是週行程　星期三FEX星期五TLS下星期一IT Assignment & Debate
逢到SEM尾一定瘋狂跌錢。唔係掃碟，係租房趕工。四五月都冇收入，係時候為做功課節衣縮食。灰。番到黎第一個星期已經咁多節目，所以幾時都話筆學費真係俾得好很抵。嫌節目唔夠多？唔緊要，係功課方面教院永遠都唔會令你失望。下星期一就交IT功課，可以今日先至俾guideline，掂。驚做唔切想遲交？
「得！一個星期前申請唔該！即係今日唔出聲的話你下堂交唔出我可以立即肥你！想遲交唔好搵我同我老頂講唔該！咦佢今日好似唔係度喎．．．」
仲唔夠？唔緊要！呢期興買一送一，買assignment送debate。下星期一邊個有份做辯論？唔使「估計」喇，係「明知」，一定係我俾人屈。早知我就動議辯論「應否在交功課日進行辯論」。

終於搵左林Jr做Child-De訪問。我發誓我冇寫定答案俾條肥仔！雖然我聽番餅帶都覺得兩條友完全係夾緊稿：
「你鍾唔鍾意讀書呀？」
「當然鍾意！課堂可以令我學到好多知識，又可以識到好多新朋友，所以我好鍾意讀書！」
「．．．多謝呢位同學提供呢個完美答案．．．我冇叫條靚仔夾稿架黎寶燕．．．」

呢野真係Perfect Co-incident。
處境甲：上堂俾左份練習條肥仔，佢到今日都冇做，我都睇化算數。
處境乙：落堂條肥仔要去同學屋企拎野，噉就落堂之後快手搞埋Child-De個訪問，是堂評語都未寫就走。
處境丙：條肥仔去到人地屋企同同學一齊做功課，係好很難得，但係開心得滯做到十一點幾先番到屋企。
老闆娘案情重組：條肥仔擺到明唔做功課唔上堂，搞慶阿Sir手尾都未執評語都唔寫就走左去，條肥仔就去左同學屋企玩玩到唔肯番屋企。
「我知我個仔係難教！佢搞到我晚晚都唔夠訓，我都搞唔掂佢！而家我地決定停晒佢所有學習活動，等佢唔好以為呢ｄ野好容易得到！所以暫時唔使上黎幫佢補習．．．不過唔係你問題！係我個仔錯！」
夜晚十二點幾打黎噉同我講，我都唔知有咩好講。剛剛好係我最忙一個月唔使我開工都唔錯。可以六月頭考晒試交晒功課之後再補番就更完美。好在剛剛搞掂左Child-De如果，唔係真係唔知點樣做功課。

十二點半準時放學。而家呢幾個月收入真係Absolute ZERO，飯都要番屋企食慳ｄ洗。下半場係FEX，聽日就交兩個Teaching Portfolio，睇見ｄ教案都唔知點執，灰。

所以幾時都話想將四萬二千五使得物盡其用加有賺的話，一定要拎黎教院。真係淨係實習時ｄ教務同埋實習完之後ｄ報告手尾，已經可以有人地大學一個學期所有工作量加起黎咁多。仲未計埋其他科數之不盡ｄ功課。所以幾時都話

之前就深夜都打晒鑼噉搵我叫我唔使黎補，到今日晏晝又打黎叫我補番。即時吹脹。蘇詠梅又而家先黎新Project，又係吹脹。不過多左咁多野做，當堂搏左ｄ，分分鐘今個月搵到銀之餘又做得晒功課。不過都係唔好發夢下星期一IT都仲未搵過書。星期五仲有TLS．．．

正生書院，聽過未？「正生書院係一間名校，學生成日參加社區活動同比賽，個個月都有獎拎，搞到成日要通知家長，我都覺得煩．．．」個校長噉介紹。唔知？「我成日都上鏡見報喎！香港所有報章雜誌電子傳媒冇一間未見過我！」個校長話。都唔知？等我話你知。正生書院係長洲一間中學，除左教育仲兼營好多生意例如狗場、二手鋼琴、薄餅屋，「雄霸」長洲。仲有一瓣養殖金魚，培殖出黎之金魚仲拎個世界冠軍，成四十萬一條。夠勁未？我講埋你知呢間係咩學校你就知最勁之處係邊。正生書院係一間福音戒毒學校，開中三至中五俾有志戒毒人士，假如你冇吸毒但係想入去Repeat中五唔係唔得，請你會考拎低過三分。正生主要以教授技能為主，的確為好多邊緣人士改過自身，成功重投社會。「學費又如何？」八千蚊一個月。記住中學黎咋喎。係好喪，但係原來計過數，一條友去坐監一個月都要成萬二，反正拎綜援家庭可以向社會福利署Claim學費，即係筆數點都係政府俾，但係入正生的話成本較低，仲真係可以令人改過。
「做乜無端端提呢間野？」冇，今日雖然只係得八點半堂，但係為左聽正生書院校長個Guest Lecture而唔走堂。你會發覺香港其實係好需要呢種學校，畢竟香港問題青年真係太多。而且呢一種教學模式先係真正教到讀唔到書之學生。其實香港以前都有個採用類似教學模式之「實用中學」，以教授成績「未如理想」之青少年生活同工作技能為主，讀過之學生都話好，因為「真係學到野。」但係開左冇幾耐，就因為教署一句「冇Ｑ用」就全部執晒，正生似乎係最後一間。但係正生學額有限學費又貴，又唔係個個都入得工業學院，噉其他大量「讀唔成書」、「冇書讀」之人點算？

