Frankfurt Freewalk 2011
Episode 1
從香港的1.27到德國的1.27



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記



****************************************************************************************************



作為市場部美國區sales,歐洲單同展覽會從來唔關我事。美國就去過幾次,不過三年前2008拉斯維加斯一役已是絕響,跟住個市死晒老細放棄美國市場,再冇機會公費出國玩。今年無端端俾老細點左同個歐洲水同事去德國出show,一月底出發做到二月一,接住新年假留多三日初四至返香港。三年未坐過飛機,成世人未試過自己一個去旅行加一次逗留外國咁耐,又未去過歐洲未體驗過零下有幾凍未見過真雪,又可以避埋年,最重要係公司差唔多包晒出差加旅遊全部使費自己一蚊都唔使出,仲可以順便試真為今次出差而買的新相機E-PL2。


「叫個跟開美國水未掂過歐洲單仲要平日返工已經光明正大地唔做野的冗員去歐洲擺展覽,做完fair班客又唔係佢跟都唔知關佢咩事,擺到明就係老細曲線叫人稱地獄黑仔王的劉Sir去旅行,寧願貼埋錢送佢去外國廢事新年眼冤過年都過得唔合皮唔老黎啦!」




27/1/2011 THU 香港



劉Sir出晒名黑仔,自己衰就算仲成日邪住身邊各位朋友,次次出門必招風雨實有大鑊野發生。第一次去歐洲,立即話「二十年來最凍」、「破紀錄最寒冷冬季」、「積雪幾尺厚機場都封埋」,上年同事參展臨走幾日先遇著火山爆發滯留左大半個禮拜,今次同劉Sir一齊,點知會唔會落雪落到成個禮拜冇飛機?仲要撞正搭國泰先黎工業行動,明明一早可以搞掂又要「延期兩個星期」到新年前夕去德國果排先搞事。唔好話佢劉Sir自己都肴底啦,除左帶定大大舊錢(自己現金已經帶定一千歐羅喇,仲未計信用卡同公司數),未去過落雪地方唔知會凍成點,摷晒成間屋加周圍搵人班執左大堆衫出黎。


基本裝備即平時普通低衫褲外加tee&牛仔褲之外,打底底衫已經有三件:一件短袖,前年年底八三三漢爺大日子特登買黎湊夠一套冬季兄弟裝的雞仔嘜(下次結婚唔好揀冬天黎結唔該),再加多件長袖羊毛底衫,外面再笠足兩件長袖tee,又原來成世唔做運動的劉Sir居然會有套運動衫,牛仔褲入面有多條運動褲打底,奇在著左咁多野上身,居然仲郁得到、條面褲仲扣得到紐唔爆。


其他野全部打孖上,手襪腳襪各兩對,戴完自己條頸巾親戚借左一套reggae帽+頸巾,加多個成個頭笠晒得番塊面的頭套帽,特登帶左件長袖樽領冷衫可以反起遮埋塊面擋風。最後漢爺都知道前年結婚除左件雞仔嘜仲昆左劉Sir買左套二千蚊西裝心中有愧,主動借出大件又有帽的羽絨(卦),如果全部著晒上身Full Armor Mode除左對眼同手指頭成個人包到密,落雪落到成米厚都唔驚。




想當年去美國可以每人帶30kg,而家只俾20kg真係容乜易就過,見天氣凍衫褲唔會著到好污糟,十日行程帶得三日衫一套西裝,點知加埋立雜野已經10kg。為免回程買完手信俾各位同事爆篋過唔到磅盡量帶少野,加懶洗衫(這才是重點)仲要咁凍天氣洗完唔知等幾耐先乾得透(這是藉口),貪過癮買左包紙底褲玩玩。


格左輪價發現百佳最抵十一個半有七條,其他多數十二三蚊至得五六條。初頭聽見個名都以為好化學著幾著就爛,點知幾襟冇想像中咁易整爛,防水吸水都唔差去完廁所唔驚唔小心整到條面褲一撻撻,又唔使怕太污糟,反正日頭著完夜晚就掟落垃圾桶架啦。包裝寫1 size適合28-36寸腰朋友,未出發到德國瘋狂食腸食扒已經肥到喊的劉Sir剛剛好著得落,始終有點兒夾硬所以郁動得多的話會著到條底爆晒北斗之拳噉款,不過未試過爆到成條爛鬼左著唔到。


至於著紙底褲同布底褲有乜分別,感覺就跟衛生巾廣告的美女模特兒們時常分享一樣:

「著左都唔覺有著到咁舒服。」

會少左一點實在感,我就冇乜問題仲覺得幾舒服的,但未必人人慣。買黎試下囉,$11.5七條,玩得過啦。




由細到大點大風點乾點凍都唔搽野連唇膏都未用過,可能適應晒從來冇乜試過爆拆之類,但歐洲始終唔知咩環境帶定好。支野一睇就知唔係香港貨色啦,同事上年去德國展買返香港的手信,見到隻蜜蜂初頭以為食得用黎搽麵包(...),後來先知用黎搽手潤膚。當然冇用過,借埋俾人用都用唔晒,結果這份來自德國的手信,一年之後跟住劉Sir返鄉下...


