段記



24/1/2007 WED
trhK MKII

本年度首個重要活動,正式展開。對於trhK呢個TRHK康樂活動、呢個告訴各位專家劉Sir & friends「唔係metal」的搖滾叛徒糾眾之聚,我從來非常認真對待,睇我為左呢一晚特登請左日半假就知。邊有人會為左唱K連工都唔返?今日先至係2007年第四個禮拜,但係前三個禮拜已經每星期請左一日(例)假,今個禮拜仲勁請足一日半,即係到而家今年仲未試過有一個禮拜係返足。老細好唔滿意:
「即係你想唔做咪出聲囉,唔使搞咁多野喎!」

日頭我點吞pop法無謂多寫,日日都寫你我唔講你都背得番出黎啦!重點係放工之後。其實今日可以請足全日假,但只請半日除左留番個朝早清定d野等聽日唔使俾公司電話摷醒,同後日返到黎唔使跟咁多野(雖然事實證明我今日返到黎純粹係為左呃同事d早餐食),仲為慶祝trhK再動而擦番餐好 - 其實係俾會計靚女屈左出黎請佢食番餐至真。即係我已經衰啦一個月唔夠已經冇左四日半假,佢都不相伯仲甚至青出於藍請假請得仲離譜過我,已經用全年差唔多一半假,夾埋月尾要計出糧多野做(所以佢點得閒都唔會有我咁得閒,因為月尾總有幾日真係要做野),唔敢好似我咁猖狂而只請一個鐘假出黎食算,正確黎講都唔係請假而係怒射,食到兩點鐘先施施然打電話返去求祈搵個理由話返唔切公司,盡得劉Sir真傳。今餐係聞名已久之小肥羊,夜晚打邊爐梗係食過啦晏晝未試過丫嘛,難得今日放假梗係踩下場先啦,當然唔係打邊爐咁癲,兩條友只係食呢個點心粉麵自助餐,小肥羊自助午餐同自助晚餐完全係兩個方針,晚餐食過都知係豪到爆每人冇兩三舊水唔使旨意落樓,但晏晝調番轉走平民化路線,其實同你去茶樓食差唔多係多少少特色野食噉,可能要顯出比其他茶樓珍貴,上菜係用一個好靚但容量只比豉油碟大小小之華而不實碟仔裝丁少咁多俾你,好在我地第一輪已經瘋狂點左廿幾樣唔係絕對唔夠食。由頭到尾叫左兩輪,好似好少但你知道我地一輪叫幾多就會明白點解兩輪就收晒皮,結論係同晚餐相反越cheap越好食,有個唔知係咪(扮)蒙古小食之玉米餅,點食都覺得同食班戟感覺差唔多只不過細塊好多,但好食就得啦理鬼佢係咪麥記ma 扮蒙古丫;炸兩雖然簡單但係整得好鬼好食,都唔夠全場最正之XO醬蘿蔔糕,好簡單之一味但用XO醬爆得好香口,呢兩樣野我一個人已經各食兩碟,之後水煮羊肉河粉,個兜好似意粉屋裝意粉果d,一碟唔係多但d汁奇正加埋羊肉夠羶,又吞多一碟半。最後有(扮)扭紋朱古力外皮之雪山奶皇包,如果多番d上海野好似小籠包就更perfect。嘩今餐真係非常豐富呀我食得極度滿足,不過只限cheap開的我遮,食慣山珍海味的會計靚女好唔滿意:
「d冷盤唔多掂係得個汁好,選擇唔夠多先得果三四十款,又得茶飲冇得任飲其他野,冇啖好食搞錯呀!」
「姐仔收得你五十五蚊位仲想點呀!仲要唔使你俾錢喎!!!」

全場兩層除左我地一檯係後生仔女全部都係師奶&阿叔伯級人馬,令我覺得自己好似真係退左休出黎嘆點心。當然又係講下公司同同事的各大無聊戇居野,會計靚女亦同大家分享一件真人真事,告誡大家英文真係好重要,特別係釣金龜果時:
「我上一間公司係大公司黎架,間野做玩具,成日有大粒野上我地公司坐同開會。有次"Toy Story"個主筆上黎我地公司,同行仲有個日本仔,佢兩個留係度三個月,我公司個reception噉就搞掂左個日本仔,走果時個日本仔帶埋個reception走,第二次返黎佢已經做左人地老婆喇!佢係reception黎咋!不過個樣唔係好得,係身材正同夠姣囉!其實我都有機會架,果個鬼佬對我有意架!佢一黎到已經成日撩我,不過講英文,梗係唔敢出聲啦!跟住係噉send email俾我,問我有咩嗜好呀又問擇偶條件呀,不過十幾封email我先覆得果五封,唔識寫英文丫嘛!到臨走果日佢話想抱抱,我當堂肴晒底唔知點樣講,剩係識講一句"Toilet!'之後匿入廁所唔敢出黎!如果果陣我英文好d同佢傾到偈講到野,我而家都好似個reception噉做左徐子淇喇!」
「下一期職業英語運動廣告片應該用你呢個真人真事個案做劇本,出街之後相信全香港英語水平會直線提高!」


雖然計坐低起任食兩個鐘,但食左個半鐘兩點九已經走人,即係我當自己退左休遮阿靚女唔係丫嘛。仲咁早,有咩消遣?會計靚女臨走前有好介紹:
「我前排行過太子油站果邊,見到有間野招牌寫住『任訓兩個鐘』,你咁得閒咪去訓下囉!不過其他服務收費我就唔知囉呵呵呵!」
即係我都想試,但實在太多節目了。首先行路出尖沙咀,行路除左因為時間太多仲因為有此必要,睇埋今晚你就會明白。途經佐敦地鐵站,原來出口商場果間唱片舖執左變左賣體育用品,隔籬巷仔之芒記又搬左不知多少時日,賣唱片真係難做呀。跟住行冇乜斬獲之HMV,再行文化中心,唔係因為我有文化,得閒無事都會行文化中心睇下會唔會有咩過癮節目或者講座睇遮,有時會有驚喜架,就好似中七果時行過見到飛碟會有講座仲要六十蚊張飛唔係貴,噉就成班友走左去聽,幾過癮架。然後出到Tom Lee會合Rock爺,順便睇埋黎緊兩三月節目,Roger Waters果場勁爆,買三百九十蚊飛已經剩番尾十六行最邊邊個位,你會話「都唔係PINK FLOYD」之類,不過都有PINK FLOYD主腦鎮場,加埋會重玩全隻"Dark Side of the Moon"("The Wall"唔會再發生架喇,算啦生不逢時),當朝聖都要架喇呢d機會真係可一不可再,所以可以提定各位朋友,二月第三個禮拜會改為開一二三五,禮拜四15/2上左黎喊都冇用架喇。仲有一場都好想睇就係MUSE,不過唔敢買飛住啦下個月出埋糧先再算啦劉Sir真係超任博士無限金錢咩。
噉樣行一行,又聽左兩隻碟,正確d講係一隻半碟,包括黃貫中第一隻碟《黃貫中》同最新EP《狂人習作》,第一隻碟當年新星堂執笠半價大清貨時第一圈冇執到,兜一兜已經唔見左有d後悔,到契爺唔知邊度班到隻二手返黎,聽過之後更加後悔果時唔立即執埋,因為隻碟真係好正。BEYOND三人時期d野玩番好恆,但呢隻個人碟比想像中輕得多,招牌當然係有LMF之《香港一定得》,當年話呢首歌有個唔出得街版本,但隻碟果首冇粗口又唔多粗俗唔知邊度搵得到?只不過無論曲詞都係慢歌受d,而成隻碟當時同而家都係,最吸引之處係有Mick Karn同Sugizo,Sugizo係彈得好但從來冇迷過日本野之我對佢冇咩特別感覺,不過有Mick Karn已經夠要買呢隻碟,佢係我最鍾意bass佬之一,亦係我覺得冇幾多個真係有自己style之音樂人。黃貫中把聲同d詞從來唔係我鍾意果種,講rock的話,坦白講,而家聽黃貫中d野,仲可以覺得有幾rock丫,如果當呢隻碟d歌pop野噉聽感覺就好得多,冇之後兩隻碟果d直頭pop過頭編詞亦冇咁好,而最新一隻「rock番」之《狂人習作》,灰地我最鍾意亦成日聽果兩首,係《逃》同《彩色世界》兩首格局大半一樣之慢歌,亦可以話係全EP最pop果兩首。其他果d唔係唔好聽除左《踩界》編曲唔鍾意,夠爽之《原罪犯》同有點兒Manson的《阿博二世》都唔差,問題係錄音幾爛下,又係衰唱同歌詞,同埋同一個原因:
「講rock的話,坦白講,而家聽黃貫中d野,仲可以覺得有幾rock丫。」
冇錯劉Sir已經變左一個pop人了。

行完尖咀買完飛,仲有時間出去金星兜番轉。身邊機舖同CD舖一樣執完一間又一間,好在呢間尖咀傳奇仲係度,以前中學出呢頭補習果陣必玩幾舖,仲記得果時鼓機先剛剛出一舖三首歌成八蚊跳舞機仲勁兩首歌十蚊,好多時補習前加後黎玩甚至玩到習都唔補後來索性唔補習算,因為有呢間野係度補同唔補完全冇分別。中學畢業之後都冇再黎過經過呢頭都冇入過,到今日再黎已經隔左六七年喇,仲捱得住真係好野,只係同以前已經唔同晒,少左好多機,因為而家機舖無可避免地要入大機好似跑馬同賭果d先賺到錢,其他dgame一係家用機玩得到,一係幾蚊雞坐足成個鐘全日先得幾十蚊電費維修人工都唔夠俾,搞到而家機舖變到好似歡樂天地噉先生存到。細機都冇咩選擇,機舖風氣係果輪興d咩機就有幾多入幾多,好似最初街霸二出果陣大半間機舖變晒街霸,唔係講笑我真係見過有機舖全舖得一部機唔係街霸二。然後興拳皇,又全部機變晒做拳皇,到而家大半間機舖都係Gundam Seed,由街霸壟斷開始已經唔再入機舖,而家已經退化到唔識玩要用手掣果d機,所以打親都係拎起手就玩到果d野,好似槍game同音樂game。難得地呢度仲有鼓機七代,對(power) metal友黎講呢一隻有非常重要之意義,因為咁多代鼓機之中得呢一集有得玩後Michael Kiske HELLOWEEN最出名金曲"Power",仲要兩蚊三首歌忝唔Q理立即連玩三首"Power"先啦!話係power metal不過放心,一到最難最癲果part之前首歌就完左就番鼓機之系統同大家之技術,只得前三份一剛剛好易玩又好玩,假以時日要no miss全連combo絕對唔係難事。但係除左"Power",玩黎玩去都係玩舊歌,收晒皮喇,睇番呢個場差唔多全部玩鼓機都係靚妹,仲要係勁得飛起果隻,真係世界變矣。同場仲有個肥仔表演Pop N' Music,叫得做表演就梗係玩到癲晒果隻啦,就玩到好似呢個李雲迪咁癲。死,而家入到機舖,覺得自己好渺小。
仍然搜尋Time Crisis 1中以完成傳說中之Project: Time Crisis。知道邊度有機舖仲有Time Crisis第一代者請告知。

本身話五點上舖頭點知玩得太開心六點半先出現,上到黎皆旺已經集合左好多傻仔。冷爺過左去先達執碟,
「十蚊四隻碟,抵玩!」
先達唔知幾多樓果檔二手個阿叔真係好鬼死多正野,上到去基本上有大半間舖你係唔知咩黎特別係呢個十蚊四隻corner,不過就係唔知咩黎先至係正野,純粹靠封面同公司同經驗去估,呢個先係樂趣,果度d野拎上eBay,分分鐘HK$2.5變US$25都唔奇,因為正野真係多到你估唔到,唔止係價錢根本低到無可再低,仲因為呢d貨真係好神奇,好似今次廿蚊八隻當中包括一隻psychedlic proto-punk,你叫我形容的話,我會話係極端金屬發展之中被人遺忘之一作,呢隻1988年英國碟三十首歌,你可以聽到CELTIC FROST、KATATONIA、DARKTHRONE、black metal、sludge、grind、crust、punk之一切一切,好似話個歌佬玩到入埋精神病院忝,真係夠晒cult。之後到阿捷接更去執,我多左隻彭羚同張信哲,佢有入樽soundtrack同一隻featuring Mr. Bean之BOYZONE single,真係乜都有呀呢間野,而以上只係冰山一角而已。想尋寶、想執二手,上先達啦真係唔係昆你,就算買到返黎唔係正唔鍾意,大佬,兩個半一隻碟,買個盒都唔得啦你仲想點?完全唔明白呢間野點樣維皮法,但個阿叔的確係捱左好耐並可以持續地有新貨,好想知呢d「兩個半一隻」貨源係咩人/邊度?真係好多隱世高人。


