終於忙晒。經過連續幾日之搏殺，到左呢一日，劉Sir變番劉Sir。之前幾日一早返到公司由朝做到尾lunch都對住部電腦做到仆晒街果個劉Sir大家唔使理，好似今日呢個遲到兩三個字先返到公司之後食碗麥皮搽塊麵包開機之後check下email上下網睇睇玩玩無無聊聊到lunch食完兩個飯盒直訓到六點準時打卡走人呢個先至係正貨，大家千祈唔好認錯。

當然要準時放工啦，又有飯開嘛（冇飯開都係咁準時架啦咪扮野）。今次係八三三聚會，通常每隔五六個月，大家就會覺得
「咦差唔多時候食餐飯喇喎！」
次次唔係漢陽苑就係花園金閣，今次試一試新野，上星期三本來計劃食東大門呢間傳說中旺角最正韓燒結果得番粒名寶石，今日難得有兩條水魚幾大上黎試一試。七點半拎籌係九號，等足成粒鐘到我地有得坐時已經去到差唔多四十號，即係呢ｄ人起碼每人要等多廿零張飛企多個幾鐘先有得食，呢個情況居然真係個個黎到都堅持等到有位冇乜人走，當可以排成個鐘隊先有位加咁多人陪你一齊排，未食都知道呢間野肯定係掂。食韓燒其實真係冇咩選擇，以前食極都係得漢陽苑，今次東大門先係第二間，所以只得漢陽苑可以做比較，最大分別係每張檯有獨立「包廂」好坐得多，唔使自己出去拎送，開個掣你個位就會著燈，然後好似打邊爐噉有專人過黎收飛上菜唔使自己拎兼上得勁快，又有甜品同小食當然唔少得最愛之咖哩角，淨係食個前菜已經覺得值得豪俾呢間野。服務又夠晒快由坐低到食頭盤到開始燒野一個字都唔使，叫野飲你落左單之後一分鐘之內保證送到，嘩你要我加二都抵啦！ｄ送仲勁喎，多野揀得黎全部新鮮同原汁原味，唔似漢陽苑果ｄ噉樣大大盤放晒出黎放到老晒，亦冇好似果度噉醃ｄ野醃得淨係食到ｄ香料同味精本來舊野咩味食唔出，嘩真係好食到出乎意料咁好食喎！而最過癮係有「燒烤輔導員」駐場，燒燒下有個阿叔衝埋黎
「你地識唔識食韓燒架？你地知唔知道一定要放住ｄ野係個爐中間度燒住，如果唔係會燒到塊板火農晒架？」
食左咁多年韓燒，呢樣野真係唔知喎！今次上一上黎東大門真係得益不少！奉阿叔喻，我地開始周詳地計劃點樣燒法，每次ｄ野熟到差唔多果時，一個人高速夾走晒爐中間果堆野，一個人極速將另一碟野推落爐，一個人超速攤開晒果碟野攤到個爐入面周圍都係，跟住一分鐘之內食晒頭先熟左果ｄ野，食完之後差唔多時間重覆以上咁多個步驟。如是者兜左幾轉已經頂唔順，就開始搵蝦同雞翼呢ｄ燒成年先熟野黎祭旗，平時放側邊燒，中間ｄ野清晒之後就推番晒呢ｄ野去中間果位烘住，噉就長期有野放係中間唔驚燒火農啦！不過噉樣燒下燒下，恍然大悟：
「呢個一定係東大門之陰謀！迫你係噉放野落個爐度，放得多就食得快跟住好快食飽，唔使趕你你都會一早飽到埋單走人，呢招果然高招！」
六年前係呢四條友，食到今日都係我地三條友，隱閉青年係噉架喇。似乎而家除左我之外，冇幾多位舊同學係轉行脫離教育界，好多之前搵唔到教書都陸陸續續入番去教，個境好似越黎越好近年多番好多空缺，不過仍然係冇興趣同動機入番行，一入到去未計每日做餐死超早返勁夜放，已經要因為個太廢之制度強制性預定兩年加一舊錢讀番ｄcourse先可以再教落去，犧牲太多有錢都冇命享，同時我從來冇樂觀過過多幾年個市仲可以好似而家咁「好景」。所以見過咁多教緊書的朋友，冇幾多個唔係話「教多一兩年冇架喇」，因為呢個年代要搵到一間好同唔會被殺之學校長做落去，真係難難難再加難。我寧願「早悉先機」噉樣放棄賺大錢之機會轉定行好過，係絕對賺少錢過教書（嘩，教書的話人工分分鐘高而家一倍呀），但時間亦少幾倍，起碼每日要早而家三個鐘起身、早兩個鐘返工、再遲而家個幾鐘放工、之後早返過而家三四個鐘，更加冇可能好似而家噉得閒就放下例假有show同有需要時又可以請假，要放棄好多野，亦唔合我style，除非真係可以搵到間學校中期內唔使擔心教教下又執又要轉，可以真係做教書而唔使負擔其他無聊職務太多，可以教書之餘保留番多ｄ私人時間，可以唔使因為政府之無聊政策未開始教書已經要被屈讀多Ｎ張證書，噉我就真係會搵番份（算吧啦）。要搵的話我絕對相信今年搵得番教書，但要考慮太多野，不論放棄多少同前景問題。我寧願犧牲一下錢同物質過優哉遊哉之自在生活同追求所想追求。
今餐實在食得豐富，限食兩個鐘食左個半鐘已經食到飽一飽非常滿足，唔係星期六要返工一定搏埋剩番果半個鐘（唉，而家度度都轉五天工作冇五天都返長短週，幾時到五日半的我呀？）。埋單一條友百四，如果慳慳地唔叫啤酒汽水的話可以平多廿蚊，又肯企多半個鐘等宵夜場先入席再平多廿蚊，同打邊爐當然冇得比但韓燒黎講呢個價差唔多架喇，你食漢陽苑冇咁好坐冇咁好食冇咁乾淨服務又冇呢度咁好咁快都收而家呢個價錢啦。似乎又搵多一個飯堂，唯一問題係等：次次都噉樣企成粒鐘先有得食，灰左ｄ喎！
「下次你一放工就黎排隊，我地八點鐘上黎，果時應該排到你架喇，噉我地咪唔使等囉！」

為免好似上星期噉發生意外，今日特別落多ｄ功夫清晒所有野，廢事聽日要返工時又要開舖下個禮拜就跟餐死。朝早忙完，到晏晝忙：

自從METHOD起花太多時間同錢落ｄ騷度，好耐喇，終於有貨到。 OPETH新碟特別版，似乎會引到全年只買一／幾隻碟之年度客人上黎，就同上年一樣。
對我黎講，重點當然係INTO ETERNITY新碟，BORKNAGAR隻unplugged，同ARCTURUS隻DVD，一場真係睇到迷惘之"black metal"演唱會。SUFFOCATION新碟同NAPALM DEATH新碟相信會有幾多人搵（卦，我呢個老坑估下而家ｄ後生仔會搵遮），但我對TERROZIER新碟興趣更大。另外好有興趣係VIKING，當知道DARK ANGEL我最鍾意果隻"Time Does Not Heal"個結他手就係VIKING個結他手，就知道我等左好耐，雖然兩隊band style好唔同，單"Time Does Not Heal"之技術已經吸引住我。又睇睇「我要搵thrash」的朋友有幾多個會問／搵呢隊野喇。（唔好搞錯VIKING呢隊thrash經典係black野喎，「搵thrash」的朋友。）
另特別之選係挪威black death DEATHCON。放心，雖然佢地係明星組合，你聽極都只會覺得係一班悶到Ｘ噉的唔知乜料。所以唔需要推介太多野，因為相信相同情況會發生Ｎ次咁多。
雖然呢批貨我（地）覺得好正同好多野真係睇到唔需要問同試直接俾錢就得，但我（地）一向同時代同市場脫節，所以口味同取向永遠唔同市場所需，正如頭先所講之SUFFOCATION同NAPALM DEATH新碟，可能結果都係得幾個人／自己人會買。始終唔係邊隻邊隻嘛，
「都冇BODOM隻DVD！其他果ｄ唔買啦！」（即日已經發生過Ｎ次）

因為噉，今天又係玩野的一天。今晚新聞透視主題係online forum大家心愛的高登同曹博士原始網站當然有上鏡啦！今晚曹博士親證，原來你每次上佢個網問問題，佢係真係會親自答你架！相信呢晚七點半之後，高登同曹網都會俾人玩到飛起！
收完此舖，又係落第二間舖時間。而家要搵間機舖有番ｄ野玩下真係好難，上星期去果間up dub野打戰斧時已經打到輕機，今日阿姐仲守住部機話輕到冇得打趕人走忝（既然部機玩唔到與其搵個阿姐睇實趕人不如熄鬼左部機算啦），好在隔籬間機舖仲有部五百合一。今日表演係究極黑仔王點樣打理論上一隻爆機之吞食天地連一隻雜卒仔都屈到佢大半行能源，當年打都只係打PS版，咁多年之後黎番機舖打已經唔記得晒點打係噉俾人老屈。
「Rock爺！唔係我負責擋晒ｄ卒仔，你會咁符碌兩蚊爆機？」
原來吞食天地隻game都好短，識打的話真係話咁快就爆到機，冇以前想像中咁抵玩。煲左咁多年，最好玩同襟玩，仍然係玩下手都要差唔多成粒鐘之Alien Vs. Predator，亦係我唯一一隻一條命爆機行街game。而家搵到呢間有五百合一，睇黎遲ｄ手痕又可以落黎「表演」下，更正係今日身痕行左一行，原來係正我公司樓下大角咀間機舖都有呢部機玩。噢，突然間人間滿希望忝。

近排悶左ｄ喎，冇乜野（好）玩。似乎要發掘下新野／無聊野發下癲。

兩點鐘，Henry哥打黎。
「仲係屋企？唔係食飯咩？」
係喎。唔係Henry哥打黎，我都唔記得左今日要三點前起身忝，有新貨到嘛，加埋係禮拜六日上到一定上，所以今日你又會見到我。隔左一段時日終於有番新貨，引番一ｄ人上黎 － 係「ｄ」遮，原因琴日已經講晒。又或者因為黑仔王我出現所以搞到今日冇晒人啦，絕對無人島物語呢一日，唔止我地係成棟商場都係，即係得幾單仔生意的108已經係今日全層最旺果間，就知道點解皆旺各大玩具舖一直都咁唔妥劉Sir。但有同冇多定少都係噉，我地都係係度發癲（星期日上黎都係為呢樣野遮）。星期日除左有我亦會有Alex長駐係度（正確黎講，而家係星期日唔使返的我身痕上黎順路邪住皆旺的大家冇生意），成班人加隻鬼吹左成個晏晝水，同外國朋友可以有好多野傾唔止音樂咁簡單，當然大前題係，你肯開口的話。（英文呢家野都係練返黎遮）
仍然係咁得閒，當然要搵野做／玩下啦。重點之一係ARCTURUS，呢隊band係少可由頭到尾係噉變而變極都鍾意，似DREAM THEATER多過似自己隻新碟起初聽係好悶同有ｄ失望，不過越聽越正，聽入左之後睇呢隻DVD完全係一大享受，因為ｄ歌好有氣氛同埋佢地live果個玩法（我絕對會鍾意睇ARCTURUS多過睇DREAM THEATER，亦坦白講，真係講睇同視覺效果，唔少progressive band好睇過DT好多倍），只不過如果你唔鍾意連佢地隻新碟"Sideshow Symphonies"，呢場新碟tour演唱會你更加會唔鍾意，因為以前black果ｄ歌唔係好多，而係較多最近兩三隻碟果種迷幻版DREAM THEATER野。Progressive黎講不論技術定意境ARCTURUS絕對係屬於較高層次之一隊，不過出唔到名冇乜人識係非常正常，一來最簡單之理由係佢地唔係美國而係歐洲啦，仲要係冇乜人理之挪威；二來佢地最開頭係black而唔係progressive，雖然black果期已經progressive過好多人，亦早過好多人出道；三來係佢地ｄsolo係勁，不過整體唔係晒技術果種彈都唔係超勁速彈，solo同「晒命」時間亦相對地少；四來編曲非常豐富但唔高調同太重意境，所以你唔深入聽只會覺得好（Ｘ）悶；五來，淨係唱已經好多人唔受，呢個亦係挪威progressive到而家都出唔到頭之原因。係時候提下，鍾意鬧「CoF/DIMMU BORGIR pop」的朋友記得順便鬧埋ARCTURUS喇，因為佢地新碟同呢隻DVD個歌佬就係DIMMU BORGIR個bass，雖然鬧的朋友可能連ARCTURUS同DIMMU BORGIR個bass係咩料都未清楚，不過冇乜所謂啦，
「會搵DIMMU BORGIRｄ人唱，即係呢隊band廢／pop／唔好聽啦」！
係咪？好簡單的邏輯推理黎遮。就算音樂好正常都好，挪威ｄbandｄ歌佬唱法，一係就用聲或者和聲好歌劇好古典，一係就唱到好歐洲民族，對於聽慣正常聲的progressive metal迷黎講，單係歌佬呢ｄ唱法已經搞到成隊野「唔好聽」（咦，progressive精神唔係就係超越規範咩？），但同樣地你問我我梗係話受，唔係因為呢種唱法ARCTURUS／挪威progressive係唔會做得到自己呢種獨特風格，但呢隻DVD其中一個遺憾亦係因為歌佬。雖然新歌佬把聲同舊果個差唔多差唔多一模一樣，音域甚至可能更廣更高音，但實在想睇睇Garm之台型，同佢只此一家果種聲底同咬字 － 點似都好，Garm始終係Garm，只得一個佢。評價係好正面，但識劉Sir的朋友都知道，通常劉Sir鍾意果ｄband都冇乜好下場，例如冇人會理／要。同佢地ｄ歌一樣，ARCTURUS呢隻DVD絕對唔係人人鍾意，就算係佢地fans都未必會完全接受，好似今日有位仁兄，因為「聽人講過呢隊band好得」又見出左DVD所以想買番隻，一開始已經決定左99%買硬，臨俾錢前話想試一試先，一試，剩番果1%立即變成100%，唔買（假使扮下野話冇得試，就立即可以呃多個人買一隻了，我地幾戇居），冇聽開的話ARCTURUSｄ歌／ｄlive確係幾惡啃下。所以平時好少一執就執新貨同出名band而專執死貨的我兼ARCTURUS fans相信今次好快就可以買到呢隻DVD了，因為從今日之經驗可以知道一定有貨剩：同佢地ｄCD一樣，ARCTURUS（一早）成為左死貨。

悶＆靜，除左玩107，就係玩鬼。無聊到開佢部電腦玩，原來佢部腦有好多神奇野，神奇到你唔信都有，例如孫燕姿（！！！）。中途爆笑地有個大口黑鬼入黎搵hip hop（！），過程完全爆笑唔係在場你唔會想像得到。噉有冇hip-hop野？
"Yau!"
有"zomb-hip-hop"！笑到仆晒街真係（不過唔係特別好聽話定你知純粹過癮）（但我鍾意，因為夠無聊）條友真係估佢唔到咁多過癮野喎！繼續摷摷，曾經經過一排果兩隊禽獸樂隊、搵兩隻鬥牛梗唱果隊brutal death同搵隻鸚鵡唱果隊grindcore，佢又有喎！（夠晒無聊）當然仲有極大量澳洲band，獲益不少。最後大家無聊到開左個一澳洲超出名民歌木結他佬個clinic concert，玩首BEATLES玩到neo-acoustic-country shred (haha)噉。由此可見，今日大家幾咁無聊。

有見及此，而家身份由上黎開舖變成上黎混吉的我，鼠左落去新之城。唔使問當然係一招冇中過perfect爆機的Time Crisis 3。新之城越黎越多雙槍雄出現，以前可能幾個禮拜先見一次每次見都睇到「嘩∼∼∼」，但唔知潮興雙槍定大家打到悶玩新野，到左而家每次落黎實會見到最少一個見唔到先係出奇，已經習以為常到睇到都冇動機停低睇睇了。不過今日唔同，House of the Dead玩雙槍冇乜出奇啦，今次勁喇係Time Crisis雙槍雄！即係一條友玩晒兩支槍踩晒兩個腳掣，打晒兩個畫面！Time Crisis玩雙槍絕對難過其他槍game，因為要踩腳掣即係要玩到好似紮下馬噉玩，而且兩邊兩個畫面打ｄ野好多時都完全唔同即係左手左腳同右手右腳係分別打樣唔同野，真係玩到你左右互搏。亦因為難度咁高，要玩得好Time Crisis雙槍相信要交多好多學費，單係你玩得似「雙槍」已經好高難度，如果兩個畫面打ｄ野係一樣冇乜問題，但如果係打唔同野亦即係玩呢隻game之大部份時間，基本上係打完一邊之後再打另外一邊，而唔係同時打晒兩邊ｄ野（噉樣打法真係要打到精神分裂至打到喎），好似呢位仁兄其實玩得幾夾硬下，過癮係過癮不過睇唔好睇。所以我自己爆多舖Time Crisis 3算。
爆完差唔多到食飯時間，而家我咁得閒，唔使次次都叫燒春雞、大家食、樂樂雞加魚蛋包咁灰可以食番ｄ好野，今晚就食毓民牛肉麵，雖然大家好鍾意食但咁耐以黎食過唔係好多次，就係因為「皆旺太遠唔送」，所以難得今日甩到身自己走過黎買。上到舖頭之二寶樂聽到話食毓民牛肉麵，曰：
「我唔想食野！唔使預我！」
要特別強調呢點，因為呢個故事之中呢條ＸＸ的角色相當重要。最後得107+108&Alex三個，一個袋裝六碗野，拎到上黎ｄ湯已經倒Ｑ晒成袋野簡直係恐怖到伸隻手入去拎碗麵都會死人果隻，唔怪得佢地唔肯送過黎皆旺因為送親一次必蝕一次錢。三個人食到成手＆成地都係，二寶樂見到，曰：
「見你地食得咁開心，搞到我又想食忝！不過你又返左黎，噉我叫大家食啦！」
「頂你！係食又唔早ｄ叫！你叫埋的話八碗野分兩個袋裝，咪唔會搞到好似而家噉ｄ野倒Ｑ晒囉！」
玩完，食完，就梗係要飲啦。無聊到落樓下七仔買啤酒上黎劈。我地呢ｄ乖仔就當然係飲維他奶啦。（．．．）逢星期日皆旺呢兩間野都係黐線。

等呀等等呀等，終於等到十點happy hour！逢星期六＆日晚收舖之後發癲就肯定架啦，但今次我地除左三個人，仲多左隻鬼，久聞我地呢班癲佬晚晚都落機舖玩到癲，今日就帶埋佢出黎見識見識。今晚第一站係新之城，有我地長沙灣Para皇二寶樂同ｄ靚妹爭部Para Para跳舞機玩（冇錯我地係名乎其實的無聊人），而落黎呢度主要係同隻鬼玩隻過山車版House of the Dead 4，呢隻野真係好好玩，雖然成隻game先得兩關，不過短都冇問題架啦反正我地呢ｄ傻仔打極都爆唔到機！其實唔多想落黎新之城，因為雖然大但係ｄ機唔太適合我地呢ｄ老野，睇而家佢地連部OutRun都冇埋就知，唔係俾Alex試下部House of the Dead的話，今日會直接飛去第二站好景，而相信而家OutRun冇左，以後一大班人都冇乜幾可會落新之城。問問Alex，佢住澳洲同香港咁耐都冇乜入過機舖，因為澳洲果邊ｄ機舖係俾細路玩而唔係俾大人玩，所以佢絕對係「超晒齡」地唔會入機舖，雖然香港調番轉十六歲先入得（我好想知呢個年代仲有冇兒童場？），但佢對自己「超齡」之觀念令佢黎左香港都冇乜諗過去機舖。傾下傾下就到左好景，過到黎呢邊就似番ｄ樣喇，四條友始終都係OutRun最好玩，特別係加埋二寶樂呢ｄ撞車唔係賽車的ＸＸ。實在非常鍾意玩太空站呢個撞車場太過鍾意，除左因為畫面、設計定賽道，仲因為直到而家仍然 只有我一個可以全個太空站賽道一次都唔炒，入親黎呢個場我已經有過半機會贏第一。雖然只係第一次玩，Alex已經玩到好勁大炒另外兩個（另外兩個遮，今晚我接近由頭帶到尾喎）。
"Gun hai gain la! Ho hai o chau chu gor chung si, yat yat jar cher jar dou luck sai may gar!"
玩完OutRun，冇野玩（而家ｄ機舖對我地呢ｄ老野黎講實在太冇吸引力了）（well，你唔知道隻OutRun係兩三年前出咩？），悶成噉開始搵ｄ無聊野玩下，例如高達。睇就好似幾好玩但我對呢類game一向冇乜興趣同天份，四條友一齊打，打左兩舖，都係唔使一分鐘就死晒。唔識玩嘛。
"Its a total waste of money! I will never play this game again!"（唔係Alex講，係我講，唔好意思）
冇乜野玩，而家ｄ機舖實在越來越少野玩，當我地仲係徘徊係呢個Final Fight、吞食天地、街霸二之時代，而家ｄgame、ｄ多邊形野又點會鍾意？差唔多十二點，噉又玩完。仲有咩玩？玩就冇架喇，又係得個食字，去左二寶樂介紹之煲仔公仔麵。起初非常期待，煲仔公仔麵，係咪即係同煲仔飯一樣，不過落飯變左落出前一丁？結果係好普通的用煲仔飯ｄ煲黎整公仔麵再原煲上，係濕麵唔係乾麵，除左落多ｄ「港式」菜料同冇落味精湯粉ｄ味冇咁濃之外，又唔覺有乜大分別。確係失望，我開始係好期待有得食麵焦架！
「真係炒一次之後再落煲咁大工程，就唔止收你廿蚊一煲啦！」
「真係乾整的話，計我多廿蚊我都制架！」
又食下腸粉呢ｄ香港地道菜式。澳洲又有ｄ咩地道美食呢又？澳洲土著之地道飲食係食蟲同埋茹毛飲血（．．．）。四條友吹水吹到十二點幾一點先散場，真係好過癮架同外國人吹水，但係，都係果句：
「你肯開口的話。（英文呢家野都係練返黎遮）」
（突然間劉Sir個網從未試過地咁有教育意義）

點幾鐘返到屋企，放埋狗沖埋涼聽多陣野訓覺。呢隻碟，近來成日聽：

Weekly Review:

冇錯而家擺到明係玩野吹咩。而家metal野都係留係舖頭聽，返到屋企反而少掂，呢排最metal果隻已經係EVANESCENCE新碟（除左兩三首大部份歌確係唔多得，主將走左餘黨功力完全未夠，根本出都唔應該出之本年失望作），反而係噉開ｄpop野黎聽，就好似本週熱播F.I.R.全線。第一隻同名仍然係呢幾年最愛中文pop碟之一（當然係次於心愛的謝安琪），旋律同編曲之突破呢隻碟之後都冇幾多人做到包括佢地自己，所以跟住果隻《無限》有番方向走「高檔」路線，反而冇左第一隻碟乜都有個特點限制左自己。呢隻第三隻，又變番做乜都有，不過「好pop」，對於F.I.R.呢隊仲有點兒「唔pop」的流行組合黎講，而家玩到咁「pop」，搞到有ｄ似技窮。下隻碟仲可以點玩呢？一年之後先算啦起碼下年暑假先會出啦。佢地真係出一隻碟夠食一年。

今日個時間表真係fit到漏：成兩三檯客老細全日唔得閒，老闆娘晏晝又出左街唔係公司，我又（同平時一樣）冇野做得個坐字，嘩爽呀今日。所以今日可以串到五點十一已經熄定機執定野，之後企定係個打卡鐘前面等夠鐘，一到六點準時打卡鐘都未打完已經唔見左人。放工第一件事，當然係即落新之城爆多次Time Crisis 3先（而家爆Time Crisis 3最少一鑊已經成為每天日常生活的一部份），雖然已經練到十次有九次perfect爆機（剩番果一次都係爆，不過中一兩招perfect唔到噉囉），但煲左咁耐仍然只玩1P位而唔玩2P，因為太老屈。Time Crisis二同四都係2P位易過1P位，反而呢集第三集調番轉1P位易玩幾倍，單單係第一關2P位已經有兩個位屈機指數達四粒星，單打的話呢兩個位係必死咁滯，而且少好多item食唔似玩1P多勁彈到屈番電腦轉頭，所以就算而家1P位已經玩到專家級甚至開始研究time attack，2P仍然係第二關都過唔到甚至連第一關一槍唔中過到都好高難度，所以打死都唔玩2P位，寧可我屈九電腦，不可電腦屈九我（劉Sir好膚淺架咋）。之後又睇下雙槍雄表演（點解而家真係咁多人玩雙槍？），無無聊聊走左去睇三國志大戰，即係好似玩卡足球機噉玩果部大機三國志，係個戰場上面郁文將卡同武將卡調兵遣將攻對方個城，睇落又真係幾好玩。雖然我睇左差唔多成個鐘，都唔係太明白個道理同系統呀下。但同樣地，我呢ｄold-school友唔會玩呢隻，要用太多時間同錢去買卡、儲卡、升level，而且一舖十五蚊（跟機／霸機上限係200蚊，黐Ｑ線），雖然打一場成兩三個字又唔算太唔抵冇人挑機挑贏你的話可能可以玩到九個幾字，但我打Time Crisis三蚊半粒鐘仲可以屈九電腦喎。我地呢ｄ同時代脫節的老坑，都係鍾意玩一舖過搞掂乾手淨腳ｄ簡單game － 黎機舖都係為求一時之快嘛，要煲十幾幾十個鐘儲經驗值昇level呢ｄ，留番係屋企慢慢玩好過啦。

打完機又睇完機，噉就八點幾。點解今晚又唔開舖又唔返屋企？一睇就知有野啦。自從一至五有Alex幫拖之後，好似逢星期一三五一早留定俾人約，之前公司、教院、紅燈山丘中等Ｎ個單位已經食過晒，今日終於輪到易通（冇錯就係大家報紙雜誌成日見果間易通）。過左一年，似乎各位同學都撈得身光頸靚，全場最頹果一個就係劉Sir（你睇睇佢個款就知架喇），各位同學未畢業的努力讀書，畢左業／畢唔到業的努力工作，搏到而家high dip畢業的同學都好搵過劉Sir＆好景過劉Sir，看來劉Sir真的要努力了。
「劉Sir發夢了，快點叫醒他。」
今晚歷史性地終於唔係打邊爐同韓燒，而走左去灣仔街市食小菜，例湯任飲白飯任裝抵食到仆喎！黎左半個鐘未夠已經食左Ｎ碟野三碗飯飽晒（錕哥！今次碟芝士焗班柳唔好意思，下次自己上黎叫番個啦下！）十個人食到成檯野，埋單先至係每人三十六，平到冇乜可能。跟住由灣仔行到去銅鑼灣食糖水每人都差唔多唔止呢個數啦！不過講係噉講，你俾我揀我都係揀打邊爐狂食多ｄ呵呵呵∼
之前約極都冇時間出黎，呢個月突然間好似好得閒想玩乜就玩乜。黎跟仲有咩節目？

