試機為名行街為實的E-PL2非專業測試




2011新年前,1月26會上機過德國兩個禮拜避年,正值此時屋企用左幾年部Panasonic頻打柴(Pan記真係超廢影一張相除了雜訊還是雜訊,我永世唔會再用呢個牌子相機),出發一星期前決定買Olympus新出部E-PL2。聽聞銷路非常唔錯,好多人特別多女想買,因為marketing做得好廣告日賣夜賣,唔係問題,但當廣告內容係完全唔做做乜冇對白冇故事只搵班打扮到睇落好in不過正常人平時屋企一定唔會噉著唔會噉set頭唔會噉化妝的model仔女屋入面無無聊聊廿幾秒完全同影相無關,劉Sir覺得柒,對其他人尤其女黎講就係「潮到爆」。都會買,唔係因為型or潮(or柒),係用傻瓜機太耐想迫自己試新野,見網上評價唔錯,同未玩過呢類(懶係)要自己手動相機,襯今次出國買黎試試。

上面張相,係部Panasonic收檔前臨尾幾張之一,幫部新機影相做為收皮作,是為送舊迎新也。

星期一買機,不過病左成個禮拜(加懶)只刨說明書,到禮拜六日先正式試機。因為劉Sir從來唔識影相,影極都係自動mode同P mode兩個部機幫你較好晒野模式,乜野光圈快門乜乜物物全部唔識,所謂試機,只係等佢有個藉口躝街only,其實同影相or測試無關。




室內光管P mode無修正,近自然色,好似有少少偏白,不過我OK,同唔似細機唔開閃燈就聚唔到焦,已經好夠。




嫌太白,部機有個藝術濾鏡模式,鍾意相片鮮色所以個濃化色調效果我超鍾意,係有少少誇同爆紅。




開埋閃光,平衡番,雖然仍然偏紅,勉強接受得到。




上機前個星期六係短週加上病好,決定去九龍城幫部機開光。屋企果頭影極都係九龍城架喇鬼叫蒲呢頭大又最多舊區景影。特登早起身去九龍城廣場,10:59到KFC買個早餐食,同試機。坐窗口位隨便P mode一張。其實唔太明自動mode同P mode有乜分別,兩者都係部機即場幫你設定所謂最佳光圈快門,但感覺上P mode聚焦同色均表現比自動mode出色,較接近自己要求。



有個功能以前傻瓜機冇得玩,就係雙重曝光兩張相合成一張,不過冇腳架有難度,結果是失敗的。




隨便撻Q一影。其實諗過落公園影花花草草,不過唔識手動較野又唔知光圈快門點先影得靚...算。




買機時係打算第時搞function睇show時可以影到台上,覺得部機細致位聚焦得但zoom未夠。是個迫你買新鏡的局。




成朝經過間油漆舖幾次,隻貓都係訓覺,仲要次次行過都係訓唔同位置唔同箱。舖入面其實幾暗,不過企門口,同隻貓隔兩三個人位,影出黎都夠清楚冇甩焦。




仲有狗。間寵物店未開門,隔住玻璃同入面三隻狗影相。呢張係用自動mode影,仲有張P mode...




呢張P mode影。可能冇乜分別。我就覺得用P mode影光鮮清楚過自動mode。




街景。因為陰天冇陽光,出街影乜都好蒼白。冇較過任何setting拎起手自動mode就影,聚焦好似唔多好。




zoom近再試影。




這是重點。




出得九龍城,又點可以唔黎龍珠。依舊冇乜變過。




冇陽光搞到龍珠外牆屍妝咁白,等我用filter幫佢加番色先。雖有點過濃,但唔差。




部機仲有個懷舊相片粗粒子效果。有點太粗。點解冇得整啡黃色?會更似舊相。




龍珠上頂樓梯間告示牌,自動mode




龍珠上頂樓梯間告示牌,濃化色調效果




自從TRHK搬左出旺角,龍珠302差唔多冇人租過。吉左七年都有。auto mode影完...




用濃化色調效果加番一點生氣。




龍珠落樓街角間堅駿,讀緊書已經日日放學落黎蒲(架巴士龍珠樓下落車,唔上龍珠就係黎打機,整定啦擺明),當年龍珠人士經常落黎煲街霸拳王鼓機,在這網吧當道傳統機舖沒落之夕陽期,好難得捱左十幾年仲未執。雖然一早要間左四分一間租俾人做報紙檔維維皮先頂得住。




由細到大好鍾意住九龍城,除左舊區商戶夠密集非常方便衣食住行選擇多之餘消費指數又低加濃厚人情味,啟德機場年代全區唔可以起高樓,個天係好大好闊好清的,仲好懷念以前屋企窗口可以望到飛機飛過,雖則夜晚升降真係好Q嘈。住左廿幾年之後,搬完機場舊樓收購變晒高樓大廈,對左好多年,仍然係非常唔慣十分眼冤。




濃化色調效果




懷舊相片粗粒子效果




懷舊相片粗粒子效果仲可以加相框。我鍾意個框整到咁殘舊。不過其他filter都係用同一款框。就好古怪了。




最好玩莫過於戲劇性色調效果。即係爆黑。影街景落呢個filter,立即風雲變色。




雷電魔法究極奧義.劈你老母

(Photoshop技術有限,請各位自己用藍筆幫個芒加番幾條閃電)




九龍城玩完,下一站當然係旺角。沿住太子道行出皆旺,樓下間價真棧多人排隊到黐線,睇多貨到堆晒出門口入面都唔夠位行生意一定好好,班人仲要係幾大袋幾大籃噉拎走,係咪自由行辦年貨辦到黎旺角?




