段記



14/10/2012 SUN

Kowloon Metal City
Track 20
《搖滾歲月》:如果命運能選擇




15/10/2012 MON


我諗今年兩大估佢唔到,第一個係Unearth居然會黎香港 - 第二大當然係十一月中Dark Funeral啦買左飛未呀 - 當連pop界都冇以前咁多大band黎開演唱會,indie界仲搵到隊咁出名開show十分難得,所以貴貴都要睇。


向來唔多鍾意metalcore,僅叫接受多過deathcore同nu-metal,但Unearth係難得會迷之metalcore band,因為metal大於core。想當年metalcore係美國佬「參考」北歐/瑞典melodic death搞出黎的pop/chok版melodeath,跟住歐洲band見metalcore好搵咁多索性抄考返美國轉頭,而家源頭瑞典都唔玩或玩唔返melodic death,反而Unearth玩得比佢地更似樣,唔一味breakdown而超melodic加大量old-school Iron Maiden式solo&double lead,根本就係多左慢板位同breakdown的《Whoracle/Colony/Clayman》時代In Flames - 諷刺是當年In Flames《Clayman》之後選擇轉nu轉core,大佬都郁其他細band點可以唔跟,歐洲melodic death先開始沒落,而家想聽melodic death,揀Unearth反而仲好過唔少北歐band。


至於好唔好睇就問黎都多餘,Shepherds the Weak一早係其中一隊最好睇香港band,而Unearth向來被推舉為metalcore界最佳live band之一,台風同現場技術確實冇得彈,但感覺未夠high、差少少。音響可能係一個問題,新HA嘈野冇高梁舊場咁好聲,好似Unearth音樂重點之一melodic solo,差唔多全場都突出唔到聽唔清楚,令整體打左個好大折扣。有趣係STW時冇呢個問題。


另一影響係人數比預期少。起初以為今場會企爆最少四分三,話晒Unearth夠料晉身metalcore界皇者之列,音樂掂表演勁冇理由會少人黎?結果,唔係搞左個成個場咁大的mosh pit,你唔會留意到Unearth表演時後三分二場差唔多吉晒,估計全場過到百五人,但應該唔夠二百,應該蝕本收場,你計計戲金酒店食宿夾埋點都要幾餅野,而三百蚊張飛得百幾人,乘埋都維唔到皮。只有話HA太好人,成日覺得兩年前閃靈咁大加必爆可以平到$140,某程度上縱壞左好多人,從此認為細場搞show無論隊band點大點出名點好睇,一張飛都唔應該過$199,二字頭已經要睇睇班底日子再慎重考慮,$3XX的話直頭係個難以衝玻的心理關口,「好貴」、「唔抵睇」。相信就係因為預售已經$300,好多人嫌太貴唔黎了,如果$270/290可能可以拉多五分一人,雖然埋單計數應該都要蝕,畢竟搞大band本身開支已非常大,一日企唔爆成場,一日都難有望回本。


「...其實Unearth關鍾嘉欣咩事?」

「行過地鐵站見到咪影低,呃厹入黎俾like嗟,騎騎」




16/10/2012 TUE


同我一樣用新世界傳動$72無限上網,而近幾個星期覺得慢到冇朋友的朋友,請睇睇以下兩個post:


新世界$72上網慢請入

http://forum4.hkgolden.com/view.aspx?type=BW&message=4013722


新世界「伺服器改進」公告

https://www.facebook.com/NewWorldMobility/posts/10151054628096245


其實新世界個無限plan好無敵,任上而且速度唔錯最少可以油尖旺一面行街一面睇到普通Youtube片,先一個月收你七條,係衰網絡唔多穩定,而個網突然超慢果排剛剛遇著換電話冇耐,等我以為Razr Maxx上網仲慢過Defy,而家執執先冇咁灰。就噉睇個搞法好複雜,但我乜都冇搞過,只係


行動網絡>存取點名稱(APN)>還原為預設狀態


之後部機自動幫我選個1010/hkcsl APN,朝早九點旺角用通訊辦個apps試試(係通訊辦個名真係好柒),下載400kb、上載200kb,應該算正常速度,同我同台而上網超慢的話,試試reset APN setting睇有冇改善。


