段記



9/6/2007 SAT

200769版罪 之 W11爆K冷誕大典


Bonus Track:
2006823版罪 之 trhK



10/6/2007 SUN

今次版罪、今次trhK,絕對玩得唔夠喉,但玩得夠癲,今日起身咳,痰中帶血,嗌得激得滯卦琴晚。一點唱完(太早了),返到屋企再搞多陣野先訓,第二日起身已經兩點幾,獲邀參加「剪綵儀式」(呵呵)都去唔到添,唔使開舖咩大佬!至於舖頭當然係正常的一天啦,咪即係冇人囉,幾近一個人都冇,大佬今日幾大雨先得架之前果晚已經紅雨,就連皆旺一樓各大玩具舖一係唔開,一係九點(未夠)已經收皮,皆旺108過左九點半先收,已經係「堅持到最後」了。想知今日有幾得閒?係可以接近DT(DARK TRANQUILLITY唔該唔係DREAM THEATER)全線直聽晒完全冇被打斷過冇人阻止,證明幾無聊丫今日。接近全線而唔係全線因為我都未追晒,仲差頭兩隻碟同中間兩隻,不過都夠死喇因為今日噉樣未全線都成七隻碟夠日頭聽到夜晚,真係齊晒十幾隻的話聽到收舖都聽唔晒。結論係:
「DARK TRANQUILLITY,由始至終都係瑞典最強melodic death樂隊,甚至係自有melodic death以黎當中最值得尊敬、最應該尊重之一隊。」
好多人聽melodic death,除左聽旋律,仲為左夠快、夠爽、夠多solo,同埋「夠pop」,所以「BODOM才是皇道」。但DT係完全背道而馳:melodic death metal band夠膽死唔玩solo、唔晒solo、夠膽死中板同慢板歌多過快板歌、夠膽死玩progressive同玩keyboard都唔玩技術野,噉都係melodic death?(所以立即冇人聽,哈哈)老實講,以前我都係太鍾意佢地d野,膚淺的劉Sir聽歌係要快要焚要勁嘛,但聽多左聽耐左加上對佢地認識深左,感覺就唔同晒:剛開始同IN FLAMES一齊創立melodic death時可以話係較「大路」唔太特別之melodic death,自"The Gallery"成型起DT一路同其他band唔同,好似IN FLAMES越來越pop,但DT係調番轉越黎越實驗,而到左而家已經冇幾多隊瑞典/芬蘭band仲真正係玩(old-school) melodic death時 - 你唔會話IN FLAMES、SOILWORK、CHILDREN OF BODOM同NORTHER而家d野仲算係melodic death卦 - 所有元老只剩DT一隊繼續堅持玩番自己創出黎果種音樂,而唔係放棄自己一路支持之melodic death轉玩賺錢之美國野、metalcore,繼續玩「唔pop」之melodic death仲要越玩越堅(上年隻"Character"絕對係一班老鬼新碟之中最激最"melodeath"果隻),所以我誠意推介DT俾各位想搵有水準之melodic death同extreme metal之朋友。
係推介DARK TRANQUILLITY新碟,但唔係DREAM THEATER新碟。此另一隊DT,我唔係專家都講到俾你聽,而家除左技術之外,講歌講音樂真係已經去到盡頭 - 其實盡頭一早已經過左,就係"Metropolis Part 2"。講係噉講,但隻新碟相信總有一日都會買番,始終都係半個fans「由細聽到大」嘛,好頭好尾就追埋佢啦。買埋隻新碟就追齊晒佢地所有大碟。呢個可能係唔少「DT fans」都未能達到之成就。

聽晒近全線DT都未夠無聊?仲有。冷爺帶契睇今晚亞視七點鐘個港台節目《西遊記》,今晚講挪威首都Oslo,即係一般旅遊節目從來冇興趣睇,但港台做唔係講旅遊,而係講地區文化同社會問題,立即好睇得多,港台而家都好少見呢類有興趣睇之資訊節目了(罷睇《過渡春青》!)。冷爺第一件事打個電話黎叫開電視就梗係有正野睇啦,聽extreme metal唔知Oslo都知道挪威咩料唔可以唔睇卦,有留意black metal肯定成日見到是但一個名。今集主題係挪威之青少年自殺,最激試過一年內全國有四份一青少年自殺,嘩勁呀挪威呢個國家真係好doom,難怪會有咁多doom metal同suicidal black metal band。點解挪威呢兩種metal會咁強?就係睇你用咩方法宣洩,好似訪問果班清一色係十四五歲靚仔靚妹,全部都係厭世唔開心果隻想死左去算數,但睇番十年前,Ihsahn十四五歲果時已經搞緊EMPEROR寫緊歌出緊demo喇。有d野都係睇你點面對遮。
北歐/挪威metal可以壯大同有屬於自己之metal,除左文化同歷史背景仲有地理因素:北歐地區森林區多,除左陰森仲有更多有關自然之宗教同傳說,另外北部日照時間短,一日可能得幾個鐘見到太陽,當堂令全部人灰晒想死。所以你見呢個地帶好多doom metal band。睇過metal band訪問:
「點解芬蘭呀挪威呀呢d地方咁多metal band,人口入面有一至兩成聽metal,仲要metal都可以上到流行榜?」
「就係因為北歐咁灰,所以d人先要聽metal同玩metal振奮人手,又或者發洩心中抑鬱,唔係好容易自殺死!」

你當metal只係一種潮流,音樂在你只係一個電腦file、一陣過耳風聲、填字遊戲入面一個詞彙,但真係有心去研究音樂,可以透過音樂認識到好多人文事蹟,又或者調轉由國事民情對聲音有更深入了解,更能夠認識到投入到果種音樂文化,就好似明白點解講black metal一定諗起挪威之餘講death metal又實會係佛羅里達,同搖滾/金屬點解係屬於窮人同中下層而唔應該係潮流主流。同北歐人點樣面對自殺死亡一樣,你消極求祈聽過就算定用心去充實自己,最後有咩得著下場係點,係現眼報。



11/6/2007 MON

全日只需要關心一個電話。可惜好短。我等緊下一通電話。



12/6/2007 TUE

劉Sir的一餐(Cheez線版)



13/6/2007 WED

「唔好意思,我仲食緊芝士!」



14/6/2007 THU

「食完芝士,梗係食雪夾糕啦!」



15/6/2007 FRI

「...冇晒野食喇卦?」
「邊個話???」
唔好意思大家。我都想停一停。只係,劉Sir都係迫於無奈:
「噉d靚女係都要請劉Sir食野,我有乜計???」(淚流滿面地)
真係飽到滯一舊三文治已經,不過都係齋餐肉夾芝士好食d,加左蛋d味撞晒唔夠啃。好在今日lunch個餐牌又係冇啖好食,叫左個叉燒湯意粉就算,懷緬一下落茶餐廳食快餐的歲月,我好叫鍾意食茶記叉燒湯!今個禮拜簡直係人間天堂,冇咩野做一連幾日齋上網上全日渡日辰,又有各位同事熱心呈獻各式美食零食,除左上網訓覺同同事發癲怒玩怒吹水(可能老細都頂唔順我地,今個禮拜公司成日處於冇皇管狀態),就係食好野食雪糕食雪夾糕同埋開零食大會,無聊玩下就六點鐘收得工,正呀人生在呢d公司做野真係夫復何求?
「死,如果第時轉工或者間公司執左,點Q算?又要做野,又冇晒靚女同事的熱情照顧,劉Sir會死的!!!」


唔止日頭,夜晚都係。禮拜五又係人齊的一晚,噉又一桶。今個禮拜真係食野食到黐線,但唔計雪(夾)糕,全個禮拜我差唔多日日/晚晚都係食霸王餐,呵呵呵∼今晚有好多計劃。剩番六個月,除左要碌舊錢出黎,仲有好多野要諗定。
今晚仲有Bon Jovi新碟。係我係佢地超級fans,其中一隊最早迷之heavy metal/hard rock band就係佢地,只係都不得不認同一進入九十年代,確係立即變成兩回事水準差好遠,都有追佢地d碟,只係真係一首兩首噉揀(講係噉講,但好似買下買下又買齊晒,呵)(冇辦法,劉Sir的音樂態度就是這樣)。2000年隻"Crush"都唔錯,有我最最最愛之Bon Jovi歌"Next 100 Years",某程度上比《藉著在禱詞之上讓我們堅強地活下去》同《你條仆街給了愛一個撚錯的名字》更得我心,只係唔知點解,劉Sir鍾意果d野,就係從來冇人會留意鍾意,見過咁多,好似得我一個鍾意呢首歌。一直到上隻碟、2005年隻"Have a Nice Day",得喇根本唔需要考慮,一聽到派台首"Have a Nice Day",
「八十年代返黎喇!」
唔止音樂仲有歌詞,係Bon Jovid歌詞衰起上黎可以衰得好離奇,但你睇番佢八幾年d歌,有d歌詞係藍領白領睇到感動流淚,你話佢pop好商業好,當年佢地賣錢得黎確係為社會中下層出聲,亦因為噉佢地先可以成為咁多隊glam/hair當中最紅最成功一隊,而八幾年之後一直到"Have a Nice Day",歌詞終於再重溫果種社會生活之時代感,所以一聽就知道冇得走,你話全隻碟得"Have a Nice Day"好聽,因為得呢一首最rock?我冇所謂,唔夠rock,唔代表唔好聽。就好似新碟"Lost Highway"。連似番"Have a Nice Day" rock番少少之歌都唔係好多,變晒country (pop) rock/soft rock野,係唔rock,係「唔同以前」,但噉樣美國地道搖滾我又受喎。好過之前所謂"acoustic"果隻"This Left Feel Right"先啦!
「即係metal碟都未買,已經係噉跌錢!」



16/6/2007 SAT

超眼訓的一日,好在今日公司最大兩個老細都勁忙走黎走去,我可以光明正大地a) 食坐我隔籬個shipping師奶請我食之麥記早餐(又係有女請食野(師奶唔係女咩),又係唔使錢有早餐食,吹咩) b) 凳上拉直成個人地訓覺 c) 想打喊路想伸懶腰隨便啦既然連訓覺都差唔多冇人理 d) 繼續食雪夾糕 e) 等公司拜神食飯。下星期二端午節,本來定星期一公司拜神食飯,點知有客call話要下星期一上工廠,噉食呢家野冇左劉Sir又點成事呢(...),為左佢全公司特別提早今日就拜埋神。真係勞煩晒。拜完神食完飯(即係同神檯爭飯食)梗係立即飛走啦.係好多地方去好多野玩,不過最後都係乖乖地上舖頭,除左得閒得滯,得一個理由可以令劉Sir咁早蒲頭遮:

Dimmu Powgir

真係好鬼死多。連返幾水extreme,終於黎一大水old-school metal同power/prog野,唔知款多量都超多。呢水貨聽呢種metal黎講真係隊隊隻隻都差唔多經典級數,又睇下可以賣到幾多、有幾多人會買/追?在這「新」「潮」世代仍然堅持old-school,其實係好不切實際的一回事。以前(都唔係好耐,可能一兩年前都冇),你唔介紹呢d野俾人聽,會俾人小,因為係必聽必儲級數;但到而家介紹呢d野俾人聽,俾人小得仲勁,因為已經冇人知佢地咩來頭乜band黎,同唔係emo、唔係metalcore,你同呢兩樣野冇關連 - 音樂上同商業上都係 - 呢個年代已經冇人會理你。經典又點教父又點殿堂級又點神檯都上埋又點?
心水?其實唔介紹你亂咁買求祈一隻都冇死錯人,就係堅成噉。真係要講講?多數都係一d我有留意開但未執之band新野:AVANTASIA(第一集係我最愛power metal CD之一)、DARK LUNACY新碟(「恆左」,實際上試過先知,但同樣地追左頭兩隻都冇得唔追埋啦?)、FAIRYLAND新碟(上隻碟好聽得太恐怖了,新一隻未試都已經買硬)、DARK MOOR全線(最少都追晒女聲果幾隻啦)、ETERNAL TEARS OF SORROW(新碟出左咁耐自己都未買,唉)、FIREWIND(結他手超勁,NIGHTRAGE DREAM EVIL OLD MAN'S CHILD ARCH ENEMY都有佢份玩喎大佬)、《歌德卡伯勒》(唔使問點解啦,見到THERION個名已經知道要自動自覺添香油朝聖)、VITAL REMAINS新碟(同樣地唔需要多解釋),仲有最最最重要果隻:
HIBRIA "Defying the Rules"
power metal對我黎講屬於easy-listening一類,就同hair metal、hard rock、pop rock呢d一樣,冇野做時拎出黎焚兩焚十分之開心,好似RHAPSODY你話隻隻碟一樣首首都係噉我冇問題喎照係噉笑住焚法一次過七隻連播仲開心添,而DRAGONFORCE係我最常聽之樂隊、"Inhuman Rampage"確係我最常聽之唱片,有時冇野做攝時間都係拎佢出黎焚一兩首浪費番兩三個字,喂真係喎雖然好多人都話已經聽到唔想聽聽到悶年幾黎我每次播都仲係聽得興致勃勃喎。但劉Sir呢d怪胎唔好理啦,power metal呢種音樂確實非常容易聽厭,因為類型限制大十隊band有九隊相同/相似,亦難怪好多人聽power metal都只聽大band又聽幾隊band聽一排已經聽到厭唔繼續聽落去唔再追,因為商業性質同音樂發展都已經俾大band同唱片公司控制加壟斷(其實metal發展到而家,仲有幾多成唔係噉情況丫)。所以要聽underground,因為好多有料到之band種種原因勁過好多大band都成唔到名失蹤,係呀我講緊HIBRIA。雖然power metal你點播法我仍然係聽得開心,但聽得開心一回事,要達到聽到仲可以「嘩!!!」一聲彈起身已經冇邊隊新或者舊band做到(「類型限制」也),唯獨佢地隻碟第一次聽已經嚇到唔止彈起直頭撻埋落地,勁快加勁高技術加超勁歌佬,咁堅冇理由會紅唔起喎特別係呢幾年好多power metal band已經食晒屎時?睇睇隻碟,原來已經係三年前2004出仲要只出得一隻碟,點解?因為巴西band卦。巴西metal band就梗係超高技術超快,但亦可惜佢地係巴西metal band,如果唔係巴西係芬蘭或者歐洲,佢地而家應該可以有DRAGONFORCE咁紅。時也命也。不過佢地官網未摺仲有update下,隊band應該未死卦。希望佢地可以再出到碟捱得起啦。
至於我最愛power metal band?以上甚至貨單所見都冇出現過,唔好意思。假使有一日會出現佢地d碟,再寫啦。不過都好難。因為同HIBRIA一樣,佢地一樣係勁到仆街,技術甚至史上power metal band中最強一隊,音樂亦200%帶出heavy metal精神同味道,但只可以紅過下而紅唔起,兩隻碟咁大把就唔知去左邊,d碟甚至想搵都唔係易搵。我都好希望呢隊band可以重出江湖。
「呢個世界,仆街實在太多,懷才不遇者更多。」

