如果你同我一樣係個超級資訊癡，2013年7月1日係成世人其中一個最悲慟日子，因為今日就係Google宣佈處死Google Reader之日。而每一個日追夜追新聞的資訊狂迷，都會明白Google Reader之死，幾乎等於自己死一樣，同時亦都令我地呢個社群對Google態度，同街上遊行隊伍對特區政府各位庸官一樣，大失所望。

其實好耐之前，我都算係個上網白痴，除左睇網頁之外只識得send email，其他好多功能都未用過，因為覺得好深奧深到forum都唔識上（係我認我真係好柒），所以一日到黑只識上Yahoo、用Hotmail。後來儲埋好多網站日日上，用我的最愛逐個開好鬼花精神時間，就開始研究RSS，跟住就成為Google fans。RSS就好似訂閱服務，幫你省略我的最愛＞開網頁＞逐版摷有咩新野呢個程序，只要個網支援RSS，掟條RSS feed入去Reader，Google就會幫你留意所有訂閱網頁一有更新就通知你，開Reader就可以好似從前睇news group噉一路飛標題揀野睇，有興趣先開新tab睇，慳你好多時間之餘仲要快好多，自從用左Reader之後我已經冇再用一般方式睇網頁，個網冇RSS索性唔睇，因為單靠Reader已經多野到睇唔晒，用更少時間睇得更多野同時比其他人知道得更快更新，是為潮人必備神器也。

自此幾年黎屋企上網個首頁都係Google Reader，開住以快見稱之Chrome上Google Reader真係爽到爆炸，而用Google Reader最正係跟account唔係跟機，你篩走左咩垃圾bookmark左乜野潮文立即同步，我最鍾意出街用電話飛標題，飛走晒無謂野留低晒有咩想睇，返到屋企就開desktop用Chrome慢慢嘆，非常有系統加非常舒暢。而且一貫Google產品簡約實用設計風格，簡單得黎功能勁多勁齊全仲要有超就手hotkey，最重要介面唔花巧就係一片白底藍字，返公司光明正大地開住都唔覺眼係上緊網扮得到Outlook，令我只要對住電話同電腦就係睇住Google Reader，包括返緊工時。而身為香港人，其中一個不得不用Google Reader原因係高登RSS，有佢真係足不出戶能知天下事，可惜前幾次高登大清洗西傑個1.0版俾admin收左皮，黑椒漢堡整果個高登RSS 2.0只會定時綜合第一頁題目，遠不及西傑可以收集到差唔多全部新主題仲要唔重覆個神級版本。

本來都相安無事，好可惜Google始終係一間上市公司。Google點賺錢？咪就係靠（用你個人資料）賣廣告，個所謂宗旨"Don't be evil"你話有冇可能丫，如果佢唔會睇你email同文件內容芒實你上咩網做過乜，又點樣有效地賣廣告呀？不過門面野總要做足，所以Google業務有擺明賺錢的部份之餘，亦提供好多免費兼無廣告服務，而且好多的確係設計得好非常易用加好用，不過當中有冇收集你任何私隱就自己諗啦。Google方針一向係用大量多元化免費服務引你過去，你用左一樣覺得好自然會慢慢試用埋其他，好似我將Google Reader做左屋企電腦個首頁上左當之後，上網搵野十次有九次用Google（第十次用Yahoo，因為事實係搵香港本土野Yahoo較好，Google唔會自動按地區分類撈埋太多大陸同台灣野），然後開始用埋Gmail同Google Calendar，仲有Google Office同Google Drive，得閒無事又會試試佢地其他唔知咩黎／好似冇乜人理產品，令你真係相信"Don't be evil"，因為Google好多服務實在太方便太好用喇。

只可惜舊時Google的確唔多邪惡，近幾年越來越關注盈利，上市公司嘛要向股東交代嘛近年經濟不景要開源節流善用資源嘛，就每年都會整一次大掃除，將多年來積落好多唔太為人受落或冷門產品判死刑，而今年引起公憤就係名單入面包括Google Reader。其實唔係全無先兆，即係我由開始用時已經覺得會有呢一日，因為雖然叫做可以令Google知道你上網習慣鍾意睇咩類型網頁進而其他地方賣到廣告俾你，問題係你用過Reader就知，佢推介你睇堆網站唔計啦，Reader入面想搵到廣告係非常之難，因為RSS feed只會出標題同部份內文，有時仲可以撮晒全部內文同圖片俾你，而唔另外開黎睇的話又邊度出得到廣告呢？可以話Reader其實係倒緊Google自己米，其實我開始用之前居然冇執先至神奇。同一直覺得呢樣野賺唔到錢反而仲會蝕幾多，世界上由朝用佢用到晚肯定唔止我一個，要維持Reader server成本一定唔少，再者又係Google由朝到尾都要面對的法律問題，你睇睇高登就明，就算只係轉載一篇敏感新聞，自己唔係發佈者只係中介角色都會俾人告仲要告得入，而Reader一日處理全世界無數咁多個網頁，外國比香港更著重私隱權同少少野都鍾意訴諸法律，點會唔使俾人告？再望望Google Reader本身，對上一次大更新已經係兩年前，仲要變到勁樣衰加更新完仲差左成日hang同lag，跟住冇乜大修大改一直問題多多，就知道Google晨早已經放棄左佢，大家只係等緊一個正式「最後今天」通知嗟，就係呢一個。見個通告仲要只得英文，一句仔野連中文都廢鬼事譯俾你睇，Google有幾關心Reader，唔使畫出腸啦。

