今日葵涌個倉開完工，夜晚要出深水土步買parts，大安旨意出黎行街掃貨。與其去朗豪坊同班「新香港人」爭食$40一碗魚蛋再行我地根本買唔起的名店，倒不如出黎深水土步，先去福仁個個禮拜唔同款檔散貨場幾蚊一件又實用掃一堆返屋企，買唔夠行埋鴨寮街囉，買落堆貨使左錢又用得著好開心。跟住龍津食魚蛋，都係一碗但七蚊咋喎，而且我覺得好食過朗豪坊囉，唔夠加多底雞蛋仔又七蚊都仲平過人。仲未夠喜喜喜喜整多兩串雞軟骨然後合益泰$6四條勁滑坑渠腸粉，走去搭車返屋企經過點可以唔順便整多份新香園蛋牛治呀。

這，才是真香港人的生活。

過完年就加價，已成食肆慣例。返工經過麥當勞，想買個早餐，嘩居然加左一蚊，就係唔益你返公司果頭食茶記，點知仲大鑊全日乜都貴左兩蚊，就快齋食個碟頭飯加杯野飲都要四條埋單。睇黎第時只可以下午茶時間先至落樓食飯。

九展開左間新戲院益晒我，六點鐘九展做完野，行返公司時見到搭九上《華爾街之狼》，上到公司拿拿聲執手尾走人，搭五閃，行到去入七仔買埋野食先至買飛，都仲趕得切開場半個字前坐低。呢個場確係爽，地方勁大勁好坐，又畫面音響都靚，而且幾時買飛都一定大把靚位你揀，梗係啦，呢個位置邊有人黎睇戲架？睇我連晚飯都要食七仔執兩個包加包?飲就當一餐根本冇得揀，就知係九展開戲院／黎九展睇戲有幾戇居啦。

好在套戲，同間戲院一樣咁正。

今個星期六就是維京傳說中的世界末日「諸神的黃昏」，地球將會進入永遠的冬季，人類互相殺戮，神魔大戰，一切回到黑暗虛空。你會如何迎接這最metal的世界末日？

Prepare yourself mortal, for this Saturday is the day of Ragnarok, "The Twilight of the Gods". From this day earth enters an eternal winter, with massacre and genocides spreading across the land. Then comes the battle of the pantheons, and ongoing war lasts until nothing but darkness and void is the only thing left in the the world as we know it.

So, how will you embrace this impending apocalypse?

千呼萬喚，亞視終於肯重播《我和殭屍有個約會》，仲要特登整咁大條預告片宣傳，雖然內容相當九唔搭八，但而家亞視好難得有自家製作水準叫見得人架喇，即使只是一條trailer。第一次睇以為會有第四輯，不過當然冇可能啦，其實可以remaster頭三輯已經好好，但當然，又係冇可能啦。

王菀之雖然討厭政治，但以歌論歌，佢的確係而家香港非常難搵實力風格兼具之唱作人，雖然某程度上「而家香港」呢一點是成功一大原因。新歌《天堂有路》好聽，但聽完只諗返起丁菲飛，其實走同一ethnic fusion路線者，丁氏姊妹早十年已經玩到登峰造極，可惜時也命也，當年丁菲飛音樂風格同唱歌聲線俾人勁笑勁小，如果佢係遲十年或者半個十年，到而家較成熟較開放（只係「較」）市道先出道，分分鐘係佢紅而唔係王菀之。

當十年後／遲足十年的今日，大家可以為一個本土歌手（終於）寫同唱出一首朱哲琴風格流行曲喝采，可想而知香港人音樂認知發展係幾慢。

除非會再上《Music Station》，如果唔係今次會係第一次同唯一一次香港電視機睇得到BabyMetal，雖然台上面有晒骨頭人同日本鬼新舊兩隊band好大排場，但首《打咩打咩》似播帶仲濃縮到得返一半，不過已經非常好睇，即係其他人包括紅爆AKB48表演時得音樂同歌手聲，只覺得好似拍緊MV，但到BabyMetal玩先發現原來個場有觀眾，成班人（其實係毒撚．．．）衝晒台一齊唱一齊跳好鬼癲。所以話BabyMetal真係好睇架，可以咁成功，因為pop有資本但唔夠內容，metal有內容但唔夠資本，間label非常醒地將兩者之長合為一，抵佢發達，同都想問好耐，點解一直冇人噉做？

