聖誕假放完、新年假放完、繼續工作，2008再見。生活、社會同音樂皆達最低潮流之一年。眼見現在經濟情況，我冇預過2009甚至打後幾年，可以活得比2008輕鬆、精彩。所以，都係收皮算。聖誕加新年完左，仍然放假放得意猶未盡，所以一次過出大量稿交差，跟住，俾我放多幾日假啦。

繼《激流青春》，亞視又有好野睇。今日起八點半又有新自拍劇《東邊西邊》，預告片已經吸引，羅蘭喎你幾耐冇見過佢！好開心仲有亞視自拍劇睇，點都要支持下啦！唔睇尤自可，一睇笑爆咀。故事發生於近未來，中國共產黨方成一統天下大業，漢語成為世界法定語言，全美國不論人種通通操流行漢語，劇情睇名都估到，就係講中國人去到西方面對之生活不調及文化衝突，雖然無線以前好興拍呢類劇，長期堅守內地鎮地之亞視好似冇太多劇會出埠拍，而且拍出黎唔娘唔大陸，呢套都算難得，但同無線劇唔同，亞視一來冇咁多就番而家觀眾的低能位，二來睇得輕鬆，當其中一個重要角色係個個look超級metal的法官，可以長金毛上庭唔使戴假髮，同睇睇下無端端變左部「國民應赴海外振興中華」的愛國教育電視劇，就知套野有幾正啦！近兩年電視觀眾俾無線搞到好極端，自《溏心風暴》起全部走doom death路線，但睇電視唔係就係為開心為放鬆嘛？《溏心風暴》之後，好似香港觀眾已經唔記得晒了。唔doom的話就好似八點做播半個鐘果ｄ處境劇，但講笑又唔夠以前《卡拉屋企》、《開心華之里》咁正變成齋賣低能白痴相當膚淺。鍾意睇《東邊西邊》，唔係話套戲特別好睇，而係喚回九十年代睇電視真係為品嚐睇電視果份味道的感覺，而家睇無線完全搵唔到果種feel。亞視好耐未有過咁精彩，晚晚播黎播去唔係婆馬時裝韓劇就係悶爆古裝韓劇，應該拍多ｄ劇振作一番啦！而《東邊西邊》另一賣點係囡囡。上次同張導演要求《文化潮流》訪問要搵呂晶晶黎訪問我點知被放飛機，今套戲有佢份喇終於，梗要捧場啦！再睇睇其他演員，十居其九係絕對見得人的囡囡，明顯亞視盡地一煲搵晒全台最掂班女演員做呢套戲。

「是否Wiki Wong發功？加油呀亞視！你地執左的話，我都唔知第時想睇電視時點Ｑ算呀！」

無線又未衰得晒。雖然《溏心風暴》整doom晒香港電視劇後已經只睇英文台，新年第一擊勁歌頒獎禮更加睇完頭兩節熄得機，新節目《星星同學會》扮足台灣娛樂清談節目，扮唔緊要講得掂唔掂先？你一睇就知道劉Sir實話掂。當你會講唱片工業、會有謝安琪，已經令佢100%支持之後送多100%啦。

「我怕好快無線會剷左個節目，連YouTube都冇得睇，點知我用開個software死左，而家download唔到YouTubeｄ片。有冇人有YouTube ripper介紹？」

今晚TRHK好多人入黎。原因？梗係因為今晚冇metal聽啦。R先生上黎係噉播太極嘛。BEYOND人人識，但太極曲詞唔差過，個人覺得技術層面特別結他更勝BEYOND，但BEYOND有黃家駒，冇得鬥且雖敗尤榮。BEYOND光芒實在太過燦爛，到今時今日太極仍冇太多人識 － 拿，我都唔多識架講明先我唔係專家！不過的確好多金曲，我之前執過隻精選，不過唔知掟左去邊仲未聽過（．．．），似乎係時候尋寶了。除左好聽同懷緬過去，仲因為今晚一談，繼METALLORD後我地再搞多隊新band EASTERN EMPERORS東方之王，就好似亞洲神童一樣唱好東方之珠！大家分工Rock爺打番鼓，我就可以專心一致做歌佬！

「點解隊band叫東方之王？有冇聽過NORTHERN KINGS？」

打響頭炮的兩首歌都揀好左。第一首歌係《頂天立地》：

曲詞MV根本就是MANOWAR。點可以唔玩。太極搵咁多大隻佬騷肌肉拍，來到廿一世紀，我地EASTERN EMPERORS應該要重金禮聘FREEZE出演MV。二十年前，呢種曲呢種詞屬於香港流行曲。而家得地下樂壇搵到，甚至地下band睇見聽到都笑你娘，可想而知香港樂壇倒退左幾多。

呢首又係想玩，pop rock玩到咁technical咁math，仲要係香港歌，幾難得呀！MV著到做大戲噉算前衛，不過記得同期BEYOND太極有次俾人叫著到大戲噉上公開活動表演（好似唔止一次添），唔知導演靈感係咪從此而來？話說回來，當歐洲人玩folk/pagan/viking metal可以著晒中世紀衫披晒獸皮上台而大家睇得開心，自己中國人調番轉中國文藝裝表演，卻只俾遭人恥笑。這是香港永遠唔會有自己地道金屬出現的原因。除左盲追潮流（以前有幾多隊唔係玩J-Rock？跟住有幾多隊唔係玩nu-metal？然後有幾多隊唔係玩metalcore？），仲因香港人自己都唔接受、唔支持自己中華文化。點解成日話大陸band有特色有水準？因為好多會將地方音樂加入rock/metal。但香港搵到個band友對中樂有研究有認識都難。同香港人（必須唔執輸）研究的，是最新果樣i.e. metalcore，而唔會係源遠流長五千年文化。

