段記

23/5/2012 WED

近來睇左兩套恐怖片，《[REC]3: Genesis 80分鐘死亡直播之變種屍新娘》絕對大勝。初時以為前傳，原來係由第一集隻狗延伸的外傳，就算完全冇睇過之前兩集都唔會唔明－其實又有多少喪屍片你會睇唔明，你有幾何會死斟酌「喂噉即係喪屍邊度黎先？」

最成功亦最突破，係作為標榜第一身拍攝之偽紀錄片系列，今集除左超長／太長的片頭有玩（同類電影入面，終於出現一部打得爛的手提機了），跟住個幾鐘用番正常電影拍法，而且攝影＆剪接唔錯，同一味得個嚇字（有時甚至悶字）的上兩集唔同，節奏快得多而且充滿娛樂性，好多位相當好笑，中文字幕又耐唔耐抵死一下（「版權佬」真係笑到仆街），亦唔太多造作或過度翻炒舊戲舊橋舖排，轉型得非常成功。可惜打戲較少，男主角著住中世紀盔甲拎把Claymore，女主角婚紗加電鋸而且無端端識打功夫，聽到都覺得cult，最後居然唔係兩個重逢再一齊喪屍大屠殺逃出生天，只兩邊各殺幾隻就玩完，唔多夠喉。不過打戲同死相設計一流，如果個班底直頭拍套擺明賣血賣笑的剝削式電影會好好睇。

雖然始終離唔開幾個套路，結局又係「女人都係累事都係麻叉煩」的硬道理、「點解男主角永遠明明唔使死都要自己走去送死咁笨實」，「其實唔一定要俾喪屍咬先會變，成套戲掂到咁多喪屍兩個人應該一早中左招啦」，對《[REC]3》我非常滿意，不論單論套戲本身還是作為整個系列轉捩點，好想第四集快上，睇全個故事點收科。至於之前睇的另一套恐怖片《The Cabin in the Woods 屍營旅舍》，可能因為期望太高而相當失望，所謂「你一定估唔到」，唔好意思過左頭三分二個道友出返黎，我已經立即估到晒劇情跟住會點發展落去，橋段更是cliche到唔到cliche處理得更差，極其量只是trope，到頭來只成一套非常拙劣的tribute。對比起黎，《[REC]3》先係真正破cliche地獄。

24/5/2012 THU

Australian Death Metal Band Receives
$20,000 Government Grant

http://www.theaustralian.com.au/arts/music/
australia-council-recognises-artistic-merits-of-death-metal/story-fn9d2mxu-1226361642287

"The Australia Council for the Arts offers AUD20,000 grant to Australian death metal band Ouroboros to write for next album that will include a symphony orchestra."

"Composer Matthew Hindson, chair of the Australia Council music board which approved the grant, said of Ouroboros : 'They have a degree of technical virtuosity and musicianship. No matter what kind of music you are involved in, that comes through.'"

這才是文化局應做的事。「英文唔睇」或「TL;DR」的話，悉尼technical death metal樂隊Ouroboros計劃黎緊第二隻碟同交響樂團合作成Symphonic Death Metal，向澳洲文化局申請，結果獲批20,000澳元／160,000港元撥款，作為新碟聘請交響樂團同錄音製作基金。身兼古典作曲家之審批主席表示，「佢地玩death metal，但當中展現高超技巧同創作才華，不論類型只要有實力就合符資格。」絕對係廿一世紀重金屬界最不可思議新聞之一。

澳洲同加拿大一樣，封閉經濟同地理環境有利有弊，利在唔受外界影響發展出自己風格同技術，弊在幾乎從來打唔入國際大市場而長期衰落，但正因困境中飽經歷練，能出頭者皆有令全世界讚嘆實力，好似Ouroboros2011年第一隻碟《Glorification of a Myth》非常強，有技術之餘一聽就會感覺到同其他／一般樂隊唔同有自己一套，如果佢地移民到北歐，已經會俾幾間大公司爭住簽。而家政府藝術部門開先例肯支持呢門另類音樂中的另類，希望澳洲金屬得以進一步抬頭，Ouroboros掂左，Winds+Opeth的Ne Obliviscaris係時候快手遞表，佢地剛出冇耐的新碟《Portal of I》，已必入今年年度十強之列。

明知講都無謂，都要呻句：成日標榜「參考外國同類個案」、特別鍾意照辦澳洲煮碗的香港政府，學學人地點樣搞藝術、點樣經營文化局啦，人地就真正如梁振英所講「唯才是用」呀，雖然實為中宣部的香港文化局，到頭來亦只會同狼英一樣得個講字，再加大家永遠冇份選但永遠自動當選的文化界功能組別表示霍震霆招絕技「睬你都戇鳩」。到頭來香港地夾metal band希望政府肯出錢或最少出力幫幫你，唯有大大聲「我玩Red Metal」先有機。

25/5/2012 FRI

http://youtu.be/1tg6Cr3nuHY

續昨日提到澳洲文化局撥款二萬澳元成全悉尼technical death樂隊Ouroboros新碟同交響樂團合作雄圖，順便重溫呢單舊聞。Obscura新bass手（新果個，唔係之前三隻碟玩六線fretless勁到黐線果個）可能因為老豆係音樂教授之淵源，2010年底即係入Obscura之前，促成佢隊avant-death band Noneuclid同交響樂團合作演出一晚《Transition Metal》，雙方用自己風格cover對方名曲。metal band點玩Wagner我唔係好大興趣理，反而想知交響樂團點樣cover death metal。

