八個鐘後就開波。估下我而家做乜？頹？唔係，「實習前最後一頹」已經於四月八日零時零分正式結束。「噉到底你而家做緊乜？」答案就係：
寫應徵信搵暑期工
係呀而家仲敢噉玩你話點死！GS教案差最後兩堂冇咩大問題，英文就巧遇叻姐大病淨係寫左第一堂，我都唔知八個鐘之後會點。「好開始」。
俾我發現到一個無敵暑期Full-Time-Part-Time Job：
一至五 朝早西灣河搞興趣小組 晏晝柴灣教靚仔 夜晚林Jr補習
星期六 朝早西灣河搞興趣小組 晏晝教珠算 夜晚嘆世界
係完美不過唔會噉玩。一來柴灣份工五條一個鐘真係度過龍，二來係暑假應該要嘆嘆，三來搵錢夠買碟就夠我冇咁戇九。
為搵工修修個履歷，再一次印證一句成日講之說話：
「我搵野做永遠都唔會靠我個成績，而係靠我份履歷。」
係實習不過唔使教，呢幾日淨係觀課教就係下星期之事。英文個教案度生度死度到走左堂都唔知，點知個教案 冇用。因為個程度實在太高。係呀原來我地每堂淨係要教幾個字仲要係書入邊ｄ字就夠唔使搞咁多野。
睇第一堂就知而家個教育真係極無聊。英文唔教得文法，Tense你會點教？連個阿Sir都話唔知。雙語教學的確係無敵，解字快又可以同靚仔吹水，不過直到畢業前都與我無關因為無論班友點唔掂我都一定要全英文教。
「今天只是實習的第二天，劉義已經非常的頹（形容詞）了。當在第四節看完當日最後一課後，回到休息室便立即開始頹（動詞）。雖然還有英文教案要寫、後日GS教書要準備教具還有兼職的工作，但是劉義只是攤在梳化上，報紙架上的六份報紙每一份都讀過了。雖然被其他組員－特別是他的兩個協教Partner－怒啤，但是直到午飯時間前他仍然一動不動。『一日不吃飯，一日不做事，方為至頹（名詞）也。』」
「你果然是一個名不虛傳的懶人。」劉義的Partner茵姐說。「請不要把『懶』這個字加在我Year Two頹霸身上，這一個字貶低了我。懶人最少都會意識到自己有工作要做，我可是連挪動身子的意識都沒有呢！」
英文唔教得Grammar，你會點教過去式？
"Now I am old. I was young in 1930."
成堂就剩係可以不停重複類似例句，學生冇轉時間式就提佢"I 'WAS' XXX in 1930."。唔可以教文法，咪唯有噉教囉。班靚仔會明你講緊乜咩？睇到落堂我都唔覺佢地知發生緊咩事囉。好似你要教靚仔串字但係唔俾佢識廿六個英文字母噉。
ETV，大家都知係乜。呢ｄ粵／外語殘片雖然俾人媽到七彩，但係到而家都仲做緊。唔係話佢拍得唔好查實係唔錯忝，不過當班靚仔一面睇一面「嘩！搵個肥婆黎跳舞！好核突呀！」「車！咁白痴架！」「好戇居呀哈哈哈∼∼∼」班人笑多過睇，呢三個字都唔知有冇學到野。大家都明點解香港九成中小學多年前已經唾棄教育電視啦。唯一仲有人唔明就係 點解而家仲會播。
「而家仲好早咋喎！做乜咁早番到黎學校呀？」「我要早ｄ番黎罰企呀。」
「做乜唔同其他同學玩呀？」「因為之前欠交功課所以先生罰我唔准同其他同學講野。」「但係你而家交番齊功課嘛。」「係交番齊但係先生話都要繼續罰喎。」唔好問我我都唔知呢間咩學校。
小息完集隊，有班細路排隊時玩，俾個老Miss捉出黎：「垃圾黎架你！」「上年讀一年級，今年又係讀一年級，而家都未識排隊！冇用架你！」如果我係條靚仔，我會當面小番個先生，「你唔尊重我我都冇必要尊重你。」跟住個家長即刻申請退學，同提醒其他家長「呢間學校就係噉樣，你千祈唔好俾你個仔入。」
是日要聞：廿五歲女小學教師燒炭自殺身亡
先生自殺都唔係咩「新」聞啦，年中都見唔少。想解決呢個問題，方法有兩個：
１．工作量不變，薪酬提高５０％
２．薪酬不變，工作量減少５０％
但係大家都知呢兩個方案係冇可能成真，所以只係剩番最後兩條出路：
１．自殺死
２．做死
"What's the matter?"