聽完歌，再睇戲。傾起LOST HORIZON，就拉到《挑戰者》呢個經典系列。係喎，之前買左頭兩集DVD，仲未睇。頭兩集當年明珠九三零成日重播，第三集仲未睇過，第四集當年我入戲院睇，果陣仲要係未識睇戲、未開始認真睇戲的白痴仔一個，而家諗番當年居然咁白痴都會俾錢入戲院睇都覺得自己行為神奇，證明潛意識中我已經是個超級《挑戰者》fans，可惜時至今日《挑戰者4》仲係最後悔睇左電影之一，分分鐘仲灰過睇港產廢片。點解？有機會一定要開個Project: Highlander，同大家講講呢個商業電影史上最大騙局。但首先要搵到第三集同第五集DVD先。第四集都難搵啦大佬。

「講開《挑戰者》，提醒大家，今個禮拜日明珠930做『2000世代《挑戰者》』《The One》喎！」

其實我真係好鍾意《最後一強》呢套李連杰唯一科幻電影，除左動作場景道具設計超乎電影所屬級數，平行宇宙設定合晒美漫迷我合尺，仲有套戲雖然屬於典型李連杰即動作凌駕故事，但拍出黎唔差的，電視播加DVD我睇左最少五次，相信又是《挑戰者》的原因。好希望《最後一強》會有下一集，不過咁小本格，加上要拍一早拍左啦套戲01架喎？繼續等明珠台一次又一次重播啦。等唔切，DVD同YouTube搞掂囉。睇套戲其實只為呢一分鐘：

前排成日鬧無線，無線又唔係真係咁地底泥的，曾幾何時禮拜一至五晚晚九三零有好戲睇，夜晚睇電視好開心架！．．．不過已是曾幾何時之時，同係英文台唔關中文台事．．．冇事，我地繼續敵視無線熱撐亞視啦。

一路寫冇乜特別留意，原來劉Sir個blog開左年幾。自07年11月1日起壇，到今日12/1/09，已經有十三個半月。以前好多人問我，寫網時一日有幾多人睇？話晒段記都維持左八年幾，有一班固定讀者。當時仲係「underground」，冇乜諗過有幾多人睇呢樣野，直到開左blog有統計先知。玩左十三個半月，瀏覽人數二萬四，除番一日有六十人左右都幾穩定，中間試過幾次瀏覽人數不正常增加。同音樂無關者，主要兩次都因劉Sir個朵：第一次要特別鳴謝小惠同學首次為本blog帶來一日近百人次。第二次全靠「善用多用途室的劉Sir」帶契令我俾人點錯相，連帶引來好多入錯冤枉blog的朋友幫左另一位劉Sir谷收視（我成日話姓劉冇好人架啦）。期間間中講講主流音樂，好似黃家駒同MY CHEMICAL ROMANCE甚至較近期F.I.R.，都引到近百至過百人入場，臨床結果證實在blog講metal絕對唔會有助增加人流，只有潮物（包括metal及非metal）方呈陽性反應。上圖是開壇十三個半月以來最高視收紀錄，發生於08年12月4-5日，居然可以一日有四百八十人光臨，根據平日一日得五六十人之穩定數字，我覺得Yahoo輕機計錯數多。你會問5/12/08發生咩事呢？冇咩事，只不過幾日前將Tomahawk Metal Fest後記擺左上網嗟。會話Yahoo輕機計錯數，皆因我唔覺得寫到出黎會有多少人有興趣，劉Sir寫作出名臭長夾臭串，加上場show之直接影響（當然唔係講「TRHK搞果場魚蛋show」啦，係另一場），係事後令death metal成為metalcore後forum力捧之熱爆討論／「分享」題目，大家上forum睇大家講緊邊隊新band齊齊「分享」都趕唔切，仲有幾多人會有興趣睇番一場「成個月前的魚蛋show」？

「又可能，劉Sir真係有咁多仇家呢，呵呵∼」

blog左一年，寫作取向已經全為遷就寫blog而改變。以前underground時段記係生活中重要一部份，每日唔寫番一兩段唔算完整，就算好眼訓都寫到三四點鐘記晒全日發生咩事先訓覺，即使當日冇乜事發生都整幾句記番低「當日冇乜事發生」。有時冇寫到之後都會追番，好似試過學期尾長期駐守學校通頂趕功課而兩三個禮拜冇更新，交晒功課後返到屋企一次過寫番追晒咁多日，如此每日必寫段記，是一份（幾無聊）的堅持，真正斷寫長時間只有因「嚴重事故」，發生過不多於三次，而且當時停一個禮拜已經叫做「長」。不過blog之更新系統同介面實在太唔同，以前種寫作方式完全唔合適，加上近年個人懶左好多，所以開左blog之後好多野過左就算，頭六年只斷寫過兩三次加每次停超過一星期已經唔開心，而家閒閒地隔五六日先update一次已唔覺有乜大不了，冇左以前覺得寫少日好大件事要追番之執著，頹晒喇個人。

