段記



20/9/2014 SAT


其實我有特異功能,仲要係兩種添。首先,我有特別的飛歌技巧。我份人比較有組織,用咁多年mp3機都會自己整playlist,每隊band每隻碟一個playlist出街聽,再砌一個跟時序由頭排到尾之全集,等搭長途車搭飛機同返工時可以煲全線。唔知幾時開始發現我可以隨心所欲飛去想聽首歌,例如想第一隻碟第四首飛去第三隻碟第一首,正常梗係要拎部機出黎望住慢慢篤啦,但我就會自然知道「click十四次就飛到去想聽首歌啦」唔望齋篤就飛到,就算係唔多熟的band都可以無意識地想飛去邊首就邊首,準確度有90%以上。呢招奇技都令我幾自豪,雖然純粹自娛完全冇實際用處。


第二樣特異功能就係,唔使點講大家都估到啦,咪就係地獄黑仔王托世去到邊衰到邊囉。我之前做過咁多間公司,全部執晒;出街食飯,好多食肆都俾我食死,好似旺角有幾間放題都打邊爐都係我食完之後就執笠;同怒人出一場show,一個月之後隊band就出事;電話用Motorola,跟住Motorola撤出香港;然後轉用Nexus,部N5立即變成末代版成條line話收皮(好在跟住Android Silver冇人理,Nexus有得復活,死唔晒);咁多年黎耳筒用開一隻Sony同埋Denon隻360,兩個model同樣我用過之後就停產;今次估唔到蘋果冇左教主頂住立即出事,當全世界顧住搶iPhone 6時,蘋果唔聲唔聲唔再出iPod Classic。雖然我唔係蘋果fans甚至有點唔太鍾意蘋果野,聽到呢個消息都有點唔開心,因為iPod Classic實在係最接近完美mp3機,而且以二千蚊價位黎講,世界上再搵唔到一部更好mp3機架喇。


冇經歷過連寬頻都未普及個年代的話,唔會感受得到當年科技突破有幾震撼,而家一年一代新iPhone點點點進步之流完全及唔上。正如唔會想像得到當年開個Gmail都係超級威水一回事,Hotmail仲係俾得10MB你用幾個attachment已經爆時,Google一野俾夠一激你,最初想開仲要人邀請你至開得,果陣問人拎邀請開Gmail account個盛況幾咁墟陷。而iPod革命在一玩就玩到盡,我第一部mp3機係JVC,得128MB賣成三千五百蚊,間間廠出都係幾十MB幾百MB時,蘋果一開始已經係用5GB 10GB噉計,當年連256MB USB手指都已經叫先進(嘩我仲記得當年買flash drive差唔多$2先得1MB),噉樣一舊野有成幾激大,真係嚇死全世界,而且整到咁大仲因為可以睇片,我第一部iPod係U2代言部5G,係第一部可以彩色螢幕睇片之mp3機(好似係),我就從來未用過iPod睇MV睇戲,不過單為有30GB已經夠爽,果時屋企部電腦兩隻harddisc夾埋先得40GB仲要全家分,我仲係聽緊128K mp3一隻碟先三四十MB,30GB已經幾乎等同於無限架喇,大佬佢一部iPod已經大過我部電腦一隻harddisc呀。


而且真係靚。iPod之前冇幾多電子產品敢用全白,雖然我就好怕成日驚整污糟,但個設計實在冇得頂,亦邊會諗過一個圈就可以做到晒全部功能,中間仲一定要隻手掂住先轉到,出果時屬於超級高科技超級型。聲又係勁靚,之前用過兩部聲都夠厚夠實,但有點太多低音,其實聽歌我好怕太重bass包括聽metal時,但十間廠九間出mp3機賣點都係(超)重低音甚至谷到拆,iPod就好在賣音質聲好清層次感亦夠,聽pop一流夾對Shure聽The Gathering更是最高享受,而好在我聽metal從來關注中高音多過低音,所以iPod隻聲薄左少少,但完全符合我所要求面面俱圓,雖然對耳筒就真係食晒屎。