話時話香港地冇乜出現過正規樂團X搖滾樂隊而多人留意的正式演出，印象中恭碩良同港樂crossover過一場Rock Concerto，冇記錯伍卓賢@SIU2有份創作。都預左，夾band唔入流嘛在香港，所以唔會預期將來會有改變，會變亦只有變得更差，尤其文化局正式成立之後。各位indie朋友請繼續努力。

又諗起另一單舊聞。傳說中2001/2002年間，Yngwie Malmsteen黎香港時打算metal同concerto各開一場，到頭來concerto搞唔成，因為香港管弦樂團港樂俾唔知邊個歌手搵左去唱港樂，亞洲只演有出DVD果場東京，不過睇左隻DVD又覺唔係咩損失。老實到今日仍覺得吹水居多，我就唔信搞手真係咁落本搞唔似有機會回到本的concerto又或港樂團會理，睇跟住發生開唔到show又唔退票，買左飛隔兩三年先有得睇幾單大鑊野，連metal gig都咁難搞，仲點開concerto？

26/5/2012 SAT

今朝返工時發現，大角咀已進入$4.5一包細維他奶、$5一個蛋撻的時代。

香港還適合人住嗎。

27/5/2012 SUN

每週一相片大行動 2012 Week 22
再見，陪伴我成長的九龍城廣場KFC

28/5/2012 MON

內幕

http://blog.sina.com.cn/u/2769229805

個名相當簡單，但肯定係大陸搖滾／金屬史最震撼最具爭議性網頁，因為終於有行內人高調指名道姓講出中華metal界存在超過十年之害群之馬問題，親身指證台灣某知名集團點樣聯同中國南方不義人士，借搖滾之名進行各種懷疑欺詐暪騙勾當。一個禮拜前在網上在Facebook打得火熱，冇留心睇因為想等佢爆晒至一次過追，等一排都冇新料wow先刨，消磨左成個晏晝。對好多人黎講非常精彩，我冇乜意外，因為有留意「時事」的話，好多事其實早已傳出、見怪不怪。

睇得好有共鳴，亦敢講香港冇人比我對箇中體會更深，因為TRHK關門大吉同自己離開香港metal前線，其中一部份跟兩岸三地間此類無謂商業糾紛不無關係。好多人成日講「賣CD有幾難」，從來講係最容易，實際上邊有咁簡單，市場本身已細無可細，對內要對住香港地難服侍過自由行班大老細（有趣是，我從未遇過任何大陸客人稱得上麻煩或冇禮貌，更加冇任何一個會冇料扮四條），對外就是獨立藝術對商業為本之爭－似乎好多人唔知，文中之台灣商人同香港信和地庫集團式經營賣碟兼辦演出之Music XXXX（已經唔知佢地而家改名改到叫咩名），有跟北京一樣之合作伙伴關係，自己非本行實質盈利至上，結果就如黃子華魚蛋理論教導：你做得好過我，我要超過你，使乜落力做得比你好咁辛苦，簡簡單單旁門左道唱衰你已經得啦，香港人咁易被誤導，整死左對家生意自然自動過黎我呢邊、自己自然唔使去長進去努力，舒舒服服就有錢落袋，仲有大把人當自己神噉拜。做一間metal專賣店掌櫃，唔係坐係度等客人上門吹個水就收得工咁容易，亦要面對同應付好多你冇諗過小市場文化界都會出現之各式鬥爭同打擊。

前面都講過，相同問題已困擾中港台兩岸三地十年以上，既然咁多事實人所共知、咁多人中過伏，點解仍然可以有人從中撈油水撈足咁多年？台灣情況較好，有另一家大廠牌制衡而成（良性）競爭，而且台灣人出事會大大聲鬧同心抵制，冇幾耐之前台灣A7X事件已是個例子（毋怪乎需以各種手段轉戰內地）；大陸文化始終錢銀當道，要搵同道中人其實唔難，同只求有演唱會睇你點樣搞當中用乜手段一概不理者大有人在；香港呢，更簡單。

睇晒個網的話，聲明初段已經提到，台方其中一個大陸合作人係廣東「影視音像」生意人，即係做咩生意唔難聯想到，正好香港信和地庫以前／當時最出名係常賣印刷及製作有問題之metal碟。無論是真是假是次貨還是甚麼，總有大把人肯俾外國版價錢買一隻質素連十幾蚊人仔東門老翻都不如的疑是正版貨。當然以香港人聰明才智，買完發現中招梗會上網鬧，但鬧完第二日又係照買，而且講到賣碟有問題生意手法唔正確點點點，人地搞幾隊出名metal band黎香港，咪又係立即當人地大佬，賣飛賣到幾貴、音響做得幾唔理想都仆到去睇。唔覺唔覺，好似形容緊親子王國班師奶。

