這是最後的兩天。過埋呢兩日，皆旺就只會死淨108一檔 － 我講緊on9果班，正常人例如105&113不在此列。我地107已經搵夠，光榮退休了！
「梗係早日逃離呢個無人島啦！唔通留係度睇埋你班傻仔點死咩！」
為左慶祝，今日劉Sir再有創舉：
「食早餐！！！」
今日一早107就返皆旺清倉，夜晚三點大家先傾掂一齊食早餐，即訓之後七點就起左身，劉Sir呢ｄ一係頹到仆街一係勤力到你都唔信嘛噉先夠extreme嘛！就同上次怒行玩具舖歡樂早場一樣，呢單野一樣係冇可能早起身之劉Sir發起，但不幸地亦同上次一樣，除左發起人自己之外，其餘團友全部遲到。難為今日仲對呢個花園餐廳早餐咁期待！點知變成KFC仲要食晒先見到團友107！今次早餐除左食，仲有重要計劃：
「澳門！！！會係普通團定『特級』團就．．．呵呵呵∼」

要劉Sir咁早起身，確係難為左佢，嘩平時冇八點半甚至八點九都唔起身啦今日七點起喎大佬，所以返到公司立即不斷瞌眼訓係噉釣魚，半日返四個鐘工，我有最少兩個半鐘係昏迷狀態，真係好鬼眼訓。
「Z Z Z Z Z Z Z Z Z．．．」
呢個朝早完全係怒訓，老細又寧捨多野搵我今朝唔知點解，搞到訓都訓得不夠暢快成日訓訓下就聽到老細把聲／腳步聲紮醒。當堂怒小各位同事：
「做乜唔幫我睇水？老細過黎都唔通知聲？」
「有架我地係噉叫你起身醒水架！」
「有咩？邊度有？」
「有呀我地狂send MSN叫你起身架，你訓左冇睇到message咋嘛！」

今日上到黎，你會發現TRHK好唔妥：
「劉Sir你條友會執到間舖咁四正？」
冇錯你冇估錯真係唔（會）係我，入到黎會發有熟口熟面的感覺，再望真幾眼，
「咦？呢ｄ咪107間舖ｄ野黎？」
冇錯，正式過檔信和之前，107已經正式入股TRHK，從今之後107轉賣metal，108轉賣變形金剛，即日生效！
「TRHK，宣佈放棄metal，正式收皮！」

琴晚收檔之後冇節目，返到屋企又係C&C Red Alert，盟軍真係好難玩而家玩返先知道原來Red Alert 1係咁Ｑ難有ｄ位真係老屈要慘勝先過到關，本來諗住可以一晚通宵爆埋佢，但結果去到六點半先爆得三份二隻，即係起碼加多個禮拜先爆得晒隻game － 未玩到C&C3，對我黎講完全冇影響。訓到兩點半鐘，唔起身都唔得啦要開舖嘛，尤其是今日有料到：

出在今水貨大多係舊貨再補同已成目標唔算死得太慘，但單係上半個月連續幾個禮拜六果批野都已經夠死啦，而家砌緊果箱metal碟都未執，亦相信個箱好快就會滿＆爆，因為死貨已經越黎越多！
「身痕落街兜左個圈，原來F.I.R.個結他手出左隻solo，又有興趣！殊多！！」
同樣地又係心水推介時間（亦即係講定你聽有乜唔好聽唔好買時間，從來劉Sir話好果ｄ都係俾人怒小「唔好聽」果ｄ）：「單人匹馬與不死身第四小隊」（打渣古打上腦呵呵），上隻碟出左先好似冇耐今年又出新碟真係好鬼死快，即係預左係老土到爆加「悶」到爆架喇但我鍾意喎吹咩（即係呢隻碟入咁多隻都只會賣得出一隻啦！）；SCAR SYMMETRY同KALMAH呢兩隊個人心目中瑞典同芬蘭melodic death遺殊；thrash果堆唔使講啦，但心水唔係任何一隻德國thrash，亦唔係TESTAMENT（雖然TESTAMENT真係未聽過完全唔需要考慮可以即買），而係隊日本仔TERROR SQUAD，超癲的grind thrash隻碟聽到最尾直頭係估佢唔到咁爆笑，真係日本仔至玩得出呢ｄ野先會諗得咁癲；gothic果堆GATHERING悼念舊女主音之ELIS冇得走；progressive呀哈PAIN OF SALVATION同RHAPSODY OF FIRE係唔好聽但開左個頭為埋尾都要執架啦走唔甩，WUTHERING WEIGHTS、MERCENARY同INTO ETERNITY又執左未？死，數下數下，原來今舖都係大檸樂！提示只有呢水貨（已經同上星期六冇公佈出街果水合璧），個名越唔知乜果ｄ越正！我最鍾意係呢隻：

Weekly Review:

冇錯劉Sir都放棄extreme metal轉投metalcore的懷抱了。極鍾意呢隻碟，一來係EP剛剛好唔使煩，二來呢班靚仔玩metalcore真係玩到黐Ｑ線，所以聽metalcore咁耐我真係唔係太多美國band鍾意而好歐洲band多，始終metalcore係美國人學歐洲野，但學到其型玩唔出精髓。我支持英國、瑞典同德國metalcore。
另外特別推介，自然係ｄ特別野：TO-MERA、PROJECT HATE同RAM-ZET三隻，每次有親貨你總會見到呢三隻碟係物以類聚地放埋一齊。唔使講啦自不然又係劉Sir自己個人喜好「唔知玩乜春」果ｄ，通常呢類「神怪野」入一水賣晒之後 － 快則自己＆自己友執晒，慢則大半年，假使最後賣得出的話 － 都好少會再補貨，冇市場嘛好現實好聽唔代表有人買，唯獨呢三隻咁耐以黎賣完再入賣完再入無間斷過，因為呢三隊band之對象唔係本身上黎搵metal的朋友，而係漫無目的地搵野聽，甚至本身唔係聽metal的朋友，真係架喎呢ｄ人反而會鍾意呢ｄ唔知乜春metal野喎，就好似今日有條模型友上黎睇玩具，睇睇下好雀躍地走入黎問播緊果隻咩黎，噉就無端端賣多左隻PROJECT HATE。何解反而唔多聽metal果班同唔聽metal果班會更鍾意呢幾隊野呢？或者因為呢三隊band同劉Sir一樣，唔多metal卦，呵呵。

到左今日，皆旺107告正式收皮，我等都不知幾高興，因為107用埋間舖黎做籌碼，捨命證實俾各位朋友睇，
「一皆旺不能藏兩仆街！」
以往107開果時，108冇生意；108開果時，107冇生意；但兩間舖唔同時開只得其中一間開果時，就掂喎！今日107正式收皮，嘩我地生意真係超勁喎成為今年高峰之一！（當然，今時今日之「高峰」可能只等於以前之求祈一日平日）相信今日開始，TRHK營業額會直線上升生意興隆！

《鏗鏘集》係而家冇幾多個仍然值得睇之港台節目（你唔係叫我睇《過渡青春》卦，唔為睇女的話？），而今集經廣泛宣傳，亦可能會成為最高收視集數之一，《聽不到的樂與怒》喎，一睇就知係講香港地下band啦，自不然大把人睇。《鏗鏘集》唔係第一次講本地地下音樂、地下band，不過耐唔耐都會「update」返個時勢搵返下新band講講，再加上切身嘛，做幾多次都照睇架啦。今集焦點係四個單位（如此形容今集似乎較適合），第一隊係最有興趣的NEVER N，見識超豪band房同出騷要破窗運架生地大工程，好可惜到而家都未正式睇過佢地live，「live」只限電視、YouTube同「邊個話」，想睇，因為玩得好正之餘ｄ歌完全合我心意；然後係台柱KING LY CHEE，無論係咩媒體講親香港band一定有份，唔係點叫得做台柱？睇完印象最深係：「circle pit」＝「圍圈跳舞」，「圈內疾走喻作社會轉變」，全部野翻譯做中文有時唔係好事，唔知呢ｄ係咪真正之中文譯法，只係為中文而中文實在怪相。EMPTY TOMB睇之前唔知咩料，今晚先知道，原來係white metalrock！最後係今晚令各位(extreme) metal友不得不開電視，梗係EMO！重點之Tommy反而冇出鏡，而只得拍到好乾屍feel的阿華同Vincent，又係因為一樣野印象太深，而顧得一樣忽略其他：
「香港極端金屬聯盟幹事」
即係唔係冒犯，只不過我睇見真係引唔住笑！（唔係得罪，真係頂唔順架！）實在極具組織性同認真，我地TRHK一拍埋立即顯得相形見拙，或者我地每個人都要諗返ｄ銜頭俾自己好似四大護法三花紅棍白紙扇？（呢條友已經睇《DMC》睇到short左了）
「喂！契爺！點解冇訪問到JAZZTALLICA？話晒本地cult霸喎！」
點解好似講極都冇講到內容講乜，只識講笑？老實講，內容真係唔使多講，又係未睇你已經估得到講得出果一大堆老生常談。只係當睇完呢集「最新」之《鏗鏘集特輯之香港地下音樂》，發現內容其實同Ｎ年之一／幾集唔係太大差別，已經灰到冇晒野講啦。
「幾時到訪問你地TRHK呀？」
呢條問題都幾多人問過。都唔係未試過丫，2004年已經試過《Metal時尚坊》啦，果時劉Sir行出街俾人指住笑添架！只不過正常黎講，無論係咩節目選咩對象做訪問都好，點揀法都唔會揀得到TRHK。有冇人記得Ｎ年前《Milk》篇「Metal專題」？係講metal亦有TRHK份，但個專題係講「點樣著得metal」，跟住有一版介紹extreme metal有出TRHK個名，只係內容其實非由TRHK提供，至於內文所寫為何有興趣搵搵舊段記啦。至於《Metal時尚坊》，其實唔係張導演係metal友又係我地ｄ客再加埋撞正六翼，大家都識之關係，亞視又點會無端端走上黎訪問呢間CD舖？係囉明啦大家明白點解冇人會上黎訪問TRHK啦：TRHK只係一間CD舖黎遮，雖然國際上TRHK並唔止係一間舖頭咁大把而係一間唱片公司，但香港地只會當呢間野係要乜冇乜掛metal賣狗肉的廢舖，冇乜值得探討。而且「CD舖」又有乜好探討？訪問坐檯叫劉Sir果條傻仔，答案又係好多人都好熟果一大堆「事實」，既不勵志亦唔正面甚至有點兒反高潮加得罪全世界，有幾好睇？俾著你係觀眾，你寧願睇一隊band出live之後講返你聽佢地玩乜音樂、搞音樂有幾難，「深受感動」，定睇部電視影住一間舖頭三個鐘一個人都冇得條傻仔坐係度上網打機玩變形金剛，然後講下「咩叫metal」，同點解賣正版undergroud metal野咁難經營？即係當事人我都係噉話，如果我係導演，我都會立即搵幾隊band去幾場騷拍MV噉拍，再叫「演員」聲淚俱下地講下地下音樂如何難搞要點樣努力拚搏請大家多多支持啦！這就是現實！拍一間「舖頭」點樣賣唱片、講下點解香港地賣metal賣音樂會咁難、客觀限制有幾大，會有幾好睇？
「TRHK = 廢！Yeah！！！」

