段記




1/6/2009 MON

當是晚可以全皆旺靜過圖書館(呢個比喻都幾矛盾),再加三條傻仔坐舖,好自然又係煲碟時間。近來目標係《未來戰士2018》,計劃今個星期睇,事前準備包括《Transmorphers》,《Knowing》提過之cult片霸Asylum出品,一套戲集變形金剛+Matrix+未來戰士三家大成,點可以唔睇呀?繼《The Spirit》同《龍珠》後,今年睇過最廢都係呢套。或者應該睇一套戲食晒《未來戰士》同《星空奇遇記》兩條潮流水之《The Terminators。當然唔少得Rock爺極力推介之《巨鯊大戰八爪魚》,真係笑到你喊,我好想睇架,香港未見到有,上網又賣到廿幾蚊美金隻DVD未捨得咋。當一間電影製作公司可以拍左近二百套戲,加未睇戲齋睇戲名已經笑到你反肚時,你就知道呢間label唔追唔得。trailer已經好笑過人地成套戲。


唔好再講Asylum,唔係越講越遠收唔到口。今天的主角,是狼人。


X-Men Origins: Wolverine



4/6/2009 THU


2009年6月4日主題曲非佢莫屬。相信BEYOND自己都冇諗過首歌會變成民運歌曲,黃偉文手詞又可以夾得咁完美。


「個MV話咁快俾YouTube剷都唔奇。有睇襯手。有得download添。」



5/6/2009 FRI

是晚節目,冇可能有人估到。成班傻仔上皆旺,睇明珠八三零《地球咁柒全因你地球很美有賴你》,六月五日全球電視、戲院、DVD同步上映。經名導演洛比桑手(我成日以為佢係Rob Zombie),睇埋簡介同劇照,我(加在場傻仔甲乙丙)諗住似Discovery Channel之類,鳥瞰超靚景加post-rock/new age/chill out配樂當正MV嘆,點知原來唔係,畫面冇想像中咁「Discovery」之外,仲有把女聲不斷講野。加上皆旺部電視超勁,長期贈送無限雪花回到大家細個屋村睇電視(加撞正打風)時,一套賣靚聲靚畫戲,當堂花過VCD bootleg - 上皆旺睇呢套戲本身已是個最錯誤決定。唔緊要。我當聽歌算。雖然把女聲多左d。都唔緊要。慘在,


「喂,陳志雲,唔係話有你份做旁白咩?」


近來好興講環保,預左又係典型說教片,冇預過會激成噉:開頭正路地講世界環境、植物如何調理地球,講講下去到人類社會同大城市點樣破壞生態平衡,跟住告誡大家要保護環境,最激直頭講到而家我地乜都係咎由自取,人類其實唔應該存在!因為過程中熄左聲(播住doom metal睇仲有feel過本來配樂),唔知英文原文講乜,字幕譯到好黐線,後半集差唔多講到全人類應該為左地球生物大我死左佢算數!當中有一句:


「美國利用黑金力量XXXXX」


嘩!Anit-Human成噉,直頭black metal添啦!單為字幕已經搞到想入戲院捧多次場!



收舖繼續Anit-Human,上新世紀睇妖魔殺人僵屍戲《血戰新世紀》。《龍珠》我以為已經夠廢。估唔到仲有片(Asylumd擺明爛片唔計啦)可以同佢鬥。睇完,差少少想血洗新世紀。似乎鬼佬都係唔適合改編日漫。死,黎緊仲有《銃夢》,同傳說中之《超時空要塞》。今年改編戲可能睇埋《變形金剛2》同《義勇群英》就夠。美國佬,都係忠於美漫好。



6/6/2009 SAT

香港首場(暨可能是唯一一場)
免費極端金屬秀6六陸

三週年慶典之
「我食咖哩食足成日」

(明顯地是夾硬拉埋)


早餐:起身都十二點幾啦,仲點早餐呀?

午餐:波仔微波爐叮叮咖哩雞飯

下午茶:蘇格蘭薯堡英式咖哩薯條

晚餐:阿龍咖哩雞加牛肉加牛腩加薄餅大量
(阿龍可能是全香港最好食的咖哩)


「2009夏季減肥計劃,無限期押後。」



7/6/2009 SUN

紙談金屬 Kowloon Metal City
第四章:D.M.C. vs K.M.C.
死亡金屬之真相@re:spect#37 (20090601)


六月冇show情況下,今期《紙談金屬》可以自由發揮,無聊寫番death metal。自從睇左《D.M.C.》電影版,已經有動機寫篇文掟上《re:spect》,不過因為套戲同期撞著搞Tomahawk Metal Fest I,又懶(...),結果當然冇成事啦,襯而家有個正式地盤,剛剛搞完兩場show冇乜諗頭,就用存貨交差。用《D.M.C.》做比較適合冇留意開metal的讀者,不過老實講,有幾多冇聽metal而睇《D.M.C.》會對呢方面有興趣呢?單睇《D.M.C.》最潮時傳媒效應都估到可以有幾多:講來講去著衫化妝,音樂只得幾版中的某個角落頭一小段,就算搵音樂界中人訪問,都只會係唔關事的樂隊如高潮。自不然,更加冇人會訪問真正同到你講音樂的label/劉Sir啦 - 某程度上,主流傳媒寧願唔開估「真相」,如果俾人知道其實death metal好正經而《D.M.C.》完全唔死亡,仲有幾多野可以炒作可以吹?


