段記

韓留記2015




23/5/2015 SAT

自從《今晚睇李》啟播,外國talk show host紛紛退休迴避。Jay Leno退時冇乜metal友講,Craig Ferguson多少少,因為佢最後個星期每一晚都請Metallica表演,唯獨David Letterman一個喺metal界迴響相當大。意料之內,最後一晚都係Foo Fighters,不過佢退休好多metal中人討論,因為佢係咁多個之中最支持獨立/另類音樂,自己搞埋唱片公司,仲成日請metal band上佢個show做嘉賓。其實呢個list都未算all,仲有唔少冇提到例如Red Fang,唔齊可能因為年代久遠,有啲片已經搵唔到啦。好在仲睇得到classic lineup Black Sabbath玩《Paranoid》。


所以Late Show with David Letterman一樣好好睇,係每晚音樂表演嘉賓猛料得嚟多元化又多驚喜,同佢隊band CBS Orchestra好撚勁,應該係咁多個talk show之中最勁嗰隊,首主題曲full version好鬼正。而家只有靠Youtube重溫了,但呢種典型talk show,始終電視睇至有feel,最好玩係晚晚都等片尾,估今晚會唔會有得睇隊band玩晒全首主題曲?


曾幾何時佢個Late Show係我每晚都追晒十一點幾首播加凌晨兩三點重播至瞓,連會考時都風雨不改堅持睇埋深夜重播至瞓,係我星期一至五晚睇國際台嘅理由。只可惜帶佢到香港嘅亞視收皮時David Letterman都退休,以前成日話呢世人一定要飛一次去紐約睇佢live,而家人生又多一個遺憾了。以前都講過好多David Letterman了,想講,重溫舊文已夠乜晒啦。再見了,我的英文加音樂阿sir。


《告別David Letterman,我的英文+音樂恩師》,2014/4/21

http://lau-sir.com/diary(p126).html#20140421


《Moby與我 a.k.a. 沒有那天晚上的Moby與David Letterman,就沒有今天的我》,2013/10/1

http://lau-sir.com/diary(p120).html#20131001




24/5/2015 SUN

其實本身唔太想睇新版《Mad Max》,一來reboot片十套有七套收皮,二來好多年前套dieselpunk road rage tribute片《Doomsday》唔差又唔算拍得好好,有點保留就持續觀望,但個個睇過都話正特別metal友,好難得今個禮拜多日佛誕假,即係向來禮拜六日都要做足兩日的我終於叫可以放返一日假就出去睇睇,的確唔錯,唔交代好多故事同角色背景但又唔大影響,由頭到尾冇乜悶場,最後場追逐拍得好鬼緊湊,除咗電影公司求祈質堆望落好有霸氣嘅詞彙一齊就當戲名,反而台灣《憤怒道》個副題譯得仲好,我冇乜投訴。


值得入場,導演將一套好(diesel)punk嘅戲拍到好metal,不過個結他佬出場時間唔夠多,同論到今年今年大路戲最metal場面,始終鬥唔過《Avengers 2》入面Ultron嗰句:


「世界末日之後,呢個世界只會得返METAL!」




29/5/2015 FRI


高登名句「X到佛誕」,原來是真的。二月開始跟手頭上個project,本來話三月內搞掂走人,點知一個禮拜已經幾乎做足七日,都可以做多兩個月都做唔完,結果一坐就坐到佛誕,當下個星期一就係product launch,今個月四個星期都揀禮拜五搞show,果然一場都睇唔到,而臨deadline呢個星期五,又回到每次交貨之前Pie & Tart食足全日嘅日子,夜晚收工拎返盒返屋企,仲要個盒係晏晝飯加晚飯。暴君當然冇得睇啦,雖然我承認我更想睇Scandal,只係當忙到全日都起碼七八點至收工、除咗搭車嗰陣唔使做嘢時,Metallica嚟香港都冇時間冇氣力冇心機睇啦。


所以本來諗住星期日睇太極當抖抖。當星期一就係交貨日子時,睇嚟又冇行。而當下星期六Fleshgod Apocalypse去台灣,我今個禮拜六都仲未訂機票酒店未買飛時,係咪真係去到睇,我都唔敢諗。




31/5/2015 SUN


當今個月每個禮拜都有show但每個禮拜都miss晒、當聽日product launch搞到今晚太極都冇得睇、當嚟緊禮拜六已經係Fleshgod Apocalypse台灣站,而我而家都仲未(敢)訂機票酒店,我只有靠去阿信屋同七仔買啲韓國嘢食,去懷緬一下放假的時光。