107撤出之後，最慘就當然係上唔到網啦，冇得上網睇野事少，去MySpace同樂隊ｄ網搵歌呢樣野好有用加好重要架，似乎都要搞返個上網俾網上行昆架喇。呢樣都未算灰。更灰係，已旋收皮的107又再出現。
「都未剋死你地TRHK，我點樣走得安樂！」
就算未剋死，而家都係等緊死，今晚節目係一班「智囊團」係度腦震盪，如果搬竇的話，可以搬去邊？
「似乎愛美神夜總會真係唯一選擇喎呵呵呵呵！」

每年都係，一到四月就連踩到六月都會超忙，因為四月香港一個展覽，跟住五月再一個，返到黎再跟返ｄ野，全年其中最忙一段時間就係呢三個月。下個禮拜六起就係香港個展覽會，再加上而家手頭上跟緊ｄ客勁多麻煩野，前排踢晒ｄ野去工廠做ｄ野差唔多起晒貨，今日就一次過睇定展覽會個攤位同跟返自己果大壇野。聽完都知其實今日返上工廠其實又係無聊啦，上同唔上實際上差別唔係真係咁大，我都係貪有得訓覺同埋工廠阿姐煮飯好食遮！似乎老細都知我心意今日手車特別慢，九點鐘上車行足兩個半鐘先到一返到工廠用少於0.5秒時間睇完個攤位 － 喂我真係「睇」架咋老細叫我上黎睇我咪真係睇完就算囉我幾聽話！睇完之後咪立即企定定等十二點食飯囉！食完餐飯又再訓多個零鐘，正！跟住同工廠班友吹返半個幾鐘水再電話同個客吹多輪，三點幾彈上車又訓，更正！！！睇黎係老細都知道我近來辛苦左ｄ（「辛苦」＝「本身乜都唔使做變成每日打多兩個英文字母咁大把」），特登帶我上黎散散心抖抖！
「多謝老細！！！」（免生誤會，特此聲明：「我唔係多謝緊我自己！」）
即係有得世紀黑仔王劉Sir係度，有邊一次係冇事發生？今日又黎：有冇睇新聞？呢輪因為關卡口岸新措施阻Ｑ住班貨車司機大佬過關，搞到班司機大佬郁ｄ就罷工抗議，冇錯罷工果時我又在場！話說要入黃崗關卡，就要先上一條天橋再由一條分支路剷返落去，今日條橋都未到已經見到數以百記之貨櫃車組成之可惜車龍，上到橋條龍已經係長到遮實晒連出關條分支路都唔Ｑ知去左邊！唯有走返落天橋兜黎兜去搵第二條路入黃崗，但係老細冇走過呢頭深圳ｄ路又亂到九彩，其實好近架咋黃崗一望就望到架喇落去一個字都唔使，就因為呢個罷工車龍要再地氈式搜索地兜勻附近咁多條大街橫巷先入到去，噉又（訓）多半個鐘，最後六點鐘準時返到公司，算好彩架喇（冇錯特別係我！）。老細曰：
「．．．下次無端白事，都係唔鬼帶埋你上大陸！帶多幾次分分鐘命都冇！」

一入到公司立即飛撲埋部電腦度急send＆睇email，嘩實在殊多，所以我選擇send左幾封緊要野之後乜叉都唔理立即飛身走人，趕得切七點前上到皆旺絕對符碌！今晚係靜靜地多人的一天，多定少人有定冇生意呢排對我黎講唔係重點，而家我係諗緊，呢半個月黎咁多批貨夾埋，點樣去掃點樣去聽？近來呢ｄ貨，特別係underground果批驚喜，實在係太大吸引力，足夠令我先放棄一陣C&C同變形金剛先。

琴日返大陸，返到公司睇睇，email數目係多過上星期總和，
「嘩平時一日過十封都算勁喇喎你地唔係噉玩我丫嘛？」
加上復活節假前最後一日同超多野跟緊，本身已經做定最壞打算今晚冇七八點甩唔到身，點知！大家都知道，同佢地打交道果個，係出名頹盡江湖的劉Sir！各方朋友立時異常合作，工廠一早做好晒ｄ野，公司ｄ同事又爽手執定晒ｄ野俾我，填好晒ｄ文件掟晒俾ｄ客之後，平時個個收到實會有野講又話貴叫減價又話唔夠靚點點點，今日奇蹟地係完全冇任何回應or意見，最後準時六點又走得人直頭感動流涕！睇黎頹廢之神冇離棄到劉Sir仍然庇佑緊佢！（頹廢之神唔係劉Sir，劉Sir已經頹到成佛！）

今日係我地EEG成立後首個盛大活動，我非常認真地對待，雖然例假放下放下已經冇幾多日年假剩，都認真考慮過今日請返半日假去玩，點知係呢兩日先一野炒咁多野埋身就冇得走啦，好在臨尾可以六點放工，仲有返兩個鐘周圍逛，反正得閒就行路出深水土步啦做下運動又可以聽下歌。細個開始蒲九龍城，大個仔仲係好鍾意行舊區，就好似深水土步呢度，原來呢頭除左多機舖，仲有勁多game舖同玩具舖，去魚蛋檔篤左串魚蛋加咖哩角再掃街，正真係好多野行同睇，想當年旺角有條玩具街即係而家兆萬樓下果度而家已經冇晒，好在呢度仲有成條街都賣玩具，每邊三間檔有兩間係玩具舖精品檔行都有排行，仲要係我鍾意行果種玩具舖喎，有ｄ成間都賣公仔連孖寶兄弟條龍成個人咁大之毛公仔都有，有ｄ地攤檔超多濕碎野立雜野買玩具反斗城都冇咁多野睇，仲有超多舖頭賣勁多美國野，令唔多鍾意日本野的我今晚行得非常高興，變形金剛梗係有啦，多細細隻二三十蚊一隻／一pair果ｄ抵玩野，最貴果隻反而係一間地攤檔先有（似乎有人入錯死貨呵呵），有隻仲要係我一路搵緊之目標添，即走啦唔係又跌錢大Ｑ劑。行呢區對一ｄ平價同白痴玩具興趣咁大，細個邊有咁多野玩呀好多都十幾年前見過想買但無緣擁有，而家行過見返好有感覺架，平平地又過癮同埋確實好玩，好似今日主要目標就係想搵返上次玩具反斗城見到果個手榴彈，真係好鬼鍾意好想摷返個黎玩下！
「咁好玩，我又黎！」
阿捷曰。冇錯真係行到好開心架，只係阿捷一出現，全部玩具舖都買左佢怕99%舖頭即時收皮成條街黑晒。
「阿捷，似乎我世界黑仔王個位俾你搶左喎！」

行程係八時集合九時入席，八點鐘都仲未有電話，撥幾個輪，家住長沙灣的幾位老細個個都仲未出發。原來我+阿捷+阿成三個最準時，亦即係最戇居！仲咁「早」，冇野做又出到黎黃金，梗係順便行埋。嘩雖然呢度咁出名但我真係諗唔起我幾時有黎行過喎，只記得我黎過呢間機舖打機！見識到全香港堅持得最耐之四仔舖，勁喎而家仲有賣四仔兼賣得咁揚＆開到咁大，呢間四仔舖都可以話係黃金甚至香港景點！仲有大量「開埋今日就執笠超值價可一不可再」雜貨舖，九蚊一舊扭計骰有諗過買黎玩架又係童年回憶嘛！仲有越做越pro的翻版舖，而家ｄ翻版game包裝已經同正版完全冇分別喇無論美工用料定製作質素，唔同只有盒面寫係簡體中文而唔係英文，有更多連正版你都唔會見到之正game，例如
「Red Alert 2007！？！？！？！？」
名係Red Alert 2007，畫係C&C3，劇情係2010年，嘩集晒C&C全集咁多系列之大成喎！唔知係咩黎亦都知道搵笨居多，喂夠架喇夠搞到我呢ｄ傻仔乖乖磅水架喇！（呢次當然冇啦呵呵）真係有好多舊game，連最想搵返之DOS game都有正版都只係七十蚊一套（翻版DOS game就唔會搵到架喇呢個年代），摷摷下仲奇蹟地搵得返：
「死人打字！」
真係噉都有，嘩想玩返好耐喇呢隻野！黃金原來又係福地黎死又俾我發現多個跌錢熱點！一場黎到電腦商場梗係要睇埋display card啦，丫原來我地有個客仔好耐冇見人，而家黎左黃金呢度做，望望display card價，似乎投資都幾大喎為左隻C&C3，使左舊錢執完隻game，又要跌多舊執埋張display card黎玩！
「玩一隻game使咁多錢，值唔值呀？」
講真係絕對唔值架。可惜呢隻game係C&C，我打機生涯同中學生涯重要一部份，其他game我都唔會諗，呢隻，義無反顧。呀唔係，都有少少顧架：
「死，執左張display card的話，跟住咪打乜game都得？到時咪變形金剛都唔使玩metal都唔使聽舖都唔使開？」

