Sir的一天 (Etonian Version)



5/5/2005 THU

今日係最後一日"annual break",係呢個禮拜最後一日全日駐守日校,連續三日留係度受盡(高層的)煎熬,聽日會再戰播碟生涯。今日又撞正今個學期最後一日阿Sir萬歲兼會考英文B卷前一日,以此為記。


09:00
呢個鐘數,劉Sir仲訓緊覺。

09:15
呢個鐘數,劉Sir先發現全部(三個)鬧鐘兼部手提電話比佢整熄晒。所以點解老母成日鬧佢:
「俾幾多個鬧鐘你都冇用啦!鬧極唔醒!」

09:30
呢個鐘數,劉Sir終於識死,起身喇...

10:15
...九個字之後終於返到,阿sir已經同班友唔知上左幾耐堂,仲有唔知幾多個人未蒲頭。但理論上已經遲大到的劉Sir依然好少理,入邊班友仔同阿sir就更少理,因為本身今日係唔使上堂,不過係阿sir見班人未學得掂又肯學,就免費加送一堂試前精讀比各位同學,為免各位同學再放飛機,阿sir特別事先聲明今堂豪包全場午膳,好多本身聽到要上堂已經冇晒心機的小朋友一聽到有免費pizza食立即醒晒:
「嘩!咁好死!朝早記得打電話叫我起身,唔使咁早十一點幾先叫醒我等我返得切黎食pizza得架喇!」

11:30
「阿sir,叫得架喇喎!叫架喇!」
開始左測驗冇耐,已經急急腳提阿sir要叫pizza。負責提果個當然係劉Sir啦,即係班學生係衰但邊個夠佢咁厚面皮丫班友,有得食喎仲唔立即扮晒野咩。為左今日呢宗盛事,特別搜括左屋企張Pizza Box VIP卡可以買一送一,話咁快就點晒菜揀好晒野打埋電話,點知打到去先發現,間野原來係開三點...

11:40
「大劑!點算?」(冇錯除左食之外劉Sir咩都唔識)
「點算?我幫你叫Pizza Hut咪得囉!拎部電腦同電話黎啦!」
成村友衝出黎搶佢部機上Pizza Hut個網。
「喂!唔係測驗咩?三個字咋喎!」
「你理得我地丫!咁多嗲,噉你食唔食先?」
「食食食食食食!快d叫快d叫!」
(冇錯除左食之外劉Sir咩都唔識)

11:50
理論上十二點半先落堂,但十二點未夠成村人已經發晒癲反轉ing間學校。
「喂!阿sir!班學生作晒反唔上堂喎!」
「等我鬧下佢地啦!喂你班友仔!測埋個驗先好走出去作反呀我要交分比總校架乖乖測埋個驗先玩啦!」

當堂冇野好講,但有野講都懶講喇,反正今日本身都唔係正式課堂,劉Sir呢d打雜咁懶煩少樣得少樣,反正今日老細都冇蒲頭,劉Sir呢d假楊修當然要自作聰明地推斷成係老細默許比班靚仔靚妹反轉間學校噉佢就可以大安旨意地假行聖旨咩都唔理等開飯先算。但劉Sir想頹都冇得頹,因為話咁快已經比發緊癲冇野做搵野玩班學生拉左去影相:



是日大老細阿林Sir又名Paul Lam。
「全靠有劉Sir係度比班學生玩,班友上堂先會唔搞住我,
有劉Sir係度真係飲得杯落!」



「嬌姐,一齊yeah!Yeah~~~」
「...」

對住呢條傻仔,學校衛生部主管嬌姐已經睇化晒。



想知平日劉Sir點樣比佢d高層欺凌,睇幅相就知。連同人地影張相都要夾硬塞人地入度門後面仲強迫人地
「笑住影!唔准喊!」
連影張相都搞到噉款,平時可以比人恰得幾慘丫你話阿劉Sir。



呢張相唔係叫大家睇日校班代表Poli姐姐,係睇側邊笑淫淫留晒口水之劉Sir。



呢個係不得不提的死靚妹阿溶溶,朝朝早一見到劉Sir就
「劉義∼∼∼」
噉衝埋黎唔玩夠唔肯上堂。



「我要影多張!」
影果陣時兩個人,影完之後後面多左隻面目猙獰之冤鬼Poli,呢張肯定係靈異照片!



「再影多張!Carrie過黎一齊影!」
「影多張都得!你要咀啖我喎!」

睇下豔福不淺的劉Sir幾開心!坐側邊的Carrie(終於)發現劉Sir份人原來係噉,
當堂彈開成尺遠之後見到劉Sir就避。



Ricky&Purple伉儷plus Alex乙件。噢,都唔知有咩好講忝。
「...讀書啦!成日顧住玩!」



華姐&英姑,讀書人黎架!亦即係成日比劉Sir玩果d人囉!