平時完全唔飲酒嘅我都會買兩罐Cass返屋企飲,證明而家生活幾唔正常,最灰係買完都唔敢飲,驚飲完之後wing咗成日做唔到嘢就大鑊。已經返工返到太唔正常。




6/6/2015 SAT


小紅帽,邏輯失控,暴君,太極,仲有台北Fleshgod Apocalypse X Eye of the Enemy X 兀突骨 X 無限台妹。以上就係我五月到六月頭錯過嘅演出,即係平均每星期一場,但返工返到每個星期都睇唔到,唯一安慰死符碌個客星期五晚要開會冇時間理我,先可以睇到Fleshgod香港場仲要睇得晒全場,只係呢個幾月已經錯過太多。


夢想中的追星之旅,係禮拜五晚請定假睇Flesgod + Ne Obliviscaris + EofE香港站,完show返屋企睇住《大時代》執行李(雖然實際上睇完返到屋企已經一點半),執完沖涼趕三點四機場通宵巴,朝早上機飛台北睇埋6/6星期6晚Fleshgod台北站,雖然興趣在於今次唔睇唔知仲有冇機會喺日本以外睇到佢哋嘅兀突骨。666之後台北留一日再過澎湖拜候台灣各地metal好友,而去得澎湖起碼會留三四日啦,就請足一個禮拜假。


上次去韓國已經忙到臨去機場一刻仲係做緊公司嘢,去到韓國都要用半個禮拜繼續同個客跟,今次都冇預過咁易走得甩架喇,係冇預到由請一個禮拜變到只請到一日嗟,去唔到澎湖算,六月五請唔到假分分鐘Fleshgod成晚去到時真係只睇到Fleshgod一隊又算,只請禮拜一一日,冇問題嚟啩?


問題係手頭上project忙到每日已經只得搭車時叫唔使做嘢(假設個客冇call的話),出發前一星期先拎到護照,去到星期三都未有時間加未敢訂嘢。又咁蹺想去台灣之際達哥dia send封email話去台灣來回機票加兩晚住宿最低六折,一個package最平千三蚊的確幾平,但上落機時間同住房一定唔係好,最起碼你唔肯加多兩三舊水,就預咗一定要夜晚甚至深夜上機落機先。結果都係用開的無敵組合Wego.hk訂機票 + Agoda訂酒店,Wego來回早機至九百幾,Agoda加多兩晚單人房唔使五舊,一模一樣嘅嘢夾埋都仲平過Expedi達所謂最抵價package。


禮拜三晚做嘢時望到見仲有唔少靚機位靚房,但做到十點鐘頂唔順,「瞌一瞌先」,瞌完已經係第二朝七點幾,禮拜四晚再睇已經乜都冇晒,連禮拜一凌晨落機啲垃圾位已經要千四五,就算唔住得好單想早機去早機返已經要差唔多二千,仲未計Fleshgod飛錢。一晚之間價位可以浮動咁大,即係唔使去台灣啦,反正唔去澎湖只留多台北一日意義已經唔大,而去唔到台灣連星期一日假都唔使請,反正喺香港的話,唔落場都俾人send爆email call爆機架啦。睇到Fleshgod香港場已經要感動架喇,睇完就繼續返個客度捱驢仔啦。


收工行去HA,見到aPM有新廣告,今個禮拜日有韓妹嚟喎,既然星期六去唔到台灣,係咪禮拜日要嚟捧吓場呢?(唔好玩啦,禮拜一到五已經aPM朝九晚八,連放假都係返嚟aPM,會癲架)(同我硬係覺得Tara其實唔會蒲頭嘅,到時嚟到個「拍手會」原來見唔到佢哋咪灰爆)




9/6/2015 TUE

點解大時代可以拍到咁灰?臨尾飄晒雪加多首《容易受傷的女人》,雖然整個飄雪景又真係刻意咗少少,但首歌加埋加埋最後首尾呼應、迴光反照,個意境真係形容唔到。所以你話藍潔瑛唔係拍《大時代》拍到個人癲咗,係冇可能嘅。




10/6/2015 WED

Fist in Fetus the one & only eponymous EP
full download@Mikseri

http://www.mikseri.net/artists/fistinfetus.67079.php


唔知幾耐未試過放工會見到太陽,甚至返到屋企個天仲未黑晒,今個星期終於可以鬆返一鬆(因為個客都同我一樣開始放慢個project了齊齊hea),多返啲時間聽歌同寫嘢。Fleshgod Apocalypse場show唔寫喇,不過見咁難得有classical/symphonic death metal樂隊嚟香港表演(NO同FA live真係太正),就encore講吓一隊芬蘭symphonic death啦。


