段記



3/6/2013 MON

終於明點解一個台灣新人黎香港開第一場show
要收$580咁貴,同點解咁多女睇:
白安「是什麼讓我遇見這樣的你」香港演唱會




4/6/2013 TUE

http://youtu.be/Rim-m4Wtcqo


今年最強MV,唔係Biting Elbows《Bad Motherfucker a.k.a. Insane Office Escape 2》,唔係Meshuggah《I am Colossus》,而係Pryapisme《Un Druide est Giboyeux Lorsqu'il se Prend pour un Neutrino》。齋睇個名已經冇得輸啦。眾所鳩知今日係Megadeth出新碟《Super Collider》的日子,不過聽左派台兩首,我會同你講,去買呢隊法國黐線band Pryapisme隻新碟《Hyperblast Super Collider》好過啦,保證你聽得仲high。




7/6/2013 FRI

今日7/6/2013朝早十點開始,Metallica上海站 a.k.a. 「麥記有史以來第一場中國演唱會」正式開始賣飛。雖然成隊都老、冇Jason Newsted同個setlist都幾削,但歷史意義重大,所以相信今朝早全中國會有幾十萬個keyboard要換F5掣。因為從來未試過返大陸睇show,同好似買飛要特別窿路先易搶(甚麼是龍嘯?),見反正黎緊似乎仲會放個悠長假期,考慮不如直頭過東京睇Summer Sonic,反正八月中上海麥記加香港Smashing Pumpkins,Summer Sonic兩隊可以一次過睇晒仲送埋Muse,分分鐘皮費唔係貴得好多。


(講到尾,都係唔多想返大陸嗟,挑)




8/6/2013 SAT

http://youtu.be/RsjHvaU5Aik


今年可謂芬蘭melodic death回歸大戰,幾隊主要樂隊都揀2013出碟,難得盛勢。單從聽過評論,Eternal Tears of Sorrow《Saivon Lapsi》平庸得失望,Children of Bodom《Halo of Blood》唔差聽得出隊band知道自己之前點衰慢慢變返好(又或者終於唔夠錢使乎?),Kalmah《Seventh Swamphony》保持水準相對大band佢地知名度算好低但唯佢地一直忠於正宗芬蘭旋死風梧,不過心頭最好始終係Omnium Gatherum《Beyond》。


論成員同樂隊名聲佢地最名不經傳,又好難怪因為頭幾隻碟個歌佬唱得數一數二地難聽,我真係冇聽過extreme metal歌佬可以唱得衰過佢(真係要搵對手,就要過mallcore果邊了),同一開始已經唔走傳統路線而想玩氣氛一點,後來慢慢變progressive death,呢種實驗格最難搵客,加上之前十年出左六隻碟,老實真係要去到兩年前隻《New World Shadows》先至真正成熟,其實我都唔明點解佢地叫好不叫座之下可以頂到咁多年、居然有唱片公司肯投資十年俾佢地。只係《New World Shadows》都只算成熟歌仍有不足,到今年《Beyond》終於完成一張由頭到尾都可以話好的Omnium Gatherum唱片,冇再顧住一味想玩feel玩氣氛整體快返重返編曲比以前流暢得多,prog-death之餘亦不忘本行,寫左一首可能係史上最好的pop death single《The Unknowing》 - 認命吧專家們,melodic death metal本身就係pop架喇,同埋芬蘭melodeath除左唱法唔同,同Sonata Arctica之類樂隊有咩大分別?


《The Unknowing》呢首歌真係百聽不厭(雖然個MV就真係,可唔可以唔影咁多個歌佬),可以話係「post-melodic death metal」,Omnium Gatherum一直想做的終於憑呢首歌做到,我又成日想像如果唱清聲真係變成post-metal會點,例如搵Mogwai歌佬去唱,一定會正到仆街。聽著聽著越聽越灰,因為,唉,又話Omnium Gatherum會tour中國?而家都冇聲氣,即係香港站冇乜行啦。




9/6/2013 SUN

我都唔知間銀行係醒目定窮到只值一個數目字




10/6/2013 SUN

忍痛告別八年長髮,劉Sir落髮儀式定於2013年6月16日星期日舉行。最後一個禮拜我會隨緣地睇撞到咩人就拉埋一齊影返張相留念,有邊個無聊想襯劉Sir呢世人最後一個長髮的星期同佢影張相or搞搞佢個頭,就好好把握機會喇,口桀口桀。




