有時不得不信命、不信緣。早上收到Facebook通知，TRHK專頁正式關閉。而兩年前今天，正是TRHK門市最後一日。

「明星八掛大分享」，睇見個名都知講娛樂野，網主每日將報紙同八卦雜誌娛樂版（直接ｄ講：囡相J圖）quote落個網，方便大家收集娛樂界最新資訊同打飛機。過癮在間唔中會post重大政治新聞，之前特首選舉、僭建、邊個官有乜落台級醜聞之類有講，今期反洗腦反到陷家大細上街遊行，政府借國民教育之名明益紅底機構公然貪污咁大單自然冇忽略到。

證明香港真係如政府明眼官員所言已達臨界點。換著以前呢類小型商業網理得你死，咁得閒關心時事，倒不如上網搵多幾張囡囡相引多幾隻厹上黎谷人氣賺廣告分紅？而家反而好多舉動估佢唔到，好似ThisAV地震會換上灰色logo、菲律賓事件後出《港殤》公告、會利用播片之前寶貴時段出反蝗廣告；就連八卦飛機blog，俾女你睇之餘都不忘社會責任，定時定刻為你傳達重要時事訊息，即係唔少所謂泛民政黨、親民政界人物都冇咁熱心咁立場鮮明。仗義每多屠狗輩。師奶們好需要明白呢一點。

（順便問問：以前有幾個網可以唔使錢直接線上睇到壹週刊、Face等，不過知道的都bam晒，有冇人知道仲有咩窿路睇得到？）

真係好對唔住，今朝提到而家連鹹網囡網都支持香港本土反紅色入侵，師奶們應明白仗義每多屠狗輩，黎到晏晝已經要出個道歉聲名。因為事實證明，香港地師奶／老母已經愚昧到一個冇得救之地步。

近半個月網上出現過兩次網上大幅動員。打風前後、佢有份開咪之數碼廣播出事前後，唔知點解鄭家富突然間成為網上共同攻擊對象，所有論壇幾日間同時出現大量言論批鬥，由「政棍妖言惑眾」到「批評港鐵捉錯用神」都有，但內容不重要重點是模式，所有攻擊通通無先兆下一兩日內同時出現遍佈各論壇，係熟口熟面之中共網絡水軍動員手法，而連高登都出現得不尋常地多，即係攻勢非常猛烈。批鬥完鄭家富，第二個目標當然係當務之急國民教育啦。

雖然今次陷家遊行有點柴娃娃，好老實香港同大陸政府點會唔驚丫，我諗佢地同我一樣預得幾千人，但當向來只及真正人數五分一唔夠之警方數字都話有19000-31000換言之的確有最少九萬人上街，代表香港而家除左食開民建聯蛇宴班阿伯阿嬸同新移民之外，最易搞掂果班老豆老母都開始脫離佢地控制範圍。當遊行之後低章五毛橫行見稱的師奶王國只得「睇我地遊行幾和平幾理性」飛機post大量，居然一個五毛post都唔見已經知道有事，原來係改變策略主力出擊，琴晚梁振英一講完「國民教材會放上網俾人任睇」，24小時未過就出現一個集中帖：

以懶客觀角度軟銷，超短時間內海量支持言論連推幾頁保證置頂，有回應反駁同質疑立即攻其弱點「其實係咪大件事到要罷課？罷課影響你地仔女呀」，再轉移視線「國民教育就一定推行架喇，所以我地唔係人反我又反，而係要爭取點樣去制訂教材」，當然又係一呼百應。睇到呢度就知道五毛已經成功左。個post去到五六板都只得非常少反駁聲音，而且往後方向已經由為前日有上街遊行而自豪，調轉成為冇去遊行、唔遊行而驕傲。如果當中大多數係五毛分身，去到五六板夾埋反駁都唔夠一板，你老母個個禮拜日上街都冇用啦真係殺到埋身要出聲時又唔出；如果五毛原來只佔少數好多回應來自真正師奶老母，就更加搞笑了。所以成日話香港班老豆老母從來最抵死，擔心自己仔女俾人洗腦，到頭來自己最易俾人洗腦，咪俾我睇死，而家講到為保護仔女會點樣同政府搏命（針終於拮到肉了），去到九月咪又係死死地氣送個仔返學校俾人染紅。歷史上親子王國真正戰勝五毛，只得早排五毛話要取消ICAC結果俾人剷到上報一單，但亦非因為師奶老母醒覺，只因條五毛太柒。

