新貨中，有隻冇乜講過，就係DRAGONFORCE新碟《Ultra Beatdown》。原因，兩面。一面係，其實見到DRAGONFORCE個名，仲需唔需要講咁多，就好似METALLICA九月出新碟，你明知唔會玩得番你要求之真正麥記，出左你會唔會唔買？唔會。單為麥記個名你已經會俾錢，此乃江湖地位。另一面係，在商言商，有時都係講少ｄ野好。我份人唔會hype，我會叫你自己聽。（這，在香港當然係弊／柒多於利，尤其做生意時：畢竟香港人需要的只是一個潮流、一個指標，而不會自思）

上面就係新碟派台歌《Heroes of Our Time》MV。假如你呢首歌都唔鍾意，隻碟基本上唔會買／唔需要買。

又或者，你會鍾意呢首多ｄ，唔使俾錢又有得笑又有得踩，一舉滿足晒香港人想要的三得。

「『讓我們大家一起唱更加多的卡拉ＯＫ』大行動，正式展開。」

冇幾多機會夾band。Ｎ年前MELODIC（中文名唔出得街的），雄心壯志，點知講左年幾兩年都未正式夾過，請小九結他手蟻哥。跟住METALLORD（cliche爆），第一場已經係告別演出。直到今時今日，又有新野玩。

「這個（好似）好認真的大project，其實是大家返工吞pop傾MSN傾出黎，從開始到齊人唔超過十分鐘，跟住即晚蒲頭傾埋，一個星期後的今天，已經上band房了。」

最想夾band係今次。最認真夾band亦都可能係今次。雖然，我地四條友行得埋，皆因我地完全唔認真。

「我們的目標，是攻陷2009動漫節，成為香港史上最多妹妹仔fans樂隊。」

對我們都是popguy。我們都是沒有大志的。當隊band可以集中晒專業metal工作者、band show搞手、經驗live show樂手同最重要的潮流仔女，為左成名同囡囡，有乜野我地諗唔出先？

「細細個中文堂作文《我的志願》，我已經寫大個左要做香港SPINAL TAP。」

好好玩。呵呵呵呵呵呵。或者應該將整個創作同成名過程拍低，整番套metal版《四大天王》，相信我地幾個人在香港band壇metal界所見所聞，已經有太多至滿瀉的橋段、笑料。越來越多野玩。

「讓我們大家一起唱更加多的卡拉ＯＫ。」

今天星期日是投票日。夜晚十點收舖，搭巴士返到屋企果頭仲有幾個字，投票站又正正車站同屋企中間夠晒順路，更加冇唔投票的理由。我屋企果邊一連幾條屋村，亦因舊區關係好多學校特別小學，但地方唔算大人口唔算多，唔知點解會搵左兩間小學連開兩個票站，兩個站相隔仲要半個字路程唔使，使唔使開咁多呀？有點浪費人力物力喎！

「投左邊個？」
「梗係十號民協！話晒我地紅燈山丘中英雄榜上有名！」

今年我屋企土瓜灣屬九龍西成十三張名單，十號民協排最尾第五位就係我地文曲星戰隊探花兄，不過據當事人所講，而家制度唔係可以直接投某一個候選人，而係以名單參選，名單中有幾多人可以當選，視乎整張名單得票之比率，用佢張名單五個候選人計，佢能夠當選，除非全個九龍西100%投晒俾民協。自從投個別侯選人改制成現今候選人名單為基礎開始，政府擺明為做大左派做低泛民之不公平及偏袒機心眧然若揭，如非支持老友（同老老實實，民協確係有落區做野的），我更想投完全是香港硬蕊的的黃毓民WYM！近幾年香港政治嚴重大陸化，政府明益自己友同當大家窮人冇到你死你事係做到出晒面，好多人一早覺得投唔投都改變唔到香港地遲早同大陸睇齊（衰的方面，非好的方面），橫掂投邊個都係死，不如投ｄ玩野人好似毓民，等佢入到立法會癲狗亂吠，起碼有戲睇先啦，做唔做到野、改唔改變到現況另計，就如當年長毛！你唔覺得睇毓民參選搞亂檔、鬧九左仔民建聯，好似睇緊《水滸傳》咩？現在的香港市民，都想水滸英雄出現打救大家。難怪社民連同其他大大聲草根候選人咁受歡迎。

