段記



1/7/2012 SUN

今天七月一日,香港人、身在香港的朋友,
有很重要的事要做。


七一遊行手冊

https://docs.google.com/file/d/0B0gV3Ao78vG1bDV4bEt2V1pVVkk/edit?pli=1#




2/7/2012 MON


2012七一遊行見聞/趣聞記

https://www.facebook.com/media/set/?set=a.10151066791695928.477055.644290927&type=1&l=49e1dbeb58




3/7/2012 TUE


自從九龍城廣場KFC執左,都未食過雞記,報紙見到新果個雞椒雞賣恆廣告仲就送大把coupon,先發現,唉,乜而家想食雞記咁難,唯一仲搵得到,得番朗豪坊樓下,仲要唔知點解見過咁多間得呢間一直唔賣薯仔野同布丁之類特色野,即一半coupon冇得用,難為最鍾意食炸薯仔的我。仲要縮晒水。


其實本來今晚都打算去豪華睇《車手》,因為想試個黑椒雞,而家變左食KFC順便睇埋《車手》。好在黑椒雞FC同套戲都唔錯。睇完就明點解近來咁多人提住「八千轉、兩咪車」。




5/7/2012 THU

http://youtu.be/9_WMLFzHQ1k


《吸血鬼獵人︰林肯》今日上。trailer唔錯但睇唔落手,因為個概念實在柒到爆炸,名小說改編都係噉話。與其玩柒玩cult,我不如睇全宇宙最強電影山寨廠Asylum抽水勁作《林肯勇破喪屍黨》,應該正過正版。


「香港Asylum」王晶幾時拍《鐵拳無敵孫中山》同《南拳北腿蔣介石》呀?




6/7/2012 FRI

http://youtu.be/MayFlkCtGKE


自從《黑紙》發現自己懶型但型唔起柒左由唔收錢變番收一蚊,到今日只買過兩張,一次係六四,去晚會時見到王維林封面俾錢支一支持。老實我對佢地完全冇好感,早兩個月睇埋《蘋果》副刊講集體回憶,班友政治立場非常騎牆、非常含糊,再加反感,因為又要講到唔似其他人咁懷緬過去、對好多議題唔熱忱唔敏感唔盲目、自己好有諗法好有態度,逢到政治界大時大節又要跟大隊整色整水黎抽水。可能自己都心知肚明,單靠得個爛字的「黑句」同毫不突出又短之人物專訪(非精簡,係短),根本唔會吸引到人買唔會維到皮,正如免費派時不論封面內容係乜,每出新一期去到最僻間七仔三日內一定冇晒;收番錢之後,就算最大最旺果間,第一日同最後一日,架上都係咁多冇賣過咁滯。但如果噉樣「政治抽水」銷路一定好,最少大量明知被昆都甘心俾你昆一次的傻仔如我會幫襯,又可以表達「我地唔係得潮流我地都有時事觸覺有智慧」。但到頭來仍只是毫無內涵另一純粹食潮流的投機之舉。


第二次係上星期黃家駒,近幾年每到六月底七月頭上街聲勢浩大,往往令人忽略六月三十黃家駒死忌,(擅於抽水的)《黑紙》冇,仲借七一前夕天時之利,宣傳片充滿濃厚抗共色彩又勝一仗。我承認會買呢一期,除左黃家駒,《海闊天空》配大遊行宣傳片十分epic亦是另一原因。事實是他們有的是才,可惜用得其所(甚至用到)之時,少到想數都難數。


不過呢,香港地就好現實,你柒你戇鳩是沒有問題的,出到名賺到錢就是王道。睇報紙先知我同佢地一樣八幾頭出世,但佢地紅、佢地出到名、佢地靠自己嗜好搵到食,我唔得,即係柒果個係我唔係人地啦。




8/7/2012 SUN

http://youtu.be/MHAiTmbZwDA


近來聽到無記成日提住「想搞好音樂節目」,我仲對佢地有點期望,但經過琴晚個所謂群星拱照大製作《翡翠歌星紅白鬥》,就知仲對無記有期望其實已經柒左。根本見到到明照抄日本的節目名已早應知道出事,全晚唯三有興趣得 1) 謝安琪(《情人》其實都唱得幾走鋼線,紅館時的狀態又冇左?同唱得兩分半鐘咁短) 2) 閻奕格(只叫交到貨但冇驚喜,同樣又係得兩分半連三分鐘都唔俾唱,趕成噉仲搞乜音樂節目呀) 3) 所謂幾隊band幾十人一齊夾。點知到頭來都係得個柒字,除左Michael段drum solo其他唔提好過,王菀之《水百合》改/演/唱到唔知做乜,6:51有條友打到跌鼓之後成班人一齊推跌個鼓黎兜,好柒。而作為同四大和解後首個大型音樂節目,到頭來又係英皇做主角、又係對住佢地班十年如一日的廢柴,真正唱家班見唔到幾多個。噉既「音樂節目」我仲睇黎做乜?即係你以為亞視台慶已經夠柒。結果成晚無記紅白唯一有娛樂性只得呢樣:





9/7/2012 MON

自己都冇諗過,上個禮拜頭睇到琴日星期日,我居然會讚無線一句:


「估唔到無記劇又幾好睇喎。」


向來唔妥無線,但成日睇(自己房=客廳是很悲哀的),所以敢講我反無記算反得幾有道理,唔知彼又點反點鬧先。不過對事不對人,近幾個月晚間三套劇居然似返樣,《愛.回家》(個.點想)同《瘦薪兵團》有返九十年代睇《卡拉屋企》、《開心華之里》種feel,《護花危情》雖然「tribute」二十年前套荷里活片《護花傾情》到出晒面(睇人設同個名已經知咩事啦,不過當娛樂節目連個名都可以照抄人,出晒名鍾意致敬的劇會有原創先驚奇),個頭開得唔錯而且幾多外景大場面,掂唔掂就睇落去先知,需知而家無記劇從來得頭幾集同尾幾集貼題,中間全部係你媾我我唔受呀唔好你都係媾返我啦拖拖拉拉十幾集。而可能係近年最落本最有心的《飛虎》,好好睇,但屈就到禮拜日晚「電視電影」式播,就知道無記始終同真正視迷之口味同要求背道而馳。請再看《天與地》的故事。


其實嚴格評價的話,不論製作、編導還是演員,只及十年前無線同亞視隨便一套同檔劇之基本質素,但能夠再次八點對住中文台對到十點半而且覺得唔錯,全因兩個半鐘入面完全唔婆媽而且一點膠味都冇 - 係,好遺憾,而家對無線劇的期望,已經由「好睇」下降到「你唔戇鳩就得」。所以你見到前面提住,點讚點好,只限去到琴日星期日,今晚八點半開始播《回到三國》,即係見到trailer有林瘋、爛得有如《陷家福碌壽》,一陣硬膠除由電視機飄出黎,得我一個霸客廳的日子,又可以繼續只睇明珠台。


再次證明中共政府香港支部一日繼續玩弄政治唔發新免費電視台牌照,香港電視一日唔會有得救。




10/7/2012 TUE

每週一相片大行動 2012 Week 28
COOL CAR, BRO




11/7/2012 WED


個客就係今日公司吉左一半冇王管先上黎,仲要一朝早黎到搞幾個鐘先走,lunch又死唔願出去等我冇得公數食自助餐,循循善誘一大餐又唔肯叫KFC同Pizza Hut係都要sic dim sum。本來都唔多妥,但百幾蚊點心自然落格唔少,十足飲茶飲足兩晝噉款,公司食到返屋企仲有一碟蘿蔔糕一碟叉腸奶皇包小籠包當晚餐,屋企煲左薯仔牛腩湯,食完開雪櫃仲有一個梨一個橙,同一罐Jolly Shandy,食得飽飽食得開心。鬼佬今舖我就算,本身仲諗住教你廣東話。




11/7/2012 WED

http://youtu.be/znmX45mFbMg


話說每日生活就係美國街頭飛法拉利的Yngwie Malmsteen,月頭返自己鄉下瑞典出live,2008年令佢起死回生繼而成為御用歌手至今的Tim Owens要夾官方搞的Dio tribute band睬佢都傻,度縮到死的Malmsteen連guest歌手都廢事搵,叫個bass佬唱埋就算。有時佢種囂爆rock star態度真係唔到你唔服。不過估你唔到地,個不知名bass佬唱live勁過而家的Tim Owens。Yngwie你條孤寒鬼不如以後叫bass佬代埋歌手個位算啦,大條道理請少個人慳番筆。


立即上網查查條友咩料,只搵到個俾差佬拉左去影大頭相的Ralph Ciavolino,唔知係咪同一個人,哈。Rising Force從來只得Malmsteen一個主角,不過樂手session條友好識揀勁人幫手,所以佢隊band主音雖然Jeff Scott Soto之後、Tim Owens之前冇幾多個得(佢廿幾隻碟當中最成功最出名幾隻,結他未必最勁,但往往全因歌手實力強橫),後面彈果班其實臥虎藏龍,正如今次唔係Tim Owens放飛機,全世界點知道個名不經傳bass佬唱功一流。可惜點勁你都冇幾可知道,原因又係Yngwie的仆街性格,唔勁唔請但請返黎永遠唔俾人發揮,好似Derek Sherinian咁猛料,入佢隊band都只係彈彈chord少少appregio咁無奈,仲未計mixing特登將keyboard聲推到最細最後,唔留神都唔知原來有keyboard咁灰。而三十年黎Yngwie Malmsteen演唱會台上唔會見到第二個結他手,更加唔使畫出腸。有點似以前中國外族侵略中原之後,唔殺皇帝而留佢做隨從:


「出名又點勁又點?都係幫我做session伴下奏咋!」


難怪bass佬身兼兩職又唱得勁,都要迫到埋角落頭差少少跌落台咁滯,留成個台俾Yngwie踢腿轉結他,冇計,這才是真正的'80 rock star呀。所以點仆街點契弟都好,始終係佢我先會聽metal,最近兩隻碟《Perpetual Flame》同《Relentless》我覺得真係好撚好撚正(唔話正都唔得啦,我係去HMV用佢地十年前個價位$175隻買返黎架,哈),而且佢台上台下完全同時代脫節但又自得其樂毫無掩飾的言行舉止娛樂性太過豐富,我仍然願意繼續做佢忠實fans,除左音樂仲因其文化意義:作為一門不惜一切去打破一切的藝術,將所有野推到極限時,柒同戇鳩就好容易因逆規範而行成為自身一部份,metal本身實帶強烈自嘲意識:你估好多時好認真去夾果班,唔知自己音樂、歌詞同表演對好多人黎講好戇鳩咩。明白到呢一點、接受到「我係戇鳩仔」的事實,先至型得起,因為夠貫徹始終,即使戇鳩人地都會認同你戇鳩得很型;反之覺得玩/聽/追metal可以令你型的話,認真你就柒了。




13/7/2012 FRI

http://www.hkco.org/ActivityDetail.aspx?ractivity=0&ainfo=300&lang=C


今晚會去睇「抬花轎.迎新娘 - 郭雅志的吹管世界II featuring 黃耀明」,事後記得留低幾隻字講講場show如何。Silverstein一定大把人影相拍片,呢場唔知在座有幾多人會去。




14/7/2012 SAT

上報了。應該話,柒到上報了。早排七一前後提過老母王國眾師奶盲從附和,令佢地自己地盤成為全港最有效五毛宣傳據點,可能連班幕後黑手都覺得要控制老母王國其實唔難而掉以輕心,五毛post仍日日有但打手質素日漸參差,七一半個月之後終於廢到連平時標題黨都昆得到的師奶都頂唔順,隨便執幾個近來出現的睇睇:《多得你地班政棍囉! 葉劉好似中肯D?》《香港比d傳媒搞到政府做唔到野》,同今期流行《建議香港取消ICAC呢個機構,以免阻礙政府運作》


即係以前五毛post成效衰極都有個譜,最差只係得同黨或分身和應幾句,或開post之後見冇人理分身都唔蒲頭沉底算,好少可會引來師奶們大幅反彈。但近來未睇內容齋睇標題已經知道唔掂連師奶們都會小,「取消ICAC」個thread更加短時間內引來二三十版反擊,極速上到從來只報exciting old news的蘋果。相信係老母王國難得醒覺戰勝五毛得以正面上報事跡。


噉係咪代表香港(師奶/老母)仲有得救?唔係。到頭來其實只表達出,香港今代老母們同佢地管教的下一代細路更加冇得救。遇著五毛post,醒果班會話樓主玩曲線一笑置之,可惜非常之少,真正理解時事更加罕有,其餘絕大部份師奶非常認真地輸了。五毛黨要為政府不利post或自己被圍剿時解圍,手法不離幾招,level 1係臭蟲論「邊個邊個咪又係噉點解只講XXX」,兜唔到就level 2合理化「其實罪不至死,佢知錯架喇,大家原諒佢啦」,再加幾個同謀分身煲煲佢,好容易就將爭論沖淡。兩個level都唔得,放心,謹記師奶王國金科玉律:只要出現言論針對 1.「教壞仔女」的人社派 2.「撐雙非」的公民黨 3.「擾亂政府施政」的泛民成員 4.「不學無術」的八九十後(排名絕對分先後),不論本來講緊乜野、矛頭指向邊一邊邊一個,眾師奶都會立即團結一致地討伐。我只見過一個師奶明白梁國雄做緊乜 - 唔知係咪師奶黎,分分鐘真身原來係佬甚至巴打。其他呢,只要撻黃毓民、陳偉業或者/尤其梁國雄三個名是但一個再批出黎鬥一下,你想個post跟住點去都可以想人地當你神噉拜都得。如此富文革色彩情景,每天都在師奶王國上映。


所以今次五毛俾師奶圍柒到上報,其實冇乜特別值得高興自豪,唔係師奶醒,只係策劃同前線果班一時撻Q。如果各位老母真係咁有時事觸覺咁有智慧,就唔會一次成功抗五毛,仲要係最最最低手果隻,可以立即上報咁歷史性啦。




