段記



1/12/2014 MON


知唔知點解Clockenflap 2014閃靈出個台叫Your Mum?因為直線相隔幾十米就係文青台,佢哋表演時隔籬經常有人大叫


「細聲啲呀你老母!!!」


今年係七屆以嚟第一次睇Clockenflap,或者期望有點高心態亦不太同,作為香港全年最大音樂藝術節,老實內容同製作質素比我心目中差得都幾遠,上面只係其中一個不足,而我第一日第一刻已經中伏。去過西九都知有打對角兩個入口,主辦單位編咗一個職員同樂隊用,一個觀眾入場,但完全冇指示邊個打邊個,我係去到樂隊入口個閘口,俾埋人查飛,跟住叫我等陣等咗幾個字,先至有人同我講「你應該過去另一邊個閘入場。」然後話五點開閘,點知遲咗差唔多四個字至放人入去,你知由碼頭行入去條路已經唔係短啦,中間仲要俾人摷吓袋check吓飛,夾夾埋埋又冇兩個字,最過癮係第一隊band五點開始玩。唔緊要我本來計劃係第一隊睇Thud,又是過癮,唔係話五點九至開始咩,我去到佢哋個台先五點半左右嗟,點解隊band已經玩咗一半?唔計記者連我在內都唔知夠唔夠十個真正觀眾,要一隊好band對住塊空地表演,見到都灰。三日以嚟經驗係時間表其實冇乜太大意義,已經試過唔止一次時間表內容同實際情況完全不符,早知係噉我禮拜五就唔使特登請全日假四點未夠就過到嚟,反正結果都係差唔多七點至正式有嘢睇,我呢期又中港城返工咁近,早知就六點收工至過嚟好過啦。


(話時話,本場刊勁厚超落本,跟場刊張flyer個時間表畫得幾靚幾清晰,點解全部設計官網都見唔到?網站個時間表第一個版本直頭好似中學生做功課完全睇唔到幾點咩台邊隊打邊隊,跟住改咗設計好少少雖然依然樣衰,作為咁大個音樂節,呢方面會唔會唔夠專業呢?)


話晒搞咗七年,由免費搞到而家幾貴飛都有人制,香港難得可遇之強大班底自然是賣點,不過為拉觀眾入場可以去到好盡,為求一網打盡有乜band肯嚟都搵晒先,結果反而多band得滯,最多人鬧係幾乎全個fest最多人想睇嗰五六隊band全部排同一晚出,仲要係好多人嚟唔到嘅禮拜五。冇錯牌面的確精彩,聽實Q講最後一晚單大台睇The Flaming Lips已經爆場12,000人,仲未計其他台人數,之前兩晚情況相信亦差不遠,場面十分墟陷,問題係此情此景係靠犧牲堆砌出嚟,好似第一晚要我放棄Mogwai睇閃靈,最後一晚又要The Flaming Lips同張懸之間做取捨,睇時好爽,但之後硬係覺得蝕咗唔開心,編排實在唔太理想。


要解決編排問題唔係冇辦法,一係加台囉,不過環境所限唔太可能,而家只三個台都已經咁鬼迫,眼中是The Raveonettes但耳中是Shepherds the Weak確係幾超現實,加上其他所謂細台即D場只得帳幕仔,台係得咁多架喇。另一個方法簡單得多,台與台之間協調咪得囉,三個主要舞台分別運作個方案幾好,主台Hardbourflap專做大band,Replay走文青同party路線,Zippo一向極力支持地下樂隊,所以佢哋主理個Your Mum Stage音樂多元化之餘,亦係全場音樂而非音量最嘈一個,好似第一晚Shepherds the Weak然後閃靈,中場播Pantera,其他台邊可能見到?只係同樣聽落好理想,現實兩個細台感覺好似外判出去做,而主辦單位同兩間「外判商」冇乜協調,搞到成日三個台一齊開波然後一齊完,結果全個fest做得最多就係等下一輪三個台一齊開場,同每一晚都係只能魚或熊掌的抉擇。點解唔會大家傾好先,一個台表演時另一個準備,到A台節目完大家就可以立即趕去B台睇下一輪?而家搞到好似比賽噉,三個單位同一時間開show鬥邊個台多人睇,而唔係齊心協力搞好一場音樂節。更大鑊係除咗Harbourflap每晚重頭戲真係稱得上靚聲之外,其餘九成節目音響都係非常唔掂,點解咁多soundman鍾意係唔係都推爆bass,推到除咗低音乜都聽唔清楚,再震到台前冇人敢企至開心?事實是上年自由野大台,古典鋼琴民歌搖滾hip hop blues hardcore乜風格都有比Clockenflap更廣泛,但全日冇任何一個環節你覺得推聲推得差。Clockenflap規模是有國際水準,但製作上仍需努力,作為一個大型音樂節音響卻幾乎不合格,是很大致命傷。


你話因為Clockenflap唔係單純音樂仲係藝術節,幾乎每兩場show中間都有成個鐘你消磨,係俾你多啲時間去其他細台如D場同藝墟發掘,我認同,好似令我有機會睇多次《打轉教室》,同Replay Stage睇完Rodney Branigan嚇親之後跟佢過隔籬酒吧草坪細台睇多次,的確呢份找尋驚喜先似睇fest,只係當你時間表已編得唔係好又成日唔跟住個表做嘢要人走嚟走去撞彩,搵到有嘢想睇但好多人都係圍埋大聲吹水嘈住晒(屌你老母睇Tenacious D時前面條仔擺明唔係睇show純粹溝女,傾偈把聲仲大過台上Jack Black,阻撚住晒到連企我側邊條女都頂唔順屌佢老母),消費又高食細細隻熱狗都收你五十蚊飲杯汽水又二三十(大佬,我去Summer Sonic食嘢都唔使呢個價位,仲要相同價位係食得飽唔係只夠揳牙罅),咪搞到唔係成班人嚟玩只一個人一心入嚟睇表演嗰班越行越冇心機囉,所以我睇完頭兩日頂唔順,禮拜日瞓到兩三點至起身,都冇覺得冇睇半日好傷,因為已經當咗五點甚至七點至係正式開場嘅時間,遲啲嚟仲可以出面食餐飽至入嚟慳返筆。同其實主辦單位自己都有意無意將音樂凌駕其他啦,正如宣傳重點之一家庭樂一家大細都有嘢玩,但係個遊樂場好細而且唔多設施玩,仲要同D場迫埋一齊有時嘈親班細路,而且冬天個天黑得快,但家庭區係完全冇燈,基本上六點已經摸黑冇得玩冇得搞藝術,結果咪又係趕晒全世界去三個大台同幾個D場帳幕,冇得俾你同班細路開開心心去公園玩,理得你班老豆老母同小朋友死?


第一次睇Clockenflap,印象真係麻麻,又衰唔晒,始終政府最大德政就係西九劃咗塊地咁多年都完全冇作為,大家先可以幾年嚟有一大片空地加無敵海景做咁大場音樂藝術節,只可惜似乎呢個政府永遠唔會做啱嘢,跟住西九就會封兩年,好難再搵到個同樣咁靚咁好景地方了。而且呢種場合鬼佬一定佔最大比例,而多鬼佬就是好一向是文青指標,亦即係肯肯定呢個禮拜五六日大把文青囡囡同國際學校學生妹。同唔係有Clockenflap就唔會有一個俾Zippo打骰的舞台,唔係有Your Mum Stage閃靈X國樂團呢個組合冇乜可能嚟到香港,雖然只出得全場最僻最細個台、雖然音響真係撻晒Q,睇閃靈真係好好feel,因為佢哋份態度同成個Clockenflap相反完全唔離地,同個細台一樣接近民眾,呢一點佢哋之外只得唱到俾人cut show(好似係)的My Little Airport做得到。但係呢份腳踏實地,你都估到,只容得下於小台,對主辦單位嚟講,講到metal只有Tenacious D之類至叫入流上得大台,作為一個metal友,呢張圖道出晒我對Clockenflap處理(indie) metal的感想。亦相信之後唔會有咩大改變/進步。




韓留記2014



9/12/2014 TUE.韓留記Day 0


問題:張相有乜特別?答案:之前幾次飛都係大力水手炸雞送最新一期《進擊的巨人》,今次淨係叫雞,冇計中文版一季先出一本,上次十月去睇Loud Park至出新一期冇耐,點知年底又要飛,急到等唔切。不過唔緊要,再返到香港時應該有得睇下一期了,因為今次有排飛。


如果你同我講,劉Sir份人唔係返工同睇show都唔想出街、出街遠過觀塘油尖旺已經嫌辛苦、做嘢又頹,但係會半年內飛四次,仲去外國做嘢坐返起碼一頭半個月,我自己都唔會信,但結果兩樣嘢都發生晒。唔係全無先兆,老細一早講咗總有一日會派我過個客韓國開個新場,坐返個零月就梗,分分鐘韓國全年最凍幾個月坐晒坐到停埋雪至有得返香港。起初話二月中農曆新年過去,跟住一月,然後十二月底,再十二月中,再突然急到前個禮拜中話半個星期後就出發,好在最後個期延到月中,俾我留多個半星期喺香港,先可以睇到今年最後一場metal gig Revocation@Hidden Agenda,同睇埋《Agents of S.H.I.E.L.D.》同《The Blacklist》大結局至上機。分別好大架,Revocation同In Denial live真係超正,錯過的話會繼Origin之後再度後悔成年(但而家HA做聲的確唔及以前矣),同兩套劇都係睇到最後一集先冇得睇咪好灰?


