段記

2/9/2006 SAT

VADER!!!今次到係Candlelight。我有個印度客叫Candylight。

今批貨重點當然係VADER新碟。外國4/9出。今日幾多號？呵呵。（唔係星期六日先有時間拎貨落黎，會早多一兩日忝其實）隻新碟正唔正？隻EP正唔正？呵呵。
執埋今日批貨，有幾樣野好得意。首先係，好多band都已經有一個專用箱裝佢地ｄ碟，仲要係每個箱都裝到滿晒。呢ｄ有私家倉之band，全部唔係細野，例如OPETH、CRYPTOPSY、IN FLAMES、DARKTHRONE、MARDUK、IMMORTAL、ENTOMBED、HYPOCRISY、MORBID ANGEL．．．基本上係知道個名，都知道係不得了大陣仗實要聽冇得走果隻。而而家係差唔多呢ｄ經典band，每一隊都可以有一個私家箱放佢地ｄ碟ｄ存貨兼放滿。噉代表ｄ乜？又今日，到齊左XASTHUR全線。呢個名仲有幾多人記得呢。當年XASTHUR同BETHLEHEM兩隊，係全城最紅suicidal black樂隊，suicidal black亦係城中最紅black metal / metal style，係唔知點解瘋魔一時，一日之間突然上村人衝上黎問，搵XASTHUR、BETHLEHEM、suicidal black。果時真係差唔多日日都有人問，問親都係好多個問。到左而家，XASTHUR全線放左係度，仲要唔係放左一陣，係放左已經一段時間，而XASTHUR、BETHLEHEM、suicidal black三樣野，由之前日日有人問，變成已經好耐－半年，甚至更長時間－無人問津。噉代表ｄ乜？

晏晝，好靜。可以成個晏畫同阿捷同學吹水。雖然大家相距咁多年，但大家都係'80人士，我鍾意。我係永遠的'80追隨者、追求者，就連我個人，都係同時代脫節地充滿'80氣息，美好回憶，仍然係元祖高達、《勇者》系列、《熱血》系列、各大戰隊系列、手繪作畫、一味死打死炸唔使用腦諗之各式動畫漫畫。所以而家ｄ動漫已經唔適合我，一係太深奧向，一係太少女向，一係太白痴向，同埋瘋狂Photoshop＆CG，見到多邊型CG版金剛戰神同變形金剛，我好想死。我而家先知道，原來我教院Year 4先聽過開始睇之數碼暴龍，佢小學即係我中學時已經做緊。我到而家先知。差唔係好多年遮（「都未夠十年！」），已經有幾條代溝了。
代溝，實在好深。新一代，實在太幸福，睇睇捷同學，幼稚園已經開始睇卡通，到小學同中學仲幾揮霍下，基本上興過乜、出過乜都有俾過錢買過玩過。想當年小學二三年級都係要求阿爸阿媽先有得睇電視，紅白機、Game Boy都未擁有過，ｄ最低階細細部幾粒掣果ｄ遊機機，都係自己儲下儲下ｄ零用錢薯片錢先買到，最經典果部飛鷹，我玩到而家都仲有玩、未玩厭未玩悶，因為得來不易；雖然細細個已經有電腦玩，果時1M ram要成舊幾水部腦有8MB ram同有sound card出到聲已經好威好勁，但玩左唔夠幾年出左586之後，部486拍埋人地度就好似紅白機拍埋超任度，好多野玩唔到之餘玩到都超慢超窒，到有得上網果時，已經係中六中七，仲要係得56K，根本唔使旨意download野果個年代係download都冇得download，因為淨係load網頁都load你個幾兩個字，今日五秒鐘做完之簡單小事昨日係可以做你五個字，而家呢個年代之朋友係唔會想像得到果種痛苦。由細到大好多野好辛苦同花好多心機用好長時間先得到，而家付出少少眨下眼已經有晒。新一代實在太幸福。資源同科技令新一代提早開始同接受好多野，亦越黎越易追到上一代之所學所識。相對黎講，一切得來太易，就唔會識得珍惜同欣賞，同太易令自己不知天高地厚。

夜晚，多番ｄ人。又係睇電視的時間。呢晚正，做英皇新秀歌唱大賽！娛樂性相當豐富！其實呢個年代，仲有冇歌手係新秀出身，新秀係咪真係為選拔歌手舉行？我只覺得，真係好正！當連歌都未識唱氣都未識抖都可以入到圍（「歌都未識唱氣都未識抖」呢句，亦非常適合各位今晚表演之英皇歌手），睇黎笑都抵番晒！當可以有參賽者自選歌曲揀粵曲唱，就知道，真係好正！最後贏果個，唱到成個張信哲噉款，冇可能唔贏，尤其是拍埋其他各位「新秀」身邊。再睇睇，呢位張信哲絕對係大熱勝出：呢位仁兄係大陸同胞。當佢個名係叫做高園，你就知道，一定唔會係香港人。
「禾大陸忍禮刀香港都可以贏尼文香江忍幾條街，尼文香江忍收皮巴！」
基本上佢係超級大熱99%一定拎冠軍。但可惜，就係差果1%，佢得唔到今屆英皇新秀大賽冠軍。最後一個環節，係勝出者要即時被問一條問題，睇佢點應對。問佢果條，係：
「你肯唔肯出席富豪飯局？」
佢答：
「唔肯。」
所以輸左。而今屆亦冇人贏出。

3/9/2006 SUN

「喂！去打機丫！」
琴晚收舖之後同Rock爺落左新之城打機，但多人到爆，冇乜心情打機就走鬼左。今日起身一開機又有人撩打機，係107。
「喂！去打機丫！橫掂你三點先開舖，打舖機先囉！」
有ｄ興趣。不過唔好意思喇107，今日有飯開，定期TRHK聚餐，今日兩點舉行－話係定期，但其實個期完全唔穩定。開飯地點，係我最愛的宜豐，唔係平，不過好食，同埋夠飽。佳人，除左pizza仲要係最cheap果個德國肉腸之外其他冇乜有胃口食；台灣野，飲就OK食就無乜謂，一向唔多鍾意食台灣野，同埋呢間有得叫外賣，就費事食啦。再者，我鍾意食西餐多好多，既然之前幾次聚餐都係呢度，我已經視呢度為TRHK御用食堂。不過有個問題：貴。對我呢ｄ慳家／度友黎講，食飯食廿零蚊已經係頂晒龍，所以我成日食大家食，因為一個麵十五蚊搞掂加多個送先二十就晒我budget，係每次有107的日子同佢癲一癲親上海呀小炒呀就實過三十，呢餐食到四十，對我黎講係好貴－你知劉Sir食開粗野架啦。所以TRHK好少聚餐，亦係定期聚餐唔定期之原因。
不過，宜豐真係唔錯。

好唔開心，TRHK捱左成兩三年果張雜技凳（上過黎見過劉Sir點坐，都會知點解叫雜技凳），終於俾我坐爛左／玩雜技玩爛左，證明同107又上海又小炒TRHK又聚餐，我真係肥左好多。今日晏晝冇乜人，但睇戲睇得好開心，有兩間玩具舖因為爭位擺野積怨已久，今日終於口角。
「好彩今日先講數！星期三先黎的話冇戲睇！」（冇錯我好衰仔）（107：「我都係架！」）
冇客，就戙係度睇戲。
「打啦！打啦！！！」
一面睇，一面打氣。最後連差佬都上埋黎忝！
「正！吹雞啦！快ｄ！」（「冇錯所以點解我地107&108係皆旺咁乞人憎！」）
點知最後，和解，全場所有單位和平散去。
107：「喂！拗完架喇？做乜唔開拖呀？打啦喂！」
108：「打啦打啦！係咪唔夠摺凳呀？我借張俾你地！」
ｄ差佬其實係果兩檔玩具舖call上黎制止呢兩位精神病患者危害各位皆旺租客同顧客。

今日好多人，好多奇人，好多band壇中人，好多水吹，好多野玩，我鍾意！
「喂！日日都係大家食／上海野／新旺／肯德基／麥當奴！今日試新野啦！」
剛剛收到張新外賣紙，今日就試試呢間新野。所以我從來唔會信107講野，因為佢冇次唔係昆人，佢點講我都唔會信佢，睇呢間野又唔係平食個炒麵都三條，ｄ野又唔好食又少到死，叫到個麵返黎之後一面食一面灰就知（「咦？又話唔聽佢講，今次又俾佢昆左？」）。不過算。就當俾三條見識一下全香港最型外賣阿叔。個阿叔著住一件黑色紗網透視衫，透出內裡前後左右各式青龍白虎紋身，額頭再綁一條毛巾長到落腰，點睇都係一個東洋賣魚佬。我鍾意！
「喂阿叔不如你跳槽過去大家食做啦！噉我咪可以晚晚都見到你囉！」

八點半準時開電視，就明白點解今日＆今晚會咁少人。
「《美女廚房》今晚做最精彩果集喎！俾我都留係屋企睇啦！」
既然冇人，就開個電視睇睇，立即好多人入黎，包括隔籬玩具舖個光頭佬，連107都收埋舖過黎睇。
「喂！去打機丫！」
睇完《美女廚房》，107又黎。
「打咪打！」
107+108&Rock三個超齡傻仔，就走落新之城同各位十零歲小朋友爭機打。
「喂！玩邊部好？」
「呢部啦！」
「呢部你識打咩？」
「唔識架我未玩過架！」
打機遮，開心就得啦，所以三條傻仔同ｄ靚妹爭玩拍拍機，玩到爆晒粗問候晒各位娘親，令到圍觀／跟機的一眾靚仔靚妹側目。又玩韓國捽碟機EZ2DJ，某程度上我覺得呢部好玩過Konami捽碟機Beatmania，Beatmania係頭三代非常好玩後來ｄ歌越黎越單調同偏門（似乎頭三代最好玩係Konami音樂game系列之宿命），但EZ2DJｄ歌風格廣好多同好聽得多（又或者話pop得多），同埋畫面靚ｄ＆介面設計好ｄ，果時煲呢隻煲到好勁係差一人玩晒兩面之double play未爆其他全部歌單手爆晒－「果時」係「第一、二代果時」，即係我仲係中學果時。而家已經去到第六七八代，所以好快就死左。不過死唔係因為唔識玩呢一代，而係因為揀歌果個係107 俾得佢揀，佢條癲佬仲唔發晒狂揀晒最難玩一開波40秒就game over果ｄ？（「喂！回番水俾我！」）又玩玩收左皮好耐的打鼓機，107超勁！廿秒都唔夠就死左，得64850，破晒新之城紀錄！好在我都唔差！叫做捱多佢十秒噉啦！都叫做過到十萬分仲可以笑九佢！再走過隔籬玩結他機，兩條傻仔玩到癲晒又頸後彈又背脊彈又反手彈tapping都玩埋（「結他機都有得tap？」）繼兩條友兩舖鼓機夾埋都玩唔夠一首歌之後再次威盡新之城。
「咁勁，玩咩歌呀？」
「全隻game最易玩果首Puffy，仲要兩條友都係得番一滴能源符碌過關．．．」
結他機後面有部槍機，可以四條友打射骷髏士兵，第一次黎新之城到而家都仲係度，以前覺得隻野唔係好好玩又唔係特別靚，唔明點解到而家部機都仲未搬走。到今日三條傻仔一齊玩，明喇！呢隻game真係非常過癮！尤其是見到另外兩條傻仔不斷俾ｄ骷髏兵圍射而我可以十分得閒地開個sniper mode玩head shot慢慢一槍一隻，立即覺得呢隻game真係非常好玩！原來要有一班傻仔陪你玩先知領略到箇中樂趣！
「喂！下次每人唱夠一舊水煲爆呢隻game佢呀下！」
Time Crisis 4，到而家都唔識玩，Rock爺一個再加107＆108兩條友十蚊夾埋先去到第二版第二排，單打的話半版都過唔到，呢一代都係收皮算。隔籬有部Time Crisis 3，未玩過，試下先。估唔到易玩成噉！今晚第一次玩，求求祈祈噉都過左一大段，可能玩完四代有經驗，隻三代未玩過好多地方都估到咩位有咩人要用咩槍，實在太過易玩，唔係支力同冇乜心情打機，好有信心捱到大半隻game先死。決定黎緊要煲爆呢隻先！玩左一次，已經好有信心可以再復當年二代一格血都唔扣加接近殺晒所有人no miss超perfect爆機之勇！（死，即係又要開始定期落機舖添香油！）
好耐未試過咁合皮。一群'80硬膠仔群埋一齊，係人生一大快事。

最後，契爺伉儷MSN傳話。為保原汁原味，我只作出少量內容刪改。
"hi i still alive and stay in lasa now, i went lasa by chinghai tibet railway ,no any actue mountain sinkness. don't worry. we made fd with 3 chinese ppl in train, and now stay in hostel together, tomorrow may be go potala palace. i have crazy thinking for go mt everest starting point*5200 high se level, and i discus with buddy for go.....but i worry about the acute mountain sickness, even now, i still have something not normal for breathing. we plan to go to see sky funeral, that is most exciting for us. if i am well, will come back b4 22, everything i feel diffcult now. as about bus route, equilment, food, timing, money, we have many thing that have to plan carefully, if unlucky, may be late come back and die..........if u can, pls tell the trhk fd. i will back and bring a lama rock. if something happen, may be many many trouble..."

Weekly Review:

VADER - The Art of War

All reviews here

同波蘭冇乜緣份，雖然有唔少band好似BEHEMOTH、VADER、YATTERING都係經典級、必聽之東歐death metal band，亦真係玩得好技術勁，但係始終唔多受佢地，唔知點解。冇緣份就係冇緣份。到而家真係鍾意之波蘭band，唔係好多，VEDONIST，仲有無敵的DECAPITATED同佢地新歌佬自己隊prog-death band，同埋一ｄ唔多出名之地下band。VADER雖然已經係必聽級death metal band，但一路都唔算太鍾意，可能因為始終鍾意ｄband玩實驗多ｄ，而佢地屬於「高質素old-school」，聽落係爽，但唔夠過癮，所以鍾意摷波蘭同東歐ｄ地下band，呢ｄ先夠實驗性。到左呢一日，VADER，突然間好正，就係呢隻EP "The Art of War"。VADER好耐未試過咁恆，同埋個feel真係好打仗，玩得激玩得勁之death metal band好多，但做得到個feel出黎之death metal band，實在唔多。你會話，
「得果三個字，買黎做乜？都唔抵！」
重質不重量。一隻八十分鐘碟但聽一次就唔會再聽，同一隻十五分鐘碟連續聽成個禮拜都唔會悶仲會覺得好聽，你會點揀？
聽完呢隻EP之後，呢位唔係好鍾意VADER的朋友，已經對隻新碟"Impression in Blood"非常感興趣，回勇甚至更勇喎！但，遲ｄ先啦，排緊隊聽／買ｄ碟，實在多得恐怖。話時話，寫呢段野果時，VADER隻新碟"Impression in Blood"歐洲都仲未有得賣忝！（但早到並唔代表ｄ乜。ｄ碟遲左到，各位大老細小就例牌；早左到，讚就一定唔會讚甚至串多幾咀，因為點快，都唔夠download快。仲要唔使錢忝。大老細曰：「未出都已經聽厭左啦！早過歐洲有得買又點？」）

4/9/2006 MON

當返到公司開電腦，第一件事係發現居然過左成個禮拜六日都可以一封email都冇，就知道今日有個好開始。

今晚，正。全晚最正，係恭碩良隻GINJA ROCK，同MARS VOLTA。

「．．．做乜咁求祈？」
唔係求祈。今日一ｄ都唔求祈。睇啦：

Korean Thrash Attack:
METHOD Live in Hong Kong

要thrash的朋友，拿，thrash到埋身喇。如果仍然因為（各位「thrash友」自己填）所以呢場騷唔值得去，噉只有講句愛莫能助。

5/9/2006 TUE

琴日晏晝手痕放左隻蕉落雪櫃冰格，諗住雪凍黎食，點知唔鬼記得左今朝開雪糕見到先醒番起有隻蕉，冇計，食蕉啦。成隻蕉雪到僵硬皮都剝唔到，要拎把刀好似批薯仔噉樣批皮黎食，不過真係好正！食完蕉做野，做做下，有得笑。有個同事推廣新產品，有個台灣客落左單同佢跟的台灣客收到之後，回應如下
「別只顧著推新產品，我要的資料速速給我啦．．．有兩個張資料你要填回給我的，你應該知道吧．．．」
見佢send business email好似玩ICQ噉，佢覆番佢：
「別只顧著追資料，我推的新產品快快看啦．．．有幫襯我先會騷你，你應該知道吧．．．」
呢間公司個個都係傻的。

