星期六收完舖，仲可以睇多次謝安琪演唱會十一點半先收舖，因為買左飛睇十二點半《300》。港產片戲名譯名從來係柒多於好，一係見果期興乜就拎最hit最潮之字眼同topic入名，而完全唔理套戲本身講乜，令好多戲因為改錯名而趕客同俾人極差印象，好似《死亡魔法》，同期上《死亡筆記》就係唔係都要《死亡ＸＸ》，搞到好似食住人地條水上果ｄ二線廢片，當堂令好多人冇興趣睇做死自己電影市道；一係其實正正經經按字面原意譯甚至唔譯已經夠晒，但就更係要加ｄ野入去整到ｄ名好死老土，當然係講《300》啦，好地地叫三百咪得囉，點解硬係又要加多ｄ野去個頭度？（我點都唔會叫佢個中文名，太柒）真係要中文名的話，你俾我譯，我譯做《三百伕》，都唔會要而家個譯名。會睇自然係因為Frank Miller，畫《蝙蝠俠》、《罪惡城》同呢套《300》，題材同敘事都較寫實黑暗，正正係我愛美國漫畫之原因。之前《罪惡城》變左電影版，無論劇情定畫風都出乎意料地精彩，今次《300》同樣係電腦製作半動畫，仲要加上古戰爭同歐洲史詩，非常吸引，雖然今晚得十二點場就到時間睇，一樣照殺。劇情報紙雜誌廣告日日講都唔使我多解釋，就係波斯入侵希臘，希臘政權昏庸，皇帝御駕親征，以三百壯士抵擋波士百萬大軍。簡單黎講，即係《三百無雙》，一個人對三千個，由頭斬到落尾果ｄ，我鍾意。文戲夠少，但簡單得黎足夠交代晒所有歷史同背景，講故事技巧確值一讚，亦將大部份篇幅保留最重點之三千人斬。講打鬥確係一流，睇一個個人fit到漏個款已經夠殺，再加埋古裝打鬥從來好睇過現代武打，無論規模上還是設計上（美國現代動作片通病係動作生硬之餘慢動作，灰在已經成為荷里活特色），不過既然設定到波斯軍係支異色軍團、幾乎所有亞洲奇兵異獸都有，但往往打一種兵／一種獸都係帶一帶過就算，既然用得電腦動畫式製作，要幾誇張都唔係咩大問題丫，仲使乜集中人打人呢，我諗講三百個人點樣打殘一隊象兵點都好睇過同一班忍者鬥卦？同埋ｄ血實在假到．．．一刀斬埋去，ｄ血係一粒粒飛出黎，都假得太過離奇喎？煽情同感動位亦達唔到所想之效果（可能係我一心想睇血所以麻木遮）。呢ｄ超現實戲本身就係想超乎現實地誇張，但《300》畫同劇本都冇《罪惡城》去得咁盡，有少少失望。不過都係果句啦，鬧係噉鬧，但鬧完又係噉樣睇法，冇計啦美國迷嘛。死，搞到而家有少少想追埋美國漫畫睇。實在太多野想做、太多野想玩。慘。

十二點睇到差唔多兩點，返到屋企都兩點半三點，仲未訓得覺住，C&C呢！就黎爆機喇玩到！又搞到六點幾先訓覺。兩點幾先彈起身飛去開舖，其實彈唔彈（得）起都冇咩大分別丫，今日唔止108，直頭成座皆旺都係無人島，八點幾已經得番一個傻仔係度全層任焚。今日只需要播兩隻碟，梗係TRHK兩隊新band ALLTHENIKO同IT WILL COME，唔係一聽就鍾意而係要慢慢煲同幾睇mood果種野。一面聽，一面玩變形金剛，玩緊果兩隻　我買過最特別、最「矜貴」之兩隻變形金剛，本來冇諗過會點樣多野玩法，點知一玩就半個月，都仲未玩完玩夠！再唔覺意，死，六變獸都出現埋！要玩六變獸就有排玩架喇，玩六變獸之前，先俾大家睇下呢班傻仔點樣俾六變獸玩！

小小插曲，前一排《秋天的童話》一段粗口搞到滿城風雨，令大家發現原來而家香港仲保守過廿年前，但老果班越保守細果班反而仲壞過以前幾十倍，夠晒反智。今晚，同晚晚一樣，夜晚，睇左無線套野少少，《陀槍師姐》卦？講乜唔係重點，最緊要係我一集入面，聽左兩次「仆街」 － 希望爆粗爆到上腦的劉Sir冇爆到上腦啦，我真係聽到電視出現過兩次「仆街」，100%肯定的最少有一次。我記得以前其實唔少無記同亞記電視劇都有「仆街」甚至「陷家產」。所以點解而家我唔睇電視。睇益智的《高朋滿座》？點解我唔睇粗俗甚至暴力的《開心華之里》同《卡拉屋企》？

正今日我等左好耐。五月美國展覽，今日要過灣仔聽talk，嘩正呀即係以工作之名出街好開心呀！十點半要出到灣仔，但九點幾返到公司其實已經夠鐘出發，打完個卡通知定老細「你都知今朝見我唔到架啦！」就可以即閃，過到去灣仔仲有時間食多個早餐行多陣街（衰在太早冇舖頭行，打機又好似誇左ｄ喎？），先再施施然走上去都仲有大把時間。呢ｄ講座其實黎唔黎都相差無幾，講行程係點邊日出發去到做ｄ乜邊日走人，拎左份notes已經走得人因為都係按notes讀遮，只需要坐係度半訓覺狀態聽住歌然後每三秒點一次頭十一點幾起身走人噉就搞掂。走返到旺角都仲未到十二點，跟住仲要公務出銀行做野即係擺明遲返都得，去完銀行再去麥記買個lunch（*又*加左價！唔係可以食公數食lunch我一定唔會幫襯！），仲可以上皆旺兜兜、行下玩具舖甚至打多舖渣古先返歸。返到公司，當然又係冇乜野做啦，覆下客人ｄemail執頭執尾個零鐘已經做得晒所有野食住野上住網等收工。下個月起連續兩個月搞展覽可能會忙番ｄ（都只係可能呵呵），但今個月真係得閒到仆，冇野做同個新加坡老友MSN嗲兩嗲，佢而家同我一樣咁嘆。之前佢係做sound engineer，即係錄音室幫人錄音同做後期製作，同演唱會做聲，係好玩，只不過好現實，邊夠搵食？仲要係結左婚，自然要踏實搵番份「正當」工作，最後唯有「委屈」返去做office。職位係office assistant，職責呢，就同劉Sir一樣：stand by，中文叫等運到，即係平日冇野做有人叫先做，佢可能係唯一一個黐埋劉Sir度而唔使死奇蹟生還人士，份工可以有劉Sir咁頹，甚至頹過劉Sir仲多時間做私人野過劉Sir添！睇今日同佢MSN，傾傾下老細出現旋收皮，對方回應係：
「我老細都企正我後面呀，仲啤住我做緊乜添！不過佢又唔Ｑ理我喎！」
嘩令本身已經夠頹的劉Sir都羨慕！大家而家其實返工同返屋企分別唔係好大，都係點都得任做自己野，差在office唔可以怒爆機冇得焚metal（同冇得C&C，我講緊我遮），但我同佢分別亦有唔同：我係玩乜都得，得閒上下網、得閒睇睇變形金剛、得閒寫下野、得閒無聊MSN撩人傾偈，但佢係公司果時，接近全部時間都係搞metal野睇metal野，返到屋企就唔多會做呢ｄ野甚至唔多上網，結左婚嘛返到屋企要做番個好老公嘛，日頭負責達成自己理想，夜晚就做其他私人野同「盡番責任」。所以單身都有單身的好處，真正係自己想做乜就做乜，今日即興想點，唔使想就去啦，假使要顧埋第二個，有好多野都唔可以咁放肆咁盡情去做。琴日就有位同道中人朋友上左黎，大家意見一樣：
「而家玩乜都得，同班friend搞左間band房可以成日夾band，平日同成班人打牌去玩，得閒自己行行街睇玩具，有好野執番黎砌同玩，今日左去影相，去舊區走下影下車影下人影下舊樓，一影就影左三個鐘，有女邊可能有咁多時間做呢ｄ野？又邊有咁多閒錢玩自己ｄ野？」
拍拖有拍拖好，但暫時單身更好，起碼而家我生活方式單身較為合適。如果真係要拍拖，首先要即放棄TRHK。當然啦呢樣野絕對係好事，反正好多野其實做唔做都冇分別做左反而更冇意義，但現階段呢樣仍然係需要諗一諗之重大考慮。
又可以話，某程度上係被迫單身。