雖然都要錯失大半季《The Mentalist》同《The Good Wife》,下星期開始做《The Flash》又即係全季冇得睇,而且十二月冇metal仲有好多正gig,好想去Hidden Agend衝Pisco台呀,King ly Chee十幾隊band mosh足全日場fest睇唔到,怒人又我飛咗先至有show,錯過好多,但轉換環境都好。一直以嚟十次「旅行」九次實際上都係去睇show,更多地方唔係有得開公數絕對永遠唔會去,好似一向冇諗過去韓國興趣比日本更低,韓國菜除咗韓燒一味完全冇嘢啱食,景冇乜想睇,show的話日本更多更大更吸引(話對日本冇興趣又每年飛兩次,都係為睇fest嗟),冇公司津貼我過嚟,我相信成世人都唔會飛韓國,更加冇乜機會試一條毒撚喺首爾過聖誕過新年,改變一下可能係好事,而且話唔埋一個唔覺意真係坐到過晒兩個新年至走,俾我就到三月頭過東京睇Judas Priest或者Thrash Domination就爽了。


係,去到天涯海角,到頭來最關心咪又係有冇show睇?話就話喺好比首爾的旺角之明洞區返工,但band scene同livehouse冇我想像中熱鬧,同發覺好難搵到呢邊近期有咩演唱會,都衰唔晒喎最少俾我發現去到第二個禮拜六日已經有場兩晚metal fest,個場又近坐半個鐘火車就去到,仲要冇見好多年嘅Method有份出,雖然佢哋好似得返bass同鼓佬仲係上次嚟香港個班底,其他已經轉晒人。唔知好彩定唔好彩,因為頭兩三個星期肯定忙到日日都要落場坐足全日,分分鐘到時明明隔籬已經有fest睇都要望poster輕嘆,而且有時間去都唔知點搞,韓國啲網仲衰過日本,大家一樣全部冇英文,日本起碼有中文字俾我估估吓,韓文就真係識條春咩,我睇咗個網成晚都未研究到點買飛。唯有希望到時符碌睇到啦。噉當然,最想睇嗰隊始終是傳說中的「泡菜Babymetal」Pritz,口桀口桀(唔係講笑,佢哋下星期二首爾有show出,不過一程路已經要個幾鐘好叉遠仲要平日晚開,同又係唔知點買飛...)


以前唔係未試過出國返工,但做嘢加埋玩兩個禮拜已經好盡,今次係第一次離鄉別井超過一個月,我仲未預計得到會發生咩事,會24/7日日坐喺個客度冇得玩,定逢夜晚逢星期六日就係一個人出去大風雪中forever alone,還是同香港一樣匿埋酒店房毒足咁多個禮拜呢?諗返謝安琪最新兩隻碟都未寫,呢幾個月返工忙香港又發生咁多事,離開一下可能終於俾到我時間同精神寫好佢。但係去到韓國真係會點,就只有聽朝之後至知道了,而家我只知搭凌晨機架機唔好坐的話好難瞓得好,仲要一落機就要開工冇覺好瞓的話好辛苦。





10/12/2014 WED.韓留記Day 1


去日本同韓國,連機場都好多好嘢睇,唔係講女(大韓航空啲空姐真係唔掂,但一落地啲海關同地勤完全兩個層次),而係人哋機場成日都會有音樂會,揾啲歌手或者樂手樂隊表演,等你等上機都有娛樂唔係只得行免稅店一味,仁川機場今期聖誕匯演直頭起大大個台加大量嘉賓陪你過聖誕。機場咁僻都肯落本搞咁多嘢,香港地比人話係文化沙漠就是應份的。




成世人第一次嚟到韓國,山長水遠加天寒地凍,隆重其事的第一餐,又係食麥記,吹咩。我都想食好啲,但琴晚一點上機再今朝五點落機冇乜時間瞓,同唔知點解咁多凌晨機鍾意全晚唔熄燈,玩嘢咩成晚光璨璨點瞓呀。


落地已經冇乜精神,仲要兩隻篋一大一細加多個大背囊,全部裝爆晒4Xkg上身,都算,然後發現韓國啲地鐵站個個都幾層樓深之餘差唔多完全冇電梯!抽晒全部嘢上到地面時雖然只得負幾度,已經熱到連褸都除埋幾乎捲埋衫袖,初到貴境就嚇親各位包到陷晒都凍到震的辛奇人。上到個客度掟低晒啲嘢之後,唔掂反正都要落樓下七仔買雜貨架生,見隔籬係麥記好啦就你啦。


原來韓國麥記都幾貴吓,香港早餐已經唔平佢再貴少少,正餐一個套餐閒閒哋要六七千圜即係四十幾蚊起,雖然都有兌返港紙廿頭的窮撚餐,整體仍足夠令你覺得香港麥記原來是亞洲良心。本來諗住求祈算但原來韓國麥記早餐有獨家嘢,就係呢個Mc9卷,根本就係麥芝蛋包餐走包,再將全部餡連埋塊薯餅塞落Subway個百味卷入面,一啖就可以咬晒全個早餐,真係虧佢哋諗得到。而且幾平喎先1500won即係十蚊港紙左右一個,唔包嘢飲唔緊要,隔籬便利店呢款咖啡做聖誕優惠買一送一900won兩罐,而且好味飲落似Pokka,加埋至十六七蚊港紙抵到爛,香港都食唔到咁平啦。而且個Mc9卷又真係幾好食的。


所以我預見到,嚟緊十個朝頭早,應該有九朝個早餐都係差唔多款。因為韓國真係冇乜嘢我有興趣食之餘,其實想搵平少少又食得飽嘅,都幾難。好似今日lunch行咗大半個鐘都諗唔到食乜冇乜菜式同價錢啱心水,結果走去買麵包算,執咗兩個包加一個芝士蛋糕,冇乜留意價錢,就出事了,三件嘢埋單,收到我差唔多成萬won。




頂你,諗住收工之後返房瞌一瞌嗟,醒返已經十一點幾鐘,晚飯都唔使食直落宵夜場,附近乜嘢食都閂晒得返間酒吧,去日本時咁恨餐餐食便利店吖嘛,恨到啦而家韓國第一晚唔食便利店屎都冇得你食呀。


好遺憾韓國便利店遠不及日本,可以行兩條街先搵到一間仲少過香港完全唔便利,同唔使諗即炸炸物喇我行過附近咁多間只見過一間有蒸糕包其他乜小食都冇,好在有樣好過日本就係成日都大量買X送Y大劈價,今晚食杯麵2200won三個再加800won兩罐咖啡,廿四蚊港紙質到飽。


香港時成日阿信屋食芝士撈麵,過到嚟韓國又係食佢,係咪見到有啲唔妥呢,冇錯可能仲未瞓醒我居然將杯撈麵當咗做湯麵噉整,所以點解會買二送一呢,就係知我起碼會衰一鑊吖嘛。





11/12/2014 THU.韓留記Day 2


理論上過到嚟韓國會有宿舍住,實際上呢住住酒店先啦個客新開場乜都未搞掂,所以預頭幾個星期會每幾日就搬一次屋。第一個禮拜住呢間唔錯,其實應該叫湯房因為係一間三層平房界開幾間房,地點一流,內街位夠靜,行返出一條就係大街,地鐵站就喺附近,最重要個客個場轉個彎就係,由旅館門口去到佢門口行唔使半個字,就算同香港一樣每日八點九起身都趕得切準時返工,同埋唔使搭車可以慳返唔少嘛,雖然睇門口個阿姐唔識英文又成日顧住打機,打到成層樓都聽到咁嘈之餘肉緊到見你走連鬆開隻mouse同你揮個手都廢事,但服務唔錯態度搭救,所以印象唔錯。而且我份人比較求祈,間房其實都幾大,地方乾淨,張床好瞓,地板曉發熱間房夠暖,有得瞓有得屙我就OK,今次住呢度甚至比我住過嘅唔少外國酒店更好更舒服。


不過唔係幾慣間房有發熱地板有獨立wifi router一出門口就有凍熱水機任斟仲有兩對拖鞋俾你沖涼水洗頭水乜都齊,就係冇牙膏牙刷,問問另一個睇舖的哥哥,佢用勉勉強強的英文努力地解釋韓國酒店唔興俾刷牙用品。都幾古怪。一係噉啦我朝早唔食你啲其實只係咖啡奶茶任沖加無限方包任食的所謂免費早餐,每日換返兩套牙膏牙刷噉啦,得唔得呀阿姐,咪鬼打機住先啦聽我講啦好冇。




琴日仲擔心嚟到韓國朝朝早都會嘆麥記,好在到步第二朝早終於唔使了,食芝士蛋糕係咪好high呢,其實係琴日lunch買落不過冇食到,到六點班裝修師傅收工趕鎖門就趕走咗我(冇錯,搭正六點就收工加趕埋你一齊走,這樣才是正確的工作態度),見班師傅咁兇嚇一嚇就唔記得咗帶返酒店,結果今朝唔使食麥記了。不過好貴,琴日lunch去執麵包當一餐,拎時冇乜留意,睇返張單至知個芝士蛋糕原來成三四十蚊。個個都話韓國食嘢平,我真係唔覺。




今日收工住開韓國班同事帶我落公司隔籬地下商店街開電話上網卡,先知原來我酒店附近有如此正嘢。其實嚟咗兩日已經覺得明洞呢度好似深圳或者十幾廿年前嘅香港,呢個地下商店街多元化街坊舖為主,賣衫賣袋賣雜貨賣玩具賣公仔賣郵票賣銀仔鈔票,就十足十舊時香港啲老式商場,中間仲要有幾間二手黑膠舖,揾返好耐未試過嘅行商場感覺。 嚟韓國之前對呢度冇乜興趣,但而家覺得應該會留得幾開心。




我老母成日都話,出得外國就對自己好啲,唔好食得咁寒酸啦。見琴日朝早麥記晏晝麵包夜晚杯麵,又好似真係灰咗少少(雖然我食得好開心),今晚收工就對自己好啲,行過見到有間燒牛肉定食12000圜,即係八十幾蚊港紙,係好鬼豪不過死就死啦。結果咁大個仔第一次明白到,不聽老母言,原來真係會蝕底在眼前。




