段記



14/10/2009 WED

如何照顧一隻中風老狗



18/10/2009 SUN

全年重頭戲,過埋今日正式開始,聽日要上中山做兩日展覽,返到黎下星期到會展,又要睇實屋企隻狗,之前同之後到月底應該都幾難有好多時間寫野。本來諗住襯離港前夕加今個月最後一個得閒星期日,自製番個邱禮濤一天電影節,諗番先知原來佢好多戲都有睇過,《伊波拉病毒》一套已經無能敵啦香港cult笑片之霸!今年仲要非常活躍,之前有套《Laughing Gor》,可惜我向來反無記唔好意思,即使鍾意睇專題電視電影,跟住《廉政行動》其中一集有佢做導演,你唔係無線播我會睇。年底連黎兩套,《同門》興趣唔大不過想睇《死神傻了》,雖然我是個超超超級謝安琪fans,此卻非想睇後者原因,只係套戲睇晒所有press都唔知道故事到底想講乜,加個名咁戇居,打算去豪華十點半廿蚊早場之後再十二點半連住落一日睇晒《死神傻了》+《同門》,雖《同門》唔算好想睇但邱禮濤個名加豪華underground同撞到一日上晒兩套又夾時間,自製邱禮濤一天電影節事在必行。如果劉Sir唔係咁懶的話。禮拜日九點幾起身真係好難架大佬。都係等VCD算啦。(...)


既冇戲睇,大陸兩日行程前,先送兩條囡俾大家。好耐冇講過音樂/metal喇原來。




After School 2009
李卓庭My 2nd Live音樂會


十月屋企多事日頭份工又忙,平時叫做放鬆只係打打Diablo(真係好大鑊的,一開始就會無止境地打落去),睇呢場演唱會至叫做正正式式行得開放假。不過睇完唔多開心。




紙談金屬 Kowloon Metal City 第九章
2009/09專題
Michael Jackson背後的女人:Jennifer Batten
@re:spect#43&44 (20090901&0915)


一早寫好亦晨早刊書見街,不過早排屋企太多事,加每年十月例牌勁忙,而家先寫番。冇特別安排,收書先發現原來最近一次《K.M.C.》第九章撞正09/09出街。當Michael Jackson六月底過身,已經打算寫番個tribute,梗唔係寫佢啦,我成日都話講MJ我會熟Man Janice多過Michael Jackson(...),會寫都只有寫佢個結他手。


成日覺得Jennifer Batten生不逢時。老實講,metal作為非常男性化音樂,搵到個女成員,點都對推廣自己樂隊有極大幫助。兩大例子:香港好少人認真聽black metal,始終本地主流是技術派(progressive/technical)、旋律派(melodeath/少少power)同節奏(core),籍籍無名之列卻有隊symphonic black ASTARTE彈左出黎,耐唔耐俾人擺上檯潮一潮。非殿堂級非新band又冇大label撐腰,何解咁多人留意?因為全女班、女歌手唱,雖則唔講明你根本唔會知道亦聽唔出女人唱,只會覺聽緊另一隊EMPEROR,全因同你講左「全女班夾black metal喎」,就連好多唔聽black metal者都會問/講ASTARTE。此現象ARCH ENEMY更為明顯。正如METALLICA都知道高峰過後係時候出黑碟「開拓新市場」,明耳人唔難得聽出《Wages of Sin》已為另覓出路e.g.商機改走更舊派甚至更power路線 - 香港metal一大迷思:好多聽melodic death metal人士會鄙視power metal,卻從未思索過自己所聽音樂實際上可能只是death power metal,此現象於基本上等同於死腔唱power metal之芬蘭派melodeath fans群體e.g. CoB fans中更甚。好在搵到個女歌手。同一批歌曲,單憑無敵雙結他但繼續由男歌手唱,即使唱腔同而家女歌手一樣(與ASTARTE同:唔講你聽,你根本唔會知道係女人)ARCH ENEMY未必能夠如現在可以成為新一代metal band中(商業上)最成功之一,我坐TRHK七年睇得最清楚:幾年前metal未如現今被潮流產物化、ARCH ENEMY在港仍處於半紅不黑時,因為「女人唱死腔」而選擇聽ARCH ENEMY,人數大大拋離「兩個結他手超勁」或者「佢地歌好聽」;試過《Burning Bridges》同《Wages of Sin》後,選擇買後者比例遠高於前者,同音樂無關,就係因為「女人唱death?勁喎!」。對好多人(尤其香港人)黎講,gimmick與名氣一樣,絕對比質素重要。試想想開放得多之廿一世紀都如此視綽頭多於一切,更何況二十年前metal界入面想搵個勁過男人的女人超難?