由今日Google Reader死期開始，我非常迷惘，因為重點其實不在Reader而在Google。佢賣點係資料跟account，所以隨時隨地可以同步、任何電腦電話只要login就可以按最後同步進度繼續用，而市面上其他reader app，其實接近全部都係用Google戶口做RSS訂閱來源，所以當Google唔再提供呢個「一個account走天涯」服務，就真係可以用陷家產去形容，我仲要屬於超重度用家有千幾條feed，當其中一半已經再冇更新都有五六百個source啦，Reader執笠噉我點？想搵個完善代替品唔係冇，公認接班人Feedly早佔先機，Google一公佈會關閉Reader立即宣佈佢地會成立Feedly Cloud接收各位難民，好可惜我用左一個月，評價，兩個字：一垃一圾。Feedly賣點係同Google Reader完全相反，人地得白底加字我就整到成本雜誌噉，靚係靚呀但拖慢晒同華而不實好難用，同埋大佬你搞到咁花哩花碌我返緊工時點樣好似以前開得咁張揚黎睇呀？仲連好多基本野都做得唔好甚至唔俾你做，例如Google Reader俾你打個字，立即搵到全部feed咁多年黎幾時邊個網出現過咩網頁，有時一時間有資料想搵非常方便，偏偏Feedly要扮到自己唔似Google嘛，人地強項係搜尋我就唔准你搵野，即係如果有一篇文睇左第時想睇返，但果陣唔記得bookmark的話，噉你就仆街喇基本上超過一日之前Feedly都唔會俾你搵得返，好野你唔學，係要學埋晒Facebook死都唔俾你search又只可以向前看唔可以回顧你做過乜（而家叫少少）堆衰野。

不過Android電話版先究極垃圾到你唔信。點解飛標題你一定要我一堆堆噉飛，而唔可以一條條飛，如果我想留返其中一條想留返陣間睇，做乜一定要我加星bookmark佢唔可以簡簡單單只將果篇文改為未讀？同睇RSS reader就係因為可以只睇標題選擇睇咩文章，你Android版Feedly夠膽死可以好多時出唔到標題要我直接睇內文，噉我用你做乜春？唯一賣點真係只得Feedly Cloud一樣，黎緊應該好多RSS reader會開始由同步Google account改為同步Feedly Cloud，只係Google衰極都有個Takeout服務可以俾你backup一個XML出黎匯入其他app，如果有日Feedly真係用到頂唔順想轉（其實而家已經係），到時點算？恭喜你，Feedly又要「反Google」所有訂閱有入冇出，上左賊船喇你傻仔。其實又唔係冇計，強國已經有人整左個FeedMe兼容Feedly Cloud，而且超級好用功能仲強過原版Google Reader，問題係佢唔同其他reader用即時線上同步更新，而係要你一次過由雲端download晒舊雲落部電話，睇完又要再做一次同步通知返Feedly Cloud你有咩睇左有咩未睇，不過我連屋企用Wifi同步一次都可以用兩三個字，出街點用呀大佬．．．

Flipboard得電話版，The Old Reader得桌面版，Digg Reader月底先有Android app，Newsblur要收錢，NetVibes好煩，傳說中之AOL Reader同Facebook Reader我都冇咩大寄望，換言之最少呢一個月我仲要繼續邊屌邊用Feedly。立即想再屌柒Google。你有冇經歷過或者記得當年Gmail出果陣點樣震驚世界？當年Google真係每次有新產品公佈都充滿革命色彩嚇親所有人，而且有一份"Don't be evil"單為服務人群而做的說服力，而家Google已經冇晒呢種氣質，只餘無限的私隱投訴，同舊客戶因為用開之舊產品無端端被取消而離棄，所以當Google公佈線上筆記Google Keep時，我好想笑，因為又係一個而家Google不再如以往值得信賴同尊敬上乘例子。話說兩三年前Google有項功能叫Notebook，因為無利可圖加上同期出現針對專門功能之雲端筆記好似Evernote，就學足地鐵廣告一樣「唔好意思囉」就執鬼左，到兩年之後見Evernote撈到風生水起，繼食Dropbox條水搞左個Drive之後，又將Notebook改頭換面成Google Keep重新上市。本身我都想用，因為用開Springpad不過真係越來越廢我已經頂唔順，又唔想用Evernote，Google Keep正好切合我要求同需要，不過唔知邊個marketing天才咁醒，會揀宣佈關閉Google Reader兩三日之後公開Google Keep。Keep或者因為處理事務夠濕碎唔似Reader開支咁大，所以即使冇廣告賣賺唔到錢可見將來Google應該唔會執左佢，但大佬，經Google Reader話執就執你死你事一役，仲要呢頭先講完殺Google Reader果頭立即同你講有樣新產品叫Google Keep，而家大家仲點信你呀，阿谷哥哥？

本年度最悲慟新聞，絕對係Google決定關閉Google Reader。最後一日係七一，不過因為時差香港七月二日頭仲用到，到七月二號晚Google Reader正式下線，代表左好多野，例如毒撚是時候面對世界。

Web 2.0世代網上搵新聞，除左傳統式逐個網開黎睇有咩更新之外，主要方法有兩個，就係上facebook之類社交網絡睇其他人分享同訂閱RSS，當中RSS最特別重點在「我」，所有野都由自己決定，訂閱咩網、幾時睇、點樣睇通通由你，唔似facebook之類只可以先等人地講左再跟從一條直線上至下噉收集資料，但另一個角度睇，你亦可以話RSS同進而Google Reader，其實係一個毒撚程式黎，因為系統會自動將所有新聞整好一個清單俾你慢慢揀，你可以完全唔使經過或接觸網上任何人，你諗下，當連高登同facebook都有RSS，你仲有咩需要上其他雙向平台搵新聞？只可惜而家係社交網絡時代，重心由以前「我」轉為要靠攏其他人之「你」，正如Google都不得不向現實低頭學facebook搞返個Google+，當要賺錢而公司營運方向轉為社交時，Google Reader呢種一切由你話事自己做主之反社交毒撚程式，佢仲邊有理由俾你繼續生存落去？