點解我會同《新東方三俠》呢套戲咁有緣呢,之前幾次皆旺飯罪,兩次晏晝犯局都撞正電視播呢套,估唔到嚟到韓國開電視都走唔甩。噉樣成日撞法,套戲夾埋睇過可能十次都有,所以都係轉過去MTV台睇AOA好過啦,口桀口桀

(between,點解啲韓妹十個有九個可以勁到谷爆衫咁滯,去食飯啲女坐低一除褸立即口桀口桀,剛剛電視播Sistar19又係口桀口桀口桀)

(再between,唔使同我講假嘅,我只志在有得J嘅嗟)



夜晚電視做MAMA 2014製作特輯,點知睇晒成個鐘都冇陳奕迅份,反而劉德華有半秒鐘過場,早講啦我就唔浪費呢個鐘啦(不過班韓妹是正的)



12/12/2014 FRI.韓留記Day 3


琴晚去咗食萬二圜燒牛肉定食,豪過了,今朝又節儉返。正確嚟講呢餐並唔係今日嘅早餐,而係琴日lunch。


話說琴日晏晝諗唔到食乜,就公司附近四圍行,其實韓國食嘢都幾貴,麥記食個餐6000圜起即係四十幾港紙起錶,正正經經食個正餐的話可以成萬圜一餐仲要只係普通飯款,立即好懷念香港擦個碟頭飯先三四十蚊雞。真係食唔起,結果行過見到有檔街邊車仔賣紅豆燒餅,一個成塊面咁先大兩千圜三個,似乎唯一食得起係佢就兩千圜啦,可能連個阿姐都頂唔順我個窮撚樣可憐我,同我打咗個眼色之後質多幾塊落去,拎返公司一面做嘢一面食做幾做就咬一啖,結果到我收工都仲未食晒,個阿姐應該俾咗最少五塊我,食到收工都食唔完,然後一搭正六點裝修公司班人又要鎖門趕你走,唔記得拎返酒店今朝繼續,結果十四蚊雞港紙食咗我兩餐。抵屌。


我相信繼發掘七仔買X送X杯麵之後,走遍各橫街小巷搵平得嚟質得飽的街坊美食,將會是劉Sir這條窮撚呢一兩個月在韓國生活的最大樂趣。




雖然一粒字都聽唔明,我好少可會咁專心睇電視新聞。




食飽飯又落地下商場街行吓,幾多選擇吓,價錢5000-10000圜左右,1000圜=HK$7,勉勉強強啦。只可惜我唔係黑膠膠。




個客間新公司開喺LG其中一間office樓下,順理成章裝修揾揾LG搞場地network嘢,今日上去佢哋度拎hardware做嘢,入去嗰間係server房同倉嚟,路過就參觀一下LG個廁所啦,見到有晒梳洗用品預咗返工返通宵噉款,唔意外,可能大公司做嘢就係落力啲,有件嘢有事,急call師傅,「出咗去外勤,陣間趕嚟幫拖!」跟住五點幾到一直搞,call晒人上網查晒都唔掂仲唔肯停,一向六點裝修師傅就會準時走趕晒全世界出去鎖門,但又唔好意思叫LG班人走,最後頂唔順破例留低鎖匙叫我哋自己鎖門,我亦過到嚟韓國第一次冇得準時收工(「你過咗嚟兩日嗟……」)。結果師傅都做到真係搞唔掂唔好意思唯有收工先,唔使擔心,聽日禮拜六都仲有得做。




今日終於砌好隻server rack,就決定今晚開始每晚係唔係都最少行到九點鐘至返房。香港地最怕三樣嘢濕熱塵齊晒,咁難得有得去外國生活,空氣好夠乾燥又落雪,俾個藉口行多幾步做運動,好過成日匿埋房入面咁毒啦。(利申:每晚匿埋酒店房開電視轉音樂台睇韓妹組合跳舞曷我的最新嗜好)


除咗享受好環境同郁動吓,明洞夜晚仲真係好好行,日頭我冇乜地方想去因為都係周街商場,但一入夜市中心全部內街橫巷迫爆晒食檔同小販,就好似十幾廿年前嘅旺角,所以今晚唔使搵嘢食喇直接去掃街啦,逐條巷掃睇有乜好嘢食同新奇嘢買,是好很開心的。


不過其實到頭來使得仲多,因為韓國食嘢真係好鬼貴,整串串燒已經起碼3000圜幾乎夠你去麥記食個餐,但係行幾步就會見到有嘢想食要科水(放心,經常發生),唔覺唔覺就跌咗你萬幾圜,結果就會覺得好灰,


「屌早知去食燒牛肉好過啦,又唔使咁貴,收工時間啲食店又多囡囡目及!」




呢隊中文名係咪叫「柒咗」



Mnet台晚晚都播MAMA 2014花絮,播極都講唔完,講到個頒獎禮咁大,但我都唔明點解明明係韓國音樂節目(叫乜鬼Asian Music Awards,根本得韓國人入選,全世界都是韓國的),做乜會搬到嚟香港搞呢?真係威的話,香港班靚妹都會肯俾錢飛去韓國睇你啦,而家你自己本土打飛機個頒獎禮要搬去外國做,只搞到自己好似唔夠班好柒噉,就好似大陸啲音樂永遠要去外國買獎再返本土耀武揚威一樣,實質戇鳩。





13/12/2014 SAT.韓留記Day 4


我一開始已經預咗頭兩三個禮拜禮拜六日都要開工,所以今朝禮拜六全公司除咗我只得裝修師傅蒲頭,我都冇乜所謂,反正次次假期開工都會厚顏無恥地claim OT,同嚟咗幾日我都仲未睇過地圖揾地方去連搭車去明洞以外都未試過,今日我都只打算收工之後由公司開始螺旋式用腳兜成個明洞,夠時間咪過埋東大門,反正好似明洞隔籬嗟,即使我對東大門的認識只有韓燒。 禮拜六返工係姿悠啲,但我已經十點半出門口喇喎,估唔到麥記已經冇晒早餐賣,唯有過隔籬間巴黎乜乜乜執麵包,好好食而且足餡食到好飽,但係噉樣三件已經要6000圜,好在上面公司仲有罐400圜咖啡,令我有啲想當brunch食慳返餐。


叫得brunch梗係坐低慢慢嘆啦,我都唔鬼急因為今日個場見冇人裝修得更恆,上去食的話唔使幾個字啲麵包會變晒做灰色,留喺下面電梯大堂慢慢嘆,嘆到十二點班師傅放飯先上去都未遲,呢個時間又可以開始睇吓呢頭有乜玩了,除咗下個星期六日兩晚都有metal fest之外,我仲未搵到首爾邊度有livehouse同metal碟舖,見聽日禮拜日有機會唔使做放足全日假,係時候計劃吓喇。




去到外國無論天氣幾凍,由10度去到-10度,我都只同香港一樣求祈著套衫加件羽絨就算底都唔鬼打頂晒籠加多件冷衫,亦從來唔會特登開暖氣之類。不過今日一個人返office加班,裝修公司班人見我一個坐喺度咁可憐,就抬咗部熱風扇放正我張凳側邊吹住,幾乎貼住我個人咁近。其實我慣咗凍冇乜特別需要,但見佢誠意拳拳好啦就由佢裝俾我用啦(其實係我唔識韓文佢唔識英文,我猛話唔使佢仲以為我好開心多謝佢添),暖係好暖的但其實好肴底,因為唔知啲熱風扇係咪Made in China開住有陣燒焦味,而場入面大裝修緊除咗燒焦味就係天拿水味,好驚喎大佬,就算中國的唔會爆炸,一唔覺意彈粒火花出嚟點著咗間房入面啲天拿水我咪大鑊?唔怪得班裝修佬一開完部熱風機立即閃出去唔再入嚟office啦,原來唔係益我而係陰鳩我。




朝早無驚無險,又成日因為要就班裝修師傅做嘢搞到我自己做做吓嘢要停一停迴避,晏晝場我決定唔坐office到收到call時先上返去起土壇作法。因為隨時on call唔會走到好遠,不過呢頭都唔憂消磨唔到時間,馬路一邊係市中心多舖多商場,另一邊上山有座毒撚塔,我公司同酒店係山腳位即係調轉頭一直剷上去就係。第一日見到已經想試上去觀個光好耐,係衰在冇落雪,天文台明明日日都話會落雪,但永遠第二朝就話

「唔好意思今日都係未落住最多落吓雨,或者間唔中會有一兩粒嘅,等吓啦你。」




上山一探毒撚塔,可以選擇用8500圜買張雙程纜車飛,又或者徒步行上去。作為一條窮撚加毒撚,會點選擇,唔使講到咁白啦。




上山遇到,原來呢度有間拜諸葛亮嘅臥龍廟。可惜修耷緊冇得參觀。




上咗山行咗差唔多成個鐘,發現條路一直只會圍住山腰位打橫行,都行唔到上山頂座毒撚塔,老細又有call,就落山算鬼數,雖然落去時我已經唔知自己行咗去邊。去到有個深山位好似去咗世外桃源,入面見開啲嘢出面市集都未見過,有部蜆麵機幾鬼過癮喎,如果真係1500圜俾一碗熱嘅湯麵都幾抵玩喎,不過我份人成日中伏所以唔敢試,同俾我揾到路落到山返到酒店先啦,越睇越唔對路,都唔知係咪行咗去另一座城?




