段記



4/5/2006 THU

The Disavowed Show: The DISAVOWED Show


7-14/5/2006

LV


14/5/2006 SUN

Arising Middle Earth: TRHK0515新貨
「一年只上黎買一隻出名碟/幾隻出名碟的年度客人留意:KATATONIA新碟到左喇!


15/5/2006 MON

「ZZZ...好舒服...ZZZ...好舒服...ZZZ...」
大覺好訓,真係舒服。
「ZZZZZZ...」
...係咪有d咩問題?
「ZZZ...係囉,乜今日唔使返工咩?」
答案係:要架。我十一點起身果時醒起。
「點解會噉架???做乜公司冇人打電話比我?」(呢樣野其實從未發生過,次次都係呢條友仔一早自己打電話返公司扮野唔返工)
遲左成兩個鐘,點解仍然一個電話都冇?唯有自己死死地氣打番公司自首:
「老細...我今日遲左起身...冇返到工...對唔住...我而家趕番黎...」
「你做乜打電話返黎呀?」
「???」
「今日我比你放半日假丫嘛!冇人同你講咩?」
「呢樣我真係唔知喎!老細你幾時變得咁好人架?」
(最後果句當然冇講出口)
「好地地放你假仲晨早打黎煩住晒!仲有咩嗲呀?」
「冇喇冇喇老細!幫我駁過去會計部個靚女度丫唔該!」
「我係靚女!咩事?」
「喂!有冇整芝士鹹牛肉三文治比我食呀?」
(詳情請參閱The DISAVOWED Show
「我d手信係邊先?冇手信你唔好返黎見我呀!」
「...噉不如你同老細講,我以為佢比我放四個禮拜假,我六月中先返黎啦!」

非常開心,一講完個電話即刻撻低訓多陣,起身帶埋隻狗落街兜個圈先再慢慢返公司,去到剛剛好食飯(唔返工仲要用盡埋公司資源返黎開公數食飯,真賤格!)(同埋,好耐未試過有飯落肚喇!)。好在食完飯先開部腦睇睇,因為見到個Outlook收件匣同寄件備份各有差唔多一百封email的話一定即時冇晒胃口。所以今日除左跟番d重要野,主要工作就係睇email同file email,由我走果日開始一日一日噉掃番上黎,幾經辛苦,放工時個inbox終於比我清剩d重要野得番十幾封!
「好野!!!」
但係,寄件備份計埋今日send果d夾埋仲有1XX封未清。
「嘩!咁多?點算???」
梗係即刻走啦。成七點幾仲唔走去開舖,唔通留係度做野check email咩!(......)

七點三先放得工搭半先上到皆旺,希望冇朋友錯過左啦。連過香港廣州美國三個展覽,呢個月相信會非常非常地忙,請各位體諒下,未必日日都可以準時開到七點,上到黎見到未開,打過電話催催我啦。
全晚最過癮,莫過於此:
「唔該,我隻HELLOWEEN "Keeper of the Seven Keys Part I"有d問題呀!唔知點解多左首歌架!」
「多左首歌,唔係應該開心d咩???定係你見我地賣俾你隻碟多左首歌,想上黎俾貼士我呢!」


16/5/2006 TUE

終於正式返工。即係,八點半先起身、擺到明「遲到咪遲到囉!」地慢慢躝番公司、到左叫多個早餐食埋先開始做野(好懷念餐蛋呢樣香港地道美食!)、做做下野又走去pantry摷摷美國買返黎d朱古力食(冇錯,話係買俾同事的手信,其實都係買俾自己食)、一唔覺意又夠鐘食lunch。香港茶餐廳確係世界上最正食府之一!今日係今個月大日子之一,就係有得食意大利芝士肉醬寬條麵!呢d焗麵焗意一個月先得兩三次食,個個同事(well,其實得我一個...)每個月就係等呢幾日!所以今日似番d樣,先夾埋食左差唔多兩個焗寬條麵(好明顯另一個係有人捐獻),之後食茶餐特餐的女同事同老闆娘食完個麵又捐晒d餐飽火腿奄列蘿蔔糕出黎(去左咁耐美國,終於記得掛住香港d乜喇!就係蘿蔔糕!),檯面放左四盒野係度。仲有大量香蕉,同更大量美國朱古力,仲要雪櫃有雪條食...好多野做,好在有好多野食!唔係太忙唔記得左,臨放工一定叫多個焗寬條麵拎上皆旺食!終於明點解去美國成個禮拜日日都係肥膩野油炸野都係食極唔肥(甚至有人話我去完美國瘦左忝住美國絕對係食肉食油減肥法),因為香港日日晏晝食親都咁多,美國果邊野食完全唔算得係咩,難怪去左咁耐身形都冇變過,但返左黎香港兩日,已經肥左好Q多!

係咪因為提醒左各位朋友有新貨到,今日寧捨多人?仲有妹妹仔上黎玩足成晚:
「丁XN姐,你比人點左相喇!點人相者終被人點相!嘿嘿嘿嘿嘿嘿嘿∼」


17/5/2006 WED

起身,三號風球。
「八號咪好囉!噉咪可以放足成日假囉!」

拉斯維加斯日日四十度晒住,返到黎香港撞正打風,當堂覺得好...凍。出面橫風橫雨雷電交加,咪以為匿係公司入面有瓦遮頭好安全,一樣有事。唔知係咪支避雷針比雷劈爆左,今日成棟大廈完全避唔到雷,個雷行大d,公司立即跳fuse所有電腦boot晒 - 除左我之外,d雷劈極、其他同事d電腦boot極,我部機全日乜事都冇。好多同事成朝都係做一份野,甚至到放工都係做一份野,我就平安無事晏晝仲有時間搽搽呢個三塊排包加超多花生醬&煉奶再整多塊芝士之特級雙層加倍高脂三文治(劉Sir返黎喇!)。所以今日我好乞人憎。
「唔好意思呀下各位同事!近排冇乜天理!唔好意思!」

星期三加埋打風,當然冇開舖喇,難得今日仲接到咁多電話問
「幾時開,有冇新貨?」
既然大家咁高興,就送俾各位:

Polars Vol. 2: Black Death

唔夠?再encore:

The 666 Show: 06.06.06 Hong Kong Metal Gathering

「你明點解劉Sir晚晚都冇覺好訓未呀?」


18/5/2006 THU

「一點未呀?點解仲未一點架?」
就係因為落銀行打簿的會計姐姐回程時落肯德基執左兩桶雞返上黎,又要比我見到喎!(...)搞到成朝都忐忑不安冇晒mood做野:
「一點未呀?點解仲未一點架?」
完全唔(想)做野地捱到一點(...),
「擦呀∼」
諗住返到黎冇得食,點知都仲係要食呢d超唔健康美國野。
「好彩!仲以為返到黎要開始食番飯忝!」
真係開心。立即怒食半桶幾加一條粟米兩杯薯蓉再隊多半支汽水。正。好多人不滿。例如會計姐姐。
「上個禮拜你唔係度,知唔知我瘦左幾多呀?你返左黎三日,我已經肥番晒仲肥過以前忝喇!都係你衰!」
冇錯最衰係我,我走左之後,全間公司各位同事完全冇動機去搵食野,因為少左個人係度周圍撩
「做咩野丫!食個(自己填)先啦!做乜春丫頂!食野啦!」
今個禮拜就係衰呢樣野,搞到好為食果d同事,例如會計姐姐,坐唔夠兩個字就匿入pantry飲飲食食。返到黎先發覺,真係食肥人的地方係香港唔係美國,去美國咁耐餐餐係肥野炸野,就係唔知點解食極都唔肥甚至瘦左(...),一返到黎,就同會計姐姐一齊粗番幾寸腰。似乎,我都係住美國適合d喎!

