段記



30/12/2006 SAT

上網開始慢慢整番好,而家去得番外國網頁同check到email,雖然係噉,今日仍然係非常之得閒地冇乜野做。梗係啦,雖然個網搞番掂,但冇人send email黎就個網快唔快順唔順都冇分別啦,聽日已經三十一,唔係聖誕起直放到一月幾今日都唔返工啦,係我仲咁戇居坐係度唔知做乜噉!連食三舊三文治做早餐之後怒訓,三種訓法:坐自己個位訓、入廁所訓、入倉訓。結論係:
「都係唔返工留係屋企最好訓。」(...)


為左個櫃,今日成搭三四先走人。
「咩櫃?」
拿!得閒去信和時上一樓(上兩層電梯先到一樓一層係唔得架好神奇),行行下經過145號舖就會發現有間舖櫥窗有好多個格仔,其中一個無端端有幾隻metal碟,同埋有張紙仔寫住
"My metal dip gan hai yiu hui guy wong TRHK la!!!"(用英文因為要吸引外國人睇(...))
就係要搞呢張紙搞多左陣。冇錯而家TRHK信和都有「分店」喇!當然講買就冇乜野買亦都冇劉Sir係度,但得閒經過都去望望啦因為呢間野係雜貨攤即係乜野都賣(唔係點會連TRHKdmetal碟都有得賣?)。有興趣創業的朋友都可以去問問架,果度口號係
「$10可以做老闆!」
詳情請向信和145 or 皆旺107 or 皆旺108 or 劉Sir查詢。真係$10就可以做老闆架(107話,俾佢昆左唔好搵我)。
呀,講開又講,假如上到去見到一個叫做阿捷的傻仔睇舖的話,直接郁佢得架喇唔使俾面我,需要摺凳或其他器械我免費提供又點話。

玩到兩點幾先走想打機都冇時間,直上舖頭算啦。lunch係批&撻,皆旺樓下果檔開開左好耐今次幫襯下啦,買左兩款野,個咖哩牛肉酥唔錯,但個奇妙芝士條,奇妙在冇芝士(...),不過都食得幾飽,難怪之前Alex日日食呢間野。由今日下午三點,TRHK '80男之日正式開始,呢日冇人相信呢間係TRHK,包括全層所有商戶、任何一個客人、107同我地自己。為男之日打開序幕的有0083 OST,呢輯OVA特別在d歌唔係唱日文而係唱英文,呢樣野果時到而家都好特別,因為日本動畫主題曲加一/幾句英文唔罕見,但直頭全首唱英文兼搵埋外國人唱就唔係多,有幾首個底勁melodic metal就連唱果個都係一把厚女聲聽落勁似SINERGY!三條友聽住0083吹番當年中學小學幼稚園之'80&'90 old-school歷史,一致認同:
「機械人動畫同暴力漫畫係永恆皇道!」
跟住睇《爆熱campus》,咩黎我都唔知道,但知道係《暗黑破壞神》作者畫已經走唔甩啦。播住metal黎睇《爆熱campus》,正!估唔到SUMMONING同ANGRA又會同畫面咁夾喎!有機會可以研究一下fan-made MV - 有機會的話。才華、時間同技術實在係太過不足。睇完《爆熱campus》仲有阿成帶上黎之睇《攻殼二》 - 係製作特輯遮,基本上齋睇個四十幾分鐘製作特輯,一係令你對呢套野極度反感因為講極你都唔明佢地講緊乜,一係好似我噉睇完之後決心電視+電影N咁多輯冇得走一定要追,慘呀07年實在太多野想做喇。睇完再食埋個飯,就到男之日重點節目:
「斯比頓星開光大典!!!」
呢隻野由九月起「寄存」左係呢度,事隔三個月之今日正式買左佢,107亦終於正式收到錢。
「喂107唔係喎!你隻野放左係我間舖咁耐,係咪應該我收番你廠租至合理先你仲好意思收我錢?」
見講左咁耐又襯今年最後兩日,就開黎當應一應節送返份新年禮物俾自己。先前呼籲各位朋友帶同各大變形金剛出席,反應凋零,107有一系列祖國袖珍復刻版變形金剛,細細隻都分得體仲可以獨立變形架!Rock爺有復刻版列車俠(大陸d譯名真係正到hihi),阿成有隻能量戰士...嵌係心口果隻超迷你人仔乙個(...),加送一包「兩個鐘前買落之雞蛋仔」(......),但最抵死都係阿捷,捐出果隻係勇者指令達古安三飛機合體。合體機同變形機永遠係最好玩玩具,只要係正常'80 old-school男仔冇可能會唔鍾意玩!
「真係好玩!不過達古安同變形金剛有咩關係?」
「屋企d變形金剛唔見晒,完整又玩到得番呢隻咋!」
「阿捷我發現你成日話自己屋企有乜有物但搵親就咩都唔見晒頂!」

因為如此反應&太多野睇&要食飯,各位朋友期盼已久之開光大典,30/12/06夜晚唔知幾多點鐘終於正式開始喇!
「咪住!」
「做乜?」
「差噉d乳豬呀蘋果呀橙呀同成個人咁高果d香喎!」

劉Sir的童年係好悲哀的。好多小朋友細個時好多野玩,但劉Sir係冇乜玩具好鬼慘,變形金剛只係當年擁有過飛行派同建造派兩隻變形金剛,而變形金剛直到今日仍然係最愛機械人動畫之一,原因之一可能係美國出品後來日本畫果d已經冇晒興趣睇,而到而家仍然會咁鍾意仲因為呢套野其實好Qmetal,唔止劇情同機設仲因為d音樂同插曲,所以直到而家好多外國band仍然非常熱愛變形金剛,好似TO-MERA出騷都會cover變形金剛主題曲你知唔知?細細個冇乜擁有過變形金剛玩具特別係柯柏文、麥加登同最終極的六變獸絕對係童年陰影之一(「107!幾時有六變獸復刻版?」),而家大個左有收入,又有間玩具舖係正隔籬送到上門(107你應該公開鳴謝劉Sir),圓番當年億萬個兒時夢想之小小一個,好開心。
「出黎啦斯比頓星!」(「喂,呢句對白好似係鐵甲萬能俠喎!」)
呢晚四條傻仔圍住呢隻野玩得好開心,重拾幾/十幾年前玩合金&膠公仔果份激情,呢隻斯比頓星名乎其實係一個星球,又可以變戰艦又可以變機械人大隻得黎多機關好玩又靚,
「正!呢隻斯比頓星真係好正!107我好開心冇識錯你,估唔到成日俾你昆,今年last兩日你終於有番d好介紹!」
「我想話你知,斯比頓星個對頭邪惡星球尤特龍仲正喎!」
「有冇貨?」
「仲有貨呀!」
「唔早d講!頂!又要中招!結果年尾都要俾你昆多鑊!」

農曆新年逗完利是之後買咩禮物好,已經唔需要煩惱了。



31/12/2006 SUN

2006年度最後一日,一早已經計劃好晒。琴日臨走前,大大聲:
「為左呢個歡樂早場,我今日一定要早起身!」
堅定地說。但在座各位都知道,要星期日或者假期冇乜可能令到劉Sir早過十二點起身,除非有錢分(有興趣的朋友不妨實驗一下),所以呢個歡樂早場大家都預左唔會搞得成,只不過意外地路人甲阿捷會比兩位當事人更認真,我同Rock爺兩個發起呢單野都從未投入過。本身之觀樂早場,係諗住今日一早上TRHK坐定定煲晒全線0083加變形金剛電影版加到時有乜睇乜,後來計劃改動變成機舖一朝遊,但時間依舊係朝早九點,亦即係我接到阿捷電話之時間。
「你地幾點黎呀?」
「換緊衫啦!唔塞車的話實準時到!」

點解我會咁有信心?因為果時我屋企個鐘係...八點三。好明顯呢條友經過一個禮拜前「乜而家唔係一點三係三點三咩做乜咁早打黎叫我開舖」事件之後仲未識吸取教訓幫個鬧鐘換電。都有個好處,就係有阿捷呢個哨兵行先(&死先),我先知道琴晚咬牙切齒的Rock爺同我一樣起唔到身,電話又打佢唔通,當堂醒水啦立即同佢一樣放埋阿捷飛機啦!(呵呵呵呵呵呵)隔左幾分鐘之後,神蹟地收到電話,立即再搵阿捷:
「喂!阿Rock又話出得切黎喎!噉我都係出黎打機喇!你唔好走呀你!」
「頂你!我已經入左閘去到油麻地喇!」

真係未出發先笑爆,阿捷同學你2007年已經有一個好X好的好開始。但更笑爆係,我都係今日先知道,原來我屋企樓下出佐敦巴士差唔多全部取消晒,好在執剩一架俾我搵到,如果唔係可以再打多次電話放多次飛機!

最後等呀等呀,出到去仲夠時間上大家樂食多個餐蛋麵,差唔多十一點鐘終於齊人歡樂早場正式開始,呢個故事教訓大家/阿捷同學,準時係唔會有好報的,除左放工同放學之外。佐敦呢個地區其中一個吸引之處係好多機舖,特別係細機舖每隔兩三條街實搵到一間,價錢仲要平過旺角同尖咀呢d旺區,好似今日之目的地,就係一條隱蔽橫街入面其中一間尋找傳說中之一蚊舖三百合一。十一點幾黎到三條友差唔多包場咁滯,都唔使咁急丫(已經成為107傀儡要十一點半上信和睇舖之阿捷除外,呵呵),先玩番舖Spike Out呢隻現化Final Fight,賣點係可以四打所以三條友有得一齊玩,只不過呢d新世代行街game始終唔多鍾意玩,一來多邊形公仔一向唔係心頭好除非一係超靚一係超old-school地假(...),二來變左立體未習慣時成日唔識點行同點轉視點,三來由平面變成立體即係三百六十度受敵其實好屈機,特別係打大佬果時。純粹志在有得三打,但自己一定唔會煲呢隻,我太老了,要玩我寧願揀之後出果隻續篇Slash Out,由流氓打街變成魔法劍士斬妖除魔,畫面同劇情都吸引得多,但唔知點解而家香港已經搵唔到得番Slash Out系列。臨走前仲有阿捷表演單手雷電,嘩頂呢間機舖真係一流呀為左呢隻game整左部專用機,將個掣食死左等部機會自動無限連射唔使自己落手,單手就可以控制晒所有野爽呀!跟住輪到此行之重點一蚊三百合一,而家仲邊度搵到機舖會係一蚊一舖丫最低清費都兩蚊啦,但收得呢個價當然唔會咁著數,出面兩蚊兩條命呢度照計番一蚊一條命俾你仲要冇得1up,其實係得入錢時開心玩果陣係蝕底左忝架。頭先玩完現代Final Fight,當然要整番舖元祖Final Fight先啦,最終奧義左右拳再現江湖,Final Fight係好玩但始終難玩到而家仲未試過單打爆機,除非係用錢爆,當年都係玩家用機有得較無限con先爆到機,街機永遠唔會達到兒童場已經見識過之神人境界。再整多舖Alien Vs. Predator,到而家仍然係得呢隻可以一個人一條命爆機,好耐未玩過喇,值得為呢隻game搵次出黎回顧一番。玩開行街game自然唔少得Warriors of Fate(越黎越鍾意個英文名呵呵呵),一蚊一條命又冇1up真係唔多夠,跟住Captain Commando同圓桌武士仲死本身已經難玩到仆何況得一條命?
玩到咁上下,係時候轉一轉場,下個目的地係Game Zone即係新之城分店,以而家機舖業規模黎講旺角新之城果間算好大下,估唔到佐敦呢間會再大過新之城一倍,但價錢要再平多一兩蚊喎!嘩而家d機舖點做呀真係?落黎可以話因為要睇睇傳說中(咁多傳說)同新之城House of the Dead 4 Special分庭抗禮之超豪華版OutRun,真係豪到每個座位唔係單單一個位而係真係成架車一樣,一架車可以坐兩個人,一個人炒左的話控制權就會轉移俾另一個司機,即係最多可以八個人玩四打,吸引力係好大架,問題係成廿蚊一舖加埋四個大螢幕同四個超豪機動座位,成本仲高過隻過山車House of the Dead,點維皮呢真係完全唔明。行個圈,佐敦呢邊新機唔太多但勁多舊野玩,幾百合一呢d當然搵到啦而家真係得細區同舊區機舖先搵得到呢d雜錦機,但玩只玩左一舖槍game,隻野叫Vampire Night,係Namco出但初初真係完全唔覺,睇名都知係射彊屍打吸血鬼,但玩法畫面設計真係完全同House of the Dead冇咩大分別,開頭真係以為世嘉幫House of the Dead出左個兄弟系列,畫面靚就係靚喇只不過隻game玩唔多好玩,黎到大機舖反而冇咩心機摷野玩。其實有一隻game好想研究,有趣地係我冇煲開之格鬥game,就係Guilty Gear。點解會有興趣玩呢隻?除左靚同人設好動畫feel,仲因為非常metal,未使聽配樂,見到隻game副題係Reload、有角色叫Testament、Slayer、Zappa、Ky-Kiske,招名係Gamma Ray、Hammerfall、Master of Puppets、Seventh Sign,中晒招啦冇得走啦。我係盲目的metal fans。
又走返過去頭先果間繼續三百合一。玩舊野都有d玩到悶係度試d新game,Rock爺示範當年一大過癮game痛快行進曲,將行街game同格鬥game兩者合一仲featuring World Hero主角之一風魔小次朗,招式同系統都好好玩真係可以研究一下,但我對世嘉好耐之前出果隻cult game Moonwalker更有興趣。睇到呢個名有反應的話,恭喜你,你估到劉Sir會感興趣之原因有一半係因為音樂,另一半又係因為兒時夢想,第一次見呢隻game係小學二三年級去兒童場果時,果陣唔多識邊個係Michael Jackson但見到條友可以變機械人大招係全世界跳晒舞再random effect爆晒咁過癮一路都想試下,但以前邊度識打機丫只可以企係玩到一蚊爆機之勁人側邊睇,隔左廿年都有喇今日終於有機會自己玩番舖喇,感想係:
「嘩頂,真係好Q難玩!點解以前d人可以一蚊打爆機?」
但最懷念仍然係單手雷電,雷電又係小學兒童場年代產物,打到今日都從未試過一舖過第二關飛機game始終唔係在行,而且呢隻game難度當時黎講算係好高d彈又多又密又多pattern,要到之後玩家用版有無限con不斷死屈大彈先爆到機,最記得果幕係玩左頭四五關之後上到去架空中要塞度加完油再彈射上宇宙,由地球打到去太空果時細細個覺得真係好型好勁架!只不過點精彩,都唔夠雷電隔籬部拳皇精彩,一蚊一舖原來係玩一個對一個仲要1 round過即係一係死一係過關(同「射波一係入一係唔入」之邏輯有異曲同工之妙原來我好有潛質做講波佬),嘩正呀噉先夠晒緊張刺激呀!臨走前玩多舖鼓機,相比起其他大部份機一蚊一舖,呢部野五蚊局相當奢侈。呢部V5即係第幾代我已經唔知只記得最後煲係第四代即係五六年前,好在而家電腦科技跳左咁多級一部機裝成百幾首歌玩得番好多舊歌,必打最愛之"Jet World"(當年中七用過呢首歌參加陸運會parade拎左全校冠軍架呵呵),仲有非常鍾意之"Depend on Me"長版,只不過第三首一玩而家d歌,即死。我都係適宜搵番部四代玩算。又好想KO埋"Primal Soul"長版,史上只試過一次,但好想可以歷史重演,又係兒時夢想。夢想實在太多了。
雖然而家網吧盛行亦有其好玩之處,但始終唔會放棄機舖,就係因為呢個地方集合左太多回憶同夢想。