行左Ｎ咁多個圈塞＆等人Ｘ咁耐，終於齊到人去傳說中之長沙灣$38打邊爐開餐！醒水的朋友會質疑，因為之前大大聲
「宵通燒！」
難得有機會撞正禮拜四紅假，唔使開舖又可以名正言順玩通宵，特別搞返次平時冇乜機會搞次大型活動，為我地EEG打響頭炮。家陣做乜春收晒皮打邊爐？冇計，呢排天氣真係唔多掂去到落雨就大劑，加上唔夠人手霸爐同買野食，出到去大尾篤咁遠各位城市人又似乎唔多鍾意（只得家住新界豪宅區的107鍾意），各種不明朗因素及各位朋友的惰性，最後演變成／淪落至「冇晒意義」的打邊爐，
「就係唔想次次都坐低就食食完就散咁冇癮先出去郊區燒野食！點知又係打邊爐！你地全部同我旋收皮！」
107曰，頂唔順廢鬼事出現走返去開舖算。點知又會咁蹻，今日班靚全部唔返工要佢御駕親征鎮守信和，又好彩有佢駐場，因為今晚信和生意係破晒紀錄地多，再次證明「一皆旺不能藏兩仆街」的硬道理！
「拿！107！今次係我地救左你！真係去左燒野食，你今晚唔蝕返幾皮野？姑且原諒你放我地飛機不再追究啦！」
話係八點鐘集合，但點早點齊人都係等九點宵夜場慳返果廿蚊，我冇所謂呀反正出到黎呢頭都係行街架啦，行得好開心架今晚！仲可以見識傳說中之長沙灣平通港九打邊爐，冇限時任坐任飲任食裝修好夠排場坐得舒服又夠乾淨，款唔係特別多但夠我食，肥牛太肥同老左少少唔係好多人鍾意但我反而越食越有味道仲食過返尋味，加埋牛丸同豬肉丸殊正只衰冇包心丸，食咁鬼耐玩得咁合皮你夠厚面皮仲可以私藏汽水走人先收你每人七條喂邊度搵呀呢ｄ地方！即係各位返新界的朋友辛苦左少少啦轉車咁麻煩，我仍然係一程巴士搞掂，
「嘩一Ｘ流呀不如第時打邊爐搬竇過黎呢度打啦！」
從《聽不到的樂與怒》得到啟發，今次打邊爐，我地研究出獨家食法：Circle Eat圍圈食野，傳住黎食喻作食物無窮無盡！
「我地就係咁柒！鬼叫我地係EEG、Extremetal Entertainment Group、極柒金屬聯盟！我地只係一班唔知咩係metal只識柒下柒下不再有型的烏合之眾！為metal拚搏、推廣metal呢種音樂如此高尚大志，都係留俾其他人同單位負責啦！得個玩字的我地擔當唔起！」

食都睇埋晚間新聞先走，返到屋企差唔多成點，好鬼死夜先訓。C&C？唔係今晚完全冇玩過。死人打字？可以噉講啦，都玩左幾舖先訓覺好鬼死鍾意呢隻game架，不過真係好難玩次次都係打到尾二大佬就game over，自己都唔明當年點樣打得爆機。搞到成五點幾先訓，因為部機中左毒。一向除左上ｄgame網同少少forum&metal網都冇乜上網睇野，近來顧住打機更加係網都冇時間上只係間中上網摷攻略，估唔到部機噉都中到毒，仲要係毒入膏肓果隻！係我以前用果ｄanti-virus太渣定而家用緊果隻勁過頭？用電腦咁耐，都未試過好似而家噉，每次一開機連線上到網，唔使半個字立即detect到狂多木馬裝入部機，仲要一次比一次多洗晒之後過左個零字又俾人裝一鑊，搞到大半system file中晒毒改又改唔到洗又洗唔到，用足三個anti-virus黎scan都洗唔到冇用，真係仆街不得不爆句「屌你老母」俾整病毒同adware果ｄ陷家產累人累物！
「搞錯我乖乖地打機部機都可以搞成噉，早知部機會搞到咁大鑊，係噉上鹹網去download鹹片同software擺明中毒好過啦！好人冇好報！」

因為近來太多職務纏身（「你會有？」），加上放假放太多要呃返下假（「其實係呢樣野遮！」），今個禮拜計劃星期四五清明復活照返工日頭返公司之後上舖頭，但琴晚部機噉樣搞一搞，乜工都唔使返啦麻叉煩真係，搞到十二點幾先起到身仲要係俾ｄ客電話摷醒，起身屋企上網加狂打電話搞掂晒再走人出皆旺，不過就算我照返公司頹夠四個鐘先至走上黎都完全冇問題，復活節TRHK／皆旺完全冇復活過，只有益收皮。
呢輪發現係，無論係咩碟都好，想賣多幾隻搵多幾蚊，封面記得係唔係都塞個人上去，越多化妝同越油頭粉面會更好，噉先吸引到人 － 真係架，「偶像派」嘛，假使只係一幅圖畫都唔多會留意，但如果係一個人、一個「偶像派」型人仕出現封面，執得靚ｄ、著得好ｄ，就算唔知咩黎都會令人不期然拎黎睇睇甚至俾錢買，人靠衣裝，碟亦都一樣，所以J-rock、visual同gothic band從來好賣過實力比佢地好但純玩音樂果ｄband，例如X、Manson同HIM － 可以非常老實地問自己，唔係形象，你覺得好多人會咁迷佢地、佢地會咁出名嘛？俾你聽完首歌之睇個樣，同睇完個樣先聽首歌，首歌本質冇變過，只係你對首歌之印象，可以相差好遠。跨得過「衣裝」呢關，先係真正投入聽音樂之始；另一關係「名氣」。
因為同一原因，隊日本仔melodic metalcore MYPROOF賣左好Ｑ多，呵呵。

夜晚都唔係好得好多，係叫做多一件107上黎食飯，冇錯雖然皆旺一零七已經收左皮，107 or 145 if you like仲未，信和開舖之餘亦會無聊到走過黎TRHK飯堂食飯，順便幫手邪一邪趕一趕客。今日議題係：
「劉Sir個網可以搞到幾大？」
搞？係有ｄ興趣架！反正呢度宗旨不嬲都係無聊同戇居！只不過，劉Sir都算係半個公眾人物嘛！一唔覺意柒過頭，上左蘋果同《第一手真相》全港都識呢條仆街果時，老細憤而炒Ｑ左呢條頹廢員工，咪大劑？（到時就可以全職變形金剛了呵呵呵呵）

呢晚係噉打機，Typing of the Dead係噉煲warm up完之後終於俾我爆到機，三個結局而家玩到兩個，真係玩極都覺得呢隻game好過癮！而C&C努力左一晚，Red Alert亦俾我爆埋盟軍，又向C&C3行近一步了！進度比預期中快，死我驚好快就要去執返張display card直落C&C3！
唉，仲話四五月會忙到死，而家噉C&C法，我真係驚打機打到工都廢鬼事返！

我琴晚好乖仔架，爆埋隻Red Alert，四點就訓覺喇！（．．．）今日九點幾就起身走返公司，香港放假遮大陸唔係嘛，要返去繼續同工廠同客人跟野，其實留係屋企做唔返公司都可以，但係（最重要）要儲返ｄ假嘛，同埋兩個任務：返黎撻公司ｄWindows同software碟返屋企預備format部機，同埋陪人。會計靚女同我一樣襯復活節假返黎公司加班，喂大好時機黎架復活節老細出去旅行唔會失驚無神撞返黎公司啤啤貢嘛，我呢ｄ就擺到明恃住冇皇管，返到黎send晒email覆晒電話再等阿靚女買埋早餐上黎食埋就訓覺，我都係呃／「做」半日遮阿靚女直頭留足全日，不過四月要報稅真係有野做可以加被迫大條道理返黎加班做野喎。呢ｄ時段除左訓覺，當然係聽歌啦，有幾隻之前寫緊浸開，放低左一輪而家聽返，有動機寫返下碟評。由日頭公司一路聽聽到上舖頭，今日暢通無阻地聽乜都得，冇辦法啦，
「都冇新貨！」（諷刺地每到外國節日假期，鬼佬同外國華人生意可以多過本地人生意好多）
我完全冇問題，仍然係聽緊之前甚至再之前ｄ「舊貨」，連上年ｄ貨想執果ｄ都未執晒啦，根本聽都聽唔晒，基本上而家有冇新野有咩新野有幾新對我黎講完全冇任何影響。近排得閒無事拎返ｄprogressive rock野出黎聽舖癮又起，上到黎係噉播prog野，AYREON隻"Universal MIgrator"第一集同第二集，好多人唔鍾意呢隻正如好多人唔鍾意AYREON一樣，始終唔係metal只係prog rock野老土嘛，但我好鬼鍾意喎AYREONｄ編曲同旋律確係只此一家，係悶呀吹咩我鍾意就得啦！同埋重點的PAIN OF SALVATION新碟，今日靜到連續聽左幾次，未聽都唔知點解呢隻碟會俾人怒小得咁勁，小得仲犀利過上隻碟，今日噉樣連聽法．．．明喇。相信最忠誠的PoS fans都未必會頂得順，可能聽完頭兩首歌已經熄機，聽到第五首，隻碟都掟爛埋。或者再聽多十幾／幾十次兼睇埋歌詞就會明白箇中道理只係現階段只想聽ｄ唔使用腦爆完就算果ｄ，所以今日對呢隻碟之初步印象除左好多fuck，只有呢part：
「（死腔）Disco Queen （基佬聲眾）Arrrrrr!」（死，而家好似鍾意WOLVERINE多過PoS）
積下積下又唔錯，除左107又走過黎食飯果段時間食晒屎之外全日都幾平均（「107而家擺到明針對你吹咩！」），積下積下更成為本年度生意高峰日之一（琴日107破紀錄今日到108，一皆旺真係不能藏兩仆街！）。會唔會係因為Punisher同圓桌武士再現江湖接替鋤七之位？

正呀連放咁多日假禮拜六都唔使返工（調轉頭諗，返半日之星期六先黎紅日，蝕左半日假添！），今晚已經好似星期六日咁開心，打機打到通頂咁滯先訓。勁玩死人打字，爆完又爆而家較到最高難度玩，very hard唔係難，係老屈，玩normal我可以頭三關差唔多一格血都唔扣過到、去到尾二大佬先用第一次continue但very hard頭兩關ｄ卒仔／字已經係難到hihi完全係苦戰，玩到後來一個普通卒仔都要以一秒十幾字加唔錯之速度先做得底，直頭係要去到pro級數先應付得到，所以House of the Dead系列其中一個特點係要拯救受喪屍襲擊之平民百姓黎拎命拎道具同走捷徑摷寶物過關，唔係我唔想救呀，要我兩秒鐘打二三十個字仲要100%打中晒ｄ字仲要都唔知乜春黎睇都睇到一頭霧水，點打？各位村民真係唔好意思你地認命俾喪屍殺Ｑ晒食Ｑ左算數啦唔好怪我小世嘉啦。以前我係完全唔識打House of the Dead覺得好難玩，但玩完Typing of the Dead之後，立即覺得原來槍game版易玩到震。
另外，梗係唔少得C&C。Red Alert爆左盟軍，開始攻佔埋蘇俄，雖然兵力上蘇俄絕對呈壓倒性，但玩落去頂ｄ關仲難玩過盟軍，又係因為一個屈字，你自己個地盤根本唔夠資源去搵咁多錢起野之餘電腦又有地勢天險優勢等你攻果時係噉死。C&C特色係可以用唔同兵種之特性同屬性互相克制？算啦你玩落就知所謂「克制」只適用於電腦，你用果時ｄAI係會自動幫你將一切優勢屬性去除，例如你架車本身可以隔成個畫面射到人，點解你用果時硬係要行到去人地面前先開火你架車炮都未開電腦已經炸Ｑ爆左佢？一言記之曰「屈」。長時間受到電腦欺壓，搞到我決心一定要呢個復活節假完之前怒煲多兩晚爆埋佢。
「我發誓！爆唔到我就唔返工！老細你聽到未！」