點解？人人都知係「咩事？」好簡單。唔准用中文你會點教？個阿Sir做戲話自己邊忽有事，另一條友問佢"What's the matter?"搞左成個字，班靚仔先知講緊乜。不過似乎佢地係當左"What's the matter?" = "I am hurt."囉。呢ｄ英文口頭句直接講中文解釋就搞掂又一定會明，而家夾硬將簡單野複雜化，所以話香港教育根本就係自作孽。唔好賴師資住，個制度都搞唔好俾個教育家教都未必教得掂啦。
今日係「真．第一教」。「教成點？」我話你知，你點都想像唔到係點。呢野第一教最特別之處就係 冇野特別，咪又係入班房就講夠鐘就落堂？不如而家就俾我入職啦反正兩年之後之「畢業第一教」都會同呢堂九成一樣，剩番一成就係班學生唔同。
大佬，你講得一ｄ都冇錯。之前度教案整教具做到死，點知到正場時發生ｄ野根本就係另一套戲教具都冇用。我ｄ組員下星期開始教問我點算，我都係贈呢句：
開始實習之後，對於自己生活比其他人有規律得多感到好自豪。我永遠都係最準時放工之人，唔似得其他組員日日都四點幾先走。
是日重點：Elevation 2001: U2 Live in Boston
幾耐冇睇過電視呢？我都唔記得。不過今次不容錯失，U2喎。買DVD成三舊，而家唔使錢仲唔仆到去睇咩。
「U2係乜？」唔係賣衫架小朋友。呢隊野係愛爾蘭國寶級勁band之一，個主唱仲去過聯合國、白宮同微軟傾世界局勢同國際問題架。
今個星期除左我尋日教一堂，大家都剩係觀課。可能就係因為咁得閒，大家都悶到癲左，用微波爐叮蘋果玩自製「蘋果批走批」。好在下星期就開始教，如果唔係下次係用冷氣機雪雪糕。
改簿完全係樂趣，睇完班靚仔ｄ字立即覺得自己手字原來係好靚。有條細路將一個格間開做兩格寫兩個字。有條細路ｄ字全部都係由右下四十五度斜向左上，你會以為佢寫緊福字揮春。有ｄ學生你睇到佢手字就知道佢係畫抽象畫方面好有潛質，困佢係呢間學校簡直係香港藝術界之悲哀。「噉你咪改餐死？」噉又唔係，改簿之責任我掟左俾我拍檔茵姐負責，我工作就係旁觀同笑。
是日要聞：小學教師八樓墜下危殆
繼前日後又一件。「學童自殺潮」原來已經Out左，新興係「先生自殺潮」。
大佬，各位損友，各位「教」徒，唔使再問我「你幾時死呀？」因為答案就係「你死我都未死！」「點解？」唔好問我，想知的話請搵我發言人 《星島日報》社評人甲：
「一些本來已經尸位素餐的老師，習慣了渾渾噩噩的教學生涯，懶得為了教學煩惱而輕生。所以通常自殺的，都是工作表現優秀、曾獲傑出教師獎、能者多勞的教師．．．」
是日重點：DSC First Live 2002
DSC係香港最強技術派樂隊之一，仲有其他香港地下樂隊，不容錯失。想係香港聽古典同藝術以外之高水準音樂，除左地下冇第二個選擇。不過最重點係 我冇去到。林Jr就考試，雖然只係期中試但係前兩次考試都肥大半，如果今次唔全部合格就學期試點努力都冇用，我亦都可以提早退休。為左條肥仔，更重要就係為左份工，算啦。上年到今年都唔知錯失過幾多次勁騷，多一次唔多少一次唔少。
是日節目：吹水
Ｎ年前做左份問卷，估唔到今日會俾個保險經紀搵番出黎傾。感想有五。
「所以阿Sir我成日都叫你地睇多ｄ報紙。」
呢句阿Sir成日講。但係「言教不及身教」，我決定「身體力行」，做個榜樣俾大家「以人為鏡」。請閱：
今期流行疾病：運算能力障礙或失算症(Dyscalculia)
此遺傳病之患者，天生會在理解數字與運算方面有極大困難，輕者於學習數學時有一定程度之障礙，嚴重的話可以連基本的運算都應付不到。「言教不及身教」，第時我教靚仔呢種病時，我用我呢個活樣板佢地一定會學得好。
就算點唔準備、就算完全咩都唔理、就算勁耐冇講過英文今日就要教、就算教案都唔拎，入到班房，所有事都自然而然發生。無論我點唔妥教院好，教院點唔妥我都好，毫無疑問，我都一定係要做教書佬。
下星期就考試，條肥仔仲可以今日去買陀螺番黎玩。完全係同我一樣，「唔識死」。英默六版書，讀句子一定要一個個字噉讀，似默詞語多過默句子噉先肯默同默到，完全係強。更強就係半粒鐘溫六版書都可以錯成廿七個字，而家我補習真係為賺錢而唔係有教無類。
真係「問題天天都多。」
處境：英文堂教過去式
條件一：唔教得文法 條件二：唔用得中文 條件三：學生英文程度奇低
結果：
唔使我講大家都估到。Verb係咩都唔知，用成個字解都失敗，結果都要用中文講「Verb即係動詞。記住過去式時動詞加'ed'。」剩係呢野都破晒"NO GRAMMAR"同"NO CHINESE"兩戒。不過唔係噉點教到呢班低水平學生過去式呢？
