馬那合唱團香港演唱會
今日星期三，因為「本週特別安排」舖照開，但當然好死得閒啦，
「平日都冇人上，更何況禮拜三本身話唔開？仲要月底？」
所以，聽歌。反正冇人，今晚唔聽metal野。
「黎緊五月又會去美國拉斯維加斯，為此已經開始準備一個年度大project。」
同埋，打機。無敵閃光。
實在太鍾意打Flash game，特別呢隻完全補捉到忍者神韻之Ninja Rinseout，打贏之後再不停向（更）完美進發，令我重拾以前打紅白機灰機超任研究屈form同bug鬥高分之樂趣。
「自從次世代出現，新出的電子遊戲，好似已經唔記得晒呢兩樣野，打機真正開心過癮之兩樣，要靚要真，而唔要好玩襟玩。」
而家新game玩落似做功課多過似打機，好難吸引到我投入，唔似舊game系統簡單但變化無窮，在簡約規範中開發各種不可能及可取可笑，爆左無數次仍然有癮拎出黎繼續玩繼續摷bug諗屈機，都是old-school好。
「向Flash game的retro spirit致敬。」
「有緣，自會與『續集』Ninja Rampage相見。」
「15/3星期六，大家記得買《明報周刊》。」
點解？因為繼劉Sir四年前登上亞視《慧珊Metal時尚坊》後，有個客聽開death metal，自己本身做《明周》，黎緊諗住寫個專題講香港小唱片商戶生存之道，又上過劉Sir個網知道佢有幾白痴，自不然上黎叫佢吠幾聲。
「噉咪好好玩？」
確係幾好玩架，佢揀左三間探討，一間係本地知名古典唱片店，另一間係「行家」。諗住今晚會有好多野寫？冇。一來懶。二來，
「老實講，你都知劉Sir講乜架啦。咪又係果ｄ。」
冇錯，cliches & glitches。同又係宏揚唱片失敗學的時間。寫我就懶。等正文出街啦。
「15/3星期六，大家記得買《明報周刊》。」
照計場騷會超勁好睇。首先有HORSE THE BAND，音樂表演都笑到你仆街的一隊post-hardcore band。同超勁陣容，除IGNITE THE HOPE唔識所以要睇，KLC未睇過live加傳聞已久更加想睇，HERMETIC SILENCE轉左新歌佬加閉左關咁耐想知而家玩成點，但最重要係
「門生我終於等到你地！」
恩怨請見New Generation of Metal Hearts Aftermath。唔知你有冇，性趣我就好大，撞正復活節，索性早收舖去睇。
「江湖傳聞，07年同METHOD一齊出LLNR的FROM THIS DAY，HORSE THE BAND之後個星期又黎香港喎！」
睇過一次，可以同你講有得睇必定要睇，精彩到爆，仲要碼頭（倉庫？）搞肯定更加有feel。可惜我去唔到。
「版罪！！！！」
非常突然。Henry哥前排努力進修，考埋個試久休復出，今日黎番野版罪先。
「罪乜春丫！黎黎去去都係圍內幾個罪人！」
飯堂已搬左去第尾，因為
「且豐已死。」
其實近排已經復活（「且番」），只係太遲喇，一試第尾，晚市六七八十但由頭淡湯到埋尾食雪糕都正到ＸＸ，午市少左杯雪糕平差唔多一半，價錢只差且豐十至十五蚊但質素當然不可同日而語，邊食邊喊啦正到直頭。兜兜轉轉，又係我、冷爺、Henry、Rock爺四個，再加戈竹尸同稀客市長參加今次飯局。今日六條友坐埋，立即覺得Henry哥好上進，在座幾位一係做之則安之過得一日得一日，一係明知自己冇前途但我係唔長進吹咩，唯獨Henry哥今年讀完一個course，下年繼續追埋個學位，你叫我而家仲邊返工邊讀書咁勤力？算啦相信叫劉Sir放棄metal會更加容易。
「這個世界不是人人都像劉Sir那麼頹廢的，大家請以Henry哥作榜樣。」
且豐好食地方又好坐侍應又夠黐線，睇我地市長以「印度新移民」身份點菜都可以得到熱情招待（註：「熱情」＝「只差粗口未出」），就知點解我地咁支持第尾啦，且豐鬼同你癲咩地方又細唔係好坐。今日大家傾番，發現TRHK的詛咒是真的。差唔多做親TRHK，全部不得超生與音樂工業為伍。正如冇一個離開TRHK後冇做過其他唱片舖或唱片公司，假使而家唔係業內工作者。亦即係，通通冇前途死得。但最開心相信莫過於冷爺，有一個史上最on9老細（喂，on9先好玩喎！有幾多老細俾你同佢鬥爆粗咁正？），同超亂制度而成之無限金錢供應，每個禮拜落HMV由NME到Revolver最新音樂雜誌全線掃晒，落馬會買番幾注六合彩，再飛的返公司食多條雪條，返到office全部開公數。（well，誇張左少少，不過都差唔多，呵呵）
「公數乜都包？包唔包埋叫雞呀？」
「包！有同事同個客傾生意試過！」
正喎！咩公司黎？俾著你有前途，可能做成世都冇機會咁癲咁好玩！