睇得其他人寫blog睇得多，覺得blog界高手如雲，而寫blog者往往有創作大方向，間接令自己寫文都追求集中。以前特別返學時，寫段記真係由朝寫到尾，二千幾字講全日發生五六件唔同事，生活化同過癮但會好雜。直到睇人地寫blog先知「原來日記唔一定要日日更新」（．．．），文章內容精益求精左較具主題性，你比較我開blog前同開blog後內文同更新手法就知相差好遠。初初開blog好多人諗住個網同個blog寫ｄ野會唔同，結果發現是一樣的，被昆左。大佬，我一日無聊聊都可以寫成千幾字，寫咁多仲要個網同個blog寫兩樣唔同野？會死的。一雞兩味算啦，叫做俾多個選擇大家：好多人話劉Sir個網太樣衰，但白底黑字實而不華賣內涵非賣包裝就同劉Sir一樣，是劉Sir個網的思想同賣點所在（明顯是掩飾自己電腦技能不足），樣衰唔鍾意，上黎個blog叫做多番少少顏色好睇ｄ囉呵呵，同有興趣者可以留言討論唔再得個睇字。

但有辣有唔辣，因為「有方向」左（同懶），寫野冇以前咁放，你知劉Sir十句有七句不離老本行五金業，走大方向的話睇佢個blog就會得metal metal metal metal metal metal同埋metal。因為長期寫死同一樣野例如metal會好悶，而自己個網一開始起已經係無目的地無定向寫作，果日有咩事、果刻想寫乜就係果（幾）段，所以我盡量寫番多元化野唔好死寫音樂，難在日頭份工唔係日日次次咁多野寫，而返工以外生活就係TRHK睇舖同metal，到頭來兩日就有一日同metal有關。就算我而家摷番好耐以前讀書同實習ｄ段記黎睇，好多仲可以睇到笑爆咀。而家生活真係枯燥左好多。同音樂變得太『重要』矣。所以唔日日update都有好處。

講人次，同好多人／高手比當然兩個級數啦，高手blog閒閒地一日都幾百甚至幾千人睇，一日得幾十人次根本唔會發生。但作為一個藉藉無名的路人甲（你覺得劉Sir好出名？我唔覺），加上寫metal咁「冷門」，下一個突破一百人次係幾時？要達到其實好簡單，只要唔從工作者角度講番而家香港metal出現左咩問題，而每日post幾條link講有乜正metal band／碟好聽要download，會有更多人覺得我係「寫metal」、「支持metal」，點擊人數必定幾何增加。可惜你知我唔會噉做（又一（無謂的）原則）。只好繼續等撞手神。所以相信下一個「高峰」遙遙無期。冇所謂我都係一如多年非常無聊地亂寫，但開左個blog其中一樣所見到係自己種寫作風格已成一派。真正開始寫段記係八年前暑假，而家睇見之寫作格式、筆觸、思維，早在當時已經建立好，七年幾黎都冇乜改變過，係劉Sir惹上TRHK後再．．．metalｄ囉，呵呵。開始整網時仲係Geocities時代，冇幾多人會專登開個網頁上網寫日記，到後來blog呀xanga呀玩盡全世界突然萬幾人話寫，睇番其實好多寫法用字甚至開始長期寫日記種風氣，早在blog同xanga出現之前已經執著多時，不過我一向低調同underground，相信冇乜人知道劉Sir原來咁威水（．．．）。好多人同我講番，雖然我寫ｄ野好柒（．．．），但咁多年黎的確搵唔到第二個人寫野方法同文章組織似劉Sir，一睇就知係佢寫緊野，而呢種寫野方式就好似metal都幾extreme，一係睇極唔明做乜，一係成為長期讀者，身邊已有唔少人追左段記幾年。開左個blog，吸引更多之前未上過劉Sir個網之blog用家、新讀者之餘，亦見到有人（通常是metal友）用劉Sir式寫作法寫blog，呢種「Sir劉寫作法」可以成為一種影響，都算一個幾估唔到的結果，就如好多人可以以前唔熟甚至冇見過面，但一撞到立即一見如故，就係因為個網同個blog，而我冇諗過自己寫作可以同咁多人拉近距離。所以仲會唔會有「高峰」我都懶理，繼續寫落去先算。比其他人更早諗到更早做、創出唯我一套、因寫作而得到之意外收穫，比寫出黎有幾多人睇，更能使我滿足（定虛榮？呵呵）。

今日公司又冇皇管。返到公司鍾意點玩就點玩梗開心，不過現今時勢老細兩個間唔中上一轉工廠，就當然冇好野啦。結局係點一向懶理煮到埋黎先至食，難得如此大好時光，返工前去麥記買個早餐上樓嘆嘆先。因為耐唔耐就白食人地豐富早餐，加上 聖誕收得人地份禮物梗有代價啦（即使份禮物是豬頭骨），迫於無奈地要買多份俾會計靚女。一面食早餐，佢一面分享前排去君悅享受帝皇式自助餐。話說上星期三佢過海去君悅拍拖，港島區高尚酒店係唔同ｄ，有戶內戶外兩個範圍，單講戶內已經大過我間公司，落地玻璃望出去就係酒店泳池。黎到呢個級數酒店梗有專人服侍，但會專到一對一甚至二對一咁周到，行親埋位立即有人幫你拉凳，一坐低自動幫你鋪餐巾，見你起身出去拎野食立即執好晒檯面返到黎乾淨整齊，未試過有自助餐服務咁周到咁有效率。拎野食要出外面，天氣凍關係閂晒門，出去會有人幫你拉門俾你出，負責睇檔的廚師門又會好熱情地介紹你食乜乜物物（係咪要揹quota，整出黎ｄ野食清唔晒要罰錢的佢地？），雖然我去到邊都係食咖哩角（．．．），對高檔食物冇乜認識，經佢源源不絕的講解，都理解到野食有幾貴價有幾高級，好似原隻龍蝦佢一個人都拆左兩隻再加大量鵝肝醬同海鮮，平時街賣幾十蚊件的小食或甜品呢度無限量供應又係勁食，計錢的話食左過千蚊都有。食飽飽去廁所，入到去乜都冇得兩間房，原來係再分兩間獨立廁所，洗手盤花妝檯所有野一間房包晒，仲豪過自己屋企。可以咁帝皇享受，可能因為根本冇人去食，七點幾入場時全場幾十張檯先坐得八檯廿個人唔夠，坐到九點幾已經得番佢兩個包場，靜成噉，唔玩人釘人班侍應真係冇野好做架。

