段記
6


1/6/2003 SUN

冇錯今日又係我,老細飛左間舖就由我打骰。即係又係時候作反。
今日生意又過二字頭,不過其實客只係得三四個,唔係靠呢d豪客撐住真係人工都蝕埋。諗返都幾灰架想當年我係每日都做幾個呢d豪客,而家一個禮拜遇到一兩個豪客已經要笑到喊...

冇今日乜事都冇。過左五月,突然間好多事好似冇發生過,廿四個鐘前仍然係好煩惱,但係到左呢一刻好似之前一個月乜人都冇見過噉。舊事已過,一切已變成新的了。


2/6/2003 MON

點幾起身就飛去銀行入返琴日舖頭條數。做多廿幾年香港人我到今日先知恆生銀行同呢個"HK Bank"原來係兩間野黎,排左成半個鐘隊之後又要排多半個鐘真戇居。

因為屋企民怨高脹之關係,為免劉宅今晚會發生家庭暴力事件今日晏晝被迫飛出旺電買printer。買完之後再飛出尖咀買Beyond演唱會飛,嘩二百蚊飛已經俾人搶晒得返d死位,即係迫住要買四舊水飛啦!貴?睇就唔好諗,諗就唔好睇!
出得尖咀,行HMV當然係指定動作。是日有幾得閒睇我可以出入HMV三次就知。等左咁耐終於都有新野喇噉又四隻,嘩噉就一日冇左千幾...

今日點解抽住咁大部printer都唔返屋企放低反而抬住部野通街走?咪就係因為 漢 同Xam少!本來班友話六點出黎食飯就廢事返屋企又出返黎,點知結果班友差唔多七點先出現搞到有條傻仔一手拎住個袋一個抽住部機遊尖旺!
上到Year 3好似冇乜幾次三條友一齊出黎食。是晚食呢個泰式自助餐,完全唔掂喎除左蒜蓉包同唔知點懷舊法之「懷舊糖番薯」之外。咖哩牛腩都唔錯架不過只限入邊d薯仔。係呀俾成九條就係食呢d野啦都唔知邊條友話呢間野正!噉又一舊水呢排跌錢之速度同仆街一樣咁快!
似乎大家都誤解左我,以為我今年突然間轉死性搏命左所以份份功課都一(朝)早做晒仲要厚到死。
「我唔早d做完d功課點開舖呀!d功課咁厚就意外黎我都唔想!」


3/6/2003 TUE

即係呢printer呢買左係一回事裝唔裝又係一回事,不過成日俾老豆係噉哦部printerd野想頹少少都唔得就晏晝立即搞掂佢。嘩部野快到爆又靜喎仲要超靚,仲要四舊八咋喎部野HP萬歲!(雖然我唔鍾意部野用USB唔用得Serial,一來霸晒我dUSB位,二來唔知點解次次都要boot機先print到野!)挑我以後都唔用Epson!

四點幾搞完就出去行行,今次係灣仔>銅鑼灣>中環。除左HMV之外仲行左好多CD舖(冇錯我出街只會行CD舖其他舖頭除左賣野食果d之外一律與我無關,所以你出街唔想見到我就記住去d冇CD舖之地區)。今日行晒咁多間HMV除左睇下仲有冇正減價貨之外仲為左幫一隻想買好耐之碟格價,結果發現有而又最平果間係銅鑼灣,一百五十五!係呀好貴呀不過已經平過其他幾間廿蚊架喇!灰!(不過其實計返車錢同出尖咀買差唔多...)又如果你想去HMV掃貨就教精你喇!今次減價銅鑼灣係最多貨揀架,不論係188兩隻定200三隻d剩餘物資都係!

結果今日都係買左CD,不過唔係HMV係信和。呢兩隻分別係跳房子(英倫野)同福祿壽(電子野),誠意推薦因為的確係近來較佳「中文」碟!(叫中文碟都唔多正確因為前者係唱英文後者更加只係吟唔係唱...)之後上一上舖頭,阿明好耐冇見!俾你搶先用左我心目中個造型忝!

夜晚文曲星聚餐,居然唔係福星而走左去太子食日本野,係有點兒失望架!一來因為冇得上福星(幾耐冇上過?),二來今日打電話去問先知福星創興果間分店執左淨返女人街總舵!
成晚個個都食壽司、沙律、刺身,係我食咖哩角(冇錯實有佢份)、炸帶子、雞串(好似琴晚呀呵?)。冇計我呢d人骨頭賤慣都係食慣d拿渣野,太高檔果d都係唔岩我!
是晚個個人都好多野講,我就得一句:
「畢業!你又畢業!個個都畢業!*#xyz...」

今日公報基準試結果,冇野好講茗報啦唉!叻姐係肥一份Writing咁大把咋,仲想點呀你!我都冇預過自己多過兩份合格呀!不過詳情係點就我都唔知,因為個個都係今日收到信得我冇!可能教統局都知呢條友自己知自己事估到實係肥到仆街廢鬼事寄慳返算!


4/6/2003 WED

終於到喇基準試個成績!係呀班友原來有寄到架因為居然只係肥得Oral一份!有點兒意外(應該係好很意外!)份野真係係差少少(真係少少!)就合格好明顯玩野玩大左,因為當其時之情況係
「請回顧你七年的中學生涯。」
「冇我中學七年乜都冇!」
我講完之後果兩個考官即場爆笑!(真架呢樣野冇呃你!)
...死喇!好擔心呀我!突然有書教忝!

是日返教院節目係食雞(其實係買俾Leanne同叻姐食),幫人做功課只係次要。哼叻姐又話乜都冇點知成份功課乜都度晒書都睇埋,原來叫我返黎唔係要我幫手做功課而係等你有得晒命!威喇囂喇勁喇叻到拎獎學金喇唔識人喇而家!
食完節目係開房。響一響Leanne姐個朵就有得去Hall A打鼓好野!嘩間野大&豪華到真係早就應該做啦Band房!係到最後一年先有得玩!雖然套鼓就差左d不過都好過冇,唔使錢有鼓打仲想點!話時話玩完之後成身/腳/鼓/地都係木糠,真係好想買Ahead鐵棍呀阿明!而且我相信用鐵棍打鈸d聲會靚d!
唔係叻姐Call真係一直打到五六點走人反正今日係紅假冇人(會)理。下年仲全世界搬返去Hall A忝!好野!最後一年先黎噉玩!真係唔使讀書架喇我!
上到叻姐房當然做功課。做果個唔係我係佢,我係負責霸住張床等佢冇得訓從而迫住要做功課。好Q頹呀真係訓到七點都未郁過,都係要躝返屋企先唔係噉樣訓落去真係死得!

返屋企上九場睇睇先。好靜喎乜事?之後上龍珠仲衰死晒忝!之後想買飯食發現全部都收晒!再行行下撞到剛剛上完阿嫂屋企食飯之Messiah結他佬先知今日全世界都去左做節。係喎今日係端午節喎。乜端午節都要做節既咩?咁大個仔而家先知喎呢樣野真係!可想而知我係幾咁不孝!

又原來今日係六四喎。冇我冇去遊行你有冇?阿李議員我靠你架喇...


5/6/2003 THU

是日返教院節目係搵沈太傾功課,不過其實搵唔搵都冇關係,因為都係同預期一樣講一大輪之後佢淨係識係噉點頭然後不斷
「好丫!去啦!做啦!」

年年呢段時間都好灰,今年有人灰過我,佢就係叻姐喇!五日入邊兩個考試三份功課點算?做囉唔係可以點呢唉!今年大家每一科d功課好似都好超值,抵到爛都唔止直頭係抵到要爆粗呀!

是日一大灰:
「皆旺樓下食死人間魚旦檔執左喎!!!」
遠在新加坡之老細準時三點打黎問
「咁早開?」
「乜你咁早打黎唔係就係諗住我會咁早開咩?時候都唔早架喇!已經做左三單生意喇!」

係呀今日諗住開兩點搞掂埋幾日前未執晒、批發去外國果兩批貨,點知咁早開都俾我撞到客喎仲要唔止一個!N年前(有點兒誇張因為間舖只係開左一年)我帶旺Trinity之光景終於返黎喇!講得呢句當然唔止咁簡單啦,一日做到四千幾生意搬左出黎旺角之後有幾耐未試過、有幾多人試過、又試過幾多次?老細返到黎一定好開心,
「掂喎你條友仔終於似返d樣喇!」
之後我就會好唔開心因為
「你咁掂得啦!本雜誌係你架喇!」
收完舖又要去探一探火車站朋友。死喇好耐冇見佢囉喎唔通俾人拉左?


