段記




26/2/2008 WED
R7HK,開台!」

第一集 - 我會稱之為pilot episode - 最難,係事前set機(set足你個幾兩個鐘)同事後剪接(唔係遇著復活節假多d時間做後期製作,可能真係「一星期前預錄」)。只係成果不太滿意,好似平時大家幾條友下TRHK排排坐無聊吹水仲好玩好笑。或者唔好諗定咁多野,直接入「studio」(即係TRHK...)開著部機插好枝咪然後無目的地錄,效果會更好。

相信有劉Sir份,大家最關心自然係音樂同metal。希望比你預期中多。劉Sir主理《老點》系列,可能係全個節目最認真環節,你可以話係劉Sir個網電子書版。今集重點除左HORSE THE BAND,仲有 tribute「Nintendocore」的「Megadrivotechno」《All Your Base Are Belong To Us》。

「黎緊會點發展?唔知呀,不過經驗話我聽,冇乜打算地去做先做得好。」



27/3/2008 THU

各位仲見到我,都算大家有緣,因為本來今個星期五六日,應該話琴日起直至禮拜日,我本應身不在香港。今年公司非常激進地參加超過十個展覽,月頭老細去上海,有性趣,不過冇我份。月底公司過四川,冇性趣,好在冇我份。因為上海一鑊反應唔多理想,相信更殘的四川唔會有大分別,手頭上好多野跟緊,老細又頂唔順劉Sir個頹碌(同披頭散髮的劉Sir同行,確係有失身份),乾脆叫佢唔好去算。都好,近來突然咁多麻煩事,俾我揀寧願留係香港啦,兩張單下星期出貨工廠可以仲有好多野未搞得掂,每日差唔多來回一百封email,如果走左去做展覽冇留低跟埋d單?即時收皮貨都唔使出。就算真係上到去,相信都唔需要去展館,成個禮拜留係工廠對住部電腦同各位工廠同事,搞掂晒d野至准返香港。
「好在唔使上去!都係老細英明!」
連日幾百封email輪流轉,直到今日放工前,終於清晒九成野,下個禮拜再走埋貨,就可以回歸返工等放工、每半個鐘食一次野、每四份一晝食一餐的渡假生活。諗起都開心。尤其聽到老細匯報,今次四川之行多災多難:
「藏獨風真係吹到去四川!我地去到第一晚要周圍撲酒店,因為本身訂果間酒店俾成班喇嘛包圍!交通又唔方便,郁d都要坐個幾鐘巴士!搵到酒店上到房又冇覺好訓,因為成晚好多電話打黎,問『需不需要女人?』」
正喎!除左塞巴士之外,其他聽落都覺緊張刺激!冇得去蝕底左添!話時話,最後果句有d印象?
「肥仔!你去過四川架呵?」

夜晚平時已經得閒架喇,今日日頭咁忙,更顯今晚得閒到想死。好在,仲有節目。
「再會.太子冰室。」
第一次係兩個月前,出席者自然(又)係人稱「教院至(_)三寶」的八三三,如此無聊地,就有如此無聊人。事緣幾日前突然收到急call,唔係食飯係叫北上,walk-in北上咁型,可惜實在太多事幹,都係留低香港執執手尾先啦,但三條友難得有興致出黎,上唔成深圳咪食番餐囉。太子冰室上次食完印象唔多好,因為實在惡啃,只係價錢以任食黎講公道地方又好坐又無限時,除左想食得多&食得好絕對有難度,同位置偏遠少少,心有不甘,點都要黎多次。

我不嬲得閒架喇,另外兩位亦不惶多讓,首先蒲頭係間小學仲未殺&仲未俾人殺出黎的 漢 。兩星期前無端端提早放復活節假,新近先有消息傳出下星期復課,即係玩埋今個禮拜先要憂,佢就合皮啦。
「咩唔使憂!我間小學講到明今年必殺,行埋畢業禮執得野,而家日日上網搵定後路!」
就係今年同阿嫂一齊買左層樓,美孚一個四百八十尺單位一百六十萬,先至話今年都幾大機會搵唔到學校繼續教,果真夠灰。暫時網上冇乜風聲唔多好景,反正日日唔見新教師職位空缺登上網,睇見都灰,玩下好過啦。出街要使錢又唔知去邊好,日日匿係屋企上網,土豆網睇外劇一套接一套《逃》睇晒再追《凹凸容醫》,碟仔更加唔少得,之前買落加download左勁多,係時候清清。
「多到不眠不休日日睇都睇唔晒呀!上網見到好多日本網仲日日update有新囡囡上畫,而家睇到唔敢download!」
悠長假期除左睇碟仔傷身,有打拳同做占健身。以下係佢去健身場遇上一位卡拉OK工作者的對話。
「阿生!你操得好fit喎!做盛行架?」
「我教書架!教體育!」
「唔怪得咁健碩啦!」
「你又做邊行架?」
「卡拉OK。」
「咦?係Neway定加州紅呀?」
「係夜總會卡拉OK。」
「做咩架?」
「主要負責公關囉。」
「即係馬伕?」
「唔好噉講!我地呢行而家叫人力資源物流。」
「最近點計呀?」
「我地卡拉OK一百九十八一個鐘啤酒任飲,同做緊三四五套餐!三舊水用手,四舊水用口,五舊水全餐,無限時包一發!你黎我地盤,打個折你又點話?」
「做得公關,你咪成日有得睇同玩囉?」
「悶啦!寧願留係屋企煲湯俾條女飲!」

話題一轉,去到北上。
「阿sir,你上唔上大陸玩架?」
「間唔中上一次啦!你呢?」
「我成日都上!」
「去邊度玩呀?」
「我上去紋身!」

立即除左件衫,左手一隻鳳凰右手一條龍。
「條龍紋左六舊水咋!隻鳳凰先七百!」
隔籬個魁型大漢,立即行過黎一齊除衫:
「咁抵?我膊頭條龍香港紋,成千二蚊!」
再一個捲起隻襪,原來隻腳收埋左個。跟住大家鬥除鬥晒。 漢 立即覺得自己同佢地之間有層隔膜,本來諗住分享佢上大陸係行深圳書城買字典,立即收嗲,仲想上去紋番個「I 心 My Students」落隻手度,保證實搵得番教書。好在個健身場係全男班,大家多左個共同話題:囡囡。各位朋友好鍾意睇報紙,只限風月版,人人輪住睇份野話咁快殘晒,特別多的士佬巴士佬一齊討論:
「呢件正呀!」
「你又知?」
「我上星期試過丫嘛!」

之後有詳盡賽後分析,保證多料及真實過張報紙。同場仲有大量資訊性刊物如《星期五》及《夜遊人》,好多唔知邊個買完睇完就擺低俾阿公,各位有意人士可自行取閱。聽佢做占同成班正宗麻甩佬玩的經歷,笑到仆街。
「如果各位同學仲有疑問,可以到959 forum,入面個《新手專欄》會解答到你好多問題!」

一面笑一面食,進步左喎而家太子冰室。上次黎三條友一到即落單,等餐死先有得食,今次好似快左少少,或者係呢個任食餐太多人食過一次之後中晒招唔再黎,冇幾多翻兜客,所以一黎立即認得我地,服務都好過人?
「係呀!以前我地任食,而家包埋任飲,檸茶檸水要幾多有幾多!」
「咁荀?」
「係!只係收多你地十三蚊一位嗟!而家唔連加一人頭五十八!」
「挑!加十蚊都冇凍華田飲?」

第一輪將近食完,Sam少終於出現。立即叫第二轉,好快又黎一碟。大家分工合作, 漢 永世食牛利,Sam少獨食扇貝同雞翼,劉Sir唔使多講怒齒學名免治牛扒的正宗漢堡扒,唔係大家專一,係其他野實在冇乜好食。上次乜叉亂叫,吸引好多教訓,今次醒水。
「Sam哥仔,乜咁遲?」
「要讀書進修嘛!似劉Sir你咁頹咩!」

自從上年被殺左出黎,話去尼泊爾流浪點知走左去德國,讀緊Master但未交學費就唔見左人兩個月,返到黎識死喇驚冇得讀落去,寫晒信交晒表再苦苦哀求一輪之後俾錢擺平(well,其實可以直接skip到最後一環,係佢戇居嗟)。佢又勁喎自從上年被殺,至而家一年都黎緊,
「一份正職都冇做過!係間中教教普通話,三舊水一個鐘架!冇乜野教,係教阿婆學下普通話同甲骨文,阿婆最憎做功課,大家吹陣水就落堂,無後顧之憂!同間中搵代課囉!仲好搵過返全職架!」
噉樣全職兼職大半年又搵到食加夠食喎吹佢唔脹,主因係而家住半山。
「勁喎!同親戚一齊住半山屋?」
「唔係一齊住,係我同我阿叔每人一間屋!而家住得不知幾嘆,行兩個字落山就到火車站,我地兩間屋黐埋,阿叔自己種菜煮飯,黐佢餐連飯錢都慳埋!又唔使交租!慳番唔少呀!」
「唔怪得你條友唔憂搵工啦散工都可以打足一年!仲要住半山,肯定又大又好景!」
「個花園露台已經有半間太子冰室咁大!而家我嗜好係種花!間屋係石屋,入面用木板間房,我諗住拆晒d板,將間屋打通做個大廳!」