今日下午一時三十分，我係屋企一邊焚機一邊食麵。咁閒情逸緻代表左我剛剛走埋今個學期最後一個Program Assembly，順利保持今個Sem「一個Assembly都唔去」之清白之身。聽日交青瓜又要開工喎，好得閒咩。雖然一早番到屋企都係大昏迷又係勁夜先開工。

阿邊個（你知我講緊你），留言板第四十五同四十六號留言唔該。請對號入座。

突然間有個「緊急會議」八點半堂取消，最重要就係跟住唔使補堂，真係跟左大半年青瓜都未試過咁好帶契。不過青瓜人唔係度堂唔使上份功課都係要交，英文增潤走堂走到出警告信唔走得，仲要借書做IT，學，始終都係要番。有得十二點先起身我已經好開心。

人地今日生活：番學 ＞ IT ＞ IT ＞ IT ＞ IT．．．直到星期一，阿門
我今日生活：番學 ＞ 放狗 ＞ 林Jr突然話唔補習所以繼續放狗 ＞ 放狗．．．直到聽日，善哉
咦乜唔係好多功課咩？連我都成日噉樣問我自己。點解我會咁得閒？哈哈呢樣野係我永遠都唔會明，我淨係知我係教院成日比人藐比人小就係因為呢個原因。
叻姐，你呢ｄ居屋人士恨唔到呢種生活架喇，不如你係校門巴士站度養番隻啦哈哈．．．

想寫好耐，但係因為一個「頹」字，搞到俾人截糊。

先大佬後也哥，由尋晚十一點半吹到今朝兩點，好耐冇試過咁多水吹。係呀大佬，「彼此也在捱。」反而也哥已經放左成兩個星期暑假，最嘆原來係中大。

冇呀星期一要交IT冇得走所以除了做還是做。不過，等我撚埋狗先。

今日大家過母親節，但係某親戚一家就係過冇親節，「慶祝」母親節地點係殯儀館，方式係喪禮。各位，好好珍惜自己娘親喇。
白事完之後本來老母話去打邊爐，但係都唔去得，IT冇計。搞到我都冇親節。

前日已經「開始」，但係除了睇書就是睇書到今日凌晨先至係真正「開工」。聽朝就死線但係十二點幾時仲可以訓係度你話死未。之後仲可以一邊做一邊頹，到兩點幾仍然係得幾隻字但係「焚機」同「撚狗」呢兩樣野可以穿插於「做功課」之間，絕對係唔識死。噉樣做做下又訓下焚下撚下又俾我八點鐘交到功課喎。係似番ｄ做功課，但係Year 1 GS一本書都冇三晚吹三份萬言書之光景同狀態，似乎永遠都冇可能再現。
做完之後收到好多投訴，投訴我「晏過人地開始做但係又快過人地做完。」Sor囉各位，我已經好頹囉喎，最多下次我再頹ｄ就番你地啦哈哈。

係呀本身我係辯論隊第二副辯，但係今日番唔到學。點算？唯有靠我秘書。我秘書又係邊個呢？咪就係我個中學同學個小學同學Jenny Lau。Jenny姐！為左劉義、為左劉茂法、為左我地劉家聲譽，你一定要贏！當然結果就係不負眾望，但係始終都係勝之不武。《翻版有助推廣資訊科技》我做正方點諗都淨係度到四個Point，但係已經夠贏有突啦因為我真係諗唔到反方可以講到ｄ乜。

又係絕對巧合。
處境甲：通完頂個樣好很呆滯加戇居。
處境乙：條肥仔要留堂，剛剛上堂一刻先番到屋企食飯，搞搞下就冇左三個字。
處境丙：條肥仔唔想上堂，「Fine反正我月中開始大把功課，我五月唔同你補住。」
老闆娘案情重組：肥仔擺明唔做野，又顧住食飯搞到勁遲落堂，仲搞到阿Sir「好很嬲」唔肯再黎上堂。
哈哈我真係唔知發生咩事，結果又係條肥仔遭殃。老闆娘聽到我話五月唔做住都不知幾高興，梗係「抄人」同「辭職」前者幾難開口但係後者佢就完全唔使唔好意思。

只不過係幾日，已經收到好評如潮。估唔到Promotion都要Encore。

星期二堂到今日大結局，普天同慶。星期四原來唔使上堂，聽日份功課又Email交算數，變相多兩日假期。用黎做功課又好開工又好頹又好，總之合皮。

我好記得我琴日係冇番到學。但係點解有條友見到我第一句就係
「喂！你琴日好串喎！」
？？？發生咩事？係教院我已經去到唔使出聲／出現就可以得罪冇數人之層次。發覺好有賢少影子。

咁難得有假又咁蹺經過，大佬，我終於都入機舖喇。冇練兩代加冇打半年，而家到我入到去做路人甲俾人串。大佬，似乎你番黎時我都陪唔到你玩架喇．．．
兩年前係噉，兩年後都係噉，發覺機場無論點變，ｄ人永遠都唔會變都係咁戇居。遲ｄ一定要寫番篇《香港機場》，歌頌一下呢班令機場風氣得以流傳之傻仔。

