是咁的，下年農曆新年公司出trip：
1月18號晚或19號晚上機飛倫敦，留三至五日
1月25倫敦上機飛德國，1月26-31法蘭克福擺fair
2月1起留德國，2月3日法蘭克福朝早上機返香港
而家計劃緊fair前後行程，公司只包香港＞倫敦同法蘭克福＞香港來回兩程機票及食宿，所以預算想盡量低；自己唔shopping唔消費唔食貴野，慣左周圍亂咁行探險搵野睇，鍾意睇動物，同想睇演唱會／音樂會。希望各位旅行專家巴打絲打幫忙俾俾意見：
有冇網站可以搵到兩個國家平酒店？因為好多公司文件同電腦跟身，住民宿怕唔夠安全
英國倫敦同附近地區，有咩觀光點介紹？如果只留三日，有乜地方必去？同成世人第一次去英國，有咩野要注意
展覽完有兩日留德國，其中一日想去其他城市玩即日來回，心水是科隆，有冇其他好介紹？
臨上機一日會留法蘭克福買手信同執行李，想問法蘭克福有乜野觀光點？同有乜特色地方手信，上年買左半篋腸仔，今年再買驚俾人鬧
倫敦同法蘭克福邊頭多名牌貨買？同價錢跟香港比相差大唔大，過關報稅／免稅會唔會好麻煩
今天劉Sir一回到公司，開電腦就是打不著個芒，折騰大半個小時發現，原來火牛燒了。立即換了一隻，不到幾個小時後，「撲」的一響，又燒了，只差未爆炸，證明這火牛不是中國的。
成世人用電器從未試過燒火牛，今日一燒就兩隻，相信世上冇人有劉Sir咁（＿＿＿＿）。
二十幾年前八十年代中，還在讀幼稚園，家住九龍城舊樓，因為啟德機場的高空管制，大廈樓層不多普遍只有樓梯，偏偏住在最頂，一上一落要走十幾層。後來家中條件轉好，搬到土瓜灣原作公務員宿舍的唐樓，雖然依舊沒有升降機，最少每日少走了十層梯級。
那年父擔教職、母當護士，全家月入二萬多，買樓賣樓每尺可以用百元計算，一個二手九百尺唐樓單位售三十餘萬，負擔不算很重，而且真正實用面積達九成。聽似豪華卻跟真正豪宅生活相距極遠 － 當時的豪宅，是指一幢多層、層均面積過千尺的獨立樓房。
那個時候，本土電視劇典型角色是小學畢業做勞工、做侍應，中學畢業做文員，大學畢業做經理，縱有高低共通點是願意努力一定有回報，社會間投機與奢侈風氣不盛，賺錢不多也足夠生活活得開心，是當時社會寫照。能者多勞、多勞多得，是謂之「《獅子山下》精神」也。
那個時候，無線台慶的大獎，常見豪華洋樓、洋房。
那個時候，在街邊還找得著自食其力的流動小販，一串魚蛋七粒，能賣一元不到。
那個時候，不用二十元，已可享受一頓豐富滋味小菜。
八十年代末至回歸前，乃香港魚翅撈飯黃金歲月，起薪高、加薪密、分紅豐厚、廣告呼籲大家「搵工跳槽」，每晚新聞報導例見某屋苑開售前夕出現通宵排隊黨人龍，早上買個單位下午放售已賺個十幾萬，樓市四五千元一尺屢創新高。
那個時候，小屋換大屋這回事，小學和中學身邊很多同學的家都經歷過，就跟舉家移民美加一樣普遍。
那個時候，手持大學學位證書等同已踏上光輝大道，初出茅廬即月入二三萬屬平常事。
那個時候，當紅電視劇是《大時代》，大奇跡日在說九七前，泡末爆破在說九七後，因其警世與遠見而成經典。
那個時候，無線台慶還在送豪華住宅單位。
那個時候，麥當奴吃一個套餐才十五六元，比茶餐廳客飯更便宜。
1997，不堪回首，數年間八萬五、金融風暴、沙士連番天災人禍，居住成本最少由九七前那不投機買不起的高位，回落到看似平常打工仔也有機會置業的合理水平。可惜客觀環境和昏庸政府將工資打到更低點。
那個時候，香港樓價曾經大幅爬升，中國則物價低兼具兌換率優勢，無線台慶大獎改送內地住宅，標誌香港樓宇價值與地位已非一般矜貴。
那個時候，《大時代》推出非正式續集《世紀之戰》繼續批判投機炒賣，百集史詩長劇《創世紀》控訴地產商聯同炒家破壞樓房與經濟生態，時至今日仍廣獲共鳴。