再跟住,原封不動地返香港。不論如何橫風橫雪,都敵不過劉Sir懶郁手搽野都懶的惰性。同一出門就戴手套,入到室內必然係食同埋食,飲飽食醉去廁所時又會順便洗洗手,搽黎都晒鬼氣啦。枝野,咪留番下年再去德國時先用囉。




搭夜晚十一點十機,屋企食埋飯先慢慢執行李,八點半至落樓出發,反正搭極車到站都唔會夠十點,咁早去到機場都唔知做乜架啦。老細都知我悶,特登整左個無線modem等我可以去到邊上網上到邊 - 換句話講,廿四小時身在何處都要check公司email做野。都可謂用心良苦。


唔平架,無線上網廿八蚊一日,又唔係快我從來信唔過3G,其實幾搵笨。點知上到巴士先知on9左。原來而家連巴士都有免費Wi-Fi咁先進。去到機場又有。兼且分分鐘快過我3G。仲使乜特登幾舊水整隻USB modem買張sim卡再每日二十八咁戇居?




雖然入閘前通常食左飯,上機冇耐又有飛機餐,每次入完閘都會搵野食,因為有幾檔全港得機場禁區有出面冇。以前就話想食Murder King,而家開到旺區必有一間已經pop了不再稀罕,同講左咁多年黎機場都冇食過,因為呢間Popeyes更加難遇,結果次次入閘都係幫襯佢。舊時門口有電視播大力水手卡通,唔知太夜冇開定點,冇得睇。搞到食得唔開心。




睇睇餐牌,非常典型美式(垃圾)快餐,都係炸雞薯條三文治漢堡包,跟KFC、Murder King之類不相伯仲,亦即劉Sir至愛,加上我鍾意食炸雞之類多過食包,多間食肆中選擇上自然以Popeyes為優先。但位於機場禁區搶錢地段,價錢當然跟出面冇得比啦。




因為唔算好肚餓,只買左最低消費$52個兩件炸雞餐,如果加多舊雞已經要貴成差唔多十蚊唔多抵。個餐包一杯汽水(向來唔多鍾意飲罐裝或枝裝可樂,迷的是快&茶餐廳沖糖漿沖出黎果種淡味可樂,真犯賤)(但論整體其實我係百事迷而厭可樂,唔難發現劉Sir鍾意的連鎖快餐店都係賣百事),薯條其實即係炸薯圈拉番直十分好食,雞唔似麥記賣辣或雞記賣香料,唔多落醃料比較淡多番自然雞味。至於舊鬆餅淡茂茂又唔俾野搽,不論味道還是口感都唔夾其他,其實九唔搭八。上住網慢慢嘆,唔覺唔覺就食左五十二蚊落肚,比市區食豪多兩條。


「好貴?唔係丫!世界上一日有樣野叫做公數,我一日都唔知道乜野叫做貴!」




禁區內有大量舖頭,不過做等上機遊客生意為主通通名牌,即係你行入報紙檔發現連雜誌你都冇本識,識你都唔捨得買or買唔起,劉Sir份人咁度縮,全機場只得一間迪士尼專門店佢會有興趣。好可惜十一點就收舖,我十一點一至食完雞,冇行。其實由細到大都唔鍾意迪士尼讀小學已經覺得好低B,樂園更加一次都未去過加完全冇打算去,照計連呢間舖都唔會關劉Sir事。但係...




...自從兩年前迪士尼收購左美國最大漫畫label Marvel(一個我們Marvel Zombies非常不願發生的局面,大家都知道係迪士尼搵緊Marvel笨),點唔妥迪士尼都迫住要留意了。可是仍然興趣不足。直到迪士尼樂園出現蜘蛛俠過山車或者Iron Man主題公園,我先至會有少少動機想入去望望。




27/1/2011 THU 德國



其實事前好擔心,國泰話工業行動,會唔會搞到上唔到機、遲飛甚至唔飛?點知只遲兩個字十二點就飛,完全唔驚險刺激。好在國泰依然是最佳航空公司,飛機餐好食睇戲又即load即有,勁多戲又新香港仲未上畫都有。睇左香港一定唔會上的grindhouse之作《Machete》,點知係無刪剪版大量裸女噴血斷頭飛腸鏡頭,好在附近冇細路不過已經嚇Q死隔籬個鬼佬(可能因為噉,佢一連睇左兩次《The Experiment》)。睇飽食夠聽住王菀之《我來自火星》演唱會訓覺一流,衰坐正機翼隔籬個位,引擎聲太嘈成日紮醒。唔覺唔覺就十二個鐘機了。咦,以前搭長途機有得食杯麵同雪糕,去晒邊?