全文最後拉到去早前講媽咪麵同死亡金屬的關係,不過可能太白痴出街時被cut左。重溫先知媽咪麵個廣告俾人洗左。芝麻街撈CANNIBAL CORPSE冇事,反而放媽咪麵個廣告上網幫人地免費宣傳會俾人洗,香港就是這麼on9。搞到而家冇晒心情,開始轉食童星點心麵了。把聲應該好快由death metal變成emo。



8/6/2009 MON

有個客煩左好耐,四個月前新年拎左勁大批樣辦七十幾樣,老實講除左自己公司擺展覽未試過一次做咁多,肯俾錢算照做,收到之後唔識用。拎住舊野唔識用你會點算?出到黎做野梗係執生自己研究啦,但佢個方法係自己唔整打電話叫人上佢公司幫手整,梗係唔騷佢啦,最後唯有死死地氣自己搞掂,但七十幾件野總有幾件搞極唔識用,又好野喎死纏難打,二月打電話打到而家六月,我都頂佢唔順今日食完飯特登上一趟門。冇乜所謂,就算冇野做成日坐公司都唔一定寫得出野,網上得多都悶啦,加上近排好忙,當出去行逃離現實。更何況間公司座落紅磡。


屋企地點關係,兩個地方由細蒲到大,一個係九龍城,龍珠開左TRHK之後更加唔使講啦。又因為好多同學住紅磡黃埔一帶,耐唔耐就出紅磡逛逛,中五畢業大作《瘋云》都係出紅磡拍外照架!到達目的地問題話咁快解決,好多野其實好簡單,全因一個懶字同香港人「你有問題我冇問題」心態先煩到我,三點幾回程時,見反正紅磡廣場門口搭巴士,上去行個圈都好。


紅磡廣場吸引力唔細,勁大座多野睇多野食又有機舖,但唔算自己蒲點,全因地方未算就腳,黃埔花園有巴士總站夠便利,環境好附近多舖頭,鬥戲院紅磡廣場得一張票睇到笑的巨人院線點鬥?最重要機舖勁,齋美國寶同當年全香港最大機舖E-Zone已經殺晒啦,話晒E-Zone係轉捩點《丁舉人》誕生半個原因,所以對黃埔區感情特別深厚。諗番起上次入紅磡廣場仲讀緊中學最少十年前,既今日咁有緣經過冇理由唔懷古一下。鍾意在仍保留濃厚舊區感覺,舖頭好舊式,賣衫美容女人舖仍佔大多數,賣電腦用品都唔少,就連賣盆栽都有,玩具舖仲係搵唔到新潮野十分山寨feel,鍾意舊商場全因多元化,同地方寬敞,舖位勁大走廊四五個人一齊行都唔迫,又可以再遇幾間舖老細非常屋寸地開晒檯凳出走廊食野吹水之景況,自從香港興蚊形舖細商場,都幾難再可以行商場咁闊落同見到咁多舊人舊事,紅磡廣場個位改建的話,夠起兩個甚至三個現代商場呀。可惜十年幾番新舊場都難維持,戲院執左、機舖大縮水、吉舖過半,就連美食廣場都執埋,全個場除左租戶幾乎完全冇人,加上個場咁大更顯冷清,我行時先三點幾卦?其實有兩樣野想懷緬,聽人講過紅磡廣場有間美漫舖,唔知幾時開同位置,不過今日行極唔見冇乜緣份。同以前好鍾意去地下正門隔籬間OK飲思樂冰,因為我係百事fans而得OK有百事味思樂冰,OK近幾年至開到成巷成市,以前想搵間都難,而最近我屋企間OK就係/已經係紅磡廣場,見天時暑熱大好時機飲番杯,原來而家已經冇左思樂冰呢回事,又頂唔順豆腐軟雪糕咁new-school,只好灰住返公司。


美好事物,不住遠去。



10/6/2009 WED

星期三,夜晚放假,舒舒服服返屋企抖抖。今晚有線好多正爛片,前排先撞到劉以達,今晚就有得睇番《醉生夢死之灣仔之虎》,戲唔差任達華同劉青雲好睇,聽歌都開心啦有《我是憤怒》同《無盡空虛》仲有劉以達出品史上最強香港電影soundtrack(齋睇歌名已經值晒),同而家已經冇人再拍呢種《古惑仔》路線江湖片喇,你睇呢d戲有線播都可以俾人cut就知幾難啦,內容政治。不過今晚,先講番套新戲先:


Outlander



11/6/2009 THU

近排唔知咩事咁多街出,星期一出左次紅磡,回收左批辦修理,本身今日諗住晏晝再特別親身送次貨同個客講清楚邊件野點用,廢事好似之前四個月一唔掂就打電話黎勁煩。誰不知有個熟客張單做緊,佢總部要佢今日俾一堆緊要file佢唔係出唔切貨,張單落到我頭上我幫佢跟,邊個出口邊個出手唔使問啦?非常之急,急到我要立即打電話返大陸叫人立即幫手整堆file,放上網俾我download落黎之後,即刻燒隻碟再飛車(地鐵嗟)出尖沙咀交貨。十二點幾出發,個客合作左好多年大家好熟,既然出到去剛剛好lunch,又尖沙咀酒店區見面,不如...食番餐自助餐當長期合作成功暨聯誼活動?