二千年代中，離開大學投身社會，折騰一番才找到份月薪一萬出頭的工作，賺的比老爸老媽二十幾年前的更少，身邊一些文憑／中七／中五生月入還要更高。枉當年相信TVB「大學畢業必做經理」的童話。魚蛋卻已從五毛錢漲價到五元且七粒減至五粒；麥當奴由窮民救星變身加價先鋒；茶餐廳客飯向三十元進發。每天上班都會經過九龍城地產代理，才知道原來這個老舊市區，隨便一個普通小型單位已動輒要過百萬。
那個時候，身邊人的故事跟小時候相反：兒時讀書的同學家中都是小屋搬大屋，長大了卻大屋搬回小屋，甚至有屋住變成租屋住，甚至住房子變成住房間。
那個時候，無線台慶已連大陸樓房都不送，只餘房車、現金獎和「名貴禮品總值XXX元」。
那個時候，無線的自拍劇卻跟台慶景況還有現實大不同，劇中的香港四處都是專業人士和高收入人士貧窮彷彿不存在，就算是最窮困、生活最艱苦的一戶人家，住的單位都比你大。大很多。
再過五六年2011，有地產商向這住了過四分一世紀的唐樓打主意，開始四處尋覓新居，驚覺樓價現已不止過百萬，而是以百萬計。一個較新市區四五百尺單位，僅得六成實用面積裝修用料亦普通，尺價卻可過萬，管理費也高昂得嚇人。「因為這是豪宅。」不知何時開始香港沒有了住宅只餘豪宅，就連九龍城和比鄰舊區，老殘得可以的地方都插秧式建了幾幢「豪宅」，但小且不實、危樓地盤包圍，在內在外還不如自己的四十年唐樓，跟舊時的豪宅相比更垃圾不如，卻能叫價千萬。遠一點地區二手舊樓尺價也高居六千不下。租亦沒有意思，現在租樓跟供樓使費相差無幾，而且可預期不出一兩年就會因樓市再旺而被瘋狂加租或趕走。
走訪幾個區，不經不覺間八達通又需要增值，因為幾年來交通費已增加三分一。想坐下吃個飯細讀樓盤資料，不捨得進麥記，一個吃不飽套餐賣三十多塊錢，兒時窮人才吃麥當奴，現在尋常百姓吃不起。旺區茶記午晚餐最低消費也差不多四十元。從前能吃頓小菜的價錢，現在只夠買個小小盅頭飯。吃時問問一些近年置業的朋友，個個身家帳面增加百萬以上，全賴樓價每年上升超過兩成帶契，回看自己，畢業這麼多年，薪工加幅還不到10%。
相信船到橋頭自然正，三十有一也非年輕，加上唐樓被收購只是時間問題，好歹也計劃一下。三百萬買個四百尺單位，假設付得起三成首期，餘下七成做三十年按揭，每月要還銀行八千元，加上生活雜費、管理費、水電煤差餉、大小稅項，剛好跟月入打個和。假使沒有生活沒有娛樂、沒有意外沒有病痛、沒有經濟逆境沒有通貨膨脹，到六十歲就能回復自由身。如此生活實在非人，埋頭再計算其他出路，但不果，不認命，再計算．．．
那個時候，無線只會拍超現實喜劇：社會中地產霸權財閥當道，電視機內卻沒有不公義；政府執法偏頗，電視機內司法卻永遠公正；香港貧富懸殊稱冠全球，電視機內卻找不著真正窮人；民眾生活百上加斤，電視機內卻只存在奢華與安穩；現在要維生根本不能如以前單靠打工必須投機犯險方可生財，電視機內節目主持和無能官僚卻仍高呼大家共同努力工作默默耕耘。無線的世界，比央視的還要美好。
那個時候，更需要《大時代》和《創世紀》，但已不會再出現這些寫實符合時局的批判劇，見單將舊劇片段上傳至網絡暗批社會現況也遭電視台即時禁制，TVB已無膽量再開拍同類劇集。取代之是《安樂蝸》之類節目，將蝸居合理化。
惘然回家，見到家母也在煩惱。賣了樓補過地價再付其他費用，七除八扣餘三百多萬，作為公務員退休後有百萬退休金，再算長俸和積蓄，合起來可能有五至六百萬。這等同於新屋苑一個六百來尺單位的價值，內裡還要不及四十年唐樓寬敞堅固，實用面積也要打個七折，管理費等亦必高出不少，絕對物無所值，但要找間夠全家人住得舒適、居住質素和條件不輸現在的新屋，必然踏進千萬元領域。為人父母當然會顧及子女將來，想過每人分一筆錢當首期，然後各自瑟縮在自己的四百尺單位，但這樣各散東西非大家所願，而且工資低微，一個人生活根本不可能應付所有開支。不禁唏噓勞碌幾十年，老來只想最少讓一家人繼續過跟現在一樣的生活，卻窮一生財富也辦不到。
