「貴人出門招風雨。」
「柒人呢？」
「柒人出門招風球囉！」
自大暑起，天氣日差，前夕一連幾日橫風橫雨加送雷暴，居然都冇任何風球雨波，到今日生日正日，明明風平浪靜天文台反而話八號。
「係咪咁玩野呀？」
原先的劉Sir誕大典只好就此收皮。公司都唔係話得閒，雖然連續幾星期幾近日日上網渡辰，就係臨到生日突然間成堆野殺埋身，今日本身都唔係話做得晒野，但個天好地地，食完飯天文台已經話三點半前會掛八號，跟住過唔夠兩個字改為「好快就掛」，兩點半未夠已經走左人了。天都知我唔想做野，叫我早ｄ走。這是上送給我的生日禮物。

走人時，公司右面間織衫廠成班師奶仍然努力地織衫未走，相反左邊間行燈都熄晒，應該話一點鐘已經走左人，預知今日晏晝會打八號返半日就算。
「點解我公司唔係？？？」
因為唔咁早走，真係好大劑。唔係全香港得你一個放工嘛，一八號風球六百萬人一齊趕返屋企，起初諗住
「會唔會有機會去旺角行行街先，反正暫時唔大雨又唔大風？」
乜都收啦連VCD舖都拉閘喇。唯有返屋企啦。
「點返？」
係囉，成百幾人塞爆個巴士站，點返？等左半個幾鐘過左兩架車都未上到。早知行路。就算我由大角咀起行，行到返屋企都唔使九個字，而家齋等車加上車落車都唔止呢個時間，又唔係大風大雨（「真係八號風球？冇點我？」），真係行返屋企舒舒服服有風吹又有得聽歌仲開心啦，好過而家同人迫餐死又浪費時間。
「不過唔係自己戇居左，都唔會遇上意外收穫。」

兩點半走人，四點先返到屋企，行路的話早起碼半個鐘啦。上天知我辛苦，特登俾日假期我當禮物，唔使開工又唔使開舖，可以留係屋企抖一抖。
「做乜好？」
返到屋企都要遙控公司電腦做野，冇計真係多野做。開電視睇睇，無目的地轉台撞無聊節目笑笑，同埋食公仔麵，住家公仔麵永遠是人間美點、天堂美食。當然仲有打下機，同睇下戲啦。
「真開心。」
生日禮物？都有。送ｄ俾大家：

玩具日掃左幾件死貨，終於開箱見人，事實證明平野冇好。所以對投資最多隻鋼鎖期望好高，話晒係玩具日主角。美國掃左兩隻又未開，加埋朝偉哥新貨同其他，變形金剛電影ｄ新野都未掃（相信真係買，都會係下年的事了，會買的話）。慢慢玩啦。大把野玩。

上畫後一個禮拜內睇左兩次，亦終於有評。結論係越睇越正，《變形金剛》雖然仲係唔多滿意，但Michael Bayｄ戲黎講算係好架喇，《The Rock》之後最佳之選。我鍾意佢ｄ戲，雖然擺明係冇劇情，就係夠爆。適合膚淺的我。
「仲會唔會睇？」
「會。等IMax。」
近來成日睇戲，我都自己搞番個DT先，唔係DREAM THEATER，係

「終於有新碟評喇！」
冇錯。好在未使等到謝安琪出新碟先寫好。不過相信都差唔多。單為三首新歌已經要俾錢，加埋隻DVD，想唔買都唔得啦 － 我講緊劉Sir。
「幾時有新metal碟評呀？」
我都想知。黎緊，好大機會係王菀之《詩情．畫意》 。metal碟？呵呵。

今個生日其中一樣禮物，係個天再引證多一樣野。我條命都係求求祈祈地過好。千祈唔好搏命、唔好認真去做去期望，往往事與願違。所以我咁頹。
我係好信命。而我條命係頹格。此乃廿六年之見證。冇乜心機、求鬼祈搞掂算數果ｄ，人人讚好；成世人最認真果兩樣野，同今日，都係超失敗收場。

前幾日未做晒ｄ野，琴日仲要一個八號波，今日返到公司立即搏命工作啦，好在十二點前做得晒，因為舊同事走上黎踩場，除左西餅仲有七記魚蛋食，唔做晒野邊度有時間搶呀？雖然前日先食過飯，但人地得閒嘛返五日嘛，我成日見嗟其他同事唔係嘛！噉講法都知佢上黎我唔係志在見佢啦，係志在有得（扮）「敘舊」走入pantry匿成朝唔做野嗟！同埋怒食，狂篤魚蛋同食西餅已經飽到等於食左餐飯。噉又唔係齋食咁衰啦都有大家吹吹水。睇睇而家公司景況、睇睇當下商界氣候、睇睇同事撈教育撈得開，將來動向係點，都幾迷惘，過左呢半年，2008年起真係唔知應該點、可以搞ｄ乜。
「metal？自己都顧唔掂了。」

我冇預過會有咁多人上黎，包括無聊果ｄ同真係幫襯果ｄ。琴日八號波舖都唔開又點會開生日會丫，今日就成班無聊人出現了，加送Ｎ份禮物加蛋糕乙個，
「估唔到大家咁有心照顧契哥！多謝晒！」
完全唔知咩事就生日會了。不過會再搞多次。
「雖然今日已經叫做搞晒所有野。都會玩多野。神秘嘉賓都未出現！又未大家食大家食！」

一睇冇乜野寫就知道我又係好無聊好得閒啦。日頭唔忙，趕工之後上上網寫寫野；夜晚，近來多番人喇，招呼完自己做多少少野就收舖了，好事黎，起碼即係有生意先啦。龍珠起已經上TRHK的朋友，可能會記得一班鬼仔鬼妹，係家住澳門之葡萄牙人，九龍城時代已經開始上黎，次次都係一大班噉上果時班友，當時仲係靚仔靚妹，買ｄ碟聽ｄ野已經夠嚇死人喇，一直到搬出黎旺角皆旺仲有幫襯，次次都係成群人自由行噉款，聽野亦係越大越驚人，年幾兩年前突然消聲匿跡，都唔係奇事，好多外國人例如唔brutal不歡的尼泊爾黨，黎香港或者中國幾年後都返晒鄉下。昔日之一班，今日只見一個，往時之靚仔已經變成大學生，音樂情操同樣與日俱高。全日可以話就係靠佢一個頂起全盤生意一黎就係一棟，冇計而家唔係住澳門，一兩年先黎到香港一次，葡萄牙果邊碟又超貴，雖然好多大label都係座落歐洲，CD反而貴到天高，香港HMV最貴果隻，先等於佢地果邊最平果隻，所以一年一次香港遊幾大上黎TRHK搞餐飽先，尤其而家280蚊三隻，用番葡萄牙指數黎計，仲平過半價，跟住執貨相當困難，因為佢買果ｄ好多係好耐未賣過甚至從未賣過，存貨放係邊甚至仲有冇存貨都唔知。除左年度添香油，仲有野睇：

仲有107上黎，介紹大家聽日本妹。當然唔係簡單的日本妹。係好邪惡的日本妹。
「呢隊邪惡cover日本妹band，估唔到會出到新碟，仲要一出就係出三隻碟，三隻都唔同style！我一播首歌黎聽立即覺得好熟，覺得好似唔知邊度聽過，跟住就諗起，『係喇！隔籬舖條仆街成日播咪就係呢ｄ！』」
一隊band，而家可以話係一隊one-man band，一隊繼BEATALLICA之後我聽過最神奇之on9 band。
「乜野band咁過癮？」
隊野 － 而家得番一個人 － 話冇band名，只叫AkebonoNoMyojo，MySpace放左兩首歌，
「好唔對路喎！日本妹呢？」
確係有問題，兩首毫無疑問係extremetal(core)野，之前ｄ日本妹呢？再上網睇睇，網上低調地有晒佢（地）三隻碟download，原來班日本妹黎晒呢度。點解玩得咁低調？版權問題卦，日本而家捉犯版權法捉得仲勁過歐美嘛。MySpace已經講左佢音樂係"emotional hardcore sound with scandinavian metal influences"，兩首聽過都知道班／條友metal有料到，睇埋佢個friend list，六翼天使、JATUN、凍結的月亮，同我極鍾意但又係永遠被忽略之melodeath doom GARDEN OF SHADOWS，認識metal的話睇到堆名都知咩事，但最精彩都係佢果三隻碟ｄ日本妹野完全超乎你所想亦同MySpace完全唔同，"Whisper In The Winter Sonata-Mix"、"At The Gates Of Ishtar-Mix"、"Gothenburg-Mix"，唔使我出聲啦。更令人欽佩係條友除左對metal認識深入，對日本妹之研究同樣，好有metal sense之餘好熟悉日本妹同佢地ｄ歌，唔係點可以玩到噉，你要本來係跳舞野的囡囡歌變成rock野，唱係一樣但個底節奏同旋律甚至chord都唔同晒，點諗到？真係乜都有，J-Rock算少野啦，thrash metal有power metal有thrash death有歐洲hard rock都有，唔要rock同metal的話電子得classical又得鋼琴又得eurobeat又得，咩人黎？一條友咋喎佢話自己！日本妹本身冇乜興趣包括聽同睇（人生可能就此少噉ｄ意義），但噉樣改一改全部一開波就怒炸metal野，越聽越高興直頭不亦樂乎。最正果首？首先你要聽兩首歌。第一首係
美國thrash metal教父METALLICA世紀金曲"Battery"
第二首係
日本囡囡組合Berryz工房《唔知叫乜名自己上網查啦》
然後，搵AkebonoNoMyojo第二隻碟"Between the Berryz and Me"（笑爆，假如你同時對metal同日本妹有認識就知呢個名有幾好笑。「唔識日本妹的劉Sir都識笑，身為metal專家的你仲未知咩事？」），聽第九首。拍得住將METALLICA同BEATLES合體之BEATALLICA。
「我地隊band應該搵堆lolita上台玩呢首歌，肯定笑爆全場。」
因為呢條友，我諗緊搞番個MySpace，方便同佢溝通溝通。

