請為香港音樂默哀。
其實，都唔使叫你地班「香港人」默哀啦。
反正個個都只關心可以點樣自戀同拋書包，而唔會留意同關心自己踩緊塊地發生咩事。
越「音樂」之地方，反而越少人提／講呢件事。呢樣野先真正要默哀。
想不到，竟發生這事。
也許，早點發生，會更好。
是始是終、是禍是福，我不知道。
祝好。
劉義
一朝早新聞話台灣打風，有幾班來往港台飛機要取消。當堂好擔心，
「死，唔知老細佢地會唔會滯留台灣聽日先上得機後日先蒲頭呢？唔使的話，咪即係聽日開始冇得再頹囉！」
係呀，今日又係怒頹，除左大量應該上三樓換信用卡禮物之人早左出白撞入黎唔夠兩秒發現唔對路即閃，又或者想上六樓間財務公司但係「乜呢度唔係六樓咩？」，全日真正有意義人士得一位同學番黎交功課，同一個真係上黎問課程之新移民。所以全日你就見到counter有條友坐係度對住個芒篤篤篤篤篤篤．．．左成朝，終於俾我起好篇LILITU "The Delores Lesion"，本來冇咩期待，點知比想像中好好多。兩個鐘就起好，係我寫得最快之一篇（所以永遠唔明點解Henry可以幾粒字就一大篇，諗起都自卑），但係寫完之後呢成個晏晝都冇再寫野，因為又係果個問題：
「寫乜？」
真係諗唔到。結果坐左成個晏晝，坐到拆電腦個喇叭插落mp3機開大聲少少（大佬，真係搏炒咩）擺明焚，連阿姐見到我咁頹都一齊坐，佢聽收音機，我聽歌。原來就算咩野都唔使做，剩係坐係度但要維持住清醒狀態，係十分之高難度架。
今日張大導又出旺角拍野，不過係Chic之堡影figure。成日就收到佢電話
「我係旺角咋！快ｄ出黎啦！我拍完過皆旺搵你架！」
六點放工走左去Chic之堡撞佢點知一個亞視人都冇，上埋皆旺都唔見人，跟住電話響
「等我？拍完一早番左亞視啦！等你咩！」
係囉又係我錯囉。
「反來囉！」
台灣打風打成點都冇用，班高層（除左我同阿姐人人有份）今日蒲番頭，即係冇得再頹要做野喇。今日開始正式做劉Sir，因為跟住三個月二四晏晝要教埋電腦班。冇計啦，唔靠噉樣收佣（一個月一舊水．．．），真係碟都唔使買．．．
呢個電腦班一對一小班教學，保證學生有足夠時間嘗試（其實係因為全校得一部電腦．．．）。個師奶（「女士！禮貌ｄ！」）似做左幾年主婦仔，仍然停留係打字機年代因為剛剛辭工唔使做時先開始興用電腦做野，見冇乜世藝就黎學番下電腦 － 坦白講，呢ｄ時勢都仲可以七八年冇做野，相信佢老公收入唔會點低，呢居居幾千銀算得咩丫真係。為左多謝阿師奶（「女士！」）咁關照，阿劉Sir點可以唔出力ｄ教呢真係，今日就教晒佢desktop點樣玩開新folder再copy & paste搬搬搬。
「我唔會跟notes教架！因為好多野學左你都未必有用，聽阿Sir講果ｄ就得果ｄ夠你用過世！」
理直氣壯兼十分具說服力。但事實係，果疊notes有ｄ劉Sir都唔識呵呵呵。但係冇所謂，反正剩係玩copy/cut & paste加drag & drop都夠阿女士玩成個晏晝。
