我會嘗試活下去。
Weekly Reviews:
All reviews here勁呀!今日番到學校我都唔敢相信!我居然係開門果個,番到黎仲可以大大聲指住仲要遲我半個字番之阿姐
「都知你遲架喇!所以知道老細會一早番黎,今日我七點幾就番到黎幫你補鑊架啦!但係你好彩!老細未到!」
當然啦,如果唔係老細終於一早番黎,我呢d咁唔識死點會搭正九點就番到學校?結果我專登搬定一大疊file上檯,阿姐拎定晒地拖掃把碧麗珠出黎,之後...咪就係兩條友坐係度你眼望我眼囉。梗係唔係做野啦,野係做俾老細睇架嘛都未見人使乜咁搏?大家嚴陣以待,等一聽到電梯聲立即拎起晒d搵食架生開工,點知兩隻野坐到十點鐘差唔多訓著,老細唔多見,實Q就一件。噉樣落去好似唔多對路。
「............不如做野囉。」
「........................哦。」
今日出屯門,做親呢度係勞氣d,但出左幾次d人開始認得,都叫做唔使嘈太多有時企起身(扮)兇d人立即靜晒,可以安安心心打野。今日最正係尾二果堂係空堂唔使上,所以頭先晏晝唔食野買定幾個麵飽,就係等呢堂空堂可以姿姿悠悠食住包打野,咪就係呢段段記囉,一面打一面清個keyboard上面d麵包碎真係麻煩。但都唔夠另一個同事正,佢上埋呢一堂就走得人,即係我嘆完呢堂空堂佢就放工,灰。
到左八點搭二,我已經set好晒所有野,出面dstaff又係噉趕人入房猛咁大嗌「今堂要準時開始!」點解?咪就係為左準時開始。通常每一堂都會超一個字半個字,積埋積埋到最後可以超成四五個字,難得最後一堂前冇堂,last一堂又差唔多冇超時,為左可以早d收工大家合作無間,令到課堂可以準時八點三開始準時九點半落堂,臨落堂一早執好晒所有野部署定落堂點樣可以最迅速撤退,今日破紀錄搭七未夠已經打卡走人!幾威水!係威係勢之際,另一個同事打電話黎:
「咦?終於打左卡呀?我頭先八點半打左而家係馬鞍山食緊宵夜喇喎!」
今日之結尾,都幾意料之外。我係好容易原諒到其他人,或者呢個唔係好處而係壞處,我好人,但係太過好人,所以只有如斯田地。雖然身邊人都好樂天知命,但無論其他人點唔介意,我都原諒唔到自己、面對唔到你地,最唔樂天果個反而係我。
到左今日,正正半年。我已經咩都唔敢諗,唔敢回望,亦唔敢展望。
我會嘗試活下去。
好開心又有日dayoff。唔係番工日子,但十點已經起身,想訓番都訓唔到。過左幾個月朝九晚十生涯,而家做到無論之前果晚幾遲訓,第二朝無論使唔使做最遲十點都會自動彈起。我都唔知噉樣係好事定壞事。
咁早起左身冇咩好做,唯有落街放下狗(正確黎講係我比佢放,鑊鑊都係一落到去隻野已經衝到去街口要我追番番黎),順便幫老豆買報紙&幫舍妹買lunch - 冇錯,十一點幾就食飯,好明顯聽日考AL Econ溫到傻左。考A-Level咁大件事我呢d阿哥點會唔幫拖丫!所以放完狗食完飯立即閃出旺角,廢事留係屋企焚機嘈住佢溫書,對得多又眼冤,無謂啦!
清明時節,一眾孝子孝孫紛紛向先人追思。
「咪係囉!清明時節,仲上咩band房丫梗係上山啦!清明節夾band咁不孝架d人真係!」
今日晏晝有兩條友大大聲嗌仲愈嗌愈大聲,因為要同band房入面支結他同個鼓佬打到發晒癲果套鼓鬥嘈。係啦呢個世界真係好鬼多不孝子,最起碼有兩件先,或者得罪先人今日十分之邪,首先今日一早同事B打黎搵我,舍妹幫我接左,
(呆滯地)「喂?」
(平淡地)「喂,唔該劉義丫。」
(呆滯地)「...邊個劉義?」
(大聲地)「果個劉義囉!」
(呆滯地)「......邊個劉義呀?」
(憤怒地)「果條仆街劉義呀!」
(激動地)「痴X線!」(cut線)
冇錯,連自己阿哥係邊個都唔知,好明顯聽日考AL Econ溫到傻左。之後上到band房,阿姐劈頭第一句就係
「喂做乜打極電話都打唔到俾你?打極數碼通都話個電話唔得喎!拿我冇抄錯你電話架!」
仲即場打一次。神奇既事黎喇,佢打左十幾次都「唔得」果個電話今次一次就通!(「咁好玩,我又打!」同事B曰)喂,我個電話全日都冇響過喎!仲有,我係用Sunday架喎!好驚呀!
冇錯,兩條不肖子今日就係band房過清明,終於番番黎中房,有番部keyboard當堂多好多野玩,本身d歌又玩到變晒樣,而家次次上黎玩完都(好似)好Q多新發現。而家最想玩好,反而係keyboard。我要練番結他!我要練番琴!我要練埋bass!
夾完又係落一落飯堂,但今次full左迫住要去第間食米線,之後又係行街時間旺角>佐敦>旺角。差少少又過番佐敦忝呀,因為又有飯開,但打死都唔制最後走番九龍城路邊雞食。係啦dayoff架嘛今日好難得d人又無端端被兩條茂利要脅出黎食飯,個場面正正好似劉化灰噉既款。仲好食唔食食路邊雞得果幾個送一個瀨粉都要一人一舊水唔係卦?下次都係KFC算啦都係雞遮仲要平大半喎!
大家最關注,不外乎我地自夏威夷流亡歸來之阿冷爺(冇錯,每次講起佢實會提實呢一段史實),入到Hong Kong Records喎咁開心(但當然唔夠入Trinity Records Hong Kong咁開心啦),又的確係好難唔羨慕,你話人工低(話「未夠高」會好聽d)又好冇(乜)前途又好,起碼係自己興趣先,真係做到過左試用期之後買野仲要有得拎折喎(即係到頭來賺極都唔夠蝕番比公司),打死都要做落去啦唔係第時我買碟邊度有得平呀!放心啦阿冷!你入去個倉同我摷摷再入電腦同我搵搵,見到有咩正野(無聊野都得),查到可以訂到咩碟咩貨搵我,我(地)實會極力支持多多幫襯力谷你做Hong Kong Records本月之星plus最佳新晉sales!而且可以寓興趣於工作之外,最重要係做得開心,起碼對住d人都叫做似番人而唔係契弟或者XX,同埋唔算太多野做&太大責任,「淨係棟係度乜都唔使做!」以為HMV大公司仲要鬼佬檔會出手闊綽d同福利好d,點知完全兩個極端,工作煩、責任大、多仆街、多氣受,上至收銀下至苦力都要做晒,但人工原來相差無幾,好彩當初冇去in,亦慶幸當初身邊去in之朋友都落選。大家都係咁上下pay,但工作環境舒服d,工作壓力低(「我做左咁多年都未試過有壓力!」冷爺阿頂話),份內事都少d,開心好多啦真係。只不過,小件健(睇番十二月廿六號段記就知邊件小件健),祝你好運啦。
另一樣抵死野來自Rock爺。話說前排ANGRA結他手Kiko Loureiro黎香港搞clinic,散場之後例牌有簽名會,個個都係即場買佢隻碟(「台灣版」)俾佢簽名,唯獨是Rock爺果隻係外國版,無論色水、印刷還是細緻度都高出「台灣版」不知多少。簽左不知多少隻「台灣版」之後,Kiko收到呢隻外國版果陣一臉狐疑,望望阿Rock,又望望主持人,未等阿Rock爺出聲,主持人已經拿拿臨
"Kui gor jack yet tai jou gi hai fan ban lai la! Lar lar lar or day gor d jing ban lai ga ng ho mon chu or ar! Mon kui la mon kui la!"
主持人係邊個/邊間?無謂講啦呢d!即係人地可以有咁多路數做到搞騷已經諗定點樣搞到下年(搞唔搞得成係另一回事啦起碼人地有得諗先),噉我地呢d堅持原則唯有講句吹脹囉!
今日回歸書院,一朝早番到唔知點解硬係有d唔自在,一直坐都諗唔到到底係咩事,坐到十一點鐘終於諗起,
「係喎!未食早餐忝!點解今朝冇學生番黎買野俾劉Sir?」
今日冇乜野做又冇學生番,冇早餐食寧舍肚餓,唯有襯阿姐落去食lunch叫佢去篤番袋魚蛋+蕃薯先。可能今次我呢個熟客冇落到去,又唔記得叫阿姐響「九龍東反黑組劉Sir」個朵,真係得$7.5魚蛋+$7.5蕃薯,想當年我出馬「同我魚蛋蕃薯執夠十五蚊!」係會變成$10魚蛋+$10蕃薯架。早知就食豪d,因為聽日番唔到黎所以提早今日出糧拎票,上個月係噉谷,屈完阿姐係噉買廁紙同立雜野,自己又成日借d倚懶為學校設想地買埋晒d無聊野仲要一買買超多,last一日仲執多隻mouse,上個月petty cash終於雙炒高層!所以今日簽收張票不禁淚流滿面激動手震:
「好感動!做左半年,第一次做petty cash之皇!唔好嘈住我比我激動一下先!」
今個月都唔差,一出閘已經聲勢凌厲舊幾水舊絕幾水噉去!睇黎今個月都係所向無敵!阿姐,立即落去執廿樽綠水八十條廁紙上黎入我數,以保我今個月得以蟬聯!