打完機上到舖頭已經兩點幾三點,本身之歡樂早場轉型成歡樂午場,冇錯即係又係唔做生意的睇碟日子。首先當然要睇變形金剛劇場版,難得斯比頓星終於入手,梗係攬住黎睇先夠feel啦。劇場版係補完番電視版第一輯同第二輯中間之過渡,主要係講麥加登點樣變成甲威龍,同尤特龍俾博派炸剩個頭之經過,當然而家睇番同諗番個劇本其實好多戇居位啦,最經典當然係麥加登咁大個機械人變左做支槍之後居然可以俾同佢一樣咁高咁大之星星叫拎黎射人,而次次出親場都笑爆咀之恐龍派本身細細個機械人變身恐龍之後又會突然變大幾十倍有合體機械人咁大,頂一部機械人仔都可以變到咁大的話d合體機械人存在黎有乜意思?麥加登俾柯柏文做低左狂派逃走太空,一架細細穿梭機入面建築派居然會六機合體成超巨型機械人而唔谷爆架穿梭機,跟住音波放兩個機械人仔出黎狂打地板做地震,居然可以成部建築派震番散但唔震爆架穿梭機!好多呢d野以前細路仔唔會去諗點解只覺得好精彩,而家大個仔睇番就覺得好鬼好笑,但有乜所謂丫睇戲唔好駁戲最緊要好睇,當然駁戲又係另一種樂趣!講打呢套野十幾廿年前但設計得算唔差架喇,不過我地仍然熱愛變形金剛係因為dsoundtrack,頂首首歌唔係metal就係hard rock好難唔睇到high晒喎個人!睇睇下,107走過黎搭嗲曰:
「我屋企有個四川話版變形金剛,由頭到尾都唔知佢地講乜春!」
「嘩正喎!一定要拎上黎睇睇啦!」

"Kill Bill"睇左第一集,今日意想不到會有第二集睇,因為107果度有成棟"Kill Bill 2" DVD!唔好問我點解,佢間舖到底係賣d乜實在係好難理解,就好似睇左半套之後死機,用碟海戰術都睇唔到下半集一樣,灰到仆。跟住仲有凡海辛(實在太愛大陸d名了),一開,
「嘩!講咩話?」
俄羅斯話!原來係俄羅斯出品再經中國加工之祖國復刻版!一套荷里活戲加俄羅斯配音加簡體中文字幕再經一個香港拆家到我手,果然國際化!當時香港上畫果陣有興趣睇,印象中係同Underworld (2)差唔多時期上,又係講妖魔鬼怪,差唔多當左兩套戲係同一套黎,經查證後發現另一個雷同感咁重之原因,係兩套戲女主角原來係同一個人!一開波已經係科學怪人,跟住有Mr. Hyde有人狼有吸血鬼,加埋主角造型、科技同年代,似LXG多過似Underworld喎,但我幾鍾意呢類近現代歐洲捉邪捉鬼戲,唔理係咩唔理拍得好唔好殺到埋黎就會睇。由一開始已經覺得呢套野會好好睇,一路睇落去,正,唔睇唔得喎呢套野真係點解之前居然會唔睇?再睇睇下,灰到爆:
「嘩頂107你有邊野係正正經經播到睇到架硬係睇左一半先黎輕機???」


反正今日個個都有節目架啦我八點收都冇咩過失丫(「其實而家全日唔開都冇過失啦!」)。2006年最後一個節目係:蒲吧。多麼的不似劉Sir,好明顯已經俾107教壞左啦。咁好興致去吧,其中一個原因係
「Kawaii!!!」
冇錯就係令阿捷發誓問107借定N個月糧都要去親身睇下之Kawaii,但後來有人肴底得番我同107兩個(呵呵呵),今晚萬幾人出街揀搭巴士出尖咀,噉就中招就係因為呢萬幾人封路,尖沙咀個總站搬左去哥爾夫球場個「臨時總站」度,即係尖咀邊界都係尖咀丫佢又冇錯喎。噉樣俾人趕左落車,就要由高球場行到去寶勒巷成里遠,真係好鬼死多人,但出到黎得個灰字,唔係多人,唔係冇位,而係
「Kawaii間吧冇開呀!」
當堂灰爆喎真係專程為佢而黎架嘛!(黎到呢度,阿捷立即覺得自己肴底原來非常明智)之後搵到一間唔記得叫九毛吧定狗毛吧會合107男女fans各一,係架107真係有好鬼多fans架,
「本身今日仲有個大波護士專誠出黎搵我架!可惜最後冇出到黎丫!」
呢間係一間非常靜之酒吧純吹水冇野玩,飲下野傾左陣係時候轉場喇。越夜越多人,想搵間好吧都難,一係好靜唔好玩,一係冇啤酒妹or靚女,一係冇乜「待媾少女」(好明顯最後兩樣野係107同佢朋友關心之事),搵黎搵去都搵唔到。最後點?最後由劉Sir,冇錯係由唔落酒吧的劉Sir介紹番各位蒲慣蒲熟的同學落寶勒巷M1Bar。死未???點解會咁抵死?前年藍戰士復出演唱會咪就係呢度搞囉,黎過一次已經知道呢間吧正 - 除左價錢之外(果次都係黐人落黎遮,呵呵)。就係咁過癮。



1/1/2007 MON

一玩,就由06年玩到07年。
「玩咩?」
你會問。其實冇咩玩架,純粹三個人無聊。有幾無聊?
「真係好無聊架!」
雖然今晚係除夕元旦,但啤酒妹同吧妹冇上次(嘩兩年前喇)咁多,亦冇model例如阿捷非常期待的Kawaii,不過都OK啦可能因為個地方暗乜都睇唔到令個個睇落都好靚啦哈哈。所以當Rock爺send左個SMS講
「部電腦搞番掂!」
收到之回答係
「一X流!」
再睇埋頭先劉Sir果堆玉照,大家都可以估到佢口中之「一X流」唔係指「部電腦搞番掂」,而係...呵呵呵。三條友係度狂煲大話骰上年煲到今晚三點幾都係煲呢隻,其實幾好玩架大話骰假如你對住果班係好似我地呢d無聊人,可惜地方太嘈玩唔到經典之「劉Sir話」,又得三條友少左d如果多幾個人會更加癲。我呢d唔多鍾意飲酒當然飲幾杯就收皮啦,劈足半支威士忌之107臨尾係飲到完全唔清醒,坐到三點半先起到身走人。
「而家行路都行唔到直線,死聽朝仲要九點半上山頂wet忝!」
其中一個唔鍾意出尖沙咀之原因係交通唔多方便,唔似旺角玩到幾點都仲有車返屋企,尖咀呢頭又冇小巴巴士又唔開通宵迫住要飛的,個的士佬兜埋路去到屋企樓下收四條,即係唔兜路收三條甚至三條有找,嘩同我飛的返大角咀返工差唔多遠咋喎原來!又可能因為夜晚冇人冇車所以亡命d,經驗所談,就算係同一段路,架的士越快,跳錶次數越少,呢樣真架大家有閒錢同有時間果陣不妨試下!難怪d人搭的士時成日叫d的士佬開快d!
三條友合共支出千六七,飲完玩完搭埋的士返屋企,齋係今晚已經使左差唔多六舊水,即係我咁大個仔都未試過玩得咁豪。107曰:
「有幾豪丫!最勁果次我試過一個人都過千!」
「點同呢!你睇我做108都知,我呢d貼錢打工命,又點可以同你呢d四十歲退休命比呢!」


成五點鐘先訓,居然神奇地十二點幾就起左身,雖然今日係紅假但紅日黑日對我黎講冇咩影響舖都照樣係噉開架啦,呀唔係其實都有影響架紅日要開早d忝嘛。睇睇今年第一日個景,已經知道黎緊364日會係點:都係一班人上黎玩的日子而唔會係做生意的日子。
「暴君薯圈 無敵地辣!」
我鍾意。


噉就最後一日假。死,好懷念放假唔使做的日子忝。



2/1/2007 TUE

「唔使懷念啦,想放假就放假啦!」
所以,2007年第二日,亦即2007年第一個正式工作天,你十二點幾仍然會見到我撻係屋企。唔緊要,我打聽過,今日有半間公司同我一樣係唔返工,即係老細要小放例假的同事,排隊都未排到我啦!當然,已對睇化左同小到悶亦係另一個劉Sir可以放得咁放膽之原因。

直訓到差唔多成點夠鐘起身喇,lunch time丫嘛即係就算唔返工我地呢d作息時間都好有規律架,特別係夠鐘食野果陣!是日第一個節目係《標殺令2》,返到屋企,107隻唔知咩碟終於播到喇!(即係舖頭部DVD機又係時候換,頂!)簡單黎講,"Kill Bill"係拍俾鬼佬睇之摩登化香港武術電影,殺手組織一個成員變節脫離之後俾組織追殺,但殺唔死佢而只係昏迷,幾年後醒番就殺晒組織所有人報仇,過程中去日本鑄左一把絕世好刀,甚至有白蓮教,香港人睇絕對係熟口熟面因為由細睇到大果d功夫片武術片十套有八套都係噉,但我地覺得行貨鬼佬仍然睇到眉飛色舞,就係因為夠玩野。根本就係邵氏tribute,劇情擺到明搬字過紙啦但要連聲畫都學到足兼足到有突,d配樂聽到都笑,加埋d拉遠拉近大頭更係笑到碌晒地,但最項癮當然係羅家良做白眉道人果段,一面打一面講廣東話,造型對白菲林用色角度完全同七八十年代港產片冇分別,已經笑到嘔晒茄了。大結局係最終奧義武林絕技五指爆心掌,中左之後行五步路就會心臟爆破而死,嘩簡直cult到北斗之拳咁爆呀!(如果中左之後我一直唔行又或者唔行只爬,又會唔會死?)係第二集先會玩咁多野第一集其實唔太多呢d爆笑位,第一集而家睇番相比下正路得多,加埋第一集係由頭打到尾而第二集其實打得好少大部份篇幅係交代番前文後理,兩集個style都好唔同下,第二集對膚淺的我黎講有少少悶場,都係第一集果種一刀百人斬三秒死一件五秒一條血柱呢種適合我睇多d。

睇完"Kill Bill",打機打左成個晏晝。近來勁鍾意煲呢隻冷血殺手,大陸譯名黎講算好正常架喇,雖然同個英文名完全冇關係。一直係火柴人flash game系列fans,一來火柴人係永恆經典figure,二來呢個系列dgame全部都係暴力動作射擊,完全係劉Sir玩開果類,而呢隻冷血殺手係我玩過最好之一隻火柴人game。真係好正架又容易玩,A向左行、D向右行、W跳、R上彈、1係手槍、2係shotgun、3係MP5、4係步槍、5係火槍、6係手榴彈,加埋個mouse瞄準同開場,見喪屍就射死佢就得,headshot會扣得多d所以等喪屍行近d先開槍會易dheadshot,因為條友開槍命中率奇低遠射成日撻Q射高或者射低。shotgun一野散射五粒彈唔使講都知係近距離用啦,手槍冇得連射要手動但係上彈快,MP5同步槍調番轉有連射但上彈慢,不過隻game咁多款槍其實幾搵笨,因為事實上除左shotgun複彈數之外其實三款單射攻擊力係一樣,分別只係彈數、有冇連射、上彈速度同槍聲(...),普通喪屍其中一槍中槍就可以兩槍搞掂,勁喪屍射頭要成五槍仲要係瞄到非常準果隻,射身要射足十槍先死戇居,但埋身的話兩野shotgun中晒可以殺一隻勁喪屍,雖然shotgun射左一發要上彈,但用轉槍可以cancel呢野而令shotgun都射到機槍咁快。最好用當然係火槍用手榴彈啦,火槍可以將一堆喪屍燒著之後慢慢燒死,燒緊果時補多幾槍會死快d,而手榴彈唔使講啦一野KO,不過點樣掟得準同就到爆炸時間就好難研究,到而家都仲未識用,向下掟就可以令個手榴彈落原位爆,呢個係最有效亦最消極用法。呢隻game二十六關之前其實唔係難玩,第廿六關起根本唔係人玩,因為呢關開始全關只會出勁喪屍,仲要一出就二三十隻一隻喪屍差唔多十槍先死仲要一次過成班衝埋黎根本射都射唔晒更加唔使講上彈,唯有用火槍同手榴彈戰術先可以捱得過幾關 - 係捱咋根本呢d關擺到明係屈機。至於捱到幾耐有時候唔係睇你技術而係睇你好唔好彩,耐唔耐個天會隨機跌十字箱或者子箱落黎補給,但邊個位跌、幾時跌同跌d咩都控制唔到,我試過頭十幾關入面拎十幾箱子彈多到亂啡都用唔晒,亦試過跌成十幾個十字箱但得兩三盒子彈結果廿六關之後俾成班勁喪屍硬食晒d彈用剩支火槍屈到彈盡而亡。暫時最勁試過去到第32關,唔係俾喪屍做低,而係唔知有bug定點,次次都係玩到呢關,殺晒全關所有喪屍之後會話仲有一隻未殺,跟住就困死左係度過唔到關。莫非個劇情其實話主角自己都變埋喪屍所以話仲有一隻未死,要用秘技自殺先爆到機?雖然係噉我仍然係煲得不亦樂乎,每日起碼玩番一兩舖先收手,一來真係好玩嘛呢隻game!二來一舖玩下就差唔多半個鐘絕對係kill time之選,三來呢隻game係冇背景音樂可以聽其他野黎玩,播住death metal黎煲簡直係一流!當然廝殺過程中唔會聽得到幾多,都好過好多flash gamed白痴midi配樂先啦!只係衰在冇得暫停玩玩下想轉歌都唔得,但絲毫動搖唔到我決心打過三十二關之決心。
總結煲左幾個禮拜以黎之經驗,有以下簡單攻略:1. 盡量引喪屍埋身射頭,玩到後面彈藥寶貴唔好浪費 2. 記得要換子彈,冇敵人果陣check下有冇槍要上彈,記得上槍的話本來彈匣d子彈會冇晒所以盡量射晒先好換彈匣,而shotgun無此限最多可以上定八粒,得閒就睇睇shotgun啦呢支係最易射晒子彈 3. 咁多款槍攻擊力其實一樣,所以唔需要諗用邊隻槍黎打隨便揀款都得,用緊果支冇晒彈又上唔切就立即換槍啦 4. MP5一排50發但上彈慢,步槍一排30發但上槍快少少,因為攻擊力同連射速度一樣,所以MP5最好留番打大批敵人時用 5. 多人時等d人群埋一堆時用火槍燒晒慳好多功夫同時間,我試過全關用四滴火槍燒死晒所有喪屍 6. shotgun射完之後立即轉第二隻槍再轉番shotgun可以cancel上彈果下,用呢招可以高速連射shotgun 7. 手榴彈最好留到廿六關起先開始用,如果敵人差唔多到向自己腳底掟可以令個手榴彈近距離爆炸 8. 敵人埋身時垂直跳再拉前可以飛過佢,屈埋牆角或者比人圍果陣可以用呢招走人同空中射頭,但上落樓梯時唔可以跳因為過程中係當你凌空,要跳一定要企定先跳到 9. 每關開始時喪屍會由最頂跳落場,只有最右邊上樓梯果個位係唔會有喪屍跳落黎,所以最好用呢個位做據點 10. 寶物係唔會消失,所以能源滿晒果時可以留番十字箱做儲備,呢d儲備去到廿六關之後更加重要。各位玩得開心d,過到三十二關者請話我知點樣過。雖然我都知道問都無謂,呢dflash game有幾多隻唔係無盡輪迴真係有爆機丫。
搵機會,等我整番個火柴人暴力game系列回顧俾各位啦。實在太多野想搞了。