同埋煩在一定要用蘋果自己插頭條線同iTunes過歌,雖然之前已經慣左全人手upload歌整playlist,所以問題唔大甚至用iTunes處理更方便,而且蘋果自己條線upload file速度超高比人快十倍都有,但用咁多年憎足咁多年,人人都話蘋果野易用,唔好意思我可能係全世界唯一一個意見相反之人,iTunes個介面根本唔好用仲要越出越複雜完全唔user friendly,而且過親歌一定要靠佢條線佢個程式,即係去到其他機有歌想入落部iPod都可能要手指抄返屋企先過得到,Windows版iTunes又出名食ram仲勁過Chrome,次次開親部機都一定出問題。我只得iPod一樣蘋果產品,已經夠令我對呢個系統非常反感,立誓一日蘋果要我用iTunes,我一日都唔會用iPod以外任何蘋果貨。


只不過又要小又要用的情況下,唔覺唔覺就用左iPod差唔多十年。第一部5G係親戚抽獎抽到但唔聽歌就送俾我,作為一個U2 fans冇蘋果同U2合作出果部紅黑色有埋簽名特別版有點可惜,不過唔使錢有蘋果機你用仲想點丫。點知用左半年唔夠就瓜左,原來係成水貨出事大鑊到上埋報紙,上去維修中心入面全部人同我一樣黎整iPod,counter條友都冇咁好氣解釋收完俾部新機就算(雖然都要象徵式地等一個星期至有得拎)。其實當時有點失望,所有人講到蘋果點堅點好用,但連功能最基本件產品iPod都可以大問題到上報,不禁問句「唔係卦又話蘋果野好堅好好用?」好在蘋果有樣好就係出事時直接換部新機俾你廢事浪費大家時間我有新機用又開心,同第一年衰一鑊之後跟住都冇乜事發生,我超級粗用部機差唔多每日跌起碼一鑊,但跌足咁多年都冇事只芒右下角黑左撻同間唔中插電腦load唔到,同舊電由本來頂到八到十個鐘變到得返四個鐘有點頂唔順囉。如果唔係部機唔知點解放屋企當眼地方又冇人經過會叉叉下電突然間消失左,我相信呢部用左七年的5G拎去換換電的話仲可以用多好多年。


只係可以屋企唔見機咁神奇,相信係個天都叫我出返部Classic啦。有一段時間試過用電話代替,有好有唔好。iPod我從來唔較EQ,其實因為預設EQ唔太掂,好似低音一係正常一係超重冇中間位,所以咁多年都係用正常平衡mode聽歌算。電話聽歌用Poweramp可以任set EQ高中低音想點都得,但唔知點解電話會咁白痴音量只得1-15你揀,好多時聽歌最大問題就同iPod EQ一樣冇中間位,覺得細聲但推大一度就變到太大聲,對Denon耳筒隔音又唔算強,出街用電話聽歌好多時聽到好冇癮甚至辛苦。iPod就係高科技在音量拆到好細用個圈慢慢轉逐少逐少較,音量控制咁細緻呢點好多電話同mp3機做唔到。所以跟住都要豪一豪$1888出返部iPod Classic,係咪命數呢同部5G一樣一年未夠就壞又要拎上去換新,只希望拎左部翻新機之後可以長命百歲,因為當我轉用Classic之後,iPod就只餘touchscreen系列了。


