段記



8/8/2013 THU

Kowloon Metal City
Track 27
A Hong Kong Djenesis:
一談香港首部djent作品.Qollision同名EP




10/8/2013 SAT

見字時,我已經飛左去日本過緊生日。其實我從來對日本冇乜大興趣,冇諗過會去日本旅行,更加冇諗過係最熱的八月過黎,又要多謝我老細啦,唔使佢誠邀我加入量地兵團,我未必會有興致大熱天時飛大阪,仲要係曬住睇fest添。



其實今次Summer Sonic之後呢,十月Loud Park我都有興趣架。睇我去完大阪返黎之後,會唔會繼續量地量到十月仲可以去埋東京啦,哈。




23/8/2013 FRI


前傳,和我精明的老母有關。話說上兩星期飛大阪睇Summer Sonic,可能四十幾度加雲都冇舊真係太曬太熱,對360買左唔夠三個月居然壞左,唔怕有保養嘛拎去整咪得囉。點知返到發現老母襯我唔係屋企個禮拜好得閒地幫我執檯,而執完之後乜都健在,就係本身放最面個耳筒盒唔見左。關乎三舊水人命立即急call我老母。


「幫你掟左落垃圾桶啦!不過我好叻架,見到盒面有張保用證,我剪低左張證先唔要個盒架,係咪好醒呢!」


今舖真係醒我老母喇,留左張保用證,但唔留埋盒入面張單,整你老母咩整。結果搞到落亦軒買返對新,買時特別問問Denon邊度做保養,再上網查埋地址,都係大角咀,見本來都打算搵日去奧海城睇《激戰》,維修部又正正奧海城對面,好我信你就出黎用張新單保養對舊耳筒當拎多對後備。點知去到見到,


「咦,間寫字樓呢?」


再打去問,原來唔係執笠(點會執呀咁大間),而係搬左去雅蘭,仲要剛剛好我黎到正正一個星期之前搬。頂早講啦如果係旺角咁近,我就揀睇豪華兩點八場,睇完整埋落雅蘭樓下KFC食多個餐再返歸好過啦。見中完伏仲有成個鐘至開場,去雅蘭整完落樓下喜喜喜喜篤多串雞軟骨再行返轉頭都仲有時間,就襯睇戲之前一了百了,不過Denon做得大牌子,售後服務反而出乎意料地不符預期,之前用過其他牌子耳筒,都係去到俾單即場換對新俾你大家唔使煩最花時間只係排隊,今次係第一次整耳筒真係要「整」,俾晒單同保用證仲要填張表格登記資料,跟住「留低對耳筒,整返好通知你,兩個禮拜內會有電話。」可以為一對壞耳筒搞咁多野,真係未見識過,等我屋企摷下摷下摷多兩對陳年壞360出黎,本身仲諗住遲下再上黎整多幾對後備,點知而家連整一對都咁麻煩,點掂呀大佬。


因為成日行餐死,之前已經行左成個鐘由九龍城行出大角咀(係,而家出親油尖旺我差唔多實係巴士都唔搭行路搞掂,量地的人係比較多空閒時間),然後仲奧海城同雅蘭來回一轉,雖然今日冇太陽已經叫做唔係好熱架喇,今場坐我隔籬附近睇《激戰》的朋友都有免費4D版升級優惠,對眼睇入面彭于晏張家輝打到仆街時,仲可以聞到陣陣臭汗味。




24/8/2013 SAT

The Underground Heavy #9




27/8/2013 TUE


雖然食過一次日本便利店,就唔會再對香港相比下等同垃圾的七仔同窿畸有咩興趣,但有時口痕又唔想食咁貴,冇得揀咪又要邊小邊食。我已經唔會再食便利店任何熟食(唉,好想食返日本七仔薯餅呀,香港地係咪要去Mos Burger先有得食?),微波爐叮叮野就仲有兩樣間唔中食:七仔小籠包,同日清叮叮意粉,但兩樣都只會等到減價$8.9先會食,要我正價時俾十幾蚊食六粒小籠包或者一兜仔意粉?傻的嗎?


就係見近來七仔又有減價,立即大舉掃貨買入呢隻NuPasta,我到而家都唔知卡邦尼芝士係咩,但好食就得啦,以香港便利店標準黎講,呢個意粉除左細之外真係唔錯。其實除左好味另一個鍾意食原因係易整,落凍水再微波爐六分鐘跟住撈芝士粉就食得,唔使特登煲滾水,所以當而家杯麵碗麵撈麵已經加價到一個最平都差唔多要十蚊時,我多數等意粉減價算,得100g幾啖食晒唔算多,但九蚊雞當個下午茶,唔夠咪食多兜囉夾埋都仲廿蚊有找,豪少少俾多九蚊加多六粒小籠包夠塞飽個人當正餐亦得,都唔錯。係差在芝士邊有盒面張相咁多呀煙肉仲要得幾粒,我開晒三盒全部配菜同芝士粉倒晒落一盒度撈,應該先會有差唔多效果。