到七點半吉時已到,眾人起行開始trhK。今次轉場到好景果邊Neway City唱,本來接電話個姐姐誓神劈願話會俾大房,點知黎到多人到爆咁滯,所謂大房只係同上次唱差唔多大細之「九至十一人房」,叫做有機打有電視睇有網上多d野玩噉囉。但係講到食就好過上次新之城幾倍,都係食buffet但多好多選擇,勁多野揀仲有打邊爐同冷盤連小炒點心串燒片皮鴨都有得食,因為多人加間房係二樓搞到每次都要行樓梯落去拎野食關係,連走幾轉轉轉都拎到成張檯咁多野,包括有無限肥牛(所有肥牛我地一次過拎晒,死未)同無窮樂樂雞,係差在冇瘋狂咖哩角。嘩今日真係好大劑兩餐都係任食/狂食自助餐,又睇番各位朋友之反應,其實今晚都唔係黎唱,似黎玩同食野多。食飽飽又等齊人終於開始唱,當然唔少得高登經典金曲:
「甚麼聲音絕無意義?」(答案請在高登or Neway內找)
其實我地黎到都唔係唱K,係黎爆K,無論首歌係快係慢係嘈係靜一有嗌位實嗌到死,就算係慢歌情歌,假使歌詞當中有"Woo" 、 "Yeah" 、 "Haa" 、 "Ahh"之類、有長尾音位同首歌最後埋尾拖長等完果d位立即仆得街,只要以上任何一樣出現,各位都可以聽到各式獅子老虎河馬大象之嘶叫同咆哮,係爆到連咪都嗌壞左幾支激到爆,所以我地房門口經常有人經過好似睇動物園噉睇。呢一晚主角係阿冷,為左荷蘭橙的佢,今晚一律只准點慘情歌獻給阿冷,假使d歌一有獨白就大劑你會聽到有條傻仔係度哭喪,無論首歌幾唔慘都好經呢條傻仔一喊立即變到巧檸(唔)橙,係邊條傻仔就唔使講到咁明啦大家都估到啦下嘩。有好多歌唔識,但其實大部份都係聽完個intro之後睇完到歌詞已經識得唱,流行曲賣點就係平易近人嘛,話雖如此當今同以前都有唔同,以前d歌唔係為唱係為聽,編曲落多好多心機,但而家d歌講到明K歌就梗係拎黎唱,因為音樂唔係重點簡單旋律d編曲都簡化d,而家d歌有幾多首個intro同outro會長過八個bar?intro長得滯而家後生仔女會唔滿意「點解咁耐都冇得長」,outro長得滯各位大老細又嫌要等先有得唱下一首聽俾人cut歌。只係無論新舊pop唔pop中文英文對我地黎講都係一樣,係唔係都係噉唱/嗌/爆架啦,但我覺得今晚我唱得算好正常喇喎,好多金曲好似軟硬、迪克牛仔同Bon Jovi都未出!但《將冰山劈開》真係好high必定要再玩多次!



25/1/2007 THU

揀星期三晚唱問題確係好大,最主要係因為全個禮拜我得呢一晚得,所以trhK只可以/一定要呢一晚先搞得成,而第二日除左我咁癲之我各位朋友都要返工返學,所以十一二點起已經陸續有人離開,如果揀星期六或者假期唱又貴成倍又可能冇得唱咁耐,如果仲會有MKIII的話,應該點樣搞呢?到時先算啦,今晚確係非常好玩喎仲要越夜越精彩,最後走剩四個玩到尾,不過臨尾呢四五個鐘係睇同捱多過唱,因為玩埋《活著Viva》之後已經收晒皮,唔好話嗌唱都已經唱唔到,好似好唔掂反而首首歌突然間好似易唱左好多噉,因為全部要低八度先唱到。純粹睇表演跟住係。有阿捷成首EVERY LITTLE THING背晒果然係fans,QUEEN首經典"Bohemian Rhapsody"估佢唔到會有得唱仲要係原裝MV忝喂下次搵齊六個人一齊唱啦要。無聊得滯折墮到要玩兒歌,《狐狸先生幾點鐘》講一隻馬騮撞到隻狐狸跟住俾狐狸呃左去森林深處危在旦夕,個MV係《成語動畫廊》式CG(「CG」!)仲有晒劇情忝架,可惜睇唔到最後隻馬騮使唔使死/點樣慘死,因為有人頂唔順cut鬼左。《噚晚有隻狗仔叫》即係「噚晚你老豆/你老母又點樣叫」果首,都唔夠《河邊有隻羊》,咁大個仔今晚先知,原來呢首歌係有第二三四五六N節,唔止得羊象同馬騮三隻咁少架。無聊到搵埋周慧敏版《矇面超人》,梗係唔係呢首啦你傻咩不過照唱泰文版歌詞,又夾喎!下次要帶埋歌詞上黎唱先得!然後係噉搵泰文歌,唔識架見有拼音咪照唱囉咩呀,出面班人完全頂唔順:
「頂你丫成晚嘈生晒唱到四點幾仲唔肯走,而家仲唱埋晒d唔知乜春歌,想點呀你地?」
試左咁多首,有隊野叫BIG ASS唔錯喎,唔止個名dMV唔太白痴歌路仲幾英倫下,睇黎佢地係泰國應該幾紅。睇番,咦,原來DEATHGUY黎香港訪問佢地果陣佢地都有提過BIG ASS架!不過果時歌佬形容佢地做「清腔唱的nu-metal」,或者MV果幾首係派台慢歌卦?大籮柚之後係曾經風靡一時之無線最佳填詞電視劇主題曲,大家都只係為唱/爆果一句:
「男人心一.字.馬!」(相信填詞果位仁兄自己都解唔到點解)
唱/捱到五點半先走人,成層二樓我地係尾二一間隔籬房仲有班靚妹唱緊,都唔夠一樓勁仲有幾間房有人唱緊,嘩真係好似人人都似我噉唔使返工喎唱到咁癲!
「唔抵喎!好早咋喎,而家走蝕左喎!不如返去繼續唱啦!」
trhK MKII,2007年1月25日凌晨5:30結束。咦?好似有樣野冇提到。好多人都關心之一樣野。
「大獎得主係邊個?」
係喎!完全冇左呢件事忝!實在係太多野食同太多野玩,最後鋤大七比賽之事無疾而終。不過噉都好,如果真係開左,今晚Neway生意會立即增加十倍,我地唱半個鐘之後已經俾人踢走左,因為多人同嘈。鋤大七呢家野都係留番皆旺玩好。
八點玩到五點半,呢九個半鐘你問我邊首最好玩?全晚最正果首「歌」係:
《Neway接待員工作指南》


等小巴坐滿開車,返到屋企沖埋個涼七點幾先有得訓,好在全日只得零碎幾個電話,公司居然冇call過我可能真係當左我辭職唔做啦。一訓就訓到五點半先起身,訓到勁頭痛把聲仲拆加喉嚨痛,證明噚日玩到幾咁痛快。食埋人間美食屋企整之公仔麵先出黎開舖,正連放兩日假真係好爽。係chill out的一日/夜,生意就預左唔多架啦,坦白講而家TRHK賣果d野只係metal而唔係潮流,仲會有幾多人上黎丫。又好蹺地今晚撞到好多人,有metal內有metal外,傾左好多野,亦諗番好多。大致上又係17/1最後果堆。坦白講,點有理想都好,現實實在太過令人氣餒。
而家TRHK之前景,我只會用「有一日得一日」黎形容。



26/1/2007 FRI

今朝好早起左身,當然係被迫啦我有幾可會咁早彈起丫,五點幾鐘果時屋企樓下無端端燒車火燭,冇乜煙但係燒到成棟樓橡膠味,唔止臭到醒,仲因為老豆一早霸定頭位。燒車個位係正我訓覺個位對出個窗一伸個頭出去就睇到,我屋企仲要係低層忝睇得更加清楚,未聞到陣味已經聽到老豆之講波式旁述:
「嘩燒到好大火呀!仲好大陣橡膠味!」
「越燒越勁忝,隔籬架車會唔會波及架?」
「燒左成兩個幾字喇喎!點解消防車仲未到?乜咁冇效率架!」
「嘩架車差唔多燒晒先至黎!快d射水啦就黎燒埋隔籬架車喇」

就算我唔使起身,都可以透過我老豆之旁述得知樓下火勢幾咁猛烈。咁大陣味我老豆又咁興高采烈,訓唔到覺,噉點算?咪起身聽歌囉。唔使講架喇仍然係謝安琪《The First Day》,你鬧我都係噉話。都講過我聽野係鍾意將好聽果d聽到唔好聽為止、唔好聽果d聽到好聽為止,呢隻碟而家越聽越好聽,只係印象實在冇之前咁好,同有幾首舊歌新編既唔得意亦唔吸引,可能真係大公司之影響,搞到下隻碟會係點都唔敢諗。但係照買架啦係謝安琪出就實買架啦!正如METALLICA下隻碟變左玩disco你會唔會唔買丫有得走咩!


因為咁早起身睡眠不足,自然名正言順地遲到。
「做乜又遲到?想死???」
「我屋企樓下火燭!」
冇返日半,以為會好多野做?我都以為係。點知...呵呵∼∼∼(噢噉就玩完一日好冇癮忝)


放工之後的習慣,已經由落新之城爆一舖Time Crisis 3變成玩渣古,今日途中收到電話,搏殺中途見係107打黎梗係唔鬼理佢啦,再跟住另一個電話不斷打黎,噢107我誤解左你原來你打黎係給我的溫馨提示,因為今日五點幾已經光臨大駕果位係
「貴客呀貴客∼」
有關人士自知係邊位貴客。過程中遭到107 & friends的盡情恥笑,為保持低調全程用MSN同溝通/俾人笑,內容就唔係太方便公開,實在太多粗口喇睇完盞影響各位對劉Sir之形象,雖然而家已經衰到接近貼地。今晚算唔錯啦,只不過晚晚都係咁好先叫做頂得住。近排臨收舖好鍾意播番d中文pop野chill out一下,今日播王菀之,播左冇幾耐即有個靚女出現,但一入黎唔夠十秒即(嚇)走。呢個情況發生過不知多少次,全日最旺最多人果段時間,永遠唔係播metal果陣時呢d時間一定唔會有人,而係播中文歌同流行歌果時,果陣就會突然出現好多人入黎問
「呢隻咩黎?有冇呢隻碟買?」

收舖之後本來計劃係去打機,但最後冇去到,受盡千夫所指,冇計啦食太多嘛。黎開舖之前已經食左野,上到黎又口痕叫多個麵,跟住107再捐出五十蚊慈善基金提供大量臭豆腐&雞蛋仔,勁呀短短一晚已經連食三餐食到攪肚,
「要節食喇真係唔係會肥死架!」
講下遮算啦都係...



27/1/2007 SAT

...睇今朝早一返到公司,會計靚女已經準備左一大份精美芝士餐蛋三文治,
「我特登買韜韜午餐肉整架,貪佢得瘦肉唔肥膩又好食,成五蚊一罐仔好貴架你唔好唔食呀!」
受到脅迫,唯有就範啦。(「超我就唔信佢唔迫你你會唔食!」)阿靚女對我咁好,我要點樣回報佢呢?唔需要煩喇其實每一天我都在回報,我個頭一早成為左佢玩具。因為我懶&懶學關係,朝朝早都係返到公司之後搵佢幫我紮番條辮,
「拿,我整件三文治整得咁辛苦,今日我要紮條鬢辮!你唔好拆散佢呀!」
所以今日你見劉Sir個頭好(_)。放工之後由大角咀行去旺角,沿途受到很多妹妹仔的嘲笑。


屋企部機算係壽終正寢啦,又係搵佛爺笨的時間,每次佢接到我電話都知道肯定唔會有好野,逢同電腦有關事無大小實係搵佢。仍然係full-time part-time的佢(當一份part-time可以全職做足幾年,仲可唔可以算係part-time?),今日唔使返工都俾我摷左出黎砌部新機。唔係咩勁機只係二線野,但cheap cheap地砌住先反正電腦我只係用黎上網打字同玩系統要求低到爆的模擬器夠快夠穩定夠襟捱就得,到真係要打機果陣例如C&C3出左,先至再買返display card同sound card囉。呢部新野搬左返屋企之後,屋企而家部機或者整整佢,搞得掂的話拎埋落黎舖頭就唔使煩咁多野,即係到時唔使日日都抬埋自己部手提電腦出黎咁鬼死重,又可以見到劉Sir一機在手播歌又得收錢又得上網又得打野又得最重要之Punisher同圓桌武士亦得,嘩正到屋企都唔捨得返忝講到!