「今日你出去,順便請埋個客食自助餐啦!碌完卡問我claim番!記住食豪d!」


都唔使我厚面皮問,老細已經自動自覺提出,聖旨下到不能不從啦!一點幾出到去見到個客,交晒野俾佢之後,由中港城沿廣東道掃,其實想去半島或者香格里拉架,又唔使我出錢,加老細叫到明食豪d,非呢兩間莫屬啦款客梗要俾好野嘛!不過佢時間唔夠之餘我又行到支力加仲有下場唔想走咁遠,去到廣東道馬可孛羅搞掂算。自助午餐食到兩點半,入場仲有九個字,當平日返工時間lunch差唔多架喇。其實我唔太鍾意食酒店自助餐,除左價錢非尋常你我負擔得到(所以我愛打邊爐,一半價錢仲有找呀),同自助餐的確一分錢一分貨,有幸二三四五星級酒店都試過,咁耐只得兩次覺得真係好食,一次係08美國展去賭城酒店食換言之唔關香港事,另一次係好耐以前老豆突然發癲帶大家出去超豪食,唔記得係咪半島,六舊水一位,但好食到喊,似美國果次勁多國家風味外,就連最簡單的腸仔同咖哩角都整得好食過人(...),基本上三百甚至四百以下冇幾多次真係食得滿足 - 我都知只因我食開cheap野唔關人地事。所以今次冇乜期望,自助午餐冇預過會有乜好野食,行左個圈除左燒味(...)同包點如蒜蓉包之類(...),仲有一檔即叫即整「番鬼佬車仔麵」,冇乜心頭好(咖哩角呢?),係有隻焗芝士煙肉包勁好食,不斷地拎,加多個熱辣辣芝士煙肉肉醬燴意,同對唔食海鮮的我黎講全場最貴的羊扒(但麻麻),食下食下質不足但量大塞到好飽,有少少後悔,因為搞到只夠位食一杯雪糕。牌子不明,唔似Dreyers同Haggen Dazs,但乜牌子甚至冇牌子有乜所謂,總之超級好食,可惜食左一杯已經食唔落。原價好似二百頭一位,而家有八五折大約一百八十,算唔算貴?阿公數,關我鬼事?


「多謝你老細咁闊綽喎!」

「唔係!應該係我多謝你俾我搵你過橋就真!唔係你出黎,我邊有得食咁豪呀騎騎!」


當然唔可以唔提坐我地隔籬位疑似黃柏高,十分地似,除左個樣仲有同一副眼鏡同一套衫,而全場除左佢同我地,只得五六檯客人,都幾淡。兩點半截單,但大家出到黎坐低冇乜心情做野,吹吹水坐到三點幾先走。原來呢位同事曾經風光過,八幾年投身金融業,因為公司會計靚女都係金融業出身,都有聽過下有幾黑暗/辛酸,佢一年試過最勁出二十個月糧,聽到覺得威水,但其實底薪勁低可能得三四五千,除番開都係七八千蚊個月,表面風光內堨i能連普通打工仔都不如。要搵大錢唯有靠入市玩埋一份,以為做呢行熟行情梗賺得多?又唔係,真正賺到錢果班只限老細級,因為得佢地先會收到內部認購同小道消息,好彩漏少少俾你撈撈油水,冇的話唯有自己努力收風估估下。論前路又好睇彩數,因為一個普通經紀循規蹈矩做成世都唔會上到位,想升唯有靠阿頭,除左肯放風聲益你之類,假如有朝一日自立門戶,做到佢班子跟住一齊走開國功臣自然有功有祿文員變主任主任變經理齊齊享福,問題係有幾可撞得著好老頂?能打出新一片天下之老頂更難遇。眼見你自己做餐死先賺得幾千蚊個月,但樓上果班聽個電話笑幾聲一單買賣賺筆錢已經多過你成年,「好易做到個人心理不平衡」,加上八尾九頭多番動盪導致投資失利,見時勢開始唔對路,毅然轉行去左做工廠。點知一轉遇著生產業都開始式微,結果由一個火坑跳入另一個火坑,做左幾年又覺得唔多掂,再轉去做行,可惜次次轉親邊行,果行就係開始步入寒凍時期。


「難怪大家咁有緣遇上啦。都係世紀黑仔王。」


佢返開大陸寫字樓,食完晏三點幾,搭火車返到大陸公司都差唔多六點啦,索性留低香港做野算,而我唔係跟住仲有另一個客要見,會坐到四點鐘先起行,順便搵機會搏慒偷多杯雪糕食。第二個客間公司同一條街唔使周圍行,上去擺低件貨傾幾個字搞掂,不過冇一如以往行埋HMV,只有途中順路借廁所上海港城入HK Records睇左睇,見完個客直落地鐵站返公司算,因為慣左訓晏覺,今日食到咁飽又冇訓過勁睏,加上近來好忙差唔多日日要開OT,都係快手返去執執手尾先,唔係跟住幾日有排做。


「近來老細成日鼓勵我地市場部出街同d客見面,我終於明點解。唔係老細開到聲俾機會我出街走走調劑,真係好易做死or悶死。」



14/6/2009 SUN

Tomahawk Metal Fest III
Primordial Transcendence
Rudra Live in Hong Kong



15/6/2009 MON

平時我日頭返工會有空閒時間做做自己野,近來好少機會,多野做又耐唔耐要出街,變相少左時間寫野。RUDRA四月出新碟已經提過佢地會黎香港,終於定到日子同嘉賓樂隊。


「記得11/7星期六晚蒲吧同RUDRA齊齊吠陀!門票已經公開發售!」


次次搞show都忙餐死,都抽空一晚睇左兩套戲。技術上黎講,只係1 1/4套。七刀同學買左《奪寶迷城》,盒面寫住「改編自《奪寶奇兵》都抄佢的原著《所羅門王寶藏》」,主角個樣套衫直頭同《奪寶奇兵》一模一樣,套戲近兩個鐘長,但半個鐘唔夠睇晒。原因?好簡單。