「冷爺！我相信TRHK同你地凹打Records有非常龐大合作潛質，或者搵一次TRHK營業代表我需要同你出一出埠，到澳門一齊洽談生意機會！威尼斯人隔籬間打令聽聞唔錯！」
食完個飯，上到舖頭，好靜。
「冇新貨。」
坐到夜晚．．．
「meow∼點解而家中五中七ｄ靚仔靚妹可以聽日考試今日仲走上黎TRHK坐成晝咁得閒？？唔使讀書乎？」
《紙談音樂》三月號第七期出左喇。今次又玩雙封面，香港代表林一峰，海外代表SIMPLE PLAN。係第一次用外國artist做封面。
「莫非，係聽到劉Sir的回饋？」（呵呵）
非常推薦今期，內容越來越近接近我心目中所渴求。首先係林一峰訪問，開頭諗住冇乜特別睇頭，點知內文係估你唔到地hardcore！
「仲有講秋紅！仲唔值拎番本睇？」（呵呵，這是業內宣傳技倆，睇左就明點技法，呵呵）
中間一篇卻是英文訪問，不知何解冇中文，連簡單翻譯或對照都冇？過左過埋SIMPLE PLAN，正篇雷有暉同鄧建明簡訪，講太極前身TRINITY。
「佢地就係TRINITY？做左TRHK咁耐都唔知添！」
標題寫住 （上） ，即係月中仲有下集啦？後半集中做文化專題，上期講《DMC》，今期都有講漫畫，就係《Beck》，睇名同封面都知rock極果套長篇漫畫。之後驚喜極多，有「十大最佳獨立樂隊MV」，仲有一篇講電影配樂甚具學術研究意識，除文學、電影、周邊商品外，開始涉足更深入工業同幕後領域，正正係我想睇我所追求之內容方向。越黎越專業，indie感覺加重，估唔到可以比以前再進步。但講到全期重點喇喎，就梗係唔少得
未能集齊所有期數的讀者，不用擔心，《紙談音樂》編輯部現正打算把第一至六期《re:spect》整輯成精美季刊，預定在復活節假期開始發售。至於未能集齊第五期及最新一期所有劉Sir簽名的讀者，不用擔心，劉Sir現正打算舉辦一個全港十九區巡迴簽名會，巡迴地點包括旺角皆旺商場108號TRHK、旺角皆旺商場108號TRHK、旺角皆旺商場108號TRHK、旺角皆旺商場108號TRHK及旺角皆旺商場108號TRHK，預定在有人請佢食飯時開始舉行。
我已經慢過好多熱心時事／本地音樂人士、專家同潮人，KING LY CHEE隻新EP《亞洲起義》出左咁耐，到近排先聽。可能繼BEYOND之後，香港最紅樂隊就係佢地 － 我9up嗟，不過身處「地下」多年，見過最多人捧地下band真係佢地，唱片銷量甚至比流行歌手更高，最高峰時係紅得可怕、冇諗過獨立樂隊可以紅成噉果隻，或者hardcore文化係一大助力，在香港punk與hardcore才是皇道嘛，
「唔通係metal咩！一睇劉Sir就知唔會係啦！」
KLC已經係香港地下band老字號，玩左差唔多十年仲出到第四隻碟，本地獨立band有幾多隊做得到？本身唔多聽core野，相信聽最多只限grindcore之類，所以佢地音樂係好定唔好，係一個聽metal人士聽完hardcore/metalcore碟後非常個人睇法，講錯得罪者專家勿插。
俾我感覺，佢地寫歌好取決於當時core界發展，第一隻碟十分地娘，係個鼓佬勁到飛天，因為本身來頭已經犀利，但只算係個session。第二隻碟《硬蕊》賣點係勁多indie明星guest同「Polar Bear製作」，「新派」左，唔算好好；第三隻係2005 split《Under One Flag》，同斯洛伐克punk band GOOD REASON各四首歌，錄音歌路完全變晒，因為當時值metalcore當道，風格自然非常2005年，亦即modern hardcore，歌玩多段複雜技術化，當然唔少得breakdown，廿一世紀果隻。
「有關二十世紀與廿一世紀breakdown之討論，可經此到New Generation of Metal Hearts參見Cliche Review Aftermath。」
鑑於metalcore同哥登堡遠房關係（講得相當客氣了），某程度上唔計breakdown同歌詞四首新歌我都鍾意，因為夠爆夠高技術同最重要夠瑞典，錄音質素又高，indie黎講好少咁專業。不過講到「新碟」，又要等多兩年，先至有隻EP《亞洲起義》。
「send俾我！」
專家曰。毋須咁煩。請自行到以下任一：
全隻EP，KLC放上網俾你免費下載。冇錯，一蚊都唔使俾你就可以上網download晒佢地成隻新EP六首歌，仲要係奉旨果隻。你覺得錄左六首大碟質素歌曲，跟住放晒上網任人download好浪費？絕對唔係。聽到今隻碟玩埋普通話，同睇睇係邊本雜誌幫佢地做推廣，就知道現在KLC有幾紅，同知咩事了。唔明「咩事」者，
「自行到此尋寶。」
作為進一步打入國內市場宣傳用途，免費放六首歌上網，絕對係賺多於蝕，大陸人「窮」同「難搵」嘛。雖則香港地人唔窮隻碟亦唔難搵，反正都係，一野過放晒上網算，因為