好多人都話，幾乎同RSS同義之Google Reader收皮，差唔多等於成個RSS系統死亡，因為而家社交網絡橫行同成為營商之道，有幾多人好似我呢挺咁得閒，每日可以用幾個鐘時間飛幾千個post搵料呢？梗係上facebook等人地話你知最近有咩潮人潮事啦仲自己搵咁辛苦咩，班IT老細亦寧願更多呢類人存在，噉佢地搞出黎堆社交網先有人流嘛。不過一雞死一雞鳴，總有人覺得寡頭Google Reader收檔之後會形成一個RSS閱讀器專屬新市場，問題係點解我地個個都話Google無敵？因為一個account走天涯、超高速同步、超易用加好用程式介面、可以搜尋得到訂閱第一日到最後一日之間任何文章，始終只有財雄勢大之Google先做得到，其他公司出品仍然差好大段距離，例如所謂正式接班人Feedly，個app超廢超唔好用仲冇得搜尋都算，舊雲一直都搞得唔好，單多機即時同步更新呢樣都做唔到點都要俾一段時間佢update已經死啦，平時我屋企慣左同時電話同電腦一齊飛feed架。我諗要等Google Reader R.I.P.之日過多一兩個月，先有機會出現較為似樣之替代品。

至於Google，你唔好諗住你摺左Reader之後我會如你所願轉用Current或者Google+。以前我每日有99%時間用緊Google服務，因為由朝到尾都係對住Google Reader，而而家，我仲會login自己個Google account，差唔多只係為login其他公司程式好似Feedly同Springpad。

繼悉尼technical death metal樂隊Ouroboros獲澳洲文化局批准160,000港元撥款，同交響樂團合作錄佢地第二隻碟，墨爾本名團「Winds+Opeth」Ne Obliviscaris首《And Plague Flowers the Kaleidoscope》，亦俾悉尼音樂學院納入正式課程成為教材一部份。繼北歐之後，澳洲有潛質成為下一個metal heaven。香港？仲忙住襯打風去啟德搞doom festival啦，班官班文化人得鬼閒理呢Ｄ野咩。

所以，仲諗住靠班官靠政府靠班「文化人」？靠自己啦，正如你靠佢地，Ne Obliviscaris會有機會黎香港示範俾大家睇，點樣可以令正規音樂學院都不得不研究一番之classical extreme metal？

原來香港除左Hard Rock Cafe，仲有間Pop Hotel。

會唔會有間Heavy Metal Mansion呢又。

繼《EVA》之後《Gantz》都完滿結束，襯而家仲量緊地得閒，用左兩日時間一次過追晒，真係一起身就睇睇到鬼死咁夜頂唔順要訓覺先停果隻，不過咁辛苦（．．．）都值，因為套野真係超級好睇，最少頭半可以話係神級之作，經典在除左話俾全世界知正派可以每一集都死好多人仲要任何人都會死包括主角自己（美國代表係《Walking Dead》），同埋一套「正經」漫畫可以拍得住H game咁淫，即係果個世界入面男人係唔需要擔心冇女，因為只係你要屬於叫得出名種一二三線角色，自然會有大量女不論好醜自動送上門問你受唔受媾連你開口問佢都唔使，同當條女知道你係處男時會仲開心過你知道佢係處女，第一次大家相遇第二次見面已經有得扑，跟住差唔多每兩頁就要出一頁整條女擺對波俾你睇，先知道原來《DNA2》同《飛輪少年》都唔係好淫嗟。

但就算唔計女，其實頭半真係好好睇，故事新奇、畫靚、打勁、角色同人物關係描寫得出奇地好、每場都可以用打到仆街去形容、殺殺殺之餘故事又有好多深層意思，已經足夠達到神級地位，點知睇落去越來越唔對路。開頭好睇因為成班唔係勁人而外星人相反超強，場場都係苦戰死好多人先贏，全隊人又特別有劍客有槍神有武術家有超能力者，唔係玩個人英雄主義而係團隊精神所以精彩，但睇埋大阪篇之後，成隊人開始變到半無敵（雖然仍然好多戇居野，好似有槍又要打埋身、好多機會可以開槍又唔開、明知外星人有機會攻你都唔去守唔去避），每次都係出場＞衝入敵陣＞幾格行貨動作畫面＞搞掂，已經再冇之前種角色特性分野一味亂打。最大問題係，又係典型長篇日漫缺點，往往個頭開得好，但後來諗唔到點兜or兜得到但迫住要畫落去，夾硬寫到一段劇情比一段誇，結果成個局越來越大大到收唔到科甚至同本來設定／世界觀原來唔配合，最常出現就係故事最初明明只係好微觀好地區性，臨尾係都要拉到去全世界甚至打到出太空，結尾硬係要拉埋外星人順便侵略埋地球，唔信請睇多次《力王》，點睇本身都只係想畫本《北斗之拳》出黎，後來又講到同外星人有關、同大佬打已經唔係比武功而係比想法比內功，真係唔知笑好定喊好，都係睇返樊少皇算。《Gantz》既然講打外星人就預左實會講到最後外太空生物入侵全世界，只係處理得好差，故事唔得、步伐好慢、敘事又亂、打又求祈，連睇單行本都會覺得悶，而且已經冇左當初派小隊打外星人之後等生還者傳送返房計分、拎夠100分再決定自己同他人去留種死亡遊戲神髓，根本唔係Gantz。最大問題係刻意做到好凝重唔再賣女，再唔似從前版頭已經大大條女入面又成日夾硬除衫俾你睇，內文唔掂時連女都冇得睇，我仲有咩好睇？

