麥樂雞之Dil住黎食篇



已經好耐冇認真食過麥當奴,真正非常有心去食,已經係一年前07暑假黑椒漢堡,跟住除左有時公司或朋友大班人食飯,另特別活動如搞展覽去食個早餐,好少特別揀食麥當奴,鬼叫佢地每隔一排就靜靜地唔出聲加價,加到而家食次麥記夠去KFC食一個餐,貴成噉,點解唔索性去食KFC?又唔爭氣喎,KFC每隔一兩個月就有新野食,麥記?而家除非有減價野,好似豬柳蛋漢堡九蚊個,我會幫襯,加只買減價野食。正價貨早餐以外唯一我仲會間唔中幫襯只有雞翼同麥樂雞。08年底聖誕節出個麻辣麥樂雞令我追左一排(真係好好食),可惜麥樂雞新花式只此一次,其餘,又係季度翻炒出新醬。


麥記寄左張外賣傳單黎我公司,而家麥樂雞出左四種新醬 - 都唔係新,沙嗲咖哩辣椒芥末之前已經出過無限次,不過沙嗲同咖哩兩隻好食,張紙話叫滿六十蚊就免費送貨,三個人叫已經夠啦,決定今日lunch趙番個,咁蹺撞著有同事朝早出街做野,回程自動請纓(夾硬)順路經過麥記買野食,加埋女同事們的捐獻,今天午飯十分豐富。




豬柳蛋漢堡$9,九件麥樂雞$16.8,公司有得claim飯錢廿三蚊,即係今餐三蚊有找。買個九件雞餐差唔多廿七蚊,貴又食唔飽我睬佢都傻!女同事甲醒左份餐蛋治,其實女同事乙今日叫左清湯蘿蔔牛腩,佢只食蘿蔔即係牛腩我包晒啦,時間關係出鏡前已經擦晒了。




幫我買個同事自己叫左個餐,而家麥記原來薯條仲有粉送。除左(超)貴,其中一個而家少食麥記理由係唔鍾意食薯條,試過一次Murder King,從此唔再需要食麥記薯條,除非唔使錢(呵呵呵)。同事唔要包粉,我偷佢d薯條食時,順便撻埋撈麥樂雞,型到爆。




撈左四川辣椒粉的麥樂雞掂唔掂呢?起初諗住會似麻辣麥樂雞,點知撈極冇分別。薯條本身淡味,落左粉好食幾倍,雖然雞係白肉唔算濃味,已經遮晒辣椒粉陣味,入口唔太覺,或者用半包甚至成包撈一舊雞先醃得夠味。而麥樂雞醬,梗要我最鍾意的咖哩味啦!




因為係噉俾同事搶,一包醬未用完已經食晒,剩番d醬唔好晒,仲有件餐蛋治,成劈醬整落去做咖哩餐蛋治。好好食。不過醬太少唔夠辣。我班同事見到我咁無聊都頂唔順。




一如以往,每次出新醬都有卡派,集齊四張就可以全年每日免費食一盒麥樂雞送足三百六十五盒。當然,邊有咁著數?仲要麥記喎,會咁好死?總有一張你永遠唔搵到,可能全香港只得十張唔夠,到成個活動玩完果日仲責緊倉。本來有興趣追追,問題係今次連規則都改埋:以前買盒麥樂雞,不論六件九件都有得送一張,果時日日晚飯都係麥樂雞。而家話為要共抗海嘯,你要幫襯買一個麥樂雞餐先有得拎一張。搵笨柒。


兩年前俾麥記呃過我一次等我食左廿幾餐麥樂雞,今次我唔會再做傻仔!」




嘈還嘈,唉,晚飯都係忍唔到食多盒。晏晝食剩盒咖哩醬,夜晚拎埋另外兩隻想研究之新/舊口味,新加坡蜜糖芥末以前試過,OK但唔算好鍾意。沙嗲同咖哩還是無敵,食多左我鍾意沙嗲多過咖哩,不過辣椒就嫌冇乜味,好似點雞翼隻泰式辣醬仲辣喎。今次似乎繼續攻沙嗲咖哩。


「冇錯,係噉鬧,鬧完又係照俾錢,劉Sir就係咁犯賤,無論麥記點賤格,一出麥樂雞同黑椒漢堡,條友必定死死地氣。你明點解今次個宣傳口號叫『屌住黎食』啦。」