放工蕩到八點半，終於等到潮流特區番工之阿堂放工有飯開。經過多輪變卦，本來之扒王之王變左TRHK御廚之一銀龍，出席者得番我、阿堂同阿立。做男仔呢真係好慘架，我果時由揀工寄到後來「七千照殺」再到「五六千都寄啦」逢有email/fax/電話都掟晒野過去先掟左百幾（可能過二百忝喇）到今日仍然係一個回音都冇，唔係得人介紹連而家呢份都唔使做（當然，自己好想做果份呢就係自己戇居miss左冇得做），阿立兄仲灰，到今日都仲未搵到一份正職。教院個名可能係拖累之一，但係作為男仔始終係蝕底ｄ。好多工都剩係請女仔，特別係我地男仔而家都好想做之sales同文員，選擇比女仔少咁多，學歷成績又唔係點樣勁，寄幾多都冇用。所以呢，唉，阿立哥，唔好揀工喇，有得做就做啦．．．
一日比一日激，今日要走兩場，朝早一場電腦晏晝走多場。朝早果場係有個社工十一月中開始做野，臨上工之前想學好Word同Excel，今日就係由Word開始。開頭都有ｄ肴，因為琴日突然間就話今朝黎上堂，仲要十點堂開始，真係驚備課都備唔切啦（實習時多同難呢單野幾倍都冇咁搏呀真係），始終唔知個學生程度，入到去比人窒
「呢ｄ一早識晒啦阿Sir！」
噉就冇癮啦。好在佢係識電腦，但仲處於可以比劉Sir呃到之無知程度，剩係玩hotkey都玩左成堂（想學hotkey呢ｄ懶人捷徑搵我就岩架喇）。無驚無險就一堂，但係其實都有ｄ肴，因為佢想學多ｄExcel，進度快的話可能下星期就要開，死啦，我都唔識，點教？
琴日位女士今日晏晝得閒就黎上多堂，琴日教果ｄsystem野「落堂已經唔記得晒！」既然係噉今堂就教上網，夠晒「生活化」，又有得一面上一面玩真開心，開埋個email account俾佢又點話。聽日教ICQ，更開心，因為擺明為攝堂玩而噉教法（你試下去ｄ正常學校教ICQ睇下會點），雖然我都諗唔到ICQ點樣教兩個鐘。
．．．冇。唉。生活，真係越黎越悶。冇心情，乜都唔想做，碟評都寫唔到喇。唉。
又係一日走兩場。而家逢二至五都有「騷」出，星期二晏晝一場，星期三四早晏各一，星期五朝早走多場，劉Sir突然間好紅。紅到我自己都有ｄ驚忝。朝早個社工下星期就開始學Excel，我自己都未識用忝；晏晝個師奶（「女士！」）話咁快就學晒desktop同上網（雖然每次學完第二日已經唔記得晒），今日仲連ICQ都教（好明顯呢條友冇備過課），下星期冇得走喇要開始教中英文打字。大劑！邊個教我倉頡？
晏晝個師．．．女士就係因為老公有錢又困左係屋企咁多年黎學電腦搵ｄ世藝，朝早個社工學電腦係因為．．．
「以前我好高職位，電腦野有clerk幫我搞啦使自己做？而家轉左工乜都要一腳踢，冇得唔學啦！」
之前成日見到我話「冇野做寫碟評」、「寫緊段記但係番緊工架」，今個禮拜起冇呢支歌仔唱喇。呢排開始搞course，上星期無限fax之後呢星期要打電話跟，四點落堂之後就到電話時間。人地個個打幾個點都有一兩個中，係我打左成個晏晝（十個唔夠．．．），唔係「冇興趣」就「冇需要」，結果得一個有少少 － 係少少 － 興趣叫fax多一鑊。人人都有係我冇，所以我要教電腦。
今日有阿Rock哥投稿。
「話說今日幫琴行送貨，先去左荃灣一間小學音樂室set鼓（小學有鼓！我都想去教！），撞正成班小二小三係果度食lunch，有條契弟問：『哥哥，呢d係咩黎咖？』我答：『咪鼓囉傻仔！』個契弟問：『哥哥你係咪識打鼓架？有冇聽音樂架？』我答：『梗係有啦！阿契弟你呢？』條契弟話：『我爹地媽咪叫我學琴囉．．．』跟住我用\m/呢個手勢答佢：『彈琴都要玩METAL呀第時大個左知道嘛？你班ＸＸ知唔知！』之後成班契弟一齊\m/番我大叫『好呀！MMMEEETTTAAALLL~~~』我就係校長同班先生衝入黎之前逃出果間學校．．．
