段記



1/8/2009 SAT

太多事發生,近日先至醒番起:


劉Sir個網,無無聊聊又一週年。」


自八年前七月一日起,到今日已經寫左八年零一個月,不過正日果排好多事幹又退緊休冇乜理過。其實懶的話,摷番上年亦即前年就夠,一篇文夠用過晒世。


開網一年後踏入TRHK,個人音樂生涯同個網可以話共同進退,而投身TRHK七年後,已經半放下個人生命中最重要之metal/音樂,熟悉劉Sir都知道原因好簡單:metal特別香港metal其實有好多故事、好多笑話,當中最(唔)好笑者,偏偏毫無疑問是當今整個本地metal文化,一個非常大非常大之遺憾,可惜經過左二十年,香港metal界仍未有多少進步過,甚至更進一步、非常樂意向一個自己曾經不屑、鄙視的方向前進,繼續將metal K歌化、將band壇娛樂圈化。除非你只求能夠威同型俾人睇,做做專家、夾夾band、踩踩其他人就夠,又或簡簡單單求求祈祈是是但但,否則好快就會灰心(又稱(被)收皮)。


音樂方面完左,希望個網唔會跟住。漫無目的都寫左八年,寫作成為生活一部份,我諗好難而家先至停低、放棄。無聊亂寫都搵到一班追隨者,話晒劉Sir呢種幾頭唔到岸者,好難搵到「正確」目標讀者:對公眾黎講名不經傳寫野又市井又雜又亂,即使音樂界/metal界中算薄有名氣,亦唔見有幾多局內人會睇,一來好多現實自欺欺人之香港人根本唔想面對,加上之前已有實驗證明,香港地寫音樂特別metal一定唔會有人理,因為本地真正會睇會留心音樂者遠遠高不過是非,所以劉Sir即使作為音樂工作者好多年,當只同你講藝術講文化而唔提本地最多人鍾意最想知之明爭暗鬥時,佢寫d野反而係香港「metal友」最唔想睇果d。


退休連帶寫少左metal及音樂,轉向其他之前忽略左之嗜好如電影,對所有人可能都係好事。可能早就應該,自劉Sir個網延伸的劉Sir個blog,寂寂無名下開張兩年累積瀏覽數有十萬總具一定代表性,唔少文章「(可能)係全港同類中寫得最好」例如《不死傳奇:黃家駒》《Project: Watchmen》曾經試過令劉Sir個blog兩個星期持續日均瀏覽人次幾百、最高峰一日過千人架,同埋「全地球最長」《殺人犯》後感呢,加上獨家寫作風格同思路,再將metal帶到音樂以外,好多野全香港甚至全網絡只此一家。有人話如果一早改改路線,網名同筆名起得有幾文藝得幾、只寫文化野間唔中憤世嫉俗一番,加唔用白話全部用書面語,可能幾年前已經有所成就,其實我自己都覺同認同,不過我係咁頹有乜計?可能單單棄白話改用書面語寫作,「成就」已經比而家高出幾倍,不過一向做野冇乜目標,加上八年黎皆為生活而寫,如果要出名要多人睇要名利,連自己生活絮記都搞到打工噉,又有乜野意思?況且劉Sir講親之主題永遠不合時宜、內容離經叛道,佢個名已等同於逆潮流,除左玩小眾玩cult,都幾難話寫得出頭了。


「如果你估到劉Sir黎緊會做乜野、出面有第二個人寫野諗野似佢,你點會咁特閒成日特登走上黎?」


我自己都好難想像到唔止音樂/metal,連劉Sir個網、個blog都冇埋的劉Sir會係點樣,不過相信果個劉Sir,應該會係(已經)媾到女的劉Sir(呵呵)。搞到「邁向十周年」呢句,我都唔知講唔講好。



2/8/2009 SUN

今日朝早帶隻狗出紅磡睇醫生,熱到34度,九龍城出到紅磡都咪話唔辛苦。隻狗流晒大汗主人亦伸晒利,行過108(唔係皆旺108,係紅磡108商場),見到有檔賣野飲,即刻撲埋去啦。天時暑熱想飲珍珠奶茶,點知走到門口一望,立即走得:


「唔好意思,我地只賣熱奶茶。」



4/8/2009 TUE

又要講講同麥記(&KFC)的恩怨情仇。小中學時代麥記是人民英雄,除左大家鍾意食(細路梗係越唔健康越鍾意食架啦),第一次出套餐一個先十五蚊左右,差唔多等同於正價買的五折(而家睇得轉頭,原來好耐以前麥記食水已經極深),最緊要平過買飯盒,靚仔零用錢唔多都負擔到耐唔耐食一餐開開心心。到中四時做選民登記大使(又有好多野寫的一段往事),人生第一次兼職出街食飯靠自己,麥記餐仍然只賣十七八蚊仲平過茶餐廳,最激試過一日食足五餐麥記.慳埋d錢夠去機舖打幾局。加埋平之餘好鍾意搞花臣如麥當奴版變形金剛即薯條汽水變機械人好過癮(可惜十幾年前已經唔見晒,唉),有幾多細路唔係當麥當奴叔叔神噉拜!


年復年,麥記終於顯露其邪惡組織真面目。每隔幾個月唔聲唔聲加幾毫,永無止境加價到今時今日,套餐價錢增加近一倍,就算單買個包都貴過以前買全個餐,十年間麥當奴已從窮人食肆「升呢」至中產餐廳到現今富人食府。唔知仲有幾多人記得當年食麥記會俾人笑你窮?而家窮人先食唔起呀。最賤格麥記人工從來冇點加過。更慘野食質同量相反越來越唔掂,KFC後來居上加遠遠拋離,Murder King又加入戰團,最後一次我真正有心支持麥記,已經要倒數一年以上黑椒漢堡。要俾三十幾蚊食個麥記包餐而家的我100%唔會,再者麥記薯條越黎越難食,相同價位點解唔直接去Murder King,好食抵食得多而且薯條高幾個層次?會食麥記只有陪人食,食雪糕(其實都貴到喊唔太捨得),公司食早餐,足六兩,同麥樂雞。最後二者係我仍然會耐唔耐幫襯麥記主因。


麥記自己都知自己事,麥樂雞作為最受歡迎食品之一,耐唔耐搞活動谷谷佢,呃一面鬧又要一面食的傻仔e.g.劉Sir磅水。起初耐唔耐出新醬,跟住玩埋砌圖遊戲,買盒雞送一張,集齊四張送你365張麥樂雞禮券,每個月三十張一日一盒食足一年,N年前玩過一次,食到應一應啦。隔幾年再接再厲,我講緊我中招。四張中總有一張你永世搵唔到,第一次買盒雞就有得送,儲唔齊唔緊要反正好食;第二次先搵笨要買個餐先送一張,你會唔會為張卡每日俾三十幾蚊?我唔會。特別你知道第四張可能你食足三十個餐都撞唔到。不過有人會。


「講明先!唔係我架!」
「我都係偷人相tribute咋!」


「何其壯觀。」


萬惡之源請看此。話說同事報寸,Yahoo拍賣有人放麥樂雞禮券,咪就係最近一次砌圖遊戲份獎品囉第一次左下角即搵極唔見果張網上炒到五百幾蚊,今次個賣家醒換盒禮券返黎逐張上網放,一張五蚊,$5x365=$1,825,就算要食三十個餐都回晒本啦。(蠢左添!)五蚊一盒相等於半價都叫超抵食,仲要個賣家原來係同事朋友黎,叫佢立即打去問,超級好賣,已經要到十月打後先有貨。喂放緊暑假咋喎而家?掙扎左日,十月就十月啦都係等多兩個月嗟,隔日再打去,已經賣到得番2010一月後少量。


「點解會咁黐線???」


無謂買啦,仲有半年,買左到時都唔記得用。非常識時務,有見市場渴求又冇貨,即時出現左另一位賣家,坐地起價$6張。我咁犯賤之前有人賣五蚊,雖然六蚊都叫打左個三折,點都覺得蝕左唔抵囉。再次收皮。