今日,OK啦。好多過癮客人同好多鬼,噉樣有單開又有水吹又有野玩的日子先似開舖嘛。今晚節目係...開信。成幾個月未睇過信我,一路堆係個芒側邊,已經高到遮住左左下角「開始」個字,多到我都頂唔順,反正舖頭都唔會有生意架啦拎晒上黎慢慢開好過啦(呵呵)。我都冇諗過呢幾個月可以差唔多一日一封信多收到!幾十封信開一開就已經收得舖,時間剛剛好,仲可以慢慢躝上去新世紀廣場,睇:

Fantastic 4 Silver Surfer

套戲真係谷得好勁,十四號上今日十七號全日映成十幾場,我睇十點二場接近全院爆晒,其他漫畫英雄片同動作片都唔係套套得,最特別係好多細路,勁多老豆老母帶埋班靚仔靚妹一家大細噉黎睇,蜘蛛俠都冇咁多呢個情況發生,莫非神奇四俠其實係套笑片黎?除左睇四條友,當然仲有最重要果樣野:
「變形金剛!!!」
終於有預告片睇喇!睇到我尖叫大嗌!毫無疑問,電影版機設一定會俾各位老fans同hardcore fans狂小(所以d玩具唔賣得囉),但係我超超鍾意喎大佬香港要等到七月底先上遲人地差唔多成個月!段預告片播完,老豆老母問班靚仔:
「睇唔睇呢套呀?」
「咁低B!」

仲要勁多靚仔如此反應喎。頭先睇預告片時睇到尖叫果個劉Sir立即唔敢出聲話自己鍾意,原來佢咁低B而家,搞到俾靚仔笑番轉頭就唔好啦。(變形金剛都話低B,莫非而家d靚仔要玩到《恐懼鬥室》咁激先叫正常?)
睇過咁多美國漫畫改編電影,唔係好多個系列成功,咁耐只得《X-Men》、《蜘蛛俠》,同《神奇四俠》,《X-Men》好睇在批判社會同人性,《蜘蛛俠》就真實反映到平民英雄之兩難,《神奇四俠》本身已經過癮,接近全部超級英雄都係大隱於市隱姓埋名冇人知真正身份,F4(呵呵)係少有公開自己身份之超級英雄,成為公眾人物加上隊員之間鬼打鬼,就變成套戲大半時間都唔係打敵人而係自己人打自己人之(反)英雄笑片,套套都係追求型同場面時,呢種玩法反而少見,加上編劇真係一流個劇本勁多美式幽默笑位,但好笑得黎又唔會變左英雄包裝白痴片,動作場面仍然保持荷里活水平,即係有劇情得黎有得打,打得黎又會好笑,笑之餘又唔會無厘頭,仲要幾樣野加埋平衡得到,套戲唔係長只得個半鐘,又唔會嫌唔夠喉而剛剛好,睇完之後真係有d興趣睇多鑊,唔止為打戲,再入場笑多次都抵!絕對好睇過第一集,即係今集已經打得少,都多過上集同精彩過上集,加埋好笑過上集呢!都唔使擔心仲會唔會有下集,伏線太明顯了。
全套戲我真係冇咩投訴,直到最後之前。銀魔可以話已經係主角,但其實主角四條友出場咁多次,都冇一次係正式同佢打,又講到咁勁但結果求鬼祈噉就俾軍隊捉左,喂無聊左少少喎!又銀魔一飛就半個地球,火人又一齊跟住佢半個字唔使美國飛到去歐洲,喂有冇咁勁快成噉呀?到最後又無端端有架神奇四俠版飛機,拎部PDA篤一篤立即三個字唔使美國飛到去德國,再跟住架機仲可以一分為三,又一個字唔使德國飛到去上海添,喂即係我知你係超級英雄遮都唔會高科技成噉卦,美洲去到亞洲仲快過搭的士?架「飛機」就真係好似的士噉樣款,仲要飛到咁高飛得咁快架野係開蓬先吹脹,變到好似日本特攝片怪獸片果d地球防衛隊咁戇居,而睇超級英雄片、特攝片呢d最唔鍾意就係呢d超越晒當今年代之超現實高科技產物,又永遠唔會解釋點解會有邊度整出黎同得主角先有/先識整呢d高科技野。就因為呢部「的士」搞到套戲cheap左了。無奈。



17/6/2007 SUN

回鄉證就過期,本身諗住今朝去換張卡(我仲係old-school地用緊大大半的回鄉證而唔係細細張回鄉卡真自豪),點知咁蹻聽日要上工廠,冇得換證一樣九點就起左身,歡樂早場照常營業嘛。第一站當然係尖咀,十點出到去玩具反斗城剛剛開門,雖然咁早都已經有唔少人行緊 - 應該係鬼 - 而我就梗係立即仆去睇變形金剛啦。諗住尖咀做得總舵梗會多d變形金剛,真係多d,量多唔係款多囉。而家谷電影版谷到除左電影版果d其他接近一隻都冇收埋晒唔放出黎。套戲仲有成個月先上、玩具開始賣都唔係好耐,半個月唔夠已經勁多舊貨新版出、兩三隻夾埋變boxset同混水摸魚貨,好多唔係電影版而係近幾年日本仔畫果d,油過隻色換過個名再用電影版個包裝就當係新玩具拎出黎,最憎就係呢d改隻色就當新野呃錢。其實黎咁多次都冇咩分別架喇,變形金剛要出暫時都出晒黎,模型我又唔好睇少好多野,每次黎都係望住個手榴彈,絕對相信下一次黎就會忍唔住掃左佢。都有意外收穫,玩具車仔都好多野玩喎!細細個時冇咩玩具,但合金玩具車仔都儲左唔少架!細個果陣思想簡單,有架玩具車仔碌下碌下已經好開心架啦,最鍾意係拎晒d車一架跟一架排條車龍出黎,噉樣排下又收番跟住望下碌下就好心滿意足架喇,細個嘛!可惜d車仔已經唔知去晒邊。近來玩具反斗城又力谷Hot Wheels系列,即係玩具車仔除左靚同擺講玩係冇乜好玩(撞(爛)囉),但Hot Wheels狂玩場景同機關仲要玩到好勁,有隻game係巨型機械人襲擊城市你飛車打低隻機械人,有隻玩盜墓迷城架車一彈出去唔知點轉圈轉到上塔頂再過機關吊轉番落黎再一野撞開石門拎寶物,睇場地設計都好正,係開心架又係童年回憶,只可惜冇錢冇時間,同屋企都冇地方了,喂買件呢d境品野都唔係細件架大佬。等我玩埋變形金剛先算啦。行左唔係好耐就走得。冇野睇?唔係每次入玩具反斗城我都有好多野睇。問題係而家有半間「裝修」緊。玩具舖同唱片舖一樣,一經劉Sir幫襯後,都收晒皮了。
除左玩具反斗城,尖咀當然唔可以唔行HMV。買CD?冇乜好買呀,都係Bjork同椎名林檎囉,metal野就算啦,同埋近來對戲DVD興趣大,好在身痕出一出黎,"Cube"全線噉就集齊左三份二,第一集行版而家長期減價,但另外兩隻一係唔出現出現都得超貴進口版,點知今日撞到隻仲要只收廿五蚊雞只係第一集行版減價後五折,兩隻夾埋都唔夠一隻正價碟一半,嘩平時搵都難而家出現仲要平成噉唔使諗啦旋執啦!再差第三集搵到埋就可以開波(兩舊水一隻黐線!幾時有行版?),三隻碟齊晒一野過落都幾爽,問題係齊晒都好,幾時會有時間開波?另一個維持歡樂早場原因係今日屋企lunch過銅鑼灣食飯,喂fit晒啦本身我今朝就係諗住換完回鄉證之後尖咀再銅鑼灣。又係先行玩具反斗城,變形金剛唔使睇啦其他都係,都係發掘新玩具時間,呢邊Hot Wheels系列冇咁多亦冇手榴彈,不過多左幾隻遙控玩具,有隻波形外星人可以防守巡行攻擊三段變形,同行果時係用波形個身碌好過癮,又有套遙控坦克車可以兩部互射,唉而家d細路真係幸福當年好多野都係只有睇冇得玩。銅鑼灣HMV過到黎就梗係為左搵戲啦,但好灰一場黎到居然一隻斬獲都冇,上次黎見到有幾隻都想買,特別係一套玩喪屍笑片中之經典上次黎廿九咋見到!點知隔左唔係好耐再黎,頂你已經一隻冇剩想正價買都冇!都未夠,過到黎當然要再去聽聞左好耐之White Noise朝聖,都幾偏僻下撞左好耐先撞到去,點知咁早又唔開門!今日歡樂早場真係唔好歡樂!唔緊要,黎緊個禮拜日應該會如願去搞掂埋個回鄉證續期,到時又可以出去玩!


今日好得閒結果,可以做同寫好多野,仲有時間打左盤機,同睇DVD。先睇完ARCH ENEMY再睇埋TESTAMENT原裝班底復出巡迴,一班人睇,睇完之後真係有衝動立即上band房!即係鍾意聽邊樣野一回事,講玩live同睇live,old-school hard rock/heavy metal同thrash永遠是皇道。講夾band講左好耐,但真係過埋年都仲未成行。難得今次大家咁大共識,搞隊野玩番d老坑metal同thrash,希望搞得成!
「Pain of Sevention,集合!已經諗到合適人選!只差識啡solo之結他手!」
TRHK一係好靜,一有人時就有好多神奇人物出現,一連幾水貨extreme同old-school都有,好耐冇蒲頭之阿Big即上黎狂掃!
「最緊要個封面夠淫、歌詞夠鹹濕!我都想買多d,不過冇錢!」
「挑!返少轉大陸叫少次雞夠買多幾隻碟啦Big爺!」

又有個細路走入黎,通常同類個案個小朋友見唔係賣卡通又唔係賣翻版game五秒內就會走番出去,但勁呀今次個靚仔係入黎走去death metal個架度再攬住一隻封面有幾多個骷髏頭之grindcore碟唔放!
「我係迪士尼見過呢隻呀!」
「細路你真識貨!呢隻就係傳說中之『加勒比死亡金屬』!」

跟住個阿爸走入黎叫條靚仔走,條靚仔都唔肯放手唔願走,到最後要個阿爸武力加言語威迫,先夾硬拉到個細路出去,一面拉個靚仔仲要同阿爸鬥力係都要留守TRHK同加勒比死亡金屬一齊去到世界盡頭!可惜阿爸唔通氣最後個細路都係要走,香港噉就少左碌未來metal棟樑!