15/7/2012 SUN

http://youtu.be/Js5swjzPsyw


請恕我愚昧,雖是Beyond迷,三人時期作品我都鍾意,但對三子各自solo興趣實在微乎其微。黃貫中除左第一隻碟達神級,直到《天與地》之前真係冇其他邊隻碟/邊首歌特別鍾意,所以今場紅館演唱會到頭來都係冇去到,即使是所謂Rockestra - 個人之見,佢作曲編曲造詣未去到能完全帶出rock + orchestra應有氣勢之層面。所以全場show,我只對拉埋掃把柄唱《年少無知》一part有興趣,雖然到頭來唔係演得好好,但事實是陳豪同林德斌的確冇乜唱功,最好果次live都同CD水準差好大段距離,所以從來冇大期待,你只志在見到佢地兩/三個同台唱呢首歌,唱成點已不太重要。


作為一個有多少少市場知識的樂迷,客觀意見是,返九展搞好過啦。因為:

1) 坐場搞band show始終無奈,三面台又非合適。九展近距離大台又可以唔放凳,先係大band show格。

2) 唔好打我,但我覺得單黃貫中個名,確實未夠號召力坐爆紅館...




16/7/2012 MON

http://youtu.be/8HuVM9M9Ni4


[iMOM左勿hi] 香港未來的希望、真正的社會棟樑在此,絕對係史上其中一集最精彩《城市論壇》。劇情簡介:學民思潮召集人黃之鋒、之前唐英年去學校拉票時舉牌話要有權選特首的吳美蘭,加多兩件左派教畜,上《城市論壇》討論國民教育,結果係點唔使講大家都估到,吳美蘭的語重深長加上黃之鋒字字珠璣,兩件擺明冇point只有一味話政府好的左仔俾人由頭小到落尾,非常精彩。


「TL;DW」的話,睇最後兩個字戲肉就夠:明明工聯會紅底又要扮冇政黨政治背景好中立的余綺華,俾黃之鋒臨完場踢爆想參選,立即拍檯發脾氣(當事人話「唔係拍檯,係隻手掂到張檯嗟」),成全日壓軸高潮令整個論壇圓滿結束,絕對好睇好笑過而家的周星馳爛片 - 即係佢自己擔大旗個組織叫「國民小先鋒」,柒成噉,你話個人點可能唔戇鳩?從來左派要去做去宣傳去支持一樣野,都係冇理據或論點支持得到,所以每每一落場就露餡,只有成為大眾恥笑對象。


但無奈地,會搞成噉,正因左派從來唔需要理據或論點,佢地要做一樣野有政府幫有愚民撐一定做得到,連去論壇落街見市民之類門面野都唔需要做,去都態度依舊,反正俾你拗得贏都只係樣衰嗟到頭來你咪又係改變唔到任何野;但你真係有根有據指出問題所在,在當今香港就是死罪。正如「國民小先鋒」,聽到個名都知又係搞出黎呃中資機構同政府錢之紅底機關,而一個參選三次一次比一次少票仍可屢敗屢選的on9師奶做到阿頭,當中絕對撈到唔少油水獲親中勢力人士大力支持 - 同日新聞正正踢爆民建聯用空殼公司呃政府資助,用公帑但經自己組織名義搞社區活動,上電視個阿伯仲要好開心「民建聯好好人為人民」,而政府只話「有人投訴先會查」。


同樣是同日新聞,另一單講吳美蘭自從當住唐英年面舉牌,每次申請升職,即使夠表現夠資歷、主任批、校長批,教育局就係唔批,一日佢仲係教官校、教名校,就一日唔會有晉升機會。其實這已經是最佳國民教育案例:你親中共、撐政府,著數要幾多有幾多,點貪贓枉法都冇問題,出事都會有人保你,但明知唔妥有錯而出聲講出黎,成世人唔使旨意有運行。為人師表就應該好似Miss Yu噉,明知係錯都要本住「打好呢份工」心態夾硬講到冇錯,如果唔係好似Miss Ng噉出聲質疑,就聽冇好日子過,而既老師如此,各位同學亦應以老師為榜樣學習做人道理、學習中國式的人情世故。有甚麼比這更中共式國民教育。


所以我幾擔心黃之鋒,繼同傳媒聯手大爆吳克儉約晒學生開會但肴底、打電話俾佢「收唔到」cut人線之後,今集《城市論壇》又見學民思潮何其高章,最吹脹係呢班新晉中學生搞社會運動,比好多民主派更成功、更有效率,最重要非常清楚訴求同爭取方式,仲有點樣曝露對方醜惡。朝早睇完《城市論壇》黃之鋒清楚仔細講出佢地想點反對紅色勢力滲入,反方完全回應唔到,晏晝再睇支聯會仲叫中央徹查李旺陽真相,即係嗌兇手自己查番自己,笑死人咩。但香港地文化就係最忌露鋒芒,我怕左派組織未郁佢,已經俾自己學校或身邊人玩死,而且現場表現有點太咄咄逼人,唔係佢對手比佢更粗鄙,只顯身處大局時欠缺大將之風。但讀中四已經咁勁,上新聞上節目做訪問講野有紋有路有理據,我當年讀大學year 4都冇幾多人臨場表現同口才及得上佢,俾時間佢鍛鍊改進,前途無可限量。如果有時間有機遇俾到佢的話。(我認我衰,差少少好順口地講「佢有命的話」)