越睇越想睇，年初三晚crossover閃靈要返工迫住退晒機票酒店冇得睇，跟住個禮拜六日三月一同二仲要去到東京武道館連開兩場加每晚一個主題，不過更加冇可能去到啦。唯有望望今年Summer Sonic同Loud Park有冇計。

得罪講句，我覺得Diablo好睇過Havok，你可以話因為Havok一路向下，頭兩隻碟真係超正，但跟住越玩越冇力，上年隻《Unnatural Selection》聽到差唔多訓著。相反Diablo優勢在於indie，始終亞洲樂隊地域限制，要達到同樣成就級數、要搵到外國同規模廠牌簽約支援，就算去到好出名時都其實好難，所以能夠鍾意點玩就點玩冇乜包袱。好似你問我Diablo其實玩咩我都答唔到你，呢一首Machine Head，下一首變成Slipknot，跟住thrash到Sepultura咁恆，最後播個drum loop intro加個dubstep backtrack玩到成隊Static-X噉款完場，擺明隊band前期後期兩個樣，但pop得黎唔會放棄技術，結他佬有齊'80 metal solo加'90 metal玩聲玩effect奇技，成隊band台上非常活躍絕無欺場。

而我覺得佢地呢晚做得最好，係示範左gig同演唱會有咩唔同，雖然多數人會認為兩者冇分別，但實際上演唱會比gig規模更大更深化，唔只為上台唱幾首歌吹幾輪水就完而有一定主題性，會講流程講舖排會醞釀，Diablo做到就係令你覺得每首歌／每個演出段落之間都有一定關連或過渡，全晚係睇一個完整event而唔係精選碟live版咁小事。早前講到BabyMetal成功之道正是以流行音樂宏觀計劃經營偏向集中特定目標聽眾之metal，唔知Diablo係咪都有借鏡K-Pop做法，呢晚演出我睇得出好多香港樂隊一直忽略之成功／進步要素。

Diablo絕對好睇非常精彩更是抵睇，但講到咁好都冇用，可能個期真係唔好，好多人只留意星期日一晚四隊香港band，反而之前一晚有隊韓國metal band同一個場開show，似乎冇乜人知道或關心，台下景況真係．．．兩隻手數唔晒，但加埋兩隻腳就．．．我唔知最後冇encore係本身根本冇還是因為觀眾人數遠不及理想（好耐未試過九點幾開場／「準時開」都可以十一點前返得屋企），但當只得咁少人捧場隊band都可以表演得咁落力，就更加值得被人尊重。當然我亦不幸見過比呢晚更惡劣情況，只有話當香港老細們咁揀擇的時候，台上全晚表演人數總和大唔過台下全晚觀眾人數總和的話，搞手已經可以當贏左。

因為今晚仲有一場Metalvolent Creation，Diablo寫住咁多先。補多兩個p.s.啦：

P.S.：G.E.M.出戰《我是歌手》，演出中段耳筒冇聲要求重唱，引發「出現技術問題時，歌手應否繼續演唱」之爭議。而今晚值得討論議題，係當表演中段樂手發現器材失聲再搶修無效，係咪應該照樣繼續演奏，即使只係扮彈？

P.P.S.：我諗今晚最過癮係完場有個黎香港玩的上海靚女搭訕，臨走一晚特登上黎HA睇表演，過癮在佢係連兩隊band叫咩名咩地方黎都唔知，「那為甚麼會來看？」「在網頁見到這段時間看得到的只得這一場是metal，就來看了。」一問一答，我已經可以666%肯定地話你聽，呢個一定係好女仔黎。睇睇呢位連band名都唔知，見係玩metal就黎捧場的上海妹妹。再回頭看看揀擇的香港老細們。搞到突然間好想去上海。可惜個靚女聽日返上海，傾左幾句就趕住走，而我只是一條得撚樣書的柒頭，睇黎下次去HA睇metal show之前，要微信微博QQ乜Q都裝晒落部電話度先得。

其實Metalvolent Returns呢場show不如改名叫Hermetic Silence Returns，甚至直頭叫Hermetic Silence & Friends算啦，除左Evocation另外三隊都同HS有關係，點睇都熟口熟面。Dismembered歌佬 a.k.a. Hermetic Silence歌佬話本地band唔及外國樂隊咁有號召力，所以搞show好難經營。不過我觀點相反，睇返近年情況，而家香港(extreme) metal band自己幾隊圍埋開場show同搞release party幾乎係票房保證，我諗佢應該唔知道之前一晚韓國thrash metal band Diablo出同一個場，全晚觀眾加埋，都唔夠佢講呢番說話時佢前面第一排咁多人．．．