今晚面對之單位，可以分成三個地區：首先葡萄牙啦，跟住107上黎算係日本。最後自然係本土。三個地區，要批判、最值得批判的話，好遺憾，就／又係香港。大家都係聽音樂、聽metal，就係唔知點解心態可以咁唔同。外國人入黎TRHK呢間metal專門店，係會話「我唔識野」、「想搵野聽想試新野」，唔係自己杯茶仍本住「一試無妨」心態、聽過唔鍾意都會較為客氣，反觀香港人唔知點解，入到TRHK、對住大堆metal碟同一個賣metal店員，第一件事係直接或間接地拋書包 － 有冇書包都好都要拋下先 － 事先聲明「我識野我聽好多野」甚至「我咩都聽」，但問落十隊有八隊唔知咩黎未聽過、試乜播乜都「唔好聽」，然後不屑地丟低幾句就走，從今以後亦唔會再出現，
「我咩都識你又隻隻都唔好聽，我仲上黎做乜？」
所以外國可以出到BEATALLICA、出到AkebonoNoMyojo，可以接受到好多唔同類型音樂metal以內以外皆是，可以一直進步；而香港乜都冇，只得周街clone band，同遍地專家。「專」嘛。

唔知點解世上會有人咁唔正常。
「返到公司未呀你？」
「梗係未啦老細，你都知我每日起碼遲番兩三個字先到公司架啦，而家先九點三，邊有咁快呀？」
「你個客到左好耐喇！仲唔快ｄ？」
「咁早？唔係十點咩？」
邊有人咁無聊，晨早流流上黎開會，會早左成個鐘上黎？搞到我成朝冇精神，通常返到公司係飲杯水去個廁所食埋同事貢獻的早餐抖番半個零一個鐘回番個魂先正式開始做野，今朝一返到已經立即對住個客，個客仲要係有料到果隻喎前排黎睇過工廠今日上埋香港公司睇貨，即係唔係上黎求祈行個圈坐低飲杯茶大家笑呵呵就lunch食飯果隻，真係要大家圍埋傾黎緊一年點樣合作做幾多錢生意果種，搞左個半鐘之後再要出番個會議紀錄，而家先開機一開發現原來我一晚間多左三十幾封email，死今日意外地多野做到死。
「抵死！！！」
而家真係好似交更噉，一日超得閒，跟住一日忙到飛起。
「好唔開心添而家搞到我！黎緊幾個月仲要係年度旺季，點算呀冇得玩？」
噢。冇晒心情返工了。

點多野做，一樣六點準時走人，除左懶（yeah！），有飯開嘛今晚。九點鐘尖沙咀食飯，六點鐘放工，中間有三個鐘，好無聊喎唔係上舖頭坐到夠鐘嘛？梗係唔會啦咁多時間梗係去行街啦，由大角咀行到旺角行返去太子再出尖沙咀，全程人足進行仲要沐住雨行黎行去，冇辦法啦真係得閒得太犀利喇！雖然成日都噉行黎行去，第一次行到好鬼支力唔想再行，又冇計喎咁多時間要消磨。
「食咁夜，冇計啦。」
今次係同班學生食，上次食係大家上大排檔好似已經係上年年尾喇總之勁耐之前，中間仲有次麻辣火鍋超正，再對上應該已經係前年生日，冇辦法啦好難齊人，劉Sir時間難就大家都知，班友上堂一時日頭一時夜晚大家上ｄ堂又唔同，上完堂又要撈part-time（我好似已經冇乜聽過有後生仔會做呢樣野？），唔係今次劉Sir大壽，點請得郁半班同學（七個，已經係半班．．．）加多個阿sir？只係大家又要返工又要返學，要九點先開始食，都要等到十點幾先黎齊。要大角咀行到出黎尖沙咀，因為今餐食有骨氣，傳聞己久「好有特色」之打邊爐。湯底已經幾款你揀，唔係普通邊爐檔「清湯定沙嗲」就算，而特色在有點心叫。叫左個奶皇包，
「喂！試粒！」
立即屈身邊某位同學甲做白老鼠。
「得唔得？」
「好硬，塊皮好似過左期噉。」
為免影響其他檯之心情同舖頭生意，阿姐聽到，立即箭步趨前：
「哥仔，我地ｄ點心唔係即食，係要烚黎食架！」
款唔係好多但十分好食，ｄ料好味之餘又新鮮，除左特色點心（我第一次試過食點心要烚），肥牛超正，仲有劉Sir打邊爐必備美食午餐肉。埋單又唔係貴喎，計番正價每人先百三四，除左多人到爆要預早訂位，第時聚餐可以諗諗。不過當中有商業陰謀，首個煲唔係大大個平底煲而係俾隻鑊你，裝得少湯渣又多，坐低限你食兩個鐘，就係等你因為個煲唔裝得多野而唔會叫得多，雖然我地係唔係都係怒叫。只不過怒叫一回事，而家打邊爐都係入紙等送大家都知啦，亦都知道往往你入左紙之後，通常真係俾你都只會係一（少）部份，有骨氣同樣冇骨氣，入左三張紙，只得第一張紙到，另外兩張無疾而終。去到最後半個鐘，
「last order，仲有冇野要加？」
當然有啦！大把！大家立即怒剔，乜叉都要三三五五七七碟，收飛個哥仔睇到，話：
「你地得番幾個字咋喎！夠鐘時有食剩的話，我地逐碟計每兩十八蚊！」
「乜唔係話夠鐘只係唔叫得野食，但仲可以任坐咩？」
「係任你坐，不過坐之前同你地埋左單先！」
咩呀怕你呀！（的確係怕，我地立即將ｄ三三五五七七改番晒做一）睇番之前入三張紙先俾得半張紙送擔心ｄ乜丫黎得幾多野丫，點知，張張紙都唔俾咁多甚至收左之後當冇收過側側膊，但去到尾二一個字，last order點果ｄ真係點左幾多俾足幾多源源不絕地送上，兩個字要食幾碟肥件幾籃菜大量丸加公仔麵烏冬粉絲，仲要剛剛掟晒ｄ野落個煲度又送幾碟上檯，擺明就係屈我地錢嗟！所以我地後來都係樣衰衰地一碟一碟地退貨算，不過退左一半都仲有成檯野，大家生死時速怒食。樂趣十足。
冇見咁耐，但各位同學好似讀極都未畢業，個degree course要到年底先讀完，所以之前讀完hi-dip就出黎做野果班夠晒醒，而家唔係做銀行就係晉身金融業，搵錢搵得多過劉Sir啦，即係見到班學生噉青出於藍，都唔知係笑定係灰。睇睇林Sir都向Doctor進軍了，目標四十歲前做博士。阿劉Sir都要爭爭氣喇。

九點三入場，「食兩個鐘」食到十二點咁滯先走，即係要趕巴士返屋企都仲趕得切，不過要送埋人過旺角搭車先走得，點幾先返到屋企又係兩三點先訓得覺。
「姐姐！成日蒲，下次玩到咁夜，醒水ｄ早ｄ睇定路返屋企啦！」
真係高興。下次邊個幾時生日？我地就黎好似幼稚園噉，每個月搞個生日會為果個生日的幸福兒慶祝。

琴日好怒力工作，做晒野。可能個天見我咁勤力，特登獎我，
「今日老細同經理返大陸夜晚先返香港喎知唔知呀？」
點會唔知丫！你叫我做野、問我做ｄ野點做法賣緊乜產品我答唔到你，但幾時公司冇皇管有得頹，我收風收得最快。昨日勤力付出，成今天頹廢的果，都有野做近來始終較忙，十一點都趕起晒ｄ野就可以開始玩了。好多節目又好鬼無聊。上個禮拜五打風，會計靚女準備左蛋糕乙個同禮物一份，結果蛋糕唔過得夜自己食晒，禮物就未拆，反正今日冇野做，阿靚女又今日整左個返黎，大把時間，就一次過先食禮物再拆蛋糕啦。
「好食喎個蛋糕！雖然只係芝士蛋糕仔一個！」
「梗係啦！我失敗左好多次先成功識整架！」
「一食就知，係累積左五年失敗經驗！最少！」
食完蛋糕拆完禮物做完野上上網，就到食飯時間了，但人地做野時我食飯，人地食飯時我已經落左街掃貨。上返黎再訓番大半個鐘，確係幾得閒係無聊到搞掂埋銀行同上網ｄ瑣碎事務，其實都仲有野做，就係而家搞緊產品開發要谷2008聖誕節，所謂研發部主管就係我。
「聖誕節？我只識一樣野咋喎！咪就係有假放囉！」
我都唔知點解會搵我做，我美術設計都肥佬又冇聖誕氣氛又懶結果下年的聖誕產品就同我今日一樣，乜叉都冇。跟住係剝花生。幾無聊。仲有野玩架，琴晚打邊爐之後收集番各位同學的MSN，晏晝同契妹係度MSN打井。平時MSN我打到字就算，今日同佢玩研究一下，原來都幾多功能，例如噉樣小畫家打井法。真過癮。玩到悶就訓覺了，四點幾訓到五點幾個幾鐘起身，就放工了。
「呢種生活真係舒服。老細不如你地唔好落返黎香港啦！我驚聽日起我會好唔慣！」