夜晚，就大劑。今朝特登上一上皆旺，就係為左呢壇野：

冇錯今日係星期一都有新貨，其實係正一個星期前即係上星期一已經到左，但全TRHK得兩個人仲要大家都係日頭夜晚搏盡噉搞法，邊有時間拎落黎，今個禮拜六日又有野忙，但實在太正呢批野，打死都要今日拎到落TRHK。我諗唔需要多講卦個list已經講晒有幾吸引，當然，通常劉Sir話吸引果ｄ，最後都係得劉Sir一個覺得吸引，結果全部變晒死貨之後劉Sir自己食晒。始終，唔係TRIVIUM，唔係CHILDREN OF BODOM，亦唔係DREAM THEATER。
個人推介，RAM-ZET同PROJECT HATE呢ｄ「行野」唔講啦，有GALLHAMMER（如果你好似我咁迷HELLHAMMER/CELTIC FROST就會明點解）、PRIMORDIAL全線（冇錯係全線，愛爾蘭民族black呀大佬！）、SEPTIC FLESH（唔需要問，同捷克一樣呢個國家我仲未試過有一隊band唔鍾意）、DARKANE（我永遠最愛瑞典thrash death band）、LOST EDEN同BENEA REACH．．．只係一部份。仲未講SWALLOW THE SUN新碟、REBAELLIUN、SCEPTIC同SPIRITUAL呢ｄ另一批正野喎。仲有ｄ你一睇就知係為劉Sir而入之唔知乜春野。冇錯，呢批貨，絕對係已經仆街死左，睇今日上黎借廁所的阿Ant同走堂上黎的阿捷個樣，就知道，大劑。
當然，只限對劉Sir而言，基本上呢兩個禮拜有80%野佢係啃亦要硬啃。對好多人黎講，呢批新貨仍然同垃圾冇咩分別。

Weekly Review:

呢隻就係2007年度第一篇碟評。劉Sir份人比較膚淺，都係呢類音樂同名氣都完全「唔掂」同out的野適合佢ｄ，唔使用腦嘛。好多人想搵old-school野聽，買呢隻，保證你立即對old-school death上癮著迷，睇你信唔信劉Sir講野喇，相信除左劉Sir之外，你身邊唔會有人同你提起呢隊band。鍾意佢地，自然會連帶鍾意而家之all-star band BLOODBATH同絕對經典之ENTOMBED、DISMEMBER、GRAVE，你唔係一定要追band名，而只係追音樂、想搵old-school death，今批貨入面KAAMOS同NECROPHOBIC又係會鍾意埋。就係睇你想聽乜：metal band，or metal。

有人話，呢度已經唔多metal、唔再講metal野。相信今日係2007年上旬「最metal」之一日。

想知劉Sir而家得閒／無聊成點，睇今日就知。坐左係度成日，一直坐到五點幾，終於有番ｄ野做下 － 算唔算係「做」都值得相榷，因為係做電話訪問。話說仲有半個幾鐘就放工，有個電話打黎，有位小妹妹打黎搵老細幫香港貿易局做番個意見調查。
「想問你地公司負責人係唔係度呀？」
「你搵我得架喇！」（呢條友真係當正自己老細）
「點稱呼呀？」
「我姓劉。」
「哦．．．請問劉生你貴姓架？」
把聲係你一聽到反應立即係「得」果種，「得」包括個樣同人品，再加埋一個咁抵死的開場，就知道今舖真係好好玩。一個連稿都未讀得掂的得意小妹妹，對住問答全部黐線的劉Sir，會發生咩事？我諗呢位小妹妹電話調查生涯之中最難忘／難搞之一次，都係呢舖。
「請問你職位係咩呢？」
「都好難講喎．．．不過頭先你打黎話搵我地老細，你就當我係老細啦！」
「你把聲聽落好細個啊！」
「其實我五十歲架喇！不過keep得好，個個人都話我得十五歲咋！」
「我想問你對香港貿發之服務評分係點？一分係最差、十分係最好．．．」
「呢條七分．．．呢條八分啦．．．七分．．．八分．．．八分．．．七分．．．我呢ｄ分數，你係咪好開心呢？」
「其實我唔係貿發局，係另一間公司幫佢地做調查咋，不過你份好意，我會如實反映俾貿發局方面聽架喇！最後幾條問題．．．」
「你問左我幾十條問題都有喇喎，幾時做完架？」
「就黎完架喇！已經到左尾聲架喇！」
「尾左好多次喇喎encore都encore完啦！你個尾聲都幾長喎！」
「因為．．．因為你地ｄ意見對我地客戶非常寶貴架！」
「噉都俾你兜到？」
「．．．原來我地訪問左你好耐喇！」
「係呀！噉就半個幾鐘，咦？差唔多五點九。」
「係呀！所以而家真係接近尾聲喇！」
「頭先問極都問唔晒，做乜而家又突然間咁快做完？」
「因為我就黎放工嘛！」
「我都係喎！大家乜咁蹻！」
「好多謝你今次接受我地訪問先！我祝你地公司生意興隆！」
「噉呀噉我祝妹妹你青春常駐再早日逢春跟住連生貴子再三年抱兩啦！得閒記得打電話黎搵我呀！」
某程度上大家都唔係認真對待呢個「電話調查」，兩個人係度拖住黎做、唔認真地做，因為好玩，同埋等放工，呵呵呵呵。老細見到我對住個電話發癲傻笑左半個幾鐘，都唔敢打斷我問我咩事，梗係，劉Sir先係老細嘛！
話時話，政府ｄ公關部門揀蟀揀得好勁架，當然係指　首先，你唔會見到好多男性擔任公關職位，除左高層之外；而做得公關果ｄ，代表香港面向世界喎，全部都係相當養眼的女性，當然人數多自然有參差啦，但大部份都係行過堪停低望望的美少女，加上呢ｄ場合總會包裝一下，真係好省鏡架！仲要唔止外表，連把聲都殺死人架！
「阿捷，四月我去做展覽喎！使唔使帶你去見識見識同識番ｄ新朋友？」）