「麥記,即係唔係我唔想支持你。搞到咁麻煩,叫我點撐你?」

「想搞宣傳活動益街坊,學學人地Murder King先啦!」




5/8/2009 WED

「天文台,我再屌你!」


半個月前難得九號波,點知撞著星期六加快黎快走,乜野吹到正禮拜日八號禮拜一九號通通收皮;今次夜晚九點掛八號,即使本身已打定輸數,起身打去18503聽到落到去一號波,都不得不大大聲對住個天...文台怒屌。從來天文台決定掛幾號風球非以天氣情況為優先考慮,以往唔少八九號風球可以比冇風球時更風平浪靜,亦即如同今次,我絕對相信個八號波頂唔到第二朝連半日假都冇,除左係「商業決定」仲因撞正放榜日,正日先黎八號唔俾考生同特別家長小爆?總之搞到我好唔滿意,俾我放半日假都好啦,當堂冇晒心情做野,好在老細個仔今日放榜,兩老要陪個仔四出奔走成日唔見人,先叫做似番返工(...)。


「禮拜尾先打風唔緊要,不過最重要最重要月底廿九號個禮拜五六日千祈唔好打風呀!」


29/8咩事?梗係重要啦!咪就係:


Tomahawk Metal Fest IV
Asian Death Metal Fest

TMF4:亞洲死亡金屬祭


「又抽到水,口桀口桀∼」



6/8/2009 THU

呢兩日公司一度陷入緊張狀態。一切源於琴日5/8/09中五放榜。話說老闆個仔今年會考,作為名校生一直以黎所有人包括佢自己、家人、學校先生同補習先生,個個睇好佢起碼廿中起,點知張cert一到手:


「做乜少左成十分?」


讀開名校眼角心頭都高時,而家跌左成十分,一字尾唔叫差但二字頭都冇完全超乎大家預期,點諗過要淪落到飛車周圍撲學校咁慘?琴日朝早同事打電話去老細度打聽,唔止得佢個仔而係全級好多人都撻Q得十幾分,以名校黎講冇乜可能會發生,覺得係考評局改卷時出問題,猛話要查卷;老闆娘把聲仲沉過death metal,一聽就知道今舖大鑊了,分分鐘返到公司剷死晒所有人,不過我未驚過,因為本身今日即放榜翌日我晏晝有客要見,老細電話中言下之意可能見唔到,即已經打算走足(最少)兩日幫個仔搵學校,返得到黎公司先算啦。點知又搵到喎,先生肯幫佢打電話到其他學校推薦,本身名校個名已經著數,最重要出面比賽同活動幾張紙仔佢食糊,晏晝有間肯收老細覺得間學校OK就搣cert,危機便解除了,其他同事高興,不過一心以為可以公司會有兩日冇皇管任玩唔嬲的我,反而有點唔開心。(...)


相信大部份人最少考過一次公開試,自然明白中五中七學生逢到八月必定灰爆。本身香港教育制度已經極度不負責任:讀完九年免費教育俾你升到中五,就算好有心讀書唔代表一定有得順利俾你升上中六,每年大約有十二萬人會考,但中六學額得三分一左右,加埋其他私校學店之類先佔一半唔夠,雖然大家都知香港學生一山還有一山低,我記得我中五放榜果年,報紙講有間官立中學有班學生全班零分型到爆,問題係不論如何參差,我當十二萬人中有一半一放榜已擺到明冇書讀,剩番六萬都未必一定上到去讀到自己想之學校,甚至連正式中六學位都搵唔到。香港地又咁睇重成績學歷,大學生都難搵工啦,得中五畢業會考幾分分分鐘冇分仲冇工作經驗,可以點算?政府當然唔會理。又唔係佢要讀中六。


最慘係唔夠分果班。年年都為「方便學生同家長」,硬要整一大堆(無謂的)新措施,記得我放榜兩年都撞正生日,亦好彩兩年都符碌過到骨,不過好多中五同學就冇咁好彩,我果年同而家一樣分階段收生,不過仆街在以分計,第一階段即頭日半只准十四分以上搵學校。我剛剛好不過身邊好多人校內試勁我好多,就係會考撻Q得十二十三,本身實力冇可能冇得讀,就係制度下唔俾讀甚至可能升唔番原校要轉去低band中學,第一日真係喊出黎。 可想而知而家香港教育同考試制度,害死左幾多真係想讀書、真係讀到書之人。最難為要陪仔女搵學校、幫佢地周圍走排隊敲門跪地求情班阿爸阿媽,今年仲要撞正打風落雨 ,個個都辛苦。而且今屆失敗畢業生相信慘過以前咁多屆,因為黎緊就三三四冇仇報,會考話仲會搞多幾屆俾人重考,問題係想重讀點算?由新制度中四讀起?中五放榜係我今世人第一次感受到人生灰暗、社會現實、香港教育有幾失敗。最諷刺跟住會入左教院讀做阿Sir。不過我條命就係生成咁諷刺,際遇永遠係入到一行,看破晒所有野,但完全改變唔到,只有睇住佢灰。


