兩份工。

1. 補習社教學助理，月薪$8000加$300-$500交通津貼，番工時間十二點半至兩點不等有時會早多一兩個鐘，每日工作七至九個鐘，每星期dayoff一日，教院生優先申請。每日工作流程係，先上佐敦總部坐兩個鐘同check video course DVD，期間除左落街煲煙劈酒之類做乜都得，而呢段時間係計人工；坐完兩個鐘之後（想早ｄ走落街行亦得），就拎ｄvideo course DVD去其中一間英皇分行，遠至屯門元朗近至旺角太子都有，所以每月有三／五百交津，而且因為對英皇黎講ｄDVD重要過你條命點都唔可以遲到，所以佢地點都預多最少一倍時間比你，基本上你係可以多時間到到左果頭之後行下街去茶餐廳食個下午茶再睇埋集電視劇都仲有幾個字你浪費，而且，同樣，呢段時間又係計人工；到左之後，先至算係真正之開始工作（冇錯，即係每一日都有半日係唔使做而白逗人工），入班房播隻DVD比班靚仔睇就得，有問題搵番英皇ｄ人搞就掂唔使自己出手，要做之工作就係成堂個幾鐘坐係度做自己野，同樣除左漫畫小說食野煲煙打機呢ｄ唔得之外，做乜都得，包括帶部notebook入去玩。坐到落堂之後就趕人走，等下班人入黎加break番個零字，再播DVD，再坐。睇晒堂之後就走得，每日一定有得早放最少半個鐘 － 係最少，早走九個字亦算等閒，而無論早走幾多都照計人工。星期六日仲嘆，office都唔使番直上英皇，慳多程車錢，好彩的話上兩堂有得break番兩個零鐘再上幾堂，唔好彩要坐足七堂九粒鐘冇得亂咁走，不過你會介意咩？份工基本上，叫個人番黎唔係教，係預防教署查牌，上黎查果時就拎張教職員證話係自己教緊，所以點解講到明「教院生優先」。雖然據官方數據，呢個情況創校以來只發生過兩次，但反正佢地本身多錢到都使唔晒，每個月拎番十零萬噉養兵千日又有咩所謂丫（八個員工每人每日睇三至七堂，即係一星期夾埋成二三百堂，就算當每堂四十人班每個學生只賺得一百，計條簡單數學題都知答案冇可能唔係「和味」）。真係好嘆架，基本上就係有人每個月比八千幾供你讀書（當供你行街亦得），每日最少有四個鐘你讀（咁多時間要你自己搵野做，唔讀書有咩好做丫），連老細都講到明，「呢份工工作量好低。」最重要係，工作環境都舒服到冇野講，因為個個都做自己野所以唔會有咩鬥爭，而且ｄ人好到你唔信，例如有一個當你係佢老細多過似你老細之老細。零壓力、低工作量、高自由度、悠閒工作、舒適環境、超多自作業時間、極高收入，唯一缺點：得半年約。但係，你會介意咩？你係肯讀書的話，就算唔好彩續唔到約，出到黎讀成書搵份10k工都得啦，就算搵唔到之前賺到咁多錢都實儲埋唔少夠你放多個假先。總結：夢寐以求般的完美。
   
   
2. 進修書院市場策劃，月薪$6000加分佣（現階段約$X00／月），三個月試用期後底薪加一千。番工時間九至六／十至七／十二至九總之每日九個鐘，番足一至六，即係每星期做五十四個鐘，放紅假。每日工作流程係，下至打雜，中至處理學生問題，上至未來書院宣傳計劃，近至打電話去各中學大專推廣，遠至出去講seminar同搞Expo，一腳踢乜都有，因為基本上全間書院就係得老闆Ｘ１＋員工Ｘ２＋阿姐Ｘ１。現階段剛剛開課，工作量唔算太大，不過過埋呢個月，做唔到隻狗，都可以做隻積。人工呢，就希望黎緊幾個月會多番ｄ學生可以分多ｄ佣啦，不過應該冇行，因為而家全校已經收晒生十九個（冇錯，係十九個），短期內亦唔會開新班。唯一可取之處，係長工唔使煩續約，同如果下年真係搞得起間野，回報唔會低。

排除「教院生優先」之條件，兩份工你揀，你會揀邊份？相信冇人會揀第二份卦？講到明教院生優先，又剛剛有人之前一send resume兩個鐘之後立即有得in，入到去仲發現完全唔同上次電盈果份一ｄ黑工成份都冇甚至係比想像中之完美更完美，睇怕呢份一定冇死。點知，係就揀教院生，不過唔係揀我。聽見做緊果位阿堂日日都打黎「喂而家我係邊度邊度玩緊呀，仲有半個鐘先上堂」、「阿頭好人到爆呀對住我仲好禮貌過我」、「今日上堂寫左一篇小說溫左幾課日文」、「話九點鐘放工點知八點三走得呵呵呵」．．．而我等極都冇聲氣，真係一日比一日灰。卒之等到有消息入面有人唔做，諗住今次一定冇死，再叫人幫手交多次表，點知，都係唔得。明明係一份有99%搵到之超完美工作，點解噉都做唔到？就係撞正果1%。原來今次唔係一個人走，係兩個；唔係請番兩個，係請三個；請三個，仲要三個都係女仔。上輪只請男仔，今輪就只請女仔，而且可見之將來都唔會再請人。即時灰盡。琴日講過一句：
「男仔而家真係好難搵工。」
是真的。特別係好工。唉。
有人話，如果我早ｄ交表、如果我只顧自己、如果．．．可能，結局唔會係，我選擇今日叫我上工之第二份工。不過，我唔會後悔。唔會。