三年前抽身時提過，其實自己駐場七年，在舖、在網、自己搞show、去睇人show，見識過香港樂隊、樂迷同商賈唔少黑暗面所作所為，離開亦因見到厭見到滯，因為即使有心做藝術做文化，現實從不會如你所想咁理想，特別牽涉到名利時，一切都可以變得極醜惡。但我已經冇興趣開番個「內幕」網，因為篇幅會及得上咁多年黎所寫之樂評同專題，只展望現今有心有力落場搞一班，會將整門藝術整個scene向好推動。

29/5/2012 TUE

好似冇乜人知／理唱作人Takki王若琪，冇公司撐就是這麼無奈。三年前出左隻碟，有幾首好似《左手》印象頗深，但隻碟實物見都未見過，然後拉多三個女歌手出左隻唔多知想做乜的雜錦《陳李張王》就潛左水。今年唔聲唔聲又有碟出，封面同碟名新碟應該有料到，《魂內傷》更非常盧巧音，唔似以前有點清新有點cute路線，此人此碟應該很不錯．．．卦。問題係聽左幾首，今首好盧巧音，下首突然變到Twins噉款，好驚喎大佬．．．

30/5/2012 WED

琴晚有兩樣野好唔對路。

1) 《Falling Skies》終於播完，套劇開頭好地地，後半越來越唔知做乜，外星人點解可以咁白痴咁廢，教書佬主角點解外星人一侵略地球立即變得勁過Rambo全個鎮都要靠佢一個人打救，大結局爛到想喊，仲話史匹堡監製。好在下星期開始播新劇，但十足《Stargate》+《Primeval》的《Terra Nova》睇左預告，似乎唔好得幾多。

2) 為左慶祝《Falling Skies》大結局，買左包薯片邊睇邊食，其實想買爆谷但屋企果邊搵唔到。卡樂B近來相當進取，單近三個月已經出左差唔多十隻新味，有幾隻仲非常好食好似香濃芝士、意式薄餅同法式忌廉，不過佢地市推廣同產品開發相反相當唔掂：一係每次出新味就標榜「限期供應」，賣左一水半個月之後就永遠唔再出，到頭來只得番賣開幾隻正路味道，太過短視；一係就出得好怪，我冇諗過會出現羅宋湯薯片咁過癮，但事實證明唔是乜叉都可以放落薯片的。

31/5/2012 THU

黎到五月最後一個禮拜，終於似番五月。頭半個月（應該話上個月底開始）熱到可比暑假，下半返風落雨先似番正常四五月氣候。以前不論幾多度，七月前開冷氣必遭老豆老母問候，今年五月頭老豆老母已經帶頭開冷氣開足大半個月。

細個夏天過三十度已經叫好熱，曬住出街都唔會好辛苦，果陣地球未日講夜講溫室效應、大陸工廠廢氣同北面狂風沙吹到南方問題冇咁嚴重、香港未有咁多屏風樓。而家一到夏天你完全唔想離開有冷氣地方，記得幾年前有次35度會上報紙講到好大件事，跟住果年再見唔到同類新聞，因為一年間35度已經成為七至十月日間標準溫度。一兩年前每逢入夏，會爆番句「乜咁熱架？而家六月咋喎！」今年六月已經改成四月。熱到《Knowing》噉款，你話今年就世界末日點會唔信丫。如果大家咁好命居然過到2012，黎緊幾年可能會去到

「嘩，年都未過喎！」

「嘩，聖誕咋喎！」

（係都唔奇呀，唔係好多年前好似2006，我聖誕節係著短袖衫過，長此落去香港夏天升上到40度實在不足為奇）

1/6/2012 FRI

http://www.nownews.com/2012/05/31/350-2819767.htm

「嗚呀～為何香港沒有這樣的heavy metal baby～」

2/6/2012 FRI

自從禮拜頭執過server，高登RSS死左之後，生活空虛左好多。browser版太慢太累贅，電話版更加唔使講，冇左RSS真係冇晒心機上（立即多左時間打Diablo）。有冇人知有冇其他方法，或者Admin有冇機搞番掂？

3/6/2012 SUN

每週一相片大行動 2012 Week 23
伏味甚重

4/6/2012 MON

每週一相片大行動 2012 Week 23
In Memoriam：抗戰二十三年

6/6/2012 WED

http://youtu.be/Qw7LEIDFCX4

六月四日除左大家都知道的那一回事，今年另一大事是憑一首四十年前陳年舊歌成為比Rick Roll更神的互聯網歌神Eduard Khil a.k.a. Mr. Trololo，中風昏迷後不醒人事，享年77歲。99%人只識佢一首歌，100%人唔知佢唱乜（包括佢自己，因為根本冇歌詞），但首歌真係超級洗腦超級地cult。

《超級巨聲》預賽有人唱過Vitas《Opera #2》。唔知如果我參賽唱《Trololololololololololo》會發生咩事呢。

7/6/2012 THU

http://youtu.be/qfLMTsIJsoo

知唔知點解Microsoft寫左on{X}呢個可敵Tasker之神器，居然唔係俾Windows phone用，亦唔係俾iPhone（以其自閉性相信冇乜可能），而係Android獨家？除左擺到明Windows系統唔多掂／Android系統夠鬆散夠空洞，傳說中，Microsoft以專利等各種途徑，從Google/Android處所賺，收入遠高於自家Windows Phone。