「送完呢間又去左間青衣小學，見到有班一年級上PE，個Miss帶緊班豆靚熱身，突然間條女播EAGLES隻"Hotel California"，我初頭以為聽錯，但係又真係EAGLES唱喎！跟住個Miss同班豆靚講『你班死仔跟住音樂熱身！一、二、三、四．．．』見到呢度已經嚇死，之後再嚇死多次，因為個Miss唔嗌一二三四直頭唱埋忝！撞鬼！嚇Ｘ死！個Miss見到我嚇死左個死樣，立即一句車埋黎『Ｘ你老ＸMiss唱EAGLES唔Ｘ得望咩呀＊＃ＸＹＺ．．．』之後一面跟住首歌帶學生熱身一面唱"Hotel California"仲要唱唱下可以窒我幾句又繼續唱！癲架！點解而家ｄ小學可以咁Rock架媽咪我好驚呀聽日我要辭工嗚嗚嗚∼」
今朝教完電腦，lunch時阿堂臨番工過黎旺角呢頭整電話就吹左陣水。橫掂晏晝冇堂又一場黎到就同佢一齊行埋過佐敦送佢番工，英皇間野我學校行過去兩三個字就到，原來就係咁近。
冇錯，原來就係咁近。甚至更近。唉．．．
晏晝冇乜野做，但老細係度想頹都唔可以頹出面。OK月頭到琴日一張三百蚊EPS單可以換一杯軟雪糕同一罐野，所以之前全校（三條友．．．）瘋狂碌EPS造單（剩番之九張單琴日拎晒去換喇，好在學校樓下間OK冇雪糕賣而送雪糕券唔係唔知點算，一次換九張單仲要張張都齊頭三百睇舖條友收數時冇小到真開心），戶口果千二整晒出黎，不斷死慳死抵之後計計下有少少閒錢，放學上TRHK執左兩隻加多兩隻二手（呢個「少少閒錢」情況今個星期已經發生過兩次．．．）。執左一隻QUEEN、一隻symphonic black、一隻progressive同EMPEROR歌佬兩公婆隊我都唔知咩之實驗野，結果最岩feel就係last一隻，因為唔多明佢地玩乜，聽果陣腦都唔使用，唔使煩。
做左野，就明白個個月尾等出糧之苦。但係一有閒錢有時間，都掟番去TRHK，我未有糧出住，阿威都要出啦，所以點解成日話老細請我幾抵，唔使俾人工之餘仲貼番兼幫手清ｄ死貨爛貨忝。係囉，點解生意咁差成日都唔見人呢？成日話「我好metal」、「投身metal」、「貢獻metal」果班去晒邊？信和？買日版sample？定還是去都冇去過，留係屋企download算？
個webzine好日唔update，呢排幾日就一次，睇黎MF近來都幾得閒。見Henry哥前兩日話寫「呢幾隻」點知今日就Ｎ咁多篇掟左上去，真係快手，唔似得我寫碟評噉兩三個禮拜／月先起到十零篇之後比MF一鑊過。所以點解而家我唔寫碟評。Henry哥，努力呀！「TRHK Webzine香港區首席寫手」之位，今日正式傳俾你喇！
呢排摷番以前ｄ段記黎睇，係呀，以前果ｄ真係好玩好笑好多架。係「灰」未出現之前、係「妳」未出現之前，原來生活，真係好開心架。