返左黎四日,終於乜都趕好晒,回歸坐係度等放工的日子。劉Sir返黎喇。再返黎皆旺,聽,同埋聽。最近兩批貨(或者你唔知,Arising Middle Earth其實係兩批貨黎,我已經忙到唔係次次有貨到都有時間上網揚開去),實在係太-太-太無敵。亦即係,太-太-太過少人會買。冇pop野嘛。例如
「IN FLAMES新碟/LACUNA COIL新碟/KALMAH新碟/NORTHER新碟/ETERNAL TEARS OF SORROW新碟呢?冇?拜拜!」
(DRAGONFORCE新碟、DARKTHRONE新碟同KATATONIA新碟已經outdate了)
至於DISSECTION新碟,人人都話唔得,係咪真係咁差?老實講,我都唔係好樂觀,但聽多幾次甚至好多次之後先會有最後定案。歌方面,確係欠左d,好在仲有我鍾意DISSECTION之原因:木結他同結他solo,亦有d編曲法以前未試過,唔會好鍾意,但聽多左之後相信印象最少唔會差到入Hall of Shame先。所以,而家之DISSECTION對我黎講,衰唔晒、死唔去。

另外,再通知各位同事:
「記住TRHK係十點收舖架下大家!有同學試過十一點先撞上黎都夠膽死架!記得唔好阻住劉Sir收舖呀下你地個個都知劉Sir幾懶架啦!以後邊個十點之後先上黎買碟,每超時一個字買多一隻碟補數呀下!就好似今晚呢位模範同學噉!『出左糧就係用黎使架嘛!』」

近來睇過最有趣的新聞。


19/5/2006 FRI

「ZZZ...好眼訓...乜咁耐都未放工架!」

返左黎五日,三個展覽會已經乜都比我趕好晒做起晒,再次回歸訓住覺寫住野等放工的日子,即係正常上班日子。六點三準時撇再慢慢躝過皆旺,呢一晚又會咁多人上黎探契哥。仲好多奇人出現,連一群gothic/punk友上黎買extreme metal碟都可以發生。直坐到十一點,可以發現到左今時今日,真正有心買CD同試新野&唔出名band純聽音樂而唔係聽band果d,係第一印象完全唔屬於metal果d,而唔係越話聽metal、越係玩metal果d。當連所屬音樂性質完全唔同甚至係連「我聽metal」、「我好metal」的你見到都會問句
「你噉款都話係聽metal?」
之人都會買metal碟聽、搵metal野聽,但稱自己聽metal玩metal果班反而唔會做、做唔到呢樣野 - 你覺得download左隊band隻碟聽完再話比人知你識呢樣野鍾意呢隊band都算係支持隊band同metal就不需再作討論啦。呢個係一個非常負面、非常唔健康之現象。

再聽多左幾次DISSECTION新碟,暫時結論都係
「衰唔晒、死唔去。」
有幾首歌甚至幾鍾意忝,只係宣傳實在失敗:single同派台歌,都係屬於最差果堆。雖然對好多好多好多人黎講,呢隻碟絕對係未聽過已經會話
「一定唔X掂廢到仆街唔使聽唔使買!」
但我又唔會極力勸告你點都要試一試先聽一聽先至話係咪真係咁唔好聽,因為呢句說話講過好多次,好多玩得好好只係衰在冇乜人識冇乜人提之正碟甚至classic,真係有心去講去介紹都冇人會理冇人會聽(直至網上有人提起或者身邊朋友叫你聽,而唔係劉Sir介紹你聽或者你自己聽完覺得好聽),更何況係你身邊個個人都話唔好聽的DISSECTION新碟?
所以,唔好聽人。聽碟。

忽發其想:唔知如果我上forum講「我鍾意DISSECTION新碟覺得"Reinkaos"好聽」,會發生咩事?會唔會立即比(成班)人串「唔識聽野」?睇黎都唔會,睇睇到而家網上面都唔見有人會提「DISSECTION出左新碟」,或者討論「DISSECTION新碟點樣」,已經知道,呢d野已經out喇,真係出post的話甚至可能有人會問番轉頭
「乜野係DISSECTION?」
呢d老坑band對而家d人黎講,已經成為「唔知咩黎」,睇睇上年年尾今年年頭,HELLOWEEN同DRAGONFORCE一齊出新碟,個個都講DRAGONFORCE,有冇人提過HELLOWEEN?冇。除左
「乜野係HELLOWEEN?」
照計HELLOWEEN出新碟,點都大件事過DRAGONFORCE出新碟卦?但點解最後會係人人都只會講DRAGONFORCE,卻冇人理過HELLOWEEN?就知道,老矣。已開始有代溝矣。

又有樣野,好想玩,就係MACHINEMADE GOD "The Infinity Complex",一隻因為唔係Roadrunner出所以絕大多數人唔識/唔理/而家仲未聽過之metalcore,係近groove thrash、恆得黎冇solo而適可而止地breakdown之metalcore,亦即未完全踏入主流而只餘groove失去thrash果種metalcore,仲玩得好恆。除左thrash同death以外,個人一向同美式metal冇乜緣份,所以真正鍾意之metalcore band唔係好多,而呢隻係更少有地一聽即鍾意果種。聽完之後,更想玩。想點玩?唔係玩佢地歌我亦絕對唔夠班啦,而係噉玩:
「有冇LAMB OF GOD/CHIMAIRA呀?」
「有!有佢地新碟!」
「係?佢地有新碟咩?」
「有呀!聽下啦!」

然後播呢隻MACHINEMADE GOD "The Infinity Complex",絕對相信過大半數一定會話
「嘩!正呀!」
因為呢個的確係我試過咁多次播呢隻碟比搵LAMB OF GOD/metalcore朋友得到之回應,但當然咁多次「正呀」回應之後都係冇人買,因為聽過點正都冇用,當發現此GOD係MACHINEMADE GOD而唔係LAMB OF GOD噉就即走。所以玩果時我唔會講,而只會播。如果跟住係話要買隻碟(呢樣機會相信唔大),就會拎隻碟出黎。
「咦?乜唔係LAMB OF GOD/CHIMAIRA新碟黎咩?」
「唔係架!頭先播果隻係呢隻碟!你剛剛聽完話正果隻metalcore咪就係呢隻囉!」