咦今晚節目就係同肥仔兩個坐係度睇DVD,睇晒成場TESTAMENT,同吹足成晚水。由此可見今晚生意興隆。經劉Sir教壞,華潤雪夾糕近來突然銷路大增,因為有好多人好似肥仔噉,睇過劉Sir條神棍妖言惑眾之後水魚被騙就走左去買黎食,肥仔條傻仔(...)仲要一買就係三盒!睇黎我可以為窩氏雪夾糕任香港區代言人!
又吹開先發現,原來TRHK的詛咒是真的。從龍珠到皆旺,TRHK已經經歷左五寒六暑,而死剩之龍珠人入面,只得我同佢兩個仍然單身,又只得我同佢兩個仍然持有TRHK鎖匙,其他果d一唔做還番條匙,就立即有女了。對唔住,肥仔,係劉Sir、係TRHK連累你,以metal之名糟蹋左你終生幸福。



18/6/2007 MON

我最愛的上廠日子,公司冇晒野做,有時上網同寫野消磨成日都幾無聊,走一走上工廠食個飯訓個覺仲舒服。不過今日就無聊左少少。個客約係約朝早十一點到工廠,噉行工廠一個圈個零鐘搞掂啦,十二點食飯再訓覺兩點彈起走人返到香港先四五點等埋打卡就閃,但今日趕早車返到公司先知個客改左晏晝黎,喂十點幾咋喎而家點算?我地良好員工盡忠職守,用工廠部腦遙控番公司部機覆晒email整好晒d文件,跟住就係玩。劉Sir的「玩」即係「恃住自己冇野做騷擾工廠其他同事做野」。好容易就到十二點鐘,工廠午飯時間了。
「阿劉Sir!(好明顯工廠的同事/高層係唔會撻呢個朵啦)知你今日上黎,我地特登斬左隻雞你食!平時我地都唔會食得咁豪呀,你未食晒隻雞唔好走呀!食完仲有呀!聽日端午節,我地工廠每人派兩隻粽,一蚊一隻有糯米有豆有蛋有瘦肉仲要好大隻!」
「咁多餡先一蚊隻?」
「係呀搵得好辛苦先搵到架!早前搵左幾間,間間都賣成個三個四一隻,幾貴!到最後有人介紹先搵到呢檔一蚊隻!」

仲要係前酒樓大廚阿姐主理,嘩今餐勁和味又超飽,一個人清大半隻雞喎大佬!因為兩點見客,特登早半個鐘起身補一補妝準備定,點知,班友蕩失路。蕩到要派車去帶路,三點先蒲頭。
「頂!蝕左!早知三點先起身啦!」
台灣客,兩男兩女。追開劉Sir段記、對佢見客經驗有所知,都知道重點係女。台灣妹真係冇得頂的。莫講樣靚身材正,就連份人同把聲都嗲過人。
「喂107!係咪應該搞番次台灣版罪團呢我地?」
四點半終於搞掂班友,再跟埋少少手尾同玩多陣,五點鐘就開車走了。
「有冇咁多野玩呀?」
雖然今日上左工廠,冇左會計靚女同埋其他女同事的熱情招待&進貢野食,但仲有工廠之花嘛呵呵呵。唔使台灣,好多大陸女仔都已經夠殺晒90%香港女仔了。你會發覺劉Sir其實都幾好豔福身邊好女仔同靚女,但到頭來都係得個望字。等待改變命運的一天。


假使今日有朋友準時上黎,真係對唔X住,五點開車飛到盡都要差唔多七點先趕到返黎,仲要呢個鐘數過關塞車塞到爆左邊十幾架貨櫃車右邊成排旅遊巴夾住,仆到上皆旺都已經遲左半個鐘,摸左門釘的朋友唔好意思今日真係,假使有的話(相信係冇)。預期之內地靜啦星期一嘛,根據工作心理學星期一生意冇二三四五咁好係好正常完全合乎科學推論架,就好似睇戲有平飛起初星期三跟住星期二都唔會揀星期一啦,有興趣上網摷摷論文睇睇。仍然係DT - 唔需要解釋邊隊DT啦 - 因為聽極都意猶未盡,雖然佢地全線一次過怒焚會high爆但今晚得兩個鐘,時間關係只有集中最後兩隻碟。新碟,嘩,越聽越無敵,上隻係夠晒激但今隻寫歌好好多,恆位冇以前咁多但driff爽過上隻,同keyboard簡直係神級編曲,隊band一路咁多隻碟其實都好難揀邊隻特別突出,因為轉極style都keep住極高水準唔同樣都唔會話差得太遠(”Haven"就要傾傾先有定奪),但新碟"Fiction"可以好肯定話你聽,一定係佢地最好之一,除左音樂仲有歌佬,講melodic death數最鍾意一定有佢份死聲清聲都勁同最重要兩種唱法都唔似其他人而有自己唱法,尤其清聲聽聽"Projector"同幫NIGHTRAGE就知道,IN FLAMES同而家SOILWORK的「清聲」收得皮了,真正的melodic death清聲同emo/metalcore清聲係兩種野黎,佢NIGHTRAGE隻碟清聲唱得兩句仔好少但已經收晒其他人皮,都未提新碟最後一首歌佢把「gothic聲」同ToT新女個無敵組合。"Projector"同"Damage Done"已經無敵,"Character"再激d只係整體唔係次次都感覺到順,但"Fiction"係比"Damage Done"甚至"Projector"更接近完美,分分鐘夠同SCAR SYMMETRY第一隻碟(等碟評吧),爭「劉Sir最愛melodic death metal album」之位。印象150%正面,唯獨是一樣野唔多鍾意:錄音。今次唔再Studio Fredman搵到丹麥兩大producer之一Tud Madsen,丹麥聲我係鍾意但呢位仁兄真係好浮動,幫班「未來band」好似RAUNCHY同MNEMIC整聲時夠晒環迴立體空間感同質感一流,但幫番d「現代band」搞立即乾到爆,今隻碟又係衰同一樣野,結他keyboard同歌佬冇得彈,唯獨鼓聲唔鍾意,好焗。一係轉錄音,一係轉番去Studio Fredman啦。我都係鍾意上兩隻碟隻聲多d。
聽metal,真係好多野聽同玩架。


返到屋企,難得聽日假期,梗係聽歌先啦,買左咁多碟都未掂過。好多,不過最後都只聽兩隻,就係琴日買果兩隻。Bjork上隻碟"Medulla"轉style轉得都幾出奇不意,由華麗迷幻變到簡約原音,今年聽到出新碟完全諗唔到會玩d乜,買到返黎,正我最鍾意之實驗野,似RADIOHEAD同Thom Yorke但當然要玩野同啃好多,上隻嫌太靜,今隻立即怒爆但玩聲甚至玩得仲勁過上隻碟,仲實驗好多除左幾部人聲同工業噪音連國樂和風都玩埋,以前有時太過跳舞,越新果d越玩氣氛同音效所以越後我越鍾意,隻新碟直流一流添啦。椎名林檎新碟又係急不及待,東京事變出左幾隻碟終於到佢個人名義出之solo,單飛d野比東京事變自由度大,隻碟玩我最like之big band,冇想像中咁神經喎大部份歌都好正常,唔正常果d都集中後半所以一首一首聽落去係越來越過癮,最唔正常已經係佢把死人聲,不過d歌真係好正,全晚都唔使聽其他野齋呢兩個拆聲女人都夠聽通頂。唉dDVD都仲未開添我個Project: Cube。幾時可以俾多幾日假我呀?



19/6/2007 TUE

紅假開三點,亦即係有最少連續六個鐘俾我任焚,應一應批新貨,今日係power metal日。power metal從來令人又愛又恨,開始聽metal好多時都係由power metal同melodic death入手,但之後大多數發展一係長浸呢兩種或其中之一(後者為甚),一係「聽到悶」而唔再聽轉第二樣野(尤其前者),始終太多糖衣包裝同技術表演就好易冇深度,都係屬於引入同過渡而難為長聽之metal,而另一個問題係power metal前已有珠玉(old-school) heavy metal同hard rock,基於「聽新band不如聽舊band」之思想,同的確舊band追求音樂性而新band追技術追速度相比已經冇咁襟聽,又好難怪power metal唔係好多人心頭最好。但,唔好意思,又係擺自己上檯,唔襟聽一回事,我真係來者不拒任何時間播邊一種野點播法播幾多幾長通通有得聽就得,今日只聽RHAPSODY聽日只聽NIGHTWISH全個星期只准我聽power metal我一樣冇問題仲聽得開心,完全唔會有「聽到悶」同「聽到厭」之情況發生,齋係power metal已經夠我研究一年 - 研究同(齋)聽始終兩樣野。一隻又一隻係噉播,可以好肯定同你講,你係聽power metal,今水貨你真係望都唔使望求祈伸長隻手拎起一隻都已經俾得錢,就係咁激,HIBRIA自不然,AVANTASIA、HELLOWEEN、HAMMERFALL聽power metal冇得唔聽,FAIRYLAND、DARK MOOR、FIREWIND、DRAGONFORCE、KAMELOT、六翼天使一樣,唔好講喇講講下成張貨單都會講晒出黎,但事實上又的確係成批貨都得喎!講左五萬次都要再講:
「HIBRIA,絕對無敵!齋聽bass都夠!!」
正宗的IRON MAIDEN bass!好多power metal band已經忽略heavy metal重要之一部份:bass。而會咁鍾意HIBRIA,除左音樂仲因為佢地果份堅定信念,好多人成日問:
「Heavy Metal態度係乜?」
punk呀hardcore呀呢d立場同態度係點大家都知啦,heavy metal呢?係有,只係咁耐以黎好似冇一個明確共識,想知道的話,上HIBRIA個網兜個圈啦,睇睇佢地團史同所寫就會明白(睇睇劉Sir都會知一二卦,呵呵)。heavy metal唔止係一種音樂,而係一種文化、一種生活態度。所以點解我會咁鍾意佢地。就同鍾意之前提及過果隊「power metal之神」一樣。
FAIRYLAND又係一隊意料之外之奇band,第一隻碟當年一聽最初唔鍾意,因為錄音未夠keyboard差少少,但後來的起心肝自己執左隻(好明顯係因為冇人買,唔係RHAPSODY嘛玩epic symphonic power玩得好過佢地又點?),嘩頂唔使講啦碟評講晒啦直頭係超越左RHAPSODY,RHAPSODY第一隻碟係佢地最特別之一隻因為全線之中其實呢隻中古味最重跟住已經太偏交響,FAIRYLAND就正好繼續呢種RHAPSODY都唔再玩之中古feel,殺著之一就係DARK MOOR個女歌手,新碟睇睇盒底,女人換左個男人,嘩會發生咩事上隻賣點之一就係女歌手喎?好在音樂仍然咁正,中世紀味道濃郁技術、新古典旋律同歌佬把聲亦得,而家仲有band玩(symphonic) power玩得似樣真係好開心,因為power metal已經沒落之餘亦出得太多band。至於FIREWIND賣點梗係希臘結他佬Gus G.(如果有留意希臘metal band,可能會發現好多希臘metal band友都有一個共通點),第一隻當年一聽驚為天人,超八十呀大佬特別係個超沙聲歌佬同手超快結他!入左隻第二隻,同好多power metal band發展一樣,第一隻碟總係夠恆夠啡,第二隻自然會「成熟」d歌progressived又暗d唔再一味死去,鍾唔鍾意睇你口味係點,噉我膚淺就梗係鍾意死衝難衝果隻啦!只係第二隻碟都好Q勁,冇計Gus G.手結他太神!雖然佢出名在power metal同heavy metal,但我覺得佢最勁同我最鍾意果段Gus G. solo,係佢行過studio冇野做搵枝結他幫OLD MAN'S CHILD隨手撩兩撩果一段仔即興guest呵呵。
夜晚冇野做,又睇多次ARCH ENEMY DVD。每次播ARCH ENEMY隻DVD都會引到好多人入黎,d歌melodic夾恆同好聽,仲因為個歌婆(新名詞也),好多人聽到首歌再睇睇電視,
「嘩!女人黎架?」
跟住就會企定定睇,個歌婆把聲實在恐怖到嚇死人仲勁過男人,仲要激到黐線佢一唱其他member幫手唱和音都全部俾佢遮晒,而且CD得拆聲嗌但live嗌之餘仲要勁多嘔泥位,噉樣先正齋唱都勁多變化,就算聽CD聽到悶一睇佢地live都立即紮番醒,仲有而家melodic death界最強雙結他組合要彈SLAYER彈YJM甚至彈J-Rock瓣瓣都掂兩條友技術加音樂感太強,同埋聽落冇乜但查實玩d野超old-school超有料之鼓佬同bass(有追開七十年代鼓佬,睇鼓佬段drum solo一定會會心微笑/大笑),加上全隊band工夫紮實到爆最佳狀態keep足成場live,淨係睇條女唱/嗌/嘔足全埸加狂fing同鼓佬roll足個半鐘都抵番晒醒神晒!犀利講睇ARCH ENEMY真係睇過最佳live band之一,最重要歌同表演都得而唔係只得其中一樣掂i.e.(某些人眼中而家的)IN FLAMES。而想知而家ARCH ENEMY有幾紅隻DVD講晒你知,聲同畫仲有剪接分鏡都係pro到爆的級數,兩set live有一set仲要係高清(雖然用TRHK部電視機仔睇高清低清清唔清係完全冇分別),跟住加多隻碟超勁多訪問同video完全係睇戲聽歌鍾意汁都撈埋的劉Sir杯茶,就音樂、表演、內容同製作質素而言,隻DVD同IN FLAMES場live一樣,絕對抵買。
「咦?唔係power metal日咩?做乜播power metal?」
melodic death唔係power metal,但其實power metal影響melodic death發展好深,特別芬蘭果邊,所以你聽CHILDREN OF BODOM會覺同聽SONATA ARCTICA呢d冇咩分別,根本個底一樣只係唱把聲唔同。但知唔知melodic death metal呢家野有趣在邊?由九幾年中起,melodic death到而家都有十幾年歷史,而發展得好快每兩三年就「進化」一次,「現代」之melodic death - 你仲算佢係melodic death的話 - 已經同最起初甚至同半個十年前完全唔同樣,雖然呢種metal係其中一種最受歡迎,但過癮在真正果批melodic death例如DT(DARK TRANQUILLITY呀唔該)真係"tr00 melodic death"個底唔power甚至可以好death,先係melodic death metal發展之正道,但正宗果班反而紅唔起冇乜人聽,一直到「power metal化」左(當然係CHILDREN OF BODOM啦)跟住出黎果班先多人留意;再跟住有metalcore、美國人翻炒瑞典野搞出黎之「美版melodic death」,講深度同技術毫無疑問melodic death高過metalcore幾皮,但反而係metalcore比人捧到上天咁高而melodic death紅極都紅唔起,冇計啦美國市場控制一切,睇IN FLAMES最初個個話勁話好但真正去聽唔多,一到後來變左nu-metal同metalcore野立即出名到仆晒街,順應市場打入美國先係當今metal band賺錢皇道嘛,音樂性同技術已經再冇咁深意義,講呢兩樣野DT唔會差過IN FLAMES卦?但堅持meldic death唔變樣唔玩pop仲要一隻碟比一隻碟有料到之DT理都冇人理。相當諷刺。
焚足全日power野(加少少melodic death),精神爽利。劉Sir都係膚淺pop guy一個。