今晚好得閒，預料之內。有阿Rock爺同大家分享佢對金庸改編劇的感想。話說Rock百無近排摷番《雪山飛狐》黎睇，唔係小說係電視劇，大陸拍有Twins某個同朱茵，都幾年前喇。
「Rock你老母都幾得閒喎！」
近來同劉Sir一樣打番C&C的佢，就一面打一面睇（「點解可以咁得閒留係屋企打機？」「Rock爺一早退左休啦你唔知咩？」），話說有一集講到主角（唔好問我咩名金庸我冇乜睇過查實）中左桃花露定桃花淚，解藥只有一樣，就係「搵條女搞掂」（當然冇咁粗俗啦），簡單黎講即係春藥，然後男主角就同Twins埋牙了。
「嘩正喎阿媽乜原來《雪山飛狐》咁好睇架？」
「一早叫你讀多ｄ書架啦！學晒劉Sir成日顧住打C&C！叫你睇多ｄ書架啦！」
好學不倦的阿Rock立即去書櫃摷番小說出黎睇，由《雪山飛狐》睇到《飛狐外傳》，每一頁每一個字都睇得清清楚楚。
「點解冇架？點解小說會冇頭先果幕架？」
「傻仔！阿媽頭先睇緊係《雪山飛狐》鹹片版《雪山淫狐》呀！睇咁多書做咩丫睇DVD好過啦！」
自此之後，阿Rock每逢遇到有人提起《飛狐》二字，都會振振有詞話你聽：
「扑野果幕，《雪山飛狐》原著入面冇！真係冇果幕！唔信你去書櫃摷番小說出黎睇，由《雪山飛狐》睇到《飛狐外傳》，每一頁每一個字都睇得清清楚楚！」

Simpsons電影，真係笑到爆咀。假如你同我一樣係經歷過八幾年，同細個會睇亞視、會睇英文台，冇可能會未睇過Simpons或者唔知咩黎，細細個電視卡通已經俾日本壟斷（美國卡通只有中文台朝早同英文台先睇到），但日本動畫點靚點精彩，十幾廿年黎最愛仍然係Simpsons，雖然唔同當時大行其道之日本動畫，冇機械人冇飛車飛機冇打鬥冇血冇暴力（well，其實都幾多打鬥血腥暴力鏡頭的），只得一家人一個鎮圍威喂噉又半個鐘唔似劉Sir鍾意果種野，可以成為劉Sir最愛卡通就係因為好笑，同埋有深度。果時會夜晚播之卡通唔係幾多，除左聖鬥士同城市獵人，就係Simpson，當時係夜晚七點幾做，一面食飯一面睇，當時剛發明麗音，一套戲有兩種語言好高科技架，而Simpsons係第一套麗音卡通片，你見佢係夜晚播就知道唔係卡通片咁簡單，而係真係俾大人而唔係細路睇之動畫電視劇啦，但同成功之迪士尼／彼斯動畫一樣，SImpsons可以橫行廿年就係可以雅俗共賞，講深度係非常有深度，加上生活化之處境同環境大人睇會好有共鳴（只可惜唔係美國人，成長在美國相信會更明白更投入），但就算係細個唔識野，ｄ笑料一樣可以笑到碌地，高深地睇膚淺地睇同樣高興。好多卡通同動畫過左幾年後會電影化甚至真人化，Simpsons歷史長過好多其他卡通反而咁耐以黎都冇試過，或者難卦，電視版賣點就係大量情節放入廿幾分鐘時間，而好玩好笑得黎係通順，好多時上半節同下半節可以完全冇關連唔關事，但你睇完完全唔會投訴，就係編劇功力高。唔出電影版，可能就係怕達唔到電視版帶俾觀眾之高要求，電影唔係半個鐘而最少個半鐘，加上故事會獨立於正傳，要花多好多心機舖排先可以做到電視版一樣咁成功。咁耐唔出電影版都係好事，一來大家期望好高啦，二來加多（十）幾年時間，自然有更多角色同劇情俾電影版利用發揮。起初公佈會變成電影，大家最關心梗係兩樣野啦：
「會唔會變成立體CG？會唔會變成真人拍？」
而家仲有咩人唔用CG唔同立體整動畫？只係Simpsons用立體畫會變到成隻電腦game噉好怪，亦唔係各位由細睇到大想見到、自己心目中之最愛變到「不倫不類」（「變形金剛症候群」），第二樣野先死得人：就係唔知點解好多電影公司同製作人鍾意將卡通真人化，尤其是日本仔，但往往由真人拍出黎，對比起卡通造型，立時覺得唔拍好過拍樣衰十幾倍，日本仔真人化電影呢個問題更加嚴重將本身之肉麻造作擴大十倍，好在劇照公開，同電視版一模一樣，可以安心入場睇 － 雖然最後真係變CG變真人一樣係邊鬧邊入場架啦，Simpsons喎大佬廿年由細睇到大喎大佬當朝聖都要啦，同變形金剛道理一樣。買飛時，發現有困難。好多人都知我鍾意原汁原味，睇戲鍾意睇番英文版，就算係好想睇，但係無線重播中文版，一係開麗音聽番英文一係寧願唔睇，對於漫畫小說電視電影我有呢份執著 － 除左日本野，鬼叫唔識日文，有字幕都叫做聽番日文配音，冇字幕就迫住聽中文啦。所講困難係乜？香港人英文程度日低大家都知，原因之一係冇機會接觸英文，強迫自己去面對或者間接接觸點都會有幫助，只係當而家連電視劇都會加英文字幕幫大家學英文時（只係有幾多人會因此轉睇英文台？），電影反而反其道加廣東話配音「顧及」（應該話「遷就」）市場需要，好多戲院只做中文版，有播英文版做一日都唔會有幾多場，香港人英文程度唔係真係咁低、唔係真係咁需要「顧及」卦？好難得新世紀有一場日頭一場夜晚，夜晚果場仲要就到我收舖時間，立即買飛啦。感想係，
「完全達到Simpsons迷我之要求。」
只長個半鐘，即係三集電視咁長，比想像中短，但出黎效果剛剛好啦，你睇Simpsons想睇到全部都有，除左主角一家人各位大家喜愛的街坊百姓都有出現，同埋主角頹廢、其他人荒唐夾埋而生之笑料，仲有大量美式幽默（以幾近荒謬之態度應對各種人事），同埋Simpsons獨家估佢唔到之笑料。故事好簡單，講春田鎮環境災難，Simpsons一家走佬之後重返家園為救萬民，冇乜特別亦唔大驚喜，一路落去好多片段簡化左，甚至簡單過頭好容易就應付左冇深究落去亦冇交代，但你會介意咩？正如睇睇電視版上半兩節可以差距好遠，明明唔多關連，大家一樣噉睇，全靠當中笑料連結，而笑料係Simpons廿年黎最強武器，笑位超多差唔多每一分鐘甚至半分鐘就有一個由頭笑到尾，但最頂癮係ｄ笑位係估你唔到果隻，望落似熟口熟面覺得以前見過聽過，點知結果完全同你所想相反，又或者荒謬得可以但唔係硬滑稽果隻，即使你完全唔理劇情齋笑，睇到散場都唔會覺得有咩損失有乜問題。除左笑，仲有三個原因要睇，一樣係感情，同變形金剛一樣大大話話睇左近廿年，今個暑假兩套一齊黎電影版，冇藉口唔去睇啦成長一部份喎。其次係向上一世代致敬。而家人人都玩CG玩立體，仲有幾多個肯一筆一筆人手畫出黎，花錢花時間加「唔靚」？就係鍾意簡單黎得仔細之畫風，雖然而家都用多左software執，唔少場面好似睇flash野噉色調同層次動感不均，好在大場面同多人場景先用，絕大部份時間仍然倚靠人手，都算情有可原。最後係心同深。你當普通卡通睇得，當係細路卡通睇得（雖然點睇都唔多／唔夠細路），當大人電視片集睇都得，甚至睇到你會唔記得左係睇緊卡通唔係真人劇集，咩角度睇都會有得著有得笑，笑之中又有強烈諷刺同批判性，單一開始串人入戲院睇電視劇已經笑爆（但大家好樂意被串），GREEN DAY開演唱會唱左三個半鐘之後想講一分鐘環保立即俾人殺死又係，最正都係「世界末日」時，教堂班神父教徒同酒吧班酒保酒徒走晒出黎，尖叫，然後神父教徒衝入酒吧，酒保酒徒衝入教堂。睇得出想表達ｄ乜，你會笑得好大聲，但唔知係太美式還是唔夠好笑，呢套笑片我睇果場全場係好靜，明顯地好笑ｄ位都唔係好多人笑，可能文化始終唔同，香港人浸淫日本文化太深。對於自己黎講，又好唔好睇？Simpsons真係睇咁多年，從來冇覺得唔好睇過，你話來來去去都係噉、見極都係同一班人，就係睇十幾廿年都唔悶，全靠編劇功力同精彩笑料，電影版亦由頭笑到落尾，劇情唔突出但叫做通順，雖然角色間之感情同發展唔夠深，冇緊要正如從來睇Simpsons你唔會追究劇情有冇意思、邊個同邊個之間點點點，只係睇邊個發傻果個戇居然後笑笑笑。係未夠好，又點？我鍾意就得啦。
一個暑假（係我係冇暑假，俾我幻想中懷緬一下好冇？），兩套八九十年代經典一齊登上大銀幕，亦一齊成為暑假最賣座電影，計邊套鍾意ｄ就冇可能架喇，不過要揀的話我諗會揀Simpsons，簡單嘛。始終都係八十年代好。