「而家香港仲有幾多人（肯）買碟？」
分分鐘少過大陸。俾著你，你都未必會考慮都唔考慮即時科水啦，小朋友？唔係音樂問題。係＄問題。香港地的市儈現實，同「講時威風做時失蹤」文化。老實講，KLC個名救左銷路唔少，當現今世代音樂質素同銷售數字已經脫勾。
新EP六首歌，唔知係咪全部新作，我只認得《無皮》就係上隻split《Skinless》的「中文版」。有留意KLC去向，都知佢地近兩年經歷過好多人事變動，唔知因為呢個緣故，定還是又係潮流問題，
「metalcore已經潮完，現趨勢係回歸old-school。」
新歌又唔同左，明顯地冇上次咁複雜，簡單直接得多技術亦淺白，就連「廿一世紀breakdown」都接近冇晒錄音再舊化，論歌頗有好感，因為好貼近我心目中的老式hardcore即AGNOSTIC FRONT果隻 － 請不要和我拗佢地係（唔係）hardcore定thrashcore定crossover我好膚淺的我只知好聽 － 但更大原因係放棄一味摩登。個人對breakdown其實幾反感，特別由一個快beat慢慢減慢／簡化最後減／簡到成為breakdown，上作想學當道紅團情況相當常見，對我黎講係一個非常唔健康現象，好似以前metal band／結他手為加solo而夾硬加入首歌入面，metalcore band又係係唔係都要攝breakdown位入歌（「唔core唔得」的道理），連帶「遠房」瑞典、哥登堡而家都學埋。breakdown雖然唔係新奇事，只係點break法幾時break先係重點，我受果種係音樂性breakdown如《皇后碼頭》，而非純節奏性（大量metalcore band至《Under The Flag》果隻）。old-school感覺重左，新歌冇以前咁多窿同多番副旋律線，即時討好得多，但有得必有失，放棄上隻碟紮實錄音及複雜技術取向（係人問題定潮問題？），如《無皮》舊編曲唔計breakdown非常吸引，但新版技術加旋律改晒，好多位刪減左唔夠有力，仲冇左我們的最愛
「每個∼流淚晚上∼∼∼大同世界！！！」（成日發癲嗌的班友）
部份歌亦因太簡化致削弱氣勢。舊歌衰潮流感過重，新歌衰過份簡單，如果可以將上隻碟錄音技術同riff結合今隻碟寫歌方向，一定會令我覺得好正好正。
「希望『新碟』會係噉做法。」
但某程度上，以樂隊寫歌路向，都要睇番該時候世界玩緊乜，先知／就會估到。
而家KLC其中一個焦點，係搵左ENGRAVE THY HEART女主音阿紫唱。hardcore聲我從來唔多鍾意，拆聲感覺好似身有隱疾（無意得罪也），清聲．．．唔知點解隊隊hardcore個歌手把清聲聽黎都一樣，好似十隊都係搵同一個人唱清聲噉，加上core清聲成日聯想到emo/punk「基」多於靚聲，所以能於唱方面做到自己風格如KILLSWITCH ENGAGE我會特別欣賞。前任Alex唱功好，拆聲夠拆，清聲唔係我鍾意果種起碼接受到先，阿紫一拍埋相差甚遠，把聲仲好嫩，唔夠力亦唔夠火，加上國語咬字相當廣東化，要完全稱職取代前任仍需漫長努力。Alex走左我覺得係KING LY CHEE一大損失。
音樂跟隨潮流走未必係好事，但歌詞同樣緊貼最新時局反成優勢，雖則hardcore好正氣歌詞我從來唔多頂得順，但寫完首歌能夠將當下話題即時入詞，確係填詞人一大功力，加上獨有之東西合璧，上隻碟廣東話加英文，今次玩埋普通話兩文三語，確實只此一家。歌手仍需努力。我好懷念Alex。
唔算我杯茶但整體好得我心，上個月搞左release party，落碼頭搞聽落幾過癮，錯過左唔緊要，黎緊仲有。
「已經成隻碟俾晒你download啦。仲唔夠理由去支持咩？」
之前一連幾日，都係朝早好忙，搏一輪命起晒晏晝渡假，按推理今日唔會差得幾遠。點知琴晚突然收到電話，個客突擊上廠，搞到今朝無端端要上大陸一轉。通常上廠見客都係我同老細一齊，到場佢有佢講我有我坐／訓／頹，但早前幾日走左去上海擺展覽，琴晚剛剛落機，受到劉Sir感染唔多想郁，變左自己一個上去。仲正。
「有得上船怒訓！」
同老細一齊上工廠會飛車，自己一個或老細唔跟住就坐船，仲正過坐車，好坐舒服有野食之餘，
「一丁友玩乜嘛！尖沙咀上船喎！正唔正先！」
因為琴晚先收到電話，要一早返上公司執野印野準備，食多條蕉，九點九出發去尖沙咀。
「我車你。」
阿姐話。冇錯，係阿姐車我出尖沙咀搭船。當堂有ｄ驚。唔係驚炒車。係驚而家好似得我一個未有車牌。原來當今世上咁臥虎藏龍，分分鐘下次撞到老細，佢會同我講
「《Lords of Chaos》中譯本係我負責翻譯，你唔知咩？」
