噉就去左歐洲三個禮拜，多得大風雪，令我可以在這讓人懷緬的地方留多兩日，返到香港，情緒同適應反差真係好大。但始終家就是家，回到香港，有幾樣野好想做甚至需要立即做：
好在唔使行李亡人亡，可以早返香港的理由（應該話條件），英航過國泰時件行李唔知去左邊，一係即飛一係留多最少一日等佢番。想唔想返香港之後放長假丫？仲要搞滯留時食飯搭車使費退款，同英航大把偈傾。
剪指甲，平時慣左每個星期剪一次，而家三個禮拜未剪過，留到僵屍咁長，自己都頂唔順。
好想立即食番個港式人間美食餐蛋麵呀。
歐洲三個星期也是汽水之戰，歐洲多汽水飲到呢，最後是Coke Cherry與Dr. Pepper之爭，返到香港都好想飲 Dr. Pepper， 幾乎日隊一枝飲到上晒癮。同想英國之外唔知邊度得到的Mars朱古力奶。
訓，勁訓，聽日又要返工，唉。
可以安心等待12月21日了，呢世人應該再冇機會咁合皮玩得咁開心，一月份糧&雙糧噉就冇晒，財散人安樂。
是時候開始準備劉Sir章回小說《世界末日前的歐洲旅行》。三個星期、三個國家、四個城市、一場風雪，有排寫。
唔係離開左香港好耐嗟，定我真係同時局脫節左？歐洲回港第一件事係摷零食，歐洲啤酒超多，汽水都多特別英國，但零食差唔多清一色得薯片，仲要見親唔係Lays就係Doritos就係品客悶同埋悶，又貴到死。第一日放工立即走去屋企對面成日幫襯間辦館，嘩乜叉都加價加到，好很鍾意食的古文記蝦片，新年前$7，新年後貴左兩蚊。Dreyers雪糕家庭裝，聖誕時$37，過完年去到$40。其他大牌子薯片蝦條更加理都唔使理。垃圾食物是我們這等窮撚難得負擔得起的娛樂，而家灰到薯片都食唔起。
所以只會買一罐罐的薯片Pik-Nik，除左好食，仲只得番佢維持到$1 10g的高性價比。
4/2星期六晚大風雪被困機倉的六個鐘，除左呃左一餐飛機餐（本身好犯賤鍾意食飛機餐，都頂唔順，可想而知英航飛機餐幾垃圾），仲睇左香港冇乜可能上的《The Troll Hunter》。非常好睇。
此Troll非4chan or 9gag成日見的動詞或名詞，而是一種挪威神話生物，典型AD&D／魔戒常見巨大食人怪獸，套戲講一班學生拍紀錄片追蹤獵熊隊，點知跟著個幫政府怪物安全管理局做野的怪物獵人，鍾意唔拖泥帶水怪物好早已經成隻彈出黎，又唔會只得一隻／一款咁單調越後出怪物越勁，拍得出緊張刺激又用好嚴肅好科學態度解釋Troll同政府點樣掩飾順便批評一下封建制度，最後拎埋現實世界挪威總理記者會「講錯野」洩露國內有Troll存在之新聞片段扮晒真實。除左咁大個國家只搵一個人對付成族怪獸，個獵人居然單打獨鬥咁多年都死唔去，拍攝中途死左人班友可以若無其事開開心心繼續拍，同最後一個人打成座山咁大的Troll場仗有少少戇居，冇問題，《Trollhunter》應該係史上其中一套最佳mockumentary。搞到本來好有興趣的《Chronicle》，而家猶豫緊入唔入戲院睇。
bonus：提到Troll，就算唔講4chan唔講9gag，都好難避免Trololololololololololo．．．
之前一日講到我非常鍾意的mockumentary《The Troll Hunter》。鍾意原因好多，今日分享多個。有乜野完美得過一套挪威傳說怪獸電影，搵一隊用當地方言唱地方神話的black & roll樂隊首派台歌做片尾？
雖然唔算好鍾意Kvelertak，但睇完套戲字幕聽到佢地首歌，都不得不爆番句，嘩，頂，好Ｑ正。
返左黎香港花左幾日搞掂滯留同公司手尾，禮拜日先得閒放日假睇番早前新聞。而家先知原來令親子王國同高登兩大敵對陣營一致向外，集資上蘋果同爽報登頭版發表不滿個廣告，設計同計劃咁絕，成班左仔同政府連平機會都中晒伏笑到爆。「要求平機會徹查平機會」真係笑到爆。可想而知反對當今港府同內地入侵勢力不乏專業人士同有識之士，只係對手即使愚昧仍手握極權，抗戰始終無力。
懶上網典睇番，之前半個月除左冇買到份頭版反蝗蘋果收藏，仲有咩錯過左？
今日返工廠，唐狗五星級防空洞單野只有追收音機，追到屋宇署班人俾社民連擋駕擋到遲左個幾鐘五點幾先入到屋。公司做完野返到屋企上網一睇，頂，笑到仆街。