你問iPod Touch即係打唔到電話的iPhone嗟,有乜唔好?唔好就係同蘋果無緣就係無緣,唔知點解人人都話易用的蘋果野我到而家都仲未曉用,出Classic一個原因就係借左部Touch返黎用過一排之後發現我真係頂唔順蘋果touchscreen類產品,再加提高去買Classic之動機。同雖然Classic個系統都有美中不足之處,好似連直接係機入面改playlist內容同查一個playlist全長幾耐之類咁基本功能都冇只可以聽歌,只係當要用touchscreen就代表想轉歌甚至較音量都要拎部電話出黎(Touch機身個音量掣同電話一樣,做唔到轉圈種細緻調整),噉我仲點可以用到而家招唔望齋摸就可以想聽邊首立即飛去邊首招特異功能?冇左個圈同實體鍵的話,我仲點可以好似而家噉部機擺褲袋,想較大細聲伸手入袋轉圈,想飛歌係袋外面篤左右制就得,連機都唔使拎出黎就能夠控制一切?鍾意獨立用mp3機聽歌除左聲普遍比電話靚又唔怕搶晒電話電,仲為出街時可以唔使事無大小都要拎部電話出黎睇睇,唔望只用手摸就可以轉歌較音量,假如到頭來又係要全部經touchscreen做,就俾唔到我追求之效果同效率。


只可惜iPod出Touch版之後,Classic就變到同Google Reader一樣,超好用、超方便、超強大,只不過唔會離開到小眾玩意同死忠派領域,當無利可圖時就一定會cut。有幾多人明白iPod聽歌點都好聲過iPhone呢?加埋可以一舊野包晒全部功能時,又有幾多人仲會old school地另外買多一部機專為聽歌呢?既然最正確商業決定係谷人買iPhone或者幫手清iPod Touch貨計劃下一個停產時間表,非touchscreen的Classic就只好訣別了。都幾諷刺,上一次U2同蘋果合作時,係出其中一代最重要iPod;今次U2又幫蘋果手,不過佢地有份幫手推動之實體鍵版iPod反而被消滅了。而家對住部機都幾唏噓,呢個iPod Classic + Denon 360組合係最完美聽歌組合,但係兩樣都停左產,是但一件壞左的話都唔知點算,我再搵唔到另一部mp3機同另一對耳筒更加適合我。360香港已經冇晒貨,黎緊去東京可能會掃返對,雖然日本買打埋稅個價錢等於香港兩對;認真考慮緊反而係,係咪應該襯而家街舖仲有Classic尾水貨時,執定多一部做後備?好命的話,可能兩部Classic陪到我過世架喇。


每週一相片大行動 2014 Week 37:R.I.P., Apple & iPod Classic

http://lau-sir.com/one_week_one_photo/2014_week37.html


每週一相片大行動 2014 Week 38:iPod Classic & Apple, R.I.P.

http://lau-sir.com/one_week_one_photo/2014_week38.html




27/9/2014 SAT


其實我份人一向唔多注重生日呢回事,又唔係假期咪又係要返工,但係都唔介意大家用黎做藉口送野俾我請我食飯,不過今次一定要多謝Stan大佬份超精美生日禮物,做左三十幾年人,呢份應該係收過最有心思之生日禮物,有主題禮物盒仲要一份拆完又一份。件Walking Dead tee唔夠膽著我驚老母洗衫時嚇Q死佢,不過居然搵到蔣嘉瑩唯一一隻碟《約會》,對我呢個《我和殭屍有個約會》fans黎講實在太過珍貴。真係講柒十柒次多謝都唔夠。


雖然亞視一早已經執柒左都冇人覺得可惜,其實早前真係有為佢地擔心過,就係話出糧都唔夠錢、政府已經開埋聲話有機會收返個牌時,立即肴晒底:「大佬,你點都要播晒三輯《我和殭屍有個約會》先好執呀!」呢套劇係《天與地》之後第一次由頭到尾每晚都追之劇,仲要連播三輯即係追足半年,不過絕對值得,雖然第三集故事同剪接都唔太得,全個劇本真係冇得頂第二集直頭神級,而家根本唔會搵得到咁天馬行空咁突破故事,加埋連茄哩啡做戲都好正(黑仔搞笑好掂絕非而家王祖藍帶起所謂「喜劇演技」之流,要睇《警界線》,佢係咪而家唯一一個同時簽兩間電視台之演員?),而作為特技片頭兩集ETV level CG加假到笑反應彈而家睇返其實相當富娛樂性,第三集CG拍得住甚至超越而家無線製作,又可見製作有幾前衛、當時亞視肯為一套劇投資幾多心機,就連向來唔睇本地劇的老豆都話要追埋一份。所以追晒之後,只會對亞視同而家香港電視工業徹底失望,好在時間編得差所以冇得追埋另一亞視神劇《千王之王重出江湖》,如果歲月留聲台係將呢套連住《我和殭屍有個約會》播,今年年底我應該會直頭將屋企部電視無線同亞視兩個中文台delete埋。