因為學生dayoff冇堂上，今日遲一個鐘番工，番十至七。一點之前，基本上我係乜都唔使做，又或者話係冇得做，因為根本咩都已經比人做／造好晒，又冇堂上，真係純粹坐係度聽下歌、I下CQ噉就一朝。一點鐘老細請飲「Welcome Tea」，食下點心食到兩點幾先走番上去，反正今日dayoff冇所謂啦，而且「身繫幾單官司」之老細係噉講講自己面對過幾多單官司講到唔停得口（但唔係亂吹，而係真係猛料），噉大老細講緊野冇理由打斷佢架嘛。兩點幾番到上去，又回復原狀，即係野就比人搶晒去做，老細得得閒閒講下電話落街行下同ｄtutor傾偈，我呢，就坐係位度聽歌同求人俾野我做。到最後學校搞普通話課程要整傳單，我先至有ｄ野做 － 「ｄ」。所以我琴日都醒，第一日放工立即上旺電搵佛爺執番個USB harddisc，帶晒自己ｄ野番黎做，反正現階段我都只可以坐係度對住部機，用Winmx download下野寫下碟評好過。我發覺而家我之職責唔係Marketing Executive，唔係打雜（真係打雜阿姐都不如，佢仲多野做過我），而係（＿＿）。（＿＿）入面係咩？請睇睇以下故事再解答：
Cherry就黎過試用期renew加人工，本身老細只諗住加五百俾佢，因為覺得佢好做得野。跟住我黎左，只係到左第二日，佢突然間覺得，Cherry唔止係做得野咁簡單，直頭係好Ｘ做得野，
「唔加夠一千俾佢都唔得啦！果條傻仔就聽乞米都得！」
冇錯，答案就係：綠葉。不過係好枯黃果隻。

七點放工之後，飛左出尖咀交普通話course表 － 冇錯，劉義居然想讀書，真係世界變喇（潛台詞係：「我都讀書，你班ＸＸ仲唔讀多ｄ？」）。點知，我想讀下書遮阿老天，點解噉都要玩我？只係唔記得影張身份證副本遮，大大座中大進修中心居然冇得／唔肯幫人影印，唯一一間有得影印之七記部機又呢日先黎壞，係尖咀點搵影印舖呢？結果兜左成大個圈，終於搵到間晒相舖花左一蚊影。相信我地唔係第一個冇影齊野黎之申請人囉（唔會係第一個，不過都應該係第一個冇影到又撞正七記壞影印機．．．）中大真係白痴！佢地自己做埋$1影一張肯定賺到笑呀！

最後，多謝Henry哥仗義相助，仲要肯係HMV等我成個鐘。第時想借咩碟，即管出聲！

踏入第三日。一日比一日得閒冇野做。今日第一日上英文堂，同個鬼佬阿Sir吹下水交帶ｄ野，落堂又同老細一齊同佢拗「用冇notes齋講band 1方法教呢班band 2人唔得架」拗一大輪，再send多幾封email，算係好多野做。到差唔多兩點放lunch食個飯盒，老細走埋落街應酬，本來已經少野做又一早做晒，而家開左學又未有其他新course有人上黎之機會係~0，唯有成個晏晝兩條友吹水同聽歌，我索性檯面咩都唔執由佢亂等老細番黎時先至搞掂佢，梗係啦已經咩都唔使做喎如果連野都執埋佢番黎果時我仲可以搵ｄ咩黎做比佢睇？第三日咋我唔想咁快因為日日白坐比人炒呀！正當食飽飯聽歌都聽到有ｄ眼訓，提心吊謄驚老細隨時出現睇到個頹款之際，到差唔多放工果時老細先打個電話上黎話「今日晏番，大家走先。」係就早ｄ啦老細等我可以大模斯樣噉訓嘛！
六點鐘放工就走左去搵下佛爺，差唔多次次放工都去煩下佢，反而信和日日放工都經但係完全冇落過。部mp3機壞左好耐，都係時候換過部喇，不過，＄，唉．．．