日頭份工週期係忙到仆晒街＞忙＞得閒＞好得閒＞好Ｑ得閒＞得閒到仆晒街＞應該會忙番ｄ但唔知點解仲係好得閒．．．噉樣去。近來係屬於得閒到仆晒街之階段，成日坐係度真係冇乜野好做。開始寫番下碟評，同埋上網無聊下。好耐未上過喇喎，再上曹博士七問七答睇睇先．．．星期日新聞透視訪問完佢又有講高登，點知意外地高登居然係冇人出聲，曹博士呢邊就多ｄ野睇。前排冇乜人搞事答又答得正經，近來無論問定答都有番ｄ睇頭喎！好在係噉今日先唔使悶死！晏晝節目係打電話。以劉Sir咁頹廢的習性，點睇都唔似會咁踴躍打電話同ｄ客人聯誼果種員工喎，一睇就知有問題啦。查實唔係佢勤力／勤力左，亦唔關個客事，而係個客個電話：果邊接線時個鈴聲，居然係EVANESCENCE "Bring Me To Life"！不禁打完一次又一次聽完又再聽，老細見我係噉打電話，仲以為我好勤力噉搵客忝！
．．．有陣時得閒冇野做都好辛苦架！寧願老細俾番多ｄ野做好過！（．．．）

當然係六點準時走人，之後即落新之城爆多兩舖Time Crisis 3先！爆到咁上下又係時間上舖頭，唔係上去睇舖，而係上去攝時間（冇錯，成日小人攝時間的劉Sir而家都同大家一樣同流合烏了）。今晚呢餐飯少有地齊人，亦別具特別意義，因為係拖左／拖足七年前日終於正式結婚的契爺想食番餐，前日擺酒請完各位親戚，今日就到我地金屬中人，咁大單野自然係叫到者皆出席啦，今餐仲有神秘嘉賓NEVERN忝！唔計上一代即係三十尾四十幾果班，身邊metal友結婚契爺係第一個，不過佢結唔結婚結成點對我黎講唔多重要，我掛住今餐有乜食多ｄ。襯番今日之良朋知已餐太多海鮮與我無關（唔好意思劉Sir只鍾意食走地獸），重點係我叫但係結果圍檯係噉轉轉到我度已經得番幾舊仔之芝士琵琶豆腐（劉Sir叫野食永遠叫埋晒又無聊又唔抵食果ｄ）（不過，呢個芝士豆腐真係幾好食），但更正係個羊腩煲，不過唔關羊腩事係關個煲事，難得有個爐又有個煲有乜理由唔打番下邊爐呀？立即叫阿姐整碟肥牛黎先啦仲要食完一碟又一碟，阿姐起初唔肯落單忝架：
「喂！你地食小菜架喎！無端端叫肥牛，玩野呀？」
契爺食呢一餐，絕對係開心同真過前日同成班姨媽姑姐幾圍酒果餐，睇佢擺酒影果ｄ影四正到仆果個飲樣完全違反晒rock友定律，就知道果一晚佢係幾淒涼幾辛苦先可以笑口噬噬粗都唔爆一句應付晒全部親戚，果種感受我地呢種人絕對感受得到，都係呢種完全唔使造作拘謹係食就食係爆粗就爆粗之寫意場合適合我地性格同生活（冇錯打死都唔好叫我去飲或者同親戚食飯我會死）。契爺係我見過咁多個人當中最搖滾、搖滾得最真之一個，唔係外表而係個心，而家做左老襯都繼續搖滾，呢樣先係最令人尊敬之地方。亦因為咁真，佢亦係我身邊最多敵人同最少朋友其中一個。呢個係香港band scene特點之一：你對音樂越真越認真，身邊ｄ人越唔妥你。不過邊個唔妥邊個點解唔妥呢ｄ我冇乜興趣理，我只知道我想玩。
「喂！今晚你提過一樣野，有得諗！幾時再去酒店夾JAZZTALLICA玩三十五分鐘thrash medley？」
有人問，點解今晚齋食咁靜？我鍾意聽人講多過講人聽。想聽我講，咪黎呢度聽囉，呵呵。

我今日真係唔想寫野。我都唔明點解，呢幾日明明我擺到明唔做野架嘛！做乜無端端俾咁多野我做喎！我唔制！（呢條友已經當左自己係老細）

所以六點即走。返工要做野搞到我好冇mood（呢條友唔止當自己係老細，直頭當正自己係大帝）。呢一晚，等左好耐，講就講得多，到呢晚先正式上網吧玩玩，同時代脫節的我咁大個仔第一次黎呢ｄ地方咋！得Rock爺引見，今日先知道傳說中之太子娛樂城原來係唔係卡拉OK酒廊夜總會，而係機舖波樓網吧，真係今日先知，我以前成日以為呢間野架步黎（．．．）。兩條友黎到呢度梗係玩online game啦唔通上網check email玩MSN咩。我屬於九十年代初未有多邊形之平面3D時代，自從電腦遊戲踏入多邊形立體世代之後已經放棄左（主要原因係屋企部機唔夠勁玩唔到遮），所以黎到網吧呢度只煲一隻：終極動員令紅色警戒二擴充版：尤里的復仇，其實即係Command & Conquer Red Alert 2 Expansion Pack: Yuri's Revenge，冇錯ｄ中文名真係超七所以我永遠唔會玩台灣譯果ｄ中文版外國game，未開始玩淨係睇見ｄ名已經頂唔順。雖然生不逢時過左metal黃金歲月'80，好在打機、電視同動漫都叫做經歷到兩者之黃金期九十年代初，即係多邊形立體同CG出現之前仲係人手畫圖果個時代，當年總算有幸玩到幾隻歷史性之重要經典，好似Doom同C&C，不過呢兩隻都唔係果種game當中第一隻，Doom呢隻第一身射擊之前就有暗殺希特拉，C&C之前就有Dune整定大概實時戰略系統（有趣在Doom同暗殺希特拉都係id Software出，而C&C同Dune都係Westwood）。唔係第一個，但係係帶起革命果個，正如街霸定晒以後幾十年2D格鬥game個介面同系統一樣，Doom同C&C成就一樣，你十年前玩到而家，都會覺得你玩過咁多隻FPS/RTS，硬係有ｄ似Doom/C&C，就同你聽metal聽極都總會有BLACK SABBATH同IRON MAIDEN影子一樣道理，因為係老祖宗第一代而後代都係聽佢地學佢地大（無論講乜，講講下實會講番下metal．．．），而C&C之創舉同影響係史無前例之兵種多元化同高平衡性、當時最高質素之光影效果同畫質、非常大規模之史詩劇情、將真人電影結合遊戲，同埋無敵之電影同視覺效果：淨係入隻game落部腦個install畫面已經係前無古人後無來者，冇人會諗過入隻game咁簡單都可以好似睇戲咁大陣仗，排場勁過唔少game之片頭同爆機，淨係呢個install已經係電腦遊戲動畫經典 － 記得係installl咋喎！唔止個install，C&C1個片頭同好多間場片仍然係經典，畫質當然及唔十年後而家ｄgame啦，但係意念同分鏡到而家都唔係好多game CG做到果種感覺同效果。想當年一出呢隻game開始煲，第一集煲到Red Alert (2)煲到C&C2中三煲到畢業都係煲呢隻，想當年真係煲到天下無敵手（well，當年邊隻電腦game唔係？單打ｄgame煲到可以鬧番寫攻略ｄ人轉頭，對打ｄgame打十舖十舖都係贏，無敵是最寂寞）（可惜一進入多邊形CG年代便變成on9仔一個了），而當年C&C系列亦有好特別之意義，因為見證左電腦由2/3/486時代踏入586時代，想當年屋企初初買486果時（當時老母要部電腦係屋企做野一出即買，連埋張電腦檯成萬銀呀），身邊各位同學唔係冇乜幾多個屋企有電腦，有都只係286、386呢ｄ「文身」仲要係用黑白芒忝，我部4MB ram彩芒486已經係好先進架喇。但後來已經慢慢outdate，先係Doom玩唔到（呢隻game要去人地屋企玩同後來換左部機先玩到），C&C叫做到玩，但係係慢到仆晒街果隻咁慢，你可以睇到粒飛彈點樣飛呀飛飛飛飛之後飛落目標度爆炸「澎」個爆花慢慢地開乜都清清楚楚就係慢成噉，果時有得玩就算架啦都唔會預期咁多所以慢都冇所謂，而且你會覺得當時「最先進」之486係呢個速度，噉隻game本身個速度就係咁「正常」架啦！出左冇耐之後出現586，玩過就知道原來呢隻game係可以咁快：當一粒飛彈可以飛幾秒中先射中，ｄ車行得幾慢可以想像得到，但用部586，就算你叫部車由地圖一個角落頭走去另一個對角 － 架車唔係慢到仆果種重型單位同目的地物理上去得到同中途冇比人打死的話 － 全程係可以唔超過三秒鐘，細地圖的話甚至好似瞬間轉移咁快click下mouse半秒內必定會出現。即係連普通行軍速度都有咁快，打果時又可以有幾慢丫，如果計小規模衝突即係十幾部對十幾部咁「小規模」，586打一場之時間486可能只夠射兩粒甚至一粒飛彈咁大把，係可以快十倍甚至以上，分別可以相差咁大，大得咁誇張，誇張到玩完586版你會覺得原來486版係好好好容易玩，因為開左超任博士慢動作都冇佢咁慢（仲有幾多人記得超cult之超任博士？）。C&C係第一隻真真正正感受到586機能之電腦game（亦即繼Doom之後第二隻感受到自己屋企部486收得皮之電腦game），同第一隻經56K modem同人連線玩之online game。加埋果份歷史性，呢隻game對我黎講係好有意義。只不過中六七換左部電腦讀A-Level（揀修電腦就有呢個好處，可以屈老豆老母買新機），部野玩到C&C2叫做update番ｄ，但入左教院之後因為屋企部機已經變成廢機（果時買部新電腦萬萬聲點敢隨便買丫），轉左行打PS之後已經冇乜玩過電腦game，隔左成六七年到今晚先拎番起，當年之天下無敵已經收晒皮了，而家連個mouse點用ｄkeyboardｄ掣係點同點樣起野起ｄ乜咩部隊勁已經唔記得晒，所以今日純粹係熱身，慢，加唔知自己做緊乜＆要做ｄ乜，唔係兩個對電腦而有Rock爺項住晒的話我一早死左Ｎ年。今日噉樣玩一玩，死又勾起番大量回憶同果舖癮忝，真係好想執番套返屋企玩，當年C&C1玩GDI最後果關係俾我研究到一個無敵屈form可以搵敵人幫你採礦賺錢自己乜都唔使做架！不過而家點樣搵番呢隻又已經成為文物之當代經典？
「出左隻大合輯，一隻DVD包晒前十年全部C&C game全線嘛！」
嘩正喎抵玩喎絕對制得過！反正C&C3都就出，出左之後立即即掃晒C&C1到C&C3全線包晒唔使諗！問題係，我部機冇DVD Rom．．．但其實我更想搵隻soundtrack，C&C1同Red Alertｄ配樂全部都係techno、industrial、metal同epic野，當中有幾首係過左十年都仲未有其他game及得上，當年考試都係開住隻C&C播住黎溫書架！
玩下玩下，咦差唔多時間埋單喇喎！兩條友坐左三個鐘食個魚柳薯條飲多杯野先至每人三十，嘩抵到噉款難怪而家ｄ機舖咁難做，不過呢間野正在網吧隔籬就係機舖，仲係要好多老餅機起碼仲搵到幾百合一果ｄ先，黎到就算唔係為間網吧打Red Alert齋打番ｄ舊街機都抵啦！唔計環境i.e.大煙同唔多順路的話，呢度絕對會成為另一個新蒲點。（不過放心，我相信Rock爺一日未過完佢而家之「退休生活」，每個禮拜總會有一兩晚上黎呢度過夜）

呢兩日有班"special guests"黎左香港，當然係metal友啦，仲係好猛料果隻：有Nikolo Kotzev，一個保加利亞裔芬蘭音樂家，玩過兩隊band BALTIMOOR同BRAZEN ABBOT相信唔多人識，但2001年出左隻對我黎講近呢幾年（已經唔「近」喇）其中一隻概念同表演性最好之symphonic hard rock，雙碟rock opera "Nostradamus"（提下，TRHK有得買，假如你有興趣搵的話）；同行仲有英國超cult epic thrash band SABBAT最後一個bass Wayne Banks，呢隊野唔止地位同音樂cult，齋個lineup已經cult到爆晒燈。
「得兩個咁少？」
唔止佢兩個咁少，不過呢兩個算係比較出名，所以其他就別過不提啦。冇嚇親丫嘛？（仲使講梗係冇啦，坦白講呢班及阿叔阿伯對各位新世代青年黎講又算係ｄ咩料？）如果俾我撞到我一定會發晒癲，最少會同Nikolo吹水吹到癲先，我咁鍾意"Nostradamus"！噉各位有冇咁好彩見到佢地呢？我就冇機會喇，因為要返工。可能你會問：
「呢班metal猛人黎香港做乜？」
係黎表演。但當然唔係出metal gig，如果係有metal gig又點會唔知？係出gig，但唔係metal gig，係今晚BEE GEES個Robin Gibb場香港演唱會，所以23/11落機，24/11表演，25/11上機去下一場。其實已經唔係第一次，佢（地）幫Robin Gibb彈live已經彈左幾年架喇，差唔多年年Robin Gibb tour都有佢（地）份。
「梗係幫Robin Gibb啦，你唔係以為佢地幫之前果晚VILLAGE PEOPLE彈丫嘛！」
係好怪，無端端一班如此資深之metal中人會同disco/pop之Robin Gibb，諗極都硬係好似有ｄ唔對路，但呢個係放在眼前之事實。咦，好似有ｄ問題喎。各位「我好metal」的「True Metalhead」，係時候做野喇！（各位「True Metalhead」唔係唔記得自己講果ｄ咩丫嘛？「真正metalhead應該只聽／玩metal唔聽／玩其他音樂」果ｄ呢？）

提開VILLAGE PEOPLE，講開又講，我成日以為自己第一隻買之外國碟係Moby隻"Play"（到而家我仍然係極鍾意呢隻碟，亦係因為Moby間接令我開始追David Letterman同練到而家一手／一口英文）（噢，又係另一則長篇大論了），諗番摷番，原來"Play"係第二隻，第一隻外國碟係VILLAGE PEOPLE隻精選。當年年少無知的我唔知佢地背景同咁多資料（果個年代邊似得而家上個網篤個掣就乜春都有晒咁方便丫），聽過"YMCA"首歌好聽，係九龍城廣場對出間CD舖見到有呢隻精選 － 亦係僅此一隻之後已經再冇見過佢地返貨我幫佢地清左呢隻死貨 － 而果時細細個的我又過左新年有番ｄ錢，就買左呢隻野返屋企，我而家仍然覺得當年歌都未開始聽的我之呢個舉動之感到自豪（同由此可見，劉Sir呢條友確係on9得不可思議）。聽完"YMCA"，鍾意，之後再聽埋"In the Navy"，更鍾意，噉就繼續聽落去，而班友底蘊我都係好好好後來到左TRHK時代先知道，但冇乜所謂啦聽下歌仔遮。雖然我係幾鍾意佢地ｄ歌，但場live冇去，唔係冇錢或者冇時間去，而係唔敢去，我驚去左會發生意外。（你唔係唔知VILLAGE PEOPLE＆去睇VILLAGE PEOPLE班人係咩料丫嘛？）

今日發生左咩事已經唔需要多講。只需要睇睇契爺點樣講就夠。繼三年前俾瘦仔擺左上檯之後，今日又再次俾人擺上網。已經唔需要再多講了。自己睇。

要我再講，我只會講多一樣：

今日係要返工的。前排又放例假又放病假又要搞騷，年假已經用晒兼放突左，為免要扣人工今日要返去公司坐番（半）日呃番下假。而更重要原因係，同我一樣放假放到用晒年假都唔記得之會計靚女同我一樣計劃，所以特別要脅我今日點都要返公司陪佢坐足成日。熟悉劉Sir的朋友都知道，呢單野一定唔會發生，
「星期日喎！佢會早得過十二點起身？」
冇錯。朝早又冇電話叫我起身喎（相信會計靚女比我更早放棄呢個呃假計劃），晏晝起左身之後本來都想上舖頭，點知一開部電腦，大劑！屋企部電腦兩個harddisc死左一個，仲要係死左放file果個，即係咁多年全家所有file一野過冇晒！搞唔掂部機，自己唔死都俾屋企人打死！當搞掂部機，已經支力＆懶出街，再打多個電話今晚打邊爐又取消左唯一出門理由都冇埋，留係屋企放番日假好過。係屋企做埋晒ｄ無聊野，例如開電視係噉轉台搵野睇、打唔使用腦總之係噉拍個keyboard就爆到機果ｄ簡單flash game（近排怒煲呀成日搵flash game玩）、訓覺（訓醒左，都係訓．．．），又見有時間，過去台灣果邊睇睇先。雖然掛名叫做管理員，但我呢個懶人好頹實在冇乜盡過管理員之責任，以前一個禮拜去一次，而家個幾兩個月先去一次，嘩好多新post喎！打下打下噉就兩個鐘。覆完睇一睇，發現真係好耐冇正式噉上過香港ｄforum，而家除左有新貨時上去留一留言，之外真係上都冇上過。真係冇乜野topic有野好講嘛，一係唔夠專家講（每次見識到專家之見解，深深感受到自己所謂聽metal真係收得皮），真係講音樂又唔會有人理唔使半日已經沉晒底，即係講黎都冇用，慳番ｄ時間搵／爆多隻flash game好過啦！
台灣邊度？知的朋友自然會知／知道左好耐，唔知的亦唔多需要知道了。

唔上舖頭其中一個原因，亦因為唔敢上，呢兩個禮拜兩批貨，冇乜潮野所以好少人會理，但對我黎講係死得人+死晒。上個禮拜點死樓上都知啦。今個禮拜都唔係好得好多，MDB新碟無論玩得好都要追架啦，始終鍾意industrial野所以ANAAL NATHRAKH全線加新碟冇得走，INSOMNIUM呢隊創新野又係冇得唔追全線，死晒。但最大興趣都係TO-MERA呢隊女聲progressive metal band，一向鍾意支持細band同新band，呢隻係今個禮拜首選。講開progressive，TIME REQUIEM第一隻碟返左貨喎，非常鍾意之一隻neo-classical progressive metal，我覺得好過SYMPHONY X同ADAGIO新果ｄ。死，點算？上個禮拜果ｄ都未執忝。
「大佬，我係連三四個月前ｄ貨都未執晒呀！」

今日lunch睇完張外賣紙，已經plan好晒全日餐單：三位女同事，一個俾成盒吉列豬扒焗意粉我（真係俾足成盒我自己象徵式噉食一啖仔加一塊豬扒就算，我都唔明除左叫俾我食之外佢叫黎做乜），另一個係新彊香草雞翼煎餃子擔擔麵（你唔係諗住一間香港茶餐廳仔會煮得出新彊風味咁威水丫嘛？不過新唔新彊都好，ｄ雞翼醃香草確係醃得幾惹味），最後一個叫香草豬肉腸火腿煎蛋飯（呢個齋香草同新彊香草有咩分別？我呢ｄ識得食唔識得用腦當然唔會知，但心理上新彊香港好似好味過香港香草）。即係見到都知道大劑架喇，所以自己冇叫飯食，只係叫左個薯條加多件西多整多碗忌廉湯當頭盤（幾刁鑽，lunch都要飲白湯）（頭盤只食咁「少」你話幾大劑丫）。已經覆蓋晒lunch加tea再打個電話返屋企落定order今晚要食個炒公仔麵（咩叫好食懶飛？睇劉Sir就知），今天又是完美的一天。點知就係契爺一個唔覺意，又中招。話說為全日膳食作好周詳計劃之後，二寶樂打個電話俾契爺：
二寶樂：「今晚有冇時間？」
契爺：「有。」
二寶樂：「打邊爐。」
契爺：「哦。」
簡單四句，演變成大大壇野。未放工已經有五盒野一碗湯放左係面前，點算？都要食架啦有乜計丫，食完兜薯條趙埋個意粉，跟住係噉食食食，飲埋碗白湯盒西多都唔敢食留番聽朝做早餐，但又口痕係其他同事度呃下呃下，夾夾埋埋今日出門口前食左三個飯盒份量先走人。
「點解？我已經唔想食架啦！點解係都要我食咁多野？」

放左工之後，立即向契爺屋企即係長沙灣契宅出發。咁大個仔我都冇出過長沙灣其實，又想慳埋果幾蚊地鐵錢，就自己憑空由大角咀經太子行去想像中的長沙灣。行下行下噉就半個幾鐘，穿過太子又經過深水土步，到左長沙灣喇卦？又好似唔係。跟住收到call話出返去深水土步集合，都好喎反正我都唔知自己行左去邊度。契氏家族終於齊人了，有契哥即係我啦，仲有契爺，同埋契弟。邊個係契弟唔使講到出口啦係咪？（呵呵）跟住再行番去長沙灣，好大段路。開始覺得自己戇居。
「Ｘ！過左黎搵你兩個之後又係要行番過去長沙灣，咁鬼遠，早知我係果邊等，你兩個過黎搵我好過啦！」

就係噉，三條麻甩佬行超市行街市行辦館買送買料買雪糕（呢樣最重要），開始我地八十年代集體回憶之夜。九龍城土瓜灣成長，對長沙灣呢ｄ老殘地區好有共鳴，好鍾意左右企滿矮樓危樓舊樓街市市政中心，更鍾意好多舊機舖，未受網吧入侵之基層地區係我地呢班老坑之天堂，因為你係一間網吧都見唔到，而機舖多得梗有一間係老近，真係行兩步一間轉個角又一間，仲要全部都係舊機冇乜新世代遊戲，ｄ機殼仲要係十幾年前用木嵌果隻（未見過的話，一係少蒲機舖，一係太過後生），坐係呢ｄ木殼機前面打番兩蚊舖街霸二特別有風味。今日黎觀摩時除左見到有Virtual Cop 2，仲有個高手玩食鬼，呢ｄ地方先有感覺呀。以前屋企果頭都好鬼多機舖仲要間間都係用木殼機，但跟住一係與時並進地換晒膠殼機，一係俾網吧迫死左，而家係屋企果邊想搵間機舖玩下都好難。搵次一定要落黎呢頭玩下，一大朝早黎到食完早餐之後逐間機舖打打足成日夜晚再踩上契爺屋企打邊爐，噉先夠perfectly old-school。（認真的說，有意者請報名）Roadshow有《玩盡十八區》，我地都要搞番個《小盡十八區》，第一集長沙灣，第二集土瓜灣，第三集九龍城，小到粗口爛舌果隻。唔難丫，落機舖拍下劉Sir打機個款已經小到喊啦。

買齊野上到契宅已經八點，都仲未齊人，大廚又未到，我地呢ｄ又擺到明唔做野，梗係玩轉契爺間屋啦。老野就係老野old-school就係old-school，契老真係乜舊野都有，由1977到九幾年都搵得到，萬變卡、買包薯片入面送果ｄ卡、集圖冊、袋中怪．．．好多好多野。當年自己都儲左好多呢ｄ野架（冇錯曾幾何時劉Sir都投身過潮童之列），但果時年少無知冇收集珍藏之概念，好多野後來掟晒或者唔見晒，到左而家老大徒傷悲。契爺仲可以保存住成箱野咁多，我地呢ｄ後生仔又點可以唔尊敬佢老人家丫！（你唔好話差我幾年咁少野呀！阿叔！）
「咁多正野，拎上107同佢分享下啦！」
「費事啦！盞俾佢笑！」
「放心！佢仲老＆仲多過你！」
跟住打機，未至於紅白機同超任咁老，有部PS1玩下都叫做懷舊啦。
「成套野部機連隻game都係後樓梯執番黎，執下執下手掣都有十個連大掣都有！殘殘地係但唔係錢差唔多架喇！」
當然要煲街霸Zero亦即係街霸Alpha，已經new-school左喇。Zero系列我始終鍾意Final Fight系角色，當年用手榴彈Rolento屈爆天下無敵手，睇果時連街霸Zero世界冠軍都係用佢就知道英雄所見略同，但呢ｄ已經係當年往事了，而家收晒皮連招都唔記得晒點出。另外當然要用Final Fight主角Guy，勁！但點勁都唔夠我地Rock爺咁勁，契爺用泰皇同佢隻豪鬼打，點知佢「個掣壞左」出極招都出唔到，再玩落去隻豪鬼出ｄ招同佢出ｄ野完全唔同，跟住發現個掣「壞」到係放低埋個手掣隻豪鬼都識得自己郁！原來係契爺揀左對電腦，但我地同當事人阿Rock仲on99地以為係雙打緊！以前ｄ阿哥家姐呃九ｄ細佬妹話「一齊玩」就係用呢招架喇！又係一大old-school經典！玩到悶（係因為我太廢），改玩海底大作戰，一隻都好舊下之潛艇射擊game，水底射魚雷同深水炸彈，昇上水面又可以用機關炮同飛彈炸天空同地面ｄ人，個介面其實幾創新下，問題係成隻game太花水面爆之餘水底又爆，而且水底射親野萬九幾粒氣泡水花，多人果時花到完全見唔到自己係邊，亦因為噉用唔係好先進之PS1玩呢隻game係慢到好離奇。當年我係好有耐性地打爆左呢隻game，今日就算啦，我有耐性，Rock爺冇嘛。呢個世界唔係個個人都好似我咁無聊的。

差唔多九點終於齊人有飯開。無端白事打邊爐，其實都唔係無端白事，本來一講好左琴晚打點知搞唔成，今晚難得即興就補番，呢餐當係契爺補擺圍酒俾我地架喇（雖然兩大股東之一係我，另一個先係佢）。唔使問又係一品鍋啦，豆腐呀豆卜呀肥牛呀丸仔呀同親劉Sir食都係咁上下架喇，今餐最大發現係烚漢堡扒原來係好好食（當然煎漢堡扒先係永恆的皇道），呢ｄ無聊野唔使講都知邊個諗出黎啦。去買送時有檔野有得買魚蛋咖哩，冇睇錯唔係咖哩魚蛋係魚蛋咖哩，佢話係「魚蛋包住ｄ咖哩」，即係魚蛋形咖哩角咦我鍾意喎！不過食落覺得一般料唔多味又唔夠濃，其他人好似覺得唔錯，可能係瘋狂咖哩角fans我要求高左ｄ啦。打過咁多邊爐食過咁多丸，食極都係酒家果ｄ丸係大粒ｄ多料ｄ，特別係包心丸，自己出去買果ｄ細料之餘個心少好多汁同料，但去親酒家打邊爐次次ｄ包心丸都爆到九彩，所以上人地屋企打邊爐（呢樣要非常特別註明）係開心，但論食論料一分錢一分貨係真。