這個時候，母親勸說快點找個女朋友 － 不，應是快娶個老婆，是時候成家立室反為次要，更重要找多個人一同供樓，可減輕自己和她的負擔。香港社會風氣的商業世利，逼迫得連單純的愛情也容不下。更悲哀是，我認同。
電視在播放《鏗鏘集》的收樓專題特輯，「經過多年調查，警方表示無證據顯示收樓期間發生事故與收樓集團有關。」遙望九龍城，見童年舊居外牆已高掛田生血紅幡，積極進取的專業團隊開始向我家方向進發，前有李家不懷好意待君獻金，後有玄牛來勢洶洶步步進迫，未能攻更無法守。這個時候，想到自己父母回歸前尚有公屋居屋保障，才讓我們這一代很多人如今有個家可歸，但到自己長大需要特區政府卻拒絕合理供應，數量少要求嚴格輪候時間長，更要忍受新移民遲來先上岸；想到一位月入過二萬的舊同學，離家自己一個人住，也應付不到樓價只能租個房間，每年搬屋一趟居無定所；想到身邊有朋友拍拖多年已到談婚論嫁階段，卻因為沒錢置業結果婚都結不成。不禁仰天嗟嘆。
「百萬富翁」跟「《獅子山下》精神」一樣，早成了無意義的歷史詞彙甚至笑話。以前一百萬可以買一幢的豪宅，現在只夠付一間所謂「豪宅」的發水窗臺，而高官商賈常叫「X0後」標籤世代學習並延續「《獅子山下》精神」，但發言的官賈們無不不是靠巧取豪奪利益輸送發財，跟其所提倡的努力耕耘背道而馳。最荒謬是在後九七香港仍秉承「《獅子山下》精神」工作生活的話，早已連獅子山下最殘舊最簡陋的民居都住不起。
今日同大家講講一個細個好鍾意打的電話號碼18503。而家仍然唔多相信琴日真係八號風球、真係放左日假，上次掛八號歷史古遠到我以為香港一早冇左呢個風球。
話說琴日九點先起身，大鑊遲大到唔八號波就我射波，立即打去18503睇睇有冇行：
「電訊盈科話你知，三號強風訊號現正懸掛。」
出面明明橫風橫雨，唔信邪打多兩次，三次都話三號。死死地氣起身換衫擦牙，綁緊鞋帶果陣老母房行出黎，恥笑：
「八號風球喎，返咩工呀傻仔？」
立即開電視，真係八號，差少少就柒左。證明經常遲起身返工是個好習慣。天文台早跟18503一樣下場被收歸李氏旗下，點解口徑會不一致？係咪琴晚+X哥見外圍大市仆直，臨時臨急決定熄力場引風入港停市，通知唔切公關部？還是之前一日宣佈參選特首的唐英年，到凌晨先成功爭取得到+X哥送個八號俾佢做勢助選，話俾廣大市民聽曾班子派$6000成年都派唔到，佢講句要做特首立即有日假期俾你地更實際，撐佢上位第時仲唔日日打風打到車毀人亡？
近年pop metal／女聲metal當中，Amaranthe 2009隻demo/EP最滿意加最有驚喜，勁到俾Kamelot請左去做佢地2010歐美tour opening，搞到大碟延期到2011先出，全年最期待作結果變成全年最失望作，有機會再講講，我只擔心謝安琪隻新碟會仲失望過佢。今次係share呢個過癮tribute。
作為metal友，Youtube有兩個channel不得不關注，Andy Rehfeldt將metal歌改頭換面成其他風格玩到出神入化之餘多產仲要首首佳品是個天才，synth000（個名真求祈）相反出歌唔密亦唔係全部玩得好，不過特色是a cappella cover metal而且難得可以柒過Van Canto。Amaranthe唔算出名亦較新，冇諗過會有人cover，仲要係由佢玩成9up版。