打完機沖埋個涼成七點幾先訓覺，照計呢輪咁多野忙緊唔係工廠都有客打黎叫我起身做野，點知今朝奇蹟地（近來真係好多奇蹟）只得一個電話，點零鐘叫我起身，更奇蹟係呢個電話唔係同正職有關而係metal（「乜你唔係當左metal係自己正職咩？」）。起身刷完牙洗完面再食住個公仔麵，開一開機睇睇發生咩事先。食麵到開舖中間主要係為左幾樣「metal野」，亦係為左佢地先會咁「早」起身。食食個頭盤先啦：

就係由AZYLUM結他手阿中"Decreate"放出黎。唔識邊隊AZYLUM？唔緊要而家講你聽：AZYLUM係九十年代初本地最勁metal band之一，玩SEPULTURA、SLAYER果種爆恆tharsh metal，九四年自資出過一隻碟"Are We Born To Suffer"，相信係香港史上唯一一張thrash metal唱片，亦已被公認為本地metal release經典。事隔咁多年自然係絕左版啦，曾經HMV擺到成個架都係廿蚊大清貨，亦試過鴨寮街不知名唱片舖十蚊隻全新賤賣，而家除左耐唔耐去二手舖或者偏僻地區可見其蹤影絕冇可能搵到，有ｄ二手舖亦好識貨架知道呢隻咩黎大大隻字寫住「絕版」再標到過百都有。而AZYLUM捱左好多年，最初出騷十幾人睇，跟住幾十人睇、過百人睇、幾百人睇，甚至到條片呢場八百幾人之高山音樂節，可想而知當年地下音樂「全盛」時台上台下係幾咁熱情同投入。呢首"Dreamland"係自己歌，同一場騷仲有玩到METALLICA "Disposable Hero"、FLOTJAM AND JETSAM "Metalshock"同SEPULTURA "Inner Self"呢三首聽(thrash) metal冇可能唔識亦唔可以唔知之經典,睇佢個樣同聽ｄ歌都知道佢（地）係超級SEPULTURA fans啦。喂果時AZYLUM真係好Ｑ勁架仲有其他好似SLAYER同麥記版QUEEN cover "Stone Cold Crazy"呢（頂呢首我都超想玩！），技術同音樂黎講佢地肯定係首屈一指，睇過段片你都知道實在堅料。出騷出到咁大、又連碟都出埋，最後點解不知所蹤？都係band sound沒落、與生活妥協同有才招妒呢ｄ原因架啦唔需要多講啦，特別係最後者。仲有一樣野，可能好多人都唔知：
「AZYLUM歌手兼結他手Soni，就係成立TRHK果位Soni。」
我都明呢樣野好難置信，但的確係100%事實喎，台上彈緊結他唱緊歌果個同你去TRHK見到「司儀」，的確係同一個人黎架，雖然兩者之差別肯定大過100%！AZYLUM散左之後，為生活拚搏左幾年，就搞左TRHK出黎，最起初只係做online mail order，跟住上九龍城龍珠開左門市部，係正我屋企附近咋喎，喂行兩三個字咋喎真係日日晚晚去都得啦，幫襯一輪仲做埋老襯入去做埋，噉樣捱一捱就捱左六年，由當初好多人一齊搞，變到而家剩返我一個加幾位朋友繼續撐住，可以有緣成噉，證明我呢世真係註定要奉獻俾metal。當年AZYLUM玩到咁大，噉而家點？
「仲有冇夾落去？又或者問，做乜唔繼續夾band？」
「夾band之心仍然有，只不過係由自己夾band，變成去支持其他人夾band。所以你會見TRHK積極簽band同幫佢地出碟。」
再想知多ｄAZYLUM同九十年代香港地下音樂？請即登入Rocker Man Blog。Rock爺所寫，100%道出，值得細味Rock爺所寫同片段所記，如果你知道片中主角之歷史，會更加體會得到 － 但在座有幾多位有咁「老」呢？
「．．．段片講ANODIZE喎！」
有架！睇Part 3 3:20！見到拜神果個「鬼佬」未？認唔認到佢？呵呵∼
「噉關咩事？」
其實，關好多事。如果你夠「老」的話，就會明白好多野，知道幾者之間的千絲萬縷，同埋搞metal，真係冇前途（呢樣野你真係要知道呢十幾年內發生之事先會充分理解得到）；唔知的話，咪當睇多樣野認識多ｄ香港地下音樂歷史囉。

寫左咁耐，先只係講左一樣野，繼續食公仔麵，同其他朋友繼續溝通溝通。一位台灣朋友彈過黎的過癮野，潮左勿小你都知道我已經好耐冇特別上網睇野，呢ｄ「新聞」相信都係來自BBM，只係幾耐之前之BBM我就唔知喇，都係果句啦：
「請各位專家高抬貴手，潮左勿小。」
真係好耐冇認真上過forum同網頁睇新聞，冇乜心情嘛又要玩，見今日食公仔麵得閒咪睇睇。一上BBM就見到呢單野，繼上年LORDI之後今年芬蘭又係metal友贏左，呢位仁兄聲唔係靚唱唔係勁台風更加係唔多掂，但唱metal而贏左，噉又繼續等睇戲啦。又係metal贏左確係幾估唔到，不過都唔夠佢會揀"Black Hold Sun"咁估唔到。metal可以橫行成噉，全國大半人都係聽metal個個十歲未夠已經開始夾band仲有資助政府同家長支持，實在係我地metal友的天堂呀！無聊又上forum立立，比起BBM我更耐未睇過forum，點解？唔識玩填字遊戲嘛。俾你揀，你想做一個識得多band之人，定係懂得聽野之人？劉Sir絕對做唔到前者，在這download年代，有咩唔識上一上網搵資料立即變成專家，想聽邊隻碟上網摷一摷手到拿來，新碟未出出碟個幾月前已經有得聽，到出左碟之後劉Sir搵到錢買返黎果時已經會俾人笑「out啦呢隻聽到悶而家我都唔聽啦」。又唔會download（相信我係全香港冇幾多個仲未識用BT同P2P software之人），又唔會成日上網睇「時事」、睇定有乜新band出有咩新碟出、去MySpace搵近來有乜新band襯其他人會識會講之前快人一步，所以講識得多band，劉Sir絕對及唔上而家在座任何一位，更及唔上forum上的求祈一個。而而家forum之「規矩」，係講band名，而唔係講音樂，當各位朋友隨口都撻得出一大堆而果大堆我都冇幾多隊識之時，唯有自愧不如收皮算啦出聲盞俾人笑遮，冇辦法，你叫我數band名我真係數唔到幾多，我只識得聽到一首歌，講得出呢首歌係咩類型、夾雜左咩元素同風格、有咩特色、技術同創作有乜好／唔好、隊band同首歌受邊隊band影響、係邊個國家風格、甚至講得出呢隊band係咩國家出身，但係真係要我數幾多隊band出黎、講有ｄ咩band，我真係只有甘拜下風。
近排勁聽ANTIMATTER同寫緊（貪佢unplugged野唔係metal嘛），睇左篇訪問，就係講呢個問題：佢（ANTIMATTER的確係要用「佢」黎形容喎）細細個已經開始聽音樂，果時冇internet冇CD，係每星期將全部零用錢慳埋慳埋，到星期六日行好遠出市區買黑膠碟，仲因為細個冇幾多零用而只可以買二手碟，噉樣每個禮拜就係用盡一切零用錢買一隻黑膠，再用足六日去聽呢隻碟，聽佢有幾好聽、有幾唔好聽，邊首歌得、邊首歌唔得，首歌玩乜、隊band首歌想表達ｄ乜，過程中對音樂之鑑賞能力同態度都得益不少。但事隔二十年後之今日，每個人擁有之音樂存量已經等同於擁有一間HMV － 假如未多過HMV的話 － 而聽緊一隻碟之時，已經係望緊另外五十隻download左而未聽果ｄ，第一隻聽完之後已經急不及待／迫於無奈掟埋一二邊轉去第二三四五十Ｎ隻，一隻碟一首歌會真係聽幾多次，心中有數。呢種聽法，又點會聽得明、聽得真，點會真係去研究自己聽緊乜、去明白呢種到底係咩音樂？所以有好多人可以講得出好多勁多當打metal band同extreme metal band，但係會識EMPEROR唔識PANTERA之類，又或者可以每種metal講得出一大堆band，但問返果種metal即係咩黎有乜特點簡單講講歷史卻完全應唔到的怪現象。做一個識好多band名的metal友，定係明白同解釋得到自己聽緊乜野、點解要聽之metal友，你想做邊個、你會點選擇？我會揀做後者，亦已經做到，所以好多人每日第一件事就係上BBM、上forum、上MySpace有咩最新消息即時吸收，我完全冇諗過去做呢ｄ野，聽歌遮，追星咩？得閒無事打下機好過啦唉。真係明白一樣野、知道自己識聽，係唔需要做好多野／太多野去「證明」。

連續咁多日紅假，反而星期六先至係最靜一日，近來又打返機，自不然又係圓桌武士同Punisher渡日。
「玩左幾多舖？」
你唔會想知。講出黎我驚會嚇親你：
「乜TRHK唔係賣CD咩？做乜而家變左機舖？」
點止，夜晚仲有《殘酷一丁》。TRHK終於回歸「正常」了：冇人買野的TRHK，先至似係TRHK嘛。
噢。而家舖頭冇野玩冇癲法的話，真係冇乜野好寫。

冇幾多晚剩喇，珍惜光陰，繼續打機。C&C自然唔少得啦，反而死人打字狂煲，喂真係越玩越開心喎呢隻，雖然俾電腦勁屈的時間居多，有個mode近來好鍾意煲，就係同電腦雙打鬥高分，見電腦眨下眼就打左十幾個字行野你睇都未睇得清楚佢已經瞬間轉移噉成行打晒KO隻喪屍，簡直係玩到令你氣餒唔再打字。今晚仲同阿成研究點樣連線雙打添，可惜隻game個system廢得滯連線窒到仆想雙都雙唔到，都係好事黎架，真係雙打到的話，我會四點半咁早訓？

