我屋企有咩節日從來唔會係正日搞活動，因為成家都最憎排隊最憎迫最憎無端白事俾人收貴，所以父親節隔左咁耐，老豆終於話「咦！係時候食返餐好！」自從好多年前試過一次成家人去酒樓食飯，俾幾舊水野食唔掂服務又差仲要迫餐死之後，老豆次次叫成家食飯都去食自助餐，一來大家都鍾意食西餐多過中餐，同自助餐乜都有任揀又可以食到夠食到飽至收手，最重要陷家都鍾意食甜品所以每晚最後狂掃蛋糕同雪糕係大家最開心時候，我屋企上次去茶樓飲茶係幾多年前我已經唔記得。
咁多年試過好多間酒店自助店，好平食過，好貴又食過，最出名都試過幾間，但係兜兜轉轉，最鍾意食果間反而係屋企樓下8度海逸。估唔到土瓜灣酒店收得尖沙咀價錢，就真係有大區酒店水準，我老豆好簡單只要海鮮夠多就好食就得，所以通常只有最貴幾間先滿足到佢，就算收到五六百都唔係間間海鮮佢會話好食，但係8度食過一次之後話一定要再食多次。我唔食海鮮所以去食自助餐多數頭兩round已經冇咩選擇，呢間係第一間我會食到飽都仲未試晒所有想食堆野，食極都未食好鍾意的刨冰，因為有無限Haagen Daz，同埋個芒果拿破崙真係正到癲。
只可惜好事總是可一不可再。係咪已經俾近來連我屋企呢邊都開始出現成千上萬架旅遊巴帶來班千千萬萬強國人攻陷左呢，隔左大半年嗟，個自助餐水準完全唔係同一回事，野食少左，補得慢左，同埋唔好食左，除左雪糕同芒果拿破崙仲keep到，之前土瓜灣食到尖沙咀級數自助餐仲要食到飽都未試晒全部野果份驚喜呢。我討厭政治，但係我真係好鍾意食8度海逸個自助餐同芒果拿破崙架。
（between，其實我到而家都唔知點解間酒店叫8度。點睇都係斜多過八度啦下話。）
做外判IT，好處係可以一次過見識晒兩個最男人浪漫行業。越對得多programmer越覺得呢班人真係好神，例如正常人買大芒就係貪睇字睇得清楚，但program調轉芒尺寸同字大小係成反比，報紙字體大小一開四已經係標準尺寸，見過最勁係一開九，我隊到個頭埋個芒咁滯都睇唔清楚，但係條友「冇乜野丫」唔使戴眼鏡隔開兩尺都睇得到。而叫得做IT做programming搞程式直頭係本行添啦想點玩就點玩，想要咩software？上網搵囉。冇開心版？hack囉。功能唔夠？改source code囉。發揮唔晒？hack埋hardware bios囉。始終唔合用？夜晚食完飯冇野做的話自己寫個程式去做個task先。真係好型。
而做得外判就即係只要有生意做狗屎垃圾都接啦，所以我其中一個project就係去葵涌管貨倉，男人竇自然更加浪漫。做得倉庫環境自然唔會有幾好，有幾差入得去就食塵多過食飯仲要係冬天入去都可以流汗，而地下除左車多就只得地方多，想搵個地方可以抖一抖涼下唔使食塵都冇，噉點呀咪自己搞掂囉，成班佬一手一腳用卡板紙皮起間屋出黎，有電有檯有凳有燈有電腦有埋雪櫃冷氣做工作室當埋休息室，雖然後來老細俾錢將隻貨櫃改裝成辦公室，始終都係間紙皮屋正，龍床不及狗竇嘛，係要噉爛撻撻先至夠feel先有果陣佬味。
講得好聽就係男人的浪漫，實際上其實係（好撚）毒。所以點解咁難搵女？你鍾意狗竇，但你覺得（港）女會揀龍床定狗竇呢？
今天又是到啟德郵輪hea的一天。冇乜做架真係，老細話佢去見客，拉左成隊人一齊去做傍友扮到間公司好似好大好人強馬壯，輸人唔輸陣嘛。同埋飲紅酒。老細一坐低就話要飲Lafite，我又唔飲酒，又唔識讀果堆成抽長又唔知應該用咩文讀的酒名。唯有點Lasing啦。
