段記




2/12/2008 TUE

早排《D.M.C.》講過賤格metal。今日,講番本格metal。都幾多。



繼「一起唱更多的卡拉OK」後,又有新band夾。話說R先生一次買碟撞到阿Ricky哥,四張幾了,仲想出番黎夾band。問佢玩乜?metal。不過四張幾唔係玩DEEP PURPLE。以前夾玩開thrash野,放低左好多年,想搵人夾death metal。冇錯是一個四十幾的阿叔想夾death metal。仲要手結他啡到飛起。突然想班人夾band,好即興地收舖後我就現身band房了。見我鞋都冇著走黎開舖就知幾咁即興。租band房,借結他、借bass、借線借鼓棍非常平常,但玩到要借鞋應該前無古人。仲有另一個問題就係,阿Ricky哥,你彈到NECROPHAGIST嗟,唔代表我打到喎?

「好似隔籬房先近我level喎,玩黃貫中。」

不過最緊要係大家夾到。同埋,緣就係緣,原來大家又係做零售、又係工作同教育有關,同大家音樂方向、態度一致,加幾年間都斷斷續續出現過TRHK,基本上已知對方想要乜、同自己夾唔夾得黎 - 事實證明,在香港始終我只能夠同阿叔輩暢所欲言溝通得到。成團後,我地已經搵到人生目標:政府搞緊個「健康人生歌曲創作大賽」,我地已經度好故事《帝皇的blastbeat》,英文名叫《Emperor's Blastbeat》,一個非常正面、宣揚健康人生同正直品德的金屬歌劇,將會是繼THE WHO《Tommy》後最發人深省的rock opera。優勝者(即係我地)會被榮邀17/1荃灣表演。在「一起唱更多的卡拉OK」唱到攻陷09動漫節之前,一月荃灣唔知邊個商場為我們天下一統大業揭開序幕。

「繼SKM後,我地METALLORD係時候重出江湖了∼」

話時話,關心妍「招募好歌大行動」二回目開始了。第一回得獎作品,係以色列dark metal樂隊SLEEPLESS的《Melancholic Umbrella》。今次,仲唔輪到我地METALLORD《帝皇的blastbeat》?




夾完band,仲有野:



Tomahawk Metal Fest
First Strike is Deadly


終於有野睇喇。隔左個半月。再之前Circle Q加Circle K都未寫。實在太多野忙嘛。場show一完左立即連擺兩個展覽(去目及deep-v姐姐都係我工作一部份來的,騎騎∼),同準備緊2008回顧(雖然下年先出街,我發現已經唔夠時間去完成),難免遲左。當然,仲有其他好多因素啦。


「打飛機都需要時間的。」



Rock & Matto Complete:
兩個重金屬狂熱愛好者的閒話家常

Part 1: Link Here
Part 2: Link Here


「劉Sir獲亞視邀請就中樂與重金屬之訪談,已定於12月7日禮拜日早上8:30《文化潮流》第九集出街。等唔切者,可先收聽以上簡短會談,是兩個八十年代男無聊吹水又唔覺意錄低左的official bootleg。」

「大家果朝早除左記得早d起身睇(第二節先見劉Sir,八點九起身都趕得切),仲有記住幫劉Sir錄低佢呀!佢條友肯定起唔到咁早!」

「另話說一晚無生意時,有一本地樂隊成員上到TRHK,就研究本地音樂整體與樂隊文化發展受困專題論文訪問劉Sir,同場尚有***資訊審查***AV興從樂隊角度發表意見。如有一日獲許可,會嘗試將該論文撮上網,作更進一步深層討論 - 有機會的話。(致果位樂隊成員:見字,識做啦!希望可以!)」


註:因三聚氰胺肆虐,為紀念其「睇住AV練結他」傳奇事蹟,及定期帶同十幾激四仔上TRHK孝敬劉Sir之義舉,即日起XX興將正名為AV興,遵旨欽賜謝恩!



5/12/2008 FRI

「今個禮拜六日,記得睇亞視!」


星期六6/12夜晚九點
扮野天王鄭少秋演唱會!


勁好睇,有齊鄭少秋最經典金曲,仲有part扮晒四大天王加扮草蜢勁似,記得睇!不過呢場扮野演唱會我冇DVD。我有的,是另一場。


「如果講你聽,(扮識)聽metal的劉Sir最愛香港男歌手係鄭少秋,你會唔會笑死劉Sir?曾幾何時,兩場演唱會《笑看風雲》兩套舞我都識跳。死未?」



星期日7/12朝早八點半
《文化潮流》之「中樂vs.金屬」


提過N次,我都講到悶了,我第二節先出現,所以八點九先開機應該仲趕得切。


「記得起身呀今個禮拜日!唔係叫你起身睇,係叫你起身幫劉Sir錄呀!佢條死仔自己都唔慌起到身!」



9/12/2008 TUE

「7/12禮拜日各位朋友起唔起得切身呀?睇唔睇到劉Sir個柒頭出現亞視呀?」


繼四年前2004六翼天使帶契劉Sir上到《慧珊時尚坊》,每個禮拜一晚一兩個字同大家講左成個月metal,2008年12月7日,亞視又再次見到metal同劉Sir喇!「見到」唔止於有意無意拉到一隊band出陣仔鏡、有時用到少少rock野metal野做背景,噉樣計當年出鏡後有集講埃及用ORPHANED LAND《Mabool》做插曲都可以算了。所講之見到,係真係做一段時間/一個環節專題講呢種音樂(一集是冇乜可能的了)。你可以諗下近幾年你有睇過乜野中文台節目,會特登花篇幅同大家講解甚麼是metal,除左劉Sir蒲頭的這兩次之外。


「有一個勉強算:《聽不到的樂與怒》,雖然不是講解。呢樣野,會特別講講。」


今次唔係《慧珊Metal時尚坊》喇,雖然仲有朱慧珊做主持,個節目改左名做《文化潮流》 - 我都係到節目出街幾日前睇睇節目表,先知原來唔係叫《潮流文化》。萬物之始,長話可見一個月前訪問所述,短說是今集主題係「中樂與西樂」,第一節訪問左發揚新派粵劇(Progressive Chinese Opera?)之戲寶梁漢威師傅,第二節西樂部份因為張導演超級metal友加TRHK熟客身份而選左heavy metal,而全港能流利專業地講解重金屬者冇幾多個,劉Sir之外相信要搵到鴨寮街阿Paul之阿叔阿伯輩。至於個節目出街時間,係朝早八點半,你問點解咁早?冇計啦,四年前唔止講潮流商品仲會提藝術文化之《慧珊時尚坊》閒日夜晚十點半播,劉Sir講完metal後仲去到十一點幾晚間新聞前(相信是因為劉Sir而被人投訴),《文化潮流》更進/退一步,變成星期日朝早八點半,完全是豬頭骨時段。香港地辦/講文化下場就是這樣的了。你有幾可見港台節目以外,黃金時間會有電視台資訊節目同你講音樂講藝術,而唔係講物質講享受?


「明點解《聽不到的樂與怒》可以七點《鏗鏘集》見,而04年《慧珊Metal時尚坊》到四年後《文化潮流》,只得未起身同訓左覺兩個時間出得街啦?」


片頭已經有IN FLAMES,你話中文電視台幾耐未試過咁metal!訪問方向係先由主持08亞姐冠軍張家瑩(咁蹺同一晚原來做亞姐決賽,有佢同歷屆得獎亞姐合唱Yngwie Malmsteen《I'll See The Light Tonight》做節目開場!雖然見唔到呂晶晶,夜晚亞姐決賽有得見補番!睇左今晚歷屆得獎亞姐齊集一場,就會明點解咁想見呂晶晶!),問問劉Sir「甚麼是重金屬」,簡單介紹歷史和常見類型後,就到主題「中國傳統戲劇與重金屬之異同」,全長兩個零字。時間與尺度關係分類只提到五個,同時版權問題未能用到經典金曲,最經典最出名只有IRON MAIDEN,我都想thrash metal講METALLICA講SLAYER(而家用ANTHRAX,因為個MV係我最愛之一),我都想用DEEP PURPLE做六十年代heavy metal例子而唔係我唯一一段有片加出得街之CATHEDRAL,我都想講到pop metal即播BON JOVI《Living on a Prayer》,但現實有好多問題需要顧慮的。出奇地我只俾左份稿佢地而冇提過,編輯組自己加左black metal一段,唔知係咪張大導主意?而最後討論主題、中國傳統戲劇同重金屬相同之處,基於時間關係(我訪問果晚臨放工最後一個字先度好篇稿咋大佬!),自己唔係聽得多音樂智慧又有限,只諗到節目中提到之兩點。不過最意外係講到對本地金屬發展前景,其實想講唔止香港仲有中台地區樂隊,所以提到好多樂隊開始加入中樂元素,開頭諗住播閃靈,新碟TRHK特別版加送五個MV睇到佢化屍妝拉二胡嘛!(明hard sell)不過唔夠時間搵番隻碟出黎,加上節目想集中講香港而作罷,不過亞視醒水地自己摷番年初大中華冠軍樂隊大賽香港代表「oriental nu-metal」戳麻參賽片段出黎,用歌手拉二胡作序曲做例,醒呀係咪又係張大導神來之筆?無獨有偶地我本身有帶戳麻隻demo上去做訪問,只不過冇片得聲仲要demo音質而冇俾到導演!