單新政府上台半個月,我已經覺得今代人好慘、自已以前好幸福。作為八十後即最後一代體會港英政府德政及輝煌、最後一代接受港英政府教育(我係回歸後第一屆會考出身,跟住課程同考試制度已經改到仆街),以前我地讀中學甚至大學,就算乜學校同社區活動都唔參加(社區活動唔係社會運動呀),甚至連兼職都唔做由朝到晚就係讀書食飯訓覺,最多只係畢完業之後發現自己變左條白痴仔,但完全唔會有咩危機感覺得前路茫茫,事實係港英政府管治下,社會和平好多、經濟繁榮得多,自然人心穩定得多。但而家讀中學已經要上街遊行打仗、暑期活動就係參加社運(今次就真係社會運動喇),我實在對香港冇晒希望。




17/7/2012 TUE


其實我好鍾意去豪華睇戲,除左平得黎夠懷舊,附近又多野食(雖然成日只去美而廉敗家或者走去朗豪坊食雞FC),戲院出面又有大公園,以前係爛地停車場,政府收左地之後以為會變又一棟豪宅,點知起左做公園同落一個街口個公園連接,變成一個跨兩個街口的大公園,造福附近居民同唔怕黎豪華等睇戲冇地方攝時間的我。都可謂曾政府難得(同最後)之德政也。




18/7/2012 WED

《四大名捕》未睇過原著小說,認識只有無記套少年版膠劇(當時睇膠到喊僅叫好過龜波氣功都出埋鳩扮cult的《強劍》,但同而家無記劇比立即變成「都唔錯」,無線收皮算啦),但前個禮拜睇《車手》見到trailer唔錯又有陳嘉上,而且豪華禮拜二場只收三條,撻Q都可以當支持佢地而唔係支持套戲。兩個鐘頭之後,再次明白有時我地唔願入戲院睇港產片/國產片,特別呢類武打合拍片,是有原因的。


這是一個trailer同戲完全貨不對辦的例子。單睇trailer,係套幾好睇的懸疑武打偵探片。點知三樣都冇。我入場純為睇打,但點解好地地一套武俠片要搞到X-Men噉款?當你見到女主角識讀心識念動仲要坐電動輪椅(冇錯,一部出現於中國古代的電動輪椅),就知道出事了。其實中國武功有一門叫以氣御物,點解唔可以用呢個前提,而要明示係跟武功無關加同世界觀完全唔夾的超能力?同當你可以玩讀心、可以心靈傳動、可以突然慢動作變bullet time、甚至可以停頓時間,敵人遠攻時起力場擋、近攻時龍珠式爆氣炸走人,我使鬼睇你咩求祈睇套荷里活特技打片都得啦。隔空控制暗器又拍唔出X-Men磁力神種神髓,只令我諗起《全城戒備》。


另外幾個主角奸角玩唔同元素,更加搞到日式ACG噉款 - 話時話,劇情所需而改邪歸正個劍客完全《浪客行》look,但同樣我地睇武俠片唔係為睇XXkinesis呀,唯一拍得出彼此相輔相承係四個主角用唔同元素聯手打大佬,不過發揮太少,亦難洗設定太柒的印象。最無奈係,反骨劍客可以變人狼,之前得閒無事就變但打大佬時唔變吹咩,然後黃秋生舉一舉手可以殺敵千萬(tribute X-Men第三集最後黑鳳凰覺醒一幕?),但睇住自已班靚四抽一都唔夠大佬打俾佢屈機幾乎打死都唔出手,呢d大佬真係唔仆街死都冇用呀。然後四抽一都贏佢唔到的最後大佬,死得奇柒仲柒過自殺,即係正派贏到唔係因為佢地勁或團結,而係個大佬自己戇鳩。都仲未講武指弱、攝影差,同兩個鐘入面打戲篇幅奇小。


打已經少加唔掂,劇本衰多無數倍。人物同組織前紋後理幾近全無交代,劇情超級鬆散,步伐極度凌亂加緩慢,我睇過唯一一套角色同故事處理差得過佢只有連劇本同對白都冇的《風雲2》。查案是一大主線,但拍唔出所謂案中有案的陰謀有幾大、點樣如戲中所言危害中原漢室,只似班人遊手好閒冇野做,撞到街邊有人換假銀紙咪搵佢地消磨時間。查案方法係念力破案,乜都唔使做,去到案發地點望幾望諗幾諗大家吹幾句水就乜都破晒,以偵探片黎講,連無記膠劇水平都不如。而且好多明顯過明顯的漏洞居然會睇唔穿發現唔到搞到自己硬咁中伏,戇居中之戇居是反派喪屍兵,早前先念力破案搵到弱點,跟住再撞到佢地時「嘩乜打極唔死點樣殺死佢地架?」我喊了,乜你地唔係朝延數一數二的破案專家加武林高手咩。


同前面一直查案,一路落去乜主要謎團都冇解到只解答左無關痛癢濕昇野,臨尾仲要好似一切謎題已經唔再存在,「查咩案呀?打大佬啦!」噉前面好難先夾硬拖到出黎的九十分鐘 有咩意思?有,去到大結局先揭曉,拖到超慢的兩個鐘原來係前傳,所有謎團請看下回分解,情況就好似導演諗左一個非常宏大的故事,要八至十個鐘先講得晒,而家先拎介紹基本人物的最初兩個鐘出黎做第一集,不過個頭已經爛成噉加擺明呃錢格,跟住仲點叫人繼續入場支持?