「聽落好正喎！幾錢先？」
「五百五十！」
「噉就真係好抵食喎！酒店自助餐收得咁平！」
「係一個人五百五喎！」
「好在我唔係你條仔。」

經過咁豪一餐，今日公司晏晝飯食茶樓叫點心，叫左三十幾籠擺足全張餐檯，會計靚女都嫌排場唔夠食之無味。真係咁正？好在今晚我都有機會一嘗豪華自助餐。老豆雜誌睇到尖咀而家好多酒店勁減價，有間做到六五折埋單一條友兩舊水多ｄ，仲平過去茶樓同小肥羊，今年所謂團年飯就酒店自助餐搞掂了。我發覺經濟越唔掂時，我地生活越豪，換著以前你叫我好似會計靚女俾五百五十蚊食一餐？睬你都戇啦梗係！（當然又要睇睇對手係邊個先講啦）係而家全世界仆街商賈唔敢再吊高黎賣，同團年飯唔使自己出錢（這才是重點），先夠膽／有機會食咋！上次我出洲際見客差少少有得食免費自助餐，今晚去食洲際隔籬間新世界（係咪改左名？），既隔籬洲際稱為全港最正自助餐之一，應該唔會差得去邊卦？．．．我食野已經求祈，都覺得冇野食＆冇野好食。廣告話有無限Haagen Dazs，收二百幾蚊一位的話單為呢樣真係值得入場喎！點知ｄ雪糕，係好食的雪糕，但唔覺係Haagen Dazs雪糕，雖然已是全餐最好食／真正好食果樣。被昆左。

「一分錢一分貨，似乎都係去君悅食好ｄ。不過，最無敵似乎還是花園金閣。劉Sir打死邊爐是有原因的。」

一餐趙完，未夠，仲有得食：

琴晚屋企團完年，今晚到公司食。食就麻麻，玩算OK，不過因為同會計靚女的一番對話，是日收皮：

「六點半開席，酒樓趕做生意每轉兩三道菜噉上，八點就食完啦！」
「食完有咩節目？」
「我有個朋友話今晚Megabox九點半有演唱會睇。」
「咩演唱會呀？」
「謝安琪加關楚耀mini concert。佢有兩張飛俾我。」
「咁正？我想睇呀！」
「佢係噉塞兩張飛俾我，不過我冇乜興趣，推左佢三次，最後冇拎到飛。」
「我小！！！！！」

難得遇到謝安琪開演唱會，仲要撞到一晚唔使開舖可以去睇！點知！！！！

餓得耐了 － 其實上批貨係半個月前聖誕，對我黎講絕對唔耐因為你執一次碟聽真都唔止半個月啦，但對上慣網的香港人黎講，一個甚至半個禮拜冇新野已經係唔Ｘ掂的大件事。為應付市場需要，黎緊會入番密少少貨，但作為聽眾同顧客的大前提係，請唔好唔識唔新唔潮就話係垃圾。需知TRHK好多常被人稱為『賣剩蔗』的，好多唔係「唔好聽」，而係「未潮」。就如當年TRHK有賣過唔少metalcore野，好似神聖的LAMB OF GOD，當時入左冇人理，播俾人聽ｄ人話「都唔知乜黎」、「都唔好聽」。賣晒若干時日後，metalcore潮左，有人返轉頭黎問有冇LAMB OF GOD，答冇／賣晒，話番你轉頭「都唔知你識唔識metal」、「都唔知你地係咪賣metal」。有好多野，好唔好聽，係靠你對耳判斷，而唔係對眼睇band名同睇網上有冇人講。TRHK有好多碟，可能Ｎ年之後會係潮流、興爆全城，你而家聽，只不過係（比其他人）聽早幾年嗟。

「請讀參考文獻《八三三》。」

大家結緣／結怨於year 1，三條友都修常識，上堂同功課要分組，當時佢地唔識我，我又唔識佢地，共通點係大家都唔識其他人人地個個分晒組，局我地三條友要一齊啦，加上我唔住宿舍而佢兩個同一間房，每逢無聊日子或學期尾佢地間房就成為我別墅。就仆街了。相處耐左，發現大家都是喪的，在人前我地表現得十分正經（劉Sir的是傻仔），但人後自己三條友時大量超無聊不正常行為，例如買個鏢靶上房飛到成牆甚至成門都係窿；走去公家康樂室拆晒梳化ｄ褥出黎練拳，打到ｄ梳化唔知仲坐唔坐得（做沙包果個當然係我）；放假或冇晏晝堂上的日子租成棟漫畫上房，我唔使返學都專登出大埔買桶雞上去大家食住刨，當年《魁男》同好多漫畫就係噉樣煲番黎；學期尾趕功課，屈蛇上房通宵趕工，但往往話做野變左訓覺（我係訓地下）、睇漫畫或者上網搵四仔；曾幾何時大埔麥記有賣大盒麥樂雞同雞翼即係廿幾三十蚊有十幾件果ｄ趴地裝，見食KFC食到悶，大家夾錢買幾個餐幾十件雞上房食，當然一半歸劉Sir啦，更有動機去百佳一人一隻原隻燒春雞，不過講左四年都唔成事，是我們教院生涯的一個污點；朝早上晒堂，晏晝出大埔亂行搵野食同打盡大埔大小機舖，打完機，當然又係食KFC； 漢 買個沙包返房，吊係天花水管練拳，幾乎成條水管拉爆，Sam少就買架單車，有時夜晚大家做功課做到支力或唔想做（後者佔九成），兩三點衝落樓下教院門口巴士站飛車，嘈到隔籬宿舍ｄ人勁小．．．仲有好多好多。當時全級我地三個臭名遠播，就係因為人地個個過正常大學生活即男的瘟女女的瘟仔，其他人媾緊仔／女時唯獨我地仲顧住打街霸八人版睇《浪客行》（well，劉Sir嗟），咁「唔正常」梗死得啦。我地唯三全級最「唔正常」人士碰得到頭都算命中註定，所以大家畢左業接近斷晒六親（其他人「正常」嘛），但三個人仲間唔中出黎食番餐無無聊，就到時間（最主要就我）又返大陸掃貨食野，彼此間金句係