除左戳麻之外,仲有節目出街兩個月前之Tomahawk Metal Fest。亞視比無線優勝係「indie」,反正正經節目唔夠鬥,倒不如得閒無事搞d神奇節目出黎搶收視,《AV事務所》就係奇招之一,張大導想搞音樂節目好耐,而家講數碼講高清,直頭同上頭傾過開條數碼音樂頻道,先勿論數碼頻道點樣有得睇同有乜睇(我第一個同你講,兩樣我都唔知),起碼有機會搞搞佢先,無線直頭傾都唔會有得傾。因為早已定好《文化潮流》內容,決定點都要有一集講metal(擺明係佢自己想,唔關其他人事),知道有show搞梗係立即卜期黎拍啦明顯私事公辦,點知市道疲弱亞視整頓,佢黎唔到,得番班靚同張嘉瑩。以下節錄自佢調職後一次電話對話:


「話時話,金融海嘯亞視炒人慳錢大執位之後,你而家調左去左咩部門?」
「去左亞視數碼頻道體育台呀!」
「嘩!有冇人睇架?」
「細聲d啦屌你!我老細坐我隔籬咋!」


「本地樂隊發展」、「世界金屬發展」同「京劇金屬之同」三個討論題目中,出左ZoundZ、ELYSIUM、BASSAIUM同HYDROPHOBIA表演片段,第三題其中一點是京劇甩水髮與金屬甩頭與「硬蕊舞」(原來「甩」字是正字,有典故的,今集跟梁師傅學到野了!),剛剛好有得睇BASSAIUM歌佬指東指西玩《油脂》,好可惜演出後七刀同學同兩位metal姐姐的訪問都冇用到,開場前Daimon九唔搭八果段更加唔使講,因為佢搞到我俾人投訴,人地拍黎做野食飯架嘛大佬佢仲要9up一餐!個節目咁早做,都怕朝早播metal會嚇親人,怕唔怕嘈親茶樓嘆緊早茶的公公婆婆,尤其BASSAIUM同HYDROPHOBIA咁激??會推低晒d聲就預左,都唔使低到差唔多聽唔到咁細聲卦?(可能係平時焚慣聾左,而家乜都覺得細聲了,呵呵)


導演講番,節目播完後會數碼台重播(換言之,冇人睇冇人知...),然後賣去美國(揀歌選片要顧及咁多,就係因為呢個原因,單香港玩終於乜都得啦,外國對於版權好敏感)。上鏡除左X肥,口才亦唔太得,算好過四年前架喇,同導演收貨加覺得熟夾流利我就乜都唔理了。張大導初時諗住唔單講兩個字,而係講夠兩個鐘,好似四年前《慧珊Metal時尚坊》噉分幾集出,就可以一雞多味自己做少d又搏多d人睇到,但佢部門都調左,相信冇乜行了。仲想睇亞視講metal唔係冇機會,14/12第十集繼續有梁漢威師傅講講「Progressive Chinese Opera」,同美心lock&撈石頭鍋飯代言人ECCENTRIC為大家分享香港夾band樂與怒,記得收睇,仲起得到身的大家。對我黎講,一連兩個禮拜八點幾起身,難度分十分。



節目出街後,後遺症有兩個:話說可以咁勇素顏上鏡,皆因咁早播理應公司冇乜人起身睇到,結果香港真係冇,但大陸好多。亞視不嬲親中,香港死晒仲撐得住因為一早轉攻大陸,工廠好多人一開電視就係睇亞視,大陸人又慣左早睡早起冇事都六七點起身,飲完早茶開電視一睇,仆街了,連工廠大老闆都睇到,仲要立即不斷打電話叫其他廠友


「立即開電視睇亞視!劉義條仆街衰仔上電視!這是領導的命令!」


我仲要播完隔日立即上工廠,一上到立即大把人圍住,因為佢地覺得有得上電視仲要講文藝野好勁,好似好型,但同時衍生出一d問題。都咪話唔大劑。


第二個...係我知唔關事,但搵位入埋,吹咩?


TRHK 聖誕3-4-5 清貨大優惠

賀聖誕、抗海嘯,
TRHK十二月推出終極大優惠!

任何2件產品 = 7折!!!
任何4件產品 = 6折!!!
任何6件產品 = 半價!!!


另推動本地音樂,
香港progressive metal班霸BlackWine
《追夢》及《影子》兩張大碟
十二月內以優惠價$65發售!


2008年12月內任何營業日子到TRHK購物,即可享有以上優惠!

TRHK聖誕期間25-28/12全開3-10pm,讓你挑選心愛聖誕禮物!


TRHK wish you a Metal Christmas!




14/12/2008 SUN

星期六晚有R先生帶同大袋印尼蝦片上黎俾大家一面食一面睇《歡樂金屬滿東華》,再七條友上band房玩SCAR SYMMETRY版《真的愛你》(又打斷鼓棍,冇幾多間band房做我生意唔使蝕本),訓醒覺,禮拜日朝早繼續金屬。上回7/12/08《文化潮流》第九集講到「甚麼是重金屬」和「中國傳統戲劇與重金屬之同」,完左提到今集仲有重金屬,就係香港樂隊ECCENTRIC訪問。兩者訪問在同一晚進行,聽導演講本來計劃係先出ECCENTRIC,即係第九集佢地第十集先見到我,但對完稿覺得講完乜野係metal再講樂隊較合情節,次序就對調了,雖則我最後一條問題「京劇與金屬」,本應是全個主題總結。神奇地,呢個禮拜日居然八點四起到身,亦可惜太早起身,搞到見仲有兩個字,「訓多陣都得啦」,跟住一訓,八點十先再彈起,頭半「Progressive Chinese Opera」冇得睇,尾半ECCENTRIC得番一半,不過因為大家一齊做訪問,所以基本上我一早已經睇晒了,呵呵呵呵(...)。冇起到身睇或如我睇唔晒的朋友,話咁快,YouTube已經有重播了∼



訪問樂隊,每每必問點解夾band、如何夾band,自己玩乜音樂,同在香港夾band玩自己種音樂有幾艱辛,都是大家聽左(十)幾年的老生常談,也不細表。會講者,又係幕後同業內。有睇四年前劉Sir第一次上電視講metal的《慧珊Metal時尚坊》,都會記得訪問地點在TRHK,因為當時《時尚坊》話事人係張大導,佢覺得「劉Sir咁識metal,噉TRHK梗係香港最重金屬的地方啦」,而拉隊上皆旺拍。《文化潮流》本來一樣,不過計劃好晒先俾人調去第二個部門,新接手一班完全未聽過metal,訪問地點就轉左上band房,除左因為順便訪問埋樂隊之外(因為張大導狂熱心態,約劉Sir應是較先),仲有一個原因:


「講音樂,始終見到樂器好d。」


呢個係一般人/門外人士對藝術典型心態,擁有、使用工具者就是懂得,例如拎畫筆就係識畫畫、拎結他就係識音樂,此種先入為主思想存在於所有人心中,包括我在內,但年代經驗講番你聽,真係投入、研究藝術者,卻往往非睇得出或屬「門內」者,想要例子,睇番幾個將(extreme) metal帶入香港具舉足輕重地位之本地金屬網,例如亞視今次訪問都係睇佢做資料搜集之爛屍金屬網,搞手本身都係唔(多)識樂器唔(多)玩band,但你睇完幾個網唔會對搞手之音樂熱誠、認知有任何質疑。只係最淺白者,有幾多人會明白得到呢點,包括本身玩開聽開音樂人士?作為一個公眾節目,由一班非metal人士主管,即使講者唔會、唔需要玩樂器,都感到係唔係推佢上band房,等出出下鏡見到套鼓見到枝結他,