Into Eternity終於肯出多首新歌。上隻派台《Sandstorm》麻麻，《Fukushima》直頭聽到個intro立即連爆幾句粗口。好在跟住似樣，唱依然超勁（但旋律使唔使J到噉），同肯玩番多結他solo，印象好過大半隻《The Incurable Tragedy》，新碟應該最少返得到去《The Scattering of Ashes》。
都未夠黎緊tour搵左條女代幫Iced Earth玩的Stu Block唱live咁過癮。除左Stu Block，IE歌可能真係要女聲先唱得到。希望再有機會黎香港，佢地live真係爽到震。更想睇女聲班Into Eternity會係點。
「咦，好似幾日前蘋果先用slide action screen lock專利打壓Motorola令佢地全部手機德國禁售」
估唔到仲有新一輯《頭條新聞》，而且新一季新一集仲係歷來最精彩最好笑之一，唔單純因為crossover《天與地》，水仲抽得好快好新好應笑到死。香港仲未死晒。
原來王立軍投美單野，過程咁曲折咁精彩，十足睇特務片一樣。雖然來源係《蘋果》，我撐佢地但老實《蘋果》報新聞總有老作水份人所共知，但就算係假係吹水，吹到小說咁好睇，都抵俾佢呃啦。
再者，話內情並非如此，先更難叫人相信。
《D.M.C.》之後，日漫只追《爆漫》同《進擊的巨人》。記得兩本對上一期同一日買，冇上年年底都今年年頭，《爆漫》要到上個禮拜先出新一期，咩原因出得咁慢？
睇開字多過圖的美漫，所以覺得根本係小說的《爆漫》好抵睇，好似今期第16期，聽住歌睇，成隻碟聽左兩次即最少個半鐘先至睇完，換著其他日漫睇完再翻睇多次唔使一半時間啦，《浪客行》兩個字睇完一本都試過。其實用漫畫家做題材發展限制大好難寫得長久，頭幾期講兩個主角一個編劇一個作畫（現實中作前是《死亡筆記》的原作者二人組之投影），向成為最年輕連載漫畫家目標奮鬥真係好睇，家下日漫大趨勢係連打書都要萌，從未諗過講畫漫畫反而可以講到咁熱血咁有男人味，畫又靚你睇過《死亡筆記》都知人設畫功幾好，又帶出好多漫畫行業同行內工作者資訊，娛樂之餘充滿教育性同思考性。但發跡後變成同其他作者爭排名，「決鬥」好多時比古龍更古龍，用幾頁講用咩畫法同橋段去爭名次，下一頁已經公佈結果講邊個贏，過程細節可以完全唔交代，最慘重覆好多期，一次算兩次都算睇多幾次就覺得求祈過頭。第16期成功在用幾回講主角宿敵點樣一人對抗成班作者，過程唔再是但高潮又重拾初時引人入勝之男人的浪漫，另當初三條線角色人際、漫畫工業業內議題同漫畫家爭鬥，唔再過份側重最後者而平衡發展，最有興趣之業內議題比前幾期加插更多，又有晒舖排新反派出場剛剛好完留晒伏線，前幾期睇完覺得作者不如激流勇退就如今期以一敵十之宿敵一樣，但回勇得實在出乎意料，如果今期水準維持到落去，《爆漫》應該長玩長有。不過，最緊要明白見好就收道理，唔好漫畫入面畫得出漫畫家明白自己作品幾時結束最光輝可以永垂不朽，現實偏偏死唔斷氣做衰自己，前事請睇番《死亡筆記》L死後之後半。
追《進擊的巨人》同樣因為男人的浪費同熱血，講到係近年難得回歸正宗男式打鬥路線之佳作，頭兩三期確吸引，但越睇越唔對路，難得世界觀獨特但打好少浪費左，吹水多又吹得悶，劇情行貨好多野例如主角係巨人其實一早估得到，畫風亦夠晒另類唔係人人啃得落，睇到第五期曾經諗過放棄，但好多人話跟住先真正黎料，就俾多個機會佢。不過好難搵到地方買，而家唔知出到第幾期？
Dragonforce新歌，繼續高速，繼續celtic，繼續DF。但編曲平淡，同live都唔算好得的新歌佬錄音力度仍然差少少。對新碟有保留，不過唔似上隻靠single一首撐全隻碟我都收貨架喇。
劉以達High到你唔掂五十減一賀壽大派對音樂會（即係你以為兜兜轉轉達明一派演演唱唱會個名已經夠刁鑽），打字時仲有三個鐘開場，其實好想睇，一來佢唔聲唔聲就出左的新碟《希望之旅》唔錯，二來冇預過四月達明一派演唱會買得到飛。不過禮拜五晚蒲吧搞已經惡搞，仲要有個客咁身痕無端端上大陸，好揀唔揀揀我唔使返工個星期六晨咁早上，睇黎除左半個達明，星期六晚Immanu El都冇行。