跟住會發生咩事?亦好大機會係唔會買,因為隻碟好聽,但隊band唔係叫LAMB OF GOD/CHIMAIRA,亦唔係身邊朋友或者網上某人講果隊band,亦即係唔好聽,然後即時掟低隻碟唔買走人,之後或者唱多幾句
「超TRHK劉Sir昆人!」
唔記得晒自己係TRHK聽過咩歌,同果d歌好唔好聽。我真係好想噉玩,好想知結果會唔會好似我所想。
冇錯劉Sir講緊聽緊寫緊metalcore。成日覺得劉Sir聽metal而唔妥metalcore果班朋友,信唔信劉Sir一直以黎成日講住提住metalcore,係講緊本來聽(extreme) metal一見metalcore成為主流立即放棄(extreme) metal跳槽metalcore果班,同一味只顧聽最多人講最多人提最新最潮果dmetal(core) band果班,與各位朋友自己有關,而與劉Sir無關。


20/5/2006 SAT

臨走係公司食埋個焗肉醬意 - 只要果日間茶餐廳個餐有焗粉焗麵我一定會叫,分別係叫一個定叫兩個。唔係今日有得食肉醬意,你覺得我會唔會唔一點鐘即走?即落信和執埋遺失已久之劉以達《麻木》(再講一次,劉以達《麻木》、余力機構《快活》謝安琪《Kay One》,於我心中並列為三大心愛粵語唱片),又係開舖時間。似乎今日某幾位朋友幾得閒喎,十足唔使返工噉一早已經落到黎吹水同埋吹水,一吹就六個鐘。證明今日幾Q靜幾Q得閒。

睇DEATH DVD吹開,近排有forum有人問death metal,好多人寫左好多名,但DEATH呢隊,居然一個人都冇提過,好耐之後先有人提一提Chuck Schudiner,都唔知應該俾咩反應;有個客上黎,然後走左,唔知點解,有d香港人習性好特別,就係第一次見面,好多時第一樣做係話比其他人聽自己點樣識幾多野點勁過你,唔係「多多指教」而係去落人面抬高自己,一句講晒「我係型過你」,不過唔緊要,呢種態度TRHK同劉Sir受慣,同時呢個世界唔係好多人有呢種態度而真係有料囂得起(所以我永遠唔會囂,因為我永遠知道自己離有料仲差好遠),你覺得你屬於囂得起一類,不妨繼續,只不過見聞所及,用呢種態度對人對自己,一定唔會有進步,亦唔會受尊重;又傾番九龍城古事,當年九龍城時期d客人已經冇幾多個仲見到喇,一係唔知去左邊,一係唔再聽metal,由TRHK最開始傾到我呢個第五代sales,傾番大家點樣開始聽metal、當年點樣搵metal野聽、點樣摷到TRHK(有幾多人知道劉Sir聽metal出身同歷程?相信冇乜)...原來,噉就五年喇。六年都黎緊喇。


21/5/2006 SUN

超大雨。唔止TRHK冇人(呢樣就成日架啦),成座皆旺都冇人。好靜。可以靜靜聽野、慢慢寫野。一兩個客加多個入黎已經係搵CANNIBAL CORPSE新碟的brutal小妹妹(無論對metal之接受性、極端性同買碟之熱誠,香港女性慢慢超越男性)、玩軍服玩到成個公安(...)噉上黎的嘉樂兄、由band tee進化到籃球衫的樂爺、同埋坐左成個晏晝之後
「等左五年喇!正到仆街呀!」
終於買番SUMMONING第一隻碟之冷爺。睇黎差頭尾的我係時候走埋最後兩步集齊SUMMONING全套了。鍾意魔戒的metal友,不妨參照呢個方案:每個禮拜六/日落黎執一隻SUMMONING,用一個禮拜聽真一隻,由第一隻碟開始,第二三四五六七八隻噉逐個禮拜掃落去聽落去,掃晒全線聽完剛剛好兩個月,同時跟住樂隊歷史噉聽,聽住佢地點發展點變,可以聽真同聽真多好多野。呢個亦係點解我係鍾意一隊band,一定慳盡佢投資晒時間同錢落佢地全線之原因,因為只有噉樣去集中聽,同埋真係付出去支持,先會聽得到最多最真,一定多過只買最出名果一兩隻碟黎聽/只download佢地一兩首歌聽噉聽。只係有冇人會噉樣買碟法都成問題:你肯成個禮拜入面唔食lunch連晚飯都食平一半嘛?甚至,有冇人會買咁多碟都成問題。最重要係,你肯唔肯咁花時間去聽一隊band,特別在呢個唔係求聽得明而只求聽得多,隔兩三日已經上網「呢隊band呢隻碟呢首歌我聽過啦唔聽喇想搵新野聽有冇人有其他新野聽send俾我」之時代?

夜晚咁靜,Rock爺拎埋隻"Metak: A Headbanger's Journey"上黎,正!原來係大風大雨之今晚最大消遣。呢套戲係一個加拿大超級metalhead周遊列國拍成之metal紀錄片,講解metal由最開始至到八十年代之歷史、發展同文化,仲要係訪問左好多好多名人(如果你唔識得晒所有訪問之metal中人,就真係要落落苦功補補了),最重要係你睇呢套戲,會覺得呢條友、佢拍d野同佢揀d歌真係完完全全徹頭徹尾metal,完全唔假唔造作,基本上你真係想了解metal,呢隻碟絕對絕對要諗諗;當然,套戲仲有好多野覆蓋唔到,亦好多野講得較片面,更多學說/見解同我/你唔同,又全英文冇字幕,但,值得。香港第一水DVD已經接近冇晒,Rock爺呢野已經係水尾拎黎display果隻,第二三四N水應該好快到。有心朋友,行街時記得留意搵搵。
有興趣但(買完衫褲鞋襪袋唱完K落完網吧打完機瘟完女之後)「我都冇錢買CD/DVD」、「搵唔到邊度有得買」的朋友,記得download喇。就係因為而家同音樂有關之所有野都太容易得到,同好多野都要人地送到面前先會留意,上一代自己慢慢摸索探索果種樂趣同認真,同得到一首歌買到一隻碟會用一切去欣賞去珍惜果種態度,不復見矣。

呢排真係好Q多新聞。仲要單單都cult到爆。先有相信而家全香港冇乜邊個唔知的林尚義怒數無為青年,睇完段片你就知道咩叫MK仔:人後大大聲人前冇晒聲(希望在座各位唔係啦/希望在座「我好metal」、「我聽metal」的各位唔係啦)。相信呢單一定係本年最經典港聞!拍果條友肯定冇諗過手痕拍左呢段野,會變成香港2006年news of the year!起初睇呢個網以為
「丫玩野果條友都幾認真喎!玩都玩到扮足Wikipedia個網噉款!」
點知,原來呢單野係真係入左Wikipedia,比人拎左黎嚴肅夾認真地進行學術研究,實在係笑到喊抵死到喊!搞到我都想搵幾日搭68X,睇下撞唔撞到呢個阿叔同死飛仔!經此一役,呢條靚仔仲敢唔敢出黎行?
另一單,只同metal友有關:
芬蘭『moster rock』樂隊LORDI(真係)贏左Eurovision!?


