「去唔去遊行？」
「有得唔去咩？」
個個聽完我個答案都問
「點解呀？邊個迫你？」
點解一定要俾人迫先去？自發架啦呢ｄ野？（雖然某程度上都係政府迫成．．．）我覺得唔去的話對唔住我ｄ學生！所以呢幾日我一直踴躍叫人今日上街遊行，而結果我叫親果ｄ人都有上到街！點知！冇上街果個居然係我！學生呀我對唔住你地呀嗚嗚∼我愧對你地！我唔配教書！抵我成世賣CD！
即係唔係我唔想去，不過老細突然今日要開會即係又係我啦？遊行我都想呀唉不過問題係有ｄ野唔係話走就走．．．
我發現左一個好有趣之現象：我遊說過之所有IEDer都有上街，但係我認識之所有Trinitian都冇上街。本來都諗住叫老細唔好開今日諗住「應該」會有好多人去遊行唔會有乜生意，好在最後都係的起心肝頂左佢，因為今日唔知點解勁多人上黎！出左糧大家係唔同ｄ！係呢兩個禮拜入邊，今日終於似返ｄ生意喇！
我發現每次犧牲左某ｄ野之後一定會助長到另一樣野。希望最後唔使犧牲某個人完成某件事．．．
今日有個新客對我地舖頭好有興趣：
「成日有女入黎借廁所鎖匙，你地咪好開心囉！」
我都唔知點解保險果班女自己有鎖匙但係次次去廁所都係走過黎問我地借。今日黎皆旺果班保險姐姐外在質素冇咁高，如果佢早幾日黎的話會開心ｄ忝。不過佢唔夠開心一回事今日我借鎖匙俾人就借得仲開心過平時。點解？睇唔睇到我強調左「外在」呢樣野咩？雖然佢地樣唔係好但係「內在」係非常之好架借果陣真係可以雙手擺後面企到直一直笑住口好好禮貌噉問係差未鞠埋躬俾你！換著係平時果ｄ靚就係靚有ｄ外型仲好好忝，但係借鎖匙果陣肯笑下講返句「唔該」已經好開心喇！借完之後冇還到叫佢地還好似反而係我地欠佢地，今日有個唔記得還一陣之後立即飛返黎係噉「唔好意思！」所以話靚冇用人品好先有用！睇人唔好睇樣呀尤其是睇女仔果陣！
返到屋企睇電視，大家都估唔到最後係有五十萬人上街。係五十萬人！如果全港有七百萬人的話，五十萬人即係成總人口7.N%，又即係差唔多等於九成失業人口呀！可惜我唔係當中，我對呢樣野真係感到遺憾！
今日你屋企部電視機教識你左咩叫做「左」咩叫做「右」：當訪問遊行路線沿途ｄ商戶時，無線同有線做果ｄ都係「今次遊行值得支持，做少日生意有乜所謂！」亞視就唔知點解淨係搵到「＊＃ＸＹＺ阻住做生意！」果ｄ。
點解今晚個Webmail down左？好明顯係教院防止我地Minorians反動顛覆英文系！廿三號都未通過教院咁快就做野真係快手！應快果ｄ又唔見佢地快喎真係似足佢地阿頭！
係李議員我冇去遊行我對你唔住！所以係度整返個特此通告：
「其實唔止五十萬人上街架！」
「今日睇報紙，民建聯話有六萬人去佢個嘉年華會。六四果時個場爆滿，但係政府都話得四萬人；佢地個場都唔滿，竟然會有六萬人，真係神奇呀！原來政府個數字會伸縮架！」
本來都幾鍾意亞視，但係而家好憎！太左喇！每次見到何守信幫政府講野已經好想爆粗，又係噉訪問ｄ親中人士同左派學校，挑！跟住見到教統局唔知邊個話
「老師上街遊行只係佢地擔心自己職位不保，唔代表佢地不滿教育改革。」
噉都講得出真係好野！第時仲要幫呢班人做野忝真係折墮！
而家亞視只淨返一樣野（一個人）我鍾意： 張大導！
夜晚要「遠行」，不過臨走前點都要睇埋《衛斯理》先。話說上海人（？）衛斯理係苗疆某山洞遇到日本皇軍（？），班人唔知幾時係個山洞入邊整左個炸彈脅持佢地（？），跟住就實係打架啦，打打下唔知邊個整爆左個炸彈（！），跟住個炸彈就係山洞入邊爆炸！然後鏡頭一轉，山洞入邊全世界訓晒係度，但係全部人都完好無缺完全冇人斷手／斷腳／甩頭／爆身／漏腸／流血！之後仲勁最大果幾個角色居然仲未死起返身又再打過！打打下你會發現其他「屍體」唔知幾時已經唔見晒！勁呀《衛斯理》不愧為《衛斯理》果然峰迴路轉夠神怪加神奇！呢套野個編劇簡直係近年難得一見之鬼才，諗到將二十本衛斯理濃縮入四十集電視劇入邊已經無人能及，連呢一幕都俾佢作到我敢話只要佢繼續做落去的話衰落已久之香港電視連續劇一定可以谷底反彈呀！
夜晚去左Victor度玩，其實又唔係玩因為上到去之後又係食野＞睇戲＞訓覺。今晚睇左"X-Men 2"，我覺得好過第一集。好多上集大角色今集都做左路人，阿Cyclops好似冇乜射過laser喎 － 打都冇乜打過忝呀直情係俾人打就有份！睇完X-Men就知道做奸角一定正過做正派，一來反派角色一定係／要型過正派呢個已經係自然定律，二來睇ｄ好人打生打死都係得個桔，ｄ奸角用下旁門左道就乜叉都搞得掂！唔制我都要做壞人！
其實一直都好想睇返X-Men漫畫，個人覺得係其中一套最好睇＆最值得睇之美國漫畫，因為除左意念正同畫工係美國野黎講好好（起碼我接受到先，好多美國漫畫對我黎講都超樣衰），個劇情係美國漫畫黎講好有深度同哲理，所以一直都好想整返套黎睇睇。但係而家X-Men出左六百幾期平裝本，即係買／租合輯都會買／租到喊．．．
五點幾睇完戲訓覺，個個都一早撻低晒。其實搵我上黎做乜？呢條問題都問過無數次架喇不過到左今時今日都係冇／唔會有答案，所以都係繼續噉樣順其自然千山萬水出到黎美孚睇戲＆睇人訓覺啦。
琴日Henry通風報信HMV又有呢個「瘋狂減價」（唔係亂作架個名今次真係叫"Crazy Sale"架），仲諗住今朝早ｄ起身飛出去掃貨，點知起身已經兩點夠鐘去開工。不過我係唔甘心架喇所以早一個站落地鐵去久仰大名太子聯合兜個圈！行一大輪淨係搵到一間又係賣執甩貨之CD舖，傳說中果間Band Tee舖就見都冇見到。目標件Slipknot "Industrial Look"工褸仍需努力！
是日節目係數拍子。所以成日話Progressive抵聽一隻碟都夠聽十年，你淨係數入邊ｄ拍子都夠數到你喊。5/4、7/4你玩過未？唔夠喉就13/8、17/16啦。仲有31/32同57/64未出喎。都嫌唔夠複雜就試下65/128啦不過相信除左玩果堆友冇人會數得到。有得俾你揀你會話首野係6/8定12/8？定還是只係好簡單之4/4？你明唔明我講緊乜？唔明你就唔夠Progressive喇！所以咪叫你買多幾隻碟返屋企學下數拍子囉阿偉！等你仲以為我成日昆你買碟噉！
是日好多人入黎，因為我地播Beyond！我都想買架不過都係睇定ｄ先，話晒呢個只係Part 1仲有Part 2未出，又唔知CD/VCD/DVDｄ歌係唔係一樣唔知佢點出法．．．不過我理得佢點出反正隻野係阿Rock買上黎我就淨係負責睇既遮！呢場Part 1唱舊歌多過我睇果場Part 2，成隻碟好似得四首係新歌，如果我睇呢場的話就真係會開心好多因為佢地ｄ新歌我真係冇乜邊首識，同埋佢地揀果ｄ新歌真係．．．（詳情請聽聽《預備》）而且呢場黃貫中彈多好多結他，起碼《舊日的足跡》（呢首我鍾意）最後佢同阿賢鬥solo超精彩，但係鬥得果兩個round就玩完非常之唔夠喉！