阿邊個（冇錯又係你），《八三三》我係唔會剷架喇，你想見唔到呢篇野的話，HACK我啦！
仲有「教院最頹廢屎忽鬼」有野搵你，留言板五十號留言唔該。

死喇而家小學連魚旦都唔俾篤，下年實習會唔會冇啖好食？

咦原來「揚州抄飯」俾人註冊左做商標囉喎。我地「宏快樂」都要快ｄ申請「多餘麵」個專利，如果唔係好快就會俾人搶左呢個名．．．

由入教院第一日至今日，所有見過我之人冇個信我係教英文，「你點睇都係教中文！」可能我真係選錯科。呢幾日好多人問我中文字尤其香港字點寫，一個問完到第個。問佢「點解唔成篇野用書面語寫晒算？」「ng tak gar!」見到呢句野都知咩事。我重申一次，我係教英文唔係教中文，雖然我上年中文聽說讀寫四樣野都唔使增潤呢樣野好多中文人都做唔到．．．

聽日就要交番份FE俾甘志強，搵番上個Sem份野個過程簡直係非常神奇。估唔到唔出屋都可以有奇遇。
叻姐，成日都叫你唔好執野架啦，我亂葬崗噉起碼都搵得番上年ｄ屍骨，你成日執到咁整齊都搵唔番上年兩份野黎交，搞一大輪身水身汗又冇用你話為乜？

嘆左兩日，今日英文增潤Last，要番學喇．．．又點？咪又係十二點先起身然後趕到仆街？死喇噉搞法下星期冇堂上我都唔知仲有冇朝頭早。

三點八開會講英文，到四點半．．．
「開完拿？」
「你應該問：『開始拿？』」
唉叻姐都變到好似我咁頹，成為最新一名受害人喇，我係教院真係害人不淺。結局當然係做唔完，一切留待下回分解。

今日放左學好得閒，絕對係下星期放大假之先兆。有幾得閒？係唔使補習但係上條肥仔屋企玩突擊家訪，夠得閒未？
對住呢條肥仔，冇錢收又白費時間口水，我都唔知有咩好講。連老豆老母都放棄諗住掟佢去聖士提反寄宿算。小朋友，算你好彩，如果你唔係仲係讀小學的話，再係噉落去就真係剩番正生一個選擇。

《星戰》，「等左幾十年喇！」冇得唔睇啦。算係唔錯啦，睇完之後你真係要講句「抵George Lucas發！」幾十年前已經度到呢個驚世劇本出黎，寫個「服」字都嫌太少唔夠。
睇過海報，你一定會見過個女殺手同埋賞金獵人。但係原來兩個都係大路人，個嘗金獵人冇乜講過野係間場出過下死得又快又簡單，個女殺手仲衰開頭幾個字就死左。噉點解會重點宣傳佢地？一個字，呢個字大晒：「型」

《丁舉人》到今時今日仍然咁成功，總算老懷安慰。不過．．．唉．．．

「我覺得你係天才！」
好多教院人黎過呢度都有好多野講，揀呢句只因呢句最新別無他意。回應只有一個，唔想再講咁多次，登係呢度，有關人士請自己睇：

蘇詠梅終於殺到埋身，一早打電話黎審：
「好耐冇黎番工囉喎，做成點？我知你養左隻狗，梗係成日係屋企玩狗唔番工啦？」
我呢ｄ蘇豪派，不嬲做野都係留係屋企。雖然係噉，呢句都係要講：
「邊個！係邊個爆響口！！出黎！！！」

上回英文Unit Plan未分勝負，今回叻姐專誠上黎劉宅再戰三十八回合。戰況如何無謂提，得一句說話：
「想頹，一定要上劉義屋企同劉義一齊頹，因為噉樣頹，先可以令你頹上加頹。」
對唔住嬌哥，教壞左阿嫂搞到佢而家同我一樣咁頹。叻姐話我屋企隻狗係佢咁耐以黎見過第一隻「唔會吠、唔玩波、唔四圍走、唔鍾意食野、唔會因為你叫佢個名而理你或者走黎搵你，唔會對任何搞佢整佢糟質佢之人反抗、唔可能搵到第二隻狗頹得過佢、唔會再搵到第二隻更適合劉義養」之狗。佢仲俾左條IQ題大家：
「劉義頹同劉義隻狗頹，邊個係雞邊個係蛋？」
仲有，再提醒大家，「無聊齋」先至係劉義官方訊息唯一來源，叻姐所講有關劉義之一切只係"OFFICIAL RUMORS"，敬請留意。
叻姐，等緊你篇《土瓜灣傻佬》投稿。

早前同也哥吹開水佢講番起，呢排叻姐又提起《一一二六》，見今晚都唔會有咩心情做「理論上做得晒」之英文同RA，終於都寫：

英文Unit Plan搞一大輪，臨開工做埋個「課室英文應用」時收到May姐急Call：
「喂你知唔知Language份野到底點做？我地組三個人做出黎個格式同內容都唔同！仲有，個Unit Plan有人上過去問，好似話唔可以多過一版喎！」
好神奇。我同叻姐就一直跟住張Oultine黎做，但係而家聽番黎個版本同我手上個係完全兩回事。搞到而家Unit Plan做出黎唔知係咪做錯，Language又跟邊個Guildline做都唔知。但係都冇時間諗喇，聽朝就要交。
所以永遠都將Module Evaluatoin留番最後先做，一個Credit Point都可以做咁多份野，連做法都可以傳到四五六個出黎，唔讚唔得。