Musicape

雖然叫得劉Sir個論壇阿劉Sir梗係主持人之一,但個forum基本上已經放左手俾各位柒友同107玩自己都少上更少插手,所以突然多左個音樂版,實際上都係返到屋企上網睇睇先知實情係點。
「我都唔知發生咩事架嗚嗚!」
有睇之前段記都知道,整音樂版整metal版其實自己都唔係太想,太多專家而劉Sir唔係專家,冇辦法。噉而家當事人都不知情地米己成炊,噉搞落去睇睇會發生咩事囉,或者好柒,又或者好掂,雖然後者冇乜可能而前者極大機會發生。現階段只搞一個音樂版包括晒所有音樂,會唔會順便整個metal專區?有日metal post氾濫得滯先再算啦。而且我一搞,就一定要搞到「全港最專業」噉搞。所以,再算啦。
「講音樂喎!劉Sir要出山了!」
噉點都會講番多d野啦,只係都未必會出太多post,一來自己本身唔係太鍾意玩forum啦,二來已經太多野搞緊:講音樂同metal,手頭上d野plan到去九月;自己同生活堆計劃就更加係排到下年了。劉Sir係頹,都冇你想像中咁得閒架。
請各位朋友去其他地方同向身邊朋友多多宣傳呢個「劉Sir音樂版」啦,亦盡力同大家分享音樂界各種新聞(pop、alternative、metal、乜叉都好都屬於音樂界),例如聽metal的朋友得閒上多dBBM搵d新聞返黎俾劉Sir啦,佢太懶了已經好耐冇update過自己了。



20/6/2007 WED

星期三係每個禮拜唯一一日「假期」 - 名義上遮夜晚唔使開舖我已經當係假期架喇 - 似乎老細都想幫我應一應節,手頭上跟緊幾個project成堆野一次過寄走晒,全日最忙就係寄野,搏完之後就嘆世界,跟住公司半冇皇管狀態,當然又係狂食&狂食雪夾糕時間,仲有周圍走同玩。今日我同會計靚女兩個公司內異常活躍,四圍彈黎彈去搵其他同事睇有冇野幫到手,唔係因為我地熱心你知啦我地咁懶,而係因為實在太得閒冇野做(or有超多野做不過唔想做),如果唔噉樣飛黎飛去的話,駐留自己個位超過五秒就會立即撻低瞌著。死,近來覺得原來頹都係好辛苦的一回事。最過癮節目係去買鞋。大家都知道,劉Sir正常的日子((最少)30/31個月)都係著涼鞋返工,但著得耐加上日曬雨淋,上個禮拜著爛左一對,今日出門口行行下又拗柴拗爛埋剩番果對,又懶返屋企換對鞋(除左懶行,仲因為懶著襪),返到公司發現阿靚女又咁蹻同劉Sir一樣拗柴拗爛左對鞋喎!
「都叫你唔好群埋晒劉Sir呢個地獄黑仔王啦!」
食完飯大家一齊落樓買新鞋著。所以我鍾意大角咀,乜都平之餘又有齊平民百姓生活所需,正正公司樓下就有檔賣涼鞋五十蚊對,抵玩旋掃番兩對先啦!跟住再周圍逛掃下街去七仔篤串魚蛋食雪糕,正我愛舊區!個個人都想尖沙咀返工,但俾我揀,我都係揀大角咀!夠頹!起碼尖咀返工涼鞋都冇得著先啦!


非常開心地無驚無險又一天,今晚唔使開舖,不過近來越來越多project上手(日頭dproject慢慢清晒,夜晚調番轉日日都有新project搞),放工出到太子果邊,見得閒又黎到順便上埋89268。都好少可有機會上黎,因為我返工時佢地未開,佢地開舖時我又係開舖,真係只有星期三晚先可以上到黎幫襯。雖然目標有好多,齋掃番d本地野同大陸野都有排執啦,時間關係(唔係冇時間買野,係冇時間聽野)今次只執諗左好耐之GODSPEED「新碟」,只差隻EP就追晒佢地全線,正post-rock band係有好多而且隊隊都唔同style仲抵聽襟聽過metal,不過現階段都只沉醉GODSPEED一隊,係我都知佢地係「好pop」我都知佢地係好初階,但佢地果種post-rock我好鍾意,因為完全唔rock唔band但ambient得黎要爆時又可以好爆,最勁係冇人聲而玩弦樂同sample意境重過其他按番傳統band模式之樂隊,齋佢地一隊都有排聽啦 - 佢地是但一隻碟都夠消磨成個禮拜啦。我都知post-rock係正,只係太多野聽,勁多新碟買左都未開,metal又玩多幾年都玩唔晒,再算啦。
「要研究一下太子邊度多玩具睇先!第時星期三晚可以出黎行街!」
不過研究到都唔知幾時先有得行,因為黎緊連續幾個禮拜三都已經有野玩個時間表爆晒!
「我要放假!!!」

噉樣買埋碟行多陣街再搭車返到屋企先七點,唔使開舖的日子時間真係見使好多。亦因為噉個人異常懶散,本來都想搞搞個forum見整左個音樂版出黎,但實在太懶了結果乜都冇做過,成晚除左睇野就係打機,係呀打番機,soundcard壞左又點一樣打到機遮!又係一個準備中之project!(咁多野玩,所以話,邊夠時間?)又今晚先知道原來星期三晚係做勁歌金曲,從來唔感興趣而家之勁歌金曲真係已經冇晒野好睇,但意外地睇到個廣告,都有點兒唔多相信:
「勁歌金曲!?!?!?」
廣告入面係成棚band友,一開始已經係太極加葉世榮(雖然唔知點解多左個戴夢夢),jam左一輪連《紅色跑車》都玩埋仲有太極vs葉世榮drum solo,勁歌金曲呢個歌星娛慶節目居然會出現呢個環節,雖然第二節變番無聊冇乜歌聽亦冇野好睇,而從兩節台下觀眾之反應都睇得出第一節時台下班妹妹仔係完全唔知度發生緊咩事台上班阿叔咩料佢地唱緊咩歌,都可算係近年最傳奇一集勁歌金曲架喇。話時話,無線之前都曾經「努力」過一排真係做番音樂節目,果時真係搵識音樂之人去講音樂、請音樂人出鏡大家討論、搵樂隊樂手出場表演,但好似維持得唔係好耐又收左皮。當年一出就係標榜住「改革音樂節目」、以「邀請香港本地樂隊上台演出」吸引左好多band友去睇之唔知乜鬼三六零去左邊?



21/6/2007 THU

而家日頭係玩時間管理。點樣可以最短時間之內完成晒份內事,跟住善用剩番之空閒時間,去同隔籬位船務師奶玩、俾會計靚女服侍、避過老闆耳目去做自己野、同幾時用幾多時間去做邊樣自己野?每日都係一樣架喇,日頭四個鐘工、中間一個鐘食飯、晏晝再四個鐘工(理論上遮,你知在劉Sir而言就唔係噉計架啦)。所以做而家份工,得著真係好多架,我學識到善用時間之大學問。


今晚非常過癮,香港人以外我遇到最少四個唔同國家之metal友。亦見到唔少生面口。今日一位朋友上黎試聽一輪,買完野臨走前一句::
「真係唔敢成日上黎!次次上黎都好危險!」
「黎多幾次就慣架喇!」

的確係事實。係搵metal碟想搵metal野,而家上到黎TRHK,真係睇到都會驚。太多。
經常出現果位北京thrashead通風報訊:
「TESTAMENT,兩個星期後到北京!」
有冇睇過隻新DVD?就係DVD入面個最元祖班底、最強組合,睇DVD已經睇到嚇死人咁勁,而家仲要有得睇live!門票$190、$290、$666,抵到爛,加上肯定多人睇人山人海,絕對係城中盛事。
「你會來嗎?」
「走鬼到咩!日頭份工走得甩,舖頭都走唔到啦!就算去睇都去野台睇算啦,北京咁遠!」

而家大陸搞metal真係搞得越黎越犀利,唔止外國band到中國唔止數量多左,仲已經由簡簡單單之表演擴大成巡迴。香港?算啦。大陸一年間,單metal演唱會發展之差別已經可以好大,香港都係,不過係向下,不論演出還是聽metal數量。市場已經唔同。聽眾音樂層次相距太大。



22/6/2007 FRI

「返到公司開部電腦,得幾封email,行貨地覆晒之後,九點半發現今日已經冇晒野做。」
正。即係我用十五分鐘完成晒全日八個鐘之工作。
「老細,我係咪好有工作效率先!」
老細都知 - 係知道頂我唔順 - 所以朝早就走左了。一冇皇管,成間公司立即頹晒,成班友一係唔做野吹水食煙,一係發癲狂玩,一係煲電話粥,又或者好似我,拎埋枕頭出黎訓覺。今朝仲有樣野玩,就係玩字典。公司部機最好玩就係裝左個電子字典,開左之後郁個mouse箭咀指指個字就會出解釋中文英文都解到,齋睇字典都夠玩成日。今日公司黎左個最新版,立即裝啦唔使煩,嘩超勁以前查字只得一個字庫,新版一查立即幾本辭典幾個字庫唔同學科學術解釋成個表彈出黎,仲有個動畫字典有d簡單字會有flash動畫解釋(得架喇我知你想點架喇,唔好意思唔係個個字都有動畫),仲有個功能一個掣成篇文乜文譯乜文都得,噉都預左唔會譯得點好架啦勝在好過冇,同有得笑啦。會計靚女剛剛有貢品朱古力蛋糕,個袋上面有句:
"A flavor of bitter-sweet chocolate opens in your mouth."
立即用黎祭旗先!譯成中文係:
「一種苦甜的巧克力的味道在你的嘴裡張開。」
立即唔敢食。我驚舊蛋糕入到口張開逼爆個頭,變左真人快打真人版。

近來lunch研究到新食法,就係將早餐同午餐結合,仍在開發階段,等我研究成功之後同大家分享一下,除左好食仲有易食,食「早餐」塞晒入口趙兩啖就搞掂,五分鐘唔使就可以訓覺。琴晚成四點幾先訓,但唔知點解今日異常地精神,除左朝早返到公司居然冇遲到(此乃神蹟,我張卡全個月幾乎保持全紅紀錄,今朝唔係紅色令全公司非常驚慌係咪有事發生),食完個飯又完全唔使訓晏覺,換著平時一食完飯立即撻低咩都唔理,難得唔訓又聽聽歌仔先。lunch好鍾意聽中文歌,而且唔知點解lunch聽歌聽得特別精楚,好似之前達與璐聽到有段「單音solo」勁過癮(但已經唔記得左邊首了,呵呵),今日再聽近期熱播關心妍《Jade Loves...》,雖然好pop但聽耐左又越聽越好聽,而且做歌果班都唔野少編曲原來收埋好多猛料野,好似《眼中桃花》初聽冇乜野,但今日聽聽下聽到好後有枝結他唔係彈普通rhythm,而係全首歌background一路彈住solo彈足全首,仲要唔係普通重覆一段melody/riff就算而係跟番首歌高低係噉變,去到高潮位玩啡同搶高音仲玩到好勁,真係值得為呢枝結他一聽再聽,只係唔知點解要收到最後,隻碟都叫做聽左過一年,唔係今次咁留心去聽都發現唔到,亦因為仲有咁多神秘野同隱藏野隻碟相信仲會聽多我十幾幾十個lunch。死,家陣真係對pop野之興趣,比metal野更甚添。