「黃毓民同長毛要雙雙入選呀！」

不過今晚唔係講政治，我一向唔識講，想特別記低，係投票時一宗趣事。話說入到票站俾張身份證阿姐，佢對完身份證交完張票俾我之後，想走之際，阿姐截停：

「咪走住！你仲有一張功能組別A選票！」

我屬於咩組別？金屬界？另一個阿姐拎左張票過黎，原來係．．．教育界。兩位阿姐望望張組別A選票，再望望條友，有點詫異。

「你係邊個？點解你噉樣會係教育界？」
「我係劉Sir丫嘛！叫得劉Sir就梗係教育界啦，唔通反黑組咩！」

投唔投都冇乜意思，教育界名單三位侯選人，一個係工聯會左派我必定唔投，另一個獨立參選朵唔夠響鐵定冇人理，最後張文光，實係佢贏，有乜好投？至於投邊個？你覺得呢？

「metal教識我，要支持indie。」

雖然教育界已經唔關我事了，不過下次選舉唔知仲有冇得以教育工作者身份投票，幾大玩埋佢啦。本身想為張組別A選票影張相留念，話晒可能最後一次，不過廢事，就好似之前有個靚妹會考影低試卷擺上網，之後俾高登玩死玩到最後取消埋成績。文字獄一向在香港無形存在，加上現今上網世代，少少把柄已經可以俾人唱衰玩死，始終香港人本性係踩住人上，寧要睇人死都唔要睇人好，就算你死左衰左對佢黎講冇著數冇益處，佢只當睇黑色喜劇。

「不過，可能會係宣傳劉Sir個blog／劉Sir個網／劉Sir的上佳有效途徑喎，呵呵∼」

越來越懶而家。冇計啦，成日打機而家搞到冇乜心情寫野，日頭又忙，加上上個月生日起鬼死咁多應酬，隔足成個月先有心機寫好佢。同埋，太多事喇，單下面兩單尤其第二，已經夠死：

METALLICA新碟遲到，唔關我事，請問番label點解，不過又唔點出奇，METALLICA出碟延期一向係平常事。等等先啦，我估都係遲一兩幾日嗟。下面呢單，先至緊要，夠玩死我：

METALLICA新碟點？做左重要野先。生日送左隻超exteme AV大雜匯的TS興（信我，簡直係AV中的經典，震撼程度簡直是grindcore級數，睇完已經旋用brutal death的方法doom了他），終於知錯了，今日帶左謝安琪新碟《Binary》新碟CD+DVD新版上黎孝敬孝敬。會出新版就明知。鬼叫我係大fans，所以初版第一日出撞到旋買，新版出左先算。本身都有ｄ肴底，因為前排我完全唔知道的情況下開左場BEYOND tribute演唱會，有鑑於隻remix精選《The First Day》新版送DVD係送足成場unplugged演唱會，驚住新版就係送場BEYOND tribute。

「好在。好在我唔記得左而家佢label係新藝寶。」

至於正題的METALLICA新碟，又點？

「1989年聖誕節，METALLICA撞到聖誕老人，聖誕老人問佢地想要咩生日禮物？佢地話想聽聽未來的metal係點樣，聖誕老人就送左佢地黎2008年，唔單止學成metalcore，仲出左隻碟叫《Death Magnetic》。」