今日其實都好多野做。但搏晒命做，終於朝早搞掂晒，搏命因為晏晝有得出街。會計靚女行太子時見到有間錶舖個櫥窗擺設幾靚，可以參考一下個概念黎做產品開發（即係抄啦），老細就委派左我同佢兩個去刺探加偷拍。
「嘩！點影呀！俾ｄ職員見到仲唔俾佢地打？」
「唔怕！我地扮遊客影相咪得囉！」
一面由大角咀行去太子，一面夾定ｄ「日文」扮係日本遊客，去到就一輪嘴噉講一大堆果度ｄ職員同我地自己都唔識之「日文」然後夾硬扮觀光企埋去個櫥窗度扮影相。去埋公園坐定定綵排多幾次之後，出擊！行到去，
「係喎！街舖黎架喎！頂！」
係囉！街舖黎架嘛！即係任影唔嬲啦！頂！
「頂！阿靚女，早知你就琴晚黎影定相先，噉今日我地就可以出黎扮影相行街啦！」
行到出黎太子已經熱到個人溶左一半得番對腳，之後仲要行番去大角咀，
「頂唔順，匿入商場涼下冷氣先啦！」
晒壞左身子中左暑又要請假，影響公司運作，唔係太好嘛！為左個人及公司健康，我地呢個決定係絕對正確！（．．．）阿靚女前排行開呢度又見到有野買，噉而家出到黎冇理由唔順便買埋佢啦！擺到明係奉旨shopping ！如果係我自己一個人黎的話，肯定兜埋89268先回程！行完太子先行左半個零鐘，
「仲有大把時間！」
之後行番去大角咀大酒店果頭去第二站（唔知邊度係大酒店？千祈唔好過黎大角咀喇），去到個人已經溶到去膝頭哥。過黎呢邊因為ｄ地攤有ｄ好野執可以用黎搞設計，但其實會行咁遠水路黎，主要係因為太子加公司果頭都冇咩好食，最好食果ｄ都係晒大角咀，所以採購為名，掃街為實，兩個人一面飲一面食一面行街邊檔睇野買野飲飲食食係噉跌錢（當然係我跌啦會計靚女擺到明要我包起佢架！），行左兩條街唔夠已經食到死。過到黎當然係立即仆去好鍾意果檔魚蛋檔，上一次黎已經係大半年前新年果陣，果次買左廿蚊一袋魚蛋再由大角咀兜路行去旺角九個字都食唔晒，又多又好味，立即愛上呢檔野，但始終唔係經開果頭，直到大半年後的今日，終於順路喇！立即再黎掃番一袋！
「我要魚蛋！我要矮瓜！我要豆腐！我要腸仔！每樣執ｄ俾我！」
呢個唔係我。靚女一行埋去間舖，我都未開聲，佢已經出手，梗係啦！食幾多都係我俾唔係佢俾嘛！所以魚蛋檔老闆好開心，好大單生意喎！點知，太過開心，一個唔覺意，跌左條腸仔落地。個老細又勁喎，執番起，又掟落去炸過！
「阿師傅，你都幾唔衛生喎！」
「冇乜野丫！我個地板好乾淨架！噉樣炸兩次，冇問題既！」
「嘩，噉都得？我食到屙聽日返唔到工，係咪入你數先！」
「．．．噉你想點丫？」
「想點？．．．咁污糟，就計平ｄ啦！」
「．．．廿蚊啦！Ｘ！！！」
就係噉，一唔覺意就呃左成大半袋返黎，正！好在我不嬲慣左粗食拿渣唔怕，而且噉炸法乜菌乜毒都死啦！照食可也！
「嘩！咁污糟！噉你都食！」
「好明顯你冇經歷過真的香港小朋友童年歲月！街邊檔同大排檔，由細到大都係噉食法架啦！呢ｄ叫風味！」
邊行邊食非常開心，但，好熱！食完魚蛋成個人已經溶淨隻腳趾，再噉落去，我地兩個會變成一攤水，之後入膠袋再掟入公司門口搞掂，為左條命，唔得，要再衝入商場避避。一入到去，
「冷氣呀！」
攤水立即凝固番變番人型，噉一場黎到，又淨係行得果個零鐘，邊夠喉丫！入到商場立即發癲，去七十一買杯雪糕，走過七仔隔籬間漫畫舖摷漫畫睇，摷到之後再去漫畫舖隔籬間傢俬舖撻係梳化上面睇／訓係床上面睇，睇夠歎夠就去傢俬舖隔籬間百佳買多一大袋雪條返公司＆兩支甜筒一人一支行住食。一出商場門口，立即由天堂跌番落地獄。
「熱到死！如果第時政府真係搞到商場冷氣得二十五度，死都似！仲邊有人行商場？」
飲飽食醉之後，兩個人依依不捨地返公司．．．等打卡。噉樣出一出去「出差」就行／玩左個半鐘（雖然實際上半個鐘都搞得掂晒返得公司，可想而知呢兩條友幾咁肆無忌憚），同埋使左差唔多成舊水，梗係啦，阿靚女一路要飲要食（我承認，有好多係我食既），兩個鐘跌一舊水，差唔多啦。平日唔計買碟同禮拜六日出街篤下魚蛋打下機，同有時夜晚開舖有人上黎食飯，我絕對唔會豪成噉，早餐差唔多日日都有人請我都好耐未試過自己俾錢食早餐（就係唔知點解咁乞人憎的劉Sir咁受歡迎吹咩），公司又包晏晝飯，夜晚冇人上黎的話返屋企食，基本上一日三餐都可以慳番晒每日淨係要俾搭車錢，夠cheap的話直頭可以返工放工都行路車都唔搭忝，星期日屋企行四五個字出皆旺開舖都係噉啦，皆旺行多兩三個字返大角咀公司又有幾麻煩辛苦仲可以聽到一隻碟忝。真係夠cheap的話，禮拜一至五一蚊都唔使使（禮拜六日就點都要同107＆各位契弟癲下既，人不瘋狂枉少年），呢兩個鐘已經有差唔多平時一個禮拜之使費咁多了。接近不吃煙火錢都唔多使的我一路以黎儲到唔少錢，唔係因為賺得多（畢左業兩年，我仍然係全屆畢業生二百五十人中月入最低之一），而係因為使得少。同埋單身。相信只有到有拖拍果時我先至會／要使錢。所以同我拍拖可能會好開心，錢方面絕對唔係問題，同實會玩到癲，因為慳家的我分分鐘慳到自己果份都唔使俾埋妳使！有興趣女士不妨預約面試／相睇。

今晚開舖第一件事，係一個巴黎朋友上黎貼告示。佢係巴黎讀書，返香港住一年，之後搵到個澳洲仔兩個都係玩結他、都係讀sound engineering，返到黎香港諗住搵人夾band，玩experimental extreme metal，搵bass、鼓和其他任何樂器，有興趣請打92730576搵阿Yau －雖然係巴黎返黎，但華人黎識講中文，係唔識睇同寫遮。
第二個係個阿叔，剛剛去完HMV上黎，去HMV買乜？
「IRON MAIDEN隻新碟隻黑膠特別版雙picture disc囉！《生死攸關》喎！」
之後吹水，好多水吹，睇到個阿叔年齡同買ｄ野，都知道大家都係傾老餅野多。好鍾意同阿叔輩吹水，因為大家都係'60/'70/'80，同真係傾到呢種音樂呢隊band點樣，直接搵阿叔吹水，係好玩過上forum好多，因為唔係只係得「好」同「唔好」，但點好同點唔好，完全講唔出。
第三樣，係MY DYING BRIDE隻新DVD。睇左一次，絕對無敵，佢地十幾年，出咁多碟變過幾次樣都仲係keep得住，黎緊又有新碟，實在太強，而我真係冇乜邊隻碟唔鍾意，包括人人都小果隻"34.788"，其實呢隻碟我幾鍾意忝，要我揀，甚至會揀"34.788"都唔揀"Like Gods of the Sun"。特別鍾意個歌佬，我覺得MDB歌佬係doom metal中之地位，等同於OPETH歌佬於death metal中之地位，甚至可以話呢兩隊band於所屬領域中之地位係對等，亦即係殿堂級、經典級，同呢種音樂之中唔可以同冇可能唔聽之一隊，即使你係唔鍾意都係，因其地位同影響都應該欣賞、研究一下。有ｄ人話，MDB太多人聽，pop晒，好pop，如果你係屬於呢一類，提提你，好多doom metal朋友聽開的「唔pop band」，都係聽MDB呢隊pop band甚至視佢地為最佳doom metal band。多人聽、「pop」係咪就係唔好聽？少人聽、「唔pop」係咪就一定好聽？（哈，諗番起前HKB單野忝）

到左九月，開學喇。好多暑假時日日晚晚蒲頭人士不復見。所以今晚食肉醬意。今日lunch餐牌主菜係芝士焗肉醬闊條麵，完全唔需要出聲各位同事已經夾埋捐左成盒俾我，加埋我自己果盒即係有兩盒，仲有其他薯餅＆乜乜物物小食，lunch食左半盒加其他立雜野食，晏晝出左去掃街淨番果半盒都食唔落，今晚就唔使煩食乜清埋呢半盒就得。食完意粉睇完MY DYING BRIDE冇晒人冇乜野做，又落去打機。當然係打Time Crisis，三代遮，玩完三代四代已經冇乜興趣玩，因為三代似乎好玩過四代好多。點好玩法？等我煲爆埋佢。今日玩下幾舖，已經可以一舖去到最後一關，但係要好似二代時隨便玩玩都可以一槍都唔中perfect爆機似乎冇乜可能，甚至要keep到每次玩都一舖到最後一關都好難，因為煲落去就發現呢隻冇想像中咁易，非常難玩，甚至難玩過四代。抵煲。舖機癮又開始出現了。

6/9/2006 WED

「今天回到十分悠閒的日子。坐著發呆整天，吃了兩個盒飯和很多小食，便下班了。」

講完。見字時食緊琴日食淨果個肉醬闊條麵。係呀你見到我琴日有食晒兩盒咩？而家每日叫lunch食係食同事ｄ捐獻同進貢，自己個飯盒其實係叫定第二日lunch食。

又係星期三晚。本來今晚有band夾，結果冇，玩乜好？又去打機。仍然係苦戰Time Crisis 3。唔經唔覺，Time Crisis已經去到第四代過左成十年，亦係十年黎唯一一隻識玩之槍game，因為有得避，槍game對我黎講瞄準同反應都唔係好難，最難係個個敵人開槍都一定會打中你，但佢地開槍冇得閃屈你硬食，所以Time Crisis有得避立即覺得易玩。第一代初初出果時，完全唔識玩，一來唔似而家人地射你時會提你避，二來個系統同之後三代唔同，其實得呢一集先真正有「時間危機」feel，第二代開始每過一個細關固定有四十秒俾你玩，但第一代係俾一個限定時間你去過全關，每過一個checkpoint補少少，殺某ｄ敵人又送幾秒，噉先真正係限時難玩過而家好多，亦可以話之後第二集起為左遊戲性失去左"time crisis"果份意義。當年街機出果時係完全唔識玩第一關都過唔到，唔係唔夠抽，係根本唔夠時間，到PS1版出左時係屋企慢慢煲先煲得爆。第二代開始直到而家個系統都冇變過，由單打變成雙打已經夠易玩，支槍由六發變成九發再易玩ｄ，ｄ敵人射你時會射中你的話會提你避更加易玩，同埋好似前面講過噉，無論你玩得點慢都好，總之殺晒畫面所有敵人，到下一個畫面都實會俾足四十秒你，已經由第一集趕時間玩法變番似隻普通見人殺人槍game，亦因為係新系統第一集，整體唔會set到太難玩，所以玩到後來已經乜都記晒知道晒拎起支槍已經好自然地perfect爆機。第三集出果時，已經係冇蒲機舖之時代，到而家落番機舖已經出到第四代，睇人玩就好容易，玩落就知道其實幾難玩下，唔係多人或者ｄ位太陰，而係機舖將隻game難度set得太高，人地ｄ彈差唔多係快到避唔到。起初覺得四代好難玩。點知跟住煲番三代，比較之下，原來四代係易玩左。第三代起又唔同第二代唔多同（亦即係第一同第二代兩隻都係自己一個玩法同成個系列唔同），基本上第三同第四代個系統係一樣，都係雙打同有四種槍用，起初玩第一版時ｄ位易估ｄ人易射覺得今集確係唔難玩，但一去到第二版就大劑基本上後半版已經講晒你聽呢一集點解難玩：有好多敵人係玩埋身同唔係用槍而係掟野同噴火，亦即係打你時冇提示中左招都唔知同唔知應該幾時避、避幾耐，而且陰濕位多左好多，非常多敵人係一出黎半秒唔使就會打中你避都冇得避，同埋呢隻game除左有ｄ敵人係一定會射得中你，雜卒仔係計% random決定打唔打得中你，呢一集random得勁過二代同四代好多，試過第一版已經俾ｄ魚毛仔做低左，最後一版仲要連頭兩版預設到差唔多命中率0%ｄ卒都會瘋狂射中你，到最後一版根本係老屈。同埋呢一集由頭到尾都係自己solo，唔似得第四代出聲提你邊度有人出黎射你，同係噉塞機槍子彈俾你叫你"use the machine gun"點啡都實夠子彈，呢集邊個位會有人幾時用咩槍真係全靠經驗，但整體上ｄ敵人陰濕過同勁過四代，仲要係勁幾多下。玩玩下玩到谷鬼氣，唔理咁多係噉con機con爆佢（當年之機癮返來了），頭三蚊玩到第三版都好，淨係最後一版都可以con成四次，太搵笨了。但四集黎講，第二集就固然好玩啦真係單手單眼都爆到機喎，三同四兩隻似乎三代好玩ｄ，四代夠靚同有得玩搭直昇機，但係三代整體設計好好多，最後一關有排係火場入面百九幾人圍住你射，根本個場完全睇唔到邊度有人，設計得好好，個舖排簡直一流，又即係呢度都起碼屈你con一次。玩耐左而家寧願玩三代，難玩ｄ同冇提示即係襟煲得多，最重要就係冇乜人爭嘛，呢一樣先係重點。所以黎緊似乎會經常地落機舖。
「拿！107＆有關閒雜人等！星期六晚再落新之城呀下！」
都好耐未試過打咁大段野。好似次次同打機有關都打好好多，反而而家同音樂＆metal有關越黎越少、越黎越短。前排開始寫番多ｄ碟評之後，跟住停左一停，就停到而家都冇掂過。似乎場騷前都係收收皮先。

7/9/2006 THU

今日，都係冇野做，甚至係更加冇野做。最正就係老細都配合，今日全日連落幾次街，間公司長時間冇皇管。我又要冇email收到喎！（呢條友完全唔知係咩人返工唔知返黎做乜）所以今日主要係做三樣野。第一當然係聽歌仔啦。因為METHOD，近排聽番多ｄthrash、neo thrash同metalcore，隻METHOD差唔多寫到出黎，亦會係短期內唯一新review。聽完，當然係食。是日食左兩盒咖哩柳蛋飯加多個咖哩雞扒＆一個特餐仲要ｄ麵包雪條雜食野。食飽，梗係要訓。今日超級支力，實在得閒，係噉走黎走去試勻幾位同事個位睇下邊度最好訓。發現原來我個位，係全公司其中一個最唔好訓位置。所以臨放工前最後三個字，匿入倉仔訓到打卡。近排實在係得閒得唔正常。得閒到，我都唔知有乜好做／寫。

永遠的'80＆初'90。
「係度寫咁多做咩丫，上黎皆旺食住大家食吹水好過啦。」

冇喇。近排近於Time Crisis，疏於寫文。

8/9/2006 FRI

老細（真係老細果個）：「近排唔知點解咁邪！屋企部電腦死左，公司又死多三部機，上網條線又壞左，去廁所又跌左部電話落屎坑，個人都病埋，呢兩日公司仲幾個同事都肚屙！發生左咩事？」
老細（當左自己先係老細果個）：「哦！老細！原來係你！原來就係你邪到我屋企部電腦都死埋！唔理呀你賠番部新電腦俾我呀！」

今日好得閒，甚至比已經好得閒的琴日更得閒。老細部機死左，走左去我後面個位部機做野，即係成日都俾佢睇住晒我做乜。相當尷尬同唔知做乜好。雖然佢坐正係我後面望到實一實，我一樣可以無聊做自己野寫下野，仲令到老細覺得「嗯呢條友都幾勤力喎」。有絕招架碼我地呢ｄ偷開懶的賤人。
「咁勁？咩絕招？」
「講到明絕招，梗係唔教你啦！」

今日lunch個餐牌好唔得，當自己只係叫薯餅當lunch，已經知道係冇啖好食到搵ｄ女同事納貢都廢事，早ｄ食完訓覺，因為要抖足精神。出街玩嘛！（抖足精神做野咩唔通，傻架）今日又有任務，要落公司樓下個公園影相影景做廣告，點解揀呢個公園仔取景都得我唔知，我只知道，今日老細係我後面搞到我非常尷尬，尷尬在，我實在冇野做，都唔知點樣「充實」自己俾佢睇（．．．），所以不宜留係office，有得走即走！其實個公園就係樓下，搭電梯落去影完再上番黎都唔使兩個字，不過老闆娘見到又係我地兩個－冇錯就係前幾日借去太子影相為名行＆食通大角咀果兩個－都知道俾得呢兩隻落到去，實冇好野。
「哼！廢事又要我頂心頂肺！我俾夠成個鐘你兩個落去影相！」
就係噉，一個字已經做好晒公事的兩個，開始餘下十一個字的行街遊玩之旅。多左部相機係手，可以周圍凶人，非常好玩。有條友落街放狗，隻狗屙完想唔執，兩條友見到立即（扮）影佢相，條友立即好無奈地幫隻狗執屎。之後經過間茶餐廳，見到頭先上公司收左文件條速遞仔居然坐正係度嘆下午茶睇《武神》，
「係度吞pop！立即影低罪證email去你公司！你死喇你！」
周圍行睇完玩完，最重要當然係去買野食。公司果頭冇咩好食，又懶行番去篤魚蛋果度咁遠，靚女前幾日同我一齊掃街見識到劉Sir「跌左落地都放得入口」的拿渣野，為健康起見，都係去超市買安全ｄ。有ｄ後悔，因為一入到去靚女即刻
「衝呀！掃呀！」
呢樣好食，掃！果樣減價，掃！係噉掃掃掃掃到架車都唔夠位放，仲要掃多兩盒腸粉加一大樽麥皮，
「買定下個禮拜做早餐丫嘛！」
噉又跌一舊。返到公司好辛苦先將所有野食收好（多到我張檯ｄ櫃桶都幾乎冇位放），之後又有得玩。今次係上大廈頂樓間布舖執布碎。同樣地，點解要執執黎做乜我都唔知，我只知道，有得出街玩我實仆到去。
「靚女！你想要ｄ咩呀？」
「我想要少少布辦，得唔得呀？」
「得！隨便拎啦！」
靚女永遠係著數ｄ，就好似厚面皮拎拎下拎左成疋布咁滯，走果時個老細仍然係笑笑口哈哈哈講拜拜。
「喂，其實我地使唔使要咁多布呀？要黎做乜架？」
「超！係我自己拎黎做衫咋嘛！你估我真係幫公司拎架？」
有不正常的公司，就有不正常的員工。

出完街玩完返到公司，真正有野做，終於唔使扮做野俾坐後面的老細睇。做到最後半個鐘，搞掂，食碗麵，入到pantry發現冇麵食，唯有食個包。最後呢半個鐘，「眼訓到嘔」的經理亦入埋黎，我搽麵包，佢睇我搽麵包，我食麵包，佢飲茶，大家係度等放工。每一日無論幾忙都好，我一定會用一個鐘時間頹一頹，朝早半個鐘食早餐，晏晝半個鐘食下午茶。通常頹頹下食食下，唔覺唔覺就過左半個鐘，同時亦會越黎越多人入黎一齊頹／食／等放工，例如經理同會計靚女。
知唔知花生醬點樣食最好食？唔係搽麵包食，係用隻湯匙畢一大匙隊入口食。