冇乜特別的一天。無聊到不嬲唔備課之我都做定下星期電腦班ｄ教材。Lunch果陣Toby搵埋一齊上旺電買野（當然係110 Digital），就順便叫佢執個麥記餐黎學校樓下個公園開餐（我都唔記得幾耐冇正式食過麥記。剩係知，佢地又加左價，小！）。發現，真係冇乜邊個衰得過我。圍內差唔多個個都搵到教書，唔係教書都好好前途，好似有學校請都唔教揀左而家份hkedcity整網頁之Toby，每日早我放半個鐘，星期六仲要行長短週兼長週十二點幾就放，嘆過我多多聲但係人工高我一倍再加一千。除左英皇果份究極完美之外，呢份緊隨其後。之前流傳臘味同阿昌做出版社暑假時做到萬幾一個月，而家過左旺季未必有咁高，但係捱多排過左試用期人工月薪可能都過到萬（呢份其實暑假有RA老細保送我入去，要做一定有得做，但係為左搞六翼天使推左，而家冇得怨亦無謂怨）。唉。正宗人又冇錢又冇。大家千祈唔好學我。
少錢同辛苦，都算。明明近在咫尺卻是遠在天邊的感覺同情況，每日都會出現。所以點解，我咁唔鍾意呢份工。
完左sem break，又到新學期（冇錯，一個月已經係一個學期），又見番班學生，即係又有人比我窒，我都唔想但送到上門冇計。
我發覺埋親我身ｄ電子野都冇好結果，好似屋企部「新」電腦買到番黎format左十幾次搞左成個禮拜先叫做行到，而家份工上左工唔夠三日學校部腦就死左，部MP3一個月未夠又死埋（佛爺真係好帶契），大家如果唔想換電腦電話，千祈唔好比我埋你地（ｄ機）身。好在有保養，間野今日叫人上黎學校幫我收機。最灰就係上星期突然間好有手尾地聽阿Cherry（讀音：高層）話執一執張萬紙塚工作檯同亂葬崗櫃桶，興奮得滯連張保養證同張單都掟Ｑ埋，今日條友黎收機時唯有死死地氣係張交收單寫住
「我都唔想冇保養證交架，衰在好地地無端端執執張檯囉！連個天都睇唔過眼整唔見左張保養證同張單，我都唔想架最多以後唔再執野囉！在此對各位高層致上萬二分敬意！」
而家學校除左做學校之外，仲做埋託兒所同飯堂，有幾位小朋友一落堂就拍晒檯嗌晒
「我要食新旺呀劉Sir！我要食新旺！我要食粟米雞扒拼煎蛋飯奶醬多多醬涷華田走冰！」（斜體部份請於四秒內完成，上個紀錄為兩秒讀出「漢堡煎旦飯粟米汁炒底凍華田」，但冇人可以破到呢個由劉Sir所創之永恆紀錄，因為果間野執左差唔多成年）
「粟雞旦」已經成為呢度指定食品，睇劉Sir入左黎做之後除左頭幾日未收到新旺張紙之外日日lunch都係趙呢個就知有幾正，而班友仔亦全部中晒新旺毒留係學校食飯的話非幫襯佢地不可。對住留係學校開飯之班會主席、班會財政＆同學甲絕對食得開心，班友傻架完全唔明點解可以咁癲咁串，班會主席永遠係被在場人士針對之目標半分鐘一小窒一分鐘一大窒，而佢永遠都唔會／唔識反抗只有笑口噬噬或者喊苦喊忽，可以為大家帶黎咁多娛樂，抵佢（被屈）做班會主席。點解佢會成為眾串之的？可能因為佢日日都set個潮爆髮型同STATIC-X（又名"FEAR FACTORY with funny hair"）歌佬Wayne Static一樣：
食完個飯，就到電腦班時間。出席者有財政同同學甲，主席只係因為數學堂唔聽書冇抄notes順便痴間冷氣房抄番兼溫聽日個maths測驗。今日有大粒野參觀學校，上親電腦堂唔係撻係張凳就係趴係張檯上面果三條友（主席當然係超極勤力地抄notes啦，聽日測驗仲敢玩野咩，噉係邊三條友就計到啦）仍然係唔識死，由勤力的班會主席坐窗口位幫拖睇水，財政同同學甲一如以往以超越所有「坐」之概念之坐法對住阿Sir：