近來TRHK終於似番d樣,唔係多左生意(多極又可以有幾多丫老實講),而係見多好多「聽野」之人。前排日日都撞鬼一個禮拜已經見到差唔多聯合國咁多,近來又多好多老野同真係去研究metal&音樂之朋友,好似一個好迷symphonic epic folk 類power野之「後生仔」,見左好多次今晚大家吹水,個樣好後生,但傾落先知「老野」一個唔止結埋婚有埋女喇。
「我係八幾年時聽IRON MAIDEN開始架!以前真係追好多同睇好多騷架!不過而家結左婚,冇得好似以前咁free喇!都係好耐冇聽過,而家出番黎搵番野聽!」
「而家又有老婆又有女,噉你點聽呀?」
「要搵個角落頭匿埋封閉自己噉黎聽架!」
「唔焚大聲d教個女一齊聽metal同fing頭?」
「兩歲咋我個女大佬!」

又講番當年Ian Gillian同Robert Plant 黎香港(如果唔知呢兩位咩料就真係要補補喇,係好基本但必須之metal知識黎),Bon Jovi 海洋公園演唱會打得冇得睇,買番隻ARCH ENEMY DVD因為
「我係超級IRON MAIDEN fans,幾年前專登去日本睇佢地,做opening就係SONATA ARCTICA同ARCH ENEMY,雖然我唔鍾意果種唱法,但係ARCH ENEMY玩live好過SONATA ARCTICA勁好睇!」
難得過左三十歲仲堅持metal,莫講三十,身邊過左廿五仲繼續metal之人都唔係見到好多,事實上metal的而且確唔係襟聽之音樂,嘈野嘛,唔係真係狂熱心態真係好難堅持長時間。同埋同呢種「老坑」、較成熟之metal迷/音樂迷吹水,感覺真係好好多,因為對音樂之認識同態度真係同好多其他人唔同。只可惜真係好少。你叫我數身邊有幾多個年過廿五之狂熱metal友,確係有d難度。



23/6/2007 SAT

我已經當左自己係皇帝了。即係平時已經係(...),不過今日係禮拜六情況自然輒益嚴重,返到公司老細仲要人影都唔見,即食番個靚早餐先啦!真係好靚,又要講番我公司之「早餐史」:最起初公司係冇人會返到公司先食早餐,都係食完先返,唔係公司規矩老細都冇講到明,只係大家都當左呢條係一樣好正常、間間公司都有之不成文規定。直到劉Sir入左黎做之後,唔知幾時開始劉Sir的頹廢傳染左俾各位同事,返到公司先食早餐之風氣開始盛行了,最起初只係大家買d野食上黎好似腸粉、燒賣、麵包,跟住索性返到公司先叫又或者濫用/食公司資源(人證物證俱在!),再跟住仲勁d甚至成個麥當奴餐或者成個早餐叫上黎慢慢嘆番三四個字,後來老細都睇唔過眼了自己都食埋一份唔輸蝕(「咩公司黎?」)。而今日見反正得閒老細又唔係度,立即叫左個扒餐上黎做早餐食,豪到爆。送到黎時,剛剛老細同我盒扒一齊到,睇住條友可以晨早流流咁大模斯樣地坐係自己個位唔做野上住網4鋸扒,老位老細好後悔咁早返到黎,盞眼冤。
之後繼續得閒,好得閒果隻,我已經響應政府呼籲,當左自己係五日工作架喇!近來節目係見工,公司走左個人幾日上黎應徵,大角咀衰在唔係好多人鍾意黎呢種溶爛舊區返工特別女仔同「高級」果d,所以見開一係麻甩佬一係地盤工一係阿叉一係師奶一係港女,即係有番個靚女做會計算係「不幸中之大幸」囉呵呵。一連幾日見極都係佬師奶都冇個,負責搞請人果個同事一早放晒風:
「今日有條女上黎見工,勁後生仲勁靚女,記得留意!」
係?通常如此形容果d女仔都唔會出現大角咀呢頭喎!今次係例外!果然係又後生又靚女,唔係港女樣先呢樣已經夠殺!全公司一致讚好,但最後都係無緣,因為位小妹妹先得中五畢業,未夠程度入黎做。又一過眼雲煙。
「唔制!老細!下次我要做面試官!話晒我有豐富面試經驗!」
當年仲做緊書院時,入學面試真係有好多樣靚身材正青春無敵仲要衣著性感之學生妹架!仲要係我負責面試添全靠我口英文呃得下人!俱往矣!


前幾日去太子行完今日放工冇野做又行,今次就真係行玩具舖喇。我都唔知邊度有架,就係唔知先周圍亂咁行搵下邊度有,又搵到間幾大下仲有勁多不知名玩具之舖頭,我仍然好想搵番個手榴彈返黎玩下,但搵極都得玩具反斗城見過又唔想益佢地!雖然玩具呢家野而家同十幾廿年前見果d唔係差得好遠,但好簡單好白痴的玩具唔玩睇到都開心,我份人要求比較低嘛。手榴彈搵唔到亦唔見有變形金剛,有部遊戲機好有興趣,係直插電視就玩得之Capcom三合一,有1942同魔界村仲有一隻好似戰場之狼之射擊動作,正喎集齊三隻Capcom黃金時期勁作真係有d衝動架!實在太多野miss左想追番!
去埋TRHK指定食府且豐(指定外賣商戶先係大家食,堂食食堂仍係且豐),擦多餐好先上舖頭慢慢坐,冇計啦「冇新貨」嘛今個禮拜係冇生意架喇。成個晏晝就係睇契爺神州之行回憶錄,五十一日香港北上再陸路到巴基斯坦,點樣中間一日落番黎香港再走番上去繼續全程、中國人點樣「商機無限」、女兒國男人唔使做又想搞就搞點玩都得、原來中國度度都聽到BEYOND、又我地原來係港燦日本韓國東歐果d求祈執件都係噉中國流浪到東歐玩半八個月一年幾而唔係單單幾十日、中國同巴基斯坦點樣風光明媚...真係靚到爆睇見都想去,問題係:
「走鬼到咩?」
一日TRHK未執、一日我未放棄metal,一日我都唔會走得甩。戇居就是戇居。
全日冇咩大買賣,就只係等一個客。有個客特登打電話上黎問,問完直頭走埋上黎試聽買野,一睇就知係老野一個,只有老野會做呢d野,唔知咩黎唔係自己聽開唔識都會拋個身拋埋個心出黎研究,唔知咩黎唔知咩band都冇所謂,只要試聽過之後自己鍾意覺得好聽又夠錢就即買。呢d客先至好做,無論生意上定係態度上。問題係仲有幾多呢d真係去研究去聽野之樂迷、有幾多呢d老野?年代唔同就係唔同,聽野之心態同態度已經完全兩樣。老野搵野聽,唔知咩黎會問會搵,完全唔識都聽過再算,唔一定要點要挑剔係順自己隻耳就得。差唔多時期又有個客出現,拎起AXAMENTA "Ever-Arch-I-Tech-Ture",呢隊band呢隻碟香港之知名度係接近零,所以絕對相信會拎起隻碟係因為盒面張同紙:PAIN OF SALVATION歌佬guest。
「Daniel Gildenlow係咪唱晒成隻碟?」
「唔係,佢只唱一首歌。」

立即放低走人,問問隻碟玩乜或者試一試聽都唔需要;而面對過好多呢類客人,就算真係播埋出黎試聽,都總會搵到有d野係唔滿意,而音樂中有任何一樣野或者一秒鐘「唔好」就立即唔會要,而就算聽過音樂完全滿意,都仲要再掙扎,因為隊band「唔係邊隊」。唔同就係唔同。仲有另一個分別,就係老一輩會諗多好多生活上既野,好似唱片公司要經營、dband要食飯,所以唔止話肯俾錢買碟甚至俾貴d都願,你鍾意band同音樂,唔係想佢地可以有飯開有工返等佢可以繼續落去咩?後生果d或者仲未使出黎做野、仲有屋企照顧、或者香港對後生一輩之照顧太好,雖然一路講自己係鍾意音樂支持隊band,但諗都會諗自己可以點樣俾付出最少拎最多著數甚至食免費餐,
「叫我買碟同試多d新band?我自己唔使去玩去夾band去唱K去溝女去買衫買鞋買袋咩!隊band我又唔識!」
以上所講唔係只有TRHK,而係好多本地/外地獨立唱片舖之問題,就係因為太多專家、就係獨立音樂之思想同態度已經失去,indie先越來越難搞。最諷刺係好多「indie fans」都唔去支持番所謂自己最愛最支持之indie。


收舖即興走上新世紀,好彩今晚走一走先有戲睇。近來《殺謎藏》有d興趣睇,難得會有要用腦戲吸引到我入戲院睇,只係十一點三先上,呢個都唔係問題我肯等,不過套戲成三個鐘長睇完都兩點...另一個目標《戲王之王》,起初以為八點幾先有一場,好在走到上黎先發現原來記錯左剛剛好趕得切九點十場,天都叫我睇啦即係!禮拜二先上畫即係今晚係第五晚,但即場買飛後面都係得d散單位其餘就只有最前兩行,我好耐冇睇過港產片都知道而家港產片好少可會有如此盛況(事實上確係太多廢片),而到第五晚都仲可以咁爆,呢套相信都係港產片近年少見之成功。詹瑞文自不然係賣點所在啦,一路都係做串星但次次出親場都笑到仆街(我係《拍兇拍人》fans!!!),《戲王之王》係第一次做主角,一定要捧場啦!港產片其實都唔係冇料到都有輝煌過,除左動作片同警匪片,喜劇都係強項黎,只可惜近年「笑片」同「垃圾片」兩個詞已經同義,哀哉。對電影我亦偏向唔需要用腦之官能娛樂多,所以《無間道》三集之後,好似今晚先再入場睇港產片。有詹瑞文你都預左會係誇張笑片黎,劇情講差佬進修演技做臥底,立即《喜劇之王》因為好似,似到大家都係衰同一樣野:大家都係分上下面個主部份,前半講對演技有執著之主角去潛心修練最後出山致用,警方派左詹瑞文去演藝學院學做戲準備做臥底,自然係玩同諷刺佢浮誇到爆之舞台劇演技(所以到而家我都唔多鍾意睇舞台劇就係太誇),舞台劇演出之浮誇同電影演出之實在兩者衝突成為笑料來源,但並唔係一味只玩表情同肢體,好多對白同動作笑料真係作得好應,經過太多胡鬧同無厘頭「搞笑」之蹂躪,終於有番一套正正經經真係笑料有深度、令人由心笑出黎之港產笑片,最正係編劇一路落去都好順亦冇悶場,雖然好多枝節亦有好多角色同深層意義想講,但你唔會覺得太多太亂又或者有d劇情過於片面,學院派專業編導就係唔同d,就前半黎講我係非常非常非常之滿意。我講緊前半,個劇本本身睇落已經好似好無聊好夾硬,喂無聊先好玩喎乜都正正經經有乜癮呀叫得做笑片?後半就係主角「得道」之後被委以重任,只係兩套《王》後半都變成單為左做多d戲而拖長,同「演技」之主題同發揮已經冇咩大關連同發揮,變左一班人柴娃娃玩幾個字就做完套戲,成part 戲出得突然發展超快完左都唔知咩事,搞到套戲有d虎頭蛇尾,較失望就係呢個部份。不過夠架喇,唔無厘頭式搞笑亦有好多野想講,同埋笑料夠多加玩盡港產片,玩最多當然係《無間道》真係好鬼好笑,雖然重點係詹瑞文同「Twins果個」,反而其他任何一個路人甲加一大班客串guest先係重點,客串果班全部都係「我地年代」一睇見就會笑出黎,夏春秋都有呀大佬夠未?同埋林雪&黃啟發!(唔好意思睇左《暗戰》之後我只記得佢叫黃啟發)《無間道》班底有黃秋生又有曾志偉,仲有杜汶澤扮足曾志偉做狂森就知幾玩野,都唔止,麥兆輝真人都有份客串先夠晒吹脹!我最鍾意睇配角,更鍾意睇老演員做戲因為老野做戲更有戲味,《戲王之王》個配角卡士直頭係黃金組合,最路人果個都睇到你笑爆咀!兩個鐘港產片黎講都算好長但由頭到尾都鍾意除左後面少少唔如意,我好耐未試過睇港產片睇得咁心滿意足,亦令我對港產片再次提起興趣 - 只係有興趣還有興趣,仲有冇機會再有一套真係唔敢講。只係眼前呢套鍾意滿意就得。未係最好睇亦未到滿分,但作為笑片作為港產片作為香港人,絕對推薦你一定要入場睇支持一下呢套有心之作!就算要我入多次場睇陪你睇我都肯制!就係咁感動!