今日職責,相當重大。我比d高層指派左去上Yahoo放野。冇錯。(扮到)乜叉都以學校為重d高層,將佢d私事批比d小薯(被稱為「私人助理」)負責,
「拿,學校d野我做,我d私人野你做,老細咪覺得我做得野你就剩係吞住pop等出糧,之後佢炒Q左你,我咪可以食埋你果份囉!」
老謀深算到丫d高層真係,連相都一早影埋今日一開個zip就得,可想而知佢計劃幾咁周詳。又係得d豬頭骨,包括又係用唔到得個睇字之華納動畫地鐵(懶係)紀念車票阿寶&翠兒,一套四款,但得阿寶同翠兒兩款咁大把,喂仲有成半套唔見影喎!仲有去完台灣用剩以為好稀罕之台灣電話卡乙張,人地整個周華健係面先廿幾,佢得棵花都開大口標廿蚊,係咪搶先!仲有陳年全手動叮噹相機,有兩個人放緊,一個標$100(!),另一個標$10(!!!),佢就中庸之道$50,明搶人生意。睇個款都冇乜人要,但今次唔敢講野,因為上次放埋晒兩張飛加隻冇理由有人會要之Sony Aibo狗公仔居然全部清晒,可想而知呢個世界原來有幾咁多水魚。
做完內務(即係放完野),仲有外勤
「上次放張飛我約左個客四點三油麻地地鐵站交收,你去!」
幾惡呀而家公器私用果d高層。仲等緊我地阿錕哥買野食上黎孝敬劉Sir架嘛。點知乜叉都冇得食魚蛋都冇粒,仲要劉Sir親身拎埋N年之前做落份功課比佢做參考忝。冇野食唔緊要,我要你側邊果個靚靚小妹妹,呵呵呵。
行到去油麻地地鐵站,就打個電話比個客。只知道佢姓梁。
「喂?」(一把女聲響起)
「唔該你梁...小姐丫!」(回應得有點遲疑)
「......(緘默)我係邊度邊度,你點樣點樣行啦!」
「噉我噉樣噉樣啦!我行到果度果度喇!你係邊個邊個?」
「呢個!」(眼前一個好明顯剛剛放學趕過黎之男性小朋友曰)
果位梁先生收完貨之後好冇癮地走左。
搞掂阿梁小姐先生,再買筆買墨(冇錯,為左petty cash之皇之位我係無所不用其極),把握時間五點前衝到去大家樂食個tea。由油麻地地鐵站行番到差唔多亞皆老街咁滯真係行街噉行,但冇計啦,為左咖哩角,點辛苦都要。雖然兩件仔賣成$7.5係好鬼貴,但好味道冇辦法,所以點解咁鍾意d自助餐/打邊爐有得任食咖哩角。上過幾堂家政堂就懶係以為自己煮野食好Q勁果d高層見狀,曰:
「咖哩角,我都識包啦!想當年家政堂都不知包左幾多百萬隻!下次包番幾打你食啦小朋友!」
好!我劉義特於此公告天下
躝完街食埋野,都差唔多放工,我地呢d好員工好守時架嘛!不過今晚冇騷出,冇得encore琴日「清明不孝大匯演」,而上左舖頭坐一坐,試一試批新貨,睇一睇條數,執一執間舖...有好多野都想寫。時間實在唔多。而家係連段記都冇乜時間/機會寫。
已經唔記得上一次八點前番到屋企食飯係幾時。所以今日娘親都有d擔心:
「...日日都十點幾十一點,乜今日咁早?...炒左呀?」
而家越黎越多事,估唔到可以咁多問題、咁複雜、咁麻煩。今日係有好野發生左、好多事值得記,但我唔想寫喇,我好耐好耐未試過好似今日咁擔憂。
唔好有事。
今日發生左好多事,亦有好多事我冇諗過會發生。而家,反而到我不知所措。或者要下一番決心。
...唔好噉啦。
今日回歸旺角,唔使搭一大輪車又算早放,車錢仲慳唔少,十分開心。半年以黎,有d野今日先第一次發生。我都唔知應該用咩心態對待。
「乜咁多野?」
係呀今日三大袋野,右膊頭電腦右手公事包仲有左手兩本字典(冇錯,係兩本),似電腦維修多過做阿sir。拎咁多野(其實都只係多兩本字典遮,另外兩樣我日日都拎架啦),因為呢幾日多左個job要做翻譯,即係咁耐冇正式寫/睇過英文,好多字都唔記得左點寫點解,又或者識得英文唔知中文點講點解,譯到出黎老細唔收貨就廢事啦。都廢事拖咁耐,中間有一個鐘break比人趕左出房的張凳出走廊就繼續做,慢慢地砌加中途寫多隻碟,譯完都仲有兩堂,仲可以寫多一隻。都算好啦。除左一件事之外,今日仲有另一單播碟生涯以來第一次發生之意外,就係播播下碟,有學生叫
「劉Sir!」
但呢位同學唔係問「呢條問題點答?」而係
「劉Sir!近排有咩新貨?」
今日好神奇地居然有得早落堂,鐘都未打已經執晒幾袋野出黎嚇親d同事:
「咁早?你自己停左隻碟扮落堂咋卦?」
超強五點九未到已經走得人。本身要出一出銅鑼灣,點知唔使忝,因為直接送到去潮流特區我放工一落樓就有得拎。等左好耐喇呢隻野!
今日出到大埔,起勢地寫,寫呀寫呀寫,都冇咩好寫。好眼訓ZZZ...
一落堂,立即好精神,因為好即興地
「Band囉!」
所以舖都唔落,六點放工即過一個火車站落太和。乜咁好興致話黎就黎?
「我覺得今日會彈得幾好!」
唔係我講啦當然,今次黎料急左d反而冇咩貨。今次搬竇過太和d設備靚到爆(「Line 6喎!」結他佬好開心地說),係套鼓隻聲靚但個調唔多鍾意。我冇乜貨,但都玩到好多野,最大成就當然係最新作品《唏噓組曲》,包括左《唏》,全首歌得一個chord,歌詞得個唏字乘無限次;第二首《噓》會好d,多一個chord,歌詞當然係得無限個噓字。呢個《唏噓組曲》將會成為我地演唱會指定encore趕客歌曲。
一場黎到呢間乜叉都掂都爆之band房(除左價錢:承惠每一八條!),最後一個字節目係影相。冇錯,全日最好玩反而係呢part哈哈哈。而家平面照有晒,bonus DVD材料有晒,乜叉都有晒,隻碟隨時出得。但係,d歌呢?
Weekly Reviews:
All reviews here今日好唔對路。做乜一朝早成村人番晒黎?做乜二朝早連阿sir都番埋黎?做乜三朝早渣人堆晒入課室阿sir係噉講講講講講講&班友係噉聽聽聽聽聽聽?做乜四朝早好多人問
「劉Sir!乜咁早呀!好少見你上堂前番到喎!」
做乜五朝早連阿sir都話
「乜今日你咁早番架?仲諗住你十一點先番忝等我仲一早自己印定notes諗住唔靠你忝!」
六朝早...
「咦?乜開左學拿?」
跟住七朝早
「喂!你班友仔番左黎又唔買早餐!阿sir食咩呀?好肚餓呀!!!」
晏晝番到office好受歡迎,但唔係我,係佢。開頭以為d同事聽到隻野賣成一百八十會被世人嘲笑「傻仔」,點知個個都估隻野賣成幾百蚊,原來出面賣呢d手織公仔冇四五六百都落唔到樓,咦原來我隻象都好抵玩喎。本身見張檯冇乜佈置就拎隻象番黎美化一下唔使咁死,點知噉就死,一出現已經變左眾同事工餘最大娛樂,坐側邊果個推隻野過兩張檯中間條隙玩飛象過河(雖然永遠過唔到只有仆街收場)、坐好鬼後果個拎左兩條橡筋上黎幫佢戴耳環、冇咁後果個拎黎做坐墊再當椅墊、跟住隔籬果個唔知去左邊度拎左個水樽等我一擰轉頭立即兜頭扑落去、坐最後果個直頭唔好意思都廢事連打幾拳係要打到隻野扁為止。見坐我前面個女同事不嬲都斯斯文文,諗住叫佢保護隻野等佢脫離地獄,點知佢知拎隻象睇書果陣當枕頭同墊手。呢d就叫知人口面不知心喇全靠呢隻象我終於睇清楚原來我班同事咁殘暴,好後悔拎左隻象番黎,搞到想帶番隻番屋企比隻狗忝。臨走前粗略估計隻野矮左(正確黎講係扁左)四份一,跟住兩日都唔使番office,希望星期四番到黎可以收番條全屍。
今日出屯門,十分興奮,上個星期發掘到呢個「廿三蚊超值抵食鐵板餐」(個餐牌自己都噉叫法),今日兩條友準時出門飛奔追車就係為左呢樣野。但呢餐食得好靜大家都唔出聲,冇辦法啦,今日實在好唔妥個同事,上星期我四堂個同事三堂,雖然我尾二一堂空堂舒服得黎又可以早放工,但佢可以早我成堂放工,開心到爆。即係上星期已經夠早放架啦,今個星期條友十分過份地再早放一堂即係七點幾走得人,我空堂都冇埋變左要過去頂佢果堂,即係佢上少一堂兼早放之時我上多一堂又冇得早走,last果兩堂仲要一個人走兩間班房,兩間房仲要隔超遠次次都街頭走到街尾,當場灰爆,好在今日d堂都短又可以九點七走人。所以而家我好唔妥佢。唯有寫多隻碟洩憤。
愈黎愈驚喇。我已經衰啦即係成九點五先番到,但呢個時間,居然都做到全校第三名!死喇真係大家都沉迷於呢個鬥遲遊戲喇,連阿sir都玩埋一份!(或者佢係預左成村友冇搭半搭七唔會出現,訓多個幾字好過)
一坐低,檯面已經成疊野棟係度,上面張紙寫住
劉義今朝要做:
1.XXXXXX
2.XXXXXXXXXXXX
3.XXXXXXXXXXXXXXXXXX
4.XXXXXXXXXXXXXXXXXXXXXXXX
............