仲有：
「下星期三13/10，十點半睇亞視《慧珊時尚坊》，有KING'S-EVIL！」

終於有野做喇！一番到office發現部腦開極都開唔到，recover之後仲衰部機不斷自動boot機，咁大件事當然要立即搞掂佢啦大佬冇部電腦晏晝點捱呀（冇錯，我係擔心捱唔過今日多過搵唔番入面ｄfile，衰）！經過一番努力，終於用個新folder裝個新window開得番機，立即用第一日上工立即幫襯佛爺果部flash drive backup埋ｄfile（真係冇買錯），再format部機＆裝番晒所有野．．．剛剛好趕得切係老細出去lunch前做晒！佢臨走前話
「今日我應該唔番黎！」
噉就最開心，係佢在場時做晒所有野，噉晏晝冇王管就有排嘆！即係齋坐成個晏晝你都悶啦（所以有時都明英皇果份ｄ人有幾難捱），不過只要有部電腦俾我，就算上唔到網你要我坐幾耐都冇所謂，好似今日噉我直頭拆埋部機對喇叭插自己部mp3機焚（lunch全場冇人果時真係開到後樓梯都聽到正宗焚機，到有人番黎時當然唔敢噉玩啦）同寫碟評。拿Henry哥，你肯借隻碟比我，我一定唔會放你飛機，交功課喇！
開左四日工，現階段都仲好嘆，如果我敢再放ｄ，每日係office真係可以有大半時間聽住mp3寫碟評。或者你會問：
「咦？噉六翼天使、KING'S-EVIL同THE ETERNAL show review咪有望見天日囉？」
係架．．．或者。等下啦。

放工之後走左去太子89268買後日MOGWAI演唱會飛。噉就$420。本身見到沼澤隻碟終於到，但係見到$105．．．＄．．．聽日仲要執mp3機忝．．．

今天，這就完結。不過有一點遺憾。唯有寄望明日。

星期六特別嘆，得一班英文補習班之後咩都冇，連老細都點幾先番到。申請調遲lunch時間三點鐘出去食個tea之後，四點幾上番黎老細又走左，即係又係等放工時間。唔計人工，某程度上呢份工係幾舒服的，工作環境又唔差老細又好人，所以，雖然正正於我上左工之後果一日知道英皇會走兩個男仔即係內部遞表一定有得轉過去做，齋坐就八千五一個月喎 － 其實係差唔多九千一個月，因為完成半年約會有約滿酬金，即係做七個月有八個月糧。但暫時聽番黎，入面冇乜幾多人可以做長過一個月，因為話，「太悶」，我就一定唔會。但係，應該都唔會走架喇。可能真係傻仔啦，但係都想搏一搏。

六點放工之後又去探佛爺執mp3機（本來果部唔知點解有"bad sector" load野超耐真係聽到灰），發現今日有唔少教院人遊旺角，撞撞下最後變左拉團上佛爺間舖，跟住每人執一樣噉佛爺就無端端做多幾單生意（又或者話，無端端又蝕多左．．．）。之後拉隊走左去百老匯執Pocket PC，玩左一大輪（我地似sales屈人買野多過似自己買野）執完又番佛爺度，梗係啦要買螢幕保護膜使幫襯百老匯$9X塊咩搵佛爺$75減到$60就得啦！仲有得睇佛爺點樣用盡九牛二虎之力兩個字貼一塊膠之極富娛樂性場面忝！走左之後發現，都係去執埋個套啦，百老匯$16X減到$14X，佛爺未減已經一四零啦仲有得平廿蚊，有乜理由唔幫襯佢呢？噉就一日內幫襯左佛爺三次，你睇我地幾好帶契！結果是日人人都好開心，我就執左：
1. RIME IMP-800 MP3機 = 差唔多成千減到$850之超值友情價，抵到爛，而且部野真係一流。
2. 人地買Pocket PC時痴換禮物換番黎之電鬚刨 = $150，我終於有鬚刨喇。
3. GP 850 AAA充電池 X 4 = $88，之前用左好耐果四粒700叉到叉唔到電，換機之餘仲要換埋電。
滿載而歸。笑住噉買，但係喊住噉走。

買完番屋企除低西換番套麻甩裝，又走番出旺角搵好好好耐冇見之Sam少同 漢 打邊爐，對上一次833聚會已經係半年前深圳西湖春天喇。福星原來執左喇，以後冇得再見福星，好在搵番間似樣打邊爐，就係位於創興六樓幸福樓遺址之金龍閣。效率快，服務好，食物唔錯，又夠乾淨，只收七條，除左耐唔耐走下單（好似Sam少一開頭已經落左單之大堆粟米同菜到食飽都未到，ｄ小二話「冇呀，落多次單囉，係噉架啦！」），真係冇咩投訴。吹水發現，原來都有唔少人／常識人搵到教職或者好工（最豪當然係Toby有書教都唔教寧願去hkedcity做，但係果份人工有13k又嘆得多，比我都會噉揀），全級最ＸＸ果個又係我。各位，希望你地唔使破我$6000呢個最低紀錄。
呢間野最鍾意個部長，一入到黎坐低佢立即衝上前，以其低沉磁性之聲線字正腔圓帶點壓迫感地逐個字說出
「你 有 咩 需 要 ？」
「飲！」
我話。部長立即飛身去拎庶水＆五花茶各一渣掟過黎，全程唔使廿秒鐘。
「食！」
Sam少話。湯底都只係到左冇耐之檯面立即出現大量肥牛＆丸＆ＸＸＸETC。
「性！」
漢 話。跟住個湯底立即多左好多牛鞭、羊鞭、虎鞭．．．

好似好開心。不過今日都好唔開心，比琴日更唔開心。A係努力，Z係正果，當其他人(~0A)=(>100Z)之時，我(>1000A)=(~0Z)。點解？又點解我仲要繼續付出A呢？可能真係因為，我係傻仔。