灰的，唔止明明短週都要大朝早起身返大陸白做成日，加兩晚兩場正gig都睇唔到。而家大陸傳到恆又爆沙士，仲話源頭係南方，你先叫我上去？
是咁的，兜兜轉轉達明一派演演唱唱會，好好想想睇。收到銀行短訊，話可以信用卡優先訂票，立即打熱線電話去，點知打通之後個姐姐（按之前去銀行櫃檯的經驗，應該90%以上機會阿嬋黎）死都唔肯俾我訂飛，兜兜轉轉左成個字先發現，我間銀行係工行ICBC，佢收果張卡係建行CCB，大家BBCC一大輪我先知道咩事。大家都有B有C但level差咁遠，好心就唔好send SMS俾我啦等我咁開心。
話時話，除左非必要如我公司用黎出糧，冇乜聽過有人會去工商銀行開戶口或信用卡。分行少、冇優惠、服務唔多掂、睇櫃檯的囡囡質素亦遠不及其他（大）行，仍然想像唔到有幾唔掂的話，可參考下面我一個深圳客知道我地公司仲幫襯緊工行之後的反應：
「唔係卦，你地仲用工行？我地大陸公司一早已經唔用佢地啦，港燦！」
睇完林峰都拎到全年金曲的勁歌金曲，再睇睇人地芬蘭勁歌金曲，簡直一個天堂一個地獄。雖然搞得呢類頒獎禮即使metal始終大路，賽果有點預左，但唔多滿意。Turisas大贏我冇問題，論歌論演佢地有實力，但Album of the Year Insomnium《One for Sorrow》得第二都算，《Stand Up and Fight》居然拎第一？呢隻係今年其中一隻最最最失水準metal碟，Nightwish贏我都冇咁火（利申：我好鍾意佢地新碟《Imaginaerum》）。俾我做評審，Insomnium《One for Sorrow》同Omnium Gatherum《New World Shadows》兩隻冇理由唔贏到開巷。
「話時話，乜撚野係Wankers of the Zoo Crew？」
Milestone 4外國已經賣左一排，如果有港版行貨應該近幾個星期出，不過按照Mo記傳統，就算香港肯出都要／會延期番一頭半個月，到部機規格俾人趕過晒變成二線機先正式推出。作為佢地fans，我都好頂唔順佢地擺明視香港市場如無物的marketing。
半年前買Defy+，跟住個禮拜就出Milestone 3，而出Defy系主要貪三防，點知加納米塗層令全機防水已成2012年智能手機基本規格，即MS4唔防塵都最少防水，立即覺得中左伏，因為好恨QWERTY實體鍵盤。有興趣換但用緊Android 2.X的舊機包括MS4都未升4.0，Google已經話5.0年中出，買完過幾個月又係得個灰字，真係有心換，等年底Milestone 5好過啦，會出港版的話。
除左OS，仲因為Milestone 4基本上等同於一部加厚加keyboard的Razr，而我唔鍾意Razr外型同冇得換電設計，可惜黎緊Motorola講到明會集中Razr一條線學蘋果玩單一旗艦機走天涯，其他副線發展必有影響，作為追隨多年fans，擔心黎緊其他型號會點。對新一代Razr冇乜好感，只好重溫條陳年廣告片懷緬一下舊唔知幾多代的V8之震撼。
Motorola擺到明大中華市場只關心大陸，香港的朋友話孤兒機又好伏機又好，最少咁多年黎電視廣告拍得吸引（「唔係點引到你肯買佢堆伏機呀！」）。新版Razr拍到Mission Impossible已經型，V8個廣告香港有播，sell刀片機超薄特色廣告睇一次已經立即記住部機咩名咩樣非常成功，當年係最薄智能手機亦係其中一部史上最型手機 － iPhone之後，全世界手提電話已經再冇設計這回事，十部電話九部一樣樣，尤其三星出品。就係V8令我成為Motohead，部機真係薄得離奇，老豆買果部仲要係拋光金屬面，睇完廣告更加擔心係咪會剃刀咁利界親手，亦令我自此迷上摺機。
可惜進入智能時代全世界電話都要同iPhone外觀90%一樣分別只得厚薄，已經再冇摺機這回事，當Mo記自己都放棄為中港台市場特別開發之商務摺機系列明（半年前唔係A1680死唔跌價的話，我最後會出此唯一一部非日系Android摺機而唔係Defy+），Razr又要變到真係一塊刀片噉款唔再摺埋，而家除左日本仔，仲有邊間公司肯出Android摺機？