搞完部機冇乜野做,早左上舖頭,好彩撞到拎新貨上黎之Soni,雖然我同佢關係密切,但好似如此大家面對面噉傾可能兩三個月都冇一次,甚至搞騷果時先至有機會。咁難得撞到,大家坐低傾左好多野,由入貨到搞騷一路傾,入貨都冇咩好傾架喇,坦白講其實而家入咩貨都係死,入pop野又唔係入underground野又唔係,而家入果d根本就唔係咩大band,雖然好多聽開的話都會知道係屬於明星級數,但連搵都唔會有幾多人搵只係等人試,亦即係等死。至於搞騷,想搞呀係好想搞架,只不過可以搞咩band同係邊度搞?雖然成日有人話想睇metal show,但真係搞的話,反應只會係嫌唔係邊種metal又嫌唔係邊隊band又嫌係邊個場搞,同埋最普遍之嫌貴,基本上只要一張飛貴過一百蚊都係貴。但你覺得一張飛真係賣幾十蚊的話,場騷可以俾到咩場你有咩器材有咩質素,特別係呢d騷根本可以過一百人睇已經係奇蹟,而奇蹟只發生過一次:DISAVOWED,但都係要靠低於成本再低於本地band show價$70一張先做到出黎,喂大佬$70有得睇香港band加一隊世界級extreme metal band唔會仲唔夠抵卦?亦即係話唔好話賺回到個本已經偷笑。真係有可能做到一張飛貴過一百蚊,又或者可以有過百幾二百人入場,除非搞明星騷啦,可惜亦有失敗例子:ANGRA,因為「$350睇ANGRA好貴。」點都冇得救架喇,因為TRHK先天已經犯左一個大錯:其他組織係問人出口或者出手,兩樣野要搵到坦白講真係唔係太難,同時付出者之回報一定唔會少甚至可以同付出成反比自然更受歡迎;但TRHK係問人要錢的地方,而好現實地一講到錢已經會有九成人唔見左,而且就算俾左錢亦絕對唔會有非常大之滿足感,隻碟好唔好聽係另一回事,但你覺得同人講「我買左隻CD」可以有幾威有幾型?唔俾人笑你「仲晒錢買碟梗係download啦」算好彩架喇。
因為咁戇居,所以落去仍然只得一個捱字。


至於新貨方面,冇咩特別:

7000 Dying CD
我知,你會問同上個禮拜一樣,多左d乜?係有野多左,只不過我冇加落去。呢批貨已經夠多野喇卦?加埋本身果d,單係經典果堆已經夠計劃幾個月之使費。今日新到果d唔係好多,留番下次先一次過出啦,唔需要咁急,因為呢批新貨只會得到兩個回應:
1. 「呢隊咁pop都入?咁pop梗係唔聽啦!」(唔使我講,大家都估到係邊(幾)隊卦?但"pop"係咪就即係唔好聽?)
2. 「呢隊咩黎架?都唔識,梗係唔聽啦」(絕對唔陌生的一句)
所以,留番下次到貨先一次過出晒啦。呢批貨對我重點,除左果大量實驗野,仲有果堆old-school heavy metal,dband係新band但音樂絕對正宗舊式,而old-school sound一向好多人搵同問,只係到而家都唔多發到市,因為而家聽野主要分成兩類人,一種係只聽舊band即係十幾二十年前d野同經典,新野只聽少少甚至不屑去聽,而新band玩復古更加唔會去試,「要聽呢d點解唔聽返舊band?」一種係只追新band新音樂或者出名果d,音樂老土自然唔會試,加埋隊band完全冇知名度更加係理都唔會花時間去理。講唔好聽又唔係丫,例如隻SCREAMING SHADOWS,我播過咁多次俾人聽係冇一個人唔鍾意,只不過呢批heavy metal碟,暫時只賣過兩類客,當然唔係頭先果兩類:第一類係未聽metal太深,上黎問「有冇好介紹」果種客。第二類,係有聽過下band野,行皆旺睇玩具聽到播緊heavy metal野就入黎問下,試完覺得岩feel就買番隻聽下,呢樣係最不可思議,因為TRHK開左咁多年做到唔係聽開metal之街客生意真係兩隻手都數得晒,但今水貨已經可以做到兩單,亦即係賣呢批真係metal之metal野,有趣地對「冇態度」、「冇立場」同「唔識聽」呢班反而易過對聽落果批,或者band名真係比音樂本身重要,又可能heavy metal已經outdate左冇人聽。而家聽眾的「識聽」,對好多有堅持之新band實在好唔公平。
係講黎講去都係好灰,可惜事實確係咁現實。可能連灰之時間都唔會剩番多少矣。

最後講番兩樣野啦,冇咁灰,雖然對大部份人黎講都冇咩意思:

香港另類搖滾樂團意色樓
首張專輯《相識但陌生》
已於TRHK有售,定價$85

TRHK Bargain Corner所有唱片
現一律$100三隻大清貨!
為時不久,有買襯手!


「今日有冇人上黎黐線呀?」
「冇。」
「有咩人係度呀?」
「107係PS2 Winning Eleven。108係圓桌武士。」
「黐線!!!」
「仲有冇野呀好忙呀而家冇野就收線先啦拜拜。」

如是者,今日皆旺最on9果兩間舖變晒做機舖,睇夜晚二寶樂踩到上黎都一齊無聊到爆多舖圓桌武士先走,就知今日成班人悶到黐左線。
「不如我地索性係度開番間五蚊三個字啦,一定賺得仲多!」

收左舖落新之城繼續打,琴晚放人飛機搞到俾人狂小,今次到我小狗番107喇:
「咩呀!信和生意好就唔使過黎呀?賺左五十幾萬又點呀立即落黎新之城見我!」
近期怒煲渣古。我地渣古07小隊越黎越強大喇,而家單打可以去到第二關大佬,雙打起碼到第三關過埋不死身之第四小隊先,只係隊員107唔生性,打又cheap過人又搶晒野食又推隊長108上去擋彈硬食之後仲要妖言惑眾07小隊失敗係因為隊長領導不力,放心當晚呢條粉皮已經立即遭到軍法處置即場拉去新之城門口七狗分屍示眾。鍾意打渣古,其中一個原因係打大佬有得出超必,打大佬時打到佢出破綻再係噉射,射到爆氣就可以出到超必兩部渣古機槍>飛腳>熱能斧交叉雙斬,一野做低大佬仲要大大隻字寫住「 修 羅 雙 連 擊 」,十足十當年Capcom勁好玩果隻立體格鬥熱血私立學院之合體技加埋真人快打Fatality,型/七到爆襯晒我地07小隊。而家打渣古並唔係為左過關,而係修羅雙連擊出到上癮,只為左可以去到大佬之後係唔係都用呢招KO先至夠心滿意足同安樂有覺好訓,而今晚亦練成左我地07小隊肴底formation,蛻變自新派玩家之遮槍頭戰術,隊長108之成名絕技係不斷將支槍上下上下上下上下噉高速搖動,從而達到「你打我唔到」但又可以屈到電腦之遊擊戰效果。可惜變成呢招肴底formation是需要代價的,就是招來隊員107的妒忌:
「你可唔可以唔好咁消極呀???」
當然可以積極番d,就係唔只郁支槍,而成個人上下上下上下上下噉閃黎閃去,異常投入遊戲之中。因為娛樂性咁十足,每次07小隊出擊總會有廿幾三十人圍觀。
今晚真係打到傻,可惜太多人玩唔到Let's Go Jungle,好懷念用船槳打青蛙果關。知唔知上次我地107&108煲呢隻game幾威?我地爆機爆到上Fight Club!以下係原文節錄:
「有日我在新之城見人con爆機,見到最後大佬...兩條傻仔con左十幾舖先爆到機,on99!我一舖爆啦!」
令我迷上Fight Club。



28/1/2007 SUN

無人島再現。全日只得幾個人咁大把,有執到身光頸靚「今晚上澳門蒲」的阿Big,蒲乜同玩乜,唔需要多講喇卦?熟悉Big哥的朋友都好清楚啦!同埋好yeah的metal老豆,一執執十五隻碟,都只係五舊水,而家巴根corner減到一百蚊三隻嘛大佬,當然啦CHILDREN OF BODOM呢d一定唔會搵得到,但係當試一隊band只係三十三個三三三三三...都仲係嫌貴的話,莫非真係要做到好似先達噉兩個半一隻先至值?underground之永恆可悲命運。全日簡直可以用等死黎形容,都唔知玩乜好,冷爺冇黎即係冇PS2玩,Rock爺冇黎又即係唔夠腳開鋤七局,結果係兩間舖隔牆連線玩吞食天地,證明幾咁無聊。我發覺最擅長都係用五虎將之首黃忠,當年劉關張三英戰呂布一抽三都唔夠抽,係因為果時呂布撞唔到(劉Sir用果個)黃忠遮!唔係講笑,忠伯真係有其好用之處,決心苦練一番黃忠先。因為係隔牆打關係而兩條友又鬼死咁爛口,外面d人唔知咩事,見兩間舖頭間中會無端端飛幾句完全無上紋下理可通之語句或者粗口,驚到唔敢行埋黎,令今日更靜。最後極速十秒唔使KO埋曹操,爆機。圓桌武士都爆埋。仲有咩好玩?Punisher?唔好卦?捱極都仲有兩個幾鐘要捱,好痛苦,即係開舖開左咁耐,冇乜試過好似今日噉樣真係好似等死噉等收舖咁灰,係悶到開個email清下四年黎累積果千幾二千封email都可以。如果跟住落去都係悶成噉,可能已經不問世事/時事的我,都可以多時間到上番下forum同BBM睇睇。係屋企我用呢d時間黎爆多舖圓桌武士好過啦睇咁多野把鬼咩有鬼用咩?


今日真係灰到無可再灰。



29/1/2007 MON

是日菜式:漢堡一丁忌廉湯
所需材料:漢堡扒兩塊、出前一丁一碗、忌廉湯一兜
製作方法:
1. 致電公司樓下間茶餐廳。
2. 「唔該一個漢堡扒出前一丁!」
3. 「加多一碗白湯!」
4. 「個麵走湯唔該!」
5. 「咪小住先啦我唔係玩野架碗麵真係唔要湯呀小你!」
6. 三分鐘之內未送到上黎,再次致電茶餐廳粗口問候。
7. 外賣仔出現之後,叫老細幫你俾錢。
8. 「老細我肚餓食先你當見我唔到得架喇!」
9. 將碗白湯倒晒落碗漢堡出前一丁度,成為忌廉湯底。
10. 拎碗野周圍走問其他同事:「你估下呢碗咩黎?」表情要招積得戚。
11. 食。匙羹is fine。叉or筷子not acceptable。
12. 你會發現,其實好鬼難食。
13. 跟住扮肚屙,匿入廁所訓覺。
14. 17:55出返黎,唔好太遲,因為要就時間執野、熜機同打卡。
15. 落新之城打番舖渣古先。記住出修羅雙連擊。
16. 多謝大家。



trhK後遺症: 劉Sir化(又稱on09)
「所以點解而家皆旺商場變成無人島。冇人敢上黎。」


「劉Sir而家臭名遠播到呢度都有仇家!」
(107你咪再係度玩野扮劉Sir fans呀下!冇錢收架講明先!)



30/1/2007 TUE

灰到爆啦今日,好鬼死少野做,都做到四點幾先搞掂晒,點解?因為睡眠不足。呢個晏晝一到lunch立即狂吞,點三準時撻低,點知有條XX(阿Rock放心我唔會爆你出黎),由一點半開始每隔三個字打黎一次,需知我而家正常午睡時間係一點到三點(仲長過食飯時間幾威冇錯我至係老細),即係覺都未訓醒已經係噉俾呢條友嘈醒令到我嚴重睡眠不足,訓得唔好就自然唔會夠精神做野,所以今日做野果陣吽下吽下少少野都做到四點幾,當然你俾劉Sir訓多&訓足廿四個鐘佢都唔會有精神做野一樣要做咁耐但不在此討論啦!
「而家嚴正聲明嚴重警告各位同胞呀下!以後一點到三點之間打死都唔好打電話俾我呀招來殺身之禍恕不負責呀下!」


而家夜晚都係無無聊聊又一晚,近來最紅節目係同Rock爺兩個上網搵工,應該係話笑工,上勞工處個網兜個round,可以發現好多公司d請人廣告都係on099好Q好笑。係噉玩。
「喂?係咪請售貨員呀?我見到廣告寫其中一項要求係『對女性衣著有認識」,我對女性衣著好有研究架,屋企收埋好多女人底衫褲!」
「喂?係咪請文武吧?我識耍螳螂拳又懂琴棋書畫,文武雙全,余能勝任哉?」
「係咪請人呀?你地要求小三程度仲要中文打字一分鐘10個字,咁鬼死高要求,點做呀???」
「喂喂?係呀我係打黎搵工架。我唔知你咩工黎,見廣告寫『工作性質沒有挑戰性』,覺得好適合我,咪打黎試試囉!」
「係咪請flash game課程導師呀?我打flash game好Q勁架!使唔使上黎即場示範一下?」
「喂?我上勞工處網頁,見到你地招聘要求係中七畢業流利中英文識普通話豐富電腦知識純熟文書處理兩年有關經驗誠實有禮刻苦耐勞勤奮主動有責任感具自發性喜歡學習能於壓力下獨立做事同願意加班工作,我打黎係想問如果我真係咁X把砲,仲使乜吼你份七千蚊人工仔?」
「喂?係咪請全職溜冰鞋銷售員?我想問呢個銷售員職位係咪賣燒肉架?」
「勞工處寫住請派卡員,請問係咪派好景或者派Chic之堡門口呀?員工買四仔係咪有折架?」
「我應徵做校工架!我想問你地學校d女學生靚唔靚,有冇得洗女廁架?咩話?你地男校黎?唔早講?*#XYZ!!」

上左咁鬼耐,只得兩份工真係好玩/好做。第一份工係:
成人性用品銷售
仲有份正野,就係二級助理控煙督察,即係拎正牌小九人我地最鍾意!要求之一係「流利粗口」!如此正工邊有得唔做?