．．．冇咁「早訓」，今日真係起都起唔切身趕唔切，喂大佬玩具展呀！！！
「死貨場黎咋喎！」
所以先去！TRHK工作多年，令劉Sir成為一個熱愛死貨的傻仔，人棄我取！個展覽擺星期六日十點鐘開，本身都冇諗住黎因為就噉睇吸引力唔係好大，亦冇諗住真係有好多我想要之野例如變形金剛，點知琴日一唔覺意有個鬼佬走上黎，拎住一隻建造派，仲要大特價$180！就係玩具展有得賣！
「油巧零多邊影金剛埋牙！」
得唔使講今日旋去！十點開場噉我地當然唔會咁早去啦十一點出發都未遲啦，即係我已經衰架啦十一點半先至去到德福，理論上太子地鐵一出就到的阿捷仲衰過劉Sir簡直殊廢！
「拍得住已經衰到貼地的劉Sir，真係好難唔衰埋一份喎！」
玩具展真係好大吸引力，唯一一架穿梭巴排隊排到兜幾個圈，算啦落本ｄ飛程的過去啦，唔使貼標兩個人分都係七個半遮當飲杯野冇Ｑ左啦！呢ｄ「開放日」都冇預過可以有幾多檔幾大地方，但多唔多檔分別唔大丫最緊要係賣乜嘛。聽返其他有去到之朋友講，今次真係冇乜好執大多都空手而回，但我調轉，嘩多正野到丫只行今日都執唔晒呀！
「此行收穫豐富！」
我真係慢慢兜圈慢慢摷返個幾鐘都唔怕，我要果ｄ野，除左鋼鎖之外相信真係冇人會同我爭，又平又正！
「我愛死貨場！下場係幾時？」
行完有時間順路就過埋淘大，玩具舖真係有好多間，只不過間間都係櫥窗放出黎ｄ野勁到爆絕對夠睇到我地呢ｄ人立即仆到入去，只係入面．．．算啦。似乎我條命都係死貨命同執二攤命，適合做垃圾佬。

睇完玩具返到上舖頭，旋收皮。今日一眼望出去，係冇人到連出面幾間玩具舖都冇人睇檔果ｄ都唔知去晒邊，跟住我地幾條傻仔係走廊度躝黎躝去過著「頹廢的生活」。夜晚仲有阿成上黎，大家排排坐睇多次《鏗鏘集》，夠無聊喇卦？如果唔係冇得上網，肯定即上YouTube睇埋 阿龍大。講開死人打字，就黎又出新一代喇，阿成仲帶埋個試版上黎玩。
「做乜你唔返屋企玩，係要上黎呢度玩？」
「我屋企部機玩唔到嘛！」
可想而知，今天的生意有幾旺了。在舖頭時所寫亦越來越短。

．．．一到十點收舖，先緊要嘛！即過信和！
「搵107？」
「食屎啦佢！搵佢條靚遮！」
冇錯就係107頭馬阿煲姐。真係好好玩喎！
「喂！107！你頭馬好似仲有料到過你喎！好在佢唔係黎皆旺呢邊做！如果唔係，半日都捱唔住已經俾我地玩死左！」

琴晚玩完，今朝又鼠上信和玩過，好玩嘛！
「喂107，你不如過返黎皆旺開啦！不過叫你條靚過黎睇就得架喇，你就留返去信和自生自滅啦！」
呢朝早上去，除左玩（梗係要玩啦），幫107發達（事實證明，當107+108兩隻野同場時一定唔會有生意，但只要108一走或者準備走就會立即有客入黎睇野買野，今日靠108不斷又入又出又入又出，一個朝早就幫107搵左皮幾野生意，需要請人招財的朋友請聯絡劉Sir！），跟住又食雞當然係一桶果隻，仲有傾正經野。劉Sir個網現正擴建中！
「係呢兩個月最忙先有咁多野玩！」
值得一提的是，唔係呢壇「正經野」，而係桶雞。去信和食，自然係落百老匯隔籬果間買啦，今日唔知咩事睇counter全部都係妹妹仔就連個經理都係靚妹黎，而我亦得到呢位靚妹經理的親身接待，獲對方含情默默招待，唔知因為乜野原因，桶雞仲要係差唔多全部大雞＆全部雞係新鮮出爐好好食添（呵呵呵呵）。

似乎而家上信和絕對開心過留係皆旺，當出面玩具舖都呈半收皮狀態，個場仲會有幾多人？而家上皆旺其實只係為兩樣野：玩玩具，例如阿捷原來食晒屎果套聖鬥士boxset呵呵呵。同埋鋤七。
似乎皆旺都就黎俾地獄黑仔王剋死了。

．．．勁唔慣。連續過左五日假期生活，今日突然間要我返返工，仲要咁多日假之後鬼死咁多野做黎緊禮拜六又展覽要清晒手頭上所有野，眼訓到死的情況下仲要好Ｑ多野做更Ｑ多email要覆，眼訓到食完飯之後立即撻低跟住兩點鐘醒左繼續坐係度拎住隻mouse訓覺訓多半個幾鐘先正式清醒，嘩要折墮成噉真係好耐未經歷過。都好在，折墮極都仲有朝九踩到晚十教師奶投資／呃師奶錢的107墊我底，呵呵呵呵。

呢晚，唔係做人生意。真係架，真係唔係做人生意，人冇幾多個都係混吉者多，反而多過癮鬼佬上黎。先有隻肥鬼著住件BEHEMOTH走上黎，吹吹水先知道，
「過癮喎你隻野！原來以色列鬼黎！」
各位對以色列印象係點？新聞同報紙教大家，以色列係一個非常混亂加頗為貧窮的國家，日日係噉殺人放火打仗聖戰乜乜物物，住果度ｄ人好Ｘ慘失驚無神死鬼左唔知咩事，係一片危機之地完全唔適合住人理應不毛只餘戰火，但今日呢位以色列朋友話俾大家聽，原來以色列都幾發達下，就好似佢噉從事IT，
「Or yat gor yuet yan gong yau US$2,000!」
「Oh $hit! 我地香港人US$1,000一個月已經好Ｑ勁！」
就同印度一樣，以色列慢慢成為世界資訊科技強國，講量產自然唔夠地大物博的祖國咁低成本，但唔攻量轉攻質，做專門設計同編寫、集中專業而非量產型之生意，又係一條財路。而且咪以為以色列咁封閉咁多戰火，原來都及得上香港咁潮架！上到黎望見兩樣野好大反應，第一樣係Apple Seed隻特典boxset，
「Or hai anime maniac!」
第二樣係，過癮，六變獸。
「Luk bin sau! Or sai gor dou yau lei jek!」
噉上得黎TRHK就梗係metal友啦，呢位以色列IT鬼（越黎越長個名）本身亦有夾band玩death metal，之前玩過一隊，而家又搵到隊新band，隊band黎緊會去瑞典錄音。
「走到去瑞典咁遠，機票食宿夾埋咪好貴？」
「Or day hui dou chung yau tour mar! Cow tour wan chin sic fan tong lok yum!」
「走左去外國個幾月，日頭份工老細唔小你咩！」
「Well, or arrange dou jau duck la!」
真幸福。雖然以色列本土都有唔少勁producer同studio － 聽過ORPHANED LAND隻碟你都知有幾堅 － 但查實去到歐洲好似瑞典咁遠錄音，其實都唔係話貴到天文數字，如果可以噉樣去埋做tour一面出live搵兩餐補貼一面錄音，成本真係唔係高架。所以我地唔多識以色列band，但其實用呢個方法去錄音同宣傳，呢個地方ｄband歐洲越黎越多人識同受歡迎。跟住TRHK度摷摷，其實已經有唔少以色列band，除左ORPHANED LAND，仲有搵左美國cult ABSU鼓佬之MELECHESH（呢隊forum上都曾經hit過一排架）、非常出名之ARALLU，同我地心愛的ETERNAL GRAY，仲有ARAFEL。數黎數去差唔多全部都係black metal band，係呀，呢個宗教之都不知可解真係特別多black metal band，又係地理同歷史因素催迫卦？
「係咪曾經有過一隊以色列black metal band太激，激到俾政府驅逐出境？」
「...ho chi mo bo!」
以色列又有幾metal？基本上全部以色列band呢隻鬼都識晒，隊隊band都係friend黎，因為細嘛，真係鍾意metal聽metal全國大約得二千人左右，如果有經典老band過黎一場都可以有幾千人，即係出名到麥記呀呢ｄ（唔好睇少以色列呀你諗到的出名同經典band都去過晒），就過萬都可以。可惜只限大band，如果講返半土，即灰，即係我地會好恨聽同試以色列band，只係以色列band出返以色列騷，人數減一百倍啦，好似ARALLU咁出名，出live可能都係得一百人，多返opening band或者多五十零個啦，就算去到ORPHANED LAND咁經典，有三百至五百人黎睇已經算多架喇，只係呢ｄband本土未必咁多人理，但一出到歐洲立即成棚人仆到去睇，確係人離鄉貴。另一個現象係呢個地方metal中人係異常團結，就好似頭先所講，全以色列冇幾多隊band呢隻鬼係唔識，而咁多隊band大家同樣係friend過打band，因為地方細全個scene玩同聽夾埋先得二千左右，而且大家個心都係向同一樣野：
"Metal."
係metal整體，而唔係某一類metal、某一隊band，所以你玩咩metal都好，只係你有騷出，我一樣支持你；亦無論你係屬於邊個類別都唔會受到歧視、排斥或者忽視，正如你玩black metal而我玩death，唔代表我會唔妥你，反而一樣會去欣賞你。
「．．．咦？香港metal scene仲細，但好似反而冇以色列咁團結咁開明喎．．．」
．．．點解呢？唔知呢。以色列人唔夠香港人潮卦。

除左以色列之外，今晚仲無端端多左兩隻本地芬蘭鬼過黎，你永遠唔會明白點解芬蘭人可以咁後生就開始玩／聽metal，同芬蘭人真係天生已經麗質靚仔同型過好多人，抵呢個國家metal可以發展到如斯不可思議之境地，同幾老土幾outdate之metal都仍然生存得到同大受歡迎。換著係香港一場band show玩首DEEP PURPLE，搏台下果班小遮即係，有人知道你玩緊乜已經好好。仲有個都幾省鏡睇到在場的阿捷留晒口水的靚妹入黎，拎住gothic metalｄ碟同CELTIC FROST望住封面不知幾雀躍，走果時阿捷小朋友差少少按捺不住跟埋人飛埋出去。呢間舖頭而家真係越黎越唔正常。

空白左幾日，好正常。因為好多事幹。星期四係腦力勞動，展覽前夕要清晒所有野加幾十封email，做到死；星期五係體力勞動，禮拜六開始展覽，今日要一個晏晝內整好晒個攤位，全公司總動員到會展，砌足成日支力足成日。呢兩日上到舖頭反而最得閒。懶寫。
空白一片，仲有一個原因，睇落去就知架喇，直頭要特別鳴謝兩位朋友啦真係！