其實末日篇處理差都未必衰晒，結局可以做到好epic，但睇黎作者自己都唔多想繼續落去，趕收工情況非常嚴重。接近全部謎，搵一個有神一般大能的外星人你問我答就搞掂晒，仲要隻外星人唔知邊度搵出黎，更抵死係一個記者搵到。本身話要打爆太空船入面唔知乜野先可以贏，最後主角想兩個種族和平共存所以冇打爆佢，諗住會係大團圓結局啦，點知轉個頭呢就話全能的美國人唔知幾時已經控制左成架太空船，既然咁勁頭先點解又會打得咁辛苦、之前使乜搞咁多事呢？唔知點解贏左之後，即係你已經成百人圍住大佬，一人一槍做低佢都綽綽有餘 － 唉其實故事入面連劍都可以無限變長仲要變長完一樣咁輕，根本你每人一把變到成公里咁長已經冇人埋到你身齋行步路都插死人啦。噉樣贏唔得，係都要搵主角上去單挑等日本人可以做救世英雄至得，仲要唔夠打跟住推晒班隊友去送死再自己暗算人先羸到，冇錯係呼應返開頭「全隊合作先可以贏」個主旨，但講到明單挑你又要噉樣玩群抽，做英雄都做得唔風光啦你。再柒一城係「單挑」左Ｎ咁多話，最後一話殺死最後大佬之後，一頁間全個外星人世界自爆收皮，就叫結局。即係畫多幾版講講每個人生活同地球浩劫之後點發展好辛苦你咩。但我諗最多人唔妥係，兩個女主角一個全書最正加最淫，一個全書最唔掂，正果個是是但但就整死左，唔掂果個可以上到太空船俾唔知幾多隻外星人捉過唔知幾多次，試過十幾次差少少冇命點知個個外星人都係殺晒其他人唯獨放生佢，真係睇到屌你老母。都未算：唔係一直話遊戲以外死左就冇得復活咩，但而家日本隊屈死左大佬之後，又話咦唔係喎原來死左都可以復活？你地日本隊入場抽水之前幫你地清場殺剩最後大佬先死晒班美國隊聽到咪灰到震？

當完得咁快咁求祈，好多謎團同伏線已經俾作者當唔再存在架喇，夾硬無端端出現間真理之屋解話我都算，其實呢個本身已經係一個最大謎團，其他好似（出黎都唔知做乜的）吸血鬼、（搞出黎完全冇發揮過的）超能力、可以製造意外跟住突然間消失個神秘德國佬、仲有熊貓同隻狗呢、意大利外星人大亂明明全球Gantz夾埋都唔夠打差唔多全軍覆沒點解後來又可以好似乜事都冇發生過，大把問題有待解答。個尾係埋得差，但神級外星人用科學角度解釋人、神同靈魂，所講唔係咩新奇意念但表達得好好，呢一段我好鍾意。只係有好大個bug：Gantz科技源自德國，再由德國分發到全世界準備迎戰外星人，但點解控制權會落左入日本人手上呢？同班日本人本來計劃係一早知道外星人幾時會入侵地球，打算等外星人滅晒其他大國之後用Gantz科技趕走外星人做地球王者（但，Gantz又唔係只得日本有喎．．．），不過當你一早已經有咁強科技，可以無限複製兵器同戰士加隨時傳送到全世界任何位置，要外星人侵略好耐好耐之前立即稱霸晒全世界其實唔難，然後用全球資源加複製科技整一隊軍隊出黎打外星人咪仲簡單。神級外星人解話，因為係佢地鍾意玩遊戲，所以將一個軍事系統變成一個遊戲系統，而如果唔係掌握外星科技班人會有呢種諗法，人類要趕走入侵者可能真係好容易。又係相當有意思，可惜去到呢個地步先兜已經太廢。

結論係真係好睇架，因為成日玩大格玩拉頁，打一場可以拖十幾廿話，追連載肯定悶死，而家一次過睇晒就爽到震，不過當你以為《Gantz》可以一秒睇完一頁成話睇晒都唔使半分鐘好搵笨的時候，《強殖裝甲》先至係呃稿費的最終王者 － 話時話，幾時到《強殖裝甲》大結局呢。等佢完之前，我有興趣再煲煲《Gantz》，我覺得直至大阪篇（中間唔知做乜春的吸血鬼篇可以不理），已值得再重睇最少兩次，單睇女都正啦口桀口桀。至於套戲兩部曲就算狗數啦，漫畫超勁睇畫都超熱血超有氣勢，點知套戲拍出黎畫面同劇本都屎到震。

（between，大結局殺左最後大佬之後，其中一幕群眾歡呼係花園街。但畫到條街好似成班人係度行街買送噉，完全唔似世界末日。）

（再between，因為係用實景，所以好多真正商戶招牌入左鏡。《Gantz》大結局之後，永興隆窗簾生意可能真係永興隆。）

今天七月十六，是Jon Lord忌日；上年這一天，Jon Lord離開了我們。

我仍然覺得三年前Hibria演唱會係香港史上最好睇metal gig，你睇過幾多嘈band show連場地做野、平時一metal一hardcore立即走出場外面班妹妹仔，都可以natural high到衝入場跳晒嗌晒玩埋一份？唯一遺憾係蒲吧搞show就一定要早收場而被迫玩少幾首歌，真係玩晒的話班友玩足個半鐘同時由頭high到尾完全唔係問題，因為當年Hibria係全盛期組合，有而家個新任鼓手佢比第一任花巧同有力好多，仲有當今heavy/power metal最強bass手，全因有佢作歌作詞同無盡瘋狂tapping先至會有Hibria。