亂咁行的好處就係成日去到唔知咩地方發現新嘢。走走吓走咗去明洞近邊,呢邊好鬼歐洲,一間大教堂附近再少高樓大廈,而以闊街矮樓細舖做主,根本就係歐陸式規劃,同呢首爾都幾多教堂。




是日毒撚下午茶,其實從未食過,不過見一串旋風薯2000圜,以份量計算好平㗎喇,立即整返串先,食完明白點解喺香港咁耐都未食過,真係冇乜特別。


食完就麻煩了。去過旅行都知,外國街頭係幾乎唔放垃圾桶,可能行足幾條街都冇地方掟,最後要入便利店借啲倚。所以垃圾桶仲多過七十一的香港其實非常方便甚至性命尤關地重要,尤其是而家。點解?我唔直接答你,我用例子答你:


你喺好景買完四仔,落樓下掃街買咗串薯仔,食完但揾唔到垃圾桶唯有拎住枝成尺長竹籤繼續行,唔覺意去到彌敦道口,隻腳一踏入彌敦道立即成班反黑組衝埋嚟推你落地,打柒你幾鑊之後再用「管有工具作非法用途」、「非法藏械」、「涉嫌襲警」同「不誠實使用木材」罪名拉鳩你。




雖然地下商店街主要係做二手黑膠,但估唔到CD部都有驚喜喎。




如果話明洞係首爾嘅旺尖銅,東大門就一定係首爾嘅深圳,雖然明洞已經好深圳feel,但東大門環境、衛生、氣氛、感覺,根本同身處深圳俾到你嘅一模一樣,一落地鐵車站入面已經係大量女人嘢雜嘜貨散貨場,上到地面一樣再加大量俗氣商場同一座街頭霸到去街尾羅湖商業城咁大嘅批發outlet,內街除咗更多雜嘜衫褲鞋舖仲有大量韓式打冷酒家,唔係本身應該係簡體字嘅地方變晒韓文字,同東大門中間多咗座舊城門興仁之門,會以為自己記錯唔係搭完飛機而係坐完火車過咗關,灰在我嚟興仁之門先圍晒板冇得睇,連東大門唯一特色都冇埋。


見一場嚟到,算啦坐低食返餐先走啦,起碼呢度就算細舖都好多有中文甚至中英menu,值得安慰呢度菜單之外中文唔多見,而且多數用繁體字。香港食韓式芝士辣麵食得多,一場嚟到主場試一試地道版啦,雖然都係用辛辣麵整但湯底會加其他配料,比香港食開辣少少,全餐4000圜食個麵加3000圜一碟餃子,價錢唔貴過香港好多,勉勉強強叫OK一餐啦,起碼夠飽唔使返明洞時又掃掃夜市先。


東大門終於都叫有樣嘢我會滿意,但都係鍾意香港個東大門多啲,起碼上去食韓燒開心過而家行成晚都唔知行咗乜春先。




去咗東大門無無謂謂地兜咗個圈,令我渡過/浪費了在韓國的第一個禮拜六。其實今晚有show睇,仲要係囡囡band添,只不過喺釜山開搞到冇得睇。我都超想睇Bebop呀,問題係唔係好似我屋企九龍城過斧山道半個鐘搞掂嗰隻咁簡單,我酒店過釜山要過隔籬個城去已經要半日路程,仲未計睇完返過嚟明洞,今日朝早又要返工,所以今次留韓國段時間好少演唱會睇都只有放棄,太頻撲冇計。


雖然真係超想睇,上Youtube search Bebop條鼓妹啲片就會明,實在是睇到你口桀口桀口桀。我對K-Pop印象一直只係一班純情大波妹做埋晒啲好淫賤嘅嘢,所以I like,AOA有首歌扮貓,班女著到SM噉款出嚟扭屎忽,真係睇到嗚呀叔叔不行了。


韓妹band其實性質相近,不過少了點淫賤而多返點實質音樂,睇得一樣咁開心但一切立即當堂合情合理晒,好似韓妹跳舞跳到彈吓彈吓你會話「挑咁撚姣」,但韓妹打鼓打到彈吓彈吓你會話「正常吖打鼓係噉架嘛」,從而可以喺大庭廣眾面前光明正大地睇,然後一句「你睇佢哋真係夾band架我聽歌嘅嗟」帶過,唔怕俾人話你係厹。





14/12/2014 SUN.韓留記Day 5


琴晚返到酒店一直搞到瞓覺,都研究唔到韓國啲gig點樣上網買飛,見今日唔使開工索性直接出去下星期六日場fest個場買飛,雖然box office個姐姐唔識英文,我都理解到佢9up一大輪的意思係場show一定要上網買飛,睇嚟即係迫住要買即場飛,仲要希望唔好賣晒。不過買唔到飛都有街行,場fest個區叫上水,同香港個上水差天共地,你見唔到任何大陸水貨佬,成個區更似銅鑼灣,同時規劃又好歐陸式,好少商場但勁多唔同種類細舖同西式舖頭,而且都幾多得意博物館開呢度,應該夠我消磨返半日。


但我行咗咁耐,睇極都係文青舖潮人舖,真係未撞過韓國嘅metal舖。乜韓國個metal scene真係咁淡咩。




可能鬧做乜天文台日日話落雪但個天係都唔落鬧得多,今日一出首爾真係叫上水個上水,立即落俾我睇仲要好鬼大。終於落雪喇喎,第一件事做乜?梗係立即食個雪糕先啦,雖然韓國個上水始終是潮流區高消費,行到最邊啲細舖唔少平靚正嘢食,好似呢個阿姐1000圜即係七蚊港紙一個雪糕格子餅,我屋企樓下普通格仔餅擺到凍晒至俾你嘅都要十蚊啦,阿姐只收我七蚊仲要即叫即整喎仲要俾足五球雪糕五隻色喎,終於喺韓國揾到好食加抵食過香嘅嘢了。而且逆住風一面食雪一面食雪糕,實在是喺香港俾多十倍價錢都享受唔到嘅體驗。




行咗大半個上水,終於揾到間舖睇落似賣metal嘢。點知間Skull's Hair原來真係整hair。唯一metal就係雪景中的招牌。




毒到可以喺韓國地鐵站賣燈箱廣告,大陸班fans都算經典




雖然食開鬼餐亞洲菜一向唔太鍾意,嚟到首爾又唔係除咗夜市之外揾唔到想食嘅嘢,點都有西餐食大不了麥記,最大問題唔係啱食嘅選擇少,而係唔捨得食。


成日都話如果喺首爾正式食一餐請預起碼一萬,好似今晚噉叫個豬扒蛋包飯加杯提子汁已經9000圜。噉確實幾有質素,個飯份量多又幾好食,果汁真係啖啖都有果肉,仲好似有無限添飲,不過我毒得滯唔敢出去斟。但窮撚在香港的生活概念一向係每餐正常開支港紙五條已是極限,過到嚟就餐餐都好似香港時出街飯局使費咁多,仲要有時食少少已經使好多,長遠計都幾襟計。


坐呢邊公司班同事都係嫁過嚟或者呢邊讀書,懶怪佢哋都話過到嚟韓國,最懷念就係大家樂大快活同茶餐廳。




好多大商場平日八點已經拉閘,估唔到禮拜日好多舖頭同食肆直頭唔開門,夜市又冇之前幾日咁旺,加埋聽朝要轉酒店,今晚早啲返房開始執嘢早啲瞓啦。亦即係韓國第一個禮拜日晚的節目又係睇電視。


可能係星期日,Mnet台終於肯將全個MAMA 2014頒獎禮播一次,唔知係咪我太遲開電視結果,都睇唔到陳奕迅唱《浮誇》,好在跟住仲有個話現場表演但我相信係咪嘴的live節目。睇咗咁多晚Mnet台,覺得韓國流行音樂都幾惡頂,男女組合唔係hip-hop就係dance pop,獨唱R&B都要中間featuring XXX加多段rap,當然總會有正正經經唱歌,有啲彈木結他唱抒情歌或者唱吓bossa nova係幾正,但實在非常非常之少,一個live表演節目十幾隊可能只一兩個屬於呢種。


所以,都係睇算啦。無論音樂幾唔掂或幾唔鍾意,韓國製作真係好勁,排舞多變化全隊又齊,舞台燈光攝影全部專業過專業,可以上電視台只唱一首歌都全個台重新搭過,而且就算樣衰女都有身材男都有六舊腹肌,同班女表演啲衫同啲舞真係淫到仆街,音樂不足視覺補救。


而睇得多亦明點解咁多人唔鍾意韓國人樣。韓國人差在掂同唔掂之間嘅距離相當大,而且好少屬於中間/普通級數一係好靚一係好樣衰,即使叫得偶像組合好多成員其實都相當醜,更灰係唔少屬於假得嚟樣衰至慘,呢樣喺班仔身上特別明顯,好多韓國仔個樣真係比大陸更大陸。所以好多組合點睇都似根本只得其中一兩三個人,其他只係搵本來應該係伴舞嘅入隊撐場扮到人強馬壯,我用例子答你:


圖中是三人組合Orange Caramel的Nana,上電視已經正到仆街,但你諗住另外兩個都會係差唔多級數的話,我勸你千祈千祈唔好搵真相,更灰係明明正過其他人幾個level但隊長又唔係佢,早日單飛算啦。




其實過到嚟韓國,夜晚做最多除咗開電視睇韓妹跳舞,就係開電視睇戲,特別港產片。反而呢邊睇返之前冇喺香港睇嘅戲。


利申:《冰封俠》呢套嘢真係...武指唔錯,最後天橋段打得好,但係論戲真係唔掂,啲CG假到嘔(最好嗰段係key林雪入立法會9up爆粗,你話灰唔灰),想拍古代人嚟到現代份文化衝突完全唔好笑,更灰劇本完全唔通前半好多嘢唔交代,你連班人本身古代係做乜、大家關係係乜、點樣嚟到現代同跟住想點完全唔知,加去到最尾至講你知其實呢套只係上集,垃圾成噉應該好難如願有二三四五集。打鬥係唔錯,但想睇王寶強打甄子丹,都係睇《一個人的武林》算啦,最少劇本都係唔掂但底線係似返套完整嘅戲。





