段記



18.5/6/2005

一日之間,對我黎講最最重要、最放唔低,亦係最遺憾之兩件事,不住纏擾。


結束播碟生涯之後,第二日起各位朋友(我唔會視為舊同事)已經致電問候、約定黎緊點樣出黎一聚,到今日,終於到呢位朋友,呢位兄弟。未放工已經幾個電話,放左工一直傾,傾成差唔多個半鐘,傾到電話都冇電,返到屋企ICQ繼續傾。其實情況同以前一樣,又同我一樣,只不過而家調轉左,我係勸果個,而唔係被勸果個。個情況同我個角色,我自己諗番都覺得幾滑稽,自己都執迷不悟自甘墮落、做唔到甚至仲做緊啦,仲點樣去勸人唔好噉樣做呢?仲點樣去叫人「放低」呢?唉...所以我都只識講句
「算啦。唔好學我。」
你問我的話,我依然係咁鍾意佢。佢係有好多不是、對我做左好多野,傷害得我同我身邊d人好多好深,但在我眼中佢仍然係咁/最美好,我仍然係唔識得憎、唔識得恨。你地點睇呢個人係你地既事,旁觀者清地睇到乜野,亦唔需要再講咁多。你講幾多,我都只識講句
「算啦。唔好學我。」


返到屋企,就等食飯。本身係約左今晚,但一拖再拖,結果拖到凌晨先有得食。冇辦法啦,幾經波折,戲劇性地折左個幾兩個月,呢批"The Legendary '80s"終於運到,成十幾大箱野送到去屋企樓下 - 冇錯,個倉就係自己屋企,你唔係諗住TRHK咁「大」間舖放得晒,又或者有錢出邊另外租個地方做倉嘛?為免管理員同街坊投訴,朋友(我唔會視為老細)執足成日先將十幾個大箱搬晒上樓,所以成十二點幾一點先出到黎食飯。好似冇乜邊次大家坐低傾係有好野、係會開心(有,搞六翼初頭被「好多人都話支持呀!」之假象蒙蔽果時)。可能你會問,
「做乜突然間入咁多'80 heavy metal野?」
因為「入到」,同埋一直都好多人問,再加埋呢d貨本地除左TRHK冇人會入,所以入一大批俾各位樂迷發掘。當然啦,當初問果批係咪真係會買呢我唔知,就正如當初話搞六翼陷世界話贊成話支持,但真係搞得成果時全部人立即收晒皮一樣。所以,黎緊呢,有d野都係算喇,咁好人咁有理想咁有大志咁有原則做咩呢,入幾多野一樣冇人會買,好多話聽progressive,THRESHOLD新碟同DVD居然到而家都無人問津;聽melodic death,但冇人會買DARK TRANQUILLITY同NORTHER新碟;聽death,但冇人會買KRISIUN、IMPALDED新碟;聽doom,連入幾水經典名作,差唔多冇人買過,好似聽doom果班真係doomed;black就更加唔使講喇,要多麼indie有多麼indie,數量更加唔使講,但結果幾十甚至百幾幾百隊band一隊都賣唔到,因為個個都只係要大label貨色,又或者唔係black果dblack。所以,使乜搞咁多野呢,大家開心咪算囉,有陣時都係跟番個市場就算,噉大家係要邊d,係要「潮」,咪潮果d囉,反正好indie的大家到頭來都唔係/唔肯要indie野,噉我地咪就番大家囉,膚淺d好。但當然,冇人會噉覺得,我亦唔會講咁多野,因為顧客永遠是對的,即使要發晒老脾爆晒粗去證明自己「對」,詳見各大本地網上音樂論壇。我懶理喇。我只會繼續努力下去。

係好辛苦。當做一大輪野使左咁多錢依然冇變,更覺戇居。當初要做兩份工,除左因為時間,仲因為錢。你唔會相信我d錢係用係邊。所以而家因為某d原因放棄左其中一份,人工少左好多,對我(地)黎講可以係好大件事。我已經諗緊係咪要出去搵多份part-time,甚至真係搵番份自己萬分唔願意之教書,寧願再犧牲自己已經好缺乏之時間去搵番多d錢。當然,你唔會理同關心呢d野,就正如半年前一樣,其實冇變過,就算我將半年前d野重新抄一次,依然全中。你可以好似某d人一樣,(盲目地)話我自視過高。但先客觀地睇番我、你同整體,係唔係先。

而家噉樣,真係拎埋條命出黎搏。係真係好搏。又或者,其實唔使做咁多野、唔使對人咁好,因為事實證明報之以德唔代表人地都會以德相報,同埋,配合番大圍,膚淺d好。