好可惜佢一走隊band已經完全冇晒靈魂，上隻碟《Blind Ride》技術同歌已經回塘到好多二線樂隊都及得上，完全冇晒大將風範，主要問題係失去左正宗味道而充滿九十年代感覺。新碟派台兩首歌，最新呢首主題曲先叫做好少少，最少自知冇左舊bass佬而家再走唔返以前Lost Horizon種超熱血power metal，就轉型撈撈其他野，同埋冇?狂tap bass佬就搵鼓佬打多幾段solo頂上。不過，對新碟都係好唔樂觀。

老實，《悍戰太平洋 Pacific Rim》唔算拍得好好但係好睇，仲有衝動入戲院睇多次3D版，難得在套戲會好睇過trailer（係，其實trailer整得好鬼悶），美中不足係點解唔直頭叫《打爆維多利亞港 Victoria Harbour》，個故事根本係香港發生，地面唯一一場大打戲都係香港遭殃，好難得一套外國大製作咁睇得起香港俾佢擔正做主角。其實本身冇乜期望因為由頭尾都帶住一陣濃烈爛味，牌面有點似大人國與小人國版《Real Steel》，更加似恐龍戰隊劇場版，仲要兩個鐘長好鬼危險，點知睇完發現衰唔晒之餘仲唔錯添。

世界突然出現大怪物，人類整巨型人形兵器抵抗，因為精神負擔太大要兩個駕駛員先可以控制到，點睇都擺到明係tribute日本動畫尤其EVA，故事發展都好似，又係怪物越出越勁之餘越出越密，又係控制機器人要玩同步，男主角咩料唔使理差唔多完全冇提過背景咁滯總之以前慘啦，然後搵多個同樣有悲傷過去女主角，又自然會對佢起痰，跟住連暴走都玩埋。其實故事幾薄弱，首先因為係tribute自然乜都cliche到爆，好在導演非常醒目心知肚明入場睇呢套戲有幾多真係好關心有咩深層意思點樣有內函丫，所以雖然學埋《Man of Steel》衰野明明係打片偏偏要頭半套戲吹水尾半先打，都好過超人，因為超人就係又要商業又要（扮）有深度，結果要講故事但個劇本爛到仆街，《Pacific Rim》就係我擺明係唔理故事架喇係簡單到暈架喇你吹咩。

而我覺得套戲最成功係，冇錯打戲基本上集中晒後半而且其實唔算多，但唔著重故事同時吹大半套戲水之餘，居然冇悶場。以呢種戲呢個「爛度」黎講，班演員其實叫好有演技，不過當角色咁平面時，人人都冇發揮，所以好浪費，演大個女同細路女兩個日本妹都好好戲，細個版叫有得solo全套戲演得最好係佢，大個版對白已經少，仲要上到機器人果陣永遠得男主角講野，女主角相反打時接近乜對白都冇得講，搞到好似成部機得男主角一個駕駛員噉。最搶係兩個瘋狂科學家同個怪物屍體黑市拆家，睇佢地三個誇張演譯真係好似睇卡通片一樣，不過亦因為噉每次有佢地出場時立即令套戲變返恐龍戰隊級數，同埋其實呢三個角色可以話完全唔需要存在．．．如果改改劇本整走佢地，套戲可以短半個幾鐘。

講到打呢，其實都幾多問題，主要在於次次都要夜晚打，機器人設計靚但部部都都暗色，怪物調轉造型好鬼悶都算仲要隻隻黑色，又成日都要水戰水面打完潛入水底再打，加埋大量近鏡，結果黑暗背景前面大舊灰色打大舊黑色再水花四濺好多時你都唔太知其實佢地做緊乜，所以最後唯一一場地面戰打香港好好睇，只要你接受到維港一望出去就係海，同唔介意明明係維多利亞港打打下會去左葵涌貨櫃碼頭就得，但冇乜所謂啦因為打到仆街，睇佢地拆左半個香港真係幾爽。但打落去又有點唔對路，明明機器人經常要同怪物打埋身戰，點解打左十幾年班機器人都可以得咁少武器，冇槍冇炮都算，連近身武器都唔整齋打拳腳，會唔會戇居得滯？唔係冇，主角機都要到最後先出主角做左咁多年駕駛員都唔知道有的秘密武器一擊必殺（呢野真係夠晒日本機器人動畫同特攝片feel），但講到全世界都要靠呢班機器人，而居然可以冇招式冇武器冇遠攻一尾埋身拳拳拳拳拳拳，你班人類會唔會對幾部機幾雙鐵拳大信心得滯呢，就連每次打都會附近圍住飛來飛去堆直昇機，都可以乜武器都冇真係只會兜圈食花生睇戲，大佬唔會連普通戰機坦克支援都冇卦，EVA呢類日本動畫最起碼反派出場時都會整堆常規武器出黎射一輪彈幕先啦。（話時話，點解咁大部機器人，靠幾部直昇機仔就可以吊起佢地去邊都得？仲要全個基地中左EMP，乜都死晒，就係直昇機冇死繼續飛得咁堅？）而且一拍埋「宗師」日本派，就顯得太笨重出招完全唔夠迫力唔夠氣勢，我明要寫實嘛但有時可以戲劇性少少架，但美國佬拍戲就係死都想真實，所以作為tribute戲完全拍唔出日本特攝種激情，《Real Steel》都熱血過佢，結果諷刺地最好睇段打戲反而係男女主角比棍，呢段真係精心設計過比唔少拳腳武打動作片精彩，雖然我唔明點解成隊人個個都會耍棍，同時又唔會整棍類武器俾機器人用．．．