「睇落專業d,觀眾先會覺得你講緊音樂嘛。」


此即為「普遍」,亦因此「普遍」,每每令本地媒體探討音樂時,往往只集中於未必明白太多、未必有份創作之台前,而忽視真正理解藝術的幕後群體。既此心態、思想早已根深柢固,製作人又要睇老細頭又要顧住睇果班唔多敢亂黎(唔係人人似張大導咁夠薑架)(所以俾人調走左囉,呵呵∼),中庸之道就是皇道,香港文化藝術多年來仍未受重視,就是因皇道橫行,而大眾未有嘗試求他道也。非完全關事但仍有關係,順道節錄《聽不到的樂與怒》時一段,講講點解咁多年黎媒體想搵人講metal,會搵band、會搵著得「好rock」人士,都唔會搵TRHK:


「對好多人黎講,TRHK只係一間CD舖,雖然國際上TRHK唔止舖頭咁大把而係一間唱片公司,但香港地只會當呢間野係要乜冇乜掛metal賣狗肉的廢舖,冇乜值得探討。而且『CD舖』又有乜好探討?訪問坐檯叫劉Sir果條傻仔,答案又係去開佢地頭的朋友已經熟晒果一大堆『事實』,既不勵志亦唔正面甚至有點兒反高潮加得罪全世界,有幾好睇?俾著你係觀眾,你寧願睇一隊band出live之後講返你聽佢地玩乜音樂、搞音樂有幾難,『深受感動』,定睇部電視影住一間舖頭三個鐘一個人都冇,得條傻仔坐係度上網打機玩變形金剛,然後講下『咩叫metal』,同點解賣正版undergroud metal野咁難經營?即係當事人我都係噉話,如果我係導演,我都會立即搵幾隊band去幾場騷拍MV噉拍,再叫『演員』聲淚俱下地講地下音樂如何難搞要點樣努力拚搏請大家多多支持啦!這就是現實!拍一間『舖頭』點樣賣唱片、講下點解香港地賣metal賣音樂會咁難、客觀限制有幾大,會有幾好睇?」


之前《明周》專訪會從經營而非音樂角度出發,真正探討獨立音樂工作者境況,已是難能可貴。而每當訪問地下樂隊,更會比較而家同以前生存難左易左,同地下音樂係咪得到更多人支持?由冇得download到任何download、由識上metal-archives.com已經威盡全港到MySpace YouTube任你玩、由錄音要玩身家租錄音室到一部電腦搞掂晒、由網上冇人講metal到到處專家橫行,從我經歷所見,你目標唔係要達流行歌手級數之名成利就,而家做地下樂隊真係容易左好多,地下同主流之界線亦日益模糊。其中一個結論,係ECCENTRIC為美心拍左個廣告,而能夠在廣告中表演搖滾,加上近年出現唔少以搖滾/金屬為主題之電影如《Nana》同《D.M.C.》,似乎而家地下音樂/搖滾/重金屬已被大眾接受。其他人點諗點睇我唔知,但劉Sir乞人憎的性格,你都估到佢實話唔係。四個層面探討,從最基本出發:


  1. 如因有廣告能用搖滾/金屬表演做主題,即顯此音樂已為香港大眾所接受者,反而今次ECCENTRIC美心廣告只係一個再加證明「不是」之例子。早於《文化潮流》第十集、此廣告出街最少半年前,KFC香辣雞堡廣告已用相同概念,以一隊rock band做主角介紹產品。但該時至今時半年間,廣告出街前後唔覺對於「推動搖滾/金屬」有任何助力,大眾對此metal態度依舊,半年後新廣告出街結果亦然。可見只是以「反傳統事物」吸引視線之宣傳綽頭。

    「此段文字全部對事,無任何對人成份存在。」
    (在香港講到本地樂隊時,就係需要咁小心)


  2. 當有一套以音樂為主題之電影得到大眾注目、商業成功,又是否真正等同於該種音樂已被接受?Project: D.M.C.已詳論過。


  3. 再進一步,宏觀所覽,Tomahawk Metal Fest後記已分享過我做metal做左六七年,對metal在香港是一種音樂、一門文化還是一種商品、一股潮流之想法。


  4. 承上點回到樂隊:當一隊樂隊成到名,係自己成名,定令自己種音樂成名呢?如集中講metal,第九集談及「重金屬於本地發展情況」,提到過就算紅如BEYOND同太極,都只能做rock band而不能做到metal band,又假如當BEYOND咁多人識、咁受歡迎,都只能影響到人聽BEYOND/聽黃家駒而唔係聽rock(其實三人時期作品更接近真正搖滾,但你問人/fans,有幾多個真係鍾意?),而BEYOND之後隔近十幾年,再「正式入流」之樂隊係PING PUNG、SOLER、MISTER等流行重於樂隊(音樂還是好的),我冇預期過會再有一隊香港band能夠達相同甚至更高影響力,能夠令人受到啟發投身真正搖滾,而metal更加唔需要講,請睇番第三點。記得睇過文章,提到當年黃家駒有意從幕前退到幕後,如果佢冇死,可能到九幾中一樣會冇左BEYOND,而呢個決定,某程度上係睇通左好多本地樂壇、樂迷問題而作,正如佢都講過,希望人欣賞BEYOND音樂,而唔係將佢地當四大天王式偶像黎追,不過知道改變唔到大潮流,只想真心做音樂而唔想做不應做之明星,退居幕後是唯一選擇。綜合出一條好多玩band人士絕少想過、絕少認真勇敢面對過之問題:

    「你成到名,係你入到屋,定你玩果種音樂入到屋?玩音樂時,又是為音樂而玩,還是為名利而玩?」

    香港band壇/metal界二十幾年黎是非不斷,metal從未能在本地擺脫潮流成真正藝術,就係因為好多人隨住時日,再冇醒起過、思考過呢條問題。畢竟風光誘人。


最後者是玩band同唔玩band者做音樂心態之別。當一隊band成功時,好容易令自己錯覺自己推動左音樂,而唔會諗到會唔會只係自己被推為明星、紅的推動的只是自己 - 當然,覺都唔會覺甚至唔諗住去覺者大有人在。只不過退一步再退好多步睇,自如上面四點,好易睇到metal在香港難成真氣候。早前本格金屬的一天,某香港獨立樂團團員就本地樂隊文化研究到TRHK所作之訪談,一個業內工作者及兩個現任獨立金屬樂隊成員,三人圍繞理據不離以上四項,可見所述論點,並非只係劉Sir一個人廢話,而是香港band壇/metal界事實。眾多局內人其實早知,但未必想去面對之事實。


「明點解冇人講metal會搵劉Sir啦。就算全部屬實、可以深入到學術級,導演會唔會收貨?普羅大眾會唔會鍾意睇?況且,真話永遠最政治不正確?」



今集講晒音樂,下集主題係聖誕裝飾同畫畫,重金屬又再遠去電視/亞視了,想繼續睇電視睇到metal,唯有逢廣告時間捕住ECCENTRIC。因為屋企睇電視再睇唔到佢主人,劉Sir隻狗劉狗好唔開心,所以今日死上TRHK悼念一天。


劉Sir(隻狗)的一天@TRHK
(Doom Dog Mix feat. KATATONIA)



18/12/2008 THU

似乎下年都係大鑊架喇。有做廠的朋友,都知上年年底起南中國工廠死左七八成,因為中國加入世貿為表示自己「進步」,立即瘋狂加工人最低工資同福利保險(香港政府都冇咁保障大家呀,港燦們),以前大陸出名在賤,乜都唔使錢噉要幾平得幾平,先可以成為人見人愛的世界工廠,但自勞動法通過之後,工人開資增加三四成,油價又高料價又貴經濟又差,一件產品總成本可以增加一半,但外國人每一年都預你減價俾佢而唔係加佢價,仲邊度有生意做?但這是為「國際水平政策」,你適應唔到,係你公司無能,理應淘汰。這就是強國政治。而且不止於此。大陸一直以黎可以用全球最低價出口商品,就係因為官方對廠商大量非法行為已隻眼開隻眼閉地默許多年,好似加班一定要補水而且係倍數計(香港都冇呢支歌仔唱啦戇居),同原來一早好多年前已經規定正常工作時間係一個星期五日(頂我都係近來先知!你幾時開始有五日工返?香港有幾多份工返五日?),以前國家賺到錢就理得你啦,而家身為世貿一份子,自不然要伸張正義為人民出頭,加晒人工保障晒工人生活後,第二件事,同班廠講:


「以前你地拖欠工人d工資,而家全部還晒俾佢地唔該。」


即係幾多?我地計計:雖然法例話返五日,但為生意加實際上(當年)冇人理,有邊間工廠會跟、會唔叫全部人返足六日?而家要一次過還晒之前咁多年禮拜六人工,即係一個月補最少四日,一年坐底個半月人工。另外為防無良廠商無理解僱員工,設立左保障金,每做滿一年,如果被炒可以收一個月人工,仲好似無上限(你明點解大陸人做野可以咁頹啦?我工廠真係有d人可以老細面前照擺明訓覺唔做野咁型)。呢兩樣在我地工廠問題就大。我工廠標榜管理層全部係大學生起薪點高,同有勁多人開廠已經做做到而家,十幾年非常長資歷人工唔會低,以往成日同客人講呢兩樣野,以顯工廠管理層高質素,但點高質素都好,一講到錢,就仆街了。工廠閒閒地有幾十個做左近十年至十年以上老員工,上年年底一知道新勞動法通過,有得一次過追番以前全部禮拜六人工同每年一個月的服務保障金,仲唔立即發癲?所以當時睇報紙成日話大陸工廠有工潮有暴動,就係呢個原因。錢喎大佬分分鐘一野拎番(十)幾皮野喎,果陣仲要係恆指三萬點經濟大好果時,拎住舊錢去炒樓炒股,發過你匿係工廠做餐死多多聲啦!果時因為太多人搞事,而大陸係年年續約,所以約滿立即一次過炒晒搞事果班,大學生之智慧就在這時派上用場:幾個管理層高級人員自己夾錢請律師告工廠追番筆數,法庭判工廠敗訴,老細梗係第一時間再上訴啦,嘈左幾個月到佢地勝訴,但班友唔妥又再上訴,玩到年尾上星期十二月中,到第三判兼最後一判:因為一年間中央自己都知個新策好大鑊,又加又減又改,為杜絕所有潛在問題,就定今判決定所有野,而結果係工廠敗訴,雖然好似唔使賠足咁多年而有個上限,暫時官方口吻係俾左二三百萬先擺得平,而且今日宣判,第二日已經立即要工廠俾錢。強權也。


單野牽連極廣,因為當時工廠唔係全部人搞事,後來搞事一班請律師告工廠,同冇搞事果班無關,而家宣判搞事一班有得賠,對工廠梗係衝擊大,大拿拿幾皮野喎,仲要而家市道咁差有錢旁身咁緊要!所以今舖工廠贏同輸都係死:勝訴的話,工廠一班知道冇得拎番錢,生意又差經濟下年只會更衰,根本唔會有心機做野;敗訴的話,冇搞事果班見原來有得賠,梗係立即唔做野告埋一份,到時工廠停工都似。而家第一次已經冇左三百萬,仲要判完第二日即賠,唔係搵得切現金周轉,可能又罷工工潮,而班工人真係再告的話,我聽老細講過起碼要六百萬,處理唔好,分分鐘可以搞到公司破產。而且死唔止係我地一間公司,因為論僱員學歷水平,我工廠算區內數一數二,上年新法通過後最先搞事之一就係我地工廠,又係我地d人先咁醒識得自己夾錢請律師打官司,所以全區睇住我地工廠,因為判落黎我地下場係點,分分鐘影響到區內其他工廠d人有樣學樣。黎緊點收科我都唔知。不過明年份雙糧,應該凍過水。


中國就係咁吹脹,鍾意話乜就係乜,以前有錢上交就唔理你點做都得,加上要靠你振興經濟,有錢投資就係老細,而家上頭話地區發展完成,轉而開發中國北方,南方係時候整頓,區內工廠再冇多少重大意義,先至話原來你十幾年黎一直犯緊法,同要一次過補償番晒十幾年黎唔依法律導致之損失,你死你事推你出去祭旗先,而玩死的對象,係大多投資於中國南部之港商,所以睇報紙講咁多港商走佬、咁多港資工廠有事發生,你又唔好怪晒香港人,地方管治先係最大問題。而聽老細講,最新勞動法有一條,係要「保障員工月入足夠應付生活」。工廠出糧之餘,仲要確保份糧夠佢地使?簡直笑到爆咀。點先為之夠使?如果佢拎晒d錢去買煙買酒去賭去燒,之後冇錢食飯,算唔算夠使呢?而且d工人點使錢連佢地老豆老母都管唔到啦,工廠點管?笑爆。


「想同其他強國看齊、顯出自己係國際強國,但又唔熟知人權世情,自己亂咁定d完全冇顧後果之謬政出黎就話『向世界邁進一大步」,就是中國特色社會主義了。」



20/12/2008 SAT

21世紀金屬少年



21/12/2008 SUN

屋企隻狗老了,上星期帶佢去紅磡年度身體檢查,今日再出去拎埋份驗身報告同執執手尾,順便逛逛黃埔。


上個禮拜日隻狗走上TRHK玩/訓,真係貪得意咩!」


今日先知道,原來聚寶坊開左間玩具反斗城,不過勁細冇乜野睇,行完一出就係YO Park,經過時門口幾部電視剛剛好播番上次Tomahawk Metal Fest兩隊日本band、BASSAIUM同HYDROPHOBIA表演片段,過左今次能夠再撞到機會率相信微乎其微,有緣至此,立即影低幾張相紀念一番:




「俱往矣。只不知以後,是否還能有緣。」



行完黃埔搭巴士出旺角下半場,目標係陳姍妮新碟,但無緣就是無緣,一係未開一係冇入,結果去油麻地執番個Murder King食食。以前要出尖沙咀先有得食,油麻地分店講左好鬼耐,連正正佢樓上間雞記都搶先成個月開張,不過吸引力並冇因為俾人壓住、寄住而削減,間舖超細間分分鐘一間正常茶餐廳大細都冇,所以買野基本上要舖外排隊等姐姐招待,而我去到時已經有近十個人排緊隊,排到就好快搞掂半個字唔使走得,不過出去時門口已經廿幾三十人,要姐姐仔幫我開路至出到去。野食得唔得?我覺得整得好食過尖沙咀,可能因為太多人所以個包唔似尖咀落汁多到滴出黎咁滯而太濃味,少汁味道剛剛好。難怪可以多人到塞爆晒舖外&大廈入口,而樓上KFC吉晒。至於大家好關心的問題:靚女接待員一向是尖咀Murder King賣點,排隊已經有揀過蟀的囡囡兩名帶你位問你食乜,連入面企櫃檯收錢果d都化妝見人。旺角分店得唔得呢?


「...舖在旺角,人都MKd。」


今個月全皆旺死城過無人島,所以上到舖頭,第一件事開電視。三點幾未有卡通做,不過亞視有套奇片,而家亞視已經話唔拍自製劇,難得搵到呢套用亞視名義去到內地唔知山卡啦邊度市區及郊外實景拍攝的青春劇,故事講一班MK仔同一班MK妹互瘟,途中介紹內地旅遊景點風光景色及郊遊知識,饒富教育意義,只不過劇情MK、演員冇乜演技(好在全部人應該係香港演員/model,所以冇口音)拍出黎都幾笑片feel,好似今集講阿sir帶班靚去行山,途中教識大家好多地理知識,例牌去到深山先打風行雷落雨,按照傳統要走失幾位男女團友,然後藉口俾女演員濕身,跟住條河超淺水都可以浸親,而遇著意外情況本應英明的阿sir不知所措,明係俾佢溝的女主角大發神威挺身而出解決晒所有問題。嘩。冇得頂呀。拍得住當年港台勁作《過渡青春》。睇番,原來套戲叫《激流青春》,睇埋人物介紹,個阿花有份做《過渡青春》的,澳雪難怪咁似。話時話,飾演思齊果個model姐姐,我04年漫畫節見過佢真人架!睇晒全集,最正係臨尾個天行雷落雨,阿sir帶領各位學生避雨,跟住有個姐姐仔以超姣超嗲的聲線大叫


「耶∼∼∼冇signal既屌你∼∼∼」
(唔好意思,最後兩個字我加得太順手)


非常真情流露的演出呀真係好Q正呀,搞到我想搵番條片sample呢一句做電話鈴聲呀屌你∼∼∼跟住睇亞視新聞,講大陸呢幾日落到零下十幾度風暴大雪,鏡頭影住一位男主播站於曠野為大家報導,當時風向係從佢左邊吹去右邊,主播左邊大半個人俾風雪吹到舖左成層白色,而且風勢凌厲,清楚講句野都難更加企都企唔穩,但佢仍然出盡全力定住身形對抗烈風,一時感觸,對住鏡頭大叫