想當年Razr V8同Milestone 1係兩大經典，前者是一大潮機周街都見，後者更具歷史性，當時手機界兩大鉅頭Nokia同Motorola俾iPhone打到沉晒，然後Moto憑佢地第一部Android機Milestone反攻，一部機救番成間公司，如果冇MS，Motorola可能幾年前已經落得Nokia如今一樣下場 － 你可以話Nokia之死係攬住自家OS屍變人唔放唔肯放低面子轉用Android。只係而家Razr同Milestone二合為一，反而唔多知想點，仍會繼續支持Motorola，下次換機亦好大機會出Milestone，原因之一是當年兩大鉅頭之質檢同質素，仍然未有其他廠商如當今大廠蘋果、三星、HTC及得上。我未試過跌壞任何一部Nokia或Motorola電話，包括已經跌過Ｎ次的Defy+。但你敢唔敢跌部iPhone落地？我見過一次，同人去band房，佢跌部iPhone落地毯，係地毯唔係地板，落地隻角立即爆左少少，拎去整好大機會換部翻新機過你，噉又冇左千幾了。
之前一日先講完我對Motorola的情意結，今日就發現佢地同爽報合辦左個抽獎超筍價一舊水賣五十部新中階機XT615。我身邊冇任何一個人鍾意或妥Moto，呢部XT615唔好話抽獎直接送可能都冇乜人會要，但我Motohead的身份同精神始終未有動搖過。
蘋果入侵電話市場前，佢地產品設計同品質保證跟皇者Nokia並駕齊驅，進入Android世代大廠保守學iPhone四四方方一塊磚唔敢突破，只有Motorola仲堅持創新每個系列各有自己無可取替特色：Milestone係最出名實體keyboard趟機系列，Defy防水防塵防刮，Atrix玩高規格再同lapdock合體變雙核手提電腦，Pro tribute Blackberry但外型靚得多，Razr媲美刀片咁薄，仲有仍然是大fans的商務摺機明系列造就第一部Android摺機加唯一一部有關機鬧鍾功能Android機（點解而家智能電話硬件規格點勁點多apps點多用途，反而冇左閂機都會響鬧鐘呢個陳年Nokia都做得到的普通功能？）。一切就是擺明翻版iPhone的三星同玩機海又要玩得悶的HTC冇得比，佢地產品線數量多但分別幾近只得ram rom 螢幕大細唔同。你話Motorola次次出新機都延期甚至最後唔出，升級又永遠冇香港份一回事，我仍然支持，正因欣賞佢地誠意同冒險精神。
但相比下，Moto從來弱項係冇大特點的傳統型智能機，呢方面確唔夠一個星期幾部新機、半個月一部新旗艦機的三星同HTC黎，所以Mo記Android機輸比兩家，除左對美國同中國大陸以外地區愛理不理的營運態度，非主攻最大的傳統派手機市場亦是敗因。XT615規格全無特別，同我用緊部Defy+比等於減左三防再加強硬件同換多個靚仔外殼（對我黎講，靚過九成HTC機），但$99買得到當後備機或者送俾人甚至孝敬老豆老母扮孝子都唔錯，只係未講有冇咁好彩入到圍成為1/50，首要條件係要收集一連十五日爽報頭版已經有難度，仲要活動星期一27/2開始，知道時已經係三月。好在香港有高登。
想問玩開Android的工程師朋友，Android三大神器Tasker、Locale、Llama，各有何優劣，會推薦邊隻？
繼女青年會之後，東華都可以不理，大家想做善事，都係直接親手捐錢捐物資俾本地乞兒同窮人好過。
話說我返工個地區，發生過好多事，試過有人跳樓，試過玄牛收樓放火燒死人，今日到屋宇署去我公司隔籬棟大廈拆板間房。初時諗住會有大事發生，特登帶埋相機，最後乜事都冇，係真係咁和平解決，還是署方強拆行動有效率到乜風聲都冇傳出黎呢。
見到連工廈板間房都要拆，只感現今香港人早應絕望。自己算幸福屋企上到車，但身邊有一半人家住公屋或居屋，可以話冇公屋同居屋，根本冇我地今代人，要不是港英政府照顧，我們「七十後」、「八十後」早就完蛋了。上一代幾十萬一層樓都難上樓，就算未能受惠於政府公屋或居屋政策，要搵個單位租金合理一個人住應付得到亦非無可能，二十年後到當年同阿爸阿媽一齊迫公屋居屋或成家租平單位住一班投身社會，人工同八十年代睇齊即係一樣咁低冇提高過多少（1991-1997即使非專業工種要搵兩三萬個月其實唔難，九七後就算有資歷有學歷，又有多少人能月入二萬甚至萬五以上？），而家一個袖珍單位都要幾百萬，樓價高自然租金同步上升，板間房唔准人住，訓街都要俾差佬先搶財物再趕走，然後政府話唔好意思公屋要留俾新移民，居屋呢過多幾年或者先有機會俾你同幾十萬人爭。如果香港係一間公司，九七之後早就應該執柒左佢啦。