好明顯會好得閒，有新貨，又點？乜「新貨」乜出名band都冇，只得一批比利時野，似乎呢批新貨只適合「有性趣」人士（仲有冇人記得這些好朋友？香港人坐言不起行之典型例子）。可以仔細聽聽新呢批貨。比利時野我諗好多人都會覺得陌生，細國加冇大label嘛，相信大部份人聽metal九成以上唔係芬蘭瑞典挪威就係美國，冇幾多隊唔係出自以上四個國家，但歐洲細國反而先最多野聽，因為唔向商業（根本冇商業可圖），創意甚至技術比好多大國瘋狂得多，例如充滿未來感之丹麥、冇一隊聽過係唔鍾意之捷克、自成一種metal之希臘、細國中波國已經算最成功之波蘭、death metal發達得已經超越其他鄰國之荷蘭，比利時更少人留意，但論極端金屬同水準其實唔低，又係衰地理同衰世界音樂心態。其實唔係第一次入比利時野，最近一批貨AXAMENTA已經係，symphonic black metal版PAIN OF SALVATION，甚至請得郁Daniel Gildenlow唱一首歌，你唔會話佢地係雜魚甲卦？真正前衛好有技術有音樂好，一樣冇人會理，點解？唔使我講啦？對progressive metal友黎講佢地唔progressive卦？所以今水貨預左人人不聞不問，當而家DARKTHRONE EMPEROR MORBID ANGEL呢ｄ曠世經典都已經再冇人理、唔係要TRIVIUM就係要WITHIN TEMPTATION時。自己聽囉。我聽得開心就得啦。
THE RECKONING "Deathlike Millennia"，metalcore。講完。
BATTALION "Winter Campign"，非常老坑，睇見band名都感覺到，有ｄBOLT THROWER feel。
OCEANS OF SADNESS "For We Are "，以前都返過最少一次，只當係「舊貨」黎。近gothic black一邊，即係，十個香港人聽過十個話悶果隻。冇計。又冇名氣補救。
ORDEAL "Atrocities"，DEATH但更melodic，正野。
PANCHRYSIA/ICONOCLASM隻split前者係ROTTING CHRIST，後者係MARDUK，錄音仲要比我想像中靚，雖然從來唔太鍾意split，但兩隊野都玩得好，又係正野。
RHYMES OF DESTRUCTION "A Sun Revolution"有ｄ似CRIMSON MOON，返過幾次貨之美國vampiric/SUMMONING black metal cult band，atmospheric black metal加超靚木結他。metal果邊唔太滿意，但ｄ木結他仲靚過OPETH。我寧願佢地成隻碟唔玩metal。
CRIMSON FALLS "The True Face of Human Nature"玩metalcore近deathcore，OUTCAST VS MOKER split OUTCAST係CRYPTOPSY、MOKER係deathcore。deathcore即係metalcore之death metal版，唔係新事物，地下蘊釀左一段時間，只係近期突然好潮多左人問。相信原因不離「有人講」、「forum睇到」、「邊間（大）公司出」、「邊隊出名band出左碟」，只係有人問多人問一回事，比利時幾隊都唔多使特別試俾人聽，唔係「潮」嘛。都唔係，例如，唔係上年紅到今年的JOB FOR A COWBOY。唔係JOB FOR A COWBOY，同唔係其他邊間公司邊隊band，就唔係deathcore了。見字時此個案已發生幾次。同樣係「有性趣」例子。
全批貨最滿意，除左
ORDEAL、CRIMSON FALLS同PANCHRYSIA/ICONOCLASM，就係最後未講之三隻：FLESHMOULD "The Lazarus Breed"，所謂「technical death」，不過技術同音樂都好簡單完全唔複雜，更似INCANTATION果種atmospheric/dark death metal。我唔理tech唔technical，係唔恆係唔技術，但越聽越like，始終death metal兩大I-ION係我至愛。你見過有death metal碟會有兩首歌過八分鐘未？death metal我都係鍾意玩氣氛玩邪果隻，即係FLESHMOULD呢隻。SUHRIM "The Cunt Collector"，正碟名、正歌名、正歌詞、正old-school grind death、有Predator做封面入面有「更正uncensored封面」，聽完就明白點解要聽比利時metal，我諗全比利時最強death metal band之一就係佢地。另外STRATUZ "Spirit Seduction"，唔係比利時而來自委內瑞拉，正得黎有ｄ過癮之death metal，單個土人木結他intro已經殺晒。今水比利時貨款唔多，整體亦未達想像中之高水平，但大多都鍾意都係好野黎。只係靜候有緣人。冇計啦。香港地。

八月開始係傾單落單季節，近來做到冇停手，今日係歷史性地幾個月黎第一日加班遲放工，張卡成個月都係左邊紅色（即係日日遲到）右邊全部00尾，今日破天荒30尾，好耐未試過喇。差少少趕唔切開舖。唔緊要，幾點開都係咁得閒架啦。只係近排打機打到有點停滯，不論屋企C&C還是超任，C&C玩到尾二一關電腦屈爆機冇心情打，只間唔中玩玩一兩舖散關恰番電腦轉頭過過手癮算，超任諗唔到玩乜之餘懶發掘新game，可能係循環返到係時候動番筆寫野之階段。
但最想都係咩都唔做。近來實在好多事幹，想乜都唔做抖抖先。

收舖返到屋企繼續打C&C，雖然Red Alert 2盟軍已經打到尾二一關，不過苦戰成個星期仍然未過到關，最強只係捱到十五分鐘跟住就被屈死了，係差少少就爆機，但逃避現實就係唔打落去，摷番其他幾集出黎同電腦玩對戰一舖過搞掂。終於開隻C&C3黎玩。雖然部機叫做新半年左右又加多張display card，都唔係話夠玩C&C3，開game已經要成個字先開到，玩果時隻game自動tune到中級解象度，唔係話樣衰不過同trailer靚到黐線果隻仲有段距離，加埋係順亦接受到但比我想像中慢左ｄ，同埋最抵死，會crash。我未玩正關唔知係咪會咁易crash，但玩對戰成日打打下就輕機，可能我人海戰術得太勁卦，我咁享受起無限隻兵仔去欺凌電腦。亦都開埋最後一隻未玩之C&C、將軍系列。對呢隻game冇乜好感，因為掛住C&C個名，但同C&C完全冇關。戰略線C&C有三個系列：正史之C&C，講聯合國維和組織GDI同謎之科學宗教恐怖組織NOD，就外星降臨地球、產生無限能源但亦嚴重破壞地球生態之?物Tiberium之抗爭，而家去到第三集，第三集連同Tiberium有關之外星種族都出埋，到而家仍然係最正確之C&C宇宙同歷史；Red Alert紅色警戒系列係另一個平行宇宙，講愛因斯坦同時光機令希特拉消失於歷史，納粹政權冇出現，但蘇聯因為冇德國之威脅而坐大，最後第二次世界大戰變成由史太林發動，RA就伙圍繞呢條主線發展，第一集本身想將RA系列做成C&C前傳，但去到第二集所有同正史有關之連繫全部取消晒，令紅色警戒成為二戰／三戰版C&C，不過做得比正史頭兩集更加成功。而將軍系列又係另一個平行宇宙，係不久之將來恐怖份子發射病毒飛彈到歐洲同美國，歐洲中招但美國截擊到，都令全球死幾億人口，亦令世界只剩三個主要勢力：美國（當然啦）、偉大的中國、同中東阿拉伯地區為主而潛伏全球之恐怖份子GLA。冇錯同C&C「前傳」及正傳完全冇關係，加上係第一隻立體版C&C、界面亦同以往唔同晒，亦冇C&C系列之招牌、由佢帶入戰略遊戲之全真人拍攝過場電影，除左個名外同C&C冇任何關係，似掛住C&C個名出黎呃人買多。加上之前部機都唔夠勁玩，而家C&C3都玩到，低一級之將軍系列點會唔得丫。除左貨不對辦，另一唔鍾意就係立體（我仍然係old-school 2D派），加上C&C3又係立體變到成隻Starcraft噉不論畫面還是設定，自不然對始仍佣者將軍系列更加怨恨，唔係Red Alert 2打到瓶頸，都唔會咁得閒開黎試試。不過玩落又唔錯喎。起初驚立體會唔會好難玩，因為keyboard加mouse大把野你記你學，但玩落就好容易，同其他系列差唔多（相信同真正C&C最接近就係控制設定），好容易就上到手同應用自如，可能因為先玩控制複雜得多之C&C3，全個keyboard咁多粒掣差唔多全部有用，C&C3控制到而家都未熟得晒。雖然同2D版幾集好唔同，唔同得黎又確係幾好玩，立體景觀、系統、軍備設定同物理判定，戰略性同計劃重要性比其他C&C系列高，真係好有將軍感覺唔似之前幾隻一味死炸，雖然講係噉我到尾我一樣係old-school地無敵人海戰術玩晒，加上打果時好爽同視覺效果夠晒震撼，死，搞到想爆埋隻將軍先至打C&C3添！最正係音樂似番C&C1，soundtrack作得最好果一集，classical、電子、中東、中樂、metal加埋，平時打C&C我會熄音樂開住其他野聽，將軍係第一集之後我從新認真去聽配樂之一集C&C，甚至想搵番隻soundtrack。
「點算？原來咁好玩，Starcraft都未煲番又黎一隻，點算？」
係喎今日星期二。打到訓覺先醒起，
「顧住打C&C，唔記得左今晚要睇《Heroes》！」
搞到我覺得自己會放棄睇電視。