幾鬼懶丫d高層而家唔做野喇學晒我d衰野喇真係。咁叉多野做,點算?點知點算,淨係諗做邊樣開始先都諗爆頭:
「咁多野,做邊樣先好?呢樣?唔好...果樣?咁煩...做咩好呢?...丫,有喇,食早餐...」
一直做/諗做乜到一點,阿劉Sir終於復活喇!冇錯,係劉Sir!又多左條水魚...唔係,係師奶女士上黎學電腦,當然又係我呢個「易通易明電腦班金牌導師」出馬。比起以往d水 師 學生,呢位女士學電腦都好有雄圖大志:
「我要學電腦!我要學網上理財!!我要上網炒股買基金!!!」
「阿阿阿師奶我地今堂學開機咋喎...」
從未見過咁有理想之學生,今日劉Sir特別獎佢負責亮燈儀式按掣開機,逗得阿姐姐仔都不知幾開心。佢剩係學Windows基本操作,剩係呢part都成五個鐘,本身都幾驚教唔到咁耐,剩係郁下mouse再copy個file又玩玩資源回收筒我都唔知點樣玩到咁耐,又見個學生咁有大志都幾擔心三個鐘乜都玩晒,但上上下堂發現真係驚乜鬼丫,教左都唔夠半個鐘已經係噉收到電話,
「喂!係咪過落呢個戶口架?幾千蚊喎我驚入錯戶口喎!你再講多次等我抄真d啦!」
「阿師奶,你咁驚記錯,有冇諗過叫佢send SMS比你?家下科技進步,字筆都唔使用矣!」
跟住教電腦變左教電話,教完send同收SMS之後又教點樣save電話號碼,玩玩下就夠鐘喇,個Windows都只係教左點樣double click開個我的電腦出黎再放大縮小個框框。但阿師奶一d都冇介意仲十分之滿意,因為佢發現原來自己部電話咁多野玩,
「阿sir!我冇跟錯你!第時上網買股票旨意你喇!」
噢。睇黎有排玩。
玩完(即係落堂)就係時候上路,但途經信和都要落一落去,已經遲左四日架喇其實而家先買F.I.R.隻新碟,CD+DVD特別版連海報先九十三抵買啦,今日落雨又撞正漏左野,就可以拎野順便放低張海報先。今日出太子,自從冇出荃灣以黎終於有得再幫襯山畸麵包,廿零蚊執成五六件真係食足成堂食到飽忝。接左幾個翻譯job做全日係噉做翻譯譯譯譯...譯到收到老朋友個電話:
「喂!今晚JOURNEY個鼓佬Steve Smith有clinic喎!去唔去?」
想去,但九點幾十點先放,去到簽名會都完。真係睇少左好多野。或者,遲d會可以睇多好多騷?
十分開心地早放,雖然搭八走得人一樣要等到搭十一先有車,灰。番到屋企第一件事當然係開隻F.I.R.《無限》,連聽左五六次,呢隻係「難聽」左。剛剛寫左Corrinne May,再聽F.I.R.,兩者成功之處相同:「國際性的聲音」。除左普通話同個樣,真係唔再台灣喇佢地。
等左好耐,終於出喇。
1995年9月在烏拉圭,主音兼結他Pablo Magallanes和結他手Jose Romero (INNER SANCTUM)找來了鼓手Martin Lopez (AMON AMARTH, OPETH)和低音結他手Martin Mendez (OPETH)組成了REQUIEM AETERNAM,在一張合輯中推出了第一首demo,之後換了些成員,Death Row Productions在1997年推出"Eternally Dying EP",同年末樂隊開始製作首張大碟"Eternally Dying",並在98年7月透過ICorp作全球性發行。他們為"Infamy"和"Come Back"拍攝MV於拉丁美洲的電視頻道播出,並開始了"Eternally Tour",在烏拉圭、阿根廷、巴西、巴拉圭等國家演出。到2002年4月,主腦人物Jose Romero著好"Escritos Prohibidos"(《禁文》)一書,探討不同的哲學、經濟與政治問題,其中有一詩辭部份收錄了樂隊首張大碟點題曲"Eternally Dying"的原版歌詞。
Jose Romero後來遷到紐約居住,並在當地找來一些樂手協助完成REQUIEM AETERNAM第二張專輯"Philosopher",這時樂隊的陣容包括低音結他手Maciej Kupiszewski和著名Death Metal樂隊IMMOLATION鼓手Alex Hernandez。專輯於2004年5月和6月於澤西城Big Blue Meenie Studio經Joe Pedulla和Arun Venkatesh (OVERKILL, ALL OUT WAR)進行錄音工序,並在7月由Tom Hutten (IGGY POP, FOO FIGHTERS, CRO-MAGS)在紐約的Bionic Mastering完成後期製作。專輯中每一曲的歌詞都取材於不同哲學家之思想主張,還有一首是源於Romero的著作《禁文》。音樂與錄音製作皆有著非常高的質素,特別是Alex Hernandez的精彩鼓技,音樂充滿各種各種對比、衝突與不平衡。REQUIEM AETERNAM最新專輯"Philosopher"這張出眾的Progressive Black/Death Metal唱片,甫推出已在歐美引起哄動獲好評如潮,現已由Trinity Records Hong Kong作亞洲區及歐洲區發行!
Trinity Records Hong Kong: http://www.trinityrecords.com.hk
REQUIEM AETERNAM: http://www.requiem-aeternam.com
得閒就上一上TRHK個網睇睇啦,webzine未上番,請定期留意label news。真係靚到爆,不過呢,個價都...
「琴日阿sir話今朝九點會番黎同個學生補習,等我今朝仲特登早d番黎開門忝,早知唔咁早啦!等我落咁大雨都趕到身水身汁噉九點番到黎,點知黎到一個人都冇,跟住阿sir打個電話黎話趕緊過黎遲d番,不過佢遲都唔緊要啦,個學生仲遲足八個字忝!早知就唔咁早趕番黎啦!灰!」
對唔住,今次灰果個唔係我,係阿姐,雖然我都係超極早番到,但我地呢d好識變通架嘛噉冇人咪鼠落去買早餐先囉,所以阿姐只有抹黑板果時對住塊板嘈。阿sir都算唔話得,今日晏晝要補考,本身今朝十一點係隔籬間學校上堂都專登一早番黎免費幫手補習,幾好人丫你話。我呢d不嬲都冇咩貢獻架喇,咪俾張五十蚊阿姐叫佢落去掃番d麵包上黎,阿姐好有良心架大拿拿五十蚊都只係買左十七個幾麵包咋唔似得d學生成日屈劉Sir請食飯咁衰仔架。呢好似今日呢d咪冇良心囉,買到番黎就係噉搶,
「搞錯!唔留番d比阿sir我!」
「你叫我食架嘛!」
「我叫你食,冇叫你食晒喎!」
今日非常地驚,無端白事有隻鬼打電話黎話一早約左今日晏晝兩點in。嘩好似好耐冇鬼寄過信黎,上次搵鬼in已經係上個月喇喎!點解隻鬼仲可以講到似層層係我一早約實佢今日晏晝兩點鐘上黎面試?
"Lay ng hai ng gay duck jor ar mar?"
喂我真係唔知喎!就算約都唔會約今日兩點啦兩點鐘開考嘛!但既然仲搵緊鬼,噉一場打到黎咪叫隻野一點鐘上黎in。點知上到黎:
"Lay hai Lau Sir ar mar! Or ying duck lay! Lay gil or gum yat leung dim sheung lai in gar!"
Or ying ng dou lay wo!唔通真係有鬼?從來面試都要講「勢」,今日比隻鬼嚇親搞到神不守舍(自己眼訓就眼訓啦賴三賴四),當堂比隻鬼搶左個勢壓唔住比佢佔左優勢係噉講,問「商業英語同綜合英語有咩唔同」立即
"Wa holland ng tone gar wow! Lar lar lar dung or wa lay gi jack hai gum gum gum gum gum gum gum gum gum gum..."
之後當正自己talk show講足個幾字都未停,之後條條問題都唔知有冇聽真鑊鑊都答到天花龍鳳離晒題但超級眼訓的我又要扮精神地望住佢真係支力,結果短短幾條問題玩左成九個字先玩完。見過鬼怕黑喇我以後都願撞鬼喇高層阿高層呢d荀野留比你啦!
見完鬼就到補考時間。今朝一早有人打電話黎卜左間大房,
「兩點鐘我地要間大房開會呀!記得留比我地!」
開會咁大件事,無理由唔讓比佢地啦。果然好多人成十幾人塞晒入間房,但咁多人入到去黑媽媽開咩會?一睇...原來係電影會!十幾個人熄晒燈拎對超靚喇叭同大投影機睇DVD,果然係開會正經事喎!挑!但噉樣仲好,大房成大大塊玻璃行過都睇晒入面班友做緊乜,搬左去細房遠離人煙做乜都冇人知正到爆。本身有四個點知得兩件出現,有一個仲要真係上一上黎坐跟住就走人,但都好架喇上星期科補考得一件仲要三個字走得即係冇開過考咁滯。既然今日得一位VIP,劉Sir特別關照呢位同學:
「拿,今朝食剩個麵包放你側邊,肚餓就叫飯盒啦,眼訓就訓陣先反正咁多時間,唔識就自己出貓搞掂啦!唔使咁急架慢慢做啦!大把時間呀慢慢黎唔使急!」
「丫阿sir你成日叫人唔好阻你收工乜今日轉死性?」
「五點先夠鐘呀大佬!慢慢做啦做到五點先好走呀咁早走我點吞pop呀!」
四點幾五點監完考,出到黎已經有成噸野等緊我做,本身諗住頹多陣就走得人晏晝都唔使食慳番餐,而家唯有又叫阿姐落去篤番大大袋蕃薯+魚蛋食住做野,做做下就七點半。有幸見到夜晚頂我個位果位part-time小朋友,今日佢終於發現,原來當日(3月30日)同佢面試果位劉主任,同佢都係咁高咁大平起平坐(即係大家坐埋同一個位),原來做得主任地位都係同佢一樣(即係猛咁被點做野灰到盡),同埋,原來劉主任係正如傳說中咁頹。
七點半放工(算好早的了)番到屋企食個飯撚下狗再落惠康掃野食,又比我撞到人。今朝番工時先撞到鄭華(佢住我附近又係旺角番工,都幾常撞見),傾番其他人點樣,發現原來大家都係咁X樣哈哈哈。除左某女同學從珠寶業轉做marketing兼任model(近排《蘋果日報》都見過幾次啦),仲有一位似我地校花投身機場,不過唔使飛係做地勤。佢係邊個?咪就係今晚係惠康撞到之政府官員(又係住我附近,又係幾常撞見),同場加送官員家姐乙件(阿家姐都有故事架,但懶摷番舊段記喇)。即係雖然我係番足七日,但好似今日七點半放工已經係好好,做地勤隨時朝九晚十一,仲未計出入機場搭車時間,咁辛苦,所以而家做做下又諗住轉第份。除左也哥自己開舖之外,好似真係冇乜邊個唔使捱驢仔噉捱。搵食艱難啦真係。
前日學識點樣double click就開到我的電腦果位女士非常地意猶未盡(咁未盡其實係因為發現左自己部電話原來咁好玩),今日十一點鐘準時出現上第二堂。即係日頭班學生都冇咁準時間真係佢地條條友肯搭七番到已經要叩頭喇我。一入到房,
「阿sir,我部電話點點點呀!」
冇錯,唔係電腦,係電話。又係電腦堂變電話堂。又係教下入電話號碼查查短訊再用埋個留言信箱,最開心係換左個鈴聲,
「買左部電話咁耐都唔識得轉個鈴聲,搭地鐵個個電話響都係呢隻聲,成日唔知自己電話響嘛!」
同佢玩完之後先發現原來我部機咁鬼古老,雖然佢部野都係好舊款Nokia起碼係彩芒先,我部野仲係黑白面,部機上面張狗相都係自己印出黎黐上去扮野,即係連鈴聲都係要自己篤出黎冇得紅外線or download,midi都冇更加唔使話mp3,所以我從頭到尾都係震機算連響聲都未轉/較過,今日同阿師奶一齊玩電話我先識得點樣幫而家d電話轉鈴聲。好在佢都睇唔出其實我係唔識用電話的呵呵呵。
「阿sir你真係好鬼叻乜鬼都識!我跟硬你架喇第時搵埋你教英文架!」
噢。睇黎有排玩。
今日晏晝好早就出門,因為唔夠notes派的關係,今日要專誠上舊office拎番一疊仔notes - 冇錯,由尖咀行到去佐敦就係為左拎一疊仔notes,上去坐一坐食多個麥記,跟住仲要地鐵轉火車出沙田,比尖咀直接搭火車出仲貴兩三蚊,勝在過黎佐敦果陣有得去麥記買番個廿五蚊好鬼貴既九件雞餐,新果d醬咖哩同沙嗲好好味,如果唔係咁貴我估日日都會食一餐。
...冇喇。今日冇野寫,因為唔想寫喇。我真係連一隻字碟評都寫唔出。只有繼續不斷做翻譯。唔好問我點解。可能好快就乜都解晒。
要說的、該說的,都說了。可能以後也沒有機會了。
不要哭...