12/6/2013 WED

是咁的,星期一走返舊公司黐餐,食食下飯有人打黎約我見工。lunch hour打電話黎已經神奇,間公司正正舊公司對面幢大廈過過馬路就係仲要做埋差唔多野都未算過癮,最正係約我端午節朝早上去見工。單呢一樣,就算本身冇興趣都好(噉我又有的),都要上去見識見識一下啦,係玩野的話果日收到電話立即踩上都得架,對面街行幾步嗟嘛。


開頭諗住好簡單,點知一玩玩左個半鐘。間公司有上下兩層兩個單位,先去上層工作室面試講一大輪,跟住俾份卷叫你落樓下寫字樓做Excel,做左半個鐘都做唔晒(先話:「其實我地從來冇預過有人做得晒架!」),再上返去上面又同另一個人吹一輪水,即係之前次面試都試過叫你寫信做電腦睇你會話能力電腦技能,但從未試過去一次面試可以玩足個半鐘咁精彩 - 其實算短架喇,我十一點見,見之前果個做完之後仲會有人同佢對卷逐樣講有咩事架,或者我係最後一個班人趕收工啦,所以冇左呢個部份收完卷「我地會對架喇」就算,如果早一輪上黎的話分分鐘玩足兩個鐘。


所以呢份真係純粹上黎搞事見見玩玩就算,見可以叫你端午節上去見工就知勁啦,而且好似見好多個我最後一輪已經見到最少四個人黎面試,上去時寫字樓都返左一半咁滯,雖然應該只做半日但連紅日都要噉加班,再講到明平日幾大機會要OT,同老細好似日本人黎而日本文化就係有開工冇收工,可以預得肯定做到死,人工又唔算好高減晒福利計返工時除返開可能仲少過之前果份,就當上黎見識一下就算。雖然日本人做老細有樣好,就係福利點都好過香港老細,新入職都有十日年假,香港公司?五日起跳想有十日假同我捱返幾年驢仔先啦。


難得有工見順手望望之前寄過信堆公司,發現主動打黎叫我去見果三間公司有個共通點,就係都講到明要「懂得倉頡輸入法」,雖然我中文打字有120-150字一分鐘,但打咁多年都只係速成,倉頡對我黎講同普通話一樣好很深奧深到我呢世都唔會學得成。係唔知點解偏偏寫到明要識倉頡先會搵我囉,第時搵工我專揀寄呢種公司先得。




14/6/2013 FRI


七年,三尺,襯落髮前,為這人生最後的長髮留倩影。對上一次幫抽水草度幾長係兩尺,不過都好耐之前,加上本身捲髮,襯剪前再認真度度,原來已經有差唔多90cm。係好唔捨得架,所以諗住臨別秋波表演多次成名絕技「屎忽夾頭髮」,不過廢事嚇親街坊,如果張相呃到7777個正評先拍片擺上RedTube益街坊啦。




19/6/2013 WED

琴日走左去個好市民獎頒獎禮,先知道原來好市民獎...都幾流。個獎係一張證書,但只用個硬膠快勞入俾你,有點求祈,不過證書後面有張支票,原來做好市民有錢收今日先知。不過有樣野係非常古怪:頒獎時,司儀會同得獎者講句「恭喜晒」。其實好市民獎本身係嘉許見義勇為挺身而出之平民,即係本身做果個都唔會諗住為乜獎,只係因為應該做而做,而當你會俾個獎佢跟住恭喜佢,咪搞到佢好似係為左拎獎為左張支票而去做?咪即係同好市民獎本身精神完全相反?用「多謝晒」都好丫,雖然聽落幾娘幾大陸,最少點都適合過「恭喜你做左件好事喎」咁on9。




20/6/2013 THU

我覺得下一屆諾貝爾文學獎應該頒俾《天姬.春宮圖》個導演,因為佢對「柒」呢個字進行左一次驚天動地再定義,我已經唔識點樣去講去評呢一套戲,讀得書少唔好意思,盡我所能都只能夠俗少少講一句:我屌你老母啦。


實在太撚鳩了(睇清楚,唔係cult,係鳩)。其實頭五分鐘見到媲美無記膠劇的對白同CG已經知道出硬事,後半先至最精彩,幕與幕之間一個角色性格同行為舉止可以完全唔同,咦張靜初頭半唔係個普通保險經紀黎咩,點解尾半突然間會變身武功高強女俠,仲要招招奪命見人就殺仲狠毒過劉德華?同埋,如果真係咁勁,點解當初又會咁柒俾人捉到?最後兩個人打,本來好地地冇咩問題,點知突然間兩個人唔使幾秒會變到著晒成套衫打劍擊,戴晒頭盔完全分唔到邊個打邊個都算,仲要jump住cut黎打jump jump下真係jump到上牆擒住繼續打,嘩屌你老母我真係諗唔到仲有咩人可以比佢更有創意。所以成套戲越後越笑到你仆街,因為你永遠估唔到跟住會發生咩事,加一定估唔中,因為劇本同剪接真係亂鳩咁黎,同埋根本成套戲係一個廣告雜誌黎,每一分鐘都有最少一個product placement,然後笑到你死,好似特務咁高科技咁先進,都要用Nokia電話,同埋要上大陸拍賣網搵工具搵物資?劉德華去杜拜捉賊,可以去沙灘曬住太陽訓覺咁嘆?搞到好後悔當年冇睇到《未來警察》,導致今日比較唔到邊一套更廢,不過更想知道劉德華拍左呢兩套戲之後,第時仲可以點樣面對其他人。(張靜初都唔弱丫,佢都拍左套同樣以柒馳名戇鳩經典《全城戒備》架)