「Asylum出品嘛。」


超長。超悶。相信求祈捉個電影學院學生都拍得好過佢。邊睇邊飛,睇到最後都有d後悔浪費左半個鐘青春,可惜一日未睇埋《巨鯊大戰八爪魚》,一日我都係一面鬧一面睇Asylumd戲。雖然已經九點,激激地氣睇多套,七刀同學仲有另一套珍藏《盜墓者哥拉》,睇到英文名叫《Womb Raider》都知係乜戲黎,公開場合唔太方便播喎。好在我都有套珍藏《再造人卡辛》。之前HMV DVD大清貨,個盒奇靚吸引到我,細個又有睇動畫版,反正三隻$149我差隻腳就搭佢啦。初時完全冇期望,不嬲唔多鍾意睇日本戲,加改編七幾年動畫加日本仔拍唔係好龍珠就係好白痴,因為當時三隻中另外兩隻都係音樂/工業電影,認定《再造人卡辛》會係最廢果套,長久以黎冇乜動機開黎睇。好在冇期望加今日俾《奪寶迷城》激一激再手痕。唔係點會俾一套後EVA路線全CG製作超風格化哲理化東洋電影嚇親?全長144分鐘,所謂「2004年度最差日本電影」令我對日本電影改觀,亦好明白點解會咁差/最差。我諗要睇多最少一次。之前《V for Vendetta》睇左文字幕版,本身諗住搵晚睇多次中文字幕,似乎要讓一讓路俾《卡辛》。


「今個星期三晚有節目開唔成,禮拜五有show,我諗星期四或者星期六晚會召開是次《卡辛》重溫大會,同樣九點開場踩到十一點幾。唉,仲話想搵晚睇《星空奇遇記》添。未計日頭返工同RUDRA場show,原來已經好忙。」



16/6/2009 TUE

周星馳式無厘頭現實版之
太陽能電筒




17/6/2009 WED

無驚無險又到星期三,難得有晚輕鬆,方案勁多,想返屋企慢慢煲碟,應該都夠煲到一隊band全線;想上舖頭睇睇DVD,當然係《改造人卡辛》,繼《Watchmen》好少有戲令我咁有感受;又想去戲院睇《星空奇遇記》,下星期輪到《變形金剛2》上喇,我怕《星空奇遇記》好快落畫或者得番晏晝場睇唔到。早知唔使咁煩惱啦,晏晝一個電話,

「係咪唔使開舖呀?」

「唔使。」

「打邊爐啦!」

「好。」

即興地,八三三又黎聚餐。劉Sir咁懶,打邊爐梗就番佢地頭旺角架喇,不過來來去去幾間,花園金閣行到油麻地已經係個大進步架喇,今晚再接再勵落多幾個街口去佐敦聯邦。近來食得咁密加出到佐敦食原因有二,一來小學停課所以兩條友突然日日返少半日工,二來Sam少住佐敦,橫掂未試過聯邦行遠少少無妨。我大角咀慢慢躝到去先六點七,諗住已經遲啦?點知Sam少做完半晝食飯返屋企即訓七點我call佢先醒, 漢 年底結婚俾阿嫂捉左去睇教堂佈置七點幾先閃到,我拎完位坐低飛埋第一轉先有人出現。格局相當特別,出面一張大檯幾個大碗雪住野飲,有得揀渣裝橙汁、罐裝啤酒同枝裝汽水,餐飲檯已經夠晒誠意,枝裝汽水任飲喎唔易搵架!野食款少但質素高過好多酒樓,同有熟食送加大大盤海鮮雜錦,再黎任飲糖水加個專放甜品雪櫃,雖然埋單百四蚊個算貴,但無限枝裝汽水同芒果布甸對我黎講已經值晒,出面飲枝汽水三四蚊食個布甸已經八個半,今餐齋芒果布甸都食左四個(有d後悔食左個肥牛烏冬導致提早收皮),而且連個布甸都整得好食過人抵番晒。加上環境好位唔迫坐得舒服,同唔趕人嘛。


聽佢兩條友講番停課單野,而家考試前夕先停,學校決定取消期終試用上學期成績作準,上學期撻Q或者諗住學年尾發力果班立即灰到喊,當然佢地就最開心啦考少次試即係改少次卷喎。冇堂上又冇試考,返學校做乜?其實真係冇太多野做,咪全體教職員不斷開會研究有乜野可以做,唔開會的話真係成班人坐係度唔知做乜,校長點會咁好死?另年年四月開始,大部份教師面臨一個重大問題:學校同唔同你續約,又你續唔續約?大把野煩,加上得閒左又長時間聚首一堂,本已多圈子問題的學校辦公室自不然大把是非同政治事幹。又係已脫離教育界的劉Sir沾沾自喜時間。兩條友當然唔少得同大家分享近來141行情,加今期流行巴士短片。噉樣食下吹下,就三個幾鐘。難得咁樂也。