阿信屋實在是我們窮撚的偉大救世主，唔係有佢，呢個時勢仲邊有可能$3X買到一包5kg越南米？去百佳惠康買五斤泰國米澳洲米的話價錢起碼兩三倍啦，隻越南米又唔係唔好食分別只係濕身少少，所以屋企附近開分店之後，我老母入糧貨寧願行多幾步路都唔幫襯百佳惠康。不過低處未算低，今期流行螺絲粉長通粉蜆殼粉400g通通$4.1一包，400g概念係夠煮四大碗，而且有會員卡七折三蚊一包，就算冇得平到盡街坊價都有八折先三個半（其實到而家我都未知幾時當我會員幾時當我街坊，是但啦八折都好平啦已經），然後落街市買$20免治牛肉，撈埋可以整到四兜免牛意，隻粉又要好食＆食得飽喎，自此老母成日叫我經過阿信屋就買幾包，我亦成世人第一次開始帶飯，因為當而家出街食飯四十蚊已經係基本消費時，廿幾蚊夠一家人食一餐、$5食得飽你，真係慳到好多。同埋真係好食嘛。
雖然今集依然好睇，不過黎到第三集，《Expendables》呢個系列已經相當大危機。第一集概念同場面都好，衰在史泰龍自己做導演，搞到套戲好亂；第二集知驚搵真係識做導演的人去導，故事場面都冇唔妥，差在一切顯得太簡單冇乜挑戰性（有Chuck Norris世上仲有乜野難事呢）；今集似返第一集，缺點係想講好多想做好多，結果好多方面都高不成低不就。
似乎史泰龍已經唔記得《轟天猛將》要搵咁多猛人演原意。頭兩集論戲幾差都好仍然會覺得精彩，因為人人都有自已solo時間拍得出個個隊員各自特點似場盛事，而家雖然玩返第一集種硬橋硬馬真功夫，但又明顯打得冇第一集咁激，為左過電檢等細路都入得場卦，Jason Statham玩刀片到周圍血或者龍格爾霰彈槍分屍全部冇晒。班新仔仲灰，有個話枝XM25高科技爆破彈狙擊槍點先進點勁，點知出都冇出過，不過點灰都唔夠李連杰，居然只出黎開槍，唔使打功夫你搵佢黎做乜鳩？結果成隊十幾個人，除左個搞笑西班牙佬同真係打得勁條女之外，其他全部都係拎住相同的槍做埋同一樣野完全冇分別，講到係史上最危險人物Mei Gibson更加講都廢事講。如果可以加段李連杰同條女中國功夫+MMA一個打十個，會更有睇頭。（between電單車一野飛上八樓果場真係精彩，坐我後面班女睇到尖叫）
劇情搵得返上集唔夠之危機感，只係隊名叫Expendables，三集以黎幾乎冇死過人仲要死都係路人級角色，十個人打人數多十倍仲出埋飛機大炮的軍隊，依然可以成隊人全身而退槍都冇中過冇穿冇爛，仲係咁無敵會唔會冇癮得滯呢，要一開波中槍個黑鬼死好難咩，而且如果佢個角色死的話，跟住劇情發展都會合理好多。
有樣好過上兩集，就係玩演員出身同經典對白，史泰龍加Wesley Snipes根本就係《Demolition Man》，跟住現實真係坐過監的Wesley Snipes戲入面用佢現實入獄個原因黎講笑真係笑死，阿諾舒華辛力加玩佢舊戲金句更加出神入化，最後史泰龍tribute埋《Judge Dredd》，笑位設計得比上兩集精警同時自然唔夾硬，只係精得滯，我睇《轟天猛將》除左為成班麻甩佬以一敵百見人就殺，仲有殺完人之後成班佬圍埋一齊互寸互窒架。笑位好左特別好過上集唔少，只係希望可以有更多囉。
不過同睇無記班人一樣，都係又要鬧又要睇架喇，睇個尾都知長拍長有，佢肯拍開到456柒集一樣會俾錢入場。套戲又未至於話好睇到想入多次戲院睇多次，不過勾起左舖old school打星癮，等我聽日狂loop Austrian Death Machine全線至得。GET TO THE CHOPPER!!!!!!