15/12/2014 MON.韓留記Day 6


遇著十二月出國,可以預期未有宿舍住之前,每個禮拜最少要搬一次屋。今次住間新明洞旅館非常好住,位置近市中心又近地鐵站,最重要近個客行去公司最快一分鐘就到,雖然全酒店只得一個見親佢唔係打機就係煲煙嘅阿姐,加一個英文勉勉強強的哥仔睇場,但態度好禮貌好服務搭夠,而且係間平房改建嘅旅館所以裝修似屋企多過酒店房,朝早又包早餐有無限咖啡方包粟米片,最正我間房喺地下入酒店行幾部就到,pantry就喺房門外面,夜晚出嚟斟水飲同朝早偷早餐入房食都超級方便。向來出國對住冇乜要求,歐洲之外我都好少可會對一個歇腳地方讚咁多,雖然呢個時節收四舊水一晚已可比酒店級數,論住宿環境服務質素,已經好過晒我住過嘅日本同台灣酒店。


只可惜今日就要搬走了。嚟緊嘅日子,我相信唔會住得咁舒服咁開心。


(利申:高登巴打不是我)




住港紙$400同住港紙$250的分別,就係冇電梯要你拎行李行五層樓,外面落大雪但入面只著底衫都會出汗,間房只得一張床一張檯一個廁所係咁多連打開隻篋都唔多夠位,瞓低一起身十次有八次撞到天花個櫃,廁所當然乜都冇請自行購買,廁紙仲削過白兔糖啲透明紙打飛機一射就穿,同埋門口唔聲唔聲加級暗級,入去仆一次,出去再仆一次,拗住柴開成日工,收工唔使出去玩,跛吓跛吓行過便利店買少少嘢食加洗頭水沖涼液,然後上返房搵個桶開盤熱水浸浸隻腳先,仲要帶得一個禮拜衫差唔多著晒,即係搞完隻腳今晚又要留返一個鐘洗吓衫先。


這就是我今日起直到平安夜前夕的生活了。其實我唔介意間房細或者環境差,冇電視睇仲要個wifi唔夠勁先至灰呀,口烏口烏


而當未到聖誕已經搞到噉,下個禮拜聖誕幾日再加之後新年,我都唔知低處可以有幾低。話唔埋真係五六十蚊床位搞掂。




Jingyunglababy Part 1:Angelababy居然唔係賣整容醫院廣告




Jingyunglababy Part 2:整容醫院居然唔係Angelababy賣廣告





16/12/2014 TUE.韓留記Day 7


是咁的,琴晚洗完衫拎返房,仲煩緊咁細間房點晾衫、隻篋都唔夠位打開點執衫之際,夜媽媽有人敲門,原來係間旅舍個老細。操著一口流利普通話的佢夜半敲門除咗叫你唔好煲煙,原來仲係送早餐,雖然只得一個麵包仔加一盒奶,已經比我想像中多,其實我冇預過一間乜都冇到幾乎連廁紙都要自己買嘅旅舍會有早餐送。


老細話食完之後掛返個膠袋喺門柄度,佢就會再放第二朝個早餐入去,夜晚返嚟就有得拎了,就好似細個老豆老母話聖誕節掛起隻襪,聖誕老人就會喺你唔知嘅時候擺份禮物入去。這間空洞的旅舍突然間令我感受到人間溫暖同充滿節日氣氛。




已裝備黃金繃帶,防禦+1,攻擊+5




上星期六有Bebop睇,但係出隔籬城,一來一回已經冇大半日,仲要睇完都唔知返唔返到自己個城,唯有放棄。今日就到Pritz,冇錯就係被喻為「泡菜版Babymetal」嗰隊(其實佢哋得首新single同個logo似)。今次係首爾出喇,但都要搭個半鐘車去,而且日本韓國啲show特別鍾意五時恭候六時入席未到七時就開場,就算唔係隻腳傷咗,準時六點即閃立即衝去都趕唔切啦,睇完又要再個半鐘返酒店呢。


不過呢個都唔係最大問題,韓國搵show睇有兩難,一難係好難知幾時有,就算同一個售票網,好多show都只有韓文版先搵到,英文版絕對買唔到你想睇嘅show。而Pritz呢場直頭好鬼神秘,連官網都只得個日子同地址,幾錢飛邊度買飛等等資料通通都冇,不過是但啦其實去睇佢哋真係只為扮Babymetal嗰首,來回咁多時間咁多錢就係為一首歌咁多,返房養傷等星期六日睇fest好過啦。





18/12/2014 THU.韓留記Day 9


琴日成日冇聲氣,因為日頭忙到嘔,夜晚裝修公司個老細又請韓燒。嚟到韓國食果然唔同,未正式上菜已經成堆沙律之類冷盤堆到連張檯都唔夠位擺,上式燒時係有人喺側邊幫你燒唔使自己落手,而且啲料真係靚好多肉味濃又多汁香港食唔到,不過唔係有人請自己一個一定唔會食,大佬食餐普通飯都要成萬圜,食燒烤真係唔敢諗會使幾多。


不過食之餘狂隊酒先係重點。班韓國咩時間都可以劈酒,個裝修老細每日起要劈兩枝燒酒,文化係噉食飯時自然竹狂隊你,雖然我唔飲酒都同佢哋一齊隊。佢哋好鍾意飲一隻bakali,似啤酒不過對我嚟講同飲汽水差唔多隊咗兩枝都冇乜嘢,然後試吓燒酒開始有飲酒嘅感覺,跟住老細出絕招啤酒溝燒酒,


「一杯就夠!」


果然一杯就夠我第一次有飲到要停嘅感覺,個人仲行到直線但一面行一面飄浮,我返酒店係上一條斜路轉個彎再行五層樓梯,平時一個字行晒,呢次上斜路都上咗大半個字。然後返上房立即撻低,但係咪飲醉咗呢反而好鬼精神瞓唔到喎。是但啦,反正已經攞正牌第二朝冇十點都唔會蒲頭。


不過就算晚晚有人請噉食法都幾惡頂,所以好佩服班韓國仔可以劈足全晚之後第二朝起得到身七八點返公司仲正正常常。叫我照食照劈都OK嘅,不過第二日唔好預我可以正正常常做嘢囉。




成日聽到人話韓國炸雞出名,今日終於一試。公司樓下有間酒吧我幾鍾意,裝修好又有電視睇,lunch入去叫咗個炸雞盤加汽水,餐牌冇寫價錢得張相同一大堆韓文,俾錢時先知中伏,收咗我兩萬圜 - 冇錯係20,000,即係港紙百四蚊。點知上菜時先發現,原來更大伏係最初以為個餐係KFC size,點知最後都係KFC大細,不過係桶餐size,難怪收咁貴,我食足九個字先至食到一半,所以今晚收工可以立即返酒店唔使周圍躝,今天晚餐就係lunch食剩嗰半盤。兩萬圜食足全日,噉又算OK的,雖然食足兩餐,我都食唔出傳說中的韓國炸雞有乜特別。


可惜上機個星期KFC出韓式炸雞,趕唔切上機前試一次,就嚟唔到呢邊同真正韓國雞比較啦。我成日型住香港KFC個韓式炸雞會仲好食。




我出國旅行從來唔會虧待自己,可以住平啲,但都會揀住酒店(hotel)。不過唔係自己飛而係公務時多數係guesthouse,之前份工會住民宿,今次嚟韓國第一個禮拜就住旅館,因為格局似返屋企多過似寄人籬下,感覺係舒服同開心過住酒店。只可惜快樂的時光總是過得特別快,第二個禮拜變成住旅舍(hostel),第一次去外國住,見識良多。


旅者之舍叫得好聽,其實咪即係湯房。幾時有人煮嘢食、有人洗衫、有人check in check out、有人吹水聯誼,你一定會知,因為全層發生任何事都一定聽到或者聞到。亦搞到我連聽歌都唔多敢,就算較到坐喺電腦前面先聽到咁細聲,出一出房就知原來隔籬鄰舍同我一齊聽緊Metallica。立即好懷念之前住新明洞旅館時,日頭時間你鍾意點焚機都得,除咗隔音真係唔錯,仲有大門口個阿姐打機分分鐘打得仲大聲過地下最入我間房的metal。而家我連聽謝安琪都要戴耳筒至敢開大聲。


我要求已經唔高,一向只求有個地方俾我安靜過夜加乾乾淨淨沖涼洗面刷牙屙屎就算,所以地方細到連隻篋都幾乎打唔開唔緊要,同都算幾乾淨嘅又有獨立廁所,第一日住個客問我掂唔掂,我仲好合皮地答佢OK添。點知第二日先知出事,原來間房租俾你嘅意思就真係俾咗間房你,直到check out之前佢哋都唔會入你間房,亦即係間房搞到幾亂有幾多垃圾,頂唔順的話請自己搞掂。好在我唔多垃圾亦都算企理。


但沖涼至大鑊。check in時俾兩條毛巾,而我係住一個星期,就即係一個星期入面沖涼洗面就靠晒呢兩條毛巾,而更大問題係就算你頂到一條毛巾用成個禮拜,好多時第二日沖涼時,至發現條毛巾仲係好濕。個老細每晚都會掛份一個紙包蛋糕加一包牛奶嘅早餐喺你門口,但我寧願佢每日俾一條毛巾我沖涼抹身好過。


你問「乜幫公司去外國做嘢,租酒店唔係有得claim公數咩?」當然係公數包,但肯包幾大舊公數又是另一個問題...