冇呀今日乜都冇做過。但係好多人都催我交稿，噉我就求祈整篇「知多一點點」俾你地算。唔鍾意唔好搵我，你知我係咁頹。

開工開工開工開工已經係尾二一個禮拜星期三冇得唔開工再唔做就聽辭工

好得閒噉就同探花睇左《蜘蛛俠》。點睇都覺得係幾廢下，唔明點解會係美國開畫票房冠軍。

幫襯過間網上唱片舖係龍珠開左間舖，睇完戲行過就一身街坊裝噉上去睇睇。行入去之後就舖內本來吹緊水之幾條友立即以怪異眼神啤住，跟住買左隻之後走人班友更加係覺得不可思議。係因為「人靠衣裝」？定還是聽親極端同前衛ｄ人一定要覺得自己係高人一等？

「今日做左ｄ乜？」
我將今日之廿四小時濃縮成呢分半鐘之Video，睇過你就知今日之生活係點。

爆少ｄ粗啦，叻姐。

「今日做過乜野？」
「如果頹都算係『做野』的話我今日真係好忙．．．」

今日冇咩建樹，最大作為係同探花同放射人食韓燒。係呀噉就四年，你地噉就Final Year。我雖然只係尾二一年但係相信都唔好得你地幾多．．．大家努力啦。

再帶俾大家「知多一點點」：
「金三角，泰國一處以生產毒品而聞名於世之旅遊景點。但係其實而家個金三角其實只係泰國造出黎，真正之金三角係另有所處，當中原因牽涉到歷史同政治。第一次世界大戰時，台灣國民政府派出一隊軍隊駐守金三角。後來本部同呢支軍團失去聯絡，而呢班人同外界隔絕之後，並唔知道戰爭已經結束，就繼續留係金三角等待指示，結果一直等，到第二次世界世界大戰結束之後仍然留守金三角。要駐守陣地，但係又冇支援、冇補給、冇指示，班軍人為左生活同消磨時間，就係金三角種罌粟花黎換取食物同軍火。經過不斷循環之後，呢班軍人已經成為一班好有勢力之毒品商，亦因為噉佢地同泰國政府有過多次衝突。而問題一直都得唔到解決之原因除左因為呢班人勢力過大之外，仲因為冇國家承認佢地身份：雖然到而家呢班人已經去到第二代，台灣一早已經遺忘左呢班人，而呢班人亦因為台灣幾十年都唔幫佢地轉而支持中共；泰國開出放棄一切中國文化身份之入籍條件亦得唔到好多人支持。所以除左一ｄ人肯放棄中國身份入籍泰國，同有錢同護照ｄ人可以搬去中國之外，其他人一直都係留係金三角。為左解決呢個問題，馬英九之前曾經三次經香港秘密到泰國同當局談判，最後肯番台灣之人可以拎到台灣護照，唔願走之人亦都可以得到以萬美元計之賠償。」

今日生活：又豪多成疊碟番黎焚到爆，想知情況係點的話睇睇前日段片再將佢加快三倍啦。
我都想自己拍番套，但係有本錢冇技術嘛。或者交晒功課考完試之後去ETU借部機叫舍妹幫我拍番套啦。

冇呀今日又係焚焚焚焚焚．．．野都冇乜點做過。不過今日有一大得著。
阿龍大Anodize，記唔記得或者有冇聽過？原來間網上唱片舖個老細就係阿龍大個結他手。剛剛係龍珠開間零售舖，絕對係臥虎藏龍。求祈Quote段你睇：

「你好耐冇黎囉喎！你隊Band玩成點呀？」「我就做Vocal。我想試下玩Death Metal下，Death腔我掂，不過Black腔就唱唔到。但係我班隊友唔鍾意聽呢ｄ，所以就番佢地玩番Thrash。不過我個Side Project琴晚先係蒲窩出完騷咋，玩左幾首Metallica Cover。」「你又係負責唱？」「唔係，琴晚冇我份。因為我個Side Project有成十幾人，上台之前邊個想玩咪上台囉。我琴晚就淨係上台Fing頭。」

同老細吹吹就熟，你真係唔會信佢以前係名結他手。老細認得我之後，以後得閒就可以上去搵佢吹吹水，又可以聽下老細ｄ專業碟評介紹，試聽又係無任歡迎，想要咩碟出句聲叫老細幫拖訂就得，最重要就係上到去買碟有折．．．
龍珠開左呢間舖之後，對其他商戶黎講真係「焚到仆街」除左爆粗冇其他野可以做。呢間舖一日未執，龍珠一日都唔會安寧．．．

為左考個無聊英文增潤Exit Test，無端端又要番教院。考完之後終於明點解成日都話英文增潤真係有成效。上學期個Entry Test就係五分鐘內做一百條Listening MC，再一百條Grammar MC做完就走得；Exit Test份卷，居然係一模一樣，分別只係先Grammar後Listening等你Grammar冇得早走一定要坐足九個字。根本就係三個字可以做晒，但係而家唔俾人走，即係有半個鐘悶到爆除左Check卷之外冇咩好做。同一份卷，Entry迫人亂做，Exit迫人真做，出黎個結果點會冇「進步」？原來year 3班人都係做同一樣野喎。即係同一個試、同一份卷，仲要做多兩次．．．

好在考完之後上一上八三三今日先有番ｄ意義。聽日晏晝五點要交現當代文學四千字論文，死線廿六個鐘之前先開始睇書同定題目，諸位頹霸果然別來無恙，冇影衰到「八三三」呢三個字。中文係與我無關，我上去係幫人整機。