imdb現時評分係1.2/10不過低處肯定未算最低,噉我又未至於俾零分,五粒星滿分的話,我會留返最後一粒星其中一隻角仔俾佢,因為果然如其名套戲真係春宮圖黎,好撚超撚勁撚多女,成日跟住斯琴高娃個春麗頭旗袍妹究極地正。如果連女都冇得睇的話,呢套戲真係連果0.00000001分都冇埋。


睇完呢套戲,令我諗返起一套本地獨立製作,好多年前耗時六年加耗資港幣5,000大元製作套《特務之王》。其實兩套戲真係好似,又係講特務,又係開頭正正經經後來戇鳩失控,又係本來想拍特務片點知發展落去變左武俠片,又係CG令你回憶細個睇《430穿梭機》笑到你喊,分別在於《特務之王》香港街頭冷巷五千蚊拍出黎,你會真係覺得好好好好睇,而《天機》話億幾兩億去左唔知幾多個國家取景,就算撚數啦。所以話,cult同鳩,真係只差一線。




21/6/2013 FRI

《World War Z》好似幾多人鬧,不過我受,因為套戲唔似一般喪屍片,我從未睇過一套喪屍片可以咁善良,成套戲一個見血殺人場面都搵唔到,連《Walking Dead》都暴力過佢 - 雖然你可以話因為佢地唔係喪屍,而只係負責傳播病毒之宿主,所以咬下人就算而唔會食人殺人。《WWZ》,其實唔係喪屍片,而係一套講傳染病的劇情片黎。


或者正因為噉而出事,見到trailer喪屍堆到成座山成排浪噉衝埋黎(其實我反而唔明喪屍本身就係玩人海戰術,點解一直冇人諗到呢樣野?),個個都諗住係睇喪屍點食人班友點死架嘛,你同我慢條斯理講故仔?雖然以劇情片而言,故事其實有點薄弱太過一節接一節唔夠連貫又有bug,例如你唔係話我知正派背景係情報科係調查員係美國政府,以色列突然間起左座超高城牆同外界隔絕,會完全冇人理冇諗過要去質疑去調查一下,甚至會如戲中所言,好似全世界都冇人知道呢回事?同我知Brad Pitt真係好型好靚仔,但可以上天下海炒晒飛機重傷都冇事死唔去,最後一個人面對幾十條屍仲悠然自得到好似同你講「火腩飯inevitable」一樣咁輕鬆,同臨尾唔係話佢用自己做實驗品而自殺左咩點解又可以咁輕易救返?噉搞法,會唔會神過頭?


套戲有兩個笑點。第一個係跟隊去調查病毒源頭個科學家,記得留意實佢,因為佢出場冇耐就死左仲要死得超搞笑,係連死法都唔清唔楚死左大家都唔知咩事果隻,「下?死左?」跟住 成院笑到仆街。死得簡直cult過《Pulp Fiction》。第二個係臨尾要一個人面對大群喪屍好鬼緊張時,走左去汽水機整返罐「82年百事,inevitable。」效果好正成棚人笑到好開心,其實又係product placement,不過睇完《天機.富春山居圖》之後,我相信可以對任何規模之殖入式廣告免疫了。而對我黎講,《地球末日戰》呢個名都算係個笑點,係咪同《催眠潛凶》一樣marketing班友已經諗唔到仲有咩戲名可以用,求祈執一堆同劇情有關keyword出黎拼埋就當係譯名?


仲有個原因令我幾鍾意《World War Z》,就係好多處理風格相當接近progressive rock/metal,片頭好似Nine Inch Nails MV,而最後講人類反擊場獨白戲根本就係中後期Pain of Salvation啦,全套戲種敘事手法同篇幅運用,亦正正同唔少concept album一樣。或者繼《War of the Worlds》之後,應該搵人將《World War Z》改編成rock opera。