其實冇乜特別需要講。一如以往：

「正到仆街喎小你。」

主角自然係thrash。大量。相信個個都係望住METALLICA同DESTRUCTION同TESTAMENT。但唔出名果班先多驚喜（＜我都講到cliche了）。仍然最愛係GAMA BOMB。同CHAOTIC DISCHORD、EXTREME NOISE TERROR兩隊唔止thrash的怒爆。同DESTRUCTION歌佬隊HEADHUNTER：為佢地首《18 & Life》已經抵買隻碟。想要現代一點，DEAD SHAPE FIGURE please，今年我最鍾意modern thrash/metalcore碟。同遺珠的THE FORSAKEN，單為五首bonus track就抵買隻碟。METALLICA加SLAYER喎。thrash death版喎。

另一多係doom。大量sludge同post，doom發展已進入此階段，所以突然見好多一窩蜂，包括玩同聽。但想提提其實而家好多忽然fans追的sludge/drone/post band，都係玩左一段歷史，只係而家潮流起，呢ｄband先得到應得之留意。CULT OF LUNA都係第三至第四隻先「出名」啦，灰。唯有同情玩sludge的生不逢時。我知CULT OF LUNA新碟大把人搵，而家佢地係香港最紅band之一。但係咪ESOTERIC個名先係一見彈起果個呢？sludge唔鍾意唔緊要，DAYLIGHT DIES新碟，相信比現在任何一隻doom碟更具吸引力。

black metal都係補舊貨多。除左我自己鍾意之HAVOHEJ同PRIMIGENIUM（仲有「韓國cult爆十四歲BURZUM」PYHA），同SEPTIC FLESH《Communion》（black metal都係細國好），最好玩反而係KHOLD。一兩年前話散左，今年又彈出黎，新碟《Hundre Ar Gammal》繼續求祈，老到VENOM甚至CELTIC FROST甚至HELLHAMMER。正。問題係，唔恆唔得的現代，仲玩得咁慢咁doom，加上完全唔潮的black metal．．．well．．．

death我都係捧SADIST。始終細國同非主流國玩metal先玩得出新風格，這ORPHANED LAND + CYNIC。同IMMOLATION，《Close to a World Below》是我最鍾意death metal碟。

ELUVEITIE返左第一隻碟。folk metal、維京野從來唔算係我非常投入一種，但ELUVEITIE係我咁多年黎，覺得最有感覺、最玩得出一眾folk metal band想做到之盛大同中古。賣點是出身非主流金屬國土瑞士。

自己當然第一時間飛埋堆實驗同前衛野度先。AGHORA再返貨。同「2008年metal新希望」GOJIRA隻碟同DVD － 你可以話因為MASTODON之後雜誌網站冇樂隊谷，就搵左GOJIRA出黎做另一個「新希望」，但比起黎GOJIRA的確比MASTODON有希望得多，聽完感覺到具說服力，唔止係傳媒吹水咁簡單，真係有料到。但最好玩果隻，都係「成吉思創」。

．．．今水新貨，好似冇以前寫咁夕多。睇過貨單都知，真正新出現唔係多，好多都係以前賣開ｄband、ｄ碟。某程度上，反映而家買家心態：

「唔敢入新野。」

邊隻好賣，咪入番果隻；邊隊出名，咪入死果隊。面對現在香港的metal主場、金屬，噉就夠。

好多日冇見老細。因為今個禮拜佢去左匈牙利。公司生意越來越差，近年底先有少少反彈跡象，老細非常活躍今年勁參加展覽會，未計香港齋要出國果ｄ都有十幾個，可惜在我管美國線，拉斯維加斯係好好玩，但我想去一次歐洲呀大佬。年頭德國冇得去，今次匈牙利當然都冇啦。不過聽番黎地方唔太好玩，老細捉左另一個同事去，兩條友住超平旅館（多謝老細），乜都冇到要用公共廁所公共浴室，而且天寒地凍，平時得幾度最「熱」先十幾度，位同事去一個禮拜，病到幾乎訓擔架床返香港。

「都係拉斯維加斯一味怒玩怒食夾我風格，呵呵∼」

雖則老細出埠係普天同慶大日子，ｄ客擺明玩野，好日唔搵我，就係今個禮拜冇皇管先頻頻上黎公司，每日最少見一個客，有日冇約都突然有個客打電話話要即日上黎，本身半放假的今個禮拜變成忙到死。搞到唔夠時間做夜晚ｄ野。黎緊開show呀大佬。十月ZoundZ又出碟。仲忙過日頭份正職。