「好耐未試過打邊爐食到勁飽之餘覺得未夠喉。百四蚊果真一分錢一分貨。七月起,應該大把機會重溫。」



18/6/2009 THU

今日睇第二次《再造人卡辛》。據七刀同學提供資料,2004年日本最差兩影三大,除左佢仲有《惡魔人》同《哈爾移動城堡》,前者我冇睇套戲齋睇海報都知避之則吉,後者畫風由油畫變成電影畫已經冇晒興趣。不過《卡辛》睇左兩次,明多左,同仲未睇得悶。我諗再睇多一兩次仲得,或者直頭需要。未話真係好差/太差。


「是沒睇頭的,也多漏洞與瑕疵,不過拍得出特色,同有共鳴,對我黎講就夠,有時一個導演拍戲未必好有水準,但肯去實驗同肯去拍出自己風格,我都會欣賞。當然亦有太過玩攝影同導演風格而搞到忽視質素之例子,但《卡辛》未至於此。」

「將《卡辛》當成一部真人演譯之日本動畫,而唔係動畫改編電影黎睇,會比較『順眼』。」


導演本身拍MV,畫一定靚,但故事確實唔夠突出,人物亦太多,當成一套戲睇的確死硬,特別入戲院睇或只睇一次一班,冇乜可能咬一次就明晒欣賞得晒。調轉擺明睇卡通睇動畫噉睇,從中睇導演點樣從兩種性質不同媒體中尋求新意及突破,反而有驚喜,亦好彩我打慣機睇慣日本動漫,所以覺得《卡辛》好多造作位同超現實設計加大量「廢話」位冇乜問題。最重要一樣:音樂實在無敵,未計片尾曲,平時配樂加靚畫面,音樂人我即時加盡印象分。


「當佢電影又好動畫又好過長加唔完整MV又好,睇多一次就必定架喇。幾時嗟。」



19/6/2009 FRI

而家個個星期都要上大陸做野,相當地忙,今日至搞到八點幾先正式放工,我都懶寫了。不如講講內地飛車。成日講大陸坐車好似入主題公園玩噉,以前老細開部七人車上落廠,高速公路百四米左穿右插,後來大陸影快相捉緊左開到八九十就收手了,但工廠懶理,廠老次次開車照飛,大陸馬路好多減速區即係停車場成日見到種中間有幾條坑拱起等你冇得飛車,佢照直踩油過,我次次都覺得自己好似坐緊越野車,做司機隔籬睇地圖指路果個,又要邊個cut佢線或者阻佢車立即係噉響鞍加勁鬧,鑊鑊坐佢車粗口聽唔少。點知高手中之高手,原來係工廠個駐場司機,今日走時佢載我同個客,貨van仔普通馬路可以開到百二米,正常人開三十至五十架咋!又係死唔減速之餘不斷威嚇其他司機,只要前面有車或者覺得有車想入佢線爬佢頭,隔七八個車位已經係噉響鞍趕人走,平時工廠去碼頭三四個字,今程路兩個字搞掂,當中一個字耳鳴只聽到


「砵∼∼∼」


不如講番我試過最危險/精彩一次(前者定後者睇你個人正唔正常,劉Sir當然係後者啦)。劉Sir成日俾人鬧寫野永遠得字冇畫,我特登用埋我唯一識用的繪圖軟件PowerPoint繪影繒聲俾大家睇(...)。



話說有次同個客一齊上廠,落船後碼頭轉工廠車,途中有程路係雙線雙程行車,十字路口我地車轉左。點知一入彎,迎面黎左兩架車:



冇錯,雙線雙程行車,但係有兩架車,每架一條線朝同一方向衝埋黎,仲要係超高速果隻,呢種情景大陸見慣見熟,基本上有幾多線邊條線乜程冇太大意思。當時我地架車仲轉緊彎,你係司機會點做?換著香港發生的話,梗係三架車全部減速停車,又或最少圖中藍車同紅車停低,等綠車先行大家再走。不過區區兩部車,大陸司機使買你怕?佢反應係:



極速S字形飄移,一野扭過晒佢地重歸正途,威過John Woo、勁過Matrix,如此驚險刺激飛越鬼門關環節海洋公園&迪士尼都冇得玩,差在冇多角度慢鏡重播同罐頭甩尾煞車聲。回神後連後座隻鬼都不禁爆句


"Holy $hit!!!"


我上大陸做野來來去去幾個地點幾條公路叫少見識架喇,再上密d,肯定大把見聞。不過,老實講,「玩」完仲有冇命同你講番有幾好玩,又係另一回事。



21/6/2009 SUN

紙談金屬 Kowloon Metal City
第五章:印度.吠陀.重金屬
@re:spect#38 (20090615)


RUDRA四月出碟時已經寫左篇文講Vedic Metal,不過五月有其他show,加上RUDRA講左好耐話會黎香港,就等正式定好日子11/7,六月中第三十八期《紙談音樂》先出RUDRA黎香港。今場show會好過癮,因為從來未試過有或者印度metal band黎香港,更第一次有人黎香港玩folk系metal,而且我敢講此乃可一不可再之經歷,「保守思想」主導之香港(明顯講得相當隱誨)想睇到呢種metal界奇特樂隊,空前之外11/7/09過後相信亦好難再有機會,同嚴格黎講,今場show一共有三隊外國band,加暑假+金融海嘯+流感大酬賓超值票價,機會難得甚至在香港成世人只此一次呀老細。


「今場show五隊band種風格組合,正好回到個人概念中之Tomahawk Metal Fest但其實在『保守思想』之香港中做metal gig時求變的話,永遠難過甚至灰過唔變甚至唔做。」