6/6/2003 FRI

死琴日咁好生意梗係迴光反照今日舖頭完全地冇人。老細好唔開心,
「見琴日你咁好野仲以為你真係掂忝!就派你去搞雜誌俾個機會你將功贖罪!」
不過其實都有點兒預左,因為為左避免大家「於網上下載濫錄音樂」而之麥記(記得Napster嘛?)提早左五日即係今日推出六年來首張新碟"St. Anger"。即係如果唔係要開舖我都立即飛出去HMV買啦,所以今日開緊舖果陣聽到阿Rock打電話黎話出左都叫佢立即買一隻返黎聽呀!隻碟剛剛出外國已經立即有超多Review出現而且劣評如潮,自己睇過個MV都小架喇不過點都會買,鬼叫「一起成長我與Metallica」。呢隻碟有幾差就唔係度唔講喇,因為冇背景人士黎到呢一刻都會繼續貫徹你地冇背景之精神「(音樂)事不關己,己不勞心」,而有背景人士黎到呢一刻亦一定會聽過佢地隻新碟,係好係壞公道自在人心!
唔知係咪因為噉(一定係!唔使同我拗!)成日客都冇個,好夾硬開到十一點臨收舖先多個客過到五百。成日節目除左(小)麥記之外就係同肥仔瘦仔吹水。乜你地而家先知我係咁「神」咩?有句我幾鍾意:

"Don't mistake lack of talent for genius."


7/6/2003 SAT "Don't buy this album!"

案件重現:
1. 「麥記新碟點?」
2. 「睇電視啦播緊佢地新碟隻DVD。」
3. 「挑!」
4.
"Don't buy this album!"

以上是日舖頭發生最多之事件,而最後果句當然係出自我口。我都唔記得我講過幾多次喇呢句野。係大家都係噉鬧架喇不過都繼續會中招,冇計始終一直追開冇得唔買,睇由細聽佢地聽到大之老細出完差一落機第一件事就係飛去買佢地隻新碟就知。


8/6/2003 SUN

聽日英文考試後日又兩份仲要交沈太不過是日乜都冇做過。有人問:
「咁老定?咁多野做唔驚架?」
「後日四點九都做唔晒先驚啦!」

乜都冇做過因為麥記,今日專誠由佢地第一隻碟聽到最新一隻真係睇住佢地大睇住佢地壞。係差(到喊)架喇91年之後之Metallica不過你鬧一回事,佢地頭四隻碟某程度上又真係天下無敵。唔講喇又要摷返呢幾隻碟出黎聽多幾次!

功課?唔知!因為:


「嘿嘿!我返到黎屋企佢唔使同我玩咩!」


9/6/2003 MON

「試?唔考!又要晨咁早考又唔計CP我都唔知考黎做乜!」
琴晚已經蘊釀緊架喇呢樣野,後尾仲搞到成立左「反LPA大聯盟」咁大件事忝!呢個大聯盟之盟主係我但係其實又唔係我,係真正果個盟主搞左個大聯盟出黎之後肴底結果我俾人擺左上檯!有d人呢就真係好Q賤格架!
「叻姐呵!」

成日都冇做過試又唔考勁呀!是日除了焚機都是焚機,夾埋聽多左好多野搞到有想寫返下碟評之衝動!點睇都唔似聽日又兩個考試加三千字教哲!


10/6/2003 TUE

三點
到左呢個鐘數,我幫左兩個人做份教哲功課,而家輪到第三個叻姐。係呀我係「幫人做」呀自己果份都未開始做係咪笑爆咀!
四點
呢個鐘數,我同Leanne姐係度吹緊水。功課?傻架做埋晒呢d野?
四點半
「開工喇!」

係開工叫人起身遮唔好咁開心住,不過都開始動(下)筆架喇。咁耐都唔動筆係因為呢份教哲諗得太癲!我相信我呢份野係教院史上最唔似樣之功課。沈太見到個題目係《海星的故事》就以為真係講海星的故事佢就中招喇!因為頭果一半都係講音樂(!)連半隻海星腳都冇,到佢睇到差唔多要爆粗話我做錯功課果陣隻海星先出現陰晒全場!諗起都開心呀哈哈哈哈哈哈...
六點半
過左兩個半鐘,仲係玩緊前言!點算?
八點
點算?做多兩個鐘都唔知點算都係訓陣先算...
十二點
一起身睇到個鐘,嘩!大劑!即做!因為我發現我淨係個前言都寫左千幾二千字真係玩出火喇今次!
三點半
搞掂即閃返教院,跟住四點十返到準時五點交好野真係非常完美!不過其實又係非常之不完美,因為趕工關係前半同後半完全係兩樣野黎,唉有點兒悔不當初點解唔早d做!而且夾埋做左果六個幾鐘先寫得果五千五百字!開頭諗住寫六千架嘛,仲有好多野未講好多音樂料未用架!(唔好!唔好打我!我都係講事實遮!)
講左咁多,好似少左樣野呀呵!係呀試當然係冇考啦!死喇唔知點解好多人都知道我係今次「反LPA大聯盟」之盟主兼發起人之一忝!(另一位發起人已經肴左底好耐喇!唉!)
今日返到黎最開心梗係終於收到之前EA Week條數!今個月唔驚冇著落喇今次!HMV!等我!

搞掂之後夜晚上一上舖頭慶祝下。好耐冇見過老細喇!佢現正為麥記而瘋狂中,有幾瘋狂呢睇佢買左港版之後再買多隻日版珍藏就知。可能結他佬聽野係唔同d個個都媽呢隻碟老細就聽得好開心,不過其實隻野又唔係真係太差有幾首我都幾鍾意(只限幾首)。有人小佢地有心今次玩Nu-Metal冇心再Thrash商業晒,坦白講,其實從Nu-Metal角度睇,"St. Anger"玩得唔錯而且仲要係質素幾高下,如果你唔鍾意由頭Rap到尾式之Nu-Metal呢隻碟絕對買得過。但係如果你係從成個Metallica史之角度噉睇而又好鍾意Old School時期之Metallica的話,你真係可以話呢隻碟垃圾都不如。至於冇心玩返Thrash...當你知道淨係"Reload"一隻碟已經係全球賣出超過9,000,000隻你就會明...反正玩乜都有人會買,使乜咁搏?而又坦白講,雖然佢地已經變左兩次型,但係每次轉型玩出黎d野質素都幾高下。商業一回事,你唔可以否定寫歌果幾位仁兄之功力... 又原來今次個鼓佬用個snare係新發明,加重左呢個共振效果所以餘音會比一般snare長好多,個聲亦都更加「鐵」。舊野成十幾萬喎高科技係唔同d,演唱會最後玩拆台果陣掟爆呢舊野就爽加喪囉。阿明剛剛好兩個月後我就生日喇識做啦...
是日Messiah輝爺上黎,
「生日呀我!」
上黎就係專誠屈老細送碟。到送左之後...
「其實呢,我生日就過左好耐...」


11/6/2003 WED

十點半先上堂唔知點解一早就返左去,唔知做乜好唯有探一探老細。而家老細都知我「正職」係乜,得喇可以講到明我會有一段時間唔出現佢想小都冇得小。不過我又寧願佢小下我,咁耐冇做過RA真係就黎冇晒錢嗚嗚!

今日Ed Proj係最後一堂。今日Ed Proj係最悶一堂。嘩佢講左成堂都唔知佢到底講乜?(其實之前咁多堂佢講(過)乜我都唔知)跟著個噉既阿Sir下年點算?仲要靠佢做Final Year Project喎!

是日被放飛機(Leanne姐我叫你卜兩點你兩點先起身真好野)就飛出尖咀。琴日一有錢到手立即豪喇,三隻碟咪三隻碟驚你呀!
Nine Inch Nails - "The Downward Spiral"
NIN終於買齊全套喇(除左Live因為玩得唔好唔買,同埋Remix冇乜興趣唔想買)!呢隻想買好耐架喇老細又似乎唔會訂就唯有比HMV昆啦,雖然呢隻碟銅鑼灣比尖咀平廿蚊都廢事等唔知幾時先再出果頭(冇錯N日前出HMV格價就係為左呢隻碟)。死喇開始越黎越迷工業野忝又多左個途徑跌錢...
Apocalyptica - "Reflections"
呢堆芬蘭傻仔又出新碟。唔記得邊個黎?請翻舊帳。真係傻架呢班友,四個傻仔當中有一個仲因為忍受唔到佢d隊員咁傻而離左隊忝。今隻碟唔係玩得唔好,不過變左真係用大提琴黎玩Heavy Metal就有點兒失望,因為硬係冇左之前果種似Metal但係又似Classical之感覺。不過點都好始終追開都係會買埋架喇。淨係呢兩隻夾埋已經成三舊幾水,係好灰不過又真係得HMV搵得到吹脹!
Radiohead - "Hail To The Thief"
呢個先至係是日重點!呢隻野特別版HMV賣成一一五,之前麥記又係一一五點知出邊平三十中左招今次唔會再做傻仔!出到去HMV行過d果間CD舖結果真係平成三十,仲要係特別版送多件衫忝喎!(話時話呢隻碟我淨係見過HMV有普通版,不過都要賣99)。本來見特別版個包裝將拉頁海報同歌詞集都釘晒落個紙皮套度超麻煩都想買返個普通版算,不過為左特別版先有得送件Tee就算啦。點知買到返到屋企先知中招:細碼黎既!點著呀真係玩爆衫咩唯有送左俾舍妹算!而家我細妹都識Radiohead!