「我們亞視新聞部,是堅定不移的!我們不會倒下!Wiki Wong我


報導就被終止了。幾時都話亞視好睇過無線。就係噉一路睇亞視睇到夜晚,本身今晚有JACK OR JIVE搭多隊日本dark ambient project黎灣仔藝術中心表演,兩三年前黎香港加埋ELF FATIMA冇去到(勁灰呀牛棚正正我屋企附近咋!),今次搭多隊日本野,加上主辦單位話撞做冬對票房有唔細之影響,都想支持一下同補番上次冇去之遺憾,不過要睇舖想走又談何容易呢,各位朋友去睇JACK OR JIVE時,我坐皆旺睇《香港故事》。個節目講香港地的當年今日,睇過幾集題材廣泛問題唔係集集有興趣,今集一開波見到泰迪羅賓就知正野了,有擔任主持的佢、一些當年老band友同Uncle Ray為大家細說六七十年代香港樂隊潮。一向鍾意睇港台出品文化/音樂節目,之前《不死傳奇:黃家駒》感動加學到好多野,今次從泰迪羅賓同佢隊THE PLAYBOYS點樣成為第一隊錄碟出唱片再成名之本土樂隊開始,講到當年夾band係點、搖滾音樂與政治(始終當年政局未穩)、流行音樂同獨立音樂不同之處,到而家三十幾年後,傳媒同唱片公司對band sound已經再冇熱衷,睇見成班阿叔可以搞隊band叫SHADOWS OF THE VENTURERS玩《Apache》玩《Born To Be Wild》,真係好唏噓,特別節目中播左99年《世紀金曲頒獎禮》THE VENTURES黎香港表演片段,相當感動,因為除Moby之外,當年VENTURES呢次香港演出,係另一令我開始投入音樂之重要片段,跟住特登周圍摷搵左隻VENTURES live返黎,就算直到而家我仲係咁鍾意THE VENTURES好想搵人組番隊band玩surf,不過metalcore世代搵到人夾BLACK SABBATH、DEEP PURPLE都難啦,何況更老餅的rock野?我唯一聽過「近代」的本地band cover,已經是DSC《龍變》版、改到贏埋《嘉士伯流行音樂節》最佳改編的《Apache》。希望有一日,會搵到人同我一齊夾《Wipe Out》。節目後半,搵左d後生band出場,而新一代總令我想起一條問題:


「玩rock、玩metal,係咪一定要嗌先代表夠rock夠metal呢?同,有冇諗過是否嗌得動人?」


最抵死係連旺角百老匯條街帶住隻狗彈結他獨唱個阿叔都有拍到,另一訪問對象玩blues而被新一代排擠的後生band仔旁觀,曰「而家香港真心玩音樂同夾band一班,只有淪落至此下場」,睇得好感慨,真正的音樂、獨立音樂從來唔易做,今集有歌聽、有歷史學同對三十年來發展至今日,道盡band壇委縮、夾band被遺棄之苦,喜怒哀樂一集包晒,再加睇埋字幕先知,原來主題曲謝安琪有份唱。


「近期我最鍾意港台節目有兩個:非常柒但我好鍾意的《創新戰隊》,同《香港故事》。」


坐到八點半,國際台播Simpsons,細個第一次發現原來夜晚都有卡通睇(...應該早過《聖鬥士》。),亦係麗音進入香港第一批被重點宣傳雙語廣播節目之一,小學睇到而家、睇左十幾廿年電影版都終於上畫,仍然未睇厭,難得國際台仲肯買新野播,一定要追啦而家逢禮拜日晚睇Simpsons已經成為皆旺一樓指定動作。睇完轉過亞視,今晚做林憶蓮特輯,有得睇佢以前演唱會片段,亞視之前宣傳每個禮拜日晚八點半都會整個音樂節目講講舊歌手,包括BEYOND,今晚完左林憶蓮,最快的話,可能下星期就係BEYOND。熱切期待。


「所以你話,睇電視,係咪一定要睇無線?無線又有乜真正好睇查實?」


呀,仲有,提一提你,返左d貨,同聖誕&新年營業時間&優惠:

Good Old



22/12/2008 MON

我冇諗過前日同大家講講一位小朋友上黎TRHK買碟,可以引發出咁大連串討論。又等我踩多腳落黎繼續攪屎。


論metal,外國同香港比起黎,實在係兩個世界,以前香港地幾歲人仔識聽BEYOND已經係好大不了的事,但外國細路在我地聽BEYOND時已經聽緊METALLICA、我地學吹牧童笛時已經夾緊band、我地小學畢業時已經出緊show,因為對音樂態度太唔同,起碼外國教育會教你多元、社會肯接受不同音樂,連玩metal都可以向政府藝術發展基金申請資助,大把外國metal友讀古典同爵士出身,IN FLAMES幾年前仲拎埋瑞典經濟成就大獎,可見metal在外國地位早已被認同 - 當然仲有好多樂隊只能處於地下,但非此份認同及市場存在,唔會有如DECAPITATED班友仲未夠秤已經出第一隻碟時般英雄出少年個案發生。你睇好多香港人覺得「好地下」的東西查實其他國家流行榜個個禮拜有份、芬蘭連grindcore band出碟都可以上流行榜就知,歐洲同香港簡直天堂地獄比。


因為heavy metal言行舉止都過激,外國成日出現「聽heavy metal上腦」發生之案件,好似劑劑校園槍擊案,梗話兇手「原來係個超級heavy metal fans」,有乜殺人放火都入晒metal數。主要討論問題就是此:metal是否會教壞細路?小朋友細細個開始聽metal,會唔會好似外國一d極端人士噉,聽完會入魔、會殺人?我完全冇擔心過,絕對相信在香港一定唔會。外國人較易受影響,始終歌詞係英文,屬於佢地母語或通用語言,但香港人英文水平大家有目共睹,加上非母語關係難以完全感受得到創作人所表達。同十分老實:你聽metal咁耐,有幾多次認真睇過歌詞?一向香港人只將歌手當成一種樂器,再加上唱英文、「都聽唔到唱乜」的唱腔,唱廣東話而內容非常激進之rock/metal band唔見多少,我諗冇幾多香港人聽metal第一件事甚至任何一件事係研究每首歌歌詞寫乜,特別新一代,你見網上面人人每日講咁多新band、download咁多碟,作為一個靚仔,會唔執輸地跟隊一齊追?定「等我聽真d歌,睇睇隊band想講乜先」?話好鍾意好鍾意一隊band,但未細心睇過隊band一首歌歌詞者,大有人在。大家都經歷過靚仔靚妹階段,都會答「型」同「多人講」才是追求所在,邊個細個時未試過唔想威唔想型/未柒過呢?正因大家柒過,先會明白到我成日講「現今metal在香港只是潮流」係事實,而非因為劉Sir坐TRHK而抱任何機心去講。


靚仔打機打到盲目暴力,所以將遊戲中一套搬上現實好似打老豆老母,而家新聞耐唔耐都見一兩單,我絕對會認同打機好易引發未識諗野的靚仔靚妹暴力傾向,但大把metal友一向裝扮到牛鬼蛇神樣,是令好多衛道之士一見立即話「重金屬是邪惡的」主因,反而香港唔多見因為聽metal又或因metal惡型惡相引發之不正常行為。分別是視覺感官接受。電子遊戲顧及觀眾心態同遊戲步伐,影像大多顯淺,唔需要深入思考已經全盤接收到,長期接收就會對一種事物麻木,正如第一次睇恐怖片會驚,但睇多幾十套之後就會變成笑片,就算現實中出現、在現實中做同一件事都會視之平常。但metal包裝如何邪惡都好,對香港靚仔黎講只係一種時裝,只有「Manson著得咁型,我出街都要著到好似佢噉」,唔會「因為Manson係邪神,所以我都要邪埋一份,今晚出街斬人」。而且metal友搞親一係好碎料,唔係就好大鑊,而大鑊果d叫本地小朋友真係學,好似black metal燒教堂?我又唔覺得有幾多靚仔夠薑做。到頭來,metal在視覺影像文化方面,就只可成一種時裝。但音樂本質不同於其他藝術,皆因無形無相,必須認真投入同研究先會理解同吸收得到,只睇可能根本同音樂無關之包裝片面,又可以學得幾多成壞呢?敢講,如果從一開始起,日本視覺系唔化妝、Manson唔扮邪神正正經經玩音樂,而家都唔會成功打得入香港。而是「普遍」之累,當一門藝術去到好普及時,為顧商機同普羅大眾而只(可)餘下表面一層,就算你想研究,大圍、大潮流都迫到你要隨波逐流唔可以研究。