22/5/2006 MON

超超超超超超超超超超眼訓。係眼訓到要匿入廁所訓所同倉庫訓覺果隻。真係好好好好好好好好好好眼訓。
「好在我上個禮拜已經趕好晒所有野,今日食完飯已經可以坐係度唔使做等放工,噉先頂得順!」(......)

基本上成晚只係服侍一個小妹妹,好brutal唔激唔聽果隻。
「我要閃靈新碟呀!」
冇(有留意閃靈動向自然知道點解隻碟咁難入),亦必然地劉Sir會試其他好多野佢聽,(pop) symphonic black、(gothic) doom、(brutal) death,試左好多。
「你之前有冇聽過閃靈d野?」
「未呀!」
「其實閃靈風格就係同DIMMU BORGIR、CRADLE OF FILTH、TVANGESTE呢d一樣,係編曲較靚較富旋律同帶少少gothic之symphonic black,佢地亦係受呢一類band形容而玩而家果種音樂。如果你係想搵閃靈,既然你之前未聽過閃靈d野,亦未聽過symphonic black同black metal,其實可以買呢dband其中一隻返去試一試。」
「我要閃靈新碟呀!」

之後試多幾首,發現自已鍾意brutal death多過symphonic black。
「好聽呀!俾多幾隊band我試下呀!」
「頭先試果幾隊band風格都唔同,有d行d,有dmelodicd,有d多變化d,你有邊隊特別鍾意想要?」
「我要閃靈新碟呀!」

所以,試左好多碟之後,都係空手而回噉走左去。因為有咩都好、d碟點好聽都好、自己點鍾意都好,冇閃靈新碟,有乜都冇用。呢個情況,經常發生,只要將閃靈果個位換成你想搵果隊band就可以。
樂隊名氣係咪真係好似你所想咁緊要呢?重要到未聽過佢d野只識佢個名都可以諗都唔使諗去買,連自己聽過覺得好聽同鍾意果d都要讓路放棄唔理?
好多時呢個故事下集係:隻碟終於到左,搵碟果位朋友即上黎,聽完之後
「嘩乜原來佢地d野噉架!我以前未聽過呢隊band架今次先係第一次聽!咁難聽!唔買喇!」
跟住走左去。唔好笑呀。呢個故事,真實發生過,仲要次數唔少忝。

好靜。所以可以夜晚Ant哥上黎,食埋麵吹水吹到差唔多十一點先走。如斯閒情逸緻,九龍城時期都冇乜試過。
...well,噉就當然啦。九龍城時期甚至初代旺角時期,八九點就收舖啦點會開到十點咁晏?好多時都係收左舖先成棚人走去樓下求祈搵間茶記搞掂。而且果時開舖開短時間咁多但個個客都搵野聽仲多生意過而家,唔係成日買都肯上黎試聽新野同自己未聽過d野,有幾可好似而家旺角時代又少人有人通常答句「你搵果隊band果隻碟賣晒試唔試其他野」之後個客半分鐘唔使已經消失我地繼續吹水咁得閒,得閒到可以兩條友食埋麵吹水吹到差唔多十一點先走?


23/5/2006 WED

「頂你呀你地仲係度做野?」
今日食完飯之後老細&老闆娘出去開會仲要「好遲先返」,兩個一出門口,兩位經理已經係度大嗌。
「四點前唔准做野!淨係准食雪條!」
呢句野係我狐假虎威地加既。之後我已經即時指派左會計姐姐落去樓下華潤買雪條(呢間公司癲架)。然後大家收到老細電話:
「喂!部電梯唔郁,停左係九樓同八樓中間呀!我仲要趕去開會架!快d落黎救我!」
「抵死!都叫你行樓梯架啦老細!你都有今日喇!哈哈哈哈哈哈!」
你試過困車立未?我就未試過喇。唔知點解我知道老細噉都撞到之後,寧捨開心,連條雪條都食得好味d。成間公司係度瘋狂地玩,經理話
「食完雪條,食支煙先!」
「仲食支煙咁少?食包煙啦X!」
實在係太得閒太開心了!老細一唔係度,成間公司都玩到癲!(冇錯,呢間公司的經理,頹廢程度其實同劉Sir差無幾),食完條雪條,再食多個lunch搜括返黎之粟米芝士火腿雞絲焗意粉(好明顯呢個唔係我自己果個,我果個一早食左!呢個係我叫會計姐姐自己叫,但lunch果時叫其他反正都係食唔晒一個飯盒的女同事分飯比佢湊夠一個飯盒等個意粉可以留俾我做下午茶,冇錯劉Sir非常地受女同事歡迎!),食完個意粉,身體健康,當然要食蕉啦。
「蕉都食完!連蕉都食埋喇我!仲有d咩可以做?」
仲有d咩可以做?...放工囉頂。

平靜的一夜,過左第一個鐘,靜靜地聽野 - 真係好靜。因為今晚呢度變左黑膠舖,播埋果d老坑pop/rock歌,趕走左唔少客。仲聽番一首70年代超經典instrumental,呢首歌當年之地位好比現今DREAM THEATER/LIQUID TENSION EXPERIMENT最掂最出名之instrumental。
「嘩!咁正?邊首歌呀?咩人玩架?」
「...不如你聽番DREAM THEATER/LIQUID TENSION EXPERIMENT算啦。你會好失望架。」

原因之一,係結他手唔係John Petrucci,鼓手唔係Mike Portnoy。亦係致命原因。


24/5/2006 THU

超忙的一天。唔使開舖,唔代表會得閒。今個月開始,舖頭以外之時間會仲忙過開緊舖。(呢樣野其實好正常架喇,而家之TRHK有幾靜大家都知?)


25/5/2006 FRI

返工等放工的日子真係開心。坐係度唔使做同埋寫野寫野&寫野,好耐未試過喇!