不過講到成功一大因素,始終係音樂。亞視劇集組一向強在音響,音效幾乎電影級級數(你唔嫌有時太誇的話),仲好鬼鍾意用日本動畫歌做配樂,《包青天》明明係查案片經一經亞視手都可以變到成套武俠片咁熱血,之後有線都向亞視取經甚至更上一層樓播Nirvana播Therion(這是新聞台之外另一我超鍾意有線原因)。當然令第二集大受歡迎同好多人追好多人識,就梗係首主題曲《假如真的有個約會》,呢首應該係輝黃時代之後香港電視主題曲史上最接近完美顛峰。劇紅歌更紅,自然立即食住條水出碟,隻EP叫《約會》,《假如真的有個約會》之外仲有《單獨約會》同《約會之後》兩首,噉都可以用「約會」砌到張concept album出黎,比當年陳啟泰主持《百萬富翁》之後出隻碟叫《最後答案》更cliche。


唔知係咪買唔到原版版權,首主題曲由power ballad變成chamber pop編曲版「歐陸Remix」,唱法都唔同放輕把聲,不過都好聽。另外兩首係陳慧嫻式典型pop歌一快一慢,見到陳慧嫻個名都知出事啦,老實當時香港流行曲其實仲係相當老土,K歌為患搞到發展慢左最少五年,抒情《約會之後》冇乜特別,不過輕快的《單獨約會》有點驚喜,中間仲有先木結他solo八個bar再木結他鬥keyboard solo多八個bar,可以一首歌入面有長過八個bar solo仲要係兩種樂器鬥彈(雖然都係慢solo唔點高技術),在K歌橫行之香港流行曲黎講非常難得。不過最kvlt始終都係入面仲有一舊水年費蔣嘉瑩國際歌迷會申請表格,同埋大聯盟卡拉OK優惠券加修身堂$500豐胸coupon,oh the good old times,想當年中學時代卡拉OK仲係百花齊放,樂壇廢柴張德豪老豆搞果間創藝臨執笠賤價到$15唱lunch K,新歌多舊歌齊仲要勁多rock/metal歌,而且飯餐款多大份又好食,大佬果陣麥記出名平過茶記,都平唔到十五蚊食到一餐飽仲可以唱埋K啦,當時係考試之後只返半日,日日放學成班人何文田出去尖沙咀金馬倫間創藝食飯唱K十分歡喜,住得遠的話分分鐘車費仲貴過$15呀。只可惜俱往矣,跟住加州紅一招獨家試唱打殘大聯盟,不過風水輪流轉最後反而俾大聯盟死剩種Neway食左。未經歷過當年大聯盟大戰加州紅時代,唔會領略到果陣唱K選擇多又競爭大而間間都肯俾著數你係幾咁開心,邊似而家又少(舊)歌又收得貴仲要冇野食加唱一陣就俾人趕咁受氣?