Fist in Fetus睇個名唔會諗到音樂會咁過癮,其實好pop大量位一聽就知係芬蘭melodic death,但thrash death鬥一大輪solo之後又可以變做好epic嘅交響底grind death,變吓變吓啲歌鬼死咁長,兩首長歌其實野心大咗少少搞到有時隊band自己都唔知自己想做乜,但呢隊嘢種玩法,我就真係未見過有另一隊band似,真正獨特,可以最pop到最extreme到最prog都有,佢哋應該會同Dan Swano好投緣。


錄音都相當indie,我好鬼受呢種爛爛地demo feel聲,相比之下我受呢隻聲多過Fleshgod添,其實我唔太鍾意Fleshgod轉玩symphonic death之後啲錄音,《Agony》都叫接受到只係太電太人造執得太多,《Labyrinth》就直頭,其實隊band係咪到出碟一刻都未諗到隻碟應該點mix?




11/6/2015 THU

[粵配]TVB將於8月起停止所有美劇及電影粵語配音@高登

http://forum1.hkgolden.com/view.aspx?type=CA&message=5885935


如果真,無線唔死都冇用。無記配音組咁多年嚟都係冇得頂,配音員聲靚感情豐富(睇《Bones》就知,入面成班鬼老牛聲,無記配音班靚聲好鬼多,聽慣真係返唔到轉頭聽返英文),對白譯得正間唔中加啲地道嘢,同幾年前開始角色譯名唔再直接音譯而會改好港式嘅中文名,除咗角色係鬼佬鬼婆之外,一切都好親切好本土劇feel。而因為咁出色嘅翻譯同配音,好多師奶慢慢捨棄翡翠台,每晚轉去明珠台開Nicam睇呢啲鬼佬演嘅中文劇,因為無記自拍堆劇根本連比嘅資格都冇。


你話無線點會唔知,所以傳聞嚟緊明珠台英文劇唔會再有中文配音,除咗貫徹無記一向縮皮精神,仲點會冇政治目的吖。如果明珠劇冇中文,嗰班冇得聽中文要睇字幕就唔會睇嘅人e.g.師奶自然會轉返去睇中文台,我老母就係其中一個,所以嚟緊唔再幫英文劇加中文配音的話,真係非常非常毒的一招,擺明就係迫懶聽英文或者根本冇中文唔睇嘅人/師奶轉返翡翠台谷收視。


最少而家仲有高清台J2台,我老母暫時仲會寧願轉呢兩個台睇韓劇都唔睇翡翠,但之後你同我講,無線夠薑到所有外語劇都唔配中文,只得翡翠台啲劇至聽到中文,我唔會出奇。




12/6/2015 FRI

10 Insane Facts You Didn’t Know
About Christopher Lee@WhatCulture

http://whatculture.com/film/10-insane-facts-you-didnt-know-about-christopher-lee.php


Long live the Metal Mage。其實八十幾歲人先嚟玩metal,已經係Christopher Lee最唔metal嗰瓣。噉嘅人生,邊度搵?




13/6/2015 SAT

《大時代》最後個禮拜真係超好睇,星期五晚電視追完大結局,要上網再重溫臨尾五集至夠喉。雖然舖排係兩家人鬥股票,實際上同股票有關嘅時間唔多,而且四十集入面真正講技術只得鬥江毅火燒連環船一段,其他全部都係等運到、估估吓、靠靈感同繼續等運到,劉松仁、劉青雲同鄭少秋三個都係(劉松仁對賭之餘大手入貨當後著,都叫有技術嘅)。作為一套股戰片,到頭來所謂大戰都只係玩買大細一人買一邊睇最後邊個買得中,老實都幾吹脹,即使現實的確運氣好多時比任何因素更重要,你睇幾個大角色有幾多鑊唔係靠符碌贏人吖。加埋講運氣講運勢之餘又講後台講最緊要有(家)人撐,劉青雲唔係老豆種樹,又點請得郁三大有錢佬俾佢乘涼?其實《大時代》係比蔡加讚早廿年嘅「成功需父幹」教材。