打完機訓覺，訓醒返工，做做做做做做做做做，近來之典型生活，不過有樣唔同就係終於做晒野喇，之前幾日每日開機已經十幾廿封新email，放工個Outlook仲係爆Ｑ晒，一番努力下，今日食飯前個Outlook終於回復正常，即係空一物。然後係噉食、係噉上網、係噉寫野，正！
「我終於似番返工喇！」

仲要係星期三，喜上加喜，夜晚約左成個月的節目，等左好耐。
「我要夾band！！！」
日日都講次次都講鑊鑊大家見面都講，講足成個月甚至半年幾成年，今日係上年年尾「半退休」時上band房後，大半年黎第一次。我地隊band，好叉多人，基本上圍內夾band果班都蒲晒頭（well，即係鑊鑊都係果班人），包括夾band前夕篤魚蛋由bass變成觀眾之肥仔，加多個流傳左好耐、傳說中之「十四歲lead guitar」。今次我地係邊隊？係麥記McDONALDDICA？定還是香港地下音樂界的一個cult，去酒店大堂玩"Master of Puppets"的JAZZTALLICA？錯。我地係
「METAL LORD！！！」
非正式的名字。呢ｄ柒名，多謝Rock爺啦（我作的話我諗會再柒ｄ）。如此娘的名，自然係玩同樣娘的音樂，
「我目標係玩晒八十年代加九幾年初數得出之經典！」
即係大家（理論上）耳熟能詳，講個名提第一個音大家已經知咩黎玩到晒果種，好似酒廊樂隊添，我鍾意！如此冇大志已經夠玩有突，玩得晒METALLICA已經勁啦，仲要玩GUNS N' ROSES呢？BON JOVI呢？（「滴著熱血！」）真係玩晒最出名幾隊最出名果ｄ歌，玩到今年聖誕都玩唔完。最想玩梗係hair metal同thrash，八十年代兩大「pop」，death同(proto)black都有興趣架，不過而家夾band呢家野，簡簡單單happy過就算啦，而家先的起心肝練好樂器夾好band太遲了。今晚出席人士夾埋六個（well，其實係四條友霸晒黎玩加兩位半列席人士），去總統卜中房玩其實唔多夠位，樂器擺得亦唔係太好套鼓唔夠好打一夾所有聲冇樣清楚，似乎下次要轉移陣地去第二間喎。不過作為第一次（兩個禮拜前仲有劉Sir不見了的第零次），完全　尤其是有得一睹我地「十四歲lead guitar」之風采。　一開波試聲熱身已經係校歌，然後原定夾之幾首除左（最重要）一首全部搞掂，好多歌都係即興彈出黎就玩落去。兩個鐘，其實真係唔夠玩。不過嫌唔夠多歌，唔係玩得唔夠多（呀，其實都係，玩多兩個鐘都未必夠喉），係自己未夠熟。近來成日打機同睇DVD，係時候聽番多ｄ歌。
「同埋，我們的主題曲《Transformers》，半首都夾唔到！灰！阿捷快練歌！」

唔係全部房滿晒，兩個鐘之後會再加鐘，而唔係走左去食十蚊麵。係唔夠食（似乎大家食十五蚊碗飽肚得多喎），志在夠平嗟，卜band房唔使錢咩食飯係要慳ｄ補番架喇。然後係是晚重點，
「TRHK unplugged演唱會。」
冇band房玩，TRHK仲有得玩。隊枝結他落個DVD再出喇叭，搞掂又有得玩。當然唔係玩metal咁激啦TRHK對陳年喇叭咁焚法爆硬啦而家都差唔多死得，加上人手及資源短缺，一枝清聲結他算啦＆夠啦。玩solo又好，玩清聲又好，「十四歲lead guitar」果然超凡，身邊好多廿四歲都冇呢個功力，如果真係「只拜師幾個月」就有如此修為，前途無可限量。再練番準ｄ清ｄ就掂。我冇諗過自己隊band會有lead guitar，仲要係一個比我想像中細十年而功力超越十年之結他手。要玩乜歌都得喇。
「黎緊有排玩，大排玩。」

正。回復正常。今日朝早老細唔見左人。仲要撞正係我完全乜叉都唔使做的日子。fit啦直頭。
「正呀！！！！！」
劉Sir頹廢的一天，開幕禮係會計靚女準備的精美餐芝腿治，其實本身只係餐肉治，返到公司笠埋公司ｄ芝士同火腿（冇錯火腿都有老細幾照顧劉Sir），再微波爐叮一叮，正呀人間美食同屋企整公仔麵有得揮（劉Sir的公司生活真幸福）。玩下笑下又到食飯時間了，冇皇管自然早少少（何謂「少少」值得商榷），人地打鐘食飯我打鐘訓覺，訓醒覺，連老闆娘都唔見埋添！食完飯自然要食甜品，電視廣告宣傳而家惠康「買窩氏雪糕送雪夾糕」，會計靚女「咁蹻要落銀行」（真確性同劉Sir為人一樣值得商榷），劉Sir贊助一舊水，
「買少少野食。」
靚女落左樓，兜個圈上返黎，抽住三個超大膠袋。
「頂！我想食包薯片嗟！點知一舊水變左得番幾蚊！」
簡直恐怖。冰格爆到連本身個冰架都冇位擺，好在剩番唔係好多粒冰得ｄ冰碎，大家就等ｄ冰自生自滅自己溶晒佢算，
「雪條緊要ｄ！買兩包窩屎雪糕送一包雪夾糕！幾賤格呀間惠康，特登收埋晒ｄ雪夾糕唔擺出黎，我排隊時係噉嗌『點解冇雪夾糕？』嘈到佢地拎番黎出送俾我先走，成條隊因為我貪小便宜，擾攘足兩個字都冇得走！全靠我厚面皮，你先至有雪夾糕食！」
仲有其他大量薯片蝦條、餅乾朱古力，怒食。上住網、食住野、同各位同事發癲吹水，就放工了。今日返工，仲開心過食住花生等睇戲。

夜晚？都係果幾樣野架啦。今日有Rock爺做外賣仔，係麥記係好呃錢，不過冇計啦耐唔耐都要被昆添添香油。例如今次，要試試新出個芝士火腿扒包（又係芝腿，朝早食完夜晚又食），八蚊雞得個包夾住塊芝士同火腿扒昆到爆，食就唔係話唔好食，同同樣八蚊的豬柳漢堡拍埋，雖然豬柳漢堡無敵，但我會揀芝腿包，因為唔係鬆餅而係麵包，鬆餅加埋豬柳有時陣味激過頭，簡簡單單整個芝腿包淡下口都唔錯。至於麥香雞，廿幾年黎我第一次食，唔好意思我食麥香雞係全走之後加麥樂雞燒烤醬（有見過劉Sir點食魚柳包的朋友都知道劉Sir係點「自製」法），正果然係正，只係燒烤醬一包要另加五毫子，
「小。」
其餘都係圍繞八十年代。亦都即係對現況不離一個灰字。例如歌詞。八十年代歌詞係metal重要一部份，當然填詞奇柒奇on9的band唔係少特別係八幾初仲係講血講暴力反基督果期，但去到八幾中，歌詞簡直係metal半個靈魂，尤其thrash metal，當時metal想帶出之信息係好發人心省，灰都係文化上世界上地灰，而唔係而家噉自己點灰點灰。到而家？你問而家聽metal的各位朋友，有幾多個會研究歌詞甚至會睇歌詞？
「世界變了。」

月底同月頭，往往係兩個景像。要買野的朋友，月頭出完糧自然會出現添香油，月中打後買野人士日少，而多神奇人士同外國人出現，換言之頭半個月係做生意，尾半個月係見識見識。今個八月最後一個禮拜日，人唔係多，就係好多奇人，仲要係連續地上黎。第一個「客」係一個行家，冇錯好易估你見TRHK放左幾大棟hardcore/emo/punk野就知，雖然係全香港最專業hardcore label，對好多人黎講佢賣ｄ野一ｄ都唔算好hardcore/emo/punk，情況同TRHK一樣：
「冇計啦，世界實在太多專家，而專家行列唔包括我地。」
亦因為專家太多而自己唔係專家，佢都唔做了。冇辦法。三十幾啦四十都黎緊啦，仲係攤大手板問阿爸阿媽拎錢果個年紀咩，就算冇老婆仔女或者唔理老婆仔女，自己生活都難辛苦，家陣香港生活已經難（政府所講「經濟好轉」，除左有錢佬同商家受惠之外，關我地社會中下層咩事？），仲要揹住間label、自己蝕錢貼錢俾樂隊錄音出碟，幫一隊band出一隻碟付出成本有幾高你知唔知？唔知唔緊要，你會知出左碟之後隊band同公司可以賺得番幾多喇卦，當專家滿街、出名先等於好同下載有理時？所以你見而家香港band界已經冇乜人會搞label，搞亦唔會搞得大或者出得多band多碟，大家都知咩事啦，除非係超超明星band、「邊個邊個大人物叫你聽叫你買」，當夾band果班自己都唔買碟唔試新野唔聽underground時，自己隊band出碟或者幫其他band出碟，可以賣到幾多叫得郁幾多人俾錢支持，自知心照，好多野其實全靠「香港band」之名先可以維持到落去、先會多番ｄ人支持。所以我想知黎緊仲會有咩新label出現。請記住，label／唱片公司同唱片舖係兩樣野黎。同埋我係想見真係搞得出頭搞得大，唔係圍內出一出就冇晒聲氣果種。見到堅持左咁多年呢位好同志都決定停低，真係心灰。至於TRHK＆劉Sir又會同可以捱到幾時。
「假使今年係最後一次大家上TRHK同劉Sir過生日，都唔出奇。」