「十月十一黃埔YO Park場metal show Tomahawk Metal Fest，已經開始賣飛喇！飛身撲上黎TRHK買飛唔該！」

「始終BEYOND是最好。」

執左別了家駒十五載海闊天空音樂會。同名紀念展有去，場show就冇，就唔到時間冇計，日子太刁鑽。需要聽番黎評價唔係好高，但BEYOND個名加「明星組合」，歷史價值而要捧場，雖然確玩得唔太好。只旨在追回舊日的回憶。一入verse大家立即跟住唱。即興歌詞版《喜歡你》。今晚TRHK十足BEYOND演唱會。這是大家喜歡BEYOND、追思過去的原因。難怪平時TRHK播metal，一個人都冇，但今晚一播BEYOND，即時人山人海。

「過去永遠是最好。」

所以今晚第尾牛扒，來來去去都係以前。龍珠年代。傳說中之五金舖時代。過去永遠是最好。

「而家搞音樂玩音樂聽音樂、搞show玩show睇show果班，同以前果班完全兩回事，差好遠。『以前』，我講緊只係兩年前甚至一年前。」

生意難做、法例常變，老闆＆老闆娘兩個飛身返大陸同銀行傾數撲水。對我冇乜影響，我依舊等公司執笠遣散，拎多大舊錢先走夠晒型。梗係成日發癲啦，返到公司勁食，先黎個朱奶送餅乾，再打電話叫未返到公司的船務師奶去麥記買多個早晨全餐，食完走落郵局寄野（條街三十七度！黐Ｑ線！），順便買左成盒炸魚蛋上公司，lunch多謝各位同事捐獻夾埋擦左兩碗台式米粉，盒魚蛋一路食到下午茶時間，清晒發現仲有大大包我的最愛哈哈笑薯圈。

「好Ｘ飽。Ｘ。」

一面食，一面聽古仔。同事月頭同老細飛去匈牙利擺展覽一星期，上星期五病到死返香港，抖完個禮拜六日，好精神地返黎同大家分享匈牙利的見聞。展覽地點係匈牙利首都布達佩斯，當地歷史我當然唔識，不過聽落相當落後，通街有人屙尿屙到條街臭晒果隻。如果想扮大老細，歡迎到布達佩斯，一蚊港紙兌當地貨幣（兇元？）係一兌二十二，食一餐大約花費五十幾蚊港紙，即係一餐飯使你千幾蚊兇元，去完返香港不經意噉同ｄ女講

「我去歐洲，食餐飯閒閒地都千幾蚊啦！」

仲唔成班女撲埋身？不過睇過當地人或者已冇必要再睇港女了，歐洲人靚就係靚，當地白人囡囡要樣要高要身材要乜有乜，展覽會入面ｄmodel索爆到你唔信 － 同事話。係真係假我唔知啦。老細走左去同場舉辦的時裝展同內衣展影相，用佢部手提電話．．．

．．．即係索定唔索，我都唔知。但出奇在今次去到匈牙利咁遠，居然噉都俾佢地撞到

「港姐冠軍張舒雅！！」

相中人係咪真係佢我唔知，都幾王家偉，即係影相的老細同睇相的同事噉講，我咪信囉。聽佢地講真人唔化妝都未至於唔入得眼（相比其他港女而言），但超高，著住高跟鞋仲高過在場其他鬼妹model。

好似好威？其實相反。近幾年香港小姐傳統，從來係冠軍先最冇野撈，你睇中秋果期ｄ大騷，做主持做節目果班冇一個唔係近兩年落選或亞季軍港姐，相反堂堂冠軍中秋節節目係走到匈牙利做「香港商貿發展大使」。都咪話唔灰。