19/12/2014 FRI.韓留記Day 10


雖然韓國食飯時間幾free,裝修工人可以十二點幾已經唔見晒人(然後一兩點返嚟三四點又大半人唔見晒,爽),寫字樓班同事冇乜特別事的話都會十二點半左右起行,慢慢嘆到兩點幾至返嚟。我就冇咁free,因為要keep住同香港office聯絡,而韓國快香港一個鐘,好多時起碼要等到一點幾香港真係冇事搵韓國先落樓食嘢,廢事食食吓飯收到call結果一面食飯一面開電話會議就無謂,有嘢急call話要現場做但去唔到又唔知點。


雖然次次晏晝都自己一個食幾蝕底,因為跟住班大粒有得黐餐慳返餐嘛,但其實毒撚一個更開心,每日晏半個鐘頭食飯得一丁友,可以隨心所欲地試食唔同嘢。今期幾鍾意公司樓下間Quiznos Sub,始終食開西餐,間嘢夠鬼又就腳就晒我,其實好想食麵包碗麵但lunch好似得三文治,雖然已經夠貴,中size三文治加杯汽水唔收你10XXX圜都要七八千,但的確俾足料加勁好食,雖然大家都係Sub,濕way同佢比就好似快餐廳同餐廳嘅分別。當然呢個區別同時適用於價錢...


喺香港食飯我鍾意買外賣返屋企或者公司,但嚟到韓國就鍾意坐低堂食,因為裝修得好鬼靚坐得舒服,而且嚟韓國第一個禮拜已經成日包場食飯,去過幾間酒吧同餐廳食,餐餐都係坐足成個lunch仍然差唔多得我一個客,因為咁寧靜所以食得舒適食完都會坐多陣hea吓至返上去,覺得自己好鬼文青。香港就冇乜可能求祈食個lunch都咁多享受,唔使比裝修環境,如果香港開間食肆食飯時間得咁少人,一個月已經執得笠。




星期五最好的節目當然係去行夜市啦,今日俾我發現到一個平得嚟飽嘅食法,通常一隻大餃子1000圜隻,搵到有檔半打3000即係500圜一隻,食完真係有點飽唔夠再3000圜囉,基本上呢HK$42一定質得飽你,喺發現到邊度有得食(芝士)辛辣麵之前,呢個韓國版八方雲集食法應該係明洞最平嘅一餐。


就喺我食緊餃子,搵到個阿嬋好鬼勁,自己起個帳幕掛晒「神打救你班罪人」標語十分metal,開恆咪係講世界末日喇你班仆街聽食屎啦,韓文長篇大輪之後講完英文再講一次。我不知幾期待佢唱返首《神屌人》我聽。





20/12/2014 SAT.韓留記Day 11


可能潛意識都覺得首爾冇乜嘢行瞓吓好過,琴晚掃完夜市街返到房即瞓,今朝起身沖個涼刷個牙食埋房東掛喺門口個早餐又瞓過,唔係今晚有show睇的話,我相信會瞓到六點而唔係三點至起身。


出到上水第一件事,梗係幫襯阿姐買返個雪糕格仔餅先,1000圜食雪糕都可以食到你飽。今日冇落雪(睇天氣報告,首爾之後都好少機會落大雪了,灰),冇得一面食雪一面食雪糕,不過今日發現呢度食格仔餅有另一樣好,阿姐個檔口開正大學對面同去消費區個路口,而且阿姐檔嘢平加好食永遠大排長龍,唔介意食風的話,食雪糕時可以有好多大學生妹目及的,口桀口桀






一別八年,終於再睇到Method,不過上次係搞佢哋嚟香港落灣仔酒吧開show(仍然係我搞過同睇過嘅show當中最難忘最好feel一場),今次到我飛到嚟首爾睇佢哋出show,其實我都係出發前無端端身㾗地上佢哋Facebook,至知道今個禮拜六日呢場fest。


香港嗰邊間酒吧同TRHK都執晒,呢邊佢哋仲撈得幾好,現場反應一流班文青女都high晒。嚟香港表演集碟之後走咗歌佬同一個結他佬,跟住三年出一隻碟對上隻係2012,唔同在新歌佬一個人唱加彈晒,同歌路變得更摩登玩到Arch Enemy噉款。但live仍然冇變超級地正,第一晚入面六隊排第三,已經可以肯定成場fest最受歡迎佢哋一定有份。只可惜玩得四首歌,絕對唔夠喉。


當好多十年前接觸過嘅band已經因為種種現實問題消聲匿跡,Method隔咁多年仲可以越來越好咁得人心,呢樣我都估佢哋唔到。





21/12/2014 SUN.韓留記Day 12


過到嚟韓國其實最開心嗰樣都係瞓覺,咁凍天氣縮入被竇入面真係好鬼舒服,所以每朝要掙扎起身都好鬼辛苦,今日好難至迫到自己兩點一定要出門口而唔係呢個時間至起身,因為今日好可能係今年最後一次落雪,點都要出去望望。


上次去過根本就係韓文版深圳嘅東大門,今次去另一邊南大門,反正都係去睇fest個方向行多遲一個站上車嗟,同下次轉間酒店都係呢頭就探定路。同東大門非常唔同,女人街味加鴨寮街味多過大陸味,最少地面街同地底街啲嘢都係行過見到會覺得買嚟有用同食得起先,可能嚟緊兩個月會有好多日子住呢頭,多平嘢買平嘢食是好事。


同叫得大門當然有座城門,今日仲有雪景。其實本身唔多雪幾粒噉,點知我一嚟到南大門立即扯大風雪,雪大到好似霧噉對面街矇晒咁滯嗰隻,搞到成個南大門街露天市場要立即執嘢拉閘避避先。到我差唔多走出發去上水時個天就出太陽。又係我喺度累街坊。




其實住咗將近兩星期明洞,最大嘅煩惱係仍然揾唔到邊度有得食最簡簡單單嘅辛辣麵,理論上應該係韓國好普遍嘅嘢,就係唔知邊度有同點樣叫,拎住張相四圍問都揾唔到,唔知係咪明洞始終高檔得滯呢。


今日去南大門終於撞到,雖然首爾好多街邊車仔檔,今日第一次遇到一檔有得食車仔麵,阿姐即叫即整,冇芝士都加隻蛋俾你,坐喺街吹住風雪食到你流晒鼻水猛咁咳。加多三隻即炸餃子一罐嘢飲夠晒飽,埋單先承惠5000圜,三十五蚊港紙咋,而家香港呢個價錢都未必食到咁豐富呀。


嚟緊半個月都會住南大門,分分鐘晚晚都係嚟揾阿姐一個韓國車仔麵搞掂。其實我始終覺得韓國最最最好食都係辛辣麵,直頭國寶級。




隊band連英文名都冇唔知佢哋叫乜,但我知道喺香港我永遠唔會揾得到一隊本地band會著同玩到Steel Panther噉款。





22/12/2014 MON.韓留記Day 13


間重慶hostel住咗個幾禮拜,樓下間老母屋甜品好似好猛料,成日都有大陸師奶遊客影相,不過我住佢樓上住到今日last day都未幫襯過,可能有明星代言或者拍過戲好勁,但要我萬幾圜食個雪糕我真係睬你都on9。




只要加個飄雪景,就算只是食個魚蛋粉都會顯得很文青




我要挑戰無限豬扒





23/12/2014 TUE.韓留記Day 14


其實我好耐未試過lunch可以慢慢食慢慢嘆,好在上星期尾清咗大部份嘢,今個禮拜冬至加聖誕全場冇乜心機做嘢班裝修佬都慢慢嚟,好多時都係等人交貨先有得繼續做,既然今日都要轉酒店,晏晝就早少少拉行李去check in加嘆一嘆先。


住南大門好處係多平嘢食加終於搵到有地方賣辛辣麵,過一過馬路就係明洞又有街行,而行咗兩個星期明洞,終於明白點解會覺得呢邊冇乜街想行,因為韓國居然係接近冇碟舖。明洞都叫大消費區啦,韓國都叫音樂工業蓬勃國家啦,但好似係冇HMV、Tower之類外國大唱片舖進駐,而細唱片舖唔係冇,好似我酒店過馬路一入橫街已經有間,再入明洞都唔少街舖,但一入到去成牆都係少女時代,碟唔係冇但標十萬圜以上嘅簽名版CD同商品才是重點,十足黃金時代的信和中心堆賣相舖閃卡舖,所以每晚冇嘢做都鍾意落街躝吓望望呢啲舖頭,因為一定多囡目及,口桀口桀,同埋會令你重拾少年時,體會到媚大陸同高租金令我哋香港人唔見咗幾多本應是好基本的特色小店。


若講到買碟,明洞個地下商業街超多黑膠二手舖,但論最indie亦只得如此。我仍然搵緊首爾入面邊度有metal舖。




其實唔係見呢幾日食完晏返到公司已經幾乎唔見晒人,我都唔知道原來今個禮拜係冬至,梗係啦有假放嘅聖誕都唔多理啦(更何況預咗聖誕都要返工),冬至本身都冇假更加唔會理,人哋有得早走嗟我又冇份。不過又唔係冇著數嘅,我自己過嚟韓國毒嗟,人哋有屋企人有老婆仔女㗎唔早走都夜晚要返歸食湯丸㗎,所以點樣想做嘢都俾人準時六點趕走。


呢啲時候,當然又係返酒店掟低個袋之後過對面街掃夜市啦。人哋有湯丸,我都有炸雪糕食,雖然我承認係見到個檔口中文寫住咩「明洞不能不吃小食」乜乜乜至豪2500圜俾佢,唔係有中文我真係唔會中呢個伏,OK的,但冇乜特別又唔係好食,隔籬街加多一千就有直徑成隻豉油碟咁大成寸咁厚嘅雪糕macaron(雖然我都中過伏,除咗勁大舊完全唔好食)。