（另一個傳說係，Google經每部iPhone所得之盈利，比每部Android電話高一倍以上，到頭來，皇者仍是蘋果。）

不過即使on{X}唔使錢，暫時都冇大興趣試試，除左用慣Tasker同Llama，一定要人用Facebook login同依靠連線到MS舊雲控制你部機已經搞到唔想用。而且就噉睇好似冇Tasker咁神，絕對唔會放棄Tasker，因為玩落絕對令人玩上癮，Android機樂趣正是自己想點就改／較到部機想點。

相對地，唔鍾意玩微調玩tune機，用蘋果算啦千祈唔好掂Android機。

8/6/2012 FRI

食到好飽今餐，易通下次聚餐會係幾時，係咪七月底上林師傅師母屋企以滿月酒名義黐餐

定還是各位同學八月頭會請劉Sir食飯同佢慶祝生日，騎騎

10/6/2012 SUN

早排蘋果有篇專題有關唱片業同一位「當今知名年輕樂評人」，引發連番議論。其實耐唔耐報紙雜誌就拎呢個題目出黎翻一翻炒，例牌認知不足記者搵非最合適受訪者從非最正確角度出發，然後網上例牌感觸一下「而家做音樂搞音樂真係難ＸＸＸ」，繼而引申download是對是錯嘈一大餐，幾日之後志在參與過投入過發言過的朋友們已遺忘相關討論轉向其他話題＆繼續download。當時冇乜留意更加冇參與，一來懶睇報紙，二來劉Sir不知名，三來Ｎ年前早於自己blog就此題目深入評論過無數次，星期日落雨唔出街上網時撞番先正式目及目及。睇晒之後，唯一興趣係，到底果個Chikin咩料？

從3C追溯，搵到佢個網，是有點料子是獨到（因為香港地本就只得極少數人認真寫本地音樂，而無多少比較），但單以此視野都備受重視、知名到幾萬人睇、出名到可以去講talk，只有話香港樂壇／樂迷膚淺愚昧的時勢造了這位英雄。以前睇佢文都冇乜野，但睇完蘋果再睇埋佢個blog，只令我諗起《黑紙》班潮童，唉。

我地'80可能係最後一代仍然會覺得俾錢買碟係正確，跟住九十年代大一班已經變晒做大老細，睇而家每每講到download與否，正派已由「點解聽歌唔買碟」變成「點解聽歌要買碟」、「只download唔買碟唔岩」變成「只download唔買碟有乜唔岩」，買碟反而變成反派變成傻仔行為，呢樣我做左門市前線咁多年最清楚，推一隻碟叫人／大老細買，自認契弟都冇咁灰，而黎到今時今日，連所謂樂評界佔一席位之年青新晉都會同群眾大多數一樣大大聲「我咁多錢要使邊有閒錢買音樂」，更加明白香港音樂已經冇得救。

十幾年前開始音樂工業已注定只會向下冇可能再繁盛，當主流都做唔住時獨立更加唔使講，懂得縱觀整個音樂業界同藝術界，都知道想貢獻音樂就只有調番轉頭去蝕底去付出，身在香港靠音樂帶俾你名利之時代早已過左，仍可以靠枝筆寫唱片搵食，只得把握到七八十年代機會之資深評論人。容許我曬命的話，我屋企有>4000隻CD，當中因為業內人士身份而唔使錢拎到手唔夠十分一，有人搵幫手寫評論而免費提供更加（二）百分一都冇，換言之寫過之唱片，絕大部份都係自己真金白銀買番黎，試過音樂雜誌邀請投稿，我都係自己落信和俾錢買隻碟返黎寫稿再投，即使做唱片舖、寫評論多年，亦唔會因為任何原因而隨心所欲地想有邊隻碟就唾手可得。同你會明白俾錢令你鍾意之音樂人／樂隊得以維持生計，先會繼續有好音樂帶俾你同其他人。

Chikin既然自己提得出當今唱片公司面對之各種困境，及延伸之各類商業與文化問題，自己亦非已達神檯級江湖地位之樂評人，如此明白如此理解，就應該清楚知道香港業餘音樂工作者／樂評人面對之現實，就係你未有可以問唱片公司同音樂人拎辦之地位，想支持自己所愛之音樂，靠自己心力財力付出不可避免。但佢選擇左以大市場問題為由加入剝削所謂自己支持之音樂。冇乜出奇，睇佢一直以黎所寫都知，佢非常甘於局限自己於香港樂壇，涉及少少港外音樂已是極限，只有如此小市場主流視野（有理由相信，因為本身實力見識僅此），能寫一回事，毋怪乎心態跟一般香港K歌樂迷不無分別，包括同普羅大眾一樣口說熱愛音樂身體卻很誠實地唔會俾錢，我唱好你不過你唔好要我同你一齊捱，本質根本未能超脫一般樂迷層面。以此水平同心態就可成為知名樂評人，只有話我對香港樂壇未來相當悲觀。

最後，有兩年前第一次正式有人俾辦寫碟評，順道一記之劉Sir評論寫作生涯小結。所以我成日話，劉Sir係不知名，但講到唱片業乜乜物物，想知現實係點，都值得訪問一下佢卦？（可能正因太現實了，所以唔適合登報上雜誌）