夜晚冇野做就飛出去睇Matrix。冇野好講根本d特技同動作係掂到爆,不過今集好多廢話我寧願佢由頭打到尾算。話時話個Agent Smith可以無限複製自己咁勁,如果佢一早/一直噉樣做就可以大力量到控制返Matrix轉頭啦使乜搞咁多野!又如果主角真係咁犀利一早飛黎飛去玩晒就得點解成日都要打一大輪先飛呢?有幕係貨櫃車上面打,班友起晒飛腳超勁,不過照計真係係噉情況跳仲要跳到咁高咁遠的話未落地架車已經行左去好遠喇喎。個結局擺到明下回分解,係呃錢架喇不過雖然係明知但係你同我又會俾佢昆到喎!吹脹!

夜晚聽人地講先知跟住兩日原來要補考英文,朝早考到點幾兩點跟住去開舖剛剛好。好灰呀又要考!兩年都收警告信考左都唔知有冇Cert我都唔知去唔去好!最重要就係英文系根本就冇send過補考封email俾我,可能佢地一早已經放棄左我!


12/6/2003 THU

今日醒過三次:第一次十點見咁遲就得喇繼續訓;第二次十二點幾起身食飯之後又訓;第三次三點半立即飛去開舖。返到舖頭又粒幾鐘都冇人唔係老細叫執貨可能真係會撻低繼續訓。好明顯之前幾日「玩」大左係時候回氣。個試就...有冇人話到俾我知兩年夾埋返唔夠四份一堂數又唔交Portfolio仲要唔考試會唔會畢唔到業?

是日大客:張大導!唔記得唔緊要,因為佢做過乜基本上同呢度大半人無關!不過有背景人士睇得多亞視可能會發現某d節目/廣告當中一d間場位會播Metal歌。冇錯你地冇聽錯,係METAL!一切都係呢位聽左十幾廿年Metal之張大導搞出黎!
「全亞視最嘈果個人咪係我囉!」
只要係佢負責做製作之節目就一定會耐唔耐焚幾野架喇,不過真係得「幾」野架咋大佬野野都焚d手下忍到老細都小狗佢啦!開心一回事都係飯碗要緊!
「我d同事聽到我d歌都覺得係幾勁有d料到架,不過聽極佢地都係覺得得個嘈字囉!」
唔好以為呢樣野好新奇呀其實佢噉玩法已經玩左成十幾年架喇!另外我懷疑亞視節目後期製作果邊仲有d係動畫人,因為好多亞視電視劇都有用到一d動畫配樂黎做插曲,又係已經差唔十幾年喇!唔知係唔係又係佢搞既呢?
張大導買碟除左買黎聽之外,仲買黎做野用架!真係Pro!
「之前去日本公幹俾其他同事人笑,『個個人黎到都係買衫買盛架啦點會有人好似你噉買CD架!』」
亞視有張大導係度撐住,實在係我地呢d萬年都唔睇一次電視之Metalhead之福!
「嘩原來亞視咁多正野,我第時一定睇多d亞視支持下!」
「咪吹水啦你!」
張大導買碟果陣剛剛撞正老細上黎,佢地吹一吹水之後老細更加想做雜誌。今個暑假已經唔再需要搵工/驚搵唔到工喇。
最後放少少風:張大導話亞視拎左九月歐洲三大盃賽之一之播映權,有興趣就記住睇實亞視喇。邊個比賽?你唔係諗住我會識答你嘛?

今年同叻姐調轉左角色(好耐之後我先明點解我要拎獎學金),平時本來「挑死咪死!」跟住乜叉都唔理擺到明頹玩晒野果個係我,死都要跟住guildline做果陣又驚乜驚物肴晒底果個係叻姐,但係今年乜都唔理果個係佢,怯場果個反而係我!本來諗住見今日都冇考到就索性唔考埋聽日英文,但係未知道唔考會唔會畢唔到業之前又唔夠薑咁勇喎!
「變左喇你!」
我認架呢樣野,不過串我肴之前記住今朝冇去考試果個係我唔係你!出左黎做野係唔同左,而家做親乜野都要顧住後果,因為當你發現好多人都係聽你支笛果陣你講錯/做錯野的話真係可能會教壞細路,所以而家做乜/講乜都要諗過先冇以前咁放喇!噉樣你話好左又得你話衰左又得,不過有得揀就梗係好似以前噉乜都求鬼祈開心d啦唔使諗嘛!


13/6/2003 FRI

唔覺意七點鐘起左身忝!弊!迫住要去考試忝!
今次考試最大節目唔係考試,係研究下份卷同上次基準試前幾日先黎考果份Mock卷有咩分別。係呀每份最少有一半係之前d卷用過,好心就作過份啦唉。
考第一份Reading果陣點解冇人走?俾著我一早就問佢早走啦點解冇人出聲?(結果亦真係到我問左先有人走)下一份卷成個鐘之後先考,時間尚早當然係去食早餐。重開之C-Can真係掂呀!最緊要就係有我呢d頹友最愛之十幾蚊碗公仔麵!呢樣野對我呢d頹廢粗人黎講好緊要!
食完早餐考Writing。基準試果陣佢寫到剛剛好就停,我就寫到停唔到手最後為左廢事冇得早走就夾硬完左佢不過都爆字成倍(冇錯又係爆字),而結果就係佢唔合格而我就拎到頗高分(無論你信唔信都好,「超字最多果個永遠都係最高分果個」真係自然定律黎架)。經過呢個教訓,叻姐今次係噉搏命寫寫左N版出黎,而我呢出乎意料只得版半。一來呢份野冇限字數(不過噉樣其實即係又係超字越多分數越高),二來太耐冇寫過字懶寫,三來我根本就唔想考試好求祈,四來個試都唔知考黎做乜何必咁搏?

是日生意興隆,又有隻新鬼撞左上黎所以話幾時都有野玩,等教院d人話咩「英文增潤」喎不如我批d更期俾你地上黎我舖頭同d鬼吹下水好過啦!
是日一大灰:
「麥記個Boxset賣左!」
都唔知幾多人對呢舊3CD+2DVD Boxset虎視眈眈 - 當然包括我!大佬四舊幾水咋喎(仲「咋喎」!)又精彩到爆,本來我都諗住月尾出「糧」果陣執埋佢,但係而家!不過而家舊野冇左可能係好事,唔使再成日都心掛掛!
是日二大灰:
「做乜附近幫襯開d小食檔全部執晒發生乜事!唔通俾麥記同七記收購左?」
夜晚冇乜人同阿Rock吹水。"Progressive"呢家野真係好野,一隻Progressive碟夠你聽十年你信唔信?梗係唔信啦因為
1. 「Pro...你講咩話?」
2. 「Twins一年都出成十幾隻碟,用十年聽一隻碟點樣緊貼潮流?」
3. 「CD?咩黎?我以為呢個世界淨返Mp3忝!」

夜晚老細上黎放一放風,下星期夾埋有成三批貨到!大佬求神拜佛一定要早過禮拜四到!
期待已久,火車站朋友終於再出現喇!不過上黎只係幫人買野,包括買The Corrs Boxset俾舍妹同幫阿明買Radiohead "Amnesiac"。暫時係呢度我冇咩野想執,不過就算唔係度執都仲有太多野要聽喇。


14/6/2003 SAT

開完工返到屋企就係做呢個英文增潤Portfolio。成份野其實只係得千幾字但係可以做得超慢又係搞到通頂...咦呢份本應係一份「好開心」之功課,但係最後都做到唔開心加冇心機「玩」,我係教院/對教院之心理狀況已經達到一個好惡劣之地步。
擺明玩野架喇份野因為全份野就係得一篇文講「點解我唔交Portfolio?」,內容其實好耐之前已經放過風架喇,不過同教哲一樣最後有好多野都冇寫到。今年所有玩野之功課都玩得唔夠盡,下年係咪應該為左玩野而早d開始做功課?
本來都諗住返教院交再搵叻姐食飯,不過六點先訓即係又唔使起身啦就Email俾叻姐搞掂算數。本來諗住個個人都交幾寸厚之快勞係我交隻Floppy仔俾佢串爆,而家叻姐幫我燒隻CD交忝真係好野。我好想知道祝姐收到呢份功課果陣會有咩反應。