「咦，老細，話時話，今次我地去布達佩斯係擺展覽，點解身為攝影師的你公司個攤位可以得兩三張相咁少，但fashion女內衣女張舒雅呢ｄ夾夾埋埋反而可以影到百幾張咁多？當老闆娘冇到乎？同今次咁正，點解唔預我，仲用手機影咁廢？點係老闆娘面前保住你呀老細今舖！」

「我老細終於有人性過天文台。」

歷史性第一次。今次主角颱風黑格比（個名真metal！英文名係咪Cannibal？），禮拜一日頭天文台預告仲好地地，禮拜二三號波禮拜三剛剛好疊住香港全日放假咁靚，點知越走越快，星期一夜晚路徑圖已經嚴重偏南唔會吹到正香港，禮拜二仲話黃昏先考慮掛八號。好在三點幾老闆娘落樓，落到去大風大雨，就打個電話上黎同老細講：

「睇黎五點可能掛八號，俾班靚四點半走啦！」

老實講，無論面對點樣的風浪挑戰，老細們從來推晒大家去最前面你死你事，做又三十六唔做又三十六嘛，俾左你三十六，仲唔做死你先值？大佬睇個勢天文台唔臨放工先掛八號唔甘心，今次老闆娘仗義放人，都可謂入左黎呢間公司第一次感覺到人間溫暖！大家立即搏命做野報答老闆娘之恩（劉Sir的勤力做野 = 襯放工前入pantry食埋個下午茶先廢事留過夜）。到四點半，大家諗住走。老細大喝：

「你地做乜撚？」
「放工囉！四點半嘛！」
「邊個話四點半放工？我話四點九先准走！」

其他人打柒老細的時候，我冇咁好氣，去埋廁所執埋野，準備好晒都差唔多四點九，就走人了。返到屋企開電視，六點鐘突發新聞，果然放工一刻準時掛八號風球，多得天文台，各位不幸打工仔先要返足全日工，之後天氣最差果陣全香港人迫埋一齊搶位塞車返屋企。然後第二朝早六點半變三號，慌死你唔記得要返工，縱使個天仲係橫風橫雨。

「你敢講天文台掛風球冇商業機心？有顧及我地打工仔感受？」

我唔知應該五六點出門口返工果班點算。可能同我一樣，塞車塞到爆。今日我好幸運唔使等車，一去到車站一陣立即有位上，平時我可以等半個鐘都未上到。但上到同唔上冇分別，架小巴行九龍城太子道，塞到綠燈三四次先郁得半個車位，四個字都未九龍城出到旺角，司機直頭改道唔行太子轉出旺角行亞皆老街，叫做好少少，但兜到去唔知邊度，最後奧海城落車，單埋路邊都用左兩三個字，落得車黎已經九點七八九喇。最灰係我公司同奧海城係大對角，行過去成三四個字，我把遮仲要去搭車時已經吹斷左，非常冇癮，難得我發現身上有張KFC coupon，食埋個早餐先施施然行返公司，最後遲足個幾鐘成身濕晒返到。

「多得天文台六點半先轉三號風球的偉大成就，琴日大家一齊風雨中返屋企，今日就全香港一齊塞車返工。我諗冇幾多人今朝返工冇遲到。」

返到公司忙到同天文台一樣，仆街。可惜俾天文台玩左鑊好冇癮，一心諗住今日有得放假架。做陣野就上上網。俾我發現到過癮野。

維基百科內容任何人士都可以修改大家都知，而上面天文台版，曾經有一段時間被修改，頁底所列修改時間係2008年9月24日 (星期三) 10:40，至於修改內容係全段前言刪晒，只餘成就起餘下部份。到2008年9月24日 (星期三) 12:42，先至回復原貌，亦即被補回有關天文台與大財團關係之前言部份。至於點解？係咪有打手？就要問問李＋Ｘ先知，呵呵。

「今天25/9號AM730，有吉澤明報月巴西氏所寫之METALLICA新碟《Death Magnetic》簡評，從個人對METALLICA之感情到樂隊二十年歷史與演變，延伸至新碟態度與音樂，非常精彩之一文，有拎AM730者請與其他同好分享！」