至於樂隊訪問,當然係1/7/09第39期《紙談》見啦。記住而家場show賣緊飛架喇。



22/6/2009 MON

唔覺唔覺坐左TRHK六年,見盡皆旺一樓上落興衰、人面變遷,隔籬玩具舖碗碗妹妹唔見左一排,原來讀左年書已經畢業去左澳洲旅行。當然有好野帶番黎啦。



來自澳洲手信有大袋糖,望到即揀左呢條朱古力,見到個名都知點解劉Sir會選佢,個牌子就係劉Sir最愛的pop rock!(乜你以為劉Sir聽metal架?)其實個名已經估到同爆炸糖有關,撈朱古力第一次見,可惜冇驚喜。入口係普普通通甜朱古力,爆炸糖磨到細細粒又唔夠多,好多時因為俾朱古力包住晒關係入到口趙極甚至吞埋都唔爆,食到最尾一截仔先終於感覺到有少少爆炸,基本上唔加爆炸糖完全冇損失,當普通朱古力條食勝在夠長,差唔多成尺長喎,同超甜 - 食慣甜野的劉Sir都覺得有點甜過頭,就真係好甜了。



食完朱古力,需要香口膠清清口氣。估唔到而家連香口膠都有得pop rock。見到包裝咁扁都知將香口膠粉碎到好似爆炸糖咁粉撈埋,但得好少每啖爆炸糖同香口膠大概四一比,而兩種糖最大分別係後者唔吞得,爆炸糖入口爆爆爆爆爆爆,但爆完趙完有粒膠,覺得有點兩頭唔到岸唔多知做乜/想點。唔落香口膠淨係俾爆炸糖我,會食得開心d。


「我都想放假、我都想出去玩呀。」


七月啦。過埋六月下旬,今舖應該唔係假。



23/6/2009 TUE

近期公司同事好活躍。我今個月個個星期都返大陸又有幾次出去行,最經典當然係有客主動戲身俾我過橋開公數食自助餐,但我已經唔算勁,有同事好即興地搵埋老細買機票返上海。突然間我公司搭飛機去見客成為好比搭的士一樣的平常事。其實我都好想出去,可惜d客從來唔使粗心,有得傾果班全部身在外國email搞掂,香港或者大陸有開寫字樓班客一係已經熟晒唔使得登上門,又或根本冇料到上都冇用,所以冇太多機會再借機出去行街食飯。不過講到食,留係公司其實同出街食冇乜大分別,普通一餐已經可以食到好癲。近來有改善的了。「改善」這回事是相對的。



近幾個月已經好克制,餐牌如果冇特別好野,就唔叫飯盒而只叫三文治或者早餐食算,好似今日lunch只叫個早餐咁大把。圖中所見其實得三分一左右真正關我事,早餐一個包括兩塊魚柳兩條腸仔加塊薯餅,餐飲一早俾人搶左腸仔亦唔見左條,唔緊要一塊薯餅時間,其他同事將(食剩的)炒蛋呀豬扒呀漢堡扒呀掟晒落個盒,順便送多碗麵。女同事們每餐永遠只食少少,有時兩個人甚至三個人分一個飯盒,叫左個麵返黎先發現「食唔落」,當然係塞俾劉Sir啦。一唔覺意,我個「早餐」就變成雙倍份量了。其實就算唔叫自己餐飯,日日單等其他同事施捨都餵得飽,不過有得食唔食好犯賤架,有得叫有乜理由唔叫先!所以一日最多可以有三個免費餐食,食完晏嘆多個下午茶,仲有個剩番夜晚。好似今日,食完上面咁多野,夜晚仲有個焗肉醬意粉。


「我真係好想減肥呀。不過各位女同事對我咁好,點減?」



24/6/2009 WED

Terminator Salvation



24/6/2009 WED

近排好無聊,係噉睇戲。無聊到煲番《Blade》同《Bio HazardResident Evil》全線,兩個三部曲共通點甚多:都係耐唔耐電視撞到,每集叫睇過最少一次,同被典型荷里活化,故事人物唔夠突出,亦犧牲原作黑暗緊張刺激只餘打同埋打同埋打 - 《生化危機》加多樣賣囡囡,相信是最接近原著一項。其他共通之處包括都係第二集最好睇,同第三集唔拍好過拍,仲有配樂正,特別《生化危機》勁多metal同industrial睇得特別開心,雖然白痴,但搞到我有d興趣睇埋爛到爆的《House of the Dead》。《再造人卡辛》睇左兩次仲未夠喉,難得星期三放假諗住睇第三次,隻DVD去左皓哥仔度冇得重溫,繼《V for Vendetta》再《卡辛》大家傾開電影中極權世界觀,諗番以前無意撞到正在製作之芬蘭獨立電影《Iron Sky》,加埋《BC》咁得意提到,不如講講佢。


「睇完trailer,再睇睇《BC》介紹啦。

「當然唔少得官網。


製作組前作叫《Star Wreck》,睇名都知玩《Star Trek》,不過我唔係睇好多戲又唔算大電影迷,加上少上網、唔download,會知道《Star Wreck》全因獨立精神:製作組容許有識之士參與製作,只要你有可行概念、有技術同藝術支援,合用又好傾都歡迎參與,當2009年初YouTube交響樂團大家覺得好有新意,芬蘭獨立電影界已經玩左全民皆兵十幾年。《Iron Sky》梗繼續,好多網上素材例如官網張「motion poster」,都出自網上自發組成之智囊團技術組,不計錢不計名勞心勞力捱義氣幫手做,導演自己亦努力搵人注資贊助同演出。即使《Star Wreck》製作質素非常indie,同樣需要投資錢同特別時間,特別呢種「特技電影」,但拍完免費俾人睇,從第一集《Star Wreck》開始十幾年後成左名先再搵label幫手做授權出DVD復刻,一開始動機、整個過程甚至而家去到似樣製作級數,全部非謀利甚至非為名,所以唔識班友、未睇過《Star Wreck》、唔太知《Iron Sky》,單睇背景我已經訓身尊敬。你知劉Sir在乜都要講著數講名利的香港獨立音樂界打滾左幾多年架啦。