其實玩多ｄ技術野先似返ｄ搖滾演唱會嘛，可惜呢個年代之Fans都唔多會／識欣賞呢ｄ技術表現所以Beyond後來都越黎越簡單同慢晒輕晒，當ｄFans覺得Beyond其中一首較重之歌曲《我是憤怒》真係好Ｘ重之時我都明點解黃貫中彈少咁多solo、葉世榮手鼓簡單左咁多。所以我成日都話希望佢地演唱會可以玩返多ｄ慢歌．．．
之前幾日日日都二千幾，今日先得齊頭一千，死喇有預感聽日會好靜！其實夜ｄ有個客會上黎可以鑿多筆，但係最後都廢鬼事等埋佢九點半就收舖！唔使同阿Rock同Henry上HMV咩真係！上到去又會撞到Kara真係蹺。今次減價都冇咩好執，因為一係就真係唔係好野一係之前已經執晒，所以今日叫其他人摷碟果隻
「平野唔使俾我睇！而家我淨係要無聊野！」
結果只係執得兩隻，其中一隻仲要係Metal野明倒老細米！HMV雖然學精左好在仲未精得晒，令到我地呢ｄ成日俾佢昆之升斗市民仲有機會可以嘲笑佢地之所作所為！
呢排見到好多人成日嘴邊都掛住呢句：
「今個sem的GPA過不到3，唉...... :(」
睇到好唔開心。我冇幾多個sem過到2.5都未嗲啦你班友嘈乜？另一句就係：
「就黎退宿執左好多箱出黎都仲有嗚嗚∼」
好在我冇住宿舍而家有得笑仲可以笑得好大聲忝！
老細呢幾日要去開會，所以今日開舖前要拎住一「大」舊錢去銀行入數 － 個「大」要引號因為其實呢三千幾係前三日之總營業額。以前我每日做完都會有咁大舊錢呀陰公！
又再一次排完半個鐘隊之後再排多半個鐘，因為到左今時今日仲要連招都中過之後我仍然係唔識分恆生同"HK Bank"！
兩點半一開就準時有客入黎買野，隔左一陣又多條友黎。呢條友我認得佢去左外國讀書，上次返黎果陣都仲未搬舖，當其時佢有隻碟搵左好耐但係剛剛最後一隻俾我執左搞到佢飛果日都買唔到。今次佢飛返黎第一件事又係上黎搵果隻碟，不過真係唔好彩果隻又係剛剛賣晒！所以而家佢由好憎我變到好Ｘ憎我！
見到一開就有水魚諗住今日有個好開始唔會衰得去邊，點知都係成日夾埋冇乜幾個客，係到左臨收舖一刻剛剛好有個客上黎幫拖執多隻先剛剛好過到千似返ｄ樣！死喇一日俾一日衰聽日會點我都唔敢諗！
返到屋企又係時候搞反動！睇黎大家對英文系同個tutor都好失望，所以終於認真鑿返份「投訴信」寄俾上頭搞大佢！成晚就係噉改封信，其實內容上都冇咩需要我改架喇因為仲有其他人搞，不過淨係執文法都執到．．．坦白講，如果乜文法都唔改就噉掟呢封信上去的話真係教院都會話抵我地肥呀！夠喇唔好再講．．．
到左今日先肯搞事，其實我想問好耐：
「點解咁遲？」（夠喇唔好再講）
是日果然大劑，生意額暴跌一半，好在有阿Rock同阿輝上黎吹水。阿輝為大家提供佢係麥記之寶貴工作經驗：
經理：「入薯條果陣時呢就將個盒摺一下（「摺」＝「將個底整入ｄ個著條盒個底整入ｄ」）先至好入薯條．．．」
阿輝：「經理，個薯條盒好地地點解要噉樣整呀？」（註：當其時佢初入行乜都唔識）
經理：「摺完先入咪可以入少ｄ薯條囉！」
阿輝：「噉樣咪即係呃人囉？」
經理：「．．．．．．」（以詫異中帶點無奈之表情凝視對方）
為免飯碗不保阿輝立即學以致用，點知．．．
小妹妹：「點解冇廣告入邊盒薯條咁多既？嗚嗚嗚∼」
阿輝：「．．．．．．」（以詫異中帶點無奈之表情凝視對方）
學完鼓之後飛上舖頭，得架喇老細我會磅水架喇，批新貨隻隻都咁掂冇得走架喇！不過有ｄ都係留返係舖頭聽算，有隻都聽到爛咁滯不過為左寫碟評冇計！雖然唔係太想買碟住不過點都要執兩隻先，因為發現實在有太多錢（真係太多）。
我發覺我地香港人俾好多外國幸福好多，因為老細成日都肯入新樂隊或者唔出名樂隊ｄ野試試，有好多其他國家ｄ人除左上網訂都唔知去得邊度搵既碟TRHK大大疊棟晒係度（可惜香港人永遠唔會明白同珍惜呢樣野．．．）。有時有ｄ樂隊係外國仲未係好出名我地已經入佢地ｄ貨，所以好多時外國ｄ鬼佬隔幾萬里遠都要同老細訂貨。老細入貨除左夠晒快之外仲夠晒怪，因為又係本住呢個「乜都試下」之精神所以舖頭耐唔耐都會出現一ｄ唔知咩黎之物體（所以我成日覺得舖頭開咁耐都賺唔到錢就係因為佢噉玩法）。最開心果個當然又係我啦我最鍾意無聊野架嘛，不過經常都係開心果個只限我一個因為其他人仍然係要出名同埋型所以好多貨都係長期無人問津。講真，TRHK有時入貨快過外國，又入到好多外國都未必咁易搵到之樂隊，如果肯做的話TRHK Webzine一定可以做到全亞洲Metal消息最新最快之網站，可惜，我頹，呵．．．
最後送一句俾大家，也哥呢位「不滿基督教人士」應該會好鍾意：
Alexander Dumas (1802 - 1870)
點幾先起身本來都唔諗住出街點知身痕都係上舖頭坐坐。琴日到果批貨雖然知道係必買但係見未試清楚晒就專誠上黎試真ｄ，試過之後知道今次四舊水真係跌得非常之心甘命抵！跟住走去信和兜個圈（真係兜個圈咋暫時係度都冇咩想執）又身痕飛出尖咀。都係乜都冇執到唔知點解呢排真係完全冇意欲買碟，上到黎就係睇Led Zeppelin隻DVD，難得HMV肯播真係睇得好鬼開心！呢隻就真係想買呀但係一來＄＄二來買左都冇乜時間睇．．．
夜晚睇電視《鏗鏘集》，見到民權大學（梗係組織黎啦小朋友）大佬郭達年上電視！呢個名曾經係度出現過不過相信冇人會印象：佢就係好耐之前香港名憤世樂隊黑鳥個主音，佢地已經有好多年冇聲氣，之前有場show見到好似佢地出黎玩返，又呢排聽返黃秋生隻《地痞搖滾》，原來碟底個簡介就係佢寫，入邊仲有首歌係黑鳥寫俾黃秋生唱！估唔到而家佢唔止唱直頭搞埋政治忝！（不過可能已經搞左好耐好耐係我戇居唔知．．．）
今日好神奇地八點鐘起身，因為更神奇地係為左返學校做功課。叻姐勁啦我兩個鐘先返到已經衰你可以遲多我一個鐘。等佢果一個鐘做ｄ？首先係搵一搵黃生借幾隻碟俾佢加收禮：一隻佢買多左之Live CD！隻野係一隊打鐵樂隊之現場專輯（出騷果陣真係拎成堆鐵出黎敲架）呢ｄ就真係工業喇！跟住上office搵Park Lane拎返之前借俾班靚仔張狗相，嘩不論幅相定個架都殘鬼晒好毒呀呢班靚仔！Park Lane同場加送GS Method份功課，B+忝呵呵估唔到份野做得一日加接近冇圖都可以咁高分呵呵（唔好打我！）。見返到得office就自然要探探老細，不過荷包又冇著落因為佢超忙最快都要下星期先有工開。搞左咁多但係都只係浪費左一半時間唔夠點算？唯有坐係度咩都唔做呆等囉噉先似浪費時間嘛！到最後齊人又唔代表開得工因為我仲有份功課要拎：重頭戲教哲！沈太都冇咩評語（可能睇左一半已經嚇窒），不過最後得B+好唔開心，需知我對呢份野好大期望雖然只係做得一日！（又唔好打我！）