是日行程:旺角食早餐>上學校坐坐>元朗坐半堂>荃灣坐半堂>兩點半放工做乜都得>咦仲可以夾野band喎。
結果:旺角食早餐>旺角上學校>旺角行下街>旺角食餐飯>旺角上下舖>旺角>繼續旺角>一直旺角>旺角萬歲!
今日突然間話唔使出新界代同事lunch時間,變相多左日dayoff(嘩幾耐冇正式dayoff過?),非常開心!但其實冇乜分別,因為已經返工返慣晒,今日播碟唔使做,都照上書院打下躉。好耐未試過牛記笠記喇(即係牛仔褲再笠件tee),件OPETH長袖tee上年聖誕黎到之後今次先第三次著,上兩次都係紅假夾band時先有得著下,計番買左番黎個幾月先著得一次,但而家日日飲樣有得著一著已經好好架喇。
番黎呢頭,朝早可以搵星期六旺角更d同事食個早餐。話唔埋遲d個個星期都有得食忝。但有陣時,我都唔想食。唉。
上到學校一條友都冇(阿姐云:「喂!你當我冇到?」)。今日又有展覽會,即係全校除左我同阿姐呢d雜卒仔都過晒去會展做大事,我呢d呢就開開心心地冇皇管做乜都得。但果d高層又點會咁好死丫自己死都要攬住人地一齊死,又係一早留晒口訊
「你就想嘆喇傻仔!今日同我
1.做做做做做做做
2.做做做做做做做做做做做做做做
3.做做做做做做做做做做做做做做做做做做做做做
嘿!死未!
死到應晒啦。早知就唔咁好死假期都返工乖乖地dayoff算啦。好後悔今日自投羅網。做到不知何時何日,終於有人出現:
「咦?番黎做乜?」
「番黎上英文班囉!」
「係咩?幾點上堂架?」
「十一點囉!」
「咦?咪即係半個幾鐘前囉?」
逢星期六之英文補習班出席率及準時率再創新低,阿sir都睇化廢事理喇,好似今朝撞正部影印機冇晒碳粉印唔到notes,阿sir都十分自若地
「唔使煩啦!今堂就噉爆肚算!冇所謂啦反正咁少人,而且班友都唔上堂架啦!環保d好!」
雖然阿sir(同班學生)都唔多志在,但我地呢d咁盡責置各位同學&阿sir不理(其實係被屈遮),立即打個電話
「唔該,我地學校部影印機冇晒碳粉,今朝有冇得送貨?朝早冇晏晝有冇?急用呀!」
「拿拿拿拿拿阿劉生(真係咁多個拿,黐Q線),我地今日係唔送架,星期一都冇貨架喇點都星期二先有架喇,一係我幫你查查旺角個倉有冇囉!留個電話陣間覆你囉!」
態度奇劣,打去果時有話「為保證服務質素對話會被錄音」,鬼唔望果個姐姐仔比人炒 - 我就唔會投訴,唔係因為寬容,係因為懶。跟住阿姐姐打番黎態度好左少少地報告旺角個倉有一支,但冇送貨即係要自己親身過去佢地個倉度拎,好在個倉原來好近,就係轉個彎隔籬潮流特區條街魚蛋檔對面(話時話,女人街口檔超大魚蛋檔執左,可能租金太貴)行兩行就到。阿sir知道陣間有得換碳粉,好關心/擔心:
「有碳粉?你幾點過去拎?番到黎咪要印番notes?」
「放心啦!十二點幾先開倉,我又唔會咁快手,保證落左堂先拎到番黎!」
阿sir立即鬆一口氣。
當日(又係3月30日)請左兩個part-time,前幾日男果個同劉主任見過面,今日終於輪到見一見阿靚女(刻意提及靚女係明示我地reception實在冇靚女)。一上到黎阿靚女彷彿習以為常唔當係咩地眼都唔望聲都唔出自己非常熟練地搵個位坐低睇書,完全冇被當日踢晒西同佢面試之劉主任變到如斯牛記笠記差少少撻到落地下訓之潦倒之景嚇親甚至係當佢冇到。落左堂之後全校走晒阿姐都走埋我又閃人即係全校剩番靚女一個,本身劉主任都諗住盡一盡責任培訓一下佢(即係教點樣偷懶),但發現都唔使喇,即係平時我做果d佢都做到足晒。好明顯有人已經係我背後講左好多壞話講到人地都熟晒我d野仲要學晒忝。
對於呢位靚女同事,高層有以下言論:
「夜校d學生成日撩佢傾偈呀!」
阿高層,即係呢,有d野,我都明,之不過呢:
「算啦,你恨唔到咁多架喇!」
做完晒野班學生又走晒阿姐都走埋就唔爭在我都走喇,落去行個圈又落一落信和睇睇,又係時間食lunch。Lunch好好多,食得開心d之餘又可以食足成個鐘唔使趕,遲d可能真係個個禮拜六晏晝都有著落。但呢兩個禮拜,都仲有好多好多事要面對、太多問題要解決。
晏晝又過皆旺睇睇,一食完飯就立即起行,其實唔使走咁急,可以慢慢走甚至遲多陣走都得,但我唔可以唔走得咁急。我好怕走遲一步,都會有事發生。係。到左而家,仍然有好多野係好無奈、好灰。
又係抽住兩本字典出門,做左兩堂幾做晒d翻譯,冇咩好做,又寫寫碟評。但近排冇乜貨。自從逢星期日發文先發現原來寫左咁耐,數埋數埋都冇乜存稿剩。所以,有貨人士,請多投稿。
大埔放工都係火車出旺角轉巴士,沿途實經皆旺必定上去坐一坐 - 真係坐一坐,因為屋企冇人,廢事悶親隻狗就快手番屋企同佢行街(冇錯,我對狗比對人好)。而家TRHK隔籬開左間玩具舖,十分有緣地,原來其中一個老細係教院人思敏(我只知叫思敏同埋佢係我舊同學同埋佢識我&我識佢,衰)。好揀唔揀揀正開係TRHK側邊,嘿嘿!真係唔識死!所以今日臨走贈番句:
「開正係我地隔籬,你預定第時你地門口有三多都得喇!」
「邊三多?多錢多客多生意?」
「錯!係多人多煙多粗口!投訴定先都得喇你地!」
Weekly Reviews:
All reviews here今日要做苦力呀 - 差少少!前兩日全校總動員(打雜不計)去會展做展覽會,琴晚玩完班搬運工人送野番黎送到一半鎖左門入唔到,結果學校門口堆滿左各式家具,擺到今朝居然都冇唔見野果真夠符碌喎!本身琴日應該打個電話通知定阿姐以免驚慌,但佢電話打極都唔通之後又冇左件事算,搞到今朝八點幾管理處聽到二樓有個老年婦人瘋狂尖叫
「嘩黐x線*#XYZ發生咩事?邊x個玩野!搬x死阿姐!」
係架真係好鬼多野架,大戰前夕我就當然訓多陣先,上陣前要養精蓄銳休養生息保持最佳狀態嘛。訓飽飽精精神神番到學校諗住大顯身手,點知番到果陣阿姐剛剛搬晒得番幾疊凳係出面,噉我咪象徵式噉望兩望再嗌多句
「咁慢架!搬到而家仲未搬晒入去!快手啦!」
今日朝早幫完阿sir影notes又解決一個「中四個仔想補習」神奇電話(咁早打黎問補習已經黐線,仲要問補習都問左幾個字,黐X線),十點鐘又變身劉Sir,即係教電腦個劉Sir。(「個個身份都叫劉Sir,玩晒啦!」)。今日係「視窗操作系統」課程最後一堂,即係教左點樣double click、點樣拉大拉細dfolder又點樣開新folder將dfile搬黎搬去,本身課程係諗住教埋copy & paste點剪下複製貼上又點點點,所以今堂都有d擔心點挨呢兩個鐘。點知,又係擔心咁多做乜?今堂終於冇玩電話,但吹吹水唔知點解吹吹下已經冇晒時間,冇時間到最後係要催個師奶快手d
「right click!left click!唔係呀right click呀double click啦double click啦!Click乜?總之見野就click啦X等收工呀!」
呢幾堂阿師奶玩得相當開心,
「我要上網!我要send email!我要ICQ!你教我網上check戶口呀!」
阿師奶興致勃勃差少少立即交學費聽日開始學上網,好在佢睇番唔得閒噉就星期三先開始。死,自己都未搞個網上戶口,聽日要上一上銀行搞搞個E-Banking先...睇下我地呢d阿sir幾為學生設想丫!