今個禮拜調轉閂二開三，冇計啦係噉俾人催食飯，另外兩位又星期三唔得一定要星期二，今個禮拜唯有噉安排啦！冇錯，無論日頭定夜晚，劉Sir先係老細！同上次一樣，又係東大門、又係果張檯、又係會計靚女加走左返大陸果位同事加埋我三個。而家每個零月就會定期聚餐一次，講番而家劉Sir幾頹（．．．），同同事點樣上進法。身為MBA畢業生的佢，而家係做戲院收飛仔．．．唔係，係戲院經理至真，辭左職又搞掂MBA，而家入左間大戲院度做經理，即係全間戲院乜叉都經你，入到去第一個月，同麥記一樣經理又點一樣係由低做起，經理ｄ野未有得做，學晒點樣收飛、賣飛、帶位、賣野食、洗爆谷機先（灰），跟住先可以入經理房坐同真係做經理，不過一ｄ都唔易做，得閒要幫ｄ靚頂更（冇錯，好多人同劉Sir一樣鍾意請例假），又要編戲更，要設計到每一個院播邊套戲幾時播邊套點樣分配再配合法先可以善用晒每間影院每一分鐘播到最多，計都計到想死，話可以免費睇戲，但其實要等到夜晚你收工先有得睇，因為日頭會有人行beat俾人見到唔做野睇戲就大劑，但夜晚放工之後，你仲有冇精神留低睇戲，之後鬼死咁夜先返屋企？所以佢非常之後悔當初辭職返大陸實習：
「我唔走咪可以好似你咁嘆囉，日日唔使做又準時走人！如果有得做你個位，老細叫我立即返黎！」
東大門只可以坐兩個鐘，上次完全唔夠時間食同傾，今日大家都冇乜狀態好快收皮，仲有三四個字已經頂唔住，夾硬賴死埋果兩三個字算。八點九就食完，好早咋喎，仲有咩節目？
「我要玩籃球機！」
之前天橋底果間仲有一部玩，但今日去到已經拆埋留位俾賽馬機喇（街機已經進入新世代），慘喎有乜好玩？問過先知，原來咁多位朋友都唔知道原來新之城樓下有機舖！
「我淨係知果度有得影貼紙相咋！」
靚女話。就等劉Sir帶大家蒲下呢個108指定蒲點啦！就番各位的程度同呢種場合，當然係玩唔使用腦果ｄ啦，要玩拍拍機（即係「解說！」）、篤篤機同撞撞機，睇名都知道幾白痴啦呵呵呵，但係白痴先好玩喎！話係白痴，但呢ｄ白痴game話咁快就一關眨下眼就一舖先最食錢，玩左半個幾鐘，夾埋已經冇左差唔多成舊水！玩得非常開心玩身水身汗，但唔使好耐已經要閃，一個聽朝要返超早要早ｄ返屋企訓，一個收到call夠鐘交人，唯獨是返工永遠遲到又唔使交人的劉Sir，可以散水之後落去打多舖渣古先返歸。頹有頹好。所以，雖然而家轉去第二份工人工立即起碼加一半，我仍然係咁如此唔上進，死都要繼續攬住TRHK唔放，呵呵呵呵呵呵。（又或者，嗚嗚嗚嗚嗚嗚。）

臨訓前，睇埋近來「大hit」（我覺得遮）的《DMC》 － 同樣地，香港譯名永遠超柒，實在唔想叫中文名。琴日買左，返到屋企唔記得左呢回事冇睇到（．．．），今晚睇埋先至訓覺。單睇封面已經知道metal友走唔甩啦，劇情亦絕對抵死：一條鍾意歐洲folk pop而極唔鍾意metal的傻仔想搞隊band玩清新野，點知因為某ｄ原因「上左身」，平日白痴仔一個，但一夾band就會變成死亡重金屬歌佬，未睇已經知道肯定係戇居到適合劉Sir level。畫功擺明唔靚有幾核突要幾核突，反而呢種咁raw咁爛畫法襯晒喎噉先夠寫實喎！雖然中文譯名奇廢，但入面對白翻譯粗俗爛口到仆街，再加好多香港地道次文化野入去所以我鍾意！就同以前《Boy聖子到》一樣，玉皇朝翻譯果班友簡直係將本漫畫畫龍點睛300%！（呢個case又可以refer返去前日「電視爆粗」個討論）雖然入面好多野擺到明係吹水（「死亡金屬之父」哈哈哈哈哈哈哈哈），劇情亦冇想像中咁爆笑，我地聽metal反而睇得仲high仲正，因為知佢講乜玩乜識得笑！嚴重推介給每一位＆所有真係鍾意metal的朋友！
睇左第一期已經決心一定要追，咁大個仔真係冇乜買同儲漫畫，《DMC》會係第一本會追晒全套，為了無聊同誇張到爆的劇情、為了metal，實在無法抗拒。噉搞法，代表今個月起每月固定開支增加三十蚊。冇乜問題，咪再食少多一兩餐囉！溫馨提示：
「前排惠康公仔點心做特價十八蚊三包，各位朋友有冇瘋狂入貨？」
一包點心絕對夠食到飽，計番先六蚊一餐，抵玩到極架，已經掃到雪櫃都爆晒，呢度已經可以慳番唔少，不過而家仲有冇做特價就唔知喇，得閒去撞撞啦，其實行行超市同便利店執平貨絕對令你慳到好多錢。點解劉Sir可以成日去玩、成日買野，好似好有錢好豪，其實呢劉Sir的收入圍內之中算係低的一個（信不信由你），而錢呢樣野唔係無端端跌落黎，除左自己搵返黎，仲要自己慳返黎。劉Sir就是如此old-school。

食飽飽，自然係訓番夠本啦，今日具非常動機唔返工，但八點幾身都未起已經有個長途電話打黎嘈醒，當個客可以「咁有誠意」地專登美國都打黎摷醒我，冇得唔返工啦迫住要返啦，仲奇蹟地今日居然冇遲到，連老細都覺得有ｄ問題（最大問題就係今日我返左工！）。返到黎先知道，原來會計靚女已經截左我糊一早打黎話唔返工，好在我有返到今日！喂，真係好得閒喎！同埋，今個禮拜三要開舖嘛，返一返工都好！本來冇預過會有人，始終今日星期三本身唔開舖嘛，呢批貨又唔會咩正野丫（呵呵），諗住都係107+108幾條友發發癲又一晚（哈哈），點知今晚開一開，分分鐘全層最旺最好生意就係TRHK。只不過，噉又可以代表ｄ乜？人地賣玩具，賣一樣野可以賺到兩三倍，但賣CD，仲要係賣metal CD，一隻碟你覺得可以賺幾多？講「賺」的話，今日TRHK生意最多，但計番，可能反而係賺得最少果間。
今晚終於請得郁梁生蒲頭，難得有番ｄindie/underground black野嘛，即係大部份朋友上到黎或者睇個list時見到「都唔知乜黎」果ｄ － 希望呢ｄ朋友冇包括到「聽black」的朋友。不過梁生上到黎，試同執black野只係其次，今晚最主要係．．．同一班傻仔一齊玩變形金剛．．．玩完六變獸再玩錄音帶．．．似乎而家真係各位都開始遠離metal．．．
「做乜而家入少左咁多black野？」
真係少左好多，以前差唔多每個月最少有一批呢類（超）underground black metal，十隊入面可能真係十隊都唔會有人識，其他人當垃圾，但梁生當係寶；只係每一百隻碟當中入八十隻係為「推廣」而入絕對係違反經濟原則，況且「推廣」往往唔會有人會聞會問，加上連好經典好大路果ｄ都已經冇人會理，唯有減少入black野，亦即係少見左梁生好多。超underground果ｄ，唔係冇入，只不過變成只為梁生小量噉入再檯底交易。冇計，抱「DARKTHRONE/MAYHEM/CoF = black metal」信念之人，仍然大有人在，呢個情況下除左噉樣「檯底交易」，仲可以點？好似以前噉一隊連識都唔會有人識之black metal band都十幾二十隻噉訂返黎，自己戇居之餘再俾人（同樣希望唔會包括「聽black」之人）笑／小戇居，確係冇咩意思。