是日生意超超超少,其實有好多客上黎不過都係冇耐就「有事」走左去聽完又唔買野生意真係灰到喊,琴日話會出現果個鬼仔又唔上黎喎!好在都有另一隻鬼上黎去左幾隻救下個市。不過生意多又好少又好我地班友都係噉吹水架喇!是日Messiah結他佬又上黎笑爆咀:
「之前有個有錢仔跟我學左個零月,之後就叫我上門教佢。佢屋企住半山區超級豪宅,我同佢講我冇車上唔到去,佢同我講我可以搭的士上,佢會俾返的士錢我。每一次我淨係上佢屋企都搭成六十幾蚊的士。佢剛剛開始學結他學得果個零月,但係你知唔知佢拎果支結他係咩?PRS呀!個Amp係Mesa/Boogie呀!(冇背景人士唔知咩黎唔緊要,知道PRS&M/B=貴到仆街就夠)佢間房呀成四個我屋企個廳咁大呀!樓底仲要超高喎!仲要落地玻璃喎!屋企仲要有三個賓妹喎!」
夜晚有位小朋友上黎。你點睇佢都只係一位中三小朋友,但係你亦點睇都睇唔出呢位中三小朋友居然係一個結他神童。佢年幾前開始彈結他,跟人學左個幾月之後就自學,靠自己聽同練,年幾之後之今日以玩Paul Gilbertd歌為主(冇背景人士唔知邊個黎唔緊要,知道Paul Gilbert=癲到仆街就夠)。彈左年幾已經彈到咁喪癲架!唔止喎佢仲要係玩幾隊band,而且bass同鼓都有佢份喎!真係痴Q線!我大佢差唔多十年仲係戇居居唔知做乜叉!
最後俾阿明:
「今日唔想上買Cruachan就晒左喇你!今日電梯口檔保險條廁所鎖匙唔知去左邊搞到今日好多姐姐仔入黎搵我地借鎖匙喎呵呵∼」

今晚火車站朋友又搵到幾隻Metal野,不過暫時都唔多想買住,太多野聽喇真係,仲要屋企&部機冇位...


15/6/2003 SUN

今日上完堂上舖頭探一探班,嘩老細將間野大執位,因為開始搞二手寄賣喇!最開心果個梗係我,一來可以擺d碟出黎呢度當倉,二來可以執平碟,三來可以搵Pop野哈哈!
...而家位就執完喇,即係我要搞Email啦?...

今日好早就走左,因為仲有兩度要行!首先係荷理活(原來香港真係有(好多)個荷理活)。開始度度都賣火車站朋友果d執笠貨,呢度仲有好多Metal野忝!仲要好平喎!心水都有既不過唔買住。日後又多一個蒲點。(即係又多個地方添香油)
之後走左去女人街尾檔Tee,一睇就知係賣老翻band tee架喇不過當你見到個價錢可以只係幾十蚊件仲要改埋碼俾你你就會發現
「可以唔幫襯咩?」
係多左款喎今次不過我想買果件得短袖,屋企果四件短袖衫夠我著過世架喇(冇呃你架果四件一日冇穿冇爛我一日都冇諗住買新短袖衫)所以而家淨係捕長袖。但係呢d日子話買長袖衫會俾人指住笑所以都係十月先再會。


16/6/2003 MON

雖然今日冇諗過出街,但係噉唔代表我會肯朝早十點幾起身架叻姐。下次打電話黎果陣唔該睇下個鐘過左兩點未先唔該!
晨咁早俾佢摷醒係因為「唔知邊個講師搞Visual Art要音樂做背景。」有野玩我實玩既不過搵我又未必係最適合,因為我覺得搞"Visual Art"的話電子音樂會比Rock/Metal更適合。不過試左先算,話唔埋可以幫TRHK提高一下知名度...

是日節目執書檯,中七畢業之後(一定唔止咁早!我肯定!)都冇乜正式執過張書檯,再唔執的話下年真係唔使再收新notes架喇(不過其實最主要目的都係執一執果堆已經多到要放地下之CD)。上次小執書檯摷返d小學野出黎已經算小野架喇,今次我連五寸磁碟呢d文物都搵返出黎死未!五寸磁碟都未見過?證明你真係好好好年青!
執完之後發現,d陳年notes(中四五果d都有)係就係冇晒不過張檯一樣係非常擠迫,因為本來係地面上之CD轉移陣地上晒檯面...

呢排報紙成日提到某位舞王,我老豆睇到又小。邊個舞王?請睇返上年十二月廿一日之段記
呢排電視成日出現某位醫生,我老豆睇到又小。邊個醫生?請睇返上年十二月廿一日之段記


17/6/2003 TUE

本來諗住乜都唔做留係屋企頹,點知今日負責睇舖之老細病左即係又係我上場時間。傳說中之三批貨中第一批到左好在今日老細搞埋先走百幾二百隻唔使全部都我上晒真開心,不過老細已經講到明後日又有一批即係點都難逃劫數...
呢排生意都好慢熱,係要個幾鐘一兩隻個幾鐘一兩隻噉去,最後挨到一點鐘先至剛剛好過到千。冇錯係凌晨一點,因為我地大客阿梁生好夜先收工就等埋佢先。佢而家基本上咩都唔聽除左Black野之外,睇佢都三十幾四十歲就同佢吹下水聽下佢個「歌路歷程」:佢開頭係聽d外國band好似Duran Duran,跟住就迷上Disco野好似Village People(我都幾鍾意呢隊基佬band架哈哈),後來聽到悶就轉左去英倫野。果時U2先剛剛出佢地係全世界揚名立萬之大作"The Joshua Tree",佢第一時間就買返黎聽 - 係黑膠唔係CD唔好估錯!不過佢好憎後來"Zooropa"同"Pop"時期電子左之U2不過此乃另話...又聽多一排發現左Van Halen就開始聽Rock野喇,聽聽下呢就(自然而然)聽Bon Jovi(佢都好認同雖然而家Bon Jovi係好唔掂以前之佢地的確係無敵)。聽多左Rock想再行d就中招聽Metal,跟住行d再行d就去到Black野。冇架喇喎再聽落去Metal入邊講行Black已經係最盡架喇喎梁生你仲可以點玩? 睇佢今次十點幾搞到十二點幾先揀得一隻就知佢都聽到盡。似乎跟住會係返轉頭
「聽鬼佬野聽到好悶!聽粵曲喇我都係!」


18/6/2003 WED

今日起左身發現終於可以搵日頹返下乜都唔做咩都唔理真係開心。

今日睇報紙發現有個理大畢業生搵唔到工跳樓死。冇乜特別呀呵其實因為每日都有呢d「搵唔到工青年慘死」新聞(噉都講得出證明香港而家真係好灰!)。但係呢段唔多特別之新聞其實好特別,因為原來我係間接認識事件中之主角 - 跳樓身亡果位理大畢業生係Park Lane某中學同學。千祈唔好俾我係報紙上見到你地呀各位大學畢業生!

今日經叻姐講發現今年Beyond送俾黃家駒支結他係寶華紙紮之首席紙紮弟子阿志幫Beyond整既!呢間寶華紙紮就係我Year 1做GS果陣去左做訪問果間紙紮舖(講左N次都要再講:呢份GS功課我淨係用左兩間紙紮舖訪問就有78分拎B(頭),好多睇N本做N個調查之人都拎唔到咁高分呀!所以成日話「讀萬卷書不如行萬里路」!),而阿志就係寶華紙紮大師傅乾伯之獨子,亦即係阿志就係乾伯之嫡傳大弟子,而阿志唔可以唔做&寶華唔可以執之原因就係同Beyond會搵佢幫手之原因一樣:
「得佢識做佢唔做邊個做?」
你叫而家d紙紮老師傅紮電結他?唔係嘛佢地分分鐘電結他咩形狀都唔知?所以咪要阿志繼續做落去囉冇佢呢d連滑板車跳舞氈都紮到之後生仔係度紙紮界點樣可以緊貼潮流?

今日終於有人發現一樣野:
「你以前d段記好笑d!」
呢樣野我都發覺左好耐!點解?之前日日都有得笑寫野好精警玩字玩到癲又成日有新野玩果個劉義去左邊?我有時睇返之前d段記都會諗「嘩點解我會諗到/寫到呢d野出黎?」不過,點解?