「所謂『開放得多』,實際上樂迷心胸視野一年比一年狹窄。」


就如文中提過,假如二十年前已經普及寬頻上網,Jennifer Batten a) 身為難得之女結他英雄 b) 造型一流,當年黎講非常極端前衛 c) 技術及創作層面上可能直到今時今日仍未有任何女性搖滾/金屬結他手超越得到,點會而家仍然冇乜人識?其實佢非常值得探討,雖然七八十年代metal band多到數唔晒,男女比例嚴重失衡,會夾band之女性大多做歌手,冇多少如VIXEN般全女子樂隊,彈結他加技術拍得住男性對手更罕有,而佢可以比當期大量結他英雄更高超,齋tapping都玩死人啦。講快未必及得上Great Kat,技術變化同創作多元化就高好多班,勁在唔係得個快字,好多殿堂級大師音樂性都唔夠佢鬥。所以我仍然會話,Jennifer Batten係rock & metal界最強女結他手,雖然好多人數結他英雄,佢連遺珠之列都入唔到。同Michael Jackson合作太長時間令自己冇成功樂隊可能都係原因。你睇Slash只同Michael Jackson彈過一首live人人記得,因為佢係GUNS N' ROSES結他,上台彈《Beat It》對佢自己、MJ及GNR三方面皆有錦上添花之效。但大家對Jennifer Batten印象 - 如會有印象,實際上冇多少此類人 - 永遠只得「Michael Jackson個session女結他手」,但追Michael Jackson有邊個認真研究佢班session咩來頭,聽band聽結他又有幾多人特別留意Michael Jackson?難怪你而家想搵Jennifer Batten舊兩隻碟,循正常途徑有錢都未必話有就有。


「咪所以要download囉,呵呵。」


此「樂隊紅人」現象,亦令結他英雄被局限於'80。九十年代壓抑技術,以獨立樂手姿態上路只限於小型廠牌及歐日市場,又或非玩嘈rock及metal類,風光亦遠不及,從前萬人敬仰之道變成小眾藝術,真正之結他英雄幾近全部局限於八十年代已成名或出身者。近代能夠成功之結他手往往非因自身而是所屬樂隊帶契,未必一定結他勁(Matt Heafy),部份仲要睇真聽真人所共知地瑕疵多多名不乎實(Herman Li),大家會留意佢地只因樂隊出名(TRIVIUM, DRAGONFORCE),話晒四大唱片公司經過多年收購吞併,已得到大量具備商業潛質之「地下」樂隊製造潮流 - 面對現實啦,有幾多人人日日提住的「勁band」,唔係直接或間接同四大有關,真係如大家一廂情願地underground?商業污染及近十年音樂取向改變,細label以外已經好難再搵到人錄首七分鐘純音樂最少四分鐘超快solo,玩純演奏速彈紅得起更加只限潮爆YouTube難有多少商業成就。真正之結他英雄,除技術被認定屬於世界最頂級,縱使寫歌未必隻隻碟都好(重申:舊派唔等於差),對後世必定有一定開創性及影響力,江湖地位是單提個名大家已認同等於全球第一,即使技術層面有後輩可超越到亦不會推翻之大眾思想中之第一概念,例子可見YJM同G3諸位大師級人馬。