「教院我都冇朋友，畢左業之後唔搵你地，仲搵得邊個？」

畢業後佢兩個投身教育界，不過性格始終難以動搖，粗口照講四仔照睇漫畫照刨學校照煲煙，Sam少繼續做其健康憤青，讀書時成舊grant loan拎左去流浪歐洲兩個月，畢業後讀緊master都可以學費唔交又唔通知就去東歐玩番幾個禮拜，最難搵到就係佢。雖然我同佢都修電腦，但佢行蹤咁飄忽，加上年頭大把馬拉松比賽佢要練跑，所以今次 漢 （又）死機，好自然搵我幫佢搞掂。《八三三》已經講晒俾大家聽三條友的電腦水平，我電腦咁廢，已經叫做勁過另外兩條友，尤其是絕對電腦白痴的 漢 ，所以兩條友部機有乜事，或需要任何協助i.e.如何有效地在網上搜尋免費色情電影，就係劉Sir出馬的時候了。條友係我見過最終極的電腦白痴，識佢果陣電腦都唔多曉，係連開folder擺file都唔識果隻，做完功課成個desktop都係file，仲要ｄ名改到超柒好似中文功課叫11111、英文功課叫111111、常識功課叫1111111，得佢自己一個識睇識分。既連擺file都咁頹，更加冇可能識打字啦，英文叫做好夾硬地篤到，中文特登買個手寫板返黎做功課，但教院同其他學校調轉係year 1最忙之後一年比一年輕鬆（冇錯，這是真的，就因為「通識」兩個字導致如此戇居），手寫板寫成世都寫唔起一份功課，當年Sam少又興手寫起稿再打趕唔切，時間緊迫關係我一個人肩負起幫埋佢兩個打功課之重任。好多人問我點解打中文可以咁快一分鐘過百字？中文打字我中六有得修電腦先開始學，當時仲要打得好慢，但上到教院，臨交功課半個月一日要打四五篇論文每篇兩三四千字，仲要趕四點前打起衝落電腦房爭崩頭霸電腦印功課五點前交，日日萬言書噉打法，唔識打中文都打到變專家啦老細。

「為左Sam少，仲令我搞左《鼠鍵應用》呢個lau-sir.com唯一正經搞作。條友當年打Word果陣真係print出黎當notes用。」

year 1時仲係834號房，year 2起搬入隔籬房一住兩年，八三三無敵陣容就誕生了。基於教院一年比一年少野做關係（我year 1一個學期可以上十幾堂，一堂＝一科＝兩三份功課，但到理論上最忙的year 4最後一個學期可以一個星期只上三堂全年冇乜功課做，死未），時間多左，on9行為更多（當年差唔多個個禮拜都會有一日為左食雞而返學校），兩條友亦更加努力地找尋網上資源，又唔做足安全措施唔裝防毒，就仆街了。上得多網冇防毒自然中得多招，Sam少試過一次帶條女上房時，條女一開電腦上網，立即彈出聲畫俱全的全畫面鹹網廣告，到而家諗番仲係笑到仆街。所以班友耐唔耐就要靠我上去清清毒同執一執ｄfile，以達「更有條理地儲存及分類各種數碼檔案」之效，當然有回饋啦，大量漫畫長期供應，同無敵的午餐肉，當年房內勁多飲料同罐頭儲備，午餐肉成為定食，我最無聊果次試過做功課做到悶，開罐午餐肉然後原罐唔切掟入微波爐叮，再大大舊篤住黎食，簡直令人髮指。全級唯獨呢兩條友忍受得到劉Sir的on9行為，劉Sir又能夠解決二人電腦上各種問題及煩惱，大家冇左對方，都唔知點捱教院四年。

畢業出到黎教書，乜時候都要用電腦，校長面前仲邊夠薑用手寫板寫中文？學成左九方輸入法，算係 漢 畢業後一大進步，對上一次花園金閣聚會仲要好威地曬佢用左兩舊幾水買的USB九方輸入法，去到邊九方到邊，俾我睇隻手指時覺得自己不知幾醒（不過同場加送買左六舊幾水點知用唔到俾人昆左的USB高清接收器乙隻）。工作迫成打字進步左，但用電腦一樣咁頹，返工部機返工用，屋企部機，就梗係用黎「下載電影」啦，但仍然唔多防毒，結果部Fujitsu買左年幾已經死左兩次，第一次拎去整好在救得番，不過聽佢講番Fujitsu售後服務差到離奇，拎去整勁多麻煩野之餘整好左唔夠半個月立即舊病復發，睇黎繼華碩後Fujitsu是又一我會blacklist電腦品牌。今次壞乜野？超級抵死，仲抵死過Sam少有囡囡在場先爆鹹網廣告出黎。話說佢半年幾前拎過部機去整一次，返到黎唔覺有乜改變，見廠俾左隻recovery disc佢，就照說明書跟住做，然後繼續照常使用電腦（即係係噉上鹹網．．．），佢format過部機又唔裝番防毒喎，結果仲衰過讀書果時，但衰都衰得有性格，上正常網頁上唔到會輕機，上鹹網反而冇問題；睇碟呢，鹹碟點播都得，反而擺隻正正經經教材光碟入部機，死機。成為一部只能瀏覽不良資訊的電腦。問題係全屋得一部電腦，阿嫂上黎用部機時大鑊，要拎番學校用更大鑊。