今夜都是吹水夜。可能過左暑假完左旅遊季節，少左ｄ鬼，多番ｄ人。今晚有位仁兄好好玩，
「做盛行？」
「我做lab架！」
「邊間？」
「ｄ細lab仔遮！」
「接咩單做？」
「玩具。我公司包晒Kinder出奇蛋玩具ｄ化驗project黎做。」
「嘩！咁咪好開心？」
「一ｄ都唔開心！我淨係做玩具，都冇朱古力，又唔新奇刺激好玩，得一個願望又冇驚喜！挑！」（唔明呢句意思的朋友，已經和我們有代溝了）
好鍾意同呢ｄ出左黎做緊野較為老坑的朋友吹水。
「我果時會考得七分，都係讀dip咋嘛。跟住就出左黎做野。」
「噉而家呢？」
「機械工程Master，今年畢業喇！」（原來身邊咁多猛人！我都使唔使攻番個Master of Puppets傍傍身？）
所以點解我選擇脫離教育界。唔太鍾意教書／教小學係其一啦。教育制度太亂太失望係其二啦。教書係賺到錢仲要係賺好多錢，但賺到番黎有福冇命享同埋悶到死，呢種生活完全唔適合我呢種人，唔教書出到黎做份普通文員仔，對我黎講已經好玩好多。我鍾意玩唔同野，所以full time metal係好想亦係理想，但而家噉捱法，都係一種樂趣，起碼你會日日睇到呢條友係公司呃左幾多個飯盒食搽左幾多塊麵包食左佢老闆幾多樽花生醬，如果full time metal的話，呢度段記會有咁多野好睇好笑咩？到時可能係每日段記都係碟評或者訪問，再講下「hardcore香港metal友」，又講下forum的各位專家，就玩完。所以噉樣日頭一份同音樂無關的工作，夜晚就完全投身音樂，兩個世界間走黎走去，有陣時都係一種享受，當然你可以話呢種「享受」應該係一種捱，睇住間舖咁多聽metal冇乜可能會唔理唔聽之經典，都可以平均一日都賣唔到兩三隻碟，點講都唔算係享受，你會覺得執左佢做番個普通寫字樓文員仔仲好過。
到底full time metal好，定係part time metal好？一個弔詭。
睇過一篇訪問，係訪問一隊我幾鍾意之metal band個歌佬。記者問佢，點解佢有機會靠metal維生，但寧願繼續做一份勁辛苦的工廠工，都唔選擇完全用音樂搵飯食？答案係，因為想捱。如果身心一直唔勞動，個人只會越黎越遲鈍消極，同當好多野都係必然，呢個狀態下個人之思想同寫出黎ｄ歌都唔會有果種「味道」，只有捱過、辛苦勞苦噉去收成，先至可以完全理解同投入到果種野，個人同創作先捕捉到果一份感覺。
當你唔當metal只係一首歌、一個潮icon、一個mp3 file果時，呢種音樂可以令到你同幫到你生活上、態度上思考到好多野。

9/9/2006 SAT

返到公司乜都唔理，第一件事係拎琴日超市買果兩包腸粉同果大樽麥皮出黎整早餐。ｄ叮叮腸粉十分唔好味各位千祈唔好買，好在樽麥皮唔錯，廿蚊雞大大樽相信夠我同會計靚女食大半個月，呢個早餐方案夠晒低成本＆（感覺上）夠晒健康。食完早餐，係一個好多野做的星期六朝早。所以今日非常之唔開心。（老細：「威水喎你！冇野做時大大聲有野做就唔happy！我都唔夠你威喎！」）返工時冇乜野，臨到放工立即黃雨，平時大角咀出旺角行路都得，今日都要豪六蚊搭果兩個站巴士出旺角，真係太大雨。唯有走落去新之城避雨。（大家：「挑！扮晒野！我唔信唔落雨你唔落去！」）仍然係Time Crisis 3。苦戰一個星期，而家已經練到一舖去最後一關甚至一格血都唔扣，但要一舖爆機仍然要再練練，因為最後一版實在係太多位老屈。呢隻game實在抵玩，三蚊雞夠玩差唔多半個鐘，非常之消磨時間，同最重要係，係難得而家我落到機舖仲識打＆打得爆之一隻game嘛。其他game，要用手掣玩果ｄ唔使預我，捽碟結他同鼓收晒皮好耐，上次成班傻仔玩到好開心果隻head shot骷髏兵又的確係要一班傻仔噉玩先好玩一個人玩冇癮（「107！幾時落機舖先！」），而House of the Dead，最新果代係好玩，但我呢ｄold-school友都係鍾意第一同第二代，即係仲係用手槍果兩代，而唔係shotgun的三代同輕機的四代。知唔知呢兩代最正係乜、有咩地方之後ｄHouse of the Dead及唔上？就係爆屍。而家出街隻House of the Dead 4，有留意會發現而家ｄ喪屍係唔會碎唔會爆，你點射發，除左個殼爛少少，仍然係一個完整人型。但以前頭兩代最正亦係最出名更加係比各位師長小得最勁果樣野，就係ｄ喪屍係砌出黎，將ｄ手腳頭身一件件噉砌出黎，即係成隻野係好多件細件而唔係一舊大件，而每件細件都可以獨立爆開，好似第一關大佬你係可以將佢ｄ手手腳腳同個身一槍一槍噉逐忽逐忽肉射爆，射到佢成身得番棚骨然後一槍爆頭過關。呢份血腥暴力槍game黎講都算係破天荒，所以當年呢隻game出左之後俾勁多人投訴，如果當年有煲呢隻game（我記得我當年十六歲生日夠稱第一件事就係衝去紅磡E-Zone煲House of the Dead 1，冇錯就係傳說中的紅磡E-Zone），都會知道隻game初到香港時係紅血，但後來差唔多全部機舖都（被迫）轉晒爆綠血或者紫血。以前ｄ喪屍係行得超慢，果時最鍾意玩係走埋黎時慢慢一槍槍射斷晒ｄ手手腳腳同射到個心口開窿，殺剩最後果隻時專登唔射佢等佢行埋黎，隻野右手劈埋黎立即開槍射爆隻右手等佢劈唔到，左手劈過黎射爆埋隻左手，冇晒手得番個頭衝過黎咬果陣再射爆埋個頭搞掂。碎屍爆屍先係House of the Dead樂趣同精髓，所以而家畫面點靚都冇用，你點射最多個身爛少少，但成隻野點都唔會爆野甩野，失去當初House of the Dead個神而只剩個形，太過同市場妥協。所以第二代之後已經冇玩。第二代仲要灰到係煲隻打字版多過槍版忝。如果有機舖有House of the Dead 1，遠遠都走去煲！
死，俾107同Time Crisis 3挑番起舖癮，近黎真係狂迷落機舖。所以，metal方面，收收皮先。

禮拜六，冇乜人都唔緊要，107已經變成禮拜六重點。佢先為大家帶黎一個叫雞的故事。
「今日報紙有單野好搞笑架！講有個鳳姐俾人打！有條麻甩佬上去搵佢，問佢有冇得打個八折，佢唔肯，跟住個客就打佢！呢樣都唔係好笑！之後佢報警，噉成單野係點ｄ報館都知道啦。報紙寫果個鳳姐三十七歲，點知佢原來有link上141（當劉Sir都知係咩黎而你唔知，就代表你相當純情），佢係果度寫自己廿五歲！」
篤爆左之後，107立即上網留言：
「三十七係度扮廿五？打得少忝啦果條友！」
跟住上網又搵到樣超級正野！有條友上網拍賣
「中式棺材，98%新，只訓過兩次，放因為唔岩size」
107覆番佢：
「唔好意思，我訓慣西式！」

冇乜事發生的一天。都係玩同埋玩。107新返批貨果隻斯比頓星，好有興趣，始終對美國野喜好大過日本野，一起成長我與佢的變形金剛更加係到而家都非常鍾意，所以呢個成尺高有成四個變型仲要曉發光又曉發聲再加埋隱藏function 的斯比頓星，真係好吸引。或者有一日，買下買下，TRHK會變到成間玩具舖噉。小婷妹妹去完大陸渡假，拎左勁大袋東莞名牌徐福記酥餅＆者喱返黎俾大家（各位朋友，請自動自覺上黎拎手信）（雖然可能你地未上到黎果袋野已經俾我食晒）（又，加多句俾107：「上次大大聲話去到上海帶番黎果ｄ乜酥物酥，食左半舊已經成包塞晒俾班保險妹，真係好鬼難食！睇人地呢ｄ東莞帶番黎好食過你果ｄ幾多倍！」），夜晚有107係度，又係上海，即係又跌錢，跌足舊幾水忝（下次上黎食飯唔該唔好當乜都係奉旨，有ｄ野請自動自覺，例如俾錢，今晚只有一個人做。劉Sir並唔係大老細。）。然後就準時收舖。亦即係今晚又係好靜的一晚。所以，都係打機算，屋企部電腦死左都未整得番，又悶悶地，落新之城打多舖好過。因為以前二代之經驗同近來勤力左，三代上手得好快，呢一晚玩兩舖，兩舖都可以接近perfect去到最後一關，距離一舖爆機再近一步，但相信起碼要煲多個零禮拜先，而要一格血都唔扣爆機，就再煲多大半個月先啦。亦即係，仲有排玩，亦即係段記會繼續咁短！

10/9/2006 SUN

壞左部電腦，好多野都做唔到，點懶都要今晚臨訓前整番好部機。format過部機同入番ｄsoftware，冇野做期間，開部手提電腦上上網睇睇野。當然唔係上forum，自從部電腦壞左已經幾日冇上過forum，雖然部手提電腦上到網都冇乜意欲上去睇睇，無聊上左Wikipedia，睇番以前好鍾意玩果ｄ街機同電腦game，特別係小學時玩果ｄ電腦game，同其中一隻最cult格鬥game真人快打，絕對係劇本最完美之格鬥game，同拳皇一樣係玩日本神話但好過拳皇Ｎ倍，當一隻格鬥game發展左十幾年到而家都仲可以未完個故事，兼拍到兩套戲同其他外傳game再加漫畫動畫，就知道真係好cult。好多野放低左好耐，而家網上見番，諗番起好多野（呢一代最幸福係有得上網。當有得上網己經可以有90%野不勞而獲時，有幾多人會明白當年我地呢ｄ老餅點樣唔食早餐唔食lunch唔篤魚蛋唔食薯片蝦條唔飲汽水，就係為左儲番幾日甚至幾個禮拜零用錢去買當年$25-$35一本漫畫同十幾蚊一隻floppy一隻game分分鐘幾十蚊之DOS game果種捱法？）。Wikipedia實在係非常偉大之發明，睇番好多野，亦知道番好多當年冇去留意同冇發現之事。可能有一日會整番個童年回憶錄，紀錄番當年直到而家仍然非常懷念之動畫、漫畫同game。果時可能已經係放棄左／「過左」metal甚至音樂之時候。
一睇，就睇到成五六點。
「係喎！唔係要整電腦咩？」

成六點幾先訓，今日起到身已經兩點幾，起程開始又一天的平靜之旅。成個皆旺有暑假咁靜，亦即係今日要再靜過琴日，同暑假最低峰時一樣，九點未夠全層除左保險妹就淨番TRHK。107今日唔見左人，因為要北上，
「去睇睇琴日個鳳姐係三十七定二十五丫嘛！玩到星期二先返架喇我！」
開左學之後好多朋友都唔見人，讀書的讀書做野的做野瘟女的瘟女，冇人黎冇野玩，呢ｄ時候除左睇DVD，就當然係聽下歌仔寫下碟評。呢排對瑞典death興趣好大，前排特登執番AT THE GATES早期ｄ碟研究（雖然個個都係"Slaughter of the Soul"，但呢隻反而係我覺得最普通果隻，對我黎講頭兩隻先係真正melodic death、哥登堡之聲），黎緊可能順便執番ENTOMBED頭兩隻亦係瑞典／歐洲death metal兩隻必備經典（冇錯終於到我執喇：潮完冇人搵變左死貨丫嘛！），加埋一路興趣都好大但只係排緊隊之progressive版SOILWORK SCAR SYMMETRY全線兩隻，跟住收一排皮潛一輪水研究一下瑞典death，然後可能會開始寫番ｄ歐洲／瑞典death重要作品同經典，再慢慢寫到去九幾年初melodic death，之後去九幾年中，然後再寫埋好想寫之捷克death metal，或者加埋波蘭。相信淨係瑞典old-school果part半年內都玩唔晒，真係寫埋哥登堡夠寫到過年。係有心聽同研究一樣野，就應該係會投入到噉嘛。但今日聽同寫果隻，又唔係呢ｄ野，吹脹地你唔會估得到係乜野。係非常過癮非常玩野的「野」。寫好先講係咩黎啦。近排好頹。

Weekly Review:

「Time Crisising＆整電腦中，今個禮拜冇碟評！咪阻住我煲Time Crisis！」

11/9/2006 MON

今日都算係做左咁耐最頹之一日。呢一日有一半時間係匿係pantry渡過。呢幾晚上Wikipedia懷緬當年之紅白機／超任／兒童場／486歲月，晚晚都睇到唔捨得訓，所以今朝起身返到公司個人仍然係
「ＺＺＺＺＺＺＺＺＺＺＺＺＺ」
同時今日亦係接近冇野做的日子（冇錯，我係度做左差唔多成年，都唔知道呢份到底係咩工黎），又眼訓冇乜精神寫野，所以今日係個位坐兩三個字，就鼠去pantry攤一大輪。以下係是日工作時間表。
10:45
朝早開完例會再覆下email，支力，即叫埋會計靚女入pantry整早餐。今朝食左好少遮，只不過食左一個奶醬排包－加煉奶再加花生醬果隻－再叫靚女整多個煉奶麥皮過我。飽。正。
11:15
食飽就訓。訓醒，嘩，原來係度嘆左成半個鐘。會計靚女係度一面做手作仔陪我訓。
發現老細冇黎行必捉人，繼續訓。
11:45
正。噉樣磨下就磨左成個鐘。
「喂！我ｄ手作仔都做完喇喎！我諗住坐多陣就出去做野。你呢？」
「我諗住坐到一點，跟住出去都唔使出就可以食飯。」
13:00
pantry訓下又入倉訓下又去廁所訓下又返個位（扮）做野，遊魂野鬼一輪之後，終於捱到lunch。只係食左一個滑蛋粟米豬扒飯。唔係因為冇野食。係太眼訓，訓醒先再食。
14:15
訓到過晒鐘先醒，開工前（如果有工開的話）去雪櫃摷條雪條食下先，搵到條大腳板，即擦。雖然大腳板呢樣野流傳已久，但可能好多人唔知道，大腳板都有old-school同new-school之分。old-school，就係今日食果隻，係雀巢出；new-school果隻係Wall's出。講食雪糕Dreyers當然係無能敵啦，但平民雪糕之選必定係雀巢，雖然阿波羅都有好多正野好似Monaka，但由細到大最好食果ｄ雪糕都係雀巢出品，因為佢地ｄ雪糕整得好夠味，其他好多公司一係唔好食一係太淡味，例如Wall's。Wall's係一間好抵死的公司，唔知點解佢ｄ雪糕有好多都同其他公司ｄ雪糕一樣，好似雀巢有Magnum，佢又有Magnum，同樣地大腳板又係人有佢有，只不過包裝全部英文字做到鬼佬野款。但食過咁多隻Wall's雪糕同甜筒，ｄ雪糕就係唔好食，唔夠滑唔夠實口感唔好，ｄ味又淡過人，中左幾次招之後都冇再幫襯，除非特價＆減價得好勁啦，否則都唔會買佢地出品ｄ雪糕，就好似呢條大腳板，雀巢果隻真係好食過Wall's果隻Ｎ倍，絕對絕對以後唔會再幫襯Wall's。成間Wall's，我只鍾意食一款野：雪夾糕。但，一舊仔成六個八，昆九錢。所以我永遠只會等同事買返黎黐黎食／搶黎食。
繼續魂遊四野，到左
15:15
「夠鐘！下午茶！」
又再走入pantry（「查實，你有冇出過去？」）
「今次又想食咩呀？」
劉Sir御用私人助理兼炊事員會計靚女入黎問。
「櫃入面有咩整咩啦！」
跟住靚女就摷晒櫃桶ｄ野出黎，包括麥皮、華田、煉奶、咖啡、奶茶同奶精。都未落水，淨係落晒ｄ粉隻杯已經接近滿瀉。
「呢杯野叫六神合體！」
16:00
杯六神合體嘆到四點，
「夠鐘！下午茶！」（「又黎？？？」）
平常人一日食一餐lunch，我一日食兩餐lunch。點解今日lunch只食一盒飯咁少？睏嘛。所以拿拿臨食完訓訓覺。今日下午茶食完頭先個開胃頭盤（而家食下午茶都豪到去餐廳食咁威，呢ｄ都唔知咩員工黎），而家先到正餐：鴛鴦飯。將女同事甲個咖哩腿蛋飯同女同事乙個肉醬意二合成一，就成為是日第二餐lunch鴛鴦飯。飽。正。
16:30
食下食下，噉就四點半。食飽飯做乜好？梗係訓覺啦。唔通做野咩！傻架？
17:00
「食左咁多乜都食晒，冇野食喇卦你？」
「咦？你唔記得左上個禮拜同靚女落街玩時掃左成舊水薯片蝦條返黎咩？」
17:45
飽。正。非常美味。差唔多時間去廁所補補妝。
18:05
夠鐘走人。當然搭正走都得啦，但我呢ｄ從來等負責搭正走的靚女走左先，佢走左之後我跟佢尾，噉咪唔使行先死先囉。我地呢ｄ雖然頹，門面工夫絕對唔偷懶架！臨走前，問問老細：
「點解今日我有成半日唔係位匿左入pantry訓覺，你唔黎搵我唔黎周我？點做老細架你？定其實你偷偷地升左我職做老細唔講我知？」