既然全香港人人都鬧,點解香港回歸十幾年,特區政府成日可以朝令夕改,唯獨「港英餘孽」考試制度咁多年都唔教,「微調」就間唔中整一兩單,大少少三三四都要等咁多年?其實原因好簡單:


「你知道香港有份搞教育果位姓田,自然預左各位香港學生下場必定不堪。」


邊個搞香港教育?班官。邊個去外國讀書?唔係我地,係班官d仔女。事不關己時,反正累唔到自己同仔女,又點會咁得閒同你重頭整過一個比現時更好之教育同升級制度?你死你事啦。正如之前田主席個電視訪問,早前又有下文。話說第1006期《壹週刊》訪問田北辰,問佢以前讀書接受英文教育,明白英文重要性,噉點解一方面搞本地母語教學,一方面又送自己仔女去外國讀書?答佢仔女去外國,同香港受難的大家一樣接受緊母語教學:


「外國先生教書唔係用緊佢地母語咩?」


平民百姓「受得起」之母語教學,係學生本身母語即廣東話,而自己仔女接受之所謂「海外式母語教學」,講緊先生用佢地母語英文教,兩樣野根本完全相反加冇關連,可以與本地母語教育推行混為一談完全不合邏輯,而且冇諗到自己個制度中幼稚園到中五你用乜文冇所謂,但上到預科同大學一定要用番英文,母語到最盡頭,咪又係「海外母語」?當大大聲講以上謬論位仁兄正正負責管大家讀書點讀,你就預左香港讀書只有死路一條。當然政府成日講會考唔成上唔到中六唔代表死得,各大傳媒同樣搵幾十個成功例子鼓勵各位朋友,但你睇番上面數字就知,成功機會真係可以用萬中無一形容,年年會考咁多人,唔計身先士卒果班,有幾多個係光宗耀祖地上到電視上到報紙?真係咁易成功,香港晨早解決左好多問題。


結果現今會考制度,唔係為香港帶黎乜野人才,只做福到三種人:的士佬,放榜期係的士業全年生意額高峰之一;記者,要勵志要悲情無限人物材料你大寫特寫,唔使擔心諗唔到題目搵唔夠料;同傳銷教育工作者,客人多到你搵都搵唔晒,加埋失敗者政府唔會理,大把水魚俾佢地昆。正如負責教育政策的田主席話齋,大家都係早日去外國接受「西洋母語教學」啦。這是唯一出路/生路。



8/8/2009 SAT

今年生日相當特別。琴晚紅燈山丘中聚會,講番起兩年放榜都撞生日,返到學校人人喊苦喊忽時大家陪我切蛋糕,係好笑但亦覺得好衰,放榜真係好慘架,我叫好彩架喇兩年生日都可以愉快渡過。經過四五年黎睇舖困身生涯,終於退休令我第一次可以自由身過生日。大把節目,懶寫咁多,出街玩之前,睇睇戲先啦。


Taken



9/8/2009 SUN

紙談金屬 Kowloon Metal City
第七章:TMF4:亞洲死亡金屬祭序章.上篇
@re:spect#41 (20090801)


《紙談音樂》係半月刊,即逢一同逢十五號出新一期,不過七月起退休,加上搞完QUIXOTIK(相信冇乜人非常好印象,但我真係非常鍾意佢地、覺得佢地玩得好好),八月頭決定放個假先,今期八月中重出江湖。當然主因係又有show搞。成日文稿都係等到最後一兩日先開始寫,甚至寫一刻先諗寫乜好,今期因為已經有晒料(冇錯,我全部都係copy & paste頹爆),都算早過好多次。


雖然我已半脫離本地金屬界,黎緊仍然會繼續投稿,不過冇左TRHK空間反而大左,諗緊寫寫之前想落又冇動手之諸如此類,例如樂隊訪問。當然,冇show搞先,你睇完今期,已經預左下一期又係講TMF4。講乜都冇所謂啦,最重要講呢句:


「提醒大家,TMF4亞洲死亡金屬祭門票已於TRHK公開發售!」



10/8/2009 MON

「五年黎第一次自由自在享受生日。」

2009/8/10 9:10pm 銅鑼灣Zoe Cafe



11/8/2009 TUE


今期流行是自動結冰可樂,7/8/09都市日報仲整左個鱔過鱔魚的頭版鱔稿介紹,「型到結冰」。女同事甲睇到,爆左句:


「自動結冰可樂有乜野咁稀奇?」


聽佢講,原來早於何守信時代即「第一季」《開心大發現》,已經玩過自動結冰呢回事,方法係先買一枝細膠樽裝可樂(叫人請or落七仔撻都得),擺屋企雪櫃冰櫃雪一個鐘至個半鐘,確實時間視乎雪櫃同經驗,同事屋企部雪櫃就要雪七十五分鐘。夠鐘後拎出黎,樽內可樂仍然處於液體狀態,用任何方法大力打或搖個樽,可樂就會好似變魔術噉自動結冰變成思樂冰。完全毋須任何化學野,背後道理是基本物理現象:將可樂雪到近結冰時拎出黎,內堣ㄕP位置水溫會有差別,當液體流動就會令整體水溫下降,從而出現凝結現象,另好似話因為可樂本身成份包括好多物質,所以比一般水難完全結冰,所以只會變到做思樂冰唔怕飲唔到。換言之點樣自動結冰完全唔關枝可樂事而只關部汽水機即係部雪櫃事,而且唔開蓋就噉搖一搖或者撞一撞甚至倒轉個樽已經可以,而家話買完要點樣立即開黎飲一啖再閂番個蓋先結冰點點點,只係俾個理由你調轉枝可樂加扮到好奇特。


「挑!可樂公司講到點樣新奇點樣新潮,我一早已經成日用屋企部雪櫃整咖啡、果汁思樂冰啦!」


一枝結冰可樂「會場價」賣成十蚊,叫價叫高平時超過100%,知道乜野一回事後,就明可樂其實搵緊你笨實。再次證明《開心大發現》真係有用同要睇,可惜係亞視出品,我算《開心大發現》大fans都唔知道原來講過,你話有幾多香港人仲記得?而且亞視同你講時你唔會理,「超好出奇咩」,但到可樂懶神秘同你講到好勁好強,大家又會好自然詫異一番


「嘩!好神奇呀!」


跟住齊齊俾錢。香港人始終是品牌同gimmick盲目追隨者;見到仲神奇過可樂曉自己結冰的《殺人犯》可以大收就知啦。所以大家不妨繼續俾十(幾)蚊買一枝可樂,即使是個傻仔,起碼開開心心。



12/8/2009 WED

特務之王

「向本地熱心藝術工作者及獨立精神致敬」



19/8/2009 WED

上星期一生日,上星期三睇完戲想抖一抖,冇諗過一抖就抖足成個禮拜。顧住玩冇乜動機做野寫野之餘,撞著公司換新server搞到勁麻煩,跟住到網上行所謂「台灣打風吹斷左個網絡」整幾日都整唔番,同各位網上行用戶一齊怒屌(這又是另一個故事),搞到浪費左時間落好多無謂事上面。所以今日先蒲番頭。


The First Free Birthday in 5 Years


「不過我仍然未抖夠。過多兩個禮拜又到大show,今個禮拜後大把野忙,慘呀∼」



21/8/2009 FRI

「首先,要特別譴責電訊盈科網上行。好慶幸《復仇》上畫首晚我已經睇到,十一點幾返到屋企立即開機徹夜打好呢篇評論,點知跟住死左網絡,搞到遲左日先可以上線。此只乃是次台灣天災打殘網上行無數禍害冰山一角。咁多年都服務差過人速度慢過人又收得貴過人,之前台灣地震已經試過一次全港用戶上唔到網,有此經驗今次台灣風災又黎,間間冇事得佢有仲要一連多日無大改善,但高昂月費照收足。懇請各位網上行用戶盡快甚至即時與PCCW解約,轉用其他優質網絡供應商。我已經決定左。」