24/6/2007 SUN

睇完《戲王之王》返到屋企十二點幾,都未玩完仲有得睇,一開門電視剛剛好做《不日成名》,一套被譽為近年最佳搖滾電影之必睇經典,但名超響一直都冇乜去留意,今晚電視都播埋送埋上門,今晚歌都唔使聽臨訓前睇埋套戲先,嘩噉又睇足兩個鐘。套戲係講一個幫一本indie rockzine撰稿之靚仔,機緣之下俾《Rolling Stones》睇中叫佢跟住一隊rock band去tour做專題訪問,故事就係圍繞佢同隊band全國巡迴之rock n' roll life,帶出好多議題;我地rock/metal友自然係留意一隊underground成名之路同成名前後個人同團員間各種內心變化;跟班果堆"groupie"就係sex & drugs & alcohol & rock n' roll,同樂迷樂隊兩者對相互睇法點樣唔同;主角就係年輕人鬥家長、同周旋於「普通人」、「好仔」世俗同rock n' roll life離經叛道之衝突...由起初樂隊地下搏命出頭大家共同奪鬥,到最後成名後各懷鬼胎互相唔妥男主角離開返屋企,band leader名成利就但冇左條女,仲有其他好多,係搖滾中人睇過都會有好大感受同感觸短短兩個鐘第一秒到最後一刻都會感動人心,真真正正之rock n' roll,而唔係借搖滾包裝或者以諷刺rock友為樂之商業片。已經同"Rock Star"一齊成為我最愛rock/metal電影,而遲到而家先至睇到搞到我好唔開心:都未使計'70經典大集合之soundtrack,套戲太真、太rock、太感動了。你係真係鍾意rock、真係鍾意metal,實在冇得錯過。你會發覺我鍾意之rock/metal電影同文學,都係同地下血淚史有關。
既然話得係真正地下音樂反映,自然有好多野地下樂迷睇到會有相當共鳴。到最後樂隊成左名炒晒大鑊之後,有一段講番「何謂樂迷」:做得樂迷,就係對一隊band好執著,熱情投入佢地音樂、態度同文化當中,唔止口頭,而係心理、生理同經濟上都為佢地付出,只有噉先至叫同配做一隊樂隊之真正樂迷。雖然戲入面係由樂隊之角度去講,批判番好多樂隊本身利用左樂迷對佢地之感情利用佢地、唔認真對待樂迷,但同一套套番落樂迷身上,都唔係有太多樂迷能夠達到。話自己鍾意一種音樂、鍾意一隊樂隊,並唔係好簡單口輕輕講下就得,當你講左一句說話、決定左做一樣野,係要去承擔好多野、要去作出好多努力。此乃執著同投入,同對音樂之認真。


返屋企又睇番兩個鐘戲,加埋做埋其他野執埋手尾,訓醒第二「朝」都已經兩點幾,直接飛出舖頭都得。既然琴日都冇人,今日就自不然下場一樣啦。前排成日見鬼,近來就同老坑有緣成日撞到老野,一個三張幾四張幾的老野經過見到,
「咦?而家仲有舖頭賣metal野?」
同樣係以前超迷音樂,不過跟住又要生活又結左婚「自己又老」近來先再「出山」之老野,典型現實迫人而要放棄音樂之香港樂迷,不過佢就唔係迷metal,而係好早期之gothic野,因為見到有本地野買又係band野又係indie就入黎支持下,順便認識番下而家之gothic野 - 雖然TRHK只有gothic metal,而gothic metal事實上,同好多人所諗一樣,係唔多gothic一樣...只好搵左「最gothic」果隻gothic metal俾佢(唔係TYPE O NEGATIVE唔好意思:
「嘩!呢隻碟正,好似我聽開果dgothic野!咩黎?」
「呢隻係MOONSPELL "Wolfheart",gothic metal必備經典之一!」

跟住大家吹水,吹左好耐,都係吹本地indie野同gothic野,由而家一路吹番轉頭,吹到去香港最早期之gothic band,一隊本地最早玩gothic、只出過一餅帶但一餅單已經連外國聽過都讚好之香港gothic band(點解「淨係識聽metal」的劉Sir都會識?呵呵,唔知呢?佢唔係專家卦?)。同老野傾,真係好多野都好唔同,除左真係傾到,仲會尊重音樂,知應該點樣對待音樂。只可惜老左,確係好多影響。
「碟唔敢亂買,買隻封面噉款播出黎又嘈生晒,我老婆都窒『都唔係細啦,仲聽埋晒呢d野!』去買band tee買件BAUHAUS都俾人問『而家靚仔先買呢dtee架喎!』我咪話買俾自己個仔囉!呢d野當你去到差唔多四張有埋老婆就會明架喇!」
雖然音樂無分年齡界限只有分鍾唔鍾意,但聽音樂自己「太老」同「超齡」呢種世俗始終存在,不論自己心中還是旁人眼中。同樣係刻服到呢份世俗眼光,可以令你見識到同學習到更多。


近來劉Sir個論壇好流行玩問答,由廣告到動漫到音樂問極都有得答。使唔使遲d劉Sir都出番個「劉Sir問 柒頭答」,出七十七條有關劉Sir的問題,由劉Sir個網百萬字中出題,考考各位對劉Sir認識有幾深?又契爺有個諗頭,就係好似Yahoo撚知識噉,整番一個劉Sir柒知識,俾各位朋友進一步發癲 - 應該話正常化番個forum先至係(重申一次,我搞個forum出黎,其實係想搞一個正正經經的forum!)。係有好多野可以諗可以玩,問題係,
「得閒先啦!」
你睇我都係耐唔耐先蒲一蒲個forum遮!就連之前個「劉Sir問答」都已經收左皮等待復活的一天。冇計,真係太忙!總有一天,我會成個forum從頭到尾一野過睇晒加覆晒!(總有一天...)



25/6/2007 MON

今日最唔開心,就係本身會計靚女應承我會整早餐俾我食,當然又係一餐等於一日食量之恐怖片級數高脂油炸唔健康厚芝餐肉三文治。點知,
「唔記得左添呵呵!」
灰晒今日立即。好唔開心。全日都係。
當今日最唔開心都只係冇早餐食時,會有幾灰、有幾多野做?(有,上網上足全日其實都幾唔開心,悶呀!)(...)


月底加「冇新貨」,自然係靜靜地聽歌的一晚啦。今晚睇HELLOWEEN隻新DVD,無論玩成點都好,佢地始終係最重要power metal band,不論對我定對(power) metal整體。毫無疑問到今日已經玩左廿幾年,跟住九幾年幾隻「食晒屎」之後人都換埋,人同style已經轉左不知多少,鍾意又好唔鍾意又好,始終係神檯級人物同教祖,好多人因為過左八十年代人唔同左又唔「happy」唔power metal就狂鬧,我又冇所謂,鬧之餘,聽真過未先?《七鑰守護者》兩部曲自然係經典無敵,但論歌其實唔算太得,將兩隻碟最正d歌抽晒出黎合做一隻就更加傳奇,而唔會成為經典係因為歷史地位多過音樂,就同根屎《用你幻象》一樣情況。反而九幾年過左「食左屎」之後果d,音樂係一隻比一隻好,講每隻碟中最高峰就確係唔及以前兩集,但講水準之平均同整體歌曲水平,反而係九幾年新班底起,確係一隻碟比一隻碟好,甚至一隻碟比一隻碟「認真」同邪惡,但可惜聽HELLOWEEN果班好多都唔係想要呢類,而係要「開心」,所以九幾年起,HELLOWEEN就只係俾人不斷鬧不斷小,即使創作力其實係倒轉頭持續上進,只係先入為主同「唔順眼/耳」就係冇計,令好多人唔再追隨落去甚至倒戈相向。我就好鍾意,聽metal雖然係為開心耐唔耐都需要一d開心band調劑一下,但始終暗同現實果d襟聽得多,因為更具思考性,去到新碟直頭兩首長歌已經殺晒,聽完我甚至寧願佢地一路玩呢dprogressive metal野多過power metal野,一首《機會大道》已經係HELLOWEEN最正長歌,唔止編曲歌詞更精彩,好在live都有玩,隻DVD最正就係HELLOWEEN全部長歌都玩晒live,都可算一個創舉,當個個寧願聽佢地幾分鐘之金曲就算好似鼓機玩紅左之"Power"!起初睇隻DVD唔係太滿意,結他手彈d野唔夠火,歌佬又唱得好「阿伯」,「阿伯」到我覺得佢可以試唱一下LACRIMOSA,都咪話唔大劑,但過左頭幾首warm up完之後,變左另一隊band一樣,勁到黐線,尤其是真正玩live,好多無聊表演同台上台下一齊玩之環節都只有睇live之感受得到,講演出佢地已經做到世界級,始終玩左廿幾年嘛自然老到。講選曲好多人會唔滿意,因為好多HELLOWEEN之必玩經典都冇玩到而集中新歌多,又睇你點睇,要而家個歌佬玩番以前d歌,真係可以玩到佢死,根本新舊歌佬風格完全唔同,所以我寧願好似而家噉,集中玩新歌多,亦即係揀番為新歌佬而寫果d歌,噉先更就到佢發揮,而唔會高(音)不成低(音)不就,配合番音樂同表演整體,好多人往往就係忽視左呢樣野。未必個個HELLOWEEN fans鍾意,好在唔包括我。除左開頭「熱身」,成場live我都睇得好開心。Rock爺曰:
「就黎又有新碟喎?」
係?噉就真係要等喇!希望更加progressive同暗番d唔好咁power啦!不過仲有幾多人會介意?當講power metal,個個都走晒去DRAGONFORCE,HELLOWEEN反而已經冇人理之時?
想知道一個人對HELLOWEEN甚至對power metal 認識有幾深,一條問題就知
「你鍾意HELLOWEEN邊個歌佬?點解?」
唔信?不妨試試。



26/6/2007 TUE

琴日朝早冇三文治食,勁唔開心,所以今朝返到黎已經有人自動自覺放左一大份三文治係檯面(呵呵)。係即係我都唔想食。肥嘛。但係都要迫我食,我又有乜計?(就快俾人打了)想知今日我又有幾得閒?幾乎有閒情逸緻到拎刀叉食三文治 - 幾乎遮,起初真係想架因為一大舊用手食唔方便對手污糟又唔用得電腦,但都係張揚得滯算啦俾番次面老細啦(...)。食完芝餐治再整多個雪夾糕,食緊同食完一路上網,一流如此返工法真係夫復可求?
但係,都係唔開心。今日lunch又走落去樓下掃貨,雪夾糕都已經差唔多俾我清晒。可能雪夾糕代言人劉Sir吹水吹得勁得滯,上星期都仲有大量存貨係度冇人搵,今日再落去,個雪櫃成格空晒d雪夾糕唔知去晒邊!雪夾糕已經成為劉Sir工作的一部份(...),正所謂「一日不吃番舊雪夾糕,一日都唔叉願做野」,冇雪夾糕食,當堂冇晒心機,做唔到野,上網算!
「老細,我都唔想!落去鬧華潤啦唔關我事!」(呢條友總會有理由唔做野)


早前執左椎名林檎、Bjork再加多隻GODSPEED,夜晚屋企播極都係播呢三隻同埋結他三國誌,舖頭焚到好勁,但一返到屋企,個個都唔信係劉Sir,太靜了。都係107衰,成日無端端掟don9野過黎,好似而家屋企又嘈番,怒煲MAXIMUM THE HORMONE呢隊黐線日本仔,當封面係條白痴仔 \m/ 晒入面班日本仔&日本妹仲癲,未聽都已經知道係正野,開埋隻碟仲死添真係第一首已經笑到爆。雖然日本仔玩音樂都係返炒外國野,但抄得黎又加番自己地道玩法,你明知係外國野聽極又唔似,而果種「地道」一係包裝到超靚不論音樂還是造型,一係調番轉玩超騎呢同發神經,咪就係呢隊野囉。雖然從來唔太鍾意日本野同日文,但確實日本dindie band玩創玩癲真係好多外國band都望塵莫及。呢隊MAXIMUM THE HORMONEd班友個貓樣、artwork都係日本仔式超現實荒謬,歌就梗係唔使講,歌詞拍得住SEX MACHINEGUN同聖肌魔咁戇居,音樂話係punk但又點止punk咁簡單,第一首已經funk到爆,你要metal又有你要hardcore又有跟住有death metal同noise/grindcore,一首歌可以十幾個樣係差未有交響jazz同電子,有d歌直頭玩殘SYSTEM OF A DOWN,punk?有冇咁碎料呀!再上網搵搵料,資料顯示,原來隊野都唔係新喇今隻已經係第五隻碟,又原來幾出名下,因為《死亡筆記》電影版片頭片尾就係佢地作品!「唔係玩metal」,但論style論激論聲你當係metal聽法一樣可以,唔計較一定要邊種野的話,齋開黎happy焚下笑下而又可以聽完又聽,呢隻碟絕對做得到。
「邊度有得買?」
有興趣咪搵劉Sir問問囉呵呵。
「有心有興趣的話,打番個靚價俾你又點話!」



27/6/2007 WED










28/6/2007 THU

一睇琴日乜都冇就知道幾得閒啦!加上係每個禮拜唯一難得的假期,立即頹到爆炸!今日,一樣!今半年最大雨就係呢兩個朝頭早,平時就係唔係都遲到架啦,遇著打風落雨的日子自然係再加大條道理地遲到。點知唔係呢兩日!琴日朝早係黃雨的話,今朝就係紅雨,但反而朝朝都遲就係呢兩朝唔遲,仲要越大雨越早返到公司!
「有冇搞錯!搞咩呀你?」
全公司都好唔妥我。
「日日都遲到,點解呢兩日咁早返到公司?冇野呀你?」
就連老細都好唔滿意。係咪真係有野呢?一面「工作」,一面諗:食完個早餐再加多N個意粉,冇錯又係芝士,今晚仲要係比焗粟米芝士火腿雞絲意粉更正之粟米芝士煙肉焗意,呢個意我一餐食半打都可以,就係咁好食!係差冇人請我食!公司今晚停電更加大條道理要清晒雪櫃d雪條不斷狂吞,又走去摷其他同事d糖呀餅呀薯片呀蝦條呀攝牙罅,兩日黎係接近乜野都唔使做尤其是今日係完全冇做過野返工返黎八個鐘差唔多上足八個鐘網 - 噉中間點都要搵d時間去廁所飲杯水搵野食同撩人玩 - 跟住六點準時放工。
「冇野丫老細!冇野丫!好正常喎我覺得我自己!」