無驚無險又一天，又是開舖的時間。口痕，食麥記（「又食！！！！！」）。入到見到，嘩，頂，又加左價。已經冇一個餐係平過廿蚊，而家冇廿三四蚊落唔到樓，最愛的麥樂雞九件要成十六個幾，收皮算啦！實在昆九錢，我發誓我以後都唔會再幫襯麥記！（「收皮算啦！」）
一面食，一面同皆旺個衛生阿叔吹水。佢係其中一個吹水吹得最開心的朋友，因為佢知道我做緊乜。有ｄ野始終係會諗野同入工作階層勞動過，先會明白同思考得到。

今晚係IRON MAIDEN之夜。好老土果隻。IRON MAIDEN係普通過普通的heavy metal，但普通得黎係聽metal必定要聽必定要識必定要知道之一隊。只係，得意在而家好多「專家」，係唔會識呢ｄ，extreme metal、metalcore、最新果ｄmetal同band可以朗朗上口，但問番heavy metal經典例如IRON MAIDEN同PANTERA，佢地係咩style有乜特點邊隻碟係classic邊首歌係必聽，反而冇晒聲出。就好似話俾人聽識彈結他但識tapping唔識掃chord一樣。追求最型、最新、最潮之時，係咪亦都應該明白番理解番自己追求緊ｄ乜、聽緊ｄ乜？有ｄmetal朋友鍾意話ｄ潮童「著／玩／聽j-rock / punk / hip-hop但唔知乜野係j-rock / punk / hip-hop」，但將j-rock / punk / hip-hop換成metal，遺憾地同樣適合形容好多呢ｄ大大聲的朋友。

收舖之後，繼續Time Crisis。屋企部電腦壞左，除左冇得聽歌之外，已經唔Ｑ理了。
發現唔上forum，係好安寧之一回事。

12/9/2006 TUE

今日九點三返到公司，九點四已經放得工。就係冇野做成噉。所以好辛苦。
「淨番果五百二十分鐘點捱？」
又係周圍搵地方訓的時間。今朝早冇乜野食，冇得匿入pantry借食早餐為名訓覺，阿姐又一早霸左佢主場貨倉，
「今日我都冇野做，又唔使出街，我留係倉訓，你去第二度訓啦！」
所以係噉行黎行去搵位訓。真係好鬼支力，所以行到邊訓到邊，只求搵到個位訓得舒服又唔會俾老細發現。結果係，
「阿姐，你俾我入黎貨倉度同你一齊訓啦！」

唔覺唔覺，又到lunch時間。又係我發號司令的時間。
「咦！今日lunch有卡邦尼芝士汁雞扒飯！好似好正噉喎！有冇人知乜野係卡邦尼芝士？冇？唔緊要！我都唔知！就等我身先士卒試試先！今日仲有個焗芝士火腿雞絲意，正野黎喎！拿！你兩位靚女一人叫一個，之後阿靚女甲你就同靚女乙分一盒，淨番果盒就唔好搞喇留俾我做宵夜啦！見你地近排肥左，唔好食咁多忝呀你地，盒意粉分三份我地一人一份好喇！呀另一個靚女你今日唔好食飯盒喇，叫薯餅食好喇，因為我想食！老闆娘你就食特餐啦，好耐冇食過喇我！」
就係因為噉，呢個月全公司女同事腰圍平均瘦左三寸。所以佢地都好感謝我，不斷地請我食飯／塞晒自己ｄ飯俾我食答謝我。

當全日差唔多真係一件事都唔使做果陣，要冇野做扮有野做地捱到六點鐘閃人都幾辛苦。實在頂唔順，今日準時六點打鐘走人，仲早過會計靚女。早ｄ走上皆旺聽聽歌仔好過。今晚係progressive之夜，全晚都係唔知做乜諗野。
「如果可以揀過，你會揀邊種音樂？」
過左咁多年聽左咁耐metal，有人會「過左」，揀jazz、揀classical、揀pop、揀punk/core、揀電子、揀唔係metal果ｄ，但你俾我揀，我仍然係揀番metal。因為果種「勁」，同埋metal係當今其中一種融合性最高之音樂，你要搵jazz、classical、pop、punk/core、電子，metal入面搵得到，但呢ｄ音樂當中搵唔到果ｄ，metal同樣搵到。可惜局限在「樂隊」之型態，但已經足夠發現同研究到好多野。我到今日都仲未覺得聽得明metal、聽得晒任何一種metal，呢門學問，確係無邊。再俾我揀，我都會選擇metal，但可能會選擇玩為首要，而非聽為首要。
「如果可以揀過，你仲會唔會留係TRHK？」
會。一定會。除左因為音樂，仲因為呢度可以見到好多人、見識到好多野。我仍然會選擇留低。只不過，如果可以，我會選擇用另一個方法開始。唔係犧牲晒而家完全轉晒走商業路線。而係，一定唔會有態度，因為係香港地有態度係冇用，只係負累。有態度，冇人會讚，只會俾人串你懶有態度；冇態度，一樣係俾人串冇態度，但起碼比有態度者更易生存同經營。

收舖之後，當然係繼續Time Crisis。屋企部電腦我已經唔鬼理了。

13/9/2006 WED

非常高興，因為今日又有得出街玩。成日煩住同事個日本客今日又再黎，
"Arm arm lok gay, yi ga hai chau din, gor boon chung hau chuk yin!"
話係生意人，但條日本仔似渡假多，每一次都係冇野做心血來潮即買張機票飛四個鐘機黎香港，落機到酒店放低ｄ野立即急call同事即刻出去見佢，有錢佬就係咁豪。所以我鍾意！全靠佢打救，我先可以黐住我同事出尖咀玩！雖然一點先夠鐘見佢，但十二點未夠已經閃出門口，
「大雨嘛！」
冇錯，咁大雨，預鬆ｄ時間好ｄ！唔係噉，點可以出到尖咀仲有半個幾鐘掃街！反正大把時間剩，可以企定定係檔魚蛋檔度篤番兩串先，如果唔係跟住要見客，我肯定趙埋好耐冇食過之臭豆腐！（死，真係好耐冇食過！講起都想食！）
食一大輪，去到酒店時都仲有時間。呢條日本仔，每次黎香港指定要住五星級酒店，有錢就係有錢。一入到去，就明點解：差唔多個個員工都係靚女，一入門口已經有一個戙係度。
「呢ｄ姐姐，著到成個知客噉，全日得個企字，有人行過笑下，次次問路都係答同一句，都幾姿悠喎，唔知幾錢個月？」
「都成皮幾野個月架！」
所以成日覺得做女人好幸福，容易過做男人好多，好多公司趨勢都係請女唔請男特別係高級職位，女人絕對易搵工過男人，基本上靚女就一定有工開，加埋英文好更加係無能敵。
「講開英文，有次去麥記勁呀！果次我去麥記，隔籬行收錢果個係個阿嬸，五十幾歲倒啦，撞著個鬼佬，見到我同好多人都陰陰嘴笑『睇你點死！』跟住你知唔知點呀？果個阿嬸居然係用超流利之英語同果個鬼佬溝通，仲要唔係淨係講乜餐有乜食，係真係介紹咁多種野食，呢種野係點點點、『呢個餐好似幾適合你！』佢英文好到連個鬼佬都話"Ah jei, lay ying man gum gang, ng sai joe mc gay la!"」
坐係酒店大堂等多幾個字，條日本仔先至落黎。
"Fi d! Or ho mon! Fi d!"
"Dim guy? Yuk jor ching fu?"
"Ng hai! Hai or lo po!"
每次黎到，都係趕頭趕命，冇計，好多頭住家嘛。超高速地係噉簽文件交貨辦。
"Bite! Dun or yat zheng!"
半個字未夠，又唔見左人，走左去三個字。之後走番黎，
"Fi d! Or ho mon! Fi d!"
"Dim guy? Yau hi lo po!"
"Ng hai! Lo po gau dim jor! Gum chi hai ching fu!"
真係忙，立即拖住一大箱出去截的士，臨走前當然要摸下開門個姐仔隻手仔抽下水先。有錢人的生活確係忙過人。所以我鍾意。唔係因為呢ｄ有錢人生活咁忙碌傾都唔傾做都唔做總之黎到你俾文件佢簽佢埋其他野你之後散band，邊有得借出差為名出黎玩先？

「點算呢，仲有咁多時間！」
呢ｄ時間，當然係食個飯先啦！黎到尖咀，好多野食，但懶浪費時間去摷（ｄ時間梗係留番黎行街啦），所以兩條友同上次出黎探呢條日本仔一樣，求祈美心搞掂算。止次黎美心撞正做美國食品promote，果個飯真係正到仆晒街，今日黎到，美國變左日本，當堂冇癮，又要唔好食喎。好在頭先掃左街。但唔好食冇所謂，重點係快ｄ食完之後去躝街，而家都冇幾可會出尖咀，一場黎到，當然要出HMV睇睇。今次減價確係好多正野，但實在太多碟未聽喇，加埋屋企部電腦壞鬼左冇乜時間同心機聽野，今日出到黎，係好吸引好多野想執（唔止metal，pop同britpop都有大把野執啦），唔敢發癲住，但又見到撞幾次都撞唔到之BULLET FOR MY VALENTINE EP，一場黎到，點都要跌跌錢。始終係old-school野正，所以佢地ｄ野點都會追。
「BULLET FOR MY VALENTINE，TRHK指定metalcore樂隊，你今日聽左未？」
佢地隻碟，已經係所有會聽metalcore之Trinitian人手一隻。

玩夠食夠買夠，係時候返公司。差唔多四點返到，
「咦，好似有樣野未做喎！」
冇錯。仲未訓覺。出左去行成日十分支力又冇訓晏覺，返到黎唔掂，即訓。
「阿姐好眼訓，借你個倉使使！」
「得！我幫你睇水！」
守望相助是好同事應有的美德。

今日放工，乖仔地即返屋企。一來大雨到仆，都廢事出去煲Time Crisis，二來襯今晚得閒，要整整部電腦喇。一面整，一面開部手提電腦。自從部機壞左之後，每晚返到屋企都冇乜掂過metal，雖然部手提電腦上到網，但郁得慢又唔鍾意個keyboard同手指指mouse pad，最慘係手提電腦ｄ聲唔靚同散聽歌都冇乜癮，所以一晚到黑都係Wikipedia。得意在我咁耐以黎都冇乜試過上Wikipedia睇音樂同metalｄ野，反而係係噉睇動畫、漫畫同game緬懷往昔的日子。有點退休生活的感覺。
顧住睇番以前，舊果部機救極都救唔番，整整下都懶搞，似乎可以壽終正寢。係時候換機了。

14/9/2006 THU

今個禮拜真係好正。前兩日冇野做得個坐字，琴日有得出街玩，今日又係正，
「老細唔係度！」
所以今日苦思。有條問題，真係好難諗。
「到底係出街玩開心ｄ？定公司冇皇管開心ｄ？」
好似兩樣都咁開心喎！真係好難諗。諗左成朝都諗唔到。叫靚女沖杯華田俾我飲再成班友匿入pantry吹水然後行黎行去四圍玩玩完坐定定聽下歌上下網寫下野之後，仲係未思考到答案。算，食野。每次老細唔係度，90%機會食叫雞，就好似今日，
「食雞！」
冇錯，噉為之食雞。
「其實，都唔係好多遮。」
食完個雞之後，立即攤低怒訓，訓到黃朝白晏先醒（兩位經理見呢條友訓到死左噉都廢鬼事理喇，因為一早已經睇化左佢當公司冇道），繼續聽歌同吞pop －喂，真係冇野做丫嘛。今個禮拜我係擺到明咩都唔使做齋玩同等放工。終於，老細返到黎。
「你返黎拿？噉我入pantry喇！」
「關我咩事？入去做乜？」
「入去訓囉！你六點叫醒我打卡放工！」

近排個人都部機都支力，早日休息。
近排真係好殘。

15/9/2006 FRI

今日lunch，只係同會計靚女分一個飯盒食，再加多Ｎ塊炸薯餅，噉就一餐。唔多對路。冇錯，食咁少，梗係有事發生啦！今日條日本仔又黎，
"Or hai heung gong! Lai gin or!"
本來話同前日一樣，呢條當全世界所有人都係隨傳隨到的日本仔要一點鐘酒店見我地－亦即係要我地特登飛出去酒店俾佢見。我最鍾意隨傳隨到！全靠呢條日本仔先可以成日出街玩唔使留係公司悶死！問題出現：
「喂！係出街的話，點解仲要留係公司黐人飯食？」
咪就係！本來話一點，即係十二點就可以鼠出去，點知後來一點鐘變左四點鐘，非常唔開心。知唔知我開頭真係計劃
「出得黎五星級大酒店，有乜理由唔食埋呢度個自助餐？」
非常認真地計劃，係認真到問埋老細請左個鐘假黎呢度食自助餐！點知去到晏晝先出去，自助餐冇行啦！為免蝕底，lunch唔食咁多留番個肚，三點鐘出發去尖咀掃街！今次唔理，點都要食盡佢，陣間見客都照殺臭豆腐狂趙！金馬倫道中間十字路口檔臭豆腐真係正到仆！下次出黎尖咀一定再怒掃！
"Wai! Yat boon jai! Gay si joy lie heung gong gil or chuk lie?
掃完街再搵個地方坐定定食野，食埋舊超正臭豆腐之後，都仲有三個字。姿姿悠悠打個電話俾條日本仔：
"We are on the way! Lay hai bin?"
"Or dou on the way too! Busy!"
"Gau chor! Yau gil or day say dim lie! Gi gay yau chi dou!"
之後行入酒店，見到條正在on the way的日本仔，原來係度溝緊女。果真busy。既然佢咁忙，我地都無謂阻住佢啦，所以繼續食，食大酒店．．．隔籬間士多。等極條日本仔都未搞掂，唔鬼理，走左去算－我一個人遮。玩多一輪之後，返到去見到條日本仔終於溝完女同同事傾緊，而我，當然係由佢自生自滅自己再出去玩多個圈。直到佢同條日本仔搞掂為止。
「你居然唔黎幫拖留番我一個對住條日本仔由我死？」
「噉頭先出左去食臭豆腐，口氣大左ｄ，嚇親個日本仔就唔係咁好啦！」
三個字都唔使就搞掂晒，HMV前日先行完，雖然仲有TOOL新碟＋QUEENSRYCHE新碟$190特價組合想執（喂TOOL隻新碟淨係為個包裝都已經要買啦），LAMB OF GOD新碟又未執（LAMB OF GOD我只係鍾意未改名之第一隻同Devin Townsend監製果隻"As the Palace Burns"，新果隻因為變左melodic death所以有興趣試試），但實在太多碟等緊我唔敢亂郁（瑞典呀瑞典～），加埋今日好懶，所以傾完之後坐係度坐飽先走。五星級大酒店就係五星級大酒店，裝修寧舍豪華連張凳都舒服過人，坐左係度就唔願走。差唔多個個人入親酒店，都得到各位bellboy＆靚女親切歡迎，唯獨是我地兩個入到黎，完全冇人打招呼冇人服侍望一眼都冇，冇計，一來唔係鬼，二來冇俾錢，三來，個款太頹嘛。
「睇呢條友個款，成條速遞仔噉，梗係搵廁所行錯路入左黎啦！」

坐足幾個字先好唔情願地起身，飛地鐵出太子行番公司，中途當然要掃下貨。雖然已經入秋，我地呢ｄ雪糕雪條照食，又有同事sponsor就黎呢度掃，即係要我貼就一定架喇，但同事之間就無謂計咁多。呢排我研究過，一大pack果ｄ雪條i.e.十支裝，通常係唔夠單支裝好食。就好似珍珠奶茶，雖然個名有珍珠兩個字，但每次買大包裝返黎，一條珍珠奶茶雪條都唔知有冇五粒珍珠，我試過食晒成條一粒珍珠都冇，珍珠奶茶得番個奶茶，超搵笨。之後再買支一支裝食，頂，大半條都係珍珠！一條單支裝ｄ珍珠已經多過晒一包大包裝咁多條夾埋。所以我到而家都唔多鍾意食大包裝ｄ雪條，因為全部用少ｄ料又開稀晒黎整，偷工減料，搵笨。最灰就係搵極都搵唔到雪夾糕。另外特別買多一盒Tronky朱古力，長條形橙色包裝餅乾夾榛子醬，由小一二食到而家都係食呢隻。老實講，呢隻朱古力唔係好好味，仲幾貴下差唔多$2.5一條－當然，同Kinder比仲有段距離，但Kinder絕對係其中一隻最正朱古力，冇得比。但而家好少食，耐唔耐心血來潮先買黎食下，純粹因為實在唔係好抵，而唔係因為唔好味，唔好味我都係噉食，唔係一定要100%、10/10、classic先係好。自己鍾意就係最好。所以我絕對相信好多人唔會鍾意食呢隻朱古力。（自從部電腦壞左，生活習慣改變左好多，舖頭以外冇乜諗過音樂，返返以前而唔理而家）
五點半返到公司。老細愕然。
「搞錯呀你！」
「？？？我做錯ｄ乜？？？」
「你唔係話五點十一返黎打卡咩？做乜咁早返到？」
「係喎老細！噉我落去打舖Time Crisis先！你五點十call番我上黎啦！你幫我打埋卡就當然最好啦！」

逢星期五晚都非常開心，因為107係度，平日夜晚靜，有佢係度玩，點靜都玩到喪，未收舖已經玩到癲晒，收完舖三條友（冇錯又係果三條超齡傻仔）落埋機舖，仲癲。本來今晚都唔想落機舖。有親佢每次落到黎都係玩埋晒ｄ無聊game，今日連好多廣東＆國語pop歌果部台灣捽碟機都玩埋，夠晒無聊。本來想玩果隻Headshot骷髏兵（我淨係識噉叫佢，到而家都唔知呢隻game其實叫咩名），但有個靚妹超勁左手槍兼差唔多100%命中率槍槍中，睇左一陣我地兩條友都係收皮算，廢事我地上場時比條靚妹笑九
「咁屎呀！白痴仔！」（無論自己玩得勁定cheap定識唔識玩見到人地玩得唔勁or撻Ｑ都會笑九人係香港機舖特色之一）
然後走去玩House of the Dead 4，我到而家都未識玩。唔緊要，107都係，所以我地玩果時，都不知幾多人圍觀，亦帶俾佢地不知多少歡樂。而今晚重點，當然係OutRun。從來唔識玩賽車game，通常係玩小心車，但玩玩下很悶，跟住就玩炒車。所以比107怒炒。但呢隻game實在好玩，兩條友冇晒錢再唱狂煲呢隻玩到十二點幾先走，正！
「阿Rock你下次唔好咁早走呀下三條友煲爆埋呢隻先好走呀！」