「．．．．．．」
起身之後，眼光光。琴日冇放假，今日補番放日例假，接番靚女會計更（．．．）。除左中間幾個電話嘈醒，今日直訓到三點幾先起身 － 都係要起身開機send個email俾個客先起身。放假真好，食個公仔麵，聽下歌仔打下機睇下漫畫，得閒到執櫃桶。嘩唔好話大學畢業，中學畢業之後原來我都未執過野喇，今日執一執，砌左超大棟紙出黎，包括教院四年黎之notes同參考書，同中學ｄnotes＆雜物，估唔到連中三四ｄ野我都仲有留番，果然夠懶。執晒ｄ野出黎，好開心，整齊左咁多，又多番ｄ位擺碟喇！跟住立即變得好灰。執好一個櫃，但仲有Ｎ個櫃．．．

今日除左因為近來冇乜野做而放假，仲因為想早ｄ上舖頭，冇計連續三個星期三批貨，要執好擺好ｄ貨都有排搞，因為每到一批貨，即係要將上兩批貨搬落架再搵位收好，而一連三個星期三批貨．．．唔執好邊有時間繼續玩變形金剛？雖然，到左之後第一件事亦係跟住Ｎ年事，都係玩變形金剛．．．
「執貨？下批貨到左先啦．．．」
今日撞到好耐冇見過的茂利兄，成兩年幾冇見都有喇，上一次上黎，係放隻碟俾我，唔係（．．．）。估唔到而家阿茂兄同張大導一樣，去左亞視為細台拚搏，佢仲要係先做無線之後再過亞視做，勁！！！茂兄之工作係剪片，即係將一套電視劇cut開幾截中間放廣告，例如四個字當中要放兩個字廣告，就要中間搵個位剛剛好可以分開上下兩半，之後click一click個掣，噉就搞掂。大家都知道，而家亞視已經變成一間冇演員之電視台，藝員組解散，以往之藝員清一色變成職員，又或者過晒去其他電視台例如近日經常出現亞視人之無線，基本上亞視而家只會做外購劇，叫得做外購劇即係買返黎已經咩都整好晒。噉仲有咩搞？
「冇架！乜都唔使我地搞架！所以一下掣就搞掂晒！首先入餅帶入去播片，通常十幾分鐘先至剪一剪，噉就出去兩個幾字，之後入去click個掣，再出去兩個幾字等夠鐘再入返去，噉就搞掂架喇！」
「點解唔一播片就fast forward去兩個幾字果度立即剪片？噉咪唔使咁麻煩囉！」
「可以fast forward就一早做晒ｄ野啦！而且有快鏡仲邊度可以噉樣走黎走去？」
真係好嘆！正？唔止咁正！就好似呢晚，點解我地會見到茂利兄？唔係因為佢放左工，而係因為佢返緊工！
「我份工有早晚兩更，早更返八點半到七點，晚更就七點到第二朝四點幾，返夜班十二點之後仲有三十六蚊車費津貼，而且有得計OT添！所以幾大都留到第二朝六點幾先走！」
「噉你今日係返日更？」
「一睇就知我今日係返夜啦！七點返到去打完卡我就鼠出黎旺角喇！」
「嘩！廣播道鼠出黎旺角？」
「唔係廣播道！係西貢！亞視個剪片部係西貢架！」
「咁正？噉都走到出黎？冇人理你咩？」
「老細又點會夜晚返工咁得閒丫！我返到去打完卡單聲就走得出黎架喇！買完碟八點幾，跟住食多兩個鐘飯，搭小巴返到去十一點幾，差唔多架喇！」
「橫掂老細夜晚唔係度，點解唔索性玩通宵聽朝至返去打卡走人？」
「夜晚公司閂大閘嘛！閂左咪入唔返去囉！」
「」「班實Ｑ唔使訓覺咩！即係你趕得切返到去就大家冇野，夜晚閂左閘佢地訓緊覺先叫佢地開閘嘈住佢地訓覺就實篤爆你！」
長夜漫漫，返到去又有咩做呢？繼續直擊茂哥：
「真係冇野做架！所以成班人直頭帶埋PSP返去玩架！八條友一齊孖寶賽車噉囉！我地個個人都有自己個位，有自己電腦，不過部機好廢入唔到game玩，係上到網囉！好多時成晚係度睇戲同睇電視！睇乜？梗係睇無線啦唔通睇亞視『職員客串出鏡」咩！」
「嘩噉你咪好正？返五六個鐘就放得工！」
「咩五六個鐘呀？返五六分鐘就當放工喇！」
嘩死，即係我以為自己份工已經夠頹架啦，點知一工還有一工頹，本來充滿色彩的人生，經茂兄上一上黎之後，立即變得暗淡無光！
「頂！！！！！！亞記幾時再請人？？？」
「得閒睇住亞視網頁啦！我地西貢廠剪片組隔籬係配音組！」
「正！配音我最Ｘ擅長！！！」
我的志願係入亞視打成世工！！！！！！！！！！！！！！！！！！！！！

放完日例假返黎，就要開始做野喇。會選擇放番日例假，除左因為懶，仲因為真係到左作戰前夕，年年都係四月起直踩到六月都會係非常忙之日子，過埋呢幾日就冇得咁嘆架喇，幾大放多日假先，今日返到已經有好多野要開始跟。唉無端端要我做野添，立即冇晒mood，唔寫喇。（．．．）

今日終於奇蹟地俾我推晒ｄ碟上架喇！舖頭居然仲奇蹟地有位放野，　
「好野！！！！！！」
不過，黎緊仲有更多．．．．．．．．

好多奇人上黎買奇碟，又有西貢打完卡之後鼠出黎之茂利，再加一班硬膠仔五十蚊基金夾埋成為一大桶雞，玩到舖都唔多想閂今晚。黎緊，仲有更多野搞，呵呵∼

變形金剛已經成為皆旺的一部份，今日全日都係瘋狂變形金剛，真係瘋狂地玩，唔止107&108，每一位入黎的尊貴客人，都係黎玩變形金剛而唔係搵metal野，後來仲越玩越大添，好似前排去銅鑼灣見到個渣古頭枕頭，107旋刮到個返黎！正！可惜係紅慧星，我都係鍾意雜魚綠渣，貪佢次次俾人一野KO夠晒路人甲I like！仲有又係107的大量狗頭同熊爪動物肢體，黐Ｑ晒線成班人！請睇：
1. ToyRHK
2. TRHK生態奇觀
今晚仲有個超級變形金剛迷上黎，邊個？咪就係Adam@SC/RAINBOWTRON。佢變形金剛之藏量，係劉SIr的幾十倍咁多，但叫得做迷又點知咁簡單丫要追永遠都追唔晒，所以今日上TRHK執完碟，第一件事係飛過隔籬107掃多Ｎ隻。喂，107，帶契左你賺唔少喎我，收番少少commission都要啦！
「點解會咁迷變形金剛？」
八十年代的靚仔至寶！更加多得變形金剛，拯救左TRHK！話說前排代號105的玩具舖肥仔整左隻超經典'80機械人＆暴力動畫片頭特集，激得滯，睇完之後連部DVD機都頂唔順死Ｑ左，正版metal碟都播唔到（「一早叫你唔好聽metal架啦！而家報應！」），跟住拎返107隻番禺正版出黎，播一播，嘩立即洗乾淨晒部機旋冇事正常返晒！TRHK已經擺脫唔到變形金剛的咀咒！（＆107的咀咒！發現凡唔係來自佢ｄ野鑊鑊玩完用完都會有問題！灰！）