Kowloon Metal City外章：
KATATONIA新碟及
metal評論員劉Sir剖白八年寫作生涯

http://lau-sir.com/diary(p86).html#20100305

http://blog.yahoo.com/lau-sir.com/articles/99559

「請容我呢個metal友唱番首王菀之。『懷念技術低，創意高的向後站』。Geocities萬歲。」

11/6/2012 MON

六月頭必多事，今年特別多，六月十日黃家駒生辰，因各樣國情變得低調。今年生忌前夕有Beyond第一張唱片公司發行專輯《永遠等待》5碟6海報超豪華大boxset復刻版。作為多年Beyond雖早已買左佢地多隻精選、四人時期演唱會VCD加幾近全線復黑王，當中真正「新」者不多，都有興趣收藏，除左所謂限量同好大好豪，興趣在於可能是香港第一隊正式thrash metal樂隊高速啤機幾首歌，因為咁耐以黎我都只聽過《沖》。

書局見到$349，有興趣的朋友請快手。

12/6/2012 TUE

我認我期望太高，《Prometheus》有點失望。期待因為「異形前傳」，同Ridley Scott，雖然佢其實冇幾多套戲我覺得好（唯一非常鍾意可能係連續劇《The Good Wife》），但佢手戲導法同氣氛好對口味。不過《Prometheus》強在技術同攝影，人物同故事好弱好散，有點頂唔順係幾個橋段一節節，同其他部份幾無連接，對後來影響亦唔大，有點搵戲黎做。

同大故事唔太明，一開始個外星人睇住架飛碟走之後飲X-Files式黑油自殺唔知想表達乜，外星人點解會俾自己軍火庫個地址人類呢，造完人又會屎忽痕想黎做低佢地？再加埋個結尾，今集為整個外傳產品線舖路之動機，實在明顯得太樣衰了。

要讚係3D做得非常好，真正做到自然景深，完全冇一般立體片Flash動畫式紙板放前後感覺，雖然唔睇立體版都唔會差好遠，因為特技場面唔多，最多係《生命樹》式超靚風景。不過睇到今時今日實在唔太想睇3D，主要關眼鏡事。本身少睇戲，睇完一套下次睇唔知摷幾耐先搵得番副立體眼睛出黎，而且唔似普通眼鏡成日戴，入到戲院開場戴先發現花到仆，可以點丫硬食架啦唯有。立體眼鏡又得塊膠片仔鬼咁易刮花，基本上每次睇都要買副新。所以總結係，都係睇2D版算啦。

13/6/2012 WED

http://youtu.be/NPdDKNpjwuk

正值早前《蘋果》及延伸之網上討論提到CD已死、（免費）下載當立之際，即將出碟之The Agonist歌妹拍左條片，唔係sell隻碟，而係講點解唔好download／偷佢地隻碟，道出現今樂隊巡迴成本高回報低生活條件差劣之困境。聽唔掂的話，樂隊仲有個文字版方便大家：

"Here's a little insider info just to clarify, since a lot of people don't understand how the industry now works. We would feel bad divulging this kind of info and shattering the dream, but a lot of metal musicians seem to be doing it nowadays so I think we're ok to do so as well.

"Why are we asking you to buy the album? We don't see money from album sales. We have never seen a single royalty penny. But, if your band is known to sell a lot of albums, especially in the first week of release, you get more offers for tours, therefore making it more possible to play to more fans.

"Ticket money: As an opener, we do not see any money from ticket sales or have any control over ticket price. As a headliner we rarely see any money from ticket sales as well.

"YouTube: If you think we are making money off of YouTube plays, check out whose channel our videos are on (Hint: It ain't our channel!) Again, we've never seen a penny from YouTube plays.

"Merch/CD sales: To get our albums shipped out to us, we need to pay about $10. We sell them for $15. Venue takes about 15% usually, manager takes 10%. Therefore, we are left with about $1.25 profit per CD. T-shirts, they cost about $10 to create and ship, we sell them for $20; again, you can do the math. So we have a few dollars profit per item sold, but about $200-$300 in gas per show, plus the expense of work visas (about $4000 for the USA), vehicle and trailer leasing, and all the other expenses that go into touring.

"We sleep in the van, don't eat, don't get to bathe. We hire no crew. We get maybe $20 or $30 a day to get food or save up to pay rent. We invested years of our lives into this and some had to take time off work to record this album. And this is not just our band. We can safely say that this applies to every opening metal act we have ever toured with.

"Sorry to shatter the rock-star fantasy, but the truth is we all work 9-5 as soon as we get home from tour, if our jobs are gracious enough to allow us to leave and return. Otherwise we scramble to find even the most menial jobs just to cover our bills in between tours.

"So - taking our project without paying for it is STEALING. But if you repay us by spreading the word about the band, getting your friends to come out to our shows, buying our merch, giving us a place to stay or some other form of support, you've paid us back. Nobody wants to go to work and not get their salary, but bands do it ALL THE TIME. So, have some respect for the work they do and support in whatever way you can.

"Hope that clarified everything! Enjoy 'Prisoners'!"