今日冇咩事發生。即係又係開工等收工之一日。
朗奴迪寶亞兄有份好工介紹：

十分有興趣。梗係，呢份工真係唔使睇客人面色，唔使受客人氣，正宗死人工一份。問題係：「一年相關經驗」？點為之？巡過一年墳場？見過一年死人？睇死人一年or比人睇死一年？唔知「聽過一年death metal」算唔算呢？

上左工正正一個禮拜，終於似番ｄ番工。今日上工以黎最忙之一日，朝早落左堂搞掂晒之後，晏晝工作就係：影印（冇錯我係一個月薪$6000之打雜）。影兩本書夾埋七百頁仲要雙面，剩係轉頁對位都要搞一大輪，加埋間影印房開埋抽氣扇都焗到爆，雖然唔係支力但係每影五十版就要出黎抖抖氣呼吸下唔係真係聽暈低。成個晏晝一直噉影，影到最後已經冇晒意識（因為開始缺氧），對手自動地進行揭書＞對位＞拍掣＞揭書＞．．．之機械動作，直到永遠，阿門。影好之後其中有本四百七十頁要再影一次，研究緊應該點樣放疊紙入影印機影完單數面之後再影雙數面唔會調亂方向，點知後來老細一點
「部機有得直接雙面印雙面架傻仔！」
噉就搞掂。今日，真係好Ｑ忙。（「剩係影下印都咁多嗲，挑！」）

呢一晚見唔到我，因為我番到屋企食完飯之後就撻低左，梗係，全日困係間影印房噉影法，而家都仲未窒息死剩係昏迷都算係不幸中之大幸。令我諗番起當年RA常識百搭果陣朝八半晚五半全日困係fax房fax信去學校差少少中碳粉毒之日子。

本身今日係dayoff，但係聽日英文測驗，見班友仔「噉款」，免費開堂英文補習班幫手溫下書啦。都有半間學校黎聽我書架！（乜冇話你地聽全校得十九個學生咩？超！）講ｄ野其實都好簡單，都係subject, verb, object, noun, sentence, declarative statement, interogative statement, exclamatory statement, imperative statement, phrase, clause, main clause, subordinate clause, coordinate clause．．．呢一大堆我都唔識之grammer野／小學野遮。唔識點樣教？冇架，咪借番學生ｄnotes黎照讀囉，佢地英文係鬼佬教，跟番隻鬼ｄnotes讀實冇死架啦！不過分別係隻鬼用英文講，我譯番用中文講，班友見係中文聽完之後咪「哦！原來係噉！」立即（好似）明晒噉囉！
都幾開心架，班友唔係唔掂（雖然絕大部份會考低過三份），讀書其實唔算差，品格又好又肯去學，係唔識考試or唔適合讀中學。我都覺得係呢度「教書」我會教得好開心，因為我份人同教法始終教中學會適合ｄ，而呢度可以教到我想教既野，同埋班友真係為左讀書而黎，而我亦都可以放晒所有時間係教書上，唔似得搵到教職ｄ人要讀生讀死但係讀ｄ野根本同教書冇關。都幾《青出於藍》架。
落左堂就真係off，老細全日冇出現，佢係度都唔多做野啦更何況今日冇皇管？仲唔頹番夠本咩唔係我自律的話真係落堂之後同班學生一齊走喇！唔係今日開班的話我覺得我真係會訓足朝九晚六！

有冇睇到亞視？今晚《Metal時尚坊》有講到八月尾去左抱窩青年中心表演果隊日本速度金屬樂隊king's-Avil喎。阿張大導開頭剪片果野掂到爆啦，係佢地rehearsalｄ片中間攝ｄ懶係藝術ｄ片（即係影下屋頂呀拍下雀仔呀）＆木結他配樂，導演呢係唔同ｄ。段野就當然唔係好長啦，係"Detonation" solo之後開始直到尾囉，勝在旁白個姐姐仔（唔係朱慧珊，呢ｄ粗重野邊使勞煩佢，所以我成日覺得佢拍呢個節目好嘆）好少講野。有幾位朋友都上左鏡的，長頭髮同fing果班上晒忝啦，但係今集冇我，所以冇睇的話唔使專登摷番黎睇喇（．．．）。但係THE ETERNAL果晚黎唔到拍好失望囉，因為果晚仲好feel過呢一場，而且佢地玩ｄ野會更適合電視播呢．．．

朝早：學生上堂，我等佢地落堂，搞掂班人同隻鬼，食飯。
晏晝：老細消失，自由活動，行程包括鼠落樓買蕉食結果發現附近ｄ生果舖執晒唯有執$20一盒ｄ貴價零食過下口癮。
夜晚：冇。
平凡的一天。寫下碟評好過。

當我打呢段段記之時，時值三點幾，我係學校頹緊。學生朝早放晒學，老細走左，阿姐落街派傳單，Cherry去洗樓做promote，全棟樓就得番我一個。又唔訓得又唔走得，好在有部電腦，冇皇管時都可以上下網寫下碟評。呢排都起左ｄ貨，加埋前排積埋果堆，夾埋都有唔少架。但係，原來冇野做齋坐係度，都好難捱架。終於明白，其實英皇果份坐係度等收錢都幾辛苦，而家有電腦都咁難頂，冇電腦更加唔知點算。所以唔好以為果份工咁高人工又咁嘆個個都賴死唔走，流失率原來都幾高架，大佬，悶嘛。