「諷刺在,乜獨立藝術唔係棄商業甚至反商業,即如Wreck Movie Crew所作所想?點解香港獨立音樂界好多人反而事事首先關心著數名利,這又何來獨立?」


故事題材亦走唔甩。納粹主義東西動漫成日玩,日本卡通同特攝片常見之邪派和黨羽,擺到明軍國主義同納粹色彩返生,《再造人卡辛》更加做到出晒面,美國漫畫曾經作為政治教育工具,劇情同歹角點會少得納粹份?不過自己認識同著迷之起點,還數史上最經典第一身射擊暗殺希特拉 - 拎住枝機關炮屠殺幾千納粹軍人都好難叫暗殺架喇,不過重點在齋射之餘帶得出一個人深入虎穴對抗同推翻整個極權組織份革命感,對納粹史引起興趣 - 唔係極端思想而係野史,即種種有關納粹與超科學及黑魔法關係之學說,後來第四集立體版納粹黨玩到古代戰士屍首還陽同喚醒魔神,魔法科學二合一背景發揮得更盡。睇漫畫睇戲的話,《奪寶奇兵》經常用納粹黨作反派,Hellboy出身乃二戰時納粹黨打開異空間而誤闖人類世界,例子當然仲有無數多,我見識少講唔出冇計。


再進一步發展,就去到空想歷史,一係軸心國戰勝聯軍,C&C系列中Red Alert正是玩弄此種虛構歷史,講愛因斯坦回到過去從時空中刪除希特拉,進而令蘇聯強大發展有機可乘;另一流行就係《Iron Sky》式太空納粹黨。既希特拉執政時醉心各種異類學說,擁有強大科技同巫術妖法,輸左二戰唔代表完全失敗,餘黨利用宇航科技到月球設立基地,準備飛碟大軍等待適當時機反攻及佔領地球。基礎是掌握無上權力而冷酷無情之鐵腕政權,意識同詮釋已令人感到一份無形壓力,香港人背靠祖國更清楚其中一派有幾可怕,所以空想歷史魅力歷久不衰,全靠(算)熟悉得黎又全新且創作空間無限大,同魔爪無處不在、行差踏錯即死、將來全無希望之氣氛,可以當做一種另類恐怖片,而從暗殺希特拉到Red Alert,我好迷呢種不安不祥,亦即《Iron Sky》trailer種感覺。好期待有緣一看之日,因為段trailer睇左年幾仍然未睇厭加越來越想睇全套,同最緊要戲名夠晒(power) metal呵呵。等左咁耐,都唔介意再等多大半年至年幾,只不過到時點樣&邊度有得睇又係問題。或者我需要開始學點樣用BT了。



28/6/2009 SUN

旺角返工其中一個挑戰,就係搵到又平又正又好食的茶餐廳,一係好污糟,一係唔好食,一係偏貴,我知商業區黎講三十蚊左右食餐飯算普通水平,你知我食開十尾廿頭一餐,要我俾近三十食個lunch或晚飯唔係日日捨得,通常禮拜六日至會豪佢一兩豪,特別真係好食同有特色者,我唔介意豪d支持佢。


不過旺角租貴,近幾年市道又唔好,好多食開正舖紛紛收檔,十分傷心。例如間魚蛋檔,一間旺中地鐵站出口一出過馬路就係,當年全區最抵食價錢平又多,係旺角區煙肉腸一串五舊先鋒之餘甚至平過人地,又有炸得勁好食之麥樂雞,而且唔同好多魚蛋檔用超市急凍粒粒吉列皮雞塊,而用番麥記種薄皮雞,好味之餘一蚊一舊叫十蚊食到飽,試過一次完全唔使食麥記 - 麥記買麥樂雞都冇咁平冇咁好食。間舖地利又好我放工實經,高峰期日日食好開心架,可能就係咁著數,兩年前2007年中已經執左。跟住移師朗豪坊對面,同樣好食夾多款,可惜市道差左後係噉加價,去到七蚊四粒咁離奇,話咁快執左笠是抵死的,但一向唔太鍾意先達樓下果間,有一段罷食煎炸野。


但只限好短時間。魚蛋檔行前少少,冷巷位有間飽餃店賣上海糕點,試過幾次唔錯,禮拜六日經常幫襯買鍋貼搵佢加送。同鍋貼有廿幾年不解之緣,細個屋企附近間上海菜館,每逢老豆口痕或者有親戚朋友上屋企打牌,就會使大筆錢食上海菜 - 的確要用大筆形容,時值街邊仲有推車仔魚蛋兩蚊串六粒年代,一客五隻鍋貼十五蚊,即收三蚊一隻,絕對奢華極侈。始終我屋企算舊區大家慣左平價消費,如此價位確難獲大眾接受,間上海菜館幾年後執左,另一間(名店?)老正興捱到我讀埋中學先執,但一直要到2008新年前夕重回大埔發現之鍋貼大王到我屋企樓下開分店,先再有機會食正鍋貼,不過食耐左發現水準唔太穩定且開始下滑,最好食之鍋貼,始終係細個食開第一間上海菜館,因為皮夠厚又炸得脆,入面包住勁大舊肉再勁多汁,以後冇幾多次食過一樣咁落足料咁好食之鍋貼,對比鍋貼大王2009仲賣兩蚊隻,二十年前三蚊隻係有理由的。飽餃店d鍋貼冇乜汁乾左少少,但厚脆皮加多餡令我回到從前,當然價錢都係:十蚊三隻,貴也。