只可惜有首超強登場作唱歌又好都冇用,傳聞當年佢見自己咁紅想入英皇,但同亞視傾唔掂數得罪人,結果出完隻EP之後,就同隨碟附送coupon上面間Big Echo一樣消聲匿跡,直到今年套劇重播多人知返,亞視台慶搵佢登台,先第一次睇到佢真人聽到佢唱live。不過相信係絕唱了。所以呢隻EP我會好好珍惜。又要多謝多Stan哥柒十柒次至得。


(between,《我和殭屍有個約會II》係我回憶一大部份,除左神劇地位同首無敵主題曲,仲有入面個差佬小炳係我中學師兄成元鈞。佢本身係超級李小龍迷,校慶請佢上台表演耍雙節棍同飛腳扮踢「東亞病夫」好鬼high,表演慾爆棚做埋港男真開心,當年想媾Crystal Leung但媾唔到更成一時佳話。亦可能因為噉,入亞視做唔夠幾套戲之後就唔見左人了)




2/10/2014 THU


請謹記,路障係最重要,只要冇路障,警車就可以直接衝入陣地趕人拉人。琴日一葉雙輝陳淑莊突然出現四處叫人拆路障,跟住今日周融同愛字頭話晏晝開始有行動,香港島亦多左大量警察旁邊駐守,跟住會發生咩事,可想而知。所以路障點都唔可以拆、點都要撐住。最好各地點有人自發去路障處睇住,以防俾人e.g. 不明來歷糾察隊襯人唔覺拆走引兵入關。




4/10/2014 SAT


我會將我由2014年10月3日6:45到場至凌晨兩點過後離開,於旺角街頭一切所見所聞,亦即黎棟國所講之「好戲在後頭」寫低。


3/10星期五返工之後出旺角,其實我只抱「贏就一齊贏、輸就一齊輸」心態,就算俾人掃晒場都要睇下輸成點。點知原來件事未完,六點九去到時未算好多人,主要集中亞皆老街彌敦道交界十字路口,我可以企到亞皆老街近女人街條班馬線,全部人由四面馬路圍堵中間,仲有幾乎全世界記者在場。匯豐銀行對出安全島側邊放音響個鐵架上面有個madam嗌咪叫大家離開,大家當然睬佢都傻,因為而家全部人唔走圍住困係中間果班,就係晏晝打學生班黑社會,佢地逃走唔到,差佬又唔拉人,而出現呢個圍堵對峙局面。


至於六點前情況,資料來自不同目擊者,當中一個健談阿叔,我相信佢就係英國衛報專題文章《Hong Kong protesters beaten and bloodied as thugs attack sit-in》受訪者Andy Chan,佢駐守朗豪坊外地鐵站C出口位置時以風趣幽默全晚幫大家維持士氣,而且係黑社會清場目擊者。佢當時係地鐵站上緊地面,途中撞到黑社會追打學生打到落地鐵站,有個男俾人打到流晒血,另一個女過去勸交都俾人打埋一份,所以佢驚都立即加入旺角圍堵黑社會行列。


事件過程,聽到係四五點開始大打出手,當時已經接近散場,留守學生得幾十人,突然出現大班人衝入去見係學生就打,仲要見血都唔停手果隻。好耐之後差佬終於出現,點知得十零廿個,更加見唔到任何防暴裝備、胡椒噴霧、催淚彈或者雙面旗。成條街都叫佢地做野,點知班差佬係企係側邊唔理,仲要留守班學生想還手時制止佢地唔准對班黑社會郁手。然後差人終於做野喇,點做呢,當有人打你你想舉手擋時,差佬捉實你隻手「我救你走!」跟住拉你走,佢一面拖,幾個黑社會就襯你冇手擋時追打,仲要一面打你一面嗌「嘩!你做乜打我呀!」而拉你走個差佬完全無動於衷。好喇班差佬終於將你由彌敦道路拉到去朗豪坊果邊,你以為冇事時,側邊馬路又衝另一班黑社會出黎繼續打,原來班差人係「救」你去人打,打到你落地鐵站都唔停手,差人都只係同你講你一還手就係傷人,同記者訪問你對鏡頭講黑社會打人差佬唔做野時喝你唔准講野。