日前一問Android三大神器，落手落腳試用幾日，已自己搵到答案。問點解死都唔用蘋果，除左麻叉煩的iTune，玩過Tasker、Locale、Llama任何一樣就會明，只要編好方程式，個apps就會按時間地點客觀環境照你要求自動操作，幾乎諗得出就做得到，真正將部電話發揮至近100%。好似而家每朝出門口部電話即解飛線，入公司自動連線落router再sync，放工熄Wifi轉番行data，返到屋企唔使郁手部機自己駁完屋企Wifi再飛線，平日好多瑣碎調整同工夫，全部有AI代勞。只是新入門第一個晏晝搞出黎的自動程式。
做得神器之首三者之中Tasker肯定最強，不過代價係系統極詳盡而極複雜，當正用家一定係工程師有programming底唔多解釋，開心版玩過就算。Locale同Llama建基同樣理論，以所處位置主導行動，最大分別Locale收$30（已經比Tasker五十蚊平好多），而Llama主程式加外掛全部免費。Llama大致上做到Tasker多數基本功能，不過介面簡單而且每個設定有晒詳盡說明，跟住佢指引黎寫方程式其實唔難。免費之餘再加贏在完全唔認真：Llama即係草泥馬．按開發者說法，你要先教識隻草泥馬記住常用地點，佢先至會知道去到邊度要點樣幫你處理各種大小事務，連育成成份都撈埋，仲有大量玩野on9用字加爛gag，以為自己玩緊flash game多過用緊個app。而且服務一流，有問題唔明send email，話咁快即覆，令我立即上Market買埋個donation pack捐錢俾佢，一次先十蚊，捐兩次都平過買Locale。不過香港版Market限制，只可以捐一次錢，同最多只捐到0.8英磅，老實我真係唔介意捐多十幾廿蚊港紙俾佢。
既然簡單易用，相反而言難以盡善，唔似Locale用GPS改用電話訊號站，慳電不過誤差範圍相對大得多，開地圖睇定位永遠同正確位置差最少二三十米，好似朝早返工出左門口行成個字，部機先至話我離開左屋企開始做野，定位又浮動身處邊界時會判斷你又出又入，作為一個以位置做控制關鍵之程式都幾麻煩。特殊變數同動作亦唔及Tasker多，想寫到部機好似Juice Defender熄mon之後斷上網每三個字開半分鐘收message，對Tasker黎講係基本動作但Llama未研究到點寫。更大問題係冇得設定等級高低，當全部程序同等就好易有衝突。
全手機自動化玩過確實返唔到轉頭，相信到頭來都會科水五條升級Tasker，但應該要等換機之後，因為感覺上佔用好多資源，部機本身已經唔勁，開住Llama似乎lag過平時，加上部機而家俾我玩到除左超慢，仲乜都做到就係打唔到電話咁戇居（哈我買部iPod Touch唔好），差唔多時間再format一次。一日未換機，應該只會繼續用定時自動開關之Timerrific，唔用地點同環境而單純按時間做簡單動作，例如返工時間開WiFi六點放工轉番data、凌晨自動開飛機mode起身變正常之類，簡單但夠用同實用仲有易用。
因為一切程式按邏輯同環境條件執行，只要練成Tasker神功，要自製widget同marco冇難度，分分鐘裝左Tasker之後唔使再download apps － 你有咁得閒搞咁多野的話。Android點鬥都鬥唔贏蘋果i系產品，是有理由的。