全個計劃同政治動向咁配合、整體咁有組織，同你講冇人幕後策劃你都唔會信啦，而且師奶王國從未出現過如此嚴謹之五毛攻勢，證明政府開始認真做野國民教育點都上硬馬，要反只餘罷課一途 － 雖然教協已經肴左底話都係唔罷課，師奶王國吹幾吹「罷課會搞到你個仔成績唔好呀」又會大把老母唔響應。距離開學只餘一個月，黎緊網上五毛水軍會出動得越來越頻密同激烈，剛剛前日「和平理性遊行」後自我感覺良好的師奶，實際上冇任何能耐或根本冇意欲去對抗，我只有祝願而家仲讀緊幼稚園、小學同初中的小朋友們，唔會因為自己老豆老母無能搞到大個變晒戇鳩左仔。

第一日出開始已經非常唔妥Facebook Timeline，介面鬼死咁煩亂到唔知點睇，可能俾人小得多，最初話強迫性轉，後來不了了之。以為冇事點知半年之後無端端話「係時候轉喇」，搞到幾日前無端端將我個page變左timeline，研究到今日認命真係冇得返轉頭救唔到。唯一比以前好係比較容易搵到（好耐）以前出過的wall post，但搞咁多野，直接加個search功能俾人查舊post好過啦，都唔明點解一直唔俾人search。

除此之外，門你啦Facebook。

謝安琪、王菀之外G.E.M.之外，李卓庭係唯一我會迷的香港女歌手，好可惜香港地主流唱rock已是自己搵自己笨，唱左五年都有一年出到一隻碟，由初出道橫掃頒獎禮到而家完全冇人理，仲講到八月開多場演唱會之後可能正式隱退 － 剛剛先有新歌派台，唔係即plug即飛丫嘛。非常無奈因為香港樂壇已經搵唔到聲底靚唱功勁仲要敢唱同唱得到rock的女歌手（其實關家姐絕對可以，但即使佢未上岸都唔會走呢條「另類」路線），非商場show我只睇過佢09年狀態唔算好好的《After School》九展演唱會，假使真係最後一場點都要睇，絕對可一不可再第時可能朗豪坊都見佢唔到喇。而家八月頭仍然冇聲氣，上網望望，場所謂「告別演唱會」，唔係就係呢場似劇多過似演唱會的《Duo In Love》嘛．．．日子仲要揀八月10-12檔期同人撞到PK，即係唔睇Kolor同透明雜誌同太極，都要睇王梓軒啦，哈。

我老豆係個超級扒迷，幾十年黎鋸扒是人生一大樂趣，好在口味限於飲食方面，我老母是很正常的。雖然已經七張院都入過唔知幾多次，好多野唔再做得鍾意打波都唔可以再打，唯獨扒繼續鋸唔停每個星期唔食番餐都唔心足，唔出街食都要買返屋企自己住，唔理平定貴靚野定粗野最緊要有得食。晏晝出惠康買野時見到澳洲牛減價$38塊，即掃左大量肉眼同西冷，多到雪櫃冰格都擺唔晒。想出門口，老豆喝住：

「走咩呀走？陪我食扒！」

出到去睇Evade的話，返到屋企宵夜可能又係／繼續食扒。然後聽日lunch都係。

8/8/2012 WED

好似冇乜人鍾意新版《Total Recall》，搞到我都唔敢同人講我覺得唔錯。本身冇乜期望，trailer已經完全兩回事仲有點爛片格，全無期望結果出奇地好睇，可能因為我一如當年抱睇old-school打戲心態入場，而成套戲由頭打到落尾非常多大場面，又唔似好多導演又要打又要吹好多水扮晒有內涵結果兩頭唔到岸，乾脆之餘帶得出一點意思，以商業戲黎講文戲同打戲比例調節得相當準確（雖然有幾場追逐戲拖左少少唔夠爽快），不過一定滿足唔到這一代乜都要講求氣氛深度的高要求影迷。所以我好明白評價會幾近一面倒負評。