番到屋企之生活都係焚焚焚焚焚焚焚焚焚焚焚焚焚焚焚．．．

「我唔鍾意睇X Files，ｄ劇情成日都解釋唔到，都唔知睇黎做乜！」
「我都唔鍾意睇六合彩，次次睇都唔到我中獎，都唔知睇黎做乜！」

番教院就係為交功課，又係無聊。好在上一上叻姐房搞一搞Child De先有番ｄ意義。
真係得叻姐教路先知原來份野係咁Ｑ煩／難。睇佢同個miss傾份野點做傾左成半個鐘仲要講到到好似鬧交噉。我都唔知點算。所以，今晚先算。

做做做做做做做．．．到今朝五點幾，Child De終於搞掂。雖然一面做一面覺得好似做錯，但係都唔理Psycho野不嬲都唔明亦都永遠唔會明我都係志在搞掂就算。做到仆街之後得一句：
「千祈唔好再搵理論野搞我！」

「你諗過打機都可以打死人未！」
係呀今日《蘋果》頭版又有「打死人」事件，請各位家長立即剪存並大量影印貼於家中電視及MON上。

本來係諗住番教院借書做埋GS，但係結果呢野教院行又係無聊。書就冇乜，啟示就一大個。所以番到屋企仲可以打機焚機又訓又頹都唔知功課．．．

「乜咁夠薑功課都唔做？」
點解香港人咁擁護自己「港人身份」？真係我同你吹一個字水ｄPoint已經多到寫到幾千字，唔會驚唔夠料只係驚太多料寫到超晒字。睇落應該係幾易做，但係都可以挨到兩點先intro四點先過千六點先做完，頹到噉你都咪話唔犯賤。

「番黎拿？」
前日方雋同我講。自從Year 1文化研究Present破天荒地做「香港（電）機（娛樂）場（所）」之後，佢永遠都會記得我呢個多多事實又多多廢話之頑劣學生。但係似乎佢老人家記性唔係太多，Sem 1過左Sem 2見番就問「咦你係咪今年畢業呀？」到而家Sem 4就問「番黎拿？」梗係以為我畢左業教緊書而家番黎在職培訓。
「番黎拿？」
今日老細同我講。係呀成個月都冇蒲過頭難得佢見到我唔小仲即刻批幾份野我做，等我可以交完功課即刻搵銀。不過佢唔小我似乎係因為睇化我呢個走堂多多走工更多之頹廢員工。

即係諗住我Child De做到前日五點幾由今朝六點先搞掂GS都覺得自己唔多係路，但係三點幾落電腦房見到全場爆滿先發現原來我已經算係神人。同上年Dreamweaver一樣：
「唔通勤力個係我？冇理由丫．．．」
上到房發現，兩條八三三頹霸都堅信「魚與熊掌不能兼得」之道理，決定淨係做GS，Child De就「今晚先算」。「八三三」之臭名得以力保。功課都唔交淨係留係房訓覺的確係強，但係兩條友GPA都過二點四豪得起我就點勤都只係最低分一個嗚嗚嗚∼
冇錯我係頹！頹到出機舖都冇打機欲！但係「功課又做得晒喎！」係囉我呢個Year 2頹霸發生咩事點解會頹到噉樣走火入魔法！

八三三三賤人加埋 漢 嫂，「八三三明星之旅」終於成團。 漢 之前食過福星之後猛小，話「我間明星掂過你間福星多多聲！」我回應係：
「得個平字　不外如是」
唔係自己拎要等佢上菜真係等到仆街，個沙爹湯底除左得個顏色之外又冇沙爹香又冇沙爹味我完全唔明點樣「正」，唯一值得欣賞就係鮮橙汁五蚊渣仲平過出街買同埋每人七條就埋到單。
四條友，東羊西海南牛北素一人一味。呢舖玩「自己問責制」，自己剔ｄ野自己清番晒，結果我地唔想響朵之八三三大才子最後累積左成檯冇人敢食之火腿丸同不同餃類．．．
「呢ｄ野你自己『螺』黎架！」
係度送多句明星印係張點菜紙上之官方訊息俾佢：
「食物珍貴　請勿浪費」

最後， 漢 叫我係度發放一則"OFFICIAL RUMOR"：
「我上年GPA得1.5，雖然上一個Sem有二點四幾，但係我今日兩份功課有一份交唔到聽降Grade，英文個考試冇溫又遲到似乎都係仆街架喇，八月個補考成績又會打八折，所以兩年GPA加埋都可能唔夠升班呀！希望你可以同情下我，支持由劉義發起之『拯救小淫漢』簽名活動，只要集齊五千個簽名，校長就會批准我豁免GPA升Year 3，如果唔係下年大家都見唔到我架喇嗚嗚！」

頹語有云：「夏日炎炎正好眠，火鍋洪洪更好眠」食完飽到郁唔到，兩條友番到房梗係即訓，一起身一個入Camp，一個仆去搞下年住Halｄ野，功課似乎又係「今晚先算」。我都只不過係走工打成日機，同佢地相比，我真係枉為Year 2頹霸。似乎我都係無緣競逐今個月之「八三三頹廢之星」美名。