「我覺得部電腦係知道主人心意而主動變成噉。都幾好丫，咪由佢囉∼」

我笑到仆街，不過部機一定要整，我忙加懶（．．．），學校今個月考試佢又忙，Sam少顧住練跑，結果由月頭搞到今日，撞正今日Sam少終於出賽馬拉松，我十一點幾起身出發收到風佢跑左兩個鐘跑完差唔多休克即返屋企撻低，即係得番我一個出馬加一定要我出馬整機啦。條友年底結婚，已經美孚買左個單位，我搭開2A出美孚，今日聽佢講搭四十幾號，點知被老點一野去左葵芳要搭地鐵返轉頭，都算大整蠱。條友住半山區地鐵站出面巴士總站要再行兩三個字上山，四百幾尺單位加靚爆裝修兩個人住百三萬抵喎，上完佢屋企加見到佢兩個，思考左好多野。咪煩，整機先。其實上黎冇乜特別野搞，入隻XP碟入去點知廠機設定鎖死左一定要用Vista唔俾入XP（再一個令我更堅定唔用Fujitsu的理由)，噉我只係做番佢做過之同一樣野，拎隻recovery disc format部機再入過Vista，幾下mouse搞掂，之後就係等，百幾激format要個幾鐘，做得ｄ乜？原來我今日上黎，為打機同食飯多過整機。先欣賞申請上網送的高清機頂盒，係咪真係好清唔多識睇只知有得睇J2，好似無線最正的節目都擺晒J2播，灰喎我地冇機頂盒呢ｄ，好在我唔睇太多電視，睇電視之餘有阿嫂煮麵食。打開個櫃，又係營多撈麵真係頂佢個肺去到邊都見到佢而家，好在仲有麻醬味大將撈麵，前排廣告谷得幾恆又未試過就食佢啦，又唔係如傳聞中咁唔掂喎。仲有全罐午餐肉（當然有切片，全世界得劉Sir食午餐肉原罐食的）加隻炒蛋，嘩超好食呀頂你阿 漢 哥真幸福！食完仲未format完部機， 漢 拎左部好野出黎。前排打邊爐大家傾開以前打機幾開心，佢而家石硤尾日日放工都落鴨寮街，打完邊爐果日就落左去行搵舊機，仲要一買買左唔止一部，而係兩部復刻王，個樣我睇見以為PSP黎，拎上手先知係2PG。唔係平架部野，四舊幾水一部機加個雙打手掣仲有一枝射唔到的槍，送多餅108合一帶，勝在真係108隻game冇重覆，手掣手感唔錯雖然紅白機得AB掣，你主機扮PSP雙打手掣扮PS2，AB之外俾多兩粒掣再加LR有乜用？冇所謂啦最緊要好玩，必打的是奧運會，一隻game有田賽徑賽射擊果隻勁好玩，魂斗羅當然要玩但亦當然玩左唔夠一分鐘立即reset，無敵的雪人兄弟都有勁開心不過搭著個唔識玩的去到三十幾關算唔錯。派報童同影之傳說又係美好回憶，紅白機版十二人街霸，AI超勁加紅白機根本唔夠反應感應指令出招點打？我搞部電腦時睇佢打幾局，冇一局唔係輸perfect俾電腦，不過聽當事人講，佢打左個幾禮拜呢個情況發生率係100%，已經慣左了。我記得當年打過一隻山寨版有得用孖寶兄弟架笑到仆街。而打紅白機，一定要打Circus Charlie，仍然係我最愛電視遊戲之一，當年去人地屋企晏晝打到夜晚十一點幾唔返屋企，一個人玩過癮，都未夠雙打睇人地跳火圈一野撞落個火圈度指住佢大笑「戇鳩仔」咁有快感。點解我地咁鍾意打舊game？就係呢份簡單上手但極其襟玩的遊戲性，同獨樂與眾樂皆娛樂無窮的娛樂性，後來遊戲機功能越強，遊戲反而轉為發揮功能，而缺乏甚至忽視機能大遜之紅白機所著重之「玩」，Wii能夠咁受歡迎，就係任天堂追求番紅白機帶俾大家份感覺。你俾我揀，我都寧願俾四百幾蚊買呢部2PG，多過任何一部次世代／新世　代遊戲機。過左今日，我真係有衝動立即衝落鴨寮街。唔係要開舖的話，我肯定留低打到黐埋晚飯先走。