邊食邊睇BULLET FOR MY VALENTINE DVD，雖然呢隊band係玩得好，metalcore黎講係最鍾意其中一隊，但對佢地印象持續負面。只出得一隻EP一隻大碟出道幾年，咁快就出DVD會唔會太快？當成場live玩晒自己所有歌先得果個零鐘，不禁令人質疑出呢隻DVD之誠意同動機。我只覺得太投機太商業。好多metal band（真心玩果隻，唔係一出就大label同過左海果ｄ），出左幾隻碟甚至玩左差唔多十年都唔肯出DVD，因為覺得仲「未係時候」、「仲未夠歌／料」、「仲未有最適合拍DVD之演出」，同「冇錢」。最後果個唔使理啦，基本上BULLET唔係有Sony撐的話亦絕對相信唔會咁紅同咁快出到DVD，但其他三個point，相信佢地絕對冇諗過，同時Sony唔會俾佢地諗，因為metalcore係咩一回事大家都知：人人都知道呢種音樂係商業為先，呢個係事實，而且可以睇到而家metalcore都走緊下坡，已經冇當初大紅果時（只係年幾兩年前）咁得人熱衷，始終潮野無論本身性質還是對象市場係好難持久，唔襯而家個潮流未完下一個浪潮未出現之賺盡佢，可能遲少少已經冇人理你冇晒機會。就好似當年DARKNESS出第一隻碟時又係俾人捧到上年，可以得一隻碟兼出左未夠一年已經有人出tribute album咁離譜，但而家佢地點？就係快得太過離譜。同樣密集出擊的BULLET恐怕會步其後塵。
跟住係別安不插電演唱會，呢隻搵左好耐而且想搵真係搵唔到，唯有靠契爺呢ｄ老坑先有機會一睹。一直覺得佢地玩木結他勁過電結他好多，雖然四人時期之live好唔穩定成日有甩有錯，事實的確係黃家駒時期ｄ歌，同一首歌編曲都好過三人時期，感覺上係「藝術」ｄ，呢ｄ中文歌而家點搵都唔會搵得到。
食到十一點半，乜都夠啦係時候收皮喇，雖然食左三盒飯先黎但結果食左意想不到地多野。跟住的甜品時間先至係重點。牛奶公司三色雪糕幾耐冇食過？Dreyers以外最好食就係牛奶公司，可能仲有其他名牌子好似Hagan Das，但我支持陪伴大家一起成長的本土製作牛奶公司。睇完一眾七八十年代metal中女豪傑（同樣地而家想搵都唔多搵到，唔好同我講LACUNA COIL呢個所謂"Metal Icon"呀下！），之後到最經典之PANTERA+METALLICA七十四萬人演唱會，同樣呢ｄ歷史見證除左問老坑你其他地方唔會搵得到。淨係睇台下七十幾萬人都夠殺啦，更何況台上果班係九幾年頭之PANTERA同METALLICA？真係勁到仆晒街，更顯得而家ｄband．．．唉。論台型，以前ｄband確係而家冇幾多隊及得上。點解以前ｄband技術未有而家咁登峰造極ｄ野亦簡單過而家咁多，反而玩得好過而家聽同睇都有氣氛ｄ？就好似頭先BULLET，ｄ歌聽係好聽但睇唔好睇，隊band玩live好冇火氣。道理同流行歌手一樣：點解八幾年甚至九幾年頭ｄ歌手，硬係唱得好過而家？同頭先DVD所講一樣，太快喇。以前ｄ歌手係學過唱歌登過台先做歌手，而家ｄ歌手調番轉做左歌手先補番呢ｄ野，甚至補都唔補打天才波；好多band都一樣。同上一代歌手係唱酒吧唱酒廊幾年先簽到一樣，PANTERA同METALLICA呢ｄmetal中紅到無可再紅之樂隊，成名前一樣係唱細場唱bar仔幾十人騷幾百人騷噉樣捱出黎，磨練番幾年再慢慢出頭，唔似而家唔少band一出黎可能未有太多創作同經驗已經有得簽（最）大label，都未磨練過台下已經成千成萬人，但台上根本未夠火喉，甚至冇乜feel以至唔多掂，好似前排都紅過一排之MENDEED，聽冇咩問題（雖然唔覺得點樣勁法），睇過佢地ｄMV同live立即冇晒興趣，因為台風同表演好似一班姐手姐腳之少爺兵。所以而家好多metalcore band（唔係全部，但係好多），的確係好似OPETH歌佬（比人屈）噉形容：
「純粹係一班boy band with guitars。」（唔理係唔係俾人屈都好，確係形容得好貼切喎）
好多「聽metal」的朋友會鄙視（香港）流行歌手「唔識唱歌」、「唔識表演」、「未學過就開演唱會出唱片」，但唔會用諗番自己聽果ｄ，除左多左樣樂器同嘈ｄ大聲ｄ之外，（商業）性質上其實一樣；又好似好多呢ｄ「聽metal」的朋友會不屑於香港人／MK仔淨係識聽中文歌、淨係識聽幾個歌手／傳媒提同多人講果幾個歌手，但可能講同鬧的朋友，身邊好多人甚至自己都係集中聽呢類"boy band with guitars"，淨係聽呢種野、淨係聽幾隊band同多人提果ｄ，但不屑對象只會係其他人而唔係自己 － 相信身處TRHK的我絕對係見證呢樣野見證得最多次一個，因為TRHK就係負責俾人不屑「有幾百隊band有咁多種metal又點果ｄ唔關我事都冇我要果隊band超！」之單位。兩者道理相同：聽metal係聽band野唔係聽歌手、唔係聽「流行」丫嘛，即使聽果ｄ只係metal中最pop最大路果ｄ，都係聽緊band而唔係聽流行音樂丫！已經「高級」左啦！（唉，呢ｄ觀念幾時先會改變？「聽metal」的朋友幾時先會真正地聽metal而唔係聽名聽潮？）

臨走前，仲有契爺特別為「集色情暴力於一身metal友實鍾意」的一套動畫，果真珍藏，阿嫂唔好睇呀！（點睇都唔似係新婚啦呢兩位，間屋搞到似會所多ｄ喎！）結果又玩到點幾鐘先走人，嘩真係唔似聽朝仲要返工喎。而家幾乎晚晚都好似禮拜六噉玩到癲，但呢樣野係必然的，就好似佢坐上張凳上面個人會不期然地隨住張凳之角度下滑成低於四十五度角仰狀（如果係梳化過程會快三倍以上），呢ｄ野係順其自然的結果。今晚係契爺度睇睇本運程書，今年運程當中我個生肖命格係「死蛇爛鱔」。所以我擺到明咁頹都只係奉天承運遮！逆天而行會不得好死，（曾經）想過勤力的我只好順應天命啦！

「幾時係下一集《八十年代集體回憶》？」

「劉Sir返黎喇！」
各位同事尖叫。因為前排有點兒唔正常地搏命加多野做的佢，今日變番做坐係度冇野做訓覺食野周圍行等放工，變番做大家（包括老細）心目中「噉先係佢嘛！」果個劉Sir。返到公司之後，清埋琴日太多野食而剩左果個西多，食完繼續pantry直訓到lunch，噉先似樣。因為琴晚太癲支力，亦因為呢排食得太多（單單琴日已經等於食左三日啦），今日特登唔叫飯食留番成個lunch訓覺抖下。點知訓醒覺一起身，檯頭又多左三盒野。
「頂！黐線架！放過我啦各位靚女！」
呢ｄ係唔叫飯食的報應。

晏晝，係答問題時間，因為太得閒。契爺有問，唔明劉Sir到底係何許人。
「 佢究竟果份係乜野工作呢？一個謎。」
咪文員囉。全職係「不務正業部好食懶飛組首席頹廢文員 暨 員工休息室及飲食部管理員」，主要工作係偷懶。係呀偷懶都係一種工作黎架。各位同事ｄ懶俾我偷晒，我一個人懶晒佢地咁多位冇晒懶剩番勤力，咪會好很勤力地做野囉。呢一招就叫做捨已為人救公司。
「有邊份文員工作可以俾個staff著band tee長毛踢拖返工仲可以聽ｄ咁變態既音樂？一個謎。」
返緊啦大大個人辦係度已經。頹工就梗係頹人先搵得到啦。契爺你太勤力喇，所以呢世都唔會搵得到。
「佢點解可以唔使訓，日頭返工夜晚在TRHK之後仲可以同班嘩鬼去打機凌晨仲online寫review個樣仲成個Kurt Cobain噉（就死果陣）？一個謎。」
當你個人夠頹，就會識得偷時間，例如偷返工ｄ時間訓覺噉夜晚就唔使訓啦。（．．．）偷時間係時間管理中好高層次之學問。
「呢條友個腦爆開，除左KFC炸雞、極端金屬、無限肥牛之外，唔知會有d乜呢？」
仲有好多。而家你／各位睇到的劉Sir可能得四份一個都冇。就好似你問劉Sir聽乜，佢俾你之答案同行為，會令你絕對相信佢只係一個只識聽metal仲要係好pop好大路果ｄmetal (band)的傻仔，但佢真正聽ｄ乜識ｄ乜你點都唔會知同估得到（所以好多人只會當劉Sir係一個傻仔其實十分正常，呢個係避世的佢故意塑造之形象，噉可以煩少好多野同見少好多無聊人／傻仔／專家）。所以，唔使諗喇，諗得到劉Sir係乜，你仲使黎呢度？呵呵。
「點解點解？點解點解？點解點解？點解點解？點解點解？點解點解？點解點解？點解點解？點解點解？點解點解？」
算啦契爺你點解幾多百千萬次都唔會明。勤人不可語頹。
「Extreme conditions demand extreme responses。只能這樣解釋。」

Rock爺call到，冇野做的夜晚又「好忙」地走去太子C&C。而家生活已經好即興地夜晚生活係點，係由日頭有冇電話決定，冇咪返屋企囉，有的話通常果個電話話果晚玩乜就係玩乜。今晚第二晚玩，操番熟左開始似番ｄ樣喇而家，戰略game始終都係呢隻好玩，其他RTS一係太new-school一係太複雜同埋最奪命之多邊形，睇就好睇例如Starcraft但玩就唔多使預我。不過而家又面對另一個問題：死，第二晚上黎，C&C都玩到無敵是最寂寞。仲有咩好玩？

今日老闆＆老闆娘都唔係公司，冇皇管加冇野做的日子，自然係fit啦。而家之生活係噉：返工果陣呢，就寫野，寫碟評同段記（契爺又問：「呢份咩工黎？」），放工之後就玩，或者返屋企，不過返屋企唔係聽歌唔係寫野，而係睇電視、睇碟、玩flash game（我實在太鍾意玩a) 係噉拍個keyboard同mouse就爆到機 b) 冇爆街無盡輪迴係噉打果ｄflash game了），所以各位朋友，夜晚ICQ、MSN見到我可能冇乜用，因為你幾萬個message炸過黎都好，我都廢鬼事睬你。

今晚夠晒無聊，有《搞乜鬼奪命雜作》第三集。呢套美國無厘頭野，太無厘頭關係我唔會主動地去戲院睇，不過遇著電視播就唔會錯過，就係因為無厘頭。呢個系列特色係完全冇自己劇本同創作，而係將其他新片同經典ｄ劇情同場面玩野化之後砌埋噉就做左一套戲，擺到明係廢片同爛片架啦但無無聊聊又俾佢玩到幾集出黎喎。最開頭上人地屋企睇VCD睇左第一集已經笑到仆街，跟住電視撞到第二集睇埋，今日又有得睇第三集，雖然無聊但確係笑到爆咀，同埋夠晒串同玩野，而呢ｄ廢片必然地賣好多女色，但後來由賣女變成真係賣串爆其他片之玩野拍法之幾集更得我鍾意。夾埋一共出左幾多集呢？我都唔知忝，不過相信唔會少卦，反正呢ｄ片真係完全唔使自己諗淨係等人地抽完片之後搵人地ｄ橋段黎改就得。其實呢ｄ擺到明係廢片黎架喇，睇完都冇乜非常深刻印象，不過廢片就係好在呢樣，就係因為睇完好似冇睇，下次睇果陣好似睇過又唔太記得，又可以笑多次。次貨都有其存在價值。

今日居然歷史性地有野做，成六點半先放工，嘩好遲架喇對我黎講。一放工立即衝啦，難得今晚有band夾喎！今次有契爺同Rock爺仲有觀眾小婷乙個，玩玩下無端端多多一件二寶樂，一睇就知道又係一個好即興的陣容啦，冇錯又係一個電話演變成一大壇野。真係好耐未入過band房，自從Harmony執左之後連同B哥玩"post-rock"之機會都冇埋，因為兩條友要夾得平只有Harmony，到呢晚 再入band房彷如隔世。今次到總統，嘩原來係呢度好耐冇上過黎喇，上一次黎係幾年前，上黎玩乜都唔記得左，但仲記得呢度大房套鼓，係打過咁多間之中最靚最好打之一套。一班metal友入到band房，你覺得會玩乜？METALLICA冇得走（正確黎講，係JAZZTALLICA），校歌好耐未打過，high。但今日最主要玩，係BEYOND，《真的愛你》今日兩個鐘內玩左不下十次，除左結他咩位都玩過晒（「超，得番唱同鼓你揀遮！」）。仲有BLACK SABBATH式free jam，雖然jam jam下之後發現，
「好似BEYOND好玩ｄ喎！」
玩黎玩去都係BEYOND好，連「bass主導版《冷雨夜》」都玩埋（「bass主導」，係因為結他唔識彈，得bass一樣．．．）。同埋punk野。總之唔係metal。睇黎我地正在蘊釀一個「違反True Metalhead精神」的pop song project。
「台灣有隊叫亂彈，我地隊野就叫九彈啦！」
玩係好玩，但噉樣隨意地jam似乎十分不合經濟原則。下次係咪應該準備充足少少先上黎呢？例如，帶番本《勁歌金曲全集》chord譜上黎？（呵呵）

今日工作，係寫聖誕卡，到左年尾，為公為私都會寄一大疊聖誕卡出去，而全公司仍只得我係每一封都用人手寫。當連經理都頹到名都唔簽就噉入信封就寄（好明顯係應付老細的交差手法），我仲可以逐封逐封每人一句噉寫左差唔多成百封再封埋口貼埋郵票兼拎埋落郵局寄，可以話我好有心機，亦可以話我好得閒，更可以話我好無聊。上年同樣地一封封地寫聖誕卡之情況，歷歷在目。噉就一年。好快。

同樣地，晏晝有電話，放工就有節目。今天又是C&C天，六點鐘放工，六點半已經mouse在右手（其實再早一兩個字都得架！）。死，前排先至玩到天下無敵，點解今晚兩條友玩咁多局，冇幾多次係正式贏到電腦，贏果ｄ差唔多場場都係慘勝？唔識死地玩下兩條友對三個電腦，即係今日個電腦已經唔知咩事突然間咁癲，二對三當然係死得仲慘，可能癲得滯＆激得滯，舖舖二鬥三都玩到部Windows 98（一分鐘一分貨，俾呢ｄ文物電腦你差唔多架喇）頂唔順，輕機收場。可能真係太勁我地部機都驚左（．．．）。雖然C&C對我黎講係萬玩不厭就同Doom一樣（元祖game就係有呢種點玩都唔悶之魅力），不過我地勁成噉，呢度ｄ機咁舊，玩玩下電腦唔夠我地抽輕機屈我地就冇癮啦（．．．）。使唔使搵第二個竇口呢？
「但我唔捨得呢度ｄ魚柳薯條同四蚊一個鐘喎！」

六點半玩到十點半，返到屋企十一點，梗係立即開電視啦！你唔知今日Rock爺上鏡咩？話說有架海盜船哥登堡號黎左香港，哥登堡呢三個字足夠吸引聽metal人士上釣喇卦？（．．．）呢ｄ「咁metal」的場合，除左Rock爺，當然仲有Arthur@NANAHARA SHVYA@ATV！兩個撞到，正搵緊受害人上電視的Arthur當然同Rock爺做番個訪問先。唔使擔心劉Sir一向好照興各位讀者，一早幫你地搵左喇！Click呢度由九分半鐘開始睇啦！供應期有限欲睇從速！（噢Rock爺你已被人擺左上檯／網了）其實Rock爺只係佔左全個節目的五秒鐘，內容只係得咁多：
"It's very big...嘿嘿！And it's old history!"
「咁少？」你會問。當然唔止咁少啦。原文好長架。據當事人親身透露，其他當時情況係噉：
"It's very big...嘿嘿！And it's old history!...and IT'S SO F**KING METAL! HAIL THE SOUND OF GOTHENBURG! 你班ＸＸ同我記住我叫阿Rock！MMMEEETTTAAALLL \m/！！！！！"
仲有其他一大堆f**k呀holland metal呀當然係冇出到街啦。呢ｄ片段會留番遲ｄ出director's cut版DVD收錄，到時送多個親筆簽名你又點話！（不過，講真，睇完Rock爺果兩句之後，再睇睇其他幾個俾Arthur訪問之靚仔，會發現原來Rock爺ｄ英文，都叫做見得下人喎！）
以下，係107同108睇完呢段「Rock爺高振哥登堡之聲」後之對話：
「Ｘ！乜原來係你地個friend做訪問架？」
「梗係啦！唔係點會無端白事搵佢呀！貪佢樣衰咩真係！」
「不過都幾叻仔喎！識講兩句，又冇講錯。」
「可能訪問左十幾分鐘，最後cut剩呢五秒呢。」
「噉又係，中間條友肯定係一路f**k f**k聲，一路唱"We are the 7"。」

好耐未試過係屋企寫野同聽歌，而家生活係好耐未試過地咁遠離音樂。

呢排夜晚成日同107傾，傾好多野傾到唔多想訓。無聊野當然有，但更多灰事。而家皆旺、皆旺107同皆旺108的前路都好灰。
貼多一則啟示。

星期六，其實返唔返工都係一樣，邊有心情做野丫返得果半日之後又星期日，準時走人啦當然係。近排沉醉於睇片、睇動畫、睇戲（琴晚同107玩到咁夜就係上YouTube摷詹瑞文ｄ片黎笑，呵呵），放工得閒無事又唔想打機，走左去行VCD舖，最主要係為左《恐懼鬥室》。之前睇左第一集已經非常之鍾意，第二集冇去到戲院睇，一路等VCD同DVD，等到而家連第三集都上埋先肯出，梗係第一時間仆到出去搵啦，而家執埋隻第二集，遲下可以搞番個Project: Saw。無聊行下VCD舖有好多發現，兜左個圈睇番有好多戲真係未睇，前排睇完《搞乜鬼奪命雜作》，或者遲ｄ要追番《死神來了》，又係睇左頭兩集之後果ｄ未睇。又見到有"The War of the Worlds"元祖版紀錄片，先廿蚊雞諗得過喎，如果見到有新果隻DVD的話一次過執埋，跟住又可以一日煲晒全線 － 係喎，之前107果隻七碟musical版都未聽！噉就真係可以一鑊過煲晒！如果問埋佢借埋CD、SACD、DVD同黑膠版再搵埋隻電腦game就全線得更加完美！但鍾意行VCD舖係因為可以搵到好多唔會上畫其他地方又唔會搵到之二三線戲，喂呢ｄ先至好睇呀！見到一隻應該係新出野，叫鯊魔人Sharkman，跟住行行下，見到有另一隻，叫狂蟒人Snakeman，應該係同一個系列黎，除左因為個名，仲因為個封面，都係影住一條友個側面連條友個樣攝影角度同表情連陰影光暗都要一樣，分別只係一條友個樣鯊ｄ另一條友個樣蛇ｄ，至於劇情唔使講都知架喇，實係唔知邊個島間秘密實驗室班瘋狂科學家做實驗之後搞左呢ｄ動物人出黎殺九晒佢地之後一班正義的英雄主角即係死剩種拯救生還者之餘順便打救埋全世界而結局實係成班怪物困晒係個基地／實驗室入面然後一野炸Ｑ死晒佢地呢ｄ片十套有十一套都係呢款劇情架啦仲使乜諗丫。由呢兩隻碟95%一模一樣的封面、名同劇情，可以推論出呢個係一個得意動物人驚嚇片系列，令我好有興趣集齊一套。唔知有冇食蟻獸人Myrmecophagousman同河馬巨人Hippopotamusman？所以點解我深夜得閒無事時就會開電視。就係等／搵呢ｄ無聊片嘛。再行下，死，原來王菀之出左新碟，黃耀明都係！明哥果隻成隻黑膠咁大未必會買，但王菀之冇得走架喇實要買。死，真係好多野要買！同真係好耐未買過碟！
行完都仲有成個鐘。始終都係要走落新之城爆多舖Time Crisis 3。當然係perfect爆機啦，已經去到無意識都爆機到爆的境界了，而家係玩time attack，同研究緊點樣用盡全隻game每一版所有槍全部彈藥之玩法（呢樣先難）。真係要搵ｄ新野玩下。

今日最大娛樂，梗係上網睇片啦！琴晚果精彩五秒鐘已經傳到街知巷聞，難得今日當事人上到黎，梗係走晒過去107果度睇片啦！"it's very big and it's long history"已經成為TRHK年度金曲！之於呢晚跟住發生咩事，唔使講都估到當然係典型的107&108發狂例子，總之，唔係做生意！呵呵！

十點鐘準時收舖，除左因為冇人，仲因為要睇《墨攻》，我一定睇片頭架嘛！數埋數埋，呢幾年真係冇乜入過戲院睇港產片，記憶之中好似最近一套已經係《功夫》，冇辦法，港產愛情片笑片胡鬧片又一向冇興趣因為編劇同演劇真係太容易俾人「廢」的錯覺（賣點係靚仔靚女偶像果ｄ情況更嚴重），所以除左幾個風格化之導演，真係冇乜動機睇廣產片，包括去戲院同買碟，電視播又撞到就一睇無妨。而《墨攻》係呢幾年冇乜幾套一上即決定要睇之港產片 － 假如呢套香港導演跨國演員內地製作電影都算係港產片的話。會睇，因為睇晒《墨攻》漫畫，同因為少見之大製作中港電影，更難得係香港導演拍呢類史詩作，呢樣已經夠晒吸引力。通常漫畫改編電影都冇乜好結果不論港外，又見套戲成／得兩個鐘，起初係有少少憂慮，結果，我俾四粒星。有睇漫畫都會估到大概劇情，都係「邪派」攻城正派搵墨家傳人幫手守城之類，雖然話係改編，但大部份同人物都係原創，同時成品當中攻防只係次要，其中之人常倫理德行道理先係重點主題，動作戲戰爭戲冇想像中咁多咁大規模，但長得黎而文戲多當中係膚淺的我覺得唔太覺得有悶場，只係有ｄ攻防橋段太含糊冇交流清楚，敵軍諗完一個戰術之後守城果邊好似已經立即知道晒佢地想做乜、想係邊個位攻過黎之後輕鬆打贏敵軍，但點樣計劃點樣識破都冇講到，做到劉德華個墨家使者角色好無敵，同我好想知道趙軍退兵之後佢走入人地空晒個軍營入面整左幾煲趙國菜係想做乜，由頭到尾都冇交流過原因同結果？睇完會發覺阿叔級數人馬永遠係最識做戲，最老果班就係全套戲最有戲味果班，同時香港演員同大陸／國外演員，真係仲差一段距離 － 劉德華唔係做得唔好，只係我一向唔多識欣賞劉德華做戲，但佢的確做得出到主角果種墨家使者感覺。雖然我對呢套戲印象好正面，但相信會有唔少人持相反意見（例如107），因為你用睇動作片／戰爭片之心態黎睇你就一定失望，真正之打戲真係唔多架，但入面極多的文戲同文皺皺的對白別夠會悶死你，個個人都講好好好好叉多野，但我冇乜問題，因為一面睇一面思考到好多野。《墨攻》其中一個主題，係千祈唔好叻，當呢個世界平庸同埋羊群佔絕大多數時，有才只會招妒，然後無仇無怨都會俾人敵視排斥；同在世唔需要對人太好，因為呢個世界十個人有九個都係自私，做得第十個，就要預左俾另外九個謀害，而對呢其他人越好，其他人唔會領情只會嫌棄排擠得更深。有趣地，全中國最醒果個，唔係劉華，係個黑鬼（中國古裝片都有黑鬼問你死未？）。某程度上，呢套片意識同《英雄》好似。
好多人會覺得悶特別係睇慣荷里活式即食即棄的朋友，但我好欣賞，因為係絕對有心之作，同埋夠真。冇睇前排同呢期最紅幾套中國古裝，就係因為太靚，一靚就唔持久就犧牲左深度，《墨攻》你覺得係大製作，但演譯完全唔靚唔浮誇，又係我好鍾意果種真實做賣點，成套戲冇乜幾多個豪裝或者靚，用色構圖係咁多就係咁多冇乜多餘扮靚位，噉樣先夠接近。但唔鍾意ｄ演員係配音而唔係即場收音，點解到左呢個年代仲唔即場？或者空曠地區太難？仲有少少唔完美，就係太多偶像明星，革離本身係一個樣衰細粒老人但搵左劉德華做，反正係寫實，點解唔徹底ｄ直頭放棄所有具商業潛質之偶像級演員？（當然，負責俾錢的大老細會肯咩？）如果連女主角都減埋會更好。同埋始終覺得短，好多野冇交流晒同未交流得清楚，如果有足本導演版DVD必買。非常值得入戲院睇多次。
一喜一悲。喜，在香港導演拍出如此國際級大製作，初步印象已經俾呢（兩三）年所有我所識之大製作中國古裝片之初步印象好好多，因為真實同務實。悲，在呢套電影係改編自日本漫畫。有冇發覺有樣野好有趣？日本人對中華歷史、思想同學說比中國人同特別香港人狂熱得多。例如三國，你會諗起乜？會諗起電腦果隻《三國志》，會諗起《三國無雙》，會諗起幾套有關三國的漫畫，頂晒籠去到陳某。但數下數下，差唔多全部都係日本野而唔係中／港／台作。中國人反而唔會追隨同珍惜自己本身之文化遺產，而由外國人發揚；中國學說同語言冇乜華人會留意同討論，反而日本甚至歐洲、美國係好正統地學術式研究同學習。點解會搞到噉？特別係崇洋崇日的香港人。你有睇過幾多套港產中國古裝歷史電影同漫畫，唔係變左歷史為名武打動作為實？
最後，一條問題：《墨攻》係咪改為《墨守》會更正確？