鍾意導演一開始已經唔玩劇本膚淺到盡，只係始終有點抱負唔想拍一套打戲咁齋，所以兩個鐘入面實際上咩都有少少，一開波主角睇住大佬俾怪獸整死講兄弟情、澳洲隊老豆睇住個仔去送死講父子情、黑鬼同日本妹父女情，仲有劫難點樣改變社會生活同政治、災難經濟學等，不過都唔深入提提就算，唔知算好定唔好。結論係我覺得一套特技動作片，一開波就打，跟住吹成個鐘水至再打打到尾，兩個鐘長但拍出黎冇乜悶場位，而且成套戲會好睇過預告片，已經係成功左，至於角色劇本點單薄．．．套戲係贏在帶回細個睇機器人動畫份回憶，你會唔會屌卡通片劇情垃圾、屌點解次次怪獸打到黎，成個城可以一個人都冇點打都冇人死？你都係睇機器人點樣打大怪獸嗟屌。不過都有樣野唔妥到出面：其實如果最後男主角為拯救世界而死，先至係完美結局。可惜呢種商業戲點都要大團圓。

仲會想睇多一次，除左套戲真係唔差，同想知3D版有幾精彩，梗因為本土情意結啦。其實設定好過癮，戲名話太平洋但個異次元入口位置好近香港，幾架直昇機飛出去唔使好遠就去到，所以香港因為「地利」成為打怪物重鎮同最後基地（咪話套戲應該叫《Victoria Harbour》囉），雖然如果係噉個異次元入口其實位處淺水，同點解如果咁近香港行幾步就到，打左十幾年，好多怪物好有心機走到其他國家母雷公咁遠打仲要打贏，而最近的香港咁多年都冇事而且接近完好無缺（「因為強國勁囉！要不是強國照顧．．．」）。最感動當然係雖然外國人對香港印象仍然係九龍城寨，但基地入面講廣東話、用繁體字（雖然好多字一睇就知直接用Google Translate譯出黎就算得啖笑），而且提到其他國家糧食要配給，香港全賴自由貿易港優勢所以任君選擇幾鬼威，某程度上，戲入面個香港，比而家大家身處緊住緊個香港更似真正之香港。噉當然亦有似返現實啦，例如戲入面全部「香港人」面口完全唔似地道香港人，仲要個個一口流利普通話；怪獸來襲唔驚，政府係乜都唔會做唔會第一件事走去避難先，解放軍咩黎架梗係唔會出黎防守啦，你班蟻民你死你事啦；打完怪獸之後，善後果班唔係政府，唔係軍隊，而係一群社團式暴徒第一時間走出黎搶屍執雞。計返戲中年份，係現今廿幾年後，其實《悍戰太平洋》會唔會係一部寫俾現今香港人睇之預言書？

琴日講完《悍戰太平洋 Pacific Rim (a.k.a. 打爆維多利亞港 Victoria Harbour)》，今日講講一本美漫，好蹺故事同《Pacific Rim》幾大雷同。本漫畫叫《Giantkiller》，係一部六期完中篇，但故事一講你就覺得熟口熟面：話說有日加州一個火山口出現時空裂縫，裂縫入面湧出好多巨型怪獸，人類用怪獸基因製造一隻半人半怪生物兵器，靠佢制止一隻超巨大怪物進入現實空間同封閉異次元入口。聽完係咪覺得好熟呢，分別在於一個係怪物上山打怪物順便打爆異空間，一個係機械人下海打怪物順便打爆異空間（再媾埋條女），不過《Giantkiller》比《Pacific Rim》早十四年出。我諗要搵唔難而家用睇漫畫app應該好易搵到，不過因為十幾年前仲未興電腦作畫，加上要模仿日本六七十年代特攝動漫，種粗糙水彩木顏色畫風，睇慣而家鬼佬漫畫未必頂得順。

因為成家人都懶，所以好少飲茶，當陷家都覺得要食飯之前特登早好多走去拎籌排隊，分分鐘一等就要個幾兩個鐘等時唔知做乜好，等到喇食時又嘈又迫，食完埋單又唔係平，寧願求祈買飯盒或者茶記粥粉麵搞掂好過。雖然好少機會幫襯，我對屋企樓下行半個字到間酒樓好有感情，因為差唔多未試過同屋企人食，但耐唔耐就會成班人走上去發發癲。讀中學時最鍾意一班人除夕躝街吹水或者去九龍城廣場唱K － 當時仲係大聯盟同加州紅鬥到出面時代，有競爭先可以除夕都可以人頭一舊水唔使又唔趕客走玩通宵唱到五點幾先散水，點似而家大聯盟死剩Neway仲食埋加州紅結果大家得返貴K唱 － 跟住新年第一朝走上去飲個靚早茶跟住先返屋企訓覺。

到龍珠開舖，當時客多大家易熟落生意又唔差，好多時星期日收舖老細拉隊過黎打邊爐，貪佢夠平六十幾蚊一位咋，仲要有得烚之餘可以任食點心再每檯送多半隻燒乳鴿，果陣舖頭生意好，拎禮拜日晚生意過黎請晒全部人都綽綽有餘，亦因為咁抵食加咁多野食，跟住日子好多時都會一班人過黎打邊爐，幾乎個個禮拜六或日都會食返餐。之後間酒樓易過唔知幾多次手，價錢加冇所謂但冇左任食點心一樣已經心灰啦，對上一次黎應該十年前喇，直到近排夜晚落街跑步，有次唔知點解咁身痕想睇睇而家已經唔知第幾代老細間酒樓有冇咩搞作，就發現大鑊，黎緊幾個禮拜，每晚落街買多一個鐘步都唔得掂喇。