...就係咁多喇。今日晏晝絕對比夜晚精彩。



3/1/2007 WED

今日調番轉,夜晚比晏晝精彩。星期三嘛。呢日先係正式返工,過晒聖誕加新年假外國d人開始做野,加埋琴日放埋,今日積埋都幾多野清。所以冇咩好講,夜晚仲開心啦。因為要處理好多雜務加店務所以返左屋企,搞掂d野之後摷番Rock爺私人醒果隻Capcom模擬器,唔摷由自可一摷大X鑊,。曾幾何時Capcom真係雄霸街機市場架由Final Fight起至街霸2果時去機舖真係去到一個程度係十部有九部都係街霸2,亦即只識打人同打飛機之我街霸2出左之後已經冇乜機會蒲機舖了,大佬真係成間機舖剩係得街霸2打我又唔識打格鬥game點玩呀?直到三百/五百合一呢d出左之後先再得以重拾當年打機之樂趣,而家甚至出埋模擬器(其實出左好多年喇,係我而家先玩咁out遮),實在係太開心了。雖然Capcomdgame煲黎煲去不外乎Final Fight、AVP、恐龍同吞食天地等等幾隻,但有唔少B-Side係幾好玩,好似Captain Commando,嘩玩呢隻game果時真係小學三四年級咋,果時隻game先剛剛出信和地庫仲有間兒童機舖,當時就係去呢度打架喇,記得果陣同人地三打,用左廿蚊先打到去尾二一關大佬。呢隻game當時黎講幾突出架,畫風好美國化人設又獨特,同埋可以四打、有得跑、有機械人坐、入唔同指令可以出唔同連續技同可以帶武器過關係幾大突破黎,最重要係:夠暴力!就噉睇隻gamed人物同畫功都係低年齡層向,但係會有攔腰分屍、溶屍同燒死變灰呢d恐怖場面,而家諗番起都覺得Capcom好野:
「十幾年前已經有而家dgame咁暴力,仲要係呢隻闔家歡game先暴力成噉,Capcom萬歲!」
可惜點創新都好,呢隻係公認Capcom最失敗行街game之一,因為難度太高,卒仔攻擊力太強,又預左係四打所以成日人海戰術屈死,d大佬正頭係玩晒,除非你用turbo掣連打,如果唔係你屈佢幾野拳之後佢肯定會還到拖,而大佬還你一下拖已經扣到你四至五份一但你每打佢兩次佢就還你一野,齋講攻擊力已經冇得玩更何況大佬d招式又係屈爆,特別係最後大佬全場飄黎飄去,飄果時大半時間無敵,就算唔係無敵果d時間你都打唔到佢因為佢就係預到剛剛好你打佢唔到,等你搵位入又入唔到果時,立即高速閃去你面前再掟十幾個波炸你根本避無可避中硬,又或者直接捉你撻撻一下冇成三份一,根本就係要用錢先贏到,而呢個係我打個最仆街之行街game大佬,直到今日都係次次打親佢都打到好似呢條友噉爆粗爆到停唔到口,相信Capcom隻隻行街game都會有人一條命爆機,但Captain Commando永遠冇可能,齋大佬已經屈死你。跟住玩番隻正常d,係圓桌武士,「正常d」只係對神人級人馬而言。呢隻又係超早出之Capcom行街機,唔止故事畫面都奇特地歐洲化而家睇仲係超靚,呢隻騎士刀劍動作game果時幾罕見,加埋三打、有得擋、RPG式升level同寶物可以一開幾份全隊人一齊分又係一個經典,已經當成係action RPG噉整法,問題係靚還靚前衛還前衛難玩真係難玩,敵人係人海戰術加攻擊力強加戰略性高,初初玩第一關要贏到大佬已經唔係易事,而玩到後面真係要用錢黎爆,我用電腦玩夾夾埋埋死左成百條命都有先爆到機。咪住,又話有得擋,噉咪應該冇咁難玩?難就難在個操作,隻game只用兩個掣,一斬掣立即拉前係大斬扣多好多血同可以出寶物,斬立即拉後就係擋,斬掣同拉掣兩個動作時間要非常吻合,問題係當年街機用joystick都難出啦,更何況用個keyboard仔篤篤下黎就時間?而呢隻game唔用擋根本冇可能爆到機,因為擋完之後會有幾秒鐘無敵時間(冇錯就係傳說中之無敵閃光,仲未知留言板之出處?又是當年的一個cult).去到後面你識擋之餘敵人都識擋仲要擋完會counter你勁到爆,唔係靠呢野無敵閃光根本連卒仔都打唔死,更何況係勁多幾十倍之大佬?對大佬真係要等佢打你擋完之後反擊幾野然後等佢擋番你還擊後再擋噉樣去法。而一定要識擋係因為用擋先可以出到隱藏1up,有寶箱果時用大斬斬開,一斬中個箱立即拉後擋就有可能令個寶箱變成1up,而唔噉樣儲命肯定唔夠命爆機,所以呢隻game對控制技術要求好高甚至高於反應。當年兒童場年代邊度識玩丫,所以果時見到已經有人可以一條命爆到機,仲要係噉有1up最後儲到成五六條命,喂大得我幾多年丫呢d靚仔已經玩到咁出神入化直頭當佢神噉拜,而我玩到今日仲係靠無限錢先爆到機唉灰呀真係。
嘩頂,實在太多回憶同感慨了。打呀打呀打呀打呀。大劑。
「阿Rock!都係你衰!無端端整呢隻野過黎!慘喇呢次flash game都玩完又有咁多野玩!」



4/1/2007 THU

琴日清晒d野,今日超勁勁得閒呀正呀,所以晏晝又係冇咩好寫,
「我點樣連訓三個鐘再食左四餐你都冇興趣知架啦!」(...)
而家TRHK已經變成老人院,入親黎果d全部都係八幾九幾人士,就連附近玩具舖d人聽到我地吹d水都話:
「嘩乜你地咁鬼out架!」
打機打左咁多年,雖然d野越出越靚越出越真實,但遊戲性同畫質一路成反比,對我黎講最好玩之電子遊戲只限去到超任時代,PS1都仲可以,PS2開始已經完全冇晒果份癮喇,就係因為越舊果d越簡單果d越好玩,所以點解任天堂由紅白機到超任其皇道地位到而家仍然冇人推翻得到,嘩坦白講我真係唔多覺得有幾多隻超任game唔好玩喎,相反PS開始你要我數廢game真係數下數下可以數到好多出黎。但今日重點係紅白世代。Rock爺同大家分享當年煲太空戰士3之(慘痛)經驗。
「其實呢隻game有秘技可以全部角色變晒做level 99架!首先去到中段拎到架飛空艇之後,再飛返去最開頭個迷官度打果度d小矮人,打之前買定九十九個藥草,只要打到小矮人跌一個藥草出黎,你果九十九個藥草就會唔見晒,跟住全部人就會升晒做level 99!不過都唔知d小矮人點先會跌藥草,都未見過!果時係到等佢地跌藥草,部紅白機打到成個火球噉,仲要日日都係火球噉喎!但係我打極都打唔到,不過我聽人講話真係打到level 99,仲要係有幾個人都得喎!到而家我都仲未試過!」
「呢d傻仔真係慘!俾人昆足廿幾年都唔知!」

跟住另一個傻仔阿捷出現。
「咦?今日唔使返學咩?而家考緊試喎!」
「今日考中文listening,點知播帶果時個先生先發現份卷錯左,結果今日考試取消左!咪咁得閒上黎囉!」
「我發覺on9仔讀果d學校係寧舍on9d!」

跟住環節係高達膠囊戰紀,即係當年咁多世代所有機種大雜匯、打果時真係要自己控制部機對打果隻高達戰棋、將唔同機融合成新機種、由紅白機四方戰場到後來超任昇華到六角形戰場,呢隻係一隻當代經典黎架但係到而家已經唔知去左邊,冇計而家唔興呢一種game嘛,高達都不復當年勇啦唉 - 而家出都只出Seed果d冇癮啦。因為以前果份「勇」,同埋唔賣畫面專攻遊戲性,以前細個唔打機打到俾老母打,簡直唔算係真正有打過機。太開心了,以前。

吹到興起,收舖之後直落新之城,過晒聖誕新年假,終於少番d人起碼打到舖機先喇。而家落黎最有興趣係煲渣古。呢隻game其實唔係難玩,你係玩得唔貪心又就住就住其實真係唔難玩得耐,最大問題係部渣古支槍太弱,一部吉姆仔都要射成十幾槍先爆,同埋敵機中槍果時係唔會有硬直,隻game只係用支廢槍係噉拖你,要射咁多槍先射得死一隻又阻止唔到敵機射你,就係等你拉鋸期間多d機會中槍,呢個設計我非常唔鍾意,又令我諗番起街霸電腦一拳等於你一下超必果種不公平屈機,之但係鬧係噉鬧玩就照玩架喇,鬼叫隻game又真係好好玩咩,我最鍾意匿埋掟個手榴彈之後閃出去狂掃。臨走同阿捷煲多舖House of the Dead 4,梗係玩過山車版啦呢隻先夠過癮嘛,其實呢隻game講難唔係好難,只得兩關但玩落又唔係好快玩完,或者因為目標觀眾係低程度玩家例如女性同阿捷(...),真正難只有最後大佬一個,但我到而家都未見過有人打爆機。而家單打雙打都係計廿蚊,咦得閒無事黎番野雙槍雄都好喎!
「喂阿捷你有冇打過喪屍架?打喪屍梗係打頭架啦邊有人係噉掃佢條腰同心口架?睇睇樓上打喪屍指南啦!」



5/1/2007 FRI

今日好得閒,老細又唔係公司,全日係度發癲。
「挑!差唔多日日都係老細唔係公司!日日都係寫呢d野!」
噉係事實嘛我有乜計?唔鍾意日日一樣,今次咪唔噉寫囉:
「全日係度發癲,老細又唔係公司,今日好得閒。」(...)


今晚最大節目,係俾107笑九,因為我們的尊貴客人上來了,仲要上黎玩得好開心忝。係邊個?知道的朋友已經知道(「唔准笑!」),唔知道的朋友,唔需要喇無知是福呀,信我啦呢個人唔見絕對好過見呀見過一次已經足夠你寧願自己仆街死左去算架喇,真係威水到已經成為香港唱片店工業中之名人差唔多出名之唱片舖間間都認得佢知佢咩料,107見過一次已經難以忘懷了,我仲要見足咁多年忝,就係咁死。嘩灰呀。
「唉頂,早知唔咁早開舖落去打渣古算啦唉!」(「唔准笑呀我講左!!!」)
但如果你問對住佢慘d定對住「專家」慘d?呢條問題有d難度。我只知道呢位尊貴客人(_)一回事,但佢真係可以講到好多經典/舊band出黎、講到晒每隊band歷史、講得出每隻碟接近所有資料、講到一隊band唔同時期每隻碟個style係點、比較到唔同碟同唔同band風格同高低、同佢真係買碟而唔download,你話佢只集中聽經典同舊band一回事,佢起碼講得到你聽佢聽緊d乜同聽到d乜。佢識唔識聽?佢係唔係專家?請自行定奪。

可能好人有好報,服侍完呢位尊貴客人之後peoplemountainpeoplesea。有個超過癮講中文鬼佬入黎搵野聽,
「蓆蝶修愁歌度腰吳通蛾鮮仲姨!」
搵劉Sir就中晒啦搵呢d野,最後差少少買左逢搵實驗野劉Sir必推介之PROJECT HATE,但都係揀左TVANGESTE,因為對CoF果類興趣大d。但知唔知呢個咁前衛之鬼佬最有趣係咩?
「崎實餓記連錢二經毛聽metal!罪猴聽密滔哥鎮度兮聽DEEP PURPLE桶MAYHEM炸!」
仲有唔少少女仲要都幾掂下忝(擺到明係講俾阿捷聽),跟住一個接一個噉黎廁所都冇得去飯都冇得食,最後連肥瘦仔都上埋黎又玩左一大輪連隻斯比頓星都玩壞埋,買左一個禮拜唔夠咋頂我都未玩夠咁快就壞左喇!幾乎連皆旺都封場先走得人。好耐未試過如此光景喇呢度好耐未試過咁多人喇,今日出現之人數分分鐘仲多過一個禮拜之總和,有生意做又有得玩噉先似樣嘛。
「死喇有機會講多幾句喇跟住都唔會有咩機會再發生架喇呢d事!」