點解唔直頭落茶仔或者Pizza Hut食個真正卡邦尼意粉好過呢?噉又窮又要體驗中產生活,我地呢挺窮撚仲要量緊地,唔食七仔仲有咩好揀呢,大佬而家落茶記食個芝士焗意粉都要四十蚊喇。想食餐好,除非七仔肯學日本,肯出三十幾蚊一碟茶記咁大份咁好食的微波爐意粉啦。




29/8/2013 THU


琴晚Evocation + Ne Obliviscaris,後者其實唔多使講,NO live比我想像中再強好多倍,好難遇到外國band黎香港開show,可以有咁多人睇同時全場natural high到爆,極鍾意結他手solo有兩種風格,除左一般metal式solo,仲有招音色同奏法都扮到好足小提琴以假亂真,係音響差少少,唔知係咪要就小提琴所以平衡做得唔太好。今年最好睇metal gig係邊場,睇埋下星期三,再Persefone、Ne Obliviscaris同The Ocean三選一啦,如無意外實係佢地其中一隊架喇。(between,HA係咪真係會拉到隊維京metal band e.g. Turisas黎香港?)


講前者好過啦。有鑑香港band壇永遠的最大禁忌就係講香港band本身,而近來facebook又出現因為評論樂隊引來之腥風血雨,利申一下,細路仔唔識世界,唔岩聽咪屌鳩我,我未想死住。老實出左兩隻碟,我感想仍然係佳章多佳作少,第一隻碟風格我鍾意但編曲有點雜亂無章唔完整,新碟成熟但整體去勢太平穩,欠氣勢起伏未夠刺激,最大問題係,我實在好唔鍾意新碟錄音,好多人成日覺得新一代舊式band唔好聽,正因音樂點樣忠於原髓,錄音一追求時代感同高質,就好難帶出合理之氣氛同氣勢,就算係部份外國大band都有呢個問題。所以今場好睇在歌有新有舊,同現場功力非常之高(睇完,已經立即期待睇下一次),仲有要livehouse音響先真正可以帶出Evocation音樂應有感覺,尤其鼓聲完全兩個層次,如果隻碟係用呢種音響效果錄,我會受好多。


同,係,我覺得Evocation聲做得好過Ne Obliviscaris。




2/9/2013 MON

每週一相片大行動 2013 Week 35
大香里大阪遊.一:Summer Sonic篇




3/9/2013 TUE

http://youtu.be/MCxXf3Smqrg


講過666次,再講一次:Babymetal今年第一首single《Megitsune》,絕對係本年度最邪惡single,擺明J-Pop但班底超專業超認真,論製作級數勁過今年聽過好多好多好多metal band,既然琴日講完Summer Sonic,今日就講Babymetal啦,話晒暑假特登飛過去大阪就係為睇佢地(你去Summer Sonic為左睇Metallica睇Muse?冇撚野下嘩?)。


唔知係咪我睇大阪站問題,出時太陽對到正個台太曬太熱,同埋推聲條友推到好似揩左野,第一次睇Babymetal live都幾失望,同場亦由未開始已經企到場外都圍滿晒人,到玩完第一首已經陸續有人走,特別鬼佬,相信對鬼佬黎講Babymetal avant-garde得滯。唔計現場水準同音響,我都覺得而家的Babymetal好難搞得好,一來,唔夠歌;二來,唔夠好歌。第一首single《Doki Doki Morning》2011年底出,年半之後全部歌先砌到一隻EP多少少咁大把,而且又著重single唔夠好side track,所以出live你可以話有一半時間係靠隊band撐場,唔係的話,使鬼結他佬啡大大段Yngwie Malmsteen《Trilogy Suite》消磨時間咩。


不過如果跟住而家條路走,Babymetal未必唔可以再做得更大,冇錯佢地其中一樣最多人頂唔順係總要攝堆「J-cute」野入去,當然不能不提最經典的dame dame dame dame,梗係啦,唔係噉另外兩條靚妹仲有咩存在意義?但近一年開始由Baby轉返去metal,好似《dame dame》音樂底勁到嚇死人,最新隻single《Megitsune》其實勁不在首歌,而勁在呢首b-side《紅月》。Babymetal優勢在J-Pop得,要metal亦得,就好似隻新single兩面,《紅月》根本就係一首非常正經非常認真的power metal,最重要條女把聲一向掂再練練中氣更好,另外兩個靚妹除左live跳黎跳去跑黎跑去真係唔太知做乜,首歌由歌妹solo唱晒效果好好多,順便舖多一條路,就算有日隊「band」唔掂佢都隨時可以俾佢單飛。


搞到而家,我好想Babymetal快手出新single,主打係點冇乜所謂,我對b-side更有興趣。




4/9/2013 WED

http://youtu.be/Qnqud-E4aXM


今次大阪行,初頭諗住會大出血,結果帶左60000 yen過去,齋俾現金唔碌卡,用六日都使唔晒。Summer Sonic你唔係兩日都一朝早去排隊基本上已經買唔到乜野,而CD舖除左買少少本地band同old-school metal碟返香港當手信同放,買俾自己只有一隻,Light Bringer《Scenes of Infinity》,係去到最後一日去機場前最後一站,搵到去某個隔涉區某條內街某棟大廈某樓上舖metal CD舖見到,立即俾錢唔使煩,上機打終於買到份手信俾自己,因為呢隊band、呢隻碟。