19/6/2003 THU

「我有個朋友當初會考0分,當時好唔開心,覺得自己比人差,但因為佢冇書讀,又找不到工多了許多時間練琴,上年就考了八級,而家教緊琴...我覺得佢出路好過我好多,俾左咁多錢讀大學,到路來都唔知為乜!」
以上係某音樂人其中一段心底話,亦都係教院好多好多音樂人之心底話(係今日之後我仍然聽到好多好多教院音樂人講同一番說話)。呢樣野我不嬲都覺架喇,講真你入得黎教院修音樂的話手琴一定唔會差得去邊,咦我亦都冇乜聽過有邊個音樂人係冇(得)教琴!教音樂可以話係教班之中其中一份最好搵之教職,雖然一定唔會夠教小學咁好搵架喇但係你諗下喎教琴的話嘆好多,本身彈琴樂理去到一定程度又夠頹的話進修呢家野可以慢慢黎,最重要就係唔使再掟十幾萬花多四年讀個唔知咩學位,呢樣野好重要因為你投資左咁多之後出到黎就會發現
「...都係去教琴算啦...」
最後送上是日IQ題:
問:「有乜辦法可以聽朝準時八點起身?」
答:「將個鐘較到八點再拆粒電出黎。」

唉又係我負責搞d新貨,搞左個幾鐘先搞掂果百零隻野以為好開心點知
「聽日仲有二百幾隻黎緊!記住聽日早d返黎!」
係有好多新野到不過d人都係係都唔黎買野係咪吹脹,好在最後都湊夠千幾生意。不過我對聽日生意好大期望因為聽日果批貨大家等左成個幾兩個月,餓左咁耐唔會唔落黎搶卦班人?

冇喇係咁多喇除左開舖又係乜都冇我已經預見到今個暑假會同今日一樣情況。


20/6/2003 FRI

一起身已經超晏,食埋飯未夠兩點就飛身去開舖。算早架喇大佬返到去滿滿一大箱CD等緊我喎真係多到執到夜晚先搞掂晒!好在又係冇人阻住我執貨,最好次次有新貨果陣都唔好有咁多人黎!(老細行緊過黎...)
晏晝係冇乜生意不過我完全唔擔心,因為夜晚有Messiah!輝爺好耐冇見過你蒲頭囉喎!邊個輝爺?咪Messiah個鼓佬囉!我發現佢好鍾意學我,呢排我留長頭髮佢又留,我留鬚佢又留,就好似我踩爆鼓佢又學我玩mute鼓一樣!再夜d有Davy,即係Messiah個結他佬,佢係一位虔誠教徒(教徒又聽Black Metal?),好斯文唔會講粗口(只限阿嫂在場果陣),而且個人好好(「不過咪睇佢個樣咁善良呀佢成日笑騎騎放毒蛇架!」Messiah歌佬即係成日自稱「屎忽鬼」之阿達話)。有佢兩條XX係度就點玩都唔會悶(雖然佢兩條友最後夾埋先買得兩隻碟)。

收完舖就同自加拿大來之Victor飲野。佢上次返係幾時我都唔記得喇淨係知佢好好好耐冇返香港。佢見到我第一句係
「肺炎死咁多人都未到你,有乜理由呀?有d失望!」
人齊之後發現有一個大問題:去邊度飲野?我地呢d市井粗人當然除了麥記都是麥記架喇,但係對出身上流社會之Victor黎講
「挑又係麥記!我果邊都有啦有咩咁特別呀!」
「好特別架!你果邊d麥記冇中文字架!」

佢過埋今年仲要讀多兩年,嘩佢都讀左好耐喇喎都仲有得讀?不過佢間學校正尾二一年會俾工你開拎工作經驗所以下年開始佢有份工做研究,成七十蚊港紙一個鐘一個禮拜做六日每日六個鐘,畢業之後可以繼續做的話仲有得加人工同升職。得啦你千祈唔好返黎!呢d工你係香港想搵都搵唔到呀而家反正你係果邊要生活慳少少皮就夠使,係香港你節衣縮食到極點都只會發現自己冇錢!
最後Victor送上佢對而家香港之評語:
「以前d人節目係去砵蘭街嫖,而家d人節目係去砵蘭街估下『呢條女係唔係?』噉樣估估下都可以玩一日!真係折墮!」

是日係英文Minor史上最灰一日。全班二十個人居然肥左十一個!(我符碌合格呀Victor你又要失望喇)今日成班人上去搵個Tutor理論,個Tutor話
「係噉架喇!得叫你地衰三辨:1. 抄書唔講出處、2. 做唔足指引要求、3. 英文能力差!」
1. 讀左三年教院/大專做過咁多功課,我諗冇人唔識quote書卦?係咪真係咁多人衰抄書我就唔知喇佢話真係查返晒d書睇下我地有冇抄人地d野唔講出處先噉講,你信唔信?
2. 第一堂派果份功課指引話"Use your story and/or other stories",即係其實用一個故事都夠啦?點知而家又話「其實要用多過一個故事」,噉即係同個guildline完全唔同啦講d野?最好野係佢上咁耐堂份功課講都冇講過點做喎!
3. 「英文能力差」之定義原來除左基本文法果d之外,仲包括左「用字簡單」。上年我份英文先俾個Tutor話太花巧所以差,而家反而話「踏實=英文差」?乜學院唔係一直要求我地英文以簡單達意為目的咩幾時變到作文都好似玩雜技要搞咁多花臣?而且如果我英文能力真係咁差的話點解我會過到頭三年?而家先話我差即係否定晒我前三年啦,噉係代表我前三年學d野廢定教院教得廢呢?而且我過到基準但係都俾教院話「英文差」,係咪即係其實教院本身之英文水平已經高過基準呢?按照呢個「英文能力差」之定義,英文《聖經》《創世紀》第一章第一節雖然連小學生都睇得明但係都係寫得好差,因為篇野入邊冇一句係超過十個字,同時冇一個字係超過十二個字母架!
之後班人要求拎功課睇,Tutor話要去搵阿頭問問先,跟住兜左個圈返黎話阿頭唔俾。點知跟住有人立即走去搵發然阿頭根本唔係office而一直都係canteen嘆茶!之後終於講到可以睇功課不過只限下星期一lunch果個幾鐘。嘩睇下份功課都要限三限四,仲要隔幾日先俾睇呢幾日入邊做乜都得啦!仲有喎禮拜三就要交分喎你知道衰乜都冇時間駁!之後班人走左去搵另一個高層,個高層反應係
「我地係經幾個marker睇過先俾分既!唔好覺得合格果九個人好好呀!佢地d英文能力都唔係好得去邊有d仲差過你地,佢地雖然係合格都只係好過你地少少咋!」
連阿頭都唔照我地仲講到出口話我地「廢」,仲有咩說話好講?不過係我地先有事喎同一日有半中制課程都放分,當中唔少人好高分之外係接近冇人Fail!好明顯我地呢d所餘無幾之英文Minorians而家俾人拎左黎祭旗,反正遲d唔會再有副修英文全部都係主修,教院又咁想趕d學生走(報紙都有賣過詳睇下文),死果班就係我地!
另外高層放左風請各Majorians注意:雖然而家你地豁免基準但係遲d呢個福利將會消失,因為而家基本上你冇考基準學校係唔會請你 - 正確d係你冇修過英文都唔會請你,因為制度關係而家小學請人唔係你教唔教到書,而係你考唔考到試(係真係好諷刺!)。我老豆間小學收左幾百封求職信,差唔多全部都未睇過就掟晒去碎紙機,係修英文果d會睇一睇,不過只限睇一睇咋!就算你係主修英文豁免左基準,唔使考一回事人地只會睇你基準個成績!今年就有兩個雖然校內拎Distinction但係因為過唔到基準一樣搵唔到工!因為學校而家之心態順水推舟,又或者係有關當局希望順理成章,相信呢個「主修都要考基準」消息就黎會公佈 - 有關高層話!不過屬寅屬假事實係點還須下回分解,但係相信就算呢單野係流料你地都唔會夠薑唔考基準架啦?
大家都覺得俾人屈想爭取再覆核拎返個合格返黎(連一d途經「靜坐」行列之Tutor都噉講!佢地都唔知發生左噉既事!),但係暫時都冇人想玩大佢。我就覺得反正下年都係要Retake不如就搞鑊杰佢地嘆!單係Guildline唔清晰同導師冇講過功課呢個責任問題已經夠鋤!雖然我都覺得唔會有好大機會拗返個分(睇左頭先你都知道英文系d人點都只會保自己人寧願犧牲學生),最少其他學生知乜事跟住實會有多d人出聲!校長已經話下年所有語文科都會執得超嚴,大家唔出聲下年真係攬住一齊死!估唔到除左校外校內都要搞反動!
講起retake就真係灰。教院為左「提高學生質素」今年開始改制,唔合格科目一定要retake唔淮redo,一年內肥兩科即時retake一年!呢樣野報紙都賣過架,仲要唔係一次而係兩次慌死你唔知!有人就噉中招因為兩個學期英文都肥搞到下年要retake,最無聊係佢重讀一年但係每個學期都只係要讀返肥左果一科英文其他乜都冇得做!如果未改制的話上學期果份redo完合格返的話可能唔使咁灰!(上年主修英文之 漢 肥左英文都仲可以redo救得返)今年佢就做左砲灰!(死喇下年全班英文得我一個男)知唔知最灰係咩?當佢搵Tutor果陣,
「我上年英文肥左,今年都肥的話下年就要retake架喇!噉樣下年我就淨係讀得兩個module晒錢晒時間!」
「噉樣你咪可以去搵兼職囉!」