成日都覺得Tim Cook好慘。毫無疑問Steve Jobs係最接近神的男人，不過佢marketing方法亦係做神，將蘋果全部捧上天高再踩到其他人低過地底。佢有人冇，「就係劃時代就係最前衛！」（呢一點唔係蘋果迷的我都認同）人有佢冇，「垃圾黎，蘋果唔會有亦都唔需要！」到後期蘋果新software/hardware開始出現「垃圾」，畫都廢事同你解，一句收你皮：「This changes everything. Again.」不過冇人會質疑，因為Steve Jobs就係神不要問只要信，而且你點鬧都好一樣大把人／港女俾，正如我公司班programmer手提電腦一定係用Mac，雖然買返黎都係裝Windows用office，仲要一部唔夠買多部擺屋企，有個型到部Air買完返黎開得幾次，跟住同書一齊打棟擺上書架做擺設多過用黎做電腦，「生活態度既野你識條春咩！」
所以佢在生時威到盡，但死左之後Tim Cook接手就灰爆了。佢冇錯，錯係Steve Jobs每次出新野例必先數爆其他人踩住人上，當年出iPad時就好口響「戇鳩先會出細tablet」，瓜左之後Tim叔唯有樣衰認戇鳩同大家介紹iPad Mini。iPhone又係另一口響代表作，未死之前iPhone代代個芒都係咁高咁大（or咁矮咁細），只不過用神級marketing包裝到點樣完美尺寸、點樣（好似其他牌子電話噉）大部少少已經唔可以單手控制、點樣最符合人體工學，大家又覺得係喎細得有道理喎，跟住佢一死部5已經搞到Tim叔又樣衰多鑊，而家第六代仲要bigger than bigger添都唔知可以點樣兜喇。
其實好多年前已經覺得蘋果只要一出大芒版立即可以稱霸天下，好似Galaxy Note初出個個見咁大部根本冇人睇好，點知爆冷成為其中一個最賣得電話系列，就係一班用完iPhone覺得太細的港女見大iPhone差唔多成倍就仆去買Note，所以只要有日蘋果出大芒，成班人／港女肯定立即仆返去用iPhone，要立即搶多幾十%市佔其實唔難。問題係Steve Jobs時代連唔用蘋果班人都覺得蘋果型，就係可以硬件規格唔係勁甚至弱、芒咁多代都係咁細，偏偏用設計同UI+UX打贏幾十個Android電話牌子，當時你只會覺得Android電話係抄iPhone特別三星出品。但iPhone 6．．．唔好意思5代手感同設計我都覺得好完美（雖然個人口味仍然嫌太輕太細），但今代第一眼真係以為HTC出新機，特別個背脊點解可以仲樣衰過大陸Android山寨機？就連marketing都弱晒，Steve Jobs死之前有幾可試過發佈會之前已經乜都俾人爆晒出黎俾晒相你睇？今次除左隻錶仲係神神秘秘，兩三個月之前你已經知道晒最新一代iPhone咩樣咩料，噉個發佈會仲有咩值得期待意義？（有，咪見證一下部iPhone 6係咪真係傳說中咁樣衰囉，結果求仁得仁啦大家）
雖然從來唔係蘋果友，今次發佈會都有兩樣野關我事，第一就梗係睇定iPhone 6咩價位同幾時有得買，大佬唔執返幾部賺返少少水腳，下個月邊夠錢去睇Loud Park呀？第二就係，唔係蘋果（今次係蘋果日報）講都唔知，原來出新iPhone、出Apple Watch，代價就係唔出再iPod Classic。真係好心灰，雖然我成世只用過iPod一樣蘋果產品，而且單iPod一樣已經令我非常非常之厭惡iTunes繼而唔再對其他任何蘋果出品有興趣，但iPod本身的確係史上最完美mp3機之一，上星期先剛剛拎去整，整完就見到話原來剛剛收返黎部機已經係末代，總會有點唔開心。而iPod，將會係我同大家講的另一個故事。
《一切從音樂開始》真係好睇到黐線。（between，個中文名真係好Q長。）不過有點可惜，故事又有意無意間用到十套音樂人電影九套會出現的cliche。好似《起勢搖滾》，Mr.點解會紅？唔係因為音樂好，只係唱片公司見到黎緊潮流係樂隊，經理人身邊有個做細夾緊band，就近水樓台捧左佢地出黎先。（利申：雖然而家不值一提，Mr.頭兩隻碟真係冇得頂）《一切從音樂開始》更加一開波已經講明，無論你音樂有幾好，首先要令人注意你，當人注意到你對你有興趣，先至會（認真）聽你音樂，縱使你音樂本身如何驚天動地。
《一切從音樂開始》女主角最後成功，音樂是好的，但更大原因係搵到個大明星同佢宣傳，人地一句說話勝過你千萬廣告費，只要搵到有份量人士幫你講野，點平庸都可以紅e.g.《Gangnam Style》。而每當出現呢個cliche，故事點精彩導演拍得點樣好睇都好（呢套真係超級好睇），始終都會覺得主角最後成功到，實際上並唔係因為實力名副其實。