今日唔想講我ｄ野。因為，真係唔想講。算啦。

唔好講我喇，講番ｄ開心野：

正常的一天，即係朝早番到（例遲兩個字），等班小朋友放學，食飯，然後老細消失，我就頹等放工。不過黎到第三個禮拜，開始多番ｄ野做，除左ｄ行貨文書工作，食完飯晏晝又要教下ｄ小朋友電腦。一對二之小班教學，教兩位小朋友用Word，非常之free地就噉睇你唔會覺得係個阿Sir教緊學生電腦，似係三條友圍埋玩野多ｄ，係差未有粗口哈哈哈。學一個鐘電腦之後吹一個鐘水，都幾開心架，教小學邊度有得噉玩法丫。所以點解我會鍾意呢份工，除左人工之外，呵呵。

今日撞到好多人。放工之後先到潮流特區搵個客執兩隻二手，我應該係第一次見佢但係佢第二眼就認到我（第一眼認唔到係因為我而家日日飲樣）。呢位仁兄做緊自僱人士做貨van司機，鍾意就自己放幾日dayoff，唔夠錢使就掟多幾轉，生活樂悠遊又夠自在，有點兒妒忌。之後落信和（冇錯，上工咁耐以黎第一次落信和）撞到阿Rock，兜左個圈就等到主角出場：阿Henry哥（真係唔係為等佢，我應該落都唔會落黎）。多謝Henry哥借隻CHASTISEMENT過我。如果我問你借埋隻LILITU，會唔會好過份？

搞掂兩輪交收之後，就出尖沙咀搞多兩輪。首先上Tom Lee幫舍妹買LOVE PSYCHEDELICO演唱會飛，490ｄ飛就當然唔會考慮得番390 & 290，290仲要係究極山頂位兼差少少就貼邊，但係舍妹又唔介意咪照執囉，佢話搏果晚會有大mon播噉我祝佢好運啦。我就當然唔會虧待自己，醒多舊執張390，叫做前多幾行加靠番中間少少囉。之前執兩隻碟跌一舊，呢度又跌多四舊，我終於明白各位等出糧之心情係幾咁悲慟。
之後落番中大果邊搞埋普通話班ｄ野。佢話之前拎黎交學費張卡「碌爆左」過唔到數，搞到要特登拎張支票出黎找數。見到幫我搞果條女搞少少野都要樣衰衰嘴藐藐，問多個日期遮噉都要哦半世，真係想立即問佢隔離斯文靚女得多果個reception
「我想問投訴你地員工服務ｄform邊度有得拎？」

今日收到好多神奇電話，有Alge打黎問．．．我都唔記得好似有關Paul Reed Smith、有教院tutor打黎問有project搞做唔做（結果係冇得做因為要呢個星期五番廣州下星期番玩咩）、仲有個個名都記唔實個樣都只係大概記得＆希望冇記錯之教院人問我「有冇范曉萱《健康歌》MV」，仲有一個等左好耐之電話．．．
不錯的一天。愉快的一天。期待明天∼

我發誓以後唔食大家樂（留番條後路先：咖哩角除外）！琴日晏晝上左去執個黑椒雞扒飯，塊板寫連涷飲$25結果後來先發現比佢昆左多四蚊都算，食完之後立即大件事，教緊電腦果時先黎攪肚，難為仲要忍到落堂先可以立即沖入廁所解決。點知今朝一起身，仲有得痾，結果搞到遲左半個幾鐘先番到學校，好在今日冇堂（冇錯，每星期兩個module每個上兩堂930-1245，逢第三星期兩個module都只要上一堂，跟住就一星期sem break班友真係嘆），老細又不嬲唔會咁早出現。所以今日晏晝立即幫襯番新旺 － 冇錯，就係TRHK繼呢個「漢堡煎蛋飯粟米汁炒底涷華田」（記得飯名唔記得舖名）之後之御廚新旺！潮流特區呢邊一向好少收到外賣紙，見到佢地張野果一刻直頭感動：
「反來囉！」
雖然對上兩次之乾炒叉燒出前一丁（基本上我只會食呢個）十分之唔掂似乎換左廚師，但係見價錢仍然係平絕旺角又新加左ｄ「出位快餐」，就叫左個「出位粟米雞扒拼煎蛋飯」加多杯涷華田。當我落左去橫掃女人街＆VCD舖搵呢個「范曉萱《健康歌》MV」時諗住打定去叫等掃完上到去有得食，點知點三打到點半都打唔通，通左仲要俾人hold幾次線先有人聽，聽到仲要狂催因為有超過三條線等緊旺到爆！結果半個鐘之後送到，雖然經之前兩役對佢地失去信心但係個飯又算唔錯，係唔知點解Cherry個豉椒排骨飯細細堆送都可以有五舊薑仲要加送意粉公仔麵雜碎，見佢一面食一面鬧唔好食就想嘆句，
「算啦十六蚊貨色係噉架喇！一早叫你跟我加多兩蚊『出位快餐』架啦！」
新旺，我愛你！我以後每日都會繼續幫襯你地又平又正之飯盒，抵我Ｎ年前已經將你地個number save落電話度！Yeah~