十點一到中港城買船飛，十點八先開船，仲有半個鐘先入閘，自由時間喎梗係去行行街先啦！
「搭船上工廠就有呢個好處。」
旋過隔籬，傳說中Hong Kong Records做緊「alternative大減價」，仲要睇睇近來放咩垃圾片出黎減價，點知一隻碟一隻DVD都執唔到：
「十點都未開門。唔係卦。」
唔知佢地，成座商場差唔多乜都未開，連食都冇得食果隻。講起早餐，有興趣試多野Burger King不過太遠，冇KFC又唔想麥記，一場黎到Citysuper，去meow姐推介的Triple O探探路先。去到，先剛剛開門，但姐姐連收銀機都未準備好已經閃得，因為超貴。
「Triple O一個包，已經貴過Burger King一個餐！真係食Ｘ！」
十點八上船，搭完兩個鐘再轉車上廠，返到都點幾個客兩點到，爭取時間，決定早餐加晏晝船上面一take過。當然要食餐蛋麵。本身船上面ｄ麵已經難食仲要廿蚊碗奇貴，不過念在餐蛋饒佢一命，餐蛋麵已經夠難食，但今班船冇餐肉得火腿，腿就冇癮啦改食牛腩麵，點知仲難食，噉就跌左廿蚊。
「頂。早知Triple O搞掂。」
食完個麵慢慢訓，兩個鐘船喎食埋個麵頹多陣都仲有個幾鐘啦，坐船夠穩張凳又好坐訓得舒服，訓醒差唔多上岸時，俾個姐姐仔開咪嘈醒（搭左咁多年船，發現有個慣例，就係一條船會有兩個姐姐仔，一定係一個唔多得但另一個中上線），唔係叫你起身，係提醒你
「香港報章《蘋果日報》、《東方日報》、《太陽報》，獲中國海關禁示攜帶入境，敬請留意。」
呢招勁。一來順晒老頂意。二來你唔帶得走，除左惡意破壞，唔係落船之後班姐姐仔可以執番齊成疊報紙，排番齊又賣俾下班船的乘客，報紙甚至唔使自己俾錢入貨等早船班人買入黎，之後用上面番說話叫佢地自己放低報紙，搞掂第二班船立即有貨賣。醒。我冇報紙，唔驚啦。不過，
「香港右報唔帶得過境，我個袋裝左幾隻metal
碟，會唔會有事？」
點知，冇事，掂行掂過。睇黎在大陸公關的心目中，極端金屬都不及三份港報咁邪惡。
因為好少人，話咁快就出到去，完全唔會話迫或爭先恐後，真係少人到你唔信，除左有一次唔知係咪暑假小學生旅行有班姐姐帶住成村細路坐得滿大半架船，就算繁忙時段同大時大節都未見過爆到過四份一架船。落完船過完關先十二點七八，個半字唔使已經全部人唔見晒，門口兜客班的士佬見咁快冇人都閃，遇著食飯時間下班船成四點先開／到，全體關員同職員一同消失吃飯去，成個碼頭我一個人包晒。成日覺得做呢個中港碼頭好正，每日得四出四入早二晚二共八班船，少人出入境即係買飛班姐姐全日坐係度關員一兩個字清一班船，每晝四班船計埋等三個鐘內乜都搞掂晒，見親最多係就係坐同企、圍埋吹水、玩電腦睇報紙，差未拎埋副啤出黎鋤，十二點半完下班船隔三個幾鐘，食兩個鐘飯都得啦根本就冇皇管 － 皇果班一早自己走晒去啦仲等你咩。
「仲嘆過我做呢度。我係咪應該入藉深圳先得？」
十二點七坐係度，坐左三四個字坐到成個碼頭走剩我一個，仲未有人黎接我。工廠唔係話派人黎接我咩？
「冇理由喎！冇上錯船丫我今次！」
坐多兩三個字，終於出現了。有廠長伉儷親自出車迎接。
「勁喎！」
「一點都不勁。廠長相迎，因為佢同劉Sir是一擔擔地頹。」
都係劉Sir啦。佢在香港公司的頹廢事蹟，早已傳遍工廠每個角落，搞到個個都唔做野懶到爆。上左廠長車，未即時上廠住，兜兜風再買個野食（仲唔係被劉Sir感染的徵狀？），去埋廠長寓宅參觀先。雖則大陸建築質素開始提昇，好多大陸樓外觀甚至靚過香港樓，但好多仲係敗絮其內，企門口好有期望但入到去溶溶爛爛到你唔信。但一分錢一分貨啦，大陸有樣野就係好極端，一係極端地好，一係極端地差，未必盡善盡美，但一分錢一分貨，一個屋苑級環境優雅中級單位 － 非屋村係屋苑 － 先只收你三十七萬一個。已經叫做「貴左」。
「大陸人人工低過香港喎！」
「佢地人工低你幾千蚊，但係買一層樓，平你一百萬。」
廠長再同大家分享，而家大陸人三千蚊一個月已經夠生活，「夠生活」＝「供到
樓養到車自己老婆仔女夠食仲可以有消費娛樂」，「省儉點二千都夠了」，諗得過。
「在香港打一年工，上到大陸就變成大富戶，生活輕鬆，又多靚妹！」
諗得過諗得過。原來大陸都有「靚妹」這回事，多謝廠長教誨。諗得過諗得過。
「我們，咸是港燦。」
點半終於到達工廠，個客話兩點到，當然例遲啦，客就係大晒你遲俾人小但佢遲大晒。咁突然上黎又懶到如劉Sir都會奉陪，自然係大單野。
「分分鐘今年食粥食飯 － 或者話有得食定冇得食 － 就係睇今舖。」
冇乜好講，大家鬥嘈，一嘈就兩個半鐘。點解？
「有時同外國人、同老人傾生意，會發現原來香港人真係個好醒的民族。」