其實download 400kb係咪到頂?如果有人識得搞到可以上到四百幾甚至5XX請教路。




17/10/2012 WED


推介一個我很喜愛的內地女歌手,潘辰。Facebook最常見post,除左食食食就係「今期我買左XXX碟」,我的今期到了,花左好多時間,潘辰兩隻碟終於到手。


問何許人,2009年「快樂女聲」出身,八強止步但簽左張靚穎公司少城時代,2010年正式出道。都唔識唔緊要,我都完全唔識,不過兩年前第一隻EP《出發》非常無敵,當中《綻放愛》更是年度中文單曲,跟住靜左兩年,連楊冪都簽左張靚穎出埋碟,先肯出第二隻碟加第一隻同名大碟。不過聽歌莫問出處,音樂才是重點嘛 - 雖然我承認我係睇先的,《出發》個「搖滾氣質女生」造型實在無敵,係我曾幾何時的lockscreen wallpaper


但唔係得個樣,把聲中音厚低音夠磁聲,好多女歌手賣唱功點高音點點點,中低音唱得好女歌手先難搵。同雖稱搖滾女生,除左第一首其他俾盡用pop rock/soft rock形容都好勉強實質更近pop jazz,可以話搖滾在於氣質,但其實浸淫一番可以試唱jazz。所以好鍾意佢,把聲好聽唱歌唱得好女歌手大有人在,但你一聽就會記實、再唔會唔記得唔認得,就冇幾多做得到,加上隻碟音樂班底真係超班落足本做,仲有張靚穎會睇中,點都唔係單單靠偶像派外型總有實力的。(「楊冪呢?」「呀...」)


等左兩年的新碟《潘辰》,大碟本身優勢已不及EP實在好難贏到,總有filler總更加pop(說好了的搖滾呢),勁的歌的確好勁但唔夠驚喜整體有點太大路,都聽得好開心好滿意,畢竟唱冇失望。雖然水準唔夠《出發》全因pop左好多,當未得閒研究台灣歌手(魏如萱好似又有新碟),謝安琪睇黎有排唔出碟,今年中文流行唱片首位,就係林憶蓮《蓋亞》同潘辰今隻同名專輯之爭。


買碟呢家野,反而有故仔講。其實公司一向有團購力量,香港同事上淘寶搵野,睇中叫工廠幫手買,上廠時跟車送返香港運費都慳埋,雖然好多碟想淘但靠公司工廠團購力量有點尷尬,


「幫我買隻陳屍,封面爛肚爆肛屌屎忽果隻。」


都幾難講出口。潘辰就比較方便起碼好過陳屍先,但有日行信和居然擺最出最顯眼果隻就係《潘辰》,立即執左佢順便訂返第一隻碟特別版唔使經工廠。跟住有點後悔,即係五條人仔收我七條半港紙算當刺激本港消費,俾左五條訂金先話要等成個月,仲要交貨時先加價收多十蚊,諷刺係盒面印住「超值版」。最開心梗係碟舖老闆,以為有大大條水魚送錢俾佢使,因為其實新碟本身送埋EP即係買一得二,係我地呢種hardcore買碟人士為收藏為特別版為隻DVD,先捨得再使錢買同一樣野 - 已經收歛左架喇,《出發》特別版有DVD偏偏較靚個封面俾左普通版,如果唔係大陸碟冇港版好大機會兩個版執晒,因為中國的唱片雖然唔會爆炸,但Made in China真係連最基本野都做唔好,好似潘辰兩隻碟睇size都知digibook,一開盒已爛爛地,裝碟位崩晒,膠水位全部黐唔到,仲連本野都要又皺又污糟。老實咁多年黎冇幾多次買大陸版碟唔出事(諷刺是通常冇出事都係獨立band碟唔係大公司pop碟),此乃一直唔多會唔多想買大陸歌手碟主因。


刨晒兩本歌詞集,發現有樣野幾有趣,雖是大陸歌手、雖只內銷大陸,兩隻碟夾埋有四分一經香港人手,除左方大同有份作一首曲,CY Kong + Davy班底都監&錄左幾首。成日覺得香港幕後其實好有水準,最頂一班水準絕對足夠站在中華一線,欠的是夠實力夠個性去唱好佢地作品的本土歌手。