「邊個係月巴氏？之前幫《明周》同劉Sir做訪問果個月巴氏呢！」（明硬銷，呵呵）

返貨都返得好快今個月，我都冇諗過，話晒兩個禮拜後就搞show。

「雖然好多人覺得TRHK = 劉Sir，但其實我只算半個工作者，好多野都唔係我負責搞，就連返貨日子同內容我都係返到先知。我唔係TRHK個腦，我只係TRHK隻手。」

今水貨好多old-school野同舊貨，所以唔講太多，因為有興趣者自會上網嘗試e.g. MySpace，同唔少舊貨以前講過，冇興趣冇心再講都唔會改變。所以集中講番較新同個人喜好幾隻。ANDROMEDA唔係出名，但佢地第一隻碟《Extension of the Wish》係我最鍾意progressive metal碟，因為技術得黎夠pop同夠jazz rock，第二隻碟麻麻，第三隻碟唔知咩事見都未見過，唔聲就到第四隻。似想做第二隻碟唔玩技術玩歌種做法，但做得好，冇第二隻碟咁唔知去邊好同悶。隻新碟等左好耐，好在冇失望。只係，唔知點解隊band去到今時今日，仲可以咁冇知名度。

「就如PATHOSRAY。佢地上隻第一隻碟《Pathosray》，係全年我最鍾意progressive metal碟。但玩得好一回事，呢個世代好唔代表會有人理你。要谷的。」

melodic death/thrash death有兩隊：LEGION OF THE DAMNED玩好簡單之瑞典初期thrash death，歌同技術好簡單，但我就係鍾意果時瑞典野唔超勁唔複雜而保持簡化同直接，如THE FORSAKEN，只係你睇而家冇幾多隊當年之thrash death band而家仲有出碟就知，呢種風格好難生存，聽眾胃口越來越大。《Feel the Blade》玩SLAYER後《Reign in Blood》種thrash，問題係a) 當好多聽SLAYER都聽到《Reign in Blood》就完或只聽《Reign in Blood》 b) 同而家metal比較SLAYER實在唔夠「勁」．．．呵。只有話我鍾意，同唔止聽，睇都咁正，本野。FEAR MY THOUGHTS調轉玩現代野，開頭諗住係metalcore個名潮流仔成噉，但估佢唔到玩美式野不過係九幾果隻，即係(post) grunge同alternative，「grungecore」都算出奇，更奇隊band係德國band。我覺得有ｄ似NEVERMORE+PEARL JAM。相信好多人聽會覺得幾怪。我鍾意咪得囉。同可能又係位處東歐之地理關係，德國metal band確有自己一套，就算同一種音樂都鍾意偏灰過其他國家，FEAR MY THOUGHTS已講左，貨單入面寫CALIBAN+ALICE IN CHAINS確有點因德國出身，而FEAR MY THOUGHTS得我心原因係佢地可以比美國band更忠於美國化。progressive都有DARK SUNS此「doom progressive metal」（開頭真係玩doom的佢地！），folk metal如NACHTGESCHREI同樣唔同北歐，非玩開心跳舞史詩，而玩低調唔開心。所以我鍾意德國metal、東歐metal。而講到thrash death，近兩年最佳之一，始終情傾DEATH SHAPE FIGURE。雖然話佢地係metalcore。同樣，理得佢，我覺得夠thrash death、呃到我就得啦。仲有，返左IMPIETY，一個聽black metal唔可以唔識之新加坡名字，對亞洲metal有興趣者宜研究，如同是新加坡之ethnic death metal band RUDRA。另外曾幾何時有好多人話，想搵white metal白金屬。今水有喇，SEVENTH AVENUE，MySpace見。

至於故事主角，如貨單名，梗係HAGGARD。玩成點？

「HAGGARD一向雙數碟永遠好聽過單數碟，同越新越好聽。今年出第四隻碟，係第二隻雙數碟。」