食完飯又係等放工，係中間藉要幫老細去銀行做野之便閃左上旺電探探琴日生日之佛爺（好彩今日先上，過左正日就大條道理唔送禮物），
「．．．三點半喎而家！點解你會過到黎仲蹓躂咁耐都唔走？而家先放lunch咩？」
「要出外勤咪上黎探下你囉！本身諗住過埋皆旺架但係見咁遠懶行咪廢事囉！」
「．．．你都幾有職業道德喎。」

放左工之後，第一件事仆上TRHK，等左好耐之貨終於到左噉又三舊三條二（嘩，剩係今個禮拜已經冇左成千，月中咋喎）。之後走左上89268「入會」（好Ｑ多著數架做左佢地會員，除左上去買碟有得平仲有無數公司提供優惠，再一次證明玩metal冇前途），走果陣撞到Alge兄拎最新一期《打口》上去（今期唔錯的，因為有我做顧問，呵呵），又吹左陣水。原來佢都經歷過我呢種飲樣的日子，當時日頭做Marketing（我都係喎）夜晚去press conference，有時晏左放番唔切屋企換衫，去到招待會響晒朵撻晒證件都入唔到場，因為
「踢晒西噉款仲話自己記者？」
後來每日番工都會帶定套衫，放工之後即換由飲樣變頹款，噉就搞掂（但係都幾麻煩）。而家仲開心，全職《打口》日日都有得牛記笠記，十分妒忌。（我幾耐冇試過正式牛仔褲+tee？）

琴晚冇訓過，撻係梳化碌黎碌去完全訓唔著，最後一次睇鐘見到五點定六點；又好似有訓到，因為我記得試過失去知覺之後比隻狗用個鼻頂番醒。即係有冇訓過覺？我都唔知，但係有都唔會耐。明明完全冇訓過，但係就係覺得自己好精神完全冇需要訓番下之意識。上次發生同樣事件係幾時之事？唔記得，亦都唔想諗番起．．．

星期三係班小朋友dayoff之日子，亦係劉Sir免費加開「易通易明奪勇上進英語功課溫習奪A精讀班」之日子。上星期三有十一個，今日急跌到得番八個（有一個仲要係琴日先回頭是岸話番黎上堂），主因係「唔想著校服番。」非常諒解各位同學之苦衷，正如我都唔想日日飲樣。
英文班聽日要交功課，廿幾個連接詞每個作兩句，即係夾埋要作四十句句子。
「大家作左幾多呀？」
「冇作過！」
上星期五俾份功課聽日先交，有足成個禮拜仲要呢個星期剩係要番星期一朝早一堂咁大把，就算星期六日去玩都最少有一日半做，噉樣款都唔理，睇黎各位同學都好希望劉Sir可以幫晒你地做功課。劉Sir亦不負眾望逐個連接詞解一次比班小朋友聽。結果解成點呢？我都唔知自己講緊乜，佢地敢話明我就真係驚喇！唔係劉Sir提供之福利就係用中文講，你妨班友聽唔明隻鬼講野會肯過黎聽我講咩！
落堂之後班衰仔借ｄ倚吹水（得衰仔，ｄ衰女唔係做part-time就走晒去蒲，灰），十一點九落堂飲到一點幾我吠晒「喂阿Sir要開飯呀！」班友先肯走。如果我唔係飲樣佢地唔係校服，你會覺得係一班友係hall度食飽飯冇野做無聊攝時間。所以都有點鍾意呢份工。「有點」。如果呢排唔係開始多左好多文職工作寫下日記碟評都冇時間，會多一點。「多一點」。加埋人工呢，就更好喇。