所以七八點已經好多人,學生再建物資站,當中好多人相信係第一次上街。有對老夫婦住示威區樓上,條街出事時屋企老人家報警,佢地亦睇住現場情況,有個黑社會自己扮跌低,有醫生定醫護員過去話幫佢睇睇咩事,佢彈起咬人隻手再繼續訓低,然後無線報「有人俾示威人士推跌暈低」,佢地睇完電視報導立即出黎。而在場男女比例係五十五十,就係一句「示威就預左俾人非禮」,好多女性出黎旺角聲援(有關非禮女示威者,請同時參閱《喜記老闆踩場,涉嫌非禮被警帶走》),如果今日班人可以打完人非禮完女學生之後大模斯樣離開,就代表即日起你身處香港已同大陸一樣失去任何人身安全保障,因為香港法律禁止行私刑,人身安全要靠紀律部份/警方保護,所以唔好成日話「一面鬧警察,又一面要警方照」,呢樣係法律規定,如果可以自己帶防護器具出街,我相信好多人唔介意好似去到咩國家都鍾意食生果個阿叔噉,任何時候都有把刀傍身。但而家差人擺明唔會保護你,你亦冇權自行保護自己,相反黑社會打人唔會俾差佬拉,你還手反而會被拘捕,即係話從今以後香港地只要係黑社會就可以見人就打、見女就強姦非禮,而完全唔需要負法律責任,甚至有警察做佢地私人保鑣。所以今晚旺角街頭特別多人。


當街頭開始多人包圍黑社會,立即有大量差佬出現,比學生俾人打時多幾倍,而呢好大班警察黎到立即圍起防線,去保護班黑社會。冇錯你冇睇錯,黑社會打完人之後,居然得到警方保護,而唔係被警方拘捕,班差人仲要拎警棍出黎威脅市民唔好行前,成個計劃根本就係黑社會打走示威者,然後差佬趕走到場聲援市民徹底清場,真真正正警氓合作。有人話搞事呢班唔係旺角陀地而係西北落黎做野,因為旺角古惑仔師承牛佬講義氣,而鄉紳派係牛屎佬當正自己土皇帝乜都唔怕乜都敢做,所以打完人之後仲可以留係條街度對住市民同記者叫囂成個鐘都唔走,因為佢地知道差佬一定會保佢地走。只不過因為人實在太多,而差佬擺明唔會做野,結果條街只有越來越多人,「拉人」之聲此起彼落。


聽到在場人士講,被圍困黑社會主要有兩群,一群係匯豐銀行下面近轉角位,另一班係彌敦道至朗豪坊中間路段,過程中差佬已經幫手放走左幾個 - 冇錯你又冇睇錯,差佬到場居然唔係拉人,而係將黑社會同市民隔開,然後襯市民唔留意或阻止唔到時放佢地走,而且為保班黑社會安全仲要不惜千方百計,好似匯豐銀行外彌敦道路段約八點人群突然起哄,因為班差佬居然圍起一個圈護送幾個黑社會離開,不過去到近安全島時俾市民迫返去匯豐下面,班黑社會走唔甩,但班差人繼續保住佢地,等市民唔可以對佢地郁手。我寫完都覺得好超現實。


八點之後匯豐銀行下面有人搞事,民眾嗌「警察拉人」甚至開埋條路俾佢地入黎,完全冇差佬理,結果要市民自己行使公民拘補令制服搞事份子,之後再擾攘多成個字終於有警察現身,不過差人似想只帶走佢就算,全部人梗係唔收貨大叫「落孖葉」,大佬打人係刑事喎,手扣都唔使用,唔係卦?又擾攘多好耐,可能差人見呢舖冇其他選擇,至戴手扣押走個犯,當然大家都知只係做場戲,全日好多人都目擊到差人帶犯出去之後轉個彎已經放人,只差在送上的士之後未幫個犯俾埋的士錢。大家唔妥係一來冇可能唔拉人,二來對學生你都用手扣時,拘捕犯毆打刑事罪之黑社會邊有可能唔使落孖葉?而家差人係直頭想連戲都唔做俾你班市民睇呀。