以此作準,年青一代中夠資格稱為結他英雄者的確罕有,單可以獲絕大多數人認同為高手及具一定影響力者已難,如上段所評,瑕疵多多名不乎實之流非少。新一代我覺得Alexi Laiho具當年結他英雄風範,並非因為CHILDREN OF BODOM - 佢地絕對係melodic death,不過一向覺得以power metal心態聽佢地會開心得多,論melodic death瑞典已有大量樂隊超班過佢地,需知Alexi Laiho本身聽瑞典野大,第一隻碟更加係嘗試模仿之melodic black/death,其後將之先芬蘭power metal化再美國化方有如今名成利就之景(請再次參考前述「聽death power卻恥笑power之迷思」;CoB頭三隻碟除左歌手,同SONATA ARCTICA等有幾多唔同?)。Alexi Laiho成功在樂理同用聲有自己一套,即使《Hatecrew Death Roll》已市場化得可怕,起碼結他部份仍有新意聽得出,往後CoB大碟已完全只為聽佢結他(同Wirmen,可能冇多少(盲目)fans知道,當初有CoB其實歸功於佢多於Alexi),係噉的話直接放棄CoB轉聽佢隻all-star solo碟《Guitar Heroes》好過。不過可能後生及年代分別,拎CoB及《Guitar Heroes》Alexi手筆同Jeff Loomis《Zero Order Phase》(現今其中一個最被忽略結他手,及近代其中一部最佳、真正結他英雄作品),甚至CANNIBAL CORPSE + WATCHTOWER之BLOTTED SCIENCE比較,始終聽得出過於追求輕狂。夠架喇。反正有幾多人會介意或關心?CHILDREN OF BODOM可能係繼X-JAPAN同KORN,近代香港band迷中最多人識(讀音:最潮)樂隊,同人講你唔識唔聽會俾人笑果隻,當年甚至比X-JAPAN等更潮唯有CoF可以匹敵,而Alexi Laiho亦是現代「metal fashion」代表之一,唔少人鍾意Alexi Laiho,皆因記得長金毛黑指甲,同身為CoB結他手加大佬愛屋及烏,多過邊首歌邊段solo彈得巧妙。


其實一向想寫呢種專題,重提七八十年代眾多開山始祖,及佢地對後世深遠影響。雖而家絕大部份人只留意最新出最多人講之樂隊/專輯,舊野唔係冇人想知,就如曾幾何時香港網上metal界曾翻起一股cult thrash浪潮,不過當中多少真係想認識音樂,而非純粹當成潮流噉去追,令自己「學成」後可以上網同人「討論」?事隔多年,你睇睇網上討論區metal友心態,而家仲有幾多人似當年咁熱心議論、追求(cult) thrash,就會明白,只要一潮退,立即再無多少值得細心留意。當代思維整支樂隊而非單一無背景獨立個體,及音樂以外因素方為重要,亦欠缺尋根之心,而你知劉Sir從來唔識做更加唔會做潮流,所以好多人物同題材想寫,諗諗下,都係算。記得extreme metal「潮完」到metalcore橫行,有次同個客傾開結他佬,提起James Murphy,問番轉頭


「你講邊個Murphy呀?係咪想講Matt Heafy呀?」


現今聽metal(甚至可能話「聽外國野」),需要知道同認識毋需太多,只要懂得最新同最多人講之人物、樂隊、專輯、類型就夠,問心果句:有幾多香港人願意為聽完可以同其他人講「我識我知我乜乜乜」之音樂投資時間心機?香港、香港人講到點樣underground,到頭來音樂目標同態度咪又係商業同潮流主導?探討音樂文章著實無多少存在意義。


