放工經女人街，KFC樓下個街角有班友分緊VIIV tee，唔知係咪高登巴打s？

跟住上左KFC叫雞，唔知係咪睇左呢個thread關係，硬係覺得舊雞形狀賣相顏色味道通通都怪。

今日係The International Day of Slayer（no not 端午節），自當遵從無為教條。上網睇到篇搞野博文，同時跟兩個最愛metal blog、Global Domination同Invisible Oranges有關，加上過癮不得不推介，兩班友最愛將metal cliche推至極致。

任TRHK掌櫃多年、forum閱人無數，見過實在太多專家。所以我有信心，這測試如此簡單，香港恆河沙數的(black) metal專家們應可不費吹灰之力秒殺之。

每日煲爆最少一隻flash game，已經成為我生活一部份，每晚我一定要玩完一隻我覺得好正或好戇居的flash game先肯訓覺。好game廢game正game爛game見識唔少，但最極致最精華，一定係呢隻Don't Shoot the Puppy。要落手玩過先能明白精髓所在。每次玩仲可以係噉爆笑，因為實在太無聊。

不過越係無聊，先越多人追捧。有人無聊到直頭自己拍左個「攻略」擺上YouTube。

但係無聊game唔等同於廢game。真正玩黎都晒九氣的flash game，我都玩過唔少，極品中的極品．．．有機會同大家一齊分享，呵。

玩得多flash game要求提高左，好難遇到真正覺得好同一玩再玩的正game，呢隻算難得。你做AI hack晒全關所有電腦就過關，過程可以選擇殺唔殺人，有25種特殊能力你用，升級之後敵人都會一齊強化，變化夠多彈性夠高，同我鍾意果種卡通公仔風格。為左睇晒兩個結局一晚連爆兩次，殺人定唔殺人結局分別只是黑色恐怖還是白色恐怖你都是仆街一條，不過我份人向來冇乜耐性，所以往往玩一陣就會等唔切班人讓路俾我hack機猛咁殺人，brutal death才是王道。

上星期個blastbeat競猜遊戲，Invisible Oranges出左答案喇：

十條題目，估中樂隊1分、專輯出處1分、歌名2分。拎唔到666分唔好見我。

星期六夜晚去KFC食撞到一家，個阿媽睇落好後生仲好省鏡化妝又化得靚，著住條低V連身短裙，左邊身上臂同小腿都紋左朵花，靚過而家好多o靚模，似真係做model。

食完落街，見到有兩兄弟當街除褲想屙尿，佢地老豆老母拎左個水樽俾佢地當廁所，成條J隊落個樽度屙一個屙完到一個。

好喇，閒話講完喇，其實我係黎留名既。

難得有band夾，特別買番隻《繼續革命》日煲夜煲《長城》執歌。李氏力場發動八號波掛唔成，今朝如常搭小巴返工，有個有樣有身材的靚女OL坐隔籬，聽緊《長城》時八卦望望，原來靚女用電話睇緊Beyond 91年場生命接觸演唱會，想黐埋去一齊睇但佢身材咁好廢事眼望望俾人當變態佬啦。唔係見到佢戴住隻戒指仲要鑲左勁大粒石，這種美貌與智慧並重的美女要搭搭訕呀。

日前提到淘寶淘返黎果隊大陸thrash metal band懲罰者The Punisher，聽大陸朋友講佢地近況，上年年底成團、今年三月出EP，而家六月已經話隊band差唔多散。佢地級數算中國二線頭一線尾，而家可能一年未夠就玩完，中國（當然包括香港）夾band的朋友真苦命。月頭隻碟入手時已開始著手寫，以劉Sir之惰性正常要過多幾個月先有機會寫好，但聽到佢地而家噉景況立即拿拿臨趕起篇稿，我真係擔心再拖落去會變obituary。

「千祈唔好散呀。《人民公僕》首歌真係無能敵呀。」

主要當然係幫隊band寫啦。大陸band好少寫更加少認真以內地為目標地寫文章，發現好有難度，要特登寫兩個版，一個係「國際版」即係上面，然後大執成「中國版」，除左將英文術語譯番做中文、港式用字改番成中式，唔知內容會唔會出事先大件事。因為唔熟悉國情，好多野有冇踩界好難界定，有少少覺得不安唔夠和諧都delete左算，仲煩過重新寫過篇。唔好講我啦，而家幫緊激流中國Thrash China手（所以會咁留意中國thrash），班大陸朋友好勁成日搵到外國band寫碟評做訪問，但thrash metal本身成日講社會，好多時睇番樂隊答案，有時可能只係字眼上偏激少少同時局無關，上網公開一樣俾人警告，亦試過唔用中文只出英文一樣搏唔到慒照俾人搞，而家審查真係好勁，想登的話一係勁洗一係勁改，即使習以為常佢地都好無奈。而家連正正經經講音樂都要就住就住咁多顧慮，你話大陸幾煩幾灰。

香港基本上冇乜人仲掛住Beyond。大陸完全唔同，一到六月中，全部接駁鈴聲由平時娘到爆的民歌or流行野變晒Beyond舊歌，日日打電話上工廠都聽到黃家駒把聲。立即令平時起身斟杯水都懶的劉Sir勤力工作。香港應該一早學習啦。

每年年中睇報紙，都見到台灣中學大學畢業禮，班校長同先生點樣喪玩點樣扮野，今年代表作係校長扮Iron Man仲要扮到好鬼似。唔明點解台灣可以咁癲，可能日本文化淵源始終有影響。香港就算啦，叫佢地噉玩先生校長第一件事當你傻，唔當你黐線都唔會有教職員同你癲，敢玩都會俾人e.g.白痴家長投訴，如果未俾董事先一步炒左的話。大陸更加唔使講啦，畢業禮攬住隻公仔影相都俾人小。活在香港真係好苦悶。

作為一個獨立音樂／metal界（前）工作者，見到呢個情況，非常唏噓。你話djent之類差唔多整個scene免費任人download任人forward任人聽，我理解。但見到而家唔少老band同樣，唔止新碟未出已提供完整試聽，連舊碟都全部免費大贈送，同可以預期大把人當老奉旨，「你唔送俾我我都一早download晒啦。」近來又常睇band interview，讀到好多band夾左十幾年、出左好多碟，因為已經冇人再買碟連最基本錄音成本都彌補唔到，tour成本高又易被剝削，大部份已打定輸數短期內會散band。真係好灰。

有見樂隊網站大多已是donate button當道甚至取代buy，是個樂迷精神轉變之象徵。以前fans鍾意一隊band，會自動自覺俾錢支持，唔買碟都買衫買周邊，每件商品七除八扣到樂隊手可能只餘幾蚊幾毫，但意義重於金錢；而家新band好舊band好，將所有作品免費放上網再叫大家踴躍捐輸，就好似調番轉要去求fans支持佢地，因為事實上從網上開始之新一代的確冇左果份獨立樂迷心態，既然碟都唔會買要俾錢買「應該免費」的mp3只有更難，去唔到佢地地頭表演就更加賺唔到佢錢，就算肯俾錢亦抱老細態度、唔係「我支持你」而係「我打救你」實屬普遍。好多資深地下樂隊冇乜心機再長夾落去，就係因為呢種fans心態改變。