收左舖,夜還夜機都係要打。當年入番機舖係107+108開始,跟住越玩越多人發展到成班友走去好景OutRun,當年四/N條友玩到連圍觀者都笑到仆晒街,然後大家呢個有節目果個唔得閒,今晚回歸原點得番兩條友。非常遺憾好景多人之餘冇新機,新之城部渣古又壞左一支槍冇得雙打,今晚終於有機會試玩Let's Go Jungle,隻game係坐入架觀光車度對住個芒怒射巨型蜘蛛巨大蜜蜂之瘋狂觀光團,支槍係格林炮樣裝係個位上面,唔使上彈只需要不斷狂射邊樣郁射果樣就得,畫面太靚又有劇情又多野玩,真係今日落場玩番舖先知咁正喎!因為係無限彈加唔使上彈關係,呢隻game擺到明鼓勵各位朋友亂咁射,就好似107噉有你冇你捉住支槍舞龍噉舞射到啡到周圍都係,而同之前打呢條友一齊打哥布拉之經驗一樣,事實證明你正正經經噉努力瞄準黎打,一定會難打同早死過噉樣亂射。雖然敵人全部都係昆蟲同動物,所以攻擊模式其實幾單調都係屈你人海戰術(但你睇呢隻game個佈置都知又係俾女玩多啦梗係容易d),初頭諗住都冇咩特別會係幾行貨不過靚d的槍game,但玩到中段先知過癮,有一度係跌左支槍,跟住係用船槳打青蛙!嘩好鬼過癮喎呢隻game原來!全隻game三關加一關optional關打最後大佬,長唔係好長不過我昆左我地兩條友唔少錢,即係記得我地玩Metal Slug每人煲成四十幾六十(冇錯係每一個人)都知我地兩條友一坐低左就唔爆機唔走架嘛,呢隻game有d位係好陰所以死得好快,六蚊一舖兩條友係噉死係噉入錢,爆機果時每人已經豪左差唔多四十。呢樣都唔係灰,最灰果樣係
「嘩頂乜噉就爆左機架喇?點解係要等我入左六蚊之後個大佬先死?」
渣古壞左冇得玩,又冇咩其他新/舊野好有興趣,都係煲番OutRun。可能而家OutRun都out out地喇,以前四打而家變到得番雙打,兩條友就剛剛好啦。成兩個幾月冇玩過喇,一落場,
「弊!點玩?點解我部車快極都快唔過220?」
真係笑到死架車完全唔知點解地慢又唔識&唔記得左點樣加速,輸到真係我都唔想提咁樣衰。冇玩一輪真係生疏晒。
「幾時會再成村人出黎鬥撞呀?好懷念呀!」


「最後,107叫大家睇埋呢條片先准走!
d中文字幕真係黐Q線!



6/1/2007 SAT

今日,超級眼訓。
Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z Z
多謝。(...)


真係超Q眼訓,收舖之後都修心養性直上皆旺算唔周街玩。梗係上黎訓覺啦咁早開舖咩真係。(...)一面訓,一面聽TO-MERA,因為實在太多碟加太少時間,好多碟寫完之後無可避免地擺埋一邊好少機會再拎出黎聽,但呢隻碟仍然每一兩日聽一次,係個人上年progressive metal之選,但相信冇乜人會理,原因已經寫晒:solo又唔係勁到飛起果隻,一到death metal位又激過頭,仲要女聲唱,幾頭唔到岸(劉Sir就係鍾意埋晒呢d幾頭唔岸野,所以只要劉Sir鍾意果d你一律唔需要買因為一定代表唔好聽),同埋
「TO-MERA?咩band黎?有冇DREAM THEATER?」
訓到兩點幾已經俾阿Rock嘈起身,開始了超唔正常的一天。今日真係黐線到無可再黐線。咁多樣野之中,我講最正常果樣。就係集資上市。遊戲玩法係每位參加者奉獻五十蚊購買股份,之後派一位志願人士做外賣,落樓將所有股份盡情揮霍。第一位/對受害人係107+108,阿Rock落去再上返黎果一舊水已經變成左手超多不健康油炸食物右手大袋七記薯片。
「點解咁多炸野,係冇炸魚蛋?」
「先達檔野個阿姐話煎釀三寶賣晒喎!」
「唔係卦???噉都得??????」

第二位受害人係阿捷,嘩好Q多魚蛋今舖。
「咦?有番煎釀三寶喇?」
「唔係呀!我去到百老匯果邊果間買架?」
「唔係卦??????咁戇居????????????」

所以今日周圍打電話吹雞,第一句就係
「有冇五十蚊係身?位置係邊?幾點上黎?」
第三位受害人...冇第三位,因為食埋夠捷果五十蚊魚蛋已經連正餐都唔使食,除左lunch係正正經經食左碗大家食,今日其他所有時間係食垃圾過世。冇錯呢樣野已經係今日最正常果樣。噉點為之唔正常?超乎你想像,實在太恐怖。例如TRHK呢間metal舖會以全層都聽到小之音量怒焚《白石嶺公園》焚到舖外的各位大叫encore(cult 呀!!!話時話阿捷聽講你新年果晚當街當巷唱呢首歌唱到俾人用粗口怒小再繼而遭拳頭相向俾人打得好慘?)、一個聽朱哲琴式「壓抑音樂」的北京人專誠走上黎掃佢從未聽過之extreme metal一大堆(超神奇)加引發TRHK「100%純正港燦普通話行動」、仲有F91&VIOLET UK&Brian Taylor + Yoshiki...好多好多。就係差暴君薯圈。估唔到今年第一個禮拜六已經可以黐線得咁盡。死,跟住仲有五十一個禮拜六要過,點算?



7/1/2007 SUN

平時返工都冇咁早呀,今日七點鐘就起左身喇,冇客見冇計啦。個客選擇星期日先黎,其實我幾無任歡迎架,因為又可以呃番d假第時吞pop同搞騷用。起身,立即面對一個大難題:
「死,點著?唔係今日都要我恤衫西褲咁樣衰卦?...著番對鞋就算數啦唉!」
即係同平時一樣,不過對腳由涼鞋變番做波鞋,對於幾個禮拜冇著過襪的我黎講,今日要專登摷番對襪著番對鞋,已經係非常悲哀的一回事。今日一見就見左差唔多兩個鐘,但話「見」,話係吹水會正確d,因為真係講合作講生意唔夠十分鐘,其他全部時間都係坐係度吹水,因為又係一個奇人。隻鬼係加拿大人(冇錯又係我至愛的加拿大),十幾年前仲未有外國人黎中國時已經黎中國住,所以而家講普通話多過講英文。你見過中國人廣東話或者普通話夾雜英文,但有冇見過鬼佬英文夾雜普通話同廣東話?仲要從來冇正式學過而全部中文都係「街上學來」,就係咁過癮。因為先過人咁多年黎中國發展又咁搏,住到今時今日盤生意已經做到好大,大到唔係搵人同佢做生意,而係揀同邊個做生意,
「真正富有的人,不是家財萬貫的人,而是像這樣可以選擇和誰合作的人!」
嗜好係去葡京賭廿一點,但唔鍾意賭錢,只係鍾意計卡即係計出左咩卡黎緊會出咩卡等或然率,以前葡京一張檯用四副牌,而家一用就七八副已經唔係常人可以計到,再跟住「聽」到荷官出卡係暗袋出牌而唔係由卡匣出卡,亦即係出咩牌已經一早安排晒,跟住索性唔玩,但仍然鍾意去葡京,因為睇人點樣輸晒d錢都係樂趣之一。傾左好多好多故事講之不盡,但好多都係業內或者專門有關所以廢事講,但有個寓言故事佢好鍾意講:以前中國冇幾多個外國人,到而家通街都係,但佢同其他外國人唔同,其他果d中國人甚至佢地自己都只當係「蕉」,外黃內白,識講中文識聽中文,但完全唔明白中國文化,亦冇諗過去認識;但佢係「蛋」,外白內黃,因為佢相信要完全融入另一個社會,唔係只學果種語言,而係直接進入文化之中,所以而家佢自己同身邊d人都當佢係中國人一樣,只係差個樣未係,係中國亦更得人尊重。冇錯呢個係一個寓言,有冇思考到d乜呢,聽音樂的各位同玩band的各位?
至於點解佢會咁得意,上到黎唔係傾生意,而係同劉Sir吹成差唔多兩個鐘水?呵呵,或者因為大家都咁progressive同反傳統?又或者係因為
「您的普通話帶香港口音,我的普通話帶西洋口音,大家都不純正,所以大家都聽得懂對方說甚麼!」


今天的呃假計劃,唔係只得我一個人共事,仲有會計靚女一齊,即係我新年之後都係放一日例假遮,佢仲要放足兩日先捨得返工,
「黎緊禮拜五有街出又要請假,唔呃多d假邊夠放呀?」
隻中國鬼佬走左之後我撻低訓覺等埋佢一齊收工,噉就多左半日假喇好野。一點零走人仲有兩個鐘先開舖,近來好多雜務,襯有時間快快手手搞掂埋佢。即係返工返左年幾,係正公司樓下檔整電視有個分線器掛正門口,朝朝經過都見到、日日都話要買、次次都唔記得左,琴日舖頭條線終於玩殘,今日出到黎就幫手清埋個貨佢啦。真係清貨,個分線器拎落黎果時係成舊野封晒塵果隻,老細見呢舊野終於有人買都好感動,俾完錢之後我亦用最高速度脫逃,因為果時佢係度整緊部DVD機,居然係用《十個尿急的女孩》黎試機,我都唔多好意思阻住佢啦。
仲有咁多時間,冇理由唔落新之城兜番轉,部渣古終於整番好可以雙打,隻game出左咁耐高手開始出現,一舖打到最後大佬,不過最後大佬高達基本上冇得玩,首先打全武裝型態一發炮係成個畫面都係流彈飛彈迫你避,跟住變番正常型態仲死部高達超音速飛行d彈仲要快到一開槍即中噉滯兼一粒彈可以扣你三份一,仲未意識到發生咩事果時已經閃左去你前面劈你一刀,你只見其影之後已經中左N咁多槍X咁多劍,屈機的。但呢條友玩到咁後唔係因為好勁,而係用左偽皇道之肴底戰法,即係射一槍立即匿埋再彈出黎射一槍再匿埋週而復始,因為槍game係靠槍頭係咪指住螢幕範圍黎detect攻擊定係閃避上彈,所以用手指遮住槍咀黎閃絕對快過同慳力過成支槍郁,同時隻game有個bug就係你每次閃出去開槍果時有四份一秒左右無敵時間,即係你隻手指不斷又開又閂個槍頭係99%屈爆機,亦只有用呢招先可以捱到去最後,去到第三關起敵人無論數量火力定速度都係老屈程度。但我係一個old-school人,呢種new-school玩法我始終唔多鍾意,仍然係成支槍噉郁黎閃同勇字當頭衝出去狂射噉先係打嘛,所以跟住同阿Rock兩個人打果舖,勇過頭怒射射到唔想匿埋係噉中好Q早就死左,但噉好玩架嘛。不過今日最大得著係原來打大佬果時可以出超必:打大佬果時,有時可以用特別方法例如適當時間用火箭打到佢企係度出chance位,chance位果時只要射滿行special就可以即出一擊必殺超必「修羅雙連擊」,大大段動畫影俾你睇兩部機點樣狂射機槍再埋身拳腳最後交叉熱能斧一招KO!嘩原來有咁正玩到今日先知!立即對呢隻game更加有興趣!
打完機仲有最重要工作:買線。開頭我以為紅白插頭呢dCD機線咁普通野一d都唔難搵,喂好普通架咋喎係打機都見過啦,點知真係行勻先達再行國美加行埋影音舖都冇,呀唔係影音舖有,不過最平果條都兩舊幾水你買唔買?
「我用黎焚metal遮大佬拎黎聽hi-fi咩!」
最後要行到去旺電先搵得到,嘩頂係咪真係難成噉呀?更抵死係買完之後先發現,原來買錯線用唔到!
「好在仲有絕招!」
可能經過琴日群埋晒成班傻仔,個人都(_)埋一份!

或者琴日之癲狂症狀遺害太深嚇到今日冇人敢上黎,連107都唔開因為要上廣州玩(玩咩請自行想像啦,佢就正啦今日差唔多成個中國度度都零度以下,我地香港有成十幾度!),是日絕對寧靜。今日節目係PAIN OF SALVATION全線。聽完只有一句:
「神呀∼∼∼」
真係好神。可惜,個名唔係DREAM THEATER。就係差左呢樣,同埋冇乜solo,加埋唔係美國,所以紅唔到。

收舖之後,唉阿Rock又係你,搞到又去打番舖機。九龍城龍珠樓下間機舖,當年仲有黎蒲果時已經係year 1幾十年前之時,果陣仲係玩緊打鼓機二代,呢度三蚊四首仲要低難度&唔會腰斬絕對係全港最抵玩,跟住仲要加到三蚊五首簡直係做善堂噉做簡直係玩完都感動,當時真係日日放學龍珠落車就黎煲番夠本,後來直接跳過我極唔鍾意之第三代一入就入第四繼續煲,唔記得左點解停左冇黎喇,一直到今日重返故居,鼓機已經變成V5即係唔知第幾多代喇,仍然係三蚊不過變成三蚊三首長歌仲抵玩,衰在會cut歌,就好似今日噉,玩三舖,三舖都係第一首就死,有次仲要係最後果個音先game over忝,絕世經典,即係其實三蚊一萬首都好,黎呢度打同出去打都冇分別:我頂籠都係玩得一首歌遮。
「頂!我發誓以後只玩"Depend on Me"!」
冇黎咁多年,而家連老細都易埋手喇,不過人面依舊,今日撞到果班差唔多全部都係街坊。馬機果群成群都係,大定已經由鼓機/拳皇/足球機/其他機升級到跑馬機了(估唔到而家連細機舖都會有呢d大機玩,證明世界真係難撈),但而家打咩機唔重要,重要係各位街坊仍然係度。想當年 - 五六年前 - 我係煲到全場最勁果位,加埋呢度難度較到好低,全隻二代所有歌包括今時今日仍然係唔少人眼中針之森巴"River Crossing"同經典fusion難歌"Centaur"都爆晒,但今日再出現,已變成墊底果個,好似今晚打左一舖果位靚女,直頭係住真善美村我隔籬耐唔耐都會撞到佢,二代開始同我一齊係呢度煲,今日都仲有玩即係煲足六年,係左手鼓手勢仲要超級唔正確,練左六年,反而練到自己一手左手鼓出黎,唔正統反而有優勢因為鼓機唔少歌係作到屈右手人,加埋日子有功,連打三首高難度長歌完全冇難度,拍子捉得比我準N倍仲要好多神乎奇技之combo全部perfect連晒 ,最後一首係我的最愛"Primal Soul"(長版個鼓佬同結他佬直頭係黐晒線,有d位仲要非常ANGRA!),呢首曾經難盡一時之經典長歌好簡單就過左。再睇睇自己。噢。收晒皮了。仲有個個樣似智商問題的肥仔以前又係成日見到佢,當時佢只玩一首歌:Puffy,仲要係basic兼較埋auto bass,都有d天份架用auto bass打呢首差唔多拎100% perfect架!而家唔知又玩成點?可能已經成為左隱世高手第一首已經"Primal Soul"單手過,唔係冇可能喎你唔覺呢首歌冇乜雙手位咩?而家先玩番已經太遲了,玩來玩去只識玩舊歌,新果d一係太J-Pop冇興趣一係難到飛起已經冇心機練。我都係繼續冷血殺手算。(......)
未有網吧出現果時,九龍城呢頭d機舖已經執左一間又一間,連九龍城金星霸都執埋,冇諗過呢間又細又唔係多機,居然會人人執晒佢都未執。呢間機舖已經陪伴左各位街坊渡過差唔多六年光陰,已經成為佢地生活之一部份。可惜我已經退出江湖了。今晚得見,不勝唏噓。