五點五落機,一路順風仲早左三個字諗住好野可以一早出去玩,點知過關慢到喊,成機幾百人得三個關員,我已經衰點知佢地個樣仲似未訓醒過我,有個仲勁一面做野一面拎住枝唔知酒定蘋果汁係噉飲,另一邊都唔係好得幾多做陣野就同隔籬個同事吹陣水,過關又問長問短,查證超慢點知行李仲慢,結果六點先出到去點早落機都冇用。我已經係好好好好好少去旅行果種人,都可以話你聽香港機場服務態度同效率其實非常好。


9up一大輪,都同張相無關。其實係想講,

「黎到法蘭克福先知,原來跳跳虎同芝麻街大家同一間label。」


講完。這就是我成世人第一次來到德國的首個印象。(...)




通常展覽主辦單位都會介紹各位朋友入住高級酒店,原因好簡單:佢地自己都要過黎做野同參展商一齊住,反正阿公數,有乜理由虧待自己先梗有幾揩揀幾揩啦。不過我公司永遠逆主流而行,租地方住首選是近展場質素只是其次,$$$當然是原因啦。而到德國展覽年年都係住民宿。


會場附近有個肥佬有房出租,次次展覽都係幫襯佢我諗十年都有,歐洲水同事一早同佢熟晒。其實幾特別,唐樓式單位有兩度門不過一梯只得一伙,一邊係主人房同客廳,另一邊有兩間房,中間廚房雙連,每邊有自己度門,成家大細住埋,一邊起身返工唔會嘈到另一邊。美國的經驗解答左有時多星唔代表一定好住環境可以十分差,五星級同三星級之別可能只是酒店內外娛樂之多寡,肥佬間屋全層單位唔大不過裝修靚,睇間房都覺舒服啦,同去到其他地方住民宿點都有feel過住酒店,所以住肥佬屋企我更加開心。




我間係單人房,同事住雙人房,不過要共用單人房一個廁所,所以成日夜媽媽訓訓下覺會有人影走過好驚。到步以黎都唔太覺凍,一出機場就上肥佬車,去到邊度只要係室內必定全日開恆暖氣,我間單人房係暖到熱果隻,著套普通衫加張薄身冷氣被就夠晒,見到劉Sir訓覺個衰樣唔會相信窗外面最熱果日都唔過九度。除左暖爐,德國同香港相反乾燥到爆亦係原因,濕度一高就會令人覺得夏天特別熱、冬天特別凍,德國溫度低時濕度亦低,實際上比香港舒服得多。




到肥佬屋企先六點半左右,冬天通常七八點先天光,同事間雙人大房有露台,出去影番張「夜」景。




時間尚早可以頹番兩個鐘先,執執行李撻一撻低就天光了,同一個景影多張天光版。大家有個超大公共後園,寬敞空間舖晒草地,朝早起身唔使落去行齋望到已經心曠神怡。




你有幾耐未見過沙池?仲要係咁大個加咁多棵樹圍住的沙池?我只見過兩次沙池,一個係細個讀幼稚園果陣,一個係由細到大的蒲點亞皆老街遊樂場,但間幼稚園開老人村入面唔夠學生我畢業之後就執笠做左末代畢業生(劉Sir累人累己的黑仔衰氣自細已顯露無遺),遊樂場個沙池亦一早變左其他野,因為「驚玩到班細路污糟晒」。係好白痴,但而家連鋼架都越來越少啦,「危險」嘛有機會整親細路家長唔鍾意架,結果而家去到公園冇野好玩,從今以後亦再冇見過沙池。估唔到黎到德國先至有。


莫講沙池,就連公園甚至最簡單一塊空地,香港都難搵。我住舊區屋企俾兩個屋村圍住,雖然每條村入面或附近都有一型公園或或遊樂場,但位置未必就到晒全屋村所有人,所以本身各有一個小後園,有遊樂場設施俾細路玩、有棋檯俾阿伯聚腳。但近年幾先拆晒全部野,後封埋場直頭唔俾人入,若非仲有公共遊樂場,各位小朋友公公婆婆連消遣休憩地方都冇。叫公共屋村,卻連最基本民生康樂設施都唔提供都保唔住。所以唔好睇個後園個沙池好似好吉好簡單,香港地就黎想搵都搵唔到。




八點幾,天光,出發過會場了。這是肥佬住果棟「番鬼佬唐樓」,我地住二樓,近鏡頭窗口放左個屋仔雀巢果間就係我間房。本身想去後園行個圈,不過冇時間,算。地方大所以每條街都有個街號,肥佬住條街係60486,個街號改得好,似呢個地區格調夠慢同古老。


對租金有興趣的話,兩間房加獨立廁所浴室包早餐,日租是100歐羅,展覽五日加埋第一日砌場六日即六舊水,見走果日係年初一私人封多廿蚊歐羅利是好頭好尾,全部加埋620x10.5 = 港紙6,510。當然要搵總可以搵到更平,但可以咁好環境兩個人住得咁舒服呢個價位算合理,同,又唔使我出錢,我只擔心住得好唔好,貴唔貴關我Q事∼