跟住一個一口流利國語仲好過身為香港人你同我的日本仔上黎搵disco野，
「梗係聽PAIN OF SALVATION新碟啦！」
又多個行家上黎，Fiso哥，幾年前擺街邊檔賣sample同入口廢碟之Fiso哥。以前係火車站擺檔時撞到佢，成日開舖後就係走上火車站搵佢執野，佢賣果ｄ係正版貨黎，只係其他國家好似歐洲唱片舖執笠或者清倉時唔要，批貨就當廢物噉輸出到中國，所以包裝上好多係唔知咩語文但通通正版，甚至sample都冇乜而歐洲入口貨多，加上成本低而價錢平，次次大家見面都好開心。經歷幾年擺過全香港日日走鬼避大頭綠衣歲月，終於搵夠錢到灣仔188開左間檔，舖面交俾人打理，自己主攻搵貨同網上銷售。佢入ｄ貨其實好平，sample碟同來路廢碟可以真係幾蚊就有一隻，只係咁多年黎日日都有新人入黎競爭，供應商又知機識得搵錢立即吊高黎賣，而家賣sample，
「每隻碟成本貴過以前十倍！」
加上叫得做廢碟梗係冇乜出名野可能一萬隻碟先得一半左右賣得出，其他你做到一蚊隻都唔會有人理，網上賣唔出名野就自然更難啦此專家世代，加上而家個個靚仔有電腦唔係平到免費送總之要俾錢班靚仔睬你都傻，水貨型式逆出口返其他國家又捉得嚴連海外市場都萎縮埋，
「好多人以為好易做，其實做過就知道而家賣sample碟根本冇錢賺，成本高過以前咁多，根本冇肉食！以前就好搵！而家咁多人做做爛晒！」
冇辦法。講正路，全球最大唱片公司之一EMI已經壽終正寢；講偏門，家陣賣水貨賣sample都做唔住。
「唔係我賣左咁多年洗濕左個頭，我都唔繼續做落去啦！唔繼續賣可以做得乜我自己都唔知道！唯有繼續捱落去！而家賣CD真係浪費青春！」
音樂業唱片業真係進入最低潮之蕭條期。的確係浪費青春。

行家商業會談時，同場仲有個阿叔一齊傾。三十歲以上都難搵了，個阿叔仲要係四十幾，兼唔係白撞而係上黎幫襯得幾多果隻，今日吹過水先知道原來個阿叔咁過癮。佢正職係做私人會所，係高級會所服侍鬼佬人客果隻，自己一把年紀都唔係話聽咁多metal，會搵上門係有一次有個德國客人同佢傾偈，佢介紹個德國佬聽EDGUY，個德國佬好鍾意德國野例如HELLOWEEN但有趣地唔識EDGUY（未夠舊卦），跟住佢上網查查到TRHK，就上黎幫個鬼佬買左隻EDGUY，個鬼佬返到德國自己搵埋EDGUY其他所有碟。因為對得多鬼佬而外國人生活同搖滾息息相關，佢自己都開始摷番metal野聽，就成日上黎了。
「其實好多鬼佬同香港人一樣，都係聽大路野，佢地係好迷ROLLIN' STONES同BEATLES呢ｄ經典，但其他可能乜都唔識，但係唔同在佢地會試！我試過返工時會所度播NIGHTWISH，差唔多個個鬼佬都問咩黎！甚至試過播BEYOND一樣有鬼佬走過黎問，話佢地玩得好好！」
因為要同客人溝通、因為佢同客人間互相介紹、因為開始迷番metal、因為會所播metal播到連佢老細都開始對metal產生興趣（相信「有興趣」原因係見播metal會吸引到鬼佬多生意機會），就成日上黎傾metal同搵metal野聽了，而搵野聽亦好簡單，自己睇大陸書或者上少少網，見到有咩band介紹得好上黎搵，就算冇都唔會典型香港人／專家式不屑地離開，試埋其他類似band同其他類型先，之後慢慢揀自己鍾意果種再買。四十幾歲嘛，電腦都唔多識用同冇乜機會用啦，咪用番最原始聽音樂方法：就係用對耳聽囉。亦因為唔識電腦，所以買碟。
「我鍾意隊band實會買佢地隻碟，不過我ｄ姪仔個個都係download唔會買碟！就算俾零用錢佢地，佢地都係拎ｄ錢去網吧打機或者買衫，都唔會買碟黎聽！」
年代唔同、科技進步，好多野都令人腐化。（唉，越諗越極端添。）

吹緊水時，仲有個鬼仔帶埋個阿媽上黎搵black metal野。阿媽好明顯第一次入metal舖頭，對所有野都好好奇，跟住個鬼仔同阿媽介紹「What is Metal」，逐種metal講歷史、文化、講解metal art（你可唔可以向人解釋到black metal之作畫風格同精神？）。然後叫介紹幾隊band試，咩band都得總之係好black metal band，唔知乜黎，但試過鍾意，湊夠三隻，執。問問佢阿媽，你個仔噉，冇問題丫嘛？
"As long as he likes it!
跟住兩母子好愉快地離去。服侍香港人多，對住鬼佬個人舒服好多，生活態度同音樂態度相差極大。最少客氣ｄ、對住人係笑、完全冇「架子」先。

所以近來成日好耐冇野睇or好少野睇，實乃正正常。因為煲C&C之餘，仲要顧住隻狗。

想睇多少少咪睇上面。AVP第一集，
「垃圾。」
唔好意思語氣重左ｄ，我係異形加鐵血戰士fans，難免對AVP主觀得滯，雖然客觀黎睇，三條鐵血戰士傻仔走入金字塔玩狩獵遊戲、最後人類同Predator聯手對抗異形，仲係由人類挽救殘局，唉阿導演大佬到底你知唔知我地fans想睇ｄ乜架？唔止我，全球一致劣評，唔係因為有兩大外星獵人坐鎮，套戲晨早死得。三年過左，第二集開拍消息傳出，一切向好，睇埋段預告片，信心返番黎。雖然仍同最理想之AVP有所差距。似乎仍然係以Predator以人類為宿主繁殖異形作狩獵用為主線，但似番ｄ樣，首先似番ｄ樣真係講緊異形同Predatorｄ樣，上集兩者都做到好魁梧「新派」得滯（雖然我都受），今次似番佢地八十年代造型，我唔係太執著但old-school一點都係好處，親切感豐富ｄ嘛，睇到Predator轉番熱視點唔係上集果種超精密高科技視點，已經殺左我了。另外故事重新定位各方，人類同樣夾係異形同Predator中間，Predator站穩主角之位，上集所謂三隻Predator，兩隻出出鏡就死左仲要死得好白痴果隻，人類出場鬼咁多而異形得幾隻仔，今次預告片似乎人類重火力得黎負責死仲要係狂死果隻（正！），數量多唔緊要戲份唔好似第一集咁多就得，AVP世界人類只負責死同埋孵異形，而唔係第一集噉做英雄。異形多得黎仲加左新品種（有研究異形生理學的fans會知咩事），最重要係Predator唔再係拎黎俾異形祭旗用喇，而係神勇屠殺異形如各位fans所期望，型得黎仲要好多新武器，噉先係Predator嘛。多血多死人多外星生物屠殺人類多爆頭多斷肢多分屍打到七彩同會爆粗（唔爆粗的動作片有乜好睇？），應有盡有就預告片睇係好完美好貼近各位A&P迷所想，差兩樣。首先，點解AVP一定要係現代？game出過唔少，每隻AVP game都係三方對戰但世界觀屬未來，人類係用頭兩集電影年代之科技同武器。但今套戲仲要二十世紀軍備對異形同Predator。落重本將年代放到未來得唔得呀？定還是留到下一集？另一樣係trailer後半重點係Predator同異形主將一對一，雖然有異形同Predator混種出鏡即係唔止有一隻Predator，但「主角」睇黎只得一隻Predator，其他可能又係炮灰。又點解唔可以黎番次兩種族大決戰之世紀場面呢？慳錢都唔係咁慳法卦？
最關注自然係上畫日期。寫住年底聖誕節。雖然籌備中，Project: Predator似乎要等埋AVP2，成為2008新年獻禮。

一連幾日，空白一片。冇計啦。近來真係閒得慌。日頭冇野做、夜晚冇客、返到屋企繼續C&C同搞搞隻狗，出街食食飯噉，冇咩特別。係架真係冇咩特別，好似今日噉，返到公司發現一半人上左工廠，本身已經做晒野公司又冇皇管，又係大家熟悉的玩玩玩食食食癲癲癲吹水吹水吹水跟住六點放工。有乜好寫？
「挑！我都唔知！」

放工行去收舖時，行經新之城，見到好多差人封場。然後收到阿Rock電話：
「我落黎打Virtual Tennis，點知打完想走果時差佬落黎查牌，好似話有個強姦犯犯案之後走左黎新之城呢度匿埋！」
收線之後，立即走埋去搵個阿sir：
「阿sir，我係頭先單風化案個目擊證人，係九龍東重案組派我黎認人架！」
聽日報紙頭版就見到Rock爺，唔難認，頭笠住紙袋果件就係。仲有劉Sir拎好市民獎的意氣風發。