復 仇



24/8/2009 MON

行開左好多日,好耐未試過加好少可一連咁多日不斷出街。其實剛剛個星期六日,計劃中只得禮拜六晚去睇show,不過朝早放工時有同事話「上會計靚女屋企玩」,反正得閒冇野做咪去,出發左先知道原來做苦力,佢屋企裝修多左d冷氣機洗衣機出黎,同事做開狗場義工,見有免費野立即搶俾狗場用,但需要男丁拆野搬野。


「澳雪。」


大家都知劉Sir死剩把口得個講字,要佢落場郁手做呢d粗重野絕對難為了佢,而且以為半個鐘乜都搞得掂點知最後整左個幾鐘,蝕晒灼啦今舖。好在執屋時搵到寶物,某個衣櫃入面掛住件皮褸,點睇都覺得似女裝但會計靚女死話係男裝仲要「好多年前日本買二千幾蚊架」,而且明顯擺左幾年又冇防潮發晒毛,一場黎到咁辛苦有理冇理笠左佢先,做左metal友咁多年,終於有番件(唔)似樣的皮褸。不過要著得到,相信先要減肥二三十磅。(......)


本來打算幫完拖躝下街躝到夜晚睇show一流,搬完野都係收檔算,成身污糟晒返屋企沖個涼換套衫再出發,十分支力但想訓陣唔敢訓,時間唔係冇,驚一撻低就起唔到/切身,沖完涼就出門口喇。退休冇時間加懶已經唔多會上網搵新聞,而家放長假可以勁睇show但放假放到個人更頹一樣唔知幾時有show睇,都係SILENT CHAMBER通水先知葵芳有場雜錦show,捧SC場加想睇傳說中的零霧同PERI M,雖地方遠車錢貴夜晚返屋企又麻煩,打晒喊路都走去支持啦。今次演出場地同主辦型式上有頗大突破,因為頹到而家未有多少心機詳寫,出住兩句先啦:


「SILENT CHAMBER好勁呀」(騎x100)

「著裙啦小朋友」(騎x1000)


睇完show返到屋企已經點幾鐘,加埋勞動左成個晏晝,第二日好鬼遲起身,初時想去豪華廿蚊早場睇好多人話「可能是本年度最佳港產片」的《竊聽風雲》(不過我相信今年睇過港產片中,冇一套敵得過cult到喊之《特務之王》)(但套戲其實係四年前出唔係今年...),起身望到個鐘就知繼續訓好過啦。本來冇打算出街,天氣熱人更懶,而且《re:spect》又到期交稿,理應御宅一天,就係咁唔好彩呢幾日先壞電話,過左保養期加整機一定要換零件唔慌平,但黎緊禮拜六就到TMF4,為場show為返工出旺角要快手換部新電話,加上是晚八三三十分即興地再黎飯局,起身冇耐又出門。做乜都好,第一件事要先上舖頭,因為


「有新貨到喇!」


退休之後第一次有新貨,接掌掌櫃之位的囡囡對住十幾箱新碟唔知點算,我咁熟行以前咁大批貨都要執兩日包整貨單,囡囡手足無措是很正常的。咁好彩我今日出左旺角,順路上去幫幫拖啦。


「真係好多新野架!click呢度睇睇!有時間記得上皆旺望望!」


上去坐一坐就促成左單生意,仲有個鬼佬客要招呼,睇黎我坐鎮TRHK確有必要,不過...算啦。顧住做生意幾乎搞到趕唔切去食飯,七點幾急急腳走去佐敦聯邦,上次黎撞著裝修冇得食,裝左成個月終於重開喇!一入去知客姐姐已經話用左百幾萬裝修(真唔真呀?),難怪靚左超X勁多,同最緊要無限芒果布甸再現江湖!今次我醒水喇,揀位揀正雪櫃隔籬,坐低等兩條友同等水滾時即食兩個先,非常精明的決定,因為每次雪櫃一出現芒果布甸,就會有大量朋友衝出黎搶食,中間曾經有段時間個雪櫃空空如也!好在我向部長大大聲反映加食到飽都賴死唔走,堅持左半個鐘阿姐終於捧左成底十幾個布甸出黎,全晚食左半打乜都抵番晒!加埋無限枝裝零式可樂更加滿足!(今晚先知原來Coke Zero都有玻璃樽裝!)