本來2009 demo EP冇邊首歌唔掂，但重錄再加幾首歌變成第一張大碟，結果得番兩首新歌得，第一首係慢歌《Amaranthine》，呢種'80 power ballad真係冇得輸，如果作為pop band連power ballad都玩唔掂真係收得皮。最重要係除左首歌可以，MV／囡好睇，雖則跳同扭得好鬼造作（所以我鍾意）。
另一首《Call Out My Name》，係個人其中一首single of the year，講完都怕俾人／俾專家笑，因為跳舞歌黎，極其量dance metal囉。
Amaranthe本來好有機會成為近年modern metal最佳新人，點知新歌除左上面兩首冇乜可取，原來十分無敵的舊歌新錄音新編曲之後，出到黎居然衰過demo。你明我幾灰啦，玩metal但全碟最吸引幾首都唔係metal，就算作為pop metal band都死得啦。
作為Mortal Kombat大fans，呢個top 10 list選材真係無敵，系統初幾集的確唔夠完善，但誠意同創意搭救，好似#6同#7傳媒同fans亂吹水吹到成真，係Mortal Kombat一大得民心之舉，因為美國佬心態夠癲夠喪，先特別多呢類與民同樂過癮野發生。所以打機一向鍾意玩鬼佬game多，日本仔太正經。
唔知Steve Jobs係咪自己都頂唔順蘋果搵笨柒，公司一公佈完今年只會出iPhone4S吹水吹到恆一恆的五代你地呢幾個月俾錢買完4S我先出你吹咩就（激）死左。從來唔追科技野佢死定唔死唔多關我事，但見單野咁潮冇理由唔出黎抽抽水，就等我分享幾個旁觀者的故事。利申：
1. 成世人唯一一樣蘋果產品係親戚公司抽獎抽到再轉送俾我的30G iPod，感想係好煩好難用。一日iXXX一定要用iTune駁電腦，一日我都唔會再用蘋果任何新產品。之後可能你會覺得我對蘋果出品存偏見，的確iTune令我對佢地印象好差。
2. 亦唔係Android友，手機仲係四年前Motorola明A1600，但黎緊應該會加入Android行列 － 容後再談，這也是一個故事。
3. 唔太多機會用新世代手機，綜合個人不多之接觸體驗，iPhone冇想像中／宣傳中／人云亦云咁方便咁好用；而Android，2.X之前版本不論軟件還是硬件，當冇出現過算啦。
4. 蘋果產品設計同手工確實冇多少公司及得上。
5. 不論你妥唔妥蘋果、不論你鍾唔鍾意蘋果產品，都要承認產品開發同公司管理兩個範疇，Steve Jobs是個無能敵神級人物。
想當年出第一代明A1200時蘋果亦出第一代iPhone，當時smartphone發展未成熟，手頭上部明用緊（其實果陣已經開始過時的）Linux已經叫先進，Android電話過多一兩年先出現，iPhone頭兩代亦唔算多人理，但一到3G立即爆出大比數拋離所有對手。從來著重實多於華，正如經過五年今時今日仲用全香港可能得我會用的Moto明，正因其商業用機定位系統同功能配合到工作需要，唔止係普通一部手機，而係返工做野一樣非常幫到我手的工具，而且蘋果產品唔算平，所以三代同四代點多人用講到點樣好用點樣多apps，一直冇諗過轉，都係果句iTune一樣已是死罪。而家更加唔會轉會蘋果，因為已經多到好恐怖，幾年間由成條街冇乜人用變成冇乜人唔用，行入茶餐廳每張檯平均起碼有一部iPhone，試過一次見客食飯，大家坐低對方四個人拎電話出黎全部都係iPhone，此情此景好比從前Nokia稱霸時，分別係果陣全條街Nokia而你唔用冇問題河水不犯井水，但而家人拎iPhone你拎唔出會俾人笑。當連我呢類向來唔理潮流、買物用物只求實際人士都頂唔順，何想而知所謂生活品味如何淪落至俗不可耐，套個（地下）音樂界別的詮釋：
「pop晒。仲要係pop到仆街果隻。」