星期一又係屯門時間,今日好難得係同阿頭一齊出,除左頭兩次做左咁耐第一次同過阿頭出門。傾左好多野,問起好多野...跟住點?我都唔知...
無
「我會回來。」
一切,可能從此解脫。
最後一個禮拜。(希望可以)開心地過。
黎左個幾月大埔,終於到最後一次,過埋今日就完晒所有堂。全日得三堂,坐低就係不斷地翻譯翻譯翻譯...近排都冇乜寫過野忝。不過諗番都冇乜野特別想寫,雖然其實有好多「pop野」等緊要寫。呢排反而唔多想寫metal野。
覺唔覺得呢兩個禮拜有d唔妥?...好似靜左d。冇錯,劉Sir好耐冇爆過野。唔得架噉樣!所以今日終於上番一上band房似番d樣。冇上兩個禮拜遮?使唔使搞到噉呀?入房冇開冷氣又冇噴野,d煙味已經積到好似午餐肉味噉款(真架,你可以做個實驗試試),成地煙頭水樽冇人執,部amp就黎玩到燒,都唔夠套鼓勁,double pedal個左腳掣係個連埋支軸飛插落張凳度,hi-hat個pedal兜晒之餘差少少就可以貼地,snared彈簧爆左一半,個floor tom仲勁跛埋忝,三隻腳冇左隻搞到要搵個cymbal stand頂住。喂我都未出手已經爆到噉,係咪落我面先?邊間?無謂提啦,又係果間哈夢莉架啦!
好耐冇夾,手鼓生疏左少少。都玩左&玩到唔少野出黎,玩一大輪都係結他鬥鼓係最好玩,原來我地租間房就係為左玩呢樣野。出面班友聽到一頭霧水:
「入面班傻仔做乜?多錢得滯乎?」
玩完,都係照慣例落海景飯堂之後行過佐敦。有好多野可能發生得太快,亦有太多事發生。我仍然好記得果條問題:
「諗清楚?」
有d野,可以諗得好清楚,但有d野,點諗都唔會清楚,就算清楚,都唔會改變到。只有過埋呢個禮拜先再諗。
Weekly Reviews:
今日一早印晒notes執晒手尾就走人。正所謂跑馬有晨操,唱K有晨K,今個禮拜係四月最後一個禮拜,有d同事做到月尾約滿,今日番工前就黎野farewell K。相信都冇乜人好似我地咁無聊十點半唱K架喇,我十點九去到兜勻成間Neway一個圈,發現我地七條友包晒全場真係一人一間房都得,可惜差一個同事A病左唔齊人仲有個同事抽唔到身,有點遺憾。發現原來大家都係老坑點歌唔舊唔點,所以大部份時間dMV播黎播去唔係飛圖就寶麗金。Band房成日入,K房真係唔記得上次入係幾時。應該冇兩年都有年半。玩得好開心,十點半唱到十二點半呢兩個鐘我冇乜唱過食飯居多(三十三蚊有飯仲要整得好味兼有live陪唱,當食飯都抵啦),但對住成班笑爆咀之同事,真係開懷舒暢。但玩埋今次,都唔知仲有冇機會矣。
搭半走人一點鐘要打卡,大家唱完立即由寶勒巷Neway飛奔去新港中心,仲剛剛撞埋病左冇黎之同事A,全世界差唔多搭正一點鐘番到office,大家從未試過咁準時。朝早好多野玩,晏晝好多野煩。本來已經下定決心要走,但今日,又再多左好多變數。太煩。煩到唔記得各散東西前搵齊同事影相。最後?各位唔捨得我、唔想我走之同事,唔使憂心點樣搞我個farewell party喇,你地仲有個半月時間準備。
我都唔知呢個結果,係好,定係唔好。
朝早,你班靚仔就有福啦,阿sir肯收半價開堂補習班幫你班友仔補貨,應該多謝阿sir對你地咁好啦你班友。呢個阿sir當然唔係我啦,我呢個阿sir係襯阿sir幫班友補課溫考試之時盡番劉Sir應盡之責任,即係乜都唔理頹埋先算,同埋服侍一下班學生(即係上堂上到悶之際出黎嗌「劉義∼∼∼」然後搶左部機去玩果d)。所以各位同學都夢寐以求第時可以做到劉Sir個位:
「做你個位都幾so喎!坐幾坐就有錢收!阿姐仲辛苦過你!」
頹著頹著,好懷念琴日朝早有得唱K忝...
晏晝,繼續無盡的翻譯。譯著譯著,都係唔譯喇,想譯都譯唔到,同事A&同事B拎琴日唱Kd相出黎玩,真係玩到笑爆咀。果位同事意猶未盡,決定今晚上堂繼續玩,但係今晚佢先上得果兩堂,得果兩個半鐘肯定玩得唔夠喉大嗌
「搞錯!咁快落堂?我都未玩完!唔得全部唔准走全部留堂陪我玩埋佢先!」
但我都唔擔心呢樣野。我更擔心佢上堂果陣玩到不亦樂乎失控狂笑嚇死班學生。
夜晚,旺角兩堂,六點半先打卡,七點上到九點半,疏乎。暫時放下翻譯工作,寫寫碟評先。愈寫愈覺得冇貨。黎緊星期日可能冇野睇忝。
今日好靜。係。我靜左好多。
今日冇堂上,但係果班非常勤力的同學(其實係終於識死的同學)都一早番黎學校做past paper,
「阿sir,我地都知你遲硬到架喇!拿我地十點先番,就晒你啦!」
就晒我啦!等我可以慢慢躝番黎學校兼買埋吉野家上黎,食住個飯慢慢等你地十點變十點幾再變十一點地一件件出現。最後四個變三個,十點鐘開始mock變十一點,本來話做listening又懶變左做paper 2,我都廢鬼事理自己出去做野好過。挨到十二點幾,其實阿sir可以一早走左去算唔鬼理佢地,點解係都唔肯走?班友終於知點解識做,死死地氣自動自覺走落街買兩舊臭豆腐上黎:
「拿!食啦!Cheap到死!」
古有華東水災,今有尖東盒災。一番到office個位比無數紙盒淹沒左,好在隻象仲健在。冇位坐,點算?噉又冇咩大件事既,我呢d咁厚面皮,都係扮晒野霸番其他同事d位坐架啦。到最後一個星期,開始有同事離開,大家關係好似比以前親近左、融洽左,以前發生左好多好多事,希望跟著的日子,大家可以繼續開開心心。
今日出門,又唔同。或者,好似而家噉,都唔差。
好耐未上過九龍灣。今日上兩堂就走得人又唔係超好多時,又有另一個同事一齊夾點樣互調播碟慳時間,七點幾鬆人好開心。今日有個中五學生臨會考最後一堂,問:
「下年仲見唔見到你?」
有緣的話。...
放工後本來都想留低做多陣翻譯,但又好好手尾地熄左電腦,都係去行街算。好耐未出過黎九龍灣,好耐冇行過呢頭,去番好多地方,諗番好多好多好多好多野。呢兩年,太多人同事變左好多好多。
行到八點幾番轉頭,等埋個同事放工一齊食飯,吹水吹到差唔多十一點,十分高興,原來身邊可以有咁多開心事過癮事。但複雜事麻煩事一樣咁多。我都唔知之後點喇。前景不明。
黎緊段記可能都係咁短。已經唔多想諗野。
今日係呢個學期最後一堂。噉又一個sem,快到我都唔知咩事。為左慶祝「噉又一個sem」,今日落堂差唔多全班留晒係學校食飯,
「我地搵到間外賣自取十一蚊個飯仲有野飲忝呀!」
一到十二點半已經有人彈出黎提醒劉Sir
「夠鐘打電話喇劉Sir!」
一直啤住劉Sir啤到佢拎起電話打埋開埋聲「喂」先至收手入番去上堂,到十二點九一放學全班男丁立即衝落去女人街拎飯,得果十零盒飯搵成七八條友拎,即係每人拎兩盒仔咁大把,都幾無謂。難得阿sir兩點鐘先到下半場留埋係度一齊食。我當然又係借d倚入埋去一齊食順便蛇王,叫左全世界都話最唔好食果個:
「滑蛋叉燒飯唔掂架喎!」
「要試下有幾唔掂丫嘛!知道左,下次咪唔會幫襯囉!傻仔呢家野點都要做一次既!」
呢句唔係我講,係自己叫左個其實係咖哩雞飯的葡國雞飯食到印印腳的阿sir講。的確係唔多掂個滑蛋叉燒飯,早知我都棄暗投明食最掂果個葡國雞/咖哩雞,但係十一蚊貨色仲要包埋野飲,差唔多架喇噉款!但唔緊要,阿sir話下星期加送一堂比各位同學,同大家試前精讀之外再包全場pizza,好在而家轉左逢星期四係度!
阿sir陪班學生食飯,真係十分小學feel,雖然對住果班衰仔比小學生邪惡好多。(又唔好噉講,而家d小學生已經好X邪惡)
食完飯一班友走人,一班友留低做功課,仲有一個留低做mock卷,冇錯又係日日一見到我就「劉義∼∼∼」噉衝埋黎果d死靚妹。聽日會考syllabus a英文嘛,所以識死喇唔敢玩野喇呢位小朋友乖乖地留低考mock喇。這是一個很認真的mock exam,跟足規矩先做paper 1再paper 2兼做足時間冇早走冇得出貓(我差少少想走埋入去扮埋監考,有得蛇嘛),應考的同學亦相當認真當正真會考噉做,即係入到去坐低做一兩個字就趴晒係檯面做多一兩個字已經訓著再過一兩個字唔止張檯地下都濕埋。所以點解咁需要劉Sir入去監考呢,起碼當考生訓著果陣佢會大大聲提醒果位同學
「喂!唔好扯鼻鼾!嘈鬼住阿sir打野!快d做!...唔係,應該係做慢d!但唔好出聲嘈住阿sir,訓覺都唔准打鼻鼾!」
真係差唔多做晒果一個鐘兩個字,終於做好paper 1作文。作成點?唉,無謂提...自己睇...