不過片好字好，預左唔會有幾多人理，理亦只會批鬥，因為插中廿一世界音樂最大禁忌：不支持（非法）免費音樂。每當有創作人／樂隊倡議不應濫用免費音樂，無論理據多麼實在多麼充份，回應一方永遠只會忽視重點，轉移視線到其他無關痛癢之處大肆抨擊，The Agonist一類樂隊就最為方便，諗都唔使諗已經可以立即爆番句「你撈唔起係因為你地玩metalcore你地唔掂！」

純粹對事不對人的話，同一番論點其實好多大band都講過如Nile，換言之整個創作業界從上而下、從出名到不知名、從最勁都最廢、從「值得支持唔買唔得」到「垃圾download都廢事」，都面對緊相同之殘酷現實：做音樂只有靠自己燒錢燒時間去持續，賺到錢甚至回到本機會接近零，早已成為絕大部份音樂人，尤其獨立工作者同另類音樂界別中人無法自已解決之難題。當然聽一班唔會關心，正如之前都提過當今正派反派角色已經對調，你點辛苦點蝕錢你死你事，總之你唔肯分享唔肯免費俾人，就是原罪：

「我地用左好多時間好多錢，嘔心瀝血先錄起隻碟同準備黎緊巡迴。」

「放心，作為音樂愛好者，一定撐你！」

「做音樂要錢又搵唔到食，所以希望我地出碟同開演唱會時，大家會買碟買飛支持，令我地可以繼續維持落去。」

「唔係卦叫我俾錢？收皮啦！」

很遺憾這就是現在的現實。而且「正派」只會日益壯大落去，提到The Agonist就從metal取例：metal界蘋果日報Metalsucks對條片的回應，從網主到網友，99%都同正題無關加態度負面，唔係「條女ＸＸＸ」就係「廢band食屎啦ＸＸＸ」，值得一提Metalsucks兩個網主屬非常高調之反label、反收費主義者，諷刺是佢地得以超級罕有地全職寫metal blog維生，甚至能夠用自己個網名義搞巡迴音樂節，全賴口裏抵制的唱片公司、批評要求樂迷俾錢買碟的樂隊提供之廣告費－據聞人流量可能是全球metal blog第一之MS，廣告費比其他metal網高出不少。論成功肯定係metal界之冠，因為「正派」坐大、物以類聚，但MS及同類網站之成功，只代表各位創作人同樂隊們繼續冇啖好食，想玩音樂就要認命，相信自己打緊一份冇人工收甚至要自己倒貼，貼完仲要俾人笑俾人小的苦工。雖好少特別上非metal音樂網站，但相信差無幾，見蘋果訪問果個Chikin如何美化自己不當行為（暨當轉移視線金蟬脫殼例作），這早就成為主流同獨立音樂界之大風氣。

所以而家已經好少特別理metal同大圍發生咩事，因為難見tr00，只有troll。

14/6/2012 THU

每週一相片大行動 2012 Week 24
慶興我及早離開唱片業前線

15/6/2012 FRI

每週一相片大行動 2012 Week 24 Extra
Google Map featuring 淋紅油廣視

16/6/2012 SAT

http://youtu.be/BNRLbCnTaZM

摔角之王2012@蒲吧

https://www.facebook.com/events/412754605409382

16/6星期六晚蒲吧見

17/6/2012 SUN

港摔大賽：摔角之王 2012

16/6/2012@蒲吧

http://www.facebook.com/media/set/?set=a.10151036009880928

18/6/2012 MON

睇完近幾星期《House》，點解仲要我睇無記劇？正如上星期第6季第15集《Private Lives》，一貫一個鐘完單元故事、解謎同人物／搞笑雙線並重典型美劇模式，副線是House踢爆老死Wilson讀緊書時客串拍過鹹片，跟住成間醫院係噉用佢幾句對白玩死佢，睇咁多年電視其中一次笑到最碌地。美劇得以風行全球，正因百無禁忌幾破格都得。

噉無記衰乜？一直以黎俾人踢爆無數次好多套劇抄人地美劇佈景、人設同故事，就係衰在唔（敢）抄人地真正成功之內涵神髓，正如你唔會見到無記劇好似《Private Lives》可以講到有個角色拍過鹹片，再用佢黎做中心不斷玩有味笑話－唔使講到咁遠啦，黃子華之後，都搵唔到幾多套無記劇大角色唔係健康正氣政治正確，更加冇可能做到一個主角反英雄式陰濕賤格，只餘正經到拍得住ETV的正派，奸極你都覺得好善良的反派，老土到想死的故事，翻炒無數次的屎橋，睇完只會喊的笑料。所以無線無謂再賴乜賴物，就算俾晒人地服裝道具廠景街景每集六七位數字預算你，諒你到頭來都只會拍成成節三個字講得兩三樣野拖到訓著、插大量超爛港式笑料就以為自己拍得好精警的爛劇。而無線同港產劇淪落至今時今日田地，亦當然多得香港師奶／老母們的莫測智慧與邏輯唔少：