聽碟聽足成晚。一隻接一隻噉聽。即係,perfectly靜。


26/5/2006 SAT

寫野寫野同埋寫野。永寫不停。(「咦,乜你返工唔係要做野架咩?」)

今晚TRHK見唔到我,我今日放假。出尖咀,必定要上上HMV,新HMV。見到而家連HMV總部都可以縮成噉,就知道唱片同音樂實在難撈矣。
紅燈山丘中好耐未試過咁齊人。應該話,我好耐未出過黎?真係好耐喇,而家聚首一堂,大家話題都改變晒,都係講做野喇。
下次紅燈山丘中一聚,記得兩個禮拜前通知唔該,同埋盡量星期三晚。冇計,劉Sir真係想放假都要好耐之前plan定book定。


27/5/2006 SAT

「點解呢朝可以一封email都冇?又要我寫野寫成朝?搞錯!」

所以,今日準時一點走人全公司最早走。好早上到舖,因為有貨到

5=2-7

DISMEMBER上次已經到晒全線,而家連之前好多人話要搵佢地d舊碟的HYPOCRISY都齊全套,NILE同DEATH亦差唔多齊晒,如果「我想搵death metal」的各位仍然上到黎都係「冇我想要果d野」,噉我相信只有death metal的TRHK真係唔會滿足得到非要death metal而只係要death metal band的各位。(前例中將death metal改成(自己填一隻metal style在此)一樣適用)
近排幾位朋友最大娛樂係鬥快買齊SUMMONING全線,不過勝負已分 - 當然唔係我贏我仍仲差頭尾,我有錢都執左而家d死貨先啦。大家聽同買SUMMONING不亦樂乎。有一條共同問題:
「點解連SUMMONING咁正咁經典都會冇人買,到左咁耐得我地幾個買,而家仲可以成棟係度?」(前例中將SUMMONING改成(自己填一隊本身係外國好出名又或者好高水準但身邊某朋友或網上某君冇叫你聽的樂隊個名在此)一樣適用)
見到thrash metal而家都可以排滿一行,唔知笑定喊。
「咦?DESTRUCTION、DARK ANGEL、SLAYER、SEPULTURA、AGENT STEEL、ANTHRAX、EXODUS、FLOTSAM & JETSAM、LAAZ ROCKIT、POSSESSED、NASTY SAVAGE、TESTAMENT、HEATHEN、HIRAX、MEGADETH...好多好多thrash野經典同thrash band,都係各位朋友話好想聽好想買一定要入,但點解入左之後,差唔多一隻thrash野都冇賣過,到而家呢dband全部都成棟噉放係度?如果大家真係如口中所講咁熱愛thrash,呢dthrash碟幾個月甚至一個月內,應該已經一隻都冇剩至係,而唔應該好似而家噉可以成個月一隻thash碟都賣唔出喎!唔通呢dthrash metal唔係你要果種thrash,就如『唔係德國thrash唔算係thrash』?但又唔係喎,DESTRUCTION隻"The Antichrist"同新碟到左幾個月,差唔多賣都冇賣過喎!又或者大家其實只係想要免費thrash?又莫非,thrash metal又『潮』完?」
「潮」呢樣野,確係好重要。唔止thrash,例如melodic death/metalcore,其實大家好鍾意聽的metalcore好似AS I LAY DYING、HEAVEN SHALL BURN、THE BLACK DAHLIA MURDER、TRIVIUM,根本就係玩緊AT THE GATES同埋初至中期IN FLAMES、DARK TRANQUILLITY呢d瑞典melodic death,但好老實講句,論深度同旋律同結構,metalcore確係及唔上瑞典melodic death,模仿者有幾多可以超越原創者?但一路以黎就係冇人會搵呢dmelodic death聽而只會搵metalcore野聽,就係因為metalcore先係最多人講最潮話題,睇IN FLAMES可以全線放係度,而每次上黎問metalcore的朋友係連望都唔望試都唔試就知道,「潮」呢樣野,確係好重要,甚至比音樂本身重要。
其他「潮完」例子,包括之前萬九幾人話要點知到左之後接近一隻都冇賣過的IMMORTAL & MARDUK、好多人話「想追番舊碟」的HYPOCRISY,有一期因為雜誌講而突然好紅的GORGOROTH,同又係突然好紅點知到左仲要係到2 in 1超值版都冇人理之ABIGOR,同個個都話要但一有人話「冇以前咁好聽」即個個都話唔要的LACUNA COIL新碟。當然仲有名震一時的gothic metal明星TO/DIE/FOR啦。以上只屬冰山一角。

今次返左全線HYPOCRISY,又諗番起果個故事,同上個禮拜日之「聽真SUMMONING」相呼應。話說上一次返全線HYPOCRISY,一位HYPOCRISY fans真係每個禮拜死慳死儉,一個禮拜執一兩隻,捱左個零兩個月已經買齊全套HYPOCRISY。因為
「我係佢地fans,我鍾意呢隊band,所以支持佢地。」
到左呢個年頭,呢一類朋友已經買少見少,而家真係一隻手數得晒仲有剩,因為聽metal歌仔聽mp3就得,就算真係「聽一隊band」而買碟都剩係要佢地最出名果隻就夠/算,最佳例子:DARKTHRONE。其實DARKTHRONE入"Translyvian Hunger"一隻就夠,因為全線訂左返黎咁耐,個個都只問呢隻,呢隻冇即走,其他果七八隻睇都唔會睇;SUMMONING亦係,其實入"Stronghold"同新碟就夠,根本唔使入其他碟,因為個個都只係要最出名果隻,同有新碟出時要最新果隻,其他果d碟根本唔會有人理/買。因為而家好多人聽歌,唔知點解只在乎曾經擁有,跟住可以話俾人聽「呢隊band我聽過」然後「我聽過呢隊唔聽喇想試新band」就夠。乜呢d說話咁似聽(自己填一個流行歌手個名在此)果d人語氣?乜呢種聽歌態度咁似追最新K歌果dK迷?
所以點解隔左成兩三年先再入HYPOCRISY全線:有幾多只在乎曾經擁有的朋友「鍾意一隊band」時真係會有心買碟儲碟架?最簡單:你會唔會真係死慳死儉噉去買碟先?記得「死慳死儉」=「lunch都唔食機都唔打唔買乜買物唔玩唔揮霍除左返工返學同生活必需要使d錢其他全部錢留番黎買碟用」喎,而唔係「我想慳但食飯打機買乜買物玩完揮霍晒之後一蚊都冇剩想慳都冇得慳點買碟」喎!只在乎曾經擁有的你會唔會、肯唔肯先?