呢間機舖雖然黎得耐,但隔左成兩三年冇蒲頭又轉埋老闆,而家連個招牌都係得「遊戲機」大大隻字,諗黎諗去都諗唔起呢間叫咩名,一返到屋企,立即摷番讀year 1果時份常識功課出黎
「係喇!呢間機舖叫堅駿!」
冇錯係摷份功課出黎睇番呢間機舖叫咩名。year 1常識係教通識做香港文化研究,果時份小組功課星期一present,傾到臨present之前果個禮拜尾都仲未揀到題目資料搜集完全冇做過,最後係我拎番中六電腦堂教PowerPoint時做果個用PowerPoint 97已經玩到好似flash咁精彩之「遊戲機研究」present file出黎(用過Office 97再用Office XP明白兩者功能之差異,就會明白當年我點解會成為傳說中之PowerPointer!呢個present後來仲成為左學校電腦堂之製作PowerPoint教材!)(「話時話,你用左我個PowerPoint教書咁耐,原創者我到而家一蚊都未收過喎阿Sir!」),一個禮拜六日將一個PowerPoint變成「香港遊戲機中心文化研究」萬言書,present果朝仲要遲晒到臨出場先返到去,跟住一條友霸晒成個present(「黐線架呢條友!」),基本上全份小組功課係我一個人包晒搞掂。因為個題目再因為個PowerPoint,在場所有觀眾睇到O晒嘴,連教授都話
「我從來未見過有人做呢個題目!」
中學有呢個PowerPoint同《丁舉人》,教院第一年已經有呢個打機文化研究,你明點解一直以黎劉Sir都咁cult嘛?既然份功課仲係度,或者好似《丁舉人》噉擺埋上黎留為紀錄。不過有機會先啦,大佬真係多字到仆呀!小組功課字數上限係三千字,果時齋我寫果part都差碼多一倍啦!有時間執一執再(可以的話)縮番短d(「即係唔可以啦!」),但實在太忙真係冇時間,因為我要
冷血殺手!!!」(......)



9/1/2007 TUE

唉唔好提呢兩日。有個同事放放下假人都唔見埋,本身佢跟開d野要自己跟番,拎番佢本身做開果d野黎做下先知道,
「嘩原來我個位平時做咁少野架咋?」
嘩好好好好耐未試過做咁多野喇,一做多少少就捱到病左非常辛苦。冇錯劉Sir龍體係唔捱得苦的,你千祈唔好俾野佢做如果唔係就好似呢兩日噉立即摜低,雖然平時冇野做果時你見到果個劉Sir都係同摜低冇乜分別。所以而家做緊呢間公司千祈唔可以執笠,一執左就大劑:
「仲邊度有第二間公司好似呢度咁頹?」
同埋,仲邊度有第二間公司可以劉Sir話要放假就放假?(呢樣野搞騷果時好緊要)


寧靜的一夜,寫下字聽下歌食下野。打個電話去大家食,
「而家我地唔整包心丸喇,你叫包心丸的話我地俾龍蝦丸你架咋!」
「點解呀阿姐?我幫襯你地都係因為你地有包心丸叫咋!」
「我地老細落左柯打,話唔再做包心丸喇!」
「何解?」
「老細冇講呀!佢同包心丸檔個老細反左面卦!」

又唔想食新旺想試下新野,今日叫番新明威,一個麵加三個送再加多杯野飲先收你廿蚊,喂抵食到喊啦真係廿蚊夠食到你飽喎!當然一分錢一分貨啦,係多,但d野真係唔多好食,純粹過下口癮同滿足執到小便宜心理,但對於膚淺的劉Sir黎講,基於「夠恆的metal = 好聽的metal」定律,
「夠多的food = 好食的food啦即係!」
一面聽,一面再黎PAIN OF SALVATION,一隻碟成個幾鐘舖頭煲全線唔夠時間架喇,再重溫番"Perfect Element I"同"Remedy Lane",唔使問架喇PAIN OF SALVATION點都係我最鍾意progressive metal band,幾隻碟買左三四年,聽左咁多年到而家拎出黎聽,仍然係每次聽都有新發現新驚喜,聽極都好似第一次聽咁有大衝擊。冇錯我係佢地fans,雖然唔太鍾意囂張人士。
就係咁蹺,今晚聽緊PAIN OF SALVATION果時,有位朋友上黎一次過掃晒佢地全線。值得的,因為絕對好聽同襟聽,齋睇歌詞一隻碟都夠你睇一/幾個月,"Be"一隻碟,直頭用夠你大半年時間先研究得到佢地想講乜。所以見隻碟月底先出,已經有人可以download完兼「聽到厭啦」,只覺得好神奇。



10/1/2007 WED

今日請病假。想知劉Sir到底係真病/請病假定係假病/請例假其實好易,假如係請例假,電話中會同老細噉講:
「老細今日我唔舒唔服返工有野唔好搵我我要抖抖係咁多拜拜!」
以上全句大大聲三秒鐘講晒。如果真係病左請假,個電話會係
「老細呀?我呀係我呀...今日呢,我,我呢...你知啦,有d野唔係太好意思講架嘛...我...係呀我想請假呀...係呀病左呀我,今日我返唔到工呀,陣間去睇醫生...我唔會熄電話架有事就打俾我啦...我抖下先喇,拜拜...」
要細細聲加拖泥帶水地講足成個字。想知果日劉Sir請邊種假,好易。
琴日已經好病其實,加埋晏晝有客要見,食埋個飯狂拍Panadol撐到放工再開舖到今日先放假,因為今日係星期三嘛。而家連病都盡量到自己星期三先黎請病假廢事開唔到舖,同埋呢日一次過放成日假係爽d。不過一月已經噉樣請左兩日假,死黎緊十一個月都唔知仲有冇得噉樣玩法!仲要留番d假搞騷忝?(假如真係有騷搞的話&TRHK今年都仲未執的話)


難得有日留係屋企,除左大把時間打機,仲有時間執番好多野,例如:

HONOURABLE MENTIONS

因為今年第一個禮拜已經玩得好癲關係,到而家先睇番上一/幾年。簡單回顧:



11/1/2007 THU

放左日假,又返到公司,一開機見到廿幾三十封email...喂灰喎我好耐未試過真係真正要返工喎!做呀做呀好多野做...點算?當然係出絕招啦:
「老細食左藥好眼訓頂唔順我訓覺!」
搞掂。


「...有冇邊日TRHK可以正常d???」
(有,星期三同埋冇人上黎果日)



12/1/2007 FRI

近來唔知點解咁多客要見,所以終於見到劉Sir著番對鞋,冇錯你要劉Sir著鞋著襪確係有d難度,因為無論咩氣溫咩天氣即使幾凍就算落雪都好佢一樣踢對涼鞋就返工,要佢肯著番對鞋出門口,唯有要見客果一日先叫得郁佢。非常得閒地今日七點幾已經起身出門口,點解?因為會計靚女有coupon,落柯打早餐要食肯德基。
「喂!大角咀呢頭邊度有肯德基呀?要去到奧運站先有喎咁遠!」
「噉你咪返工果時經旺角買埋囉!」

又得喎!所以今日唔係出大角咀小巴直出,而好似開舖噉搭巴士去旺角買完雞再行番過去大角咀。七點幾起身似乎真係早到傻左,因為由出門口到巴士站搭埋車落完行去買埋雞,夾埋都唔使半個鐘,跟住超龜速躝去大角咀,返到公司都未夠九點。立即得到老細之表揚。
「睇你條衰仔日日都遲到,今日居然全公司第一個返到,有心改過好事黎呀下聽日起都係咁早唔好再遲到喇下!」
就因為老細呢句話,我決定以後無論幾早起身都好都唔會早返到公司,同非常後悔今日之勤奮。好少地方會有KFC,食早餐亦好少會諗起食呢間,不過食得果幾次,次次都覺得KFCd早餐好正,特別係今日呢個17號餐,有coupon平三蚊計十九有一碗 通粉加一塊雞扒加多個鬆餅,舊鬆餅超好食麥記果d絕對比唔上,舊雞扒又係正都唔明點解正餐冇得叫,係個通粉差左d不過食晒幾飽下算係噉啦。食完早餐仲有半個鐘頭先見客,都幾唔得閒呢半個鐘,因為為左見客好好睇睇要紮番條辮。立即捉左會計靚女入廁所幫手。
「你唔識紮辮架?」
「唔識架!」
「唔識你又留長頭髮?」
「留黎fing架咋!」

食埋藥見客,昏昏欲睡,好在呢d場合一向係老細同客傾唔使我出口,我係度釣魚(...),釣釣下個客就唔見左影,即係要開始做野。(...)呢個禮拜除左禮拜三冇返之外忙足咁多日,好在到今日差唔多清晒所有野仲有時間上下網寫下野,為左慶祝我變番做一個正常人,靚女再次貢獻出寶貴的肯德基coupon。
「喂,點解你會有咁鬼多coupon?」
「我係肯德基之友嘛!」
「點可以做肯德基之友?」
「每個月最少叫三次雞,每次消費五百蚊以上就得架喇!」
「頂砵蘭街咩!」

就係噉,晏晝又係食雞,八條友分左兩個半餐,唔知點解雪櫃會有啤酒,跟住拎左出黎劈住啤食雞。戇居架班人食lunch咋喎。可以咁猖狂,因為老細今日唔係度(冇錯又唔係度呀!),成班人先可以咁黐線。再「捱」多一陣,噉就下午茶時間,喂呢個鐘數梗係要食野唔通仲做野咩!會計靚女走入pantry刨生果食。我都係入去刨野食。我將lunchd剩餘物資收集,再拎把搽牛油刀將d粟米一粒粒噉刨晒出黎撈落個肉醬意粉度。
「牛油刀倔,點解用牛油刀黎刨?」
「就係貪佢倔,刨一大輪先整到一粒仔出黎,夠晒浪費時間!」


唔知點解,前幾日都唔算好差,甚至平日黎講叫做幾好,今日變番做無人島物語,靜到飛起,我係度食意粉,107係度等運到。點解會搞到噉?答案已經講左。覺唔覺前幾日同今日分別係乜?冇錯,就係前幾日107冇蒲到頭。係架自從佢開左107之後,真係次次佢開親舖之日子,108都冇好日子過,真係架咁多年都係架呢樣野!好在而家我都唔弱,輪到我邪番佢轉頭,今日佢冇生意時我都冇生意,大家攬住一齊死!
...但,噉又何苦呢。打機都冇心機今晚靜到真係。灰到呢個程度,係相當嚴重。


返到屋企,宵夜係,葡撻。冇錯今日係KFC之日,一日五餐都旨意佢。所以而家咁肥。

今日會咁靜,可能係因為暴風雨前夕,因為...



13/1/2007 SAT

今日,點睇都唔正常啦。最常見的客人係師奶,同自由行。琴晚十點幾臨收舖同今日一開舖各有一個師奶走入黎,兩個都係搵power metal,兩個都係「買兩隻有七五折架呵」,兩個都係「係呀我係買俾自己聽架」,兩個都係「之前聽過下dpower metal野,發覺自己鍾意聽,咪上黎買碟聽下囉」,兩個都係「係呀真係我自己聽架邊個話我買俾個仔架師奶唔聽得metal咩!」有段時間,TRHK仲變埋皆旺景點之一,唔知點解好多(似)自由行會走入黎「觀光」,最熱鬧果舖試過多人到連我都迫埋出去,而班人係可以好似睇天壇大佛噉睇,係差未影相。當知道今日最主要客人係呢兩樣,你就知道今天又是收皮的一天。好易估到,今日上黎果班同樣唔正常。成班友好搏命噉研究107隻「超鷹霸」,兩部機械人可以變雀又可以合體做一部大飛機,通常呢d機都可以合體做一個大機械人,包裝上面都大大幅相有合體之後個樣,但係玩落發現變極都變唔到。好明顯呢隻祖國出品個設計差左少少擺到明係合唔到體(唔好話合體,連各自變做個機械人都有難度),但成班友死唔信邪係要完成呢個不可能之合體,好明顯係悶到傻晒,變型又變唔到合體又合唔到呢隻野都係算鬼數啦,但最正果樣係部野把劍,呢把劍我到而家仲珍而重之噉保存住。跟住節目係索火機,同落樓買啤上黎劈,同好多好多無聊野。算啦呢日似乎收皮算數會更合適。

「咪住!」
冇錯,仲有一樣野。
「暴君薯圈!」
本來,呢個係今日重頭戲之一 - 本來。食過之後,就知道咩叫做暴君大薯圈小。



14/1/2007 SUN
God's Children

「好野終於有貨喇!」
睇過之後,好唔對路:
「做乜而家賣埋hardcore野?」
因為都係band野。查實,TRHK好早好早開始已經唔止只賣metal,亦賣其他好多同metal有關之band sound,包括hardcore,而metal、hardcore同punk三者某程度上息息相關,有興趣不妨睇睇metal發展史。會賣呢批貨,係因為God's Child,相信呢間香港label之存在呢度唔係好多人識,甚至香港聽hardcore同punk果班都唔會知,就同TRHK之情況一樣,原因亦都一樣。既然香港入面佢地冇人幫,大家態度同音樂又一致,點解唔幫?
假如因為賣呢d野、同God's Child呢間label有關係,而令到TRHK或任何有關人士遭受非議甚至更激進迴響,其實都預左,God's Child於本地hardcore界中之處境,就同TRHK於本地metal界之處境一樣:玩band果班同聽音樂果班心態永遠唔一樣甚至有衝突,而由有心人、真心人所搞之銷售點同廠牌永遠唔會受到認同。要知道人等自然會知道所謂何事同箇中道理。不過點都會,仍然會照做照賣,因為只知道音樂唔知道政治,同埋係有心同有質素之音樂都值得推廣。