16/9/2006 SAT

本來琴晚都唔想落機舖。因為，賣飛喇。

韓國tharsh metal樂團METHOD香港演唱會
門票已正式開始發售！
隨票附送sampler一隻，票尾可作TRHK $20購物券使用！

今日收舖準時走人，去躝街！特別行到去好景果邊間戲院樓上間新機舖睇睇。聽聞好勁，大得黎仲要一開就開兩層，點都要過黎睇下啦（死，而家對音樂同metal都冇咁踴躍）。大係算幾大又真係有兩層，問題係，冇乜野好玩，成間野唯一好玩係Time Crisis 4，其他．．．算啦。所以黎到都淨係玩下四代，三代煲到郁下就爆，但四代唔係太識玩要慢慢操番，少人成噉，第時如果想玩高達、Time Crisis 4同結他＆鼓機，走過黎就得。好有興趣玩隻哥普拉槍game，因為同Time Crisis一樣，有得避，同埋ｄ畫真係靚到仆，係令我有動機再黎之原因。但短期內都係長蒲新之城算。當有一日Time Crisis 3可以再復當年二代之勇拎起手已經一格血爆機，就會轉蒲呢度。
打完機就掃街。有我最愛的煙肉腸仔＆臭豆腐。唔知點解，食過咁多間旺角臭豆腐，自從以前好景條街中間最正果間即係成隻蟹放正係門口果間執左之後（呢間完全係正到仆街），行勻旺角咁多間，冇一間好食，尤其是琴日出左尖咀金馬倫果間食過一次，旺角果ｄ臭豆腐直頭係食之無味，唔知點解旺角好多檔ｄ臭豆腐都係入面好酸，唔落勁多甜醬搶味的話都幾難食，都唔知係佢地吽得太耐，定係全旺角咁多間ｄ臭豆腐都係同一個貨源？所以今日掃街掃得好灰。好期待個日本仔再call我出去尖咀。

METHOD Live今日開始賣飛。張飛我都係今日先第一次見。
「使唔使印到咁靚呀？」
張飛係METHOD設計，所以做飛方面都落本左－話「落本左」遮，當你見到場騷張海報（講開又講，同張飛一樣都係METHOD設計），都知TRHKｄ騷從來唔落本，因為根本冇本可落：邊度有錢？上幾次ｄ騷搞ｄ飛真係搞到想死：A4畫完之後拎去影印，然後用cutter cut仲要再吸印同打號數，對於全間野只得兩條友的TRHK，係會做到仆街的，所以今次METHOD設計張飛再落番少少本印，減輕左負擔，唔係真係工都唔使返日日淨係係度界紙都得吸印。但我仍然忠於之前幾次ｄ超求祈影印錢飛果種underground feel，有買飛的不妨留意一下，上面寫左一句：
"Metal for Struggling Life"
非常有意思。將"metal"同"struggling"代入唔同詞式，可以有好多個唔同但近義之演譯。不妨思考一下。除此之外，METHOD同佢地間label另有一句：
"Support True Metal Frontier"
呢樣先係最難做到，真係要支持，心比錢更重要，Metal從來係實而不華、要辛苦要捱苦之音樂。所以你見TRHK搞metal、搞metal show好少會高調浮誇。（當然，冇錢高調浮誇係主因之一啦）

「今日正呀！好生意呀！做完今日已經夠交租喇！」
107非常合皮。因為皆旺終於再現當年萬人空塞爆晒成條走廊行都行唔到之光景喇！亦即係，塞死晒，冇人埋到黎，搞到本來已經少生意的108再加冇生意！好野！今日開舖後冇耐有個阿叔撞上黎，同好多阿叔輩一樣，入到黎第一件事，係走去睇果個DEEP PURPLE 6CD live boxset（包埋香港live架）。
「我聽metal聽左好耐架喇！最起初聽DEEP PURPLE開始，而家都仲有聽！以前DEEP PURPLE同ROLLIN' STONES呢ｄ係反叛派，而家變晒做貴族！唔同晒喇。我想上黎呢度好耐架喇！不過次次黎到晏晝都未開，今日約左一呢頭早左出黎，好彩撞到你開門！」
跟住就傾左陣。一見如故。同好多阿叔輩都好好傾同一見如故，都係果樣野：有ｄ野，始終係捱過辛苦過先會明（於此click一下mouse乜都有的年代，仍然講呢ｄold-school道理已經不合時宜到俾人笑俾人串了）。之後有一隻愛爾蘭鬼上左黎，又係吹水。愛爾蘭metal又係其中一種好特別同應該研究之metal，因為好folk但folk得黎又唔同挪威、芬蘭呢ｄ國家，推介左CRIPPLE MR ONION，呢度係CMO@MySpace，唔係folk野，但係係我十分鍾意果種alternative/industrial metal。所以又係好鍾意同鬼吹水，有好多野真係只可以同鬼溝通到。之後仲有個似周杰倫fans的大陸妹妹上左黎－冇錯係妹妹，但一開口已經知道佢唔係入錯舖頭，好多band同style都頭頭是道，分別只係講中文，同各位朋友冇cash時係搵恆生or匯豐，佢係搵中銀。單呢個妹妹仔幾句，已經知道香港同其他地方差得仲好遠，起碼呢位妹妹簡單講講之幾句同埋果種態度，已經冇乜見過幾多香港朋友講得出做得到。除左一班阿叔，好似到而家對香港都冇乜正面印象，但呢樣確係，去下其他地方、識多其他地區之朋友，就知道確係天外有天、人外有人。除非你的大志只是土皇帝。
買碟的人仍少（即係，搵band的朋友仍多），但已開始有人出現買飛。cult thrasher BloodKrishna第一間時衝上黎買左001號飛，然後唔理係咩metal總之逢係場騷有metal band包括nu-metal & metalcore就必到之阿Big哥第二時間上黎，係著住DISAVOWED live買果件中碼tee上黎。逢有阿Big的地方，一定會見到兩樣野：啤酒，同佢條靚阿Small。
「阿Big你撈咩架？」
「醫院囉！」
「噉阿Small你又撈咩架？」
「咪一樣係醫院！我係佢同事黎架！」
「噉你地係做乜架？」
「分工合作！阿Big負責整死人！我負責執死屍！」
好Ｑ鍾意對住佢兩隻野，兩件都係硬膠。特別鍾意見到阿Big，佢係我眼中而家香港最metal之其中一個人，唔係聽得多野，同似on9仔居多，但外同內散發果種metal獨有之豪情同氣慨，真係冇乜見過幾多人擁有，包括我。係唔係聽得好多唔係試好多野（Big曰：「頂，封面冇女冇波冇露點歌詞唔鹹濕唔好叫我買！」始終都係淫蟲一條），但好欣賞佢私底下對呢種音樂之支持同付出，呢樣野相信就算知佢係邊個都唔會知佢做過ｄ乜，我亦唔會係度細表；亦特別欣賞佢對metal之尊重。坦白問心，你聽metal，係聽metal之整體，定只係幾種metal，會唔會「唔係邊種metal唔係我聽開果種metal所以我唔會聽唔會去佢地場騷」？又你去睇metal騷，係淨係睇某幾隊band，唔係邊一隊出、唔係你朋友果隊出或者唔係metal band出就走出去吹水煲煙，定係成場騷會由頭睇到落尾？佢係我咁多年黎都冇乜見過幾多、一隻手甚至半隻手已經數得晒係每一場metal騷差唔多係由頭睇到落尾成場睇晒睇到最後一隊band玩完落台先走之人（當然，冇晒啤酒要出去買果ｄ時間另計啦）。所以我一直以黎都好鍾意佢、好欣賞佢、好尊重佢。
又到搞騷的日子。前年，講果樣係好多人寧願買碟都唔睇騷，但過左兩年，發現其實呢樣唔係必然。因為買碟同睇騷都有先後次冽分。次序係明星騷／大騷＞買碟＞地下騷／細騷。
「今次想買咩碟呢？」
「唔買碟啦！買左黃貫中演唱會飛，買左一百蚊！而家冇乜錢！」
「月底仲有場thrash metal show喎！冇乜幾何有thrash metal band黎香港架！都係一百蚊張飛！」
「thrash metal我鍾意架！係咩band？METHOD？韓國band？唔識喎．．．．唔去啦！我俾百二買呢隻碟先！」

因為係好靜的一天，所以今日睇＆聽左好多野。TYPE O NEGATIVE隻DVD又拎出黎睇，佢地點都係我最鍾意(gothic) metal band，原因唔係因為佢地gothic，而係佢地on9，佢地係我見過最笨7最on9、做ｄ野完全「唔gothic」「唔metal」的gothic metal band（冇錯要引號）。跟住焚番近排返放工時熱播之NECROPHAGIST，呢隊band係當今技術最高之一隊death metal，成日話John Petrucci點點點的朋友應該聽聽呢個結他佬睇下發生咩事，佢會俾John Petrucci或者Michael Angelo呢類速彈prog手更易令你放棄彈結他。一面聽，一面覺得好不可思議：好多人要搵death、要搵technical death，但到而家都唔搵呢隊，係好神奇的一回事，所以我篇碟評會特別研究呢個現象。有計劃將NECROPHAGIST寫成第一個完整樂團專題特集，但真係有心機寫（番）野先算，近排忙Time Crisis，或者到一日連Time Crisis 4都煲到一格血爆機時先會諗諗。然後又煲SATYRICON，講過咁多次都係，人人都話DARKTHRONE、MAYHEM，呢兩隊到而家都唔係我挪威black metal至愛，我鍾意係技術之IMMORTAL同pagan/folk之SATYRICON，而鍾意ULVER的朋友又冇理由唔試埋SATYRICON呢隊經典，因為black metal果期之ULVER其實係同SATYRICON好似，但雖然都屬於挪威黑金經典之一，SATYRICON到而家都係接近完全比人忽略，因為冇DARKTHRONE同MAYHEM咁"tr00"，又冇ULVER之唱片公司市場策略支援。最後，呢幾日因為某ｄ原因，係噉煲MALICE IN WONDERLAND。絕對相信冇乜人唔識呢隊band，而要介紹亦都好簡單：H.I.M.果款"gothic rock/metal"（我到今日都唔覺佢地係gothic），仲要係未變pop、仲係好聽果期之H.I.M.。佢地隻碟幾日內聽左三四次，果真夠pop（面對現實吧，power metal & gothic metal從來係非常pop的metal，冇100%都有98%），但好聽。講起H.I.M.，又要講講琴日發生的故事：一位朋友黎搵H.I.M.，而TRHK已經冇賣好耐（人地而家唔知Sony定環球發行、唔止"metal"咁簡單架喇，好多你見到聽到之「metal band」其實已經同真正之metal scene冇乜關係）。
「有冇H.I.M.呀？」
「佢ｄ碟賣晒好耐，如果你係鍾意佢地果種野，不如我試試呢隊MALICE IN WONDERLAND你聽。」
「．．．真係好H.I.M.喎！」
「其實佢地就係玩H.I.M.未變pop之前果種gothic rock，所以如果你係想搵H.I.M.，呢隊你都會鍾意。」
「．．．係幾好聽喎！．．．不過下次先啦！我都係想搵H.I.M.！仲有ｄ咩可以試？」
所以本來諗住試埋絕對比H.I.M.玩得更好之TO/DIE/FOR，最後冇係唔（使）試喇。因為知道根本冇必要試。
亦因為相同原因，加快版SUFFOCATION之INSISION雖然好多人聽完都話正，一樣冇人會買：
「都唔係果隊band。」

難得咁靜，收舖之後搵節目。睇睇有咩戲睇先。想睇好認真地用笑片拍法拍恐怖片的《飛機上有蛇》（齋睇個名已經知道晒套戲係講乜，當可以cheap成噉，都算係cheap到cult了），真係好想睇，因為好鍾意睇ｄ無聊戲，例如"Scary Movie"（107搭嗲曰：「"Scary Movie"就同"Winning Eleven"一樣，將最新果ｄ野group埋就當係新野，出極都有！」），但而家得番晏晝場冇得睇，結果又係新之城，好彩今日落一落黎，因為有得見見House of the Dead 4兩大高手。第一個係見過玩槍game玩到最接近化境之人，背熟晒幾時邊度有咩出黎邊個位有秘密item已經係基本要求，但條友恐怖在手槍準到恐怖，係槍槍都爆頭果隻，絕招係由腰掃到上個頭即死，十幾條喪屍圍到去面前都一招一隻完全冇扣過，每一關唔係拎A grade就係拎S grade，射喪屍準到似電腦demo，就算係旁邊睇都唔覺得係人打。所以完全冇任何野佢係放在眼內，好似人人都話最後兩個大佬最難打，但對佢黎講，最易打反而係呢兩個，特別係最後大佬，佢最勁果招係放一／兩條冰龍轉住圈飛過黎咬你，條友係可以跟住個龍頭轉住黎射槍槍中晒，打最後大佬易過借火一格都唔使扣爆機，未睇過係唔會感受得到果份恐怖。佢唔係高手。佢已經超越左高手之境界。佢係神手。跟住果條友，玩雙槍（107又黎搭嗲：「雙槍雄！」）（知道佢講緊乜的朋友請上107領獎）。唔係非常之高超，同頭先個神手更加係冇得比，但有幾可會見到人玩雙槍？
睇完之後，知道永遠都唔使再玩House of the Dead了，繼續匿係部Time Crisis 3同埋同107 OutRun算。

17/9/2006 SUN

打完機返到屋企，online又見到107。
「喂！頭先我又去左玩OutRun！」
「係？見唔到你？」
「頭先我去左尖咀落吧，落完去果頭打嘛！」
舖頭吹完，網上繼續吹。
「頭先我落酒吧，有個吧妹係上過《美女廚房》果個Kawaii！佢夠高又靚，不過好厚粉化到塊面好鬼白，當堂冇晒幻想。」
兩條友就係噉樣，一面睇住無線夜晚ｄ廣告雜誌同專題電視節目，一面MSN。
「話時話，你而家係咪單身？」
「梗係單身啦！唔係單身，點可以出去玩？」
噉又係，如果條友係有拖拍，都冇乜可能今晚落完吧下星期又返大陸玩。
「我冇拍拖，係拍下散拖噉遮！要溝女，你用一千幾百請下ｄ女食飯，買ｄ野俾佢地，佢地就會跟你架啦，好簡單。朋友，而家呢個世界好現實架，仲有邊個會同你講心呀，呢個世界同你講心既女人只有一個：你老母！」
係好刻薄，但某程度上我好認同，冇十成十，都有十成七係講中晒。當今太多香港女仔的確係好市儈好現實，加埋個永遠超高竇加超寸樣，拜拜。而我只係一個好單純好易呃的傻仔，要搵一個同我一樣咁冇機心咁純品咁簡單咁「超現實」之女仔，確係冇乜可能。
「希望你唔會成三張都仲係處男啦！」
107話。

如果你今日早上黎（早，即係得107一個見到），會見到我拎住成盒野返黎舖頭。係一個pizza hut紙盒。今日我食完呢一餐就夠晒。飽飽。
「頂！琴日先賺到交埋租都仲有剩，今日發生咩事？」
107曰。琴日成個場先好耐未試過地塞到爆晒，今日又變番暑假果時成個商場先得小貓三四隻，
「唔止皆旺冇人，就連上網都冇人！真係無人島物語！」（知道佢講緊乜的朋友請上107領獎）
琴日佢係忙到買左盒飯都冇時間食咁忙，今日調番轉得閒到間舖都唔理走過黎108玩算數，所以今日又係喪玩同埋吹水的日子（「有邊日唔係？」）。條友私人醒左隻YELLOW MONKEY DVD，一隊日本hard rock band，睇呢隻DVD係東京巨蛋演唱會全場爆到仆就知有幾紅，雖然隻DVD已經係兩年前，ｄ歌幾好聽，但個人黎講只係一般。
「其實我有好多呢ｄDVD架，你想要我都俾到你搵到人拎貨，只不過我好少特登去拎，我唔識野唔知咩黎嘛！你都知我識ｄ咩架啦！」（提示：視覺系。鍾意睇妹妹仔的朋友應該上107走一轉，大把驚喜）
跟住有保險妹過黎等廁所時分享有週刊放蛇入去偷拍（係TRHK呢度真係乜奇遇都有），然後連見兩個阿叔。首先係放大假的梁生。
「年中清假丫嘛！而家放大假放到十月，本來諗住過台灣架，但而家果邊倒扁，旅行團都唔敢落車，所以改去北京，過幾日出發架喇！」
梁生一面玩107放係TRHK隻魔蠍史汀公仔一面講。
「一早睇定晒北京邊度有碟喇，搵到有兩間，其中一間睇晒佢地個catalogue，二百幾隻碟入面都有兩隻我想搵。」
要滿足而家的梁生，實在係太艱難，全香港聽最多black metal就係佢，聽black metal已經聽到去化境。你係佢屋企可以搵到一ｄ只得一絲纏綿不斷之聲音、已經超越black metal至ambient之black metal碟，而佢可以拎住不停同你講隻碟點正法。
「屋企而家千幾隻碟（註：千幾隻全部都係black metal），而家放到成地都係碟，襯而家放大假，呢幾日叫左個師傅上屋企整個吊櫃放碟，跟住幾日搬餐死。我舊ｄ碟都未聽晒架！不過又搵左Soni，佢又幫我訂左四十幾隻！」（聽極都聽唔完買完未聽都繼續買係聽metal的宿命）
呢個阿叔實在太過癮，個樣完全係茶餐廳煲住煙睇馬經果種，但永遠係你估唔到的時候爆句精警野出黎，我真係好想知佢係屋企（＆黎緊個禮拜上北京）點同佢女人相處，絕對想像唔到。
「話時話，你個劉Sir個網俾大陸封左呀？」
「封左好耐啦！」
「寫ｄ咩呀你？寫到連大陸都禁！」
「舊膠太硬卦！」
梁生玩完到鍾生（即係又係阿叔），最正係佢望野個方法，睇野要四十五度噉睇（唔明？撞過佢你就明架喇）。每次做佢生意都好開心，因為見到佢買ｄ野，好有共鳴－坦白講，佢掃果ｄ大多數都係大路野（無論聽得點underground，大路野pop野始終係會追番同追埋），但起碼呢ｄ大路野，係好多搵大路野之朋友都唔會搵先。每見有人買CELTIC FROST隻新碟，我就好開心。
所以我好鍾意同阿叔吹水，大家思想同音樂態度一致，仲因為願意接受多好多野，例如自己唔聽開冇聽開果ｄ，同埋唔出名自己唔識果ｄ。最開明果個客，係一個「就係自己唔識未聽過先至試先至買」、由最初黎TRHK前聽heavy metal、power metal到知道呢度之後而家聽到melodic death、brutal death，唔雜唔underground唔聽之老豆。