18/10/2012 THU


其實釣魚台單野玩完未?最後點收科?冇仗打,即係大陸果邊同之前N次一樣,暴龍頭老鼠尾啦。


近排無聊刨舊港漫,發現好多寶藏,其一就是肥良一伙原來七年前已經把世事都看透了。




19/10/2012 FRI

http://youtu.be/GikgicSeEA4


一等就八年,Wintersun終於肯出佢真正稱得上製作經年的新碟。想當年Ensiferum結他佬Jari Maenpaa想放假單飛試新野,點知隊友直頭炒鬼左佢,跟住基本上自己一個人搞掂《Wintersun》,同同期Ensiferum新碟《Iron》比超班唔知幾多十倍,就知道Ensiferum冇左佢收得檔。難得佢好有耐性唔立即趕盡殺絕前隊友,慢慢搞一路等到人地出到第六隻碟,先排到差唔多同檔期出新碟再度鬥法。結果誰勝誰負未知,雖然官方已經有得聽全隻碟但未得閒去試試(不過唔使聽都知邊個贏啦),就襯今日新碟《Time I》正式發行,重溫一下三年前有心人整的經典「希特拉都冇得聽Wintersun新碟」,同埋兩個有關隻新碟的笑話。


1) 碟名叫《Time》(出之前分拆成兩部曲第二部留下年出),正所謂最怕改壞名,叫時間結果一花就八年時間先出到。好在唔係叫《Eternity》。


2) 條片好笑就梗,但知唔知最好笑係乜?就係Jari Maenpaa自己都bookmark落佢Youtube account個「我的最愛」。




20/10/2012 SAT

可以一戰

http://www.lcsd.gov.hk/CE/CulturalService/Programme/tc/music/00000412.html




21/10/2012 SUN

Kowloon Metal City
Track 21
怒人.上傳:
百年一遇地道香港搖滾「鳩core
係亂屌定屌亂,由你自己判斷




23/10/2012 TUE


《脫北者》:中伏!


不得不說今次中伏了。全因《野狼與瑪莉》重拾《海虎.武神》後已丟淡的讀港漫興致,並開始認真留意鄭建和,繼而對他同樣採另類題材、同樣三期完、同樣標榜重口味的新作《脫北者》充滿期待,尤其新政府上台不足百日香港已被同化得跟大陸無大異,香港漫畫本就罕有探討社會政治,在二十三條快將來臨之時,這可能是最後一部港產政治漫畫,沒有不支持的理由。可惜成品只見眼高手低。


其實見到名字已能猜想書中大概,好的是港難當前港人自有共鳴,未發行已引來無數議論,弊者亦是見其名知其實,欲成佳作必先「扭橋」,可是三期下來幾乎沒有任何創新或避舊橋段,主線不離典型「不惜一切挾單程證闖關逃離極權國度」,再將大量新舊國情穿插其中,出版前夕大熱的洗腦教育自當少不了,像跟隨貪腐警官在車站內狐假虎威的少年組織「國民前鋒隊」,那種「家人親不及國家親」的激進思維與行為,還有響起國歌時立即立定合唱並需感動流淚,事後再檢討是否感動夠深,通通近貼當期時事。但似乎花得太多篇幅去放大這些部份,尤其不少屬大家早就耳熟能詳的國情,結果反被此賣點所誤,拖垮了全體的步伐和張力。


遺憾地《脫北者》第一期有可能成為個人印象最差的漫畫序章:故事一開始已經來到關口中央車站,走到出口月台就是結局,是個發生在很短時間內的小插曲,正好適合短篇小品格局,但看過第一期留下的記憶,除了很多美輪美奐的插畫與細緻分鏡,還有些看得人會心微笑(該說苦笑)的細節,大體卻甚麼都沒有。就是太集中在某幾個點子再用大量畫面補足,假使一頁紙等同一分鐘,每「分鐘」的平均劇情含量,可能比出名十五分鐘戲五十分鐘做的無線膠劇更低 - 值得一提當中加了紙十數頁。過度執迷在個別部份,再有點賣弄畫功與分流,結果幾乎完全犧牲了劇力和敘事性。