好叉羨慕添。Sam哥一面同大家分享佢的半退休式獨居半山豪宅生活,一面恥笑有人俾百六萬買得個四百八十尺單位。我睇住笑笑住食。不過食得好唔開心。黎太子冰室,除左貪好坐(而家包埋任飲,益正)(都唔係包喇,入場先被昆左一條),仲為正到飛起加唯一好食的漢堡扒,第一轉黎左四塊,齒左三塊未夠喉,加單,點知加極唔見。
「冇喇!最後四塊俾你地食晒喇!」
挑。冇漢堡扒食,黎太子冰室仲有乜意思?冇其他野想食,三條友無聊到怒叫本來用黎伴碟的薯蓉。薯蓉餐牌冇得點,係你叫扇貝之類時整一舊波再插上去「做stand」,初時經理都唔多想接我地齋薯蓉張單,不過有條友冇得食漢堡扒發爛渣,為免發生流血衝突同保障其他食客安危,好唔情願整左幾個薯蓉波波佢地。隔籬檯有四個同我地一樣任食,睇落又係唔知食乜好,見我地叫淨薯蓉,唔執輸一齊叫,此情況漣漪式蔓延開去。我諗今次真係我地最後一次黎太子冰室食架喇,做壞晒規矩。
「唔緊要,近深水土步果頭,仲有另一間!」

任食時段九點開始至一點收舖結束,三條友擺到明唔滿意(加埋薯蓉叫左五六轉都食唔飽,唔掂!上次兩轉旋收皮的我非常失望!),坐到人地打佯先肯走,過程中勁食薯蓉吹水。可以吹足三四個鐘,因為大家都係前路茫茫,圍埋鬥灰,我叫做一早轉行加成功轉到,冇咁多麻煩;佢兩個如果今個學期之後搵唔番教職,而家先從頭黎過,都唔知點算,尤其 漢 樓都買埋。香港地生活實在越來越艱苦。仲有其他更多。同,因為另外兩條友唔使做。所以當正我都唔使做,坐到點幾先肯走,難為我尾班車追唔到,要行番出旺角搭小巴,兩點返到屋企仲要繼續整機搞到冇得訓咁滯,
「部機而家開得番,不過大量software未入晒,同仲有好多軟硬件問題,又要用嘛唔整唔得啦大佬。」
突然好羨慕身為教育工作者的各位。
「點解人人有假放,係我冇得放?」



29/3/2008 SAT

FROM THIS DAY
Live in Hong Kong (Again!)

「佢地乜料?」
「我睇過最佳live band之一!」


近來確實多騷,上星期先HORSE THE BAND,隔個禮拜再黎FROM THIS DAY。信我,睇過一次,真係好堅(遺憾地,雖然我聽metal,好睇的hardcore/metalcore live確係比好睇的metal live易遇到),所以要睇,唔會後悔,只係今次細場可能冇上次城大發揮得咁癲,結他佬想七百二環迴彈結他彈到劈友噉款已經難啦。
「好唔好睇?」
就要等其他有去的朋友話番你聽。是晚,要留守店中,雖然一個人都冇。
「劉Sir請假,咁易咩。」
紅假好似上星期五都話易d,星期六日特別難請。不過去唔成睇騷,都可以多野玩,今晚R7HK第二集錄音,製作人數多左一倍。
「每集都即場有唔同人/事前唔知會出現人士同大家分享爆肚,可以成為賣點。因為過癮,同埋唔使劉Sir諗嘛,佢咁懶。」



31/3/2008 MON

就係咁蹻,今晚真正做的客人,只得一對來自英國的情侶,一個ABC(或者係BBC?)搭著個著到好gothic punk但激鍾意AMON AMARTH的英國妹,非常過癮。聽佢地講,條仔想買玩具,條女唔多想又要跟住冇法,黎到皆旺,發現TRHK,條女就發癲了。結果悶到爆的行皆旺成為全程亮點。
"This is the best shop in Hong Kong!"
姐姐說。雖然來自英國,但唔鍾意當地metal,因為「太基」,而勁聽夠激的瑞典野。條仔買左隻RUNEMAGICK,
「識貨喎!」
RUNEMAGICK係瑞典band,我最鍾意doom death metal band、現已少有正宗doom death metal band,只係從佢反應,相信係,買錯野...條女先勁。AMON AMARTH唔少得。仲有GALLHAMMER。外國人買metal野,從來唔同香港人。
「TRHK有好多野,香港人連拎起望望都唔會。唔需要,亦都冇必要,一律視若無睹。」
最起碼,我仍未聽到過有幾多香港人,會話TRHK係一間best shop先。worse/t shop就有,仲成日聽到。


一場黎到,又要英國,自然要推介佢地今晚排排坐一齊睇電視:

Seven Ages of Rock
Chapter 5 - We Are The Champions: Stadium Rock

《搖滾七紀》經過上次heavy metal,今次pop一點,講stadium rock,又名arena rock。
「冇錯係rock唔係metal。」
上集先至問「點解講heavy metal冇LED ZEPPELIN?」,今集一開始已經係佢地出場。原來歸類左佢地為hard rock/stadium rock。stadium rock即係以live做出發點,講求台下觀眾可以一齊投入一齊唱,必定超勁旋律同簡單易記聽一次就成日諗番起(現代術語係「超pop」),首要一個實力魅力兼備歌手,你睇好多當年成名stadium rock band歌手都超受歡迎。可以話同white metal一樣,stadium/arena rock只係一種籠統而含糊之形容,因為型式不太特定,覆蓋面亦廣。稱LED ZEPPELIN為第一隊stadium rock可能冇錯,Robert Plant把聲加台風已經殺晒,雖然Jimmy Page手結他不嬲唔覺得有傳聞中咁犀利,成隊幾個人夾埋充滿火花,唔係得《Stairway to Heaven》咁少野架佢地。講開LZ,已經冇人記得的本地音樂雜誌《打口》有篇Donald Ashley訪問,提起過佢地黎香港:
「當年Donald Ashley在重慶大廈門口見到LED ZEPPELIN等人,閒談之後便一起去玩。有搞手聯絡想辦LED ZEPPELIN演唱會,他們的回覆是『sorry,我們習慣做最少也有萬人以上的音樂會。』」
都唔介意直接原文quote出黎,因為本野兩三年前已經冇左,全港僅餘存貨,可能集齊TRHK。就係咁灰,遲下有機會,scan番上網作歷史記錄啦。

睇左上兩集都估到,肯定係英國band玩晒,QUEEN、U2、DIRE STRAITS、THE POLICE好多好多(四隊都係必聽級,聽結他一定要聽DIRE STRAITS冇得走,玩手指玩到出神入化),美國只講Bruce Springsteen同KISS(睇番,其實佢地算係black metal始祖,又化屍妝又戴釘又噴火)只係stadium rock居然唔提AEROSMITH同VAN HALEN,就連同Bruce Springsteen一樣新澤西出身的BON JOVI,只係好後期同GUNS N' ROSES一樣做「自stadium rock後搖滾開始進入徒具其形的空洞期」例子,唔同年代人睇法就會唔同、對新野往往評價負面,正如我地老坑metal友先鬧nu-metal後鬧metalcore。
「最緊要自己鍾意。」

會覺得七十年代皇者過後,八十年代「空洞」,表徵係hair/glam過份賣弄外表,更多學者針對歌詞。雖然叫stadium rock、一個聽落已經覺得好pop的名字,當時好多此類歌手同band,歌詞其實真切反映現實,例如Bruce Springsteen,音樂rock & roll到爆你會覺得好娘,但歌詞寫中晒當年美國社會同生活,唔係美國人睇已經好有感覺(我嗟),真係美國人、好重愛國同民族意識的美國人、聽到國歌自動起立敬禮的美國人,一聽你話點算?雖則八十年代歌詞一樣,好受當權者同局勢影響而極具批判性,BON JOVI初時好Bruce Springsteen睇睇《Livin' on a Prayer》,GUNS N' ROSES更加唔使講鬧美國街頭鬧到黐線,不過論深度題材用字,stadium rock感覺成年人同老坑味重,「空洞」之後明顯後生仔得多變得粗魯冇咁文藝,睇入場睇live年齡層面已經知,對象市場係有分別的。但不論邊一種,rock同metal從來歌詞必需要睇,八幾尾九幾頭美國玩殘之後唔計啦,七八十年代寫詞係寫詩寫文噉寫,對比歌者身份同現實、聽眾甚至當權者反應,就知好諷刺好有意思。節目後半以此講到去音樂可以影響政治同人民思想。
「冇錯,就係《二十世紀少年》。」
而家做唔到,因為後生一班聽過首歌就算、就夠。歌詞?首歌聽完一次可能已經唔會再聽,仲浪費時間去睇歌詞?而且,真係想睇時發現:
「英文喎!點睇呀?download第二隊聽好過啦!」