「仲有咩玩?」
三國無雙?out啦!而家興玩三國無間!話說為助劉備一統天下,五虎將之首黃忠同最弱雞之趙雲決定一齊出征,征途之中,兩人慢慢發現對方各懷鬼胎:趙雲用刀劍、黃忠用弓箭,陣法當然係趙在前黃在後,但趙雲於前方勇戰魏國兵將之時,陣後之黃忠每每暗下向趙雲背中放箭,令其受「誤箭」所傷;又當黃忠萬箭怒射魏國趙氏將領果陣,同樣姓趙之趙雲會奮不顧身衝上去,以血肉之軀為敵方趙姓弟兄抵擋亂箭,間中亦會走到慣於後方支援之黃忠身邊,借「打錯人」之嫌將黃忠撻入前線敵陣之中。二人受對方所累而死之命不下數十條,大家似為魏國賣命多於為蜀國搏殺。勾心鬥角到出晒面,最後連曹操頭馬呂布(!)都做低埋,去到曹操面前,真相揭盅:
趙雲:「我係魏國奸細。」
黃忠:「我都係魏國奸細!」
趙雲+黃忠:「曹統帥!蜀國之中三年又三年,我地終於等到呢一日,返黎同你一齊成就魏國霸業!」

吞食天地第三集,變左曹操帶同趙雲黃忠二人反攻蜀國,統一河山。千祈唔好同呢班友打機,硬膠的。


返到屋企,好灰,點解而家做文化做藝術真係咁難捱
「就算我有錢,都不可能有這種生活。」
亦係呢個案例,同樣係為自己追求同理想撇開生活同世俗一切。只不過最後之下場係點?賠晒自己全副身家,將來生活都成問題之時,仍然唔會有任何人關注一下理一理。又係17/1最後果堆。有時的確要為好多野諗一諗。



31/1/2007 WED

我公司有十三個人,非常吉祥,但今日大部份時間都只搵到十二個人,唔係有人請假今日全公司返齊,只不過係我同會計靚女兩個好忙。大家唔知點解異常地眼訓(又或者講,正常地好眼訓),輪住匿入廁所訓覺,一個入去訓,訓醒之後出返黎,跟住到另一個去廁所訓。所以今日全公司齊人之時間,只有其中一個返到入黎另一個出去「交更」果幾秒,同lunch食完飯兩個人光明正大地撻係度訓果時。


今天星期三,開心,因為唔使開舖,放工即刻飛返屋企,放狗食野之後係時候整整部機。屋企部機死鬼左又舊行XP勁慢勁窒(最近一次壞機前我一直係old-school地用ME架你唔知咩?),又極想玩番C&C全線同迎接C&C3,唉豪埋佢啦執過部新機返屋企。起初諗住反正都出新Windows就捱多陣等出埋先再睇價執貨,但部機壞不逢時又頂唔順執左先算,點知部野買左唔夠半個禮拜就出Vista,我發覺次次都係我買完野之後先至有新野出,好似當年買第一部MP3時呢種科技仲係貴野,執左部韓國野128MB成千七蚊,雖然係貴但呢部韓國機仍然係我用過最適合聽metal之一部可以話一分錢一分貨,點知買左第二個禮拜已經跌價半個月已經減到半價。劉以達隻《麻木》之前猛咁搵,終於見到有隻二手百二唔理貴一貴都即執心頭好嘛,點知隔多唔係好多日就出左remaster版三條搞掂。今次又係噉。我發覺我冇乜幾多次買野唔係灰爆。所以各位想shopping的話記住留意劉Sir動向,假使劉Sir買左一樣野,代表黎緊幾日呢樣野唔係跌價就係貶值。

部機其實冇咩要整,新部機已經入好Windows裝晒driver一駁就玩得,剩番只係將舊機兩部harddiscd野傳番落新電腦度,要抬部舊機出黎>開蓋>external hardisc cable一頭潛入舊機駁harddisc一頭插新機>過file>執file,大佬成幾十激野噉過法閒閒地send一鑊都要半個幾鐘,難唔係難,就係一個煩字加個等字。其實好多時間剩,但開左部手提電腦又冇打機,全屋冇人亦冇怒爆焚機,因為好日唔返屋企,一返到黎電視唔知點解會咁Q多好戲睇,一開電視就大劑連睇幾套戲睇到停唔到。一開先係《蠕洞》,唔知英文名不過知黎都冇咩作用,因為一睇就知係小本經營之作,但小本之中呢套算係較落本架喇,故事係一支探險隊入地洞搵寶藏,搵搵下撞到班超巨型獨角仙,過程係殺殺殺同死死死結局係搵到隻皇后做低完佢只一野炸晒所有蟲加蛋真正陷家產走番出地面發現原來自己一唔覺意走果時貪心左少少偷左幾舊寶石出黎結果死唔去又做左千萬富翁仲順手拯救左地球呢d行貨故仔,知道套戲講乜都知係落本在dCG巨蟲啦,只不過小本就係小本,dCG幾假下佈景道具更爛,係唔好睇架喇但冇乜所謂,其實我幾鍾意睇呢類B片架,係唔掂係馬虎但粗製濫造都有粗製濫造之好睇,"indie"嘛!我真係乜狗屎垃圾都受好爛都忍受得到冇計。跟住有"The 6th Day"《第六發現》,當見到有阿諾舒華辛力加,都知道係就番膚淺的劉Sir程度唔使用腦果d戲。個名已經好宗教啦一睇就知係講人造人,劇情就係講複製人公司一唔覺意複製錯左阿諾舒華辛力加,孔武有力的佢一方面要逃避複製人公司之追殺,一方面想做番自己,冇錯已經估到又係殺殺殺同死死死的劇情結局又係殺晒成間複製人公司d「奸角」再一野成座大廈炸碎,即係故他都係咁行貨但有錢包裝得靚一靚你就吹佢唔脹。見到兩個阿諾舒華辛力加一齊打,令我諗番起當年兩個成龍一齊打果套all-star港產片《雙龍會》,果個年代仲係菲林時代未有電腦同CG,十幾廿年前出呢套野果陣拍到有兩個成龍同一個畫面出現好Q勁架!唔係講笑,我真係有興趣睇番呢套野!跟住仲正連續兩套講音樂,先有"School of Rock",唔使講啦呢套野鍾意rock冇理由唔睇、冇可能睇完會唔識笑唔鍾意卦!電視睇過最少兩次但次次睇都仲係咁好笑咁開心,一定要執返隻DVD,為左DVDdbonus同「Rock & Roll族譜」都抵番晒!呢套戲隻soundtrack同"Rock Star"一樣,又係rock友/metal友必買!可惜呢種講rock講metal之戲實在唔係多,外國有香港亦冇乜機會會上,如果"School of Rock"唔係一套笑片,相信當年香港都唔會有得睇。跟住仲有套《音樂型人》,唔記得有冇上過話,大約幾個月前出DVD,行VCD舖時拎黎睇睇,原來音樂唔係重點型人先係,係一套音樂包裝之黑幫片,興趣唔太大就冇特別留意,今日電視做唔使錢梗係睇埋佢啦,我真係乜狗屎垃圾都受好爛都忍受得到冇計。男女主角係尊特拉華達加奧瑪費曼之"Pulp Fiction"組合,中間仲要有段BLACK EYED PEAS表演有佢地兩個跳舞擺明係tribute "Pulp Fiction"。仲有也哥最愛之The Rock,雖然套戲入面佢做到完全唔似自己係後來先認得出,其他果d冇個識,不過噉先正唔識先唔會有偏見噉先睇得出演技,而呢套戲全部人演技真係一流!套戲一開始講本身做古惑仔之尊特拉華達變左荷里活巨星,個格局似呢套《音樂型人》應該係下集上集會係《影視型人》,但冇睇過上集都完全唔會唔明今集講乜,因為除左尊特拉華達個角色之背景其他野同以前完全冇關係。劇情發展落去,尊特拉華達個partner俾人暗殺,原來個partner本身有間獨立唱片公司,就接手呢間唱片公司投身埋音樂界,原來唱片業又係一個江湖,佢就要同俄羅斯黑幫、hip-hop gangstas同對頭唱片公司鬥法,然後捧紅左一個靚妹發達。初初睇DVD盒劇情簡介諗住音樂唔會係重點,點知睇完之後發現編劇同設計果班好有料到,唔係只表面提一提音樂而真係好多真正音樂同rock穿插,除左頭先講過之BLACK EYED PEAS,仲請到AEROSMITH兼可以客串同台表演,一路睇會學到同睇到好多野,亦因為用到咁多音樂文化同真正音樂人客串令呢套野好真實,睇完會以為真係有套戲入面果間唱片公司,會以為係傳記電影。但就算佢真係只掛羊頭唔多講音樂,呢套片我一樣會睇得好開心,因為編劇好絕好妙但多笑料,由片頭到最後片尾都好睇好笑,中間三幫人馬講數又有黑鬼同你講「黑人對地球的貢獻」講足半個字,題材演譯同拍攝都想做到自己好cult,當然未去到呢個地步啦但就係咁「懶cult」先好睇。亦因為咁「懶cult」,劇情都有點兒超現實左d,好似尊特拉華達個角色點解可以型得有點兒造作,仲可以玩下野就搞掂左兩個敵對幫派,再將一個夜總會歌女捧成全國最受歡迎女歌手,一個古惑仔可以做電影明星再做埋音樂界鉅子咁神?同埋一個雜卒仔有冇可能符碌&醒到呢個地步?算啦拍戲遮,睇戲唔好駁戲,好唔好睇先而家?好睇咪得囉!拍戲遮!好似一連兩套"School of Rock"同《音樂型人》,入面所有「正派」角色都係有實力最後一定成功、有才華最終會受賞識,拍戲就可以咁完滿遮現實就算鬼數啦!



1/2/2007 THU

唔知咩事原來噉就完左一日。嘩死時間過得真係好快。


所以唔浪費時間寫咁多喇,反正你都知道會發生咩事架啦:放工去打舖渣古,上到舖頭同Rock爺兩個一齊上勞工處搵/笑工,全晚一兩個人,聽多次謝安琪,收檔。其他正經野先重要。搞掂返部機,返到屋企第一件事梗係立即打機啦!仍然沉醉於模擬器中,太多童年回憶需要重拾了!死,黎緊幾日仲有C&C,我好擔心黎緊我會打到連舖都冇心機開呀!
本來仲話諗住整番個舊game回顧加攻略篇,仲真係開始cap圖好認真噉諗定寫作,似乎而家唔使喇!或者,搞都搞個C&C全線攻略先!



2/2/2007 FRI

天理循環就報應不爽,
「你都有今日喇!」
老細今日好開心。請左呢條友年半,佢從來未試過好似今日咁開心,因為劉Sir呢條友頹左年半,終於左一日係令老細覺得值番份人工。呢日真係唔知咩事,前幾日/禮拜/月/年都係坐係度等放工果種咁得閒,可能一直都係暴風雨前夕,呢一日終於打風喇,一返到公司開完個會立即做到仆,多到覆晒email再放番demail入folder都可以搞成大半個鐘,一直落得個lunch叫做可以訓下覺,然後坐低係噉做做做做做到六點幾先走得人,仲要係走得超高速非常狼狽果隻,因為走遲半秒分分鐘已經會俾老細or電話or email叫停想走都冇得走。
「請你咁耐,最值呢一日!不過俾成年半人工你先叫做做得一日野,都係蝕X晒!」
所以已經計劃緊離職大行動,今日有個貨車佬上左黎公司,帶來很大啟示。話說幾日前唔知整咩機器時個貨車佬一唔覺意鍘左鍘,成隻手指切斷左(!),好在趕得切入院駁得番,但包到隻手指成個乒乓波咁腫脹,而家個個見到佢實問一鑊
「你隻手指咩事?」
見一個人解釋一次,已經講到廢鬼事講直頭帶定張X光片跟身,一有人問就掟埋去
「自己睇啦!!!」
因為呢單意外,令佢深深體會到意外隨時可以發生,人生實在好脆弱,為左保障自己生活同家人之將來,諗住...拎綜援。諗住遮!計過數,一家四口申請綜援,分分鐘仲搵得多過自己捱生捱死,仲有最緊要拎之前成副身家使晒佢例如陷家一齊去旅行,當然收得埋就更高招啦,噉樣使到家窮屋盡果陣就更「賺」得仲多。
「而家個個貨車佬都係傾呢樣野架啦!計番數,其實真係好抵架,又唔使做鬼咁舒服!」
咦!諗得過喎!反正而家份工咁辛苦!(...)
不過我都忙堸蓿O砟U銀。俾107教壞,而家開始做實習股神,今日點忙都上左網睇睇個市。近來紅爆的美維,小試牛刀入左野美維,入之前本身狂昇,我一入左,個市立即仆直。大家明白點解今日個股票會咁反覆波動最後仲插水忝啦?各位第時想買股票,好易,問我拎貼士就得啦幾簡單!問我就知道邊隻股會跌同幾時個市會跌!都唔明點解d師奶仲肯俾咁Q多錢107使跟佢學買股票!