「我地八三三八年黎聚少離多仲可以咁密切，皆因人以類群的社會現象。我們都是柒的。」

搞部機其實好簡單，唔使我條友自己再recover disc一次都得，似乎係搵藉口上黎黐餐打機多過做正經野。好玩到舖都唔想開今日。好懷念往日八三三的時光矣。

24/1/2009 FRI

年廿八洗邋遢，TRHK今年一同響應。劉Sir一向咁懶加咁污穢，就梗係唔關佢事啦，TRHK一齊參與，是老細的意思，劉Sir從來懶理，但作為TRHK的執行仕，出口是老細，出手執果位，唔係劉Sir係邊個？見聽日年廿九唔使返工，今日特登請左日假一日搞掂壇野。十點已經上到舖頭，返工噉返因為真係咁多節目呀。首先講左Ｎ年舖頭終於整上網，咁早就係要等師傅上黎舖線，即係預左例遲架喇PCCW服務咁差有幾可會準時，佢話十點到結果遲左個幾鐘，但早到都有用架因為要執定野，裝緊寬頻時訂左個新CD架又到，就一面搞上網一面砌架再一面執野，搞掂晒第一件事唔係玩，係連線返公司做野，真灰．．．到十二點幾是日重頭戲電視機都到埋，做完公司野再執執舖頭師傅到，以為仲好早點知原來唔覺唔覺已經搞到兩點九！理論上裝電視呢家野半個鐘內乜都搞掂晒，不過遇上劉Sir呢個世紀黑仔王，加上TRHK的險要地勢，破紀錄地裝左成個鐘先完工，唔封番封利是俾兩位師傅都唔得啦。好在趕得切睇三點九無線單車新人王同五點明珠台搖滾戰士。

「睇過先知，原來真係好搖滾的，呵呵∼」

再加七刀同學的清潔部，執好晒間舖駁好晒線，當然要播碟試機啦。metal？咪傻啦，劉Sir識聽metal咩？

裝左舖面，係咪整齊好多呢？加多部32" LCD大電視再加一流！不過我仲係嫌細！雖然皆旺條電視線一條線十幾間舖爭，咁大部電視睇雪花衰過以前細電視好多，但重點係睇DVD同打機嘛！冇錯係打機，今日已經有七刀同學貢獻部DC出黎，而家咁大部電視，梗要玩PS2/3同Wii啦！各方朋友無聊的話，可以拎部機落黎TRHK開P齊齊打！Winning Ele7en有望重出江湖！

「不過TRHK擴展尚未結束，估計最快要過埋年先大致安頓，想玩的朋友再等多陣啦！」

過左唔夠一個禮拜，上星期日過美孚同 漢 整整部電腦，今日年廿九見短週，又過去玩多次。何解咁無聊？上次好似搞左好多野，但其實咩都冇做過，因為只format部機再入過Vista，其餘所有野乜都未整，包括幫佢裝番個office，搞到有晚阿嫂拎左成疊書同卷上去諗住借佢部機出卷，點知上緊鹹網的佢一句撻埋去

「我部機冇office喎。」

雖然這是事實，阿嫂點都覺得佢係顧住上鹹網唔肯俾部機佢出卷，好唔妥地走番屋企 － 好在佢只係住佢對面樓咁近，不過已經搞到阿嫂遲左一日先交到卷俾主任。廢事佢再落去俾阿嫂斬死，同以防繼續無限制地上鹹網會搞到又死機，同其實上次條友除左想我整機仲有裝埋個無線router，不過時間關係（同我懶）format完部機搞掂食多個餐蛋麵就走，為免夜長夢多，都係出多一次同佢治埋個本好ｄ。上次被點坐錯車去到葵芳，今舖冇事喇終於一程巴士去到佢屋企隔籬加勁快，但整機前第一件事係落華潤。你知劉Sir幾麻煩架啦餐餐都要餐蛋麵，佢屋企又冇晒罐頭同麵，落黎怒掃番餐先。我大角咀華潤買野已經覺得好平，估唔到出到黎美孚佢屋企行個零字間華潤可以更平，同一樣野同大角咀比仲可以平多一兩蚊，掃完午餐肉同撈麵再勁零食，薯片小食唔少得，三角朱古力八角形禮盒裝整番盒（上到屋唔使三個字已經冇左一半），仲有大盒裝朱奶，而且間華潤唔算細，但我地入去係包場，睇場三個職員企晒櫃檯睇住我地兩條友玩晒全超市，我地埋單時一個姐姐過機一個姐姐入袋，送多個經理對住你笑騎騎（．．．），咁好服務真係絕無僅有呀。上到去幫佢裝番office同防毒時等食飯，今舖唔打機喇睇電視啦，十二點幾無線做個唔知乜野節目請ｄ歌手上去玩遊戲，有得睇高清GEM，完左做矇面超人甲鬥王，而家矇面超人去到第幾輯已經唔知道了，但講到超人係秘密組織打手噉款，設定同世界觀相當八幾九幾日式陰謀論動漫，連攝影都要玩玩色做到好暗，好吸引喎繼RX同真難得再有矇面超人想追。睇睇下阿嫂蒲頭，原來上黎趕食飯，因為有秘撈。素來只知 漢 嫂撈音樂，但玩到搞左隊手鈴隊今日先知，隊「band」上年起開始接job做，今日去商場玩手鈴版賀年歌，練左五首歌不斷輪迴個半鐘即袋七舊水，嘩超抵玩喎點解人搞音樂我搞音樂我搞到咁折墮？都話聽metal冇前途架啦！

「正喎！我都想搞番隊！」
「一套手鈴要十幾皮野喎！我地都係問人借到先有得出show咋！你真係想搞？」
「．．．我繼續搞METALLORD同EASTERN EMPERORS算。」