個全新世界觀幾過癮，典型亞洲文化侵略西方的cyberpunk設定，唔好同我講高等的大英帝國洋人同西方文化當道，而次等的殖民地澳洲九龍城寨噉款仲要一街黃種人，當中冇任何政治設計呀，不過未來起碼殘但冇殘體字，同主角打開屋企雪櫃有包維他檸檬茶（好似係），繼《攻殼機動隊》要飲嘉士伯之後，再次為香港本土文化揚威未來世界而自豪。好多部份與時並進，黎到廿一世紀梗要玩dubstep啦，舊版老婆唔算多戲 － 始終當時大隻佬男角仍然比好打得女角流行 － 新版男女平等由頭帶到尾打到仆街好正。劇本繼續玩主角自己都唔知自己係邊個的雙重身份潛伏特工，其實最佳結局唔應該大團圓，而講到男主角打贏最後大佬昏途之後以邪惡記憶醒返，噉就大把野玩。同噉先配合呢一代口味嘛。

係唔多鍾意個名。原版地球打到上火星名乎其實《宇宙威龍》，今集打來打去都打唔出大氣層，極其量《地球威龍》，好心就改改中文名唔好加個「新」字就算啦。

9/8/2012 THU

ICAC寸爆林峰個新廣告真係一撚流，可以霸埋無線黃金時段日播夜播就最抵死。

我地細個七八九十年代，港英時代政府廣告拍得好好睇，要搞笑要有深度要好鬼恐怖嚇死細路通通都得，製作非常認真構思夠晒創新，但回歸之後只要係政府出品的任何廣告，只能夠用低鳩能去形容，咁多年黎我只鍾意謝安琪唱「天妒英才」果個超doom禁毒廣告。唯獨ICAC仲keep到每次新廣告都可以拍得精彩 － 可能因為廉政公署起碼比其他政治部門多一份自主。

想開開心心慶祝生日，梗要去最old-school的豪華戲院睇《低俗喜劇》啦。不過，點解冇Dada帶埋爆炸糖黎謝我票？搞到我今年生日好唔快樂囉。

既琴日回顧過Law of 14演唱會，順便講埋一直都好想講的呢件事。年度柒歌首選，本已是大熱的莊冬昕同李家仁都不得不向《難忘時刻》低頭，成隻歌聽得人最灰唔係我向來非常欣賞的環球居然會仆街都仆唔切地走去刷政府刷大陸鞋，唔係完全同香港現實脫節的MV，唔係成班歌手跟隨譚校長一齊賣港（好在謝安琪走得及時），而係填詞果個居然係劉卓輝，八九十年代為夏韶聲、Beyond等眾多搖滾樂隊，寫過無數以香港社會同政局為題，一直被傳頌型今的劉卓輝。雖然種種原因佢從當時到而家都唔及其他同代歌手出名甚至可以話寂寂無名，但一手強烈政治觸覺同時意境化文筆，係我最愛本地填詞人，基本上九十年代初樂隊潮退已難見新作，所以幾年前會出山為Kolor寫《圍城》，成就《了不起》之後另一神曲，令我呢個Beyond加劉卓輝迷非常感動。點知，熱血的佢居然會寫冷血的《難忘時刻》。

如果首詞真係完全冇被篡改之劉卓輝原版手筆，只有安慰自己，搵食嗟。

澳洲韻律泳奧運代表隊為左參賽時可以宣揚地道澳洲文化，編左首AC/DC medley做參賽歌曲。點解美國隊唔係用Metallica首Mercyful Fate medley呢。

（咪因為美國隊醒囉，睇澳洲隊結果好似包左艇，就證明metal都是萬惡的，參加奧運仲噉樣較飛，戇鳩乎？）

《搖滾歲月》今日上畫，有特派記者劉蛇遠赴倫敦Shaftesbury Theatre為大家直擊報道《Rock of Ages》音樂劇現場實況，等大家讀完雞精notes立即知道本來舞台劇原來如此，係身邊朋友／囡囡面前巧威威。