今日,七點未夠,107&108已經相當憂慮,唔係有冇人之問題呢條問題早有答案,而係
「今晚食邊間?」
之前「上海街長沙街3號」果間新中國,講明先唔係夜總會真係中國菜,可惜第一屆TRHK鋤大七比賽舉辦當中成為大會指定食物供應商之後,第二日立即執左(話時話,今日睇頭條新聞,教院過埋今年俾中大吞埋執喇!證明我真係去邊度死邊度!),逐張外賣紙抽,一係食過,一係真係好難食(例:新明威,得個多字但難食到爆,但我地又繼續幫襯,吹脹),真係諗唔到。
「噉食咩呀?」
「仲有兩間揀!」
「邊兩間?」
「大家食同新之食!」
「挑!!!!!!」

最後真係灰到食麥記呀唉今日幾灰。知唔知更灰係乜?更灰就係當我地食完麥記之後,就有個外賣仔出現。好在今晚仲有d娛樂,大家先唔使悶死,三國無間當然唔少得啦,更正係107,古有姜太公釣魚,今有107打機。姜太公咩料釣咩魚懶講啦,107呢舖先夠經典,部電腦
「可以話壞左,又可以話冇壞,部機冇壞到,係個芒壞左,但個芒又唔係壞左,個芒係壞左睇唔到野,但其實又冇壞睇到野。」
「都可謂『玄機』也!」

部機入面休眠果個掣壞左,個芒持續處於省電狀態,一開部機,咩都睇唔到,但部機冇壞到喎,係個芒壞左咋喎,但係睇真d,「省電休眠」遮,只係變到超暗遮都仲隱約朦朧睇得到,所以雖然全部黑晒好似壞左,但其實又唔係壞左(...)。噉點用?就係問劉Sir借佢果支無敵電筒(呢新年果日去酒吧lum死女果支呢!),跟住「照著」個芒黎睇。嘩呢單野都算係七到經典。為左慶祝107就黎同劉Sir一樣可以七到成佛,今日特別獻出Rock爺同契爺刮二手時刮返黎果隻超cult葉玉卿《全部給你》,正!隻碟其實冇乜野聽(亦冇乜野睇唔好意思),又冇最正之《擋不住的風情》同《我為卿狂》,不過有超靚百摺內頁,仲有「卿卿國際歌迷會參加表格」!搵次影相俾大家睇一齊分享!通常TRHK每次一唔播metal就會有好多人出現,今晚播埋葉玉卿,即刻有個阿叔出現:
「唱緊呢個邊個黎架?」
「葉玉卿黎架」
「我都估到啦!」
「阿叔!似乎你對佢都好有研究喎!」
「係呀!佢d戲我到而家都間唔中拎出黎睇架!」



3/2/2007 SAT

做呀做,做左成朝,而家返工唔再係等放工的日子,而係要諗定點樣一夠鐘立即最短時間內消失廢事老細或者客人有野搵走唔甩。劉Sir都會噉樣講法,係咪感到好唏噓?


今日放工冇得打渣古,要返屋企抬部機出黎,你唔係諗住我會朝早起得切身返工前拎定上舖頭丫嘛?除左呢個重任,仲有另一個重要任務:
"C&C!!!!!!!!!!!!!!!!!!!!!!"
換完部新機裝番個DVD rom,即時買番隻C&C先唔好煩!好在而家出左個DVD版十年大全集,一次過包晒歷代咁多隻C&C仲有bonus DVD送包埋其他零碎poster乜叉,買一隻就夠晒數抵玩仲有排玩!之後唔使問我架喇各位朋友,買完呢隻C&C全集,黎緊水貨再執多一執,相信metal方面我會收一收皮先!打機就梗係聽番本身已經好industrial同好metal之C&C soundtrack啦!而家metal野甚至聽過除左舖頭同出街聽真係完全放棄,睇今日黎到先達買game順便兜埋d二手舖,真係奇多正野執但最後空手而回就知。成隻特集12隻,每隻兩個陣營即係一共12x2=24隻要玩,一個月玩兩隻都未必得,搞掂即係黎緊呢年已經唔使再聽野or寫碟評。更加唔好話上網睇野摷野。睇黎我呢世都做唔到專家。
最冷清舖頭之列,已經包括賣正版電腦game果d。連NDSdgame都可以上網download得到之時,一早已經有得BT之正版電腦game仲有冇人會支持?所以你見而家好多正版game除左隻game要寫得好,仲要靠包裝設計周邊贈品,唔係呢份收藏價值確係好難仲有吸引力留得住各位玩家。搞到而家買正版game似買個盒多過買隻game。但都好架喇,隻game包裝好送多野,起碼仲叫做有人會因為送果d野而買;一隻CD,任你本書幾靚設計幾有水準印刷幾精美包裝點特別點大陣仗,都只係要果幾首歌遮,既然主菜之幾首歌都上網搵得到,剩番果置紙果個殼,仲使錢買黎做乜?

星期六,一樣非常地靜,因為「冇新野」。人又唔多見喎,所以呢日都係玩遊戲的一天。圓桌武士當然要玩啦,呢隻game其實好有禪機,玩呢隻game我摻悟到好多野,假如我第時真係會寫呢個圓桌武士評,一定會同大家分享一下當中之領會(相信各位睇到呢到,都會覺得劉Sir呢條友已經打機打到黐左線要睇睇醫生)。冇野做,有咩做?就係食。今日食左起碼五餐。先有五十蚊遊戲,今次107非常成功,五十蚊執到兩杯西米露、勁好食之蘿蔔糕同一大袋炸野,食到飽仲有兩舊多醬到好似俾辣醬浸過之臭豆腐(激呀),好為作獎勵107朕就委任你成為我地五十蚊基金代言人,以後逢星期五六日所有五十蚊遊戲主持同開支全部由你負責!食完,都係冇人,機又打完,即係要繼續食。食我地最愛的新明威。茶餐廳叫外賣通常加一蚊,但今日唔知點解加左我五蚊。打開個袋一睇,嘩,靚到爆炸呀個碗!係真係爆炸左果隻爆炸,個柯打係兩碗麵,但打開個袋發現只得一碗半,因為其中一碗壓到隻碗變晒形,又勁喎由圓形變左做月亮形居然一條麵一滴湯都冇漏到出黎冇穿冇爛喎吹佢唔脹喎真係!當堂打電話去小九佢:
「喂!你地送外賣搞到我碗麵噉樣,仲好意思收我咁多錢?」
「哥仔,你去d高檔野人地俾d三尖八角形碗碟你用都收你加一啦!呢個我地特製半月形外賣盒,唔使錢架!齋賣設計都唔止收你五蚊咁少啦益左你喇今次!」

新明威呢間野,真係冇一次食係唔使爆粗。



4/2/2007 SUN

渣古07小隊暫時退役,因為有更重要任務:
"C&C!!!!!!!!!!!!!!!!!!!!!!"
收舖第一件事梗係即返屋企,放完狗沖埋涼做埋所有無聊野之後,然後立即install呢個C&C十年大全集!
「正呀!!!!!!!!!!!!」
隻game故事係由二戰開始,一路打到去20XX年,但出game之次序係現代>二戰>20XX。本來係想跟番C&C宇宙個史實年表由二戰打起,不過衡量番時間、難易度同當年回憶,都係選擇由C&C1開始。呢隻game出果時中二三左右,果時一出真係癲架玩到,上人地屋企586玩玩到爆機,自己部486 load隻game超慢唔理照玩,同Doom一樣呢隻係歷史中最重要電腦遊戲,所以揀番由C&C1開始,就係追憶番當年出呢隻game時自己幾咁瘋狂。當年486就算較到最快,隻game都係慢到出汁直到開左超任博士慢動作咁慢,但到而家dual-core時代較到最快,d人車郁得真係好似瞬間轉移咁快,係快到較完之後十秒之間你個基地已經俾人地派大軍掃平game埋over你都唔知咩事,真係快到離譜,可想而知呢隻game係幾咁陳年個系統要求幾低,所以而家睇番呢隻十幾年前經典,遊戲性仍然高企,但係系統畫面聲效全部唔合格,不過我鍾意,鍾意夠old-school,同埋始終係中學生涯之重要一部份(部份紅燈山丘中人會明白,呢隻game橫跨左三年,涉及之人事層面絕對唔止係一隻game咁簡單),就第一集開始玩。拎起手仍然未生疏,好多場面同過場動畫仍然記得清清楚楚,就連動畫入面角色d英文對白甚至可以跟住佢一齊講,果時玩呢隻game就係迷到噉癲到噉。好在而家都唔弱,今日入完即玩,打通宵打到朝早七點鐘,已經玩到正派尾三果關。當年自己屋企冇得玩,暑假時就係噉樣上人地屋企煲通宵,果時為呢隻game勁到係成個禮拜差唔多晚晚都去玩過野,玩一晚之後返屋企訓,訓醒再過去玩通過,打C&C打到自己屋企都唔返,最勁果舖試過一個禮拜四日半冇返屋企。諗番起都high。


我絕對會承認,如果唔係因為要開舖,我肯定打到晏晝兩三點爆埋機先訓覺。可惜要開舖呢。都唔弱,訓到點幾鐘起身,臨出門口再煲多陣先出門口。其實留係屋企C&C可能真係好過開舖,反正都係無人島物語架啦,「冇新野」嘛,呢d場合,當然唔少得新明威。廿蚊一個餐一麵三送加杯野飲,但個麵唔好食d送係得但少野飲又唔係太得,仲耐唔耐好似琴日噉整d月亮碗俾你,呢間野食過咁多次,係冇一次唔使小九佢。只不過小一回事,仍然不斷幫襯。
「又要小,又要食,係咪戇居先你班友而家!」
「其實食新明威只係貪兩樣野:貪佢夠多,同志在小九佢時果份快感遮。真係叫黎食咩你估?」

晏晝因為107懶唔做野走左去的關係,有個幾鐘係108一個人玩晒107+108兩間,107唔走由自可,佢一走,立即多人到仆 - 當然係講緊佢果間啦唔通我果間咩。好在TRHK永世冇人,單睇佢果間都睇到走唔甩,仲要做多幾單,賺得仲多過佢睇果陣,兼仲多過自己舖頭今日生意。可想而知今日TRHK生意幾灰!
「107!不如噉啦,我同你交換,我睇107,你睇108,再加埋鋤大七,相信會對我地生意有好大幫助!」
跟住有Henry出現。
「頭先去左邊?」
「行街!有上到信和!」
「有冇見到阿捷?」
「有!」
「有冇問候一下佢?」
「梗係有啦!我同佢講過見一鑊打一鑊,估唔到走到上信和都見到佢,唔打都唔得啦!」

本身個個都話唔上黎,點知最後一個跟一個噉出現反而變得好多人,當然混吉呢班數量幾多對生意都唔會有任何幫助的,又係得個玩字。今晚大家為左晚餐食乜,費煞思量左超過兩個鐘,結果係:
「食童星點心麵算啦!」
前排上報紙賣到好行果隻話唔知咩化學品定色素落得行得滯食多幾條會死人果隻呢!所以今晚食得寧捨開心!


返到屋企,未打機住,部電腦都未搞掂晒,有隻C&C係度,真係拖延左好多野,不過冇計啦咁正點可以唔玩呀!好多software要入番,入緊果時叫做多番d時間做野,又同大家分享下:



trhK後遺症: 劉Sir化(案例二)
「叫左你地唔好行咁近劉Sir。近得佢多,個人自然會on9埋一份。」



5/2/2007 MON

終於回歸得閒喇! - 相比上星期最尾幾日遮,今日都做到成兩點幾先式清晒野,唉以前全日之所有工作頂籠做到十點架咋跟住就等放工架咋!退左步忝而家!
最開心係晏晝可以落樓。有箱野要寄去南非俾個客,嘩正反正冇野做仲唔鼠落去咩,托箱野落去郵局,落到去排埋隊填表果陣先發現原來我係唔知箱野寄去邊度寄俾邊個,要抬返上公司摷番d資料落黎再寄,好在箱野唔重今日又唔熱!上到返公司,放低箱野,睇電腦,print番收件人同地址,拎番起個箱,走,全個過程來去完全冇人理過我,對於呢位同事大家都化喇。又走番落去排隊,好開心今日條隊咁長要排咁耐,又可以聽多陣歌,搞掂之後行下街再去買雪條食,成個幾鐘先上返公司,老細完全冇聲出。直頭化晒忝啦。


而家皆旺變成完全無人島,冇計,劉Sir係度嘛。
「我去邊度死邊度嘛!」
當然又係圓桌武士啦,同場加送又係走堂唔返學 今日結論係用斧頭佬真係有著數,除左因為攻擊力(太)勁,仲因為有佢份硬係符碌d易出寶物得多。仲有聽下歌仔,而家屋豕真係唔多會聽歌,打機緊要。同埋寫野。碟評就算啦相信真係可見之將來都唔會郁手,手頭上仲有數十篇,我都唔知要黎做乜。爆埋C&C先算啦。段記而家真係留返返工(...)同埋開舖果陣寫,屋企掂一掂就算,太忙喇實在。所以,各位,第時不定期update之情況、N日冇野睇突然一日萬幾字湧出黎之情況,相信會發生得更頻繁。