而最諷刺莫過於此:套戲叫《四大名捕》,但四個主角唔係名捕而係打對頭果班,真正果四個名捕只係戲份接近零、廢到爆炸死得柒的路人甲乙丙丁,成套戲亦只得開頭同結尾一兩幕幾段對白同戲名扯得上關係。相信最後四個主角會成為四大名捕,但應該係第N集之後,如果係噉,今集就唔好叫自己做《四大名捕》啦。


我冇睇過小說都估到,有睇原著再睇套戲會睇到嘔血,單以戲論戲不論技術還是編導層面亦只屬大失敗,最大原因係陳嘉上明顯想拍套潮一點的武俠片而加入現代色彩,但超能力同武功係兩回事。中國武俠小說同美國超級英雄漫畫分別在於前者硬科幻好多,會令你覺得自己真係練得成做得到,唔似漫畫英雄對眼射laser、瞬間移動十樣有九樣異變出黎咁脫離現實,代入感自然大得多。而家反而捨武功擁護西方一套虛無飄渺的XXkinesis,連自己地方本質都可以唔要,同西片比又全部方面比唔上人,結果高不成低不就得啖笑。本片絕對可以成為一個案例,教訓中港兩地導演同老細應該安守本份,包括寫好劇本、做好導演同理解如何從東方思維出發表達武學,而唔係用中國古裝片個殼加美國動漫特技,諗住噉就可以一石二鳥。


本來諗住今個禮拜《四大名捕》開始,逢星期二黎豪華貢獻三十蚊睇一套非西片,搞番個「每週一港產片/國產片大行動」撐本地製作同益豪華支持indie,但出師已經非常不利頂唔順,跟住下期上《畫皮2》同《大武當》,唔掂真係啃唔落,豪華我對你唔住。見到兩套都有楊冪,不如噉啦各位想抽水的導演同老細,你搵楊冪同劉亦非一齊拍套古裝打戲,橋段唔緊要總之有兩條女出場由頭打到落尾,我實入場支持。




19/7/2012 THU

Android神器Tasker 1.3版本正式推出

https://play.google.com/store/apps/details?id=net.dinglisch.android.taskerm


Android神器Tasker 1.3版本,beta幾個星期之後終於正式推出。如果你鍾意玩tune機,絕對值得俾$50支持Tasker,我部電話除左Google Reader同Dropbox之外,基本上裝埋Tasker就夠,因為一個Tasker等同於一百個apps。最新版本大幅強化,反應快左好多,功能同設定大量增加,最勁係可以自己整app。一直以黎見香港冇乜人玩Tasker,自不然未見過有繁體中文網頁專講呢個神app,有興趣自己整番個,將用開的profile export成app同大眾交流。


不過新版出左,部份plug-in好似APNdroid暫時用唔到,要等開發者就1.3版更新。小問題嗟,單睇新版改左乜野已經花唔少時間,跟住再諗點樣改良本來profile同設計新project,有排玩夠晒攝時間。




20/7/2012 FRI

每週一相片大行動 2012 Week 29
估唔到我個Youtube Channel
可以靠謝安琪搵食




21/7/2012 SAT

http://youtu.be/Pj6Wq6iAJN4


琴日重提年頭謝安琪《你們的幸福》演唱會,其實當初完美計劃係睇1月17&18兩場加場,睇完跟住果日開心上機飛歐洲,點知最後一場都加唔到咁灰。另一灰是上機兩日之後到關心妍開紅館,又睇唔到。


一直好想睇佢演唱會,差唔多十年前第一場紅館冇去(老實當時佢唔夠自己歌迫住唱超大量cover,唔好睇,去唔到可能好事),本身2008話搞後來不了了之,是灰的因為同年新碟《最愛 Jade.i》在我眼中係香港流行女歌手中台前幕後水準難得超班之作,單堅持用真樂器錄音、玩rock味重過pop味的pop rock,後三分一大路貨色不理,前半實在太強,更有估佢唔到地無能敵的《龐貝21世紀》,從未諗過家姐都可以咁rock,從此同我最愛香港女聲rock歌、李卓庭 X Dear Jane的《不愛名牌》平分秋色。問題係首歌從來唔係為唱現場寫,少換氣位之餘好多部份冇可能一口氣唱得晒。