開始維持番一至兩個禮拜一水貨之進度（希望講完呢句之後唔會變番一至兩個月一水貨．．．）。呢水貨入pop野，重點當然係ANGRA新碟，確係變左仲變得幾犀利下，但聽真ｄ先再講，反而對歌佬隻solo仲大興趣，因為唔同ANGRA而實驗左ｄ。Neo-Classical Prog-Power除左上次隻TIME REQUIEM，今次仲返左ADAGIO同SYMPHONY X，但對ANDROMEDA同Derek Sherinian更有興趣，ANDROMEDA已有，只有話鍾意啡solo的progressive metal都應該執呢隻，啡得好有hard rock feel，個感覺我覺得好過唔少progressive metal band，起碼有番「玩」果種味道而唔係一味晒命地悶。但全批貨最鍾意，反而係HIBRIA、NIGHTRAGE同THREAT SIGNAL，劉Sir份人比較膚淺嘛。

今日好悶。冇野做，又唔想寫野，坐左係度發吽逗發左成日。多謝。
「．．．．．．」
今日已經搞到噉，死，聽日仲精彩。

我真係唔明呢班到底係咩人。正正一個禮拜前上星期一先打完邊爐，今日做乜又無端白事打多次？而家打邊爐變到好似家常便飯咁平常。為左慳番幾蚊地鐵錢，放工之後由大角咀行出去長沙灣契爺屋企，原來真係好遠架可以行足個半鐘架！當然係夾埋蕩失路果Ｎ個字。契宅位置係青山道尾，係名乎其實的尾到篤一篤果隻，即係青山道已經長架啦，真係要住到去成條青山道尾二果一棟樓喎！仲要傳說中的青山道尾原來唔係座落於青山道，係要經過一間電影海報仲要用油畫的「老友鬼鬼全日任睇」古老戲院（夠晒old-school）再轉彎轉入去街名都變埋另一條街先搵到呢個唔係青山道的「青山道尾」。單係呢度已經最少浪費左三個字，真係大整蠱啦契爺住都住得咁刁鑽。上到去契爺第一句係
「阿Rock去哥登堡號，我今日又有去，點解人地訪問佢唔訪問我？」
黎到先七點半，大廚起碼遲多個幾鐘到，又即係仲有兩個幾鐘先有得食，當然係尋寶時間。今晚好榮幸得見契爺「最經典最難忘」之一次演出：JAZZTALLICA。話說Ｎ年前契爺隊band有得去酒店出騷，酒店問：
「你地玩咩音樂架？」
「我地玩果種，係jazz加rock，較為rockｄ既jazz！」
如是者，順利獲得酒店演出機會，表演地點係酒店之側廳，即係由側門出入者必定可以欣賞到佢地之雄姿。
「甚麼是『rockｄ的jazz』？」
你會問。我都有問。上到台，原來係
"METALLICAAAA!!!!!!!"
哦。一開場已經係《木偶主人》，之後有《進入睡魔》、有《爬行死》、有《四馬伕》．．．似乎《暗去》同唯一一首非METALLICA的《我是憤怒》已經係最正常。果真夠rock。jazz果部份唔關音樂事，係表演果部份，契爺的台風同一個jazz佬完全無異，一支攬到都幾高下的bass，加一個非常挺直企定定唔郁的姿勢，以呢個jazz之造型唔郁唔fing地維持左全場三十五分鐘。表演場地係酒店，仲有個圍欄圍住加多一個「不准進入」的牌（契爺話：「十足十動物園噉！」），加起黎應該點樣形容，除左用數目字？真係諗唔到。我只識得笑，實在係太好笑，真係笑到想死架，最抵死仲要係全場都拍定晒等Ｎ年後的我都有笑先抵死嘛，可惜只拍台上幾位「jazz佬」，應該拍下圍觀的現場觀眾嘛果ｄ先至係精髓呀！真係好想知台下觀眾的情況、情緒同表情，更想知道請左呢隊「jazz rock band」的酒店職員係咩樣！仲有其他好多無聊人無聊事，所以大家咁投緣，都係命中註定同奇人奇事奇遇有緣之人。
睇完JAZZTALLICA，仲有經典的《笑星救地球》一集，有得睇胡大為加廖偉雄兩條癲佬拎住支結他同bass跳加fing到仆晒街仲喪過Ｎ咁多個metal友的MV，有得睇細龜俾人用笑星拍板圍住扑，又見番好多唔知幾耐冇見過之無線演員同茄喱啡，嘩實在係太old-school太爆笑喇！呢ｄ先至係節目，先至係搞笑節目，單單靠胡大為同廖偉雄兩個ｄ演技同諗頭已經殺盡而家所有所謂「搞笑節目」！（頂！勾起左舖癮，好想睇番亞視又係兩條友曾志偉＋林敏聰《笑足千八秒》！）但同樣地呢ｄ野可一不可再架喇，自從電視多左個乜鬼PG之後，ｄ電視片集呢樣唔得果樣又唔得，ｄ對白俗ｄ俾家長嘈有打戲又有人小，乜叉都唔得，結果好很「健康」，睇黎都冇意義（試下呢個年代玩「笑聲拍板」？一集已經俾人投訴到cut show）。反而以前仲開放過而家，以前單係《大時代》一套意識同影像已經冇幾多套當今劇集及得上啦！就算闔家觀時段《卡拉屋企》都粗鄙（唔係粗俗）同暴力過而家任何一套（唔想俾例子，因為一早對無線徹底失望，你唔係叫我睇《高朋滿座》咁hihi丫嘛？）。不過呢個「PG時代」電視台已經唔會再拍呢ｄ節目，甚至重播都唔會重播，因為呢類節目型式對當今世代黎講只係悶同埋老土，睇睇《歡樂今宵》死完又出番黎死完又出番黎而家去左邊？同埋，而家ｄ搞笑節目唔係搞真正到肉之笑料引你笑，而一係靠核突樣衰一係靠女，笑都笑得冇晒深度。所以你叫而家ｄ電視台仲點噉做真係好笑之電視節目丫？就算你拍到出黎ｄ橋真係好絕好頂癮，ｄ觀眾只得一句：
「超！都冇野睇！」（乜「野」？唔使講到咁明喇卦？）
睇番舊時ｄ電視劇，會覺得而家個監管制度同觀眾社會好得意。粗話、俗語、適量暴力呢ｄ反映社會同現實之意識情境，以前點玩都得但而家出現親少少都俾人狂鬧即禁；用女人做賣點越著越少布同特登俾野你睇，點睇都更傷風化影響更深，反而冇人會投訴甚至無任歡迎。一個反智年代。

睇完又玩完，終於有飯開喇，九點八有得食，已經比上次早左幾個字架喇！上次個一品鍋唔係好多人滿意但我食得好開心，今次呢煲又點？
"It's very big...嘿嘿！And it's old history!"（呢句已經成為TRHK的一個cult了而家成日成班人係唔係都爆呢句）
今次少左ｄ選擇，好在對有肥牛就過世的我冇乜大影響，不過最好食當然係漢堡扒（．．．），好食但衰在貴左ｄ。下次要開始研究將一眾韓燒同公仔麵配料好似午餐肉同煙肉結合打邊爐。仲有下次的話。
「好似上一次正ｄ喎！」
「超！次次都係上次同上次上次好食ｄ架啦！」
呢班人你係絕對理解唔到。打邊爐果時聽香港metal野，打完之後，睇美少女戰隊。你唔係真係以為係Sailomoon丫嘛？契爺睇得的美少女戰隊又點會咁少野丫！
「質素差左ｄ喎！」（同樣地，「質素」係指咩質素唔使多講啦）
「後樓梯執番黎，唔使錢有得睇，仲想點呀？」
住係呢度真係好，得閒無事行下後樓梯可以執到咁多筍野，唔止Playstation都執到連甜片都有，抵住啦呢頭真係！
「．．．你屋企有冇ｄ正常ｄ架？」
「有！」
係《動物奇趣錄》。有幾「奇趣」，又係唔需要多講。唔想睇呢ｄ，都仲有，有死人系列，即係背景播住brutal death同grindcore畫面係噉播ｄ血腥暴力血肉橫飛慘死片段果個睇你點死系列，當然係追晒全套。黎到契宅，真係想搵番野正常野睇下都冇。
點睇都唔似新婚呢家人真係。

琴晚又係點幾鐘先返到屋企又食得咁飽，都有少少「今日唔爭在呃多日假」的衝動，但最後堅毅地迫自己一定要返工，因為今日唔返就蝕左，空城喎！呢日老闆加老闆娘有多半間公司上左工廠，全間公司剩番果幾丁友，喂如此大好時機唔珍惜就真係天打雷劈啦！更正係今日可能各方好友都知道我唔會做野，全日接近一封email都冇，又或者係知道今日無論send幾多過黎我都只會留番聽日先理直頭廢鬼事send啦！嘩呢ｄ日子真係好開心，訓覺可以名正言順地訓唔使匿入貨倉度再叫阿姐幫我睇水（劉Sir幾把砲），又可以全日用劉Sir果個坐法（識劉Sir的朋友都知道邊個坐法同點樣坐法）攤晒係度寫野同上網（即係平時我都係噉坐法，不過未至於成日都係噉款咁猖狂遮），嘩好爽呀今日真係好開心呀今日返工返得好愉快呀。寫野寫到悶，興起上網search下笑星救地球，嘩原來有好多同好架喎呢套野！又原來半年前先重播過！係朝早四點幾五點果隻不過．．．唉快ｄ出番VCD同DVD啦！肯定好睇好笑過而家果ｄ多多聲！
上上下網，又搵到一位同好，一開就係有關果段，似乎大家係同一個年代成長，講到果ｄ亞視片集全部都係當年有睇有追的買飛佛。第一代《龍門陣》是係初見黃毓民＋鄭經翰果時，真係精彩都唔識政治都走去追呢套野架，就係為左佢兩個。《香港乜都有》無論劇本製作定資訊已經贏而家無線ｄ懶有創意同掛介紹香港頭賣廣告雜誌肉的同類資訊節目幾條街啦。《點解亞Sir係隻鬼》果間中學叫咩名，仲有冇人記得？呵呵。非常認同呢位仁兄之論點，亦係我從來支持亞視多過無線之原因。
呢位仁兄個網，值得研究。

其他野，唔使問喇。呢排怒煲片中。

今日公司裝新電話。我個電話個分機編號，係 107 。
「噉108呢？」
嗌108反而搵唔到我，因為呢個係阿姐個位個電話。所以而家你打電話黎我公司搵108唔會搵到劉Sir，大嗌107反而會搵得到我但搵唔到107，敬請留意。

呢排好勤力，歌都冇聽。好勤力地摷番差唔多十年前買果ｄVCD出黎，好勤力地睇高達W，最勁一日／晚煲十幾集，加埋OVA同劇場版，個幾禮拜搞掂。所以點解你MSNorICQ我冇反應。所以點解你見我晚晚都三四點先訓。唔知點解成日都覺得G同W兩個系列係好有關係，可能因為呢兩套係九幾年最早知道的英文字高達，呢樣野果期係好流行一連幾輯都係噉：V、G、W、X，而特別留意G同W四個系列之中呢兩個係較唔同之一個，而另一個咁記得G同W之原因係搞左好耐先至搞得清楚，原來G高達個G一定要放頭，而高達W個W一定要放尾，調尾次序係唔得架。VGWX四套當年無線都有做過，但真係有追只得X，W電視都睇過下，V冇興趣（有機會睇埋的話會講下點解），而G係灰到唔知點解一集都冇睇過，可能果期顧住打機冇興趣睇動畫miss左，所以到好後來而家先搵得番G同W黎睇。睇完W發現，咦，原來當年無線播時斷下斷下噉睇，都差唔多睇晒成輯喎我！但點解果時會冇追到呢？因為呢一套個市場定向同開頭實在唔掂，不過隔左咁多年終於由頭到尾睇晒之後，先發覺捱過左個頭之後，其實呢套野又真係唔錯。首先鍾意係W係另一個宇宙另一個故事，九幾年動畫除左V、F91、0083同08小隊已經諗唔到有邊套繼續用最元祖之年曆UC，好似由明顯玩野同「賣埠香港」的G係FC，「正常番」果ｄ高達都係用新年曆，而W就係AC － 如果你睇到呢度都唔明講緊乜，基本上呢一日你已經唔需要再睇落去；可以話今日係寫俾高達fans之一日。雖然係噉，故事其實同最經典之UC0079一年戰爭好相似，可以話係按呢個劇情修改番做適合果個年代ｄ人睇之版本，正如Seed都係將0079再更新一次俾九幾年代廿一世紀新世代青年／細路睇一樣，但某程度上可能係矯枉過正，又或者係有商業目的地改變，一面睇，一面小：
「頂，高達幾時變左少女漫畫？」
W故事係五部高達由殖民衛星剷落地球，要革命推翻一直武力鎮壓殖民衛星之地球政權。最起初的高達係搵後生仔做機師同主角，之後除左G之外搵靚仔／細路做主角似乎係ZZ起之潮流，所以好易睇得出九十年代之後高達之市場目標新定向係乜，亦可以預期到ZZ起之高達已經「唔好睇」了。W當然理所當然地按照傳統搵左五個細路做主角，問題係五個主角都係超美型未夠秤少年，即係就算你未睇過呢套野，單單睇過個片頭之超靚畫功同埋人設，已經知道呢套高達擺到明係畫俾女仔睇，事實呢套亦的確係最多女仔鍾意之高達，身邊有ｄ女性朋友甚至唔鍾意睇機械人動畫都會鍾意高達W，就係因為人設夠靚。齋睇，就真係幾好睇，但劇情先係重點，亦都係問題。套野係講五個靚仔五部高達落左地球，單憑五人之力要剷平成個地球政府，即係五個人五部機對五十幾萬部敵機，係呢個冇新類型人架在的AC世界中，結果無可避免地神化左五個主角同高達。五個靚仔先得個十五六歲，已經係所有殺人放火偷呃拐騙電潛入爆破電子電腦槍械肉搏瓣瓣都識，算，由殖民衛星飛落地球無親無顧兼同全地球為敵，得閒無事走出黎拆下樓搞下事，有乜可能帶住咁大部高達匿埋都冇人會發現到佢地，而且佢地可以匿得係邊、ｄ高達壞左同冇晒彈藥又點修理補給？基本上除左其中幾個有所屬「幫派」之外其餘幾個都冇，但唔知點解佢地可以咁把炮得自己一個冇人幫拖，部高達都可以射極都有打極唔爛。上埋宇宙之後仲勁，宇宙空間之中高達係俾人追殺即係完全冇人冇物得番自己同部機，但都居然可以飛出黎殺番幾部機，之後身中幾十槍部野殘晒就爆之後唔見左，第二集又完好無缺地飛番出黎再殺過。成個宇宙咁大又乜都冇，班靚仔去邊度修理補給同搵飯食？唔止ｄ人勁，連ｄ機都勁，可能搞完G高達班友上左癮，黎到Wｄ高達全部變晒做超級機械人，可以企定定係度俾幾十部敵機狂射連花痕都冇條，主角部Wing Gundam支炮仲勁一炮射到幾十里遠成條街幾百部一炮殺晒，後來變左Zero版有雙槍仲犀利開住炮部機狂轉三百六十度環迴地圖炮一野殺晒成個戰場，真係屈機到仆晒機，再後來一槍／炮打沉成個殖民衛星或者小星球已經係兩部主角機之基本能力，又可以勁到連一下殺晒成隊艦隊一炮可以炸晒成個香港的殖民衛星炮硬食完部機都居然可以未爆晒機師完全唔傷，甚至部高達可以就噉衝入大氣層，玩晒了。神呀。Wing Gundam Zero機能同破壞力肯定係史上最強高達，甚至遠超全武裝貨櫃GP-03、有月面基地微波砲的高達X同G高達部大佬魔鬼高達。所以呢五部高達可以身為宇宙公敵都好正常，因為理論上 － 係理論上呀下 － ｄ裝甲同火力勁成噉，佢地係可以企正係任何數量的敵人面前食晒所有彈都唔怕，單單衝埋去用鐳射劍已經可以斬死晒所有人，即係要滅絕全宇宙用五把鐳射劍就夠，想唔咁辛苦的話，既然部Wing Gundam咁勁一炮可以炸爆一個殖民衛星，單用呢招已經可以解決好多問題，攻人果時只需要走到超遠然後係噉開炮就得。但當然呢ｄ只係理論上啦下，本來集合全世界兵力都傷唔到分毫之五部主角高達，當劇情需要時俾人輕輕射一下都會立即爆機，同埋你會發覺呢套野勁唔係ｄ機勁，係ｄ主角勁，睇ｄ雜卒機平時掂一掂撞一下打一拳都會立即爆炸死左，但有幾集主角同ｄ重要角色坐同一部雜卒機時，呢ｄ本身打崩左塊腳趾甲都足以致命的卒仔機可以勁到高達噉捱幾十粒火箭百幾槍都唔爆花痕都冇條，而最勁係假如部機係路人甲乙丙坐的話，部機就算只係一個小小爆炸入面ｄ人都會乜都死晒，但主角坐果ｄ就算自爆或者爆到成個核彈噉爆，ｄ主角都唔會死而只會（重）傷甚至傷都唔使傷。冇錯，呢個世界就係咁唔公平，主角就係咁大晒，令到高達Wｄ機師同高達實在太「神」，冇錯「神」係好型，但實在型到冇晒節制喇，同時亦因為太型，搞到另一樣野好唔滿意：既然想賣靚賣型，點解全套高達四十九集，由到頭尾都係用同一堆罐頭片？打鬥場面集集ｄ片來來去去都係果堆，主角發炮果幾個甫士，對方中彈果幾個鏡頭，基本上佢地球整定一set廿零三十個鏡頭宇宙整多另一set，之後每一集拎呢ｄ片剪剪貼貼換個主景拼埋就係一場仗，所以第一集睇到第四十九集，除左ｄ主角互砌同特別劇情係新畫，其他果ｄ睇多左發覺好鬼眼熟太過求祈。唔知係因為節省成本定點所以用咁多罐頭片，W之機種可以話係咁多套高達之中最少之一，全套高達卒仔機先得果五六款，主角果邊五部機仲要得三部有換新版即係得八部（其實你睇五部之中得重炮高達同沙漠高達冇得升級，就知某程度上作者都知道呢兩部係五部之中最差，重炮係機師超勁但在這有防護罩的年代齋射冇埋打的機唔夠勁，沙漠係人廢加機廢），加埋對方大佬ｄ機夾夾埋埋全個W系列二十部機都唔知有冇，所以講打的話，W其實唔算太好睇，因為少種類之餘ｄ主角機太屈同主角級人馬太神，除左重要幾場同主角鬥主角之外，其他場面ｄ機係冇乜發揮，不過動作設計真係幾好，尤其是睇完格鬥為題之G高達再睇，會發覺G高達ｄ打鬥場畫其實係設計得比預期中低水準，對G有ｄ失望之餘亦覺得W堅打果幾場又確係做得好有迫力。之前電視播唔鍾意睇，因為頭幾集去得太慢，同整體太多文戲，打果ｄ又太罐頭，加埋頭果幾集唔知有意定無意，真係做得非常之「少女」，難頂左ｄ，而家睇番，捱得過開頭呢後面又真係唔錯架，劇情始終係改自一年戰爭（好老實講，有幾多套高達唔係丫），同做到高達自面世後之目標，真實反映出戰爭禍害同和平與戰亂之矛盾，做到唔係得個打而真係有野諗之動畫，而最特別亦都係W之特色係ｄ高達唔係同以前噉一部機跟一個機師，而只好似其他卒仔機噉只係一部隨身之機動戰士，好似新主角機Wing Zero出果陣時並唔係由主角坐，係兜兜轉轉換過幾手先至正式由主角用，而幾部高達係易手過好多次，亦有好多主角機對打同高達對打，呢樣野其他機跟機師之高達系列好少見，亦係我覺得W一個成功突出之手法。只不過問題係可能要就番果個年代ｄ觀眾同「新開拓」之女性市場，個劇情有陣時為左型而冇晒深度，好似兩個宿命主角、W當中的所謂「阿寶與馬沙」次次見親面都係打，無論身邊有咩其他人係處於咩環境點樣俾萬九幾部敵機圍攻都照係噉打完全唔理，其實好鬼無聊，同埋主角ｄ立場太亂一時一樣有時正有時邪，今集打敵人下集又打自己友，本來係正派的「馬沙」突然間變做敵人阿頭（可能又要係跟住UC歷史啦），但每次改變態度立場之原因都好薄弱，雖然五個／六個主要機師相信係全個高達世界中最勁之非新類型人機師不論機內機外，但好似就係因為作者要「型」，搞到佢地一時呢個款一時果個款，而到最後你會發現主角贏唔係因為佢地勁，而係因為全部奸角突然戇居玩自殺，都幾灰。編劇方面差左少少，亦係我唔太滿意W其一，雖然減番呢ｄ咁「少女」式造作，我對呢套野印象又唔係好差仲幾鍾意，特別係兩首主題曲都好好聽。
黎到呢度，好長，不過未完仲有。完左電視，仲有OVA，全輯OVA四集每集一個鐘，但基本上只係將電視四十九集濃縮成四個鐘噉解。電視去到第廿幾集時已經有兩集係超濃縮回顧番之前廿幾集係講乜啦，點解OVA仲要再做多四個鐘？唔知點解，ｄ機械人動畫好鍾意呢ｄ野，硬係中間要攝一兩集講番晒之前咁多集內容（係架你睇過邊套機械人動畫係唔會做呢樣野？），又要冇加咩新野入去純粹倒帶，追晒電視的話呢四個鐘睇黎都浪費時間。但更灰唔係呢度，而係睇晒四集之後出預告片，原來係有兩輯OVA，而第二輯OVA先至黎料講成個高達W之真正結局！當堂粗口橫飛！好在之後睇番，原來OVA第二輯即係電影版，只係電視播完之後再剪接加ｄ新片落去再上戲院，噉先爆少ｄ粗！第二輯OVA／劇場版之賣點係所有機從新畫過變成Custom版，可以話劇場版呢幾部先至真正算係作者本身想畫之高達，真係靚過電視版Ｎ咁多倍完全係兩回事，最經典當然係Wing Zero Custom對天使翼。另一突破係用到CG，好少遮只得一兩幕，但果個年代CG呢樣野係幾破天荒地新穎，呢兩幕仔算好大件事架喇。最高興當然係所有動作場面終於唔係罐頭片喇，如果電視版都打得咁精彩立即加多幾十分，可惜在呢個OVA／劇場版又係同電視衰同一樣野，唔係為劇情、唔係為打，而／只係為型，真係得個睇字架咋個劇情其實都幾夾硬黎，尤其是當敵人全支軍隊都係用同一部機即係全套唔計正派先得呢部新機咁大把，仲要部新機係照住重炮高達整出黎即係其實一ｄ都唔新。又個劇情亦同原著一樣，太空政權計劃掟殖民衛星落地球，講到撞左落地球之後會好大劑立即核子冬季全人類滅亡，但當年0083都試過成個衛星跌落美國地球又冇事？（不妨留意一下，日本動畫同漫畫次次地球有大鑊野發生，遭殃果個一定係美國，十次有八次都係）搞到呢套劇場版好似純粹係為左出多幾款模型搵多ｄ錢而出，吸引力冇乜，但我又受喎，因為ｄ新版高達真係靚好Ｑ多。OVA同劇場版都係摷番十幾年前買落果疊VCD出黎，好多VCD連當年都未睇晒，而家睇完DVD再睇VCD就知咩叫outdate，無論聲定畫VCD都差好遠。問題係，我全線高達都係VCD喎！夠晒懷舊！
起初印象幾負面但結果好鍾意，或者真係因為年代問題，0079仍然同永遠係最好一套，係俾成年人睇之動畫，過左F91同0083都冇乜邊套高達特別好睇喇，因為年齡向開始下落，G高達唔使講都知俾咩人睇啦，W擺到明係賣靚仔引女但已經係我較鍾意'90高達之一，跟住X真係完全冇驚喜甚至冇感覺（但呢套可能係劇情同商業上最失敗之高達係我唯一一套電視做即由頭追晒追到落尾噉先夠諷刺），再跟住Seed，頂唔順喇，機設唔掂之餘人設更加係恐怖地幼齒見到都想嘔，劇情已經預左唔會有咩睇頭喇，高達之本質深度已經由成年人同成熟青少年同大中學生變成小學生，W之後可以話放棄左高達，仲有幾套好似08小隊同Turn-A（唔計機設）真係好睇，但實在冇以前咁有心機追喇。一係就好似G噉直頭唔當自己係高達，繼續拎住高達之世界觀但一步一步膚淺化商業化，見到如此景地都覺得好灰。即係將舊高達更新做適合呢個時代遮，呢個時代ｄ人唔係真係咁白痴咁唔識思考卦？

