《激流青春》紀念特輯之
「點解冇signal」篇



09年年三十是個特別日子。劉Sir最愛的亞視劇《激流青春》今日大結局了!(劉Sir,乜你最愛亞視劇唔係呂晶晶《東邊西邊》咩?)《激流青春》陪伴左我渡過多個禮拜六日,自從有次晏晝無聊開電視睇左第十集就係噉追。故事圍繞一班靚仔靚妹為參加音樂比賽深入瑤寨學習folk metal,但重要的是支線即係無數瘟仔瘟女,一路講音樂,點知最後大結局變左烈火戰車,吹到脹晒,而且夾埋先得十五集咁大把,追左冇耐就大結局了。冇癮。好唔開心,整番個特集紀念一下先。


你都知劉Sir一向少睇賣囡囡的劇集/節目,何解會追《激流青春》呢套青春劇,仲要係亞視製作的娘爆劇?(香港演員大陸景而唔係全內地製作已經叫做顧及本地市場了)原因都係囡囡,但絕對無聊得多:話說第十集講到一行人進入深山密林探索folk metal之秘,點知/早知遇上狂風暴雨,走失左幾件又打唔通電話,在第二節七分四十六秒,出現了令劉Sir決定一定要追晒全輯《激流青春》的金句:




「耶∼∼∼點解冇signal既?」



冇錯我會追《激流青春》全因為呢一句。唔係因為景靚(絕對唔係)。唔係因為好睇(更加唔係,不過確是有點搞笑的)。囡囡更不會是。而係為左呢一秒鐘,會追就係想知仲有冇其他更精警對白。我鍾意到cut埋出黎做電話鈴聲。



「耶∼∼∼點解冇signal既?」
電話鈴聲全球獨家下載


呢一秒仔除左成為我最新電話鈴聲,每次收電話同message都會問「點解冇signal」,有時開舖無聊果陣又係噉播,播到成層玩具舖都聽到怕。就順便送埋俾大家,當做09兩個新年的禮物啦。此案主角是她:





這位靚女叫連詩雅Shiga,上圖攝於2004漫畫節,或者見無線四葉草搞得起,《激流青春》又學搵班model做演員,反正青春劇演技有多少唔緊要,最重要有得睇嘛。而除左提供上面經典對白同電話鈴聲,佢仲唱埋劇集主題曲:





首主題曲叫《窗外》,可說是比「點解冇signal」更大的驚喜。曾幾何時電視劇主題曲係大眾金曲,八幾九幾有邊首劇集主題曲大家唔係琅琅上口,包括無線(為主)及亞視(部份)?但去到二千年後亞劇全收,無劇搵(唔識唱歌的)演員唱主題曲加粗製濫造完全失去欣賞價值,我記得最後一首因質素而非戇居或柒而留下深刻印象之主題曲係《大囍之家》陳慧珊同蘇永康合唱之《固定伴侶》,但一定要聽片尾中樂對西樂版,而唔係行貨soft rock的album版,兩個層次黎。跟住對本地劇完全失去興趣,主題曲地位亦冇以前咁重要,你睇亞視一係純音樂一係索性買流行歌手舊歌當主題曲就算就知。估唔到《激流青春》主題曲製作非常認真之餘model姐姐估佢唔到地唱得好,唔好話劇集主題曲,甚至好過好多流行歌星作品,片頭播一次、片尾播一次,一直追就係為每個禮拜六/日可以聽到首主題曲,不過大結局片尾換左首solo完全唔知做乜的電結他rock版。套劇好唔好睇呢?查實我都唔多清楚,有興趣你可以由第一集開始睇追晒再話我知。我為聽《窗外》多過為劇情。


「聽著聽著,我覺得首歌十分之GriN,都唔知係好定唔好。只有話如果首歌唔係在亞視而在無線出街,歌同人都應該紅左。」