亞視毛病係一定要出中文。明珠都開始唔一定要咩都譯晒中文,好多時人名名詞術語照英文出街,香港文化中英夾雜甚至有點厭中,呢種做法更得人心,亞視就荒死觀眾唔識聽又唔識睇(大陸市場?),band名譯(通常譯出黎好好笑),歌詞更加要譯,「We Will Rock You」=「我們會把你搖滾」,《Bohemian Rhapsody》中間段opera睇到笑爆,即係譯都唔好照足字面譯落番少少文采丫唔該,結果辛苦得黎唔討好。英文字幕唔係冇人睇丫,新聞都出啦,就係因為好多人話英文節目出英文字幕有助學習英語,相信更多人希望資訊節目字幕一樣可以用英文。講Bruce Springsteen時,節目訪問左佢隊E STREET BAND個saxphone佬,佢講左句bullshit,字幕譯廢話。唔係譯成點的問題。係估唔到bullshit呢隻字,可以無刪剪直出,當香港檢核制度持續倒退地收緊。
「係咪需要提醒各位家長呢樣野,叫佢地向廣管局投訴十點前電視節目有粗口,再指摘rock&metal教壞細路係萬惡之源?香港的老豆老母好興郁d就話自己仔女思想受威脅投訴電視乜乜物物架嘛!」


雖然唔係metal,
「係rock咋喎!」
其實rock襟聽過metal,stadium rock已經係個例子,唔係晒命或拋,metal需要「聽得真」,係需要比聽rock花多更多精神同心機。當然而家唔需要理呢樣野啦,聽野的朋友。冇隔好多年 - 老實講我聽音樂時間唔係長,短過好多forum上大大聲人士好多 - 但開始聽野時,自己同身邊人係乜都會聽果隻,聽完CANNIBAL CORPSE會走左去聽DIRE STRATIS,跟住聽CRADLE OF FILTH,下隻碟係U2,聽到好聽、有人介紹、上網睇雜誌見到,就會去試。但隔幾年,唔係好耐丫,好多聽音樂聽metal,一定要係邊一種先得、一定要係邊隊band先得,
「聽完佢地,不如試試另一樣野?」
「唔係卦!呢d都聽?」

然後俾人笑。已有代溝矣。節目中講咁多,除左KISS同POLICE之外全部鍾意聽,QUEEN、DIRE STRAITS同U2甚至迷到有佢地99% CD。不過自己鍾意還鍾意,唔敢講周圍自己聽呢d野。
「所以我而家唔玩forum囉。真係講音樂時,覆完個thread即沉底玩串party。唔講音樂時,又俾人串唔識聽,仲有人教番轉頭應該聽乜野。我又唔識玩填字遊戲。無謂啦。」


無獨有偶,撞著個老餅,真正八十年代果隻,仲要係當年band壇中人。
「Buddy Guy黎過香港,我有去Hard Rock Cafe睇,仲要係舊果間。」
已經知道有幾老,我連Buddy Guy黎過香港都唔知。始終廿年後,而家冇玩rock & metal喇,轉玩blues,SRV style - 當然未夠,苦練中。講番廿年前,
「呢隊你睇過live?果隊你識邊個邊個?」
「水晶迷?頭先先同個歌佬傾完電話。果隊band?耐唔耐上佢地band房同佢地jam下噉囉!」
個幾鐘頭內,出現大量令人振奮的香港band名字同事蹟,
「以前睇band show,場好大好多人架!台下全部麻甩佬,個個兇生惡煞,嚇走晒d實Q衝台!而家?都唔知點解band show會咁多女仔!男果班睇果陣又唔郁!」
好多人事冇經歷過當時,根本唔知未聽過,真係只有恨句生不連時、「早出世十年你話幾好」。如果今晚同佢個幾鐘對話有錄到,已經可以立即擺上R7HK做特備節目。
「第時有機會,可以諗諗請d老坑上黎同我地吹水話當年,唔使點樣度稿,就噉隨便吹已經好多野聽。」



4/4/2008 FRI
R7HK第二集 經己上市


6/4/2008 SUN

琴晚R7HK第三集錄音,陣容強大,平時會驚唔夠料講一集太短,今次反而多到兩個鐘都講唔晒,仲可以留番下次繼續。
「不過,最精彩同最真,係咪後。」
返到屋企網上仲有得玩,搞到好遲先起身,打住喊路上舖頭開工。坐定定之後,同隻英國鬼吹水。見過好多次,今日先知原來佢自己有隊band叫6 PANTHERS,耐唔耐有騷出,今晚七點黃埔表演,仲有幾個鐘頭,走上黎攝時間。玩乜歌?
"We only play MEGADETH!"
"Why not METALLICA?"
"Too easy!"

佢學結他第一首歌係《Master of Puppets》,由慢開始練熟再加番快去正常速度,學得成《Master of Puppets》,基本上你已經識彈thrash metal,因為所有必須技巧好似power chord、mute線、down pick、滑線同轉拍子包晒,但大部份METALLICA歌其實都係八分音同三連音,只難在快,相反MEGADETHd歌慢METALLICA好多,捉beat同玩mute玩死你,呢樣野身邊好多人都有提過,所以玩樂器者多數會選擇MEGADETH而唔係METALLICA,多野玩嘛。
「雖然我懷疑佢咁唔鍾意METALLICA,係《Master of Puppets》太難練,所以佢學成之後有陰影,自此唔妥METALLICA同唔玩佢地d歌。」
隊band五個人,逢星期六朝早(冇錯係朝早)一齊上band房練歌,噉樣keep住固定練歌同定期出騷已經好長時間,或者因為成班老鬼廿幾三十,鼓佬最老四十歲,咁老仲要留晒長頭髮玩metal聽metal,香港地有幾多個?就係咁老、成熟左,大家先有心一齊搞落去。keep住夾除左開心同鍾意metal,仲因為香港好悶。好多人去過英國或來自英國,冇一個話英國唔悶,佢調番轉話香港悶過英國好多。因為,
"I come from Birmingham."
即係伯明罕,英國metal之都,重金屬發源地,除左BLACK SABBATH同JUDAS PRIEST好多thrash同death metal band都係呢度出身,例如NAPALM DEATH,
"They played in my college once!"
聽佢講番廿年前八十年代,真係metal得好誇張,連CARCASS都會去書院大學表演喎,你話幾激?唔止CARCASS,佢仲睇過VOIVOD,應該係《Dimension Hatross》果排亦即最神化果排,但加拿大band永遠咁灰,勁同前衛一回事冇乜人識,去到英國都係college band咁大把,不過噉先夠underground!當時係黑膠同錄音帶年代,冇電腦冇上網冇download這回事,個個一有碟出即仆到去唱片舖,是心中一份狂熱,狂熱到全民皆metal,通街都係好似劉Sir三唔識七見你著件metal tee就可以同你坐低吹兩三個鐘metal water果種人,加上全部學校逢星期五Metal Friday成日搵校內校外metal band表演,電台一律勁播rock & metal行到邊度都聽到,就算你唔買碟都多野聽到你唔想聽、落街行幾步路已經撞到十幾個metal友。live當然大把,個個禮拜有大騷睇果隻,IRON MAIDEN係當地人眼中國寶當神噉拜,佢有幸睇過《Power Slave》同《Somewhere in Time》兩個tour,仲係台上做晒大戲幾隻巨型公仔走黎走去,台下發晒癲high到黐線果時。八十年代大一定唔會錯過thrash metal,四大全部睇過,METALLICA好多次,第一次係1984年仲未成名。
"They were still using Gibson Explorer! Cliff Burton used his Jackson!"
之後《Master of Puppet》出左就犀利,由club仔搬到去體育館,全場八萬個座位爆晒。幾年後METALLICA《...And Justice For All》同SLAYER《South of Heaven》同一個星期出,立即買晒兩隻黑膠返屋企,聽到如痴如醉,係最美好回憶,再去睇佢地個Justice Tour,Jason Newsted live仲堅,雖然佢地而家d歌唔聽好過聽,但佢睇足廿年、地下睇到出名睇到做衰自己,METALLICA live水準確係冇乜退步過出live仲有料到,所以值得睇過多次繼續入場。ANTHRAX睇過佢地舊歌佬時期live,後來轉左歌佬歌路都唔同晒,隔十幾廿年後兩年前去日本睇隊band搵番舊歌手的reunion tour,仲好睇過廿年前,聽佢講ANTHRAX CD只玩得好一般,不過出到名係live好有氣氛,成隊band好識得煽動觀眾好有感染力。另外兩隊MEGADETH同SLAYER都聽MEGADETH仲要係最愛,睇反而唔多好睇,因為都係企定定小心奕奕地彈歌而唔係現場表演果種,有點悶。MEGADETH狀態更加係好唔穩定,一來成日轉人,二來Dave Mustaine自己好大問題,結他係勁可以彈得好快,不過節奏唔準,成日會自己彈彈下快左或慢左而唔係跟住鼓手去,要成隊band包括本來負責節奏的鼓佬就番佢、睇佢彈乜同彈幾快再入。只係唔會介意幾多架啦,你係鍾意一樣野自然會接受埋所有缺點同訓身貼錢貼時間支持,加上好多由細睇到大甚至一起成長有感情,好多英國metal band都係未成名仲係underground或者十幾歲一班靚仔時,已經去睇佢地玩埋一堆。
"You know I went to school with DEF LEPPARD's drummer? When he still had his left arm!"
外國生活也。不過搬左黎香港,又冇乜動機返去重拾當年,自己都心知dband都老啦,正如IRON MAIDEN而家出live冇幾可做足大戲,加上見到英國metal是BULLET FOR MY VALENTINE這些當道,怕返到去嘔血過而家香港。同問題係舊band聽極唔厭,新band興趣唔太大。有去過外國睇live例如日本Loud Park,只係對於新band現場評價唔算太高,ARCH ENEMY屬中上,CHILDREN OF BODOM剛出道時玩得好勁,而家紅左出show冇乜心甚至幾差下。新band音樂唔差,可惜台風同心態確唔及以前咁有巨星風範。metalcore live台下反應好,不過始終唔多鍾意呢樣野,問題係太低。nu-metal時代用七線結他,而家玩metal都嫌唔夠低,自不然要有幾低tune幾低,只係經驗所談,tune得太低就只得番厚同質感,細位全部冇晒同好多野做唔到(MESHUGGAH八線結他的故事),彈riff會好正雖然都太朦,只係佢本身彈solo同八十年代,自己堅持只tune E,D已經最低,單單落到D,彈solo音色同感情已經差E好遠,好多野控制唔到表達唔出。我唔識彈結他所以唔知真定假,不過既佢彈結他十幾年點都有d道理,就寫埋出黎分享一下。
"It's a nice talk! But I gotta go!"
勁多野吹加吹得好開心,只係佢要出騷,唯有等下回再會。或者應該搵番部MP3機,一有人上黎吹水立即開機錄伍,整定大量R7HK official bootleg。基本上每次有鬼出現,已經有多到唔想聽的故仔提供。