落堂之後，「其實你地明唔明我教乜？」當然唔明。但係佢地話有個方法可以令到佢地一定明，就係「用中文教啦。」呢樣野真係學生都知。一方面唔俾教師就學生程度定教學方式搞到「教師為本」，一方面又要教師做到「學生為本」盡量以學生為中心設計教學，結果係「自相矛盾」加「搵笨為本」。
同學生改簿真係正，剩係改疊常識作業都已經笑到仆街，精彩之處簡直不能盡錄。好在間休息室隔音強，如果唔係我地就笑到隔離教員室成班人入黎睇下同感受一下何謂「新一代教師」，而校長亦會過黎恭喜我成為「史上最年青退休教師」。
呢排老師興俾星。「頹廢之星」當然係我冇人可以搶我粒星。改完疊簿之後，多左好多「創意之星」、「簡潔之星」、「慳皮之星」、「印象之星」、「呢啡之星」．．．一時滿天星宿。
「頹廢運動」經我一手推動之下，已經略有所成。大家由「積極面對每日課堂」，變成「過得一日得一日到時先算。」是日名句：
「聽日唔使教英文。教少一日，我個心就開多一日，個人就頹多一日。」
係我呢個偽組長帶領下，我地「陳呂重德戰隊」之生活越黎越有規律，今日六位隊員一齊準時三點八閃出校門。冇錯又係「言教不及身教」呢句教育界名言，我地先生要做個好榜樣俾學生睇先得嘛。
「我對你有信心呀。」
林Sir同我講。但係我冇信心。今日老豆老母都唔係屋企，即刻幾乎堂都唔上淨係玩陀螺，到我入門口一刻先開始執野準備。跟住教成點？
「心灰意冷，不予置評。」
世界真細小。原來上星期六搵我「傾生意」個經紀剛剛之前一日星期五推廣過俾陳殷兄，而陳殷又「順手」推薦左我俾個經紀。世界真細小。
是日得一堂，不過要應付今週最邪惡工作：「填表」又要填校內工作、又要寫教學進度，加埋其他立立雜雜，噉又頹少幾個鐘。
是日要聞：「陳奕迅下體重創」
我係度唔係同大家講呢單新聞。
Ｎ日前要聞：謝霆鋒抄車
我亦都唔係同大家講呢單野。
兩件事有一個共通點，就係 都係《蘋果》頭版。點睇都係娛樂新聞，點解會變左做港聞頭條？
實習其中一樣福利就係每日都有《明報》同《星島》睇。掟走娛樂版唔睇，可能整體黎講《星島》都唔及《蘋果》，但係港聞評論就寫得較好。而且《星島》比較有「新聞操守」，起碼唔會有「娛樂性頭條」同埋「跳樓連環圖」先。
傳聞有人實習左幾日就退學。好事黎丫，早日解脫，同埋好過俾人昆多兩年學費兩年光陰但係冇得畢業。
GS話咁快就肥左兩個。肥之原因都係「天時．地利．人不和」。係呀我係覺得唔公平架，俾你抽正班傻仔或者癲仔你就真係仆街，但係 冇計，教啦。下星期到我。
「識死」呢兩個字條肥仔終於知道點寫，突然間好自發好勤力。不過只係維持左半個鐘光景之後就開始頹，由兩分鐘做八條數回歸到兩分半一條之「正常速度」。唔知呀我淨係負責接Order做野同收錢其他野一律與我無關。
一萬二千蚊，可以做ｄ乜？如果想夾Band的話，粗粗地都可以買到
（電結他乙枝＋AMP）＋（BASS乙枝＋AMP）＋（鼓乙套＋鼓棍）＝最基本打Band套裝乙套
不過我冇拎到呢萬二黎打Band，我用左黎聽人打Band。今日買到第一百隻碟。可能你都有百幾隻碟，但係「夾埋都唔使幾千蚊。」冇計，係香港非主流音樂ｄ碟嚴重供不應求平極都百幾，又冇乜邊度有得買，仲要一定唔會有翻版。所以一直都對香港樂壇同唱片市場絕望。大家繼續聽Twins同陳冠希啦唔使理我。
是日重點：視導
茵姐好榮幸成為「陳呂重德戰隊」第一個俾導師觀課之幸福兒。再次「天時．地利．人不和」。不過今次個「人」就人人有份，包括有：
茵姐：尋晚怯到今朝，準備充足都係失準。「英格蘭即係蘇格蘭」，死未？講左一大輪，坐最前排條靚仔嗌「我聽唔到你講咩呀Miss！」「茵姐把聲太細」同「學生把聲太大」自己揀個。
學生：班友係醒不過醒過頭見自己識晒就作反，七個字堂嘈足五個字。平日都冇咁嚴重係今日黎料先噉玩法，茵姐請你節哀順變。
我：冇呀成堂我乜都冇做過，視導嘛。不過少左我喝住班學生噉就搞掂。Sor囉茵姐。
不過最重點都仲未到。本來就係剛剛Marginal一步定生死，但係眼濕濕之茵姐用左半個鐘不斷為自己辯護，終於令到自己邊緣合格。不過其中一個原因係：
「你都見啦我個時間表已經滿晒，肥左你的話我都冇時間黎睇多次，所以俾你合格啦．．．」
黎到呢刻本應皆大歡喜，點知茵姐再死纏「雖然係合格但係不如你再黎睇我一次啦，今年教成噉下年我唔知點算架嗚嗚嗚∼∼∼」吹脹囉神又佢鬼又佢。
跟住冇晒時間唔可以再睇第二次，即係就算下星期到視導我時我成堂一句野都唔講都唔肥得我啦？不過我又唔會噉做，我成日都講：