雖然metal對套戲我完全冇信心，就算冇睇過原版音樂劇，單睇trailer單聽soundtrack已感覺到是個大伏。隻soundtrack聽過一次之後再未試過成功完整聽得晒，Tom Cruise唱功未夠是事實，一開波已經扮Axel Rose唱《Paradise City》簡直玩死自己加玩殘套戲，係跟住其他歌好少少，可惜改編都要學埋百老匯衰野女主角把聲尖到震好難頂，男主角把聲唔夠出，即使唔講唱音樂底編曲都幾弱。原著故事好地地，唔知點解劇本要自甘墮落回「搖滾就是萬惡之源」超cliche道德撚境地，更加無奈。對套戲要求，我已降低到有得笑唔太柒就算。

最諗唔明票房必掂的《轟天猛將2》本來同日上畫，點知前夕片商決定抽起，而唔係唔上擺明香港唔會有票房唔會有正評的《搖滾歲月》，班老細唔係以為有Tom Cruise大晒丫嘛。係咪廢事受牽連攬炒，索性推遲到《搖滾歲月》落畫先敢上？

話說相機壞左鏡頭，要搵返張保養證出黎，只好面對逃避左好耐的垃圾山。因為懶，每次買完碟or野都會掟埋某個角落頭，日積月累越來越高，一個滿左就轉去第二個位置再起，經年成為屋企入面幾座山仔。非必要如今次，我都盡量唔想掂果幾座山，除左幾千隻CD+DVD絕對唔少野，近排屋企咁多甲由，硬係覺得佢地霸左幾個山頭做竇，好鬼驚摷摷下無端端飛幾隻出黎。結果，

1. 摷左大半個鐘拆左幾座山，先發現原來放第一座山山頂果個就係相機盒，其實原來可以乜都唔使做。不過最少查證左，甲由仲未入侵我地盤。

2. 俾我搵到好多陳年收藏，幾十隻3.5"磁碟未算經典（當時DOS時代去dup碟仲收緊$15一隻三寸半），最勁搵到盒金莎。諗好耐先醒起，因為老豆老母年年新年之後都會好慷慨地將收到的禮物送鬼晒出去，當年廢事自己冇得食而預先收埋一盒，點知收得太密再跟住俾大量野淹沒左＆唔記得左，唔係今次壞相機唔知幾時先有機會重見天日。睇睇盒底已經過左期一年半，即係當年＝最少三年前。襯未引到甲由，拿拿聲拎去送俾人先，近排邊個生日記得搵我。

到敘利亞採訪位日本女記者殉職前片段日前曝光，睇完，令我諗起《The Sopranos》最終大結局，同《Rock of Ages》。

1. 雖然唔算我鍾意種戲路，平心而論《The Sopranos》編、導、演同技術層面已達美劇甚至全世界電視劇最高峰。不過我都係揀《House》之類賤格得黎帶點惡趣味種笑劇，始終我是膚淺的，《The Sopranos》太沉重了。

2. 此最後一集最後一幕，已成電視劇界數一數二經典結局，記得從頭到尾睇到最後。好多人討論主角最後下場，但睇完個結局再睇女記者最後一條片，其實唔難推斷。

3. old-school rock友或近來睇左《搖滾歲月》的朋友，都會認得出背景首歌就係被喻為「史上最完美搖滾金曲」的《Don't Stop Believin'》。導演揀呢首歌同噉用法，實在絕到冇朋友。

自從早前幫襯開個街坊醫生執左，真係病都唔敢點病。今個星期終於捱唔到，禮拜頭自己屋企執劑成藥食，禮拜尾都搞唔掂，迫住去睇醫生，先發現好灰，本身屋企樓下仲搵到幾間細診所，今日兜個圈原來全部執晒。只好走出公共屋村，但一過馬路去到對面私人屋苑已經兩個世界，由從前一次$120保險幾乎claim晒，到而家睇一次醫生要俾多百幾蚊加只保到一半。第一次體會到健康原來好重要。

而且同個新醫生唔太夾，以前個好爽百二蚊一次真睇又得知你純粹想買醫生紙射波側側膊亦得，今日搵左兩三個字先難得搵到一間診所，估唔到連想睇醫生都咁難，睇左一個字，個醫生實際睇病唔使一分鐘，跟住四分鐘幫你量血壓再查家宅問你屋企人年紀有幾大有冇咩先天後天，擺明想sell你同全家人得閒搵佢做做身體檢查同保健。我幾欣賞佢咁識做marketing睇長線唔止吼你今次果二百二，不過我只想簡簡單單搵個醫生幫我望望再俾藥我食早日走人嗟，得返半條命仲同我講生意。舊區情懷不復見矣。