近來最緊要，當然係六合彩啦，今晚同下星期二是但一晚中左，立即成世唔使做喎！第一件事當然係立即唔Ｑ理metal搞番檔變形金剛專賣店，唔係搞黎賣，係搞黎俾自己玩！（呵呵呵）開開下舖都要落去買番注先，同107夾埋買八個字每人成七十蚊，結果？
「果然係世紀黑仔王！同你夾八個字，結果開出黎一個字都中唔到！」
不如噉啦！下個星期二我買四十二個字，跟住話俾各位聽有邊七個字未買，等香港人人有六合彩中人人有錢分人人唔使做好唔好？星期一劉Sir將會公開發達秘笈！

今晚九點半立即飛撲走人，好在肥仔上左黎可以屈佢收舖（呵呵呵），唔係真係遲晒大到，雖然都miss左片頭同開頭果個字？咩戲？《幽靈車神》啦當然係。好唔好睇？因為係美國英雄漫畫改編特別揀呢套睇，因為鍾意美國漫畫果種真實同灰，唔似日本動漫英雄ｄ主角往往係「正面」，唔係咩咩博士個仔同孫順便幫手出戰，就係唔知咩傳人好多人撐噉去打，美國英雄大多都係非情願又或被迫成為英雄，角色深度已經唔同。《幽靈車神》睇角色設定已經夠吸引，變成電影，又會點？本來眼訓，睇完，益眼訓。好簡單已經講晒：主角俾魔鬼收買左做專殺魔間叛徒，魔鬼個仔Blackheat帶住三條靚出黎殺人，仲捉埋主角條女，主角殺晒佢地四個，搞掂。冇錯，就係咁簡單，完全唔驚險亦唔刺嗅，主角背景其實好多野可以講，但好多野都冇發展到又或者超快就講完冇交代到，論講故事，好廢；講睇，特技確係好勁，只係一個普通電單車手無端端會識打架，原先控制唔到自己又無端端識運用晒自身超能力，有時真係睇到好灰，再加埋四場動作場面咁大把，每場仲要係日本武俠片式一招了，嘩超冇癮喎係ｄ敵人太廢定主角太勁定唔夠時間拍多ｄ打戲？主角能力同架電單車絕對可以玩到好多野同勁多誇張效果，但乜都冇，廢到離奇喎。唉實在係超級失望我只有話，繼《再生俠》之後另一套食晒屎得個睇字但完全冇電影性之改編廢片。當劉Sir呢個美國動漫迷加睇戲從來鍾意睇得個打字同睇字唔需要用腦之懶人都話唔掂的時候，明白啦。美國漫畫改編而成功之個案，暫時只諗到《蜘蛛俠》一套一連兩集我都係超感動超鍾意之美國英雄電影。
全套戲最深刻，只得一樣野：套戲入面經常出現一首歌，係牛仔歌經典"Riders in the Sky"，當然唔係呢個"country metal"版啦雖然都係搵隊rock band cover。話時話呢隊「牛仔金屬合唱團」出左新碟好耐都冇乜理過，有少少興趣搵番隻碟黎聽番下添，真係放低左好多metal野冇理過。至於你想問隻"The Dawn of Dying"的話．．．唔好意思，入係入過，不過係大半年前，最後仲要係搵鬼買．．．

今個禮拜開始，直踩到五月一連兩個月都會超忙，四月香港做完展覽五月再過美國擺，黎緊個星期已經真係要做返野要扣呼一下ｄ大客，今日特別計劃返公司加番半日版，做定大部份野可以黎緊個星期頹番下之餘，順便呃番假 － 耐唔耐整野例假，已經所餘無多啦。可惜丫！鬼叫C&C3就出？迫我襯住今日係星期六漏夜爆埋隻C&C2佢，又俾我一晚爆埋玩剩最後一關可以正式完左正史之第一二集等第三集。如此盛事，爆到工都冇返到添。唉。為左變形金剛、為左C&C，程度已經去到唔止廢寢忘餐之地步。C&C3出左之後真係唔知會點算，我怕到時我會激動到成個禮拜唔返工一野煲爆佢呵呵呵呵。

起身時間係兩點，亦即係本身返公司加班之放工時間，遲係遲左ｄ，絲毫冇影響到是日計劃：上信和探145小姐。話說我地的阿捷同學，知道總有一天會俾佢老細107炒Ｘ，就先下手為強炒Ｑ左佢先，跟住107先生就搵左個妹妹亦即我地所講之145小姐頂替佢個位，噉請得新人就自然要試試佢係咪敬業樂業啦。今日107又要北上，臨走之前特別單聲：
「今次我特別搵左條索女黎做sales架！阿捷見到肯定會後悔辭職！」
就等我呢個神秘客人驗證一下！上到去，充份明白，
「阿捷！你真係唔後悔都唔得！不過我已經叫左107 blacklist你永不錄用！」
搵得劉Sir做神秘客人就大劑啦，佢癲架！不過為免107難得搵到個靚女（＆為免阿捷第時冇得借故走上去見人），全程只用英文買本死亡筆記已經好正常架喇！入到舖頭一連聽到兩首鼓機歌，包括超超超正之"The Least 333 Seconds"，再用英語交流一下，我仲證實埋呢位女sales真係知道自己播緊乜野而唔係求祈download左首歌／有人send左首歌俾佢就入晒落部mp3機播咁簡單！（呢個求證純粹劉Sir自己私人滿足，與107委與之神秘客人職責無關）後尾我仲想玩埋影相架呵呵呵，不過廢事真係玩到咁大啦！玩大左嚇走左人，阿捷第時上到去冇得見人，打死我架！
玩完落地庫同後悔ing的阿捷會合，CD舖同二手舖我就唔會／唔敢入架喇已經死晒架喇，但見順路就去訂埋隻C&C3先，嘩外國要禮拜尾先出，但而家預訂的話最快第二日立即有貨，仲要特別版都平過外國差唔多成半！好在我今日工都唔返爆埋隻C&C2！死黎緊幾個月真係唔敢諗會點死！另一個發現係我地阿捷居然咁受女性歡迎，本身間game舖係個大舖位，但而家一分為二成兩間細舖，但大又好細又好一樣咁受歡迎，因為係長期搵幾位靚女睇檔，絕對可以刺激各位朋友支持正版之意欲 － 噢我不在此列，本身係想過上次先達買C&C特集間幫襯（呢間冇靚女的，sorry），只不過見阿捷一入到去已經可以同counter個姐姐仔有講有笑大家已經咁熟，為左令佢可以更進一步，我地呢ｄ做媒扮係佢介紹黎買game幫佢爭取印象分又點話！
「劉Sir對你幾好丫阿捷以後要你包我每個星期六日三四桶雞呢個要求極之合理！」

今個禮拜，又有貨到，但唔出住，因為懶，同量少，同全部underground野，出黎都冇咩意思啦，雖然咁多隻試過晒差唔多全部都係正到食屎果隻，而我最鍾意果隻，係一隻metalcore EP，呵呵呵呵。有ｄ咩到左其實對好多朋友知同唔知冇乜大分別or影響，只需要知道有一隻碟到左就夠喇：
「ILLNATH新碟到左TRHK。」