之前去美國,日子唔係長,已感受到冇車生活真係非常之唔方便,但德國唔同公共交通發達得多,車並非必須品所以唔常見。架靚車唔係肥佬的,佢架算雞架喇,呢架泊佢隔籬又型得多梗影佢啦。其實冇乜人用靚車,多數實用為主,唔鍾意花巧同大反而見好多細車、二人車,呢架算係我見過最勁的了。




良晨美景,靚呀。咦,唔對唔路喎。


「又話破紀錄冬天、世紀大雪?點解黎到想搵粒冰都冇?」


有點失望,唔單止冇雪落,仲唔夠凍。初時以為真係會凍得好勁,點知出街都唔使特別打底,同平時香港著差唔多已經夠,最多戴埋手套頸巾,帽用羽絨個頭笠就夠唔需要額外戴多頂,溫度低但唔覺好凍,問題只在於大風。關鍵是夠乾,只要冇濕氣就算天氣好熱或者好凍都易適應,體驗是勁濕香港的十七度,比乾燥德國的七度難頂得多,無論溫度幾低有幾大風,十日以黎只打過幾個乞嚏流少少鼻水已經叫好嚴重,但香港地你隨便凍一日已經病得 - 當然,除左乾,空氣乾淨亦是另一原因。單天氣同空氣質素,已夠令人想移民到歐洲。




選擇住民宿原因除左近會場同平(這是最重要),仲有佢間屋隔籬街有個難得的舊式電話亭,就係圖中過左馬路樹底下。咁緊要因為想用電話卡打長途電話一定要舊式電話亭,用卡唔會計你錢打完會俾番個銀仔你下次再用,新式機只會聽到一大輪德文,講極都唔會有英文解釋點樣用或者點解唔用得電話卡,一直講到你收線,順便食埋你個一歐羅 - 冇錯打電話最低消費係十個半港紙一次。每日最少要打一次電話返公司報到,入到會場要行兩三個字路先有同類電話機,打個電話來回已經半個幾鐘,所以呢個舊電話亭十分重要,每日去展覽時順路打晒所有電話唔使煩。有日同事打完電話返屋企之後唔記得拎番個一蚊,基本上一歐羅是衣食住行任何消費最低開支,打一次電話同你買一包薯片食一個麵包差唔多價錢,所以唔好睇少一蚊其實好好使。第二日再去,個一蚊仲係度冇人拎走,證明德國人品格修養幾高(應該話個電話亭根本冇人會用)。


打返公司報到有同事代勞,我又未至於孝順到會打電話返屋企報平安(...),每日同事打電話時,就係我周圍走觀光時間。






「香港邊條街有四圍都咁多樹?九龍塘同半山都有類似美景,不過仍差很遠。」




一向對歐洲非常有好感,唔會一味都市化而保育自然,同地方十分乾淨,親身黎到見證,街上其實好少垃圾桶同唔知點解好細,多日黎走遍大街小巷,差唔多未見過路上有垃圾。環保又做得好,垃圾桶唔多但回收桶常見,電話亭對面就有大大個專收玻璃樽同膠樽。




因為多樹多植物,四周圍都係雀仔,細細隻到大大隻都有,而且完全唔驚人,可以行街時無端端腳邊多左一兩隻雀同你一齊走。當然,咁多樹咁多雀,亦即要經常小心中頭獎了。




居民好樂意照顧班雀仔,肥佬個單位窗口就放左間木屋仔俾雀仔築巢,屋苑前園或後園又會掛幾個筒上樹放生果雀粟。就我所見,其中一個養野雀原因,係放狗時等隻狗可以玩撲雀仔運動一下(...)




前園有一堆堆炭,可能係掃完落葉砌成幾堆再燒鬼晒,一次過處理晒成地樹葉順便當埋肥料。好多野睇到,會問點解自己生活地方做唔到?




德國出名之一是建築,就算平時行條普通內街,單睇人地起樓點樣玩設計玩色調玩物料玩材質,都夠你睇大半日。途中有間唔同其他用好多木材,原來係幼稚園黎,重點是校舍只佔整個校園三分之一,其餘地方係兩間學校咁大的沙地遊樂場。點解我細個讀書冇得咁開心?




好老實講,雖說商業區,高樓大廈唔多見,好似間ING有十層樓左右已經算高。同,好多時商業建築外面會留空間做公眾廣場,唔好話同區居民或者行人啦,你入面返工做緊野時望出突,個人都舒服晒啦。



「低成本製作都可以做到咁靚美化效果咁好,香港的室外設計師們學學野。」




肥佬屋企近展館Messe Frankfurt後門,每日出門口行陣過埋天橋,兩三個字就到非常方便。後門冇乜好睇,不過前門隔好遠又唔順路,結果都冇機會影低正門插晒萬國旗個場面。但行條橋已經好多靚景。











聽同事講,上年佢地唔係住肥佬屋企,而係過左橋呢邊的獨立屋。今個展覽第一次參加,以前做開個展覽隔年一次,上年參展時肥佬兩年黎加左價幾十蚊到一舊水一晚,老細企硬只肯出舊價五六十歐羅,結果傾唔掂數到臨出發至搵到另一家,到頭來都係一舊水一晚...