6/2/2007 TUE

今天又是劉Sir的一天。今日老闆加老闆娘兩個上晒工廠,係年度盛事黎,冇乜幾可會有呢d日子架!上年新年都仲叫做有去旅行可四日玩到癲,但今年生意唔好又冇乜客旅行都廢事去,簡直係苦了各位同事,即係我當自己係老細遮咁多位同事唔係嘛!所以今日難得兩老唔見人,簡直係比新年更加重要的日子呀分分鐘可一不可再!冇皇管的日子,自然要以冇皇管的心態去對待,今日擺到明係遲到,返到公司已經差唔多九點半,但我算cheap架喇會計靚女仲勁係奉旨遲到,扮晒野要去銀行做野,跟住再行埋街買埋早餐先至返黎,仲要大大聲
「拿我冇遲到架經理!今日我係出街做野,你吹我唔脹!」
今天早餐係大快活,當然係屈我請啦。幫我叫左個餐肉火腿腸仔蛋通粉,揀呢個就係貪個餐乜都有好似好多野食,點知送到上黎得個腿通其他餐腸蛋乜叉都唔見。
「哦!送漏左喎!」
「你自己返黎果時偷食晒咋卦咪扮野啦!」

唉灰到爆呀呢度蝕左起碼十蚊,更灰係靚女叫果個魚柳滑蛋超正,嘩魚柳已經係一X流(請容許我用粗口去形容),大快活d炒蛋真係炒得好鬼死靚真係好似個名咁滑,單係隻蛋已經正過晒我全個餐!好鬼死後悔呀我!
「好在我之前食大快活都係食呢個魚柳滑蛋餐,先冇好似你噉中招!」
「頂你明知咁正就唔好幫我呢叫個通粉啦!」

食完早餐出返黎,有個經理已經唔見左人。
「經理去左邊呀?」
「去左食煙。」
「食煙要去咁耐?」
「而家新例後樓梯都唔食得煙,要落街食喎!聽佢講佢慣左去銅鑼灣時代樓下食!習慣呢家野又真係好難改!」

我都唔輸蝕,下星期就過年,今日又咁得閒,
「經理我有事啟奏!見有時間我又唔做野,我決定落去飛番個靚髮!」
「你落去吞pop咋卦睇你條友!」
「又唔好噉講阿經理!我去改善一下公司形象遮!」

呢朝返黎真係只為打卡同食早餐,當然啦我地呢d吞pop都吞得乾淨d,臨出門口製造定不在場證據先。點整?你唔識點樣set到你部機定時自動send email咩?我就識喇呢招好無敵架,我好多呢d扮做野又真係出到email但實際上係坐係位度做自己野嘆世界之終於偷懶絕技,我入左呢間公司之後鑽研到好多呢d絕招出黎,相信做多幾年可以出書同開班授徒!
「咁犀利,教我得唔得呀?」
「教左你,你篤爆左我,我仲邊度有得吞pop?」

十點幾行到出旺角,死,原來髮型屋係十一點先開門,仲有大半個鐘做乜好?使乜諗梗係新之城啦!
「渣古07小隊,出擊!」
今日冇左d無能隊員i.e. 107,當堂順利好多,而家第一關可以完全唔中招,跟住直踩到過埋不死身之第四小隊,跟住就瓜柴,因為之後果d全部老屈on9的。同埋呢隻game雙打永遠著數過單打,因為幾多個人玩敵人一樣係咁多隻一樣係咁多命,即係雙打的話絕對係著數最少一倍,起碼雙打易出d修羅雙連擊先啦,打大佬掟兩個手榴彈就得,但單打最少要三個先得仲要三個係非常符碌先做到。終於玩到十一點鐘,行下行下求祈搵間飛左佢算,阿師傅勁呀半個鐘搞掂晒夠快手仲要只收六條抵玩呀,咁早飛完,即係仲有時間再落新之城打多舖啦?打打下,大劑!有個客打電話黎!拎住個電話,我都唔知點應佢好。
「喂!我係我係劉Sir,而家我好忙,唔方便接聽你電話...嘩飛得咁快吉你老姆丫!...我唔係鬧你我鬧緊隻吉姆遮佢射飛彈射中我喎!...唔係呀我真係唔係鬧你架唔好話俾我老細聽呀我知錯喇嗚嗚嗚嗚嗚嗚!!!」
返到公司已經十二點半,各位同事好關心:
「你飛左髮喇?你真係飛左髮?我真係唔覺喎!」
呢個情況次次飛完髮都發生,雖然好似呢兩年計埋呢次我平均一年先飛一次。
「真係飛左架!」
「真係?有咩分別呀?」
「剪完之後,d頭髮長左囉!」

可能當局者清啦,我真係覺得&睇得出個頭有唔同左喎。但全公司一致認同,劉Sir呢條傻仔俾人昆左。
「飛呢個頭幾錢呀?」
「六十。」
「噉都叫做飛左?早知你俾六十我,我同你飛好過啦!」
「噉又唔得,我唔會俾六十蚊你。」
「點解呀?」
「我搵人飛,俾人呃左都唔知仲俾人呃得好開心,但你幫我飛,我就知你實會呃九我!」

返到黎呢個鐘數已經差唔多食飯,唔係指一點呢個官方午飯時間,而係劉Sir食飯時間即係anytime,各位朋友仍然努力工作時,一向不會工作的劉Sir已經食緊佢的豐富午餐,食d乜自己睇番樓上29/1啦,公仔麵呢dcheap野真係百食不厭。到真正食飯時間果陣,我已經食晒自己d野,只係係度等各位女同事繳納貢品,跟住就訓覺,訓到兩點幾醒,終於開始做野。開一開番機,全日得兩封email仲要係唔覆都得果陣,正,拿唔係我唔想做野呀真係得閒到想做都冇野好做呀!清埋少少野又send多幾封無謂email,再次回復退休生活。有d咩好做?冇。無聊到幫部電腦setup,搞搞下先知原來而家個MSN仲係超舊version,反正冇野做update埋先!噉又可以online了,第時日頭見到我online,唔使驚奇!真係劉Sir黎架!見到佢時記得問候下佢喎!當然唔係善意果隻!
做做下野,又要食。會計靚女屈到經理請食下午茶,
「兩個老細都唔係公司,呢d日子一年一次咋!上年就話佢地去旅行遮,今年過埋呢日再冇好日子過架喇!經理應該捐番幾舊水出黎萬歲同我地做番個紀念啦!」
就係噉,無端端多左個花奶布甸食,正。未完喎呢餐下午茶。琴日屋企有袋栗子,知道今日會大把時間,特登拎返黎慢慢碌,跟住仲有lunch時各位同事食剩果堆物資,嘩食到我都唔想郁呀真係好鬼多。四點幾收到工廠來的風聲老細就黎返到,唯有返埋位依依不捨地做野,再過多個零鐘就冇得再風光喇!不過絲毫影響唔到各位同事已經放左工的心情,會計靚女仍然訓覺,我仲係上網玩。搞左個MSN真係開心好多,全日就係不斷地同各位朋友吹水,特別係台灣的朋友。真係唔知點解,夜晚好少撞到,但晏晝一online,嘩差唔多個個都係晒度。
「今天不用上班嗎?」
「我還在公司。今天老闆不在,才可以做反。」
「我也是。」
「呵呵呵呵。」

傾呀傾,好過癮好開心。琴晚無人島 - 應該話二人島 - 其中一個話題係:
「香港人聽野,係咪真係及唔上大陸同台灣?」事實上的確係絕大部份人聽野之認知同態度同中台樂迷仲有一段大距離,直接令香港音樂發展有排都追唔到中國甚至台灣。一來,人口已經冇得比啦,你點用香港一個城市,同台灣甚至中國成個國家黎比較?其實亦唔使講咁多,因為已經有一個好簡單好明顯之事實:
「香港人上台灣或者大陸網頁同forum學野,你會見過甚至做緊,但你有幾可見過大陸人或者台灣人黎香港學野?」
已經答完。有人會話:
「都唔係丫,大陸同台灣都有人睇香港幾個碟評人d碟評喎!」
或者係啦。今日同一位老坑傾左好耐,真係一個老坑,來自一隊好老之台灣death metal band,睇過佢個網都會知有幾老,網上傾左陣,遲d呢個網可能會見到劉Sird野出現。唔係自誇,我敢講我寫d碟評,香港以外確係有唔少讀者,甚至多過香港都唔奇。又點?因為對好多香港聽野之人黎講,劉Sird碟評不值一提,
「超!邊度係佢自己寫!上網打外國d網人地d碟評再譯番做中文咋嘛!」
而唔會調番轉諗,一個香港人可以寫到國際程度之專業碟評。所以劉Sir一向低調。
「你話係咪係囉呵呵呵呵呵呵。」


行運真係行開有條路,收埋舖夜晚上到舖頭一樣咁開心,唔止有番d生意,仲sell到好多個「有冇(band名)」之客人佢地唔識之新野。最後一個客,坐低左成個鐘吹水試野,本身目標只係KATATONIA,點知試下試下,搵到有隻dream pop野,又鍾意喎,即再磅多一舊水執埋。
「你住邊架?」
「紐西蘭!」

唔怪得。最少本地之香港人,真係冇幾多個可以有咁開明咁肯接受新事物。


這一天,絕對可以可成另一天劉Sir的一天。可惜我懶玩懶寫。因為,要打C&C。
「......」



7/2/2007 WED

相信老細相當了解劉Sir呢位員工,知道佢有幾頹廢有幾唔做野,所以今日奇蹟地兩位主持人有大半日係唔知去左邊度,所以未安頓好冇皇管心情的各位同事今日繼續viva,除左劉Sir之外。佢日日都係冇皇管viva緊架啦。正又係冇乜野做,今日繼續新發現之MSN係噉同同事玩。原來公司入面大家一齊同MSN吹水唔做野好開心架!
「點解咁好玩之一回事,我入到黎做左成年幾先會發現???」
是日重點娛興節目,係劉Sir表演點樣用一支牙籤食晒成碗公仔麵。(...)


唔需要問,放工直接飛返屋企開機C&C係意料中事大家都估到。好似冇同你講,琴晚臨訓前(「兩三點」),訓都唔訓搏埋條命打爆機先。噉就爆左正派而家開始玩埋反派,計番其實第一集一個陣營真係可以一日爆機,當然係好似我噉由朝煲到晚玩到通頂噉款先得啦。而家C&C全線完成左1/24。爆晒全線可能係大半年之後,不過爆左都唔代表會聽番metal,因為果時,C&C3已經出左,又要煲。(...)

自從C&C回歸之後,死每天閱報的良好習慣已經不再堅持了,因為分分鐘睇一份報紙的時間夠爆一關C&C呀。好在得閒無事都睇左d正野,反正打開機,同大家分享番上個禮拜一篇報紙,各位old-school友慢慢enjoy。一面睇一面緬懷一番。
「假使你睇完呢篇文係唔知講乜或者冇咩感覺,唔好意思,你童年甚至人生錯過左好多野。」



8/2/2007 THU

我好想向老細申請幫公司部機裝番隻C&C。睇下我,九點半返到公司(條友已經當左自己唔使打卡),十點鐘已經印印腳食早餐再等食飯,全日就係不斷地上網搵C&C攻略同秘技,同埋狂online吹水,估唔到得閒的日子都咁難捱。
「老細,唔裝番隻C&C,我真係會悶死架!」
近日好多朋友對劉Sir非常好奇,因為呢條友「返緊工」,都可以九點幾已經online見人。可想而知幾得閒啦我?好得意,好多港外朋友都係晏晝先會見人返緊工時先有時間傾偈,之前係台灣老坑,今次個老坑來自新加坡。大家一樣日頭搏份搵食工夜晚搞音樂,不過果邊情況好d,起碼唔使自己貼錢貼都冇話要貼咁多先。underground metal度度都係捱架喇,不過佢態度比我冇咁執著,好多香港已經睇到好灰之人同事,佢只係睇到化。可以睇化某程度上都係一種福氣,因為市場唔同睇野都唔同,唔係個個市場叫做有咁上下大同接受力可以支持到。
"Some kids think something they know are 'true', are 'gods'. Well, the real metal people will know. So actually we don't even have to bother. Just let those new kids grow up and finally realise."
呢d說話,其他市場講,確係可以講到,但香港好難。海外好多地方,d人係越接觸音樂,越會發覺自己渺小而世界偉大,所以會嘗試好多新野同追番好多舊野,香港地情況調番轉,一路聽野,音樂世界變得越小而自己變得越大至大過世界,難免好快到「最頂」,停左唔會再向前同向上走,又或者擰番轉頭睇睇諗諗。所以同一番說話,外面可以講到,因為確係有可能發生;香港地,講緊果陣好型,但講完之後就收得皮。


夜晚,當然係好得閒啦,但今晚冇打機亦冇上網,因為有正野玩:
「出黎啦!地震、鐳射鳥!」
107終於再有番d用處,令無人島島主劉Sir不至於悶死。有冇發覺今次上次,兩次開光大典之共通點係乜?冇錯,就係兩單野都係發生於皆旺108。可想而知而家開舖係幾咁得閒。
除左玩變形金剛,今晚另一個節目係Rock爺同大家分享「七十一員工培訓指南」。聽完之後,發覺七十一呢間野絕對值得入去做,錢唔係多又辛苦,只係為左個所謂培訓課程,無論內容定講解定教材都係笑到爆咀,值得為左呢個training申請。
「找錢給客人的時候,謹記要雙手奉上。」
「如果係找銀仔點算?」
「找銀仔的話,以兩手中指夾穩硬幣,再遞向客人。」