1. 上YouTube睇呢個「勇者系列變物補完」，嘩全個勇者系列真係好Ｑ多。睇機械人動畫從來鍾意睇合體同變形，但當後來ｄ勇者系列可以越出越複雜＆多野搞，合體由以前半分鐘變成合足你分幾兩分鐘都得，真係唔明點解ｄ敵人咁白痴永遠唔識得合體中途做低ｄ機或者駕駛員。
2. 雞記個新日本咖哩雞扒便當，量唔多，料唔正，唔好食。同一個價錢，新明威開心好多。
3. 不過新明威都有勁敵：今日有間富記上黎派，一個三送大碗車仔麵包野飲都只係十四，好食得黎連「一個人食一桶雞」之劉Sir都會食得飽，正呢間野絕對係大家食價錢新明威享受！
4. 零式可樂hit左一排，到今日先第一次飲，嘩正喎我從來唔鍾意飲可樂因為太濃，呢隻零版夠淡我鍾意，散埋氣之後更正！點解？因為散氣Zero隻味同散氣Light一樣，而口味另類的劉Sir，細細個已經好鍾意飲冇氣健怡可樂，最鍾意開左罐健怡可樂之後擺番半個鐘先飲！（冇錯呢條友細細個已經唔正常）
5. 變形金剛大電影，又再睇多次，唔睇國語版喇真係頂唔順ｄ配音同譯名特別係音樂個gothic metal式男opera配音，英文版夾香港字幕最正，ｄ譯名真係全部跟足晒香港版勁呀好多名而家我地都唔記得佢地仲搵得到，祖國之偉大實在係沒齒難忘！當然，會睇多次，其實都係為左兩首歌遮！
6. 今日可以噉款，唔使講都知道又係殊灰的一天啦！

退左休咁耐（or：收左皮咁耐），今日第一分鐘已經同上個禮拜／上個月／上Ｎ咁耐完全唔同晒，多野做到仆晒街果隻。結果都係冇做到野。點解？
冇野做果時，當然係唔使做野啦。
有野做果時，嘆左咁耐無端端要我做野？冇mood啦當堂，冇mood又點做野？
結論係，即係咩日子都好，劉Sir呢條衰仔都唔會做野。佢老細深深感受到，請左佢係呢世人最錯之一個決定。

放工第一件事唔係上皆旺，係落信和，琴日磅完水，今日已經收到電話隻C&C3到左，嘩仲快過美國兩日！去到信和門口，首先見到有個姐姐派C&C3傳單。
「唔係卦？C&C3都有promotor？」
地庫兩間game舖（即係同一間game舖）從來只見有靚女睇檔鮮見有仔，今日年度大game之一C&C3到場，直頭係姐姐總動員見過與未見過的姐姐都出現晒（就係唔見有仔），雖然信和唔係得佢地兩／一間，但做得到信和最成功，全賴全部員工請親都係青春貌美姐姐仔，令各位好似阿捷呢ｄ麻甩仔樂而忘返幫襯完又再幫襯冇野幫襯都走落去扮幫襯。隻game三舊水仲有找，嘩頂美國好似仲要後日先有得買加同一個特別版成US$49.99喎有冇可能呀？有ｄ唔多相信添令我自己都！仲要買game再送多貼紙乙張，雖然冇用但唔使錢有乜所謂丫，都唔止，走果時立即有一個姐姐攔住再加一個promotor送上C&C3 tee一件，係件紅色NOD tee，唔使錢送！正！！更難得係件tee居然夠大我著到上身唔爆！！！
「老細！我返工終於有一件tee唔係黑色喇！！」
雖然呢ｄ普通街頭promotor唔會話有「名模」好似Kawaii呢種質素啦，質素亦大多參差（game舖本身的姐姐仔都夠照過Ｎ個promotor），但今日一行都唔差架，立即打電話叫阿捷黎（扮）幫襯先啦哈哈！
估唔到而家連賣隻game都要promotor，而家真係乜叉都要promotor。使唔使我地賣metal都請番個呢又？（雖然請唔請完全冇分別，呵呵。）

係考試、係糧尾、定係因為劉Sir？今日發生咩事？全層係一個人都冇，就連舖都冇幾多間開，只得一炸無聊人上黎嘈生晒，即係想皆旺可以正常番ｄ冇咁多粗口冇咁多人發癲嘈拆全層趕客？等星期三啦各位朋友。

．．．好多野做，但係都可以朝早冇返到工今日只返工日。點解？
「C&C3？」
正確黎講，（可能）係富記。呢間十四蚊大大碗車仔麵新發現非常合皮，但唔知係咪又係劉Sir食先中招，返到屋企即屙，訓到四點幾紮醒唔掂再屙，訓醒朝早起身，又屙。灰，噉又冇左半日假。仲要多野做今日下晝趕足全日，連琴日ｄ野都未清晒。報應呀報應呀嗚嗚嗚嗚。

今晚開舖，只係為見四個人。而家上黎TRHK，次次未行到門口已經會見到呢隻熊彗星。今日第一位，係梁生，冇錯剛剛個星期日批貨又黎幾隻underground black，自然又係佢蒲頭的日子，黎到都未望death metal，第一件事就係執起隻野係度玩：
「呢隻咪係自護馬沙紅彗星？」
「識貨喎梁生！」
冇錯，梁生絕對係一個你點估都估佢唔到的阿叔。第二個係Ian，就係踢左不知多少學生入metal學會的國際學校教書佬，由九龍城見到而家，咁多年黎今日見佢最型一次，執到超級四正噉入黎，第一眼完全認唔到要諗幾諗先醒番起佢係乜水！第三個係同層玩具舖老細113（「其實皆旺有冇人個名唔係數字？」），除左107之外（呵呵），佢間舖我最鍾意，因為專入好多二手野絕版野同美國野，日本野反而唔係好多，喂正喎我係美國動漫fans當然大把野中招！想訂貨出一出聲就得，大劑係噉中招！今日上黎就係兩隻新貨到左，特登帶上黎，不過唔關我事，而係今日之第四位：阿捷！一聽到搵左好耐果兩隻勇者系列訂到返黎就驗都唔測即閃上黎皆旺，真係大劑嘛，雖然我唔係勇者系列fans，但望望兩隻野都知好Ｑ正，只不過要我咁豪一擲千金執玩具，算Ｑ數啦我寧願當冇見過玩少樣野食番好少少。同場加送多不知名昆蟲乙隻，飛果時似蜜蜂但身形大好多，係咩蟲唔知，但肯定佢係謝安琪fans，睇今日見可以無人島到劉Sir又拎隻謝安琪演唱會播多次（呢隻碟基本上已經係長駐TRHK），一播隻野就飛入黎係噉嬲住個電視，識貨喎隻蟲仔都！

返到屋企。冇野玩。
「唔係C&C3咩？」
我都好想。只不過，估唔到我部「新機」，都玩唔到。殊灰。睇片ｄ畫面真係靚到仆晒街絕對係見過為止最靚戰略game，未出game上年睇片已經擔心會玩唔到，但跟住換左機都算係update算係新，冇理由仲係玩唔到卦？install完之後開隻game，第一次開以為輕機，因為全畫面黑晒等足成分鐘先至入到隻game，跟住開到隻game，嘩，個setting係自動將所有影像設定較到最低質素最差，仲警告「一改高隻game就會行唔到」咁嚴重，即係玩果時係好順唔算慢冇乜窒，不過犧牲晒賣點之高解像高畫質ｄ畫面係樣衰到爆。都算。但唔知係我部機都係唔夠勁？係個Windows/System有事crash左？定還是用on board display card真係頂唔順？玩分幾兩分鐘之後，就會自動跳返出去Windows作業無效輕機死埋。uninstall完再install再試多Ｎ次玩多Ｎ次都係一樣。真係好好好好好灰。C&C3係近年非常期待絕對重要之一隻重點game黎架！！！而家換左機都唔夠半年已經話玩唔到，莫非真係要等到下一次再換機先有得玩？？？？？
「灰！！！！！！！！！