因為住屋地方普遍大又近展覽館,出租民宿非常流行,上年搵到個女屋主就係兩層屋加地牢大把位所以當自己旅館,唔使搏命做野單租金已是一筆大收入。聽佢講待遇唔差,女屋主每朝一起身就會整到成檯野食,普通早餐都好似食自助餐咁豪,面皮夠厚可以袋定野食頂埋午飯。但講到住唔算好好,人地本身一家幾口住開,你生保人入佢間屋企住兩個星期總有點唔方便甚至面阻阻,同附近有間教堂每朝早五點幾開始就會一直打鐘叫你起身,包你冇覺好訓。講到尾,都係肥佬好。




好老實講,離開機場之後,直到入左會場先第一次正式見到英文。歐洲衰在除左英國之外咩國就只得咩文,想見到其他你識得的語言e.g.英文好難,所以就算你英文非常流利,黎到德國同部份歐洲國家會發現,晒九氣,人地根本當你英文冇到,入鄉隨俗講番佢地種文唔該,唔係同聲同氣廢鬼事理你。




整個Messe有幾大棟非常之大,同期有兩個展覽,我地個展只開六個展廳,地區主義作祟,作為外國參展商,自不然被編排到最細加最隔涉果個廳。對我黎講係好事黎的,即係一定唔會多野做,所以我一向支持主辦國大力扶持自己國家廠商積極排外!(...)




這就是會場後門。一路上只得我地兩個人,或者八點幾黎砌場早過頭,事實亦證明大把人係「一場黎到德國梗係玩左先啦」然後至黎展館慢慢搞,第二日開埋展先施施然整好個攤位都得。這才是到外國出差的正確心態呀。




歐洲科技強國就是強,簡單如入口登記處,仲用紙筆仲用keyboard mouse仲用barcode scanner?一早轉晒玩touch screen啦。




我想今次展覽最需要注意,係每一層展廳外面都有個Movenpick攤檔。香港食極只得Dreyer's同Haagen-Diaz兩個美國牌子(其實兩隻牌子都係同一間label,關係就好似惠康百佳實際上同一班老細一樣咁搵笨),真正的歐洲雪糕未食過,即使天寒地凍,一場黎到點都要豪食架喇。




往年去美國參展一個攤位可以複雜到兩個人砌足成日十幾個鐘都搞唔晒第二朝繼續,今次展覽自己話事立即將所有野大幅簡化,方便自己唔使驚唔使整之餘,更破紀錄地三個幾鐘就搞掂晒兩點幾收得工。既有咁多時間回程時兜一兜路去中庭參觀一下,你睇幾型幾有排場。其實亦係展廳黎,不過擺得都唔妨係細公司架喇,我們這些雜卒過黎目及目及人地有幾威水就夠。




吉左半日出黎,返房擺低野就由同事帶路出發去wet。基本上wet極不離火車總站,去邊都靠佢,同最重要內外都大把野蒲。




法蘭克福雖然話係商業區話係展覽地點,其實幾MK有點龍蛇混雜,火車站一邊近展館同其他商業建築,但一出站過馬路,對面條街就係紅燈區,夜晚非常多野睇多野玩。




紅燈區街口有間新世界大酒店,老老實實唔整中文字上去呃鬼佬係唔使死的,而家德國街頭見到無端端有幾個中文字只覺好樣衰 - 未衰晒,係用繁體字而非簡體字。同事話呢間勁野黎,十幾年前公司請好少人,連英文唔多掂的老闆娘都會出國幫手,當時做展覽幫襯過,話好掂。當然輪唔到我地小職員啦,睇門口個排場,可能入去食餐飯已經貴過我地而家每晚俾肥佬舊租金。冇得住唔緊要,見到間野,實在好想大叫:


「唔住新世界咪住麗晶囉!」





就算唔搭火車,都一定要入火車站,大堂本身就係一個商場/市集,周街都係食檔選擇多之餘價錢平民化,空間大加泊滿火車做埋觀光點都得,唔搭車當行街睇野都開心。


灰在,最當眼廣告牌,係Murder King、麥記同《青蜂俠》。真係去到邊都避唔開美國佬。




我諗對我呢類大鄉里黎講,周圍都見到雀仔係個奇景,唔止街邊就連火車站入面都勁多,因為火車軌直接由大堂伸出站外無遮無掩,雀仔們可以自由飛出飛入,入到黎同樣你有你行佢有佢跳當你冇到。而且相當醒識搵食,會成班圍住垃圾桶執野食,或者有人坐凳時走埋去,等人掟餅碎麵包餵佢。唔好話人,黎到歐洲連雀仔搵食都特別舒服呀。