琴日講到劉Sir這個草泥馬fans點樣迷上Android神器之一Llama。估唔到捐左十蚊俾作者deal完Llama之後，再入Android Market已經功德圓滿變成Google Play。Android Market個名順口又有意思logo又靚，而家叫Google Play名已經衰再配個唔知做乜的標誌，只進一步印證Google一直以黎對Android同App Market態度純粹玩玩下。將Market變成Play，是個將所有不同類別數碼商品歸納入同一個平台做整合的商業考量，但App Department依然咁難用咁悶局冇改進過，今日見到的推薦程式，同我第一日上Android Market一模一樣。Google肯俾多少少心機搞好apps發展重整Android Market（同永世唔會叫叮噹另一個柒名一樣，就算已改名Play我都會繼續叫Android Market），Android機陣容早就可以同蘋果拉近大段距離。
不過作為消費者，更關心今次用轉名做藉口搞的大減價，有25款apps（咁零丁）特價$4發售（又咁零丁）。以為會似上次一蚊雞大減價日日唔同，點知日日都係相同廿五款睇黎唔會轉，仲要大半game而我好少拎部電話打機，加上加價300%（「四蚊一個app咁貴！我download APK算！」），吸引力實在遠不及上次。有鑑上次減價好多apps覺得唔夠好冇乜用唔買過左先後悔「一蚊嗟點解唔豪左佢」，今次唔理喇見到乜好似幾好俾左錢先算，四蚊嗟。
雖然機廢加芒細而少玩電話game，有理冇理掃左Shadowgun同Dead Space先，Shadowgun以電話game黎講靚到難以置信，仲要四蚊有齊正傳外傳抵到爛，而且估唔到玩時相當順，係要忍每次有野load都要load起碼半分鐘，同打慣keyboard+mouse的PC game用唔慣analog pad好難瞄準。初時諗住俾多四蚊掃埋N.O.V.A. 2，點知「應用程式與您的 Defy+ 不相容」（即係部機廢啦）。是但啦，Shadowgun應該都有排玩（因為有排load），仲有Dead Space呢。打左舖Shadowgun，立即好羨慕用Note的朋友。
mSecure講到好易用但完全唔知點用，到學識點用之後，先發現原來買左自己都冇用。初時以為係電話保護程式，即係會鎖住部份apps要入密碼先開到，或者進一步保護已login左之account唔見部機都唔怕俾人用到或拎到資料，原來只幫你記實密碼同重要資料，即係一本理論上爆唔開的記事簿。我想搵係唔俾人隨便開app的程式鎖，試左好多個都冇個做得好，有心水請推介，我要畫公仔鎖唔要密碼鎖，搵得到的一係多廣告到爆一係反應慢一係超樣衰一係home掣就解到鎖超級on9。
好耐以前試過SwiftKey，覺得好用但打唔到中文，要幾種輸入法轉黎轉去相當麻煩，見今次有減價再八八，開發組而家先搞投票咨詢加邊種新輸入法，仲要冇人投中文，到多人問先回應「正努力開發中文版」。照俾左四蚊先算，廢事有朝一日佢地終於出左中文版，又要後悔「灰做乜果陣唔豪四蚊俾佢地」。
日曆用開Jorte，但早排去歐洲先發現Google Calender sync相當大問題，同原來唔支持不同時區，最抵死我身在歐洲先出更新修正時區，仲要更新完都解決唔到。就俾$4試試Business Calendar，收費apps果然唔同功能齊全又強勁widget又多夾齊，單可以直接drag & drop改活動日期時間已經方便，雖然我從來只會用PC寫日曆。但頭到來都係用番Jorte，因為介面靚得多兼且做得簡潔清晰，用日曆都係為呢幾樣嗟，仲要有繁體中文。而且一日唔再去旅行，一日都唔會再出事（放心啦，之後應該唔會再有機會架喇）。
上次一蚊雞一隻apps最大遺憾係臨尾一日唔記得左買ADW Launcher，非常唔開心，尤其近排打算format部電話重新黎過，想試試Launcher Pro以外其他launcher。ADW你減多次價錢啦，我肯出比上次高三倍價錢買起你！（．．．）
唔關減價事，不過都同Market有關順便講講。見改左版咪四圍八八睇有乜新野，結果冇，推介程式受歡迎程式來來去去同一堆十年如一日。過癮在「熱門應用程式」入面，其中一款推介apps係「色情小說特集」。Google真係play play下。
最後益益各位同我一樣好唔妥新名新標誌的朋友，記得去 https://play.google.com/store/apps/details?id=com.ipaulpro.market download個Market app，雖然改唔到Play版面，最少可以令你部電話有番Android Market個公仔同捷徑。