 

你知我返到屋企都係C&C架喇。而家C&C1正派爆左,邪派已到尾二一關有d瓶頸唔記得左點玩,試極都過唔到,谷鬼氣,轉玩第二代先,起碼最開頭幾關易玩d,唔使比人屈到我屈番電腦 - 我諗住遮。點知原來一樣咁難玩,第三關已經俾人恰到死死下。嘩好灰喎而家俾我贏番舖得唔得先?
實在玩變形金剛同C&C玩上腦。而家成日係度諗:
「會唔會有機會出變形金剛版C&C?」



9/2/2007 FRI

今日返工,真係只為左a)打卡 b)食早餐 c)應付例會,因為要奉旨出街,同上年一樣,今年五月又會過美國出差(即係渡假啦),今日要過灣仔貿發局果邊幫展覽揀定個靚位,十一點鐘先夠鐘但十點幾已經閃左出去躝下街先過灣仔,即係唔係躝街同早多少少出黎打多舖渣古都夠時間。揀位呢家野,都係咁多間公司坐係度,抽個籤再剔要邊個攤位就得三個字唔使,因為公司英文名字母關係年年都係最尾一個抽籤,上年一唔覺意成班師奶留左張一號俾我噉就唔好意思第一個抽左最靚果個位,今年冇咁好彩喇尾二先到,點知各位朋友非常禮讓,揀黎揀去都揀唔到本身我睇中最好果個位,噢一唔覺意又搞掂。之後當然係即閃啦唔使留番d時間玩咩!今日有個重要任務,就係回程時要過信和果頭間幫各位同事拎大陸就黎上試果間唔知咩果汁份表,油麻地落車又經信和,自然要上去探探阿捷啦!
「107!我可以話你知,阿捷條友今日終於有準時開舖喇!」
順便,唔爭在,有好野劉Sir當然唔會忘記各位契弟,認購表格即時送上給準備發大財的107。
「唔係我對你好!係話你聽,今次入股果一百蚊手續費由我袋遮!」
之後仲可以去打多舖渣古先回程,幾free今日!旺角行番大角咀,仲可以睇睇我間新舖忝!
「咩新舖?」
「呢間!」
沿途有好多好野食,買左d腸粉,五蚊俾足一兜你當飯食都夠夠晒抵食;之後七仔買魚蛋,又係七蚊十粒仲要好食果隻食到飽,好唔好彩見到「乜七十一都有薯蓉食?」手痕叫多杯,單係呢度已經等於兩餐咁滯,好飽。仲未計正餐果餐喎。今晚公司仲要食團年飯喎。飽到仆直今日,就算由大角咀行路過灣仔來回都補唔番。

食完個飯,一樣咁正,不斷地做自己野,上網同MSN當然唔少得,玩下玩下就五點幾走人。七點幾先開席咁早黎其實好無聊,一大班人係度show hand(諗住)贏做莊的老細錢,我就唔太好玩呢d野,都係鋤大七最好,不過唔係太好意思介紹各位同事玩呢個咁好玩之遊戲啦!反正今日勁多電話,順理成章就出去躝街。今晚團年飯間酒樓係公司附近,對面有檔泰國野賣串燒,日日放工過皆旺都會經過,但係年半黎都冇食過,呢晚咁得閒就試下啦橫掂幾有興趣,一試就大劑,十蚊三串有豬有雞仲要肉同汁都超好食,食一次就上癮成日借d倚返去酒樓又走番出黎食多串,死呢檔野仲日日都會行過忝點算?因為班友賭左好鬼死耐,夾埋幫襯左兩三次,賣串燒果個見同一條傻仔居然短時間內出現三次仲要次次都係食串燒,頭上出現一個很大的問號。
「食咁多串燒咁豪?」
使乜驚,有老細嘛。我地呢d一係唔賭,一賭就賭大佢,睇準老細個勢幾時弱立即掟夠一舊水出黎,廿點贏一舖回本,仲一唔覺意帶契埋坐我隔籬之經理賺多兩舊水忝,旺財童子嘛。
「真係唔玩?一出手就贏一大筆喎!」
「我唔慣贏咁多嘛!贏到谷爆莊落左你面就無謂啦老細!」

噉激流勇退割禾青先可以流芳百世。唔係舖舖咁符碌嘛,即係今次贏到先可以咁串遮輸左仲敢係度寫咩仲唔俾同事笑足咁多年咩呵呵呵呵。
去飲我一向冇啖好食,因為唔多鍾意食呢d酒樓菜式,我鬼佬黎要食西菜架嘛(107曰:「西人食西菜至真!」)。冇咩食過野即係頭先食串燒都夠食啦,成晚都係同返左大陸做野果個同事吹下水,難得公司團年飯今日專登返落黎,再順便見埋工 - 呀應該調番轉/話專登請假返香港見工再順便夜晚黎見見我地(係我遮)。今日見份醫管局工,first in先做兩份筆試,兩個鐘一中一英各答二千字,d題目呢算啦讀過MBA的佢都唔知講乜,全部係AO level之題目(AO者,公務員中要求資格最高前途亦最好職位之一也),但又俾佢符碌過到,之後second in係全醫院最大粒果五個圍佢一個口試問足兩個鐘,同未知請唔請已經知道呢份工肯定係做到隻X噉款,先至得十七K,即係同我教書一樣,但同酬不同工地會做到死,突然間覺得原來我可以選擇教書係好幸運的一回事 - 但唔教(住)啦。呢個年代搵錢實在太難,打工又辛苦又唔會搵得夠多,除非自己做老細或者錢搵錢。搵食艱難矣。


九點食完,當然係立即走上皆旺啦。事實證明,我唔係度,呢一間先至會係舖頭,今日唔係我睇係肥仔睇,立即,勁!
「算啦劉Sir你係時候收皮喇!」
其實返到黎,都只係為左一樣野遮:
「梗係新之城啦唔通新之食咩!」
本來07小隊計劃再次出征,點知是晚高手雲集,最後變左Let's Go Jungle,上次已經爆左,今次仲玩多次為左兩樣野,一來中間果關有得揀兩條路,上次揀果條路可以玩船槳打青蛙過癮到爆,今次有超高速滑水同丫叉打蜘蛛,易玩d不過講過癮梗係另一條路啦。另一樣係最後大佬打死同唔打死會有兩個ending,上次做低左佢出good ending,今次唔殺佢,個band ending係男女主角立即散拖,同埋理所當然地留埋下集伏線。點解一殺唔死個大佬就散拖?完全唔明。就好似我唔明點解今次玩我係狂死係噉甚至一出黎就玩完,但107可以我con兩三舖條友先con一次,因為隻隻野都係打我唔打佢,又有人見死不救灰到仆(107曰:「人七被人欺!」)。有傻仔睇自然有觀眾,今次死得仲多過上次,亦即係觀眾數目正比例增加,相信我地又會上多次Fight Club。之後搵無聊game玩,無聊到玩篤篤機仲要係玩問答game,d問題用中文譯已經冇可能會識,再加埋好多問題係無聊到冇可能會識,係噉輸,但兩條友又係噉兩蚊兩蚊噉玩,夠晒戇居。跟住玩Para Para,就發現玩問答非常唔抵,跳Para Para一樣係兩蚊抵玩弱爆!真係煲得過架呢隻game,假使唔會有咁多靚妹霸機同跟機的話。最後終於可以07小隊,d高手走晒我地呢班魚腩先敢出手嘛。單打呢,就確係可以去到好後起碼過埋不四身之第四小隊,但一搭埋d隊員就...
「似乎我地研究點樣煲爆果隻篤篤問答容易過打爆渣古喎!」



10/2/2007 SAT

嘩點解今日可以咁多野做?多到放工都做唔晒星期一返到黎仲要繼續?我呢d幾年都唔開一次單之小小sales一個,居然突然間有幾張單仔,即係單唔係大但細單唔係單呀唔使做呀!所以我地呢d員工好惡架!d客冇單落,小:
「你唔俾生意我公司做,我邊度有糧出呀仆街!」(好明顯最後果兩個字現實中條傻仔係唔敢講出口)
d客有單落,照小:
「頂你呀!你落單?落單咪即係要我做野,咪即係做死我?」(同樣地,第一句出街時係唔會出現的)
做劉Sird客,真係慘。


收工第一件事,即時仆上舖頭,千呼萬喚,終於有喇,新貨:

To Mega Therion
勁多thrash野,仲要隻隻都係經典,同埋 - 最重要 - 係德國thrash。希望(德國)thrash呢家野未潮完啦。而家thrash野已經堆到行幾咁多,如果你話要thrash野而仍然話搵唔到野,不如你直接講你想要咩睇下點入好過啦。
睇左貨單個名,都知道今批貨重點係THERION新碟。同上次一樣又係孖碟,上一隻激得滯唔係一聽就鍾意果種,真係聽足成年先至浸到入去,但呢隻交響d又勁progressive (rock),好多歌好epic好high,好大機會係"Theli"同"Vovin"之後最愛THERION大碟,可以好成點?係好到聽完之後,我會覺得呢隻先至係THERION最成功最完整之"opera metal"碟,以前果d只做到將歌劇之音樂性質加入metal,但呢隻係真正做到有歌劇性之metal。好複雜,唔緊要,我都唔多明自己講緊乜。第二重點係AHAB,想知咩黎睇冷爺講乜啦相信今年內我都唔會再寫碟評 - 或者寫埋謝安琪先收筆啦呵呵。第三重點,well,大大隻字寫左啦。而家出到第二版忝,入左兩本,相信有一本又係入俾自己。第四重點,好多人都問:
「做乜加價?」
呢個係一個商戶永遠面對之難題,你只要跌價,個新價就會成為好多人價格標準,一升返去原價就實會俾人鬧,亦即係當物價上升時,賣家反而只可以逆市場繼續減價先可以留得住d客,除非係必須品同市場夠大,metal同唱片好可惜兩個優勢都冇。之前做到七五折,相信係正版極端金屬全港最平(請唔好用sample或者以價壓市之metalcore同nu-metal相比,因為根本冇得比),問題係本身唱片利潤已經唔係高extreme metal市場又冇幾多客路,做七五折已經賺唔到幾多,成本增加之後,真係冇可能做到七五折,因為莫講話賺連回本都未必得。今年第一份新年禮物就係,差唔多間間唱片公司都宣佈加價:大公司見metal越黎越搵到錢,自已吊高黎賣;諗住細公司成本低d可以賣平d?唔好意思,同好多人諗法調番轉,細公司而家生存比大公司成本同開支高出好多,其實唔難諗到,你覺得攬住一隊band印五千隻碟起碼賣三四千,同攬住一隊band印五百隻碟但只賣得出十份一左右,邊樣成本高d邊樣利潤高d?所以你可以見到TRIVIUM可以賣到八九十蚊一隻而EMPEROR要百三四蚊一隻,但會揀TRIVIUM之人肯定會多過EMPEROR,除左因為名氣(認命吧,「英皇現象」唔止出現於香港音樂/流行音樂,metal入面一樣有「英皇」的,各位聽metal但鄙視pop同聽pop卻又不自知墮入「metal界英皇」媒體陷阱的朋友),仲因為價錢,一隊身邊個個人都聽個個都話好又賣平d,斷估正常人黎講唔會寧願選擇相對少好多人提起但價錢要貴幾十之EMPEROR卦?當metal越黎越大路果時,真正之undergrond metal只會越黎越難做,只要一涉及商業成份,細公司註定會俾以本傷人之大公司打壓。上兩年美歐亞地區已經執左幾十間細 label啦你唔知咩?有人問過:
「幾時會好似以前噉個個禮拜都有新貨呀?」
正正一年前之06年2月係開舖咁多年黎之經典,果時真係超恐怖一個短短二月可以每個禮拜差唔多必有兩批貨,咁耐以黎除左九龍城時代都好耐冇發生過。之後年尾搞騷收少左好多野,其實今年開始係做得番個個禮拜六有貨,只不過有時太underground我都廢事post出黎,好似上個禮拜六其實到左批俄羅斯metal野,不過,算啦,因為而家情況同以前一樣,可能仲會有人記得劉Sir回歸TRHK之前果年,可以兩個月先得一批貨仲要全部都係超underground同black metal,可以四五日一單生意都冇,即係由大路慢慢循序漸進入underground冇人欣賞之餘亦冇人會理,到回歸之後慢慢「大路」番,先慢慢起番去到可以好似上年二月如斯光景。但跟住落去,開始慢慢入番多d玩得好但香港冇乜人識之band同underground band/新band,因為理論上聽音樂係會越聽越深入,正如好多人當初會選擇metal,都係因為聽到metal同接觸開之音樂唔同俾到自己感覺先會投入當中遮,所以TRHK咁多年都係由大路野到好唔大路野全部都會keep住,就好似BloodKrishna所提,係用一d易接受同出名之樂隊慢慢帶人入extreme metal,只不過試過咁多次,結果都係一樣,咩結果唔使多講啦。所以下一次「大路」化,可能真係連metalcore同nu-metal都入,又或者唔知點解突然個個都開始搵果dsludge同易接受化左之sludge band,只不過按TRHK之入貨傳統,入到返黎果時果樣野應該已經興完,例子請睇睇thrash metal。只求鍾意見入underground野時唔出聲但見入pop野時踩到盡的朋友,到時可以高抬貴手就可以了,例如唔好見入左TRIVIUM第一隻碟之後有野講噉啦。(但有趣地,冇乜人會睇番諗番,TRIVIUM出果隻碟時仲係半underground未成名果陣,問下聽TRIVIUM的朋友有幾多知呢隻碟咩料就知。)