行行下街,尿急,點算?當然係搵廁所啦!唔難,難是搵一個唔使錢的廁所。聽就聽得多,到自己親身黎到先發現,頂,真係好叉煩,唔少歐洲國家公眾廁所要收錢,好似火車總站想去一次廁所承惠七毫子歐羅。就算入到商場一樣,請埋個人企係廁所門口,想入去最少擺低五毫子即係港紙五個三先唔該。非常乞人憎但不得不承認是非常精明的生意手法,大家平時行街食飯都知廁所尤其女廁永遠大排長龍,根本唔愁會冇客路,就算特登請個人負責睇門口收錢,可能兩個字已經夠俾佢成個鐘人工。同有樣野不得不小九德國人:無論你去到邊,能見之告示牌路牌餐牌通通只得德文,外國人黎到根本乜都唔明(好在仲可以問人,德國人都幾好客同英文唔錯的),唯獨是廁所,大大隻英文字寫俾你睇慌死你搵唔到。擺到明屈你班遊客。


好在而家冬天,天氣好乾雖然令人不斷飲水,但同樣乾過頭飲極都唔多需要去廁所。如果係夏天就大鑊了,多多旅費都唔夠屙尿用呀。




德國以火車作為主要公共交通工具,巴士都有但極少加我到走果日都唔知邊度有車站上車,的士唔使試都想像得到一定會超貴而且唔去酒店區根本搵唔到,基本上德國咁多日去邊都係靠對腳同火車。第一次黎,見到張線路圖,煩到黐線,全個網絡包括主要走路面的電車(類似香港的輕鐵),就連市內火車都有兩種,加埋其他長途火車,十幾二十條線加好多時要轉車,我對足份地圖兩日加上錯幾次車先理解得到。


但明白清楚路線方向,上到車仲要睇實地圖提心吊膽,因為唔係架架火車/電車車廂廣播都會講英文,好多時講一大輪德文你都唔知去到邊個站,又要靠自己數住睇住先唔會落錯車。都幾叉煩。




參展商其中一項福利係展覽期間展商證可當免費車飛任你遊車河,但聽日先開展今日想搭車要自己科水。而德國的車票是咁的,一張紙仔即印即有用完即棄,雖說有回收箱,反而冇預到一個環保國家會用不太環保方法供應每日使用量極高之車票。整個網絡上至電車下至火車統一價錢同車票格式,去到邊買飛都可以周圍用幾方便,而且採自律制全部站冇閘口,大型火車車廂都有飛賣唔使趕頭趕命,趕時間上左車先買飛都得。可惜問題又係德文。


售票機有英文,不過只是非常簡單字句,睇完仲要估估下自己撞果種,同用詞十分含糊,好似你可以買單程飛兩個半,但同時又有短程車平一歐羅,點先為之短程佢又唔解釋,以防買錯飛俾人揪到(查飛查到你買錯飛或者冇買飛可以罰你四十歐羅),我每次買飛都買單程算,但兩三個字路程六七個站使你廿幾港紙,我覺得好搵笨囉。(但對唔住港鐵,我對你印象並無絲毫改善,依舊負面到貼地)同,搭左咁多日,其實我都未見過有人查飛,就算你明搭霸王車都好易搏得到,因為次次見到負責查飛班實Q,都係幾條友圍埋吹水或者煲煙。噉叫返緊工喎。同外國一向早放工,你八九點之後坐火車電車都唔使驚有人查你飛,夠衰格搭親夜晚車都唔買飛,冇人吹得你脹。


仲有幾種唔同飛,有款計時間印飛起計兩個鐘內任搭,不過我嫌麻煩只試過買全日飛$6.9,即係搭三次已經抵番晒。但事實係多數會蝕,因為黎到德國,好多時根本唔需要甚至唔想搭車,你會寧願選擇行路。






美國佬戲同game好鍾意整到火車同火車站又殘又污糟加俾人畫花晒,潛移默化下一直覺得外國火車就係龍蛇混雜,好在德國火車乾淨新淨,但一樣有塗鴉。我坐果卡算少野了,火車站入面仲多,見過火車軌幅牆有勁大勁長graffiti,火車站多人火車班次又密,都唔知班友幾時同點樣畫。




不過你唔會介意個車廂畫花點點點,因為坐位係香港火車頭等卡種獨立毛絨凳,而非地鐵果種又細又要成棚人迫餐死的長鐵凳,車尾仲有包廂俾成家人或成班朋友圍埋面對面坐。話晒車費收得咁貴,總要有番咁上下服務大家先覺得值。香港地除左特別專車相信好難開個包廂俾你,就算繁忙時間唔迫爆玻璃,各位內地旅客都會話咁快同你玩殘,或者半日唔夠已經變成垃圾房。同埋,最重要:


「如果連普通車廂都咁好服務,仲點整個頭等車卡呃你地錢?」




同事最常去的蒲點是火車站Konstablerwache,佢晚晚都過黎蒲,好簡單,因為這堿O消費區多野睇多野玩多野買多野食,晚晚濕瓶濕到唔捨得走。




Konstablerwache同火車總站只隔兩個站,唔想搭火車亦可以選擇搭電車,車費一樣三個半歐羅。火車當然快好多,不過都係鍾意搭電車,慢慢行比較舒服又可以睇街景。所以整個德國旅程,除左越區過河之類長途好少搭火車,都係電車同行路搞掂。


但搭電車又有個問題:德國馬路行車線方向跟香港相反,頭幾日未習慣時除左成日過馬路睇錯邊俾人嗶,好多時冇為意上到電車先發現「做乜會調轉行死坐錯車添!」




一砌完場同事立即猛咁催超高速過黎,就係為左火車站出口個市集,聽佢講唔係日日開同六點就收檔,今次黎到撞到市集開門十分好彩,事實的確如此,今日之後立即好似從來冇回事噉再未遇過開市。我地黎到已經五點幾,時間無多,到左冇幾耐同事已經唔見左人,大家就噉失散了。




個地方本身係個大廣場黎,火車站一出到係佔盡地利,而市集由幾十個臨時攤檔砌出黎,根本黎講就係一個街市,熟食凍肉日用品乜都有,同最重要唔貴。




走失左但要搵番對方絕對唔難,顧住砌場又趕出黎市集,大家都冇食晏晝飯,黎到市集大家第一件事一定係搵野食。作為香腸之都,去到邊都搵得到熱狗檔。




另一熱門是BBQ,睇見成塊牛扒豬扒掟落塊板怒燒,望到都想食。除左食最多人幫襯係啤酒,幾個大攤位係大牌檔式透明帆布封頂整間大房出黎,入面多人到好似開party噉,但檔檔都多人到遮住晒同行唔到埋去想影張相都難。請記住我係星期四晏晝五點幾去,已經可以好似蘭桂坊咁熱鬧。你話德國人返工幾嘆幾開心。




咁多檔,食邊檔好?同事極力推介呢位叔叔,因為


「我睇電視見過有節目訪問佢架!」


證明marketing幾緊要,唔係得佢一檔賣熱狗賣漢堡包亦唔係佢最平更加唔會係最好食,但一日唔推上報唔推上電視就唔會多人理你。熱狗兩蚊個,但我想食漢堡包貴多五毫子,一想影相個阿叔立即非常醒水地「咪住!」之後擺番個靚pose俾你影。唔好以為好平常呀,早聽過歐洲國家著重私隱,好多人同好多地方係唔鍾意俾人影相,公眾地方拎部相機出黎會有人走開或者啤住你,更試過商場入面影相俾實Q趕。去過咁多地方,唯一一次會俾人鬧影相,呢樣係我對德國唯一負評之處。




話晒一場黎到人地國家市場,食野之餘都想買幾件紀念品當手信。呢檔賣蠟燭同蠟像好靚,不過要拎番香港,入篋上到機唔溶都壓到變晒型,就算了。




另一檔買羊毛野,擺左好多張羊咩咩相,慌死你唔信真羊毛整。耳罩手套頸巾披肩成張被都有得買,不過天氣唔係好凍,自己帶過黎大堆衫褲都未著晒,又冇野幫襯。


仲有好多酒買,但我唔飲酒;又唔通買成抽冰鮮排骨咩。結果,得個食字,咩都買唔到。




見到有隻狗,梗影張相先啦。比我想像中少遇到狗香港見到仲多,不過就多品種香港搵唔到。天氣咁凍,班狗仔反而俾主人剃毛剃到好短,剃到冇晒毛見到皮都見過,呢隻黑狗算我見過最長毛的了。唔係冬天狗仔先應該留長毛咩?




雖然行左冇耐市集就閂門,冇問題因為穿過廣場市集,就是傳說中的名店街了。




基本上都係一個廣場,勁大的長方形廣場左右兩邊全部商場,中間有食肆茶座、休憩處、賣藝、雜貨攤同流動小食檔,橫街入面仲有其他餐廳、小商戶同特色店舖,行街食野遊覽攤抖一應俱全而且乜價位都有,個個人入到黎一定有著落。




叫得做名店街,最重要當然係無數名牌貨,單一條街已經有四間H&M你諗下幾恐怖,隨便入個商場都買死你,最重要單買價錢未必平香港好多,但退埋5-7%稅的話...明點解身邊好多女性朋友一知道我黎德國,反應非常雀躍啦。明點解同事每次黎親德國擺展覽,晚晚都要搭幾個站火車過黎蒲啦。