打邊爐一向鍾意幫襯舊區或者舊酒樓，例如我們的最愛油麻地花園，因為舊舖地方同食物風味都唔同硬係好多野其他大舖新舖俾唔到你，同埋點都平過人地少少，但平到好似呢間德星一至日都$98就好難，而家搵到平日非宵夜任食場可以百二三搞掂唔係容易，再加埋張海報大大隻字「火鍋放題，好派頭好出位」，十足「一張票睇到笑」時代鹹片廣告咁好文采，再多一個冇得唔幫襯的理由。

鍾意上舊酒樓打邊爐，係好多人唔記得真正的自助火鍋，係你自己出去拎野食想食乜想食幾多通通按自己意思，而唔係拎張紙剔剔剔俾部長再等唔知幾耐之後先有得食，德星都要不過要填點菜紙主要係肥牛之類雪藏野，多數野食都要自己出去拎。我份人最憎等，所以想撞返呢種「正宗自助火鍋」好耐。而講到「正宗」，又不得不提曾經的王道福星喇，當年旺角女人街同創興開左兩間，賣點係野食量同款都超多，女人街果間你想望真有咩食，由頭行到尾可以行你半個字，而且只係八十幾蚊位旺角食算好經濟，只係後來全線執晒，創興個舖位就變成今時今日的花園金閣。

而通常呢種真正自助火鍋，多數比要俾紙拎野食種多特別野食。十幾種配料俾你自己溝醬當然唔少得，罐裝汽水同獅威任你拎（但都係懷念佐敦聯邦無限枝裝汽水，仲要係舊款玻璃樽裝），等透爐可以拎熟食食住等有燒味有點心有糖水有飽點甜品菠蘿包皮雞批真係夠晒冰室式老土，炸魚皮都有得食不過最正係炸雞翼見到廚房成座山噉捧出黎真係好正，仲要有湯飲好得意，每逢食到飽要抖抖就整返碗粟米羹先啦。雖然宵夜場八點半開始，但間酒樓好有誠意會成晚一路補貨同出新野食，好似七點入座時係炸雞翼山，八點鐘開咪提醒全酒樓各位朋友廚房出左隻片皮鴨想食請出黎排隊每人兩舊，八點半雞翼山俾人夷平左就到椒鹽豬扒山出場，食飽咩喂仲有「香港製造阿波羅高級雪糕雪條」，有紅豆同綠豆雪條仲有蓮花杯（噉樣叫先至夠old-school），係就冇佐敦聯邦無限舊款玻璃樽裝汽水之後再無限芒果布甸咁開心架喇，但，阿波羅喎！咩話你仲食Dreyers仲食Haagen-Dazs仲食牛奶公司搞錯呀你梗係要支持高級土產雪糕啦！

雖然話係舊酒樓但環境都唔錯，夠光猛夠新淨，檯凳又唔會排到好迫好密坐得幾舒服，最重要係頭頂就係電視機，當你明白今晚集《吹上雲蕭》劇情就係有條女著住件細碼泳衣走黎走去仲要鏡頭知你需要幫你zoom晒埋去，坐正大電視下面食呢真係好鬼死爽，呀唔使問候我老母架喇想睇圖自己上高登追post啦但你facebook都應該俾人洗左版架喇。雖說入座起計兩個鐘但其實呢種酒樓好少可會趕人，埋單先發現更正原來標價$98就係$98，一蚊都唔收多你加一都唔使，而家仲邊度搵得到打邊爐咁多野食又好坐加任坐，可以一舊水搞掂仲有找？如果八點九先上黎仲要再平多十蚊添呀！講到料就絕對唔夠其他例如花園咁靚架喇得中等水準，你要靚去食返百五百七再加一果堆酒樓啦，火鍋配料款式亦唔算多較為大路，其實熟食先係重點，雖然亦唔係多款式而且唔係點樣得，貪佢夠特別炸魚皮同粟米羹兩樣已經贏晒，仲有無限阿波羅雪糕呢。

肯定唔係最好食，都會係難得地平加食得開心，同埋就腳嘛我屋企樓下就係，以此「性價比」計我會俾8/10。其中一個食得合皮原因係好坐，因為坐左成晚，間酒樓最旺時先爆得半層多少少，所以絕對唔會迫唔會嘈，好可惜亦因為噉，仲想食就真係要襯早喇，因為位置近街尾馬路口其實唔算好就腳，行返近大街中心區已經超多大小食檔同街市，呢個舖位做茶樓夜市從來唔旺，難怪每一年幾招牌就會唔同左名。再換新老細時，仲搵唔搵得到一舊水打邊爐，好大疑問矣。

好老實，唔係因為有謝安琪，我又點會黎睇呢場呢，雖然我鍾意香港中樂團更鍾意謝安琪，但鄧麗君對我黎講實在係太久遠之前的事了。只係而家真係好難撞到謝安琪出live，同今場有個好大賣點：同中樂團crossover的中樂版《囍帖街》。相信好多人同我一樣，係為左謝安琪同埋呢首歌入場，所以我會覺得，好多人睇完會高呼「仆街！中伏！」（好在我冇事）