盡完好市民的公民責任，又係開舖時間。
「都係噉啦。」
即係你知道點啦。今晚收舖之後，仲要送外賣，有個遊客黎到香港，因為之前睇過閃靈演唱會立即愛上佢地，但周圍搵唔到佢地ｄ碟因為全城得佢一個識閃靈，近日到香港逗留幾日，即時打個電話上黎搵碟，但因為只留香港兩日上唔到黎買，收舖後立即親身出到尖沙咀酒店送貨俾佢，跟住聽日佢就上機走人。冇計。生意難做。多一隻就係一隻。況且係有心，要我好似噉自己貼錢貼時間送到上門完全冇問題。我成日都話，你係想試想買，嫌唔就腳嫌時間唔夾，需要的話送到我都會送。都唔係未試過。以前做過都唔少次外賣仔。不過，而家當然唔使再做咁多啦，因為而家ｄ人唔係要有人送外賣，係要人送。需要外賣服務，只有外國人同遊客。

「嘿。」
老細冷笑。琴日返公司似去渡假村。今日，老細工廠返到，帶埋勁大堆野，
「死啦你！」
真係做到死，全日做唔停。好唔習慣添。辛苦捱到六點立即閃閃閃閃閃．．．我認我係契弟幾多野做只要唔趕一律放工時間即時劈低唔理。要上舖頭開飯嘛。一班人上黎，劉Sir個forum最on9的幾個都出現左，當然有鬼咁低調死唔蒲頭、大家想見好耐今晚終於出現的保后英雄戈竹尸啦。
「大佬！我求你！我跪你！請你同我地夾band！我地玩BON JOVI！」
齊齊叫新旺，今晚難得地多人，仲要玩，個飯盒成個鐘先食得完，好事黎，太耐未噉樣成班人癲過，亦冇諗過全個月最後一日糧尾到盡加平日反而會係全月最好生意一日。
「只不過，下次之今日，又會係幾時？」

「嘿。」
老細再冷笑。笑得更冷。禮拜六朝早從來我唔會做野，只有食早餐，好似今日返到公司，檯面已經多左幾袋麥記，當然唔係全部我啦，但只負責食其他乜都唔理的我食下食下吞左一個半早晨全餐，即係要自己落手砌個豬柳蛋漢堡出黎但價錢仲貴過普通豬柳蛋漢堡餐果個。食完早餐，就出事了。
「咁得閒丫嘛？魚缸ｄ魚死晒，同你洗乾淨佢！」
阿姐請左假，即係ｄ魚死晒，等下星期佢返到黎先搞（應該）都未遲。不過老細話「有礙觀瞻」，所以想快手搞掂佢，如此重任自然係落係永遠最閒／最懶之我身上啦。捉埋會計靚女加assistant甲，三條友清個魚缸清左成朝，對住成池死水（死魚一早已經俾人搞掂晒了），我唔係問題，但要將個超巨型缸由全公司最深處搬到出公司外面個廁所，然後拎個花灑沖沖沖再逐粒逐粒石春仔洗乾淨，之後再抬番入公司然後一大桶石仔加幾桶水來回廁所幾次先裝番滿個缸，然後由公司拖地拖番出去廁所清理現場，已經／好在十二點半。
「老細，噉今日我係咪收埋阿姐份人工先？」
唔好講，我公司阿姐人工比你想像中高好多架。
「得！下星期一起，你代阿姐出街，全部收件送貨你做晒！」
「係唔係真先？？？？？」
「你就想喇！」

今日，TRHK變左鴨竇。冇乜人出現，但計比例的話，超過75%係女性。　第一個出現係個gothic妹，見過幾次，次次都係gothic裝出現。
「請問你屋企除左黑色裙，仲有冇其他衫？」
跟住有兩個妹妹走入黎。邊個黎？唔識。係唔係聽metal？唔係。入黎做乜？唔知。無唔無聊？好無聊。非常無聊果隻。擺到明唔關TRHK同metal事，但唔似入錯舖喎，入到黎已經好似之前黎過好熟噉，周圍行仲好多野講，然後撩埋劉Sir吹水同玩，跟住兩個靚妹「玩到悶」就走人了。唔知咩事，只知道好過癮。
「唔係聽metal，又好似對劉Sir＆TRHK有所熟悉，仲要玩劉Sir，莫非係睇完劉Sir個網慕名而來？」
跟住一個專誠上黎搵MOONSORROW，再加一個試左兩首歌立即上癮即時上黎執MY DYING BRIDE "Turn Loose the Swans"。全日四份三生意加人口都係屬於女性。TRHK最man果個已經去完台灣返黎同大家分享「台灣遍地metal間間唱片舖都有metal野賣」（當然只係大路如Sony/RR/環球之類有做之metal band例如metalcore同DIMMU BORGIR之類，真正indie同underground仍然要去台灣本土metal label門市部先搵到，但都叫做metal已被接納成流行音樂一部份好過香港先），同埋「台灣囡囡個個營養豐富無論點瘦都好有睇頭」（「噉你仲返黎香港？」）。
「發生左咩事？？？？？」

琴日星期五好忙，今日禮拜六反而得閒得滯。終於正式開Henry隻APOCALYPTICA DVD黎睇。唔使多介紹啦，咁多年黎已經被吹到咁恆，聽係頭兩隻碟聽起追第三隻碟開始追，由最初四個大提琴手開始，走一個換一個再剩三個，而家加多個新鼓佬，而家已經「變質」唔緊要，少有變完仍然追極唔厭加百睇不厭之metal band。冇錯佢地係古典學院大提琴出身，但真係metal到你唔信，一個係Max、一個係James、一個係Alex Laiho，仲有個「盲眼lead cello」（好耐之前因為「音樂分歧」離隊之元隊員，但耐唔耐會幫手出live），睇佢地長頭髮gel punk頭、著晒band tee笠住枝褸、戴住皮手套搽黑指甲、成個場走黎走去企晒去台前，好似彈結他噉斜拎大提琴企係度三百六十度fing住頭狂拉，仲有更多驚人動作、你冇諗過一班古典友會咁metal地對待自己枝大提琴之瘋狂動作、成枝掟落地狂拉係差未打爛大提琴（好在有劈爆琴弓），除左個session盲眼可能真係因為session完全唔郁之外，每次睇佢地live都無能敵點睇都唔悶唔厭，就係因為果份活力同狂野，除左TYPE O NEGATIVE，我未見過人玩大提琴玩得咁metal。得意在照計大提琴形狀同技術都難過結他，佢地ｄ歌又唔係話易彈過其他band，但已經係玩metal之中現場表演最激之一隊，彈結他之「正確」metal band好多都係得個企字同佢地幾個古典友比相差仲好遠。最意外反而係鼓佬，成日十六個排超長fill in連續二百六十五下超高速十六分音，玩APOCALYPTICA自己ｄ歌完全見本領要激又得要複雜progressive又得，CD有ｄ歌係Dave Lombardo打而佢style確似Dave，但live打得比Dave CD入面更好更狂野，手瘋狂十六分音亦令麥記ｄcover更恐怖，一場live已經成為我最鍾意芬蘭鼓佬，最勁係佢化KISS妝打到咁喪個妝居然唔化。成場選曲亦高質素，快歌居多大部份我都鍾意，叫得做玩麥記起家麥記cover自然唔會少，好鍾意一兩首自己歌夾一首METALLILCA之編排，加埋encore兩首SEPULTURA，冇計啦單講玩metal佢地絕對超晒班，玩玩下再聽到"Master"、"Creeping Death"同尤其麥記自己都唔多玩之"Fight Fire With Fire"（差唔多鋸爛弦線之極速，但最想佢地live玩"One"），再SEPULTURA "Refuse/Resist"，intro幾個音一入耳已經high晒。快係metal必須，APOCALYPTICA賣點反而係慢：你可以話佢地係neo-classical，不過唔同metal友例如YJM，真係新世代人用metal方法玩古典變成利用古典樂理提昇速彈，但APOCALYPTICA調番轉古典界踏入metal界，視點自然相反係用metal方法玩古典，激得黎保留住古典之旋律同華麗同大提琴不同於電結他之特別演奏法，兩樣完成補完達到能收能放，要metal落distortion一樣得，但玩靚電結他點都及唔上大提琴，所以玩慢歌同大家最期待之"Master"中間，先係大家最想睇同聽。頭兩隻碟90%係cover，不過只得大提琴冇鼓，過癮係過癮但唔襟聽；第三隻碟"Cult"係最完美之"metal-classical"，真正做到得佢地玩到、唔似任何一隊或者任何一種metal之高峰，之後果ｄ對我黎講已經metal得滯唔夠古典"Cult"果種踩界味道冇咁突出，都係正，但冇想像中咁好，勝在越試越多實驗野。同IN FLAMES一樣，歌鍾唔鍾意唔緊要，睇live完全係第二回事，即使最唔好聽果首歌仍然可以好enjoy，一隊band功力高唔高呢樣野好緊要，玩得好大有人在，可以化腐朽為神奇先係高深，尤其睇住佢地拎住大提琴黎焚，比睇人彈電結他再加震撼。更鍾意佢地唔係玩個人主義而係團隊精神，好多band講野歌佬講晒、solo係果個結他手就係佢玩晒，但佢地三個（盲佬session唔計）間場個個都有機會講野，玩果陣個個都有份出手搞氣氛，又三個技術都勁大家輪住solo，同佢地偶像METALLICA一樣，係我睇過最佳live band之一，係由衷地從心而發五體投地敬拜果種，加上選曲加表演都一流，今場演唱會今隻DVD真係。隻DVD仲有新碟錄音花絮，
「頂，原來真係請到Max同BULLET FOR MY VALENTINE歌佬！」
再睇番個guest list，佢地真係一隻碟比一隻碟超班，"Cult"客串果班都係不見經傳，之後"Reflections"有Dave Lombardo已經驚為天碟，然後同名碟再多幾個，今次唔止頭先兩個加Dave Lombardo，連LACUNA COIL女歌手加RAMMSTEIN歌佬仲有SLIPKNOT歌佬都癲埋一份，真係粒粒巨星，佢地而家已經係當今一線metal band，論地位論音樂。雖然metalcore壟斷下仍然藉藉無名。
「新碟九月中出。按之前幾隻教訓，出左碟半年至大半年，就會出新版送多隻碟 or DVD。好在而家我已經放棄追碟追metal，等得。」