呢排呢度冇咩野睇好正常，因為唔係摷VCD就係打機，呢晚冇機打，即係又係高達之夜啦。拎番隻F91出黎睇，貪佢係高達電影兩隻VCD兩個鐘搞掂。叫F91好明顯地係因為1991上畫啦，當時仲係得果三四年級連睇高達之機會都未有，只知有呢套超正機械人動畫存在，果時第一次見到F91已經極度鍾意，跟住見到埋ｄ敵機就知道呢套野實在唔睇唔得，
「好Ｘ靚呀！！！」
唔好意思果時仍然非常純真的劉Sir係連粗口係咩一回事都未知道的，請將個Ｘ字刪左佢。係真係單係靚一樣已經足夠吸引到年少無知的我，但係當件只係個小小小學生，又點會有機會去戲院睇或者搵到錄影帶黎睇？所以隔多幾年到到自己儲到ｄ錢又識得出街時，搵到隻VCD先有機會睇到一圓此萬千童年夢中之一個。要講F91，當然要講美術先，到今時今日F91之人設機設仍然係我最受落最滿意之一套，畫功精細左好多，要插的話當然插得到但係夠應付我的要求（我膚淺嘛我唔係專家嘛），機設風格直到今日都仲係最特別之一個系列，敵對陣型ｄ機全部非常之歐洲化同美工化，造型同武器都好有中古騎士格，最卒仔果部卒仔機都靚到仆晒街，亦搵唔到第二套個設計風格係似F91，除左之後個宇宙海盜續篇Crossbone，仲要將呢種機設去到更加另類之極端，如果唔係因為冇影畫化，相信Crossbone會俾人插得仲勁過G同Turn-A。最後大佬朵食人花拉夫列西亞直頭係高達史上最強最經典MA，幾十支激光炮百幾條觸鬚，全機直接思想控制，理論上係一部足夠屈爆機（雖然機戰入面佢有得出血滴子，但實際上電影中之血滴子係獨立行動唔關佢事），講高達的話F91就更加係最靚＆最勁＆我最愛高達之一，仲有殘影分身絕招出喎！而當年最革命係故事去到0153年即係差唔多0079一個世紀之後冇晒限制，出現破天荒的鐳射盾，ｄ科技實在好勁！更鍾意係合理好多，ｄ高達唔似以前一掂即爆而斷手斷腳斷頭中幾槍都唔會即爆，直到真係俾人重創或者擊中重要部份先會爆，真實番ｄ（因為科技過左？），同埋戰鬥繪畫得更細致。單講美術呢套已經係最成功高達作品之一。只不過靚係冇用，踏入90年代，真係宿命地冇幾多套高達有以前八十年代時咁有吸引力，往往就係衰劇情同深度。故事年代已經去到UC0123，冇晒自護泰坦斯呢ｄ「奸角」變成全新局勢同故事，當然不離地球政權同殖民衛星勢力對抗，按照元祖高達傳統主角實係後生仔一個，一班柴娃娃靚仔靚妹住緊個衛星俾人攻打誤打誤撞入左軍部，跟住未坐過機動戰士打仗的主角無端端被屈做左高達機師，要用高達幫處於劣勢的地球聯邦反攻太空。全電影個半鐘就係講呢樣野，但劇情完全冇驚喜完全唔特別都幾失望，因為得個半鐘交代晒正常要二三十集先講得晒之內容關係，套戲去得太快，好多地方唔夠清楚或者跳過好多步冇講，好似話有敵人變節，兩個字前仲係敵人果邊，兩個字後突然變成自己友仲要順理成章得好似一早已經係自己人噉，最後朵食人花咁勁點知主角仲勁唔知點解臨到唔夠抽時最後一刻多左招分身搞到隻食人花戇居居做低自己，又係吹脹，係型都型得合理ｄ解釋番下啦大佬，實在係太快同太求祈，打雖精彩，故事有好多野都可以延伸同解釋。睇完之後，只會覺得一定唔止咁少，以F91之潛質，肯定唔（止）係一個個半鐘電影project咁少咁浪費，人物非常之多亦有晒成個完整世界觀，當年打超任隻game有出F90系列（Ｎ咁多個裝配，相信係歷史上最多型號之高達），而F91設計靚、武器多（基本常規裝備可能係所有高達之中最多之一部），又有超勁一炮穿盾之VSBR令佢成為火力最勁高達之一，仲有屈爆機絕招分身，打機戰果時F91都係最勁高達之一。既然有咁完整設定再加埋F90之歷史，造出黎點會只係為左呢個半鐘咁大把，淪落到主角一開波第一次用機動戰士已經勁過晒全隊其他人，又冇乜探究過對殺人之反思，ｄ機能太快發揮晒出黎，最後又老屈地開到招分身贏埋大佬，搞到冇晒發展同太理所當然好多吹脹位。所以如果當年能夠成為電視版相信可以成為一套小／半經典，已經夠晒料砌電視版丫，點解唔去做？（雖然我覺得呢個故事同宇宙，改成電視劇都唔會夠以前（新）自護年代時咁具思考性同哲學性），所以成個F91世界，最精彩唔係F91呢套戲，而係F90同之後Crossbone呢ｄ小說同漫畫，精髓全部留晒俾螢幕以外。搞到我對Crossbone好有興趣。
睇完套戲，未完，仲有片尾。十套戲有九套唔會睇片尾，但F91個片尾係萬睇不厭，當然唔係睇字幕啦，而係F91首片尾曲係我最愛高達歌"Eternal Wind"，聽到今日都仲係咁鍾意聽的一首J-Pop，當年睇完套戲之後係噉倒帶就係為左重播片尾聽歌，又冇soundtrack又冇mp3要聽歌就只有呢個方法，今日自然係歷史重演倒完又倒連聽幾次，實在太好聽喇。聽埋歌仲有喎，片尾之後隻VCD仲要加埋果年所有同F91有關之宣傳片電影模型都有，製作超專業。就係因為呢隻VCD，令我對F91印象持續正面，你唔鍾意一回事，有好多不足亦係一回事，我就係鍾意F91，因為可以話係最後一套好睇之高達（仲有緊接住之0083、08小隊同Turn-A）。之後V開始，冇幾多套提得起興趣。唉。

一唔覺意，呢兩個禮拜噉就四十九集W加埋兩輯OVA順便夾埋F91。跟住係咪應該睇Turn-A？定重溫另一經典0083？或者KO埋銀河英雄傳說個45VCD全集？係喎，我連第一代高達套VCD都未刨晒喎！仲有大把野睇，即係今年都唔使聽歌。死，一唔覺意都可以寫咁「少」，最經典的元祖高達睇完咪大鑊寫幾日都得？

有一條問題我成日想知答案。
「到底皆旺108呢間TRHK，有邊個人係正常？」
睇睇今日出現果班，數一數先：有「前幾晚睇明珠台見到BODOMｄvideo」的梁生，明珠台會見到BODOM？係咪全香港聽最多black metal的佢終於聽black metal聽到上腦傻左？有哥登堡號終於走左所以冇心情的Rock爺，喂哥登堡號好似係架海盜船，唔係AT THE GATES同IN FLAMES的流動表演遊輪喎！有上年聖誕已經開始放緊今年聖誕假的冷爺，算啦你而家放緊果個應該係09年暑假黎。仲有晚飯係「豉椒漢堡＋四隻鵝翼＋雲喱拿奶茶＋螺絲批一字十字各一個」的107，所以今晚食晚等左好耐先有得食，因為齋研究點樣食得咁刁鑽已經研究左半個鐘，又最後麥記俾左咩佢我就唔知啦，只知道負責買外賣的阿捷居然可以完好無缺地上返黎 － 做我地外賣仔冇貼士收之餘仲要搵命搏都會接呢ｄorder落去買，一睇就知道佢係最唔正常果個啦。所以今日麥當奴都同我地一齊唔正常，平時包漢堡包ｄ紙係白底紅／藍字，今日俾我地果ｄ居然係白底綠色字架！
「你唔知麥當奴blacklist左果ｄ客人係用白底綠字識別咩？」
原來係TRHK，劉Sir係最正常果個。

今日收舖之後居然冇節目，返到屋企立即拎兩隻碟出黎。冇錯今日又掃碟，唔好意思唔係metal，係王菀之同劉以達。王菀之出左新碟都唔知係前排行VCD見到先知道又有新碟，今個禮拜六襯有時間即執啦，同上隻唔同左，以前folkｄ、acousticｄ同哀ｄ，今隻碟第一首已經開心笑比較cutie同folk rock味，有少少唔對路係唔知點解歌路好陳奕迅，有半隻碟一面聽一面有呢個諗法，演譯、旋律同編曲實在好似，但兩者俾我揀我都係揀王菀之，因為陳奕迅始終係唱其他人作ｄ歌，而幕後一早已經俾某幾個人／某班人壟斷得太耐，所以背景好多時真係差噉ｄ味道夾唔上佢實力，但王菀之係自家創作，始終唱番自己寫ｄ歌實會有感覺ｄ，同埋呢份努力我會更欣賞。全隻碟只得一樣野唔鍾意：個包裝。隻碟個digipak大過一般之外送埋幅畫包埋畫架俾你，其實幾雞肋，聽下歌仔遮我都只係。另外劉以達新band達與璐，之前放左個MV上YouTube，睇就當然係劉以達式另類啦唔使講，首歌比預期中pop但仍然有聽劉以達先聽得到之特色，加埋向來鍾意佢達明時代已經係鍾意劉以達多過黃耀明（我份人一向鍾意幕後多過幕前），身為幕後加埋佢副尊容出唔到名、冇黃耀明咁出名就預左，但佢之才華，相信成間人山人海夾埋都及唔上，所以黃耀明出左咁多隻碟一隻都冇買過亦唔係好大興趣，但達與璐一出，唔使諗磅水。全隻碟係一絲香港味都冇，唔講的話會以為係大陸band出碟，我鍾意呢隻多過《水底樂園》。兩三年前傳說佢仲有一隻碟係玩純音樂，係玩結他同編曲野，由達明聽到而家達與璐都知佢唸兩方面功力有幾深，所以好期待，但係講左幾年，講到而家都未見影。點解？純音樂喎！彈結他喎！！冇人唱喎！！！香港地出呢ｄ唱片？？？？你俾錢幫佢出？？？？？
呢兩隻碟，當然係去番公司果頭間商場仔入面果間唱片舖買。仍然係得我一個客人。從老闆之招呼態度同回應，似乎一次買兩隻碟的我已經係呢間舖的大客，甚至呢間舖只會有我會黎買呢兩隻碟。賣唱片真係一日比一日難做。

咩叫成功？睇睇《恐懼鬥室》呢個獨立電影系列就知。兩個主角起身之後，發現比人鎖左係一間密室入面，間房入面仲有兩把鋸同一條屍，原來係用遊戲殺人之大奸角「砌圖」佈置之死亡遊戲，要走只有三個方法：一係殺左對方，一係用把鋸鋸斷自己隻腳，一係自殺，成套戲大半時間就係徘徊呢間密室睇兩個人點掙扎，加多幾個景同少少血做個半鐘。呢ｄ咁cult咁綽頭之劇情，好容易會變成高不成低不就的扮野，但《恐懼鬥室》低成本加獨立味濃之製作，贏得商業上同口碑上之重大成功，全靠接近無可反駁之劇本同拍案叫絕之佈局，之前睇左已經睇到觀呼，襯住而家第三集上第二集又出DVD，買第二集果時特登買埋第一集隻DVD重溫一下。成套戲其實真係好簡單頭先幾句已經講晒，真係多血要到最後主角自斷一隻腳先真正最多，其餘大部份時間其實幾平和下血腥場面都拍得好低調。點解咁簡單又可以咁有吸引力完全冇悶場，睇到最後埋尾仲可以拍爛手掌？點解連用左唔知幾多十億美金拍到唔知幾大陣仗之荷里活電影都做唔到呢樣野？因為呢套係獨立電影，錢同時間唔係多，要用有限資源完成全套電影，自然會逼迫出無盡意念，始終劇本係電影之決勝關鍵，單係最後之結局，已經冇幾多套大片拍得住果份震撼性。所以三集之中，最少野玩最簡單最平舖直敘之第一集最得我心最鍾意。支持indie。
結局精彩，片尾一樣得我歡心，因為揀左FEAR FACTORY首"Bite The Hand That Bleeds"，係同"Saw"一樣04年出之"Archetype"全碟三首冇死腔歌中最正果首，但會鍾意成噉唔止因為首歌，仲因為歌詞同呢套戲之內容同意識夾足100%。因為呢個片尾呢輪特登摷番FEAR FACTORY出黎聽，呢隊band除左某幾隻碟真係聽極都咁鍾意，就同呢套戲一樣。

第一集勁成功，唔知點解當年第二集好似冇片商買結果香港冇上到，等左好耐到而家先有DVD，真係唔係到而家第三集上有得食住個勢都唔肯出，我又戇居地唔會／唔想／唔識download or BT喎（在這個年代，這種戇居是完全不會被欣賞，只會被狠狠嘲笑），可想而知等左幾耐。但結果係對我黎講水準較低之一集。睇完第一集當然直落第二啦，今集規模擴大左，由兩個人變成一班人，由一間室變成一間屋，因為換左導演同編劇所以故事同製作風格唔同左，影像玩顏色玩得好勁，主題色仍然係綠色，但係用到好多重色同鮮色，菲林又重粗糙顆粒感，雖然係夾埋劇情同處境，但唔太對我口味。故事一開頭亦已經冇咁大吸引力，老豆係差佬但仔行蠱惑，個仔有事老豆去差館的佢出黎，已經估到之後會發生咩事，當故事講到一班人俾「砌圖」困左入一間毒氣屋度兩個鐘內搵唔到解藥就會毒死，唔使講都知道主角即係差佬佢個仔實係其中一個，而佢當然係帶成班人去「砌圖」個竇口度要人，跟住班友一個一個死完全預左，只不過今集ｄ遊戲又唔多又死得唔多精彩，最後由玩遊戲死變成班人內訌自己友打自己友食或者中毒死，睇都唔夠癮。又因為上集一開始已經耐人尋味果份懸疑，對呢集續集劇情抱幾高期望，但點知一開始冇左大半思考空間已經失望，跟住仲有更多野係睇過第一集都好大機會估到，好似女主角Amanda，第一集唯一一個遊戲生還者，但今集個遊戲又有佢份一齊玩，老實講，見到佢再次出現已經有預感佢同「砌圖」有關係，尤其是上集得佢個遊戲係最「簡單」而今集佢玩果個遊戲係就算贏唔到都唔使死，即係點都要保住佢條命唔死留到最後，佢個真正身份實在係太過明顯。好在最後結局總算冇失望到，做到同上一集之結局一模一樣只係角色唔同左，呢樣已經係一絕。可惜，對我黎講只有結局係夠吸引力。
今次片尾係MUDVAYNE "Forget To Remember"。呢一集配樂多左好多metal野。好明顯導演同編劇果班都係metal友。

睇晒兩隻DVD，第二集仲送多隻製作特輯一次過講晒頭兩集，我最鍾意睇就係呢ｄ幕後精華，同睇ｄ人點做野諗野，齋睇呢ｄ花絮訪問都睇左成個幾鐘，抵玩。《恐懼鬥室》導演叫James Wan，原來係個馬來西亞人，之後移民到澳洲定居同讀書，跟住同佢個朋友即係第一集其中一個主角諗到個劇本，噉就搞掂。三集之中得第一集係做導演，跟住兩集已經交俾其他人導自己做監製，而第一同第三集故事佢都有份編劇，可能因為呢個緣故，佢參與最多之第一集同之後兩集風格好唔同，直到第三集做番編劇，令呢集唔同得黎會有番第一集想帶出果種感覺，而只做監製之第二集係系列中較遜色之一集。呢樣都唔係勁，最勁係佢超後生，拍第一集時先同我而家差唔多老！當堂覺得自己on99！

一面睇戲，一面食薯片。呢排行過七十一，見到卡樂B出左隻新野德國肉腸味薯片，推廣價$17兩包，見賣相同價錢都幾吸引就買黎試試。唔食就算一食就大劑，死，呢隻德國肉腸味已經成為我最愛卡樂B薯片，原味就當然係皇道啦冇必要比較，冇咖哩味同熱浪咁激，香口得黎又冇pizza味咁濃，就係咁剛剛好，大劑！黎緊相信晚晚都大排碟睇，立即有計劃去搵間批發執一箱返屋企長期作戰！

屋企睇完頭兩集DVD，即出旺角睇第三集。一場黎到，當然要打／爆多舖Time Crisis 3先。呢隻game有三關每關三版即係全九版，score attack一向冇乜興趣，time attack亦玩到唔多想玩我試過讓夠人地整整一關先開始玩之後仲可以快佢版幾爆機，所以繼續玩gun attack，一個夠晒無聊的玩法。有四種槍你用，包括無限彈的基本裝備手槍、機槍、shotgun同榴彈砲，照常理當然係以冇彈數限制之手槍做主力啦，但調番轉gun attack係用其他槍為主，初步戰績係成關第一關一發手槍都唔射，但現階段僅止於第一關同第二三關某幾版，因為之後ｄ關敵人數量多好多補給唔夠，同埋後面ｄ大佬一定會用盡晒你所有／大半彈藥先做得低。更大問題係有ｄ位係有大大個目標企係度任你射加分，呢ｄ情況通常會手痕換支手槍出黎玩，大佬，就算唔玩分，射十槍同射一百槍都係入三蚊，噉入左錢有乜理由唔射番夠本先？
Time Crisis呢隻game又係萬煲不厭。（有冇發覺每隻劉Sir話「萬煲不厭」之game例如Time Crisis同C&C，都係佢闔埋眼都屈爆電腦果ｄ？）

為左呢個Project: Saw，今日專登早ｄ起身一野過刨晒兩集DVD加製作特輯，順便爆多舖Time Crisis（．．．）再直入戲院睇埋第三集，即係考試返工都冇咁有心機冇咁落力。
「套戲呢日先上左冇耐，仲要禮拜日，邊度有飛賣呀？」
真係好多人，去到即場買飛，除左頭兩行全場得番兩個位，唔使人陪就有呢個好處就算點多人都好即場先搵位都唔難搵到。入到戲院先發現，
「原來我咁大個仔，第一次入戲院睇三級片！」
其實之前唔知道原來有《恐懼鬥室3》，係冇幾耐前睇報紙睇到話外國上畫時有好多人睇到暈要call白車先知道，第二集冇乜野唔上但咁具爭議性的第三集居然香港有得上，時代真係唔同左。故事延續第二集，上集個差佬同第一集其中一個主角一樣最後俾人鎖左係密室度，不過佢出現純粹係回顧番第一二集一ｄ冇解之謎，主線係「砌圖」已經去到絕症末期，所以Amanda接手繼續玩遊戲，沿途捉左一個女醫生幫佢做手術，同一時間仲有另一個男人玩「過三關」遊戲。因為「砌圖」換左人，今集殺人風格唔同左暴力好多，諗住會好似外國噉睇到暈低？從頭到尾全場居然反應都冇個，冇人走冇人暈冇女仔尖叫，時代真係唔同左。順理成章地今集更多肢離破碎同血肉橫飛場面，我地呢ｄ細細個已經打機唔血腥暴力唔玩（Doom！仲有到而家都勁想玩番的Rise of the Triad！），又玩真人快打呢ｄ唔見血唔收手，又睇美國動漫大，呢ｄ場面冇乜野，但實在係多血過頭，雖然我鍾意暴力但過份血腥唔多鍾意（好矛盾），亦因為太賣血反而搞衰左，好似中間「砌圖」開腦係重點戲，但我只覺得著墨太多拖到套戲慢晒，整體亦因為分開女醫生同男主角兩條線一時一邊，進度冇上兩集咁順而拖下拖下噉。另外《恐懼鬥室》系列有一個問題，就係每一集都會重溫或者解釋番上一／幾集之謎團，好似呢一集講番晒上兩集結局之後發生咩事，睇左之前兩集會覺得好正因為解釋左好多野同知道好多本身兩集冇可能知道之內情，但如果你睇左呢集先睇番之前會好冇癮，但就算係由頭追到而家都未必係好，因為成日都要回憶同解畫，第二集只需要講番第一集ｄ野但今次要同時講晒兩集以內同以外好多野，搞到有ｄ部份慢上加慢。同第一集一樣，有ｄ野其實又可以一早估到例如男主角同女醫生之關係，好在《恐懼鬥室》最強之出人意表結局仍然係估佢唔到，加埋今集係三集之中演員演技最好之一集，慢冇所謂我都好鍾意，最少受呢套多過第二集先啦。最後又特登留左唔少伏線，好似Amanda睇左一封信之後同「砌圖」反面，同病床側邊仲有一餅錄音帶冇播到，另外主角同佢個女困左係「砌圖」個基地度冇出黎，要再玩多一個遊戲先可以救得番佢個女，今次唔肯埋尾之動機太明顯，唔似得上兩集噉一了百了之餘又可以合理地繼續延續落去。即係又要等。
今集ｄ音樂再metalｄ，上網睇番個soundtrack，差唔多首首都係仲要全部都係而家最出名果堆連MESHUGGAH，但其實聽緊果時你唔會好覺。最後一樣野，好唔滿意：中文名副題叫《死神在齒》。睇完呢套戲，好想問關齒咩事？除左張海報之外，成套戲根本從未出現過齒呢樣野。個中文名點譯出黎？好明顯係宣傳部果班未睇過套戲見海報係點就求祈作個名俾佢。一個負面宣傳案例。

睇過《恐懼鬥室》，先會知道原來三級片／gore/brutal/horror片都可以咁有教育意義咁有思想咁有哲學意味，三集都值得睇完再睇，編劇真係太妙同有野諗，第三集出DVD的話確要第一時間買番隻支持。三集之中，第一集一定係最神聖架喇，咁少角色咁少場景可以做到咁大震撼，仲有呃盡全世界之ending，編劇之功力實在太高。第二集已經講左，拍攝同故事因為口味問題唔太滿意，結局驚喜唔夠仍然夠巧妙搭救番ｄ。第三集劇情吸引番但實在太多血，呢個雖然係血腥恐怖片系列，但思考人性一直係重點血同死只係襯托，果份意識同氣氛上之隱晦性血腥先係吸引力所在，好似第一集其實一路以來流血場面都唔露骨，到最後主角鋸斷自己隻腳立即嚇死晒全世界，呢一幕仍然係全個系列之最經典，但第三集一開波已經係大石斷腳同炸彈碎屍，中間開腦手術再zoom in近距離示範，最後扭斷手腳真係會恐怖到暈，多血多到渲賓奪主視覺成份過重，所以個人結論係三套都值得入戲院睇，特別係入戲院「睇」一定係第三集，只不過影像以外計，第三集冇入戲院睇都唔會後悔。唯一一樣唔滿意，係同太多英雄動漫一樣，冇為奸角解釋好多野，佢地之智力、能力同財力來由好多時都唔會講得清楚。故事講「砌圖」係一個絕症病人，正職做玩具工廠，試過自殺但死唔去，之後就專殺放棄自己唔珍惜生命ｄ人。可以話佢只係一個普通阿伯，但單憑一個阿伯，後來加多個Amanda，一個人／兩個人點做到咁多野想像到咁多野、可以起Ｎ間殺人遊戲研究所、可以搵到咁多錢、材料同機械做咁多殺人道具、可以搵到地方搞咁多野殺人而唔俾人發現、中拳中刀中槍又唔死、又識做內外科手術、仲要咁醒？最吹脹係一個普通阿伯加多一個普通靚妹，係可以知道晒邊個人咩料，係邊年去邊度做過ｄ乜件事有咩人直接同間接有關都知道晒，即係警察甚至FBI都查唔到甚至當事人自己做過做完都唔記得左佢地都仲查得番出黎，神成噉真係吹Ｘ脹擺明搵戲黎做，亦係全個"Saw"系列我最唔滿意之處。之但係睇落去都唔志在算鬼數，個劇本確係好野喎，即使眼前情況係點，真係跟足「砌圖」阿伯每一句說話每一條規矩最後先可以全身而退之佈置確係絕得無可再絕。神咪神囉睇戲唔好駁戲！駁左的話邊度有戲睇？

可能時興三部曲，《恐懼鬥室》有意無意間三集成為一個完整故事，如果冇睇過之前可能會唔明後來發生ｄ事，例如你冇睇第一集直接睇第二，單係Amanda係咩來頭、點解佢會知道咁多野、點解佢會幫「砌圖」已經唔會知，而唔知呢ｄ野睇第二甚至第三集有ｄ時候係會一頭霧水，而如果係諗住睇完第三集之後追番開頭，唔好意思，第三集揭曉左上兩集太多野，睇完三先睇一二，其實係相當冇意思。雖然個一拖三劇本真係絕至絕頂，但有樣野雖然集集都見但其實一路以黎都冇乜關係，就係saw。第一集最貼題，主題工具已經係鋸，臨尾高潮亦係用鋸帶出，但之後每集都係客串一下，第二集係最後返到第一集結局間密室果度時出一出場三秒都唔知有冇，第三集繼續第二集結尾即係又係密室入面當然再次見到，而第三集結局亦係用鋸殺人，仲要升級做電動版忝，不過真正配番"Saw"呢個名只有第一集，之後兩集鋸呢樣野純粹象徵式出現，象徵番「砌圖」遊戲當中必須要放棄一ｄ野生存之哲理，但已同呢種工具於戲中之本意冇咩大關連，所以香港宣傳果班其實有先見，第一集已經改定《恐懼鬥室》呢個更適合二三集之譯名（亦見過《殺人鋸》定《追魂鋸》呢ｄ名，似乎係中台譯名黎？）。三部曲結局係所有人死晒連「砌圖」都死埋，得番一／兩個人、一個遊戲同幾個未解之謎，但已經講到明年上第四集。黎到呢個境地，下一集仲可以講ｄ乜？下集先算，雖然死到噉，但以編劇之功力，絕對相信要繼續發展落去成為一個系列都唔會有難度。可能最後發現難在唔係劇情，係諗仲有咩創意死法。
"Saw"都追晒，下個目標，或者係同樣賣cult賣血的"Cube"。

近來有人投訴，而家劉Sir個網冇其他人ｄblog咁好睇，例如契爺果個。官方回應係：
「自便。」
記得劉Sir個網以前叫咩名，都知道呢度從來唔係一個「認真」的地方，只有無聊，無聊就即係果日諗到乜想點寫就係果樣野。無論段記同碟評都可以寫得好爆好潮，易睇同「好睇」得多，但唔好意思，劉Sir就係劉Sir佢係噉就噉，你要佢改變黎就番你佢做唔到，同時劉Sir個網係寫俾劉Sir多過寫俾其他人。所以，自便。
又或者調番轉頭諗：黎劉Sir個網，都係因為劉Sir唔係、唔同其他人，呢度睇到ｄ野，其他地方冇可能搵到。如果要劉Sir變到同其他人、某ｄ人一樣，你仲黎呢度做乜為乜？

．．．你唔需要問架喇，呢排唔係瘋狂睇高達就係瘋狂睇戲，唔係瘋狂睇野就係發癲打機不論上網吧定落機舖，一日佢唔返TRHK，一日呢度都會冇晒樂評只有影評同game評。冇錯劉Sir個網越黎越唔好睇，走啦。
但呢度冇左音樂，都幾好丫。可以聽少好多誠實說話、見少好多事實。

．．．唔滿意？我都冇辦法，呢排實在好頹，可能因為個天都知道我咁頹唔得，今晚搵左我上黎睇舖。無端端橫風橫雨，今日全層食風飲雨影都冇個就預左，但今日已經好ｄ架喇，前兩日冇人得仲勁，全層得我地108一間開咋，噉先係究極冇人！冇人都冇乜所謂，有107係度發癲，今晚又俾佢昆左食間超貴上海野，不過貴得黎好食，即係齋係膠袋同ｄ盒都已經靚到你覺得值晒，ｄ野食仲要真係非常好食ｄ料一ｄ都冇慳，問題係同小肥羊一樣，呢ｄ豪華勾當，偶一為之啦真係好豪咩自己。好好彩噉就撞到位加拿大朋友，因為實在太鍾意加拿大metal同band，所以偏見地鍾意見加拿大人。跟住，都係玩同埋癲。而家上黎都唔係為賣野，係為左呢兩樣野。都幾灰架其實。
今晚睇舖，可以順便睇埋107壇新玩意。咦遲ｄ可能有新蒲點喎！

「最後，通知各位今個禮拜我改為睇星期日17/12。」
估唔到而家TRHK同呢度都要好似報紙噉搞埋晒呢ｄ「今日星蹤」。大佬，劉Sir唔係度都一樣上得TRHK遮，而家一至五都開足四至十，唔好等到星期六日同劉Sir係度果時先上黎啦唔該。

