話咁快就一年。又係恭祝劉Sir又老一歲的時候了。前年學校放住榜渡過，上年生日係TRHK過再衍生出trhK，今年？冇乜預期過。都係噉啦。

臨到生日又黎忙番，生日前夕奇多野做由朝做到晚，中間只有兩三個鐘可以上網做自己野，唔開心。（．．．）臨放工前十分鐘老細先突然大疊野醒黎，當然唔理啦立即走人算啦！要快手上舖頭，有人「預祝」劉Sir生日嘛！
「其實係我聽晚有飯局，今晚上定黎俾定ｄ禮物你咋！」
剛剛去完泰國渡假一星期的 漢 ，返港帶同四件泰國tee，
「見你咁metal件tee睇落又似metal，五十蚊件平平地咪執俾你囉！特登快手上黎俾左你咋，咁鬼樣衰我都唔想放係屋企！」
都唔係重要，最重要係雞，執多一盒雞上黎大家分，真知劉Sir心意。原來佢學拳學左幾年，由當年打沙包（「劉Sir拎住個枕頭or梳化褥」＝「沙包」）打到而家去比賽，幾勁！唔係街邊路人甲乙互抽比賽，真係去體育館百幾幾百人坐觀眾席圍住睇，出場時全場黑晒射燈射住你行上台加送"Rocky"主題曲全場觀眾歡晒呼先開波果隻比賽，勁呢！不過一round就被KO了，因為對手係青年組業餘泰拳世界冠軍。
「好明顯你間拳館推你出去做炮灰，保留實力。」
「我ｄ學生比賽之後仲係噉打電話俾我，問我死左未！」（係小學生，教書開唔開心真係睇你撞著班咩學生）
因為比賽之後就上機，各位師兄弟同師傅比賽之後成個禮拜搵唔到佢，以為佢輸左比賽失唔到刺激人間蒸發。到前幾日返到香港，今日就上黎預祝劉Sir生日了。
「你幾多喇？」
「81，廿六。」
「我都廿七喇。Sam少仲勁，廿九喇。不過我地三個最癲係佢。」
唔覺唔覺。真係好快。我地都六年了。

「貴人出門招風雨。」
「柒人呢？」
「柒人出門招風球囉！」
自大暑起，天氣日差，前夕一連幾日橫風橫雨加送雷暴冇任何風球雨波，到今日生日正日，明明風平浪靜天文台反而話八號。
「係咪咁玩野呀？」
原先「TRHK仝人大家食大家食」的劉Sir誕大典只好就此收皮。公司都唔係話得閒，雖然連續幾星期幾近日日上網渡辰，就係臨到生日突然間成堆野殺埋身，今日本身都唔係話做得晒野，但個天好地地，食完飯天文台已經話三點半前會掛八號，跟住過唔夠兩個字改為「好快就掛」，兩點半未夠已經走左人了。天都知我唔想做野，叫我早ｄ走。這是上送給我的生日禮物。

走人時，公司右面間織衫廠成班師奶仍然努力地織衫未走，相反左邊間行燈都熄晒，應該話一點鐘已經走左人，預知今日晏晝會打八號返半日就算。
「點解我公司唔係？？？」
因為唔咁早走，真係好大劑。唔係全香港得你一個放工嘛，一八號風球六百萬人一齊趕返屋企，起初諗住
「會唔會有機會去旺角行行街先，反正暫時唔大雨又唔大風？」
乜都收啦連VCD舖都拉閘喇。唯有返屋企啦。
「點返？」
係囉，成百幾人塞爆個巴士站，點返？等左半個幾鐘過左兩架車都未上到。早知行路。就算我由大角咀起行，行到返屋企都唔使九個字，而家齋等車加上車落車都唔止呢個時間，又唔係大風大雨（「真係八號風球？冇點我？」），真係行返屋企舒舒服服有風吹又有得聽歌仲開心啦，好過而家同人迫餐死又浪費時間。
「不過唔係自己戇居左，都唔會遇上意外收穫。」