功課呢就拎晒，不過要做果份呢就仍然係唔知點做。係拉記蒲左成朝先漫無目的地摷左幾本書仔（仲要唔知有冇用喎），晏晝摷期刊發現超戇居，ｄ期刊個名就好型喇咩《英語學習》咩《英文學習研究》，點知全部都係無聊英文雜誌黎真係俾人睇文學英文，有本仲勁係將人地ｄ投稿小說輯埋一本噉就叫期刊！搵搵下都係訓覺算反正我知道點搵都唔會搵到，網上雖然有好多不過屋企都有寬頻使乜係度搵？（挑返黎教院做就係因為知道留係屋企一定唔會做但係而家情況似乎冇乜分別）
最後終於可以同上年Leanne姐俾我睇果段唔知咩創意音樂野之主腦直接對話！以下係部份內容（拿講明先呀全部都係忠於原著我冇加過任何鹽醋架！）：
「我都未俾過人睇個Leanne就係噉拎俾人睇，而家連CUｄ人都知呢段野！成個project都係我諗架，個Leanne丫講到好似個project係佢噉！」
「導師評分好多範疇都俾好高分八八九九，但係可行性果度就超低分得四定五，因為我彈果ｄ琴全部都係即興出黎所以導師話如果俾著其他先生好難做得到出黎！」
「係呀好Rock'N'Roll feel果段琴係我即興彈出黎架！估唔到師奶都Rock得起呢！」
訓覺收皮之後飛一飛上舖睇，因為今日係阿Rock重回TRHK之日所以上黎睇下有冇野要幫手。不過六點上到差唔多七點我走果陣都係一個客都冇點解可以咁灰？（「都話我邪架啦！」係九龍城時期最後一日開舖創下史上最強零生意之阿Rock話）
福星又見福星。幾耐冇打過邊爐？第一次同叻姐同阿明出街食飯。食埋今次夠喇可以訣別福星，因為自從分舵執左之後淨返呢間總舵真係唔使再黎。一黎到就有兩隻蟑螂歡迎我地，汽水機居然淨係得清水，庶汁只係比清水多少少庶未，橙汁孱水之情況比分舵更嚴重（見到呢句又諗返起《丁舉人》），究極唔掂呀真係！食都冇咩胃口食，不過唔係呢度ｄ野食唔掂，只係唔知點解冇乜戰鬥力。真係太耐冇打過邊爐。死連福星都冇埋第時大家無聊果陣仲有邊度可以聚腳？
最後發現我一走舖頭就有客仲要係唔少忝。「都話我邪架啦！」成日邪住舖頭果個劉Sir話。
食完之後同阿明上火車站，佢有碟執我就冇喇，有都未必會／想執因為銀根所餘無幾。火車站朋友你放心啦我會繼續幫你手搵客架喇！
冇今日冇出過街。不過噉唔代表我會做功課。（答得出以上開場白係無聊齋出現過幾多次之人士請向我領獎。基本上你答幾多都有獎分因為實在多到我都數唔晒）
我：「收到份糧喇！唔該晒！」
Park Lane：「下？我都未出糧俾你？」
咁神奇？噉晨咁早收到果張支票係邊個醒我？查一查返原來係EPA，即係已經俾我遺忘左Ｎ年之心理學系！拖左成年之後班友終於肯出糧喇！．．．．．．即係要做野啦？
今晚又有靜坐，不過今次得閒都冇去，因為我覺得既然政府已經押後草案噉今次集會之目的同意義已經相對地低左。
是晚娛樂係睇黃議員舉中指。可以笑住口對住市民做粗口手勢議員喎呢ｄ唔怪得香港冇得救啦！越黎越鍾意有線，因為佢地係議員搭車離開立法會段片最精彩果一節（即係黃議員問候大家果段）落左慢鏡，務求令黃議員之信息可以清清楚楚仔仔細細地傳達俾大家，確保黃議員可以大細無遺地Ｘ晒各位家庭觀眾！
的起心肝做不過做做下都係算聽晚先，之前四五六千字都係一晚搞掂，區區一千字一晚都做唔晒我就枉為劉義啦！
唔止份野又係一千字，連個情況都幾似英文果陣：個個導師俾之指引都唔同（唯一相同係冇一個講到俾大家知份野到底點做），有ｄ話中文二千英文一千有ｄ話最少係一千有ｄ話冇二千唔好收手有ｄ就仲勁直頭唔講要寫幾多忝你話跟邊個？我果個就話
「你地份野一定唔可以寫多過一千字，因為組組都係寫一千字寫多的話對其他組唔公平。」
似乎到頭來係對我地唔公平喎．．．希望跟住會有有人擔心自己寫得唔夠人地多拎唔到1st Hon而吵大鑊啦。（不過我唔係為左爭取更好成績先噉諗純粹係因為呢個睇戲心態）
點幾鐘起身去報基準，唔去就真係唔使考架喇因為同份功課一樣聽日就係死線！去到先睇到原來要學歷證明正＆副本（灰我記得我上年係大大聲同人講「記住帶埋學歷證明正副本呀唔係會俾人笑架！」）立即躝返落樓下搵影印。當你見到我可以走左去輪街症果度問「喂呢度有冇得影印架？」你就知我呢一刻仲未訓醒。行左一大輪影左上次基準張成績表之後交果陣條友話「得架喇睇下就得架喇！」就掟返俾我。挑又講到一定要收噉點知搞一大輪原來無鬼聊係唔使收就早講啦。（灰我記得我上年都講過同一番說話）
報完之後落到樓下先醒返起
「係喎我係咪報左Oral？有冇報錯卷？張收據又冇寫到我報邊份喎！」
冇錯今日我點睇都係一個未訓醒就躝出灣仔唔知做乜之傻仔。
趕餐死三點飛到去開舖之後老細話
「咁趕咪四點先開囉我又冇話唔俾！」
近排舖頭所有人除左我之外個個都好燥（哈哈我都諗唔起我幾時有「燥」過）搞到舖頭好似就黎散噉。咩情況都好一講到錢全世界都一定會失感情。所以我唔鍾意呢個世界乜都咁商業 － 雖然唔商業的話一係就死一係等死，你睇下我舖頭就知。
我到左今時今日都仲係唔明：不論係咩科、不論係咩功課、不論會唔會做識唔識做關唔關我事，點解個個都猛問我點做功課？？？由未開舖到開緊舖到收埋舖都不斷地收到電話問點樣做聽日果份功課（唔使扮野喇叻姐無論點計打得最多電話果個都係你架喇！）。下我連書都未搵晒份野點寫都冇乜諗過甚至連份功課係點做都未搞清楚，完全唔明點解你班友可以咁有信心好似靠我就一定可以搞得掂份功課噉？（雖然我承認某程度上我覺得呢份功課真係幾易做下所以個個聽完我講都覺得份野好似真係好簡單噉，而呢個可能亦係佢地搵我之真正目的）
唔使問架喇呢ｄ野你明知我兩點前實係淨係坐係度焚機乜都唔理架喇。兩點幾三點睇過下ｄ書發現冇乜用得著就上網搵文，搵到四點幾發現俾阿Sir陰到正：我之前起個題目佢話唔夠好要我改一改就俾左另一個guildline，點知我到呢一刻先發覺阿Sir叫我研究果樣野係接近唔存在點做？我之前個題目就有大把料甚至係太多料要做真係話咁易！諗左一輪睇下跟住點做再頹左好Ｑ耐之後，到左五點半
「挑唔跟阿Sir個guildline！（型）一千字咋嘛挑！（仲型）」（劉義呢條友終於似返ｄ樣）
結果一邊同食緊麵睇緊新聞之七哥ICQ吹水一邊將ｄ料以半小時極速裝嵌搞掂！（不過換著係以前個劉義兩個鐘頭前發現阿Sir有問題果陣已經立即乜都唔理／諗照用ｄ料算）
「對唔住呀七哥一唔覺意搞到快手過你忝！等我食埋麵睇埋新聞先打參考書目就返你！咁快就串晒就冇癮啦！」