之後,執貨,冇錯,有禮:

Chaos from Japan
TRHK兒童節獻禮

今水貨新舊夾雜,舊貨最大係MARDUK個「cult爆boxset」(呵呵,MARDUK仲有冇人聽其實?),同TVANGESTE,想聽CRADLE OF FILTH同DIMMU BORGIR果種dark gothic而覺得佢地pop過頭,就要聽TVANGESTE,同CRADLE OF FILTH前第二定第三隻碟同一年出,不過拍埋,CRADLE OF FILTH立即收得皮。TVANGESTE隻《Firestorm》係最多人買symphonic black metal碟之一。成日搵thrash的朋友,有兩隊可以睇睇,就係日本仔FASTKILL,德國到爆的old-school thrash,同SOULLESS,睇個logo同音樂,有d似想玩番CANCER。另一個重點係FINSTERFORST,德國版FINNTROLL,有趣在簽左間加拿大label,一向鍾意加拿大metal,呢間label band多但質素唔算高,當中有幾隊想研究好耐,包括FINSTERFORST,間label而家好似想開條folk metal line,見連簽左兩隊folk metal band都係好野。點解咁鍾意,
「貨單段文已經講晒。」
我會將佢地同芬蘭而家我睇好幾隊維京同folk拉埋黎講,尤其pagan/folk果班,甚至玩得好過當中某幾隊某幾隻碟。當初搵佢地時只得大碟一隻,而家個版送埋隻EP,唔係一隻CD包晒(隻CD成個幾鐘長...),而係兩隻CD,但製作費加倍照舊雙CD單碟價,超賤賣。
「現在的metal,真係唔值錢。」
亦只有咁唔值錢,各位朋友先會買。所以成日話玩metal冇前途。
「似乎除TO-MERA同BIOMECHANICAL,今年又有一隻碟,必需寫碟評。」



7/4/2008 MON

Seven Ages of Rock
Chapter 6 - Left of the Dial: American Alternative Rock

第四集講metal,第五集stadium/arena rock,都係同八十年代rock&metal有關,亦集中講英國方面,第六集踏入九十年代。一連兩集講「後metal」、MTV世代主流alternative rock,分開美國同英國。今集美國,叫得做alternative rock,主線自然係NIRVANA同R.E.M.,又可以話個節目整黎為講佢兩隊,特別NIRVANA幾乎傳記咁滯,編排同其他出場人物大多圍繞住佢地同Kurt Cobain。八十年代情意結,加上「後metal」一向對九十年代美國野冇乜好感,自己心目中的alternative,係真如其名另類果隻(FAITH NO MORE),grunge其實將alternative正常化大路化左。除左音樂簡單過頭,另一唔多鍾意係歌詞,美國佬填詞由alternative rock起到nu-metal到而家metalcore都係一味「我好灰」,真係聽到我好灰。NIRVANA同R.E.M.分別帶出alternative rock兩個路線:NIRVANA想市井,R.E.M.係藝術。
「話時話,知唔知NIRVANA班友係聽UNLEASHED同CELTIC FROST大?」
信不信由你,Kurt Cobain本身係個超超超級metal友,其他member你睇Dave Ghoul玩完NIRVANA玩FOO FIGHTERS,自已仲出左隻擺明tribute '80 metal的PROBOT,metal影響力非常明顯。講grunge人人都講《Nevermind》,不過最初grunge係想復興原始heavy metal同punk,例如SOUNDGARDEN同NIRVANA第一隻碟《Bleach》,對比八幾尾同《Nevermind》,發現NIRVANA其實將grunge改頭換面大路化左,繼而成功。節目好睇在走訪幾隊影響Kurt Cobain大樂隊如BLACK FLAG同THE PIXIES,一面睇,一面明白到《Nevermind》點樣寫出黎。
「聽音樂,其中一份樂趣係思考同追,追係追溯唔係追潮流。」
《Nevermind》令好多人聽NIRVANA同grunge,因為「我聽underground」,雖則咁紅咁大加音樂大路左,冇乜可能仲算underground;到《In Utero》真係玩番另類野時,「聽underground」果班立即小九NIRVANA,十分有趣。只係探討Kurt Cobain唔想出名、grunge其實唔應該入主流,冇提到NIRVANA玩串MTV單經典大事,唔夠。除左NIRVANA R.E.M.講最多,NIRVANA用黎焚,R.E.M.就係用黎浸,唔算太鍾意佢地,但歌確實好聽同不斷求變,仲有樣野好:雖然隊band出名,音樂仍然有份另類、唔多大路的感覺,假如以「alternative」計,佢地藝術同事業上都比NIRVANA成功,我話。Kurt Cobain冇死,NIRVANA會唔會變成R.E.M.一樣,越玩越藝術,或者散band/改名unplugged型式玩落去?
「無謂諗啦,正如BEYOND同黃家駒。
不過今集係暫時較失望一集,因為太集中兩隊,同偏grunge得滯,grunge本身有好多好band提提個名就算,alternative方面更多但接近冇講過,我想佢講下RAGE AGAINST THE MACHINE。跟住亞視再落井下石:字幕,集集必小,今集小得最勁。終於有一集唔譯歌詞,更多術語同band名照英文出街,但有d唔譯有d又要繼續譯,好似「尼爾年輕」,睇唔睇得出係Neil Young?R.E.M.照音譯雷姆,但其實係bio野黎架...THE PIXIES女bass手叫Kim Deal,譯金正日,係咪玩野?譯果條友開頭唔知譯乜好,見有個Kim求祈填個金正日落去攝住個位先,諗住第時返轉頭譯番好,點知唔記得左搞到金正日直接出街?有時譯名更加係之前同之後唔同唔統一。更多字幕譯出黎同英語原文完全兩回事,錯別義果隻錯得都幾嚴重加幾多,搞到好似條友今日譯d聽日譯d,日日譯果陣都唔同心情,結果段段文筆用字眼都唔同,又錯漏百出。
「嘩。難頂。亞視唔該改善一下。」

撞正公司近排有幾隻新產品,就係咁巧合,係一堆石頭型東西。做新產品宣傳,廣告大標題諗都唔使諗立即整番個
Ages of Rock
我一向鍾意做野時玩野,睇落正經但內媊嵼芮延e野rock野metal野入去。
「噉先開心嘛大佬。真係正正經經做野,悶呀。」