難怪突然搵我出黎食飯,梗唔係因為我生日特登出黎益我啦,前幾年兩條友次次暑假身痕約食飯都撞正我生日,今個暑假學精左我生日果排去晒旅行,月底返到黎聽日正式返學校,最後一晚就搵我消磨時間。佢兩條友一個去西班牙一個去泰國,有冇手信先?乜叉都冇。不過總算有番d人性:


「以上係我今年難得收到的生日禮物。」


作為教師今個暑假一定係歷來最開心,因為豬流感嚇一嚇暑假長左幾個禮拜又唔使考試,不過勁多學生喊噉口,上學期撻左Q果班不在話下,聽佢地講原來好多頗有小聰明的學生,好鍾意上學期特登唔盡力考衰d,搏下學期考番好拎最佳進步獎,仲要都幾多呢種細路添架,呢舖豬流感佢地仆街仆得最應,因為今年全香港冇學生有得進步。但黎到今日兩條友都唔係好得過班學生幾多,Sam少幾日前先西班牙返到,時差未慣隻腳仲傷埋, 漢 同樣玩左兩個月突然要返番工好唔慣,向來返工等放工頹爆的劉Sir一面食芒果布甸一面笑九佢地,十分開心。


到星期一仲未玩完。年度最奇港產電影《音樂人生》(乜唔係《殺人犯》咩?),七月中上畫開始捕,睇實九龍區兩個放映地點又一城同油麻地,前者冇一場唔係爆滿,爆到連第一行都冇位坐果隻,落左畫半個月再開特別場繼續爆,油麻地都要靠白告早兩個星期訂飛先搵到位,而且要睇九點十場。呢類另類/藝術性較重電影特別場都係時間較不理想,《特務之王》九點半圓方有晒經驗,今晚同果次一樣放工後行路出尖咀邊行邊掃碟,最重要俾我搵到次次上 漢 屋企都玩到癲部紅白機版PSP 2PG!下年生日禮物已經有目標了。到尖咀同七刀同學會合食番個Murder King(全線水準都下跌了,但總舵總算比其他如油麻地整得好食,或者因為長期冇客唔使趕住整?),再過番油麻地,爆場果然唔同d,等入場時成個大堂企滿晒人,最重要噉都撞到Stan兄,我臨收皮最後一日上黎撞到已經好彩,黎到《音樂人生》都撞到先有緣。不過而家冇睇舖,再下次都唔知幾時了。


「又唔使好耐,禮拜六開show已經會再見啦∼」


我對呢套戲非常期待,結果未至於十分神 - 其實主角KJ特別在佢身在香港,未至於宣傳所形容異常超凡脫俗,不過玩古典可以玩到咁metal,同實際上佢利用呢套戲黎玩轉社會、傳媒文化滿足自己加屌鳩晒佢想屌的人/傻仔,「偏鋒」先多野講。經Stan兄指點,黎緊搞埋場show,會瘋狂睇戲寫戲。


「各位朋友!TRHK電影版罪可以再開了!」



25/8/2009 TUE

紙談金屬 Kowloon Metal City
第八章:TMF4:亞洲死亡金屬祭序章.下篇
@re:spect#42 (20090815)


基本上需要講的都講晒,你睇呢度就夠晒,除左一樣野:


「因事,台灣薨同越南DIGUSTED黎唔到香港,餘下七隊將如常參加本星期六29/8 TMF4。當日演出開始時間將延遲至6pm,至11pm止。」


可能你唔信,就算我仍然坐緊TRHK時,即使是TRHK內部決策如搞邊隊band黎香港,好多野都係外面/你地知道左一段時間後我先知道(真的,信不信由你),退左休好多野再冇理,大量消息自然更遲收到風,好似今單有兩隊band黎唔到香港,我唔上網睇新聞又勁少開Facebook,一兩日前先知道,仲要係非TRHK人士放風我聽,真諷刺。好遺憾,黎唔到兩隊正正係我最想睇兩隊,不過既然寫左篇文出左街就照原文出算,反正網上版先係正確同多人睇 - 老實講,我唔覺得《re:spect》讀者中有幾多對metal有興趣。



Tomahawk Metal Fest IV
Asian Death Metal Fest

TMF4:亞洲死亡金屬祭