做完訓到十二點起身就飛返去交功課。返到果陣見到有個人形同神都好似某個人，心諗「乜咁早？」就走去打個招呼。呢位女同學好快就俾背後果把枯屍聲叫喚「喂∼∼∼」嚇到唔敢做功課走左去。嚇走左人之後就印功課，印緊果陣好多人都仲係摷緊書趕緊工。又要講下呢句，好耐冇講過之一句：
「唔通勤果個係我？冇理由丫．．．」
去交功課果陣又見到有條友形同神都好似某個人。不過今次冇中招喇真係係教院撞到一個冇乜理由／冇乜可能會係教院撞到之人：教我打鼓個阿Sir！會唔會今日個咩《亞太區音樂教育研討會》佢有份演出／演講？定還是佢除左係我師傅之外仲係我師兄？不過冇乜同佢講過野佢就走左去打電話乜都唔知一切還待下回分解！話時話好多人係我身邊行過我都有可能唔認得（尤其是我聽緊歌果陣），但係佢個衰樣真係幾里遠睇見都認得出：當我而家ｄ鬚長少少其他人行過都「嘩∼∼∼」之時，冇理由一個金毛板衫look人士係教院內行走會冇人當係一回事？
「三點半？點解今日開三點半！點解！」
即係老細都話見ｄ人成日都係夜晚上黎就晏ｄ四點先開廢鬼事俾我昆人工（我承認呢樣野我成日做架哈哈），但係唔係我唔想聽老細支笛只不過到舖頭樓下想去食個飯先開舖果陣就撞到剛剛夾完band之肥瘦兩鬼然後俾佢地脅持上舖頭．．．
是日係一個完美的工作天之範例：三點幾開舖立即幾條友飛入黎然後做幾舊水生意（都話開三點好架啦老細成日話我呃你人工！），搞掂之後就一個人都唔好出現等我可以搞掂ｄ新貨，一搭正七點班友就好似放小息果陣慌死執輸噉衝上黎然後做返千零二千蚊生意（多ｄ我當然唔驅啦呵呵）。不過今日其中一樣唔夠完美之地方就係
「喂你班友做乜係要打躉打到十一點幾先肯走？TRHK十點收舖架喎小朋友！」
是日入左幾隻Fusion野。好多人入到黎都係問
「乜你地舖頭入埋晒咁多Fusion野呀？」
係呀吹咩唔滿意呀咁唔妥你又要買？不過是晚最無聊都係有個Jazz人入左黎試晒咁多隻Fusion之後：
「我都係鍾意隻(Gothic)Metal野多ｄ！」
十二點係美孚蹓躂，因為Victor條友要一點先出現。即係我都唔想咁早飛出黎架但係舖頭果度夜晚冇冷氣又唔想食宵夜機舖又閂晒除左出黎美孚仲有咩好做？結果成粒鐘坐係度唔知做乜，全程有一面煲煙一面啤啤貢之保安人員貼身陪同確保我晚間之人身安全。
點幾上到佢屋企我都唔知做過乜，三條友坐係度吹水又唔係玩又唔係只有Victor沿途提供大量無聊IQ問題，不過坐左成晚我都唔多記得（大佬琴晚通完又冇乜訓過仲要開舖呢個鐘數未撻低已經好強），淨係記得以下三題：
1 （呢條真係幾無聊下）
問："What is greater than God, more evil than Devil, rich people don't have but poor people have a lot, and if you eat it you will die?"
答："NOTHING"
2 （希望你同我一樣半秒內答到，因為佢話「我問過好多傻仔，佢地諗左好耐都答唔出！」）
問：「有十粒藥丸，其中一粒係毒藥，跟住有四個人夾份食晒呢十粒藥丸但係一個人都冇死到，點解？」
答：「因為另外果九粒係解藥。」
3（呢條絕呀玩細路一流，不過其實幾簡單又應該有好多人玩過）
問：「點可以用三個步驟將一隻象放入雪櫃？」
答：「開雪櫃門、放隻象入去、閂雪櫃門。」
問：「點可以用四個步驟將一隻獅子放入雪櫃？」
答：「開雪櫃門、拎隻象出黎，放隻獅子入去、閂雪櫃門。」
問：「有一日泰山係森林召開大會，但係萬獸之皇獅子冇出席到，點解？」
答：「因為獅子係雪櫃入面。」
後來無聊IQ題都玩到悶就（又）玩《百萬富翁》。係呀上年到今年都係玩呢隻證明我地真係好無聊。上年三條友最後拎到一百萬覺得好理所當然，但係今次三條友玩通宵都贏唔到最多只係去到八萬超灰。後來玩到問題都差唔多背晒咁滯：
「問親蠟筆小新唔係『大象』就係『向日葵』架啦挑！」
最後要玩到淨係睇答案估返條問題出黎你話我地幾無聊／戇居！
點幾起身就返工 － 不過點都閃出尖咀先，一來打斷棍都未買返（重申一次：我以後都唔會幫襯Vater！），二來行行HMV睇睇有咩新貨結果係冇，三來係三點（冇錯禮拜六係開返三點）先開舖我唔搵呢兩樣野做點挨？
本來約左黃生今日上黎拎佢之前訂果幾隻，結果我就三點準時喇黃生就冇出現等我仲執定成棟中世紀同民族野俾佢！結果八點前先得兩個客，好在其中一個係大客買成棟碟如果唔係今日五百生意都過唔到。呢排個情況終於似返ｄ九龍城時期喇可能近暑假真係掂ｄ！
今日又係我開舖，不過通常我代人開舖果時成日都會出現果條問題冇出現過。簡單黎講咪即係今日生意真係好差囉！五點開舖果陣得四條友肥仔瘦仔阿Rax三條友飛上黎盡佢地最大職責：係噉聽之後走人。係最後肥仔買左一隻兩條CD（冇錯係兩條／twenty dollars／港幣二十元正），叫做好過冇啦起碼唔使捧蛋叫做同老細有返個交代（雖然呢個交代好細．．．）。班友除左只聽唔賣之外仲係噉搶我ｄ益力多，每日開舖我都要吸收五百億活性乳酸菌，今日俾你地偷左我三百億最後搞到我唔夠健康的話為你地事問！夜晚就加多個阿威上黎，好在今次我精一早飲晒ｄ益力多。不過佢最後都係買得隻一二手又係兩條。開頭都以為今舖折墮架喇點知搭正九點即刻成村人飛上黎，雖然最後差ｄ先夠一千不過都好開心架喇大佬得四條生意一舊都唔夠真係要自己買碟幫補先見得下人！
是日咁少生意可能係（我甚至想講直頭係）隔離舊書舖ｄMK仔！真係世風日下而家ｄ靚仔已經對「公德心」呢樣野冇晒印象，擺晒ｄ書同檯凳出公用之走廊已經衰，又成日十幾廿個人塞晒係走廊度玩同煲糧嘈生晒，俾著我係ｄ街客見到呢班友都唔會埋黎我舖頭啦！所以點解我咁憎MK人！
「金屬護士正式退休了，忘記他吧！~Transition from Metal to Darkwave!~」
早知你會搞到噉我就唔搵你入黎做啦阿Jens！想當年推薦你俾老細就係諗住你係我地當中識得較多Black野之一個可以幫手sale下，點知黎到做唔夠一個禮拜立即轉型去Doom我已經覺得大劑架喇，最後果然大劑而家連Metal都差唔多唔聽，搞到好似我陰阿老細噉！
今日凌晨十二點我又係美孚，因為Victor聽日就走係佢要求之下出黎俾佢見下最後一面。點知跟住條友話要兩點幾先返到美孚搞到俾佢點返出旺角同佢會合搞到一早出黎美孚就係為左食宵夜！出返旺角又再返返美孚已經三點幾都幾戇居，不過我地呢三條友不嬲都係咁戇居四點幾先上到黎都試過！
幾經波折上到黎頭果兩個鐘節目唔係吹水係睇Victor吹水。佢返到黎第一件事就係急call佢條女，佢地之間發生咩事我冇興趣理總之呢條女除左講句「飛左佢啦！」之外我都冇咩其他評語。以下係幾百個支持理據其中之一：