市集食完野行左陣,大家又失散了。有四間H&M咁多同事大把地方消遣,轉個頭就唔見左佢好正常。我都要濕瓶,不過為做野,要買張sim卡俾個USB modem上網用。街角就有棟電器舖,睇個款應該係出名連鎖店,相當多野睇,價錢亦同香港差唔多(但打埋稅之後應該另一個講法),只係冇預過黎到德國買電子野,搵唔到目標sim卡當觀光行個圈就算。



「見到個舖頭名,差少少直衝入去」




廣場入面除左消費買賣仲有其他活動,好似展覽期間撞正埃及革命,耐唔耐就有班埃及後生仔女/留學生霸住一片空地打晒鼓嗌口號(但其實冇人理,用中東文冇人知佢地嗌乜,圍觀的都是自己友,仲要次次行過都係得三四個充充場面,間唔中有人行過影影相叫多幾個,真灰)。另一派是賣藝,最常見拉手風琴,有時會有特別野睇,好似幾個靚仔玩吉卜賽音樂。而捐獻俾各位街頭表演者,成為今次德國行主要消費之一。




行來行去,只得一間比較大興趣。去到人地地方總鍾意行市場,所以全條名店街最吸引我其實係街口個市集(可惜閂左了),然後係橫街間Lidl。


常見超市有兩間,Rewe規模較大通常開商場入面兼做熟食快餐生意,Lidl就細得多集中賣雜貨,兩者就似百佳/惠康同華潤相比。大舖當然好行但Lidl更得我心,因為格局夠街坊,貨品較平民又比Rewe平少少,之後買野飲野食連買手信都係幫襯佢。


慘在幫襯好多日好多次,鑊鑊都感到十分痛苦,首先購物車要入閘之前俾一蚊開鎖慌死你偷左佢,有時入左閘先發現好多野買,唯有樣衰衰地走番去閘口遞個一蚊銀叫人地幫手入閘時順手幫我開架車。同乜都只有德文,買汽水買零食睇個樣大概估到買緊乜,但想買生果完全唔知點解,拎起包蘋果,面前十幾個蘋果價錢牌,你都唔知到底你手上包蘋果係邊個產地賣幾多錢。同有點古惑,標價比人地平,但其實價錢未包稅,其他地方通常列個價出黎已經計埋稅,雖然全部計晒仍然平過人,但由「平人地好多」變成「平得少少」,覺得被昆左囉。


...講咁耐,都冇理過隔籬間榮華。因為黎到德國仲食中餐,好灰喎!同埋,好老實,外國有幾多中國菜館真係中國菜黎?美國德國見過好多亞洲餐館,到頭來原來係自助餐廳,得個名裝修同點菜傳菜果班關亞洲事,吹脹。




唔消費,閒逛睇建築啦,都夠你消磨唔少時間。大量神奇構思,好似呢個商場得五層,中間一個中空玻璃旋渦穿過整個商場,外面睇可以望到個天。香港商場一定唔會有咁多野玩,玩亦一樣唔夠薑玩到咁放。


其實最想知係落大雨會點。會唔會好似山洪暴發噉中間狂噴水?係就精彩。




行晒成條名店街,見到兩個好特別現象:雖叫名店街,街上冇乜人著超級名牌,你話靚野一定有,但唔似香港同大陸人乜野牌子野勁野最緊要露眼心態,正如香港地行旺角尖咀銅鑼灣,十個女人七個拎LV,但德國行走兩星期,見過之LV只出現於舖頭櫥窗內同大陸遊客身上,冇見過當地人會拎住或者著住望一眼已經知道使你成個月人工先買得起之名牌貨。莫講名牌,我就連iPhone都接近未見過。因為人地係追求聚會文化,衣食住行返樸歸真,貴野名牌野自己唔用留俾外國人,賺完你地遊客錢中國人錢,大家出糧去食餐飯飲杯酒開開心心又一個禮拜,做幾個月儲到舊錢就走去附近其他國家旅個行。同香港地為件衫為個袋為部電話唔食飯唔去玩死慳死抵買名牌大過天是極大對比。


另一樣野係作為商業區購物區好少高樓大廈。建築物五六層已經算高,樓數過二十層之商廈數量少亦偏遠及非集中,你可以話地大,但保育相信是更大理由,因為區內最高建築物係教堂同古樓,其他尤其古建築附近之商場屋宇一定唔會起得比佢地高,全因大家明白歷史及文化之重要性。這就是優質城市規劃。好可惜香港的「優質」=「最少空間賺到最多錢/可以炒得最勁」,所以大家居住的市區已經好難搵到舊建築,因為沒有強拆就沒有新香港,同拆完再重建個地區唔會再見得到天日,畢竟香港地賺錢的不是商場,而是上蓋果幾十層寫字樓。所以香港地你唔會搵得到商場開天窗此類創意。就算建築師想玩都玩唔到啦,商場樓上起唔到高樓的話,乜創意都係假。


行完名店街食完野,時間尚早,前方突出的教堂,就係我下一個目的地。




Episode 2:1.27晚間自由行+夜攝大教堂



****************************************************************************************************



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記