如果你用Android機而同我一樣追求實際多於華麗，Launcher Pro係最接近完美之不二之選，只有一個theme但設計正正符合我簡約口味，3個dock共30個捷徑無能敵，個3D apps drawer更加靚到爆。近日部機太慢已立定決心format左，前兩次都用Launcher Pro今次想搞搞新意思，不過慣左LP真係好難轉，Nemus快但功能太少自由度唔夠高，Go太慢，Zeam最似Launcher Pro又仲差一截。與其咁苦惱，不如直頭改用完全唔Android的實驗野，好似一個畫面做晒所有野，睇落好過癮的Slide Screen。好可惜唔知點解逢係好Launcher都唔長命，開發一段時間萬人追捧之後就無疾而終，就如Launcher Pro。我試過而鍾意的Launcher，而家Market都（已經）搵唔到。
或者應該轉用HTC，佢地硬件麻麻但Sense UI超強，Launcher Pro設計同功能其實都係借鏡Sense再精良化而成。但實際上HTC硬件方面點止「麻麻」咁簡單．．．都係繼續Motorola。仍在等待預定4.0甚至5.0的新一代Milestone。
「這首歌，其實是個反映香港獨立音樂界演出籌劃人，所面對殘酷現實的故事之引子。」
萬眾期待的萬能青年旅店訪港，成為近年難得票房開售即火速售罄的獨立演唱會，向隅後的討論，獲主辦單位指出「只看大團，大團偏不會來」之困境。再說故事前，先聽這首歌。
熟悉metal的該不陌生，就是thrash metal名作Anthrax《Caught in a Mosh》，而把這搞成Ska Metal版的「芬蘭Faith No More」Waltari，是當地第一支獲國際知名度的重金屬樂隊，二十年前本土樂隊仍在努力求存時他們已在歐洲打出名堂，成名作之一是《Yeah! Yeah! Die! Die! Death Metal Symphony in Deep C》這死亡金屬樂隊與交響樂團共演協奏曲，此《Caught in a Ska》則來自成團廿五周年紀念專輯。Waltari的前衛實驗態度來自領隊Kartsy Hatakka，在團外同樣活躍，像經典Urban Noir遊戲系列《Max Payne》，首兩集便由他出任音樂總監。
雖然Waltari從未來過，Kartsy Hatakka以他名字命名的最新九十年代另類搖滾solo project，在約一年前2011年中，便曾與另一冒起中的芬蘭搖滾樂隊Moon Cakes到中國巡迴，並以香港作為最後一站。按理Waltari甚至Kartsy也有資格列入名樂隊、「大band」之列，但當晚觀眾人數，卻連台上一半都不到。明顯看到主角面色難看，堂堂芬蘭其中一位最著名音樂人，之前一站是中國一大年度音樂節迷笛，並獲以百計觀眾報以好評，來到人稱國際都會、中國最發達最開放城市香港，捧場的觀眾連上海1%都沒有。
這也不是唯一一場無人看的「大band」演唱會，只是諸多之中其中一例。所以，問題除市場大小，還有其實香港人心目中的「大band」是甚麼？
當每日報紙港聞版大半份俾柒到冇朋友的特首選舉霸佔，冇乜人提到呢宗大陸人黎香港「下訪」新聞，我特別留意仲睇左幾份唔同報紙報導，因為發覺港內同港外傳媒報導，內容並不一致。（我唔會大陸式「ＸＸ門」稱呼呢種事件，太柒）
上回是有個河北女商人上訪方式到香港死控，擒出酒店房窗口企圖跳樓，俾消防員救番。至於下回，香港傳媒皆簡單一句「送院檢驗」作結，而海外中文傳媒同較開放中國大陸傳媒，通通話個女商人「被送入精神病院」，
「為什麼香港政府跟大陸一樣？大陸將上訪者送去精神病院，香港也一樣！」
唔熟行內守則所以唔敢講，同類事件「送院檢驗」之「院」是否精神科，「檢驗」是否只是簡單檢查？還是箇中另有香港已與大陸接軌而未公開之內情？就不得而知了。