劉Sir誕大典，因為打風而無疾而終。冇咪冇囉，玩少餐嗟有乜所謂丫日日都有得玩啦，反而冇預過各位朋友／契弟比劉Sir更認真，正日八號波舖都唔開又點會開生日會丫，今日特登上黎冇預過會有咁多人上黎，包括無聊果ｄ同真係幫襯果ｄ，加送Ｎ份禮物加壽包乙個，
「估唔到大家咁有心照顧契哥！多謝晒！」
完全唔知咩事就生日會了。不過會再搞多次。
「雖然叫做搞晒所有野。都會玩多野。神秘嘉賓都未出現！又未大家食大家食！」

劉Sir有咁多檯，單單一日又點會玩得晒？八月十五中秋節就到第二檯了。仍然好忙，但點多野做一樣六點準時走人，除左懶（yeah！），有飯開嘛。九點鐘尖沙咀食飯，六點鐘放工，中間有三個鐘，好無聊喎唔係上舖頭坐到夠鐘嘛？梗係唔會啦咁多時間梗係去行街啦，由大角咀行到旺角行返去太子再出尖沙咀，全程人足進行仲要沐住雨行黎行去，冇辦法啦真係得閒得太犀利喇！雖然成日都噉行黎行去，第一次行到好鬼支力唔想再行，又冇計喎咁多時間要消磨。
「食咁夜，冇計啦。」
今次係同各位學生食，上次食係大家上大排檔好似已經係上年年尾喇總之勁耐，之前仲有次麻辣火鍋超正，再對上應該已經係前年生日，冇辦法啦好難齊人，劉Sir時間難就大家都知，班友上堂一時日頭一時夜晚大家上ｄ堂又唔同，上完堂又要撈part-time（我好似已經冇乜聽過有後生仔會做呢樣野？），唔係今次劉Sir大壽，點請得郁半班同學（七個，已經係半班．．．）加多個阿sir？只係大家又要返工又要返學，要九點先開始食，都要等到十點幾先黎齊。要大角咀行到出黎尖沙咀，因為今餐食有骨氣，傳聞己久「好有特色」之打邊爐。湯底已經幾款你揀，唔係普通邊爐檔「清湯定沙嗲」就算，而特色在有點心叫。叫左個奶皇包，
「喂！試粒！」
立即屈身邊某位同學甲做白老鼠。
「得唔得？」
「好硬，塊皮好似過左期噉。」
為免影響其他檯之心情同舖頭生意，阿姐聽到，立即箭步趨前：
「哥仔，我地ｄ點心唔係即食，係要烚黎食架！」
款唔係好多但十分好食，ｄ料好味之餘又新鮮，除左特色點心（我第一次試過食點心要烚），肥牛超正，仲有劉Sir打邊爐必備美食午餐肉。埋單又唔係貴喎，計番正價每人先百三四，除左多人到爆要預早訂位，第時聚餐可以諗諗。不過當中有商業陰謀，首個煲唔係大大個平底煲而係俾隻鑊你，裝得少湯渣又多，坐低限你食兩個鐘，就係等你因為個煲唔裝得多野而唔會叫得多，雖然我地係唔係都係怒叫。只不過怒叫一回事，而家打邊爐都係入紙等送大家都知啦，亦都知道往往你入左紙之後，通常真係俾你都只會係一（少）部份，有骨氣同樣冇骨氣，入左三張紙，只得第一張紙到，另外兩張無疾而終。去到最後半個鐘，
「last order，仲有冇野要加？」
當然有啦！大把！大家立即怒剔，乜叉都要三三五五七七碟，收飛個哥仔睇到，話：
「你地得番幾個字咋喎！夠鐘時有食剩的話，我地每兩計十八蚊！」
「乜唔係話夠鐘只係唔叫得野食，但仲可以任坐咩？」
「係任你坐，不過坐之前同你地埋左單先！」
咩呀怕你呀！（的確係怕，我地立即將ｄ三三五五七七改番晒做一一一一一一）睇番之前入三張紙先俾得半張紙送擔心ｄ乜丫黎得幾多野丫，點知，張張紙都唔俾咁多甚至收左之後當冇收過側側膊，但去到尾二一個字，last order點果ｄ真係點左幾多俾足幾多源源不絕地送上，兩個字要食幾碟肥件幾籃菜大量丸加公仔麵烏冬粉絲，仲要剛剛掟晒ｄ野落個煲度又送幾碟上檯，擺明就係屈我地錢嗟！所以我地後來都係樣衰衰地一碟一碟地退貨算，不過退左一半都仲有成檯野，大家生死時速怒食。樂趣十足。