首兩期著筆甚多於人物描述,兩位主角之外第一期寫大小國民先鋒,第二寫講站中人如何為財為色自甘泯滅人性,真正有戲可做是第三期大結局,宣傳提到的重口味,應該是指悲劇結局吧。唯一值得細味,其實是上到特區火車後,坐在女主角對座的富家女一席話:「對我們來說,任何地方都是自由國度...階段不同,是無法明白的。」確實在現實世界,能享受多或少的自由度只關乎窮人,上流社會到那堻ㄔi以用金錢去疏通去買特權,對這階級的人而言世上根本沒有所謂不自由之地,從她的說話和地位,也可假設為何見到一身血瀕死的女主角會毫不驚奇,只因經常坐特區火車遊歷各地的她見得太多同類事情早已麻木不仁。當劇力張力不足、創意橋段欠奉,結局富家女一段,反而是全作最有意思。


或者對鄭建和這「港漫Modern Age」代表人物要求過高,《野狼與瑪莉》就算後半回到俗套最少第一期達難敵神級,拉上補下之餘做到真正創新,僅得三期都嫌說得太少的《脫北者》卻真的失望,畫是好但場景與篇幅局限世界觀未夠宏觀立體,故事只平舖直敘而平淡,忠於時局贏在共鳴但代價是找不到新意,讀過不覺得是受到啟發而寫,更像用一堆時事焦點堆砌出黎的趕潮流之作,若改為中篇為各方面填補,發揮會更大更完整。最失望可能是「重口味」三個字,自己看海洋出品長大,《海虎.武神》和肥良其他大作一向是港漫的重口味指標,如今路線比較嚴肅、題材比較寫實、場面渲染得比較露骨,但遠不及多年前的肥良仍會稱為「重口味」,就有點中伏之感 - 或者這是發行商的宣傳技倆跟作者無關,但鄭建和成名作之一《武神鳳凰》,正好是《海虎.武神》全傳當中故事、風格與尺度都最不武神、最不海洋一章,看往後肥良回頭接手武神系列已幾乎不視「鳳凰曆」為正史一部份,或者和仔的重口味該以另一尺度去量度。


平心而論,《脫北者》是部有好構思但寫不出好故事的憾作,主要為支持作者的勇氣和誠意。其實更有興趣看,是本地幾個早遭完全赤化的主要論壇,會如何批鬥《脫北者》和鄭建和。




24/10/2012 WED

真係冇得唔服有線寬頻的生意手法,直頭服到要問候佢地老母咁好野。一年前頂唔順李家寬頻就轉去有線,其實好抵用,兩年約頭十一個月月費$149跟住「免費」,簽約時sales為爭單仲幫你俾第一個月錢,即係一個月先$62,速度有10MB十分快而且幾穩定 - 最少穩定過同期的PCCW,頭半年除左試過兩三次斷線(死機樓喎),用得不知幾開心。


點知計數計到超準,三個月前俾晒錢開始,速度仲維持到但成日斷線,自此間唔中reboot一次router成為生活習慣。起初一個星期一次。後來兩三日一次。今個星期直頭一日最少一次,琴晚更加連boot兩次都連唔到搞到今朝都未掂,返工前索性router都拆埋今晚返到屋企先駁返睇掂唔掂。難怪話「第一年收費,第二年免費任用啦」,你用得到的話咪任你用囉。想當年有線寬頻最出名就係一條線成棟樓分超慢加成日斷,估唔到過左咁多年今時今日都係咁廢。或者而家收晒錢先黎料,已經進步左、已經比以前有人性?


唔想日日早午晚boot三次router?咪返轉頭幫襯PCCW囉,$249一個月嗟,仲要講到已經由1.5MB升級俾你3.5MB好偉大。鬼叫住唐樓得呢兩間揀,分分鐘拎我部電話tether返新世界個個無限上網plan落部電腦仲冇咁嬲。




25/10/2012 THU


《爆漫》:或者我已超過
適合看少年漫畫的年紀


《爆漫》是《D.M.C.》之後人生第二套一開始就追看、最後全線購入的日漫,除《死亡筆記》創作組新作這賣點,日漫萌腐兩系當道多時,難得還有人寫男人浪漫熱血漫畫。不覺便來到單行本最後一期,讀完第一份感覺是相當感觸,不是為佳作結束嘆息,而跟早前看《Beck》一樣,覺得自己老了,少年漫畫彷彿一種太過年青的讀物。