「我份人係頹，不過門面野呢不嬲都做到好足．．．」
茵姐其中一個肥佬原因係用唔夠「概念教學法」。咩黎？冇人知。但係原來上過上學期某課程後我地係「應該」知道同埋用到喎。不過唔緊要個導師睇左十幾個人全部都同我地一樣，佢都明呢個係教院制度同教學上之錯誤。但係佢話佢都冇計，就正如下年佢可唔可以爭取到續約一樣。
原來肥人標準教得多定少管得好定差都係次要，主菜係點教。今堂阿Sir大讚個「一分鐘環遊世界」仲有之前睇過都話天下無敵之「小明的一天」，其實都係我度出黎。根據「頹廢定律：頹人多廢話」，做親我學生都一定會好開心。可惜阿Sir睇唔到。你早ｄ黎咪好囉我最精彩ｄ野係晒前邊。茵姐另一個合格原因係「準備充足」、「PowerPoint製作精美」，噉我呢ｄ玩開「一筆走天涯」之教俠咪死得？
對唔住叻姐，因為顧住聽茵姐個視導後檢討冇黎到英文堂幫你做助教，搞到你成堂一塌糊塗一版書都教唔到。不過唔緊要呢野係我自作孽，聽日到我俾顧問教師視導，而家要諗諗聽日點樣執番今日教剩之半課書之餘做埋本來計劃好個總結複習。似乎今晚要放棄一舊黎保住聽朝。
平時三點八走已經算早，不過今日史上最強唔止係走仲追到三點八班車，四點已經家門出現。搞掂晒再搖個鈴，「乜咁慘仲係學校呀我而家係屋企嘆緊報紙喎．．．」
係架沿途都有好多先生啤住架，因為我今日仲成為左全校第一個離校教職員。不過想串我前，請先茗報。
是日重點：視導
冇錯又係視導不過今次係我。經過呢堂發覺我同我拍檔原來係好難合作愉快。
處境：係顧問教師觀課之情況下教一班只有三四個人「識英文」之低水平班
我： 教育方針：學生太差，拔尖為主 做事態度：過骨為主，搞掂就算
叻姐： 教育方針：唔理優劣，有教無類 做事態度：全力以赴，力趨完美
結果：下半場三個字俾叻姐搶左去教（記住今堂係我俾人視導喎）
就係因為大家個心態同態度都咁唔同，所以次次落堂我都係咁合皮，叻姐就日日都喊噉口落番黎。
先有大佬，今次到我。就算叻姐今日唔使教到喊噉口，落番休息室都有得喊，因為 俾我串到喊。就「我視導堂見我教得唔夠好就幫我教埋」串番幾野，噉就喊。灰。一灰：唔係灰搞喊人，係灰教院冇咩人「玩得起」。二灰：串足半個鐘可以野野都唔同我都覺自己幾有創意，但係呢種「創意」點掂都好，係教院都係冇咩用武之地。
可能因為天氣回寒風高物燥，呢幾日大家都躁左，講教案講到好似鬧交噉。實習左兩個星期，「陳呂重德戰隊」六份五已經釋放出獸性，係淨番我仍然保留住人性。所以同我合作一定好開心，做到點折墮都好，同我呢條頹友一齊都可以笑看風雲。
今堂補習真係絕。下星期一就考試條肥仔到今日都仍然可以咩都唔理，唔准一邊補習一邊食飯就喊到陷家產噉款，搞左半個鐘都仲未正式上到堂。真係俾條肥仔煩到寧願今堂教得幾個字唔收錢算。完全係為左自己少少利益而累人累己浪費大家時間金錢，將來ｄ細路尤其是呢種獨仔都唔知點教。
「冇理由！劉義冇可能唔黎上我堂！」
今朝九點半上堂甘志強見唔到我時大叫。但係呢個係事實，認命啦甘志強。呢個時間想見到我？黎我睡房啦哈哈哈．．．
如果唔係另外有野做，真係走埋十一點堂算數。GS視導雖然只係得PASS同FAIL，但係有ｄ人因為做得太好所以夾硬加多個"DISTINCTION"。聽完佢地講點教之後得一句：「時不我予。」我好有信心如果阿Sir之前黎睇我個「小明的一天」，我一定會輕易地拎到Distinction。如果我拎唔到就只有一個原因：「包裝唔夠人好。」教具呢樣野，我不嬲都唔好。我呢ｄ舊派始終認為身為「教俠」，「紅白雙筆」就夠唔使搞咁多。不過潮流興「教育改革」凡事都要花臣為主，就算我做得點好似乎都會俾人小「教得唔夠花巧。」
邊都好，而家講咩都冇用，「小明的一天」Distinction就冇，淨係得阿Sir一句：「怪人諗既野係零舍怪過人。」我唔知呢句彈定讚，淨係知道對我星期一視導冇咩幫助，同埋我要認命。不過阿Sir就真係好鍾意我ｄIDEA，或者遲ｄ整番個「一分鐘系列」同埋「小明教育套裝」。
醜婦終需見家翁，係時候面對賴柏生。
「對唔住賴SIR，我地當初都估唔到呢幾個月工作量咁大，所以個PowerPoint．．．」
「算啦．．．呢個已經成為過去．．．」
我都唔知有咩好講。呢ｄ情況下沉默是金。不過最緊要都係見唔到甘志強，身為ACEI高層又坐賴柏生隔離房，噉都撞唔到絕對符碌，如果唔係又要聽佢歇斯底里
「劉義！點解！！點解你今朝唔上我堂！！！」
話說有日導師到某低Band小學視導，當佢同兩位學員步入課室，第一句迎接佢地之說話係：