死。公司而家多左新女同事。仲要係兩個。即係好大劑。今日lunch落銀行搞ｄ野，叫飯果時都有預感會有事發d生，所以只叫左個餐蛋治加多兩隻炸雞翼再整多碗湯黎飲下就算。只係咁多。去完銀行隔籬係七記，口痕，順便執多一兜魚蛋返公司食。返到公司，檯面多左ｄ野，只係兩盒飯同一盒意粉，唔係食剩喎係咁多位女同事每人分ｄ堆下堆下堆到滿晒果隻喎。好明顯兩位新女同事已經俾人教唆左劉Sir其中一項工作係幫各位女同事減肥。死。好驚忝。

當然係準時走啦，睇睇張卡，今個月放工之時間冇幾多日唔係00字尾（相對地，冇幾多日之返工時間唔係遲到，呵呵）。呢晚節目都係開舖。因為Alex有事做之關係，近排會見番我多ｄ。都咪話唔邪，呢晚我一蒲頭，真係多番ｄ人，仲撞到好多久未露面的朋友。
之後，各位朋友可能更常見到我。

收左皮咁耐，上番黎舖頭，亦即係會聽番多ｄ野（唔好意思我係屋企係好少聽metal的所以退休之後已經冇追同聽野退晒節） 近來狂煲，當然係INTO ETERNITY，琴日個加拿大人一入到黎，第一件事就係問佢地新碟。
「隻新碟點？」
一條非常多人問之問題。上佢地MySpace聽過，十個人有十個會話佢地pop左，或者metalcore左，呢樣野幾明顯下，但好唔好聽？鍾唔鍾意old-school野？好似我噉，鍾意INTO ETERNITY又鍾意老餅野，就會好鍾意呢隻碟，因為今次非常之英國。我好鍾意，冇以前咁勁同pop左又點？不過相信唔會好多人鍾意或者搵，因為有一個非常明顯之事實：想知道一隊band一隻碟好唔好聽，只需要睇睇劉Sir，佢鍾意佢話好聽果ｄ，通常都係你覺得唔掂唔好聽果ｄ，佢越話好越係鍾意，你聽完越會覺得唔Ｘ掂。唔信？不妨留意下。
所以第時買碟，只需要留意劉Sir，佢話親好果ｄ全部唔好、唔使買，亦即係，以後唔需要落黎TRHK買碟，呵呵。

「是日新聞。」
一位師弟，就係噉樣無端端就冇左。好多野，你真係點估都唔會估到，之後發生咩事，想防都防唔住。

今日係公司旅行，冬季大旅行。未出發先興奮，成間公司一齊唱：
「十二隻恐龍去野餐∼」（除《小老鼠與大花貓》外，香港史上最愛兒歌之一！前排大家無聊提起呢首，正值今日真係去野餐，107立即上網括到呢首好野返黎！言出必行，冇錯，皆旺107&108呢班人就係可以癲成噉！）（因為係偉大的祖國捐獻出黎（祖國萬歲！），純粹俾各位老坑過番下癮，遲下好快會剷，欲笑從速！）（到今日107俾首歌我，我先知道原來呢首唔係叫《十二隻恐龍》，係叫《白石嶺公園》）
呢ｄ季節，最適宜梗係燒野食，
「我成日都燒架！」
「你條友咁懶，真係會燒野食？」
「真架！燒野食，我燒開漢陽苑！」
「挑！！！」
梗係真係燒果隻啦講緊。上次上山燒野食係幾耐之前我都唔記得喇，分分鐘係兩三年前。今次目的地係馬騮山城門水塘，咁大個仔第一次上黎，嘩，原來馬騮山真係好多馬騮喎！（．．．）呢兩日撞正今年入冬最凍果段時間，今日十三定十五度喎話，上到黎呢度山再低多一兩度啦仲要食正風忝。特別著成件羽絨上黎。
「使唔使呀？？？」
「梗係要啦！又越過冰河喎！」（哈哈哈哈哈哈！！！你唔明？？？）
旅行呢家野，通常都係秋天搞，但今年揀正十二月底仲要最凍呢日先黎搞，呢個冬季大旅行，實在係搞得非常成功。熟悉劉Sir的朋友，都會知道又要透爐又要燒又食到一塌糊塗成手都係的燒野食一定唔係劉Sir所好，跟住就可以推理到佢黎到呢ｄ場合只會食兩樣野：瘋狂丸仔同無窮腸仔（記得一定要係廚師牌香腸喎），呢ｄ易燒易食佢先會食，其實除非有人燒埋俾佢食啦如果唔係佢掂都唔會掂。今日好飽，但唔係燒得多，係因為食好多其他立雜野食到飽晒，好似飲左成排朱奶，同食左成包花生（真無聊）。雖然唔係好多人但一霸就霸左三個爐，除左因為個場根本冇人黎（冬季大旅行有幾多人會搞呀），仲因為特別搞埋打邊爐，真係成個煲成箱（真係成箱）配料拎黎烚野，全場咁多個檔口之中最旺就係呢個邊爐檔。邊個話係黎燒野食？冇乜野做其實今日你唔係叫我打羽毛球丫嘛，但都要坐到四點幾先走得人，無聊到燒花生食，同埋正牌紅燒牛扒，真真正正紅燒架係成扒真係燒到著住火燒緊架放入口果時仲有火架，噉樣著住火擺入口試過未？好在我塊入口果時個火已經熄左，但其他同事點食同食成點我就唔知喇。食完都仲有Ｎ個鐘，餘興節目係去玩人地隻狗，係人地果隻但冇帶自己果隻黎，一來天氣凍啦真係好Ｑ凍，二來因為隻野仲懶過我相信黎到立即訓低跟住完全唔需要理。另一個節目係趕馬騮，真係好Ｑ多馬騮係噉搶野食，先偷成包花生再偷大舊番薯，見人係度都照衝過黎搶野食黐Ｑ線，同場ｄ野狗都冇咁狼都係離遠啤住到ｄ人走左先過黎執ｄ送頭送尾，所以呢度ｄ狗好瘦，因為好野都俾馬騮食晒。回程時行落山，半個幾鐘路程中上下前後左右俾廿幾隻馬騮包圍，日日見咁多人班野已經唔識驚人甚至仲惡過人，係惡到要拎住碌木係度扑下扑下都可以乘機衝過黎一野扯爛個膠袋，一包花生一包棉花糖加一包薯圈即時俾班馬騮搶左入樹林度班馬騮仲要識得點樣開黎食忝，山頂行到山腰上埋小巴之後仲要圍住架車兼跳埋上車頂，而家ｄ馬騮真係醒已經搶行人ｄ野食搶到熟晒行。不過噉先好玩噉先夠驚險刺激嘛。此行最好玩唔係旅行，唔係燒野食，唔係食，係玩馬騮。我鍾意。

小巴去完旺角再做盲公竹帶同事搭車旺角出油麻地再返黎之後，反正順路又可以順便搵下野。得意動物人系列又有新發現，繼鯊魔人Sharkman同狂蟒人Snakeman後，再有飛蚊人Mosquitoman同活死人Skeletonman，咦飛蚊人個封面終於唔係四十五度角左側斜斜地噉影喇係影正面架，嘩頂呢個ＸＸ人系列我真係好鬼有興趣追晒佢！繼Project: Saw之後好想搞多個Project: Cube，但似乎要集齊一套有ｄ難度，因為零一二集搵極都只搵到第一集即係《心慌方》另外兩集都冇，《心慌方》亦係唯一一套有係香港上過畫，可能因為呢套野劇情又唔通又唔係得套野就係得個死字太過另類唔係點吸引都係唔收得，唔會上，更唔會有DVD。要再搜尋一下。不過，就算執得齊，有會唔會有時間KO埋呢個Project: Cube呢又？
點都要上黎舖頭，今日係Alex last day，成班友係度玩到癲連107過埋黎一齊黐線，玩到連ｄ客都走埋哈哈。
「放心，黎緊大把機會。」

收舖之後仲有節目，講就講左好耐今日先第一次上黎鴨寮街Paul記，傳說中之香港搖滾樂＆重金屬寶庫。好多野真係只餘黑膠甚至從未出現過CD，唔黎呢ｄ地方發掘一下，確係會有好多野冇機會認識同經歷。仲有大量笑到你死的血腥搖滾電影（Michael Angelo做魔鬼彈double-neck結他哈哈哈哈），真係好鬼經典同好鬼好笑。實在係太太太太太多野研究同玩，有機會的話，一定要花多ｄ時間係呢度吹吹水聽下野。不過，唔係今晚，今晚好眼訓，ＺＺＺＺＺＺＺ

「Alex走左拿？」
始終只係一個過客，返澳洲老家係遲早之事，走之前想完成埋出碟之心願，歌已經寫緊，黎緊會搵studio嘗試錄埋音，做好埋一張完整唱片先走。「Alex，祝你好運。」
亦即係TRHK又換番劉Sir的世界。唔使講啦之前果年幾都已經係噉開舖法睇睇樓上大家都會感到好熟悉，得番劉Sir一個睇，即係一至五開七點星期三唔開，禮拜六日同紅日開三至十，記得留意。亦可以話，劉Sir終於變番做劉Sir，終於過番ｄ正常生活，所以你見之前個半月係好唔妥，今日開始個劉Sir你至會覺得順眼番ｄ。噉樣一星期做足七日朝九晚十先係「正常」，果真犯賤。
「『但呢度冇左音樂，都幾好丫。可以聽少好多誠實說話、見少好多事實。』」
前幾日先講完，估唔到今日已經可以立即收番。冇錯，劉Sir再現，即係呢度又會講番好多事實。

「噉你地請唔請人呀？」
其實呢樣野一直以黎好多人問過，就順便係度講下。TRHK呢間非一般反商業唱片舖，要求當然一樣反傳統。首先係需要識metal，多而廣及深入果隻，就算唔係好專起碼人地問起都答到ｄ基本野簡單介紹到ｄ樂隊，但呢樣要求而家已經成為optional同「優先考慮」果種，搵sales已經難，搵識metal之sales更係難上加難，所以目標已經由metal sales調整至sales。工作時間係星期一至五四點至十點薪酬面議，part-time形式亦可，但要有心理準備，每日工作時間入面，可能有八成時間係得你一個人坐係度聽歌同睇DVD。可以一次過聽同睇咁多，冇錯吸引力係好大，但做落係咪真係支持得住就要睇你定力，坦白講可以支持得過一個月已經係好犀利，尤其是呢個年代屋企有部電腦，已經等於可以聽晒世界上所有野，而你係屋企係可以乜錢都唔使俾兼可以做其他好多野。但呢樣可能都唔係難，最後呢樣，先至係最難：
「要預定坐呢個位會有好多人唔認同你，只會俾人當你係一個白痴仔。」
呢樣先係重點。因為TRHK從來係一個只有音樂而無任何名利潮流之地方，不妨留意好型／威／潮的metal友，接近全部會同TRHK保持距離，就係因為呢度只有音樂，而有音樂冇潮流的地方從來只會俾人笑，「呢間舖連ＸＸＸ都冇咁Ｘ廢」呢類說話已經唔使提啦你都諗到呢度亦提供過太多例句。想做TRHK、真係有心去搞metal的話，請有需要拋開一切名利之準備。以上分享，係我坐係呢度四年幾五年之經歷同總結，呢個悶位我坐左咁多年、見過咁多人聽過咁多說話，呢ｄ野我係好清楚，我支持得住同接受得到，因為我純粹係為音樂而做只為推廣呢ｄ樂隊同音樂，其他人點聽點睇點講點諗懶理；但如果你係諗住做呢份(metal) sales工係可以同人講「我賣／聽metal野」而顯得自己出眾ｄ或者會令自己滿足ｄ感覺威ｄ型ｄ，你會死得好慘。你覺得自己有能力又有興趣嘗試呢個挑戰，不妨同我聯絡，搵full-time或part-time皆可。
TRHK最失敗之地方，係由一班真心落力聽metal之人搞出黎，你會發現真係識另類音樂果班，一係完全唔獻身搞音樂而自己匿埋聽匿埋玩，因為清楚明白到搞呢ｄ野唔會搵到錢甚至本都回唔到，一係搞都唔會搞另類而總會有所妥協同保留 － 另類到咁盡搵餐飯食都搵唔到啦。君不見搞得最大最成功果幾間rock/metal唱片零售商，都唔係（真係）識rock/metal果班？問佢佢賣果ｄ野，可能佢都答唔到你介紹唔到，但正正因為唔係當呢ｄ野係音樂而只當係賺錢工具，只要按住有咩band新出碟同個潮流興ｄ乜就得，入死貨同賣唔出artist之機會減到最低，唔識音樂反而做得大，甚至可以話因為唔識音樂先會做得咁大；全心做另類音樂果ｄ，因為唔係睇市場而係睇音樂睇價值同搵到真係有心玩玩得好果ｄband，最後一定係因為本錢最少有一半係分薄左去呢ｄ唔出名或者另類過頭冇人要賣唔出果ｄartist度，但世界同市場好現實，即使聽眾點樣話想嘗試想搵，真係有得選擇果時，都只會追求番出名果ｄ，亦即係入一批貨蝕大半批貨，最後只有倒閉收場，就係因為識得音樂而會去支持音樂，但結果因為支持音樂而自殺。例如MCB。

「寫錯了：唔係扮傻扮廢，係真傻真廢。唔係傻，唔會俾人笑同串足咁多年，都仲要自己倒貼錢加蝕埋時間噉坐落去；而同而家各位專家相比，我完全覺得自己唔識聽metal只係廢柴一個。所以俾人當白痴仔，都好正常。」

正。今日我做番老細。前幾日都叫做仲有番ｄ野做下，今日真係我連想搵ｄ野出黎做都有難度，嘩真係得閒／無聊到係有ｄ擔心自己捱唔過跟住呢九個鐘架，悶到仆架真係可以。見咁多時間，有ｄ碟評寫左ｄ未寫完，拎出黎埋埋個尾佢，但幾時有得睇？有緣自會相見啦反正我聽／寫果ｄ出到黎都冇人會理，擺埋一二邊先啦。又上網睇下野，自從曹博士上左《新聞透視》之後，佢個網ｄ問答立即正常晒學術晒已經冇乜癮睇，但係公司仍然係唔敢上高登，真係會笑到hihi跟住俾人炒架（「咦？乜你唔係老細咩？使乜驚俾人炒？」）。近來又冇乜mood寫野冇咩靈感（死，機癮發作之兆），又眼訓（很正常），上網又冇咩野睇，今日成日係得個坐字，坐住係度對住個芒訓覺，朝早坐／訓到食飯lunch完繼續訓，好在個位背住老細ｄ頭髮又夠長遮到對眼，加埋今日老細勁多野做好少行必，噉樣頹足全日都冇俾人發現。
「訓著覺隻手都識得拎住隻mouse郁下郁下呢招你估一朝一夕練得成架？」
夜晚冇得放假，好在日頭補番數。廿號都仲未到，我個人已經充滿聖誕氣氛了。（當知道劉Sir對聖誕節之認識只有有得放假而毫不神聖，就會明白劉Sir的「聖誕氣氛」是甚麼）

原來而家麥記冇左豉椒漢堡。今日開舖開得好唔開心。好在撞到真係幾年冇見的尼泊爾鬼上黎。
"Dim guy gum lor ng sheung lie?"
"Fan sai Nepal mar!"
邊班尼泊爾鬼？就係當年逢有metal band出之band show無論係玩咩metal只要有metal band果班。但而家班已經剩番隻了。
" Or yi gar dou boon jor hui Macau jo yeah lar! Or ban friend jau hai Nepal gap gun band!"
難怪咁耐冇見。上到黎佢非常之唔開心，因為過左澳門呢段日子先miss DISAVOWED後miss METHOD對有metal band必睇的佢黎講真係灰到爆燈，尤其是兩隊都咁正。我只有同情佢之遭遇（呵呵）。同醒起係時候準備聖誕禮物俾METHOD。
噉就聖誕，真係好鬼快。

加多兩樣野：
一．「23號星期六晚打邊爐。有關人等見字報名。」
二．「近排呢度咁少字好正常，因為沉迷flash game中。有無聊flash game者請踴躍分享。」

琴日頹，今日更頹。我已經係冇野做到今日寫下寫下就寫左一篇碟評了！（「你係咪返工架？？？」）而家放工越來越準時（只限放工，返工仍然係遲到仆街），久經訓練後我已經可以同法定放工時間對準到秒之程度，直頭可以倒數四三二一剛剛好打鐘拜拜走人6:00:20之前肯定唔見人。難得星期三，唔使諗啦又係同Rock爺兩個打機。冇架喇呢世淨係識打C&C架喇。可能係重返TRHK，再次受到TRHK之詛咒籠罩（呵呵仲有冇人記得？），今日打機打得完全唔似樣，之前兩條友打兩個電腦已經玩到冇癮要玩到二抽三先有番ｄ挑戰性，今晚個電腦唔知咩事突然short左，唔好話抽三連抽二都俾人恰到仆晒街，電腦ｄ戰略係史無前例地咁有計劃咁有效率一個鬥兩個都玩到殘，最後玩足三個鐘先至贏到一舖咁大把，當堂灰晒＆知道係時候走人喇。嘩死從未試過打C&C呢隻game打得咁灰，搞到好想快ｄ執番隻返屋企練下，但而家ｄgame連CD都唔出一出就出DVD，唉而家屋企部機都已經outdate左喇。而家部電腦都慢到死加死死地，下年Vista出左加出埋C&C3會係時候換過部機再裝埋個DVD rom一野過煲爆晒全線C&C。死可能真係放假放得太開心，而家想打機之意欲打過聽歌Ｎ倍，但而家C&C都有ｄ玩到悶，仲有ｄ咩玩？都幾難諗，當機舖果ｄ幾百合一機而家都冇乜地方搵得到之時。結果又係匿係屋企玩flash game呵呵呵。
近來怒煲呢隻，除左因為好玩，更鍾意ｄ音樂，好Ｑpower metal！！！

返到屋企，除左玩flash game，仲有一單：
「Demonzend執左喇！」
馬來西亞傳來之消息。Demonzend係當地最大metal label，除左因為果ｄ好多問題（唔使問，你已經知道係咩好多問題），仲因為馬來西亞政府。有留意06年金屬界新聞，都會知道馬來、印尼果頭今年有咩大鑊野／黐線野發生過，就係因為咁黐線咁大鑊，本來已經保守之馬來政府直頭封殺所有同metal有關之人事物，就算著住件Bon Jovi出街都會俾差佬甚至軍人逗。搞到噉，加埋本身買碟之人都唔係多市場已經細，仲點做落去？真係聽到都灰。
今年metal label執笠之情況係嚴重得好恐怖，由亞洲到歐洲到全世界，單係今年內唔做之label已經有雙位數字。可能你會完全唔覺，
「唔係呀！我聽果ｄband仲有出碟喎！」
執果ｄ都係細label黎，即係如果你係講而家ｄ網成日提又勁多MV睇果ｄ，就算ｄ細label執晒對你都唔會有任何影響。唱片業持續不景氣，音樂亦一日比一日商業化，唔去聽同理地下band同唔出名band已經成為理所當然之心態。只得幾間大label教你聽metal，即係點？就即係連metal都變到好似香港流行曲噉得英皇同幾間大公司局你聽死幾個歌手而你會好enjoy一樣，即係音樂唔同但性質同聽英皇果ｄ一樣，而呢個情況其實已經出現左好耐，metalcore已經係一個例子。分別只係聽metal果班唔會覺得同明白自己同聽流行果班一樣係（自）困於唱片公司組成之商業框框當中之事實，甚至踩番聽流行果班點解唔跳出呢個框框。而當繼Spinefarm之後連RoadRunner都俾環球（半）收購，下年呢個「非金屬化」、「金屬商業化」之情況只會再加嚴重，即係地下band同indie band會被再一步忽略更難生存同出頭、更多地下band會收檔、同更多label會執笠。同埋，聽果班會聽得更窄，「紅」果ｄ會追但唔出名同冇人提自己又唔識果ｄ唔會理，因為大label壟斷之後，令人人都覺得多人提多網講有廣告有MV雜誌電視都上埋果ｄ先係「好野」，其他果ｄ全部係垃圾。亦即係好似之前METHOD歌佬提過，呢一代聽metal之普遍現象係
「新一代係識新唔識舊、識潮唔識經典、識明星唔識音樂。」
正如而家好多人勁追metalcore，但可能佢地連九幾年甚至八幾年果班「metalcore之父」都唔識連名都未聽過，更加唔使提IRON MAIDEN呢ｄ再加影響而家咁多隊metalcore bandｄ昔日經典。亦即係識走唔識行。其實係幾荒謬。
至於下年TRHK會唔會成為07年雙位數字其中之一？齊齊睇。

咩叫食足成日？睇睇我知就啦。朝早，食完個早餐 － 當然係各位女同事自己進貢我好耐未自己買過早餐 － 仲有大量零食，而家連零食都唔使自己買喇同早餐一樣各位女同事會自動自覺捐獻，好似呢日檯面突然出現左一包栗子同一包叉燒麵卜卜脆，劉Sir智商咁低當然唔會去諗同點解呢包野會出現啦佢淨係識得食遮，果包叉燒麵味道似老母麵（cult！），不過唔係麵形而係薯片形，好食過老母麵之餘個形狀又易食個老母麵，嘩真係一Ｘ流呀真係立即叫果位女同事同我大量入貨（呢條友唔止當自己係老細，直頭當左自己係皇帝）。今日個餐牌冇乜好食，lunch叫左個餐蛋治加多兩碗白湯算，今日有女位同事食薯仔炆雞飯，每人奉獻ｄ野出黎，一個出薯仔一個出炆雞一個出飯最後一個出汁，夾夾埋埋就砌左一盒完整的薯仔炆雞飯。冇錯。就係咁無聊夾黐線。
「頂你班友，結果都係俾成盒飯我，係就一早俾一盒我之後剩番三盒你地自己四個分啦！玩呀而家！」
食左個餐蛋治加多碗湯，剩番一盒飯一碗湯留番下午茶，即係成個午餐留番晒！食完飯落街兜個圈，遭到會計靚女威脅下落七仔買咖哩魚蛋，十四蚊成廿粒死到飽都食唔晒，抵食！食完魚蛋訓多陣覺又係訓覺時間，訓醒覺當然係食住雪條怒頹啦！食食下上網睇到，
「咦！原來寄本地信今日截郵喎！老細我要落去寄信！」
正！無端端又有得落街！臨走時收到出左去做野之老闆娘電話：
「「我而家係麵包舖，今日ｄ咖哩牛肉包幾靚喎！」
「大量丫唔該！」
落到郵局快手快腳寄埋封信，梗係做正經野緊要嘛，落黎主要目標係郵局隔籬果檔執多袋炸魚蛋牛丸，嘩正真係食過返尋味！返到公司時老闆娘已經返左，然後檯面多左座山，咖哩牛肉包山。冇錯係一座由咖哩牛肉包堆成之小山。lunch食剩果兜飯同魚蛋加埋新買上黎果袋，集齊咁多樣寶物再儲夠經驗值，個薯仔炆雞飯轉職成為咖哩薯仔炸魚蛋牛丸牛肉忌廉湯炆雞包飯。張檯ｄ野食真係多到你唔信架，好可惜冇相睇果時我真係四圍摷相機想影低佢架，點知搵搵下有包可力，立即拎左去沖之後一面飲一面食飲飽食醉之後先醒番起呢件事。你會問：
「使唔使食咁多呀？」
「聖誕大餐丫嘛！」

今晚又係吹水的一晚，同肥仔吹足成晚果隻。
「點解咁得閒上黎？」
「一月頭先考試，放成兩個禮拜假！」
讀大學就係應該咁得閒嘛！想當年我師範讀左四年，除左第一年年少無知真係一早做功課之外，跟住三年有幾多份功課幾多次考試唔係臨交／考之前果日／晚先開始做？仲要一年俾一年得閒year 1係最忙果年反而year 4得閒到我而家諗番起都想笑！所以我到而家都唔明，點解身邊幾位大學生朋友會咁忙？讀大學真係咁忙咁多野做咁辛苦咩？（冇錯而家擺到明刻意針對呵呵呵）
叫得吹足成晚，就當然係開舖吹到收舖食埋飯果隻。好耐未試過係TRHK食飯的肥仔食左御用飯堂新旺食指定套餐粟雞蛋！經典呀經典我先發覺自從大家食進入左我生命，我已經遺忘左同我＆TRHK一起成長的新旺！之前試過好多次打電話一係冇人聽一係唔通以為執鬼左，原來係好生意到電話都接唔到依然健在甚至越做越大！搵一次一定要回味番次！不過唔係今晚，呢晚晚餐係晏晝搶包山搶番黎果兩個咖哩牛肉包。由暑假開始，成座皆旺形同死城，用107之形容係「無人島物語」（「真係好好玩架呢隻game！」107補充，加送淫笑幾下），臨近聖誕人人有節目自然更加靜啦，所以吹夠一晚完全冇打斷過。時至今日，最好傾同最傾得埋果班接近全部都係九龍城人，因為大家都係由咩都冇乜都要由自己搵起試起之不毛之地開始，同埋係要自己真金白銀買CD聽歌開始。由CD開始而跟住堅持到落去，同由MP3開始而MP3落去，兩種人對音樂之欣賞態度同價值都好唔同，呢個事實係非常之真，正如你會見到衣著越普通過ｄ，即係普通到行過旺角連MK仔都會笑果種咁普通果ｄ，反而係聽得最多最深入果ｄ，因為錢同心機都去晒音樂同CD度。唔需要又提番「全港聽最多black metal果個阿叔梁生」呢個例子卦？（噢，梁生都係九龍城人）但當年會出沒九龍城之人，而家已經「死剩」呢幾個了，其他好多一係失左蹤，一係已經唔再聽metal聽其他甚至唔聽音樂了。開始難，堅持更難。
有見今晚情況，當然又會討論一個經常討論之問題：
「如果TRHK真係執左的話，我／你會點？」
肥仔話：
「我都唔知仲可以去邊度買metal碟，到時可能唔聽metal轉聽jazz同post-rock！」
噉劉Sir呢？放心，我一定唔會放棄metal。冇錯如果真係要聽要浸，其實一拍埋古典同特別係jazz會立即聽得出metal其實係未夠深度，但係調番轉睇呢兩種音樂又缺乏好多metal獨有之特質，加上metal係當今融合性最高之音樂，好多野係唯有metal先有其他音樂搵唔到。而且要研究，其實metal真係有好多好多好多野可以去發掘，唔止聽聽都根本聽唔晒，仲有個歷史同文化，同埋其他好多大事小節，所以我覺得我到而家都仲未完全識聽metal，甚至覺得而家先至係真正開始聽metal，呢種音樂其實係好博大精深。如果少左TRHK，有好多underground野indie野難搵野唔會出現香港，當然對好多人黎講完全冇影響啦前幾日已經講過大概，但試新野搵新band的我就要開始努力地上網摷band了，只不過如果真係離開左TRHK，相信我會分番多ｄ時間去其他音樂當中。又或者，到時可能實行番當年幾個人傾過之計劃／夢想，正式搞番個metal網，反正而家碟評大把，就係唔知點用。（萬字DARK ANGEL呀頂！）又或者，果時可能我都會同好多朋友一樣，加入download之列，乜叉都有得聽又唔使錢跟住仲有得做專家，確係好爽架！
「搞錯！咁冇態度！」
算啦。即係而家咁有態度犧牲咁多去做咁多野都只係俾人笑俾人串，如果真係有噉既一日，仲使乜咁有態度？？？
講下笑遮。呢ｄ野到時先算啦。我只知道而家我想聽metal。