因為掃完貨上到黎開雪櫃先發現原來冇晒蛋，今餐由餐蛋麵變成餐芝士腸麵，芝士腸仲有細版同大珍寶腸兩款選擇。上次大將撈麵麻醬味唔錯，今舖燒汁都OK，下轉食埋炸醬，都掂的話可以同營多間住食！兩包撈麵大半罐午餐肉勁多條大細芝士腸加一升幾朱奶，今餐有打邊爐咁飽，部機清緊毒冇得郁又懶打機，聽 漢 講講佢教書點戇居。話說佢上年教間赤柱龍虎學校殺左，今年轉左出九龍教，有日收到個電話，原來係舊校有個家長搵佢。有幾個學生見舊校殺左冇晒人，爆左入去發現電腦全部用得仲上到網，就成日入去當網吧，玩得多又見冇人，直頭爆格六條友偷左三十包電視。直到個家長見到個仔銀包有幾千蚊的佢黎審就知大鑊，立即打俾佢問點算。 漢 充滿誠意地安慰個阿媽及提出解決方案。

「小問題嗟，你將全部贓款俾晒我啦，然後保守秘密唔好同任何人講，校長同校監方面我會出面擺平架喇！你地之後記住要扮唔知當冇事發生過就得！噉就唔會有事！」
「真係唔該晒你呀阿sir！唔怪得校監都同我講你係好人黎啦！」
「唔係卦！你搵左校監？」
「係呀！我驚丫嘛，咪打俾佢問佢可唔可以還番錢擺平囉！」
「你知唔知校監係律師黎架？你仲同佢講用錢擺平？而且單野佢都唔知，你做乜爆無端端爆佢聽呀！」

噉就少左個搵多幾千銀的機會了。涉事童黨中有兩個判入教導所兩年，另外幾個就警戒了事，原來六人中有三個猛人黎，上年試過偷單車俾人捉到，不過捉到兩個認左冇爆到第三個出黎，今年佢兩個再犯即時入教導所，但當年第三個同佢地一齊偷單車果位因為果時佢兩個冇爆大鑊，所以今舖「初犯」冇事。笑爆咀。這個故事教訓我們，有義氣都是冇Ｘ用的，做人還是鬼鬼祟祟閃閃縮縮賤賤格格好。因為佢之前兩間都係龍虎學校，而家九龍區舊校全部野老老土土係噉操係噉做就得即時輕鬆到爆，不過都唔係話個個好學生，而家好學生香港仲有幾多丫。有日有個學生見火警鐘個掣上面有塊玻璃片，無聊係噉篤又篤唔爛喎，就叫埋另一個一齊篤，點知篤篤下篤爆左響警鐘，最抵死果陣係小息，同個警鐘接左去消防處，小息時間火警鐘響仲要即時有四個消防員衝入黎學校，都咪話全校唔發癲。後來真相大白，校長當眾指住兩條靚仔勁小，鬧到差少少激動到一把星埋去，最後出埋張單叫佢地兩個家長找數，今日先知原來火警鐘塊圓形玻璃仔咁細塊都要五百蚊，同消防員會收出差費的。至於何以校長會動咁大肝火？原來當日隔籬隔籬學校校長黎開會，開會時撞著呢單野發生瘀爆，唔拎兩條靚仔祭旗一振校長之綱點補得住自己顏面呀？

「絕對相信兩條靚仔早一日或遲一日噉玩法，一定唔會死得咁慘。其實校長立即醒水叫人燒幾張紙仔扮失火已經搞掂啦！」

唔知點解佢教親ｄ學校都有咁多過癮野。傾傾下原來兩點幾唔記得左要裝router，一直逃避其實因為我唔識得裝router（哈哈哈），但食左人地個餐腸麵冇計啦唯有樣衰衰頂硬上。裝果時好淆底架，平時講到自己點叻點醒點勁，而家篤爆左原來裝router咁簡單都唔識，咪分分鐘樣衰過頭先單野個校長？插線都手震震，諗緊係咪真係裝唔掂，要好似校長噉立即指住條友勁小先下手為強先？點知部國產router一插線部機立即detect搞掂，我做都唔使做一分鐘未夠收得工。係個router勁，係Vista勁，定係我勁？對住班友我梗係話係我勁啦呵呵呵。睇番個盒有張貼紙，專人上門安裝收費$128。頂我而家食得碗麵咁少蝕左添。立即撻左佢上次部「紅部機模擬器」2PG，話晒而家舖頭裝左部32寸大電視！唔用佢黎頂頂龜點值番呀？今日佢同Sam少出旺角買野順便上黎舖頭玩玩，點知上到去先發現撻漏左條AV線冇得玩！超灰！事不關己的Sam少顧住拎我部腦先上Facebook再上Sex141睇囡囡（．．．），好在我地冇2PG，都有七刀同學班番黎的Wii！冇錯而家執完舖面TRHK寬敞左咁多再加部大電視，唔玩Wii直頭浪費啦！是日節目就係打Wii同打Wii然後打Wii再打Wii同打Wii打Wii打Wii打Wii打Wii打Wii．．．連食飯都要打住哥爾夫球保齡球你打時我食啖飯噉玩法，一直打到港台頒獎禮先收手。Wii好玩，但冇想像中咁好，原因之一係冇劉Sir最愛的暴戾game，無聊game mini game夠多但一條友玩一定唔會玩呢ｄ野，好似今晚發現最好玩係龍珠，雖然未研究到點樣體感出招例如龜波氣功（係我都覺好柒），但單玩對打已經極度好玩，尤其是隔超遠距離兩條友互鬥波，無敵的16號！雖然對Wii唔算好大好感，但隻龍珠令我有興趣研究呢部機！

「各方好友，有乜正機正game？過埋新年同二月頭舖頭定左，就可以搞多幾次打機活動！有冇人有Guitar Hero？激想玩！」

「七刀同學年初八起程，係咪初七要同佢整個餞別派對？」