睇完隻YELLOW MONKEY，再聽晒SATYRICON頭兩隻（雖然過左頭三隻之後個個都小，我覺得最後我都會追番晒佢地全線）。冇乜野做，手痕又拎左本Terrorizer黎睇，而家成疊Terrorizer淨係因為隻sample可以用黎試聽而放係度。揭幾揭，係喎，個Death Metal Special特輯仲未睇，但懶睇，太多字喇（冇錯，我寫親都寫好多字，但係睇親字就懶，真係衰仔），淨係見到一頁係講progressive death metal就詳細望望。Terrorizer算係而家冇乜幾可叫做仲值得睇之metal雜誌（另一本係TRHK賣緊果本BW&BK，你當賣花讚花香好我都係噉話，唔係算呢個metalcore世代仲值得睇之metal雜誌，又點會專登入呢本返黎賣？），呢個Death Metal Special確係非常值得睇淨係睇歷史已經抵晒，但有少少失望。冇錯係講左好多technical death同prog death band，但連progressive death metal咁大個topic，係由頭到尾Willowtip、Earache、Unique Leader、Neurotic呢ｄlabel名甚至佢地ｄband都幾乎冇出現過，差唔多全部都係大band，連TEXTURES都會提，居然都冇NECROPHAGIST。呢樣野係有少少失望。坦白講，Terrorizer呢本野確係越黎越大路（只需要留意一下碟評果度大label大band同細label細band所用之篇幅同評分之差距就已經知道），所以點解到而家都唔多熱衷睇。當初《重型音樂》睇到第七期，已經冇乜動機追落去，亦係相同原因。以前係正在你睇果時，講三隊band有一隊係完全唔知咩黎；而家，基本上寫親ｄband都知道晒講乜咩料，甚至會問番轉頭
「唔係卦，呢ｄband都寫？」
睇metal雜誌唔係望落去睇唔明唔知講緊乜先夠樂趣有意思咩？所以見到內容由NWOSDM變成NWOAHM，係非常非常非常之灰。

今晚，又俾107昆左。每次幫襯親ｄ新外賣都有好多驚喜。全旺角最有時裝觸覺果班，係外賣佬，上次果間係個賣魚佬，今次果間係個勁壯的大隻佬，次次上親黎ｄ外賣佬都好鬼過癮。
「喂！大家食！你好落力ｄ搵ｄ有型外賣佬／外賣阿姐！唔係我第時叫第二間外賣架喇！」
但大家食放心！短期內我仍然會繼續幫襯你地（同埋TRHK御用飯堂新旺），因為仲有一個原因：平夾好食。今次呢間大隻佬個餐肉火腿奄列麵，係我咁大個仔食過最難食之公仔麵，ｄ麵超粉又冇味個火腿奄列勁淡又唔熟，如果我唔係午餐肉超級fans係餐肉就入到口，呢碗野直頭直接倒左佢都得。次次信親107食佢食開果ｄ外賣都冇好結果！
食完麵玩完吹完水，又係排排坐睇美女廚房的時間。而家呢個節目已經cheap到好似獎門人咁cheap了。
「仲睇美女廚房咁out？而家梗係睇冰火廚房啦！」（笑到仆街）

星期日晚，難得107得閒，梗係落新之城打機啦！是晚重點都係OutRun，今次加埋Ant哥三個，每每就係107&108兩條傻仔搏命片車甩尾係噉撞時俾佢魚人得利跑出。今晚仲玩左其實好無聊的太鼓，雖然好多人玩但我由以前睇到今日玩都完全感受唔到，一來部機細聲到根本聽唔到真係靠對眼玩，二來個設計差左ｄ，感覺上你唔係負責打首歌之太鼓部份，而係一首已經寫好晒乜都有之歌夾硬加太鼓果部份俾你玩，亦即係你點樣打打到錯晒都好，都唔多會影響首歌整體，同以前ｄ音樂game好唔同，佢有佢播歌你有你打鼓，係冇癮之處。仲有琴日個House of the Dead 4雙槍雄。琴日手野黎差ｄ，點知今日黎到超癲完全係兩個人噉（可能真係兩個人黎），最後大佬放兩條龍穿兜圈飛埋黎咬果時，左右手每隻手一支槍追住一個龍頭轉住圈射，又係神手所為！
「超！好威咩！挑！」
之後107&108走去玩Time Crisis 4，第一關都唔使就死左。

18/9/2006 MON

今日非常地早起，七點幾就起左身，因為終於的起心肝抬部機出黎整。今朝早一早將部電腦由屋企抬上皆旺，之後係旺角食埋個早餐先施施然行返大角咀，係度做左成年都未試過咁疏乎。其實真係可以噉樣每日由屋企行返公司，特別係遲ｄ回涼果時，土瓜灣行出大角咀實際上唔係好支力，又可以聽到一隻碟。同埋最重要：減下肥嘛。不過起到身先算：
「我而家八點半起身已經想死，你仲要我日日早多一個鐘起身？算Ｑ數啦！」

頭先去食早餐係威係勢，一返到公司就大劑，非常眼訓（所以，算Ｑ數啦！），今日返到公司，食左最少六餐，包括再一餐麥皮早餐、之後入pantry食糖再食薯片再食雪條、跟住食飯、食完飯訓醒又走去食雪條、跟住食多包大包裝蝦片、食左咁多熱氣梗係要食多條雪條降火啦會計靚女順便整多個麥皮我食唔該。除左不斷噉食，仲有不斷噉訓，今日同靚女兩個係周遊列國式地行到邊訓到邊，逢星期一，大家都非常眼訓（well，基本上除左星期日之外日日都眼訓架啦）。唔係做埋晒呢ｄ無聊野，點浪費得到時間？真係好得閒！

晨咁早抬部機上舖頭，因為要等我地御用數碼技工上黎：
「佛爺！」
好耐冇見過，基本上次次係我有野搵佢笨時大家先會見面。
「而家仲係旺電110 Digital？」
「梗係！仲走得去邊？」
「噉而家點返呀？」
「做part-time，淨係返星期一至五十一至七！」
「仲part-time？好似我上年定前年搵你時你已經係part-time緊喇喎！做兩年都仲係part-time？」
「呢ｄ咪叫full-time part-time囉！」
特別推埋架車上黎拎部機去整都算唔話得。之後又係聽野時間。今晚聽番HELLOWEEN隻《七鑰守護者之遺物》。上年出碟果時都已經講過：HELLOWEEN出新碟同DRAGONFORCE出新碟，點睇都係前者大件事過後者，但結果只有人問後者冇人留意前者，就知道年代已經唔同了。power metal雖然一早玩到爛晒，但仍然會買隻新碟支持呢班老餅，俾面在part 1 & part 2 & HELLOWEEN，同埋最重要：隻新碟其實唔錯，有ｄ歌確係唔整好過整，但兩首長歌其實已經殺晒，係佢地未試過咁progressive咁symphonic，"Occasion Avenue"係新一代HELLOWEEN經典金曲。好多人都話HELLOWEEN舊歌佬走左之後就唔好聽，亦即係part 1 & part 2之後已經唔好聽（唔知有幾多人知道，其實part1&2之後，舊歌佬仲有唱多兩隻碟呢），但我反而幾鍾意新歌佬果幾隻碟，由power metal變成好暗之thrash metal，係唔係HELLOWEEN，但新歌路同新歌佬兩樣野係夾得埋，所以近兩隻碟硬係要轉番以前舊歌佬玩法，係有ｄ失望，我鍾意unhappy的happy helloween。

今日上黎果時，皆旺成層係塞滿晒人，由電梯口塞到去舖頭門口係可以塞足半個幾字，多人到曾經考慮過落番去樓下搭電梯上黎，間間玩具舖都生意興隆。幾經辛苦迫到去門口，開門開燈開機開冷氣，唔使三十秒行番出去，出面全部人突然全部散晒，半分鐘內成座皆旺變番無人島。跟住皆旺108俾全層所有玩具舖怒啤。冇計，今晚成層都要讓路俾108，呢晚好多稀客，好似（曾經係）全港聽最多metal之女性：夜美。收舖之後，當然要落去打番舖機先。今晚有阿捷同學落黎邪住。我從未見過有人打機打得咁鬼屎哈哈哈。玩House of the Dead 4，搭住佢仲衰過我同107兩條友玩，但玩得點屎都捱得耐過我，因為有我幫佢擋晒ｄ喪屍。之後玩Time Crisis，好耐未試過玩得咁．．．灰。即係一晚之前，都仲係差好少就可以一舖三蚊爆機，但今晚多左呢位觀眾，係可以淨係最後果關都不斷噉死不斷噉con，變番剛剛開始煲果時十幾蚊死con爛con con爆機。真係灰到爆。
「阿捷！以後我打機果時，你唔好同我一齊！」

返到屋企，上網繼續玩。好耐冇見過面的台灣朋友再次online，難得大家終於撞到，梗係要傾番陣先。係呢個大部份人都係download、metal越黎越大路、「聽metal」果班都只係聽出名band大路野之年代，賺到錢同型到威到果班慢慢玩晒之年代，好多人唯有妥協，就好似好耐之前提過做左mail order好多年果位台灣朋友，咁多年黎都係得一個人，自己用公餘時間同埋人工訂貨、放上網、寫介紹、搵試聽、同label傾，佢個catalogue對我地呢ｄ搵野聽人士黎講係好吸引，不論極金定係傳統野都係睇到流晒口水果隻，但做左咁多野堅持左咁多年之後，都慢慢意興闌珊一步一步抽身離場，因為同香港情況好似：
「有沒有CHILDREN OF BODOM？沒有，那算了吧！其他的二百張我都不懂，不買了！」（遺憾地呢個現象存在於世界各地，分別只係程度問題）
加埋年齡、工作、學業同家庭問題，呢種完全無金錢回報甚至要虧本，同時無人欣賞認同，更絕對影響自己正職同生活之堅持，只會變成不切實際的負累。所以你發覺，想賺錢想威想型果ｄ，肯做會做好多好多野，但係一定唔肯唔會做一樣野：賣（非大路）CD。見自己都唔係醉心聽野，亦唔係有心買碟，望望自己已經知咩事，仲點敢做呢瓣自己都唔支持之生意？無怪乎呢位朋友三十有一，已經「退休」了，但呢個年紀先「退休」，其實已經算好老、堅持左好耐架喇。但講左呢位朋友咁多野，其實今晚係同佢冇乜關係。呢一晚係同另一位台灣朋友傾。雖然同好多台灣朋友－以及其他更多國家朋友－都係經metal識番黎，但今晚身兼兩職的我，同攻讀研究生的佢，接近冇傾過metal，呢晚大家係吹台灣時局趣聞，同埋工讀之苦。冇錯，傾左咁多，仍然唔係metal。慢慢唔係metal。大家都開始妥協同放低了。

19/9/2006 TUE

踏入九月尾，開始進入繁忙期。呢個禮拜到十一月頭會係今年最忙日子。聽日仲要返大陸，又係一日兩檯客。大劑。
仲要臨到騷先黎咁多野做。灰。

今晚係old-school之夜。唔係音樂，係人。全晚係劉Sir同夜美兩個人坐係度守株待兔的日子。但冇乜兔。
最後係大家開電視睇明珠台變變變生命力的益智日子。

20/9/2006 WED

當琴晚突然早訓，冇沉醉呢個Wikipedia繼續摷番ｄ經典舊game出黎回味，就知道有問題（壞左部電腦而家仲未整番好，都算係件好事，生活徹底改變了）。捨得早訓，因為今日又要上工廠，今日先發覺，原來我好落未著過西裝－正確ｄ黎講，係好耐未著過襪，我都唔記得幾時開始，我已經名正言順擺到明日日著涼鞋返學呵呵。不過今次上廠冇得嘆，多野做之餘，仲要連見兩檯客。即係上廠要做野我冇所謂，要見兩檯客遲返香港都冇所謂，但唔好係下星期五開騷前先黎噉搞丫大佬。朝早七點九跳上車訓番兩個零鐘，一落車個客未到，先黎Ｎ封email同電話，呢幾日係史無前例咁忙。十點半，第一檯客出現：一個台灣客。台灣客冇乜出奇。出奇在係個台灣妹。大家差唔多年齡冇乜代溝，ｄ普通話又易聽＆聽得明我ｄ普通話（呢樣先係最重要），又要好玩好傾，非常開心。
「現在台灣這麼亂，你是倒扁還是挺扁的？」
「我是觀光派的，食住花生等睇戲！」
見過咁多中港台女仔，台灣女仔係普遍質素最高的，個樣要多靚有多靚，身材要多好有多好－曾幾何時都用過同一番說話形容大陸妹，但台灣女仔再加多樣：有學識。
「台灣女仔一拍埋大陸女仔度，大陸妹收皮啦！」（107搭嗲曰：「大陸女仔一拍埋香港女仔度，香港妹收皮啦！」）

台灣靚女走左之後，又到食飯時間。每次上工廠除左玩客之外，最大樂趣係食酒樓大廚級阿姐ｄ超正飯送，當各位食完第一碗飯，阿姐問：
「你使唔使裝飯呀？」
「下阿姐你頭先見唔到我已經裝左兩次呢咩？」
食飽就訓，訓飽，唔係食，係做野。一訓醒已經要飛撲去電腦度打文件send email。跟住就第二檯客。其實呢檯客唔係我檯客，係另一個同事個客黎，琴日臨放工果時先突然間夾硬話今日晏晝過黎工廠，咁蹺今日我又上工廠，
「噉不如你幫我見埋佢啦！」
噉就被屈，益晒條友。好在今日ｄ客都唔係咩麻煩友，四點就走得人唔使拖到五六點先開車，臨走時老細話
「咦，頭先有間公司打電話黎，話陣間五點鐘過黎工廠呢度喎！」
「走啦黐線！一係你幫我見埋佢！」
老細其實同我一樣咁懶，所以迫於呢條頹友無奈下，只好開車走人（冇錯，點睇我都似老細多過真正果個老細）。平次返大陸實有意外，一係炒車一係塞車，連自己架車甩轆都試過（冇錯笑爆咀），今次居然乜事都冇，六點準時返到公司。
「掂喇卦今舖？仲唔走得人？」
就係冇得走。老細直頭成袋麵包放係度：
「今晚流流長呀，你食定麵包當晚飯都得喇！」
好多人都問，我職責就係專接大單野。平日，我只係一個究極庶務員，所以可以成日坐係度唔使做；但當有大事發生，公司面臨危急存亡之秋果時，就係我出手的日子。有ｄ似死士架。所以今日死到八點半先走得人。灰到爆。仲要係揚晒呢兩個禮拜開足咁多晚，呢個月尾先發生咁多事。跟住下星期三又要返工廠。要做死士冇所謂，都唔好臨到有騷前先黎噉搞丫大佬．．．
假如我呢個死士今舖可以大步檻過，今年內立即退休都得（只限今年遮）；如果檻唔過，之後可能大家日日時時上皆旺都會見到我。

往皆旺途中，遇到一位朋友。（又）換畫了。
「個個都換左啦」
都唔係個個，我連畫架都未有。
諗番，有時確係犧牲左好多野。

最後九點先至開舖，之後講左呢兩個星期三晚照開，但結果都係開唔到，九點先開同唔開冇乜分別，今晚上到皆旺被放飛機的朋友，十分唔好意思。只希望下星期三唔會又係噉。唉。
所以呢晚開同唔開之分別，同零冇乜分別，純粹志在搵107玩。我絕對承認，仍然堅持經營108，其中一個原因係因為107，同埋其他好多無聊人。

21/9/2006 THU

今日全日匿係公司，冇乜特別野做，都係隨時候命，話辛苦唔係，但又唔係唔辛苦，所以晏晝要寄箱野俾個客，見有機會立即衝落街先，唔係真係捱到死。拎住箱野成四五斤重（係kg呀唔係中國斤呀），點知拎到落郵局先發現原來冇得寄，要拎番上公司。但幾斤野跟身都阻止唔到我吞pop的決心！回程途中，照掃街，公司附近搵到僅有幾間魚蛋檔都完全唔掂，好懷念上次跌落地都照炸果間拿渣野，果ｄ先正！跟住再係噉買麵包買蛋撻，個箱變左好似外賣車仔噉，返到公司時箱面放滿晒大量食物。雖然而家風頭火勢，但我的頹廢生活依然。
「咁大壓力，你會唔會訓唔著？」
「唔會，我都冇壓力！」

夜晚，食多兩個飯盒（．．．），玩下吹下水睇下DVD，問佛爺拎埋部機，又一日。真係好似退左休噉。

唔寫當休息。

22/9/2006 FRI

前兩日過左，捱埋今日朝早，晏晝終於過番頹廢的生活，坐係度嘆同寫野再食多個鐘下午茶，過左兩日死士生活，到今日做晒我果份所有野，其他大鑊野同埋同人地老細傾呢ｄ大壇野，一野掟晒俾老細負責，搞掂。終於似番返工。開始諗緊NECROPHAGIST特集。因為發覺如果唔寫野，係公司冇野做時實在難頂。唔通真係日日都匿係pantry坐／食成日咩！
嘆下世界先。

夜晚都係食飯盒、玩同埋吹水。呢排好支力，連部電腦抬左返屋企都懶整，更何況寫段記？
更何況，留番ｄ時間笑下仲好！？就好似今日，遇到了比上forum更好笑的事，想知詳情，將文字化之forum真實化就係。
其實身處TRHK，有好多機會遇到呢ｄ奇想。只不過見到，唔知笑好定唔笑好。