看漫畫多年,沒見過設定會寫實同時跟現實相緊扣得如此巧妙:一編劇一作畫的主角二人組,在熱血漫畫沒落年代一心光復從前漫畫振奮人心精神,以創作不正統的正統格鬥漫畫成為最偉大漫畫家為目標,正是現實世界作者兩人和《爆漫》本身寫照,更難想到「畫公仔」這題材可以寫得充滿迫力,跟其他作者比拚創作與智慧精彩程度不下真正拳來腳往,示範了何謂「不正統的正統」,近年日本罕有地熱血激昂的漫畫居然是部文派作品,可是連現在日漫發展處境都幽了一默。加上饒有教育意義,給讀者認識一本漫畫從零到有的過程和出版工業內裡,還有提醒為了理想要一直振作永不放棄,《爆漫》在藝術和社會成就方面已遠超一般漫畫。


不過「畫公仔」做主題的限制到後半越見明顯,畢竟漫畫世界天馬行空但創作過程不是,要設計「奸角」很困難,僅七峰透一個能視為真正反派角色,但他先集結網民力量成畫作,再嘗試將漫畫創作數據化企業化的戰術,聽來合理始終有點匪夷所思,這就是寫實的局限。而且作者間的對決能夠想到之爭鬥和攻防前半已經寫盡,越接近結局創作過程著墨越少幾近只餘因果,若對這方面有要求,絕對不會接受這一頁說「我要勝!」中間甚麼都不見下一頁已經贏了對手這種敘事法,最後幾期尤其過份,就像再想不出可發展的橋段和細節便趕大結局了事。到後半甚至方向也有點迷失,最初將同樣是天才少年漫畫家的新妻英二設定為主角二人之宿敵,讀者自然預期發展下來會有一番大戰,僅近結局幾回幾格幾句就交代「已贏了」。不少有發展潛質的配角也只獲出幾回鏡的機會,後事如何一點都沒提及,所以最後一期把焦點放在女主角參與配音員之爭重見初期的緊湊迫力,作品整體重心卻早已失去。


讀《Beck》時也感受到同樣缺憾,或者這就是少年漫畫不能脫出的規範,當中的世界如何艱辛仍異常美好,像主角往往一開始已擁有幾近天下無敵的才華和無限潛能,自已不用怎樣爭取都一定有最少一位極品美女主動獻身,無論要等多久也一定會痴心一片地為主角等待下去,然後一路上遇不到甚麼自己能力解決不到的問題,有也不怕最後總會逢凶化吉無絕人之路,挫折呀窮困呀這些彷似永不會降臨在主角或正派一伙身上。《Beck》的問題是有玩樂隊、在業內工作過,都知道真正的樂隊生涯跟漫畫內所說差天共地,那有這麼輕鬆如意。《爆漫》其實有很多發揮空間極大的點子,如創作組意向不一致、別有機心的助手、助理間的不和、作者與公司對連載意向存在分歧,諸如此類很多可以成為非常實在和富戲劇性的劇情,結果僅止於埋下有可能的伏線,最後主角二人關係未決裂過,職業生涯堶咫j打擊未出現過,身邊同儕沒有背叛過,背後的友人女人也沒有遺棄過。


圓滿得近乎超現實,相信是作者想在這視為自己寫照的作品中一圓未能達成的心願,可看看漫畫內的二人組,最後終於寫成一部被改編成動畫的作品,但為了維持質素而決定腰斬,這個大難題輕易獲得編輯和動畫導演的支持,結果在動畫推出前如願結束。現實世界的二人組呢,看看《死亡筆記》被一致劣評的下半就知道了。對這才是現實,《爆漫》絕對是部可達經典級數的佳作,就是很多該提的都別過不提或扭曲得過度美好,想寫實實際上相當不真實,明白給年輕人看的漫畫總要光明偉大,但當堶惟瓞g在真正的社會內幾乎不可能發生,未來要面對的人事物亦會跟漫畫中的接近完全相反,一味美化或隱瞞,又是否好事?