要應付展覽，神奇地早撻上床，但撻上去唔代表早訓，我呢ｄ夜鬼點早上床，一樣碌黎碌去碌到兩三點先正式訓著。第二朝又好野喎奇蹟地六點十一就起左身喎，刷牙洗面再攤多陣，好唔情願地換多套西裝，就出發，七點半都未到。巴士落車之後，左邊係大家樂，右邊係大快活，我一向係pro大家樂而against大快活，特別係而家大快活個新包裝實在殊柒，兩間行晒比較過，結論失望地，大家樂早餐價錢同食物都比唔上大快活，假如朝早都有無敵咖哩角就話遮噉我實仆返去大家樂，我到而家仲咁支持佢地都係因為有得散買咖哩角仲要係大隻果種唔係茶餐廳果隻半啖就趙晒落肚果隻喎！只係早餐其實兩間大ＸＸ唔係差得非常遠都幾不相伯仲，大快活個賣相係好ｄ，但個鮮奶滑蛋好鬼好怪。開始食早餐都未夠八點，仲有成個幾鐘食早餐，有得慢慢食，成個朝早仲可以連聽三隻碟，足足聽到一隊band。近來咁忙，反而意外地多ｄ機會聽野，聽返多ｄ野，有返動機寫碟評。結果會點呢？metal會否戰勝C&C？唔Ｑ知，我玩緊死人打字。

今年同以前好唔同，往年四月展覽係同復活節假一齊，即係你地／人地放假時我要返工仲要返到好忙，而且開果時大陸早幾日亦有大展覽會，即係先上大陸做野／玩返日再落返香港苦幹，今年調轉復活節假後加早過大陸開展覽，絕對有影響架！點影響法？睇我今日幾得閒就知啦！撞正呢個日子搞騷已經少左好多人，會展又大鬼咁多個場館，我果個係全場最細加最隔涉果個，地方細之餘要上到最頂樓加最角落頭，朝早差唔多冇人，邊有咁早起身大佬除左我地呢ｄ迫於無奈之外，加上成七八層樓而我地咁不幸／幸係最頂層，行都未行到上黎啦！接近完全冇野做，早餐又食左，唯有係噉食自己攤位ｄ朱古力同糖（話係買俾客人食，但年年都係客人未到已經俾我食左大半，而想食的朋友亦會遭受我兇光啤住而退卻），食完就周圍走。呢個係電子商品展，乜叉都有唔知點解連袋都有得賣咁「電子」，走出黎行浪費次要，一早行定仲有為最後一日準備，所有展覽都係，一到最後一日全部攤位收檔，激多平野掃！行左個圈，唔算好多野睇今次或者冇咩收穫，睇人地點做展覽點仲過癮：賣影音產品果ｄ正到仆啦，全日就係睇電視、睇戲同埋聽歌，有檔條友直頭帶定一大棟DVD，自己坐住張安樂椅係度睇戲。賣遊戲同遊戲機更加正到爆，要示範俾客人睇加吸引人流奉旨打機，有檔專賣即插遊戲機，有跳舞機，又有立體拳擊（得閒睇返上年四月段記啦呵呵），仲有出結他機用五掣結他勁想玩呀！有檔賣體感格鬥裝置，即係戴拳套腳套代替四個掣郁埋手腳玩鐵拳同VR Fighter呢類立體格鬥，可惜冇得試，睇落勁過癮。有間澳洲大學宣傳自家最新研究成果virtual reality，可以用頭盔去控制立體視點，即係打立體game時可以用頭代替mouse周圍望。有檔大陸野又好過癮，有個師奶 － 相信係該公司職員仲要係幾高級果隻 － 對住部電視好似出法術噉拎起兩隻手，一時升左手一時升右手，而電視當中係一個好似賽車game的物體，而架車好似會按佢邊隻手升高降低而轉彎 － 係好似，我企佢側邊睇左好耐，仍然未可以確認到隻game係乜，同操作方法，同到底個師奶係咪真係控制到隻game，定還是佢做緊戲引人e.g.我埋黎睇戲繼而查詢。睇一大輪，我只覺得佢係度標緊童，或者標完上左身。又或者呢部係祖國之偉大發明「新世代Wii」？（以祖國工業之英語文化，呢部新世代版真係出的話，應該會叫Wll）最後先發現，原來自己個檔附近已經有檔賣電動同遙控玩具玩具，全部都可以即場買同任玩唔嬲。行埋去，有兩個姐姐（應該係妹妹）走過黎：
「想唔想試玩一下？」
「我鍾意睇人玩！」
兩個妹妹立即玩黎睇睇，係兩隻吹氣玩具插落架遙控車度鬥撞，過癮！
「正喎！自己公司做玩具你話幾美好！你公司請唔請人？」
「請！你入黎做的話，我會做你助理！」
吹多兩吹，仲連卡片都拎埋！故事之後會點發展、會唔會發展落去？呵呵！有待下回分解！

到左正常lunch時間，ｄ人終於行到上黎，多返ｄ野做但仍然好得閒，又吞pop鼠落去下面果層。下面果層係另一個展覽電腦商品展，名差毫毛，相差極遠，起碼去到門口都未入，已經有大大個靚女promotor戙係度招呼你先！入到去，始終性質係傾生意多過睇產品唔係昆人即場俾錢買野，真係有promotor之檔口唔係多質數亦頗為參差，只不過，當有咁多大陸同台灣同胞在場的時候，真係要睇女的話，你覺得區區幾個本地promotor，真係咁關痛癢嘛？仲有會展本身ｄ女職員呢！次次展覽會都係，逢係詢問呀公關呀接待呀超過七成都係靚妹黎，我成日覺得每次有活動都係去大學同中學搵part-time！當然總有較差但整體水準好高架，就好似呢場已經高過搵外面agent之promotor先！講係噉講，相信唔係好多人同意，好似107望見只會話「都唔似架妹！」阿捷果句係「都冇AV feel！」冇計，對於女，我接受力好高架，劉Sir膚淺嘛！

兩點幾想走去食lunch，點知次次展覽都係平時等極冇人但一到自己食飯立即超多客湧埋黎，玩足成個鐘先走得仲要係急急腳果隻，緊要呀有抽獎！每日晏晝三點鐘大堂有獎抽，見完個客三點過ｄ，即衝落去！但落到去係唱歌表演環節未有獎抽，睇個樣仲有排唱喎，又周圍躝下，問ｄ會展姐姐呃coupon再去第三個汽車商品展度呃多杯爆谷食（一日內幾Ｑ多展覽），走返上黎仲要唱多首歌先正式開始抽。
「有乜獎品？」
「無線mouse同電子相架噉囉！」
「咁cheap！使唔使咁恨呀？」
「好過冇啦！同純粹搵個藉口合法食耐ｄ飯唔咁快上返去做野遮！」
抽獎唔係咩重點，反而唱果個有興趣，係香港人黎但英文普通話都完全國際化，負責唱經典英文金曲娛賓同做抽獎嘉賓，好熟面口又諗唔起個名。到底係邊個？最抵死係乜，問勻全層咁多位工作人員不論咩年齡職位，一個人都答唔到我。（係呀過程中有好多機會可以借故親近ｄ姐姐仔同妹妹仔呀呵呵呵呵）
因為咁遲先抽獎，抽完（當然得個吉）得返半個鐘，飯都唔食又走去電腦展。睇promotor？睇辦遮，去傾生意呀，問定人地臨尾果日點賣法呀！著住全套老西加一口呃得下人的英文真係有用架，唔使自己出聲，個個都以為有料到當正我係buyer！buyer即係乜？簡單黎講，即係老細，一間公司做唔做得成生意接唔接到單都要睇buyer頭，而我憑住呢個西人look，唔使出聲行過自然有人係噉塞野俾我，跟住可以慢慢睇慢慢揀臨尾一日去邊檔happy。幾威水今舖真係做老細喇！事實證明人靠衣裝！（所以平日唔係著老西的劉Sir，立即收晒皮！）

無無聊聊磨爛蓆到六點半，就係時候飛返過皆旺，即係有肥仔睇住遮都要上去坐鎮嘛。全世界都係六點半收工，全座會展已經爆到仆更加唔使諗出面條街，常理地99%人都會搭地鐵，所以選擇搭巴士走，唔使同千幾二千人迫，揀地鐵的話迫到落地鐵站都差唔多半個鐘，再同呢千幾人爭迫入地鐵又多半個鐘，出到旺角可能已經九點，而且巴士仲有得坐可以訓覺呢！七點九飛到出去，發生的第一件事：
劉Sir：「你估我今日去會展見到邊個？」
契弟捷：「你大我？唔通你見到Kawaii咩！」
劉Sir：「就係！」
契弟捷：「劉Sir呀劉Sir！我又要睇！帶埋我去呀老細嗚嗚嗚嗚！」
劉Sir：「係去就去好ｄ啦！機場擺緊內衣＆泳衣展呀而家！自己執生啦！」
要講，真係有好多囡囡的故事可以講架！不過你知劉Sir一向好少講女。
「阿捷你想聽故仔咪上TRHK搵我囉呵呵呵呵！即係我要KFC三號餐ｄ雞唔辣飲七喜就得架喇！」

呀，仲有，今晚仲有單重要野架，雖然又係對好多人黎講一ｄ都唔重要：

夜晚，整機。係呀前兩日空白除左忙，仲因為部機死鬼左，實在毒入膏肓喇已經連system file甚至antivirus自己都中埋毒，新機落地都唔夠三個月已經噉收皮法，唉算啦認命啦format部機先啦。但你點都唔會想像得到，單係format部電腦再入返Windows咁簡單，過程中我係遇到過幾多波折，係可以搵左幾多人用左幾多隻Windows碟用左幾多個版本Windows，部機到今日先至開得返，絕對要特別鳴謝幾位朋友，除左又係俾我搵笨的佛爺（每一次電腦有事真係唔搵番佢次笨都整唔番！），仲要極端多謝我得SP2個code而俾隻SP1我的阿捷，同嚴重多謝日頭「Windows都入唔到真係廢等我俾我隻你整好佢啦！」之後夜晚「我想話你知我會返大陸星期日晚先返隻Windows我仲要冇帶出黎你都係收皮算啦！」的107。點知整返好部機再入返晒所有driver，乜都搞得掂，就係搞唔掂張soundcard部機冇聲！對我黎講，呢樣簡直致命！灰到爆喎點解乜都得就係張soundcard唔掂？係咪要我又再跌錢執返張soundcard？（似乎係時間再襯機執埋張display card順便開埋隻C&C3了）
特登format成部機當然唔止咁少野啦，仲因為黎緊壇大project。有乜搞咁開心？都想快手搞掂埋佢，只係部機未完全掂檔，黎緊呢兩個禮拜又超忙，或者過埋月中等我得閒返少少先啦。真係好多野玩。