但神劇之在於神,就係擺明唔跟本來條路走亂咁行,都唔會話唔好睇。《天與地》仲差少少,因為講夾band點知中間十幾集變返典型無記劇式爭女爭錢,夾硬拖長同偏離主題回到規範;《大時代》得頭同尾講股票,中間其實係兩家人一家點樣惡一家點樣慘,仍然圍繞家族世仇主題,加上拍得好好睇可以好笑可以好慘,就係唔會悶唔覺婆媽,而且成套戲差唔多人人都好戲到癲。好多嘢甚至有點膠,好似大奇蹟日間港交所成座香港對不丹嘅大球場噉款,丁蟹第一次買馬用十蚊贏兩千幾萬加架Benz返嚟,再跟住未掂過股票落場就贏幾億,其實拍得住而家無記劇咁膠,但配合返套劇氣氛同角色,又會話唔係咁黐線反而唔夾添喎。


做得神劇,就係可以令你對入面嘅缺憾同錯失,通通不經意忽略或盲目接受。只可惜當連無記而家十二點幾重播都只播得到一個cut版,仲要cut到大結局全家跳樓一個鏡頭都冇,睇嚟只有失傳的錄影帶版先至睇得到足本,而冇cut咁多版本例如最後一集有得睇跳樓,要靠上大陸網先睇得返,係咪搞笑先。不過算啦,喺今時今日嘅無線,仲可以聽到咁多句「收皮」、「仆街」同「shit」,已經叫賺到架喇,第三十七集好似一集爆過兩次「仆街」,嘩幾撚震撼呀,你唔係諗住潮拜愛回家有得聽呢啲嘢吓話?


無記深夜播舊劇唔係新事,但《大時代》應該係最成功一次,有幾可試過凌晨睇電視啲廣告會仲多過黃金時段,多到廣告夾埋仲長過成集劇呢。如果食住個勢的話肯定大把人繼續捨命陪煲劇,只可惜而家嘅無線,播啲劇又唔可以太政治、又唔可以太doom、又唔可以太令人懷念九七前嘅香港,真係冇乜好揀,起碼鄭少秋系列全線悲情劇唔會有得播,《誓不低頭》講香港地黑社會黑警有錢佬玩晒,你話無線敢唔敢播?都仲有好多選擇,如果跟住係《馬場大亨》再接《創世紀》,真係嚟緊一年唔使旨意有得早瞓,點知不能太doom不能太政治不正確的情況下,揀播周星馳。終於可以早瞓,同又冇開電視睇翡翠台嘅理由了。




14/6/2015 SUN


而家世界真係難撈,繼之前見聖安娜有得賣午餐肉,屋企行遠少少間麵包舖,好耐之前賣埋雞蛋雜貨之類,跟住同隔籬間茶記入貨午市做埋焗飯焗意粉,唔好笑呀,我好多時禮拜六日lunch同晚飯就係靠佢架喇,因為好抵食。


曾幾何時我好自豪住土瓜灣九龍城舊區,因為食真係好平,我屋企對面屋村樓下兩間茶記,有一間個茶餐由我讀小學賣到而家都係沙爹牛肉麵加客茄汁豬扒薯條加杯餐飲,廿幾年嚟加價加到今時今日仲可以$28埋單,簡直平到黐線,因為同村另一間茶記下午茶叫個公仔麵加杯嘢飲已經三十幾蚊,行出村普通茶記食個碟頭飯都四十幾啦,廿八蚊有咁豐富大餐食,仲邊度搵得到?


只可惜呢個年頭街坊平舖實在太難生存,繼幾年前老人家$80正常價$120個醫生做唔住,今日lunch諗住食返個茶餐先知間茶記執埋,剩返隔籬食個公仔麵都三十幾蚊間貴舖。冇茶餐食就去頭先講間麵包舖啦,雖然唔順路要行兩個字過去,但有$25焗肉醬意粉同$27焗豬扒飯兩款,而且真係茶記水準大大盒好好食,好多時我lunch買其他嘢食時,都會特登行過去買定一個夜晚整返熱食,加多罐$5 Pokka咖啡,三十蚊就有一餐好食加食得飽,而家出去其他區茶餐廳,下午茶都做唔到呢個價或呢個份量啦。點知今日去到話而家已經冇再做我好鍾意食嘅肉醬意,得返廿七蚊個焗豬扒飯,仲要因為入少咗貨所以每日一拎出嚟賣立即話咁快搶晒,今日我嚟仲買到尾二一盒叫好符碌,而如果想加埋嘢飲的話,就一定要三十幾蚊至搞得掂喇。


望住麵包舖焗豬飯收據,我睇唔清香港未來。乜而家連想正餐時間喺舊區三十蚊食餐飽都咁難?