26/10/2012 FRI

http://youtu.be/FR2n6DURBCU


今日去會展砌booth砌到好支力,沖涼時聽迪克牛仔,一路沖一路慢慢聽,沖左好耐,因為迪克牛仔頭兩年大量無敵cover實在太正,尤其是呢個live版《原來你什麼都不要》,真係聽左咁多年,仍然每次聽到都聽得好激動。


其實迪克牛仔真係一個充滿男人的浪漫的傳奇。唱酒廊唱左十幾年,唱到1998年決定試多一次都唔得就收山,結果單憑《愛如潮水》同《原來你什麼都不要》兩首歌,就由台灣酒吧唱到上紅館。當年冇去到佢紅館場show,係成世人一大遺憾,之後新伊館狀態已經差遠了。




27/10/2012 SAT


反正《太極》本身已經打算追埋第二集,又成世仔未去過新光,當豪華之外新蒲點影藝平日要五條一張,新光差唔多價位有得順便重溫埋第一集,可以無聊一下。






今日第一日fair,食lunch時拍低擺上黎開心分享的JC又up多次,除左 1) 好野不妨一睇再睇 2) 摷勻Facebook Android同Friendcaster都搵唔到電話出相前後將張相轉返正方向的功能(唉Android Facebook app真係好Q廢呀),仲因為 3) 晏晝有個有關厹劉Sir的故事。


話說晏晝四點過後,成座會展已經冇乜人流,咁靜局加上大家飯&下午茶氣攻心隨時訓著,女同事甲拎份頭條日報黎睇,睇到JC果版時,有兩條女走左入黎我地個booth四圍蕩。女同事乙見到JC就問劉Sir:


「條女係咪掂先?」


答曰:


「呢D先係女嘛!口桀口桀口桀...」


伴隨著成口一滴滴的淫笑聲。剛剛企劉Sir後面的兩條囡囡面上立時浮現很驚訝的表情,之後就急急腳走了。




28/10/2012 SUN

有時你真係唔明鬼佬點改中文名




29/10/2012 MON


有陣時真係不得不信命格這回事,好似擺左咁多年展覽從未聽聞過會發生咩意外,唯獨今次公司兩老之外只劉Sir一個人頂晒全場,黑仔王劉Sir一去到會展,就火燭了。


九點到會展已經響晒警鐘,扶手電梯封晒幾百人走落黎,即係有料到啦,但乜火警唔係唔應該搭電梯咩反而電梯冇封到冇人管,立即鼠入去上我地頭五樓先。一路行好少人而且好多似乎唔敢入展館想走返落樓下,見唔到火但好大陣煙味,入到場坐定幾個字會展先開咪話著左火,但個宣佈超求祈同得廣東話,仲要後面班實Q嘈生晒全部入晒咪,明顯係即場是但拉條女黎講幾句,最抵死聽聞段宣佈只播俾我地入到展館好安全的朋友,樓下最需要知道發生緊咩事果幾千人係聽唔到的,噉你開咪黎做乜?關我鬼事咩,乜人都上唔到黎包括我老細,唔使做又冇皇管咁合皮立即坐低Facebook打個靚卡再食埋個雞記早餐先啦 - 諗深一層唉蠢左,我上到五樓半個字之後就乜都封晒,早知就唔咁快走上黎,行慢半個字就可以名正言順遲大到,走返出灣仔搵間茶記坐低慢慢嘆到解封先走返過黎開工都仲得。明明平時返工日日遲到,頂,點解今次我會咁準時仲要係早到好多?


三樓擺檔果班好慘,因為火就話一早救熄但成座館封到食完晏晝飯先開返,不過個火越大老細越開心,因為火燒旺地 - 旺是動詞,作為主展館之三層單數層封左三樓,變相屈晒班人上黎我地五樓,就灰了因為本來只搵我一個黎睇檔就係預個市淡加禮拜日冇乜人會黎,點知燒一燒立即大半日做個冇停手。最灰係今年個booth整左個外面睇唔到的暗位,大家食飽飯自然想訓,老闆同老闆娘就輪住匿埋訓覺,檔呢家野,梗係劉Sir負責睇啦。