冇諗過一個AV blog可以咁好睇。講的是台灣AV達人一劍浣春秋的AV No. 1。話未上過你都唔信啦，唔係日日睇實只間唔中上去望望噉囉（是真的），見今日冇野好寫，近來幾篇文又再次證明AV達人之名絕非浪得虛名令人服到貼地，就借黎攝攝位向大家推薦。（不過，若是男性的話，我諗在場冇邊個未上過AV No.1卦？）
作為AV網影評固然為主，始終某程度上靠廣告商搵食，但這download時代見到封面正就down架啦，仲得鬼閒睇包膠咩。重點反而係探討AV行業之業內報告，好多幕後話題更吸引人，好似呢篇文講個出名女優可以搵到幾多錢，點樣短時間內搵咁多，同點解退完又要出番黎拍，就應該好多人有興趣知。
再者，之前仍於metal前線工作時，已見識到台灣人乜都可以好認真好嚴肅討論之認真態度，作者帶出女優點樣同點解二十個月賺六十萬港紙再一個月賺三十萬，一眾回應圍繞「屬多還是屬少」議題，帶出現今日本同相對台灣經濟及社會情況，相當具學術價值。有時又會講講女性生理問題，就連女人都岩睇，咁有教育意義，AV No. 1都可謂個男女老少咸宜的學術性網站。（．．．）
（話時話，個blog提到呢位偶像級超萌樣女優，對上一套係同另一個女優雙飛五穴齊爆咁激（唔知邊度搵到or邊個有呢，騎騎），再睇埋台灣火車18P女主角萌爆真面目（好似係），然後睇番香港地班女，終日西口西面又除少少衫已經覺得自己賣大包，又好難怪香港男人一早對自己地方女性冇大興趣）
對我黎講個網最美中不足係冇RSS，亦係好少上的原因。自從開始玩Googld Reader，基本上一個網冇RSS就唔會上，但佢唔整RSS可能好事黎，因為老母成日用我部機，而我上網首頁就係Google Reader，老母晨早一開機個芒立即大大隻字
「新發！三穴全損無慈悲！」
就大檸樂了。
有兩樣野細細個已經唔掂，一係綁繩打結，所以入唔到童軍；二係計數睇立體圖／空間圖，所以入唔到理科。難怪想學呢個\metal/手勢捲耳筒電線法，有難度。
第一次，失敗。
第二次，打晒結。
第三次，接近成功，赫然聽到金屬屈曲斷裂聲音。
如果對耳筒會收埋一段時間唔用，如此收藏的確企理，但平日常用的話，每日\metal/一次絕對死得快，尤其轉左用粗電線耳筒好耐，仲紮到咁緊，話咁快打柴。
「只有話，要metal，總是會有代價的。」
一． Bandcamp已成新一代MySpace，即使資訊唔夠多又欠互動，單可以全部碟全部歌全首任聽一點已經無敵。加上座擁大量各類型風格樂隊，大部份都會放自己作品俾人免費聽同download，比大band們照俾你聽全部但只能夠stream更慷慨（雖然，有stream source就自然等同於俾你合法下載）（順帶多提，Bandcamp之stream source只得128K，有要求的朋友仍需付出）。而家想聽新band新碟真係冇幾可需要使錢，尤其是幾近完全寄生Bandcamp之djent。
二． 又一例證說明為何Invisible Orange是最高質素metal blog。Metal Insider議題經常學術，但亦太正經而幾近從來冇人回應。Metal Sucks相反是個《蘋果》化的IO/MI，難怪可以成為全球最受歡迎metal blog，抵佢地發達，但對佢地從來冇乜好感。故仔，擇日再談。
三． 話時話，早排見有心人搞左個Metal Bandcamp，一個Bandcamp版的Encyclopaedia Metallum。但好似停滯不前亦欠缺方向，希望可以持續發展落去。
放左工之後，同Rock爺兩條友旺角美而廉冇位＞連當年皆旺御用食堂且豐都執埋＞唯有去第二食堂太子第尾但牛扒縮晒水加極唔掂＞行路出九龍城＞順便上龍珠重遊。TRHK舊舖仍然一樣，走左之後過多兩手再冇人租。其他舊舖同九年前一樣，新舖接近零，全靠做開幾間頂住，仲要大家都係頹做，好似間小學見到今日之長青二手漫畫舖，變到只做禮拜一晏晝。
十年都冇新長約租客，頂左十幾年班舊租戶走一個個場就少一間舖，龍珠可能終有一日步長城後塵，全個場封晒唔再開。
甚麼是地獄黑仔王呢？Hidden Agenda新開張後，聽聞前幾場gig都唔係晚晚有事，係到劉Sir第一次上，一上就成班差佬燒防跟住上黎搞事大半燈鐘。這不是邪是甚麼。
（between，Eatliz真係好正，睇到我，口桀口桀∼）