劉Sir網上吹水吹左咁多年，都叫做有一（大）班來自中港台＆世界各地的fans、都叫薄叫名氣 － 的確夠薄，因為寫左十年都有，到今日終於第一次獲邀以音樂界blogger身份出席音樂會。

如果唔係一早買左SIU2飛實去，因為

1. 有得抽獎拎限量版結他effector設計防風打火機，個樣連唔食煙唔儲火機的我都有興趣，雖然由細到大從來冇抽獎運

2. 玩「tr00 gypsy」的ReOrientate正，仲有F.B.I.最後一次live

3. 其實都係因為呢樣嗟：話晒人生第一場靠自己個朵呃到飛的免費show喎，呵

因為公關靚女叫我推薦更多music blogger出席，自問是music blogger（當然要有proo符啦）又有興趣獲邀參加的朋友，不妨在此響一響朵呀。

近日提到路透社有篇專題訪問參加總統大選之坦帕政黨，問佢地點解嫌棄當地特色藝術土產death metal，十分過癮，點解香港搵唔到呢種記者？

而每當同時提到政治、選舉同death metal，就點都要再encore多次呢個來自波蘭的史上最強競選廣告：

最後呢位波蘭國會議席候選人輸左，你問我我點都覺得廣告有份累事，波蘭始終係個宗教意識非常強烈進而非常保守之國度，仲噉玩metal極都係得個death字。不過老實同樣宗教當道的美國都唔好得幾多，所以坦帕政黨 同death metal這影響全世界獨立音樂發展之佛羅里達土產劃清界線完全正常甚至精明，因為踩住呢樣萬惡之源上位，絕對容易過加有利過去支持去擁抱，有睇《搖滾歲月》嘛。政治都是比death metal更醜惡的。

結他effector pedal設計、Zippo X The Underground限量特別版防風打火機，不設公開發售，有興趣的朋友今個星期六1/9晚，記得去中環Hard Rock Cafe，睇完The Underground #104 音樂派對再參加幸運大抽獎∼

日期：2012年9月1日〈星期六〉

地點：中環蘭桂芳德己笠街55號LKF Tower地下Hard Rock Cafe

時間：晚上8時至11時30分

表演樂隊：Black Coffee (Brit-Pop)、ReOrientate (Flamenco Fusion)、Savannah Betts (Indie Folk Pop)、澳洲歌手Folk-Soul歌手Charles J Tan及香港Funk Punk樂隊F.B.I.最後一次演出！

網址：http://www.undergroundhk.com/v2/2012/09/01/underground-104/

溫馨提示：Zippo將於音樂會期間展出一系列極具代表性之產品，包括專為The Underground設計的限量版防風打火機〈見附圖〉。參加人士可於當晚舉行的幸運大抽獎有機會得到該款限量版防風打火機。

上個禮拜頭搞到今個星期尾，終於食到最後一日藥打算點都要食餐好慶祝，又撞正今晚要食自己，俾我執到呢張Murder King買一送一coupon仲要剛剛好deadline真係好鬼開心。點知明明旺角有分店唔准用，要出到尖沙咀先有得食。重返香港一年唔夠Murder King已經危危乎，睇而家連當初招牌之一每間舖兩個嚴選最靚再著晒成套公關suit為你服務的落單姐姐唔見晒，包又縮水要靠成日派coupon同做減價減得仲勁過麥記黎拉客，就知道相當唔掂，老實佢地包同薯條真係好食，但以如今質素同份量，唔係十幾蚊一個包／餐或買一送一，真係唔夠食甚至唔抵食。枉我今次闊別多時有心想再幫襯，你要我出到尖沙咀。

成世人第二次黎大會堂，當堂覺得自己揩左。今晚是progressive之夜，音樂廳有二胡jazz「霍世潔爵士胡情音樂會」，劇院係中樂fusion「SIU2超聲速漫遊音樂會」，可惜只開一晚的霍世潔音樂會兩星期前先開始宣傳太遲，如果早公佈SIU2就睇星期五晚場啦。