「你老闆丫朝早又遲到晏晝又訓覺,早到又做得最搏命果個係我,我仲似老細喎而家!」


呀同埋估唔到東方日報的朋友會搵著我做訪問咁得意。自詡人靚聲甜的女記者,送返張簽名相俾我當酬勞啦,口桀口桀∼




今日Yahoo首頁新聞充滿諷刺意味




30/10/2012 TUE


人人都知劉Sir腰圍數字同佢身家數字相反,只會不斷地向上升。全年基本上只每半年撞做fair先著一次西裝,半年前臨fair試勻全衣櫃咁多套,得返一條西褲著得落,仲要係好夾硬果隻,不過只著兩日就求鬼祈。半年後今個fair又係之前果晚先試,大鑊對自己條腰太有信心,開show前唔夠十二個鐘先發現入得晒條腰已經好符碌,跟住拉鍊只可以拉一半,再拉上去下半就會爆開,但得返一條褲著得落冇計,搞到成日要掩掩揚揚匿埋,水都唔敢出去湛尿都唔敢去屙。


實在柒到自己都頂唔順,廢事第二日仲係噉嚇親附近咁多囡囡,放工立即走去莊士頓道果邊橫街內巷買條新西褲。好在排檔臨收市之前搵到間有得買,問阿姐借把尺一度,大鑊原來最粗果個位已經突破40寸,阿姐最大得條38寸,又冇得試唔知塞唔塞得落,唔通叫我當街試咩。


「唔使驚!一條腰等於兩條頸咁粗,你扯住條褲腰位兩邊再圍住條頸,掂得到另一邊的話就一定著得落!」


阿姐曰。又真係俾我掂到喎,阿姐再立即開衣車幫我修埋褲腳,就俾一舊半佢賺啦,所以最鍾意行舊區買野,又平又多又快又方便又有人情味。返到屋企好緊張,死會唔會真係肥到著唔到?好在38寸褲著上身仍然相當鬆動。等我仲成日以為自己好肥。睇黎過左今次fair,黎緊半年仲可以刷多幾餐。


(但其實成日都驚自己怒肥,擺一次fair跟住幾個月都只會覺得自己好瘦,因為見到班鬼佬身形同體重係以噸位去計,你幾多斤都好,又算得係咩丫)




31/10/2012 WED


左右,I missed you & I'll miss you。冇睇錯過左演唱會三日張飛仲在手&冇搣到,因為冇去到,佢地黎香港撞正擺fair,本身剛剛就到演唱會正日唔使過去就歡天喜地買飛,點知一買完老細就話要調更(呢咪就係劉Sir一去到會展就邪到人地火燭封左半日館果日囉),做完執埋手尾都七點幾,仲要先返屋企除低套西裝先,但八點幾返到屋企唔掂,做fair是好很支力的一回事,時間已經遲返左屋企更加唔想再出去,相當遺憾,因為真係好想睇左右。唯有等佢地下次再黎香港...仲有下次的話,當蒲吧過埋今年年底唔再做band show,同早被批鬥多時的Hidden Agenda被判為「三級」時,過左2012,真係唔知道香港仲有邊個單位邊個場會搞港外地下樂隊演唱會。


所以點解成日睇show總係開show前夕先買飛或等到開先厚顏無恥地跪求留飛?因為黑開真係有條路,唔止今次已經試過幾次一早買定預售飛結果撞期出事,又或冇事但買左(貴)飛冇耐就話有平飛有減價,伏中得多搞到而家一場show點想睇都唔敢咁早買飛。命呢家野有時冇得你唔信,我呢條擺到明就係walk-in命格啦。


「大鑊,買左右飛果晚仲買左Dark Funeral...」




1/11/2012 THU


七仔近排玩復古?繼思樂冰新地闊別多年後重出江湖(雖然唔抵食),又見到五蚊一杯思樂冰仔,用八達通俾錢仲要平多兩蚊(話時話,幾耐未試過用銀仔買野?),雖然未見過實物但睇圖已經覺得好細杯,不過$5/$3一杯細杯裝,小學時代價位喎,仲想點?


如果老豆知道實開心死,佢超鍾意飲思樂冰,有時夏天天氣熱夜晚訓唔著,可以無聊到一兩點鍾落街買杯大思樂冰上黎送電視。不過睇個勢佢應該未知思樂冰做緊特價,近排咁多波睇,知道左的話,夜晚應該會見到佢一盤一盤噉抬上屋企。