結果終於正式拉左第一個人,而全晚我見到落孖葉拉只有兩個。如果你問點解黑社會公然打人仲要打完唔走兇返市民記者咁大件事,居然可以差唔多冇拉過人?差佬甚至會幫手放犯走?說話頭先單野過程中,有個洋警官現身(請注意,當晚旺角洋警官有兩個,光頭個有幫市民擋黑社會係好人黎,講緊係肥肥地成日講笑撩女仔果個),經過我面前時聽到佢同隔籬個華人白衫講 - 好似係咋,唔係肯定呀 - "Don't arrest anybody, just remove them to safety." 雖然我對自己英文水平有一定信心,都唔敢講我冇聽錯,亦唔知佢句中arrest對象係示威者定打人果班。你可以按幾日間發生之事,自行思考。


然後現場話地鐵站C出口即朗豪坊H&M對出位置唔夠人,就過去支援,亞皆老街彌敦道路口至朗豪坊路口一早俾警方前後用封條分做禁區,我企封條前,隔籬個社工個仔晏晝留守彌敦道時俾人打到入醫院,好多人講返晏晝清場同差人護送打人黑社會離開時都眼濕濕。個禁區本身只係俾差人同記者駐守用,後來班黑社會實在無路可走,差人就將佢地全部護送入禁區內保護,市民就前後路口加兩邊行人路包圍,不停問候各位警察同黑社會的親人。MK朋友向來充滿通俗智慧,呼籲既然藍絲帶係支持警方執法,警察就應該對打人者如曾偉雄所講「嚴正執法、無畏無懼」。此情此景,就同今時今日中國國歌實際上好比中國禁歌一樣咁諷刺。


因為已經無路可退,如是者僵持左幾個鐘,不過期間警方並未有放棄放走班黑社會,扮普通市民光明正大放走試過,警師護送出去試過,就連交更差人列隊出去時,隊伍中間夾住幾個黑社會偷運出去都試過。有架警車自禁區離開,我相信入面已經運走一大班出去散水,而係警方全力保護同突圍之下,有幾個黑社會成功被差佬護送落地鐵站,仲趕到切追尾班車返屋企,唔知差佬有冇幫佢地買埋車飛呢。我諗全香港除左班官之外,呢班黑社會就係得到最嚴密保護一班,同埋點解警察可以咁抵死居然唔係困住班犯之後拉人,而係無論如何都要放佢地走?


去到兩點幾,相信差人都知長此落去唔係辦法,最後直頭光明正大帶最後幾個行出去,立即大班人包圍追住以防差佬又放人,但係就算捉到入差館,坐一陣轉個頭都係放佢地走架啦,又唔係未試過。我真係未見過有警察可以有證據都唔拉人,仲要幫手窩藏罪犯八九個鐘加猛咁偷運出去放走都唔拉,仲要黑社會打學生市民想郁佢地時幫班黑社會擋,相反現場市民同差佬有少少衝撞,即搭。同我到而家都唔明點解唔拉得人,喂黃之鋒冇做任何動作冇任何犯罪證據,都可以無端端俾差人拉去差館拘留四十八小時,仲冇搜查令都可以「因為相信將會犯罪」而爆入屋抬野走,反而而家班黑社會已經俾人拍晒片影晒相俾市民包圍埋走唔甩,有犯,真係唔拉?既然每次示威差人落場時,在場無論係咩人就算只係剛剛路過,都通通拉晒返差館先有殺錯冇放過,點解今次又唔可以拉住先?而且仲會調返轉警察保護黑社會再落力放人,除左警氓合作,我真係諗唔到咩原因可以要警方勞師動眾,出動比市民被打時更多警力、更多裝備,再用咁多個鐘頭去保護同送走打市民班人。