冇見咁耐，但各位同學好似讀極都未畢業，個degree course要到年底先讀完，所以之前讀完hi-dip就出黎做野果班夠晒醒，而家唔係做銀行就係晉身金融業，搵錢搵得多過劉Sir啦，即係見到班學生噉青出於藍，都唔知係笑定係灰。睇睇林Sir都向Doctor進軍了，目標四十歲前做博士。阿劉Sir都要爭爭氣喇。

九點三入場，「食兩個鐘」食到十二點咁滯先走，即係要趕巴士返屋企都仲趕得切，不過要送埋人過旺角搭車先走得，點幾先返到屋企又係兩三點先訓得覺。
「姐姐！成日蒲，下次玩到咁夜，醒水ｄ早ｄ睇定路返屋企啦！」
好玩。請搵位同學快ｄ生日大家再食。

琴晚玩到咁夜，居然仲有心機返黎／返到公司，近日好努力工作，忙碌一段時間所有野清晒。可能個天見我咁勤力，特登獎我：
「今日老細同經理返大陸夜晚先返香港喎知唔知呀？」
點會唔知丫！你叫我做野、問我做ｄ野點做法賣緊乜產品我答唔到你，但幾時公司冇皇管有得頹，我收風收得最快。昨日勤力付出，成今天頹廢的果，都有野做近來始終較忙，十一點都趕起晒ｄ野就可以開始玩了。好多節目又好鬼無聊。上個禮拜五打風，會計靚女準備左蛋糕乙個同禮物一份，結果蛋糕唔過得夜自己食晒，禮物就未拆，反正今日冇野做，阿靚女又今日整左個返黎，大把時間，就一次過先食禮物再拆蛋糕啦。

食完蛋糕拆完禮物做完野上上網，就到食飯時間了，但人地做野時我食飯，人地食飯時我已經落左街掃貨。上返黎再訓番大半個鐘，確係幾得閒係無聊到搞掂埋銀行同上網ｄ瑣碎事務，其實都仲有野做，就係而家搞緊產品開發要谷2008聖誕節，所謂研發部主管就係我。
「聖誕節？我只識一樣野咋喎！咪就係有假放囉！」
我都唔知點解會搵我做，我美術設計都肥佬又冇聖誕氣氛又懶結果下年的聖誕產品就同我今日一樣，乜叉都冇。跟住係剝花生。幾無聊。仲有野玩架，琴晚打邊爐之後收集番各位同學的MSN，晏晝同契妹係度MSN打井。平時MSN我打到字就算，今日同佢玩研究一下，原來都幾多功能，例如噉樣小畫家打井法。真過癮。玩到悶就訓覺了，四點幾訓到五點幾個幾鐘起身，就放工了。
「呢種生活真係舒服。老細不如你地唔好落返黎香港啦！我驚聽日起我會好唔慣！」

「劉Sir(再)生日會 暨 八號風球一星期紀念晚會，正式開始！」
冇錯，噉都有得搞一餐，夠晒無聊。
「又話有神秘嘉賓？係邊個？」
咪就係契妹同會計靚女兩美。當然上左黎好快就走左啦，太唔正常了TRHK這個地方同這班人。各位朋友應當先自行反省，特別是劉Sir。
「上黎有乜搞？」
其實係乜都冇。就係食垃圾。同埋．．．鋤柒。我地不嬲都係咁即興架啦。同埋，咁戇居架啦。

係時候重溫各方捐獻：

玩完。

「噉就玩完？寫咁少？」

係呀。今年生日就此玩完。

「你冇睇到果日我著住件咩tee咩？」