進而形成iPhone另一大特色：顛覆左電話用法。蘋果官方舖開之前，炒iPhone iPad致富故事大家聽過唔少，至目前iPhone對我唯一吸引力仍然係保值，用一段（長）時間再賣出去仲可以收得番六七成而且一定有人接貨，其他牌子機開盒已跌一成，一年後或者跌淨一成價值，仲要有低價都未必有市。如此保值同投資潛力的確冇多少科技產物做到，亦未見過有其他電話係用黎炒賣賺錢多過用黎打。另一個用法，講講一趟搭小巴經歷就解釋晒：蘋果流動產品一向靠白色食糊，而電話等到第四代先出，半年前終於有白色版。出左白色iPhone4兩三日之後，朝早搭小巴返工時有個女仔上車坐我隔籬，坐低第一件事拎部白色iPhone出黎掃兩掃，然後機背向上放係一個顯眼位置，成程車就係噉樣俾人睇佢部iPhone個白色機背。
部A1600玩左三年幾，跌過無數次仲用得但開始神神地，黎緊換機依然會係Motorola，差在揀新一代明A1680還是Defy(+)，後者成數應該較大因為Defy+價錢睇黎可以接受，同三防正合著重實用的我心意。密切關注Defy+幾時上市期間，睇多左蘋果press同市場新聞。雖然而家數據係Android市佔超越蘋果，但要靠接近全部大廠一齊用幾百部機幾年時間，先超越得到一間每年只出唔超過兩部機之獨立生產商，蘋果依然係大贏家，不過感覺佢地都有點盡，以前每代新產品就算唔用齋睇規格都會覺得好勁好創新，但今年係年頭點名恥笑其他公司／Android點樣抄iOS當成自己新野，到年中公開iOS5，搬出黎之「新功能」人地初代Android已經用緊。然後Steve Jobs接受訪問，鬧其他廠明明本身唔係做電話做smartphone，見蘋果做電話做大左就踩入黎一齊爭點衰點賤，但回到'00中，本身唔係做電話做smartphone的蘋果開始踩過界做電話，包括當時其他大廠包括蘋果自己，冇人出過聲。天才一回事，有時睇番Steve Jobs講野做野，學唐狗話齋，相當有娛樂性。
剛公佈之4S唯一真正新功能係聲控，但好老實我第一部smartphone即係同iPhone 1同代之明已經有得玩，click個掣講個指令，可以用到成部電話所有預設功能，而且用英文同廣東話都得加辨識度相當高。不過，有冇用先？我承認成班女面前拎部電話出黎「相機mode！影相！」係幾型，但你會唔會搭緊地鐵果陣對住部電話講「撥號：老豆。發短訊：老母」？再者多數功能手控幾步做得到，何必聲控？我又唔渣車。所以新買部機貪得意玩幾次之後再冇用過聲控。除非1) 4S個聲控功能可以用廣東話，加有更高辨識度 2) 有聽寫王功能可以當中文輸入法，否則真係唔明有幾創新特別。睇今年蘋果press就知道，無論Steve Jobs身在何方，蘋果都不得不開始向下，但對佢地仍有期望，我一直覺得蘋果技術比其他廠高出唔少，佢地要做到可以用廣東話聲控甚至輸入中文未必好難，如果今次冇，可能因為要留番俾5S啦。
而更具娛樂性係上forum睇蘋果Android兩派互批。換機必然選擇是Android，一日有iTune一日唔用iXXX之外須知Linux同Android本身甚有淵源，四年黎兩部明我玩得最開心就係customization，但老實Android衰在太雜太多廠，咁多間名廠唔用偏偏揀名聲唔算好之偏門Motorola，正因佢地方針係求實用而集中開發幾個特殊功能型號，其他廠相反靠賣款差唔多個個禮拜都有新機出見到都冇興趣。Android殼差無幾餡加少少改少少又出新向來俾好多蘋果迷寸爆，Samsung一個型號要出幾個改版升級版先肯放手，HTC多到連內部人員自己都唔認得邊部打邊部的機海，而家輪到Motorola Defy，出左一年唔夠換粒CPU換舊電就話Plus版，連個殼都要同原版一模一樣，分分鐘純粹倉底貨翻新再賣。點知呢頭鬧完，果頭蘋果iPhone4S一樣食舊殼配少少新餡條水。咦，原來我買Defy+都柒唔晒，有成班4S陪我。