聽左rock/metal咁多年,日本band一直只限於聽extreme metal同某幾隊metal band,一來日文種旋律性好兩極化,一係寫得好靚一係寫得好低B;二來日本heavy/power metal band太鍾意玩到好打機feel好健康,同唔知點解成日搵埋把聲好gay或好emo的歌手,加埋永遠頂唔順視覺系造型偏偏十隊日本band九隊要扮型,所以我成世人從來未認真接觸過J-Rock甚至日本傳統派metal。噉當然日本仔做生意就好鬼醒,音樂唔掂都總有其他野搭救例如女,睇Babymetal就知啦,有興趣可以上網search Bright Star Records,一間專做全女metal band/女歌手metal band的label,其實佢地簽左幾隊都唔算特別好,但唔好聽唔緊要好睇就得啦,大佬metal界係毒撚世界要成功好簡單架咋你隊band有個見得下人的囡囡就得架喇。


咁多年黎終於到一隊Light Bringer我真心鍾意想追,講睇佢地應該算最冇野睇一隊,但聽呢,近幾年真係冇乜日本heavy/power metal band贏到佢地。其實一開始佢地都係玩好開心好正能量好RPG配樂的典型J-Metal,但跟住越玩越prog-power同重型,最重要條女把聲真係好勁,一隻碟比一隻碟進步,黎到今年第四隻大碟《Scenes of Infinity》,單呢首single《Hyperion》已經殺晒,亦好在唔會得首派台掂入面album track都冇頹玩,成隻碟由頭到尾都維持得到聽晒全隻都唔會悶,係結他手solo未夠火喉差少少,想同時勁旋律同勁技術但有點兩頭唔到岸,不過後生band慢慢黎啦我相信佢地仲可以玩多幾隻碟。


隻碟我買CD+DVD特別版,3500 yen計返紙水0.08即係$280港紙,其實唔多捨得架,不過當上呢間樓上metal舖之前去左Tower Records,見到Babymetal單隻CD+DVD single都要2800 yen...原來Light Bringer都好鬼平喎。(講真,唔係咁搶錢,我應該會掃埋Babymetal全線,雖然原來佢地堆碟都幾難搵下)




9/9/2013 MON

頭先老母睇《衝上雲霄2》大結局,最後好似又係大團圓?點解一定要係主角勇救全機乘客化解空難?你話班友最後盡晒力都救唔到,全部人一野陷家產,會更壯烈更經典 - 當然,大前提係預算唔多加資料搜集同事前研究永遠不足之無線拍得出應有之電影感。


我始終覺得當連大團圓結局都開始由trope變cliche,仲要偏離而家悲觀到極點之時局,唯有拍到有幾灰得幾灰、仲突然過《非常突然》,睇完先會覺得合情合理,因為噉先反映出現實。正如《激戰》,其實唔應該咁溫情,我點都覺得「正確」劇本係彭于晏因為屋企欠債太多所以參加百萬拳賽賺錢,最後斷頸死左。




10/9/2013 TUE

上次黎紅磡廣場好似年幾前,當時個場死城一樣。今日入黎兩回事,成個場終於旺舖多過吉舖人流又多返,有點回到以前中學過黎蒲的感覺,真係太耐未試過重溫呢種行商場消磨時間之時光。舖多之餘夠晒包羅萬有,超級市場同雜貨舖可以亦存,茶記西餐廳篤魚蛋小食檔大把野食,學生哥上完琴行補習社就有得睇玩具睇模型睇漫畫,男人睇電腦電子野睇相機睇單車睇健身器材睇game仲可以入機舖打返轉,女人睇衫睇袋睇化妝品睇首飾,老人家都有得睇盆栽睇手工藝品睇夜冷貨,就連賣中古盤賣二手碟都有。


乜都有,就係冇賣大陸人至會要至會買的無謂貴價野。是這個年頭本地商場難得的正宗地道香港味。所以我愛舊區。




14/9/2013 SAT

每週一相片大行動 2013 Week 36
大香里大阪遊.二:大鄉里出城篇




21/9/2013 SAT

每週一相片大行動 2013 Week 37
大香里大阪遊.三:環球影城篇




23/9/2013 MON


天兔講到點樣全年最勁、點樣打到正香港、點樣廿四個鐘內會由八號升到上十號,結果?在李嘉誠面前,咪又係收晒皮?不過好事黎,以前細個就話每到夏季就日日都希望打風(今期流行係加埋龍捲風),而家大個左明白好多野,就寧願唔打好過打。


(「挑,咪扮清高啦,如果你唔係唔使返工,明明有風打點知冇假放,咪又係會屌屌聲!」)




28/9/2013 SAT

每週一相片大行動 2013 Week 38
大香里大阪遊.四:窮飲窮食篇