女：「夜喇，訓覺喇，下次先再傾啦！」
男：「好呀，噉你訓好ｄ喇，拜拜！」
女：「我知你想收線好耐格！啍！」
睇左佢同條女「玩」左兩個鐘之後先到我地吹水。放心冇人講過有關搵工既野因為在場所有人都有排先要擔心呢個問題。另外兩條友係噉講「讀得唔好點點點算」，我都冇咩好講啦你唔係諗住我呢ｄ用五個鐘做功課已經叫俾多左之頹友會明白你地呢ｄ最少會／要用三日做功課之勤人之煩惱嘛？不過對在場其他人士黎講「頹」呢個概念／思想／行事方式原來係好神奇＆好新奇，
「唔好聽劉義講ｄ野呀，我成日都覺得佢果ｄ係歪理黎架！」
晏晝訓醒（其實係好早醒不過見冇野做都係撻返低好）跟住節目就係睇新聞。正呀今日新聞真係應落台果ｄ人落台應拉果ｄ人又拉左真係睇電視噉睇呀哈哈哈！
食完晏又訓多陣跟住就飛出旺角搵大佬，又係出黎俾佢見下最後一面 － 又係就黎走喇佢呢排真係走得人多。同佢逛ｄ影音舖見到我之前千七買返黎部淨係有得用黎聽歌又要入software搞三搞四之Mp3機而家跌到八百都冇，最灰就係新出果ｄ128MB即插即用仲有得錄音聽埋收音機加無數我都唔知有咩功能之功能都可以低過呢個價錢忝呀！
行完旺角就到戲肉：飛出紅磡打機！當我連上次入機舖係幾時都唔記得就更加講唔到俾你知我有幾多年（真係「年」）冇入過美國寶！我地兩條友入機舖就淨係識玩一部機既遮，係咩機就唔使講喇卦？之前都驚咁耐冇打咁耐唔知會唔會識玩而家果隻第八代，好在去到發現果部仲係我金盤洗手前仲煲緊果部第四代，仲要係三蚊四首歌忝呀哈哈哈∼不過呢度都未夠癲，回想以前堅駿部二代三蚊五首仲要唔似得呢度係唔cut歌架你明點解果時我日日放左學都去燒錢啦！係我都認我燒左果ｄ錢夾埋夠我學幾個月鼓，不過都係打機遮如果將真鼓同鼓機拉埋一齊講就有點兒無謂喇，但係呢個世界就偏偏有好多傻仔永遠都唔會明白呢個道理。唉小朋友唔好成日都覺得自己好威好型啦出到去俾人睇到你對棍同你個手勢會俾人笑死架！所以除左打機欲冇以前咁大之外另一個唔多想入機舖之原因就係
「ｄ人一直都冇進步過！」
福星又見福星，相信今次真係會係最後一次見福星因為分舵執左之後而家福星總舵無論係食物定衛生只有一個字：
「唉．．．」
文曲星人好耐冇見，有ｄ人真係一年都見唔到幾次，唔係因大佬之名的話可能下年燒赤柱之前都唔會見到。雖然暫時只得也哥一個搵到長工但係似乎在座冇乜邊個人（需要）擔心搵唔到工？哈哈可能到頭來原來得我一個係需要擔心，因為政府已經明屈下年我冇書教架喇！
今日心情異常暢快，即係有MK仔／PK仔送到上門俾我消遣我冇理由唔受架係咪先？開舖果陣隔離間舊書舖ｄ靚仔真係當正成個商場係自己噉成十幾個人（真係成十幾個人！）棟係我舖頭門口做生意！即小啦當然係雖然班友係白痴但係有陣時對MK人唔需要咁仁慈架！平時係威係勢可惜MK仔就係MK仔，俾人小完立即成村人鼠晒去唔知邊度成個商場異常寧靜，連本來買緊書ｄ人都唔知去晒邊，成日條走廊除左某ｄ時間有ｄMK仔係度煲煙蹓躂無鬼聊之外都非常整齊企理！嘩正呀真係一到暑假開始淪陷左咁耐之後第一日間商場似返ｄ間商場！（包括長時間冇乜人行．．．）你班友仔都煩到耐喇！阻住我焚機丫拿！
死突然間好似完全唔使擔心舖頭盤生意噉，因為呢排我發現我（只限我）點求祈法都好難做少過一千生意（雖然都係好少．．．）。可能老細見我而家做野做得咁求祈夜晚專登上黎俾野我做：幫佢執成二百幾隻即係成七八箱碟出黎掟上大陸！好在唔使我幫佢寄埋，因為佢諗住拎呢幾箱野返上大陸寄俾人！聽日仲開心又有貨到唉．．．．
夜晚有個大陸姐姐落左黎，原來佢係幫"PK"（要明果ｄ人自然會明架喇）做翻譯同撰文，
「聽Raw Black架我！」
睇唔出喎姐姐仔都聽Black野，香港幾時先有呢ｄ「姐姐仔」出現？聽佢講大陸而家通街都係翻版同走私貨，唔止Pop野仲有唔少Metal野，而且價錢又係
「二十蚊隻我都嫌貴！四五十蚊以上我一定唔會買！」
仲好慷慨地同大家分享佢掃平貨之寶貴經驗。佢又話耐唔耐都會有好多（香港）人拉隊上去掃貨，總之係同Metal有少少關係果ｄ都一定會俾佢地搶晒（可能「某ｄ人」都係噉樣入貨法．．．）。好吸引忝突然間好想搞呢個放左好多人好耐飛機之樟木頭Ｎ日遊！
晨咁早起身出教協問Park Lane收返上次教班份糧。勁開心呀做做兩日就有成千咁滯即係差唔多六十蚊一個鐘，連現任Ms So首席RA Park Lane都話
「仲好賺過做RA呀！真係想做多幾個呢ｄProject！」
不過搭車來回都成四十幾五十啦已經，班ＸＸ仲要超難教？但係真係好賺成噉我又唔介意做多幾次。
收完錢就去開房同肥仔瘦仔加Rax夾。呢個組合都幾無敵因為第一次可以有兩支結他＆兩支結他同Bass都超勁！（死我而家越黎越大壓力）去到發現原來大家都冇乜執到歌真係差少少就Master兩個鐘。雖然好多時大家都唔齊又成日都唔做乜，但係第一次夾得算係噉架喇我覺得，不過似乎大家都未在狀態（係好明顯我係賴得就賴）。最開心都係玩Guns N' Roses "Sweet Child O' Mind"邊打邊唱哈哈。
打完上舖，班友一時性起就駁支結他落部DVD度玩，睇阿Rax同Bodom live jam真係笑爆咀。唔得舖頭一定要整座Amp返黎如果唔係對喇叭好快就會俾我地玩殘。
是日超靜。雖然係有新貨到不過只係得一條（即係一箱）話咁快搞掂，琴日未執晒果二百幾隻都懶掟晒俾老細聽日搞算，成日節目就係吹水吹水吹水吹水．．．（係我承認唔係吹咁多水的話我今日一定會執（得）晒果批貨）是晚節目係睇黃子華《無炭用》，個個睇完都話冇之前幾場咁正我就反而幾鍾意呢場，可能因為呢場冇之前果ｄ咁重政治味，而牽涉到之題材都係我較有興趣之範疇。最正都係睇佢即興串人，呢ｄ先係佢棟篤笑精髓所在！
「知唔知全世界最暢銷書籍係邊本？Harry Potter － 係俾小朋友睇既．．．《東周刊》《壹周刊》？呢個答案透露出你既文化水平．．．」
好耐冇出過手，都係時候出糧喇！今次執左十零隻以為揮霍左好多，點知計一計發現都只係清左今個月做到今日之人工，即係上個月果份糧仍然係未郁過．．．
是日得一句，我未來老細講既：
夜晚同文曲星人走左去睇T3，特技正不過都係鍾意上一集多ｄ，水銀人仍然係我心目中最經典特技效果，諗下十幾年前整架喎！正如欣賞《二零零一太空漫遊》ｄ特技唔係欣賞出黎之效果因為從而家之角度睇好多都唔係好難做到，而係欣賞佢地三十幾年前已經可以製造出呢ｄ效果。套野個結尾幾正有《猿人襲地球》影子，亦都話俾我地知唔會再有第四集（睇過你就會明），因為
"The future is here."