10/4/2008 THU

http://r7hk.lau-sir.com

「開張以來,劉Sir個網主版面第一次出現黑白灰以外第四種顏色。」

今集第三集好堅,唔好見得三part咁少以為冇料到,貴精不貴多。一開始直入音樂,講番一個星期前FROM THIS DAY,我冇去,搵黎大把猛人坐鎮,好過聽劉Sir 9up幾十倍啦。
「京Sir,應該襯你尚在香港之時,搵你上多黎幾次教教我地做人道理。」
同場仲有我地一味死谷難谷的THORN***dooo***LAUGHTER,好多人話佢地live唔得,但開始唔太耐嗟。況且仲有幾多新出黎的靚仔會玩肯玩extreme metal,而唔係一味hardcore metalcore emo先?所以有理冇理一味死谷,目標係谷到佢地同CHILDREN OF BODOM齊名(呵呵呵呵)。今集《周末任老點》,都算係創台以黎最認真一次討論,只不過講過:
「最精彩同最真,係咪後。」
咪前九個字你覺得好多野聽?咪後九個字仲多。只係唔出得街。身在香港聽講音樂多年經驗,千祈千祈千祈千祈唔好指出太多事實,直接又好間接又好。就算你意見係多麼中肯多麼善意,聽者覺得少少唔滿意,你已經死左喇。一句講晒:
「就算睇得出聽得出唔好,都記住只可以一味唱好。又或者,沉默是金,無知的人有福了。」

跟住到新環節,RFHK
RFHK點解?」
「R完柒,咪R埋個忽囉!」

呢part你唔會見到劉Sir出現,因為講囡囡,劉Sir最弱果瓣。唔緊要,除左有107,我地而家仲多左經驗蒲精176嚮導同我地詳盡分享。即係近得劉Sir都係麻甩佬/仔多,又同佢一樣肴肴地底好多野唔會做大把地方未去過,相信呢個環節會好受歡迎,囡囡係男性間的共通語言,RFHK己成為每集固定環節,同大家講講各種豔聞。
「不過一味講叫雞就唔太好啦!要慢慢向深度少少,女同性唔係只得雞一味。」

講囡囡唔使預劉Sir,相比起音樂同metal,囡囡呢家野實在係太高深,繼續老點算啦。唱歌仔好似好玩過正正經經講歌仔,難免令trhK重出江湖。第二集兩首兒歌笑到爆,今集挑戰歌係
「Guilliver Boy!!!」
超級熱血極端metal的一首兒歌,唔係講笑,我地METALLORD必cover,將本來已經十分metal的原版改成更加metal更加JUDAS PRIEST。
「認真的說。」
所以你見好少可認真做野的劉Sir,都會特登執一執個RFHK官方網頁,仲要係(懶)正正經經果隻,雖然執到咁靚,可能玩到第柒集就收X皮(well,成數都幾大以劉Sir的頹廢習性,大家快開盤),不過真係會收皮,收之前都要玩一玩盡佢先。
「已經連出外勤做專訪都計劃緊。睇做唔做得成啦最後。」


13/4/2008 SUN

「好耐冇update喇喎!」
真係好耐。因為超忙,加極懶。首先,日頭十分忙,自己手頭上幾張單近幾個星期走貨,遇著三月尾四月頭香港大陸一齊多公眾假期,趕貨趕文件趕到死,自己d野搞掂左一半,又到經理同個同事去德國展覽一個星期,勁多蘇州屎留俾我搞。即係平時唔多覺,跟晒自己d野再跟同事d野,自己d野煩加多都叫做做得晒,同事d野跟極唔完仲要做完一單會多兩單野/兩隻鑊要搞掂,即係越做越多,搞(唔)掂同事d野,先發現自己辦事效率原來咁高、做野原來咁快!(老細出現搭嗲曰:「唔係你做野勁!係你之前冇野做/唔做野!」)黎緊禮拜一至四會展展覽又到,今日禮拜日都要一早過會展set場。支力。要流汗的事,千祈唔好搵劉Sir。

二來,打機啦。C&C3買左大半年,連expansion都出先開始玩,真犯賤。三派中正派玩到差唔多爆機,點知部機一個唔覺意中左毒,搞掂全部save冇晒,就連之前舊幾代C&C都冇晒,全線C&C可以由頭黎過。同實在太迷DOS game,近期怒搵&怒煲,單攻第一身射擊都玩到嘔,最近戰績係打Doom 2, Level 4(最高難度Level 5,不過唔係人玩的,暫時未聽過幾多人爆到)唔用不死秘技打到最後一關,以前打玩秘技玩到悶,而家試唔用秘技,果然難打到黐線,仲未試過唔用秘技過到最後一關爆機。有打過Doom 2的朋友就知點解。
「想搵DOS game的朋友,有個網叫486games.net,可以搵到少少。遺憾地我最愛的第一身射擊,冇幾多隻搵到,都係要上衣悲必。」

最後,當然又係為左我們的R7HK。今日三條友無聊吹左三四個鐘水,又多樣野玩:

'80s & Life

一個老鬼環節。唉。太多野玩。



14/4/2008 MON

本年度飯局以外,第一次正式老西上身。之前已經有三次展覽,第一個上海老細同經理去我冇份(灰),第二個四川,因為當時多野跟手老細豁免唔使上,冇得見識喇嘛暴動(灰),上星期就經理搭多個走去德國,我管美國線自然冇我份啦,結果到08年第四個、香港第一個,終於有份啦,我亦好唔開心,因為要著老西。逢到展覽必定留意天氣,最緊要有幾凍得幾凍,恤衫西褲打呔已經熱啦大佬加多件披會死人架。前幾日仲超熱差唔多三十度都試過,好在星期六日立即落雨轉涼,著住套西都有少少凍先唔使死。不過非必要打死都唔會著西裝,除左熱,仲要著鞋著襪(平時著涼鞋返工架咋我大佬),同要打呔。今朝玩打呔,玩左我三個字,仲要打左個直角三角形出黎超級樣衰果隻。掙扎多三個字,決定除番落黎,唔戴呔算。

我份人好犯賤的。平時返工要打卡,一律懶理,劉Sir唔遲超過一個字已經係公司是日大事,但做展覽調番轉永遠早到,有幾早得幾早門都未開已經去到早過晒全世界加老細果隻。或者因為噉而有d慚愧,今日塞爆車。搵工我一定唔會搵過海工,出旺角搭地鐵煩轉車人多冇得坐仲要浪費時間加金錢,搭巴士一程得但唔係特別平,遇著塞車唔覺意塞你個幾鐘仲唔企死你?今日就係,不過叫做好彩d有位坐囉。本身係叫九點到場,九點架車連隧道都未入到,就知道可以訓多陣慢慢嘆了。終於,九點半開場時間,到站了,同d客一齊衝入去,個場已經set好晒,唔係老細,佢同我一樣地面過灣仔,我住九龍都未到,佢住新界點會早得過我?係另一位同事。因為佢搭地鐵,準時到。
「所以我搵工永遠唔揀要過海或者要搭地鐵!你睇?」

然後,坐。唔知點解可以咁靜,係好多人經過,不過好似個個都唔知道原來我地個攤位係開左係有人係入得黎睇的。以前叫做點靜一晝都可以有廿幾三十個客人留低資料,今次全日都唔知有冇,自已果行黎睇黎搵或者黎擺攤位人數都少左,可能係上年年底政府勞動新案同其後連鎖工潮後遺症,有個客黎傾過,佢間公司上年生意額,比前年少左一倍。而佢果間,係美國一家算大公司香港分部。
「真係好危。好多野要諗諗了。」
不過唔係今日。可以咁靜,自然係訓覺抖抖的好日子。可惜冇覺好訓。唔知點解,逢係中國地區做展覽,不論邊度幾時,自己檔口對面果間一定係做光管or燈膽,係去到古鎮都逃避唔到的冤孽。戴埋黑超都訓唔到覺咁光,又冇得背住佢個攤位坐/訓喎地方所限,最慘係唔止光仲要熱嘛,我坐正對面隔開兩三米,一陣已經曬到流汗,當堂對人地公司成套suit著到恆企正排光管前面派傳單位姐姐仔肅然起敬。換著我?唔好話派傳單啦。企我都唔會企啦條衰仔。