「又做Word，悶唔悶ｄ呀阿Sir！咁Ｘ悶！我要學Excel！」（噢，唔講你唔知，班友對住我時係粗照爆架）
跟住主席天文台醒水，就係班大粒野即將蒲頭之半秒鐘內，全世界立即坐正立直，站得端莊過頭的劉老師字正腔圓地向同學們訓示：
「爾發現汝等不思進取、不知所謂、不死無用．．．」
（眾同學坐正連連點頭）「老師所言甚是，唯咱家知錯不改，吹脹哉？」
到出邊班大粒野講句「愚子可教也」然後閃人，阿Sir立即一野跳上張檯兜巴星兩條死仔
「做啦仆街！咁多嗲！」（學生粗照爆，先生當然都係啦）
或者星醒左班友，兩位小朋友立即非常落力地完成劉老師指派、一野過可以重溫晒所有Word功能之exercise，或者為左向呢個一心諗住早ｄ落堂訓覺之阿Sir報仇，一個「小小」之exercise成個半鐘先做起（其實唔「小」，相信整出黎呢度有一半人可能都要佢地時間一半，但唔鬼見左個file冇得比大家玩），剩係研究點樣係幅圖上面加字都研究左三個幾字。其實班友可以早半個鐘搞掂，但因為財政抱住不屈不撓之精神，
「我係唔識做，但係我寧願浪費晒ｄ時間唔溫聽日個測驗都要搞到你冇工收，嘿！」
連本身同佢一齊學電腦之同學甲都一早放棄寧願搵主席一齊研究聽日個數學測驗都唔再理部腦，阿財政仍然要玩死劉Sir先心息，到最後要阿Sir喊住求佢「你放棄啦！俾我開估教你啦！求下你！」先肯停手，但當其時已經玩多左半個幾鐘，又即係劉Sir訓少左半個幾鐘。之後當然到劉Sir串串貢時間，邊教邊做夾埋都唔使半個鐘，
「仲大大聲話學Excel！Word都未掂就阿支阿左！挑！」
本身話三點三完之電腦堂結果四點三先完（多謝晒財政啦），完左本身諗住可以嘆下先點知班友唔肯走死都要留係度溫聽日maths，但經過呢堂電腦我已經唔想再理，班友死纏住都唔理大模斯樣係班房照頹照訓。冇錯，呢一間，係學校黎。
呢ｄ光陰，就係呢份工我最鍾意之地方。其他鍾意之地方有．．．（仲）有咩？
今日又係電腦，但係係教果位「冇野做七八年咪學下電腦」之女士，唔使對住琴日兩條友真係開心。成個course三十個鐘，佢要ｄ野程度又唔要好深，諗教ｄ咩攝時間都度到煩，連ICQ都教埋，我都唔知仲有咩無聊野可以教，唔通真係教點樣用P2P download歌咩。所以今堂教英文打字，教法好簡單，搵定幾個打字exercise網，然後逐個開叫佢跟住打，佢打緊果時唔得閒理我，我耐唔耐贈一兩句就得間中仲可以瞌下 － 有幾次真係瞌著左分零鐘呀，唔知係咪琴日堂電腦真係好Ｑ支力，好在個師．．．女士顧住打仲越打越開心基本上玩到當我冇到，分分鐘我由佢自己玩出去pantry訓番幾粒字都仲得。
打完字又係打電話，亦係十分之唔鍾意做之一環。又係我樣衰囉，人人打親都有回應，我打果ｄ唔比人cut線已經符碌。老細鬧
「搞錯！我打五個都中三個啦，你係咪真係咁黑仔打極都冇呀？」
可能係啦，又或者，我真係唔識打。始終做唔到老細果種循循善（惡？）誘拙拙迫人之方法，不論能力上還是心理上。或者實在太老實喇，我性格真係唔適合做呢個位。