後日就考健教，今日專誠上八三三溫書。好似好勤力，不過相信全世界都估到呢個只係假象。就係因為帶多隻Beyond上去，噉就搞掂三點食完飯邊焚邊訓。雖然唔帶都係會訓，但係而家噉樣頹得名正言順ｄ嘛．．．
八點幾，終於完全清醒，因為　有飯開！之前有機會但係錯過左，但係而家麥記再次出番大盒裝雞翼同麥樂雞，「八三三叫雞團」終於成行！團員兩名，團費合共九條，行程包括狂搶廿五件麥樂雞、猛食十五隻雞翼加暴隊三杯可樂。另外為左慶祝成團之喜，「劉義紀念基金」今日正式成立，以後每次 漢 幫我買飯食都會吞晒ｄ找錢，到我俾人踢出校之日就用呢筆贓款開大餐歡送劉義。相信到時夠俾我打勻全大埔所有邊爐。
買之時先知而家麥記又有新餐，兩條幾就有幾件雞翼幾舊麥樂雞加雪糕汽水各一，即係用我地今次叫雞筆錢黎買幾個餐可以用幾件雞換幾杯雪糕汽水。不過而家講乜都冇用，所以　食完先算。今次九條團費我佔五成六話晒都叫大股東，所以得到十幾件麥樂雞十隻雞翼一杯汽水之分紅。Sem 5之前唔好再係我面前提個「麥」字或者「雞」字。

食完之後仲有兩個鐘先打蛇係應該溫到幾版書，但係全靠《太郎》先令我可以頹到最徹底。呢本漫畫係講一個剛剛高中畢業之普通銀行職員，為左繼承俾佢意外害死之全日第一拳手而踏上成為職業拳擊手之奮鬥之路。「又有靚女又有打拳又有做Office又有講人性仲要多圖多字係唔錯！」所以就兩個鐘內連睇六本睇完剛剛好夠鐘走夠晒完美。劇情發展到女主角因為而家條仔由以前好有大志變到而家平平凡凡，覺得佢只係「普通朋友」而去搵開始出名之拳手男主角。 漢 ，襯暑假好快ｄ打多ｄ拳自我增值喇，如果唔係Bonnie姐下個Sem都係當你「普通朋友」咋．．．本來諗住聽晚都上黎溫書，但係而家免喇，因為聽日仲有廿本黎緊。

經 漢 知道阿嫂識得一個悲劇人士：實習時俾原任教師肥左，個原任之後又唔肯再睇，結果搞到要留班，即係要俾多四萬二無聊多一年。俾人肥之背後原因係「黨派鬥爭」，因為入錯黨搞到被奸人所害。噉樣死仲折墮過因為班學生太多問題或者自己教得唔好。呢位悲劇主角，姓唐。
本故事不屬虛構全為真實，官方已於留言板五十四號張貼啟事保證真確，自己睇啦我都懶答喇。

SOR！因為我用開間轉址公司突然間好賤格噉Disable晒所有免費戶口，教院個Server又連續Down左幾日，大家黎唔到我都冇計！不過而家幫襯左第二間，加埋教院Server重開，今日終於可以開齋！大家可以繼續 kickass.at/lausir ！

今日有三打：
打機
嗚幾耐冇打過機？唔記得，知道而家有得打就得！打打打打打打．．．棋姐打機打死係死得幾型但係痛唔痛苦就由你呢幾日打完Diablo之後話我知，我過埋呢幾個月就再冇機會東山復出實身試試架喇．．．
打．．．
係屋企打機，出街就打．．．乜？我估大佬你應該估到。
「打得少！」
「聽日就考試，夜晚十點幾都仲係度打機！真係打得少！」娘親曰。係架喇我係咁頹，明天的事明天做過埋十二點先好叫我溫書。

六四，你有咩節目？有人去遊行有人去睇波，我就去考試。話就話考常識，但係就考ｄ全部都係我常常不識之健教野。十二點幾溫到兩點先終於識分個心邊邊係左邊邊係右同埋邊個係心房心室動脈靜脈。搞到噉我都灰，所以唔理咁多落七記買埋宵夜先算。

雖然讀到仆都仲未識分維他命ＡＢＣ．．．又連傷風同感冒係咪同一樣野都唔知，但係符碌在今次真係考「常識」唔係BIO，考完之後真係想大叫「早知就唔Ｑ溫！」
個半鐘做七條題目，仲折墮過考Cert中文，六十分冇做十分已經好開心。不過都未夠Year 1中文三個鐘做兩份A-Level卷咁激。
仲有，呢句點都要講俾大佬聽聽：
「冇呀大佬！性教育冇得考架！！冇得考呀！！！冇呀！！！！」

仲有幾日我地八三三大才子就要落難歐洲跟住就退房，襯呢幾日上八三三頹埋佢物盡其用。又係兩個鐘六本《太郎》！仲有十幾本，今個星期點都睇晒先開始做功課！
退房前夕，按照傳統都要飛番鏢留番一牆彈窿俾下一手住客，下年又轉去Hal C阿姐想小都冇得小。
今次賭一日五餐麥記，每餐飛三次低分者請高分食。戰果：

咦乜今日主角唔係「六四」咩點解全世界都淨係掛住睇波？

可能朝流興前傳，所以無線一晚內可以先有《少年張三豐》再有《少年包青天》。《少年張三豐》就冇咩好講，張衛健做親ｄ古裝戲一定會變成「現代古裝劇」，張三豐搞到噉真係折墮。你睇睇《少年包青天》會發現王朝馬漢張龍趙虎全部都已經係超級老餅，如果到左《老年包青天》時佢地咪老過晒包拯同公孫策點樣做佢地保鑣？