講起派傳單,搵人企攤位前面塞紙仔俾路過的路人甲乙丙以前都有,只係今年特別多,生意真係難做左。有錢少少的公司,仲會派袋派紀念品,更有錢梗係搵埋囡囡駐場啦。107非常關心,一早打定電話黎:
「掂唔掂?值唔值得入場?」
我果層做電子野,年年冇乜好睇,下面層做電腦差得遠,上年已經成個Kawaii戙係門口啦!入面仲有!不過今年大縮皮少左勁多,正式promotor只得兩三間有請,其他個勢似公司邊個省鏡就佢啦搞掂。只係量少左,質反而高左,內地同台灣女仔真係贏香港幾條街,有d著到好似去車展珠寶展,個格咁高貴唔似賣電腦野咁cheap喎?有間搵左個靚女著到去ball噉企門口,派傳單都咁隆重其事,難得係香港公司呀你知唔知?睇個勢仲要唔係請model返黎做promotor,而真係果間公司d女職員黎!在場所有人不禁感慨:
「點解我公司冇(呢d)女???」
只係,想睇呢,相信真係要入場。想望少少梅止渴都有方法:
「avbuzz幫到你。雖然今次係業內展又唔多model/promotor,亦唔係大家常見出名果班,應該冇幾多人專登入場影相。」

冇囡囡唔係咩大問題對我黎講,我對有冇舖頭有得執野更大興趣,反正得閒成噉又冇覺好訓,走左去行街街。以前行展覽好正架,除左通街囡囡(不過我公司參加d展覽性質所限,囡囡算好少的了,上年有Kawaii已經好猛料架喇),行幾步路乜都有得拎,就算你唔拎都有人(optional:囡囡)塞俾你,加上主辦單位有獎抽有禮物換,去展覽唔係為做野,為有得食有得玩有得拎。事隔一年嗟,唔使差得咁交關卦?一路掃,接近冇野拎,有得拎都樣衰都爆,唔似以前咁玩設計好求祈,難得見到都冇心情拎咁灰,最後收穫只得幾個環保袋同d無聊野。順便睇定最後一日有冇野買,個個最鍾意怒掃電器,無聊執d國產變形金剛都好丫(唔係講笑,雖然叫電子/腦展,係唔關事到變形金剛玩具都會出現,吹脹),好彩的話搵到耳筒廠同喇叭廠,執番對自己用都好呀。可惜冇著數拎,連想俾錢買好野,都冇乜選擇。再退求其次,真係當自己吞pop行街算。最鍾意去賣玩具d檔口睇,有間個妹妹打俄羅斯方塊,隔籬舖個妹妹仲勁,打緊魂斗羅,冇野做企側邊睇左陣,好似細個時入機舖睇人打機。 
「乜而家仲有人玩紅白機game咁娘?」
望望部機,隻game咁前世代,估唔到部機咁次世代,機身設計係最初化PS1同世嘉Mega Drive合體(yeah!就係娘成噉!),左邊圓形CD盤蓋上,印住大大隻字

PX-3600
超前而家d次世代機十代都有。不過玩dgame,慢而家廿年都有。這就是國產貨。賣黑膠盤賣音響好多,買當然未到我只睇人地點試機/焚機,播親多數係麥當娜或者BACKSTREET BOYS之類,又或者劉德華蔡依林,metal就算啦rock野都有少少,EAGLES《Hotel California》年年有得聽因為係現代試機天歌,間中撞到有人播DEEP PURPLE之類,今日有間播AEROSMITH,立即停低聽聽先,不知幾high!再過隔籬播緊《Matrix》,睇多陣先走正!
「點解我公司對面果檔,永遠唔係賣燈膽,就係賣光管?點解唔可以賣玩具,我等有得玩同打機?或者做影音,日日有得聽歌睇戲?」

先過左半日唔夠。出面玩完返去自己檔口繼續玩,對面舖個光管姐姐都同我地一齊無聊,悶嘛大佬。等到兩點,到下半更同事到場,我睇全日關係唔使走,老細自己悶到頂唔順走番公司算。先食個飯,因為會展飯難食加貴,由外面走私麥記入口,以前捉送外賣捉得好勁架會展玩壟斷嘛,可能俾人投訴得多,今年好似冇捉得犀利,食完麥記之後,自己檔口d朱古力慢慢食,理論上係俾客人食,實際上冇客人,即係自己食啦?鑊鑊展覽都係買Hershey's,以前食開兩三隻味,今次再多兩三隻,不停地食連光管姐姐都走埋過黎一齊食,我一晝已經食到可以幫呢隻牌子朱古力寫番個review喇。
「但係,老細!以前仲有三角朱古力同Crunch喎!做乜今年縮晒水?」
好在經理識做,拎左盒雪莎過黎,唔太鍾意食呢隻雲呢拿椰絲金莎,不過有經理請唔使錢幾大食左先算。盒雪莎,就係去德國展覽的手信。
「點解買雪莎?」
「平囉!」

五毫半子歐羅即係六蚊港紙唔使一盒十幾粒,香港地一排三粒裝都唔止呢個價啦!所以話咁快食完。點算連朱古力都食晒?又出去行。搵到有間公司派個環保袋超正,設計夠簡單唔會太多花太多字,只得純色底加公司名一個,但勝力有得扣鈕,唔用時可以摺埋收起,未見過喎以前真係,其他公司要靚有要大有,就係未試過玩呢樣野!個檔口仲要只同我自己個隔幾個位,搞到耐唔耐就行過去扮野拎番個先,而家人地已經認得我,我經過已經知道我想做乜知道應該點做。又走番落樓下電腦展,去左政府個攤位,擺到超大政府唔知咩事,仲要做到成間機舖噉,一入門口海事處有部三銀幕Sim天星小輪,機舖都冇咁大部野玩呀真係,隔籬個唔知咩處仲過癮,有部三色掣拍拍機加多枝槍二合一,不過唔知玩乜我唔敢試好似好白痴。拎多幾個袋,走番上自己檔口開部電腦玩,上唔到網,不過唔知點解部機本身裝左好多game!衰在全部係試玩版只玩得一個鐘,殺住先。有隻立體版撞磚,撞磚呢家野小學486已經打緊,細個覺得好難玩因為唔多識擦板拉西,全關最後果一兩舊磚打極打唔中過唔到關,加上咁需要耐性的遊戲永遠唔會適合我,不過今日大部時間可以慢慢同你拆,隻game由平面變成CG立體靚到黐線,仲發現原來撞磚可以咁好玩,非常開心。之後同事玩唔知應該叫香港定上海定台灣的麻雀game,即係畫面有個牌陣兩隻牌相同就可以整走佢,一路搵對對拆晒個場為止果隻,實在太無聊,成班人圍埋又玩一餐。唔係有部機係度,我地會死。無驚無險就黎六點,
「經理,差唔多時間喇喎!」
你知啦,過左五點半就係繁忙時間黎嘛,我地要過海住咁遠,第二日仲要繼續做展覽,早少少收檔趕番過九龍抖抖都好應份丫!雖然經理盡忠職守,都頂唔順我地每兩分鐘報一次時,終於...早少少放工噉啦。
「唔係俾面經理,今日淨係返半晝工啦我地!」
冇錯。我公司的經理,係噉用的。所以點解老細自己唔在場,點都要掟個經理過黎會場呢邊。


Seven Ages of Rock
Chapter 7 - What The World Is Waiting For: British Indie

日頭忙左成日,夜晚呢,得閒得多,只面對兩個客人。自從國際台開始播《Seven Ages of Rock》,有趣地個個禮拜尤其上畫的星期一,總會有客人或者有人買野同英國有關。今晚第一個係北京客,上黎望兩望,諗都唔使諗立即執左NAPALM DEATH頭兩隻同CARCASS,通通係英國grindcore經典,本來仲有野執,不過趕返北京同錢,下回再會。第二個亦係最後一個,本地人,係聽metal而上黎TRHK,但行左好耐都冇頭緒,最後終於彈出一個名:
「DRAGONFORCE。」
metal以內而metalcore以外,而家英國最紅就係呢班extreme power metal。拎DRAGONFORCE幾隻碟出黎俾客人過目,換來係
「超」
係一句不屑的「超」。點解問DRAGONFORCE而有DRAGONFORCE要「超」?冇的話,會唔「超」定超得更不屑?或者你會知得清楚過我。我只知道佢呢一個「超」,道出晒香港地香港人玩metal聽metal到而家甚至永遠及唔上其他地區所有原因。

《搖滾七紀》今晚到最後一章,八幾中/末英國地下至近代英國主流音樂Britpop。呢家野我只鍾意Brit,唔多鍾意pop,即英國式迷幻飄渺聲音狂迷,但流行果部份同台風服裝完全唔關我事,可以講到明,英國音樂NWOBHM同gothic同gothic延續同電子,之後全部空白,真正追同鍾意的Britpop band得SUEDE,因為夠Brit,其他出名如OASIS同BLUR從來唔太鍾意,偏pop。主題係「British Indie」,但其實真正indie講左半集都冇,完左THE SMITHS同OASIS等已經到Britpop,可能係香港最多人聽果種外國音樂,但Britpop其實係九幾年出現、SUEDE開始,唔係逢英國pop都叫Britpop,正如唔係逢日本rock都叫J-Rock,而Britpop的出現,歷史原因之一,係對抗美國grunge,節目中冇提過。到九幾所謂indie本質已經唔同左,掛名indie/underground但賣主流,會唔會荒謬左少少?我從來覺得上到地面的獨立/地下野大半係hype出黎,剩番果d先係玩好音樂玩出黎,只係數量上相差遠矣。另講到2007,好多近一兩年出碟都提到,居然講英國搖滾講英國indie,RADIOHEAD個名可以完全冇提過?同,點解唔講講gothic,單呢樣已值得開一集獨立去講?