月尾加糧尾,一個人都冇,係好正常的。除左間唔中經過同「入錯舖頭」的路人甲(&唔少囡囡)之外,就係咁多了。呀,都有兩個:
「外賣仔!」
唔係阿切唔好意思,今次要勞駕107我地尊貴的版主送外賣上黎。
「喂,今次檔辣魚蛋好正喎,夠晒辣!」
好日都唔見出現,做乜今日咁得閒蒲頭?原來放暑假,足足三個禮拜唔使做。
「你就好啦!搞到我都想教番書!」
所以好開心,除左做全職股神發大達,仲可以怒煲PS3。
「正喎!幾時搞番次PS3版聚先?打爆《高達無雙》!」
雖然個個都鍾意打NDS鍾意玩wii,因為系統超級創新,但我仍然鍾意打PS系,因為我嫌任天堂出品太益智,都係PSd動作射擊系適合我。仲可以用黎睇碟喎!不過就算執部返屋企又點?而家玩都冇時間玩!睇我C&C舊幾代都未煲爆、第三集買左返黎仲係得個睇字就知!真係好忙!起碼黎緊下年之打算,已經夠用大半時間去諗定!
「新年一定要搞呀!」
雖然係月底,但前幾日皆旺都好旺,走廊塞爆晒果隻,月底生意甚至好過月中月頭。但今日居然全場靜到想搵個人經過望望都難,客就更加唔使講。好明顯有人邪啦!證據當然有!107一走!客就出現了!雖然...
「Henry哥!你的出現,解救了今天的苦困!」
就係咁多。同埋我。繼續食芝士意粉。(...)



29/6/2007 FRI

我好辛苦。正。就係鍾意返工冇野做,上網又上到悶,又諗唔到點樣扮做野捱到放工果種辛苦法。我鍾意。(「點解劉Sir仲未死?」)
實在好懶,真係有野食都唔想郁,除左lunch有雞食再加同事貢獻超正炒伊麵一兜所以起一起身之外(又係怒食)。晏晝有個人上黎,想租公司樓上個單位。呢d情況通常我會懶係熱心幫手地走去湊熱鬧,但今日太懶了,撻係自己個位度唔想郁。會計靚女走左上去招呼人,落返黎,
「你知唔知我頭先見到邊個?」
「點Q知呀?我都冇上去!」
「原來係泰迪羅賓想租個單位開studio呀!」
「唔係卦?????」
miss左添!!!!!!!


夜晚,都係噉啦。休左一輪漁,近來開始做番好多冇做好耐之「神奇事」,好似狂聽番metal、寫番野,同玩番玩具。真係好耐未寫過野喇,好多稿無論係玩定碟都係撩左幾筆或者開左個頭未埋尾,又諗到好多野玩同寫,亦有更多新project搞。時間呀時間。



30/6/2007 SAT

所以我好憎人一個禮拜返五日工。尤其是今日。星期一紅假即係連續兩日放期,點解今日仲要我返工,唔俾我連放三日假等我琴晚已經可以立即開始發癲?平時禮拜六已經唔會做野,今日灰成噉,更加冇心情!再加上琴日已經連下星期一要做d野都準備定晒,就更加係想做野都冇得做啦星期一d野都搞掂左!但有時寧願有d野做下,唔係因為我勤力,而係方便我懶。有野做的話,老細知道我做野都唔會睇咁緊,同睇落唔係做野時都似做緊野,冇番d掩護有時真係好難搞架,好似今朝成朝冇野做/唔做野,真係光明正大地上網上足成朝完全係搏炒之舉動。勇敢如劉Sir都未至於如此神勇。(令大家失望添,唔好意思)


即係我地呢d友頹就日日早走遮,就算星期日各位同事都十分勤力,經理同老闆大粒野就當然遲走啦唔使做咩(應該話:「你估佢地似劉Sir咩!」),我咁衰仔就自然係留低經理老細每人個餐食一半(史稱「納貢」),黐埋公司餐先走啦。禮拜六晏晝,最好玩當然係行街,旺角周圍行狂搵VCD舖,有幾套戲都想搵番隻碟睇(劉Sir開始唔正常番了),可惜旺角衰一樣野:太潮,多係多但間間都係賣新野,舊野同外國版都係算Q數,心目中有幾套目標想搵但唔好話DVD連VCD都冇,好灰喎我又唔想俾HMV昆!
「各位大佬,邊度有多戲VCD同DVD買?最重要係齊!同夠舊!」
我係個超級科幻迷同動作迷,所以好多昔日經典都想睇番:《死硬》一定要睇啦,戲同game都好鍾意,第四集就上,好想一次過重溫;《異形》四舊水9DVD超總集走唔甩(好在有行貨);《鐵血戰士》兩集都想追番,好在都見有唔少地方有平DVD;《未來戰士》又係超有興趣,不過第四集都黎緊喇;睇得《未來戰士》,同期出黎之另一經典《鐵甲威龍》又係冇得走啦,即係其實得第一集真係好睇第二集已經完全及唔上第三集直頭垃圾,又係當年一起成長之一,加上近來又係搵佢!無無聊聊又多左個乜乜人系列,由最初之鯊魔人,跟住鱷魚人、狂蟒人、飛蚊人,出出下活死人、變形人,真係乜柒人都有,單係儲齊柒人封面已經夠晒娛樂性,已經有VCD舖放緊$19一隻大清貨所以完全唔使急(梗係啦,睇到封面都知爛啦呢d片!),搵次一次過將成個乜乜人全線一野過搞掂我就係鍾意睇爛片,分分鐘掃晒全線仲平過買一隻碟!所以極度期待呢個:
Project: Grindhouse!!!
你睇我聽metal聽音樂都知,越係超自然超現實同科幻我越係鍾意,所以相信總有一日,唔止音樂同電影,美國漫畫都會追埋。(美國漫畫都係metal文化重要一部份黎架)

所以我而家好少上網,因為唔敢。屋企成堆都未開,近來睇戲有癮,手痕上網搵搵鐵甲威龍d野,又俾我見到有套正野,琴晚見到一封email就搞掂十二個鐘後到手,互聯網世代實在超快勁有效率,我終於明白各位專家同BT一族果種快感了!亦好在今日收穫豐富成個boxset噉執到返黎,因為今日真係悶到飛天!悶對我黎講唔係問題,大把野玩、大把野寫!
「碟評呢?」
而家係聽歌吸收同消化階段。再聽多排聽入d諗多d,到時先一次過碟評連爆啦。當然,「爆」黎有冇用,又係另一個影響進度之因素。


蹻到噉,返到屋企,電視就係做緊鐵甲威龍。晏晝一個boxset加埋夜晚一集電影,勾起左舖癮添,搞到真係好有興趣開番個Project: Robocop"。講好睇其實真係只得第一集好睇,人設機設劇情哲理都係。只不過鐵甲威龍頭兩集仲有異形係細個時難得入戲院睇之猛片,十歲未夠入戲院睇當年最驚嚇最驚險三套荷里活製作,其中震撼同影響到而家仍然如新。太多事想做、太多物想追、太多夢想圓。



1/7/2007 SUN

七一我只關心一樣野:
「唔係卦?咁快七月?好似冇幾耐之前先新年咋喎!」
同樣係狂玩的一天。即係連續兩/三日假又禮拜日又熱又糧尾,俾我都唔多想出街啦。狂玩。跟住出面玩具舖又有新貨返左,一隻搵左幾耐下之變形金剛。噢。
「快手放完個假出糧啦唔該!」

「點慶回歸?」
「搞左好耐,終於搞掂喇!彈番上最頂唔該!
仲有:

The Last Stand

我實在太鍾意打flash game,打到上埋腦。
「點解係呢隻?」
係囉!好耐之前 - 上年 - 話另一隻喪屍game寫review。結果第一隻game,都係寫喪屍game,不過係另一隻,呵呵,其中一個原因係換左電腦之後,玩隻game時隻game變得超快d喪屍唔係行係跑過黎咬你,我又唔識點樣較慢,想玩都玩唔番。果時打機打到圓桌武士同Punisher都寫,真係圖都cap埋連攻略都寫緊架!不過已經唔知去晒邊喇dfile!遲d啦或者!不過C&C都未打,又想煲番Starcraft!變形金剛又未玩晒呢?
會寫game,又係一個兒時心願。相信好多人細個都試過睇game書打機,睇睇下打打下就會好羨慕寫game書d人可以打機食飯,立志大個之後做game書編輯,又或者跟住game書d攻略打但係自己打得仲快仲勁過寫攻略條友,(又)立志自己做個game編輯寫番篇似樣的攻略。寫game又係達成細個的一個夢想。完成一個,仲有好多個。



2/7/2007 MON

最後一日紅假、難得唔使早起的星期一,結果都係要早起,香港放假遮大陸唔係丫嘛,晨咁早就俾客同工廠call醒。
「灰喎而家唔係一國兩制咩?做乜香港地紅假都要我做野?」
都係好事黎,本身諗住又係兩點半起身立即仆出舖頭,而家早左十二點幾鐘就得閒,係屋企攤抖下放埋狗又可以出去行街。當然係行VCD舖啦近排熱愛,《Die Hard》已經通街,但我條友好鬼犯賤通常果期興乜就算自己點鍾意都好少立即去搵去追 - 睇我變形金剛電影版玩具除左美國見平執左隻之外都仲未開始掃貨就知 - 所以《Die Hard》賣到好平都好都仲未有心機掃,繼續搵其他目標。不過真係好多:《異形》四集、《未來戰士》三集、《鐵甲威龍》三集、《Die Hard》三集加戲院上第四集、《Predator》兩集、《Cube》三集都未睇晒...基於成本同空間,買舊戲我鍾意等佢出boxset先買,好似《異形》噉一出九隻碟,如果散開四集買貴d之餘又大份晒位,而且出boxset 乜都包晒之餘t往往有靚靚新artwork仲有大量bonus同幕後花絮我就最鍾意睇呢d,反正呢個年代耐唔耐就出新版復刻版,忍一忍手等一排自然大Q把套裝呀盒裝呀豪華版呀,好好彩頭先講果幾套除左《Predator》之外都有,又係等平貨等跌價所以完全唔需要急。嘩頂碟未聽晒玩具未玩夠機未打完,仲睇埋戲而家,有幾多時間剩、有幾多時間做咁多野?
CD都有睇,估唔到王菀之兩隻半碟已經有精選碟,算好d架喇謝安琪一隻半已經出啦。都好在近來CD方面都冇乜特別新野,繼續慢慢追番pop同metald舊野先啦。不過有隻新野好有興趣,叫Band 5,個名都講左你知係五隊band夾埋出,有BEYOND、達明一派、草蜢、軟硬、太極五大香港band壇必聽經典,每隊一隻精選五碟boxset承專$138,好多朋友成日話唔知香港有咩band、香港冇好歌、想認識香港音樂歷史黃金期,呢個boxset絕對值得你收藏,當研究又好、當朝聖又好。誠意推介。