「點解咩都講錢咁商業?成日提住錢提住買碟,仲敢話自己underground?聽音樂亦唔係一定要買碟!」
呢個亦係一個好特別的香港樂迷心態。知道一隊香港band出碟,好多人都會上網呼籲:
「某隊香港band出碟,大家記得買碟支持佢地!」
就係因為知道一支地下樂隊生存好難,出到碟更難,而俾錢買碟已經係態度上同經濟上支持左隊band,同時買碟亦係最直接支持到隊band之方法,你自己都知,夾band都要食飯架大佬,而且真係咁肯花心機俾錢去整隻碟出黎,心知自己係需要同必要掏腰包支持。但知道一隊外國band出碟,上網呼籲果句係
「某隊外國band出碟,大家記得send俾我!」
而有人叫聽外國band買碟唔好download時,就會撻出上面「點解咩都講錢咁商業」果句,加多幾句
「我都冇錢買碟唔download邊有得聽?」
為何對香港一種態度,對外國又係一種態度?莫非外國band唔使食飯?同埋,好坦白講,賣CD都係生意,生意就係關係到錢,唔賺錢食飯,都起碼要維到皮,同時細label賣碟已經賣得少,係咪真係要完全唔賺錢甚至唔維皮噉去賣碟真正完全做善事噉做完全唔商業,先至正確?就好似TRHK上年有一排只入最indie最underground果dband,係差唔多一隊大路band大label band都冇,搵pop野的朋友唔會上黎買野,最indie最underground的朋友上到黎一樣唔會買野,因為冇想搵果d野,亦即係其實唔多indie唔多undergroundd野 - 事實上的確係越係話聽/玩extreme metal之人越唔會試underground野,同自身定位相矛盾,唔信的話不妨留意一下。但會話「TRHK商業」果班果段時間反而唔會嘉許一下「TRHK完全唔商業絕對underground」。如果TRHK之後真係唔賣番d大路野繼續咁underground,果時就真係夠晒underground夠晒唔商業,但結果就係大家都唔會再見到TRHK,因為一早執左笠。同埋,如果真係可以咁商業賺到咁多錢,點解我仍然未係full time metal?
如果仲係覺得TRHK商業的話,不妨留意:你有冇見過有label會明知蝕硬本都要搞外國band黎香港開演唱會先,繼六翼天使,之後King Eternal Live,再DISAVOWED

同埋,有樣野係好有趣:唔知點解,好多話係聽緊地下音樂的香港人反而會感覺自己係身處半山區而唔係地下。最經典例子:
「你地有冇MEGADETH賣?如果你地唔係賣八九十蚊一隻碟,點解我要黎你地度買去第二度買唔好?」
香港地就係一個咁有趣的地方。身於underground、「我好underground」的各位,唔知點解話自己身處underground,對人對事思想心態同對音樂之態度反而咁主流咁商業咁上流咁...MK。同其他人講果時會叫人用心用錢去付出支持underground,但到自己要付出果時卻咩都要用錢同「型」黎衡量,總之你唔可以/唔肯以善堂心態用蝕本價賣碟(俾佢),唔係要乜有乜仲要乜都平靚正,又或者黎幫襯時冇當正佢係大老細當佢係神咁拜,乜都要就晒佢乜都唔可以錯要100%同佢所想一樣,有咩唔順佢眼唔順佢意之前做過幾多野都唔計即刻鬧到九彩,總之你達唔到所有(不合理)要求就係你錯,而唔係佢錯或者underground錯,
「你話你地係專賣metal碟丫嘛!為左metal,點解仲要標咁貴賺我地錢?」
只差未鬧點解唔專函通知佢上黎CD免費任拎咁錯,因為為左metal,就應該為左各位大老細而咩錢都唔收兼俾番錢大家至係嘛。點解對自己一套同對人地一套會咁相反咁唔同咁矛盾?如果真係屬於underground,冇理由唔知道underground有幾難捱有幾辛苦,亦冇理由唔知道獨立band唱片幾難做生意額幾少幾難經營,特別係呢個mp3年代呢d大大聲人士本身都未必會買碟。點解仲會預期一間underground label只收你一星級價錢而提供到五星級服務之後甚至要再倒貼番俾你?Underground唔係應該成個community一齊捱咩?幾時變左人地負責捱兼要幫你捱埋但好野留晒俾你福你享晒尾彩你拎晒?亦最簡單:你肯唔肯黎緊個月成份人工扣完車錢飯錢之後全部捐晒出黎支持你鍾意果種音樂?甚至再簡單:你肯唔肯黎緊個月一隻碟一首歌之mp3都唔download唔叫人send俾你?對人地要求咁高,係咪應該都對自己要求一樣咁高,而唔係寬己嚴人?

如果你仍然覺得「一間打正旗號賣metal之香港underground label有乜理由唔可以為左聽metal的我地八九十蚊賣一隻碟等我地唔使捱貴碟而要賣百幾蚊一隻賺晒我地d錢?」不妨落黎TRHK搵搵劉Sir,佢非常樂意同你講解晒成個underground metal市場同交易情況同各種成本資料,等你知道點解一隻metal碟「賣百幾蚊咁貴賺左你咁多錢」但結果賣左一隻收左百幾蚊但幾近冇得賺,同點解「賺你咁多錢」之TRHK全體職員仲要日頭做一份工放工再上TRHK開檔賣CD收完舖返到屋企仲要開電腦上網做多其他更多野。咦,係喎,有冇同你講上次DISAVOWED場騷TRHK賣左幾耐碟儲左幾耐錢先叫做搵夠本錢搞得成,仲未計要同日頭份工老細講請假準備同搞騷d野,同搞呢場騷根本冇錢賺甚至要再貼?

所以,香港各位「明哲保身」的metal(型)人,都會同TRHK/劉Sir保持距離。不妨留意一下。(只希望您唔需要留意自己)


28/5/2006 SUN

今日第一件事係睇呢個午夜場《X-Men III》。雖然某程度上係因為睇左頭兩集冇理由唔睇埋第三,但冇睇過前兩者都應該會睇,因為我一向覺得《X-Men》係最成功同最值得細味之美國漫畫之一。第一集好明顯只係用經典漫畫人物黎賺錢、套路太過典型荷里活之商業動作片;第二集有番d驚喜,雖然好明顯只係用黎做第三集之引子;黎到第三集,除左角色之外已經同原著完全係兩個世界,通常漫畫或者game改編電影都係因為噉而比人媽到九彩,但《X-Men III》自行編劇,難得地原創劇情有條理而有意思,係難得地有野諗之美國動作片。劇情好左,但打得好少,唔少你覺得重要之角色鏡頭係噉倚映一映出一兩招之後再冇見過,d新角色亦完全係可有可無因為其實打極都係狼人一個打晒,其實張海報咁多個人cut剩三四個已經夠晒,有d就算從頭到尾都冇出過都唔會影響到套戲,例如Angel,而且成套戲快到都冇乜描寫過d新角色,冇睇上兩集更加係對好多野完全唔了解發生咩事,因為根本冇交代番舊人物d關係,確係典型荷里活。但動作場面諗同做得好好,拆橋同最後果段睇荷里活動作片睇左咁多咁耐睇到悶都仲會「嘩」到出黎,始終X-Men本身就係天馬行空就要係咁誇張同漫畫化先至係,呢樣野亦係其他非科幻動作片及唔上。絕對係三集之中最好一集,雖然仲有好多野待改善,例如你會發覺磁力神同教授廿年前同廿年後個樣冇乜分別;發現磁力神一早知道自己超勁一出手就贏晒都要推晒自己班靚出去行先死先,一出手做底晒d人再派d靚執手尾唔係更有效率更有效益咩;發現好煞有介事地整番女主角出黎,其實純粹搵戲黎做;發現今集終於有有狩獵龍好開心,但結果得個頭同個影仲要完全唔關事;發現d新角色有同冇都冇分別,根本角色本身同佢地d技能差唔多冇發揮機會;同埋,唔知點解逢係做壞人果d變種人都係亞裔,普遍黎講個樣都係較樣衰或者較MK,亦死得比較快。
臨尾加一句「片尾有玄機 擁躉請留意」,結果大家睇左成個字片尾之後...得啖笑。其實唔睇最後個「玄機」你都知道一定會有第四集,因為伏線實在留左好多,同套戲太快好多野根本未交代晒。只差今集之後個劇情仲可以點接落去同幾時開拍遮。希望第四集真係有X-Men對狩獵龍啦唔該。