「Ｘ你老母！」
不過相比之下呢野算係碎料。
「呢位同學，你簡直係不知所謂！知唔知不知所謂點寫呀？」
「MISS，噉你又知唔知個死字點寫呀？」
今日咩日子？突然間俾咁多人追債？
珠算：暑假時間表 ＋ 睇模擬教學 ＋ 考試
自己教院時間表都定唔到，試都未知幾時考，你個珠算叫我搞呢ｄ野？而家自己日日都有得教，反而叫我睇番人地扮教書，都幾有趣。更有趣就係規定呢三樣野一定要下星期內搞掂。
RA：稅單
哈哈我今個月都未出糧，糧單都冇你叫我搞稅單？又係有趣。
ELE：「走堂過多，請速聯絡」
好野終於殺到埋身。唔知佢地會點小我「因為ELE由星期二調左去星期五同我RA撞時間」呢個缺席原因呢？不過其實佢地最重點都係叫我「唔好因為唔夠出席率肥硬而唔考好跟住個試」。又要肥我，又要我考個好成績黎保住你地ELE個聲譽，絕對有趣。
是日重點：視導
「你今堂前半做得好好，ｄ問題問得唔錯．．．」
阿Sir第一句係噉。你估我咩Grade？DIstinction還是Marginal？唔好意思，我同其他組員（可能仲有你）都估錯晒。係TOTAL FAIL。雖然前半評價係好高，但係同後半比根本係兩個極端，一到小組活動就天堂變地獄。冇計班學生係我地黎實習之前根本就從來－冇錯係從來－冇玩過小組活動。但係我地阿Sir話要睇分組活動，因為「我唔信用腦力震盪可以教成堂書」，結果就同掟部PS入班房一樣，班學生係好肯討論不過就傾到番唔到黎。不過你班靚仔唔合作即係想同歸於盡，聽日要一次過寫兩日詞語時唔好喊住搵我。
之前講到點Full點Full話廢事肥人，而家為左「令到我小組教學方面可以有所進步」而專登肥左我令到可以黎睇多次。阿Sir你對我期望咁高又噉樣犧牲自己照我，專登為睇多我一次而肥我，直頭令我滾動。
如果我好似茵姐上次噉一面講一面眼濕濕，講講下又停番十幾秒，噉我就可以拉番個Marginal Pass番黎。睇番份報告，我一半合格一Part肥另外全部Marginal就肥，上次茵姐得一兩個合格其餘全部Marginal就合格，點計都唔明。阿Sir解話，原來我地教師要做「全人」：
「我唔使你每方面都做到好好，唔使你小組活動一定要做到好似你教學時一樣咁好，不過你最少都要俾到人睇，你係每一瓣都掂．．．」
點都唔明點解阿Sir話「腦力震盪唔可以教成堂」，冇小組活動就可以叫做「堂」。阿Sir再幫我解話：
「其實呢我地就希望你地可以做俾而家ｄ教師睇，其實小組活動係平日教學中係可行，而家你地搞成噉，佢地就更加以為呢樣野行唔通，噉第時上堂就唔會做小組活動．．．」
所以幾時都話教院四萬二學費幾時都咁抵。原來我地除左做學徒，仲可以免費擔任教育學院宣傳大使。宣傳教院最重要，你教唔掂你死你事。
一個頹英文教師、一個勤英文教師、一班英文超廢小三生，等於次次教完出番黎一個笑一個喊。而家發覺根本上堂講咩、點講法、講得點簡單、課堂活動點有創意都冇用，因為除左某幾個之外全世界都唔會知發生咩事。結果每一堂教得最順利、班學生聽得最明白清楚之時，就係落堂後之「究極一分鐘雞精班」。而家上三十五分鐘堂就係為左等落堂用中文解番自己前七個字狗嗡過ｄ乜。絕對「本末倒置」。
今日已經去到第三堂教過去式，叻姐都灰喇，差唔多成堂都用中文算數。即係回歸番到以前「有now就is am are加ing！見到yesterday、last、before記住verb加ed！」呢野直情係時光倒流。但係更死就係中文解成堂佢地都唔明。
聽日到顧問教師視導，英文又唔知點樣「簡單ｄ教」，今晚唔好玩野喇。又跌一舊。肥仔，聽日考英文，阿Sir今晚唔出現，自己生性喇．．．
「我唔信腦力震盪可以教成堂！」「為左宣傳教院，你一定要玩多ｄ小組活動！」
就阿Sir呢兩句，令我陷入萬劫不復之地。前兩堂玩處境加腦力震盪成班都唔知幾合皮，而家又話呢ｄ唔係「正確教學法」「糾正」番我，結果班學生一榻糊塗就肥我，即時吹脹。我係玩處境教學法架喇，但係我唔明點解一定要將套《真情》改寫成《人生交叉點》先至算「正確」。基本上個教案我半個鐘唔使就可以度晒，而家係度完出黎之後用多幾個鐘黎推翻自己剛剛做好ｄ野。
咦乜唔係話「學生為本」按學生喜好同能力定教學法咩？點解而家變左係個先生「懶係為學生好」唔理有冇用只顧多活動表面為創新實則為交差之「偽．學生為本」？
係呀又係「過左海就係神仙」。各位成仙人士請你地盡情享受唔使再諗活動跟住日子淨係靠講就夠之天上生活啦。我呢ｄ凡人仍然要為應酬阿Sir改過晒成個「錯誤」教學方案。