至於點解underground metal碟面唔會出現「Parental Adivsory」、「Explicit Content」等字樣,問題其實已經答左了。皆因要顧及市場,主流廠牌因應社會要求而對「有問題內容」唱片加上標籤,既地下音樂本身已經「唔入流」,甚至反商業、反社會,根本冇畫出腸的必要;真係寫到明者,更顯主流味重,所以見好多出名metal名如DIMMU BORGIR、SLAYER,出碟連封面都唔可以光明正大,但大量地下death metal、black metal band畫同歌詞想幾激都冇問題。「Parental Adivsory」、「Explicit Content」已經有點濫用到此地無銀之地步,虛火太盛。


...想繼續寫落去,不過懶加支力,仲有幾百字稿未用完,留番下次再有機會先用,就可以慳番一日唔使寫野,呵呵∼



23/12/2008 TUE

談21世紀金屬少年,噉就談到第三回,討論範圍已從「細個開始聽metal有冇問題」,到「香港辦金屬之可行性與縱向延展度」。第二回首個重點是無尾兄分享亞洲金屬體驗


「每次睇到無尾大師發言、每次去大師個blog偷師後,都不得不講番句『參見師傅』。人外有人也。」


在大師面前我唔敢班門弄斧,唔計搞show或工事遇上,我對亞洲金屬最接近一次,係四年前極字頭挪亞方舟,有幸獲邀請及批准協助獨立字頭(R.I.P.)在演出後訪問泰國death metal樂隊DEATHGUY,可從訪問中得知當地metal發展情況。之後為印度金屬界明星DEMONIC RESURRECTION寫過《A Darkness Descends》碟評,因而對印度metal有深一層認識(雖仍膚淺皮毛),當地metal發展比大家想像中要發達同快速得多,而亞洲經濟較不發達地區,好似東南亞、印度、中東、近東歐一帶,最具其他國家搵唔到之「東方」味道,特別興起非常多元化meloodic death metal,部份折衷至已自成一格地非傳規範所能分類。至於其他東南亞地區咩境況,大家都係去無尾兄地頭摻詳一番,劉Sir愧對。


唔計東南亞、日韓同其他亞洲國家,單講華語地區,真係諗唔到有幾多首叫做「好metal」的歌曲榜上有名。即係王力宏呀、五月天呀甚至MISTER SOLER等pop rock唔講啦,真係夾band玩metal者,冇一隊出得到頭 - 睇你點定義出頭,如作品上到流行榜才是,我唔多想得出,不過單以能在媒體炒得起,就算只得一段短時間都計,噉台灣其實有好多,之前已經有一隊black metal band上過綜藝節目(唔係閃靈,唔記得果隊叫咩名,詳自己搵YouTube),另潑猴都算成功,我唔知佢地受歡迎程度去到邊、有冇歌上過流行榜唔知道,不過潑猴曾經係台灣MTV炒得很火的一隊,只是我所知的「很火」已是幾年前之事,知道佢地近況者請講番我聽送幾蚊入我袋。但冇期望過可以有一隊真正玩恆野嘈野之樂隊入到榜,陶吉吉《黑色柳丁》可以比一般流行曲激已經好難得(當然,以佢個朵冇乜野唔做得),今年年底開始好多男女歌手以「搖滾」作賣點,但都是流行搖滾加前者重於後者,正如於《文化潮流》中有提過,在香港(延伸至華語地區某程度上都適合)就算玩band可以去到殿堂級如BEYOND、太極,都只能夠做/只敢做rock band,而冇可能真真正正表演metal。一宗軼事:曾經有個外國客上黎,講佢去台灣睇過六翼天使出show,表演時台下只得二十個人睇。這就是本土metal band在華人地區的待遇。


「至於點解東南亞咁metal,就真係要請無尾大師為大家解讀了,拙人未夠班矣。」


對於歌詞,個人仍然支持必須一讀方能完全投入,就如無尾兄所引,歌詞代表作者思想之一半,以中文歌為例,點解你會話K歌魚蛋?除音樂行貨,其中一個幾大之原因係「歌詞廢」。另一方面,你會覺得BEYOND有感情過好多人,唔止旋律同編曲(雖單此兩項已殺死人),而係你被歌詞感動得到,如話因為歌詞係英文而唔去睇,老實講,點解唔調轉嘗試聽metal學英文?而且個人覺得北歐樂隊如folk、black等尤其需要睇歌詞,因為對於佢地黎講,歌詞中之意識、訊息比音樂重要得多。此亦為成日話舊歌好聽過新歌之其一。以前生活艱苦、社會保守,玩band遭受之阻力非常大,題材往往從中取得,而七八十年代後生一班,經歷過冷戰、石油危機、經濟衰退等世界性動盪,往往能語之有物地寫出及批判社會現實。但九十年代經濟蓬勃,加上主流市場要求淺白,歌詞質素迅即下滑得可怕。當你生活無憂時無病呻吟,當你物質豐盛時同人講反商業反社會,又邊度夠說服力話俾人聽你有訊息帶出?講自我摧殘之nu-metal同metalcore最易看出此份虛火,另更多人只嘗試從寫作達譁眾取寵吸引客路,如一些已大路到喊的極端金屬樂隊。某程度上社會同經濟發展直接導致此況,皆因太多年黎大家生活舒舒服服,「溝唔到仔女」、「冇錢買乜」已是人生中大挫折,又唔多會關心政局將來,除左一些最切身問題(參考K歌常用詞材),有何其他能耐呢?只係當metal過份商品化,我仍然唔多覺得詞方面縱多負面,可對本地新一代作出重大心理影響。最少我真係睇唔到有幾多聽metal人士會認真睇歌詞,又或睇完會深入思考,進而從中受「啟發」做壞事/傻事/柒事。第二回已講過為何。有陣時反而覺得七八十年代一班講文學藝術講神話,甚至更加老土的講金屬兄弟,不切實際都比而家歌詞灰餐死好得多,最少有內容,就算灰都灰得有深度過人(可見OPETH),只係呢套香港一定行唔通,除metalcore同extreme盛行時你仲咁虛浮夾老土只會俾人笑,亦相信香港metal界中冇多少人夠文學水平做到,加上籌備、搜集資料、整理到落筆可以是個經年過程,而長年製作完成後是否會有(香港)人欣賞?睇睇BlackWine《影子》演唱會及專輯後記就知。


自上網搵資料搵歌益易,香港聽metal人口日趨年輕化,其實十二歲未必算最後生,因為仲有唔少外國小朋友聽metal野,睇睇Live Life No Rules同Mind Your Headdshow就知,十零歲的外藉小朋友人數唔係少,一家大細黎睇show都見過。單講香港人,兩三年前,已經有十三至十五歲小朋友聯群結隊上黎TRHK買碟,但年間人數增加唔多,我覺得係第一回提及過之經濟理由,今次小朋友十二歲會黎真金白銀買碟,可算是近期非常特殊事故 - 真係打緊工搵緊錢果班都冇幾多個仲肯使錢啦,上網download咁易!至於問乜心態開始聽?從我多年來所見所聞總結出多個論點,而大多或許同Chg兄意見相反。就我在旺角行走多年,而家「型」之年齡真係一年比一年低,加上近年好多家庭家境富裕,同家長比以前更縱仔女(這是前教育界工作者身份之途徑搜集得之資料),多閒錢之靚仔靚妹只會比以前多,所以我見過好多點睇都未夠十五歲已經著到非常視覺系之型仔型女。最重要新一代比以往更明白到外表重要性:溝女。唔係衰十一個案唔會多過以前不知多少倍。相信絕多數人會認同metal已成為潮流一部份,而進入metal之兩個途徑,有花時間花心機去聽去明之難路,同使使錢裝裝身即引得眾人目光之易路,作為靚仔,會選擇邊種?死慳死抵都要做後者啦,咁多年黎我已經見過太多買metal黎著多過買黎聽的靚仔了,我唔覺得而家會聽metal的後生仔中,有幾多個唔係懂走精面,而仲似我地當年柒下柒下。突出例子是一次一個我覺得唔夠十歲的外國小朋友,著住件LAMB OF GOD入黎問有冇KILLSWITCH ENGAGE,知道TRHK冇賣KE就走,其他同類但年紀較大的例子,不論本地人或外國人都有,部份甚至試其他同類野佢聽佢反應係「你播緊乜?」此應已足夠代表metal已是一種商品,及metal之衣著文化方是新一代所關注。冇人聽metal聽到「入魔」?又唔係,幾年前即CRADLE OF BORGIR大紅時,black metal曾在香港風行一時,當時好多靚仔話「我要夾black metal」、「我反基督」,甚至有人ICQ同我講過「我計劃燒教堂」,但最後有幾多真係成事,做出自己所講呢?接近全部短時間內發現落手落腳做需要付出大量心血及勇氣甚至犧牲自己,思前想後,都係易路好行,black metal之行動潮流無疾而終。前文中提出是「玩GTA同聽metal能引發不良行為之比率」,係比較打機打出問題同聽/著metal到出問題之人數,點計,打機出問題之比率必定比metal者高出好多,若從總年青人口比較此兩項不同媒體產物實不公平,皆因電子遊戲之覆蓋面必定廣於音樂,所以我只以有份參與之人數作比較。另,我形容之「metal界MK心態」,並不止於表面及年齡。此是另一討論主題。不過上面可以睇到當今香港metal發展最大難題:如果樂手同樂迷真係咁留意內容、內涵,香港音樂/香港metal早已不止於現今水平。