「．．．．．．」
．．．俾你發現左我呢排寫ｄ段記都好求祈又耐唔耐走一兩日段記唔寫忝！不過最後一個暑假嘛俾我頹埋佢啦！你睇我已經推左三份又係人地搵到上門點個頭實有得做之兼職就知我幾有決心今個暑假乜叉都唔理淨係搞音樂同頹！有人投訴點解有兼職我唔做又唔介紹俾佢（地）做，即係呢當中一份係教IT一份係教英文，你（地）自認做得到的話咪小我唔肯俾你地執我手尾囉．．．至於最後一份呢就係幫人做補習（幫邊個就睇返以前ｄ段記啦），呢份雖然我唔（想）做不過其實我都想推薦俾你（地）做架，但係個老細點到名係要我去做冇計啦！
「鬼叫你唔係劉義咩！」（有陣時我都因為呢樣野而自豪）
「．．．．．．」
係我仍然係冇貨。好在我今日無聊摷返實習果時ｄ無謂野出黎！呢個係果時教美術ｄ人叫ｄ靚仔自由創作畫故事板ｄ作品黎。完全係峰迴路轉出人意表超乎意料血腥暴力．．．（請繼續加入林敏聰式四字詞）
開舖。又係好靜（外邊班MK仔就好嘈）。結果成日就係坐左係度寫碟評 － 係呀真係拎住支筆寫呀我居然淪落到要動筆證明今日生意真係好灰。
全日節目就係同肥條瘦仔吹水。我發覺今日同Queensryche呢隊野好有緣，先係阿Jens放左Queensryche兩隻碟俾我，跟住瘦仔居然會帶左Queensryche隻DVD上黎，睇完之後求祈拎左隻碟黎試點知隻野最後首hidden track又係Queensryche！嘩好驚呀Queensryche纏身呀我以後都唔敢聽Progressive嗚嗚嗚∼
係唔上黎就唔上黎當夜晚播埋Beyond場演唱會都冇人入黎好野∼∼∼是晚阿威同肥仔搞左bass講座互相clinic。唔係你班友講講再睇真ｄ我都唔知原來呢場黃家強又係要幕後代彈！唉好失望呀仲以為佢終於的起心肝彈好ｄ忝，九一年彈出街知巷聞到連唔聽Rock野唔玩音樂ｄ人都知係咩一回事之《冷雨夜》bass solo果個黃家強去左邊？阿威又帶左隻絕頂難求之Beyond精選，入邊有好耐之前黃貫中同葉世榮搞出黎果隊metal band高速啤機其中一首歌《衝》 － 你唔識呢隊野我唔會怪你架，因為呢隊野只係佢地搞出黎玩下跟住冇下文我都係第一次聽佢地ｄ歌！一聽真係「嘩！」有點兒Thrash編曲又有轉折，結他啡得勁之餘個鼓係double bass由頭踩到落尾！嘩真係好Metal呀完全估唔到呀聽到好感動呀嗚嗚嗚∼∼∼聽完呢首歌再睇睇電視．．．點解搞成噉呀？黃貫中而家彈結他唔再啡都算起碼佢耐唔耐都有幾下話俾人知佢仲啡到，但係葉世榮就真係點睇都係咁求祈。即係有陣時簡單係好但係我唔希望玩Rock野玩到好似民歌咁簡單囉，因為玩得唔好的話只會俾到我「馬虎」之感覺．．．
呢隻Beyond DVD係瘦仔係大陸買返黎，不過好神奇地一定要較左中文字幕先睇得如果唔係會輕機。大陸野係差ｄ架喇不過當你見到價錢只不過係十五大元正果陣你仲會有咩要求？唔得一定要搵次上深圳掃返晒Beyond之前ｄLive！九一年果場我好想睇呀！
今日有波睇，咩波就你唔係諗住問我嘛？不過見去睇ｄ人似睇明星多過睇波（唔使我舉例喇卦？分分鐘你自己已經係例子）。其實大家睇波定睇人？睇波就睇波啦搞到咁明星化做乜？令我諗返起ｄＪ人同Gothic．．．
是日生意係接近零，因為夜晚有band show。次次有show都係噉架喇冇計。雖然又冇生意我又要睇舖冇得睇騷但係心情愉快，因為隔離檔MK舊書又中招。話說有個師奶幾日前黎買書俾班MK仔老點搞到買錯書所以今日上門要換，點知班友話「貨物出門九月三十日前怨不退換」，個師奶當然係狂小班人最後仲call埋差佬上門。跟住點？對住差佬敢唔肴底就唔會係MK仔啦小朋友！
是日阿Rain姐（即係呢個）專誠上黎話俾大家知
「Dark Vampire未出世果陣時全香港僅有去Metal Show會fing頭果兩名女性之其中一個咪就係我囉！」（請於三秒內讀出）
前幾日舖頭突然間出現大Blackwine CD同tee，原來拎貨上黎舖頭果個係！
「 大 哥 丞 ！ 」
老細一見到大哥丞上黎怒嗌。大哥丞立即
「殊－－－－－－」
使乜咁驚丫大哥丞我敢擔保一日廿四個鐘有廿三個半鐘係皆旺以內TRHK以外範圍冇人聽到「大哥丞」呢三個字唔會當你係黑社會大佬而會話
「哦！DSC彈結他果個嘛！」
原來《小孩不笨》有電視版喎！今日先知忝！呢套野超正呀真係，咁多個鐘當中其中一個鐘已經表達晒反教育、反階級、反權力、反制度、反政府之意識。新加坡拍架呢套片！點解連新加坡都拍得出呢ｄ野香港仲未有？（我真係驚有一日新加坡都拍得呢ｄ戲香港反而唔拍得）
又當中有段情節係班主角身處之最差班個班主任（一定要註明：係一名中年醜婦）病之後有個代課先生（一定要註明：係一名青春美女）黎教呢班頑劣學生，後來以新穎之教學法令到班學生終於肯讀書。問題黎喇：
1. 即係係現實中遇到咁靚女之Miss唔係冇可能，之但係點解好先生一定要係後生靚女，ｄ壞先生一係就係麻甩佬一係就師奶款一係就超肥一係就超樣衰？
2. 根據我豐富之頑劣班授課經驗（唔使同我拗呢樣野喇雖然我只係入得教院三年但係每一次實習同校外活動好似珠算、做project我教親ｄ班一定係全組／全級最差果ｄ），假如ｄ學生係好似劇情中描述到「係唔上堂就唔上堂架喇吹咩」噉款的話佢地係會好值得欣賞地貫徹始終地堅持呢一種信念架！不論你教得點新潮小得點犀利佢地都只會唔理你而唔會突然間深受感動轉死性肯上堂聽你講野！你講書果陣佢地肯出少句聲你已經要向佢地叩頭架喇！
3. 就算真係俾你咁把砲可以教得咁New-School，你唔係諗住學校會俾嘛？我暫時未聽過有學校肯俾你唔跟書同進度教純粹上堂同班細路吹水囉！
有人發現段記越黎越多「仆街」呢個字眼出現。係呀ｄ人成日都話
「搞錯呀做阿Sir仲講咁多粗口！」
首先，我都冇諗過教書，而且畢業之後想教書我老頂都話唔俾我教；二來我係講好多粗口仲講到朗朗上口架我係爆得粗就唔怕認，不過始終為左遷就某ｄ人所以點都會收歛ｄ（起碼未出現過「dil2」先不過將來e.g.畢業之後就唔敢包）；至於三來就請睇睇以下對話，我六年級時一個德高望重同真係有料之阿Sir講既：
「其實呢仆街呢個詞就只係俗語唔係粗口黎，不過因為太粗俗之關係所以ｄ人就將佢當成粗口．．．」
「我七月目標係一日寫一隻碟！」