其實今場已經有現成大大個marketing gimmick，好似當年怒人出碟時話過夠多人睇佢場show就剝光豬插水，最後真係賣到爆場除晒插左，如果今次照辦煮碗話賣飛賣到一定數量Hermetic Silence就會歷史性重組jam返幾首歌，要觀眾人數有今晚x2甚至更多，其實唔難。（又其實，見到show名有Returns呢個字，我初頭真係以為會有「神秘嘉賓」出場架．．．）

人人都講的事我唔再多講，所以只講Synergy。首首歌都要五六七分鐘係好牙煙，一來要長得黎一直好聽唔悶難度非常高，二來香港人出名冇乜耐性，live仲玩長歌即係趕客玩自己嗟。舊歌聽多幾次慢慢聽得出部份編曲唔太夠順，新歌則越寫越成熟，完場首新歌應該嚇親人根本就係Opeth黎，掌握到技術同概念係好事，但而家問題反而係有陣時太過唔似自己，黎緊寫歌應該要搵返Synergy種感覺唔好太過Opeth。（雖然歌寫得好的話，繼續似落去我都唔拘，哈）

「話時話，相張咩料？」

「古有閃靈現場灑溪錢，今有招魂出show派吉儀。我都想同Synergy靚歌妹影幾張相益下大家架，不過你知啦劉Sir毒撚黎架嘛邊敢影呀，搵張吉儀頂住檔算啦。」

大陸今期流行三個歌唱比賽，最想睇其實係《中國好歌曲》，但見個名你都知道呢個可能係大陸電視史最有意思之音樂比賽節目，香港傳媒一定唔會宣傳、普羅香港人一定唔會留意。其他兩個人人都係追《我是歌手》，我較鍾意《中國音超》，唔係單純因為謝安琪，G.E.M.我都like，不過佢參加個比賽已經演變成純技術比試大家只係鬥嗌，雖然我都受聽左咁多年metal反而覺得唔鳩叫唔多似唱歌添啦，同其實我好鍾意G.E.M.版《喜歡你》架，但係見而家網上面似乎一面倒「識聽歌一定屌G.E.M.淨係識鳩嗌」，我就唔好意思出聲話俾大家聽我鍾意佢係《我是歌手》唱果幾首歌，廢事俾人笑我膚淺啦。

另一個原因係，大家心態真係太唔同，G.E.M.你點睇都覺得只為要贏，但謝安琪完全相反。佢做左兩樣野，令我對佢再加好感：一來梗係香港人返大陸參加比賽，第一場就唱廣東歌表明身份同態度，去人地主場仲玩到咁大，同搵自己前途較飛搏第一round就比人飛出局一樣冇咩分別，當然寸得起先可以噉玩法。

然後唱左首本名曲《The One & Only》，你會話有咩出奇，但其實睇返各大歌唱比賽就知真係好出奇，直到今時今日即使超級出名歌手參加歌唱比賽，都冇幾多個會揀唱自己歌，諗深一層其實好諷刺，就當你真係好有料，點解要靠其他人金曲用或者較易拎到高分之「另一面的我」表演，而唔會好有信心噉憑自己把聲唱返自己歌去贏？G.E.M.本身大把旋律技術兼備好歌，希望佢之後會有一場唱《睡公主》呢首代表作，雖然冇咩期望因為佢參賽有點過份計算唔似會肯行呢步，同老實，咁多年黎我未聽過佢有一次live唱《睡公主》係唱得好．．．

謝安琪參賽再加好睇，係睇得人好舒服。睇佢談吐舉止，悠然自得唔志在點樣同你鬥，但其中又抱住一份堅持，雖然論唱而家把聲開始沉，好在技巧同感情比以前成熟（不過咬字有點太用力英文口音亦好硬），只係狀態始終唔算上盛依舊好聽但每場總有失誤，只係睇到佢唱完《The One & Only》份神情，所表達係有時一個歌手上台唔係為贏 － 不論係贏其他人還是贏自己 － 而只為可以唱到想唱之歌。呢一點，G.E.M.應該仲要磨練好漫長歲月之後，先有機會領悟得到。

爽喎，歲月流聲台3/3開始，逢星期一至五晚重播《我和殭屍有個約會》，三輯連續播直播到八月，每集一日播足五次，都睇唔到或者唔夠喉唔緊要，星期日朝早八點半一次過播返晒五集你睇，每一集一個星期可以睇六次，三輯連環重播再x6，正宗睇到仆街。如此仆街，真係只有亞視先做得出。