Apple妹妹,乖女一名,乖到劉Sir都唔敢玩。都係搵番d衰仔玩下先。



影完呢張相之後,咱們偉大的班會主席隔左好長時間唔肯上鏡,
冇計啦,影影下相都可以比阿錕哥打,呂財政William已經笑到開唔到眼,影完之後阿張偉兄直頭笑到碌地,
搞到阿主席匿埋入廁所(又稱「主席成日去果樹」or「佢主場」)唔肯出黎見人。


12:20
班友顧住影相,反而唔記得最緊要之叫pizza,搞到連林Sir都大嗌
「喂!搞咁耐!有得食未呀!」
搞左差唔多半個鐘終於打完電話搞掂,
「四個字之後落去拎!」
未夠鐘開飯,老細又唔返,又係反轉學校時間。



冇野玩,連塊board都玩埋。
「埋位影相呀Paul Lam...唔係係Pizza Lam!」



「Yeah~~~」
大伙拍合照時得以整鬼劉Sir,心情愉快。



玩完課室都仲未夠,仲搶埋個reception黎影班相,
「學校個網要用呢張相做首頁架!」



影完班相當然到大老細林Sir埋位,睇下入花叢的佢幾咁陶醉!劉Sir就無福消受唯有自己柄埋一二邊。





又要請食飯又要比學生玩,呢個阿sir真係唔易做。


12:35
夠鐘落樓拎pizza,d高層負責點人做野,男丁負責落去Pizza Hut拎野,婢女負責執檯準備,
「喂!噉你呢?」
劉Sir就當然係坐享其成果個連點人做野都懶,阿姐之職責咪就係負責d野食到果陣時叫佢起身食野囉。既然白馬可以非馬,阿sir自然非丁!但見眾女同學執檯執得咁落力,劉Sir特地準備左d飯前娛樂比各位同學:今個學期有Account同Business兩科,Account即係今日上堂果科個個讀得開開心心,Business調番轉個個讀到喊苦喊忽,set完檯出黎睇到個人功課個成績,再睇睇d功課改到一塌糊塗無不爆粗,直頭打電話比阿sir理論講到阿sir cut線。咦?學校不嬲唔會派番功課比學生,成績都唔會立亂比學生睇,班學生點解會知道分數,仲可以睇到份功課改成點,甚至有阿sir電話可以打去小佢?係囉,點解呢?

12:45
玩完電話仲未有飯開,點解?原來Pizza Hut果邊「太多客」d餅焗極都焗唔晒唯有四個字之後又四個字。未有野食又冇野玩,班靚妹唯有繼續發癲。



...學校個網頁唔用頭先張班相,都要用呢張癲妹照啦。


玩到冇野好玩,老細又未返,班人見到老細檯面有舊野幾過癮,就拎左黎玩:


果舊野咩黎?原來係...



「我地係癲狂雙妹嘜!」


13:10
四個字又四個字,dpizza終於到左喇!因為林Sir豪包&全場冇人會同佢客氣,今餐異常豐富:

「豐富」當然係指對班學生黎講,對於一餐趙一個pizza的劉Sir來說,除非班友唔食留晒比佢啦如果唔係一定唔夠佢飽肚,睇下佢老豆因為佢專登申請左張Pizza Box買一送一VIP卡就知啦。但未使劉Sir出手,一開始成班友仔已經狼吞虎嚥起勢怒搶,林Sir剛剛去完洗手間出番黎想搵d野食,一睇:



「嘩眨下眼就冇晒你班友仔使唔使呀!我俾錢反而冇得食!」


13:40
食飽飽,真舒服。食完飯有咩好做?影番d合照先:


全男班


全女班


「阿sir都搞!」

正正經經影好似冇乜癮,所以懶係藝術家地拍左輯寫真同大家分享:


女人味



男人魅



男人魅 feat.sir



男人魅扮到好藝術之朦郁鬆版


14:XX
玩飽食醉不知時日過,玩到唔記得幾點,林Sir都有野做要走人,噉就散場。
「林Sir!下次唱K!」
林Sir當堂走夾唔抖。真係散水喇,返工的返工返屋企的返屋企躝街的去躝街,走淨果三隻野,
「咦?你地留係度做乜?」
「聽日會考英文做past paper呀!一早講左今日做mock架啦!」