Dear Pat,
I had received your letter and very happy to hear that you have make a new friend in other country.
But, after i read your letter i think you should not go with your net friend to Japan together in this summer holiday, it's so dangerous.
Firstly, they just have sending e-mail for three months only but you haven't meet him before and you don't know if he is a good person. Maybe he is a thief, wants to cheat some
benefit from you. How you can do if it happens in Japan? No one can help you. It is so dangerours.
Secondly, your parents are unhappy is natural. You go with your net friend go to this far country and this friend they don't meet, they will very worry about you. You should understand why they worry.
I know if you can not go with your net friend have a travel this summer holiday, you will be very disappointed. But in this cause, you can try to offer him to travel to your country, then you can meet him easily and I think your parents will not against. It's a good idea. You try to tell your net friend what your situation is. If he is understand you and want to make a friend with you seriously, i think he will come. If not, this friend cannot make with.
Hope you can soft this problem quickly and you letter is about your happy holiday next time.
Yours sincerely,
Chris Wong
即係唔係作得點好,我甚至覺得寫得唔錯同幾有組織忝,係「惡」/「霸」左d囉。以免呢位同學比其他syllabus b同學嘲笑&受到威脅,改卷員即係阿sir我勉為其難地俾個C+再送多粒星兼整多隻白兔過佢囉。其實又唔算太差,A卷黎講我估都真係有機會拎到C。跟住又學足正式會考兩份paper之間break番半個鐘,點知間房比夜校d同事拎左黎做interview同開會,結果呢個break突然間長左倍幾兩倍。見咁得閒(其實係乜都唔肯做),咪勉為其難地幫一幫朝早番到黎已經做到唔知似隻咩果d高層落街買一買個飯。理論上我係應該幫佢做下野分擔一下,但實際上我咩都唔知呀我係管academic果邊架,噉academic而家環節係「考完paper 1試場被佔用等到另行通知前只有等同埋等」,我冇理由仲做咁多野架嘛,又無謂搞埋其他departmentd野啦我地呢d好盡忠職守唔會多管閒事,所以就拉埋死靚妹落街買野食算。冇錯劉Sir呢d最高紀錄試過朝早一個吉野家>一個飯盒>整多個下午茶>篤多篤魚蛋>番到屋企食完飯整多杯雪糕>當時唔少得唔知幾多包薯片,而家食完個飯唔夠三個鐘又食過濕濕碎啦,所以點解劉Sir成日食十三蚊吉野家咁慳(今次仲慳十一蚊忝),唔慳埋慳埋點夠錢食多N餐下午茶&宵夜。上個星期剛剛有番十二蚊早餐幫襯番少少麥記,點知做左個零禮拜突然冇左搞到極度唔妥麥記,而家「話」三十日日日有著數就姑且落黎睇睇有幾。點知近排超廢日日都係買燒餅先有野送or平d,但一場黎到又要處理高層d膳食問題最重要係呢邊冇咩好食,噉唯有麥記囉。大家都咁想食雞,咪整個自製雞餐出黎(聽聞幾日前係麥香雞買一送一,噉就有番d睇頭)。記住,買麥樂雞餐加四件雞翼會平過買雞翼餐加六件麥樂雞個半!
買到番上去,d死靚妹已經大大聲噉話
「拿我唔俾錢架!」
所以阿sir咪成日要死慳死抵囉,自己唔夠食仲要比呢d冇良心學生呃飲呃食。之後兩條友仲要大模斯樣地霸老細個位食麥記忝。冇錯,我地呢d已經究極目中無人當正自己係校董完全目中無人,連引來本身個位係老細隔籬的夜校眾同事側目都係噉話。
食完下午茶間房仲未有得用,冇計啦,唯有將成群羊趕晒入一間房,結果同一間課室,做功課的做功課(雖然冇乜)、打機的打機(拎埋部GBA番學煲機戰,我都冇野好講)、考mock的考mock(「劉義!唔想考呀!!我唔識呀!!!」)、吹水的吹水(實有我份)、訓覺的訓覺(唔使問啦)。想當年劉Sir我都煲過下機械人大戰架!唔係點同你班友吹番兩嘴!但似乎我地有代溝喇,想當年都只係煲第四次同一隻正常比例版機戰,玩到Alpha就收皮,而家出到咩都唔知。
噉環境,大家當然話咁快就做晒d野(即係唔做)。死靚妹,唔好paper 2拎54分就咁串呀,滿分係120呀...仲要我送多隻長頸鹿比你...
無驚無險頹完廢趕完羊又到六點,又係準時放工的時間。但係灰囉,d高層囉,唔抵得人地受學生愛戴囉,係要屈人做野唔比人走。
「喂,我好似係academic果邊唔係admin喎!」
番到屋企,繼續翻譯。譯呀譯呀譯...
今日好靜,乜人都冇。所以阿姐好唔滿意。
「咁早番?你番黎播埋晒d唔知咩歌就嘈鬼住晒冇得靜!」
係囉。所以食完個早餐,做多少少野,都係鼠左去好過。好靜。
尖東盒災災情得到改善,起碼我可以行到入我個位先。但倉務部的同事似乎心有不甘,一見我番黎立即搬箱塞住我張檯條出路,
「想我地俾條路你行?今日lunch係你架喇嘿嘿嘿!」
原形畢露。跟住仲被屈做苦力搬抬擔托乜都有齊,早知今日借d倚遲d先番。我的同事原來咁冇人性。唔止倉務部,連其他同事一樣咁冇人性,影張d相都唔夠一個禮拜已經玩到不似人形,有個同事今日就走本身好唔捨得,但而家好開心自己做埋今日就走,因為唔使睇到自己尊容比人玩到變成妖獸噉款。而家玩相玩到癲,直頭搵埋d同事做model擺晒甫士影相(又肯喎!黐線!),我突然間變到好受歡迎,因為近排我日日都有相機跟身。
今日出沙田上三堂,三堂都唔同房,但噉樣或者係好事,因為上堂拎d相出黎睇(當然係「特別版」果d),用作者同事A果句,
「真係好邪惡!」
唔係笑爆咀就係嚇Q死,係正班學生面前又唔可以笑,唔係堂堂都要轉房要多番d時間郁動,可能真係忍唔到係課室中爆笑。我都好佩服咁邪惡的同事A上堂時整呢d相果陣可以忍住唔發癲。
上完三堂,本身從此告別播碟生涯,而家只係變左做一個break。我都唔知係好定唔好。
好耐未試過完全唔理鬧鐘想訓到幾點都得。
「咩話?今日唔使做?」
冇錯。「回巢」換來係數日dayoff,咁難得有假放,我當然冇自首扮晒野唔番工匿係屋企歎埋佢先算。呢d野冇幾可架喇。
夜晚前本來唔想出街,但三點鐘老細突然電召三點三已經落到茶記。冇錯佢就係住我附近,但都隔幾個世紀先見得一次,唉...
講左咩,就無謂講啦。都係果幾個結論:本地市場真係收得皮,同埋有陣時唔使對人咁好,仲有,唉,都係做番pop野算啦。講出黎又冇人鍾意聽,咪自己笑笑算。
下星期,應該會幾精彩。
好耐未睇過全metal show,撞正而家有時間,點都出黎睇一睇。一早黎到LiveHouse又焗又熱,仲有無數小朋友圍住團團轉,早知唔咁早到去避下難先。點解咁多人想要我電話?拎ICQ好地地咪算囉唉。其實我個電話一早已經通街都係,TRHK搞親騷d海報實有出我電話,有興趣咪自己摷囉。我已經接過不知多少匿名查詢電話,內容真係雜到你估唔到問band問碟問書問路都有,最常遇到的問題就是
「劉Sir!我而家係XXX,點樣去蒲窩?」
呢d電話通常有90%機會我係唔知來者何人。我的慣常回應就是
「麻鬼煩!自己查中原地圖啦!」
Z"NEF
見主音著住件GOD FORBID同個唱法,唔知係咪想玩metalcore,但聽左三首自己歌,感覺上係old-school heavy metal,第二首仲有點PANTERA feel。到最後兩首又真係cover左PANTERA "Cowboys from Hell"同METALLICA "Creeping Death"。自己歌寫得唔錯,無論編排定技術都好有水準,但唔太鍾意歌佬果種唱法,如果用沙清聲會夾d果種舊式感覺。最後"Creeping Death"玩得唔太好個鼓成日好似打多左野,自己歌部份比cover好好多。另一可惜係從頭到尾只聽到drum & bass,但呢個已經係LiveHouse通病,冇計,除非好似NN果班仁兄...
BROKEN LIGHTER
傳說中的本地power metal樂隊,一黎已經
1. RHAPSODY "Emerald Sword"
2. HELLOWEEN "Guardians"
3. RHAPSODY "Holy Thunderforce"
最關心莫過於三:一.玩唔玩到?玩到,但唔好預期零失誤同100%順,係唔知點解"Guardians"個beat變晒變得好怪,而且RHAPSODYd歌本身最差就係鼓,跟足而其他樂器聲唔夠反而仲悶,可以試試自己編過;二.唱唔唱到?歌佬又的確係唱到高音位,亦唔算係太過反感,只係唱同台風都欠點自然;三.有冇keyboard?有。我成日見到果個唔知邊個死靚妹,估唔到原來你係BROKEN LIGHTER keyboard手喎!按照蒲窩傳統,keyboard聲,都係唔會出到,至於kb同整體同埋呢一部份容後再談。然後係drum solo,冇睇的朋友如果有睇過BEYOND 96 live世榮段solo可以想像到,兩者有好多相似之處,從踩住double bass除衫到慢到快snare到狂roll,係少左野倒水,評語係「太急」,對棍亦好似太長,唔知有冇影響。跟住三首係自己歌,感覺上同頭三首cover唔同,會近番芬蘭派之melodic power/speed,而我亦覺得呢個路線會更適合。RHAPSODY、HELLOWEEN呢d本身編排係好重keyboard同要萬幾人一齊唱先做到果種feel,而且得一支結他本身已經唔夠厚聲,LiveHouse個keyboard同結他一樣九成時間比drum & bass遮晒,keyboard出唔到又唔夠「人聲」,始終達唔到果個效果。但自己歌果三首可能就番一主音一結他加keyboard之組合,反而唔會有好多冷場位。最後因為台下之熱烈反應黎多首EUROPE "Final Countdown" encore,好有趣地阿keyboard呢首你唔係應該有好多野做咩點解反而係結他彈晒你可以跳跳紮?