《蘋果》唔知幾時開始有條友係副刊寫下d生活品味野,寫得唔錯忝架而且內容係而家香港報紙好少會睇得到,好似冇幾耐前Led Zeppelin出DVD,佢就幫隻DVD寫左篇碟評再講下佢對Led Zeppelin之感情同佢地點樣佢聽音樂之取向,係而家香港d報紙都幾難搵到呢d文章喇!如果第時可以好似呢條存友噉有報紙俾一版佢寫乜都得都幾開心。不過其實我唔係太鍾意呢條友寫d野,唔係佢寫得唔好只不過態度上我同佢有d分歧。想知點解我唔鍾意自己茗報啦。


「乜搞到噉?」
返到屋企見到舍妹著到去飲噉(唔係!佢去飲都冇咁誇張!),原來佢今日去謝師宴,返到屋企之後咁耐都唔換衫係因為佢想影留返個倩影就等我返到黎幫佢影埋相先換衫落妝。都唔笑佢喇今次因為怕某d事而唔做某d事的話一生人入邊可以有好多遺憾。就好似今日...


21/6/2003 SAT

今日終於冇貨到喇好開心!雖然冇貨到好在有人到!舖頭終於似返d樣喇今日,睇黎五窮六絕就黎會過好快就七返身!
話說舖頭開始左呢個二手寄賣之後一直都冇咩人黎放野,到左呢幾日全靠Davy同Henry兄當堂多左成棟!知唔知最開心果個係邊個?唔係我老細係我!完全係方便我搵碟!


22/6/2003 SUN

今日除左打鼓食飯放狗同飛髮之外冇出過街。(其實咁多樣野夾埋都出左好多街)。

今個係呢世人最後一個暑假,本來諗住唔飛髮唔剃鬚由佢算睇下會發生咩事(第一件事已經發生左:俾老母勁小),不過最後都係唔得點都要去飛髮(即係順便剃埋鬚)因為聽日要返工(返咩工就等聽日啦)。好唔開心今個暑假第一樣想做既野已經做唔到千祈唔好衰頭衰尾我對今個暑假有點兒期望架!


23/6/2003 MON

「我走喇!」
嘩好突然本來大家諗定今個暑假點樣搞之二寶樂忽然話走仲要係過埋今晚一訓醒就走人。不過佢走都係好事,雖然佢剛剛係香港搵到份速遞但係係而家之香港生活除左挨之外都係挨唔會有好日子過,而家大陸有親戚搵佢上去佢間公司幫手做野賺可能賺得少d,但係係大陸生活點都輕鬆過係香港起碼買CD廿蚊隻先哈哈!祝你好運啦,唔知大家下次見面係幾時...

今日七點就起身因為開工,唔係RA係RA's RA - 幫Park Lane教班帶靚仔做Project。今次教呢間咩華富村某小學真係超隔涉我連「華富村位處港島南區」呢一句都唔知點解,點知原來旺角有van直到咁開心!最開心係唔知點解今日幾十人等車足足等左成四五架先上到搞到遲大到。
呢間咩學校黎點解可以俾成個禮拜d細路淨戚做project乜堂都唔使上?結果班細路就真係擺到明用「唔使上堂好野」之精神去做呢個project - 不過呢個問題只限係我果組出現!全組三男三女兩邊都係噉互小(真係小到出口),組長仲要係最唔做野果個,佢全日做得最多就係叫其他組員唔好做野!人地組d先生可以同班靚仔講點樣做再掟低晒d野俾佢地之後就走晒去嘆世界跟住d靚仔真係坐定定做偈都唔多傾,我對住我班學生果陣真係連廁所都唔敢去,走左的話班友真係分分鐘走晒出學校!(唔好笑呀佢地真係嘗試過噉做架!)遇著噉既學生你點教?當其他組已經傾好晒點做分晒工甚至畫晒圖油晒顏色剪晒紙做晒模型果陣我仲係度幫班粉團睇晒d書然後
「抄呢幾句啦XX!」(個「XX」當然冇出到街啦大佬想死咩)
班友仲要噉樣我幫佢地諗晒野淨係要執下手腳寫下字都唔做/做唔到,成日四個鐘差唔多都係處於原地踏步之階段(原地踏步都冇咁灰,對住佢地我係好似企定定唔郁俾人打噉款)。呢班XX仲要對多兩日喎點算?

靜左一排,英文果邊終於有新進展:班友決定send email俾校長搞大佢!好你地想玩我幾大支持!搞大佢搞大佢搞到全校都知跟住我地上去圍堵英文系再叫亞視黎訪問然後去中聯辦請願再行路上廣州要求人大釋法取消基準試再上Times等全球香港教育學院好很廢最後齊齊冇書教哈哈哈搞啦搞啦哈哈哈哈喎呵呵呵∼

Beyond Beyond Beyond Live in Hong Kong

我冇打錯架,「Beyond超越Beyond香港演唱會」嘛...
七點幾去到紅館已經超多人,當中有唔少係老野同鬼佬忝!個場就例牌好多野賣,海報相集呢d就冇興趣只係想買衫。T-Shirt有兩個款,一款我鍾意前面一款我鍾意後面點算?見咁難諗咪唔買囉呵呵。不過就算佢地真係有我想要果個款(即係A之前面+B之後面)都未必會買因為短袖衫我「已經」有幾件夠我著過世而家買衫我只想搵長袖。
相信在場冇乜邊位未入過紅館,但係我就真係咁大個仔第一次入都唔知笑好定喊好!紅館不愧為紅館淨係個排場已經贏晒其他場館幾條街,最緊要就係d音響好好多!全場超多螢光棒又狂影相,呢d先至似演唱會嘛!(雖然我想睇果隻演唱會係唔應該出現螢光棒)雖然我都有帶相機坐個位又睇得幾清楚,但係最後都係算喇唔影相聽歌算。
Paul:雖然我承認技術俾佢好之人大有人在,但係佢手結他係地上黎講都算唔錯架喇,不過唔知點解佢由二千年演唱會開始已經唔多肯彈solo,一係就唔啡好似《不再猶豫》果段超正solo彈到一半就停左超冇癮,一係就自己唔彈solo俾阿賢彈晒佢,即係阿賢唔係彈得差不過我都係想睇主角彈多d。不過有樣野唔錯就係佢今場Live唱得幾好,雖然我成日覺得佢把聲其實唔係好靚...
強:好出奇:唱到喎佢居然佢一直以黎唱live都唔多掂架!手bass仲好似好左喎有返dsolo先(不過你俾我噉樣玩廿幾年就算我唔係認真練都可以累積到呢個地步),不過下次唱《昔日舞曲》時一係唱舊版,唱新版就唔好跳「舞」唔該。
世榮:手鼓比想像中打得好,起碼多返d過門先,雖然某程度上都係好少&千篇一律,但係當中有d真係編得幾精彩(只限一d)。又係唱到喎有點兒意外,因為佢都係唱live唔多掂果d人但係呢一場雖然唱得唔算非常好起碼好過以前好多先。其實我都幾鍾意佢唱歌好似《命運是你家》,呢首係我愛歌之一,今次佢地冇唱有d失望。個重點drum solod人話好過之前果d有點兒期待,點知睇完之後發現都係唔多掂,一開頭兩隻手分別控制兩個鈸唔錯我好鍾意呢野真係玩得好正,但係對我黎講係噉多架喇。玩完鈸之後佢就玩我阿Sir成日都好鍾意玩果招:左手>腳>右手>左手>腳>右手...呢個三連音drum solo(阿Sir果然同Beyond有緊密關係),呢個可以話係最基本但係效果又不俗之drum solo方式,不過話係基本都唔易打起碼我練左大半年都仲未玩到先。玩完三連音之後就到瘋狂亂扑同瘋狂打跋,通常我睇drum solo都唔多鍾意睇呢兩樣野(打得好/靚例外)但係係呢度呢個環節已經係最好睇架喇。睇佢段solo除左個開頭正之外玩得都唔夠靚,又冇以前ddrum solo咁有火(睇過'96果段再睇呢段你就明,雖然'96果段都唔係非常精彩),不過佢好多歌都一邊打一邊唱算唔錯架喇呢樣野係有d難度架。
黃家駒:其實對佢個「影」都冇咩期望,首先已經知果個係搵人扮,二來我都唔信黃家駒生前會拍過一段片企定定彈木結他最後再整返野招牌手勢,不過算啦心意先係重點。不過見佢地成日都提黃家駒搞到真係好似冇左家駒好唔掂噉...
個台設計得幾好,最後Upplugged Encore果野真係陰盡全場因為佢地搬左去近山腰位置玩,搞到本來坐最前果排變左做最後排!我反而想佢地玩多d慢歌因為佢地d快歌對我黎講係好唔夠行(由我細細個第一次聽Beyond已經有呢種感覺,證明我真係天生要聽Metal),除左Live版金屬狂人(註明係Live版因為佢地live果陣玩呢首癲好多!)不過首歌又拎左黎做片串謝霆鋒。另外我好欣賞今場演唱會之運作,除左等左唔使半個鐘就開波幾準時開始之外,成場玩左成三個鐘中間差唔多冇停過超正&超抵!淨係Encore都有兩次玩左成半個鐘咁滯已經正啦!整體黎講係好正好正不過同心目中之Beyond演唱會仍然差段距離,不過而家之Beyond係冇可能返到去黃家駒時代之景況架喇始終三人同四人係兩樣野黎。而家都唔會計較咁多架喇...
雖然今場係香港演唱會真正尾場但係是晚完全冇尾場feel。希望真係唔係「尾場」...