同大家分享一個（＿＿）的故事，（＿＿）係咩自己睇完諗啦。逢bold住ｄ字，都係要留意之重點。
話說有個tutor由暑假開始搵阿堂番教院幫佢做RA，但係始終教院環境之差係冇乜邊個出左之後肯入番去，人工又唔係特別高又麻Ｑ煩，加上阿堂IT底咁掂，搵份最少8K之市區IT助理都唔係難。後來阿堂做左英皇果份筍工（自己睇番5/10啦，事實係甚至比5/10所寫更完美忝），做左半個月個tutor仲打黎搵佢，阿堂話「而家果份做得好開心好嘆」都問佢做唔做，「做番你本行有發揮」、「最少一定有一年約」、「呢個位係為你而開」，仲話肯等佢兩星期等佢同英皇果邊傾辭職，係人工八千低左ｄ。阿堂搵極人都冇人想做呢份（理所當然），佢同果個tutor又好好感情，噉理論上教院RA又的確係比英皇TA聽／睇落有前途ｄ，而且始終男仔唔似得女仔，做工點都要諗長線，英皇呢份起薪已經八千五仲要唔多使做對女仔黎講係做一世都算唔錯之一份，男仔就始終會諗住搏昇高級ｄ，所以佢思索左一輪之後，決定同英皇果邊講唔做。照計辭工要兩星期前通知，但係英皇果邊肯提早幾日同佢解約方便佢過教院上工，非常好人。好戲在後頭，佢講左之後第二日，阿頭同佢所屬個補習天皇親身接見佢，話雖然佢只係做左廿日，都肯立即簽佢做perm兼加人工留佢，唔得的話都希望佢肯星期六日幫手做part-time，再唔肯英皇肯等佢一年，下年五月再搵番佢傾教院約滿之後過唔過番黎（係，我都唔信世界上有呢種老細），但為報師恩，阿堂最後都決定走。到臨上工前三日，教院叫阿堂去in，點知in果時發現原來除左本來個tutor仲要另外跟多一個中文系出名賤格、身為教院導師但係都睇唔起教院生之仆街，面試過程極盡挖苦譏諷之能耐，阿堂咁隨和之人都可以比佢講到差少少爆粗小番佢，就可以知「教院tutor」對我地教院學生幾咁仁道。仲唔止喎，份野原來唔係好似以往之RA朝八半／九至五，而係一係番一至五朝八半晚六，一係一至五朝八半晚五但係星期六要朝九晚四，個tutor仲暗示可以玩野做到你一星期番足七日。無端端多左咁多工時，個阿頭仲要契弟過契弟你就算做野做得點好都一定比人針死，錢又冇而家果份咁多但係辛苦幾十倍（正確運算），番教院又唔係平唔係舒服，工作環境又唔係好仲要對住第一日已經踩到你盡入到去更有排受之老細成年，貨不對辦到噉，俾著你你都唔會做啦，亦都明白點解個tutor可以暑假搵佢搵到今日。所以最後阿堂寧願背負「背棄師徒之情」之「罪名」（坦白講，錯不在佢，tutor本身亦要付隱瞞大量事實之責任），都唔接呢份工。搞掂左教院之後，問題係，點樣同番英皇果邊交代？到佢係英皇最後上工一日（即係in果日之後日），佢番到office第一件事就係同阿頭交代晒全件事，今次又係阿頭加補習天皇親身接見，當其時佢地已經請左一個人代佢，但都補習天皇話「當冇事發生過」，叫阿堂聽日繼續正常番工，但就唔可以立即轉佢做長工，只可以放佢入perm job waiting list首位一有perm job就即批俾佢，而呢ｄ"perm job"呢數目唔多但係都係一人之下之職位，已經好明顯地係不久之將來甚至好快佢就有得昇職坐正，就算冇得昇都一定唔會唔加人工。請多左果個呢咪照叫佢做囉，反正八千五佢地唔係豪唔起（見到噉，都知道做呢份工點冇「前途」人工都一定滿足到你啦）。到左而家，佢損失左一個做半個月就有得立即加人工轉長工之機會（雖然本身都冇，只算係bonus）同一段師徒情（個tutor本身都要負上責任，我唔覺係咩大損失）呢兩個都唔算係咩損失之損失，但佢做落去保證有前途，都可以話係賺左，因為人地想留住佢多過佢想繼續留係度做。唉，呢份工，夫復可求呢？我就真係求喇唉．．．
一份工，齋坐就有得一個月袋八千幾，入左第一日已經有老細特別照顧將本來已經接近零之工作量同壓力再降低到只高出零少少，未過第一個禮拜已經知道做落去一定有得昇職仲分分鐘試用期未滿就有得昇忝而且一昇職人工冇萬都九字尾，做滿一個禮拜已經開心愉快似賺住錢放假多過番緊工，呢份工唔只係天跌落黎喇，直頭係送個天空比你。雖然我miss左第一次入唔到去，之後都唔係冇機會做呢份，機會甚至唔止一個而而家仲有。好坦白講，有陣時太為理想而搵工呢，結果可能真係除了辛苦之外冇咩得著或者滿足（問下教書果班就知），因為碩士生出到黎，都只係九千幾開始，但係要花多Ｎ咁多時間同辛苦Ｘ咁多倍，你話搏昇呢，又唔知可以昇到幾高，而且昇親辛苦程度一定係幾何上昇；英皇呢份你可以話冇乜前途，但係而家五年經驗加考到高級會計之秘書先得呢同呢份工個起薪一樣，仲要辛苦咁多兼冇晒私人時間，而且你話男仔要長遠睇呢，有好多（男）人做足十年昇埋都未必有呢個價，而英皇呢份係仲要有得昇呢。如果俾我揀一份好有理想（例如教書）同呢份呢，我估我大半機會會揀英皇呢份甚至唔介意做呢份做過世。
或者你會問，「咁恨做呢份，點解有得做又唔入去做？」如果我話比你聽，係因為「某ｄ原因」唔入去做而選擇繼續捱而家呢份幾忙下先得六千一個月，你會點諗呢？如果果ｄ「原因」可能／其實係一ｄ（你會覺得）好戇居好白痴好笨七之原因，而我為左呢ｄ「原因」斷送自己前途，你又會唔會話我戇居呢？梗唔會啦，呢種笨七已經超越左「戇居」之領域，我都唔知點先形容到自己喇，唉．．．