今日變左「公仔日」。我同茵姐帶左兩大隻公仔番學校，仲未計其他衫褲。當然帶番黎唔係玩，係用黎做處境教學，但係睇番茵姐係休息室內之時間一定係攬住隻野唔放，真係會搞到其他先生以為我地真係得閒到爆，所以而家當正黎渡假拎埋隻野番黎玩。
班粉腸明玩野。就噉睇你係完全唔會相信呢堂班學生同尋日堂班係同一堆人。根本就係豺狼同綿羊之別，今堂點玩都得小組活動時點嘈都唔及琴日一半。上次茵姐又係噉樣中招。睇怕我地要拍番餅帶俾鄧權隱睇先可以俾佢知道事實真相。
好野我地英文正式回歸到「大英殖民地教學法」喇。叻姐由開頭「全英」到後來「幾句英一句中」到而家「全中英夾雜」，今堂落堂終於可以兩個人都笑住走。呢ｄ學生係噉先至學得到，可惜到而家先噉樣已經太遲。希望我地走左之後原任阿Sir可以幫我地補番隻鑊。
今堂叻姐同班學生異常合皮，除左因為用番「大英殖民地教學法」雙語教學外，叻姐仲玩左佢夢寐以求之「國際學校教學法」（簡單黎講即係「幼稚園唱遊教英文法」）。係好玩加好有效，但係都幾灰。三年級但係二年級英文水平都唔知有冇，結果要用番呢個方法教佢地英文。如果可以俾一早就幫佢地打好基礎，而家我地就唔使行番回頭路。
丫我發覺我同林Jr補習絕對係冇錯。條肥仔同我一樣，除左假期之外，全年玩得最多嘆得最舒服之日子就係考試。聽日考數學，今日可以乜都唔溫咩都唔做，連阿Sir指住黎鬧都唔肯做野，見到噉情形我就不斷噉警惕自己：「我以前都係咁頹不過似乎都冇去到噉盡。由今日開始我要更加頹，彌補番之前之未頹。」
灰。鄧權隱成日都話人咩咩咩唔好又乜都Ban又猛要你加乜加盛，教得樣衰少少就肥Ｑ你；人地阿Sir頹到仆街搞野少肥人更少。為左專登俾機會我做好ｄ就肥左我先等自己可以黎睇多次，但係下次觀課係我最後一堂即係一係風光一係大葬；人地阿Sir都專登睇多次，不過起碼俾個合格你先保險ｄ。所以成日都話，「跟到個好教授好過揀到科好科。」
係呀鄧權隱肥我之原因就係為左「黎睇多我一次」，我到而家都唔明，點解唔可以先俾我合格再黎睇？係囉因為佢想「送錢入我袋」囉。如果唔係噉諗法我驚當其時我會即場爆粗小狗鄧權隱，係學校入邊校長面前都係噉話。
冇錯，香港教育需要改革。但係，唔係而家呢個所謂「教學法」改革。其中一個肥個案（唔係我，雖然我都係類似）就係班小三根本未試過分組討論、唔知咩係「分組討論」，你叫佢地做呢樣野？Inactive同Hyper-active自己揀個。係想改就應該改晒成個體制叫人慢慢接受，而唔係突然標ｄ新野出黎迫人受啦。完全係同「中一至中三只准中文教中四開始一定要轉用英文」異曲同工，大家都咁戇居。
成日淨係得一堂仲要係ETV堂，終於有得頹番下。叻姐聽日就視導，由今朝開始已經慄到痺，怯到夜晚補習推左佢都唔敢去，仲由番學到放學都諗唔到個教案。「緊張嘛！」其他人都係黎緊兩日視導，今日度教案度到一係呆滯一係喊噉口，全日係得我呢個「肥人」「笑得出」。點解？就正如阿Sir成日講：「我係頹，不過頹得有道理。」與其成日顧住自己做得好唔好合唔合格，顧到自己都做唔野，不如索性咩都唔好理。船到橋頭自然直，直唔到大不了撞上去，有咩好驚？
原來我同叻姐一樣，大家做補習都唔係為補習。我係做"Decadence Assurer"，係條頹仔身上得到啟示，提點自己要頹番ｄ以彌補自己唔夠頹之童年；叻姐係做"Pride Builder"，得閒就同條係加拿大生活之靚仔吹吹英文，等佢以為佢口英文仲勁過香港ｄ英文先生，從而建立起正面之個人形象同自信。
是日重點： HKBU Sound Elite
琴晚夏韶聲，今晚又有Band Show，仲要可以免費入場。世事真完美。但係你都知道入左教院之後，「完美」呢樣野之出現率係幾近零。冇錯，雖然條肥仔讀得掂唔使補，但係聽日叻姐視導，睇佢今日慄成噉個款，我知道佢今晚一定會打黎要我幫佢諗。茵姐聽日又要視導，噉就掟埋堂GS俾我搞掂。本來都冇咩問題佢有晒教案同圖片做PowerPoint，點知撞正「史上最巧合」部機今日先中毒，保得住ｄ功課同教案已經符碌，仲點會得閒理我？阿Sam少又急Call，「喂我聽日教食物教案都未寫趕唔切你幫我整張工作紙！」都冇咩問題，反正我聽日都係教同一個課題可以一石二鳥。問題呢？「小你！幫我諗埋啦！」得喇。想去睇Band Show？得，如果我放學之後係七點前（有可能）搞掂晒呢三樣野的話．．．
除左呢ｄ野之外，其實今晚仲有一樣工作，就係 練 結 他，因為聽日 有 騷 出！
是日金曲："WHAT'S THE WEATHER LIKE TODAY?"