事實證明學好外語幾重要,噉樣先呃到我呢種無知外國人錢。




夜市的樂趣之一是發掘最平可以食到最平嘅方法,因為同一樣嘢食隔一檔價錢已經可以唔同,繼上次個阿叔3000圜半打大餃子平足人哋一半,今晚又搵到檔即叫即整豬柳蛋,塊手打漢堡豬柳大塊又厚,再加隻新鮮荷包蛋先至2000圜夠當半餐,我覺得個阿姐係平咗一千俾我,唔知係咪因為煎蛋時落鹽好似唔使錢噉成炸成炸噉掟落去,搞到鹹到黐線而過意唔去呢。(又可能係調轉,講平咗之後唔順氣,就打算鹹死我報仇)


樂趣之二是搵特色好嘢食,好似串燒大把,但呢檔燒雞串特別多人尤其多女,燒得好食之餘有六種醬任你點,試過最辣兩隻的確幾激,不過我食雞一向鍾意原味所以只搽少少。但個檔成日勁多女幫襯,而班女係成串雞由頭到尾搽滿晒最辣隻醬搽到滴晒落地至停,食到咁辣但反應好似我食緊原味一樣冇乜嘢噉。係班泡茶妹唔正常定我太過正常呢。




今日開始搬入南大門,今晚開始每一晚都會見到呢個景





24/12/2014 WED.韓留記Day 15


在這平安夜,願我共你可一起喝悶酒。識我嘅人都知我唔飲酒,唔係唔飲得,而係唔明有乜好飲。韓國文化就係飲酒同埋飲酒,今晚平安夜一搭正六點鐘,裝修公司老細立即叫大家停手唔好做嘢,之後拎晒紅酒啤酒出嚟叫大家飲,而長輩文化嘛,老細塞埋嚟,就要頂㗎啦。


上次去韓燒班友狂隊我飲bakali,唔知係咪米酒,我劈咗幾枝覺得同飲汽水冇乜分別,要去到啤酒同燒酒至開始wing。今次唔知係呢隻Cass勁定空肚飲,飲咗一罐已經浮浮哋,老細質多罐嚟隊埋,第一次體會到乜嘢叫行路唔到直線。不過好神奇,跟住去廁所屙個尿之後又覺得冇乜嘢好似冇飲過。可以又劈過。




平安夜大餐,港紙$30搞掂。其實有諗過整好個芝士撈麵之後,拎過對面街搵個2000圜一客即煎豬柳蛋個阿姐加料。





25/12/2014 THU.韓留記Day 16


聖誕佳節,出咩街吖,咪又係返工。不過聖誕節韓國裝修班友同平時冇乜唔同又係劈酒,都有分別嘅平安夜起碼六點老細至拎酒出嚟,今日老細唔在場,班友一兩點已經落去樓下買酒上嚟開party。


啤酒一向唔鍾意飲,但呢隻韓國米酒即係佢哋口中的bakali真係唔錯,唔知點解飲酒飲啤酒的話我好易wing,其他酒就飲好多都冇乜嘢,呢隻bakali對我嚟講直頭同Jolly Shandy差唔多。 而一人一枝bakali,加埋電話開住Google Translate,就是一個快樂的下午。




Lonely Christmas最好的節目當然係回顧返上星期六日場Still Crazy Fest,因為這就是浪費漫長時間的最好方法。TL;DR的話:今場韓國metal fest真係非常非常之唔同,尤其同現今香港普遍metal gig/fest相比時,同去睇metal gig啲韓妹真係好正。


其實好好彩,你會以為南韓喎首爾喎亞洲唯一音樂工業拍得住日本嘅國家喎,過到嚟點會冇show睇呀?就係冇乜,呢邊hip hop同dance pop才是王道band sound難成風氣,連indie gig都好難揾,同唔知點解班韓國人乜都收埋硬係唔俾外國人知,gig已經少仲要放晒喺韓文網站,英文網就唔擺出嚟,唔係出發前有次手㾗上一上Method個facebook,都唔知十二月會有呢場玩足兩晚嘅Still Crazy Fest,仲要係我落機第二個禮拜添。好在個期就到,因為錯過咗今年就再冇show睇了。


又好在個場算近,我酒店搭半個鐘地鐵就去到(韓國火車搭其實唔慢,走咗架車要等好Q耐至浪費時間)。場fest都算個大活動,每三個月一場小gig,年底就壓軸喺上水搞個周末大fest,此上水不同彼上水,首爾個上水係個十足歐洲小鎮噉嘅大學區加消費區,有座每層各有主題嘅藝術中心,場fest喺地庫同蒲吧半場差唔多大細嘅livehouse搞,相信次次開都係呢個場搞,indie metal fest可以做到包起一個幾層樓高嘅外牆直身海報,都算威水。


日本同韓國好鍾意六七點開場,未必真係搭正就開始,但亦唔會好似香港入席同開席之間可以差成個幾鐘,多數遲少少就有得睇。不過你問韓國睇gig最煩惱係乜,要咁早睇唔多慣未算最煩,而係除咗難搵之外,搵到你都未必知自己睇乜,望望張海報就知,全部嘢包括英文band名都得韓文字,好在賣飛counter班姐姐能操一口流利得嚟冇乜難明口音的英語,有得碌卡買飛之餘,仲可以問到全晚lineup每隊英文名係乜。其實好有趣,我嚟咗韓國咁耐,唯一可以大家全英語溝通冇難度,就只得睇show呢兩晚,出返城唔好話商場大舖啦,連旅館睇場都唔太得,而呢個現象亦唔限於韓國,好多本身唔係講英文嘅國家特別亞洲國家,往往最努力學同英文講得最好就係搞show同夾band一班,不過箇中道理,香港班老豆老母唔會明亦都唔會聽。


成日話去外國係體會當地文化同見識其他國家特色,今場絕對做足晒甚至有突。前年去科隆睇Evile,最前嗰位係個輪椅metal友,今次韓國Still Crazy兩晚都係一個盲人霸第一排中間位,跟住係個頭髮長到落腰嘅侏儒。台下亦完全唔似一班睇metal嘅觀眾,長頭髮嘅人少著band tee更加少之又少,兩樣齊的劉Sir已經係望落好metal嗰個,年齡層亦偏高似老豆老母去學校睇自己仔女表演,而且女性佔差唔多一半,見親不離正常出街樣or去party樣or文青樣甚至著到成個時裝model噉入場都有,band樣metal樣嘅女只得幾個。最意外都係音樂方面,因為到場之前只知亦只識Method一隊,結果呢場可能(先至)係成世人第二場唔係extreme metal的metal fest。(第一場係2009年自己搞嘅Hibria + Vigilante,我心目中的永遠最佳metal gig)



老實捧場一大目的係為一別八年的Method,上次係搞佢哋嚟香港落灣仔酒吧開show(仍然係我搞過同睇過嘅show當中最難忘最好feel一場),今次到我飛嚟首爾睇佢哋出show,亦因佢咃我先知道呢場fest。香港嗰邊間酒吧同TRHK都執晒,呢邊佢哋仲撈得幾好,現場反應一流班文青女都high晒,唔同在嚟香港表演集碟之後走咗歌佬同一個結他佬,跟住三年出一隻碟對上隻係2012,而家新歌佬一個人唱加彈晒,同歌路變得更摩登玩到Arch Enemy噉款,但live仍然冇變超級地正,隔咁多年仲可以越來越好咁得人心,呢樣我都估佢哋唔到。而當本身唔叫唱得好拆的Method已經算全fest最恆,就知今個fest相當old school,第一晚叫較新派,起碼仲有Yellow Monsters同Naty,前者睇名會覺有點戇鳩,但音樂幾好夠過癮似J-Rock版Bullet for My Valentine,而且表演粗糙但粗獷得嚟紮實,唔會覺得係鳩玩而真係好識帶動氣氛;後者玩'90 thrash,不過整體麻麻,同第一晚開場玩melodic hard rock/metal隊Kasi一樣,有技術但音樂同表演都唔夠出眾。


雖然我為Method,其他人係為全晚最後兩隊主場地膽。Crash加少少電底歌佬枝咪落effect,有點似九幾頭的Ministry,而當時嘅Ministry其實相當thrash,所以metal底多過電嘅恆歌live拍得住Method咁爽,而且歌路編曲變化都幾大,第一次睇已勁鍾意,難怪會排第一晚尾二。壓軸Zero-G根本就係一班老鬼搞嘅Accept tribute band,歌路同歌佬把聲都好似,又要老派地搵人專唱和音,最後嚟多兩首AC/DC,而第二晚就係延續呢份old-school精神。唔知係星期六事定班底有點偏新派,第一晚只得接近一百人而且較多後生,會有班仔mosh pit然後班女叫班仔去mosh pit之後企前面fing頭的奇景,而第二晚星期日就唔見咗大半班後生而多返老鬼加有大半場人,或者觀眾已反映了音樂走向。第一隊得韓文名隊band已經夠殺,成班人包頭巾爛身爛勢貼身牛仔褲笠多件毛毛褸,歌佬枝十字架咪stand隊嚟隊去,唱唱吓歌又拎條皮鞭出嚟fing幾fing,雖然唔叫太唱到,但在只接受到日系visual的香港,你永世唔會有機會睇到一隊咁Steel Panther嘅本地glam metal band表演。跟住Won又係Zero-G式老鬼speed metal band,最正有個望落幾大年紀仲幾厚妝但成身皮勁有霸氣的bass婆,雖然睇band show有靚女是好睇,但論metal gig有時見到呢種bass婆而唔係bass妹會更好睇。Zihard就係Jeff Scott Soto時期Yngwie Malmsteen上身,結他佬Fender啡到九彩,西裝歌佬仲要cover《I'll See the Light Tonight》(其實更想聽《Faster Than the Speed of Light》),而應該係兩晚最多fans嘅Black Syndrome繼續old-school,成晚根本就係幾隊band輪流鬥高音。全晚只得有點alternative嘅Basket Note較悶局,最後一隊Blackhole又係似之前一晚Crash電底metal,其實幾奇怪,睇牌面應該Black Syndrome先係主角,海報都係第二晚得佢哋有得出band logo,點知最後變咗Blackhole排第二晚最後,但可能仲好因為玩得真係好好,同Crash比Blackhole較重metal而唔係賣變化,睇的話我會揀Blackhole。