107今日招股一招就夠食蕉食成個月，今晚收舖之後，立即出街wet下先。呢ｄ情況，梗會有我存在，有得玩我實會玩架啦。
「去邊度蒲？」
「好景！」
好景街口新開果間兩層機舖，107都未蒲過，就等我帶佢黎見識下啦！
「呢間野，好少人架咋！」
「噉都話少？差唔多爆晒喎！」
「係喎！點解咁多人？我上次黎成層先得五個人咋！」
「你上次幾時黎呀？」
「上星期六囉！」
「星期六都得五個？」
「我晏晝黎丫嘛。」
「挑！」
哥普拉漫畫之前冇睇過，但好有興趣睇，因為人設、畫風同故事都好風格化，難得呢度有入到呢隻哥普拉槍game，行過咁多間亦只有呢間有入，兩條友一場黎到點可以唔玩番舖？仲要三蚊舖，抵喎！未玩齋睇已經好吸引，平時玩果陣ｄ畫面已經靚到其他gameｄCG咁靚，噉ｄCG可以靚成點已經唔使講，真係未見過有CG game可以靚成噉真成噉，已經係一隻新世代電子遊戲了。玩落，唔知點解，同Time Crisis一模一樣，又係踩腳掣閃燈，又係紅色人射九你，中槍個樣都要同Time Crisis完全相同？
「梗係啦！又係Namco出嘛！」
但唔知係隻game係噉定部機有事，支槍唔知點解點射都唔係射正中間係要射側ｄ，但算鬼數因為隻game真係好正，除左畫玩方面都度得好好，兩個player係夾得好正，真係一人打一面兩個人打完全唔同野同互相掩護，比（而家之）Time Crisis更完善更進步。隻哥普拉好玩在psycho shot，即係可以lock人之後一條laser殺九晒，我好認真噉玩，但107係狂fing之槍lock晒ｄ人之後射一鑊搞掂，
「挑！使好似你咁辛苦？」
但玩下玩下，發現就噉射普通槍仲簡單，結果都係用番普通彈一槍槍噉射，psycho shot都懶用。
「唔用psycho shot啦！我地都唔psycho！」
隻game都算唔錯。係差一樣：
「點解得一關？」
原來三蚊得第一關玩，想打埋之後ｄ關，要俾多八蚊開張卡先有得玩落去。我呢ｄold-school人仍然非常之唔慣（＆唔妥）街機開卡，係唔係都要開卡玩先玩得晒同玩到落去。我呢ｄold-school友好短視的，只求爽爽快快就一舖，而唔係要晚晚都落黎好似RPG噉俾錢升level。所以，收皮吧．．．都係煲番Time Crisis 3算（希望Time Crisis 5唔使又要開卡啦）．．．隔籬果部世嘉飛虎隊又玩下，太複雜唔好玩，支槍有得轉mode，又要action button好多野搞，最重要係冇得閃，尤其是唔記得左隻唔係Time Crisis，自己係噉閃，game入面係噉中槍，好快就死。跟住當然要煲OutRun，同107最好玩都係呢隻，呢度又要平新之城一蚊，似乎第時兩條友會經常走過黎呢邊煲。仲有Metal Slug。之前玩左次6代，
「好易玩遮！」
今日呢度有隻四代，
「一人唱廿蚊煲爆佢！四十蚊都爆佢唔到？」
真係爆佢唔到，兩條友夾埋廿蚊都過唔到一關，後來搏埋條命四條友先去到第三關，算，放棄，收皮。
「點解我地上次玩部六代冇咁難？」
「果時你玩easy mode丫嘛！」
跟住再玩埋其他好多無聊game，好似真係坐上去好似Virtual On噉玩果部索斯機械獸，見有兩部拍埋一齊以為有得對打，點知原來冇變左一人一部單打，完全唔識玩由頭到尾都知玩乜，但唔識玩都俾我玩到第三關！幾威！但我發誓以後都唔會再玩！又玩下九個掣拍拍拍果部音樂機，當然係第二關就收皮啦都係捽碟機易玩ｄ，仲有好多無聊野，打機真好玩。所以近來，越黎越遠離metal。打機之後，
「食宵夜！」
係食左飯，但有幾何出街食丫我地兩條友，食左飯都照食，食對面毓民私房菜牛肉麵。九龍城龍珠樓下有間，但果時咁耐都冇食過，今日先係第一次食，有ｄ後悔：
「頂！正成噉，點解我唔早ｄ食？」
貴係貴左少少，兩條友夾埋食左六十幾，但真係好鬼好味，係連ｄ茶都真係沖杯普洱俾你唔係求祈茶葉沖滾水，絕對要尊重！今晚兩條友吹水，吹得好開心，亦有好多野同107先吹到。因為大家都係working class，係度捱。分別係佢好努力搵錢，搵到錢之後買怒多野然後搵更多錢，而我好頹地搵錢，夠食又儲到ｄ錢就夠，寧願留番多ｄ時間享受生活同理想。食食下，有個阿叔好熟面口，一出聲，認到喇，原來係黃毓民。唔出聲真係要諗諗先，個樣殘左好多。
「喂！毓民！送唔送皆旺？」
「太遠喇！唔送！」
「如果我叫晒全層樓一齊落廿幾張單，你送唔送先？」
「你搵唔搵得齊廿幾張單先？」
肴底，走人。

十二點幾散水，點幾鐘返到屋企，沖埋個涼無聊下兩點，開機，剛剛見到107 online。
「我而家先返到屋企咋！」
再send條link過黎，訓唔到覺，因為兩條友都笑爆咀：：
「曹面超人！」
就係傳說中的曹博士《七問七答》專欄。好似年幾兩年前第一次睇已經笑到爆咀，後來好似膠過頭封左冇乜再理，今晚107再整過黎，原來仲有得玩！問果班白痴，答果條更白痴，照計唔係曹宏威本人答卦？不過邊個答都唔緊要，我只知道真係好鬼好笑！

23/9/2006 SAT

危急時期已經過去，今朝返工，只需要做一樣野，寫一封信，加埋老細又出左門，擺明成朝流流長慢慢寫，寫得好慢。但寫咁慢主要原因，係因為一面寫一面睇曹面超人。到而家成萬幾條問題，今日朝早慢慢睇，睇左幾十條，有ｄ冇乜好笑，但係笑爆咀果ｄ可以真係超級笑爆咀（都唔夠高登果ｄ，呢ｄ係白痴，高登果ｄ係硬膠），非常好笑，但辛苦在係公司入面，又唔可以笑出聲喎！忍住笑忍得都不知幾咁辛苦！
「喂！咁開心？就放工喇喎！封信呢？」
「係喎，唔記得左要寫信忝！星期一先算啦唯有！」

放完個工，飛一飛出尖咀搵阿B哥拎機再出番旺角，見仲有時間，落去新之城兜番轉先。
「咦，部House of the Dead 4 Special開喇喎！」
即係有得坐埋上去玩果部，旺角區只見呢間入（亦相信得呢間夠薑／錢／地方入），而且相當落本，除左兩部投影機加全電動地台，門口部Time Crisis 3個頂仲要裝多兩部Plasma電視直播，所以一落到去見到成村人塞爆左個門口都知有得玩。但我都係Time Crisis 3算。因為機頂果兩部電視機，今日玩，突然間多左好多觀眾，搞到有ｄ肴底忝，肴到差好少就可以圓到一舖爆機之目標（「咪賴啦！挑！」）。但隻HotD4S就唔玩住，除左因為冇時間，仲因為
「呢ｄ好野，梗係搵埋107一齊玩啦！」

今日，冇乜特別，又係同107＆無聊人玩同吹水到癲又一日。收舖當然又要落去新之城，第一件事梗係即玩隻House of the Dead先啦！
「嘩！乜而家打機都要輪籌！」
冇錯！係要排隊輪候加等籌先有得玩，真係夠晒大陣仗。
「阿姐！ｄ人要輪咁耐先有得玩，我諗住炒籌賺番少少喎，你覺得可唔可行？」
「黐Ｘ線！」
「喂阿姐你使唔使咁坦白呀？」
都等左差唔多半個鐘先至到我地兩條友玩。呢部野基本上係一部機動遊戲，要闢足成間房俾佢分分鐘呢部機仲大過你睡房，入面係一前一後兩個投射螢幕，中間個地台搭個過山車式坐位，上到去要扣好安全帶裝埋安全架先可以開始玩，仲裝多兩部cam影低入面兩個芒同玩緊果兩條傻仔個死樣，呢樣野確係幾樣衰架！特別係我地兩條友上到去，扣左安全帶都冇得玩，
「喂阿姐！點解仲未開始？」
「Ｘ！你兩條友拎左對方條安全帶黎扣都唔知！白痴仔！」
「喂阿姐你又咁坦白？」
全個過程出面四五十人全程目擊，笑到爆咀。但我地兩條友有一樣好，擺到明樣衰唔驚人笑，所以玩乜＆點玩都得，懂得放開懷抱好緊要。開頭都諗住有呃錢成份，會唔會係四代變做機動版噉就當係隻新game？結果唔係，原來係一隻完整新game，最大改動當然係有得郁啦，即係以前點走點郁法都只係個芒跟住game入面個人對眼噉郁，但呢度行路跑步上斜落樓會震，同埋望左轉右拎轉頭係成部車載住你成個人跟住郁而唔係得個影像郁，打打下前面後面有人時轉去後面繼續射，呢樣野槍game黎講都算創舉，遊戲性同成本都係。而隻game亦真係從重新寫過，劇情可以話係4代之一個枝節或外傳，成隻game都係新關，介面同系統都有有新野，例如成隻game變成一行能源而唔係兩條友分開計，擺到明呢隻game係為雙打而設，玩到最後更加明顯。玩落感覺上難度低左，ｄ人同大佬好似冇以前咁多命，第一關大佬就係四代第一關大佬，但ｄ模式同攻擊都唔同以前，而我地兩條友擺到明槍都懶開齋掟手榴彈，然後對住個cam
「我地係玩得咁消極架喇吹咩！」（放心今晚呢段片YouTube好快有得睇架喇，之後香港無人不識107&108）
第二關已經去到秘密基地，而兩條傻仔噉樣玩玩下，都去得到呢關大佬，證明呢隻game幾易玩。大佬係House of the Dead系列永恆經典大佬Magician，諗住又係消極地玩啦，點知一開始手榴彈都未掟已經唔知咩事死左。
「咁誇張？？？」
睇左成日，暫時未見過有人贏到佢爆到機。
「贏到佢就爆機？」
冇錯，就係咁簡單，只要做低Magician就爆左呢隻過山車版House of the Dead。呢個係唯一覺得呃錢之處，或者係試版黎卦，有乜理由咁大台野得兩關玩？機動遊戲都唔止咁少啦！完左隻game，會同你計呢個perfect duo index。所以話呢隻game擺到明係雙打用，原來係情侶版House of the Dead。走番出黎，
107&108：「嘩！最後大佬真係勁！五秒唔使就死左！」
新之城阿姐：「咁屎？上星期部機到果晚我已經爆左機囉喎！Magician好難打咩？」
果真臥虎藏龍。之後阿姐收錢，每人十五。
「算平架喇！果部玩卡足球game出果時，成百五蚊舖呀！」
所以都唔知呢部特別版House of the Dead 4點樣回本。淨係兩台投影機已經十幾皮，計埋硬件地台加上機動遊戲要拎牌分分鐘淨係set機都要三十萬，又要搵定一個人係度睇機已經要增加成本，仲未計折舊同保養喎你知香港人打機幾喪架啦郁ｄ就打爆機架嘛（物理上呀我係指），投影機ｄ膽又損耗得快噉樣由朝開到晚法最多兩個月必定玩完。而且隻game話得兩關其實都唔係短，淨係ｄ人上去阿姐幫你入錢set好部機都已經要個幾字啦都未計玩果part，當一個鐘可以四舖雙打$30x4=$120，一日當開足十個鐘都有人玩先得$1,200，$300,000/$1,200 = 250日先回到本－只係理論上。你要計埋香港人湊熱鬧心態，過左頭兩個禮拜冇晒好奇心就會少好多人玩，而且過一排已經會有高手出黎霸機，之後一日有冇一千都成問題。點回本？本來家庭機越出越勁已經難搞，網吧出現埋之後，已經要靠賠本傷人，而家做機舖真係難上加難。

星期六晚機舖實在旺場，今晚OutRun太多人冇得玩，Metal Slug照殺。上次四十蚊都爆唔到四代似乎仲未吸收教訓，今日兩條友決心煲爆隻六代，
「個easy mode咁易玩（註：「易」=「每人起碼廿蚊爆機」），個hard mode有幾難？」
有幾難？呵呵。簡直可以用難到仆街黎形容。easy mode你一出黎已經係用機槍，ｄ敵人好多仲要係十分白痴冇乜勁招，但hard mode得番支豆槍，ｄ敵人尤其是大佬勁左Ｎ倍，特別係ｄ大佬以前easy mode時一招一招噉出招，hard mode係四五招一齊出避都冇得避，特別係勁《魂斗羅》之最後一關，個大佬ｄ招難避到黐Ｑ線甚至根本就係作得冇得避，戇居！所以玩玩下我地都玩到同House of the Dead一樣咁消極玩命玩錢算，到最後爆機夾埋用左成八十幾蚊，淨係最後大佬每人都用左廿幾蚊。六代有得用拳皇軍佬隊個頭巾佬Ralf，發現成隻game佢係最勁，因為得佢可以捱左一招唔死彈番起身，即係一舖錢可以玩兩舖，所以如果真係計，我地呢次爆機用左過百蚊都似。
「黐Ｑ線！以後唔玩！」（講遮，下次總會又搵過第二隻game中招）
經此一役，兩條友決定收一收皮先，呢排都係唔好打咁多機喇，會死人加破產架！（話需如此，我仍然會得閒無事就落去Time Crisis 3）

24/9/2006 SUN

早餐：「乜星期日有朝早架咩？」
午餐：「一個麥樂雞餐轉星星薯餅丫唔該！」
晚餐：「唔該一個三號餐要辣雞我有coupon送多個葡撻！」
晚餐encore：「嘩使唔使成個錦繡大賽pizza買上黎丫！即係我係仲食到野都唔使客氣成噉丫！」
今天的節目是吃和發癲。也是非常不健康的一天。一天吃盡三大美國垃圾食府，令我回憶起在美國的日子。
看著這條ＸＸ吃了一個肯德基雞餐之後，居然還可以吞下大半個錦繡大會大批，遠道從北京來到香港、讀考古（！）的一位常客，嚇得發誓以後也不再上來TRHK。

今晚，又係大家排排坐睇電視的日子。呢晚有《美女廚房》，睇完之後，仲有亞姐。
「無線ｄ香港小姐真係收得皮！亞姐呢ｄ先係姐嘛！做到十一點幾喎！」
「唔睇啦！返屋企整機好過啦！」
佛爺搞掂左部機好耐，抬左返屋企成幾日都仲未搞，確係唔多對得住佛爺，雖然結果，都係搞唔掂，似乎又要搵多次佛爺笨，呵呵。
「部機用左咁耐，又搞極都搞唔掂，好心你就換部新機好過啦！換過個dual-channel快到仆街！」
六十幾歲的老豆都曉dual-channel，證明真係要換機了。講起dual-channel，又要講講我同事。話說我同事個細佬係去讀電腦工程，讀到好癲好高層次果隻。果時dual-channel剛剛出左冇耐，佢去黃金砌機，店員遊說：
「裝番個dual-channel CPU啦！兩粒一齊行，快好多架！」
答：
「你唔使同我講呢ｄ野架喇！你地而家用緊果ｄOS係我寫出黎，而家ｄ系統根本兼容唔到dual-channel，裝左都用唔到！」

25/9/2006 MON

講過我個位係死士，即係冇事發生時齋坐係度，有事發生時搏命去做，今日，好好彩冇事發生，亦即係得個坐真的一天。坐左成日一粒未都冇寫到，因為又係《曹博士七問七答》時間。而家就黎post夠一萬九千條問題，累積到今日，終於睇左差唔多成千條，其實多問題成噉，就梗係太過參差好多都係無鬼聊，睇耐左就搵到個周期性：同常硬膠仔都係聯群結隊，「閒日」得一兩條出現，但到「旺季」果時，成班志同道合的無聊人會一齊蒲頭玩串；曹博士（or佢槍手）答問題又係睇心情，心情普通果時非常地行貨，但如果果日心情好，就突然間一大堆好鬼精警的答案出現。所以同事都發現我非常平靜同怒爆笑兩個心理狀況周而復此地出現，感到相當可怕，紛紛將自己個座位搬離呢位精神分裂危險人物。
我已經將呢個七問七答加入我的最愛，將來的日子有排睇／有排笑。等我遲ｄbookmark埋個高登forum先。而家已經忍笑忍得好辛苦，果個時候相信會笑到完全仆晒街。

唔知點解，近排同鬼寧舍有緣，特別係愛爾蘭鬼。前排先有一隻黎過，今日又有個愛爾蘭師奶奪門而入。唔係白撞，確係奪門而入，因為佢係愛爾蘭時都係聽開metal，黎香港旅行又撞左上黎皆旺，一聽到播緊DRAGONFORCE，立即衝入黎。跟住當然係吹水啦。吹下愛爾蘭，吹下TYPE O NEGATIVE（係香港，同我傾過呢隊band果ｄ，好似真係全部都係鬼冇乜人），同埋DRAGONFORCE。因為一個客試，再加埋呢個愛爾蘭師奶，今晚係DRAGONFORCE之夜，倒番轉頭由"Sonic Firestorm"聽番去"Valley of the Damned"。第三隻"Inhuman Rampage"就唔使理啦，差唔多每日都會播番兩三首黎聽，已經成為我最愛power metal CD。第一隻雖然未夠激錄音又差ｄ，但果種NWOBHM feel後兩隻碟又係及唔上。中間果隻本來唔錯，但出左第三隻之後，反而變得兩頭唔到岸，都幾無奈。但今晚煲得最開心係第二隻。只有話，三隻都唔同，但三隻都正（夠晒行貨式hardsell．．．）。