最後，呢個「日寫一碟大行動」終於可以順利舉行喇！係我都明今日已經係七月尾四一日但係遲到好過冇到丫嘛係咪？（尤其是做野果個係劉義果時）而且我今日寫左唔止一隻而係兩隻都算係噉喇卦？老細呵？交稿喇交稿喇．．．．
「．．．．．．」
係我係又冇貨。廢事俾人打我送呢個MV俾你地啦！冇背景人士用呢段野做Black Metal入門都唔錯架！真係糖衣毒藥！
好唔開心今日本來應該係上深圳瘋狂掃貨架，唔知邊個上星期大大聲話「好就禮拜三上！」跟住又放飛機呢阿瘦仔！結果搞到今日又係要淪落band房！今次樂隊班底大重組，肥仔瘦仔都係bass同結他但係阿威就轉左做Vocal。人地隊隊band都話搵唔到bass我地反而係太多bass真有趣。阿Rax就冇出現到喇今日，大家諗住夾下Beyond唔多玩行野悶死佢就廢事啦（雖然最後都係係噉Master．．．）。
今次上先達夾雖然ｄAmp差到爆一插支結他就多雜聲到爆，支咪又冇得較大細聲搞到成日都聽唔到阿威唱乜，不過我就唔會玩得唔開心既因為呢度套鼓多幾件之餘又set得好你班結他佬你死你事丫！而且百三蚊兩個鐘即係每人玩到喊都只係三十幾蚊你仲想點呀我開房練鼓一個鐘都四條啦！真係今次打到手腕都痛要收皮幾日都抵呀！
冇錯今日又係我開舖。好唔開心呀原來今日有新貨早知就唔幫Kara頂！是日係有新貨而且是日成日都有人，不過係TRHK之世界入邊後者就永遠都唔係因為前者既！唔使又要我用呢個「折舊論」去解釋呢個反常經濟現象嘛？
是日二寶樂逗留左幾個「字」（佢雖然最後係逗留左幾粒鐘但係佢一直都係度話「我地坐幾個字就走架喇！」）。想知咩叫極端今日上黎就會知：當二寶現任bass阿Simon哥試Power同Progressive果陣二寶聽到拍檯拍凳幾乎要打人咁滯，到Simon兄試完之後
「有人請我聽咁美妙之Malmsteen我一定要報答下佢！」
之後就瘋狂Brutal Death輪到Simon哥喊住噉走出去煲煙。
是日謝杜上黎探班，風光啦而家有兩間保險話會請佢，跟住同ｄ銀行高層食過飯人地又佢有興趣的話歡迎佢入去佢地銀行做，威啦謝杜而家係你揀做邊間保險而唔係人地揀佢，唔鍾意做保險仲有間銀行唔使憂冇工做！（雖然佢話應該唔會入銀行做，因為「長遠黎講做銀行發展機會同空間太細升極都唔夠好，保險我就睇好佢仲有發展空間！」）前幾日探花兄又搵到份民協七千幾個月，而家謝杜又有得也文也武（雖然我不嬲都覺得佢係有料也文也武），個個都有工開係我冇挑！下年出黎搵唔搵到份五千蚊個月我都唔知呀唉！灰！
今日好無聊地兩點鐘開舖，因為阿Rax補完課之後放左學冇野做之關係就召我出去開間舖收留佢。不過開完之後發現開左都係冇乜用，因為佢心中早有所屬：Slayer最新Live DVD！即係佢行勻成個旺角都搵唔到費事佢坐係度冇野做就收舖同佢過去灣仔買。當事人都話
「要越洋買DVD真係戇居！」
不過fans冇計啦，而且灣仔呢度隻野賣140分分鐘係全港最平忝喎（不過計返車錢其實分分鐘等旺角返貨好過）。雖然我出黎都想買Guns N' Roses隻Live DVD不過最後冇買因為硬係覺得隻野得韓版有ｄ問題，而且我亦相信旺角點都會平過呢度不過未得閒搵！
買完之後因為阿Rax唔肯搭地鐵搞到要搭一架過左海走左去奧運站果邊兜左成個圈之巴士所以遲足半個鐘先開到門。一開就有兩個客哈哈哈哈哈哈仲話遲開冇所謂喎阿Rax！我肯定因為我冇開四點至四點半呢半個鐘搞到今日冇晒最少五百生意！肯定！！！你睇是日生意興隆到係噉有人上黎搞到我王都冇得蛇下就知！
今日多人買野之餘仲要有幾個係新客都可謂人又有錢又有！（不過其實都只係剛剛好算係「生意」．．．）是日其中一個新客係阿May姐（唔係教院果個呀，我估遲ｄ在場所有人每個都要整返個編號好似TRHK-May-01），佢話成日俾保羅麥哥德老點所以都係上黎搵我介紹佢聽(Gothic)野好ｄ。幾灰架而家都因為次次ｄ新人問親江湖中人
「想聽Metal有乜好介紹？」
「Metal野問劉Sir啦！」
多謝呢個Jolibee下午茶餐同所謂之韓國旅行手信「韓國餅乾＆咖啡」（標明「所謂」係因為我係ｄ日韓零食店都見過呢ｄ野呵呵）！下次記住帶多ｄ野食上黎喎，食物之數量同試碟果陣CD之數量係成正比架∼∼∼
今日乜都唔食因為夜晚約左 漢 食韓燒，但係最後又係開唔食飯（點解要註明「又」請睇下文）。我發現每一次我搵佢／佢搵我食飯的話果一排佢一定會有事發生，例如今次就係開飯前冇耐佢打拳果陣俾人打爆咀（呢個案例都唔係第一次發生）。為左 漢 之人身安全同歐陽家之將來，我決定以後都唔再搵佢／同佢食飯。
返到屋企好唔開心！不過唔係我係我隻狗，搞到十二點幾都要帶佢落街兜圈。返到屋企好唔開心！不過唔係我隻狗係我。
冇喇係咁多喇因為再寫落去我都係寫返「又有新貨到又要做盤點唉做到喊」同「有新貨到但係ｄ人又係唔肯上黎唉生意淡到喊」呢兩句架啦。
「咁快？」
係呀就係咁快！上個禮拜三先幫阿Rax係美國訂支新結他，估唔到一個禮拜都唔夠支野已經送到黎（灰我對Ahead居然仲慢過支結他到）！最緊要係冇穿冇爛喎支野，而且話晒係B.C. Rich Slayer Kerry King Signature Specia喎計埋運費居然都只係$3100，對成日都話「我覺得Slayerｄ野好貴架！」之阿Rax黎講噉既價錢加噉既效率再加噉既質素執到呢支野返黎簡直係物超所值（支野分分鐘仲平過佢而家用緊果支J-Rock結他）！短短幾日間先後以超值價錢得到Slayer Live DVD同個結他佬支簽名結他對身為超級Slayer fans之阿Rax黎講呢個可能係成個暑假最開心之一個禮拜！不過佢就開心喇真係難為我，雖然佢都係住九龍城但係大熱天時要我抬支結他出去俾都咪話唔死，個箱仲高過你呀大佬真係搬完出去之後返到屋企隻左手係舉唔高架！我呢ｄ懶人都係唔係適合做運動架喇要我郁都係俾套鼓我亂扑算啦，就算打到死都好起碼死得心甘命抵先！