24/6/2003 TUE

今日對住班靚仔採用另一政策就係咩都唔理俾班靚仔自己做算,結果班友反而做得多野左喎雖然過程中都要小人無數次(基本上每一分鐘小人次數已經係接近infinity架喇)。終於明點解Park Lane話呢份工係
「行行企企架咋冇咩做架!」
你真係擺到明頹得閒小「幾」句就得架喇真係去做的話反而先咩都搞唔到!我愛死了這種教學法不過唔好問我係源自咩學說,因為對住呢班靚仔真係冇得教架喇除左呢個「頹人說」之外你點教法都只會弄巧反拙!丫Final Year Project做呢個題目都幾好喎完全係fit晒我呢d頹友!
做左成兩日班友連個folder都做唔晒(夾埋只係抄十版仔書仲要每版都唔過一百字我都唔知呢班XX平時點上堂做功課!),人地第一日已經做晒壁報板加folder加排緊禮拜六個匯報喇,見佢地又模型又話劇真係灰!不過你又吹佢地唔脹因為d原任差唔多幫d學生做晒野又印晒d野俾佢地,我連點樣去影印都唔知呀唔好話借教具忝喇唉。話說有個同學做北區,佢隔離組做南區由學校先生帶,人地又有立體地圖模型又有旗仔扮導遊又乜叉物叉,佢地就乜都冇得幾百隻字,搞到佢要拎返屋企開ot幫d學生諗點樣做好d(起碼冇咁樣衰先)。不過我就唔會好似佢噉OT架喇因為聽日Park Lane返黎頂返我,我就可以暫時甩難好野!(不過只限「暫時」!)

是日英文果邊風平浪靜冇事發生過點解?聽日報分喇仲唔玩大佢!早知我都唔合格啦,因為如果我肥左到左今日應該全校冇一個人會唔知道
「喂有條搞屎棍反轉左英文系喎!」

當我仍然係咩都唔做諗住乜都交埋功課先算之時,老細已經send晒email講左個網鮮個初步計劃喇!嘩老細真係當左我下年唔使讀書噉!

Lau Sir - Translation, Updating, Reviews: Genre ALL


25/6/2003 WED

是日返教院,節目有四:
1. 搵叻姐食飯
真係準時lunch返到!我做人冇幾可咁準時架除左唔係做工事果陣!
2. 睇成績
好神奇呀!居然會全部合格喎!英文C左不過係俾人屈就預左算鬼數合格就得,IT B左就有d神奇,一來係呢份野雖然做得好「學術」但係我又真係搞得好鬼求祈,二來係我幫人地英文組做果份英文野proof-read之後反而佢仲高分過我拎A-(灰呀令我諗返起Year 2幫 漢 整網頁結果我自己個得C佢有B!)!實係我令到導師對佢另眼相看
「終於有人份功課連串錯字都冇喇!好感動呀一定要俾A佢嗚嗚嗚∼」
GS Method居然有B+,實係因為寫左六千字!2CP我做咁多俾你你唔俾返呢個grade點對得住我!我敢講如果我幫呢份差唔多一個公仔都冇全白底黑字之教材套加埋圖一定有A不過而家講乜都冇用!
教哲居然只得B+,實係因為寫左六千字!可能沈太俾我陰完之後(點陰法請睇返之前唔知邊日)淨係睇頭果二千字就算其他咩都唔改(即係得個前言!),呢個唯一機會都冇埋即係我呢世人點都唔會有A!我對呢份功課都有少少期望架結果搞到噉唉...真係「少少」架咋因為份野「唔夠時間做」之關係真係非常之虎頭蛇尾,所以公唔公開等我諗下先,或者等我再從新編一次先掟上黎不過相信有排等!
GS份4CP大野又係C,我發覺我年年主修最大件果舊一定係超低分架所以我GPA永遠都過唔到2.5!好在今年有兩個B+拉一拉,經叻姐計一計發現我今個sem可能係繼Sem 1之後史上最高(我理得佢有幾高過到2.5我已經笑到喊),唔係因為GS的話可能破到當年之2.82。我本身係好唔妥而家個grading法架需知我成日都拎B尾C尾,點知而家反而靠佢救返我一命!
3. 搵書:
本來諗住搵定七月幾份功課d書,但係睇完分已經兩點幾,叻姐三點就走,仲邊有時間/心情搵?
4. 開工:
臨走前想搵一搵老細睇下今個月有冇咩著落,點知危急關頭佢先唔係度!工都冇得開忝今個月真係灰點挨!


26/6/2003 THU

前兩日Kara睇生意旺到爆諗住今日實冇死,點知今日到我睇就乜都冇成日先得果三四個客入黎,最後自己做數執成棟碟先過到千超灰!老細都話
「你已經冇利用價值喇!你走啦!......no no no I mean你走去做雜誌唔好劈炮呀劉Sir唔好呀嗚嗚嗚!」
夜晚Henry上黎又係執二手時間,四隻百六仲要送多隻抵到爛呀!多謝老細搞左呢個二手寄賣搞到經常都有大量二手碟送到上門俾我慢慢揀!是日買咁多隻都係Industrial野,係呀呢排瘋狂工業!唔知「工業」點解唔緊要你將之前果句「工業」果兩個字改做「跌錢」個意思都係一樣!


27/6/2003 FRI

聽日就黎料真係要present,前兩日Park Lane幾經辛苦先做好個folder加一舊問答遊戲箱仔加多張檯同塊board。最後兩樣基本上半個鐘唔使做得晒,所以即係四日先做到果兩舊野亦即係兩日先起到一件貨可想而知呢班友幾唔掂。今日繼續追隨呢個「頹人說」都唔掂仲衰,班友每玩十五分鐘之後可能會返黎做分幾鐘野(係「可能」咋!),最後真係要拉班友出操場小左兩個幾字先識安份少少(係「少少」咋)!結果食飯前班友搞掂左一個放滿佢地話係「狗」而實際上只係一堆紙同泥膠之「狗狗樂園」裝飾下乜都冇之檯面。勁灰呀人地組組都四五箱野有d仲林到成座山咁高cheap極都有幾萬張粉紙包住張檯丫我地連「粉紙」呢樣野都未有過呀!都唔知班友搞乜!開頭學校話「盡量唔好干預創作」點知後來實行呢個不干預政策果個係班靚仔而唔係我,全部野都係我諗晒班靚仔淨係負責做野橋都冇度過!不過噉可能仲好因為食完飯之後佢地仲要負責個攤位匯報(係呀今日要對住呢班友全日呀幾灰!),但係食飯前先剛剛整好個攤位根本冇排/諗過點搞個匯報,唔係我立即瘋狂一分鐘雞精班叫班靚仔跟住我個玩法去做的話聽日真係到家長黎睇果陣我想像唔到會/可以發生咩事,因為今日當我講完點做匯報之後一擰轉頭班友已經唔見晒走晒去人地d攤位玩淨返我一個俾其他先生問
「咦?呢組d學生呢?去晒邊?」
好在聽日唔係我!Park Lane你明天努力啦我就留返係屋企等出糧!真係血汗錢黎架今次呢幾舊水!