「喂！你唔係話會公開發達秘笈咩？」
經此打擊，呢個世界所有野已經對我冇意義喇，本來我都好想幫各位朋友發財，特別襯二千萬金多寶幫大家揀出四十二個號碼等人人有頭獎中，只不過，唉！請各方人士數碼擊入commandandconquer.com盡情怒send hate mail俾EA Studio仝人發洩！
不過107就醒喇，今日晏晝臨買六合彩之前，特登打個電話黎叫劉Sir即席揀四十三個靚number出黎！可惜，佢唔記得左劉Sir係世紀黑仔王！揀左四十二個，換言之係間接揀左七個字出黎，即係結果一樣都係死，而呢七個字正正係同上星期六一樣一個都冇中到！要發達，應該係要劉Sir買四十三個字，噉冇買果七個字先真正會成為中頭獎果幾個！
「不過，107，或者你打黎搵我時我ｄ衰氣過晒俾你啦！我自己買左兩張飛，都好彩有一張中到安慰獎有廿蚊執番喎！噉大個仔第一次中六合彩，搞到我有ｄ張珍藏呢張飛唔捨得拎去換廿蚊添呵呵！」

今日星期三，唔使開舖的日子，亦係劉Sir一個禮拜入面唯一一日「假期」。知我夜晚唔使開舖，日頭老細都知我呢排辛苦喇，前兩日做野做到仆，今日奇蹟地回歸返上星期果種退休生活，都係要做野，但十二點唔夠已經發現乜叉都做晒，成個Outlook係一封email都冇只得一片空白，嘩正呀。見我做野做得咁快，老細仲私人醒左一舊水俾我雪條任掃添 － 呀一舊水係真，不過個理由好明顯係老吹，其實係因為老細同我一樣中左安慰獎仲要中左兩注先有一舊水，與呢條友做野快唔快冇關係。lunch五分鐘內食完即閃落樓下行勻七仔加華潤（我實在鍾意華潤因為佢地英文名叫做Avantgarde！），掃左兩大袋雪條再幫自己入一入貨，去得七記就自然要執多兜魚蛋啦加多三個半仲有兩串雞串送，正！好耐未試過好似今日噉，食足成日＆頹足成日！
一點鐘，一打鐘梗係立即咩都唔做飛身入pantry啦（雖然本身已經係冇野做），又係我最愛的餐肉一丁走湯，走湯係可以塞入口趙兩趙就吞得慳水慳力慳時間，冇錯我就係頹成噉，大佬唔使訓覺呀早ｄ食完早ｄ訓丫嘛！
兩點鐘，仲訓緊。食完個乾一丁落去辦埋貨上到黎已經搭七搭八，得果四個字訓，邊度夠？冇人敢叫我起身，因為佢地都知道劉Sir訓覺果時摷醒佢佢會咬人，訓得好開心，不過廢事落老細面啦都係早ｄ醒好ｄ，跟住入廁所繼續訓，當住老細面訓落佢面唔係太好啦。
三點，起身，係時候食野。食七仔咖哩魚蛋同雞串，魚蛋仍然保持水準非常好食，但雞串差ｄ唔多入味。跟住飲埋lunch飲剩碗白湯，當然係拎住碗野係公司度行黎行去噉飲，飲完仲未飽，呀，食多條雪條都好喎，當然係係招搖地繞住場噉食啦。食完先三點九，又係匿入廁所的時間 － 梗係入廁所訓啦唔通入廁所屙尿咩！
四點幾，冇野做，食多包薯片都好喎！一面食，一面同坐我隔籬位個女同事傾偈，唔係用口傾，係用MSN傾，幾無聊。冇計，我忙嘛，把口要黎食薯片嘛，邊得閒講野？
五點．．．算啦，食完飯我都已經當左自己放左工啦，最後呢個鐘，除左繼續上網無聊戇居，仲可以做乜？真係做野？傻啦劉Sir黎架我係！

今晚唔使開舖，亦冇出街玩，實在太耐冇返屋企食飯，呢輪星期三唔好周圍蒲喇返屋企食個飯先啦。噉樣都係好事，多返時間做其他野。有咩做？大把啦，就算唔聽歌，其他想做要做都多到做唔晒。見今晚咁多時間，又睇多次NINE INCH NAILS隻新DVD，睇左兩次，冇心目中咁好。NIN賣點一向係live，呢隊野出道差唔多廿年，次次live隻隻碟都好玩藝術感覺，演唱會燈光效果非常精彩大騷直頭玩埋視像更一流，仲要玩得夠放夠癲成隊band玩到飛黎飛去插晒水果隻，只係同上隻DVD比，一拍起黎實在差得遠，舞台佈置同效果都及唔上，講癲隊band仍然係好癲，只係呢樣係NIN缺點之一：癲起上黎可以癲得好投入好放，就好似舊DVD果場，但亦有時唔在狀態或者冇乜火而癲得好假好造作流於Manson之類之「假」，亦即係新DVD呢場。加上係上年新碟tour而新碟ｄ歌都靜同簡單過以前好多，聽已經有點悶live更加唔多適合玩，睇睇下有幾個字睇到訓著左，冇辦法選曲加表演上都輸蝕過上隻，未計歌齋鼓佬同結他聲已經冇得鬥啦。係我係NIN fans我仍然係非常鍾意佢地，只係呢場live真係達唔到我要求，令我更加想買返上一隻。冇錯講到咁好但其實我仲未買，上隻DVD只係有幸睇過，直頭係精彩到暈，我冇DVD只得CD但齋聽CD已經high到震亦勁想買返隻，只係一直冇買到，除左佢地ｄ舊野本身難搵＆貴之外，仲因為一個好戇居的設計：一場live好地地一隻DVD可以放晒，唔知點解硬係要分開做兩隻DVD，即係上半場加一半bonus放第一隻碟，然後其他bonus同下半場放另一隻，而唔可以一隻碟放全場live再一隻碟放全部bonus，就算場live點精彩都好，點知睇睇下無端端要我停左部機換碟，好戇居好掃興喎，尤其是知道一隻碟都可以包晒所有野果陣，噉樣夾硬分開兩隻碟唔方便之餘價錢又貴差唔多成倍，更加唔想俾佢昆 － 係架身為fans我都會話NIN自己間label Halo係昆錢架，冇錯佢地ｄ野係好玩設計，pop一回事NIN果種art style確係自此一家你一望就會認得，只係可能就係咁自此一家加自己label加知道各位盲目fans例如我肯定會追捧，只要係NIN出品無論音樂還是衣著定係周邊，通通貴到九彩。係靚係特別係我鍾意，只不過要藝術到咁Ｑ貴，例如隻舊DVD矜貴到要噉樣一開二做到個包裝同設計概念靚一靚，盲目fans的我都有點兒頂唔順。
講係噉講，鬧完之後照係俾佢昆，好似睇完隻DVD之後呢幾個禮拜又有新碟出，唔知玩成點只知以前三四年先出一隻碟之佢地突然噉樣一年一隻真係好密，同上隻碟聽過之後對今隻冇乜預期，只係出左之後一樣會係乖乖磅水，跟住仲話隻新碟會改編成電影添，又係冇得走。NINｄMV係流行音樂之中最有藝術性同爭議性之一批，甚至拍過bootleg過一套「聽住NINE INCH NAILS殺人肢解」、激到「連FBI都覺得真有其事而作出調查」之真實暴力獨立電影，而家又有成套概念電影拍到出黎，佢地個style又正正係我鍾意果種，唉冇得走架喇努力工作啦又要。