四點半，先嘈完，趕得走隻鬼。初時諗住會好快搞掂卦，可以剛剛好趕到四點鐘船，點知俾佢搞左咁耐，過左四點，就要等六點先上得船，返到香港已經八點幾。舖都唔使開。尖咀落船，正係大好機會行埋幾間CD舖先返歸，不過直返屋企。就係咁忙。
「過埋今日，劉Sir的退休生活就結束了，請一同惡哀。嗚嗚嗚。」
怒忙，自從琴日。最後仲要OT。但一做完野立即飛上去，因為兩樣野。第一：
「張．大．導！」
有冇成年冇見過呢？
「而家撈咩呀？《慧珊時尚坊》呢？」
「咳左啦。」
自從《慧珊時尚坊》變身《Metal時尚坊》，收到大量觀眾同家長投訴「劉Sir教壞細路」，之後由十點半檔延後到十一點三檔，後來好似再遲，最後抵受不住群眾的聲音，腰斬埋了。都係劉Sir衰。叫左你地唔好聽metal。
「跟住呢？」
「《夜蒲點》。」
「正野喎！」
「不過咳埋。」
「噉《AV事務所》呢？仲唔係你？」
「就係唔係我呀頂你！而家調左我返大陸做呀！」
唔怪得咁耐冇見過。不過返大陸做都有好處，就係好多囡囡，今次仲帶左兩件落黎「教囡囡聽metal」。呵呵。
第二樣野，就緊要得多：
突然回勇。好耐未試過一次返咁多野。
「唔係好多咋喎。」
「其實，呢度只係三份一。上星期到左ｄ，不過補貨同indie野多，懶出list；黎緊好快，仲有。」
今次所謂「三份一」，其實等於平時一水半咁多。你唔會覺，因為好多都係「唔知乜黎」。
「剛有朋友到台灣旅行，講番台灣咁大、連普通唱片舖都會賣metal野咁有市場，但搵晒咁多間、搵埋當地metal專門店如瑪雅、傑笙，冇一間種類甚至數量及得上TRHK。」
朋友台灣一行同MF北京之談，綜合埋一直好多海外顧客回饋，TRHK係中港台地區首屈一指metal銷售點同重金屬知識集匯處，你話要重質重量，甚至為數不少亞洲、歐美metal專賣店都及唔上，但任何一間本地或台灣甚至大陸有賣metal商品舖頭，專門也好非專門也好，冇一間生意會差得過TRHK。因為香港不是重質或重量，而是個重名的地方。『唔知乜黎』，對香港人黎講，係一個好很嚴重的問題。
唔緊要。就當係入俾自己。今年頭三水貨中，真係一水比一水大鑊，唔知玩乜聽極唔明，超多。其他人唔會在意，但唔緊要，我鍾意。
「所以我幾時都話，而家TRHK入貨，似入俾自己買，多過入俾舖頭賣。」
唔係因為有劉Sir同TRHK，好多band根本冇機會有進入香港、冇可能本地多人搵多人識，而唔會成為而家好多人經常掛在口邊甚至「潮左」的名字。
「所以，而家唔會再見到好似前年二月一連八批貨、一個月多過而家一年之光景。因為短短一年甚至更短時間，『唔知乜黎』已成聽metal皇道。亦即反『TRHK傳統』之道而行。賣音樂不賣名稱，又點做落去丫？」
你呢？自己想想再尋寶吧。我，好開心。開心到TO-MERA同BIOMECHANICAL兩隻新碟，再次激起我寫metal碟評的興緻，放下好耐之後。
「我2008的承諾，係對得住佢地兩隊band。」
「有得怒食，有遊戲玩，仲有獎品獎金
加大量估你唔到驚喜！
唔黎？唔Ｘ係卦你？」
居然會早左返工張卡冇紅到。因為今日唔使返工。
「唔使返工又返？」
「返廠嘛！」
月底過四川五月飛美國，上去係睇睇展覽場地點做法，同行仲有另外兩位同事，一個係新同事入左黎做左兩三個月，一入黎立即有單開（well，而家全公司好似得劉Sir可以一年先開得一兩張單，人地做野架嘛似劉Sir咩！），有張單就黎出貨，今日跟車上去視察生產進度。同埋船務師奶，做左成年仲未上過工廠，一來職位上冇需要二來同劉Sir一樣好食懶飛（．．．），只係老細忍左成年都頂唔順，今日誓死要佢跟住上，
「正所謂醜婦終需見家翁！」
兩個都唔係太想上，除左懶之外，仲因為怕。而家任何人入到我公司做，最先知道除左幾點食飯幾點放工幾時出糧，仲有劉Sir每次同老細上廠都中招的野史。
「你第一次上廠就塞八個半鐘車單野揚晒啦！跟住唔係炒車就係爆呔！今次要我同你同車，都唔知有冇命返香港！」
九點幾出車，各位同事震，我照係噉訓，坐老細車遊住車河訓覺真係舒服過自己屋企撻落張床訓架。訓醒落車十一點八，
「唔好意思兩位同事，今次只係塞左半個鐘車咁碎料，同劉Sir返大陸，冇塌橋都封路啦最起碼應該！」