琴日已經死,點知今日,仲死,成層除左檔彈面,居然只得107+108兩間開舖,唔止舖少,連人都少,成個晏晝都唔知有幾多個人上過黎。呢日唔係閒日喎係星期日喎!點解會噉架?
「係唔係條街有錢派而我地唔知?定係海嘯捲走晒所有人?定係發生生化危機,全部人變晒喪屍得番我地兩個生還者?」
一直到五點半先多一檔人開,不過客依然係咁少冇多過,就係咁死。我發現每次我地認認真真坐係舖頭入面睇舖果時永遠唔會有人,但一企出黎無無聊聊戇戇居居果陣就會有好多人經過,雖然經過唔代表一定會買野,最起碼有人先啦都。唔使講咁多立即擺番個風水陣先!湊夠四隻腳擔埋凳仔出走廊,再拎一副百變小櫻palying card(冇錯一定要係祖國出品之palying card先有效),
「鋤大D!」
唔鋤尤自可一鋤笑呵呵,風水局一開果然起死回生立即好多人&好生意!呢招大D招財果然使得!實在係估唔到咁好生意,鋤下一舖又執下一單,仲要清到好多無聊貨,
「不如我地索性執鬼左間舖佢,全職做鋤D招財團收人錢幫人招客,應該會賺得仲多!」
賺到笑又玩到悶,再加為慶祝今日咁好景加將咱們七之程度推上更高峰,我地將鋤大D進化成
「鋤大七!」
嘩正呀襯晒我地呀!鋤大七絕對比鋤大D好玩十倍,因為全部牌重頭計過,有陣時自己拎住副牌要諗足成個字先計到自己果副係咩(垃圾)牌,同埋拎住四條七絕對係爽到仆街(&七到仆街)。一玩就玩到食飯時間,今日有間新中國派外賣紙,第一次見立即試,好明顯大家都當左新中國係一間夜總會。一人叫個小菜or羹,d送用成個大兜裝食完碗飯都仲有半兜剩,除左包裝唔掂瀉到通街都係d野食唔太差,重點係三十蚊唔使食到飽一飽仲有剩抵食嘛呢間新中國可以再研究下喎。食埋個新中國,鋤大七進入第二重進化,派完牌之後開始之前先擲個銀仔,公係鋤大D字係鋤大七,噉先夠晒緊張刺激呀剎那之間定生死,拎住四條二以為自己好型點擲個字玩鋤大七立即硬膠。因為其他對手太強唔夠佢地鬥(應該話對手太七唔夠佢地七),我發覺我贏果幾舖,最少有兩舖都係拎條三條七再搭葵扇二加紅心二,逢係呢個組合果舖就贏硬。
「超!咁好牌鋤D鋤七都得,邊個拎都贏啦!」
最強果舖勁呀兩個五隻加對啤煙噉就last card,唔係坐我下家之107有對啤二殺到我對啤煙呢舖真係一round爆機條友一隻都出唔到,嘩呢隻game絕對係樂趣無窮呀差少少玩到連舖都唔捨得收呀!繼「有冇五十蚊」鋤大七將會成為TRHK另一指定遊戲,我地正計劃緊開發鋤大七專用啤牌,跟住申請專利上市,再爭取將鋤大七納入奧運競技項目。錯過的朋友唔需要擔心,
20070124 trhK MKII,鋤大七再現江湖!」
鋤大七大賽除可獨得鋤七里七號豪宅一棟, 仲有鋤七盟盟主107帶你去世紀夜總會同星野亞希一齊鋤大七!(生性呀阿捷!)



15/1/2007 MON

今日我做左非常錯的一件事。搵左成個禮拜,今日終於有個新同事返工。呢一日,我奇蹟地居然準時返工,呢個月除左幾日前晨咁早去食雞之外,只有呢一日係冇遲到,連我自己都嚇親。跟住非常忙做足成日噉忙,忙到連招呼新同事都冇時間,最後忙到居然6:02先走得人,遲左兩分鐘。好充實今日。
「咁充實幾好丫!」
「好鬼!返到公司居然會做野仲要早到遲退,做壞晒榜樣俾新同事睇,教壞左佢點算?」



16/1/2007 TUE

為左矯正番新同事對呢份工作之思想,襯今日一早做晒所有野仲有大半日剩等放工即係回復番正常返工日子,特別為新同事灌輸番入黎呢間公司返工之正確觀念:
「拿!我地公司返九點三,不過呢正常黎講我地呢冇九點四九點五都唔會見人...呀講錯唔係我地係我遮!」
「咁多位同事返到黎第一件事,通常唔係開電腦,而係叫早餐食,呢樣野係我入左黎呢間公司之後先開始架,以前返到公司冇人敢叫早餐同食埋早餐先做野架!為左紀念劉Sir的功德,而家各位女同事每朝早叫完早餐,都會自動自覺貢獻半份俾劉Sir!拿拿拿識做啦!順便提埋你,劉Sir鍾意食餐蛋治!
「我地公司逢一三五九點半開早會,即係大家食完個早餐就夠鐘開會,呢三個朝頭早劉Sir通常會早d返黎收早餐 - 通常遮不過十次有九次都唔會!雖然係噉,唔代表你唔需要交出貢品!」
「開會呢家野其實冇咩好做,都係坐係度聽老細吹吹水噉,不過老細好長氣架,次次話冇咩野跟都好唔講番半個零鐘唔心息!所以開會果時最好就係訓覺,瞌緊果陣老細見到你釣緊魚時個頭點下點下,仲會以為你好認同佢所講更加開心忝!」
「十點至十二點呢段時間係屬於回氣時段,通常早起身實冇乜精神做野,呢兩個鐘我地...我都唔會做野,齋對住個芒瞌下瞌下,抖抖訓訓之餘仲可以warm up。」
「warm upd乜?梗係食飯啦!拿我地公司叫飯個規矩係噉,首先由我睇睇餐牌今日有咩飯,跟住提醒各位同事今日有邊款飯好食,你可以發表意見,不過你食邊個飯最後決策權歸於劉Sir,呢樣野講定你聽先。」
「叫左飯之後,通常好快十二點半到十二點九左右d飯就會到,跟住劉Sir就會主持配給飯送俾各位同事。呢個配給手續當然需要收取手續費啦!所以食飯果時見到自己個飯盒唔知點解冇左大半盒又或者唔見晒d送得番d飯,唔使驚訝架食多幾餐就見怪不怪架喇!」
「呀,有關食飯仲有條規矩唔可以唔知,就係如果你係叫茶餐特餐呢d一碗麵搭餐包奄列同其他野,食完碗麵同飲埋杯野好停口喇剩番果d全部收歸劉Sir作下午茶用!一定要記得呀呢樣野!」
「食飽就梗係訓啦!食完飯都差唔多一點半,得番半個鐘時間休息梗係要珍惜每分每秒,不過通常我訓親就起碼訓番個零鐘兩點三兩點半先起身,老細叫又點呀我係唔醒呀吹呀!...吹下水噉遮老細叫到又點敢唔醒丫真係!」
「訓醒匿入廁所瞌多陣,出到黎就三點夠鐘食下午茶,我下午茶時間係三點到五點,呢段時間我個位見唔到我,因為我一係匿入廁所訓覺,一係匿入倉訓覺,一係匿入pantry食野,如果我下午茶期間你想搵我就去呢三度啦!」
「拿講明先呀!pantry入面果d麵包,同雪櫃入面果d花生醬呀芝士呀全部我架老細都唔敢食架!冰格d雪條掂都唔好掂忝呀我警告你!」
「你想食野?得!自己買囉!不過買到返黎,先俾劉Sir檢查一下,如果有必要佢會扣押一部份,呢樣野個個女同事都知道同遭遇過架!試多幾次就慣架喇!」
「五點鐘食完下午茶,就係時間開始執野,有樣野好緊要千祈唔好唔記得呀,一到五點半鐘開始,我同會計靚女兩個會輪流入廁所三個字放水呀打電話呀補妝呀,你要去廁所的話五點半前好搞掂晒呀下!」
「拿我地全日最有效率就係放工,通常五點搭十一熄機熄芒,我同靚女一個企定係打卡鐘隔籬等一個出去等定電梯,準時六點走一分鐘都唔會遲架!自己醒定d執生喇下!」
「死!顧住同你講,講下講下原來六點零一分!蝕左一分鐘忝今日灰到爆!唔Q理喇走喇我!」

...講左成日,好似剩係講自己點樣返工,冇教過同事應該點樣勤力工作忝。



17/1/2007 WED

超級奇蹟地,今朝七點幾已經起左身,點解?唔慌好事啦明顯。返工前先出一出旺角,黎得呢度當然要負責埋買早餐之工作啦,今日朝早會計靚女要食麥記早晨全餐,我當然係食多餐KFC呢間野d早餐真係大件夾好食,今日抽住大大袋野食返公司,返到第一件事係兩個人立即霸住間pantry攤到一檯都係野食大模廝樣地開餐,惹黎眾同事側目。呢排實在太過囂張了,為免新同事跟從劉Sir呢個「好榜樣」學壞晒,老細都忍唔住出聲喇:
「衰仔!今年想唔想有人工加先!想有得加人工,從今以後唔好再遲到,同埋搞掂你個頭佢唔該!」
灰呀好灰真係,要劉Sir早起身仲難過叫佢三點前訓覺,慘喇呢舖真係。至於個頭呢,唔使我搞啦我自然有專人搞掂佢架啦!今日開始,每日朝早節目之一,就係捉靚女入廁所同我紮好個頭先,廢事老細咁多聲。
「喂,朝朝早都要你幫我紮,不如你快d教識我點紮辮好過啦!」
「唔制!我唔教!」
「唔教你日日都要幫我紮咪仲煩?」
「教識左你自己紮辮,我仲點屈到你請我食麥當奴同KFC早餐?」


今天超級搏命高速工作(一睇就知佢吹水,真係咁多野做,條友仲點可以咁得閒坐定定成日寫多篇碟評?),一定要準時走人,因為有飯開。唔好意思唔係萬眾期待的trhK MKII,因為今日有位朋友生日所以特登唔揀今日(呵xN),仲因為上年年尾走左去大陸做野果位同事今日專誠搵我地食飯,
「我特登請日假由大陸走返黎香港,你地唔好放我飛機呀!」
即係我都好想請阿壽星仔唱K(哈xN),不過既然同事咁誠意拳拳我就無謂推卻啦。一搭正六點即時同會計靚女兩個衝落樓,今晚開餐地點,係食左一次已經返尋味之東大門,韓燒食過呢間之後永遠唔需要搵第二間,咁急過黎就係因為東大門實在太好食,遲過七點先到已經唔使旨意搵到位,我地六點半上到黎仲係得果幾檯仔客,不過唔使半個鐘已經全場爆滿喇。呢間野正在獨立間隔夠舒服又夠靜,野食唔算非常多款不過夠新鮮又好味仲送到埋黎唔使自己出去拎,最正梗係有咖哩角任食啦即黎兩盤先啦唔該!因為韓燒熱氣所以加多個火鍋,延伸出一個研究題目:
「肥牛係直接燒黎食好食d,定烚完之後先燒好食d?」
即係係唔係都係燒黎食一樣咁熱氣,仲因為呢個研究食得仲多過平時,好似加多個邊爐仲衰過唔加,但亦因為呢個鍋呢餐食得相當滋味,正呀呢間野如果再多d款揀同多d熟食會更正。呢一餐令同事相當懷緬上年仲同緊我地兩個共事之日子,
「返左大陸做野,八點返工食兩個鐘飯六點鐘放,大陸d人又個個臥虎藏龍人人都咁猛料同真係做野唔偷懶,返工果陣鬼死咁嚴肅,我住宿舍一到十一點全部人立即訓覺你冇得唔一齊訓,生活不知幾咁難頂!見到你地,好懷念以前公司咁愉快之生活!」
「唔係公司愉快,係我地兩個愉快遮!我地兩個返工不嬲當返去玩架啦!」

成晚好多野笑,雖然呢間只係一間好細好簡單之公司,都可以有好多大鑊野好多複雜野發生,單單野都好好玩好好笑好鬼過癮,亦因為噉我到而家都仲未太過想走。經知道大量八卦內幕小道消息之會計靚女爆料,我先發現原來今日之前,即係今朝霸住pantry嘆早餐之前,我真係好威架!話說2/1即係我當自己仲未使返工照請例假之2007年度第一個工作日,早會果時老闆特別宣佈:
「我發現各位同事遲到問題越黎越嚴重!今年我希望各位可以好好噉改善呢一個問題!除左劉義條衰仔之外個個都唔准遲到!」
真係架真係噉講架老細真係威到我都有d後悔果日朝早冇在場架!嘩死原來我頹頹下頹到咁鬼威真係我都估唔到!
「灰呀早知今朝早就唔請你食早餐啦阿靚女!肯定係老細見我請你唔請佢死唔妥我喇而家!」

六點半坐到八點半就俾人趕,東大門食我兩個鐘咁大把絕對唔夠我地,係好食不過得果兩個鐘邊度夠丫,所以食到飽一飽之後大家轉移陣地去cafe繼續吹。
「呢頭飲野我去開登打士街轉入去果間Life Cafe!」
「咦?咁蹺?呢間我又黎過喎!」

就係上次同METHOD玩層層疊果間,估唔到大家咁有緣都黎過呢間cafe坐。飲埋杯野吹埋水同事已經趕住走人,
「大陸公司返朝早八點,我聽朝要六點鐘出門口過關先趕得切!不過過埋呢個月,到時成日搵我食飯都得,因為我搵到新工,下個月會回流香港返工!」
佢讀緊MBA都仲未畢業,亦冇任何相關管理同人事經驗,已經搵得到個manager仔黎做,今年市道真係好左好多,好多工開價同高過上一兩年唔少,係出面搵個同我而家一樣職位座底多過我而家幾千,要跳槽的話而家確係最佳時候。但係我暫時未有動機同興趣。轉過另一份,人工高大半,不過要跑數,跑唔到扣番,計番都係死仲要辛苦幾倍;一係晨咁早返之後鬼咁夜放,就算做晒野都要坐到八九點先走得,老細都未走你敢唔敢走?咁勢利之工作環境會對住d咩人事,又係未知之數。更重要係我相信唔會再搵得到好似而家噉,每日返工就係等放工,坐係度自己上下網睇下野寫下碟評就一日之悠閒生活,冇乜野做多野玩仲可以做自己野顧埋舖頭同音樂。對我黎講而家自由同時間比收入更重要,將來同前途對而家黎講只係次要考慮。
「有d野放過左就係放過左,以後想追都追唔番。」
呢句說話第時再講果陣,希望唔會係後悔地講。