睇完DVD當然要打下機，仍然死心不息地繼續嘗試C&C3，唉真係好灰呀呢隻game等左好多年喇。就每次果分幾鐘幾分鐘地煲下睇下，暫時對C&C3之印象，唔係太過正面：兩個陣營變成三個陣營、科技設定同三方抗衡、3DCG畫面加埋操作，唔知點解越玩越似Starcraft，真係好似特別係操作同介面，Starcraft我都超鍾意，只係我想C&C可以保留返自己C&C之特色而唔係變做另一隻Starcraft喎。不過而家玩都未正式開始玩到（再次彈出一個灰字），玩落相信又會係另一回事，只係幾時先有得「玩落」又係無知之數。
臨近四五月最旺季之時先知話隻C&C3玩唔到，相信我老細會幾感謝EA出到隻game咁高要求，如果真係玩到的話，分分鐘又打到天昏地暗復活節舖都唔開再之後四月中個展覽會直頭去都廢Ｑ事去。只可惜，C&C十幾年出左咁多集，又點會咁簡單就滿足到劉Sir？正史玩唔到，仲有個「前傳」紅色警戒呢？好似今晚一開就大劑又直煲到三四點正派爆左一半關數先捨得訓覺。冇C&C3，唔代表可以令到我乖乖早訓覺，嘿嘿嘿嘿．．．．

正前幾日的努力終有成果，我地呢ｄ字上談兵派即係得把口吹吹水的傻仔做晒所有文件之後，將全部野send返去務實派的工廠做野，要做貨做辦又點會係一時三刻之事丫佢地未做得起我又冇野做，相信下個禮拜之前呢幾日可以放埋個靚假先，每日就係坐係度印印腳再串串貢問問老細：
「喂，月尾喇喎，幾時出糧？」
有幾囂張得幾囂張喇而家過埋呢排復活節假返埋黎之後想串都冇得串架喇！

今日得閒冇野做，又懶左少少唔多想寫野，成日係度不斷上網睇game，見呢輪玩C&C玩得咁高興／灰，得閒到上返EA個網睇睇，係喎佢地仲有好多舊game想追返喎！例如比C&C更早之「即時戰略之父」Dune 2！嘩我記得我小學已經玩呢隻game喇我五六年級果時就出喇幾早！當時年少無知只鍾意玩怒焚怒爆行街game射擊game（冇錯劉Sir細細個已經具有聽metal之膚淺潛質），要再過多幾年到中學先識欣賞，果時好迷呢隻game架，個片頭係傳奇地無真人發聲講晒成個故事你聽，我係迷到唔明ｄ英文講乜都成個片頭識背晒到而家都仲記得，跟住再查返字典睇個故事講乜同隻game講乜，冇錯打機學英文絕對係有趣加有效。玩完隻Dune 2就出C&C1，兩隻直頭完全冇得比啦Dune只係開創一個新領域但真正成立現代即時戰略game始終係C&C1，亦因為C&C1之出現而遺忘左Dune，直到2000年Dune 2出左新版Dune 2000即係用而家C&C Red Alert個engine重新執靚隻Dune 2再出多次，雖然明知隻game係完全一模一樣只係畫面靚左同好似C&C系列全部片變晒用真人演，情意結令已經唔多打機的我都不禁為呢隻「呃錢廢game」買返隻正版，係我都會認係呃錢甚至有點廢但冇計啦又係童年夢想之一。又睇返先醒起，果時Dune 2(000)之後仲出左一隻立體版Dune，果時冇玩因為已經唔多再打機之餘部機亦唔夠玩立體game，而家俾我見返，唉！同樣係情意結關係，當年錯過左而家真係好想搵返黎玩，只係已經成六年前出又要唔係咩大game勁game唔多受歡迎，都唔知道可以去邊度搵返，或者除左玩具舖之後，今後仲要行埋game舖先掂！CD舖同我閃埋一二邊先唔該！
玩變形金剛已經死，無端端俾C&C3勾番起舖癮，唉仲大劑原來當年好多正野錯過左，亦有更多寶物而家想搵返，最重要係好多舊game當年部機玩唔到，但而家得嘛！C&C3又令我諗返起當年煲足成個暑假之Starcraft，Starcraft又係我最愛game之一又想儲返隻正版，以前細個連何謂正版都唔識，而家大個左真係好想搵返隻game連expansion都執返套正版珍藏，我記得幾年前有出過boxset係包晒全隻game所有野架，加上呢隻game到而家仍然紅到黐線（我完全唔明點解ｄ韓國人可以2000年玩到而家都仲係玩緊Starcraft！），相信要搵絕對易過Dune 3先，只係唔明點解隻game咁勁但係到而家都未出Starcraft 2，反而絕對及唔上之Warcraft可以繼續出出到第三代，或者連Blizzard自己都覺得Starcraft故事同系列都太成功自己都唔會超越得到卦，就好似C&C3出左之後，我呢個忠實fans都覺得有點不足一樣道理。打機都可以有好多野諗同研究架，只恨時間實在太少。要作取捨？唉而家手上樣樣野都係至寶呢邊揀？
「唯有放棄日頭份工！當堂即時大Ｘ把時間玩乜都得！」

坐言起行 － 唔係話放棄份工，請不要誤會劉Sir真係咁勇 － 一放工立即走上先達之前幫襯過果間game舖問問，會唔會有我想要果幾隻舊野？Starcraft就一定有架喇，唔使等多三年出個十週年紀念版先有得執；我隻Dune 2000已經唔知飛左去邊，但呢隻唔係太有心情再玩過玩都只係為睇返真人出演大製作過場動畫，反而跟住隻立體版Dune先真係想搵返，只不過Dune想搵真係唔知邊度搵分分鐘EA自己都冇訂唔返。但其實更有興趣搵返太古年代果ｄDOS game返黎玩，即係23486時代果ｄ，好似中文RPG之皇仙劍奇俠傳呢ｄ。殊多。
總之而家TRHK唔係metal。之前係YouTube搵變形金剛，跟住係YouTube搵動畫片頭，今日變成YouTube搵game，睇人打機戰（噉都有得睇一餐夠晒無聊），同埋睇人地點樣打機玩speed run，就好似傳奇之孖寶三四分鐘爆機。總之而家TRHK已經唔再metal啦。

最metal果野，相信都要今個星期六先會出現，睇今日收舖之後隆重其事到由皆旺推架車返屋企，就知黎緊星期六會有大野搞。而今晚想metal返少少，都有：
「《DMC》出左第二期！」
估唔到咁快就出第二期，玉皇朝果然有效率！第一期未覺好堅，到左呢期第二期，立即笑到爆咀，劇情同笑料都精彩過第一期好多，除左metal同pop亦有hip-hop同punk，畫果隻友實在堅料，亦即係話，冇得唔追呢本野真係一定要追！我好鍾意呢種行運超人式超現實荒謬搞笑！今期教左一句金句：
「你已經不再有型了！」（解：「你已經柒左了！」的斯文版）
非常期待呢套漫畫動畫化，睇書名／band名同埋入面角色造型，都知道係玩KISS同聖肌魔II，但好想知呢隊「死亡重金屬」變左做動畫之後會發生咩事？