一傾就傾到十點幾，臨走果時，個廁所剛剛俾樓下個電話妹霸左。上得TRHK多之朋友都知道係邊個電話妹，都知道佢入親廁所要搞幾耐先出番黎。就係因為等佢出黎去埋廁所收舖再遲ｄ，
「臨尾呢兩位朋友你地呢晚真係好彩喇噉都撞到劉Sir今晚遲收舖！」
終於。
「下次唔好喇劉Sir好懶架收十點架知唔知呀！夜晚上黎想知道劉Sir收左舖未就call我啦而家我個電話通街都知！」
所以你見連Honourable Mentions，我都提住呢個Nokia靚女。佢真係幫左TRHK唔少架！
係喎。一年喇喎。07年都就到，又要執一執回顧番今年。

天氣轉番涼，又可以行路返屋企了。好鍾意行路返屋企，上幾個月熱到仆就無謂行啦，但而家咁涼爽，可以的話收舖之後都會行路返屋企，一來舒服啦，二來減肥啦（呢樣先重要），三來噉樣行住聽歌會聽多好多野，特別係呢種天黑冇人冇車之環境。而家轉番我舖，即係差唔多日日都會行路返屋企，會多番時間聽真好多碟，始終係屋企做住其他野黎聽，點都冇聽得咁真。黎緊可能會多番ｄ音樂野睇呢度。
而家都諗緊，咁耐冇野睇，或者聖誕節搞番個特集？（DECAPITATED全線呵呵呵）

今日公司做冬，lunch拜神。你拜神果時，通常食乜？各位同事食燒肉乳豬雞之類的燒味。但我食公仔麵。仲要係齋公仔麵走埋湯果隻。
「呢條友真係好唔正常。」
冇錯真係十分地唔正常。好似今日晏晝，超級得閒，因為正常的公司今日都有得早走，我ｄ客更加係食完飯已經走晒所以晏晝email加電話一個都冇（雖然平時已經係接近99%冇），佢地仲要係聽日都唔使返忝呀，係我一個咁戇居居要坐到五點先有得叫做早一個鐘走，唔正常到仆啦。擺到明唔做野架喇今日我，超無聊地玩字典，原來公司ｄ機裝左個野叫Dr Eye，係個即時翻譯字典，開左之後將個mouse箭咀指住個字，立即超極大篇野彈出黎解晒俾你聽個字點解文法點用俾埋例句再加同義反義字，但最勁唔係呢樣，係唔止英文，連中文字都查到！成日就係上個中文網係度周圍指黎指去睇下ｄ字點讀點解，死用完先知道原來自己中文咁鬼屎咁多字唔識！
「唔好講，立即拎番屋企裝先！」
死！而家對玩呢個Yahoo字典real time再加強版比玩flash game更加有興趣忝！突然間咁益智，劉Sir呢條友真係好唔正常！

灰係灰ｄ架喇五點鐘先有得玩又係全幢大廈最遲走人果間細公司嘛福利係差ｄ架喇。放工行過，好耐未搞過戶口ｄ野，入去工商問問先。我去過咁多間銀行，除左中學已經去開左個戶口用到而家之恆生真係服務一流態度好效率高之外（我幾有先見之名），其他冇乜邊幾間特別好，而工商係我見過最垃圾銀行，少人開櫃檯次次都要排Ｑ咁耐，ｄ職員又要個個都口黑面黑做野又慢態度奇差，最灰係乜都要填表交表改少少野都要做大大輪加等好Ｑ耐，我想搞個網上理財係搞左成年都仲未搞到，唔係係公司用呢間銀行出糧，同前排107話工商上市嬲玩少少賺左隻斯比頓星返黎，除此之外工商對我黎講係一間接近最差之銀行完全冇Ｘ用。但出糧又要靠佢喎係吹脹架喇，所以次次黎都嘈到好似嘈交噉灰到爆。可能嘈得興起，走左之後聽埋個電話先記得：
「阿捷，剛剛行左出門口冇幾遠你打黎，收左線之後我先醒番起你問過我唱錢單野！你早幾十秒打俾我我都會幫你唱埋架！拿唔係我唔幫你呀係你唔好彩咋！」
今日多左個鐘，難得有時間，身癢出左去尖咀HMV兜個圈。其實真係冇野好睇而家，又冇減價貨，近來pop果邊ｄ新野又冇乜邊隻特別想執，真係身痕先出一出黎。純粹漫無目的地行，今期Terrorizer係好有興趣因為ｄband我鍾意，但冇feature又預左冇時間會睇暫時作罷，臨走只執左隻MY CHEMICAL ROMANCE新碟"The Black Parade"，LAMB OF GOD新碟其實都幾有興趣架不過見唔到，但最重要其實係想搵"Cube"。連HMV呢度都係得第一集港版，第二同第零集美版都唔入，有錢都冇得睇，Project: Cube似乎冇乜機會。其實要解決呢個問題，好簡單：上網download立即搞掂，正版超順唔跳唔窒正版DVD高畫質加埋中文字幕即場送到屋企電腦螢光幕上。但我又死唔心息喎。
「呢ｄ咪叫戇鳩囉。」
但今日尖咀一行，最後重點變左睇戲。話說由HMV行去街尾兜去地鐵站時，條馬路兩邊圍左勁大棚人，行埋去睇睇居然撞到差佬捉賊，有兩個唔知係唔係國內同胞之一肥一瘦，瘦果個俾差佬推左落地上緊手扣，肥果個俾成四五個職員捉實，真係肥到要成四五個人先包圍得住制服到佢架。好似好刺激噉喎，今日我又有帶相機，都有少少衝動想停低影番幾張相同各位分享架，好在臨尾冇而跟住ｄ車轉彎出馬路，因為我跟住車龍最後一架車轉番出大街，一走左之後條馬路冇晒車，本來圍係側邊睇戲果兩棚人立即好似wall of death噉朝住路中心衝埋去塞爆左個路口。如果我真係冇走到企係果度影相，相信呢個時候我會係位於wall of death之中心點俾兩排人牆夾死，跟住舖都唔使開可以返屋企訓覺＆放假了。
返到出旺角，皆旺前仲有一個站要去：信和。
「107，你炒Ｑ左呢個sales佢算數啦！」

呢一晚，當然係靜啦，
「正常人都會做冬食飯啦點會似得我地呢ｄ時節仲係呢ｄ地方呀？」
107話，講果陣佢已經閂左自己間舖過左黎108一齊食上海麵。食完麵吹多一大輪水，佢都冇咁好氣收舖過第二檔算數啦。呢晚預左冇人，所以全晚勁煲隻"The Black Parade"，連煲三次，第三次一面睇歌詞一面煲。係咪好奇怪會買呢隻？一向對MY CHEMICAL ROMANCE冇咩特別感覺唔係憎但又唔係好鍾意一聽無妨果種，但呢隻新碟一出興趣已經好大：「emo-punk界中的"The Wall"」喎！跟住國際台睇到個MV，完全係PINK FLOYD+QUEEN啦當左自己連造型都唔同晒喇，已經相當吸引到我試試。隻碟聽左三次，只有話再次印證左「pop碟single永遠係全碟最好聽甚至唯一好聽」之定律：最主打果兩首"Welcome to the Black Parade"同"Mama"係全碟最長兩首，花左最多心機同本錢落去呢度，單係呢兩首聽完你真係覺得呢隻碟係殺Ｘ晒，好似加多ｄ整色整水野就會好受的劉Sir噉。但隻碟買到番黎，聽埋其他歌．．．唔係唔好聽，問題係兩首主打太過落本，最好最精彩果ｄ已經放晒入去，其餘果ｄ歌冇乜驚喜都幾失望，雖然因為呢隻係concept album，成隻碟係串埋由頭聽到落尾其實真係唔錯，只不過獨立聽除左主打果兩首之外有ｄ歌其實好攝位feel，聽多幾次聽順左印象會持續改落，換句說話，呢隻碟襟聽。雖然一提起呢隊band個個都話emo，但呢隻碟隊band似乎真係想由一隊pop punk/emo野升格去好似SMASHING PUMPKINS果種藝術樂隊。唱、聲、編曲同概念都好英國，造型唔同晒，音樂又唔emo，再做埋「唔試過一次都唔叫做大band」的同交響樂團合作，所以聽果時印象好似GUNS N' ROSES隻孖碟"Use Your Illusion(s)"，而家連band名都叫THE BLACK PARADE唔叫自己做MY CHEMICAL ROMANCE，真係越黎越過癮。甚至有興趣知佢地黎緊動向同計劃忝，因為睇落聽落真係好好玩。
見到隻碟咁超現實之artwork，已經可以想像到呢隻碟個tour會點，可能真係以THE BLACK PARADE之名義玩歌劇噉玩一玩就玩晒成隻碟，同好大機會出DVD。係出就真係要買番隻。因為繼王菀之新碟加全線之後，呢隻碟好大機會成為我屋企最常播之一隻。

有乜理由唔早走呀當前幾日已經好似放緊聖誕假噉。準時一點鐘閃仲有兩個鐘玩，今日係Rock爺同行大角咀一日遊。是日蒲點係新九龍中心。首先當然係行一行呢度間唱片舖先啦，即係每次黎都係得我一個客幫襯果間，今日好ｄ多多一個阿Rock，終於有一次間舖係有超過一個客人喇！黎親呢間點都會幫襯下，今次執左黃貫中隻新EP，問題係暫時想執之pop野已經執晒，下次黎仲可以執ｄ乜、幾時會黎？
「次次黎都冇人，呢個地區又冇咩後生，其實你呢間舖都幾難做喎！」
「靠賣新野就實捱唔住架喇！新果ｄ人有我有，間間都係度鬥平，賣一隻先賺得果幾蚊，而家都係靠賣舊野同絕版野先支持到落去！」
之後過埋隔籬間機舖，即係呢度有間機舖就知得耐但打今次先係第一次。又係玩呢個Warriors of Fate（齋睇英文名，你呢世都唔會估到呢隻係咩game黎）。PS版有得較紫火版可以出超必，原來街機版一樣有，不過唔係有得出超必，而係全隻game所有箱變晒做神兵唔係聖劍就係一刀一行之草薙，冇晒補血野食但係基本上你一人一把係手，普通卒仔大半係一野分屍埋都埋唔到身，打大佬就更係破紀錄咁快試過四秒斬死大佬，仲會random自動換人好似打打下我個黃忠無端端變左魏延跟住阿Rock個趙雲變左黃忠笑爆。但更笑爆係呢隻擺到明係屈得爆機之鋼龍版三國志（呵呵），劉Sir玩居然都可以死左Ｎ條命con左幾次先爆到機。
「七就係七！」
打完機之後行街搵電器舖買線，行到返去我公司樓下果頭搵，丫即係做左成年我今日先知道原來公司樓下間野，係有咁多電話同電器野買要乜有乜！係度蒲左年幾（計埋當年實習的話都有兩年），全靠Rock爺今日我先真正認識大角咀！

呢一日起都唔會預期點樣多人架喇，跟住連續三日假（好彩的話今日已經放緊假忝），呢日好頹。本地人冇乜，可能因為聖誕假關係反而見多左其他神奇人士，好似襯呢輪返香港上黎掃番一棟undergroud black death之澳洲black metal友，佢執果ｄ碟同band，今日之前係接近冇人買過，亦相信今日之後係唔會再賣出多過一隻；有個帶點口音上黎搵DRAGONFORCE的師奶，仲要係唔似「幫個仔搵」果種因為真係會問會傾邊一隻DRAGONFORCE點點點果種；有上黎買brutal death band tee的少女，點睇都係買黎送禮唔係自用卦？仲有幾個教院人（冇錯，特登上黎笑九劉Sir「我讀教院你讀教院你都有今日喇！」），同埋最神奇地
「一百冇！」
冇錯就係107的娘親，連阿媽都要叫埋出黎睇舖，就知道今日107生意幾好，同佢份人幾咁不孝！仲有其他好多，不過上黎只有兩種目的，一係「陣間同邊個去邊度玩而家未夠鐘上黎攝下時間」，一係「唔使理我架我上黎叫飯食架咋」。所以連劉Sir都好神奇，今晚係同阿Rock兩個睇機動警察，一次過煲晒電影版第一二集。唔知在座有幾多人記得機動警察呢套野，當年我係閃電傳真機動畫時間睇，又係追追下臨到最尾冇睇到，後來電影版兩集電視播都有睇，記得仲要係無線「復活節動畫鉅獻」朝早十點幾做架！果時仲未咁識睇動畫但係已經覺得呢套野好正，因為唔止係真實型機械人直頭係超級真實，世界觀係近未來之地球唔係宇宙亦冇外星人，賣點係環境同年代真實到同你而家行出門口見到一模一樣切合現實一ｄ都唔誇張，但打得精彩之餘劇情非常具思考性，第一集講一個電腦天才因為私人恩怨同商業陰謀，開發左一個潛伏電腦病毒會引發暴走之驅動程式再輸入晒全東京所有機械人之後自殺，主角一行人就係要阻止呢個危機；第二集係東京陷入白色恐怖同國際危機，最後當然係拯救日本於即將同美國（冇錯又係日本的世仇美國）開戰之水深火熱之中啦。會咁好睇就係因為咁真實，係十幾年前諗喎呢ｄ野，但係你會及發覺呢套動畫講ｄ野係十幾年後之今日全部發生晒面對緊，除左多左ｄ機械人之外根本同而家呢個世界冇咩唔同，尤其是你一直睇，一路見到個劇情係巧妙到真係有野諗之餘仲一個犯駁位都冇兼完全所有野已經一早plan好晒絕到無倫，就知道呢套野絕對唔止動畫咁簡單，更加唔會係鐵甲萬能俠之類得個打字之動畫，果種深度同編劇功力到而家都搵唔到邊一套動畫，例如以劇情作賣點之死神筆記，係及得上。但最正係呢套野認真得黎有好多搞笑時間，噉先夠晒好野，因為呢種玩深度之動畫有邊一套係會有位俾你鬆下笑下？機動警察仲要係有好多，因為最起初電視版出黎已經係設定成一套幽默動作動畫，深得黎又容易睇同好睇。而另一超鍾意機動警察之原因係超高超畫功。當年睇0083果陣，已經覺得呢套九幾年頭動畫係動畫美術中之勁典，雖然成十幾年前畫，你而家睇番都唔會覺係咁舊，甚至會當係呢幾年製作水準最高之新動畫，但機動警察呢兩套電影版，無論畫功、用色、精細度同格數仲要超過0083，但係機動警察仲要早幾年出喎，第一集係1989年，即係差唔多廿年前，但係已經贏左而家八成幾九成動畫之畫面。或者因為而家已經再冇人咁俾心機一筆一筆畫，大部份野已經用CG同Photoshop搞掂，所以我地呢ｄold-school友睇極都係呢ｄ舊動畫。
套野咁正，點解後來唔再出，到而家提都冇人提？因為機動警察之後係攻殼機動隊，亦即係原班人馬將機動警察果種科技批判，昇華到更深層更哲理更近未來之境界，基本上睇機動警察電影版，有ｄ時間係同睇攻殼機動隊完全冇分別，而不過攻殼去得更盡，冇左笑位而變得更灰，所以煲完機動警察之後，冇得走一定要追番攻殼機動隊。但機動警察連電視版同OVA版都唔知去邊度先搵得到．．．
實在太多野想追了。

收舖之後，
「打邊爐！！！」
唔使講都知打唔成啦。起初同107兩個諗定今晚大班人去打番個邊爐應下節，但最後一係自己有節目一係唔出黎一係「夜晚要睇星矢」同Ｎ咁多個走晒過去今晚LiveHouse場metal show，最後剩番發起人107&108兩個，算啦各位都係自己食自己算啦。近來機舖多左好多新機，有隻係玩渣古射吉姆，正好有吸引力喎收舖落黎睇睇先 － 真係得個睇字成萬九幾人差少少連新之城都落唔到去，算啦呢ｄ要同人迫的日子都係唔適合我地搵日先玩啦。好在返到屋企都仲有餘興節目：唔係好夜，已經收到今晚場騷之bootleg同review。唔知有冇錯，今晚有份玩之band包括METAL WOLF、ZEITGEST（唔知有冇串錯？）、RAINBOWTRON、SEDLEC同QUEEN ELEPHANTINA，冇親身去睇，不過唔去都已經估到最少三樣野：第一，今場騷肯定唔會多人。呢ｄ大日子長假前夕冇可能會少騷，而有得選擇之情況下呢場騷之卡士係咁．．．呵呵我都唔想形容，即係唔在場都講得出有／得幾少人去。第二，雖然主辦單位唔係宣傳呢場係metal show，不過相信絕大部份去睇之人都當左係，即係見到呢ｄband我第一個反應都會話呢場係metal show，只不過對呢絕大部份人黎講，今場騷除左METAL WOLF同ZEITGEST之外，另外三隊都．．．呵呵又係唔知點講好喇。RAINBOWTRON聽晒個十六分鐘setlist同「製作特輯」之後，已經唔需多講啦的確係超越左metal之範疇；SEDLEC係變種NANAHARA SHVYA，將全部慢位blues位delete晒之後再將剩番ｄ快位再加快就係SEDLEC；QUEEN ELEPHANTINA你話stoner又得你話BLACK SABBATH tribute又得。只不過已經可以想像得到，呢三隊玩果時台下會有唔少人指住隊「band」振振有詞大大聲
「呢ｄ唔係metal！」
RAINBOWTRON同SEDLEC噉講可能都唔算係咩問題，但如果連QUEEN ELEPHANTINA都噉講，就應該要諗一諗喇。第三，場騷之後，搞手一定會俾會場方面狂小，因為呢場絕對係LiveHouse最另類最唔正常最趕客之一場band show／「metal show」。但齋係RAINBOWTRON果part已經聽到冇晒野講，如果我真係親身黎睇呢場騷，呢三隊band已經夠晒我睇到樂而忘返。或者我都應該要就自己呢番說話同思考諗一諗。
知唔知呢場騷最有趣係乜？係RAINBOWTRON、SEDLEC同QUEEN ELEPHANTINA三隊都係屬於鬼仔band，而METAL WOLF同ZEITGEST係香港人band。會唔會有多少象徵性同意思？

以下係一個笑話。
「喂！」
「咩？」
「等左你幾個字喇喎！仲唔開舖？病左呀你？」
「而家幾點鐘呀？」
「三點三喇！」
「我個鐘而家先一點三喎？」
故事的主人翁係邊個唔使多講啦。

呢日相當地唔正常。首先有「一點三」先起身仲係要有人call先起之劉Sir。亦有無聊到黐晒線而同108一齊玩「影會活動」的107，今日咁少人，可能就係因為多左呢個「promotor」（「刁，呢兩間舖真係on9！」）。跟住冷爺上黎壞左一隻喇叭的TRHK，然後用隻RANCID一野炸番響隻喇叭。熱播係今期流行果隻追命林琴（咩黎？問問古天樂唔該）。仲有黃貫中隻新EP。同埋當然唔少得的MY CHEMICAL ROMANCE "The Black Parade"。係差噉ｄVCD冇戲同動畫睇忝今日。冇錯TRHK都脫離metal喇。請鼓掌。
都有metal野，今日又聽聽TRIVIUM隻新碟（metalcore算唔算metal請自己拗掂佢與我無關）。上兩隻碟唔係聽好多，但從僅有之印象，都知道第三集碟變得好Ｑ勁：以前係話俾人知自己係METALLICA，今次係IRON MAIDEN，就係變得噉大，突然由metalcore變成唔多core（雖然仍然有好多metalcore-sound位）而超級old-school metal，所以呢隻碟好多人甚至隊band都唔話自己係metalcore。呢個現象好得意，唔止TRIVIUM一隊，係好多metalcore都做同一樣野，最近期之新碟突然全部唔玩core而變晒old-school野，而呢個時期正正係metalcore已經多人玩到無可再多兼已經俾人鬧到頂點之時候，突然間幾近所有metalcore樂隊放棄自己一直支持緊之metalcore音樂轉玩thrash metal或者heavy metal，就非常有趣。既然metalcore呢樣野係自己一手一腳一路建立同發展開黎，點解突然間又會好似冇乜原則地放棄自己堅守之音樂轉型其他？可能想學METALLICA學到足幫自己出一隻「黑碟」，不論音樂還是投機。
其中兩種最具彈性之metal，係nu-metal同metalcore，兩樣野之共通點係乜？都係同商業掛勾之metal，所以果輪係流行邊種玩法，例如hip-hop，就大家一齊跟住果個玩法，再跟住興第二個玩法，又一大堆另一個樣之樂隊出現。呢個係呢兩種音樂之特點，所以nu-metal同metalcore呢種「商業金屬」，從來係最難俾人定型歸類，維持之時期亦係最短。

就係無聊成噉。全日差唔多冇乜聽過metal野，真係冇人丫嘛，遲兩日可能帶埋ｄ碟落黎睇忝。當五點幾已經開始有檔口收皮，夜晚連107都過埋信和佢另一檔，今晚又係我做無人島島主，最後等齊人都廢事坐收舖過埋信和搵107算喇。噉今晚玩咩好？本來係落吧，點知一句說話變左打邊爐。第一次食倫敦大酒樓（揀呢間因為全旺角得呢間唔使排隊），五個人食埋單先八十五其實幾抵，如果唔嫌多人、迫、個死角位超熱、選擇少、上菜慢、同其實唔多好食的話，仲要超早收忝十一點已經係last order，未試過打邊爐咁早收，不過冇所謂因為雖然好多送叫極都冇例如傳說中的陳村粉，檯面ｄ野已經多到夠食多半晚喇，但倫敦大酒樓火鍋最正果樣，係豆腐同埋個十分好飲的湯底。一面飲、食同吹水，今晚先發現原來全TRHK最老坑果個，唔係107，唔係我，而係二寶樂。當全場得佢一個飲過「七十一一蚊杯奶茶同朱奶」，你就知道佢有幾老，因為呢個宣傳活動好似係七十一剛剛登陸香港想打響頭炮搞出黎之宣傳活動，即係Ｎ的十次方咁多年前。
食到十二點幾，間酒樓已經得番我地冇晒人，臨走去廁所途中發現，原來而家到職工員用膳時間到佢地打邊爐。
「唔怪得我地食果時叫乜冇乜啦，原來ｄ好野你地keep起晒留俾自己！」

打完邊爐都仲好「早」，咁快散場又冇乜癮，本來今晚重點節目係「出尖咀搵Kawaii」，但打完邊爐咁飽又唔想出尖咀咁多人，結果係好乖仔地去打渣古。今晚新之城門口勁多人，原來呢晚呢個位置有band show，玩得好metal架首歌係李克勤但ｄ結他聲係black metal！琴晚多人到塞到上樓梯，今日少番ｄ人終於入到黎玩到喇。街機係噉出高達但出親都係第三身射擊，我地呢ｄ要用掣玩就唔識之傻仔完全無緣，但呢隻渣古射擊係等左好耐之第一身射擊拎支槍就射到果種嘩冇得唔玩啦。個設計實在好好，連支槍都係渣古支來福槍個樣，而且可以閃同閃果時都可以出大彈炸人，而且係玩兩個人一組噉打即係可以幫拖射，個系統真係作得唔錯。玩落亦相當好玩，只不過畫面未夠靚差少少同有時會窒到停左差唔多成秒，同埋畫面個判定範圍好似係細過個芒，好多時支槍未指出外面已經縮左，搞到成日無端端縮同打唔到螢幕側邊ｄ敵人，要玩多幾舖先摸得熟。非常好玩，只不過實在太多人跟機，而最大得著唔係終於玩到呢隻渣古，而係證明左阿捷呢條ＸＸ真係完全唔識打機。

打完機成十二點幾都想走因為好飽，最後都係落左吧，唔係尖沙咀只係皆旺附近求祈一間，
「冇啤酒妹又冇Kawaii，搞到阿捷好失望忝！」
落酒吧就當然係飲酒同玩無聊遊戲啦，但酒真係咁多年黎都冇飲過，只飲過一次。果時係好細個，果時見ｄ大人飲自己又飲下，飲完之後覺得
「都唔知啤酒有咩好飲！」
之後寧願飲維他奶都唔飲酒（．．．），一直到今日先正式飲酒。但唔飲唔係因為飲唔到，而係因為我實在唔明有咩好飲，直到今日仍然唔明。

其中一個想早ｄ返屋企之原因，係今日要早起身上舖頭，返到屋企搞埋野訓覺已經係四五點，但其實唔使驚起唔切身，因為一朝早已經俾大陸的同事打電話黎問野摷醒，經過幾次中港電話溝通之後，已經唔需要怕喇。放假都肯咁早起身，因為今次係Soni出黎食飯。都幾奇蹟架，因為除左TRHK show之外，我都冇機會見到佢，今個聖誕節真係充滿奇蹟。飯堂當然係TRHK御用果間且豐啦（哈哈）。呢餐主要係傾幾個大計劃，對我地黎講確係好大，只不過對大部份其他人黎講完全不值一提，始終TRHK唔係做TRIVIUM同DREAM THEATER呢ｄ，而家賣果ｄ根本都冇人會要，所以呢ｄ「計劃」，諗下算啦。下年會發生咩事都唔知啦，可能果時連劉Sir都放棄埋metal呢！