字幕今集亦搞笑得多。以前係唔係都譯中文,同譯到好求祈未譯好就收工(金正日...),俾人(劉Sir嗟)狂小,今集立即唔亂敢譯,盡量保留英文。但抵死在肴底肴得好犀利,好多字甚至成句以為好pro,又或者誤會係歌名文獻,但其實係講者說話一部份,結果可以簡單譯的名詞或語句唔譯,變左中英夾雜仲要怒爆笑果隻,’ /〔;史穴╭允穿例如「I fuck you」,個個都直譯「我屌你」,亞視會譯成「你被我fuck了」。真係笑到你仆街架睇到。之前幾集亞視字幕拖低節目質素,今集調番轉,你睇左咁耐都知我唔多滿意內容方面,反而娛樂性豐富的字幕救番。
「亞視,都係果句,字幕組請part time,搵我。」



18/4/2008 FRI

回到公司了。今次展覽,話咁快就做完,都算係史上最得閒一次。第一日我駐場,靜到似黎玩多過做野。第二日只返晏晝更,過到會展,開部電腦撞左成日磚;禮拜三返工廠見客,朝早兩個鐘船,見完食埋飯兩點半上巴士,三個鐘車返到香港已經五點半,行到上公司已經夠鐘打卡,訓得滿足精神飽滿,因為要為跟住一日禮拜四,展覽會最後一天。全公司一到會場已經唔見晒人,因為走去掃貨,逢展覽最後一日個個猛去叫台灣同大陸d公司賣野俾佢地,拎唔走嘛運番去仲貴過造套新,益下我地香港人好過啦而家香港咁窮!有檔賣電器勁旺,成村人同班包晒頭巾師奶一齊爭,全場所有電器一律廿蚊件,最後講價由一百部五樣講到五十蚊三樣講到十蚊一樣,上年老闆娘四十蚊執部飲水機返公司已經笑死,點知今年仲死十蚊一部飲水機,而且十蚊部仲未到底線,成班人有理冇理買晒先算,夾夾埋埋廿幾部野飲水機風扇暖爐吹風機連迷你冷氣機都有,差少少洗衣機都執不過始終唔知個膽乜料又冇保養搏唔過,仲有紀念品勁大個字皮箱裝爆電子插頭,多到你屋企睡房都唔夠位擺,先至收你百三蚊咁大把!仲要老細好人包晒,即係每人免費屋企多左幾部野!已經幾蚊買(正確黎講係唔使錢,老細送嘛)幾台電器返屋企,仲未甘心,再去已經走晒冇人d檔口睇有咩野剩低可以執埋,紙杯薯片廁紙都執,係差紙皮木板未落手(總有一天相信,都賣到一毫幾子架!),結果執場時個自己攤位得幾個人,因為個個顧住掃貨(唔包括我,我好勤力),要老細自己一個親自出馬包好大半個攤位笑爆,包晒之後各位同事拎晒所有收穫返黎,仲多過自己公司攤位d貨。大家的煩惱,係唔知點樣運番過海,架貨車夠位裝,公司個倉都唔知夠唔夠。
「所以點解到最後一日,個個人都爭取一定要過黎會場,雖然要做苦力幫手拆場!」
開心果個唔包括我。一來我三日黎行過好多個圈,實在發現唔到咩好野,headphone可以問問不過用緊對未壞就算啦,除左帶會計靚女去睇女、睇人地點樣著套晚裝派傳單(我成日都話我公司個會計係lesbian黎,仔唔睇要睇女先開心),就係留守自己檔口,同對面光管姐姐玩。星期二臨走時,光管姐姐應承今日請食蛋糕,仆到上黎啦立即!玩左幾日,今日吹多陣水,先知原來佢係無敵freelance,本身做model,隨時接job出席各大小活動做PR同MC,間中仲有得做茄哩啡拍拍廣告同單元劇,唔怪得佢咁面善。基本上唔多需要「正職」都可以一個禮拜開足七日工,勁好搵架,睇睇上年Peggy姐做司儀唱埋歌仔就三四日就知啦。
「所以幾時都話而家做女著數過做仔。」


展覽後返到公司,跟住兩個禮拜通常會超忙,今日全日搏殺。所以對夜晚十分期待,因為係

'80s & Life

其實係一個相當老屈的環節。因為求祈吹吹,已經錄到一個月甚至兩個月所有。
「根本就同平時一班人圍埋吹水一樣。」
節目主題曲,自然係《18 & Life》


不過,未有得聽住。吊癮?唔緊要,有喇:

R7HK第四話 經己上市


24/4/2008 THU

死。由以前一日一段,跟住幾日一段,而家一星期一段。冇計,一來日頭真係忙到黐Q線,近來病埋病到把聲勁death metal,連請左日半病假,抖抖休休好過。同,懶嘛,&悶嘛,冇乜好寫嘛。好在,我這日半病假,都唔係白放的:

Project: Evangelion


26/4/2008 SAT
R7HK第五話 經己上市

病左一輪、忙到飛天、打Dos game-ing(...),搞到連今個禮拜要update乜野都唔多醒起。好在,總算上到。需遲,今R7HK確保一定可以每星期有新一集聽...卦。
「我目標,係keep住逢星期三/五update。」
今集,R先生(呵呵呵呵呵呵)的「45分鐘的故事」,笑到我仆街,聽幾多次笑幾多次。可惜在R先生未能/肯同我地現場分享,佢演譯得傳神抵死得多,仲要單一個四十五分鐘故事,可以同你live足半個鐘,過程絕不欺場。
「R先生,幾時肯上黎同我地一齊分享你的鹹之初體驗?」



27/4/2008 SUN

E-V-E:TRHK 27/4新貨

今批貨,量極大,乜都有。

聽音樂者,非聽band名,請謹記,名氣是真正認識及投入音樂的障礙。
「唔識,點知,點試?」
「internet、官網、MySpace幫到你。只有自己聽過試過先最真,比『邊個人話』、『邊個網講』、『邊本書提』更真。」



28/4/2008 MON

E-V-E

新貨到左,節目自然係聽歌。今水貨除左款多,量更多,好耐未試過一日可以執貨執咁耐,開舖開始執,執完已經夠鐘食晚飯,咁多。最大鑊係,全部正野,正到仆晒果隻,第一日自已已經瘋狂度水,都仲未買晒,忙嘛近排買左都唔夠時間聽嘛大佬,同相信我要執的又唔會有人爭,慢慢都唔驚。

雖然black metal唔係我主場亦非我強項,今水貨我最吸引,反而係果一大堆black metal,尤其唔知乜名果d,唔好睇貨單輕描淡寫一句半句好似好碎料,聽過你就知,正爆。
「所以點解要聽NORDVARGR & DRAKH?最初唔知乜。後來睇番見到MZ412個名,就知咩事,就知冇得走了。」
要大路野,兩隊新碟:ANAAL NATHRAKH《Eschaton》我已經覺得好正,難得越玩越pop但pop得黎好聽,extreme metal又pop得到仲要pop完受夠晒吹脹,新碟《Hell is Empty, and All the Devils are Here》(很長)除左錄音太靚(grind同black,都係爛聲d好),仲正過上一隻碟,唔怪得個個聽完都話今隻碟係佢地最好果隻。但都希望佢地可以去番早期black番d同industrial重d,而家係正,只係有時death過頭了,同冇左初頭種自己style。SEPTIC FLESH作為我最鍾意black metal band之一(算black metal卦?專家講法,咪dark metal囉),上隻碟《Sumerian Daemons》已經係我最鍾意black metal碟之一同佢地最好果隻,跟住覺得「玩到盡」散band,估唔到隔幾年抖夠又返出黎玩,初時諗住會繼續「唔pop的DIMMU BORGIR」,點知反而返番再前去佢地中期真係dark gothic果排,正呀,只係聽晒成隻碟,有少少失望,可能出番黎未知應該點樣玩先好,又可能期望高左d,餓左咁耐喎大佬。
「我鍾意希臘metal,所以今水貨,SEPTIC FLESH同全女班ASTARTE必捧。」

另外doom出奇地多好野,ANATHEMA唔使講啦三隻都係聽doom必備經典,同CANDLEMASS,相信好多朋友聽完會話佢地唔doom,但其實真正的doom metal,是這樣的,亦因為噉,預左唔會有人理,就像CATHEDRAL,因為「唔doom」。其實成批doom野,最正係CANDLEMASS同THROWN。又因為我係工業迷,所以會揀P.H.O.B.O.S.。仲有THE FORESHADOWING,
「《Days of Nothing》,可能係2008年最佳gothic doom/『pop doom』作品。」
不過有趣地,又會提提DARK SUNS。係佢地應該算係progressive果瓣,但玩到咁dark咁低調,你當係doom或者KATATONIA果類黎聽,又有乜唔可以?