上親工廠都好期待飲阿姐手靚湯，一向唔多鍾意飲湯特別中湯，但阿姐煲湯就係好味到連我都會一餐飲四五碗，加上鑊鑊我上工廠阿姐都會斬多隻雞侍候，通常上工廠等於遊車河訓飽之後見客見完食飯飲湯訓覺訓醒上車返香港好正架。點知今日阿姐放左假冇飯開。加上塞車耐左差唔多夠鐘食飯，所以唔入廠住，兜左去隔籬ｄ村仔搵飯食。都好，上年去古鎮做展覽食左間人民公社，非常鄉土風味仲要十蚊味送平到喊，不過今次搵唔返，因為條條村都係睇隔籬村間野叫咩名、睇有邊間出名，之後將人地個名改少少就變成自己舖名，一路兜睇落間間差唔多甚至一樣，最後落左去間叫鄉下農莊。睇個名都知有幾鄉下有幾農莊啦，我叫左味家鄉雞豆腐，外皮鬆脆但入面滑到飛起，香港未食過亦冇乜機會食得到咁正豆腐，講新鮮已經唔夠人鬥。成餐飯我齋食呢味豆腐已經夠飽，係多到豆腐都食得飽人，你話幾抵食？其他人叫乜已經冇任何重要性，碟家鄉豆腐太好食了。多之餘又要平，雖然而家大陸通脹到黐線食品可以加價近五成，一味送上年食十蚊而家要十六七八，但「加左價」極都平過香港，人頭飯先一蚊個喎點搵呀？搵埋廠長黎食，五個人每人叫一樣加煲湯仲要食唔晒咁多，先收你$115，即係一個人先廿三。
「香港地飲餐茶都唔得啦呢個價錢。」
「唔好話飲茶，食個飯盒都唔夠啦。」
地方夠乾淨環境又靚，同埋好多過癮野，大陸真係乜都可以發生。話說食食下飯有對新人出現，以為佢地係呢頭住，或者見有成個荷花湖景影相靚，點知原來係黎．．．擺酒。冇錯，係lunch時間黎大排檔擺酒。就番各位朋友返工地點同時間卦。個新娘去到邊都要著住套婚紗，即係香港地婚紗只係行禮同影相用，大陸係一紗通行去大排檔食飯照著住，最抵死係對新人上身執到靚一靚，但望望對腳，四隻腳都係著住拖鞋。笑到爆。
「午市擺酒仲要大排檔擺，我都係第一次見。」
「第時結婚黎呢ｄ地方擺酒好呀！一圍酒可能三舊水包晒！lunch擺又慳時間，擺完酒立即返得工，幾方便！雖則著住套婚紗去返工又確係誇左少少！」
本來見大家咁有緣晏晝擺酒都俾我撞到，想過去同對大排檔新人敬番杯，不過見過左十五，冇利是逗喎仲要做禮金，都係坐番低繼續食豆腐算啦。我地十一點八九坐低果陣冇乜人，十二點未夠全場已經爆滿，ｄ野咁好食又咁平抵佢生意興隆，客人多同場姐姐仔自然亦多。有個姐姐仔幫我地斟茶遞水，見到佢張工作證，即係工作證呢家野好平常，不過佢工作證張相，係笑晒口V晒手 Yeah~~~ 的貼紙相。笑到我仆街。大陸真係乜都有。
食完再上車，返到廠先點幾，仲有大半個鐘頭，梗係繼續訓啦，就算我勤力，工廠同事都要食飯嘛兩點先開工，我唯有陪佢地一齊懶惰。等大家訓醒開工，先走落樓下望望黎緊展覽個情況。
「睇睇啦。」
「哦。 睇完。」
擺展覽個攤位百年如一日，甚至全球通行咩國家咩展覽通通一式一樣，入黎公司做過一次已經一次通萬次明，美國都去過兩轉啦點擺點砌已經熟晒喇，就算唔上黎睇定，即場都識搞。兩點半鐘我已經走得人。
「咁無聊？乜都唔使整就搞掂，噉你今日上黎做乜？」
「上黎食豆腐囉。好味。」
但老細仲有野做未走得，仲要唔見埋人添唔知點算想走都冇得走，
「我司機就係我老細丫嘛！佢唔黎，邊個幫我開車？」
即係上到黎工廠我就唔會做野，但要等老細出車，雖然香港我出晒名唔做野一味死懶，但在大陸同事面前仍然要做一個好榜樣俾佢地學習，要扮晒自己好有精神好勤力好有衝勁（以上我入左公司做左兩年幾通通未發生過），想訓覺又搵唔到位匿埋唔俾大陸同事發現，又冇電腦用喎好鬼慘，唯有不斷轉換地點，一個位就黎坐到訓著時立即走去第二度維持清醒狀況，同潛入會議室開雪櫃偷汽水飲（已成每次上工廠最大娛樂），最後都係頂唔順，出左去行街。
「嘩！乜工廠呢度咁熱？三十幾度都有！」
「冇三十幾！溫度計話廿九度嗟！」
入面超悶出面超熱，個鐘又好似停左頹極都唔覺時間有過，有點後悔了早知今日唔上黎工廠啦，留係香港舒舒服服擺到明涼住冷氣上網仲有大量零食供應開心幾多先得架！
「嗚嗚嗚！好懷念香港公司部雪櫃呀！」
我差少少悶到，好似前年去工廠參加年宵晚會，要偷工廠妹架單車黎消遣。
躝下躝下躝到四點半，老細成班公司高層開完會，要運番香港ｄ野又執好晒，終於走得喇。我地三個嘍囉等左好耐。頭先老細架車拎左去整，因為後轆有ｄ問題，逢開過百米，架車後半就會猛咁震，大陸整車平過香港嘛，上到黎梗係搵大陸車房搞掂埋佢啦。回程已經夜開車，自然有幾快開幾快，整完後轆果然冇震。不過今次到前轆震。經我地研究，相信間車房其實冇整到，只係將有問題的後轆，同冇事的前轆調轉就算。笑到我仆街。大陸真係乜都有。不過老細懶理照百四百七噉踩法，震到全程好似坐越野車，兩位同事繼續驚，我繼續訓。
「此行都總算驚險刺激番少少，似番ｄ樣。不過唔多夠喉。幾位同事，下次再同劉Sir一齊上黎玩過啦！」
冇錯我太懶了。既然107已經寫晒出晒相，我就可以順便慳番。
「今餐花園金閣唔錯，食同玩都係。」
係咪通貨膨脹又唔加價，所以廚房轉入平料？今日個沙嗲湯底完全唔辣加冇沙嗲味（可能係班友發癲一開波幾碟肥牛掟落去撈上黎時撈埋晒ｄ沙嗲粉搞到冇晒味），ｄ肥牛可以仲薄過魚生加冇牛味，不過粗有粗食冇乜所謂，再者有無敵黑椒肥牛同包心豬肉丸，而家鍾意食丸仔多過食肥牛。人數唔算多夾埋先十個（已經算多，但同當初話會出席人數對比，少左最少一半）（不過，鑊鑊都係噉架啦，大家有乜唔滿意請小九今次召集人Rock爺，我只係負責借個朵黎吹雞同食）。