訓醒已經夠鐘上皆旺,都係得個靜同埋得個寫。係靜到隔籬玩具舖都廢事做一早收舖算。月底糧尾係難捱d。


29/5/2006 MON

全力寫野的一天。早上晚上皆是。

而家TRHK最開心環節係一班傻仔匿係舖頭食大家食聽歌吹水。


30/5/2006 TUE

繼續寫。寫呀寫。難得再有乜都唔使做的風光日子過,立即繼續寫。寫呀寫。

六點準時走,因為九點半有飯開。冇錯係九點本開飯,仲有三個半鐘,本來係行去尖咀搭船過灣仔再行去銅鑼灣夠晒平夠晒健康亦夠晒浪費時間。結果(一如所料地)變左上TRHK話走唔走坐左兩個幾鐘再搭地鐵過銅鑼灣。所以咁肥。
你班死靚仔肯出黎呢咩?好耐未打過邊爐喇真係,上次打邊爐就係同你班友仔打,冇見咁耐,各位同學仍然冇忘記劉Sir的教誨:
「讀書呢家野,幾時都讀得啦!梗係要玩左先啦!」
所以我鍾意同你班友仔打邊爐!下次都要黎呢間寧記打,上菜快多野揀服務好又平,抵玩!掂呀!當然有人請埋劉Sir打就更perfect!


31/5/2006 WED

雖然今日放假,琴晚打完邊爐都一早返屋企,因為:

聽TRHK批端午節新貨包你耳痛

漏夜都要出埋個貨單佢。有朋友收到之後,話:
「睇呢張貨單,就知道大件事...呢批貨可能得你一個識欣賞。」
呢樣確實係。呢批貨有超多野係我見到會即時笑爆兼俾錢,但玩得好但唔出名之death metal band從來冇人會要 - 直到網上有人講起果時。但相信呢dband唔會有幾多人會提,雖然呢批貨當中有唔少係屬於必備經典,係聽呢種音樂必買必儲果種。所以睇睇今日賣左d乜,都知道呢位朋友所言非虛:基本上新呢批貨確係接近冇人會買,唯一一隻我諗到會賣得出只有AT THE GATES因為較多人識,其他果d一隻都賣唔出完全唔出奇,所以上黎買碟的朋友都係執上兩三批貨,新呢批結果真係得我同圍內幾個人同一少撮人買。好似一位朋友所講:
「CATHEDRAL都入全線?呢dband而家邊有人搵架?而家聽doom果d都唔會聽佢地啦!」
有人搵。咪我囉。
所以逢係聽到耳痛果d新貨日子,都唔會有生意。

今晚上黎的朋友,有幸見到劉Sir表演點樣一隻筷子食麵。食完隔籬舖又請食pizza,噉冇計啦我都唔想食架真係但咁誠意拳拳地請我食咪食囉跟住Henry哥上黎又醒多個雪糕噉唔好意思推啦!(「...X!」)
所以劉Sir咁肥!


1/6/2006 THU

前日已經頹成噉,今日可以忙得去邊?加埋老細晏晝走埋兩點之後冇皇管,仲唔一面聽歌一面訓覺一面寫野咩???

夜晚,又是大家食吹吹水的一夜。我鍾意。傾到十一點幾十二點皆旺都熄燈拉閘先走更鍾意。


2/6/2006 FRI

今日其實幾多野做,因為要將一超大份英文野翻譯做中文email返工廠,非常懶地用donline translator算數點知唔用好過用,你知唔知乜野係「正義垃圾」、「火搬空鑽子」?(好似日本動畫)即係要自己一個一個字譯,噉就譯足成日。勁悶。悶到爆。所以老細晏晝出左去,仲唔一句「經理我要食下午茶」立即衝落樓買雪條食咩!(冇錯呢條友真係好鬼衰仔)

今晚發生過兩次。
「有冇AFTER FOREVER?」
「有!」
「有冇"Prison of Desire"同"Decipher"?」
「呢兩隻都冇,暫時只有"Invisible Circles"。」
「哦。」(即放低)
「其實呢隻都係佢地玩得好之一隻,概念性比以前更高,亦包括到佢地所有特色好似男女聲、合唱團同四重奏,其實鍾意AFTER FOREVER的話呢隻一樣好聽。」
「都唔係頭兩隻!呢隻都唔好聽!」
「噉你有冇聽過呢隻?」
「冇架!」
「噉你又知唔好聽?」
「人地話架嘛!」
「噉你又知佢地頭兩隻好聽?」
「冇架!人地話好聽架嘛!」

如果你話因為「唔係AFTER FOREVER頭兩隻」、「唔係佢地最出名果兩隻」而唔買"Invisible Circles",我都冇野好講。但大前提係,點都應該聽過佢地d野,先會講得出好聽/唔好聽呢樣野卦?唔會聽都未聽過d歌已經可以講得出「呢隻唔X掂」卦?都是前金惹的禍,好多人成日提住「AFTER FOREVERXXX」,但講到點好點正點一定要買要聽,都係因為睇完前金,實際上大大聲果時有冇聽過?相信近零。好坦白講,如果前金網主有時間的話,相信佢會好似"Prison of Desire"一樣寫呢一隻"Invisible Circles",話晒係progressive symphonic gothic metal大作喎。佢唔寫,只不過冇時間遮,前金已經兩三年冇update過喇。或者只有到佢真係寫左果陣時,先會有一大棚人衝上黎
「唔該有冇AFTER FOREVER呢隻呀?呢隻我未聽過架但人地話呢隻好聽呀所以我想買!」
呢隻,就係AFTER FOREVER第四隻碟"Invisible Circles",亦係當年各位大大聲見人就講「AFTER FOREVER得頭兩隻碟好好聽但呢隻千祈唔好聽唔掂架」呢句入面的「呢隻」。
同一個情況亦發生於ESTATIC FEAR上。呢隊bandd野,絕對唔係易入。但好多人搵,又係因為前金有寫。但搵果班當中有幾多個真係知咩黎,除左知佢地有人寫身邊朋友話要聽好似好紅好正之外?係唔知道幾多。所以會有好似今日呢個情況出現:
「有冇ESTATIC FEAR?乜話?原來佢地係doom metal?」
跟住其他一隻碟都唔聽唔試即閃。其他野唔係ESTATIC FEAR嘛。對好多人黎講,你唔俾呢隊band佢地聽,佢地係呢世都唔會開始試下接受doom metal,即使已經有百幾隊不同類型的doom metal band放正係面前等緊各位大老細試試。而真係訂得到,結果可能同頭先果位朋友一樣,到左先知道
「原來ESTATIC FEAR係doom metal?」
「原來ESTATIC FEAR係噉?」
「原來我唔鍾意聽ESTATIC FEAR?」

跟住就唔買唔聽走左去。


3/6/2006 SAT

我愛星期六。特別係好似呢個星期六呢d一朝早返到去開機發現一封email都冇野又琴日已經做野唯有食住早餐訓下覺上下網寫下野等一點打鐘準時放工。我愛星期六!