「陳呂重德唱Ｋ團」無聲無息地無疾而終。冇得唱，對我黎講冇咩分別，因為我都係咁頹。

出街撞到上年TA個學生，見面佢第一句就係
「你個頭好薯喎！」
呢位學生而家只係四年級。所以成日話俾人歧視都唔係冇原因，「人靠衣裝」呢句真係好緊要。

雖然仲有GS同ELE，RA又有十幾本書要睇仲有ACEI PPT，但係都理得咁多因為要衛斯理衛斯理衛斯理．．．真係睇左十幾年都仲未睇晒，遲ｄ要學探花兄整番個《衛斯理作品》等自己有番個目標。

今日做過ｄ乜？我都唔記得，剩係知道四點幾先起身然後頹頹頹頹頹頹．．．

今日一大進步，比琴日早左四個鐘起身。但係都係咁頹，八三三有十二本《太郎》等緊都懶郁喇至多遲ｄ豪番幾條睇番。不過頹還頹，功課點都要做。睇左成日之後發覺，雖然有阿嫂俾埋份A-樣辦抄加有齊資料同參考書，但係原來一ｄ都唔易做仲好Ｑ煩。點算？
「唔做囉挑！」

花姐，提多你一次，想開飯就訂好位約好人搞掂晒先至搵我，我剩係負責食同串你。
係呀我地真係好耐冇吹過水喇。點解呢？

好明顯又係交晒大半功課加考晒試就當正自己係放假，後日份GS仍然係掂都未掂。冇計我partner八三三大才子係今晚十點正式離港落難歐洲，我叫過佢臨上機前搖個鈴俾我叫醒我做功課，但係結果當然係冇所以我唯有繼續頹落去．．．
「唔好唔記得考試五成功課五成！考試仆左，份功課又掟晒俾我算，幾勇喎哥仔你都！不過你GPA高我咁多，豪得起！！」

就因為噉，所以繼續頹頹頹頹頹．．．似乎真係明天的事明天做。不過呢個「廿個鐘加冇參考書做三千字報告」特技需要經過長時間專業訓練先可以學成，屋企小朋友千祈唔好學。

基本上你逢星期日六點打後見唔到我online或者N/A而冇回應，不獲另行通知但係又想搵我的話請直上龍珠二樓，因為如無意外我都會係度焚機同搵老細吹水，可能焚得開心得滯你打電話黎我都聽唔到。今日先試聽左十幾隻碟吹左兩個幾鐘水，全家差少少因為我唔買飯番屋企搞到冇飯開。
功課都唔做去焚機的確係勇到爆，但係之後知道自己「想行邊條路」都叫做有番ｄ得著。非常諷刺地聽左咁多Metal，原來最想聽反而係Classical同Tribal。可能再落去會再番轉頭想聽原始人骨頭敲石。

睇完阿嫂份野，冇野講根本就係拎硬A。跟住睇睇唯一一本參考書．．．咦點解會咁熟面口？再睇睇禁毒處個網．．．ｄ料點解好似睇過？原來份野最少有三份一係由本書同個網Copy&Paste出黎，連文法同字眼都差唔多一模一樣。懶左ｄ喎阿嫂。我諗就噉改過個名就交阿Sir都會收課，因為做親「青少年濫藥」只要搵到呢個「天網」同「天書」做出黎ｄ野都會九成相似，相信阿Sir之前都見過唔少。
六點幾終於做／抄完，仲好有閒情逸緻彈下結他。七點幾娘親起身：
「傻左呀你？咁早起身係度彈結他？」
「．．．早抖囉噉．．．」

番教院又係為左交功課係無聊到爆。為左有番ｄ意義探下好耐冇見之醫生哥哥。
「點解之前唔黎睇醫生？」
「未咳到最嚴重丫嘛。」
「噉就抵Ｘ死啦仆街！」
點解？大夫跟住講左以下呢個「故事」（佢話係故事）：
「一碗雲吞麵呢，如果就噉放係度幾日呢就會變得好嚴重（？），但係如果一早就放入雪櫃呢，就唔會有問題喇．．．」

「做過ｄ咩？」
當連正生書院考察可以扮晒大雨唔去，夜晚習都懶補寧願跌一舊，你覺得仲有咩會做到出黎？

琴日先剛剛交左份「青少年濫藥」，交完之後三十個鐘頭之內各大傳媒包括四間電視台加有線電視同幾份報紙都不約而同有節目同專欄講毒品。又係吹脹囉不過呢ｄ事都撞得太多小都懶。

晏晝見冇咩野做又走出去開房，點知一開門就大大隻"ga-dzat"（其實即係「蟑螂」不過懶查書睇點寫就拼個音出黎算）係牆上面躝黎躝去。拎轉頭問問睇舖個哥仔：
「喂你驚唔驚"ga-dzat"架？」
「驚架！等我同你用噴蟲水噴佢幾野啦！」
呢「幾野」之次數不下六次，每次最少維持半分鐘，隻"ga-dzat"根本係俾殺蟲水「沖」出門口。噉搞法隻野已經奄奄一息，但係隻友話「等我同佢再沖多次涼先啦。」又對住隻野狂噴。最後隻野俾條友噴左成半樽殺蟲水搞到成身閃令令好似油左層光油，似舊模型多過似條屍。我懷疑條友仲驚過我驚到傻左，噴咁多的話用清水都殺得死隻野啦。
講左咁耐，好似仲未講開房做乜。大佬，請答以下題目：
「開房打（ 　　　）」
不過，答之前聽埋呢一句先：
「唔係飛機呀大佬！唔係呀！！唔係飛機呀！！！」