「阿皓哥仔我都知冇台妹出席，係失望ｄ架喇，搞到你冇乜心機，將就下啦！早知幫你借隔籬檯班索妹妹你頂住先！」
全靠贊助商107踴躍捐輸，是次班罪春冥有得玩有得食仲有得拎，在此恭喜各位抽到107倉底死貨的朋友！（一早講定莊家冇份抽獎係明智的，呵呵）
「流浪哥你就勁啦，獎品數量係出席人數1.5倍，每人最少有一份，都可以抽到散席都冇你份！抵俾人笑足成世！」
另外有終極柒級大獎三份，包括免費打邊爐777 Jackpot x1，同
「有齊杜比5.1加multi-angle的正版三仔！」
名額三名，相信係史上最無聊獎品，同比777 Jackpot更具吸引力！三仔四仔睇就睇得多，正版你有冇見過？multi-angle三仔你又玩過未？
「各位抽到柒級大獎的朋友，請寫番份詳盡賽後報告俾劉Sir！交功課時，順便連埋隻碟一齊交俾劉Sir作改卷用途！」
二月底上左黎訪問，兩星期後今個禮拜第2053期（嘩原來已經出左四十年咁耐二千幾期咁多！），大家都知《明報》一向走嚴肅正直路線，所以唔好諗住有劉Sir有TRHK，就以為係講metal，內文係有關本港音樂工業而非關於音樂。
今晚九點鐘，亞視國際台。所以永遠支持亞視。無線節目方向太投機太商業，唔似亞視咁夠膽試咁追求資訊。明珠台你冇乜見過佢會播演唱會同音樂節目，有都係好流行或好古典果ｄ，唔係唔好睇，只係論吸引力，亞視的U2、SMASHING PUMPKINS、BEE GEES、其他好多rock band等等等等，更大。
「連METALLICA《S&M》都播。你仲睇無線？」
亞視譯中文名做《歷代經年：搖滾七章》，今集第三集講punk，上集講progressive rock同art rock，錯過左灰爆！睇情形應該係七集按時序講，上集係art rock，第一集應該係Jimi Hendrix，再數落去，或者下集就到metal？
「記得逢星期一九點開電視睇國際台！仲有四個禮拜一睇！下集要係講metal呀！！」
睇完冇乜講，因為冇乜留心睇。睇果陣，
「傾緊正經野嘛！」
劉Sir個電台（呵呵），行動進行中。
好耐冇寫野。一來懶，近來成日打機，無聊到上eBay必番ｄ舊dos game黎玩。二來，屋企部機中毒死左，整番好install番個Windows，要裝番勁大量driver＆software，個Windows全新都可以有壞file好多野入唔到做唔到咁抵死，部野行得勁慢，搞左幾晚都未整番好晒。分分鐘搞一大輪，發現部機再format得，甚至死得換得了。
「麻叉煩。」
同埋，
「繼續搞正經野。」
好似真係越黎越認真添。今個禮拜六晚就知咩事。雖然而家大家傾左咁多，到時可能一個都冇出現，連各位搞手＆主持都唔見人。
「冇錯，劉Sir一定會係第一個閃，你放心。」
HORSE The Band Live in Hong Kong
「唔夠喉？29/3星期六仲有！」
「FROM THIS DAY重臨香江！」
復活節假最後一日，節目自然係睇電視。因為，就係咁得閒。唯一「忙」，係琴晚收左舖返到屋企，去到門口入緊屋之際，收到電話，無聊到兜轉頭搭返車出皆旺開門等，兩個馬來西亞妹妹仔，因為就走又要買碟，既已經少生意，勉為其難出去應酬埋佢地。兩位妹妹仔非常後悔點解唔早ｄ搵劉Sir：
「鵝地去HMV埋PARADISE LOST申疊，$155！」
「金貴！鵝地TRHK $115刀伍細！$95度得！」
黎TRHK買三隻，計番兩隻差唔多等於HMV一隻。
「金尼地尤去HMV？」
「兮HMV個sales驕餓地禮TRHK假！」
咁過癮？HMV都有內鬼？跟住仲有馬來西亞metal友越洋來電吹水，吹得太開心，俾現場妹妹仔搶走部機，因為
「顛華揮龜！厘地中容屙個顛娃講金耐！」
今個復活節就係咁過癮。四日黎冇乜客冇乜生意，而當中超過一半，都係做外國人生意，因為「遊客黎香港專誠買碟」、「假期消費嘛！」香港是沒有這回事的。假唔假期都不會消費，在metal上。所以，咁得閒，睇電視好過啦！
今集大家期待已久，就係講metal。不過主要講係源頭，頭半個鐘基本上只講英國幾隊：BLACK SABBATH、DEEP PURPLE、JUDAS PRIEST、IRON MAIDEN，同Ozzy Osbourne。睇完，領悟到的話，應該會知道點解人人都話BLACK SABBATH係萬物之父，你聽緊之所有野都係佢地一手寫出黎，尤其doom metal同gothic metal；點解JUDAS PRIEST永遠係最metal的metal band，"Hell bent for leather"；點解成日話八十年代metal最好聽，Bruce Dickinson講晒你知。明眼人會睇得出有問題：