受APOCALYPTICA影響，返到屋企立即焚晒麥記全線先訓 － 「全線」只講緊佢地八十年代全部，由佢地最出名隻九一年黑碟，已經接近唔需要理了，九零起到而家咁多隻碟，每隻聽一兩首歌就夠，點fans法都唔多需要去追，因為太．．．廢。再對比八十年代佢地四隻碟，唔難明點解咁多人咁憎METALLICA。睇完APOCALYPTICA玩METALLICA八幾年ｄ歌，再聽番METALLICA頭四隻碟，不得不讚嘆已故bass Cliff Burton之偉大。第一隻碟"Kill'em All"，係Cliff Burton剛剛入隊時，差唔多全部歌都唔關佢事，而係其他member James、Lars甚至Dave Mustaine寫，都係最最元祖之thrash metal、仲好英國metal的初代thrash metal，就係當時隊隊都玩包括SLAYER都係果個款好punk好英式，而家聽梗係覺得老土同差好遠啦，但廿幾年前當時黎講已經係果個年代之extreme metal了。因為Cliff Burton之神技同智慧，第二隻碟"Ride the Lightning"同上隻分別極大似換晒人玩，單第一首"Fight Fire With Fire"個木結他intro，一起已經知道唔係普通碎料，全隻碟亦技術同複雜好多，同 － 更重要 －暗好多，跟住"Master of Puppets"直頭話俾你聽乜野係thrash metal：警世歌詞、黑暗氣氛、fing斷頸之riff/beat、progressive rock式快慢穿插、無窮力量，當然再同之後「遲左」ｄband同碟例如SLAYER同TESTAMENT比，有人會覺得其實METALLICAｄ野唔多屬thrash metal（坦白講，確係，因為METALLICA比起其他band其實係好．．．pop），"Ride the Lightning"同"Master of Puppets"兩隻碟係thrash metal甚至metal整體最重要兩作，已經係歷史公認唔需要爭論，而METALLICA可以造就呢兩部metal經典、成為thrash metal界皇者，一半係本身技術同表演功力，另一半原因係有Cliff Burton。想知咩叫前衛？聽APOCALYPTICA玩"Fight Fire With Fire"，中段solo果部份根本可以算neo-classical。再聽"Orion"，中間開始又係已成永恆經典之bass/space solo，根本已經唔係當年一般metal友所諗得出玩得到，係屬於progressive學院派之思維，Cliff Burton已經超越左同年代甚至同輩太多。專家會話：
「好多band都係噉玩法啦！又唔係冇人將classical加埋metal同thrash！」
冇錯係好多人都知之事實。但"Ride the Lightning"係84年。如果當初Cliff Burton冇入到METALLICA，METALLICA會點？又如果86年佢冇走到，METALLICA又會點？如果佢仲在生，而家成就會有幾高？相信會同Billy Sheehan一樣受萬人敬仰。
至於再之後"...And Justice For All"，Cliff Burton死後第一隻、Jason Newsted加入第一隻，仲係thrash metal，不過大幅減慢而progressive metal左好多。好唔好聽？我較膚淺，thrash metal都係怒焚怒去適合我，但呢隻反而聽得最多，可能因為複雜，每次聽都有新野聽到，引到我不停聽卦。兩個bass相比，好多人狂鬧Jason，係Cliff Burton實在太神，但Jason彈同創意有自己一套，佢玩法近前衛同death果邊。不過，要寫唔會係度寫喇，要寫的話要多幾千字都寫唔晒，我又唔係專家。
單一隊band，要聽要研究，已經係幾十萬字都講唔晒。相信metal我仲有好多好多年先會玩得厭。

琴日兩個靚妹，仲要係上黎玩果隻，已經相當神奇。點知今日係成群靚妹上黎，真係搵metal的靚妹，執左三隻全部係超激超brutal果種。而家ｄ靚妹真係。
「阿切，你走得太早了。」
近來TRHK陰盛陽衰得好緊要。反而多女性出現，同埋搵親都係好extreme好brutal果種。呢排好唔正常。噉男果班呢？依舊：
「有冇呢隊？冇呀，噉呢隊band有冇果隻碟？又冇呀．．．呢隊band會似我搵果隊？試唔試？唔使喇，我淨係想搵果隊band同果隻碟。我都係走先。」
原來呢排仲係好正常。

果真陰盛陽衰。而家反而日日都有女上黎，混吉又好、幫襯又好，女真係多過仔。好似今晚冇見成年的Emma姐出現。
「邊個係Emma？」
「要解釋，需要追溯到兩年前！」
而家英國讀緊書，因為家境小康（應該話大康），一年總會返幾次香港，逢係長假或者大節日實出現，上年暑假之後一路失蹤，到成年後而家07年秋都就到再蒲頭。
「前日返到香港，第一件事梗係立即上黎掃碟啦！」
「而家買三隻二百八。」
「二百八十三隻？英國二百八十可能先買得一隻！」
主要係聽folk野，folk black、維京同少少power & melodic death，不過講到folk black同維京係我身邊聽得最廣研究得最專之一個（「唔係梁生咩？」「梁生係全香港聽black metal聽最多最專果個！唔止只folk black！」）。不過住英國都唔係點開心，一來治安唔好二來生活指數奇高，三來係有好多livehouse，住個地區成條街都係bar同club，間間都係播rock同metal野，晚晚有live show睇，
「不過唔好諗住有好多metal gig，因為多數band一係GREEN DAY，一係BULLET FOR MY VALENTINE，metal好少！想睇extreme metal？唯有等外國band黎英國！」
冇計。世界潮流。而家仲邊有人聽extreme metal架？（講緊真正extreme metal整體，唔係只追幾隊band之「聽extreme metal」）。返到香港，佢繼續好努力地宣揚extreme metal。
「我ｄ姨甥仔婷甥女見我聽metal，覺得大姐姐都聽就係型，所以佢地都慢慢開始聽metal！」
well，同好多人開始聽metal 動機一樣。之後係聽metal定聽metal band，又要睇做化。

八點幾上黎，坐左個零鐘就走，剛剛好係上黎TRHK攝時間坐左成晚的沙包瘋，出左去學結他缺席之時間。今日皆旺各位可以聽到佢慘叫：
「點解？？？？？」

近來都係朝早好多野做，做做做做做做做一大輪努力工作（懶惰永遠係勤力的最大原動力，唔勤力做晒野邊有得懶？），跟住開開心心食飯，訓醒晏覺就開始上網同寫野的自由自在生活。今日仲要係禮拜三，正放工仲可以出去玩。
「唔係夾band咩？」
「唉！甭提！」
今日先知道，原來大角咀出尖沙咀咁Ｑ快。梗係唔會無端白事出去啦，通常行尖沙咀我鍾意星期日九點幾十點人都冇過舖頭都未開時出去，夠少人夠靜嘛。今晚出去，係買夏韶聲同NIN。NIN我掙扎左好耐，因為太貴，
「六舊水呀大佬！」
仲要機場搞，即係加多一舊水車錢。但掙扎一輪，唉，乖乖俾錢啦。始終我係超級NIN fans，而夏韶聲同樣聽左咁多年，加上今次演唱會班底超強（查實邊次夏韶聲演唱會班底唔掂？），今個月娛樂消費一鑊過玩晒。呢兩場騷會係今個月重點。同埋，一如以往，一日Ｎ餐要靠各位同事的送頭送尾了。
買埋飛先至七點七。簡直早到黐線，即係有時放工上到舖頭都冇咁早呀。當然行埋HMV同玩具反斗城先走啦。返到屋企再同隻狗落狗跑跑（入完廠出番黎，要運動番下了），仲有大把時間上網寫野同打機。C&C3，越玩越開心，不過打極都係打對戰仲未開始打劇情。無無聊聊又Wild Guns，拍得住當年The Last Stand，而家仲係日日唔爆番一兩舖唔訓覺。Ｑ多野玩。

另外，相信好多人都知啦：
「NAPALM DEATH去深圳喎！」
你見我提都冇提過。因為根本唔需要提。有心追metal，一早已經知呢單野，係冇心係唔追，NAPALM DEATH咩料都唔會知，更加唔會理呢場騷。抵睇到爆啦大佬呢個價錢，係衰時間嗟！只不過好唔明：點解ND深圳演唱會，會搵兩隊香港band做開場，仲要係兩隊metalcore band？係grindcore都係core，但始終偏extreme metal範疇多過hardcore/metalcore，反而NAPALM DEATH咁大隊都係搵metalcore band做opening，extreme metal真係沒落？
仲有樣野，又係好多人都知啦，ARCH ENEMY會去北京，深圳相信唔會玩架喇，成本嘛大佬當紅到爆喎，搞一場騷咁易咩唔使錢咩？冇錯，大陸已經越黎越發達，好多band都會到大陸表演，因為市場容量同接納性。
「ARCH ENEMY點解唔黎香港？咦，NAPALM DEATH之前唔係話九月黎香港出live咩？」
好多香港人成日怨點解冇騷睇，一年之間而家連大陸都差唔多個個月有大band睇，香港今年一場metal show都冇舉行過。點解？有時候，香港人都不得不怪自己，有ｄ野係自己做成。賣緊音樂搞過騷的我，絕對明白、絕對知道、絕對講得出。