考試卦?唔係好多人。有一位仁兄上到黎,喋喋不休向身邊朋友講出一大堆耳熟能詳的家傳戶曉名字。之後,舖頭播一隻碟,
「呢隻正喎!咩黎架?」
就係之前好想玩果隻MACHINEMADE GOD "The Infinity Complex"。拎起隻碟,望住思考四五秒,過程沉默,因為呢隊band絕對唔耳熟能詳同家傳戶曉,雖然佢地玩得好,但唔識。之後立即放低隻碟,繼續喋喋不休向身邊朋友講出一大堆耳熟能詳的家傳戶曉名字。然後走。相信今日之後,唔會再見到呢位朋友。
所以點解咁多人唔會上TRHK。呢度絕對唔夠耳熟能詳的家傳戶曉名字,因為呢d「名字」咁大路咁主流成本價勁貴唔係可以成日存貨。所以TRHK只有玩得好同多元化的獨立音樂,因為唔耳熟能詳唔家傳戶曉所以唔會有人聽的好音樂。


4/6/2006 SUN

係咪人人去晒遊行呀?今日可以無間斷連續聽左三隻碟。最過癮係有兩條友行上黎之後「請你食薯條」塞左盒麥記薯條俾劉Sir之後走走(我鍾意呢d奇遇),同埋有個白髮古稀的阿叔睇完《獨立音樂》則廣告之後專誠上黎TRHK買碟。冇錯,係一個白髮阿叔上黎買metal碟。一睇就知道七八十年代大果d阿叔。
「我地果個年代,都唔知幾鬼多人聽metal!而家我仲keep住聽metal架!睇書見到你地舖頭廣告咪上黎囉!」
上黎就係買DRAGONFORCE新碟"The Inhuman Rampage",亦係2006年最重要metal release之一。會揀呢隻,係因為聽過佢地第一隻碟"Valley of the Damned",絕對重拾當年聽metal之亢奮,見有新碟出上黎執番隻high一high。成廿幾三十年仲堅持metal,非常鍾意呢個阿叔,難得係老而彌堅,仲keep住有留意到而家metal界個情況,唔係一個老野點會識搵DRAGONFORCE呢隊後生仔band?至於阿叔點解咁多power metal唔揀而揀DRAGONFORCE,其實好簡單:英國嘛。果個年代,邊個唔係聽英國band大?而佢鍾意DRAGONFORCE之原因,係因為佢地唔係power metal,而係NWOBHM。好多阿叔鍾意DRAGONFORCE(冇錯,呢個唔係第一個買佢地碟之阿叔),就係因為聽NWOBHM大,而DRAGONFORCE比較下確實唔似聽開dpower metal而似英國野更多,所以食英國野大的佢地自然而然地勁受DRAGONFORCE呢隊新生代NWOBHM(我眼中另一隊新生NWOBHM,係BIOMECHANICAL),所以隔左廿年,都會追黎聽,
「有果種metal感覺!夠晒feel!」
我鍾意。阿叔會從NWOBHM聽到去power metal,就係因為果種feel。但有幾多後生仔會聽完power metal之後會聽番去NWOBHM?會調轉頭去聽番一d都唔潮的NWOBHM?尋根了解番身邊冇人叫你聽的NWOBHM?所以我鍾意同阿叔級的metal友吹水多d,雖然我講新野佢講舊野(必須要面對的現實:唔係果個年代成長,就真係冇果種感覺同知少好多野),但大家可以係對方身上找到當中之雷同再共同研究,好似NWOBHM同Power Metal兩樣野,傾一陣已經可以討論到研究到好多野出黎。所以我非常歡迎各位阿叔上黎。但對住而家的metal(型)人,呢樣野就做唔到。我怕係而家d大老細面前出聲,會比人串:
「一齊討論一齊研究?你同我收皮啦你有我識咁多野咩!」
所以你每次上親黎TRHK,會發覺最沉默果個係劉Sir。同其他專家比,劉Sir完全未夠班唔敢嗲嘛。

「劉Sir呢?劉Sir去左邊呀?」
「去左叫雞呀佢!」

實在係太太太靜,所以107+108=三條友加剛剛好係落order時蒲頭的二寶樂即係total四件決定食街,外賣仔當然係我。一個128蚊餐四條友分,絕對係唔夠食啦,尤其是其中一個係自己已經要食一桶先夠喉的劉Sir!星期日往往係最合皮的日子,特別係呢d成個商場人影都冇個的日子,即係星期日咁多茂利上黎皆旺108已經係癲佬竇黎架喇,但成個場都冇生意時連107都走過黎湊熱鬧,自然係嘈到拆天加生人勿近啦,見今日個個都去晒維園64燭光晚會,我地唯有留係度皆旺107&108燭光晚餐,太靜喇!所以要食雞!我鍾意!成班友食到癲左(加靜到癲左),立即衝落樓下茶餐廳:
「拿!茶餐廳!你地成日話叫乜野食都得丫嘛!聽住喇!我要一個福建炒蜆加多個沙嗲牛肉粥要加底兼炒底記得要乾炒!」
跟住比個廚師大番轉頭:
「好!係咪我炒到出黎你就食先?」
即刻肴晒底,頭望地下樣衰衰急急腳走人。


5/6/2006 MON

好忙好忙。好忙。

「聽咩呀?」
「聽DECAPITATED!」
「正喎!」
「係呀!好Q正!聽到唔想訓!我決定聽晒先訓覺。」
「早就應該啦你!」
「係呀!真係聽晒先訓!」
「隻DVD呢?睇左未呀?」
「仲未呀!不如聽晚上黎一齊睇!」
「好喎!聽晚等埋我!」
「聽晒DECAPITATED全線噉又四點!要訓喇!」
「聽埋CRYTOPSY全線啦!」
「聽完已經天光,唔使訓直接返工都得喇!」

從以上對話可見,香港有d人真係好得閒,完全當正自己唔使返工。但呢d已經係琴日之事。今日仲激。皆旺閂晒門閂晒冷氣完全唔係問題,唔係因為十二點幾收到舍妹電話要幫佢買晚飯(冇錯係凌晨一點先食晚飯,呢家人絕對唔正常),睇怕唔傾到兩三點唔會走。已經當正自己唔使返工噉。此情此景,差左幾支啤酒。