19/6/2015 FRI

http://youtu.be/AQxgjisODZE


笑到仆街,琴日立法會單嘢仲柒過四萬五放888條傻仔。其實而家都好想知,點解可以臨投票先嚟成班人走晒出去,仲要走淨八個唔知乜事又唔(敢)跟大隊繼續坐低投票咁柒?人急生智都唔會諗得到呢啲絕世好橋出嚟啩,仲要諗到出嚟唔會真係有人唔知頭唔知路就跟隊走咁戇鳩啩?


而如果想更柒,其實泛民一見到班人走晒立即全部投贊成,跟住28+8票贊成0票反對都通過唔到,就過癮了。




20/6/2015 SAT

當年冇去戲院睇《殺破狼》第一集係個遺憾,冇預過第二集會好得過單睇cast已經冇得鬥,但《殺破狼II》拍得出另一種好睇。作為一套武打片,今集打戲係非常之少,好在文戲唔叫悶有啲嘢睇古天樂終於有一次交到戲,可惜劇本cliche地大量有有咁啱得咁蹺造就最後大團圓,搞到睇完唔太慣,因為第一集有兩大經典,一係甄子丹同吳京後巷鬥兵器一段唔度招真打,二係洪金寶殺死甄子丹點知累死埋自己結果人人都輸個結果,好少可睇得到呢種負面結局,所以今集好夾硬整個good ending出嚟,其實冇乜癮。


打戲拍得唔錯同玩唔少tribute,上集甄子丹伸縮警棍鬥殺手吳京短刀,今集吳京做正派就用警棍勾棍對殺手雙小刀,擺明俾佢威返次。中間監獄暴動又要用《拳霸》式長鏡,最好睇梗係張震型到震行步路都型過人,冇洪金寶咁有霸氣都說服到吳京加Tony Jaa兩個加埋都唔夠佢打,加上冇上集咁爛仔交feel玩返花巧招數,係幾特別好似最後三個人唔同風格,不過令今集打鬥場面硬係差噉份力度同霸氣。


論戲的話,雖然尋常警察鬥黑幫打打打的第一集都冇乜好講,既然今集打算重文輕武,應該兩個主角加古天樂之外其他人都俾多少少戲做,而家打得唔多之餘好多角色又冇交代,好似張震只知同古天樂有關,個雙刀殺手只出兩場一場殺人一場俾人殺,連對白都冇仲路人過上集嘅吳京。好多導演拍動作片都硬係想講多啲劇情寫多啲角色做到好似唔膚淺,今次只好危危乎地文戲拍得唔悶(個泰國妹同香港低B艇家仔火星文溝通一段係幾好笑嘅),但仲有下一集的話,真係寧願只圍繞一個簡單主題做中心用返打鬥做重點,我入場都係想睇打打殺殺嗟,唔係睇溫情片藝術片呀。


http://youtu.be/Aub--3dnA9o


套戲叫穩穩陣陣中上水平,同第一集一樣非常值得入戲院睇。片尾反而有少少驚喜主題曲幾hard rock,編曲有嘢聽吓尤其臨尾段drum solo,只係歌佬把聲都係唱唔起。其實一直以嚟香港都冇邊個流行男歌手把聲唱得到rock,可惜生意角度,班老細又唔會肯請真係識寫歌加唱到嘅indie band去做主題曲。結果只搞到首歌同套戲一樣,有點稔。




26/6/2015 FRI


其實今場真係浪費咗。窒息係一隊非常非常高水準嘅樂隊,等足十幾年終於嚟到香港,難得的old-school thrash,同一晚冇撞show,仲要有秋紅有Synergy兩隊勁band做opening,而且佢哋live同隻新碟一樣,正到黐線。點知,可能真係太趕,咁大場show只得兩個禮拜唔夠時間宣傳;又或者唔撞到正一回事,好多人都打算只睇跟住一晚Hidden Agenda同蒲吧兩場metal fest;所以見到網上迴響算大,點知人數仍比想像中少,始終都有點灰。


Synergy好睇(你懂的),但今場只得玩「新歌」時全隊band至達到最佳狀態,另外幾首都有點亂。同之前寫歌有時太刻意做到好Opeth好progressive,所以新歌走返最簡單直接嘅直衝鬥solo路線,就成為佢哋其中一首最佳作品,因為老實,live首首都玩六七八分鐘不斷變嚟變去,就算聽開一班都未必必次次啃得落,更何況本身冇聽開隊band甚至冇睇開band show班人?多返呢類快歌,live會好睇得多。