ADVERSARY
ARCH ENEMY "Enemy Within"
CHILDREN OF BODOM "Hate Me!"
CHILDREN OF BODOM "Silent Night, Bodom Night"
CHILDREN OF BODOM "Children of Bodom"
呢度係其中四首歌(另外兩首係唔記得名or唔認得),但睇到都知咩事啦。又一隊本地傳說,個名就聽得多,到屍輝一開口,唔得喇,呢個傳說真係黐X線。暫時聽過全港唱呢種高唱喊法,屍輝係最勁一個(低音我鍾意HYPONIC阿Roy),拆得黎夠響基本上咩都聽唔到都一定聽得到佢把聲,難得負責推聲之主持人唔喝止佢以免爆咪。台下反應非常好,搞到頭兩隊好似變左開場band。都係唔太聽到結他聲,但基本上屍輝一開聲已經殺晒,一開頭三首連續,又有快版"Silent Night, Bodom Night",之後玩首自己歌再接"Children of Bodom",技術台風同編排都一流。係個keyboard全場冇郁過咁滯,只係閒來整野chord solo冇乜,好多keyboard同結他鬥啡位得番結他,"Children of Bodom"後面一段harpsicord變左做bass,最後仲彈都唔使彈同台下d人影相,慳水慳力左d喎。希望下一場會好d。
NOTHING NONE
「Henry呢?佢係邊呀?」
「佢話廢事見到你而家生意失敗噉既款,所以廢事黎喇!」
「食屎啦叫佢!」
以上係開場前我同輝爺而對話,絕無竄改刪減。Henry哥,自動自覺啦!
冇見一排,更多的私伙架生、更長的set野時間,當然仲有最重要的更多的妹妹仔,我迫到去最前,第一行除左我差唔多全部都係女。到NOTHING NONE時差唔多全場爆滿,亦都睇到而家香港band show男女比例開始失衡之情況,就算唔係女多過男,最少都有一半一半。講番台上,五首歌:
1. Losing My Mind
2. Fake
3. Final Appeal
4. 等待
5. Paradise City
同樣係自己帶埋mixer,音響立即比前三隊好一倍,而且比以前更有默契同更多交流,台下反應實在太好,都好少見非hardcore band表演下會mosh。第三首"Final Appeal"已經從以前KORN/DEFTONES式nu-metal變做metalcore,第四首係內地大大樂團「名作」《等待》,未聽過原版,只覺得呢個版又唔同佢地,「好SOILWORK架而家我地!」的確係有dSOILWORK,我鍾意結他連掃個彈法。最後係GUNS N' ROSES "Paradise City"完場,非常鍾意呢個版本。十分成功,但有一個問題:
「喂!我首Cemetary Gate呢?」
GOSSIP
「今日黎係咪捧GOSSIP場呀?」
唔少人問過我。好似好出名,但膚淺的我真係未聽過,又一個傳說。冇錯真係好鬼多傳說。第一個感覺係個結他佬好熟面口。
「咦?你咪NOTHING NONE羅斌?」
冇錯,GOSSIP就係羅斌兄之side project,死我連呢樣都唔知忝,仲有個member玩synth/vocoder,仲要棟正係我前面玩,見識不少。可能因為由羅斌兄負責創作,的確好似NOTHING NONE,但NN較行而GOSSIP較重旋律。一開始已經《將冰山劈開》台下已經high爆,跟住再黎兩首,琴佬除左玩電子仲唱/rap埋,好易聽得出似LINKIN PARK,但LINKIN PARKd野冇咁band冇咁行。玩左三首,就收檔,台下自然encore之聲不絕,噉台上唯有好「勉為其難」噉set野玩多首。從完場到encore唔夠一分鐘。
「喂!係咪夾定架呢野encore?」
「殊!唔好咁大聲!」
棟係我前面個keyboard佬話。今次真係LINKIN PARK,"One Step Closer"台下聽到好開心,阿keyboard遞埋支咪落台比人嗌(自己唔記得歌詞咋卦!)。又抵佢地咁受歡迎,音樂同台風都唔差,特別鍾意個鼓佬,度dbeat好到,而且打得好有力水同爆發力。
呢場係睇過最成功之一場local (metal) show,亦係睇過台下郁得最多反應最好之本地秀,越黎越多女仔睇band show、NOTHING NONE越黎越多女fans(所以我十分鍾意睇佢地出d騷),雖然音響蒲窩係較好,講氣氛都係LiveHouse正d。非常期待下一場。呀,仲有樣野...成日「我好metal」果班、某個forum果d,點解一個都冇黎或者提呢場騷?
睇完騷就要食番餐慶一慶功。好耐冇打過邊爐!兩圍夾埋差唔多三十人,場面都幾墟撼,真係似黎飲多過似打邊爐。今日晏晝屋企有pizza食夜晚又趙左麥記仲有其他超多薯片雪糕立雜野本身諗住食成噉仲打邊爐實蝕底,點知今次反而係有史以黎食得最勁一次,全場三個鐘差唔多全無冷場食個不停,清左唔知幾多豆腐&豆卜&肥牛,重點當然係最後肥牛烏冬,經過左兩次不正確地先肥牛後烏冬犧牲(即係食)左四包烏冬,最後一包烏冬記得先落烏冬再落肥牛,終於完成我地呢碗完美的肥牛烏冬!只計烏冬我估我最少清左一大碗,仲未計其他野食,當在場所有人停晒手之際仲可以再黎多三碟肥牛,引黎眾人側目。全場呢八條三係我俾得最抵。呢份被人歧視兼鄙視帶來之滿足感,食幾多肥牛烏冬都得唔到。
好耐未試過咁有放假feel同咁放肆。
好難得唔使番工,琴晚又玩到咁夜食到咁癲,是日休息一天。
本身今日都唔想出街,點知四點幾突然一個電話,五點已經上到舖。可以請得郁呢位「Rock 哥話齋連呼風換雨都請唔到的玉皇大帝」,除左因為有新貨,仲可以有咩原因?(老細叫到可能有d機)今批貨,實在係太多太多。真係要用「好X多」黎形容。上到黎先剛剛開箱,上架都上足成個鐘上到身水身汗,早知就唔咁早上黎晏d先上坐享其成。上完呢批貨,仲要諗定點樣可以清d位出黎,因為黎緊果水,更X多。
上完架,自然要執一執,唔係執架,係執碟比自己。好隨便地噉又五隻,嘩我自己都覺得好鬼多,聽日仲有第二批五隻忝。我呢排剩係猛煲NIGHTWISH同ARCH ENEMY都冇乜聽其他,噉又多十幾廿隻。真係好X多野要聽/寫。
執完架&執完碟,拎左隻新雜錦DVD坐低睇晒差唔多成隻(而家d雜錦DVD越黎越多metalcore/"pop"野),終於浪費時間到晚飯時間。所以點解咁唔想出黎,鑊鑊出親門唔搞番一頭半日都冇得走,仲要跌錢。玉皇大帝都請唔郁的劉Sir肯賞面食飯(其實陪坐得個飲字),Davy哥,俾足面你啦!幫襯多幾次買多幾隻碟補數!得閒搵多d我食飯,最好當然係打邊爐,哈哈!
都好耐未試過咁好傾、傾咁多野。有好多野都好想做、好想搞,但實在冇時間,特別係而家日頭正職越黎越忙。拿,如果真係搞得成,第一單就搵你地NOTHING NONE又點話!
十點幾食完番到屋企仲未有得訓,呢個三日長off最後一晚都仲有大把野搞,掟番張貨單上網,幫人整整野...已經越黎越多身份,每一刻都係做緊野。所以基本上,有off同冇off,其實分別真係唔大。總之你有時間比我寫野聽野就得。
今日全校我打骰。所以好唔開心。你呢d高層自己走左去玩唔番工要我專登請假頂埋你果份有冇搞錯先!(冇錯我地呢d惡人明知係自己頹都要先告狀)又係一番到已經成張list棟係檯面
「你同我做做做做做做做做做做做做做做做做做做做做!」
做囉超!
今日又要趕功課,班友又要做past paper,夜校部又徵用晒d房開會做野,晏晝唔夠房用就成班友迫晒出黎counter做功課(冇錯我地學校嚴重缺電腦),連好勤力地做緊野之劉Sir都比人趕左出黎,
「你係度不嬲都冇咩地位架啦!」
搞到我都冇位坐,要開部私伙電腦擔張凳仔出走廊做野算。你班友咁型連阿sir做野都唔比丫嘛!阿sir我就一不做二不休乜都唔理聽歌打野算!老細番黎係counter見唔到佢條靚,問:
「喂!你班豆靚有冇見到劉義?」
班友例牌唔騷老細(冇錯成班友都目無尊長,似我),跟住老細擰轉頭見到走廊度坐左條友,曰:
「乜而家d人上到黎可以戴晒耳筒聽歌拎埋手提電腦坐埋一二角當正自己屋企咁威水?咦,條友幾似劉義條衰仔喎...」
今日得我一件,咩都係我包晒,前一秒先係度打緊野跟住已經跳去搞projector再閃去影印再飛身換燈膽,同學某都話
「呢間學校真係乜叉都關你事喎!」
梗係啦。真係未到今日我都唔知道原來我在此的存在係咁重要。所以,我的高層,以後我會留多d機會比你找尋存在的意義,充裕你的人生。我呢d,都係無聊一天渾噩一年就算,人生的意義,太遙遠了!