今晚開始做"Taken"。好耐好耐之前提過，但相信冇人會記得，就再講下。呢套係由史提芬史匹堡監製及創作，以有關外星人之事實及史實寫成之電視劇，而且一次過推翻晒史匹堡自己以前所有外星人電影。呢套電視劇有十集，每集長兩個鐘，而且同美國傳統電視劇唔同，係美國首播時唔係一星期一集而係一晚一集播兩星期內做晒（明珠台就當然係一星期一集啦）。因為咁不正常、因為建基於事實、因為史匹堡居然會用黎推翻晒自己以前作品，所以好多人都覺得，呢套野真係想話ｄ野你聽。
如果你問我，有咩似"Taken"既劇睇，我唔會叫你睇"X-Files"，而會叫你上TRHK買EVERGREY "In Search of Truth"，呵呵。
最後一期MCB，一出就買，但留左係學校，今日先拎起黎揭一揭。唉。
「終。」
今日要教中文輸入法。
「學乜鬼倉頡丫！家陣個個都學速成架喇，夠潮丫嘛！真係用左之後潮到ｄ人都唔信你就黎五張野呀！」
「真係？係咪用左我會好似三張幾咁靚架？」
「兩張都得呀！」
經過連串胡言亂語同花言巧語之後，個師．．．女士終於決定唔學倉頡轉學速成。一天都光晒囉真係！本來見佢電腦都唔多識，速成應該都要三四堂先學得成，點知一堂兩個鐘就學成速成！雖然例外字、難字果ｄ未教，但兩個堂就學識到點樣速成打中文終於係雖慢不錯果隻，比好多好多人掂喇！梗係阿Sir教導有方啦因為你唔係話因為個師奶醒丫嘛？
但係就係有方得滯，跟住大劑：速成都可以一堂搞掂，跟住應該教ｄ咩先係？
有時我都覺得，我份人實在太過善良。通常ｄ老細打電話叫人in，都係講定時間叫你幾時上黎，電話唔通的話就立即next（我一個月前就試過有兩次匿名miss call響左冇人聽之後再冇打過黎，可能我已經錯過左兩份工）。今日我打電話叫人上黎學校in，第一句就係
「我地請緊人，你幾時方便上黎in？」
之後仲要改Ｎ次時間改到聽日師奶要電腦要改時間就佢黎in忝。我都覺得自己真係太過太過好人。你會問，
「邊度仲會有呢ｄ老細呀？」
有。就係英皇果個。你試過老細打黎叫你上去見工，同佢講唔得閒講電話叫佢晏ｄ打比你，但佢又真係晏足幾個鐘先再打番比你未？仲要個電話斷左幾次線都再打比你打到通為止、驚阻住你所以專登就你冇野做ｄ時間先打電話通知你、仲要第一日番工果朝早專登打個電話提你幾點番工未？但我同呢份工／呢個老闆，可能真係無緣。一個十分傳奇之故事。亦係一個唔願多提之故事。
今日朝早個社工終於去到Word最後一堂，而劉Sir之慣例當然又係撻番星期一個exercise做final quiz。星期一果兩條友仔做左足足個半鐘先得4/20（呢個半鐘真係有血有汗，詳見1/11段記），阿社工姐姐九個字就做好。當堂串串貢。
「個半鐘先做好？邊兩條傻仔！阿姐我九個字咋！九個字咋！」
梗係啦，有阿Sir貼身跟進指導嘛，十一點三開始做十二點鐘落堂，阿Sir唔帶住佢做夾硬十二點起左佢的話，堂都唔使落呀！
今日英文堂落堂之後，隻鬼留左係度同學生傾番之前測驗同功課ｄ野，傾完隻鬼見到同緊班會主席同佢四條靚吹緊水之我趙緊個粟雞蛋（提多你一次，「粟雞蛋」＝「新旺粟米雞扒拼煎蛋飯」，因為我一星期番六日工六日都係食呢個，所以將來會有Ｎ咁多機會出現，敬請留意），就問，
「圍，娥哥盒呢？」（隻鬼真係識中文架，呢個故事教訓大家，係背後千祈唔好講人（鬼？）壞話，唔係死左都唔知咩事）