其實唔算好多歌，全場夾埋先至剛剛好十首，而如果一心入場只為睇謝安琪就大鑊了，其實佢只唱半場，我以前睇演奏會中過類似伏所以早有心理準備，但頭半場中樂團表演都好好聽，其中藍色組曲每一章都由一種唔同樂器做主導，改編得相當有心思。只係我身邊唔少人都ＺＺＺ。想睇謝安琪，抖埋中場三個字聽埋中樂團黎多首《何日君再來》，中樂團solo左五首之後，主角終於出場唱多五首。其實搵謝安琪合作未必無因，佢之前演唱會都唱過《但願人長久》而且唱得唔錯，加上我相信要有足夠實力可以同大樂團合作之女歌手唔多，而當中有此地位有此實力者，你覺得又有幾多個自己／經理人／唱片公司會show呢種大家都知唔會搵到錢／唔會搵得多錢之餘要花相當多時間準備的半慈善音樂會呢？（話時話，其實除左星期五同日兩場，禮拜六晚仲有一場慈善專場演出架）

講返唱的話，其實一開始《忘記他》有點出事，用《藝妓回憶錄》種唱法，不過唱得輕得滯成日俾樂團搶過，可能係第一首未熱好身，亦可能係典型表演場地缺憾第一首歌唔係用黎俾你聽而係用黎俾panel推聲，搞到樂器遮左人聲。好在跟住人同音響都回到狀態，而若問今場狀態如何，生仔／爆肺之前係100%（當年謝安琪無論換氣、運氣、音域、音準、即興同感情真係無懈可擊），入左大公司之後長期只得50-60%，要上節目唱一兩首成日失準，直到大日子例如自己開演唱會，先會操返上90-95%，正如久別紅館再開「你們的幸福」，雖然總有少少瑕疵例如換氣已唔及以前咁細膩，但已經足夠繞樑三日，而今晚始終算重要節目，唔夠紅館時咁完美都有80-85%，所以我收貨，雖然始終都係唱廣東話較自然，同我覺得呢種歌路唔算好配合佢。而重點的《囍帖街》反而有點失望，一來編曲太貼近原著所以完全冇驚喜，二來chrous本身安排成對唱，由一個人唱晒的話換氣好難根本唔適合，所以每次chrous都應付得有點辛苦。不過整體我都收貨架喇。

連埋三個字中場休息先差少少兩個鐘，而真正有謝安琪的部份只半個鐘左右，我收貨，唔代表其他人會收，加上因為係流行歌手同正統樂團合作，所以好多你最唔想見到的衰野，今場全部見識晒，好似例牌遲入場，表演緊時電話響、大大聲吹水、同唔知坐邊度的朋友揮手，（偷）影相搞到實Ｑ成日走黎走去，最勁係有條友第二首歌已經成層都聽到咁大聲講「乜咁耐仲未出場架？」而我最灰，坐隔籬係兩母女，個女擺明係為謝安琪入場果隻，所以大半場未有佢份時煩到仆街，仲要坐正我側邊先死。而唔知點解我成日黎睇演奏會都會撞著呢種超煩靚妹，好耐以前又係試過一模一樣，一個老母帶住個女但兩個都明顯唔係太知入場做乜，結果坐佢地旁邊的我開場煩到完場。或者下次呢種fans入場前應該先明白一點：樂團主導歌手做嘉賓之非流行音樂會，好多時嘉賓只係得一（小）部份出場時間，因為唔係為佢而開的演唱會黎架，真心只想睇個歌手就唔好入場啦，你會悶死架。

不過，冇所謂啦，其實好多都係為左完場個簽名會嗟，我都好想謝安琪佢簽個名影張相架，因為今日佢著條裙呢真係口桀口桀口桀，不過限額80人，要同成班fans爭，真係聽完最後《我只在乎你》手都未拍完就立即衝出去排隊先有機會。所以等佢新碟簽唱會算啦。希望今年會出到新廣東碟。（國語碟我已經冇寄望了）

唔覺唔覺，原來黎到TRHKilled三週年。回想當年，真係日日夜夜都玩到好癲，同經常遇上好多奇人奇事神奇際遇。

近期林老師因為一個「fuck」立即成為愛字頭同左仔水軍文革式批鬥目標單野，令我諗起一本漫畫《The Pro》。出自以超暴力同黑暗社會觀見稱之Garth Ennis（如果你從來唔鍾意睇美國漫畫硬係要講到日本漫畫點樣好過寫實過灰暗過美漫，請睇睇任何一本有Garth Ennis個名出現之《Punisher》合訂本，保證立即令你對美漫改觀，信我），講一個和理非非世界正邪兩派都追隨溫和派，有個偷窺狂外星人因為好鍾意一個妓女，就將佢變成超級英雄屈埋佢入正義聯盟，故事發展落去就成為激進派同溫和派衝突，係一本用modern age角度tribute返golden age種天真幼稚到有點白痴種世界觀之諷刺漫畫。

「色情暴力？唔緊要。打交欺凌？碎料啦。殺人放火？冇問題。姦淫擄掠？算得乜。講粗口？搞撚錯呀你教壞細路呀我屌你老母啦！」

原來而家香港地，正處於黃金時代。一個普羅百姓甚至正派政客天真幼稚到有點白痴，唔白痴的話會立即成為槍打出頭鳥殺一儆百批鬥對象，迫到你班白痴甘心情願開門讓路俾蠻人侵略送你遍地黃金之時代。

謝安琪同中樂團一齊tribute鄧麗君場音樂會，有人拍左《囍帖街》bootleg。其實我都有用電話錄左音，不過我位置係下層尾三行，雖然坐正中間夠晒靚，但隔太遠喇錄出黎要開到好大聲先聽得清楚少少，真係百分百bootleg feel。睇呢條片算啦聲叫好靚架喇，不過我始終覺得編曲太冇驚喜，同埋如果唔加咁西式之敲擊／鼓會更好。同chrous對唱變獨唱，有點吃力。