11/2/2007 SUN

今日同琴晚一樣,又係開門唔係我因為走左去食飯(今日屋企食飯檯號係107夠晒邪呀107),又係肥仔幫拖睇上半場,又係肥仔座鎮立即生意興隆一見劉Sir立即食晒屎。大家又係果句:
「劉Sir你都係收皮算啦!」
大家仲未吸取到教訓,今日仍然係新明威的日子,即係唔係想揀新明威架,唔知點解新旺呢間全旺角最旺外賣居然打足成晚都冇人聽,可能繼新中國之後,又一間俾我地(係俾劉Sir遮)食到執左笠。琴晚都係食新明威,當然係食到個個狂小啦,今次叫佢地,終於似番d樣喇d送整得真係幾好食,雖然個麵仍然係食晒屎噉款,叫個餐好似真係只為食送同飲野。都係小架喇,小少幾聲噉遮。
「成日小,又仲叫佢地?」
一來,之前都講左啦,食新明威都係為小佢果一刻之快感咋嘛,二來一個餐三送一麵加多杯野飲又真係好鬼死抵食過下口癮都開心啦。三來,就同新中國(甚至新旺)一樣,就係因為咁唔妥新明威,我地(sorry又係劉Sir一個遮)決定食到佢執笠。相信我地每人食/小多四百九十幾次就會成功。

呢晚人少但更好玩,Rock爺有絕版之高達W電影版隻soundtrack single,係曾經好興果種長條形盒3" CD兼係特別版,以前尖沙咀潮流地帶有間賣日本野好多呢d日本single賣特別多game同動畫,有高達又有FF7王菲首"Eyes of Me",果時唔識野冇買,而家先知後悔。呢隻soundtrack single係電影版主題曲"Last Impression"三個版本加多首改編版"Just Communication",電影版果首到而家都冇乜印象,始終電影版唔會睇咁多次同電視版兩首"Just Communication"同"Rhythm Emotion"實在太勁,呢首"Last Impression"係咩樣我都唔鬼知,三個版本短版同卡拉OK版呢d唔理啦,原版原來好勁地成七分半鐘咁長,唔係差不過搵首慢歌做主題曲已經輸蝕左啦,再加埋首編曲同歌詞都改到唔知點噉的"Just Communication",有d失望忝聽完之後,唯一正就係貪首野夠長。高達W咁多首歌都係TWO-MIX唱,有條問題成日想問,而答案亦永遠係同一個:
「除左高達W呢幾首歌,有冇聽過TWO-MIX其他歌?」
「唔識呀!」

跟住有阿捷同學同大家分享佢對日本鹹game同AV動畫之濃厚興趣同深入研究,即係無論電子遊戲市道幾差都好,擁有龐大市場之鹹game點都唔會受到影響,「生活必須」嘛,同埋開發之時間同成本絕對具經濟效益過其他任何種類遊戲,即係美工果班畫得靚就得啦隻game系統點冇乜所謂,你唔係真係諗住「玩」鹹game丫嘛?其實我幾欣賞日本製作果d鹹game,唔係因為鹹,而係因為靚,當年螢幕制式發展到VGA 256色,歐洲同美國冇幾多間仲會用EGA 16色黎整game,大佬色數差咁多倍點比丫,但日本仔就係吹脹在仍然堅持左好長時間用EGA整鹹game,但反而你會覺得鬼佬dgame係16色整日本game先至係256色,d美工就係咁好。估唔到劉Sir都會講呢d野?雖然我唔玩鹹game,但對電腦game都有過一番研究,你同我傾鹹game我一樣同到你傾架,即係劉Sir個樣onon99,但呢條友你估唔到佢架喇。
好可惜今日少左個主角,就係107,因為要返大陸wet,點wet法就唔好意思係度公開啦,但我地唔會歧視重色輕友的損友107你放心,雖然我們的友誼受到考驗,我地大人有大量係唔會計較的,但提定你先隻尤特龍我唔會俾錢架喇。



12/2/2007 MON

日頭發生咩事懶寫喇請各位自己想像(唔難丫),夜晚先緊要。一收舖連渣古都唔打,即時仆上舖頭,因為:
「張.大.導!」
好難先見到佢架,大佬做得導演工作時間幾唔穩定先得架,又成日要去外國拍旅行特輯,以往可以半年甚至一年先見一次,但呢排密左個零兩個月已經見一鑊,點解?
「唔好撈囉!本身話亞視搬去大埔,而家都搬唔到啦!係噉縮人,仲未炒住咪做住先囉!」
因為唔係多機會上黎,每次出現,實會執一疊碟返屋企聽,買metal野俾自己聽、買gothic野俾老婆聽、同買其他「soundtrack」做野用,佢一聽係諗到影像先,諗下點樣將聽到之音樂套入節目畫面之中,就好似SLIPKNOT夾越野電單車、ORPHANED LAND夾埃及旅遊,所以睇亞視有樣好就係間唔中有metal野聽,遲下會聽到Derek Sherinian同THERION完全唔出奇,會有更多唔知咩之darkwave、電子、gothic、folk、jazz同metal野,唔使問架喇都係佢衰啦搞到亞視咁嘈。見執得咁雜,都知道又係狂掃$120三隻果堆啦,你要搵band、搵名的話,呢度絕對滿足唔到你,但係如果齋為聽歌,老實講,真係有好多寶藏等緊你。但相信冇乜必要再提,因為咁耐以黎 - 係指大半年前開始擺呢個特價專櫃到而家 - 真係會去搵會去研究呢個架dband,只得兩個人,一個係個老豆,一個係張大導。其他,大多偶一為之。所以呢兩位老野都好開心:
「好在而家d後生仔唔識野!咁多正野又平,冇人同我爭可以慢慢摷好野出黎,真係開心!未必隻隻都好聽,不過噉樣搵下搵下搵到d野自己鍾意同好聽果份味道先係最享受!」


張大導走左之後,就出現走堂的阿捷,
「一個禮拜五日走三日堂,我都唔明你仲讀書做乜!索性退學算啦!」
仲有阿Ant,混吉者唔需要理。呢晚終於有新野玩喇,有Rock爺提供之紅白機熱血系列全線,唔知咩黎又只有為你嘆句生不逢時,想當年八十年代打4bit 8bit機之朋友有邊個會唔識熱血?可恨在呢個經典系列維持到超任初期,間公司就執左,熱血系列從此絕跡,可恨也可怒也。今晚試過咁多隻,除左行街果隻元祖《熱血物語》一流之外,最正果隻,居然係冇諗過會咁好玩之《熱血冰上曲棍球》,好玩在我玩得超勁係噉怒炒阿捷哈哈哈哈。隻game四對四賽事期間可以打人,執到波又可以儲氣出超必,今日俾我搵到隊超勁一出招超必一野掃死晒身邊所有敵人再射球射到連龍門都飛出觀眾席,今日皆旺商場一樓充滿爆笑聲同爆粗聲,都係多得呢兩條友。嘩大劑喇而家開舖真係越黎越唔似開舖,幾時正式轉營五蚊三個字?

今日最神奇,甚至可能係今年最神奇,係有個街客係TRHK門口徘徊左幾次,最後終於入黎,問「播緊呢隻咩黎」,係THERION新碟,唔知咩黎,但即磅$150。問佢,未聽過metal、唔識邊隊THERION、心頭好勿論價錢,好聽又遇到,唔使諗咁多,即入。真係架,好多時我都覺得,做街客反而仲易過做聽開果班客,因為好多野聽開果班反而做唔到。



13/2/2007 TUE

今日奇蹟地神咁早起身,八點未夠已經彈起左,難得今個朝早有野做嘛,又拎野俾人又有人要見,兩個鐘頭原來可以做到好多野原來可以好充實。最正一樣係可以以公事為名名正言順地遲到,做晒野之後仲可以周圍躝下,去銀行搞下野,打多舖渣古都仲得,又可以去七仔篤篤魚蛋(七記魚蛋真係食過咁多檔最好食呀),十一點先返到公司,施施然果隻。
「唔驚俾老細小咩?」
其實都唔使咁早架食飯前返就得架喇,點遲都冇人鬧,因為新年公司會過擺年宵,今日要調動人手過去整攤位(當然唔包括頹廢的我),公司是日處於半冇皇管狀態,猖狂呀猖狂。又係瘋狂地上網、寫野同玩的一天。今日由街到公司都係狂聽PINK FLOYD,由"Dark Side of the Moon"聽到"Animals"再加埋已經「唔多PINK FLOYD」但我幾鍾意之「PINK FLOYD臨解散最後一作」"The Final Cut",每隻起碼聽左一次,迎接定後日Roger Waters演唱會。唔係好多progressive rock band會成日拎出黎煲,一黎我膚淺啦progressive野對我黎講太深奧了怒啡怒炸唔使用腦果d劉Sir先鍾意,二來有時太玩技術同概念真係好難搵到時機適合去坐低慢慢聽,但PINK FLOYD係可以任何時間拎出黎聽都聽得入耳聽晒成隻/幾隻碟,同每次都會聽出新野同唔會覺得唔掂,就係因為佢地果種空間同氣氛真係得佢地有。花心機去研究progressive rock,相信會聽得出PINK FLOYD音樂會有好多「似邊個年代邊隊」之情況,但勁在佢地可以有只得佢地先有之PINK FLOYD音樂,就好似而家好多(rock/brit) band一聽就會話「似PINK FLOYD」,或者「有PINK FLOYD成份」,而唔會講似其他,就係因為佢地果種音樂、聲效同概念太獨特太突出。所以一路以黎我都好迷呢隊野。今次Roger Waters黎香港,有PINK FLOYD、有"Dark Side of the Moon",但老實承認朝聖心態居多,睇宣傳都知道,其實呢場演唱會重點,(只)係Roger Waters呢個PINK FLOYD主腦,而唔係全隊PINK FLOYD,想睇完整PINK FLOYD演出相信呢世都冇機會,雖然話佢地達到而家之成就同創舉都係因為Roger Waters,但樂隊始終係團隊,另一個成功之因素,係David Glimour手結他,佢肯定係最強結他手之一,唔係技術高超,但三個音已經贏過好多人三千個音,聽PINK FLOYD其中一樣野就係因為想聽佢d結他,而家得Roger Waters冇David Glimour,即係得番一半,有元神但冇手腳,演譯果部份,唔會期望及得上以前。雖然掛住PINK FLOYD個名某程度上係取巧,但咁難得會有殿堂級甚至神檯級聖人黎到香港,買少幾隻碟食少幾日飯當撻場都要啦。到左呢個「老坑」唔係單指old-school而係真係指一班當年後生仔而家變到四五十歲之老坑,而家唔睇,真係可一不可再架喇。


呢晚,客唔係好多,不過好多奇人。有人,又有鬼,出現晒兩大魔頭,仲有兩大無聊人阿Ant同阿成,仲有大家食,自從新明食入侵之後,真係好耐未食過大家食,阿姐都問:
「好耐未嗌過我地喇喎!」
「生意唔好丫嘛阿姐!」

越黎越無聊而家大家,係無聊到走上黎打機咁無聊,當然係熱血物語啦都係行街game唔使用腦適我合,打機當然過癮,但更過癮係個紅白機模擬器。唔知點解,就噉插個joypad開隻game玩係用唔到手掣,如果想一個keyboard一個手掣雙打,插完joypad之後,要先用街機模擬器開隻圓桌武士,入到隻game detect到個手掣,跟住出番去,再開紅白機模擬器,噉樣先可以用手掣玩到紅白機dgame。戇居的。奇人用埋d野係奇d架喇。


你知架喇。呢排成日冇野睇,冇計,C&C1就爆喇!正派爆左,邪派煲到去最後一關,努力當中,但超難玩!相信要花夠幾晚先會爆到機,亦即係,
「過埋年先返黎啦小朋友!」



14/2/2007 WED

「劉Sir點過二月十四?」
好多人問呢條問題。答案好簡單:
「留係屋企打機囉!」
真係留係屋企打機打足成日。之前果晚 - 即係2月14日凌晨 - 怒煲C&C,本來都諗住訓覺返工,但打到最後一關冇理由唔打埋佢,跟住搏足通宵,終於爆埋邪派第一關,C&C第一集終於爆左!爆機之後已經六點幾(...),噢老細我都唔係太好意思返工喇,廢事返黎就訓訓醒就走啦。點幾鐘起身,食番個公仔麵,繼續打機,爆左C&C1,就梗係到第二集啦。直煲到過左今日。
「劉Sir的一天2月14日版,就係噉過。」


劉Sir的一天之尤特龍與小肥牛
20070224