黑社會走晒,跟住點收科呢?風聲傳來金雞黎左班防暴隊,晏晝學生俾黑社會打時都唔黎,而家黑社會俾差佬放走晒只餘市民在場時,防暴隊就出動了。企我隔籬個哥仔立即開背囊派裝備俾各位,我收到一個口罩同一條毛巾,而家香港人已經進步到視胡椒噴霧同催淚彈只是一般威脅,出門口已經帶齊裝備應對,我唔知係可喜定可悲。好在可能見在場仲有大量記者,最後差人剪封條收隊,彌敦道就由俾黑社會同差佬合作拆到得返路中心個帳幕,回到眾人同心重新霸佔全個十字路口,並已經立即有人建立四方路障,差佬亦由中旅社走到朗豪坊上車,相信正式收隊返警署。


我親身經歷呢八個鐘之後,你唔好再同我講香港警察係伸張正義、除暴安良、儆惡懲奸,更加唔好同我講而家差佬執法係不偏不倚、公正嚴平、絕無選擇性。我唔直接答你,我用例子答你:首先香港係行法治唔係人治,即無論被傷害對象係咩人有冇犯罪,只要你有傷害佢,你就犯左罪可以被檢控。假如我前面有個差佬,我係佢面前一拳打落企我隔籬條友度,或者去非禮一個女仔,你估幾多秒鐘之內,我會俾個差佬推落地落孖葉?跟住又需要幾多時間先至會俾人拉上警車押去差館落charge錄口供?全個過程應該唔使半個鐘。但係我唔相信我打完人或者非禮完一個人之後,可以草都唔使著留係現場耀武揚威,跟住警方會派成隊差人同我講「放心我地唔會俾你有事」保護我幾個鐘,仲要用盡任何方法都要唔拉我而放我走囉。


今場,果然是一場好戲呀。雖然班差佬演技就好屎。應該話,佢地而家已經連戲都唔做喇。




5/10/2014 SUN

Wintersun’s Jari Maenpaa and Nuclear Blast Have Kissed and Made Nice with Each Other

http://www.metalsucks.net/2014/10/03/wintersuns-jari-maenpaa-nuclear-blast-kissed-made-nice/


好耐未寫過有關metal文章,今日特意寫寫,因為對現今香港時局,呢單新聞有一個啟示。


Wintersun最出名係可以用差唔多十年出一隻碟,原因係唱片公司只俾好少錢佢去做隻碟,視野廣成本卻有限,《Time I》就係半妥協之下完成,好多部份只有用家中器材完成,可以聽得出製作方面有相當多瑕疵。所以《Time II》Jari Maenpaa決不讓步,一定要入專業錄音室錄音,只係單憑唱片公司微薄資助冇可能達到目標,亦因合約所限唔可以經群眾集資,結果一拖再拖。


當中可以帶出好多議題,例如可以話佢太理想化唔現實,幾多樂隊錄音連搵似樣少少器材錄音都做唔到?既然唱片公司俾得你係得咁多,「袋住先啦!」其實Jari可以同《Time I》時一樣,有幾多錢就使幾多出左隻碟至算,「話唔埋之後唱片公司肯投資remix remaster呢!」不過佢選擇全力堅守立場,長時間爭取之後,終於輪到唱片公司讓步,批准佢用自己要求方法 - 群眾集資 - 去達成目標。雖然過程辛酸亦用左好多年時間,但最後爭取到,係真正想要之成果,而唔係一個過後連自己都面對唔之不淪不類結果。


凡事總要貫徹。今天你是金鐘派還是旺角派,請自行選擇。




6/10/2014 MON


我真係覺得Madfinger好多時擺明玩野。之前中國其中一個任務係佔領兵工廠,因為大陸政府知道終有一日國內會有大暴動,就起間兵工廠專門生產對人彈藥作為鎮壓準備。而當今個星期香港發生雨傘革命,Dead Trigger都打到去香港了,個任務介紹,仲好鬼死應景添。


(between,中國任務地圖好多素材根本取鏡香港,之前打極都冇,今次終於有香港了。但係trailer入面香港地下水道打喪屍跟住隻巨人喪屍一拳打爆天花板,然後走上地面同隻巨人大戰呢一幕呢?)




23/10/2014 THU

Space Invaders@涉谷