唉我對教院已經唔止失望咁簡單直頭係絕望喇。之前英文大家擺明俾個導師屈但係上頭唔肯理都算，估唔到而家連reg科咁大件事都要俾人屈我對呢間野真係心灰意冷。唔諮詢突然間話轉就轉成個算科system已經算，要學新system一定要人地千山萬水返去教院上傳聞只係一個字長之course都算，不過有樣野就點都唔可以算就係個新system居然係由有關部門編個時間表俾你，你邊一日幾點鐘上堂同跟邊個導師完全地冇得揀！結果個時間表搞到每一日只係上一堂，禮拜一仲要係返四點半到六點超戇居！講真你編時間表都用下腦先啦唔該俾著係你自己編時間表你都唔會俾自己有一個咁戇居之時間表啦，而家乜都掟晒俾電腦擲骰仔編堂算跟住乜都唔理完全搵笨！即係俾你老屈都算反正下年ｄ導師都唔知咩料，又唔係有好多科要轉只要其中兩科是但一科調到位就可以有dayoff，但係結果搞reg同唔搞都冇咩分別，因為幾點reg得科又係一早俾人定左，我個時間係十點半同五點半即係可以不理，因為ｄ靚位一早就俾八點半用九點半ｄ人搶晒我十點半睇左成個鐘都係一個位都冇，晏晝五點半果場直情睇都唔睇算喇因為我對今次reg科已經完全地失望！每日都要用三十蚊搭兩個幾鐘車上個幾兩個鐘堂唉諗起都覺得自己戇九呀！如果用返之前個system我自己選科跟住再抽籤個制度我一定可以reg到我想要個時間表呀，起碼唔會俾早過我regｄ人搶晒ｄ靚位到我可以reg果陣ｄ送尾都冇得執咁折墮！對今次選科之評語我已經唔知講過幾多次不過仍然要講：
「而家就好似衫就俾人除晒，不過係人地污辱你之前你可以嗌一聲『唔好』一樣：嗌左同唔嗌都冇咩分別！」
跟住有人問學校點解今次選科咁Ｑ廢，點知一句「新系統同舊系統係兩樣野黎唔可以將佢地拎黎比較」撻過黎哦收到仲收埋皮忝！唔怪得董建華到而家都未落台啦，港英政府同特區政府係兩樣野黎所以唔可以因為特區政府維持唔到回歸前之繁榮就話而家班官廢！跟住又有人話叫學校轉用呢個新系統黎搞選科果個人就係校長，得喇原來連校長自己都為左方便自己下屬做野而惘顧學生利益，呢間院校已經冇得救架喇！雖然我之前都唔係咁想但係我而家真係好希望中大可以吞左教院佢算！
仍然係努力碟評中。自從放左暑假之後都好頹，唔使開工的話每日都會訓十幾個鐘，訓晏覺已經係指定動作。所以老細成日都係度催稿，不過得鬼閒理佢咩唔使訓咩？我地呢ｄ係「慢工出細貨」．．．
話時話，我真係諗唔到我今個暑假除左返工同學鼓之外出過幾多次街喎？逢星期一二三我真係接近完全地未出過街喎真係超頹！不過噉先似呢世人最後一個暑假！
終於輪到舍妹放榜。結果係點？唉無謂提！結果就係：
27分！3A3B3C！
不過我老豆都係太滿意呢個成績：「差條A就搏到慒做尖子架喇！」我都認同架呢樣野，做到尖子真係幸福好多架大佬讀少一年同（呢樣野最最最緊要）唔使考AL架！都係我衰烏鴉口囉講中左佢中文作文作得唔夠離題只會拎得B（聽落係好離奇不過我話你知我就係因為太離題所以A到）搞到中文拉埋都只得B！又聽佢講佢有個同學拎到6A4B，知唔知佢睇到個成績第一個反應係咩？係喊到九彩！真係戇Ｘ！喊乜春丫去check卷丫笨！Check唔到就去跳樓死Ｑ左去算啦丟那星！
放榜事實證明母語教學係完全唔掂。跟住有人話
「唔應該淨係睇成績就話係失敗，應該睇埋佢地能力、自信、學習動機呢ｄ．．．」
挑之前又從來只見你班友講到成績咁叉重要其他能力、自信、學習動機呢ｄ冇Ｑ用，而家神又你鬼又你講晒啦！唉淨係睇今年甚至今個暑假有關教育之新聞已經知道香港教育同負責搞教育果班人已經係廢到末期冇得救！下年真係你地請我教書我都唔會教呀，教唔到我想教既野都算我係唔會助紂為虐！
今日睇電視睇呢個所謂「教育」同果個所謂「足球」睇到有好多野想講，不過廢事又得罪人之關係我都係唔講喇。但係收皮之前有樣野點都要講埋佢：
「喂叻姐今日我係電視見到有個著住件綠色衫紮住條辮追住碧咸既傻婆好似你喎！」
灰呀今日開舖見冇人想蛇王落去趙返個今期最愛黑椒漢堡餐點知落到去發現冇晒搞到今日好唔開心！好在我琴日一晚內連趙兩個黑椒漢堡噉先對得住自己！
今日係有生意不過今日冇人，因為個個都走晒去睇波，好在我地親愛果位哈爾濱朋友（TRHK代號"Ha-E-Bun Jackass"）又上黎救濟下我地唔係真係得幾舊水生意。見灰到噉我都早ｄ收舖返屋企食飯算。
以下環節冇背景人士又係唔使理：
今日係舖頭又寫左一篇碟評，仲要係寫足八百幾隻字。唔使問架喇噉都做得出即係今日生意唔使提囉！
今日有個廣州妹（噉樣叫人好似好衰，都係廣州小姐好聽ｄ）千山萬水係大陸落到黎Trinity，
「嘩！你地間舖好難搵呀搵到我死死下！．．．乜你地間舖咁細架咋我仲諗住會好大間忝！」
好在呢位廣州小姐遲半年黎，佢早半年落黎香港買碟的話要搵我地九龍城間舖何止要喊佢分分鐘搵到死都未搵到（曾經有人唔識路關係係太子步行過黎九龍城龍珠商場），而且佢可能連細過而家間舖一半都冇之舊舖就係TRHK都唔知行過左都唔識返轉頭。係香港呢ｄ舖頭點做得大間丫小朋友大陸就得 － 不過要賣翻版。雖然佢只係一個小妹妹但係我敢講佢係某幾個範疇聽野係聽得多過我，揀野又要奄尖過人：又要民族野但係又唔要純音樂又唔要交響又要夠悲又要夠靜但係靜得黎又要有起承轉合高潮起伏，阿廣州小姐請你另尋高就過去芒記罷啦我地呢度滿足唔到你架喇！但係佢又唔制喎，因為芒記唔似得呢度噉可以猛咁試碟之後又唔買！
唉大陸ｄ人而家聽野已經聽到咁高水平，香港地利上優勝過大陸咁多點解都仲係追唔到人地呀？不過唔好話「追」啦要而家班小朋友唔係為型而聽Metal已經好困難．．．
另外好唔開心，我地Trinitian之最愛美味廚已經個幾禮拜同我地失去聯絡喇！灰呀我好懷念當年（．．．）我用兩秒鐘時間讀出「漢堡煎蛋飯粟米汁抄底涷華田」之時光！聽肥瘦仔講Ｎ日前警方拉左一檔大陸人負責之上樓飯盒外賣檔。唔會咁蹺卦？？？唔得我一定要繼續努力打佢地個電話，打通之後第一句一定係
「咦？乜仲未俾人拉咩你地？」
是晚重點絕對係亞視《六十分鐘時事追擊》。香港教育學院四年全日制（榮譽）學士學位課程主修英文三年級學生Angus Wong又名阿七爺上電視喎！
「如果畢業之後唔可以入職的話，會係幾失望同沮喪之一回事。」
我返到屋企已經做到尾咁滯淨係睇到呢一段！阿七下次出黎拉闊講返俾我聽，我容許你講埋你唔想講果ｄ，包括無數粗口同
「中大呀中大！快ｄ過黎吞左教院佢唔該反正呢間野留係度都冇Ｑ用！」
呢一句如果係訪問我的話我實會講。不過我就唔希望亞視會搵我做呢個訪問，因為人地見到阿七呢ｄ企企理理四四正正咁型仔嘆搵唔到工憂心前途有好高說服力，但係如果搵我呢ｄ一出黎就講到明
「俾張凳我先冇凳我唔做訪問！」
跟住大字型撻係張凳上邊
「小學縮班？教師超額？涷結聘請教院畢業生無限期延長？挑！關我Ｑ事！我都冇諗住教書既！班傻仔佢死佢事丫我仲有得笑忝！」
跟住ｄ人睇完之後
「嘩乜而家教院ｄ學生咁Ｑ頹架？抵佢地冇書教啦！」