實在太飽,散席之後同事同靚女呢d住到新界唔知邊忽咁遠冇得講啦,我就選擇行路返屋企。回程係王菀之新碟《詩情.畫意》。前年衛蘭、王菀之同謝安琪三個女新人非常睇好,謝安琪唔使講啦我係佢超級fans人人都知,衛蘭第一隻碟"Day & Night"都幾鍾意,諗住之後會繼續噉樣唱jazz落去,點知跟住隻碟已經大路到冇乜野聽,然後一年出N隻碟,變成「識唱歌的K歌女歌手」之後已經冇晒興趣,因為除左唱得我更想音樂有格;王菀之唔使講我心目中而家香港流行音樂最無敵歌手之一,除左唱得仲要作得,雖然把聲好多人唔鍾意因為太cutie太尖太雞仔,唔緊要我受喎呢把聲反而係賣點喎,當其他個個把聲一樣(&都唔識唱歌)果時,呢把都唔知幾好聽,況且一隻碟比一隻碟唱得好,而家香港除左佢之外要搵一個可以唱歌唱得咁有感覺咁有個性之女歌手,我搵唔到。另一個鍾意之原因係歌甚至詞都係自己寫,始終自己唱番自己寫d歌會更有感覺,而且編曲之班底實在好勁,上一隻"I Love My Name"唱唔係最吸引,歌先反而殺晒,有好多位唔知係特登定冇心,聽果陣硬係覺得有心玩下野陰下人,好似《小心易碎》第一段前半鋼琴一路彈住一個單音,彈出黎似撞chord又似夾到好特別,初初聽果時真係連續repeat呢一段仔幾十次剩係為研究呢一個音,去聽係咪真係想撞音同點解要噉撞法;《我不想起》個交響樂intro流行歌黎講勁長勁大段,仲要係玩到好似惡魔城咁邪門,又係齋為呢個intro不斷重播呢首歌。至於最經典之《雷電》更加唔使講,詞只屬一般但編曲完全奪命,聽到而家都仲疑惑緊:
「呢首到底係咪真係流行曲黎架???」
可惜新碟唔知點解冇晒呢d野大路左好多,當然佢唱同寫加埋編曲班人夾埋質素梗有保證,但聽王菀之始終係想聽另類野、聽唔pop的pop歌,「好聽」同「有驚喜」要揀我會揀後者多,而家米已成炊隻碟又真係好好聽噉冇所謂啦大唔大路都照係噉聽啦。自不然會拎黎同謝安琪比較,兩者之分別係,曲詞兩樣都係,謝安琪切身d、真實d而王菀之童話d、夢幻d。唔難明白點解我會咁鍾意謝安琪,發夢係開心,但面對現實之時間絕對比發夢時間多,點開心始終要面對番唔開心之現實,而謝安琪正正做到將現實反,講到俾你聽呢個世界有咩開心同唔開心,但講出黎你會覺得好真好貼身而唔係虛構夢想。正如聽metal,都係因為當中果份糜爛真實感而會投入,真係因為聽metal好威好型先聽咩你以為。
所以你見近排TRHK夜晚唔係播metal野,而係謝安琪王菀之輪住播,好聽嘛pop野唔好聽咩?其實幾有興趣搵番d中文pop野聽,雖然幕前唔多掂但我一向幾鍾意某d香港幕後單位,同埋上年好多實力新人同唱作人出現,相信有野聽同好聽之中文歌手&中文碟唔會少,只不過時間實在唔夠,自己又唔係聽得多,有機會先再發掘啦。生有涯、錢有限矣。

就係咁應景。返到屋企,電視播緊陽光衛視,大陸電視無論電視劇定資訊節目一早已經超越香港Nx10咁多條彌敦道,而家我屋企得閒無事都係開個大陸電視台黎睇。個節目叫《百年姻緣》,今集講「北京最知名樂團」暗夜公爵兩個結他手,點樣周旋於音樂、理想、金錢、社會、生活、人際之間。非常特別之一集,由大家開始聽音樂講起,兩個rock友點樣研究音樂、點樣練結他、點樣聽音樂、點樣為理想同現實之衝突妥協同對抗,一個後來開左間打口舖,另一個為自己隊band投入到幾近歇斯底里。好似好行貨好普通(雖然呢d咁行貨咁普通之電視節目香港都唔會搵得到),但特別在 - 睇節目名都知 - 係從男女同婚姻關係睇呢兩個rock友,而唔係社會或者商業角度。算啦香港你呢世都唔會有呢類節目架喇。記得當年A-Level讀中化,有一課書係講生活,有提過咩「物理層」、「生物邏輯層」、「生物文化層」之類,簡單黎講係話人要發展文化同思想,最首先要滿足到生活同生理需要,即係有飯食、有地方住、有番咁上下積蓄,先至有條件/有資格去追求,假如你連搵兩餐之能力都冇、生活要求都應付唔到,再去追求文化呢樣高層次,「噉樣為藝術而犧牲」法,只係一種愚蠢之自棄同自毀,亦即係節目中兩個北京rock友之情況,堅持同艱苦左好長時間,大家終於完到自己之理想,可以於生活中兼顧到樂團之經營,但節目之中分享番,期間係經過好多辛酸,亦為自己同身邊人作出過好多妥協,亦為達到今日放棄同犧牲左好多野,最起碼用相同努力,一定可以賺更加多錢生活比而家更輕鬆先。但係佢地開心。節目中其中一個分享係
「就算我有錢,都不可能有這種生活。」
黎呢度多都知道劉Sir係一個玩世不恭、遊戲人間的傻仔,而我一向崇尚做一件事唔係為錢而係為意義同價值,因為咩都為錢而做,你好多野都做唔到,亦要被迫麻木同盲目追求好多野付出更多無謂且多餘之努力,有d事亦可能要違背自己理念同思想先做得出,要噉對自己我先覺得辛苦。所以我會支持為音樂同理想作出金錢同前途上之犧牲,但我唔係鼓吹呢種「愚蠢之自棄」,正如呢兩位北京朋友其實都唔一定成功,唔係開打口舖果個有一段時間過左兩三年無業生活,如果佢後來起唔返身就唔會現身節目當中,只係萬千墮落例子之一,而相信鏡頭以外呢d墮落例子絕對唔止萬千個咁少。路係自己揀,行到最尾係好係壞亦係因為自己揀,不過行路之前,都需要顧慮番自身之能力,同將來會承擔之責任,亦即係難免需要用番世俗一句:「識諗」。你見劉Sir可以使錢使得咁豪話使就使、成日玩乜玩物去邊去邊、可以發咁多癲,真係多錢得滯同完全唔使唔需要顧後果咩?只不過做之前度好晒:呢度使多左蝕多左十蚊,咪第二度食少d用少d慳返番黎,呢度賺少左錢唔夠,咪第二度搏番d捱番下辛苦番d補番。串d講句,以我而家之學歷同能力要搵份工賺錢多過好景過而家一倍,又何嘗唔係冇可能丫,真係「識諗」的話,仲點會留係TRHK付出咁多時間同錢俾人當傻仔,同為就間舖仲屈係而家間公司仔度頹搵得果「少少錢」?只不過而家「開心」完,第時唯有辛苦番d補償番而家之「透支」,只不過到時因為少壯不努力而有多徒傷悲就係需要顧慮之問題。每行一步前都需要諗清諗楚先行,將將來之「報應」減到最輕,追尋理想同隨意而行時,適當之「識諗」係必須。
幾位有關係人士,自然會知道點解我會寫呢段野,唔(止)係寫俾自己,係寫俾幾位。最後都係同一句:
「有d野放過左就係放過左,以後想追都追唔番。」
呢句說話第時再講果陣,希望唔會係後悔地講。各位同我都係。



18/1/2007 THU

日頭唔使問啦你知我幾得閒架啦。(...)近來養成良好習慣,每日放工之後開舖前落新之城打番舖Time Crisis 3或者渣古先。Time Crisis 3冇玩到咁密少少生疏,不過仍然keep得住逢玩必爆只係可唔可以perfect爆機遮。唔知點解次次放工後呢段時間落到去部渣古實係冇人玩,呢輪多番d機會玩呢隻,又好好彩每次玩都有勁人一齊夾雙打,可以去到單打去唔到之第二關大佬。當玩到第二關,已經明白到呢隻game真係唔可以用正常玩法成支槍郁走黎閃同上彈,因為d敵人太多&太快,如果唔用遮槍咀方法,未支力死齋閃完入番畫面搵敵機射果半秒已經夠俾人射死,而由第三關開始敵人閃到飛起d大佬更加係光速飛行,只有new-school玩法先有可能唔死 - 係唔死咋唔係爆機呀,最後個大佬阿寶完全令地球人感受到新類型人之恐怖。但我會堅持old-school玩法,成支槍fing黎fing去噉玩。即係,要繼續跌錢。呵呵呵。

呢排會少見我online,因為屋企部電腦又死左冇晒driver又上唔到網,不過冇乜動機整,間中用部手提上一上網睇睇之後,其餘時間全部拎黎打機,近日養成之良好習慣係每晚起碼打爆Punisher同圓桌武士各一舖先訓覺,基本上部電腦仲玩到呢兩隻game就得架喇聽唔聽到歌上唔上到網已經懶理。記得契爺寫過:
「為何周遭的玩音樂聽音樂的朋友,都是認為去付上精神金錢青春去追捧樂隊,每日大任務就是去追蹤『 行程』 :今日有什麼新band在MySpace,逛唱片鋪巡視有什麼別人不聽又冷門但自己根本買了不聽的極端金屬...將自己完全地奉獻給一些素未謀面又從未知何許人的樂隊身上...換來豐富的『音樂知識』...」
死,我發覺呢d野我好耐冇做過,唔好話上MySpace,我連上BBM同forum甚至上網睇review都冇乜試過了,特別係而家部機都壞埋,更加連諗都唔使諗。自從互聯網越加入侵各位生活,「識聽metal」已經由起初metal呢個字提都冇人提年代之「識CoF、BODOM先係識聽」,到後來開始多網頁講metal年代之「識細label出冇人識果dband先係識聽」,到而家MySpace年代「聽超細一/幾人label出、樂隊自己搞label出碟果dband先係識聽」甚至「聽冇公司簽要自己出碟果dband/碟都未出果dband先係識聽」,我自問真係冇各位後生仔咁威咁型了,當我連網都唔上、部機壞左都唔整、寧願爆多舖Punisher都唔聽歌之時。睇黎我已經唔夠潮,同時代脫節左,唔配聽metal了,睇Henry哥拎最新一期Terrorizer sample上黎,隻碟十隊有八隊唔識,就知道我已經收左皮了。各位新一代、各位後生仔、各位型人/潮人、各位「識聽metal」人士,請過黎盡量嘲笑我。



19/1/2007 FRI

「爽呀!!!!!!」
爽到仆直啦成兩點幾先起身!各位觀眾,睇到呢度,都知道劉Sir又放假了。反正做到琴日差唔多乜都清晒冇乜野做,見d舊病差少少先搞掂,屋企部機又死左要整整,今日索性請多日例假,訓飽佢身體健康(「你每晚早d訓已經健康好多啦!」),順便救埋部機,部機已經壞到連dhard disk都調亂晒次序兼detect唔到開機個partition,確係時候換機喇。
「冇錯!換完機再加番個DVD Rom,就可以怒煲C&C全線!」(係好想但邊度有時間丫唉)
其實要整都整得番開機拆線再駁然後不斷轉partition入N咁多次Windows然後再用Ghost去recover就可以好簡單(...),但結果冇,因為懶(好正常大家都估到),同埋成個晏晝怒睇攻殼。拎番阿成隻《攻殼2 "Innocence"》DVD出黎,難得今日有時間即煲啦,仲連煲兩次,你唔係諗住呢套野睇一次會睇得明嘛?故事接住電影版第一集結尾,草薙素子失蹤,世界進一步同電腦科技結合令虛幻同現實之界線再加模糊,巴圖繼續調查日益嚴重之電腦犯罪,主線調查新型號人造人殺人,一路落去發現更多陰謀同更多吊詭。劇情同思想問題唔深究啦相信我絕對唔夠班講,講番d膚淺的我會睇得明果d算啦。呢一集已經大幅運用CG,我從來唔太鍾意動畫用多CG,一來CG同手繪之色調好難夾到,二來兩者之格數都唔一樣,手繪無論幾精細都總會睇得出有轉格走格之時刻(呢一份「raw」係我地呢dold-school人熱愛舊世代動畫之原因),但CG因為用電腦模擬可以做到比真實更順,亦即係過於真實到假之程度,同「真」之手繪畫疊埋,除非調度得好唔係好唔協調,好在《攻殼二》呢個部份做到好精細,更鍾意好多場面加入實景,同機動警察時代一樣齋睇畫已經夠晒震撼,非常多場面保留士朗正宗玄學風格,只不過到而家都唔明,點解外國同日本每逢畫親未來香港一定要非常好重中國色彩,又要尖頂屋又要木皇宮又要龍鳳舞師又要做大戲又要大頭佛又要關公,呢樣野好鬼抵死喎香港特點從來係位於中國但完全唔具中國色彩而全盤西化,而家香港都搵唔到呢d中國野啦,第時點會仲噉樣「退步」呀?真係行行下街見到有個關公棟係馬路中間我就驚喇!雖然第一集打戲佔好多,但呢一集重點落番文戲度,每場打得好短但場面同角度相當精彩,如果諗住同第一集一樣好多一抽一同科技戰術表演,唔好意思,呢度搵唔到。只不過個故事睇落簡單,但到後半段突然好多對話同內容一次過爆出黎,要完全理解同消化係幾難事,今日從頭到尾連睇兩次。導演非常精心之安排,係呢個科技同機械人世代當中,每四五句就會有一句係引經據典之詩辭歌賦,好故意地由機械人口中講出人文話語,睇住一班機械人成套戲平時對話都咁文縐縐,只會令人更加懷疑到底呢班係人定機械,呢個亦係我想連睇兩次之原因。第一次睇,係睇英文字幕;第二次睇,係睇中文字幕。中文配音冇興趣聽,因為聲線唔鍾意之餘配音果班唔多夠感情,所以兩次睇都係聽日文,有趣地發現中英文字幕都唔係完全一樣,有理由相信英文字幕係按照日文翻譯而中文字幕係後加,但兩個字幕之譯意都唔同,睇完英文版之後再睇中文會睇到同一場戲有兩份唔同內容,雖然都係同故事夾而冇衝突或者矛盾,但中文字幕之解釋同「原意」唔同,但我非常鍾意中文字幕,因為譯中文果班實在好照顧香港觀眾,可以搵到好多好地道之香港人中文,唔粗俗亦冇廣東口語,但一睇就有非常強烈之香港味道,有d無傷大雅唔會影響主線之劇情亦玩野地唔跟原意黎譯而自己作香港人先識睇先識笑之對白,而當你知道攻殼兩集電影地點都係香港,再加會心微笑。雖然廣東話配音唔多鍾意,但要對做字幕果班致敬。