自從TRHK收檔,半再上過黎皆旺,噉就半年,就襯今日。新租戶睇黎撈得唔錯,貨多佈局正仲要裝修到超靚。




P mode影完黎多張P mode閃,閃到入面老細都走出黎睇乜事,到我肴底閃。加閃燈只是補番一點白,一路影落,發覺平時影普通相唔落閃燈都冇問題。




皆旺商場本來行過你都唔知佢存在,門口超廢樓下個報紙檔仲大同顯眼過正門,但我地一走,立即大裝修而家正門側門同外牆都執到超靚。明玩我地嗟。




皆旺商場外景,濃化色調效果




皆旺商場外景,懷舊相片粗粒子效果加框




行完旺角再走到深水步黃金,然後折返太子,行鴨寮街時,見到呢隻雪橇狗。




屋企果頭有幾戶人養雪撬狗所以成日見,次次落到街好激勁扯主人跑勁周圍撲,呢隻主人同佢梳毛佢坐定定唔周圍走,有人經過會八卦起身埋去聞人地,摸佢搞佢又唔會撲你或者還拖非常之乖,同我屋企果邊幾隻完全相反。




最唔同係見過之雪撬狗通通好似戴左大眼仔con噉,顏色眼瞳孔放大有點煞氣。佢對眼係普通狗仔接近見唔到眼白中全黑色,望落已經夠晒友善了。所以非常得人鍾意。




雖則非常乖非常馴任搞唔嬲,一想影佢相,非常之醒,見你舉機立即擰轉頭或者走開避開你,要主人出埋手夾硬黎,先好唔情願地俾我影到張正面。行為舉止加神態,同我隻Marco好似。所以同佢玩左好耐,十分感慨。唉。




黎到太子當然要到(其實冇metal的)Metal Bar朝聖。每次大陸坐直通巴返香港,就係佢對面落車。




先四點幾時間尚早仲未開門,等我用濃化色調幫佢整番個燈光效果。而家先知Metal同Bar中間原來有隻酒杯。




田生開始侵略旺角了




行過太平道果頭,好多間獸醫,有間入面隻狗啤到實啤左成分鐘都唔郁,咪幫佢影番張相囉。




仲有隻貓曬住太陽訓覺添。真梳乎。




油麻地戲院近學校果邊個出口,成日見到呢隻奇狗,無論日頭定夜晚,次次見親佢,一定係同一個屋村出口,同一個交叉手訓低姿勢,次次見到都係。




「我不是奇狗,我只是一條好撚慘的流浪狗,嗚嗚嗚嗚」




油麻地戲院門口試下手動曝光。1/2s。




油麻地戲院門口試下手動曝光。1/3s。




油麻地戲院門口試下手動曝光。1s。




油麻地戲院門口試下手動曝光。3s。已經乜人都睇唔到。




夜晚去廟街,再有狗仔擔任試機model。




運動情景模式,聚焦明顯集中人物中心。




柔焦效果濾鏡,影囡囡會實際得多。




一秒三張連環快拍.第1張




一秒三張連環快拍.第2張




一秒三張連環快拍.第3張




做model做到支力,天氣凍,著番件衫戴番頂帽影多張收工。




自動mode影檯面




死物加柔焦效果。我就始終唔太頂得順沙龍野。




廟街一景,加左戲劇性色調效果,有點黑幫電影feel。




九龍城深水土步太子旺角走左成日,終於買齊野,將部E-PL2砌成Full Armor mode。行咁多地方主要為買兩樣野。部機其中一個大問題係鏡頭蓋好鬆,出街影相自然掛住頸周圍行、影完一度閂番蓋去第二個地點開蓋再影,但玩左半日,個蓋已經唔知幾時甩鬼左,但行足咁多間,一係話冇咁細尺寸一係話要原廠配,總之冇或者勁貴。

另一係想買皮套,細機始終唔鍾意用袋,而且買機送個相機袋尺寸只是剛剛好,要一點暴力先至塞得到部機入去果真平野冇好,所以一直想搵個皮套,而且真係配唔番鏡頭蓋用皮套點都比用袋防塵防刮花。照計部機出左都一段時間點解會咁難搵,深水步一直剷到返去旺角先得一間話有,仲要標三百八咁搵笨?最後去到星際城市,一次過搞掂晒,廿蚊配到個新蓋,手工差少少啤大左,反而仲好因為本來個蓋鬆過頭,而家要加一點夾硬先裝得入變得仲實淨,而且加多個窿仔俾你綁繩,原廠貨都冇呀。個皮套同機一樣有晒唔同色你襯,買完仲幫你搞埋唔使自己落手,服務一流星期六買完星期日都特登出去幫襯多次買埋個腳架第時影相同拍片用。其實,我一開始已經打算先行星際城市,但最後變成百萬行尾站,行多左幾個鐘路。地獄黑仔王,唔係浪得虛名的。以後買親相機野,黎星際城市就夠。


部機夾夾埋埋,總共使左:

聽聞大舖好似百老匯賣$4950-$4999,基本上包晒上面所有配件加有其他立雜小便宜野送,但我而家個價錢有晒所有需要主件配件,再多一年保養,我覺得抵過去大舖買。玩左兩日大致上識用晒所有需要操作同功能,不過仲有幾個模式同filter未玩,又想學好光圈快門等玩手動,去完德國返黎再慢慢認真煲下部機先。