今日晏晝超曬,行旺角時熱到仆,但一上到皆旺,立即超大雨人都冇個。今日個天明玩野。又係聽歌同怒玩的一天,仲有勁聽brutal death野,靜嘛個場咪炸番嘈d囉(劉Sir到今日仲未俾其他租戶打死都算係奇蹟)。雖然係噉落雨,蒲頭之無聊人反而係近來最多。又係一群老坑係度集體回憶。今日先知道原來我地Rock爺係當年罪案fans,除左《今日睇真D》同《城市追擊》(正呀!!!!!),當年《繩之於法》收視率全靠佢撐住(我更鍾意《笑星救地球》入面玩串《繩之於法》個《地下通訊》,班傻佬扮賊做主持後面聽電話果班全部笠晒頭套睇見都笑到仆街哈哈哈哈)(而家又係冇晒呢d真正搞笑野了)。想知佢fans到點?係邊一年邊一季邊一集邊一節入面邊個環節邊單case邊個係主持邊個演員有份全部朗朗上口直頭倒背如流,又熟知香港多年黎所有奇案懸案好似拍得住烹屍同人肉叉燒包之地下經典「人心湯案」,不過呢d都未止,特別風化案Rock爺之認識同熟悉簡直係媲得美維基百科,識左佢咁耐我今日先知道佢原來有如此癖好,同第一次醒覺到對住佢要疏遠d小心d。又講講出版界,梗係要講香港流行文學之神檯級人馬博益畢華流啦,同衛斯理一樣小學起已經開始追,睇佢書中內容由中學到大學到教書再現實生活,然後去到遊戲奇幻科幻大富翁贏埋世界冠軍,條友對中國文化歷史、世道人事處事、天文迷信以至各種桌上遊戲全部通天曉,簡直係我眼中大隱於市之神人,除左文筆精彩、見解獨到、學識廣博,仲有佢已經唔係寫作而係創作,唔止係寫一本書咁簡單:《頑皮教室》趕返學遊戲、《四種怪物》借故事講四種怪物,但睇晒故事之後其實又係遊戲一部份,直頭寫書寫到當拎本書黎玩,加上佢書中好多題材都同我巧合地切身(校園、教書、科幻、奇幻...),係佢係通俗,但無論點永遠係我最愛香港作家。仲有大家細個的娛樂,邊個以前未蒲過、未迷過機舖?講番當年經典機舖,我十六歲果年開紅磡E-Zone、當年全港最大機舖,我十六歲生日果日第一時間就係仆到去E-Zone打House of the Dead,入場時仲可以高舉張身份證串串貢!(但結果第一日入成人機舖,係一舖機都冇打過,灰!)再跟住佐敦Virtual Zone開埋,仲犀利,差唔多成半個足球場咁大,城中大事黎架當年開到咁大間!Virtual Zone果間商場仲要係三料娛樂,戲院 + Neway + Virtual Zone!
「原來世界都曾經美好過。」
「曾經」。當今已逝。電視?收晒皮啦。機舖?紅磡美國寶同黃埔船兩間雖然同以前果d比只係碎料,但而家已經算係香港僅存之大場喇,當你再去佐敦Virtual Zone舊址睇,而家戲院機舖都冇只剩K房,就知世界大潮流係乜。書?你去圖書館借書,十本書有多過三本唔係搵條女做封面之愛情小說,已經值得還神,當年調番轉十本入面得三本係呢d野。另外博益去左邊?我都唔知,執左之後博益旗下之大量奇書如例畢華流全線已經成為香港各大圖書館之絕版珍藏,仲有好多鬼古、奇案,想睇書真係多野到你想揀都揀唔落手。睇番而家,各大新出版社除左講食、講旅遊、講錢、講愛情,再冇好似畢華流果種超越「書本」規範之鬼才鉅作。
所以老野永遠睇唔慣、住唔慣現在。

今日生意好 大家食雪糕
今日TRHK門口掛住呢對對聯。係二寶樂市長伉儷上黎之後,一班無聊人落樓買雪糕,走番上黎成村人一齊食時題的。可想而知今日幾旺。呢種時候,又點少得我地大會指定賽事:鋤七呢個環節丫。都係Rock爺醒目,知道TRHK早就沒落(其實有邊個唔係晨早就知呢樣野?),N年前已經買定副啤放係TRHK,遇到呢d情況就可以拎出黎打救世人。
「成日鋤七,有d悶喎!」
又好似係,所以今日試試新野:潛烏龜。相信在座甚至全香港冇幾多個人唔知咩黎唔識點玩,所以有理由相信居然會問「潛烏龜係咩黎」的Rock爺係新移民。潛烏龜好簡單遮,係pair就飛出黎最後輪流抽,抽到最後單一隻烏龜果條白痴仔就輸,但對Rock爺黎講如此簡單之遊戲都顯得過份博大精深(冇錯前述之「白痴仔」就係佢),為左就番佢之低智力,我地都係鋤七算數。點知一鋤七又論到市長唔得喎,完全唔知我地玩乜春!(這是很正常的,因為TRHK成班都唔正常)又遷就番市長的程度,結果都係鋤弟算。今日先至似鋤啤嘛!最勁果舖副牌有葵扇二有四條囡有俘虜煙,最細果隻已經係階磚積,每場每人出一round已經玩完三十秒KO,只係跟住輪到我全舖出得一隻牌就收左皮。仲有市長幻覺之pair 3、Rock爺紅心三都大,
「根本就同睇當年亞視各大賭片一樣!請大家一齊去信亞視,要求重播《勝者為王》同《千王之王》全線!」
真係好玩。係咪黎緊7七柒,都係鋤啤搞掂?

除左啤,當然唔少得變形金剛啦。而家玩到連TRHK/劉Sir最大玩具供應商,皆旺113人稱朝偉哥,都俾劉Sir教壞埋。正所謂做果行厭果行,日日對住咁Q多玩具,
「任你玩都玩到悶啦!係要玩,返大陸玩好過啦!」
但經劉Sir日煩夜煩問三問四之後,已經搞到連佢都鍾意埋變形金剛自己都玩埋一份,自己收玩具加入新貨已經大把野玩,玩到上網必埋一份,新出果批電影玩具更加大劑,造型已經超靚(最少車型係啦,變車真係靚到爆炸喎),開埋盒拎上手玩完就知大劑,手感一流之餘仲隻隻都夠晒多野玩,好多細微位同機關唔玩過都唔知道咁好玩,噉佢開得盒亦到即係我都會有得玩啦!好多睇樣感受唔到,但一玩過就知道大劑!實在太多野玩而家!就連電梯口果檔美國figure,我都撩緊佢架!
「似乎下年真係自己開番間玩具舖先得喇!」


3/7/2007 TUE

是日lunch,正。會計靚女借落街去銀行入數為名買麥記為實,噉就可以加送了。今日餐牌有肉醬意粉一睇就知係佢啦,靚女去麥記買左杯粟米加埋就可以自製粟米肉醬意,再跟住食雞翼,食完仲有蘋果批,今餐總算完滿結束。今日我公司黎左個新同事,睇見條友12:45開始lunch,食下食下,先掟一個意粉盒,再掟一個雞翼盒,再掟一個蘋果批盒,食晒仲可以趙多條雪條,食完立即撻低訓覺,以上所有全部發生晒佢連自己盒飯都未食夠一半,跟住訓覺之後「返工」時間所做就係周圍玩,好驚噉問老細:
「佢係咪真係呢度d職員黎架?又長毛又食咁多野又唔做野係度玩仲可以赤住腳走黎走去?」(冇錯每日返到公司我已經過份到立即踢低對涼鞋鞋都唔著周圍走)
自此以後,這位新同事就在這一家公司塈祤痋]&懶散)地工作了。


上到舖頭,又係靜。既然咁靜今日就聽番d嘈野,例如DARK LUNACY全線,講metal 呢隊都算係奇葩,聽過咁多隊band,仍然冇任何一隊係似佢地,交響樂加俄羅斯民歌加thrash death ,DARK LUNACY 真真正正只此一家,襯而家新碟到左就黎番野全線先。就係唔知點解,佢地明明係咁正咁特別,居然而家出到第三隻碟都仲未有公司正式簽佢地,仲係自資/搵細公司幫佢地出碟,講音樂講創意冇可能會輸俾其他人,可能又係衰一樣野啦:衰國家。唔係metal細國就好難出到頭,好多band都好唔抵,好似佢地十年都黎緊已經有三隻碟,點解仲要咁折墮?三隻碟都做到唔同,第一隻交響最出,亦會係最多人鍾意,第二隻恆左而交響方面少左,起初聽都唔係十分鍾意,但聽耐左之後,全隻碟整體同交響編曲部份都做得比第一隻好,只係你一黎就要靚的話第二隻確係差d。第三隻一出直頭俾人鬧,因為交響同民歌部份出得比以前更少 - 好似。初聽都唔多鍾意,因為DARK LUNACY長處係編曲,但metal 部份一直係弱項唔夠突出,唔係有古典樂器、俄羅斯民歌同女聲補救個底其實好薄弱,新碟開頭亦有同一個問題,但一路聽落去,去到後半d歌係另一個樣,大家想聽果d全部出晒黎甚至做得比第二隻更好,metal部份同樣後半d歌改善左好多,技術同編曲概念勁似DT,你可以話DARK LUNACY隻新碟係交響/folk/俄羅斯版DARK TRANQUILLITY。就係咁過癮。三隻碟都可以唔同樣,第四隻會點好想知道。只不過班友出碟咁慢,又唔夠公司支持,等多兩三年啦。



4/7/2007 WED

禮拜三,好開心,有飯開。又係會計靚女、同加舊同事每月一次的聚餐。每次開飯我地三個都會發掘新野食,小肥羊食左旺角、食左尖咀,今日無聊又就番舊同事屯門返工,出到去荃灣果間食。佢地最開心啦兩個都住荃灣果頭,係我一個走果時麻煩遮!香港四間小肥羊食左三間,就係差銅鑼灣果間未食,下次食食完可以順便行埋街喎!只不過要諗諗先,一來要過海,二來據聞銅鑼灣同旺角一樣都係斷碟計而唔係任食,我地呢d係唔係都亂咁叫到癲,埋單價錢可以差兩倍幾三倍。好諷刺,小肥羊最出名當然係肥羊,而就算尖咀同荃灣係任食羊肉都係要俾錢叫,但今日呢場最好食反而係唔使錢的肥牛,仲正過招牌羊肉。當然唔少得另一美點勁辣黑椒牛丸,同埋起初見到個名以為唔好食點知原來係椰汁>芒果凍>椰汁再加無限花奶中菜西做之椰汁芒果布甸。我地對小肥羊之研究越來越深入、越來越pro了。所以我真係好想搵次去埋銅鑼灣果間,反正a) 食左咁多餐,都冇幾多次係我俾錢,劉Sir食乜都有人包嘛!同 b) 冇錯就係可以行埋玩具反斗城同HMV你真係知劉Sir心意!(所以冇銅鑼灣,去尖咀食都唔拘!)
舊同事遠去已經近一年,讀過MBA返過大陸做野差唔多個個月都有工轉,兜兜轉轉走左劉Sir舊路:咪就係做阿sir囉。教職訓局遮,叫得職訓局就自然係教d實用野同技能野啦,好似佢主要教船務教物流,老實講,俾我去上都會悶死。而佢教果班,仲要係會考有分已經算勁、中五中七失敗出黎唔知做乜好就讀下書攝時間,你覺得連普通中英數都唔會聽唔會明,聽呢d高深專業野,又會明幾多?
「阿Sir自己都唔多識啦!你地上完幾堂會識?」
加上衰d講句,真係讀得到書同有心讀書,有幾多個會入呢d學校讀?本身冇心加上內容太深,成班嘈到拆天係好正常之事,教左一個禮拜已經勁到狂出警告信成為學校創舉,仲要神奇地居然真係有學生黎到呢d學校真係想聽書想上堂,班同學噉、個阿sir噉,立即走去投訴,投訴導師無能、投訴課程貨不對辦(IVE仔都會投訴?係讀書同有心讀就唔使/唔會入黎啦),朝早投訴完晏晝已經有教統局人過黎視察,全校高層一齊陪睇,睇堂人數仲多過上堂人數,勁!短短半個月已經連創該校兩大新高!睇個款諗住俾人炒硬,點知教左一期個幾月,冇事喎仲有得教!計番較一堂時薪算唔錯,好好搵架密食的話!不過好搵一回事,始終教呢d班都係兼職教,人工唔錯但堂數唔穩定加前景福利都冇正式教書咁好,所以只算係騎牛搵馬噉做法,而且有陣時搵唔搵到工,彩數比一切都重要。好似佢搵足大半年先終於搵到呢份IVE教職,但佢細路讀完個電腦degree再讀多個教育文憑,成績唔係好選科更僻,但一讀完差唔多搵都唔使搵立即有間天水圍中學請教數學電腦,出價仲要高過一般入職起錶已經收二萬二,
「我身邊d朋友又係degree加dip出黎仲要係成績超晒班果隻,搵左五年都搵唔到中學教書位,佢讀書唔得科又唔係大路,反而一讀完就搵到,死好命!」
搞到同事都有d想去用番年讀番張教育文憑,大佬立即升價幾倍呀!我就冇興趣。離開左教育界之後,如果要再進修先可以入番去,已經冇意思,因為我對正規學校之前景睇淡,非常規要花時間去研究。同埋始終抽左個身出黎非必要都唔想又入番去,教書要犧牲太多野,尤其是自己同時間。有機會同有需要先諗啦。但如果要我再犧牲多一年時間去達到,未免太大代價。
食到俾人趕都唔想走,因為三個人實在勁好玩,同埋今餐多野食到爆肚咁滯,荃灣呢間真係掂嘛係衰遠,食到飽晒郁都唔想郁。散水之後,另外兩位就開心啦咁鬼近,我就要飛半個鐘亡命van返土瓜灣。自從兩年前補習生涯結束之後,已經好少一個人搭呢程van。回憶又再回來。兩年前真係好多事發生。


返到屋企,仲未返屋企,身痕走左去行七十一行OK同行報紙檔。前兩者係因為近排同同事成日研究零食,有幾隻超好食餅乾係有個同事好耐之前便利店減價時執番黎,個個食完都話超正但就係搵唔番邊度有得買,屋企果頭既然而家七仔OK兩樣都有就兜兜,但吉手而回,唔開心。至於報紙檔,因為偶然經過,發現屋企果頭d報紙檔越黎越多變形金剛,嘩頂電影版就上畫真係度度都出現變形金剛!第時真係街都唔敢行,分分鐘行過馬路口,原來架九巴都係變形金剛黎!