今日出騷。學左一年結他終於有一番作為。唔好以為咩勁野，只不過係今日叻姐英文視導堂，我幫佢自彈自唱教英文。因為叻姐太睇重呢隻歌，番到學校就係噉唱唱到放學，結果呢隻歌就變成我地組歌，個個人都係一得閒就唱一得閒就唱．．．完全係嚇親街坊。因為呢個教法效果唔錯，聽日到我做正教時我都會繼續唱歌教英文，我仲會填新詞忝。似乎即係各位隊員之「失控歌唱症」下星期前都只會繼續惡化唔會好得番。
由今日開始直到實習完，我都會充滿歐瑞強Feel，因為每日我都會帶埋支結他番學。
甘志強個人係頹ｄ，但係原來都幾掂，仲有好多水吹。不過條友又真係疑心重左ｄ。
「挑戰警權，我試過！半夜三更行街俾個差佬查身分證．我唔俾佢查。根據警員條例，佢要查身分證我地可以要求佢俾到足夠同合理理由，解釋點解要查我身份證。條友冇野講。跟住我問佢拎警員證，佢又唔俾。我地仲可以問佢警員編號同警區，之後打電話去警局證實佢係咪真係差人。條友又唔肯俾ｄ資料我。最後佢都嫌我煩算數，放我走唔查我身分證．．．」
「你去做針灸？你又知個醫師合資格？．．．有董建華題字？你又知真係佢寫？」
可能講講下就會去到
「你又知教院真係換校長？可能呢個只係煙幕，許美德仲係幕後玩家係度垂簾聽政？」
「你又知我真係甘志強？可能我係鄧權隱假扮，等你地鬆懈之後肥晒你地？」
「班學生太乖喇！」
無論係平時點壞之學生，一到視導，豺狼都披番塊羊皮上身。不過呢ｄ與我冇關，全部都係其他隊員之遭遇，而家除左我之外人人都過晒海。我班3A到今日都仍然係你有你講佢有佢做，做小組活動即係俾多幾個字佢地自己吹水，有兩個先生都冇可能搞得掂四十個齊心傾偈之學生。其他班ｄ學生寫俾先生ｄ感想，「老師，對不起，我在小組活動時很吵」、「我會專心上老師的課，因為我知道老師教得很努力」。3A班我都廢事叫佢寫，因為我知道佢地寫ｄ野同鄧權隱再肥我時講ｄ野一樣：
「學生唔上堂唔會係因為學生唔合作，而只會係個阿Sir教得唔夠好。」
除左星期三，星期五係每個星期最開心一日，因為成日只係得一堂英文咁大把，仲要又係唱歌學英文，更加開心。成日除左頹之外就係彈結他。好在校長成日失蹤，如果唔係俾佢見到就一定
「你條友噉樣叫實習？我Ｘ．．．」
係唔多鍾意今年實習個所謂「小組教學」 － 根本連ｄ導師甚至教院本身都知呢個「二人教一班」係超廢夾冇用 － 但係有時又真係有番ｄ用。好似今日唱歌學英文，得一條友彈得黎又冇手冇口話俾ｄ靚仔聽佢地要唱ｄ乜，多個助教就可以解決呢個問題。係開心，不過亦都係我最憎小組教學之原因。下年開始我仲可唔可以噉玩？得，如果係去國際學校教的話。
呢個唱歌學英文係幾成功 － 只限某程度。唱左兩堂歌仔之後，而家班靚仔終於記得"sunny","rainy","cloudy"呢ｄ字，但係教左幾堂教到仆街之過去式，就仍然同每一堂一樣，「唔記得左呀阿Sir。」教案入邊有一項叫「學生已有知識」，係3A班呢一項係叫做「學生永冇知識」，每一堂都要再講重頭講過一次。可能真係要每一課、每一個課題都作首歌，班靚仔至會讀到書。
是日精句：「原來電話係用黎傳聲架。」
唔係茵姐你提一提我，我真係以為手提電話係水壺。等我仲一直都咁奇怪，點解ｄ水壺要越出越細，要裝水唔係應該一年比一年大先係咩？唔通發明左「濃縮水」同「水粉」，要飲水時先用水開番稀佢裝入個電話水壺度飲？多謝茵姐一言驚醒夢中人，聽汝一句話勝讀成年書。
我地除左《今天天氣呵呵歌》之外，今日再加多隻《昨天天氣呵呵歌》。各位隊員更況日下，只要係係休息室範圍內班人就會發癲狂唱。全場最正常反而係我呢個病原體。
先前我話「考完試點會有學番！」補習條肥仔唔信，一定要我今晚黎。今晚到左又唔係度去左玩，搞一大輪番左黎，對住我大嗌「考完試點會有學番！」之後猛小。係囉係我錯，「顧客永遠是對的。」結果今堂補習目的係跌一舊黎俾人小。補習補到噉你都咪話唔折墮。
是日重點：「福星又見福星」
探花兄、佛爺，好耐冇見。本應仲有一件，不過呢個講都講到悶，一個字：「算」
今日大家都好清淡，睇佛爺食到要玩「茂發出奇蛋」就知。除左食得清淡，大家生活都好似好清淡。睇黎到暑假先會有番ｄ起色。
某親戚係毫無先兆下過身。是日默哀一天。
「英雄所見略同！你同我睇法完全一樣！」
英文堂視導之後反思，基本上我講ｄ「是堂長處與短處」、「學生秩序與投入程度」同甘志強諗ｄ野係完全相同。之後甘志強大叫。噉即係證明左我係每時每刻都完全清楚自己做緊咩啦。英文俾甘志強捧到天咁高，搞到我有陣時都以為自己係主修英文。
GS顧問老師個評估表終於都出，肥得仲勁過鄧權隱。除左得罪人多之外，仲有另外兩個解釋：
解釋甲：「小組活動」
茵姐同我到今日為止俾人視導左四次，只有佢第一次視導係Full Pass，另一次Marginal Pass，我就兩次都肥。唯一一次Pass到之原因就係該堂冇玩小組活動。「學生為本」定「導師為本」先而家？
解釋乙： 3A