因為七仔近幾年做埋熟食生意,要食平野有新選擇 - 「平」只是以旺角好食又飽又抵計,好似我成日食之撈麵六蚊碗拍埋飯盒梗平啦,不過07年聖誕節美食節掃貨價$1.5/包,唔從旺區角度睇實在超級搶錢。主要靠佢crossover。平常玩法係七記買個撈麵,再加十蚊鍋貼三隻,$16一餐夠晒,就算唔食個麵,單三隻塞爆餡鍋貼已經飽飽地,想豪d廿蚊有七隻鍋貼肯定夠飽,而我買到熟晒,阿姐試過見d鍋貼老左少少,廿蚊俾左九隻我即係平左十蚊,分兩餐食仲得。可惜當我成為熟客之後,間飽餃店又無聲無色地消失,$26九鍋貼撈麵已成絕響,試過變陣到先達樓下買牛丸買煙肉腸伴麵食,一年間加左價30%-50%成本價篤兩串仔野已經廿蚊唔甘心(雖終於肯煙肉腸由一串四舊俾到五舊了),同點食都唔夠食鍋貼咁開心咁滿足,試過幾次又放棄了。


後來瘋薯將薯仔瘋帶入香港,旺角區薯條舖係噉開,地鐵站魚蛋檔附近就出現左間蘇格蘭薯堡,我唔明食個薯仔點解可以咁鬼貴,不論薯條、焗薯、焗飯/焗意還是其他小食此四大類任一,基本上你預定要跌廿五蚊,加埋野飲三十啦,但人工同料同量點計都唔使一半,真係賺到佢地笑,不過食慣鬼佬野又捱左幾年飯盒麥記雞記乜都夠,難得有新野試試,即使水準只算中庸都制。食過咖哩焗意粉,根本係咖哩湯意d汁多到恐怖,用KFC種橢圓長扁形飯兜,厚一寸唔夠但多汁到d意粉可以浮上黎,睇見都驚,見識一次乜都夠晒。又食過焗薯,鑊鑊俾得隻叉咁大把食左幾次仲未識得點食,極難撩d薯仔肉出黎,而且我到而家都唔知其實薯仔皮食唔食得、乾唔乾淨,鑊鑊食焗薯都搞一大輪,最激果次一個薯仔食足九個字,咁麻叉煩而家我只食薯條。有幾次炸得非常脆同香,但大多數都係偏淡稔,全靠佐料搭救,而我試過好多隻味,唯有免治牛肉薯條百食不厭,因為肉醬味夠濃薯條入口先夠味,其他一係太淡一係太少醬,試過一次叫魚柳薯條,居然乜醬都冇茄汁都唔俾,魚柳起碼有少少味精入到口,但要乾啃淡食成兜薯條難度過高決定放棄,都係免治牛肉薯條保險。雖然食耐左發現水準幾海鮮,我受到同食一杯已經好飽肚,蘇格蘭薯堡陪伴我渡過好多週末午飯與晚飯時光。


但炸薯仔咁乾好難唔叫野飲,三十蚊一餐吸引力只夠維持幾個禮拜六日,好在佢地醒水,睇正我就黎唔食佢地之際,開始賣埋珍珠奶茶推下午茶餐:



免治牛肉薯條原價$25,加多罐汽水收足$29,而珍珠奶茶單買預左十幾蚊杯,鍾意飲都唔捨得。下午茶餐抵玩在$25有薯條有奶茶,即係原價再送杯野飲,噉就覺得值番每蚊每毫了。論薯條,同其他舖如「正牌」瘋薯比,質素著實差一段距離,單瘋薯d薯仔已經炸得脆d有味d汁又多選擇,但薯堡以量取勝,薯仔size一舊等於人地兩舊(幾),加上我地頭得佢一間肯送貨,單以當餐飯食得飽計,蘇格蘭薯堡絕對勝過其他性質較接近賣街邊小食之薯條檔 - 當然係以劉Sir一人可以食一桶雞的食量作量度標準啦。杯奶茶極似外判,不過自從仙桃島執左,而家要飲外賣珍珠奶茶得佢地一間,好在整得好飲。好多檔例如旺電果頭四五蚊杯d地舖,奶茶往往開到好淡,珍珠冇味又唔夠口感,薯堡正在完全冇呢d問題,珍珠同奶茶兩樣都夠甜,珍珠而彈牙好好食,單買黎飲都正更何況而家免費送咁著數。所以佢地出左下午茶之後,好少再食其他,同叫個飯盒差唔多價,加價加到黐線之麥記加更唔使理,最重要佢地都唔夠食兜薯條咁飽嘛,結果薯堡由奢侈品變成大眾飲食。確幾完美。除左一個問題。


「大鑊。食左一個禮拜薯條,條腰又粗左幾串。(又)係時候計劃減肥。」


不過過埋今個月,呢個問題應該唔會再係問題了,呵呵。



Tomahawk Metal Fest III
Primordial Transcendence
Rudra Live in Hong Kong