呢晚，非常有趣，自場騷賣飛以黎，有樣野第一次發生。有三個人撞左上黎，睇左一輪，見到METHOD張poster：
「呢張poster咩黎架？」
「黎緊禮拜五晚灣仔有場thrash metal show，有隊韓國thrash metal band METHOD玩足個半鐘，仲有隊香港melodic death band DISMAL PROPHECY做開場，而家賣緊飛架喇！」
「喂，阿邊個！你有冇聽過呢隊band呀？」
「冇呀。但係thrash metal喎。」
「我都想去！咦thrash metal阿邊個都應該鍾意睇喎！」
「等我打個電話問下佢啦．．．喂！阿邊個！今個禮拜五晚有metal騷睇喎！咩band？叫METHOD，韓國band黎，未聽過呀！但係係玩thrash metal喎！係呀thrash呀！你都去？好丫！唔該三張飛丫！」
就係噉，三個完全唔知METHOD係咩料ｄ歌係點只知佢地係玩thrash metal的朋友，就噉一上黎見有metal show就買左飛去睇了。呢樣野，上次DISAVOWED發生都唔算好多（通常都係發生於女仔身上（但今次各位靚女已經唔知去晒邊了）），而今次METHOD live，就更加係唯一一次。其他的絕大部份時間，回應都係
「metal show？咩metal先？thrash metal？咩thrash metal先？爆果隻thrash metal？咩band先？METHOD？咩料先？韓國band？．．．未聽過呢隊band，都唔知咩黎，唔睇啦！」
理論上，身處香港地，呢個先係正常反應，今晚果兩位朋友係屬於傻Ｘ左。

收舖，當然係Time Crisis 3先啦！之後返到屋企繼續整機。好想快ｄ搞番掂部機，因為曹博士！
呢兩個禮拜公司發生太多事，同埋呢個禮拜後日起鐵定超忙，已經支力到冇乜心機做／寫／玩咁多野。只待星期五六。

26/9/2006 TUE

今日係公司冇探到曹博士，有ｄ唔開心忝。聽日要返大陸，今日要清清手頭上ｄ野，今日忙左多番ｄ野做。支力，放工拿拿臨走上皆旺。呢份工有樣好，返工放工同間場都唔使用好多時間，基本上半個鐘唔使就夠，唔夠聽一隻碟，所以呢ｄ時段鍾意聽EP。基本上有兩隻EP差唔多每朝每晚都係呢兩隻，一係VADER "The Art of War"，一係謝安琪《K sus2》，符碌的話，屋企返公司、大角咀過皆旺、皆旺返屋企是但一程，未聽完一隻已經搞掂。VADER果隻已經唔使講，近年最愛death metal作品之一，短，但簡單直接，帶得出epic death metal果份感覺。至於《K sus2》，更加係冇野講，《Kay One》完全玩野，《K sus2》正經番好多，但好有生活同人情感覺，起初聽係冇第一隻碟咁吸引，但聽耐左之後，甚至遺忘左第一隻碟，而長期拎呢隻出黎一聽再聽，淨係《跟我走》同《愁人節》曲詞都已經殺盡99%香港「歌手」（冇錯又係引號），就係因為呢份情。我知道無論變成點、唱ｄ乜，謝安琪之任何一首歌一隻碟，都會係我最愛中文／本土作品之列。
所以我完全唔需要追新野、追碟。一隻碟對我黎講，係有好多野聽，可以聽好耐好耐。

今晚，係old-school之夜。又有阿Big出現。一定要左手啤酒右手煙。我鍾意。
「喂！我上次黎買果隻碟，封面有條女自殺果隻呢！仲有冇貨？」
「SHADOW CUT隻"Pictures of Death"嘛！仲有貨！你唔係買左呢咩？」
「借左俾人，借借下自己都拎唔番！」
「係咪個封面正得滯，條友唔捨得還呀？」
「個封面就梗係正啦！（唔係咁正，唔鹹唔要的Big哥又點會買？）不過ｄ歌都好正，冇左都要買番隻黎聽！」（佢睇落係on9，但確係識聽野的）
之後，又吹吹黎緊星期五場METHOD live。
「七點鐘開場？未必趕得切喎！」
「你幾點放工呀？」
「我返元朗，六點放！」
「噉都趕得切丫！」
「唔使食飯呀？仲有其他野要做呢！」
「咩咁忙呀？」
「去到仲要過一過隔籬大廈先呀！你知果頭幾鬼多賓妹架啦！上次睇完騷十二點幾，行街等van仔，俾賓妹撩忝呀！」
冇錯，每次阿Big去親睇騷，都係咁忙。你睇佢上次蒲窩Devil's Horn，黎之前都要經埋灣仔辦埋「正經事」先上到黎遲晒到就知道，佢睇親騷，真係好忙！

返到屋企，繼續搏殺部機。換左新harddisc，最灰係冇左Windows 2000，要轉用Windows XP。Windows XP同Office 2003，係我用過最最最白痴加最最最廢之software。用落左你就會發現，XP同Office 2003係將以前version之所有非常方便便利用家之優點全部delete晒，再大幅強化以前ｄbug＆缺點，再加埋一個懶係叫做幫你但次次出現都係攬住部機一鑊熟的所謂人工智能。我而家超唔妥呢兩樣野，更唔妥Microsoft。最灰係部機都頂佢地唔順，而家開機同load野都超超超慢。即係，點都要俾佛爺搵多次笨換部dual-channel。唉。
「我想頂到下年出埋新版Windows先換機呀！」

27/9/2006 WED

6:30
今日好早就俾隻狗整醒左，佢都知道今日又係劉Sir大陸工廠之旅，睇條友都唔知醒，所以晨咁早噬佢一啖等佢醒一醒先。非常痛苦，唔係因為要早起身，而係因為
「灰！又要著西裝！好似除左上星期三返工廠，呢兩個月今日先第二次著襪！」（呢個都唔知咩人黎）

7:30
出門口，起程去大角咀。老細未到，先食個早餐，呢頭都冇乜食店，叫做最見得人果間大家樂爆到無可再爆，行多兩條街先見到有間勁細間加裝修超殘之茶餐廳，迫於無奈，只好食呢一間。結果食到咁多年黎食過最難食之茶餐廳，即係連我呢ｄ接近係自己會死都會放得入口果隻，都可以有半個早餐食剩，就知道呢間野真係好好好好好好難食。好彩餐飲叫左鮮奶，只得呢樣野係完全吞晒落肚，因為樽裝鮮奶唔係佢地自己整。大角咀呢頭真係冇啖好食。

8:30
食／捱完個早餐再嘆嘆世界，見到老細架車出現就好開心，因為睡眠時間到了。每一次上到車，我都會厚顏無恥地怒訓，彈上車之後瞌番半個靚鐘，去到黃崗時落車過關再上番車之後直訓，總之就係有幾多訓幾多，途中發生咩事老細講乜都唔鬼理。面皮就是這麼厚。當果個禮拜我要上工廠，果個禮拜我會寧捨精神充沛。

9:30
訓呀訓，好舒服，尤其是聽住歌仔訓，就更加合皮。好鍾意坐住老細車訓覺聽歌，慒下慒下噉樣個身唔使郁反而聽得仲清楚，同埋真係好嘆，屋企訓都冇咁正。平時都冇乜呢ｄ機會咁集中聽野。所以我鍾意返工廠，特別係上到去係噉塞車等我可以訓耐ｄ（真係衰仔）。

10:30
「頂！又塞！次次同劉義呢條．．．上親黎大陸都係．．．真係．．．丫！」
平時呢個時間，應該已經到左工廠，點解仲未到？我都唔知咩事，只隱約見到成條路成幾十架貨櫃車爆滿成條路，老細係噉小言語中仲有多幾句粗口同出現過我個名，爆粗期間同其他司機一齊響鞍。不過點嘈都影響唔到我，我聽歌，我訓，我乜都唔理，吹咩。

11:30
訓醒覺，開眼，見到工廠，終於到喇，遲左成個鐘，即係我訓多成個鐘。到工廠，開始做野？又唔係。個客都未到。黎到第一件事，就係食飯．．．

12:30
食完之後，再訓，今日怒訓，有得訓我絕對唔會客氣．．．

13:30
一點半，都仲有半個幾鐘訓．．．

14:30
個客話兩點鈕黎（冇錯，兩點先到，噉今朝咁早上黎做乜？上黎塞車同食飯？），當然我訓醒即係兩點幾果時都仲未到（有幾何會有客準時到丫），訓完再做陣野，搭半個客架車先出現。基本上我上黎係冇乜意義的，之前同個客做單大生意好大鑊野發生，今日上黎傾大家三口六面講清楚，叫得做大單野，梗係兩家老細傾架啦，幾時到我地呢小小雜卒仔出聲？所以今日等返香港期間，我只係負責做列席者．．．

15:30
．．．陪個客遊工廠．．．

16:30
．．．再陪佢睇睇貨辦．．．

17:30
終於等到個客捨得走人。亦即係老細終於開得車，我終於可以走人返屋企－應該係返皆旺。一上車又係即訓同聽歌，我就係咁好意思。冇計，真係好鬼死疏乎架，疏乎到不能自己。

18:30
一路上，繼續邊訓邊聽歌，好鬼正，尤其是個天黑得好快（雖然，呢頭工廠區烏煙瘴氣，日頭都已經見唔到天），真係寧捨訓得有mood。冇開過眼，都感覺到一路非常順通，但行到中間，又塞，仲要係呢ｄ長假期前黃昏時段勁多貨車趕過關，中間有一架貨車死左火，成條路塞多成個鐘，但今次算好架喇，唔記得左我上年國慶之前果日上黎工廠，回程時炒左架貨櫃車封路塞足八個鐘一點先返到屋企咩？大陸交通真係超廢呀～老闆娘又曰：
「又係呢條．．．！真係次次同佢上親大陸都冇好事！」
我冇所謂，反正都係訓覺，同面皮夠厚。

19:30
醒一醒，咦，到左黃崗喇喎！終於到香港喇！如果唔係頭先撞貨車死火塞多左成個鐘車，以老細手百七米辣手車，係好有信心趕得切返黎準時開舖（不得不俾老細一個「勁」字！）。過埋關繼續嘆，聽到八點幾差唔多落車時，部mp3機終於聽到冇晒電。而家係用緊iPod，40G果隻，唔好意思部野唔係我自己買，我從來唔係Apple/iPod fans，部野係有個親戚唔知抽獎定人送定點無端端有部，自己又唔用，就醒左俾我，俾我自己我係一定唔會買iPod，買都買Nano啦仲買40G咁巨型咩我又唔會用黎睇戲睇片！但今日iPod史無以例地俾左個極良好印象我，就係今日噉樣早晚塞車法每程差唔多三個幾四個鐘，加埋晏晝等客ｄ時間，部野夾埋捱左差唔多十個鐘先熄機，雖然冇得換電係我最唔鍾意之缺憾，都總算幫我捱左成日。今日只煲一隊band：CORONER。呢隊係其中一隊我最愛thrash metal band，如果唔係有VOIVOD，我一定會揀佢地，因為根本就係歐洲版VOIVOD，分別係VOIVOD玩cyber、玩「創」，CORONER玩超技術。呢隊亦係難得地全線所有每一隻碟我都超鍾意之一隊band，係連隻精選都會覺得好正咁難得，呢樣野VOIVOD都唔得，但VOIVODｄ碟多佢地倍幾兩倍實有參差，又確係冇得比。好難得係有一隊band可以由第一隻碟一路去到最後一隻碟都係一路一路進步，頭兩隻碟係加左瑞典結他野之高技術thrash，淨係solo都已經殺晒，佢地個結他佬、唯一一支結他絕對係其中一個最勁thrash metal結他手，第三隻碟"No More Color"更加係心目中最勁最經典最冇可能唔買唔收藏之thrash metal鉅作，根本你聽完呢隻碟，已經知道而家好多thrash、melodic death甚至death metalｄ人係聽乜大，歌同技術都係劃時代地恐怖，而家都唔係有好多band同碟及得上。第四隻碟"Mental Vortex"突然間慢左、heavy metal左，變到好atmospheric、好progressive，同以前差唔多完全兩回事，但我一樣咁受，而跟住果隻"Grin"就仲死，已經唔知係咩黎，似industrial metal，但又玩到用好多完全唔啦更的物體拼埋一齊，又係狂俾人小，但我都好受，吹。跟住隻精選加埋臨散bandｄ新歌落去，雖然得半隻碟係新歌，又已經殺晒。thrash metal當中，呢隊band實在係太無敵，亦係唯一一隊會令我考慮放棄VOIVOD為最愛thrash band之thrash band。今日夾埋聽左1.N次全線，聽到好有興致寫呢個CORONER特集先過VOIVOD先，喂大佬起碼先得果五六隻，唔似VOIVOD成十二隻碟咁惡啃先丫。

20:30
「喂！幾時返到香港？」
「返左好耐，Time Crisis緊忝啦！」
真係今日咁鬼辛苦，難得返到黎又有阿冷爺頂檔，幾大落去打番舖先啦！部House of the Dead 4 Special，過左半個禮拜都冇，已經冇晒人排隊，連圍觀人士都冇乜了。實在擔心新之城點樣回本。不過今次落到黎有個奇遇，就係呢個過山車版House of the Dead，每次有突發事時，係要不斷拍機上面個掣過關。有一舖係兩個阿叔入左去，知唔知之後發生咩事？過癮喇！就係兩個阿叔坐低之後，一個阿叔拎晒兩支槍，另外一個阿叔，就淨係玩果個過關掣，淨係等成隻game得果兩三次出現之特別關拍果個掣！呢隻game仲要一個人十五蚊一舖，即係呢個阿叔入十五蚊就淨係坐，勁呀！原來呢個House of the Dead的世界裏除左雙槍雄，仲有拍掣雄！
「唔得！我又要一齊玩！我要做入錢雄！」

21:30
玩完Time Crisis（「差好少咋今次！」），再睇＆笑完雙槍雄＋拍掣雄呢對笑爆咀拍檔，係時候上上舖頭了。嘩，今晚好多人，有冷爺，有Rock爺，仲有二寶樂伉儷。亦即係，冇人啦！睇我入黎果時已經係開電視睇緊《鳳凰四重奏》，到睇完都差唔多未有人入過黎就知！
「灰！今日又係咁灰！」
「唔係架！你入黎之前好多人喎！係你一黎左先冇人上黎咋！」
「挑！噉我走囉！我繼續落去Time Crisis！」

22:30
成村人都好肚餓，除左我之外。個個都話要趕收舖。今晚又係107最後一日係度，特別同佢食番餐餞行。
「你唔係度喇？」
「係呀！過埋今晚，我唔係度架喇！」
「你唔返黎喇？」
「係呀！我唔返黎．．．一個禮拜！」
冇錯！話說107個表妹嫁人，嫁到去內蒙古（！），所以陷家飛去內蒙觀禮（！！！），而本身玩影相的佢，自然就被點名上去幫手拍低全程。
「聽朝就上機去窩闊台汗國！要先去深圳機場上內陸機，去到北京之後再轉車，落完車行過多兩個山頭，然後騎多半日駱駝，就去到喇！我都唔知果度有ｄ乜，都唔知去黎做乜！」
算啦！知你過到去窩闊台冇啖好食，今晚臨走前擦多餐毓民牛肉麵先啦！食過一次已經返尋味，除左因為真係好正，仲因為有毓民係度，實在好好玩，需知佢對住我地呢班傻仔，完全地被玩死佢，所以我地有得玩有得食食得寧捨開心。

23:30
食完個麵，梗係未走得人啦！
「蒙古冇機打喎！今晚打多幾舖OutRun，打飽ｄ上路喇！」
去完投注站執定張六合彩，就走上好景果邊間新機舖（所以毓民完全食正地利，我地呢ｄ每次過親呢頭打機一定會幫襯佢）。今埋加埋二寶樂伉儷，終於湊夠腳玩四打OutRun，加多兩個，成班都癲晒。二寶樂同107最鍾意玩撞人屎忽，一係突然急停等你撞車尾，一係突然墮後去你後面再撞你屎忽，玩到後來演變成玩撞屎忽（同撞到架車炒晒）而唔係玩賽車，成班友黐Ｑ線。最後一舖，大家顧住撞人同甩尾同炒車，最後俾唔使甩尾加唔識玩的樂嫂乘虛而入贏鬼左。這是一個很大的啟示，告訴世人硬膠者死。
之前次次同107玩冇次贏到佢，今晚我終於有兩次係跑第一！二寶樂係噉撞107屎忽等我漁人得利功勞最大！

23:59
玩夠，噉就一日。METHOD場騷之前，真係冇乜邊幾日有今日咁輕鬆，無論日頭定夜晚。

28/9/2006 THU

琴日返完大陸，今日好多野要跟番，怒搞都要六點半先走得人。好在今日我都唔差，淨係公司都食左兩個意粉一盒飯，仲有多盒意粉帶上舖頭食忝。臨騷前最後一日，今晚最後衝刺，多番ｄ人買飛，亦講左好多英文同普通話，有個做記者的北京thrash友落到黎，掃thrash、掃IN FLAMES，唔係有女跟身即場飛都買埋，希望聽晚會見到面，因為言行舉止學識都係殺盡見過之90%香港人，特別係thrash方面，大陸人實在係太有料、太開明了，睇佢今日揀ｄ野已經知道。過埋繁忙時段（即係八點都唔使啦），又係等收舖的時間。今晚有阿成椎名林琴live。全靠古天樂，香港突然間好多人認識追命林琴。椎名林琴實在太太太想追番全線，佢玩ｄ野完全係我杯茶，同埋佢ｄlive實在係太精彩太玩野。仲有由西藏返黎的契爺。
「咁錯蕩呀！去完西藏度蜜月返到香港，特登拎手信上黎俾我咁好！」
「你就想喇！我部電話冇晒電，要借電話先上黎搵你咋！」
然後契爺同大家講講「西藏冇lama metal但係有lama rock」、「我點樣俾韓國妹介真係要乜有乜呀我唔係條女陪住我的話」、「嘩你知唔知呀我差少少就冇命返唔到香港呀」、「食食下我俾成班喇嘛圍喎我」、「嘩我見過果度ｄ喇嘛用木魚打blastbeat呀幾鬼death metal呀」，實在係太多野玩太多野傾太多野笑。
所以下星期五1006中秋團圓trhK MKII，有關人等務必出席。

Korean Thrash Attack:METHOD Live in Hong Kong
「開騷喇大佬！！！你仲未買飛？？？」

trhK MKII　起動
20061006pm