繼Jerry C震驚天下之《Canon Rock》（當年為左首歌買左佢隻EP，不過隻EP得兩首歌而得呢首好聽，仲要CD版冇Youtube版咁放咁多火花先灰），呢個二胡加電結他版《賽馬》有潛力成為下個網絡潮物，但亦只限於「有潛力」，玩中樂唔玩古典唔係最大原因，罪過是玩果個係毒男而唔係台妹，睇過林逸欣一條女玩三樣樂器即時紅遍全球立即明白啦。
「《Canon Rock》係寶島，《搖滾賽馬》又係寶島，林逸欣都係寶島。一定要移民過台灣。」
琴日睇左個台灣人玩rock版《賽馬》，今日睇大班鬼用classical rock cover。諗起一早唔知去左邊的女子十二樂坊，點解中國自己反而冇乜人做呢種contemporary fusion又或做得好？又諗起近來相當活躍但好耐冇睇過的DSC，有新歌未？
點解dubstep兩三年間會潮得咁犀利？鍾意dubstep因為等同於電子音樂界heavy metal，《變形金剛3》trailer就是個完美解釋，如果套戲有個dubstep trailer一半已經好好。
早前Nokia搞左個招牌鈴聲舊瓶新酒大賽，頭六名有得download，dubstep remix第一次聽已經覺得好正，一首dubstep好歌必須全部齊備贏就預左，只係鬥得贏另外五個正路之選拎冠軍就有點意外，可見而家dubstep幾咁潮。
不過最正其實未輪到佢，http://nokiatune.audiodraft.com有得聽全部參賽作品，中樂版正但更不能錯過《The Great Marvelous》，保證笑到仆街我Motohead都拎左黎做鈴聲。其實全個比賽呢首由頭帶到尾大比數拋離其他人，點知身為大熱最後六甲不入，唔知評審準則係乜但一定唔包括柒非常可惜，最少肯俾首dubstep做冠軍咁突破好過冇啦。
既dubstep本身咁metal，見Korn同Iwrestleabearonce都要玩埋一份、日本美國開始出現「metalstep」就知入侵metal界是大趨勢，向來敏感的metal界立即興起後面大大隻字"FUCK DUBSTEP" band tee。見風駛里，立即買番件四圍同人講「我係tr00 metal友我唔聽dubstep」先。
Immolation唔聲唔聲出左隻免費新EP，難怪咁低調，因為歌同錄音都有點失水準，的確一分錢一分貨。好懷念之前《Hope & Horror》，呢隻先話到俾人聽點解Immolation天下無雙的真正無敵death metal EP呀。
日前收到一位大學生邀請幫忙製作一份探討重金屬文化報告，議題之一是「重金屬音樂對年輕一代的影響」。想到一些地下像King Ly Chee和門生對香港新一代的啟發不止於音樂，也令當中一部份人關心社會，雖然重金屬跟hardcore不同，但見投身社會運動人士及網絡社評博客當中不少為獨立音樂界別中人，當中亦必有因重金屬的音樂、歌詞、環境與風氣帶動而開始關注政局時事甚至或加入社會運動，如你是一份子，希望可以分享「從地下音樂到社會現實」的個人見聞心聲。有意者請聯絡我劉Sir，先為該位大學同學答謝。
繼上次開午餐肉開到一年後成為高登頭條，早排又有個午餐肉thread有人提起篇舊blog文，隨便一個thread出一出link，一晚間個blog人流又增加200%多左23XX人次。再一次證明，香港地想宣傳、想上位，靠高登實冇死。
而家高登每逢有人開post講午餐肉，必會見到兩篇引文：陶傑抽水文，同劉Sir潮文。估唔到劉Sir都有同陶傑平行平坐的一日。