「生死去來 棚頭傀儡 一線斷時 落落磊磊」
《機動警察》同《攻殼機動隊》,係廿十世紀末日本動畫兩個高峰。呢兩套動畫,早已超越動畫之範疇,甚至超越左呢廿年超過八成電影同動畫之境界。


積下積下,有好多野要去銀行處理,但連睇兩次攻殼發現銀行都收埋同夠鐘開舖,係屋企食埋人間極品公仔麵之後,行路出皆旺買埋碟都未夠六點三。
「嘩!咁早?唔使做呀?」
「冇錯!就係唔使做!今日都冇返工!」

仲有成大半個鐘先開舖,開舖前仲可以幫107做埋外賣仔去毓民牛肉麵執多碗再問毓民嬸買埋個萬能插蘇,都仲有幾個字set埋部機。好多朋友今日好關心:
「點解你會online架?唔使開舖咩?」
要大家失望了,TRHK未執,大家會見到我online,好明顯係終於搞掂左上到網啦而家!當堂七到冇J,你有冇見過兩條友隔住牆玩MSN?冇就真係要上黎睇睇喇!而家研究緊點樣隔住牆連線玩吞食天地!正呀黎緊大把野玩!不過今晚未有,玩住爆旋陀螺版Omega Lock先啦!
「嘩好七呀!!!」


返到屋企,收到通知:
「今晚有雲海聽!」
好好好耐冇聽過佢喇,miss左都唔知幾多次。唔知邊個係雲海唔緊要啦你知劉Sir會聽都唔慌正常就得架喇。今集講好多野,大家最期待當然係最後三分鐘眾目睽睽下UFO穿雲,但我覺得佢講佢上工廠大廈「捉鬼」果part先堅,講左幾個字,果陣成間屋黑晒一個人坐係窗口側邊開住窗打電腦,聽到後來真係聽到要開燈有少少聲都驚架今晚有料到。一向係佢fans不過好多集miss左,之後上電台搵file,儲埋儲埋仲有幾十集未聽 - 冇錯係幾十集,一集兩個鐘,即係...
太多野想做同未做了。

今晚重點,仲有謝安琪新碟《The First Day》,上年公佈2007年1月19日出,等呀等,唔覺唔覺原來今日已經係,metal已經冇幾多隊band幾多隻碟仲會有一出即買之心機,但謝安項真係見今日十九號夠鐘一出即買唔想等(冇錯劉Sir完全唔夠metal請各位專家落力恥笑)。隻碟得三首新歌,其餘九首都係舊歌新編即係remix,一買即聽,舖頭連聽N次聽到狂比人小(冇錯呢晚TRHK已經聽唔到metal),返到屋企聽完雲海再聽多次,結果係...當劉Sir呢個超級謝安琪fans都會遲疑,呢隻碟可能真係有d問題,等我再聽多N次,先再定案。只不過,呢隻碟音樂同label(已經躍身環球了),都令我好擔心...



20/1/2007 SAT

如果可以,今日我都唔想返工,唔係今日有客見同星期六返半日但請假當請全日,打死都唔返。返到公司,先接到靚女的投訴。
「琴日朝早我訓到唔記得起身,真係老細打黎叫我先醒起要返工,咁遲索性朝早請假算食埋飯先算,點知返到黎先知你條衰仔連工都唔返!早知我都同你一樣請假算啦!」
「唔好講住喇,幫我紮番條辮先,之後沖杯野黎飲下啦!」

不知名的原因好耐未沖過野飲,今日又不知何解心血來潮想整番杯野飲,靚女太耐冇沖加我太耐冇飲大家都生疏左,今朝杯野先黎幾大匙麥皮,再落N匙奶粉,之後係成包好立克,未加水d粉已經堆到成隻杯咁滿,噉搞法加水同唔加水已經冇咩分別啦,五份粉對一份水之情況下,杯野沖到成杯糊仔噉。而我今朝之主要工作,就係啃左呢杯糊仔落肚。啃足幾個鐘。好忙今朝。(...)


7000 Dying CD

大量progressive/experimental/avantgarde野,更多唔知咩野,睇過呢批貨、見到dband名,都知道呢批貨係on9啦,亦即係,on9的我中晒招啦。基本上band or 碟個名越戇居果d劉Sir越會買,一睇就知係為我而入。但今批貨更大興趣係果一大批old-school野。即係我知唔係thrash,heavy metal都係old-school卦?你話個名唔識或者隊band新所以唔理就我都冇計啦,不過假如DIAMOND HEAD同ACCEPT都...的話就...所以我知道,呢批貨又好多野我會/要買,死貨嘛。

因為今天有新貨,TRHK劉Sir陪你留守皆旺至最後一刻連騷都冇得去睇。可惜...你以為琴日107&108隔牆玩MSN好on9?未算。隔牆打吞食天地先至柒到冇朋友。既然個network搞掂左,又有兩間舖&兩部電腦&兩班傻仔(最後果樣先係最重要),再加埋冇生意(呢樣更緊要,人都走晒去睇騷啦),呢日怒研究模擬器連線,幾條傻仔兩間舖走黎走去之後,終於研究成功可以隔住一面牆雙打吞食天地!其實呢,係有個USB手掣,駁番個手掣就可以一部電腦兩條友雙手,
「一部機就玩得到,使乜仲無聊成噉連線玩,搞多咁多野玩果時仲要lag機?」
「噉玩法先襯我地嘛!」

最後自己都頂唔順用番手掣加keyboard正正經經爆Punisher算。今晚上黎的朋友,唔好意思,今晚打機打到生意都唔做,趕走晒你地忝!玩到笑爆咀真係,但灰在目標之吞天三連星失敗,雖然隻game本身可以三打,但連線都只可以連到兩個人玩set唔到三個,即係諗住可以兩個keyboard加一個joypad可以三條友玩?就同我地一樣,發緊夢。有冇朋友有可以連到線兼三打之模擬器,又或者有技術破解到???請即與劉Sir聯絡,薄酬。(「薄酬」=「請你上黎皆旺108一齊打吞食天地」)



21/1/2007 SUN

呢一晚發生左一個非常不可思議之神蹟。
「劉Sir居然睇書。」
前年屋企已經有本《達文西密碼》英文版,果時揭左頭幾版見幾悶下就算鬼數,今晚舍妹要趕project,我工作係霸住佢張床等佢冇得訓覺迫住做功課,見有咁多時間,除左無限重播謝安琪(冇錯必定係佢),就係狂掀本《達文西密碼》。過左頭幾版,睇到後面,
「咦,係有d料到喎!」
跟住狂睇,本野五百頁,刨到四點先睇得四十幾頁,即係要連煲幾個禮拜先煲得晒。為左慶祝突然回歸old-school,一面睇,一面查字典,當然係成舊磚咁厚要一樣要手掀之牛津漢英大字典啦,睇到第八頁已經查左十幾次喇。但唔知點解突然間真係好有恆心完成埋呢個old-school創舉。
「各位係時候開盤劉Sir今舖會堅持幾耐。睇得晒成本賠率係1賠infinity。」

今日,皆旺好靜。因為班友更加癲。第一日係隔牆MSN,第二日係隔牆吞食天地,第三日,仲死,直頭成部PS2拎埋上黎,冷爺用佢自創果隊TRHK隊大戰107,結果係遭到怒炒9比3,因為守龍果個係劉Sir。108都唔執輸,有最無聊果兩個係度打Punisher同吞食天地,嘩即呀吞食天地今日俾人狂做底一關死十幾條命,唔係無限錢根本連過關都唔使旨意,不過唔係因為我廢,
「唔係我唔用五虎將之首黃忠讓你地,你班友可以咁得戚?」(我係永恆的忠伯fans)
Punisher就更加係玩完又玩爆左再爆,點玩呢隻都係Capcom甚至史上最正行街game之一,今日爆機爆到機都輕埋,勁!今日四點起連續幾個鐘,皆旺107+108就係呢個景況。可想而知今日兩間舖今日生意幾興隆。不過唔緊要,107信和果邊大豐收,有條泰國仔一次過怒掃107賣最多果dfigure(呢幫女仔剝衫果d呢),你會問:
「阿捷條傻仔,中文又唔得英文又唔掂,點同個泰國仔溝通?」
仲有泰文嘛!條友識泰文架你唔知咩?雖然來來去去都只識得果一句:
漏奶,咩撚關係,我批要批你個波!(笑到仆街)
同埋繼續怒播謝安琪新碟,播到俾人狂小(冇錯107係講緊你!)。冇計劉Sir就係噉聽歌法,可能係樂評人的職業病,一隻碟係聽我會接近無限重覆地不斷播,好聽果d聽到唔好聽為止,唔好聽果d聽到好聽為止,而呢隻《The First Day》,開始覺得好聽 - 應該話開始接受得到,始終覺得呢隻碟唔出好過出,買真係只為三首新歌而買,算係噉啦新歌不過冇預期中果份驚喜,始終上兩隻碟都係一聽已經嘆為聽止,但今隻三首欠左呢份感覺,而舊歌再編曲點聽都似純粹為有多幾首「新歌」而整,有d新編曲根本唔夾首歌。硬係型住係因為入左新藝寶,大公司新作風,以前d歌太過簡單驚d人唔接受,夾埋將d舊歌執到靚一靚有幾花改幾花,可能之前未聽過謝安琪果d會覺得好得意,但一直追開只覺得改到d歌冇左本身果份氣質同感覺。唉真係好灰今年一開始已經整單噉既野黎嘆。唯有繼續等下一隻碟。不過相信下隻碟冇年底都出唔到。

終於忍受唔住,107最後私人醒左隻經典電子遊戲插曲合輯過黎,係將十幾廿年前好多經典/名不經傳gamed音樂再編曲成rock或者電子串埋噉玩,係幾過癮喎真係不過冇幾多首認得,107應該可以全部倒背如流我就唔得啦我咁後生都冇幾多隻game識冇佢咁老嘛。食埋無端端有人請的咖哩豬扒包餐(雖然除左個炸薯仔完全唔好食,都唔使自己俾錢,就無謂埋怨咁多啦,呵呵呵呵),繼續執埋琴日到今日都未執完果d新貨。每次返貨都大把野執,清番個架放新碟上去唔係難,最難係之後點放d舊碟。以一批貨只會有10%賣得出黎計,每一批新貨到左,首先要處理上一批貨未賣果幾百隻碟先,而經過之前N咁多批貨,本身裝存貨d櫃已經爆晒,而家回復番堆盒仔,一個二個紙盒放滿晒碟再疊疊疊疊疊疊(當見到OPETH、DARKTHRONE同IN FLAMES都各堆得爆一個盒就知咩事),而家一棟盒仔已經堆到去膊頭咁高。其實,真係架,要聽的話,已經有好多野係度等緊、好多野值得聽值得買。噉仲需唔需要入貨?梗係要啦,當每批新貨到左唔夠五秒已經再次追問
「幾時(再)有新貨?」而家之營運方針係入一百隻碟只為賣當中十隻。呢間舖頭絕對係違反商業原則運作,呢班友完全係on09。


Weekly Review:

  1. TO-MERA - Transcendental
All reviews here

「做乜又提住呢隻?」
「正嘛!」

今日先再聽左次,實在太過鍾意呢隻碟,而再提起佢,當然係有野先講啦。近來上左套戲叫《香水》,講一個戀味狂殺人取香,最後死刑前成為香聖顛倒眾生,係一套黑色幽默文學。咁文學就當然唔適合膚淺的劉Sir啦,只係想話,TO-MERA呢隻碟首"Parfum",就係改編自同一本小說"Perfume"。係咪好過癮呢?(相信除左我之外,冇人會覺得過癮)其實好多metal碟歌詞都係取材自文學同史料,係好有值得研究之價值,而且你聽住首metal歌學英文,點都開心過睇住本書卦?所以聽metal除左聽歌,有dband我係好鍾意睇同諗佢地d歌詞寫乜同想表達d乜,但當然亦有d/有好多bandd歌詞係睇都唔使/無謂睇啦。不過我真係好鍾意睇歌詞。所以你成日問點解劉Sir會選擇聽metal、會咁鍾意謝安琪?答左你啦。



22/1/2007 MON

「為了trhK為了大獎,今天努力工作,清晒所有野等禮拜三四盡情玩盡情放假。」
講遮。當一返到公司開完電腦,發現連一封email都冇收過,仲有d咩好做?


夜晚,只有一個「帶錯左notes上唔到堂」的傻仔撞上黎,當然係Punisher加吞食天地啦。107我發覺你今年最大之功得就係搞掂左個無線上網同十蚊拍賣場執番黎呢個手掣。大家已經俾模擬器搞到對金錢之觀念麻木晒,平時打機都話仲會肴肴下底有d避忌,自從開始左模擬器生涯,個個變晒勇者見人就衝上去怒打乜都唔理,
「死左咪死左囉咩呀我死極都有吹呀!」
都唔係個個係阿捷遮,我仲係非常認真噉打法,勇者只得阿捷一個打死罷就,同佢打完全令我感受到後生可畏。令我呢個old-school機迷都開始動搖。
「機,應該係噉樣打先至係!錢我大X把而家!!!」
實在係太好玩而家日日噉煲煲到上癮,越玩得多,越認真計劃寫game review,好似斯比頓星噉樣幫隻game由頭到尾寫一次。Punisher同圓桌武士固然要寫啦,另外龍皇騎士同皇者之劍亦好有興趣,但最想寫先,反而係心頭好之一冷血殺手,呵呵呵呵。



23/1/2007 TUE

嘩正今日真係,我好似聽日開始先至放假喎,點解今日又係噉,已經連續兩日完全冇email收?嘩正真係好正。我開始懷疑緊我唔係聽日放假。我係仲放緊2006聖誕假。(06年暑假先至真)


「舖頭有得上網真係好開心呀!!!」
2007年1月23日晚上八時正於TRHK字。


今日好無聊。冇錯今日真係好無聊。好明顯因為聽日之trhK,已經開心到黐左線了,呵呵呵呵呵呵呵呵呵呵。


trhK MKII
20070124 19:30TRHK出發
「到喇!!!!!!」
為了大獎,請各位參賽者努力修練鋤大七!」