突然之間希望亞視續到牌，唔會搞到睇一半就冇得追落去咁灰添。我成日覺得會選而家先開始馬拉松式重播，道理同每次大家屌無線收皮屌到真係有危機時，無記就會重播《天與地》or任何一套有黃子華份舊劇一樣。

今晚第一晚開始重播《我和殭屍有個約會》就撞著奧斯卡，屋企部電視俾老母霸住，睇個勢九點半都冇得睇。好在亞視同超任博士一樣強項就係無限復活，十二點幾奧斯卡播完轉過去剛剛好到十二點半第一次重播。多謝亞視夠廢。

你都知劉Sir粗人一個，向來好少分享文藝野，但作為真．香港人暨最後一代真正香港人，《香港將於33年後毀滅》不得不share。

難怪質素會咁高，原來係《關公大戰外星人》同《喪屍血滴子》創作班底又一傑作。

今晚第四集《我和殭屍有個約會》有鬼魂街霸大賽，成班鬼打街霸，邊隻鬼打贏燒間屋俾佢，條橋夠晒old school勁好笑。但係冇晒機舖又冇晒好睇殭屍片的今日睇返，又好鬼唏噓。

如果唔係前晚上深圳返香港時走左班火車，我應該上畫正日已經睇左《戰狼300：帝國崛起》，而家留返今日睇禮拜六晏晝場，順路嗟今朝本身要返九展見客 － OT已經灰，九展呢個位見完客等開場出去食飯又唔係唔出去搵野食又唔係仲灰。無聊查查其他院有咩場，見到豪華好過癮講到明晏晝3:12開場，所以就算九展放工都想出豪華睇，唔係貪佢夠平（呢套戲去豪華睇其實浪費左），而係想見證一下，係咪真係唔三點二開唔三點三開，係要搭正12分至開場先？

其實最想睇果套係《金剛王》，即係見到個名、見到廣告已經覺得柒不可耐，跟住可以全九龍得影藝上一場早場、廢到連專播BCDE片的豪華都唔上，就證明呢套野挑戰得過。

其實對《戰狼300：帝國崛起》冇咩期望，第一集係好睇，不過純粹因為我睇戲最唔鍾意用腦一味打打殺殺就得，而且Zack Snyder太神全藍幕CG油畫式鏡頭加繼《Matrix》之後最造作慢動作打鬥通通破天荒，拍出黎我覺得精彩過都幾平舖直敘漫畫原版，當年我仲襯Megabox上IMAX巨幕版特登去睇多次添。但始終故事冇乜只叫足夠，打完殺完噴完血，覺得應該圓滿結束，估佢唔到隔左七年可以拍一套續集出黎，仲要唔差＆同第一集一樣有興趣入戲院捧多次場添。

其實冇伏因為《帝國崛起》唔係續集而係外傳，兩個故事同步進行，加大量／太多畫外音畫出腸，就算冇睇過第一集都唔會唔知做乜。如果睇過第一集，仲會覺得「唔錯」一大原因係，頂，隔左七年，拍法導法都係一樣，兩套都係大半套用CG整，都係畫面推爆黃色同藍色加超漫畫化構圖，都係好多假血（今集仲要更假，相信因為要整3D，所以99%血key得好明顯完全唔夾），都係以一敵百死守最後一關，都係由最後一戰演講做旁白帶到尾講晒成個故仔，都要搵首metal做非正式主題曲（上集Nine Inch Nails，今集Black Sabbath），同埋都要講返句"This is Sparta"。

但"This is Sparta"好大分別，上集講呢句最後係感嘆號，今集係感慨的句號，因為主角唔係斯巴達而係雅典，進而格局相同但又似乎好特登去將第一集橋段變成相反另一面拍出黎，所以睇落有點平行宇宙feel：戰場由斯巴達變雅典，戰地由北變南，戰法由陸戰變海戰，男性主義變女性抬頭。講到好似終極版新瓶舊酒，事實的確明眼人都睇得出相當保守，完全係想複製一套《300》出黎就算，可能因為今集Zack Snyder唔做導演退居監製，佢先《300》再《Watchmen》已經成為最有個人風格同最擅長將漫畫改編成電影導演（雖然都係翻拍同改編先掂，自己創作套《Sucker Punch》．．．），今集交俾人導，個新導演擺到明要學到足同一套，但又驚拍得唔夠Zack Snyder好就將所有野拍到更浮誇，慢動作更慢、變速變得更誇張、造作鏡頭更多更造作，不過過左火仲影響埋故事速度，好似講神王、妖女同雅典王背景，有好多部份可以精簡唔使拖到而家咁長都算，直頭旁白講故事講足三個字會唔會過份得滯呀？講主角出身，直接剪到佢百步穿楊已經夠交代身份同神勇，唔使學上集見係主角就俾佢一個打十個，搞一大輪大龍鳳仲要堆慢鏡慢過doom metal，頭半個鐘其實好失敗，我都冇諗過一心入場為睇打戲睇斬到成街血，睇主角出場果幕可以睇到「屌，打夠未呀？」