呢排夜校部請多左靚女,(今日已經有位同學表示「乜而家你d同事咁索!」),之前經我篩選果位part-time小妹妹(其實in咁多個得一個女)今晚又出現,唔知係咪因為d綠葉今日不在,令到牡丹有點不夠美豔。經過一輪培訓,而家阿小妹妹都盡得劉Sir真傳:
「今日有新學生插班喎,你識唔識點搞呀?」
「識。」
「你識就最好啦,我乜叉都唔識,你搞掂佢啦。」
「下?唔記得呀唔記得呀!」
「...噉呢個人要調堂,識唔識得搞?」
「下?唔識呀唔識呀!」
「...呢幾個學生要補番d文件,我寫晒係度,佢地落堂果陣提佢地交番就得,知唔知呀?」
「下?唔知呀唔知呀!」
......。執好晒d手尾,劉Sir終於可以安心噉去...皆旺。
有貨到,係唔同d,立即多番d人,雖然呢批貨仍然係「舊貨」。上到黎已經差唔多齊人,喂你地個個都兩三隻,即係迫我今日又執多隻遮!噉我執多隻BLOODBATH囉橫掂都要寫!加埋阿冷果邊,五月唔夠三日已經買左11隻碟成千幾銀!黎緊仲有MESHUGGAH同NINE INCH NAILS新碟、SYL、POS&EVERGREY DVD,又想執番衛蘭同拜金小姐...太多!仲要係太X多果隻!
執完碟走到太子搵茶記開飯,係好坐好食但呢餐十分唔完美,都唔想提喇雖然我覺得仲會有好多機會黎呢間野食。黎緊我會開始著手,請各位開始工作,儲定多d存貨。
今朝阿sir好淡定,雖然今日十點鐘日校補測同會考班操英文past paper一齊開,仍然定過抬油地斯斯然返到,早餐就當然唔會自己買等學生捐獻啦。理論上應該一早準備定試卷呀答題紙呀,但撞正隻鬼一早番黎影印都可以禮讓地
"Lay sin law! Or ng gup!"
"Yeei! Lay ho siu hal gum ho say gar wor! Yat ding yau gain gwun! Or ng ying!"
梗係冇景轟啦,真係唔急丫嘛,話十點但班友冇十點半都唔出現架啦,做past paper果班遲都算反正聽日先真正mock,之前走左堂冇測驗今日最後一次機會補測都照遲不誤果堆先死。你地遲我冇咩所謂呀,係有少少唔開心囉,搞到我個吉野家咁鬼遲先到!
琴日咁難得做咁多野,今日幾大都盡番首席打雜之責任乜都唔做嘆盡佢先算!又搏慒做監考,相信都冇人會見過有監考官可以打橫挨係張凳上面食住吉野家牛肉飯再開住電腦打野?本來連歌都想聽埋架不過廢事啦揚過頭喇噉樣真係搏炒咩!對住佢果班友仔當然反應都冇因為已經慣晒睇化架喇對呢個「阿sir」已經,大家都明白靠呢條友都係冇前途,「自力更生」先係唯一出路!
Past paper做完驗又測完,我地呢d當然繼續扮晒做野其實係匿係入面吹水&玩,都想扮到其實有好多野做要長駐課室當office做野吞pop算。但晏晝account阿sir專登番黎同班友仔補習(免費的,呢個阿sir好過果個「阿sir」幾多倍!),全村人計數計到興起(亦嘈到飛起),唯有走番出去counter做野,雖然冇野做。但今日手風唔順,寫唔到野,灰!
今日食左個免費早餐(冇錯點都要強調係免費以顯示劉Sir幾得學生愛戴),晏晝一路都冇食野,唔係因為食左個牛肉飯飽足全日(同我食過野都知係冇可能),而係諗唔到食乜。諗到成四點幾,上麥記個網見到今日魚柳飽買一送一,
「好!就食魚柳飽!阿姐,兩個魚柳飽,三個走沙律醬!」
完全地唔合邏輯,所以阿姐落到麥記幾乎同個staff嘈交咁滯,但唔係因為「兩個飽三個走醬」,而係阿姐以為我係話「兩個魚柳飽一定唔好走沙律醬」,結果係counter係噉嗌
「記得唔好走我醬!唔好借d倚唔落沙律醬呀我話你知咪當阿姐我好蝦呀!唔係我點同劉Sir交待!」
四個飽廿二蚊,計番五個半一個,呢個價錢就差唔多啦,平時十一蚊一定唔食,吉野家都係十三蚊咋大佬!
今日準時放工,要落一落去樓下幫舍妹搵VCD,下星期一考Eng Lit有三套戲要睇,到今日先黎搵戲,你話死唔死。當然又係好景行出d果間果間我日日都會行入去睇睇,要特別嗚謝果度個阿姐,
「唔該我想要《伊人當自強》同《誘心人》!」
唔使兩秒立即遞到黎。
「唔該仲有一套,但唔記得左中文名係咩,英文叫"Mona Lisa",搵唔搵得到?」
「阿姐英文唔好!你俾d時間阿姐!」
走勻成間舖走左半個字,阿姐真係拎到隻"Mona Lisa"比我!
「阿姐英文唔好!但係都搵得到!幫襯多d當請阿姐飲茶啦!」
冇得唔幫襯啦真係!
買完VCD再上舖執執野處理一下事務,又到夾band時間。今晚得一個鐘,時間短左反而夾得仲好,全晚都係玩新野,又玩得好順。係衰時間短左d,jam唔到太多野,但又諗到好多新玩法。
「我要玩jazz!」
我都要。要研究研究...
是日飯堂轉左去傳說中「全港炒公仔麵冠軍」果間,門口好似掛蒜頭噉掛左兩串出前一丁,仲有埋獎杯忝。食野之餘,都要傾傾正經野。Artist/designer諗d野係唔同d。灰啦真係阿Henry哥,都只係「諗緊」同埋「諗住」你已經出newsgroup擺左我上檯,即係迫我快手做野啦。希望唔使太耐有辦睇睇。
幫班友補完會考,功成身退而家繼續播碟,今日象徵式地上學校坐坐,十點半做完野就走人,冇計,因為今日下半場係十一至七尖沙咀全日翻譯。唔使出學校播碟又可以早放工,何樂而不為。上到office先得幾個同事老細阿頭都未番,仲可以絲絲然食埋早餐先開機做野。點幾鐘又食,食完又去其他同事度搜括埋d零食&送尾,有個同事仲自動自覺獻上珍藏已久之即食薯蓉,今日差唔多個零鐘就有一餐食,譯譯下書無聊又可以走黎走去搞下人吹吹水,十分地輕鬆愉快。只希望餘下之日子,可以繼續開開心心。但我已經開始變得越黎越靜。
大量碟放,有意者請聯絡我,ICQ 22209700 or email lau_sir@hotmail.com。
BEYOND THE SIXTH SEAL $50(美國melodic death metal樂隊)
CANNIBAL CORPSE - Gore Obsessed $50(最著名brutal death metal樂隊作品)
CANNIBAL CORPSE - Live Cannibalism(日版) $50
CARNAL FORGE - The More You Suffer $50(哥登堡thrash death)
CORONER - Coroner $30(瑞士前衛thrash傳奇精選)
DISSECTION - The Somberlain $50(奠下black death metal之經典作)
ENCHANT - Time Lost(日版) $50 (progressive rock)
GOREFEST - Erase $30(荷蘭著名death metal大作)
HYPOCRISY - Catch 22 $50(瑞典最出色death metal樂隊作品)
INCUBUS - A Crown Left of the Murder $50(2004年大碟)
JIMMY PAGE AND BLACK CROWES - Live at the Greek $60(rock n' roll名團與LED ZEPPELIN結他手聯手雙碟現場專輯)
MAGNITUDE 9 - Chaos to Control $50(結他英雄Rob Johnson自組樂團)
MOONSTRUCK - First Light $40(瑞典death metal)
NOVEMBRE - Dreams d'Azur $50(progressive death metal,接近OPETH一類)
POISON - Flesh and Blood $30 (Hair Metal)
RAUNCHY - Velvet Noise $50(丹麥industrial thrash metal樂隊首張大碟,似FEAR FACTORY)
SENTENCED - Frozen $40(芬蘭gothic metal)
SPOCK'S BEARD - Snow (3CD limited edition) $70(由Neal Morse成立之progressive rock組合02年大碟三碟限量版)
SPOCK'S BEARD - Feel Euphoria $50(由Neal Morse成立之progressive rock組合03年大碟)
SYMPHONY X - Live on the Edge of Forever (2CD) $70(美國著名progressive power metal樂團演唱會專輯)
TIMO TOLKKI - Hymn to Life $50(STRATOVARIUS結他手個人專輯)
VITAL REMAINS - Dechristianize $50(03年最佳death metal專輯)
WHITE LION - Mane Attraction $30 (Hair Metal)
有意者請聯絡我,ICQ 22209700 or email lau_sir@hotmail.com。
是日大病,休息一天。
琴日訓到不知多少時日,都係時候返工喇,即係其他同事個個都dayoff,搞親人地要無端端返多日工代就無謂啦,所以雖然娘親見到我都彈左句「乜噉死樣」,死都死去返工。唔知係真係太好訓還是d藥夠勁,直訓到今朝十一點幾先起身,即係得番一個鐘多少少時間飛出沙田,差少少卡都打唔切。訓左成日,好多野要追番,好支力,ZZZZZZ......
前日已經見到NINE INCH NAILS隻新碟但實在太多碟未聽甚至未拆唯有扮睇唔到下星期先算,今日出到沙田見橫掂都係就上HMV執隻,點知黎到先發現原來沙田HMV半個月前已經執左!想執都冇得執忝搞到,又唔代表唔使跌錢,換左季先發現,原來我係一件短袖恤衫都冇!呢幾個禮拜都係著件長袖恤衫摺高個袖扮晒野,但噉落去唔係辦法,點都要買番d短袖恤衫,今日沙田放工行過G2000見減價就連執三件承惠$297。呢個月上旬已經跌左三份一份糧都有。今個月,真係好豪。
因為一個幾無聊之原因,臨訓都要飛出旺角落舖頭,順便睇睇點點貨。新呢批貨真係十分搶手,可能始終而家大潮流係Century Media,估唔到隻MERCENARY去得咁快,係因為貨單中之一句還是真係自己搵?希望係後者。
等緊下批貨,應該差唔多時侯。
Weekly Reviews:
All reviews here...臨訓前上網同睇報紙睇到好多過癮野,就茗埋報先訓啦。
...但冇咩好講。因為冇野講。
我都唔知係因為病定咩喇,真係冇乜心情講野。或者星期四之前,大家都唔會有野睇。