仲有一個「媚外」迷思。香港人好有趣,好多時一件事一定要香港人做先會去欣賞,正如forum耐唔耐可以睇到好多人經常引用其他華語地區論壇文章,內地雜誌《重型音樂》更是本地「metal友」聖經之一 - 自第七期起,由以往十隊band十隊你都唔會識之絕對地下,轉向metalcore等大廠牌樂隊睇封面你想搵隊唔識都難,能成寶典因由眧然若揭。引用外來論壇同雜誌出處文章非常普遍,但有關metal之本地原創文章比例一面倒,多年特別近年來與零相差無幾,因為每每有香港人嘗試做同一樣野,一係偏向片面,更多時寫完出黎只會被蛋中挑骨,最常批評當然係唔係都話你係抄人先。有趣在識話人者,未必知道好多內地雜誌、網頁都係抄外國文章,即使呢樣野其實人所共知。資料性部份一定雷同架啦,唔通你會自己幫樂隊作生平?評論部份自己見解之多寡方最重要。但即使完全照抄,佢地最起碼有做一樣野:付出時間精神去做資料搜集及翻譯,貢獻網絡上有心人或雜誌讀者。好多人唔會知,所以見係香港人寫而作者非圍內人士,立即話人地抄;知大陸雜誌實際上都係抄,亦唔會志在照鬧左先算,重要在自己睇過之後可以大大聲同人講野。


「我搵到我識,留番俾我自己唔好?等我可以上網拋人寸人,點解要教識你?你識左,我仲邊有得講?俾你寸番我轉頭咪大鑊?」


此乃香港metal網友間幾近一面倒心態,本地論壇非分享某隻碟某樂隊之類,真正音樂角度出發談重金屬已經少,發表論點從來引用人多,卻罕見自行創作,既音樂是用黎講同追而非用黎聽,睇文章搵資料絕對唔係一時三刻能夠完成,點解我要咁辛苦搵完同你分享,甚至翻譯埋俾你,都冇著數甚至蝕底做黎做乜?香港地現實景況,有幾多人真正能夠完全由零開始寫出一篇評論文章,大家心照,而人數少時,真心認真寫往往唔俾人笑或批評亦絕少得到真正關注,多年前之「每週一唱片大行動」已是個完整實驗。所以你見我已經好多年冇於論壇公開發過言。亦已冇乜心機認真寫文講metal。


另一個巧合,係寫完Jennifer Batten後,早打算先停一停,畢竟十月係全年返工最忙日子,十月中踩到十一月中冇多少空閒時間,點都要歇一歇。原先有個周詳計劃,離開左TRHK,寫作空間變番無限大,正如以前我未必可以花咁多篇幅寫「寫黎都冇用」之Jennifer Batten,Kowloon Metal City可以成為一個真正研討重金屬文化歷史專欄,要數大把題目值得寫,又或有有其獨特性與趣味性:德國thrash曾是香港一股「聽(thrash) metal的話唔聽唔得」之大潮流,我絕對相信當中冇幾多個會查過,八十年代德國thrash仲有power metal之真正源頭為何,一首歌夠寫一篇文講此源頭對後世影響有幾大;black metal中不同學派、近二十年來人事思想轉變,可能大大聲「我聽black metal」、「i am antichrist」者都未關注過;極端金屬從thrash進化而成人所共知,但尋回其於七十年代之根,解構thrash以外元祖重金屬與極端金屬進化關係更有意思;gothic在香港相當流行,理由當然是gothic fashion而非音樂,但歌德如何從失樂園進入重金屬,現今之gothic metal又有幾gothic?樂隊同錄音室點樣鬥大聲,由二三十年前黑膠碟到今時今日數碼科技,都係一個少有探討之有趣題材。可惜值得寫一回事,現實歸現實,香港做乜都好始終要搵錢,即使作為一本音樂雜誌,到頭來亦只容得下兩種文章:商業、搵到錢文章,同(造)明星文章,換言之寫完登完賺唔到錢帶唔到潮流,就無多少實在價值,就如你睇到之雜誌原稿,即使我已經特登提早交稿兼提供排版指引,如果設計組對音樂有一定認識、如果編輯部有認真校對,好多錯誤根本唔會出現,更加唔使講版面同我原先構想完全唔同,及第一期起K.M.C.專欄已經被安置於雜誌最後可有可無幾版之事實。既而家手頭上太多野忙,唔得閒再多寫作,既K.M.C.已再無必要,倒不如先停停。即使在音樂雜誌當中,真正之音樂還是可有可無,某程度上又是一個性本地文化諷刺例證。