另多人提出一個共通結論:聽metal的人都是柒的。這又真是事實喎。我唔係話著搖滾look、金屬look就一定唔識聽metal,相反著得柒頭夠薯者亦非一定識聽metal,但就如《D.M.C.》中提過,現實中的真正metal樂迷(指認真當音樂狂熱地聽,而非人講我聽追潮流者),往往是逆《D.M.C.》、反高潮的牛蒡男型。《D.M.C.》中提過多年前一期《Milk》講metal,十幾版專題只得一版講音樂其他全部講著衫,你睇睇內文,撰稿者所作之資料搜集非常多錯處,更甚係受訪者都可以講錯(如「CoF玩death metal」),具基本知識同內行睇見會有好多位入。有趣在當時已在TRHK睇舖的劉Sir,仲係一個牛記笠記出街的白痴仔,果陣連band tee都未識買(柒呀!),但就算果時你上到TRHK發問,已能行雲流水同你講解「甚麼是金屬」,不過當時的劉Sir同《Milk》的模特兒一齊行出街頭,你問十個人,十個都會話劉Sir唔會係識聽metal果個,你見得多,會發現劉Sir唔係唯一一個,而係冰山一角。至於點解真正聽metal者大多都會咁柒,都唔會裝身?又是難路同易路之別。真係聽音樂一班,因為d錢用晒黎買碟,冇錢買衫所以柒(唔好笑,這是真的),雖則你可以話易路者要使(好多)錢一樣唔易,但對於生活上之影響,走易路絕對會更易得到他人認同(「普遍」),從而感到d錢使得「值」好多,在先敬羅衣後敬人、識metal搵唔到食的現代社會,走難路/真正投入聽metal,單身男性確實佔大半數。就同一獨男之研,個人年來觀察帶出另一頗為有趣的結論:真正投身者,大多有一定之性格缺憾,例如內向及過度獨立,可能個別缺憾導致易於受某種音樂吸引,例如最靜者會選擇最嘈之音樂作心理宣洩(此乃一些doom metal band人士提出過之論點,有根據的),其他獨立音樂可能都係,但現只集中講metal,我遇過之真正metal友,的確冇幾多個唔係寡佬/「溝唔到女的獨男」,包括我,非單身者往往老三字頭以上,如有人提出見過之多數metal友冇我講到咁灰咁極端的話,我只有講我之「真正」同他人之「真正」屬於不同層次。有人會形容此為「藝術家脾氣」,我唔敢講自己係藝術家,不過你會明白我想帶出乜野。聽落都幾歪理,但這確是我做TRHK咁多年黎睇到之現象,所以想在香港成為真正metal了,除左要幾柒得幾柒,首要條件係溝唔到女先唔該,你非單身已經冇資格做真正metal友了。(唔好當真呀劉Sir講野不嬲戇鳩架啦你都知呵呵呵呵)


最後,玩到連當事人都浮埋上水。即係大家解畫後,我先知小朋友件tee原來係LINKIN PARK,希望大家唔好笑我...


「等我扮番野專家挽回面子先!LINKIN PARK我好鍾意第一隻碟架!雖然之後一隻比一隻弱!《Hybrid Theory》仍是十分無敵的pop rock/metal碟!」


我諗小朋友同我一樣,冇諗過上一上黎買隻碟,可以引黎咁大迴響,我驚大家一兩張相演變出一兩萬字的討論(係,我認,我一個人佔左萬字的90%),會嚇到小朋友自此唔敢再聽metal/走難路。對於這位小朋友,始終我只第一次見,唔係武斷地話屬於潮人之列,不過建議宜邊聽邊思考,就如《文化潮流》幾千字廢話後最後帶出之問題。反而我十分出奇,雖然只得簡單幾段,小朋友寫野同思維比好多年過二十者更有紋路,唔係當事人現身,唔會估到個寫blog位仁兄/弟只得十二歲。所以,唔好俾我地成班幼稚阿叔嚇親呀,一定要繼續聽metal呀知唔知呀小朋友!(潛台詞:一定要繼續上黎TRHK買碟呀呵呵呵呵)



再要講落去,仲可以有大把貨出。近來有緣地到傳說中之White Noise一趟,行家之談,帶來更多見解。



28/12/2008 SUN

好耐冇野睇。懶嘛。又撞著聖誕,俾我放番個假啦。屋企部機又要修修,就算唔使返工都唔係話得閒。都係睇電視逃避現實好。一開舖即開機睇亞視,已經成為禮拜六日的娛興節目,上星期日發現左亞視咁多好野睇,起身睇睇節目表,


「咦,原來《激流青春》星期六晏晝都有得做喎!」


琴日禮拜六上到舖頭,梗係要開電視睇/笑啦!套野掛名亞視拍,但諗唔明點解所謂香港製作電視劇可以咁娘咁脫節,亞視決定唔再開自拍劇的確有原因。四年前《Metal時尚坊》張大導轉左部門搞到上次TMHK開show都黎唔到,為左整《文化潮流之中樂對金屬》仲呃左舖頭成疊DVD去(明顯自己想睇多過公用假公濟私),知再唔蒲頭還野會俾劉Sir鬧死,就襯聖誕唔使開咁多工冇咁忙,上黎還DVD順便襯而家3-4-5減價掃碟。


「點解上得黎,唔順便笑埋上次節目俾我?仲有場show隊crew拍晒,隻DVD呢?」


有張大導最開心,除左多水吹(講metal,都係同老野講先能講得暢快),仲有大量亞視內幕,好似明明話唔再拍劇的亞視,何解會整左套點睇都冇可能做得起的《激流青春》,就算拎去無線播有慣性收視都冇人會睇之廢劇?原因呢...都係唔方便係度公開地講,呵呵。


「不過各位朋友放心,我已經準備好2009年新年禮物!!不過到一月中先送俾大家。」


另外聽張大導講,《AV事務所》位女主持,做完之後原來調左去兒童節目。冇錯講完AV轉過頭走去教大家做個好兒童。咁有教育意義,梗係要支持啦!個節目叫《有腦E班》(個名真柒),驚喜係今集搵到長毛上去做嘉賓!以為佢上去同大家講政治?唔係,佢係負責俾主持同各位小朋友玩,個環節係每位出席小朋友叫長毛做一樣野,好似第一個靚妹落地人字馬,跟住AV姐姐立即叫長毛跟住做,著住件捷古華拉的佢非常無奈。都未夠跟住有個靚仔叫長毛議員講故仔俾大家聽。心諗可以同各位小朋友分享捷古華拉平安夜逆襲美軍解放古巴英雄故事,點知條靚仔一早寫左個故仔,一睇內容,柒到冇J,長毛讀果陣,全場忍笑忍得好辛苦。難得攝影師順利拍得晒全個環節。我非常同情佢。


「使唔使搵長毛呀呢d環節?搵黎做乜?最大疑問係,長毛點解會肯上去?諗住有得教香港新一代『誰是捷古華拉』?定以為女主持會同佢傾傾AV事務,講講飯島愛?」


被迫做大量戇居動作、答大量低能IQ題,仲要俾班細路同主持&AV姐姐笑到仆街,礙於自己議員身份同出席兒童節目唔講得粗口,睇得出長毛好後悔上個節目,有幾次忍耐力幾乎到達極限,小狗懶擦鞋差少少衝口而出。最後,都係頂唔順,教幾位小朋友學英文:


「今堂我教你地一個英文字!就係f、u...n!Fun!你一個fun!佢一個fun!個個都要fun!fun you!大家一齊跟住我對住鏡頭大大聲講一次!FUN YOU!