偏偏首歌太正拎好多獎,佢至發現俾監製玩得好慘,當年逢音樂節目同頒獎禮都要唱,唱幾多次就撻Q幾多次,拍得住拎錯獎咁柒。屢敗屢唱左四年,終於2012紅館唱到個演同唱最近完美版本。我確有點為唔可以現場聽呢首《龐貝21世紀》感到遺憾,好聽之外,你真係唔知道佢仲有冇機會再開下一場演唱會,開都驚啦《最愛 Jade.i》之後上左岸跟住幾隻碟轉唱福音,曲編詞健康到我喊。這可能會是史上最後一場關心妍(紅館)演唱會、最後一次現場唱《龐貝21世紀》,而且成數幾大,你試試上Youtube搵佢今場演唱會bootleg片,睇搵到幾多條就知,乜而家仲有人會聽家姐唱歌咩?


22/7/2012 SUN

「Jon Lord又關關家姐事?」


我知我wow,冇佢就冇現代技術派metal套路的電子琴傳奇Jon Lord死訊係一個星期前16/7/2012,但post字post片無數人做過就廢事。到琴日講起關家姐,突然諗起Jon Lord,因為關心妍首《指南針》


來自《最愛 Jade.i》之前一年隻大碟《Lost & Found》,一隻我相當唔妥的關心妍碟,歌普通錄音假未係最大罪,我知香港歌製作求祈左好耐,都冇聽過幾隻碟編曲尤其是個鼓及得上呢隻咁唔掂,有興趣可以搵CD版《如何離開你》聽聽,然後話我知一個正常鼓手會唔會噉樣編鼓、一個鼓手有冇可能用一套真鼓完全打返出黎。全碟只為聽《指南針》一首 - 應該話兩首,仲有個unplug版,可想而知監製都知首歌係食糊格,但結果揀《如何離開你》做派台同MV,非常無奈,因為呢首歌製作質素明顯超過其他歌好多(謹叫合格的鼓例外),發揮到家姐唱功之餘,實在超級鍾意佢手hammond organ,冇solo只玩cresendo,點到即止為首歌錦上添花。好多時聽首歌,唔係為聽唱,而係電子琴。


呢個年代香港地pop界仲會/仲識玩hammond organ已經唔多,《指南針》應該係用得最出色一首,除此之外同樣因hammond organ讚嘆,只諗到謝安琪《一人之盛夏》 - 將就下啦,首歌全Youtube得呢一條片。已經好過家姐了。關心妍真係已經冇人理到噉?《指南針》CD版,成個Youtube都搵唔到,結果要去到土豆先有。所以,我真係覺得已經再冇機會聽佢live唱《龐貝21世紀》。


http://www.tudou.com/programs/view/EhuJzsIgwJM/




23/7/2012 MON

追開《House》的朋友,記得今晚8:30開始播第六季兩個鐘大結局。過左今晚《House》同《Castle》播晒,而家播緊幾套劇悶到喊,跟住奧運無記唔播新劇住只播電影,睇黎黎緊個月屋企得我一個的日子,屋企部電視機可以抖抖。




24/7/2012 TUE

37死京暴雨 澆出人間冷暖
的士坐地起價 私家車義載旅客

http://hk.news.yahoo.com/37死京暴雨-澆出人間冷暖-的士坐地起價-私家車義載旅客-212135381.html


琴日香港八號波,大陸都有單野好灰。大陸比香港更大雨,加上基建更差,大把地方山洪暴發,水深係用米計。有個警署署長知道出事,本身放假都自發出動帶隊趕入村救人,點知搵生還者時掂到水底電纜殉職。大陸好人已經少,而家再少一個,唉。


向燕山公安分局向陽路派出所所長李方洪致敬。


雖然,真係好遺憾,我地在此向佢致敬,其他狂風暴雨時匿埋唔理百姓、颱風走左之後向中央政府申請巨額救災重建撥款再自己袋99%果班大官小官,只會笑佢戇鳩唔識為官之道。



每週一相片大行動 2012 Week 30
十年一遇十號風球 a.k.a. this is br00tal




25/7/2012 WED


咪話過AV都可以好有益身心好有教育意義囉。今期流行是強國同胞從學術心態出發研究所謂近年最靚混血女優瀧澤蘿拉登場作,以Google Map解構全套片拍攝地點同行程,帶大家參加虛擬AV幕後花絮見聞團。真係好認真的,認為別有用心的朋友,可以直接飛去佢篇文最後一段。


雖然我知道更多人關心套野得唔得,ToNick特約ThisAV有得睇全套,不過會覺得正應該只得有得_果個男優(真_唔係好似我地噉隔芒keyboard_),事實係張相比全套片更有吸引力。詳可見高登仔包膠:

「標籤: Hi,中向左走向右走晒伏」


從來呢類搞作只見大陸同台灣人諗得到做出黎,足見中港台三地民間創意高低之別。好在今舖我地都衰唔晒,香港代表有巴打去日本撞到工作中的水菜麗,有相有真相。




26/7/2012 THU

http://youtu.be/UVjSDm6GowM


點解大陸永遠要柒過人?四年前北京奧運,韓國電視台搶閘播開幕禮片段(開幕*禮*呀唔係開幕*式*呀),大陸立即鬧爆,最後搞到韓國電視台同官特登飛去北京謝罪。四年過去,今日倫敦奧運,有新浪網「全球率先揭秘倫敦奧運開幕禮片段」。


見倫敦有世界級樂隊Muse寫主題曲《Survival》,北京都唔弱,立即翻炒群星合唱舊橋,整左首官方中文版主題曲。驚《北京祝福你》個歌名、娘到喊的曲詞同得啖笑的MV嘔你唔死,為顯群星撐奧運成首歌唱足八分鐘幾十粒星登場,夠聽人地Muse首主題曲兩次,分別係《Survival》你聽兩百次都唔會覺得唔好聽,《北京祝福你》你頂到兩分鐘已經好好野。唔怪得上次世博主題曲要抄人地日本歌啦,雖然抄出黎都唔係點好,但相比之下寧願佢唔原創好過,因為最老土當成最新潮,唯大陸先做得到。


噉咪係國民教育囉,這咪是中國模式囉。




27/7/2012 FRI

http://youtu.be/qG7DHoQZT-U


《GTA: Hong Kong》借屍還魂的《Sleeping Dogs》又有新片,為一個月後出game造勢。歷史上應該唔會有另一隻game廣東話粗口可以爆得咁渾然天成,即係講香港江湖古惑仔唔通仲斯斯文文呀,屌你估而家無記膠劇戇鳩鳩咩,唔知鬼佬明唔明,但左一句「我都有老母架!大佬!」右一句「屌你老母臭西!」未計大量超暴力打鬥fatality,我地香港人單聽已經無撚敵,仲有閃卡王配音喎。雖然有時廣東話對白同字幕好怪,即係點解屌完老母臭西又要fuck you up,又咩叫「事件成功/失敗」呀頂你,睇片已經好撚爽喇屌。雖然,我部機都係玩唔到,同Diablo 3同Max Payne 3一樣,得個恨字。


其實點解反而我地香港地主場,廿幾年黎都整唔到一隻《古惑仔》?




28/7/2012 SAT

http://youtu.be/L1wGRVt5LwM


今天的節目。結論係,有點弱。但其實上畫前睇完預告已經冇好大期望。


節奏,第一集係走,第二集係跑,第三集係跳。有點亂同太急。


捉到成群鹿,到頭來只脫到半隻角左右。食正金融風暴同佔領XXX條水大把野可以帶出,但大綱輕輕帶過帶唔出應有批判,細節亦見唔少明顯漏洞,相比上集劇本接近完美(除左雙面人,我仍覺得太夾硬加Harvey Dent入去),都幾失望。敗因之一一心帶回第一集神話色彩黎結局,想講好多野、想講近年現實社會好多政治現象、想故事規模好龐大,但頭頭都唔到岸。


打,簡直拍得住無記水準。唔使講最後千人混戰得個笑字,單蝙蝠俠重臨葛咸城一個抽十個,好明顯打緊A時B已經走定位擺定出招pose但企定唔郁等埋位,到A俾蝙蝠俠打低左先開始連戲出招,然後CDEFG重覆落去。我知今集打鬥唔係重點,都會唔會求祈左得滯穿崩得太過份?而且從頭到尾都打到成個老粗噉,毫無之前「俠」之風采 - 你可以話劇本講佢老左。等我見蝙蝠俠加貓女,以為會重現《Watchmen》式二人組動作場面,有,幾秒鐘咁大把。


人物,配角反而做得好,蝙蝠俠同Bane好普通,前者演唔出打敗之後振作再戰江湖種味道,後者除了神化就只有神化,幾近只為「今集大結局喇要有個唔需要理由總之屈機玩晒的奸角」而存在,或者又因之前講過神話化之敗筆搞到編劇同人設都脫離左現實。


結局的伏筆...唔係話Nolan好憎羅賓咩。我都一樣。所以最後無端端搞個羅賓出黎,我都好唔妥,加上佢話唔會再拍,我怕下個導演接手由呢個伏筆開始,會搞到好柒。既然今集玩《Knightfall》,倒不如講下個蝙蝠俠係九十年代Bruce Wayne俾Bane斷腰後接佢手果個邪惡版,雖然冇乜可能,就算Marvel都唔敢將佢地一線角色用當年「Dark Age」風格改編做電影。


因為早就打算睇次IMAX,或者睇第二次之後先再講。第一次睇的具體化比喻,係睇完《暗戰》之後再睇《暗戰2》,劇本同角色都係。