「英文台有套劇，個主角好臭寸成日窒到人應一應，班女角著衫鬼咁性感，對白劇本又鬼咁多噯味笑位。」

「拍得好好睇呀！咁好笑，如果中文台拍劇都會拍到咁精彩就好喇！」

「中文台都有套劇，個主角好臭寸成日窒到人應一應，班女角著衫鬼咁性感，對白劇本又鬼咁多噯味笑位。」

「搞錯！低級！下流！惡趣味！教壞細路！俾我仔女睇到仲得了？立即打去廣管局投訴！」

其實在這麗音時代，劇集時段早就再無中文台英文台之分。係唔知點解仲會有咁多香港人自欺欺人嗟。

20/6/2012 WED

http://youtu.be/YzUiK-uQmlI

是Max Payne教曉我甚麼是noir。除左C&C同Diablo，Max Payne都係陪伴我一起成長的偉大PC game系列，比Matrix更早但冇人知的慢動作bullet time、灰暗到爆的都市觀同人物對白、本來屎忽撞棍的手繪漫畫過場成為神來之筆，唔及另外兩隻出名但可以話最鍾意佢。而三個系列都係第三集成轉捩點：C&C3技術層面大勝水準已跌，之後新班底整第四集除左個名根本完全無關慘絕人寰；D3唔使我講啦俾人插成點大家都知，佢一日連單機都要連線上server先有得玩我一日唔會理；同樣延期左唔知幾多次、拖到2012年中終於出的MP3雖然同樣改頭換面，好比吳宇森變成Michael Bay冇晒noir味，我對佢期望甚高、更甚於D3。

新一集要換機先有得玩，Windows 7又玩唔番頭兩集，食住個勢電話返出的第一集呢，從來唔識用analog掣玩射擊，Shadowgun玩左成個禮拜第一關一半都過唔到，所以冇俾三蚊美金買黎重溫，我驚樣衰到How to Play都過唔到。頭兩集未有官方PC復刻版又未玩得到第三集之前，只有上網睇人玩頂住癮。老實講唔太鍾意第二集，故事、對白同「noir味」都遠不及第一集，主角又神化過周潤發冇晒意思，仍不失為一隻好game，當中音樂彌補不少，除左搵黎Kartsy Hatakka@Waltari同Apocalyptica負責配樂（還記得Kartsy黎香港表演的故事嘛？），片尾有Poets of the Fall《Late Goodbye》，第一次打爆機睇住女主角死，然後入字幕播呢首歌，好鬼感動，是繼FF7《Eyes on Me》之後又一曲詞都同隻game夾到完美的主題曲。

想當年為左聽首片尾，爆完機load番最後大佬關出黎又打多次，不斷重覆，而家都耐唔耐拎首歌出黎重溫。（但老實，Poets of the Fall其他歌我真係冇邊首特別鍾意或接受）

21/6/2012 THU

每週一相片大行動 2012 Week 25
In Memory of Max Payne

22/6/2012 FRI

剛剛前兩日懷緬Max Payne一番，Android Market（永遠唔叫Google Play）就搞左個「夏至大減價」好多勁game平賣，但一隻都冇買，除左唔太鍾意電話細芒打機，部機太廢好多立體game玩唔到．．．其實最想買，係另一經典Another World。

http://youtu.be/7tLXZgx9a-I

在486時代，Another World革命成就好比次世代中之Max Payne，雖然係波斯王子將橫向動作、角色扮演同解謎融合成新型態ARPG「cinematic platformer」，為系統同技術帶來大革新大突破必數Another World，一出已走在時代尖端，單靠2D平面都做到真正cinematic、未算成熟之多邊形效果造出高質圖像短片睇到嘆為觀止，情形如id Software兩大作：暗殺希特拉是個人電腦第一身射擊遊戲主流起點，但由Doom進一步開拓並發揚光大。而家Android返出HD版，仲要做緊五折特價賣港紙$20，值得買返黎懷舊一下。（但而家買apps好似一定係要你先開個Google Wallet account，麻煩）

前面id之比喻，正好可形容Another World同公司Delphine續作Flashback，兩者關係好比暗殺希特拉／Doom。假如Another World系統同畫質係劃時代，Flashback直頭超越時代曠古絕今，紀錄是廿年後今時今日仍然係史上銷量最高法國開發電腦遊戲。既AW復刻，希望Flashback都會升格HD，然後夾埋一個discount package賣。

所以好懷念Dos/Win 3.1年代PC game，唔止舊game遊戲性確比而家只顧畫面靚系統複雜（佢地叫寫實）的次xN世代好玩襟玩，仲有份見證歷史。不得不為為新一代感到難過，因為而家你唔會再體會到見證突破界限的震撼、經歷唔到發展一日千里帶來之興奮，真的窮得只剩下一個玩字。

23/6/2012 SAT

一講到舊game挑起左舖癮實在好難停，今天推介Android動作game Gunman Clive。

http://youtu.be/-SNhOhmO0PE

作為打開8/16-bit行街game大的old-school友，見到隻game已經可以立即俾錢，而家仲邊度搵得到開發者咁有心機，唔玩多邊形自己設計落手畫，畫到咁靚咁大隻game出黎？仲要Android出先好野。但，非常無奈地，我部Defy連呢隻game都玩唔到。係咪迫我換機先。