講到DARK SUNS,歐洲progressive一向走feel路線,近年越玩越暗,PAIN OF SALVATION同WOLVERINE之後(兩者都慢慢走火入魔了),DARK SUNS係另一隊睇好,你想搵技術,唔好意思完全冇野聽,第一隻碟差唔多直頭玩doom,可想而知佢地想做d乜、而家歐洲progressive路向係點、同點解歐洲progressive或者玩feel progressive香港一直冇人理。DARK SUNS呢隻係新世代progressive,唔係technical、jazz、classical撈,係doom metal、death metal、dark wave撈,第三隻碟,正式搵到自己路向同自己風格。想玩feel而正路番少少有NATION WIDE,但相信好多人會話悶會話唔好聽,因為個底係
「heavy metal。」
即係SAVATAGE。算啦,SAVATAGE又有幾多人記得同會聽而家?話灰metal,你話EVERGREY,即買。SAVATAGE?算九數啦。

硬係要技術,AGHORA。知咩料的,聽到個名已經知咩事,可以有Sean Malone同Sean Reinert幫手玩,你覺得會係雜卒band嘛?簡單黎講係女聲版CYNIC,連錄音都要似埋先抵死,不過新碟(捱左超多年先係第二隻仲要冇label撐,真灰),接近全隊band換晒人,起初都幾擔心,聽落去亦確唔同,恆左好多。好在聽AGHORA想聽的印度野、禪野、jazz野仲有,同第一隻碟兩樣野,不過一樣好聽。嫌另類過頭,PATHOSRAY係早期DREAM THEATER即係仲會顧住首歌同旋律唔會死啡難啡果期,加SYMPHONY X,溝埋理論上係聽「正常progressive metal」一定鍾意果種,除左個名。最過癮果隊?CANVAS SOLARIS。隻碟上面寫住:
"Ultra-technical, futuristic instrumental jazz metal for fans of GORDION KNOT & SPIRAL ARCHITECT, and surely fans of DON CABALLERO, DYSRHYTHMIA, CYNIC and even COPROFAGO"
即係呢,就算你完全唔識CANVAS SOLARIS,齋見到上面段字呢,識得大楷果幾個名,尤其唔係metal果幾隊,已經立即俾得錢架喇。
「劉Sir,噉你識唔識?」
「幾大都話自己唔識先啦。」

在香港,都係低調d好,「識」呢家野留俾專家啦,我鍾意做傻仔等專家教我多d。只係請記得,technical唔只係得progressive一樣,math亦唔係只得metal同core,其實七八九十年代多好野到你唔信,係你搵唔搵、追唔追嗟、肯唔肯唔一味追新野同多人講果d出名野嗟。聽番多左underground野同以前dtechnical/math野,就會發覺好多個個掛係口邊果d例如DT、LIQUID TENSION EXPERIMENT,查實唔多好聽...

要technical death metal都得,HATE ETERNAL同ARSIS新碟唔使多講喇卦?兩隻碟都係技術比以前更癲,尤其ARSIS直到變到NECROPHAGIST仲喪過之前,雖然兩隻新碟都俾人狂插,不過是否真係咁廢,自己聽過最實際。只係有隊band,一直推薦:
「DYING FETUS。」
在乜都要新乜都要潮的世代,這些理應要重溫追番的經典(請參考番上面CANVAS SOLARIS例子),而家仲話自己聽,分分鐘俾人笑番轉頭。(立即唔出聲唔同人講我聽先,殊∼)因為,潮才是皇道。
「係我係講緊PSYCROPTIC。」

technical都嫌唔夠,想再極端少少,玩玩實驗野。例牌必提SPIRITUAL,電子加民謠加metal,重點係隻CD入面仲有兩篇論文,當然係講metal,即係齋聽已經一流,再送咁認真研究metal文章兩長篇,所以我非常鍾意呢隻碟/呢條友。YAKUZA jazzcore唔使講啦(well,都潮過一排的,而家唔知還潮否?),AVARUS先過癮,絕對唔係metal,係玩「迷幻民謠」。
「咩黎?黎緊R7HK第六話就有得聽!」
FARMAKON第一隻碟《A Warm Glimpse》,十分搞鬼,當年都潮過一排,而家當然冇人理啦,到而家新碟都出埋喇。香港地慣例,正如之前網下有人提希臘全女班black metal band ASTARTE,即時收到大量詢問,但當時冇,後來入左貨,結果當時問的全部冇出現到,唔記得左自己問過卦?所以今水返左,都唔知有冇人要,雖然單講音樂,唔計係男定女,《Rise from Within》本身已超正。其實你單聽音樂,買EMPEROR都可以,唔一定要ASTARTE,兩者音樂就係咁相近,唔講的話你根本完全唔會覺同聽唔出係男係女。但香港人永遠會有趣地,就算唔聽black metal,都可以買同聽ASTARTE,相反叫佢正正經經聽EMPEROR唔得,因為「EMPEROR係black metal,但我唔聽black metal。」
「所以,希望PSYCROPTIC唔好咁快潮完。」

一直以黎好多人鍾意thrash,BLOOD TSUMANI同EVILE根本冇得走。近兩年突然好多新band舊thrash,好似MUNICIPAL WASTE,擺到明要玩番同廿年前一模一樣,仲要係玩得到加玩得好,你唔計較個band名同隊band玩左幾多年只在乎係咪thrash得好,好多呢d新old-school thrash band,你見到個封面已經直接俾錢走得人。如果個名真係咁重要?ATROPHY第二隻碟《Violent by Nature》,佢地都算係一隊當年唔算非常出名,但音樂夠激加夠水準之underground(半)cult。你係搵thrash的話,見到個名、睇到封面,都知咩事,唔使點樣猶豫,唔會「冇野買」喇卦?

gothic上,今次唔多野,但兩隻WITHIN TEMPTATION已經殺晒。《Silent Force》同《The Heart of Everything》好聽的話,《The Dance》同《Enter》係仲好聽,差距係LACUNA COIL/EVANESCENCE同「真正女聲gothic metal」之別,當然,可能你都只在意隊band個名係WITHIN TEMPTATION,多過係佢地邊隻碟、「係唔係gothic metal」,但自己一向唔太鍾意gothic metal尤其賣弄女聲果d,呢兩隻碟音樂同唱都係幾近經典果種,佢地頭三隻碟係我難得之女聲gothic metal收藏。反而其他較為特別。DISTORTED過癮在係以色列band,可以話係好多人鍾意果種TACERE式dark progressive,不過佢地特色在加左中東野落去,話晒以色列band。同BLACK COMEDY。挪威自KOVENANT之後,好多明星industrial (pop) metal band出現,好似香港紅爆的DEATHSTAR(原因相信歸咎於像Manson的外型多過像Manson的音樂),BLACK COMEDY一樣,電子加現在的瑞典/丹麥melodic death加清聲死聲輪更加巨量melody,即係我一聽甚至未聽齋睇形容已經中晒招果隻。
「...唔著到Manson噉玩industrial唔係罪卦,一樣值得聽卦?」

最後,兩隊自己幾鍾意的。ELUVEITIE係瑞士band,但個底係德國band好鍾意果種十幾人玩晒民歌樂器的folk metal,取材國家係愛爾蘭,第一次聽已經
「嘩∼∼∼」
除左個底唔恆,冇乜問題囉我覺得,雖然「唔夠恆」在現在的香港已是死罪。同DEVIATED INSTINCT。唔係metal,佢地係玩crust,噉點解TRHK會賣?hardcore、punk、crust,同(death) metal、grindcore關係非常密切。點解一定要metal先得?好音樂得唔得?
「乜野係crust?」
「聽聽THE SQUAWK。可能係香港唯一一隊crust band。」


結論,係如果入埋今水貨,TRHK仲係冇野好買、仲係只得一兩隻睇得上眼,你的metal修為已經到達化境了,應該去到香港以外任何一個地方,都冇乜人及得上你。我未到這個境界。

同,音樂,係要黎聽的,請記住。好多野其實已經放定係度等你,只差你肯唔肯行埋黎搵同試。唔係一定要直到有人講有人提起果一刻,果隻碟先至值得聽、先至好聽。又係果堆cliche:
「唔識,點知,點試?」
「internet、官網、MySpace幫到你。」

雖話係cliche,但睇左五六七年,這些cliche已經不再是cliche,而是香港人文化同心態不能動搖的一部份。我確實未見到身邊有邊個人能夠超脫得到。

Listen to the music. Not the hype.



通告!6/5星期二及7/5星期三兩晚
TRHK將關門休息,敬請留意!

任何查詢可致電98675737 / MSN lau_sir@hotmail.com 劉Sir洽