今日嘗試講番ｄ開心野啦，我灰一回事廢事灰親大家。我盡力啦。

今日開始以後英文堂九點三開始，即係逢四五都要準時九點番到，對我呢ｄ例遲三個字（開始有遲夠半個鐘之趨勢）真係十分辛苦。今日走左去睇隻鬼堂，又係講連接詞即係so呀and呀果ｄ，好似好簡單但係我聽佢講左半個鐘唔夠已經覺得自己英文原來好Ｘ廢，但係佢教書的確係十分唔錯，起碼好過晒我見過之香港中學英文先生先，係差一樣野：唔係用中文講。有part講講下教rise，佢即場叫一位煙剷同學整番飛俾佢，即場係班房點著支煙度幾野解釋"The smoke rises."（擺明係自己上上下堂想叉電啦）。跟住即刻比學生串爆：
"Sir! No smoking in the classroom"
"No, I do not."
"You DID it!"
真係笑爆。呢ｄ場面，正常香港中學點會出現？又唔噉教法，你覺得呢班會考平均低過四分之小朋友點會呢世都記得"rise"點解？

今日係sem 1最後一日（冇錯一個學期得三個禮拜仲要每星期得四堂早堂上兩科），下星期五sem break兼交功課即係各位同學有成個禮拜做唯一一份功課七條數。點知有幾位同學／衰仔逆天而行（冇錯，又冇衰女，灰），決定放學留低做晒份野交埋先走。呢ｄ咪叫勤力過頭囉。（．．．）見班友仔咁勤力留埋係學校食飯，阿Sir當然私人推介TRHK御廚新旺佢地啦。又平又靚人人食過都讚好，阿Sir係咪好介紹先？

今日都幾多野做（「文職工作」）。可能做到傻左，全校（三條友．．．）是日瘋狂碌EPS。而家OK拎張三百蚊EPS單去就可以換一罐野飲加一杯軟雪糕嘛，剛剛今日要交學費齊頭收左六千cash，全部轉番做EPS三百蚊一張即係可以碌二十次，連老細都癲埋一份，廿張當中有十一張係佢碌。梗係啦，我呢ｄ兩三次就收皮啦，唔係靠老細唔好話食雪糕，毛都冇條你食。
呢班友，係咪十分戇居呢？更戇居係，碌晒之後先發現，學校樓下間OK原來冇軟雪糕，想食最近一係富榮花園一係過太子。開頭仲驚下個禮拜要雪糕當飯食忝而家就正宗毛都冇得食喇。

今日，睇下報紙啦。所以點解阿Sir成日叫你地聽metal。

今日段記有ｄ特別。點特別法？答案在本日段記內找。（對唔住，唔係開心左）

今日係假日，即係怒訓日，十二點幾起身見屋企有雀局，帶隻狗落街行下食下野走番上屋企又訓。可能噉仲好啦，唔訓又係煩，我都唔想諗咁多野。

老母阿姨同舅母打完牌口痕，夜晚比佢地的左去打邊爐。想當年一星期打一次，次次都係同我食班友睇到我狂掃猛咁
「嘩∼∼∼」
今次都係，但係嘩完之後仲有句
「食咁Ｑ少？唔Ｘ係丫嘛？」
佢地三個女人夾埋清左幾十碟（到我嘩喇今次），我完全冇胃口地掃左幾碟已經食唔落，搞到猛比人窒
「食多食少都咁多錢，咁快停蝕本架！食多ｄ呀你！」
唉。老喇。冇火喇。收皮喇。唉。

前幾日台灣發生左單旅行團車禍，相信大家都記得。點知琴日老細就拉團帶晒學校全班高層走左過台灣玩幾日，臨走一刻仲要大大聲嗌
「我冇買旅遊保險！」
我都唔知應該俾咩反應佢好。亦因為噉，今日除左阿姐之外全間野就剩番我一個 － 冇錯，本身已經係老細私人秘書之Cherry今日剛剛過試用期儕身「高層」之列有得去台灣，全場得番我一條傻仔棟係度。本來今日有堂英文點知阿Sir有事堂都唔使上，即係全日擺到明唔會有人蒲面，但噉唔代表今日會好得閒，因為仲有無窮電話＆無盡fax等，所以點解我冇得去台灣，鬼叫我只係個等緊試用期完之終極打雜小雜卒。全日節目就係寫下碟評 － 當然啦，你唔係諗住我真係會好搏命地做野嘛？寫左成日先寫好兩隻，相反Henry哥係我仲煩緊點寫果時已經一大篇一大篇噉掟過黎話寫左兩隻仲會寫多隻，係啦我發覺我寫碟評真係好Ｑ廢架所以我決定將呢個重任交托俾Henry哥我就收皮算。

阿堂今日剛剛好係潮流特區番工，噉就剛剛好三點放lunch時上黎食個飯盒拜會一下處理晒無盡雜務加辛辛苦苦鬥好一篇碟評之劉Sir。傾完個飯盒都未夠喉，大家都六點放工一齊走繼續傾（老細不在呢，我就當然唔會六點放啦呵呵），旺角走到太子再到大角咀仲要心血來潮坐低食埋飯之後再兜多大角咀一個圈六點幾傾到九點幾，講到工作，講到前途，講到錢，講到人，講到情．．．係教院實在冇乜邊個可以咁好傾，可能因為大家都係教院中之「異類」（即係只想靜靜地一個人但係都比無數人抹黑亂作果堆），又或可能，因為大家都係老餅，呵呵。
兩條友係吹得好開心。但係，唉．．．有陣時見到ｄ野呢，就算你點放開點豁達點嘗試去接受同面對，都係好難同好辛苦既．．．