五點放六點都未到就出到旺角,見咁早就上舖頭打下碟釘先。Kara我地幾耐冇見過面?想轉行做Darkwavian就努力啦,不過想變身之前請努力搵錢。
是日Davy上到黎第一個節目係俾人打,因為佢上黎之原因係
「之前拎左四十幾隻碟去信和放,放完之後咪上黎坐下囉!」
有碟放唔預我?邊個話我唔聽d老餅野同Hard Rock野架?打(左先算)!以後你地(所有人都係)放碟(所有碟都係)之前拎上黎問過我先准放!記住!唔係的話再打(左先算)!

是晚節目係反動,原來就算肥一科下年都可能要retake,因為根據教院規例如果一個學年入邊肥一科的話下年只可以修讀最低學分,而Year 4最低學分=十即係就算讀晒都分分鐘唔夠分畢業一定要讀多年!即時將呢樣野揚出去啦發現好多人都唔知呢樣野!(包括我,唔係Phoebe有經驗幫過人處理類似案例我都唔知)嘩係噉就大劑喇英文人最後都係同英文系拗唔掂數(都預左英文系點會唔保自己人?),即係分分鐘成半班要讀Year 5!仲有其他科d人都唔知架呢樣野所以立即瘋狂揚出去!一面宣傳之時又一面搞反動,因為要諗點樣係呢個仆街英文系擺明唔妥我地之情況下爭取到再覆核功課。再同英文系糾纏落去唔係辦法,直接去搵語文系主管搞大佢先啦!雖然今次反動唔係直接關我事(始終我係合格冇理由去玩卦),不過有我呢d仆街係背後煽風點火一定有戲睇請大家放心!

Phoebe深夜落ITS印野,
「乜咁夜落去印?唔聽朝先?」
原來佢係用呢個Staff Account印補習傳單仲要係印二千/2,000/two thousand/er qian/MM張 !幾毒呀真係我都未試過一次過印多過五六十張呀何況好似佢噉樣濫用員工福利!更毒就係個Staff Account係佢同房既到頭來ITS要斬人果陣都唔會燒埋佢果疊!


28/6/2003 SAT

兩點起身即飛去開舖。(呢個開場白出現過幾多次我都數唔到)
是日好靜,見有幾隻新辦到就係噉試碟。當中有隻好Pop好似U2同Dire Straits混合體再加重,我就好鍾意不過估記唔會好賣得,點解?因為d人會嫌POP。哈哈d人成日都矯枉過正為左同人講自己係聽Metal就唔肯聽Pop,連Pop少少之Metal都唔聽。其實你地係為型定為音樂?Pop野當中都有唔少好野架小朋友...(香港果d另計)
是日靜到可以同阿Rock吹足成日水。不過其實都好多人入過黎架因為我地播碟果陣隔一陣就有人走入黎問
「而家播緊係咪(    )?」
呢個括弧代表兩樣野,第一係《新世紀福音戰士》劇場版隻Single,我一直都覺得呢套野係歷來日本動畫中配樂同插曲製作最認真同最有質素之動畫之一,而今日阿Rock就拎左隻野落黎分享下。其實套野咁多野soundtrack我都聽過晒架喇不過擁有就得兩三隻,聽完之後真係想衝落信和執返全套先因為真係好正。播完《新世紀》之後就輪到X Japan,雖然呢隊野係真超級非常十分究極嚴重極度好很出名但係我到今日都仲未認真聽過佢地d野。一播佢地d野就死囉立即勁多人衝入黎問,後來都唔敢播廢事次次入黎都話冇得賣最後俾人打。

好耐冇提及過之「小狗你」論壇終於有機會出場喇!今晚一上當堂笑爆咀:音樂區三塊板封左兩塊,淨返我去開果塊冇事!點解封板?咪就係因為MP3囉!話說班友之前超級張揚地share Mp3,最後上得山多終遇虎驚動到海關介入。唔知關唔關琴日美國RIAA叫人唔好再用P2P事?
封左板之後真係笑爆咀,其他板本來生存就係為左download Mp3同(搵人)share Mp3d人立即過晒黎瘋狂留言搵野,仲要講到人地封板好唔應該,
「唉,無晒老翻,唔通買正版咩!」
真係年度金句!而且條友連老翻同Mp3有咩分別都唔知,買老翻都叫做要俾下錢啦大佬!結果是晚有過半數Topic都係搵歌而唔係講音樂,噉落去真係遲早俾佢地累街坊。不過我又冇所謂反正本來呢度話講音樂但係每一次都係講講下一係就變左吹水板一係就又變成「尋/分XXXMp3」...

英文系對我地之投訴之處理似乎停滯不前唔多班,大家似乎有心搞大佢(又係搞大佢但係好似搞極都唔夠大...)。我係合格當然想啦死果個唔係我喎哈哈(係我自己都認今次我真係抵打!)想搞事搵我就最適合不過請自保先所以適合一回事想搵人帶頭千祈唔好搵我,唔係因為我合格,而係因為俾著我搞的話到時一定會帶領大家轟轟烈烈地幹一番大事然後大家再響響亮亮地被踢出校齊齊先風光後大葬。


29/6/2003 SUN

之前幾堂頹爆所以今堂阿Sir教都懶,今堂成堂就係不斷地打《與我常在》,一首歌都打左成個鐘。梗係啦因為呢首Pop野俾我係噉加Metal Fill-In入去當堂俾阿Sir小爆!即係我都唔想架不過當你發現首歌一直都係咁靜之時候你越打落去就會越忍唔住想發癲架喇!
是日阿Sir放風:
「我遲d可能唔教架喇,可能好快就會走!」
咁灰?佢走左我跟得邊個佢教得咁好?可能真係要投靠Messiah...

上完堂上一上舖頭,有事傾傾。久違了之二寶樂拉成隊band上黎(佢隊band咪就係二寶囉),係呀係二寶樂呀即係禮拜一走左果個呀,佢因為「有事」就落返黎禮拜一再上返去,我硬係覺得果d「事」就係買碟同夾band。聽佢講係上面買碟真係好平,我上次係書城廿蚊隻已經貴左架喇,佢做野果頭十五蚊已經算貴!搵次一定要拉隊上去廣州掃貨,雖然冇Metal但係執Pop野都夠笑死!
是日阿威上黎果陣非常神奇:佢同我地The End Of仲未肯定不過應該會係果位Keyboard小姐一齊上黎!照計佢地應該唔識架喎點解會一齊出現?後來發現原來又係「世界真細小小小」,佢兩個都係住西貢,跟住上網識左之後再吹吹水就發現
「下?乜你識劉Sir架?」
跟住有隊澳門仔上黎,佢地玩左三個月就寫好一隻三十分鐘長之demo,其實當做大碟都得啦因為佢地係玩Raw Black,要"raw"的話使乜執到咁靚順水推舟呢個demo去出碟就夠而且可能效果仲好忝哈哈!人地寧格瘋三個月學好外語,佢地澳門仔三個月學好玩Black Metal仲要碟都出埋忝!阿冷我覺得呢隻碟你會有d興趣,睇老細聽完之後都好似有d興趣幫佢地出碟就知。香港幾時有呀澳門都有喇?
今日有好多保險姐姐去廁所果陣未行到一半已經調頭走因為廁所門口長時間堆滿N個麻甩佬。當中有一個好神奇:當其時廁所門口班麻甩佬已經閃晒得返我同阿Rock,佢行到黎我地兩條友就讓條路俾佢,點知佢差唔多行到廁所門口果陣定左係度大叫
「丫∼∼∼(請用超高音叫出)點解會係噉架?」
...我到左今時今日都唔知點解會係噉架!

探完老細之後就走出去九龍城韻彙,我就暫時冇咩想執住,阿Rock就誤大誤撞地執到張大導話搵左好耐之一隻碟!真係踏破鐵鞋無覓處,得來全不廢工夫呀哈哈哈哈哈!
「張導演你聽住!你搵到仆街都搵唔到果隻野係我手上!精就快d拎三舊水上黎TRHK贖返佢!」


30/6/2003 MON



「生命不在乎得到甚麼,而在乎做過甚麼。」

黃家駒 1962-1993


不經不覺,又一年喇。今日晏晝好大太陽,點知突然間落左個零字大雨(同時有太陽同雨),果陣唔知係咪拜緊?
經叻姐協助,有幸睇到今次用黎送俾家駒支結他同Amp。睇完之後真係驚為神人,真係紮到真既一樣哈哈...祝您愉快