「英國三大，點解缺一？」
可能編輯係追隨「LED ZEPPELIN非金屬」此另一學說，因為佢地算唔算係heavy metal band，確有好多爭論。係因為個節目係BBC拍，定metal確根深柢固於英國，美國代表最多篇幅得MOTLEY CRUE，同最後搵METALLICA做地下界代表（一面睇一面灰，你會留心的話），老實講唔算太夠喉。只係一個鐘時間，同拍俾大眾睇，冇可能預期到會有《Headbanger's Journey》式學術級數，單當中「Metalhead vs. Al Gore & Co.」一個環節已經唔同級數。
「不過，今集資訊已經非常充裕，可以話每一分每一秒都係必需要知道、唔認得唔識未聽過會『俾人笑』果隻，亦即同《Headbanger's Journey》一樣，係專家必讀秘笈。當然，你只求聽到邊幾隊band，唔介意『識EMPEROR唔識PANTERA』，就唔需要理唔需要睇啦。放心，當今專家世代『俾人笑』之定義已經完全逆轉了，你話識呢ｄ，可能先會俾人笑？」
只係有樣野幾礙眼，點解乜都一定要中文譯名？而家明珠台都唔強求一定要中文，好多時人名同名詞都專出英文，易明白同更加有助認知。睇亞視對白因為內容問題一係亂譯完全偏離原意（好似問候娘親變成你好嗎咁戇居），一係直頭唔譯，講左四五樣野得兩三樣出字幕，較敏感內容索性唔譯，不過今次已經好架喇上一集講punk內容更激更多自我審查例子。應譯果ｄ唔譯，但譯出黎果ｄ，好多因為外行結果搞到好怪，例如「家庭製作」、「微金屬」、「穿得更多街道」、「金屬製品以百黑唱片介紹敲擊金屬」．．．
「張大導！亞視字幕組請唔請part-time？我有興趣自薦！」
最後，唔關個節目事，不過見咁過癮，順便link埋：
雖然一睇就知假，因為首歌咁清聲明顯地係後來加上去，不過，
「理得佢！過癮就得！」
以前完全冇野做，九點幾返到公司連上六七個網再同老細一句拜拜搞掂；跟住慢慢多番野忙，開始日頭做一輪，要到晏晝三四點先至「放工」；今日出奇地忙，突然所有野一次過迫晒埋黎，都冇幾可試過會忙到深切感受唔夠時間做野，連lunch time都唔多得閒果隻。
「某程度上，係上年年尾、今年年頭大陸工運後遺症，一次過走晒人換晒人，結果內部亂到PK。」
個半月後去美國，今日晏晝要過灣仔聽briefing，平時有得出街梗係開心，不過今日反而唔想出，真係多野到做唔晒。公司電腦個Outlook，長久以黎 － 一年以上都有以我效率 － 唔會積存超過十封email。但今日放工時，仲有三四十封，加唔係全部睇過。灰。
個briefing其實冇乜好講，話晒去過兩次美國，年年都係講同一堆野架啦，不過可以當逃避一下現實唔對住公司部電腦。回程選擇搭巴士，會展行去地鐵站都兩個幾字啦，仲要冇得坐喎全程地鐵又要迫餐死，坐巴士慢慢躝返過海好過啦舒舒服服反正大把時間。亦終於有時間摷出黎睇睇，拎左好耐都未揭過的最新一期《紙談音樂》：
見到AUDIOTRAFFIC做封面都幾意外。可想而知佢地而家多麼的紅。內容亦越來越偏向indie化，所以睇得開心，或者主流真係已經過度失色，近幾個月本為獨立之音樂同單位，聲勢確係以前冇可能達到。只係AUDIOTRAFFIC訪問中，有以下一世：
「有說美國搖滾樂隊AUDIOSLAVE的名字是因為傾慕AUDIOTRAFFIC而命名，然而其實是沒有關係的。」
這見解非常嚴重的港式層面。我笑了。同再加商品化。只係，好睇就係好睇。
「同四月就會出精裝版季刊，包括頭六期全部內容及大量unreleased materials。」
另外，半個月前十五號上朗豪坊拎《re:spect》時，未準時出書，反而有得拎呢本：
一本免費外國音樂雜誌，但當然唔係一般質素，紙質加印刷超精美，仲要厚，多圖多字睇到你死，假如你會／肯睇英文的話。睇開外國雜誌都知，內容可以多元化到你唔信，就算你有野唔鍾意唔係你杯茶，揭下揭下總會有（少少）鍾意睇或有興趣睇。今期專題係二十大娛樂界醜聞。當然係外國大事為主，但出奇地劉嘉玲都會有份上榜。
「閃卡事件呢？」
係冇的。雖然香港人睇得好高興覺得好大件事，但其實日本同外國呢ｄ野屬於平常碎料，正如間唔中小報新聞狗仔隊都會影到甜相，或者摷到邊個明星未成名前ｄ甜料。
「廿大醜聞其他十九單係乜？自己拎本睇囉，仲搵到的話！不過我去拎時，係多貨到點睇都派唔晒！當然，你願睇英文先好啦！我就嫌太雜同太大路！」
「佢地乜料？」
「我睇過最佳live band之一！」