點睇長毛都係想講fuck,不過講完fu煞得切掣改成fun。跟住個環節就完左,難得長毛議員上去只得個幾字咁短,相信係跟住頂唔順失控,之後廿幾分鐘唔出得街,唯有直入下一部份玩遊戲啦。睇黎亞視真係才盡,環節設計、佈景同取鏡都非常獎門人,問題係獎門人玩意識不良,你亞視兒童節目,可以、能夠有幾不良?今世代唔不良,又能夠吸引到幾多人睇呢?再睇埋亞視送d禮物,環保袋同益力多禮品包已經係大獎,其他係牙膏呀洗頭水呀似送俾老豆老母多過俾靚仔靚妹,嘩大佬你叫d靚仔點玩得落手呀?似d老豆老母貪獎品推d仔女去玩多過佢地自己想玩囉。玩完遊戲,有亞視小記者出街訪問遊客教大家英文,即係好似以前ETV同會考英文oral,整一堆問題問問d外國人黎香港做乜、點解揀香港、香港有乜好,分別在而家搵個小五(甚至更細)而唔係中五的小朋友做訪問,而受訪個鬼婆d英文又長又難,即係我自信聽得明英文,唔睇字幕都唔係話跟得足晒佢講d野,你覺得好明顯照稿讀的小朋友會聽得明佢講乜?


「You up mud chun?」


唔係條靚仔講,係個鬼婆講,個靚仔都俾鬼婆口英文拋窒了,問問題都有d難度。而當高材生如佢都唔掂時,電視機前各位小小家庭觀眾,又有多少個睇完學得到英文?無記兒童節目已經唔多掂,亞記都不相伯仲。兩者之分別?唔計亞視冇大贊助商獎品睇見都唔開胃的話...無線d波大d囉。你睇同時段對台的《問問Master Joe of Puppets》。簡直教壞細路也。


「但係我好鍾意《放學IFU》個節目名。」


不過夜晚冇乜好睇,到第二日今個聖誕假最後一日,起身一心諗住有得再睇《激流青春》啦,點知跑馬。此乃細個唔妥亞視原因之一,一到星期六日就冇電視睇,進而迫住要睇無線,而無線當年禮拜六日d卡通又廢,相輔相成下,大個左兩個台都唔妥唔鍾意睇電視(...)。不過乜節目都唔睇唔緊要,新聞一定要睇。自從有線帶頭,而家個個台新聞都要賣明星,即係賣女啦,早在「維新」事件之前,亞視新聞部已經超級換人,係噉推省鏡後生女出鏡搞到「新女上場」噉款,其實早已默認左Wiki Wong一套是正確的。又聽張大導講,原來好多野more than meets the eyes。


「喂,張導演,亞視新聞部幾時請人?有得做個打雜都好丫!入到去就得!」


夜晚先精彩,亞視逢禮拜日晚《撐唱》,終於輪到BEYOND喇!開頭非常期待,繼港台之後,終於有得電視再見BEYOND!期待左成個月,點知今個禮拜出廣告先知冇黃家駒份,係播96年Live & Basic,好在三子時期呢場算玩得最好,而且我只得CD,睇僅唱K睇過幾個MV,冇黃家駒都冇乜緊要啦。張大導又走過黎搭訕。原來呢個《撐唱》節目男主持袁XX,又...呵呵。難怪要加多個女主持俾佢了。不過因為每一節開始要袁XX同王從希兩個講番個幾字發人深省,播多兩三首歌已經夠鐘入廣告,個節目全長兩個鐘,都迫不得已要cut走幾首歌。又有乜所謂丫,因為今晚收舖去打邊爐,都睇唔得晒架啦。終於唔再花園金閣,幾晚前七刀同學試過油麻地花園酒家,一個掂字,今日大家就去食了。因為都搞得幾即興(邊次唔係?),網上反應平平,初時都擔心過搞唔成,後來又好野喎一個一個地蒲頭,結果由「應該得三四個」變成九個。今晚係打咁多次邊爐以黎最癲一次。同一晚的教訓,是打邊爐千祈唔好飲Jolly Shandy。


「噉又放完假。今個聖誕有得玩有得食有得拎,仲近半年黎第一次睇show,非常開心。所以又要返番工,好唔開心,嗚嗚。食到咁飽,相信又要射波。」



29/12/2008 MON

糧尾、「冇新貨」加金融海嘯(一個讓下載世代為自己「合理」行為再加無限合理化之時機/藉口:一年前經濟係近十年最旺時,都已經「窮,冇錢買碟」,更何況而家全世界都話冇錢時?),除左聖誕幾日,皆旺下半個月變成無人島(上黎混吉者唔計),而當連玩具舖都冇生意時,賣d野連香港metal友都唔聽的TRHK自不然更加啦。不過從來唔會悶,大把野搞之餘耐唔耐有奇遇。好似上次Rock爺的重金屬訪問(講到好pro,其實只係兩條友吹水...),訪問中途遭人亂入打斷以致專訪斷開兩part,果個亂入發表「歐洲已回到中世紀」的阿叔,其實幾年黎出現過好多次。咁多年黎間唔中就會見到佢,次次語出驚人,好似今日蒲頭,


「夏韶聲講過,香港冇Rock N' Roll,搖滾樂根本冇可能係香港生存!」


爆左一句就走左,而今舖已經係佢較「正常」一次。我鍾意坐TRHK,就係因為成日遇到呢d奇人。仲未完。阿叔走左,黎左另一個阿叔,經過TRHK時逗留門口一陣,拎左本《紙談音樂》睇睇(係呀,而家TRHK已經成為《紙談音樂》派發點!)(其實,已經派左半年都有...),跟住入黎問野,用英文。


"Do you have internet access?


見佢口音非常外國,以為係新加坡黎搵碟,就用番英文同佢溝通,傾左陣先發現原來識廣東話。傾一陣音樂,之後佢留低左張紙,上面有幾十個網站咩都有,從酒店到慈善機構到志願團體,網上電台、賣物網、傳播機構、音樂網站,甚至免費商用軟件、廣播程式,做音樂做文化拎住呢張紙,得益不少。


「d網你架?你幫人賣野?」
「d網唔係我搞架,不過見你地會有用咪俾你地囉。而家開舖頭賣音樂好難做生意,上網賣同宣傳先可以搵多d。」


就走左了。之後諗番,個阿叔有d面善,唔知係咪DJ黎?從佢言行舉止同談吐口才,相信就算認錯人唔係DJ,應該都同藝術文化工作有關,又或藝術/音樂愛好者一名,始終相由心生,係果種人就會有果種氣質。最主要係會做出如此事不關己之餘利人卻不利己之事,只有呢幾種人會做。


呢個就係我所指出,玩音樂者同聽音樂者搞音樂、推廣音樂之別。玩者,做事往往會以顧及自己利益出發,但聽者唔會亦唔需要。」


重金屬與「俠」者,我一直非常想寫,因為聽左metal咁多年,「俠」係呢種音樂帶俾我之精神,只係寫未夠班,亦唔敢/唔會話自己點樣俠義(話自己俠義甚至真正是俠義,在香港只會被狠狠插死,好在我唔係,呵呵),不過相信會成為我2009年專題文章之一,已構思好簡單一寫。因為2008年好多件事(除你知道之一,仲有好多),顯示出本地metal band、metal友「有事」時唔會亦唔能夠作出取捨/不取只捨,如果你睇到呢度想講「坐TRHK果個劉Sir又想打飛機話香港metal界點衰」的話,想提你頭先番說話出自香港地一個聽左metal六年、叫劉Sir的無名小卒,而同任何機構、商業利益無關。而且我相信,香港metal中從未有人試過從獨立工作者角度出發,去剖析整個界別文化發展(非表演、技術等「物理層面」),而我可能係唯一有能力去做之一個。所以,簡撰拙文講本地metal精神、metal文化(讀:「打飛機」),似乎是時勢所趨。


「簡單一問:你同阿Riz最大分別係乜?你答得到同理解背後道理,自會明白佢可能係全香港band界唯一一個人音樂與信念一致,而點解其他(香港)人唔會做、做唔到,及我會話『在香港metal界非夾band者辦獨立音樂鐵定失敗』之原因。」



31/12/2008 WED

2008年最後一日係唔使睇舖的星期三,有點命中註定之感。今天請埋假,全日匿埋屋企修心養性。今年365日,今日係唯一一日真正覺得自己可以乜都唔理放番日假。


「今年,噉就玩完了。可惜失去左一晚歡樂除夕夜。」

「祝大家新年快樂。咪學劉Sir呀記得!」



TRHK 3-4-5 清貨大優惠

任何2件產品 = 7折!!!
任何4件產品 = 6折!!!
任何6件產品 = 半價!!!

另香港progressive metal班霸BlackWine
所有大碟一律優惠價$65發售!