之前識嘅韓國metal band只得幾隊而且都玩extreme metal,今次長進不少加睇到好多本地true metal band,感想係人哋個scene可能仲難發揮過香港,睇年底叫多假大日子都可以接近冇gig就知,但樂隊無論玩乜都磨練到好勁,就算係玩到好pop或「唔夠metal」,全隊人都一定玩得齊、表演一定識搞氣氛、技術一定練到好紮實、結他佬一定係solo高手,而個場本身係專門livehouse,環境好音響亦超靚,呢樣香港就應該冇可能做到。全fest睇落好大型一晚有六隊,但用香港人心態入場會覺得有點唔夠,望過吓rundown,每晚目標都係三個鐘內完,即六點鐘開始、每隊玩4-6首歌、連轉場一隊只用半個鐘時間、九點之前完,現實當然冇可能,但兩晚都可以九點半前走得,叫得fest玩咁少好似唔夠盡興,只可以話韓國人慣咗早完場留返時間睇完show去酒吧飲酒,好似第一晚睇完之後場入面hea咗陣,轉頭頭已經全部band執晒包袱走晒咁滯,急到碟都買唔切只搶到隻Crash但買唔到Method,如果同一個班底俾香港人搞?每隊band起碼玩多兩三首歌,六點開場唔玩到十一點半唔准完!但算啦香港自TRHK之後已經冇人會搞呢種非extreme的metal fest,間唔中落酒吧可能會有差唔多活動但規模絕對及唔上,我只有話好耐未試過成晚聽唔到一句嘔泥,同兩晚加埋,我聽到嘅清聲、高音同結他solo,已經多過晒全年香港睇過嘅metal gig總和,所以呢個週末非常滿意,因為而家香港嘅metal (scene/gig)真係俾唔到同一份體驗各位喜歡old-school metal的朋友,就當睇show預祝自己Marry Christmax啦,反正聖誕節幾日只會街都唔出匿埋酒店渡日辰。


仲未完,可能呢個部份先係戲肉。唔知係咪呢邊流行餘興節目呢,完show之後仲有個大抽獎,雖然有時似搞笑求祈執件嘢出嚟就送俾大家,不過好嘢居多,好似第一晚有個獎係一次過送成棟Crash隻EP - 你冇睇錯係一棟十幾隻 - 結果俾條女拎咗,我贏到的話肯定帶返香港派街坊幫佢哋宣傳,而兩晚大獎都係送結他,第一晚俾個metal侏儒贏咗,但其實我更想要第二晚二獎把武士刀。全張飛我唯一識睇嘅就係飛號幾個數目字,但當然抽獎又點會唔係講韓文呢,就有藉口搵囡囡搭訕了。前面提過今場metal fest最唔metal一個地方係入場班女似去party去酒會多過去睇gig,而兩晚都見到一個短髪韓妹,個樣同著衫似似小品文藝電影女角,玩到好high嗌晒跳晒拍晒手,呢種囡囡你去香港嘅metal gig係接近冇可能遇到(唔難理解點解香港十個聽metal九個都係冇前途的毒撚),仲要兩晚都有緣地企我隔籬,抽獎時自然搵靚女幫我手對飛啦,只可惜我唔識韓文,而佢唯一識講的英文係OK,加上我個樣可能真係太毒,結果兩晚過去都冇著落。嚟到韓國我第一次會後悔點解唔預先練定韓文先。


(當然,最大團圓的結局應該是「屌你,好冇?」「OK!」)





26/12/2014 FRI.韓留記Day 17


琴日講過嚟到韓國半個月,遇到英文最好嘅,係上星期六日場metal fest 賣飛個姐姐。估唔到英文第二好嗰個會係貨車司機,望落似普通阿伯,但一開口就係英文,仲要唔係掙扎成分鐘先彈到一兩粒單字,而真係用成句英文同你講嗰隻,嚇鬼死你。冇乜好挑剔,除咗一樣:


「有幾多箱貨?」

「Seventeen!」

因為只包到門口落貨,仲要箱箱重都幾係嘢,不過十七箱嗟頂硬上啦。點知去到門至發現,原來係seventy。 班韓國裝修佬恥笑完之後俾咗對勞工套我叫我自求多福,佢哋開工啲手套幾型,內面噴層厚紅油令手掌位更加硬淨,初戴時有幾個手指位中間仲有幾絲乾紅油連住,好鬼death metal。不過抬完貨之後就death了。




之前點凍都冇事,一轉而家間酒店立即病,其實本身諗住收工買包Panadol再返旅舍啪絕粒瞓到天昏地暗,點知收工時先知道原來今晚裝修公司老細又請晒全世界食飯,仲要係好正式地嗰隻成世人第一次坐喺地下食。但重點都係劈酒,上次劈完一杯啤酒溝燒酒已半收皮,有經驗喇今晚劈到兩枝米酒、一枝燒酒加多兩杯啤酒溝燒酒,都算勁喇,跟住仲可以行三個字路返到公司,曉開裝修佬平時擺鎖匙個暗格,入office摷返漏咗部電話,再順便執一執倉,跟住熄返燈鎖返門收返埋條鎖匙好似冇事發生一樣,再行三個字返到酒店房,打多次飛機再打咁大段字先至撻低昏迷。我都唔知自己其實係醉咗定係未醉。


(至於條韓妹,冇,打飛機時電視見到,求祈出張相嚟呃like嗟)





27/12/2014 SAT.韓留記Day 18


每逢星期六日都係趕裝修日子,雖然我個期都好趕,但裝修公司未做好個場,我一樣冇得開工,最簡單全個場啲電掣俾佢哋霸晒,我想插著部電腦都冇,又點做嘢呢?/p>

既然係噉,朝早就去咗觀光,冇乜地方特別想行,就去咗所謂「首爾版黃金」嘅龍山睇睇。成座龍山根本就係深水埗嚟,幾座大倉庫商場賣電子嘢,不過規劃得幾好,一座完全是黄金,過對面馬路就賣電器,隔籬個倉成棟都係做hi-fi音響同黑膠。都係呢啲地方啱我行。




結果今日都係要讓個場俾裝修佬做嘢,反正病病哋想抖抖,行完「首爾深水土步」龍山之後,去買兩包藥返房瞓過。得返半日都冇乜時間走到咁遠架喇,都係酒店附近行行過對面明洞躝吓算,首選自然又係地下街。因為冇玩膠所以冇特別留意一地下街都係的二手黑膠舖,到今日見有時間認真啲目及目及,發現有一間唔錯。多數冇乜特別興趣因為賣得膠都不離pop同classical,呢間就賣rock嘢多,睇佢擺牆幾隻都知正,大量六七八十年代rock黑膠,不過都幾貴25000-35000圜,即係兩舊水港紙起錶一隻,而呢間舖真係隨便拎起手嘅都會有興趣。好在我唔玩膠,如果唔係真係膠到敗家。




間賣rock為主的二手黑膠舖,正到癲。點知原來最癲係門口箱CD,估唔到黎明同秋官會紅到嚟韓國。




一個人離鄉別井,遲就遲咗,話晒聖誕節就食好啲整個大餐啦,雖然從來冇乜節日意識,揾個藉口食吓平時唔捨得食嘅貴嘢嗟。七點未到就食飯有點早,自從嚟咗韓國晚晚都好早食飯,最勁聖誕節嗰日早收,裝修佬拉咗去食炸豬扒,五點九就食晚餐,佢哋又覺得冇乜嘢,「我哋夜晚不嬲都早食飯㗎啦。」/p>

但諗深一層,佢哋會有呢種概念,唔係因為慣咗早食飯,而係因為成日都早收工或者準時收工。




找到了今晚的消遣節目。但係間旅舍冇碟機,個Wifi又廢上網都冇得睇,結果今晚都係一個毒字。




嚟到首爾做嘢,唔覺唔覺就個幾禮拜又到聖誕。


24號,平安夜,返工,然後匿埋酒店食杯麵;


25號,聖誕節,繼續返工,收工時裝修佬都頂我唔順,撥個輪俾老婆「今晚我遲返」就夾硬拉咗我去間永遠大把人排隊嘅名店食個萬幾圜嘅炸豬扒,不過食完都係匿返酒店一個人毒,因為條街真係多人到黐線。平時間旅舍一到夜晚就嘈怨巴閉,嘈到我開大喇叭焚機都冇人投訴(放心我隔籬房兩條女晚晚一點前傾偈都嘈過Cannibal Corpse),全場爭兩個垃圾Wifi幾乎永世連唔到,加成層廿幾戶爭兩個廁所,唔好話沖涼想屙個尿都可以行幾轉至有得屙。今晚?全層我玩晒,十一點之前得我一間房夜晚仲有光仲有聲炸機想幾大聲就幾大聲,Wifi前所未有咁快咁穩定,鍾意的話每一分鐘去一次廁所都冇問題。簡單嚟講,真係好撚毒。


26號,boxing day,都係返工,不過冇得扑,性就自己FF啦。點知原來南韓會block鹹網咁灰,可憐我這條小毒撚已經要一個人離鄉別井過聖誕,返到房仲要連J都唔俾我J,聖誕飛機都冇得打forever alone。


(利申:其實見到呢個page時,我真係有擔心過幾分鐘之後會有南韓公安衝入我間房捉我去勞改架)



韓留記2015