呢兩個字係陳呂重德入邊之解釋係「三年級最難教一班喎！」同埋「有排搞喇你地今次！」所以成日都話「俾你抽正班傻仔或者癲仔你就真係仆街。」
不過點都好，星期四仍然要教。今日我加茵姐兩個人嗌到九彩仍然係搞唔掂。都係一句啦：「掟部PS入班房，你估會點？」點？咪就係阿Sir會話「唔關部PS事喎，你係掂的話呢度變機舖你都控制到佢地架啦。」
始終都係要用到最唔想用一招：罰企。仲要係星期四視導前個小息罰。一罰完就上堂，班友會良心發現定有仇即報我都唔知。我淨係知道我仍然係要為交差掟多部PS入班房。
可能最後我都係會同叻姐所講一樣：
「英文風光，GS大葬。」
是日乃遊戲日。做阿Sir冇得玩要巡場三粒幾鐘，但係可以用「阿Sir」身份威脅學生俾你食野，又有得放半晝，乜都抵番。只不過有一條問題：「乜而家ｄ『遊戲日』唔再係運動會，而真係玩攤位遊戲噉神奇？」
晏晝係我地遊戲日，一干人等去左唱Ｋ。正確ｄ黎講係除左我之外ｄ人去唱，我只係為食飯。是日曲目：
Prelude: Tears in Heaven
Interlude: '90 Medley
Finale: '80 Medley
reprise: 同步過冬
係呀成日就係唱咁多。十二至四包大大碟飯加兩杯野飲每人都只係三條，絕對超值。所以成日話「租間房黎做功課都抵。」而且都廢事唱咁多，成班都係女仲好似平時唱麻甩Ｋ噉玩就死得。同我唱過Ｋｄ人，一係就勁鍾意同我唱，一係就以後都唔想再同我唱，好在今日唔係後者。
大佬，我都明我地呢ｄ另類唱Ｋ人士係好難融入正常社群，但係 冇計啦。我相信係澳洲，你都唔會搵到人接受到你套唱法。番黎啦，你番到黎我同你玩餐飽。
今日阿Sir講俾大家知Bee Gee點樣出道，知多一點點：
係呀勞動節嘛，當然要勞動。聽日就視導仍然係冇咩idea，冇得走啦。不過都可以點幾先起身然後去親戚屋企捉狗搞到勁夜先番，點睇都唔似咁大危機。
係呀隻狗又番左黎我度。今次會寄居幾個月，都幾合皮。見佢番到屋企又係食飽就訓，再睇睇自己，唉。再次推薦各位睇睇「做到隻狗噉」。
係忙到仆街，不過都聽左兩場BEYOND演唱會。雖然已經解散，但係對我黎講佢地仍然係香港地上音樂僅餘「聽得入耳」之幾個／隊人之一。
Live & Basic (1996)
一直抗拒三人時期BEYOND，冇左黃家駒把聲同創作始終係差好多。但係到最後都係買。結果有ｄ後悔，後悔點解唔早ｄ買。少左一個人，多左一份情。有好多歌絕對係冇左黃家駒搞到出黎效果好差，但係就選曲、編曲、技術、現場表現同氣氛，整體黎講的確係非常好色。「BEYOND最出色演唱會之一，表現達國際水準」呢句你一定要信。
Good Time Live Concert (1999)
呢隻買完又係後悔，後悔點解會買。唔係撞到HMV減價先掃的話可能爆多幾句粗。點解BEYOND折墮到唱Medley搞Party？點解可以成日彈甩彈錯同走音？點解條條友都唱到好似就死噉最正反而係個和音？可能班友真係見臨散Band求其整番野屈多筆。
GS又黎視導。風光定大葬？想知聽下阿Sir評語：
「呢條友頭先堂亂黎既！」
阿Sir噉都俾你知到我今堂教ｄ野全部都係即場同教案寫ｄ野完全唔同？
「水就吹得多，書就冇咩教！」
係呀今堂「一筆走天涯」咩教具都冇淨係靠吹，阿Sir都睇化喇小完就算。
雖然仲有大把，但係兩句夠喇。雖然評價係唔錯，但係結果都只係Marginal Pass，仲要係HYPER MARGINAL。阿Sir係唔鍾意人地跟書教同讀課文（「革新派」嘛），但係拉番合格原因之一就係因為讀課文，而篇課文又剛剛係好切合個總結。係幾吹脹。
鄧權隱，睇睇留言板第四十二號留言啦。
今日英文又俾人視導，不過係叻姐唔係我。發生咩事？本來係冇可能會識過去式之3C班，居然講得出yesterday用was，過去式動詞加ed。發生咩事？真係「是日宜視導」。
搞掂晒，不過只係過緊海。GS堂「叫好唔叫座」雖然評價係高但係兩個都係緊緊合格，個原任又話想要呢堂個教案，即係番到屋企要諗番今堂點教法寫番個劇本出黎。咦乜教案唔係寫黎計劃同準備一堂點教咩做乜而家調轉左？聽日堂英文又點？硬係覺得今日堂係佢地迴光返照所以先咁掂，聽日會唔會仲係咁醒？算啦無謂諗相信到時都會係唱歌學英文．．．
終於。噉就最後一日。次次實習到臨走都要破財。陳呂重德戰隊總消費係
（送俾顧問老師同班主任之朱古力）Ｘ十五盒 ＋（送俾全世界之西餅）Ｘ六打
平均消費都差唔多成舊。冇計，「門面野點都要做到足」，雖然做同唔做結果都一樣，班先生照係噉樣講。
今日教成點，已經冇咩意義，因為已經可以「置生死於道外」，睇英文堂搞到好似玩緊遊戲節目就知。課堂以外時間，隨了彈結他就是彈結他。點都嘆埋佢，下星期開始可以忙成點我都唔知。
嘆。唔知。唔寫。
是日全休。此乃「絕頹」。
聽日就番教院，星期三FE星期五TLS下星期一IT，唉。不過，都要頹埋呢個最後一日。
冇咩好講，不過呢句點都要講：