24/6/2012 SUN

Meanwhile in Japan, Metalababy is crossing over with Sadako

http://youtu.be/0GErGfHjHQ0

25/6/2012 MON

http://youtu.be/FCZc2aXzJSo

唔覺唔覺，王梓軒又出碟了。所謂唱作派但創作水準唔夠穩定，唱麻麻，外型亦唔討好（唔係成日要做到偶像派式好型好靚仔噉企出黎，我係唔會評論外觀的），新一代男歌手中佢已經算我留意較多一個，因為走王力宏中樂撈西洋pop「chink-out」路線，雖有特色但未有水準歌質素非常參差，最少在香港算較有野聽。新碟聽一兩首已收收地皮，但上隻碟《超越格式》我印象幾正面，作曲編曲幾多野玩，《人啊人》應該算佢作為本地創作人代表作，中間鎖吶對電結他就唔係香港流行曲容易聽到（其實唔使睇MV都知又係郭雅志，我諗有人要搵幫手吹管，十次有八次都係搵呢位中樂團首席）。《玩具也流淚》都唔錯，雖則個完全唔善用題目的MV柒到。但講到柒都未數到MV，唔知點解佢四隻碟落黎，歌詞永遠得啖笑冇幾多首見得人，「人間一粒米」簡直是拍得住甄健強的曠世極品，林若寧都係《年少無知》同繼續幫indie band寫詞算啦。係咪佢搵親的填詞人都有心玩佢？

講左咁耐，可能你仲未知王梓軒係邊個，縱使佢出到第四隻碟、咁多年各大頒獎禮拎過好多好多獎、一出道已經同香港官方的中樂團同西樂團crossover過幾場、黎緊仲會去會展開大型演唱會。點解冇乜人知／識／理都可以咁勁？當然實力不是主因，睇睇李卓庭就知，比佢早出道、一樣出左四隻碟、初出道又係拎過唔少獎、而且唱同歌更好，但知名度低好好好多，低到差唔多得番朗豪坊同可能冇錢收的商場show有份唱。原因好簡單：王梓軒最出名，「人間一粒米」之外，係老豆就係人大代表兼幾間地產公司高層兼香港藝發局主席王英偉。有米確不同，再次證明成功需父幹，包括理應同商業無關不掛勾的文化藝術。

話時話，佢正正我生日果日搞演唱會，不過老實，佢出道冇耐同中樂同西樂團crossover幾場，都係去唔到或事後先知，錯過左確有點遺憾。但會展今場就．．．

26/6/2012 TUE

每週一相片大行動 2012 Week 26
舊區服務街坊老店消失的唏噓

27/6/2012 WED

http://youtu.be/XxJZgt4YUpo

英國melodic metalcore樂隊Malefice歌佬Dale Butler倫敦街頭親身示範爛聲metal佬街頭賣唱。等我今日放工之後去菜街試下先，挑機好戲量鬥on9。

28/6/2012 THU

同以往每次政府想夾硬立例過草案，或臨近特別政治意義日子一樣，一到前夕各大論壇五毛帖數量幾何級數增加，所以近幾日上親子王國（係我有上開唔好笑），望一陣已經冇心情睇，即係你做五毛做得有深度少少，起碼叫有番少少挑戰性值得睇，偏偏全部係低手到挑機都冇心機。但灰不是此，無奈在就算最低級最生手的五毛、白痴到去其他論壇一出post已經俾人秒殺果隻，上到去都可以輕易唆擺到無數師奶。師奶王國絕對係全香港所有論壇當中，最容易控制最容易做政治宣傳果個，因為香港師奶冇腦幾可等同於自然定律，政府仲使乜諗咁多點樣開洗腦課程丫，就算冇國民教育，香港下一代都自動會俾班師奶／老母教同搞到白痴晒。所以有時香港人是抵死的。

29/6/2012 FRI

其實很想去七月一日的加拿大日Anvil台灣演唱會，見識其他國家文化分享是派出國寶級重金屬樂團做代表，演出後更有樂隊親身交流之《Anvil! The Story of Anvil》電影放映會，是一生難求機遇，雖然知道時才只餘兩星期，巧遇週末加假期曾想過飛到台灣一睹Anvil風采。但最後放棄了計劃，因為在七月一日，香港人、身在香港的朋友，有更重要的事要做。

七一遊行手冊

https://docs.google.com/file/d/0B0gV3Ao78vG1bDV4bEt2V1pVVkk/edit?pli=1#

30/6/2012 SAT

看到這幾隻字的時候，我已經在這週六早上，回到公司繼續打我的牛工。回想一起床立即致電18503電訊盈科特約本港天氣預報（報個天氣都要同李氏拉上關係，香港果真是李家城呀），聽到「所有風球已經取消」，拉開窗簾更是陽光普照，第一次對風和日麗天氣充滿怨恨－想必最愛玩人的上帝聽到了，一出門立即滂沱大雨。心中萬份悲痛，痛得只餘一句，我屌你老母啦。

1/7/2012 SUN

今天七月一日，香港人、身在香港的朋友，
有很重要的事要做。

七一遊行手冊

https://docs.google.com/file/d/0B0gV3Ao78vG1bDV4bEt2V1pVVkk/edit?pli=1#