我個更表本身星期日唔使返，點知有幾個客突然話要今日過黎，即係我又要無端端走過黎會展。本來係想朝早先返公司，做文件加訓覺（．．．），食埋個早餐+午餐再print好晒野先過灣仔，點知起身已經十一點幾，醒水地先打個電話俾老細，
「未呀ｄ客未到呀！你點都要同我死出黎！」
「出囉頂！」
出到灣仔一點幾，老細call：
「睇你個衰樣都唔想咁快過黎啦！拿！而家唔使你黎住，食埋個飯先上黎！」
「遵命！我從來最聽老細話！」
當然又係用食飯時間行街啦！兩點幾先去都未遲，呢個零鐘行晒咁多層，原來個展覽係我果邊戇居咋喎大hall全部勁野，唔係咩電視電器就係影音音響全部high野。上到去自己檔口，原來有個客到左，即坐低傾，傾完擰轉頭，又有另一個客到左好耐仲企正我後面，又傾。但呢兩個都唔係此行之目標。
「本身我黎見果個呢老細？」
「佢一早到左啦！所以頭先call你食埋飯先返囉！」
「頂早講啦佢係黎左我今日直頭唔返嘛！都係因為佢先我過黎咋！」
死，到左都唔夠一個鐘已經走得，咁無聊點算？有好大動機去灣仔睇玩具，想黎好耐，不過而家三點幾，差三個幾鐘就放，坐足全日儲返日假都好丫！結果冇去。不過冇去之最主要原因，係因為我唔知灣仔邊度有玩具舖。（．．．）
「三點幾．．．咦？夠鐘抽獎喇喎！」
就鼠左去。又係聽歌再抽獎時間，個女歌手實在面善，只係諗極諗唔到叫咩名（從會場方面得到的答案，係"She is a street singer."真係多謝晒。抽獎梗係冇啦世紀黑仔王嘛劉Sir係，但會場ｄ妹妹仔確係幾好玩，大佬唔搵ｄ野玩下呢ｄ場合真係好Ｑ悶架！玩完走返上樓，禮拜日人流多但真係幫襯好少，發現我企係度其實都冇意思，又擺明吞pop地鼠左去周圍走，拿我噉樣走左去都係為左同事的福祉咋！咁多層樓成幾千個檔攤，行下行下就會儲埋好多單張呀無聊野呀噉，所以周圍都有免費袋任拎，仲要唔係求祈膠袋紙袋一個就算而係製作精美加容量極大的尼龍袋，會場有得派，有ｄ大公司有錢都會自己整，有人拎住自己個品牌周圍走當廣告宣傳嘛，非常實用所以有理冇理係唔係都搶返幾個先走自己拎返屋企用都抵丫！有咁多間派，自然可以對比選擇，有幾間設計確係唔錯，同事一句
「呢間靚喎！」
「得我幫你去拎！」
即閃，你知劉Sir幾熱心助人架啦。拎袋時順路走返去高檔展區，有檔賣hi-fi的Hi-Vi剛剛播緊unplugged版"Hotel California"，正即坐低慢慢嘆，跟住仲有T3睇，嘩如果係做呢ｄ公司幾開心，屋企冇可能有得噉樣咁大個空間焚機，但黎到呢度鍾意點焚都得！
「喂唔該即同我開隻"S&M"焚番首校歌先啦！」
高檔公司確係唔同，有間包左勁大個位裝修到古埃及崚幕噉，門口擺左個成個人咁高之Predator figure看門口，隔籬果檔賣電子遊戲配件，有兩個職員全日工作就係負責打Wii玩足成日，好似我去到果時係玩Wii Tennis示範點樣用佢公司隻網球拍遙控器。
「正呀點解我公司唔係做玩具同遊戲機？？？」
行到支力又回巢飲杯水抖抖氣，四五點鐘多返ｄ客啦，其中一個過黎傾野問價果時，撞正會場拍片，個cameraman經過見到我地，
「反正都係拍公司傾生意，反正呢條友係度講緊野，順手開機拍低啦唔使周圍搵！」
好快大家上會展個網頁，就可以睇到劉Sir的訪問片段架喇！冇錯呢一日返到黎展覽會場，根本唔係做野，係行街同玩！（基本上今次展覽日日都係！）

六點半執野走，咦好似今日我最大貢獻就係最後幫手執野喎，出唔出現都一樣啦今晚真係。放工老細過返九龍，梗係黐老細車走啦，快之餘仲慳成十蚊喎你知地鐵幾呃錢先得架。超勁全程四個字都唔使七點已經飛到去大角咀，香港果邊沿路連條隧道都差唔多冇車，嘩今日禮拜日喎去晒邊ｄ人？
「星期日就梗係去晒玩啦，仲好似你咁傻仔要返工咩！」
最塞反而係大角咀，要搵個位落車都搵足大半個字先等到位停車，不過已經好好架喇買多個雞上到皆旺先七點半未夠，搭巴士的話加多半個鐘啦至少。而家個市調番轉 － 無論皆旺定TRHK － 平日先會多人而星期六日食晒屎，超靜的一天加上超支力的一天，自然要應節播番下靜野啦。搞掂部機好開心，終於可以聽返關心妍隻新碟《Jade Loves》，有興趣追返全線架不過有機會先啦，因為出下出下原來已經五六隻，追band都冇咁辛苦。我係幾鍾意呢隻碟成日拎出黎聽，只係聽耐左不得不承認確係遭到誤導：派台果首《玉石樂隊》，無敵，聽左成年仍然係播親都覺得好正千聽不厭無論詞曲彈唱都係，跟住第二首開始換返平時個「pop樣」，都好聽只係已經有點問題，過左頭半隻碟，後半直頭係有點失水準地失望，一路聽一路有時光倒流感覺，係呀真係好過癮架。點樣可以咁「時光倒流地好過癮地失望」法？等碟評啦。（算啦，講左成年都未寫）。
開呢隻碟，好多時只係聽一首，真係好睇果日心情先取決到可唔可以成隻聽晒，其實仲有一兩首歌有少少實驗野幾好聽架，只係整體差左一段，噉差一回事我鍾意又係一回事啦話隻碟係差遮但我係鍾意吹咩。再次證明「single理論」，metal碟永遠係single／派台果首最唔掂，但買完碟其他歌反而越聽越有味道，流行碟同商業碟就調番轉，永遠係single／派台果首最勁，聽完之後，走得。

噉就尾二一日，日日係噉玩真係快樂不知時日過。今日只係朝早要返，嘩估唔到一個朝早都會咁死多人咁多野做喎，呢ｄ時候，梗係立即肴底閃左去留返其他同事搞掂啦！（．．．）周圍行黎行去，好鬼多女，冇計事實的確係多一條女係度夠吸引多10%人流，即係果班人埋黎係唔係幫襯一回事，有人埋黎睇點都好過全個檔口一條友都冇丫，沿路經過，真係有好多公司係冇客到全部員工伏晒係檯面訓覺架。為左吸引客人好多檔口真係出盡法寶，冇錢果ｄ係唔係都推晒ｄ女職員出黎，大公司當然係請ｄ靚妹返黎著少少布就當show girl啦（只係在這阿豬阿狗都可以做model的年代，好多公司請show girl結果由吸引多ｄ客變成趕客），亦都有公司會花多ｄ心思，好似有間搵左個靚女cosplay成白雪公主，抽住籃花派全場，即係轉相派傳單吸引人去自己攤位。經理曰：
「香港呢ｄpromoter扮神奇女俠算少野架喇！想當年我去德國擺展覽，有間公司搵左兩個女人唔著衫剩係全身油晒油，跟住舉住塊牌繞場，立即全部人跟晒佢地去果間公司個攤位度！」
今日咁多野做加行左幾個圈鬼死咁支力，行過人地ｄ按摩椅公司，有ｄ職員職責就係訓係度扮安摩訓足大半日，就同賣hi-fi果ｄ扮聽眾坐係度聽歌睇戲做勢果ｄ一樣咁嘆，好灰呀越睇越覺得自己！經理又走過黎搭訕：
「噉就話灰？兩條女唔著衫個展覽，仲有間公司成個counter做到張吧檯噉有埋bar tender，得閒無事可以過去呃酒飲！」
當堂冇晒mood做野了。

所以見今日只返半日，捱下捱下捱到抽獎 － 當然又係抽唔中 － 就收皮返公司了。好事黎架，今日咁多客黎早走早著唔使做，同埋而家搭車返公司可以claim返車錢嘛，十蚊一程架大佬唔係平架。更正係，返到公司發現，公司條上網線死左，即係email收唔到之餘又唔使做野，做好都send唔到出去啦！今日擺到明係要我頹！今晚肥仔唔得閒要我自己睇返，又好彩撞到個更表係今日我晏晝返過黎九龍公司喎，再加上噉樣冇得上網咩都做唔到，又可以準時放工上去開舖，符碌到暈。本身今晚節目係，契爺臨流浪之前大家上黎TRHK食埋最後一餐，食飯盒（．．．），點知最後．．．算啦。都係咁食得咁「underground」先似我地呵呵呵。
契爺聽晚就會起程，香港經陸路剷上北方去新彊再入巴基斯坦，黎緊兩個月都唔會見到佢，假如去到巴基斯坦又冇俾人當佢係聖戰英雄做底佢的話，六月頭應該會見返佢．．．卦。又或者去到發現原來巴基斯坦好住過香港咁多直頭唔走呢呵呵。臨走前最後一份禮物：

玩下玩下噉就最後一日。開心在，著埋今日西裝就唔使再著，大佬著住套西裝真係好Ｑ死辛苦架，尤其是而家呢ｄ酷熱日子。唔開心在，
「慘！今日完左展覽，咪即係聽日開始要返返工冇得日日躝黎躝去周圍玩？」
今日朝早公司半間走晒過去加冇皇管，要特別多謝電訊盈科的垃圾服務，琴日晏晝大廈條線斷左上唔到網，到今朝都仲未有人上黎整返，如此情況平時肯定打去怒小，今日反而非常感謝佢地，咁早整番好條線上得番網，我咪要做野？所以這個朝早成間公司異常頹廢，呢個同人煲電話粥，果個走左去同第二個同事去唔知邊度玩乜。噉我今朝早玩乜？勁無聊地，我係俾女同事玩。晏晝先過去會場，朝早返公司梗係超頹look啦著衫超求祈加披頭散髮（此乃正宗metal髮型是也），黎到就係好似著衫公仔噉俾班女同事裝身，紮番條辮打番條呔執番正套衫，仲得閒到連鬚都剃埋，呢樣野一個禮拜只會做一次就係星期日晚臨訓之前，證明實在係悶到hihi。
「正呀雖然會做到好支力但我實在愛上做展覽！」（只限做緊展覽果幾日，做完之後跟到仆街果ｄ日子唔計）