除左個「頹」字之外，呢排仲多左個「書」字。係呀真係好Ｑ有文化氣息，我仲為左文化拋低晒我而家所有包袱，包括有「ELE Portfolio X16」、「RA再唔做老細就冇貨交俾人抄之Research」同「已經放左幾個月飛機之ACEI PPT」。我好少可會為文化作出咁大犧牲，所以你話我而家之所為係幾咁值得支持。
終日俾書纏身，遲早同個「輸」字有緣。好多野輸唔緊要，輸得起，但係有一樣野一定唔可以「輸」。係乜？　我估黎到呢度有九成人心目中之答案係「溝女」。你覺得係唔係？自己睇：
生活

為左令自己睇書都睇得頹ｄ，專登買左個譜架番黎。譜架，故名思義，放樂譜之架也。但係放譜都係其次，最主要用途係放書同Notes，等你睇書時除左揭書之外完全唔使郁對手，所以你兩隻手都唔得閒時可以睇，兩隻手都得閒時都可以兩手垂垂全身後傾四十五度訓係張凳上面睇，包你老母見一次小一次（就好似我娘親噉）。有左譜架之後，你訓覺時可以睇書食飯時可以睇書去廁所時可以睇書俾人打跛左對手都仲可以睇書，完全唔識音樂之你都絕對應該擁有番個，有意者請聯絡ＸＸ琴行公關劉義先生。
另外有意申請「劉義獎頹金 Lau Yee Decadenship」之人士，亦可將自己以「令生活更頹廢」為目標之發明設計作為申請作品之一。

下星期條肥仔就考試，今個星期「應邀」上去補習。不過補埋決定跟住都唔會再上，即係「事在人為」既然佢係擺到明想死唔想人救我都唔會勉強佢。
「噉咪冇錢賺？」
貼錢買難受的話不如留番係屋企頹下好過。

原來個所謂"Closing Date"唔係指幾時截收應徵信，而係幾時搞掂晒成個請人程序。因為噉樣俾間野陰到正之關係，白白睇住有六十個空位基本上報親必請之「軟硬體電腦班導師」離我而去。係度奉勸大家一句，第時搵工呢見到有心水就快手，同埋記住真正之"Closing Date"係官方數據減番兩個星期。

今日Lunch有「3PC音樂會」，係幾想去睇，尤其是當中有個"Concerto for Guitar & Piano"可以偷師加拜師。但係最後因為「懶」之關係，結果又係成日都係屋企繼續「辛文化運動」。ELE？下星期一交，即係星期日先算。RA同ACEI？我當係暑期工架，一日未交ELE一日都未算暑假。

未訓醒老細又打電話黎催開工：
「＊＃ｘｙｚ．．．冇次打俾你你係清醒！＊＃ｘｙｚ．．．下星期二開始日日朝九晚五冇得走！＊＃ｘｙｚ．．．」
「小！我要發奮！！」
當然係CUT左線先至大嗌。不過為左避免違反自然定律俾個天罰以後冇得頹，所以冒住老細打黎小多次之危險都要撻低繼續訓。發奮？聽日先。

放狗時隻野好揀唔揀屙正係個"ga-dzat"（冇錯又係「蟑螂」）竇門口，一屙就兩隻"ga-dzat"躝出黎係堆屎上面爬下爬下整極都唔肯走，情況簡直係「孔夫子尿布」（唔知點解千祈唔好深究費事話阿Sir教壞細路）。但係唔執又唔得喎成六舊水。面對「六舊水」同埋「孔夫子尿布」，你會點揀？我當然係追隨儒家。

「仆街！英文增潤十六份一份都未做過！」
係呀淨番兩日咋每日做八份都仆街，一定要做啦。更何況大嗌呢句時係夜晚十點幾。

挨生挨死挨左成日，都係做得兩份咁大把。同時真係做到唔想做喇乜都求祈到爆，做"Listening"可以話聽完首歌然之後根據番ｄ歌詞寫個劇本出黎當做完你話死未。不過求祈極都仲有十幾份未掂．．．

是日父親節，自然要請番老豆食番餐。去叫Domino，話想訂Pizza個阿姐第一句就係「要個半鐘先送到喎。」跟住送到黎個送餅人話「根據公司規矩，半個鐘內送唔到就要送十蚊現金券。」噉咪即係迫人收錢？最衰送上門時我係龍珠焚緊機，如果唔係一定會同個送餅人爭持「我唔要呢ｄ錢！你唔好夾硬迫我袋左佢！」

「知唔知點解你成日都要照鏡？」
答案：「因為你樣衰程度高到想像唔到，唯有照鏡睇自己有幾樣衰。」

可以做到今朝八點幾先訓，但係夾埋都淨係得五六份。同「十六份」之目標相差好很遠喎。所以十二點幾起身立即求祈搵幾段野讀錄多餅帶。就係最後一野都要玩我壞機，讀一大論之後居然話個咪壞收到一句收唔到一句，結果兩個字之錄音搞左兩個鐘先掂，番到教院功課係搞掂但係居然搵勻幾座都冇釘書機又係吹脹。點解噉都唔可以俾我早ｄ解脫？

功課搞掂，林Jr都搞掂。條友到考試知衰終於肯讀書算係噉喇，雖然溫英默又係得百份之五十Hyper Marginal。不過我都唔理佢肯讀書我就算，橫掂聽晚去聽迪克牛仔星期四考常識即係星期三晚又唔使上，可以提早退休九月先再會。合皮。

Sem 4同補習生涯到今日正式收皮，由聽日開始可以做番個「收皮士(Souppies)」。