20/10/2009 TUE

股震之侶09



27-30/10/2009

09燈展第二回之繼續玩轉
(+Special: Mattolium Chapter II)


Mattolium Chapter II
Matto Met Metalium Bassist Lars Ratz (Again)



20/11/2009 FRI

越來越懶,以前日日寫,跟住隔日寫,然後一星期兩三次,而家差唔多半個月先有新野睇。冇辦法,十月底做完兩個展覽,無論展覽時個場幾靜反應幾淡,完左展一樣有大把野要做,一定有勁多客話要黎公司要上工廠。而唔知點解,今年個市比以往都差,反而係咁多年跟展覽跟得最忙一次。做野忙之餘,屋企又多事。


半年前退休,除左音樂,老豆有事係其中一個原因。跟住日頭份工一日比一日忙,隻狗又中埋風,退休可能係搞metal咁多年最明智決定。之前入過幾次院,大大小小都試過,琴日再例行入院,我特登請左日假嚴陣以待,點知最後,都幾反高潮...


「講到好似老豆冇事好冇癮,應該早走早著噉,呵呵∼」


發覺灰開有條路,近半個月身邊幾個朋友同我一樣都係老豆出事。一早叫左你地唔好成日群地獄黑仔王劉Sir架啦。為左大家家人的福祉,從今天起記得遠離劉Sir呀!而家屋企咁多事,黎緊兩個星期六MYPROOFDARK MIRROR OV TRAGEDY兩場,都唔知掂唔掂添,大鑊。



22/11/2009 SUN

Marco走了



25/11/2009 WED


近來真係好doom。家犬走左冇耐,兩日後到陳鴻烈。少睇戲,對佢認識主要來自《畢打自己人》,有鑑前身《同事三分親》典型無記處境鬧劇惡劣印象,初時冇乜興趣睇,後來睇多左先知走洋劇路線,講番多左深度同人物,唔只賣懶有風格的攝影同硬滑稽,近幾個月終於有番晚間自由時間,《畢打自己人》成為我唯一會認真睇的無記劇集,要多謝除左編劇組,全劇最好戲的陳鴻烈佔一半功勞。當然,大閆生《畢打自己人》外同樣為大家帶來歡樂先最得人心。一直睇黎身心健康平安無事,點知突然話心臟病噉就走左,而冇幾耐前我老豆正正同樣心紋痛,仲差少少比隻狗更早走。


人終須一別,六十六先走已算豐足,再者心臟病一發暈低唔太辛苦就走左,而且連走就得以在縱橫一生之劇場離開,或者係一份福氣。


"OH SO METAL"



28/11/2009 SAT

28/11/2009
Tomahawk Metal Fest V
Tokyo Metalcore/Melodic Death
Myproof Live in Hong Kong


今晚28/11/2009星期六晚就係!
7:30西灣河蒲吧見!

票價預售票$128/即場$168
任何查詢或預訂預售票請致電
96120408阿靚女洽


同唔好唔記得
下星期六5/12仲有一場韓國symphonic black metal:


5/12/2009
Tomahawk Metal Fest VI
Seoul Symphonic Gothic Black Metal
Dark Mirror ov Tragedy Hong Kong Live



Tomahawk Metal Fest V & VI :
Asian Metal Double Assault


28/11/2009
Tomahawk Metal Fest V
Tokyo Metalcore/Melodic Death
Myproof Live in Hong Kong


5/12/2009
Tomahawk Metal Fest VI
Seoul Symphonic Gothic Black Metal
Dark Mirror ov Tragedy Hong Kong Live