見隻鬼咁有興致就拎左Cherry盒粟雞蛋孝敬佢（冇錯，粟雞蛋病毒已經由打雜傳染至高層無一幸免），至於高層就當然唔會介意啦，盒飯佢都未俾番錢我，咪即係我請囉。隻鬼一開：
「蛙，金領多？」
就撕個飯盒蓋出黎裝左半盒飯自己食，剩番果一半醒俾班會主席（尊容請看1/11段記），
「刀快食！我央梨容快之！」
結果隻鬼以其非常日式之筷子食法，快過我地主席幾條雞，主席連塊雞扒都未趙完隻鬼已經清晒，
「金零蚊，刁！」
之後揚長而去。在場，只餘下一邊「筷子都食得快過匙羹？」一邊繼續慢慢喫飯盒之班會主席，同等佢食完飯鬆人等到燥所以係噉小「筷子都食得快過匙羹！」之靚甲、靚乙、靚丙同靚丁。
清左個粟雞蛋，又係同阿師奶繼續速成時間。到左今日我先發現，打左咁多年中文仲要教過倉頡，我都唔知咩野叫省略原則、特別字型 etc.，到今日教果時發現，
「大檸樂！．．．冇事冇事阿師奶 － 呀唔係係阿女士我問你想唔想飲檸樂遮．．．」
照住份notes舉例子都舉一錯三，最後兜番
「呢幾樣野，初學者係好易做錯，睇下阿Sir舉咁多個例子都錯就知啦！所以記得練多ｄ呀！」
我冇呃佢架。只不過冇話比佢知，阿Sir都係初學者咋嘛。
搞掂晒ｄ學生，終於有得抖下，一個人霸晒間電腦房（其實只係一間有裝到一部電腦咁大把之班房．．．）聽住歌整電腦notes。可以坐低他他條條聽住歌做野，已經係十分幸福，而呢份工暫時亦只可以恨呢ｄ。
美國大選揭盅。結果係無窮無盡的粗口。我冇咩想講，只有再送呢首歌比大家同全世界。我心目中年度最佳單曲同年度最佳MV。
一朝早阿姐好大契，OK有隻者哩糖五蚊五包。
「嘩！五蚊五包！Cheap到爆！」
見隻糖又幾好食，就叫阿姐落去怒掃廿包，諗住放學之後班友仔一人一包（係啦，琴日請完阿Sir食飯今日又請學生食糖，所以點解呢六千蚊咁難捱）。點知班友出到黎見到，
「超！五蚊五包！Cheap到死！」
咦，點解個個都知道呢樣野好似全世界我呢條傻仔唔知？又你班友咁多嗲點解拎Ｑ晒ｄ糖連阿Sir自己都冇得食？
今日開始朝早社工堂電腦轉左十二至二，兩點落堂之後都冇得開飯，因為今日要in人。冇錯，係我去in人，遲ｄ要請人教商業英語，第一次面試就係由我負責。In成點？一Ｘ流啦。前日問佢「幾時方便黎in？」調埋堂就佢到琴日又話唔得閒改到今日點知到左今日放埋飛機，挑係唔黎就早響唔好阻住阿Sir開飯啦！結果搞到要落美心買下午茶雞籃做「晏」！
最唔滿意就係，放飛機果個叫張．星．敏！Queenie！叫你家姐出黎見我！
今日，正式完成試用期第一個月。之後離職要一星期前通知，再之後要一個月前。亦即係話，冇得走架喇。我屋企好想我走。亦有人希望我走。但，似乎都係無緣。算啦。
一個月，我都唔知應該用咩心情去面對。好開心，收到寒風送暖之關懷。雖然，我都唔知呢一份「暖」，係咪真係咁值得去珍惜同享受。但，既然只得呢一份暖，亦只好去笑著接受，寄盼明天。
平淡的一天。冇咩特別野發生。但點唔特別、點冇野做（其實係唔做）都好，都要坐到六點鐘先有得走。係呀，星期六都要返全日，諗起都灰。有次晏晝同班學生一齊捱飯盒，有條友話