食完個飯再過一過信和睇睇107檔野，見我黎之前冇人但一入黎立即好生意（點解TRHK唔會噉？），廢事阿捷咁忙啦我都係早ｄ走算喇。跟住仲有時間，當然要去打番舖機先，而家唔落呢幾日都唔使旨意有機會迫到入去架喇！新之城剛剛好趕及聖誕之前裝好ｄ新機，勁，而家連跑馬機都設計到超cyber勁豪華，嘩真係一張流線型呔金屬椅連接一個巨型touch screen，嘩打舖機遮乜而家買假馬都可以好似去左示範單位咁豪？有部Let's Go Jungle係玩暴力觀光團，即係坐係部觀光車入面一面遊山玩水一面開槍暴力怒射各式巨型蛇蟲鼠蟻，睇人玩都幾易玩又幾好玩，不過跟極都跟唔到機因為實在太多女圍住部機喇我又得一丁友，睇畫面同玩法同難度都知係整俾女同情侶玩啦呢隻game就同隻過山車版House of the Dead 4一樣，我呢ｄ得一丁友麻甩仔都係去玩Time Crisis算。今日唔係咁鬼多個電話打黎係噉接都唔使連中兩槍，爆完再玩舖Time Crisis 4，係好玩但唔知點解硬係唔多鍾意玩呢集。仲好彩撞到冇人可以打一舖渣古，正呀呢隻game真係我成日都諗高達呢個系列點都要出番隻第一身射擊先係，以前出果ｄ冇得玩呢隻一定要煲番夠本。玩落真係好正因為個系統同玩法趣味十足，雖然ｄAI有陣時好白痴ｄ動作又好鬼怪，但我鍾意白痴我鍾意怪喎就係所以我鍾意玩！呢隻game叫修羅之雙星，係兩個人一人一部渣古鬥聯絡軍，唔好以為打吉姆仔就易玩一部吉姆仔要射成十幾槍先死（頂渣古支機槍有冇弱雞成噉呀？？？），而且玩到後來ｄ吉姆好鬼勁架係玩到白色五連星甚至七連星後面一排輪住交叉射你突然畫面邊又閃出幾架輪流衝過黎一刀兩刀三刀噉劈你ｄ陣法狂老屈，雖然動畫入面吉姆純粹係拎黎死而渣古才是皇道，但玩完呢隻game會發現應該調番轉至係。衰在只可以用渣古，我好想用大魔呀！最愛自護機之一仍然係大魔！
「我要用黑色三連星抗衡白色五連星！！！」
呢隻渣古最難玩唔係過關，係玩完之後擺番支槍落部機度。每三個人當中有一個係要研究一輪先成功放到支槍落個架度。

冇錯我又係無人島島主，今日成層得我一間開檔，好正常丫，正常人呢兩日都會有節目啦冇節目都匿係屋企訓下抖下啦，好似對出幾間玩具舖琴晚一早收舖之後深夜返上黎皆量開party，癲左成晚今日仲唔放番日假咩。有趣地前排成個場冇人，今日全層休市反而個商場塞爆晒人，不過當然與我無關啦未聽過metal而會好奇入黎試甚至買碟之個案，開舖五六年發生之次數夾埋兩隻手甚至一隻手都數得晒。除左應酬下間唔中上黎的無聊人甲乙丙（呢幾日實在係太多神奇人士出現喇），聽歌聽左成日。黃貫中隻新EP《狂人習作》聽左幾次，第一首《踩界》唔多鍾意之外跟住直掃落去首首印象都唔錯，特別係《逃》同《彩色世界》，估唔到佢會玩番恆野，當然要彈總會有野彈到但pop之中有得咁rock你仲想點？只不過個包裝真係唔多鍾意，習作簿設計係非常有型亦真係買碟先可以享受得到，但本野個結構咁化學真係聽多幾次揭多揭隻碟已經皺皺地爛爛地好鬼化學，同埋隻碟實在呃晒人，相信冇人第一次見唔會覺得呢隻係CDR（I love CDR!），但呢隻EP越聽越正，始終EP半個鐘唔使搞掂係其中一個賣點，快手快腳唔使煩又唔會拖三拖四。而今日重點節目係一隊被半公認為全世界最差之metal band，出左第一隻碟之後全世界接近所有人都俾呢隻碟零分同負分，點知奇蹟地跟住仲有碟出，但第二集碟評價係點相信唔多使提啦，而今日就係可以得閒到連聽晒呢兩隻鎮舖之寶。點為止鎮舖之寶？即係永遠都賣唔出同TRHK共生死果ｄ，想當年入第一隻碟果時仲係九龍城時代，聽完一次之後我反應係
「嘩頂好Ｑ正喎！」
但劉Sir話親正果ｄ，大家都知道實係賴野架啦。所以隻碟由九龍城賣到而家賣左成四年都有，都仲係賣緊第一水貨咁多年都唔知賣左有冇五隻，仲係得劉Sir一個會話
「嘩頂好Ｑ正喎！」
大家明白點解TRHK會有咁多死貨啦。有呢ｄ口味咁另類之奇人係度，TRHK入果ｄ貨又點會正常、點會賣得、點會有人要丫。

．．．噉就最後一日假。雖然所謂「放假」都係上舖頭坐成日，又平日係公司都係頹架喇，但係舖頭頹點都開心過係公司頹啦當然。放左兩／三日假，今日皆旺終於唔係得我一個鎮守大局喇，人亦都多番，但當然又係唔關我事啦我地一向都好「靜」架啦。基本上今日只係要招呼一個客人：鍾生。呢度冇幾多人識佢，就算見到都唔會顯眼，因為同梁生一樣都只係阿叔一個，但佢要比梁生更傻更更兼有少少口音，總之又係你點睇都唔係聽metal果類人，噉事實佢又確實唔係搵metal，上黎係摷．．．darkwave。當然都有執metal野啦，而我每次見親佢都會好開心，因為完全唔需要招呼佢已經搵定晒料知道晒自己想要乜先上黎，同埋每次上黎都係幫手清死貨，就算唔計新果ｄ齋舊band而家都冇人搵啦，又係唔係on9／無聊野唔要，所以我鍾意。夾夾埋埋執左一棟，
「聖誕節紅假都唔休息？」
「唔開你又點買聖誕禮物呀？」
雖然佢只係一個面相平庸的阿叔，但身邊冇一個人夠佢咁metal。　佢係做五金。

見呢排咁靜又好耐未掃過貨，今日我都幫自己買聖誕禮物喇。Thrash呢家野當初搵就好多人搵，而家終於到我掃喇 － 劉Sir一向係掃死貨優先，就算最出名果ｄ都係等到冇人買「死左」冇人爭果陣先買，當我今日居然可以買到曾經好多人話想搵想要的TESTAMENT第一隻碟，就知道「潮完」了 － 又可能因為唔係SODOM啦，或者到一日我終於買得到SODOM，果時先真正係潮退。其實TESTAMENT頭四五隻碟以前返過唔少次，一直冇執到係因為執唔到，每次返左真係唔使兩三日已經全部俾人清晒，發生之年份係好多人「搵thrash metal」之好耐之前即係成兩三年前，反而果時「未興」會咁多人買，而家咁多人話要但放正係度咁耐夾埋都賣唔過幾多隻，即係係時候出手了／終於可以出手了。TESTAMENT可以話係其中一隊技術成就最高之thrash metal band，慢位可以chok到你唔信要快時又可以去到勁快，但最勁係激得黎又可以超級melodic甚至有少少folk，講歌講技術根本贏過唔少出名thrash band例如METALLICA，係好接近完美之thrash metal，但唔知點解就係出唔到名，或者同DARK ANGEL呢ｄ一樣，音樂同際遇都命中註定係地下經典格。雖然第三隻碟開始已經跌之後甚至變埋樣，但頭兩隻碟確係非常無敵，寫之興趣十分大，但一向慣左集齊一套或者起碼有最好／最出名／最經典果幾隻先動筆，呢樣仲未做到。睇番下，冇乜刻意追過，呢隊野ｄ碟原來一直以黎執下執下已經差唔多有晒，而家只係差前中後期夾埋一兩隻碟同ｄEP就齊全線。相信呢日不太遠。
「噉幾時寫？」
慢慢等啦。俾我揀，我會寫而家存在緊之樂隊多過寫舊band，舊band同經典果ｄ，坦白講，係有心搵自然會睇書會上網會問人，同埋理論上經典呢家野應該係街知巷聞唔需要多講多介紹都實會有人追番（當然實際上已經證實左唔係啦），寫都係為興趣同手癮多，但真係選擇始終新band新碟居多，因為呢一刻搏命搏殺搵緊飯食捱緊世界之人係佢地，唔係十幾二十年前之始祖前輩。

晏晝thrash左一輪，跟住到MESHUGGAH。Nuclear Blast近來狂搵錢勁幫ｄbandｄ舊碟出新版又整靚聲又送DVD又乜乜物物，MESHUGGAH呢隊就黎俾人捧上神檯當然有份啦，揀左佢地隻"Nothing"再錄過結他同mix靚ｄ之後夾多隻DVD噉就一個新版。揀呢隻碟實在唔明因為"Nothing"係幾／好悶下的一隻，而且真係想執靚聲的話，之前果隻"Chaosphere"絕對更有需要，只不過對我呢個MESHUGGAH fans，冇得走架喇齋為ｄbonus都要執番架喇。隻碟就預左會同CD差唔多一樣ｄ歌唔會差得幾遠，話錄過音但唔係點覺，但得意在好似ｄ聲左右調轉左。唔緊要啦呢個新版音樂以外先至係重點。個包裝超靚靚左勁多，仲要送多個3D立體版封面呢樣個盒都冇提過絕對驚喜，但最重要都係隻DVD，有三首live同四個video，差唔多全部歌都預期地係改用八線結他之後ｄ歌，live得三首絕對係唔夠，但三首已經夠晒喇呢班友玩live真係黐Ｑ線，兩首係最近兩隻碟即係最悶果兩隻碟ｄ歌，再加多一首出live唔玩會俾人斬之"Destroy Erase Improve"主題曲，但居然玩得最唔掂果首就係呢首主題曲，起初完全冇預期之兩首新歌反而係令我連播呢隻DVD三次之原因，無論聲定玩呢兩首都贏足成條街，嘩太勁喇玩live玩得，連睇三次之後即刻再播"Nothing"同同新碟"Catch 33"仲要唔止一次。隻新碟得一首歌十個字長，理所當然地唔知玩乜但我反而越聽越鍾意，出果時經友人廉讓（呵呵睇到呢度已經知道隻碟確係有ｄ問題了）起差唔多每日都會聽一次，到左年幾後之今日每（兩）個禮拜都仲會拎隻碟出黎煲一煲，甚至試過收舖之後旺角行返屋企時特登由旺角兜上何文田山再轉番落土瓜灣行多大段路就係一程路聽晒呢隻碟，噉樣一年入面係噉煲，呢隻碟／呢首歌已經成為我最愛MESHUGGAH作品之一，呢隊bandｄ野入到去的話真係會感覺好正。我係fans都係噉話，雖然MESHUGGAH有幾隻碟真係經典到頂，最後呢兩隻玩到超「藝術」已經唔係玩俾正常人聽，我都唔會推介佢地後來ｄ野因為未聽歌齋ｄ結他聲你已經會覺得好Ｑ悶，跟住聽落去，你只會完全唔知佢地想做乜，跟住爆粗小佢地。
「寫到呢ｄ歌出黎，到底呢班咩人黎架？」
睇埋隻DVD就會知道，原來係七人。MESHUGGAHｄMV分兩種，一種係真係唱片公司落本去拍果ｄ，呢ｄ正正經經唔係好特別但又算唔錯；另一種係隊bandｄ自作業，呢ｄ先係精髓，睇過呢ｄ自作業就會明點解呢隊band柒到冇朋友。黐Ｘ線地佢地。
講開又講，呢隻碟到左咁耐，先只賣過兩隻咁大把。其中一隻當然係劉Sir呢個超級MESHUGGAH fans啦。另一個人，今日先知道：
「呵！鍾生！原來係你！我都奇怪而家仲點解會有人買MESHUGGAHｄ野仲要係呢隻！」

所以今日渡完聖誕返晒黎開工之皆旺各位朋友，108開幾耐佢地灰足幾耐。晏晝thrash metal，嘈死；夜晚MESHUGGAH，悶死。

返到屋企，第一件事係萬九幾個人問：
「喂！今晚地震喎！八點半到八點八震左兩次，真係成間屋係度震喎！」
「真係？但我完全唔覺喎！或者果時播緊MESHUGGAH間舖本身已經震晒卦！」

得知地震發生之後，滿懷希望：
「會唔會震超晒ｄ野，返到公司乜都做唔到？」
真係發生左！幾條海底電纜地震果時震斷左，今日開唔到台灣同外國ｄ網頁，開到ｄ網都超慢！就連fax線都斷埋呀！
「嘩正冇得上網又冇得fax即係想做野都冇得做啦？」
噉又唔係！睇唔到網頁，但唔知點解send同收到email！非常高速順暢果隻仲要係！放完假返黎又要多email即係今日要做野之餘又冇得上網偷懶！平日坐係度冇野做折墮到一分鐘check十幾次hotmail之光景不復見矣！立即打去網上行投訴：
「搞錯你地！係壞就整到壞晒佢啦，而家要做野但係冇得上網玩算咩意思先！」
如此地震都撞得到，都可算係今生一個小奇遇了。

雖然係噉，以劉Sir的做野速度（係因為想早ｄ偷懶而迫出黎之超高速），未食飯已經清晒ｄ野，呢日冇得上網即係收心養性寫野（「唔係做野咩？？返緊工？？？？」），超準時六點放工，難得今日星期三，梗係要去打番舖先啦。今日上唔到網吧，黎到冇得上網的網吧（相當諷刺），仍然無阻我地C&C之心，內聯網唔會上唔到丫嘛？呢隻game確係百玩不厭不過都開始有少少瓶頸，主要原因係電腦太ＸＸ，有時真係老屈到你唔信，但有時又可以白痴到唔想玩咁on9，而家二對二有陣時真係玩到冇癮因為太屈爆，二抽三又盞玩到爆粗因為勁起黎可以真係勁得好過份，要搵ｄ新野玩玩先得喇噉搞法（次次都係噉講，但結果次次都係煲番C&C）。今日算係創舉架喇，煲左陣發覺都係過隔籬機舖穩陣ｄ，除左撞到有條勁人用黃忠單打三國志（不過爆唔到機，一條友用黃忠難度實在太高喇），仲有Time Crisis 2。而家真係得番呢度有得玩喇，再上一次玩呢隻好似中學都未畢業，隔左可能六年都有，仍然係一拎起手就爆，因為實在係太簡單六年後都仲記得晒點玩，可惜打最後大佬時玩野得滯中左一招冇得perfect爆機。而家玩番都咁好玩，唔止因為好玩，仲因為好多原因，睇睇有冇機會搵得番部Time Crisis 1，可以的話會搞一個Project: Time Crisis。

夜晚，唔使煩我，狂打flash game時間。玩到好合皮，諗住係度開番個講game專欄忝呵呵呵。

最後，好灰，哈迪斯全線執笠撤出香港。我從來鍾意哈迪斯多過麥記同肯德基。唔知點解，以前咁多間美國快餐，一間一間噉死，就係死剩可能係最唔好食之麥記同雞記。灰。支持indie、支持underground。（「．．．．．．」）

善有善報。地震之後send／收到email之人唔係多，琴日清晒ｄemail等於所有呢ｄ人我已經搞掂晒，亦即係今日起再冇人會send到email俾我，今日一開機係一封email都冇，嘩爽呀真係即係唔係我唔想做野呀係真係想做都冇得做呀！！！其實得閒得咁恐怖都可以好灰架，你諗下，即係我冇野做，但兩個老細都係公司，好得閒但係又冇得發癲，上唔到網悶到爆寫野寫得多都眼訓啦，今日朝早等食飯呢四個鐘真係過得好辛苦，最後真係坐住係度訓左成半個幾鐘覺。居然訓得咁揚都冇人發現喎！幾符碌！（可能因為其他人同我情況一樣但係比我更加早訓著）

朝早都唔難頂，食埋個飯訓埋晏覺先死。仲有四個鐘頭！點搞？大佬扮做野都扮唔到咁多咁耐啦！或者老細都體諒我咁辛苦（．．．），晏晝閃左去唔知邊度即係可以完全唔需要顧慮任何野盡情地頹。冇乜野做，當然要聽下歌先。而家metal野主要留係舖頭同出街聽聽，屋企同公司好少聽嘈野而聽pop野多，今個晏晝狂煲三隻碟：達與璐《達與璐》，其實以「劉以達隊band」黎睇呢隻碟ｄ野係好正常加好流行，不過就係好鍾意，可能就係因為ｄ野夠簡單，但簡單得黎又好大陸完全唔香港流行曲feel更加唔K，噉已經夠聽得開心啦。王菀之《詩情．畫意》，一句講晒：「好pop。」真係好pop，之前都講過今隻碟有ｄ歌好陳奕迅，阿明（專聽實驗野果個阿明，有關人士自會知道邊個）買完之後，評價係
「全隻碟除左《畫意》一首，其他全部唔鍾意。」
因為《畫意》就係全隻碟最灰最暗「最王菀之」果首，其他一係聽到你開心笑，一係嫌「點解好似pop左咁多」，對「王菀之＝《雷電》」的佢黎講，今隻碟冇乜邊首特別好又好正常。但我就係鍾意佢咁pop，pop但係唔K（其實唔好聽果ｄ唔係流行歌，只係大部份K歌，流行歌一樣好多好野聽），夠聽到我舒舒服服，但最鍾意反而係歌詞，實在填得太靚甚至有點鍾意《詩情．畫意》ｄ詞多過《K sus2》，係我今年最佳中文詞作之選，讀《畫意》一首已經足夠。黃貫中《狂人習作》，話係EP都有成半個鐘長，唔計兩首bonus live齋計真正五首都有廿幾分鐘，加埋個咁有style之「習作」包裝先六條，呢隻EP其實好抵玩，重點係本地出品嘛。黃貫中第一隻solo當年新星堂執笠行過冇執到轉過頭已經唔見左係一個相當大之遺憾，跟住想搵亦唔多見邊度搵到（見字者識做啦幫下眼搵搵，一手可以二手更佳），跟住兩隻碟聽過ｄ歌冇乜大興趣，再過多咁多年之後你點睇而家之BEYOND同黃貫中唔緊要，呢隻碟玩番恆野有番火我就幾鍾意。從來唔多鍾意黃貫中ｄ詞太口語同唔太順，而且而家已經冇乜solo彈都冇咩野聽，玩番咁rock算係噉架喇，pop野黎講你仲想點丫。聽＆打到四點幾，食第二餐飯（正常的一天我係會有兩盒飯食加兩碗湯飲），再納埋各位女同事自動自覺呈上之各式小食，都仲有一個鐘。坐低繼續打野，
「死！keyboard都打爆埋！」
個5字唔知點解打打下打到傻左冇反應，對用速成打字的我黎講係好大劑之一回事（冇錯我打咁多年中文都仲未識打倉頡，但係速成都一分鐘七八十字閒閒地最高速過百字都得仲打得快過人地用倉頡又確係幾乞人憎），公司剩番一個keyboard換，非常之唔開心。呢個係打落去冇聲好靜果種keyboard，呢種keyboard我就最唔鍾意，打字果時打到篤篤地噉先有感覺先至夠old-school嘛，而且噉樣一面打一面嘈，老細先會以為我成日好搏命噉做野，雖然果一大堆篤篤聲係因為打碟評發出，而家打極都冇聲，老細分分鐘聽見粒聲都冇唔信我係做緊野係噉走過黎行必噉就冇癮啦。但呢樣都算，最灰係冇左熄機掣，舊果個keyboard係有hotkey可以直接熄機boot機果隻，唔識用當然係麻煩啦一唔覺意掂一掂ｄ野未save部機就熄左爆粗都似，但呢個熄機掣到放工果時就好有用架喇，唔使用mouse又唔使去開始果度就熄到機一野就搞掂，當年（即係到琴日為止）放工好型架放工鐘聲一響立即有型地左手熄芒右手keyboard熄機再轉個圈起身拎袋打卡走人，而家要加多幾個步驟先走得唔可以一氣呵成硬係唔多順氣，準時走都走得唔開心。
「噉都有得講一餐呢條友真係夠晒無聊。」

今晚，冇咩特別好講。因為又係得一句的一晚：
「唔該有冇（＿＿＿）呀？冇呀？」（即走）
（＿＿＿）除左差唔多日日出現的TRIVIUM、DREAM THEATER同METALLICA之外，新加一員，叫EVANESCENCE。
見各位朋友噉急走人，答完「冇」之後，我都唔需要接埋成日講果句台詞：
「不過有其他好多似（＿＿＿）既band，或者試一試？」
因為講同唔講，結果都係一樣；即使真係試，試完之後，結果亦係一樣。此乃經驗之談。

所以今晚係old-school之夜。阿捷同學已經為今個禮拜六斯比頓星開光大典奉獻左一隻三部飛機合體之巨型機械人，不過點睇都唔知係咩機械人，但完整＆齊晒三隻＆合到體＆玩到就夠呢個問題遲ｄ先再算！今晚傾足成晚，事實證明動漫呢家野始終'80同'90先係皇道。同埋加爾巴呢套其實好廢好無聊的漫畫原來好Ｑ經典。呢套野令我有興趣去搵間漫畫舖租番套追番，話晒小學睇到而家都未睇晒，因為十幾年都仲未出晒！
拿拿拿，睇住喇，今年年底其中兩個project呀：
１．「星期日，TRHK歡樂早場！！！」（認真架！）
２．「有冇睇過正版日本四仔？有冇興趣一齊夾錢執隻返黎研究？」

今朝食早餐果時，真係好想影張相俾你地睇，實在壯觀：包括公仔山竹牛肉＆公仔燒賣各半兜、好大袋的咖哩酥＆叉燒酥、仲有各位女同事捐獻的 薯片零食＆紙包飲品＆Ｎ種糖同朱古力 － 拿講明先呀我完全冇出過聲叫佢地俾我食架全部係佢地自己心甘情願地奉獻俾我架。檯面ｄ野食多到我都唔想食，老細仲要今朝開會唔見人忝即係坐住係度食足成朝，絕對夠食成朝ｄ野係多到。食完之後發現，原來仲有兩盒飯加兩碗湯加一個常餐同一個餐蛋治等緊。嘩。唔寫喇。太忙。今日忙食野忙到連做野都冇時間。（．．．）

琴日已經得閒，估唔到今日仲正，唔止海底電纜直頭成間網上行死左，網上唔到連電話都唔通！呢舖真係想做野都冇得做喇，除左繼續食仲可以做到ｄ咩丫。（．．．）基本上而家午飯同下午茶之區別好模糊，因為一點幾食果餐係一盒飯加一碗湯，三點／四點／五點／三至五點（．．．）食果餐都係一盒飯加一碗湯。一面食呢個lunch or tea，一面研究呢間茶餐廳，成年有99%日子都係幫襯呢間，即係茶餐廳食得多有呢間咁好服務咁高質素真係搵唔到第間，睇送外賣果ｄ一係靚仔一係靚女（仲記得靚靚大學year 2外賣妹嘛？），邊有茶餐廳唔係搵ｄ老野阿姐送飯盒架？ｄ飯更加唔在講食左一年差唔多食勻全世界，中國各大小縣鎮省份各式烹飪美食當連西藏同新彊都有有邊個地方同煮法未試過丫，亞洲地區台式越式日式呢ｄ太大路喇馬來西亞新加坡沙丹甚至婆羅乃都有，美國梗係成日有歐洲一大堆咩瑞士德國西班牙匈牙利意大利出極都有得出，非洲都有個所謂非洲雞扒你嘆，就連咖哩咁簡單都有分日式、港式、印度、馬來、巴基斯坦同泰國，即係係咪真係咁有果個國家之風味就無謂理啦我只知道每次齋睇個餐牌已經好有娛樂性，好唔好食同係咪真係果個國家ｄ野已經係其次有ｄ野開心就算啦，好似當年紅燈山丘中指定飯盒商大家好個中式牛柳同葡國牛柳分別只係多幾條洋蔥葡國立即變中國，即係好食就笑一笑算數啦（我發現我鍾意食果幾間都同大家有關：大家食、大家好、大家樂）（要寫我由小學食到中學食到佢執算呢間大家好又可以寫番篇幾千字長文，有機會真係要搞番個紅燈山丘中集體回憶）。好在我食左成年真係冇乜幾多次係覺得唔好食，最正係呢檔野完全係為左我呢ｄ麻煩友而設你叫得出就整俾你，「呢個餐果樣送轉呢樣加多舊乜再走物然後汁轉呢隻汁順便落多ｄ汁唔該炒埋底記得汁送同飯分開上今日例湯又好似幾好喎幫我加多碗例湯記得要多渣」你敢講佢敢做刁鑽ｄ咪加多幾蚊，噉先係香港本色！所以學謝安琪話齋：
「我愛茶餐廳！！！」（冇錯我係謝安琪超級fans）
星期三同Rock爺去C&C時吹開水，當年之壹本便利真係非常好睇 － 「當年」係指便利未變成鹹書果時。你話佢帶起歪風好敗壞風格好道德貶值好我一向幾鍾意壹傳媒，當年壹週刊係香港雜誌界中之一個小革命，成功之後再出壹本便利呢本年青版壹週刊。其實果時便利可以當成係壹週刊刺娛樂版本但內容冇咁多娛樂圈八卦野而多購物潮流有關再加濃縮，最正除左會講動漫同打機，仲好似選擇噉每期會有ｄ食品同產品測試，即係你而家睇壹週刊同蘋果日報最好玩果ｄ其實以前壹本便利全部包晒，只係後來變得越黎越時尚同潮流結果潮過頭，就同Yes呢ｄ一樣淪落成為唔夠秤人士而設之鹹書兼八卦雜誌。而家之便利，格局係同壹週刊娛樂版完全一樣，其實睇呢兩本野會覺得差唔多其實唔使出多本，但格局一樣格調即差好多皮 － 當然係講緊便利差好多皮，但就係因為咁低格調先咁受歡迎嘛呢個年代就係鍾意呢ｄ野。以前買便利，係睇封面講咩漫畫、咩game、咩模型，呢樣野可能有ｄ人想像唔到便利原來曾經咁「正氣」過，因為「當年」係講緊我細個仲讀緊小學果時，果時細個儲錢除左為漫畫扭蛋同零食之外其中一個主因真係為左買壴本便利架；而家買便利，係睇封面有邊條女、內容淫唔淫。都咪話唔灰。無端端講番壹本便利，因為今日其中一樣美食係朱古力批／派，即係一個圓形蛋糕兩塊蛋糕夾住層棉花糖外面包浸朱古力果隻，相信好多人都食過因為呢隻野都好普通下。我係呢隻朱古力批忠實食迷，而咁簡單之批仔都可以出過好多個牌子，抵死在個個牌子個包裝都係99%相似而個批直頭100%相同忝啦，今日同事又執左盒返黎發現居然到而家都仲有新牌子出，食番起舖癮有ｄ興趣玩番當年便利呢個美食測試，搵齊咁多隻牌子返黎試下寫番個review。又打機又食野又動漫又睇戲又flash game，越諗越過癮，真係好多野玩，07年有好多好多野可以搞，計劃緊搞番個Project: XXX專欄。死，完全唔夠時間。似乎要放棄一下metal了。

「阿捷（＆一眾好色人士i.e. 107），如果你今晚係度，你會好ｘＮ高興。」