好在之後越後越精彩控制得好，一來海戰上集未試過而且拍得出大場面，二來船戰點樣拍咁多慢動作呀咪踏實返唔浮誇順眼得多囉，但想搵返上集種霸氣可能會失望，今集主角外型完全及唔上Gerard Butler，而且雅典軍唔係斯巴達人欠缺戰士氣質，仲要海上打喎，換來係一份鬥謀略比試步步為營，而唔係一味衝一味殺咁爽。打鬥風格都唔同左，當主角冇一身肌肉，咪唔玩力量玩招式囉，明顯放左好多心機去設計花巧招式，最後主角上船打成班Immortal再打妖女打成段拍得好型，只係妖女雙劍發揮太少喇，但應該冇乜人會投訴，始終重點唔係最後互斬，而係開戰之前兩個人互扑嘛，知唔知點解波斯同雅典到頭來都係要打仗？原來因為條友中出即飛。

或者本身冇乜期望同打戲好睇就夠，而家成套戲除左個頭開得衰同導演造場面功力唔夠Zack Snyder之外，比我預期要好好多，個妖女演得實在太強，同埋口桀口桀口桀∼反而有樣野想講。睇完好難明，咁激都只係2B級？其實要拍呢種史詩戰爭電影香港人唔係拍唔到，《赤壁》已經相當接近仲要全實景拍唔靠CG，不過如果《赤壁》用同一個拍法，即係一刀斬落去真係會斷頭斷手斷腳有血標出黎，全套戲有幾幕女人除衫同一句半句粗口，仲要扑野扑到打功夫噉款，唔使我講你都知，呢套港產片一定唔會2B只可以三級上畫。就算你同老細講「拍到咁盛大場面咁激烈，外國會鍾意，一定賣到埠！」老細只會屌你「三級喎！香港大陸點賣呀？」然後再剪過，跟住一部戰場史詩變成純粹賣動作場面完全唔暴力唔寫實，就好似一句粗口都聽唔到之黑幫片一樣咁戇居。所以點解香港電影而家同以後都唔會出得到頭呢。

講深度就一定冇架喇，你要史詩得黎點樣有意思睇返《賓墟》算啦，明珠台今晚就重播喇，而我呢挺膚淺市井之徒，就打算睇多一次仲要豪IMAX 3D版，為左個妖女已經值得再睇啦！（呀．．．你知道唔係果種意思．．．）（between，黎緊另一套Frank Miller漫畫改編電影《Sin City 2》都有佢份，即係又冇得唔入場啦）

都俾人問過唔少次，而家九展隔籬返工，點解唔見我成日過九展過觀塘睇show？有Ｄ野就整定，由我做呢份工開始，99%機會九展或者HA有show日子，我都會調左去第二度返工or晏晝唔係九龍灣放工。好似今晚HA兩隊band都係細楷t字頭又兩隊個名都唔識讀場show好有興趣，因為之前兩晚Suicide Silence & Caspian全部錯過晒， 難得呢半個月成日要坐尖沙咀就係今日有得走返九龍灣返工，諗住做野做到七點走人食完飯就有show睇，錯過左兩場俾我執返個尾彩都好丫。點知五點幾先收到call，仲要係我屋企行兩個字到個場要人，老細話「益你啦！有得早收工，仲要阿公車錢送你返屋企！」點解偏偏就係今晚我想安安份份OT，你先至貼埋錢送到我返屋企呢？真係天意。而天意次次都係返工又撞著有show日子先會出現。

又問，返左屋企果邊，做完野都係六點幾嗟，點解唔搭回頭車出返去？即係呢，返到屋企呢，就唔一定代表已經放左工。TeamViewer實在是世上最邪惡發明之一．．．