「我中五班friend全部出晒黎做野，得我一個仲讀緊書，佢地個個都搵到文職人工都成六七千七千五都有。有個搵到份話要大學程度既文職，一個月六千幾七千但係老細成日請佢食飯，逢星期五老細實包唱Ｋ，而且逢到ｄ節日老細實塞錢比佢，好似中秋節果時老細夾硬俾左佢三百蚊，計埋計埋搵好多。另外有個做緊秘書，我有次打電話比佢問佢野，佢話佢訓緊覺，原來佢一日放兩個鐘午飯時間所以食飽飯就訓下覺，星期六日又唔使番，一個月都有六千五。所以我都立即問佢仲有冇位。早知就唔讀Dip出去搵野做好過啦！阿Sir，你讀完大學出黎，人工應該都有八千幾卦？」
你想我點同佢講？或者真係要講事實：
「阿Sir出到黎，都係得份一星期返六日每日九至五一星期五十四個鐘，仲要得六千蚊一個月兼做到死死下，係呀就讀到大學都冇Ｘ用架你地快ｄ退學啦！」
因為種種原因四點幾先開飯，食完之後繼續漫無目的之等放工之旅。而家無論有冇野做，冇學生果陣都會屈入電腦房，貪一個人霸晒全間房夠闊落，又其他人要行過走廊先睇到我做ｄ乜，最重要就係有投射螢幕兼可以全身四十五度傾斜睇戲咁睇，真係一Ｘ流！更一流係，今日真係有戲睇，原來間野收藏左幾隻VCD，部機入面本身已經有隻《吾係特務》"I Spy"（好明顯有前科），駁埋個喇叭（一個靚聲到仆街之喇叭，我未試過電腦喇叭有咁靚聲！痴Ｑ線！）再熄晒燈睇，真係一Ｘ流！五點開始睇睇完Disc 1冇理由唔追埋佢，噉就"OT"到六點半先走人。本身食完飯之後落街掃左五十幾蚊薯片雜碎，睇完戲之後已經比我消化左三十幾蚊，完場時一檯垃圾，所以你話，份糧得果六千，邊度夠使丫，食都唔止呢個數啦。本來今晚港島有場騷十分有興趣，但睇完戲冇過去，一來睇到好支力，二來七點先走都趕唔切，三來張飛已經變晒薯片袋同朱古力盒。
似乎以後逢星期六都係電影日。下次買定爆谷先，噉先夠睇戲feel。
上次返教院係幾時我都唔記得左，應該係返去爆locker果次。今日無端端要專登山長水遠返黎拎袍。好無謂。繼呢個星期五晏晝搞畢業禮之盛舉之後又一貢獻。點解唔可以比人town center拎袍？點解教院做野永遠都係咁白痴？更白痴係，我發現我拎唔到畢業證書，因為還袍兼拎畢業證書只得四日，仲要都係星期五六辦公時間，呢四日內唔親身到大埔教院拎去的話（例如我呢ｄ一至六都番九至六之白痴仔）就當遲還袍每日罰錢。點解呢間學院可以咁戇居？又還是話點解呢間野咁仆街，寄多封信問下ｄ人想去教院拎定town center拎再送ｄ野過town center俾人拎就得，但寧願方便自己而犧牲全世界，點解呢間野仲未執？
今朝早要早半個鐘上堂，冇得遲（咁多）喇一定要準時返（where準時＝遲少過三個字）。之後發生左咩事唔好問我喇，已經做到我都唔記得左做過ｄ乜。朝早一放學又係飯堂時間（今日創造歷史，全場豪叫七個粟雞蛋），食完飯立即帶學生做下星期一Maths & Stat份小組功課，帶到六點幾學生走左都未走得，因為呢個禮拜開始夜校部大把野搞，今晚仲有騷出，但出果個當然唔係我，我只係星爸，即係「整PowerPoint果個」、「present時click PowerPoint果個」同「present時水喉漏水出左去拖地果個」。做做下，十點先走得，做足十三個鐘。做到隻狗噉，都叫做終於出上個月份糧喇。幾多？五千二。加埋佣得五千八。今屆最低工資。睇番前日段記，你就知道，真係好低。所以我成日（想）同班學生講，
「讀到大學，又點？」