食埋個飯一點就走人過灣仔。去到問問：
「老細，個客呢？」
「朝早黎左喇喎！」
「咁早？早知唔使見佢就唔著老西過黎啦！」
雖然今日冇太陽加有番ｄ風叫做舒服ｄ，大佬呢ｄ季節仲著住件披打多條呔再去埋呢ｄ超多人場合打風都焗死你啦。最後一日基本上只係開半日，因為正常都係晏晝食埋個飯三四點就清場走人，仲邊會有人黎行？
「噉仲過黎？」
要幫手清場嘛。同埋，更加重要：
「唔使掃場咩！」
即係黎開場帶幾十箱野黎，走果時又點會咁得閒帶返晒咁多野走，尤其是大陸黎香港果ｄ廠？所以最後一日差唔多全場通通賤賣，而呢日食完lunch之後，全場就會充滿唔知幾時同邊度出現之大量印度、巴基斯坦、尼泊爾同自由行，仲有我地呢ｄ扮自由行襯熱鬧的貪小便宜香港人。我地呢ｄ好有計劃前幾日已經吞pop落去睇定晒邊間舖有乜野好賣，黎到放低野立即閃走（睇檔呢家野梗係留番俾老細自己做啦，搵我做？傻架？），再慢慢兜下圈睇睇，都仲未買野，先落去抽番個獎先。雖然第一日得mouse相架呢ｄ送，但禮物一日比一日豐富，第二日送iPod，第三日送手提電話，今日仲勁，成部手提電腦送俾你！幾日黎周圍搜括抽獎券，到今日終於收集夠九張，換言之我地有9/40000機會中獎！
「今次仲唔俾我中？」
「收皮啦！我地公司有六十幾張都未出聲啦！」
結果，當然係乜叉都冇啦，唔係點叫做世紀黑仔王？仲邪到拎住六十幾張飛串串貢果位朋友一齊冇獎安慰獎都冇得拎，實在痛快！抽完獎立即仆返上去，都未係為買野住，係會計靚女對在場的show girl好有興趣：
「收到風，今次展覽有ｄ女promotor好正喎！有冇我咁正先？」
身為女性但鍾意睇女人多過睇男人，呢位小姐實在十分唔正常（近得劉Sir有邊個係正常先得架）。噉阿靚女又覺得掂唔掂！
「個樣一ｄ都唔得！都唔夠靚！」
「嘩！得條腰咋喎！」
「經理話有條女成個燈籠咁大喎！邊度有呀？佢吹水吹得好誇張喎！」
「果然係專業show girl，一有人拎相機想影相就立即噉樣、噉樣！」（噉樣、噉樣即係點樣、點樣請自行想像）
「喂！又話有幾個好省鏡？行左咁耐，好似冇乜邊個得喎！」
「最得果班放晒假丫嘛！」
係呀，可能會場都知最後一日唔會有好多人黎，「真正」果班show girl返完琴日已經玩完今日見唔到人。
「Kawaii呀Kawaii！點解你走得咁快？我想同你影張相擺落銀包架嗚嗚嗚嗚嗚嗚！」（阿捷哭訴）
「頂！想睇，自己上avbuzz搵啦，呢ｄ展覽實有人上黎影相！」
係冇左「真正」果班 － 又或者話算係最好果班 － 但其實係想睇女的話，會展本身果ｄ都唔錯架！有個妹妹可以話係會展之花，就連「閱女無數」的會計靚女第一眼見到都不禁
「嘩！正！好得！呢條女掂！」
不過，唔好意思，冇影到相！（繼續喊啦阿捷）相都有，有一張：
「左邊條肥仔唔使理。」
冇錯劉Sir思想同做野方法永遠脫離大路。

抽完個獎三點鐘，仲有個幾鐘頭就到自己檔口執野，好好珍惜埋呢段光陰即飛身上去掃貨。我好簡單冇咩買，一早睇定左個目標就係外置harddisc case，五條執左只係街價的二五折，行埋去俾錢就搞掂冇人同我爭，成日走去睇同問價果檔野已經街頭見到我唔使出聲埋黎已經醒水知我要呢舊野。我算好含蓄架喇，其他同事直頭掃貨掃到癲晒，同我同行之會計靚女同我買harddisc case果陣睇中左佢地部MP4，一部一激MP4由三百蚊講價講到二百七再講到二百五仲要揀晒款揀晒色又要人地俾乜送乜買部野都嘈左三四個字，跟住去第二檔$80一部DVD機講到$100兩部即係五條一部平通全港九，只係講價過程中講到靚女完全失去儀容，就連自由行都只有自愧不如心知唔講價唔會有佢咁勁而放棄爭貨嘆息離開，我都唔係太好意思企佢側邊。阿姐都唔弱，十蚊一部收音機連掃幾部，都唔止，四十蚊兩台風扇，仲要係好大座果隻勁大風仲要有埋遙控喎，廿蚊一部喂你邊度搵得到咁平大陸都唔得啦！有個阿叔睇黎係呢ｄ展覽之專業買手，執貨執到一架手推車都裝爆晒，
「我$4000執左部四十八寸電視！部DVD機百二蚊咋！幾抵呀！」
我地陰陰咀笑。跟住又走左去抽獎，大公司係唔同ｄ除左有promotor仲會有獎抽吸引你埋去，即係都預左係ｄ小便宜野，喂一場黎到志在過癮嘛！我地呢班友都唔係抽獎，純粹係度搞事！同埋周圍呃同拎人地攤位ｄ贈品同紀念品！梗係啦，我地兩個喎！有個靚女一齊真係完全唔同晒，無論係講價定求人定昆人，多個靚女係度成功率立即上升300%，而我又著晒皮鞋打晒呔笠晒披仲要紮埋辮老細噉款，行過唔出聲已經有人夾硬塞野（今日要執場都裝身裝到咁四正，係有原因架，呵呵），亦因為呢個飲樣，差唔多全場都認得我，去到好多攤位都有人問
「你之前是不是來過？」
係架劉Sir個飲樣真係好易認架，就好似靚女Peggy，第一日唱完歌抽完獎之後同佢寒喧幾句，隔兩日今日再見面，第一眼已經認到我呢位（偽）老細走上黎握手了，呵呵呵呵∼
最後，賀變形金剛真人電影版仲有兩個月上畫，
「為大家揭露變形金剛已經入侵香港之秘密！」

我地公司好少可會咁齊心，但大家點唔妥大家都好，只要係展覽會收檔果一兩個鐘，就會立即變得異常團結，冇計啦公司唔係大唔似得人地夠鐘就走得人跟住會有裝修佬黎執場，又唔係易執喎ｄ野，想準時放工之共同目標，令大家排除所有成見，一致向前，幾番努力後終於一個鐘搞掂晒，可以準時六點走人。著晒套西已經熱死，再體力勞動完差唔多死咁滯，但難得出到黎灣仔，行埋呢頭ｄ玩具舖先啦！平日有幾可會無端端出黎呢頭？係好支力仲要著住對皮鞋行，不過呢頭有咁多商場咁多玩具舖，唔係好多我要但都叫做有ｄ野睇下。死，手頭上幾隻連開都未開，有幾隻又有興趣，電影版玩具又開始出（好多人唔鍾意但我反而勁受，夠樣衰卦），死點算黎緊錢同時間兩樣野？
「．．．太支力喇，返屋企抖下先啦，下個月出埋糧先算．．．」

體力勞動呢家野，勞動緊果時唔係問題，問題係勞動完之後，當你一做完停低，先會覺得好Ｘ支力，尤其是返到屋企訓醒第二朝，直頭成個人散晒郁都唔想郁。知唔知今朝我掙扎左幾耐先起到身？但好後悔。千辛萬苦躝到返公司，先發現半間公司唔見左人。原來我有返工好威。（好戇居至係）
「頂！早知咁多人唔返，我都廢鬼事返匿係屋企訓覺算啦！」
跟住撻低。真係好支力。

支力之餘，亦多野做，今日星期三晚唔使開舖，返到屋企一樣有好多野跟。
「有乜野咁忙呀？」
有好多架，比你想像中多，睇玩都仲未開始玩返C&C就知，連張sound card都字搞番好呀而家屋企仲係用部MP3機同CD機聽歌都幾麻煩。近來真係忙到死，好多野都唔記得左要做。灰。就連我地「劉Sir個網補完計劃」都大幅墮後添。死搞到好想放番日假。

「做到趴街。」

今晚，只係一班on9係度，經過呢晚，大家對REQUIEM AETERNAM呢隊band有更深認識。
而家TRHK除左係各位的飯堂，仲係一間「metal及音樂軟硬件研究中心」，而唔係一間舖頭。

今晚係八三三季度聚會。離開教院之後，我仍然會見、仲會搵我，只得呢兩個。呢種場合，自然會得知其他舊同學近況，主動知又好、被動知又好。包括一個人。對比自己當今「下場」，同對方如此美景，我第一次覺得自己好失敗，失敗到貼地果隻。好耐未試過咁灰。

Metal令我得到好多野、見識好多野，亦令我放棄好多野、失去好多野。

咁耐以黎，我冇幾多個決定做完之會後悔，無論結果幾差。呢個係其中一個。亦係最大最遺憾一個。

以下保證全港獨家。唔係的話，搵我領獎。

MAYHEM新碟"Ordo Ad Chao"，好坦白講，就算係fans都未必會頂得順 － 又題外話，老實講句，有幾多「fans」係"De Mysteriis Dom Sathanas" － 頂籠加埋隻"Deathcrush" － 之外其他碟會追會鍾意？道理同好多「DARKTHRONE fans」只擁有 "Transylvanian Hunger"一樣，又同一ｄ「black metal fans」藏品只有DARKTHRONE（好大可能只有提過果一隻）最多加多隊MAYHEM（同樣又好大機會得一隻）道理相同。black metal就係要爛聲冇錯，而Attila話，今隻碟自己執聲，專登執到有幾爛得幾爛、爛到好似隻demo噉，以做到「天啟工業之聲」。你鍾唔鍾意我唔知、MAYHEM fans/"fans"怒唔怒小我唔知，我只有話我肯定會鍾意。正如上隻"Chimera"狂比人鬧但我越聽越鍾意。「唔black」卦。

至於你問：
「點解會知？」
有樣野好有趣：TRHK從來冇受本地重視過，呢間label存在好似就係為左俾人anti-label，為了種種目的。但外國好多band同業內人士，一提起香港metal甚至亞洲metal，第一時間就係諗起TRHK。一個好有趣的矛盾。

今日本來之計劃同時間表完全推翻晒，更發生好多峰迴路轉之事，好多野事前全無先兆，亦冇預期過會發生，一時間自己都唔知應該點面對。
我都唔知呢個禮拜同之後點做。