係喎!真係玩&食到唔知咩事忝!點睇都唔似聽日要會考呀呵!即係要做監考官劉Sir當然何樂而不為做咪做囉!佢呢d好嘆架印左幾份卷掟比班友之後插部錄音機播餅帶再大喝一聲
「做!」
之後就可以戴住耳筒(「餅帶嘈丫嘛!唔聽歌咪嘈住我做野囉!」)開部電腦姿姿悠悠地打野,即係噉:


好似好勤力,但人人都知呢個只係假像,開始左唔夠一分鐘已經回復真身,
以下呢個先至係劉Sir真面目(各位同學/同事日日都見不知多少千百次):


正所謂頹師出劣徒,監考果個都噉,考果班友更加唔使講,考左冇耐已經死晒咁滯,有件仲唔知走左去邊忝:


你有你考我有我頹,大家都相安無事。突然間,窗口有塊面飄過,有d面善:
「咦?好熟面口喎呢位仁兄!...你咪老細???」
當堂叫晒班友起身(扮)落力地考試,自己都立即除低耳筒坐得四四正正(扮)做野:

「呢條衰仔噉就似番d樣!」
老細之後(好似)好滿意地走左去。梗係滿意啦,佢都見唔到劉Sir當其時其實係...


15:30
幾經辛苦考完份listening就到做paper 2,唔好話班友,劉Sir都已經死噉款。難得有d人仲鬼死咁精神仲搶埋佢部電腦去玩,呢,上星期考完syllabus a而家係度也文也武又死唔願走係度煩住人地考試果d死靚妹囉:

張相特別搵美術師執一執d色調再加入沙龍效果架。大家係度(扮)考試之際死靚妹係度通場飛又影呢個又搞果個又霸劉Sir部機玩接龍,最後玩到冇野好玩唯有玩白板,臨走前送左隻火柴貓比佢:


17:30
做左不知多少時日,終於都完場喇!連出邊班友都話:
「真係好漫長!」
但做得耐/慢唔緊要反正佢都係打野,要改先至夠死,從無改CE卷經驗之劉Sir淨係諗點樣亂俾分都諗爆頭,改卷改到佢丫真係。好在做埋呢份班友就走人,如果做多班的話劉Sir真係唔肯改卷當全部肥佬算,paper 1真係好鬼難改架!(但當然啦,如果有番d野食奉獻一下,自然有得傾傾,但似乎都要等下年...)

18:00
「放工!!!!!!」
以前逢星期三、而家逢星期四,每到呢個鐘數劉Sir都會發癲狂嗌呢兩個字,但今日全校一到五十九分已經靜晒迎接佢呢野大叫,等極都冇聲。梗係啦,劉Sir一早已經諗住留足成晚,等d學生夜晚都可以返黎補習。幾偉大。但累死晒出邊逢星期三(而家係星期四)開盤賭劉Sir幾點大嗌果班:
「搞錯!條友今晚居然唔發癲!遲一分鐘嗌都好丫點知黎野唔嗌通殺!爆大冷喇今舖!蝕鬼死!」

18:30
未有學生返,夜校部又未上堂,就落街躝一躝執定文具為「五月Petty Cash之皇」舖路加買埋晚餐 - 即係篤魚蛋。阿姐成日都話:
「篤成十五蚊魚蛋,話咁快食完又唔飽,好心你就買個吉野家啦,十三蚊成個飯仲有野飲又平又食得飽!」
自從發現左吉野家之後,而家好似唔食吉野家就係罪過。即係如果唔係過左下午茶時間,劉Sir呢d咁求祈實係吉野家搞掂架!

19:00
夜校部英文班連開兩間課堂上堂,劉Sir都唔示弱立即霸埋淨番果間,自己做野之餘仲等夜晚用黎考mock。但其實霸黎冇乜用,因為夜校d人要搵房做拉客promote見間房有人(即係佢)都照係噉入仲越入越多多到好似開墟噉,劉Sir的存在反而相當尷尬。冇錯,係日校部已經冇乜地位之劉Sir,到左夜晚當然更加唔夠夜校部d人惡。唯有扮睇唔到,屈係個角落度聽歌打野算...

20:30
晏晝要返工做唔到past paper的Poli姐姐a.k.a.「班代表」終於出現喇!
「快手啦快d做!我要放工!放工!!!!!!」
冇錯,我要放工,支力。但結果都吹左好耐水先開始做卷。對住劉Sir做,相信呢位同學從未試過考試考得如此開心過。

22:15
計埋吹下水無聊下,呢個鐘數走得,算唔錯架喇。總括黎講,各位同學,今日經過劉Sir的操練,明後日之會考,坐F望U。但肥左唔好搵我,劉Sir要訓覺,支力。


有得玩有得食,最緊要係有得頹,這就是劉sir的一天。完美的一天。