今個新年，《天與地》大結局一個理由，已足夠令人乜街都唔出留屋企等夜晚九點鐘開電視。《世紀之戰》之後，第一次有香港電視劇仲要無線製作，令我咁神心期待大結局來臨。之前MV等已劇透左好多，三個人下場其實大概猜到，仍不損追看雅興，係估唔到預告玩《二十世紀少年》式平行宇宙，老土但仲帶得出驚喜令人再加期待，同trailer主題正是年度金曲《年少無知》之「如果命運能選擇」，未試過有預告片可以睇到咁感動。

中間十幾集係失色，但頭尾實在太強，上MyTV或者BT睇第廿八集最後一節，由第31分鐘開始，只要你仍有男人氣慨、只係你仍懂得男人的浪漫，睇過好難冇流淚的衝動。如果係MyTV就好無奈中間一定要睇一段廣告，所以曉BT當然最好啦。

雖則不完美，我都會認同《天與地》係現今香港難得奇作，稱之為神劇亦不為過。只係收視又低，師奶又小，中共又禁，播完一次，好大機會之後永不重播，更加冇預過無線會為佢出碟。今晚2012年第一晚九點鐘《天與地》最後一集，將會係最後一次電視上聽到《年少無知》，大家千萬珍惜。

亦因此，唔識BT的我，好可能為收藏全套《天與地》而去學習點用BT。